Pas përfundimit të rinumërimit të votave në Komunën e Malishevës, Prokuroria Themelore në Gjakovë sot ka ndërmarrë një aksion të gjerë hetimor, lidhur me dyshimet për manipulim të procesit zgjedhor.

Në një konferencë për media, Kryeprokurori i Prokurorisë Themelore në Gjakovë, Enis Gashi, ka bërë të ditur se pas rinumërimit është lëshuar autorizim për Policinë e Kosovës për ndërmarrjen e veprimeve konkrete hetimore me qëllim të grumbullimit të provave.

“Pas përfundimit të rinumërimit të votave në Malishevë, Prokuroria Themelore në Gjakovë ka lëshuar autorizim për Policinë e Kosovës për të ndërmarrë veprime konkrete në drejtim të grumbullimit të provave”, ka deklaruar Gashi.

Ai ka bërë të ditur se gjatë aksionit të sotëm janë intervistuar gjithsej 58 persona të dyshuar për veprën penale "falsifikim i rezultateve të votimit".

“Sot kemi realizuar një aksion ku nga 18 kryesues dhe 50 komisionerë, janë intervistuar 15 kryesues dhe 43 komisionerë. Pesëmbëdhjetë kryesuesit janë ndaluar për 48 orë dhe brenda afatit ligjor Prokuroria do të vendosë për masën e sigurisë”, ka theksuar kryeprokurori Gashi.

Sipas tij, për 43 komisionerët e intervistuar, Prokuroria është ende në fazën e vlerësimit për caktimin e ndonjë mase eventuale.

“Në këtë rast kanë qenë të angazhuar dy prokurorë nga Departamenti për Krime të Rënda”, ka shtuar Gashi, transmeton Telegrafi.

Ai ka theksuar se në komunën e Malishevës kanë qenë 75 vendvotime dhe nga to 9057 vota janë të shtuara dhe 7996 janë vota të hequra, në total 17 mijë e 53 vota.

Detaje shtesë për aksionin ka dhënë edhe nënkoloneli i Policisë së Kosovës, Bekim Avdija, i cili ka bërë të ditur se në këtë rast dyshohet për përfshirjen e gjithsej 68 personave.

“Pas grumbullimit të provave që kemi mbledhur, kemi parë se janë të implikuar 68 persona, kryesues dhe komisionerë. Sot janë intervistuar 43 komisionerë dhe 15 kryesues, ndërsa kanë mbetur edhe tre kryesues dhe shtatë komisionerë, të cilët besojmë se së shpejti do të intervistohen”, ka deklaruar Avdija.

Ai ka theksuar se Policia do të vazhdojë bashkëpunimin e ngushtë me Prokurorinë për procedimin e të gjitha shkeljeve.

“Do të vazhdojmë bashkëpunimin me Prokurorinë, në mënyrë që të procedohen sipas ligjit të gjitha shkeljet deri në elementet e fundit”, ka shtuar Avdija.Ndërkaq, Koordinatorja Nacionale për Zgjedhje, prokurorja Laura Pula, ka deklaruar se veprimet e shpejta të Prokurorisë kanë rezultuar me arrestime të personave që dyshohet se kanë manipuluar vota.

“Si rezultat i veprimeve të shpejta janë kryer arrestime, duke përfshirë komisionerë që dyshohet se kanë manipuluar vota. Asnjë individ, pavarësisht pozitës apo funksionit, nuk qëndron mbi ligjin dhe integriteti i procesit zgjedhor është i panegociueshëm”, ka deklaruar Pula.

Ajo ka shtuar se Prokuroria e Shtetit do të vazhdojë hetimet deri në zbardhjen e plotë të rasteve.

“Prokuroria e Shtetit do të mbetet e përkushtuar në mbrojtjen e votës së qytetarëve. Do të vazhdojmë bashkëpunimin me të gjitha autoritetet e zbatimit të ligjit dhe nuk do të ndalemi deri në hetimin e fundit”, ka theksuar Pula. /Telegrafi/

Ushtruesi i Detyrës së Kryeprokurorit të Shtetit, Agron Qalaj, ka mbajtur kolegjiumin e rregullt me kryeprokurorët e të gjitha prokurorive dhe përfaqësues nga Zyra e Kryeprokurorit të Shtetit, ku u diskutua trajtimi i rasteve që lidhen me zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025.

Gjatë takimit, Qalaj ka vlerësuar angazhimin e prokurorëve të shtetit gjatë procesit zgjedhor, duke theksuar se institucionet e prokurorisë kanë vepruar me profesionalizëm dhe vigjilencë.

“Gjatë procesit zgjedhor, prokuroritë kanë vepruar në përputhje me kompetencat ligjore, me qëllim të garantimit të integritetit të procesit zgjedhor dhe mbrojtjes së vullnetit të qytetarëve të shprehur me votë”, ka deklaruar Qalaj.

Koordinatorja Nacionale për Zgjedhje, prokurorja Laura Pula, ka informuar të pranishmit për koordinimin ndërmjet Koordinatores Nacionale dhe prokurorive, lidhur me rastet kur është evidentuar ose dyshuar për cenim të procesit zgjedhor.

Ajo ka bërë të ditur se prokuroritë themelore kanë ndërmarrë veprime konkrete në rastet e dyshimeve për keqpërdorim apo falsifikim të votave, duke përfshirë grumbullimin e informatave dhe sigurimin e provave relevante.

Edhe kryeprokurorët e prokurorive themelore kanë raportuar për veprimet hetimore të zhvilluara, veçanërisht në rastet e dyshimeve për manipulim të votave për kandidatët për deputetë të Kuvendit të Kosovës.

Në përmbyllje të kolegjiumit, u.d. Kryeprokurori i Shtetit ka kërkuar unifikim të veprimeve dhe praktikave hetimore në të gjitha prokuroritë.

“Është e domosdoshme që trajtimi i rasteve që ndërlidhen me keqpërdorimin apo falsifikimin e votave të bëhet në mënyrë të unifikuar dhe sa më efikase në nivel vendi”, ka theksuar Qalaj. /Telegrafi/

Prokuroria Themelore në Prishtinë, në bashkëpunim me Njësinë për Krime Ekonomike të Policisë së Kosovës, ka arrestuar një inspektor të Inspektoratit të Punës, nën dyshimin për përfshirje në veprën penale “Marrje ryshfeti”.

Lajmin e ka konfirmuar për Telegrafin kryeprokurori i Prokurorisë Themelore në Prishtinë, Zejnullah Gashi.

I dyshuari me inicialet G.B. është ndaluar në kuadër të hetimeve që po zhvillohen ndaj tij.

Sipas Prokurorisë, arrestimi i inspektorit është realizuar pas zbatimit të masave të fshehta hetimore, përfshirë edhe masën e simulimit, ku ai është kapur në flagrancë.

Dyshohet se inspektori ka pranuar para nga një biznes, me qëllim që ta amnistojë atë nga shkeljet e konstatuara gjatë inspektimit, pasi ishte vërejtur se disa punëtorë nuk ishin të deklaruar./Telegrafi/

Zyrtari policor Arton Krasniqi, i arrestuar nën dyshimet për marrje ryshfeti në pikën kufitare në Vermicë, është liruar nga masa e paraburgimit pas një vendimi të Kolegjit të Gjykatës Supreme.

Kolegji penal i Gjykatës Supreme ka aprovuar kërkesën për mbrojtje të ligjshmërisë të Krasniqit dhe ka ndryshuar aktvendimet e mëparshme të Gjykatës Themelore në Prizren dhe Gjykatës së Apelit të Kosovës – Departamenti për Krime të Rënda, të cilat kishin caktuar paraburgimin ndaj tij.

Sipas arsyetimit të Gjykatës Supreme, vendimet e instancave të mëparshme nuk kanë dhënë arsye të qarta dhe të pranueshme ligjore për caktimin e paraburgimit, pasi ato mbështeteshin vetëm në parafrazimin e dispozitave ligjore pa vërtetuar bazat konkrete ligjore të kërkuara sipas Kodit të Procedurës Penale.

Si pasojë, masa e paraburgimit ndaj Krasniqit është ndërprerë më 6 janar 2026 dhe ai është liruar nga burgu për t’u mbrojtur në liri deri në përfundim të procesit gjyqësor.

Krasniqi ishte arrestuar më 22 dhejtor 2025 ku polici, duke shfrytëzuar uniformën dhe pozitën e tij zyrtare, kishte pranuar ryshfet nga shtetasi i Serbisë, Boshko Qermioviq që i njëjti të mund të kalonte kufirin. /Telegrafi/

Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve (QNR) po vazhdon procesi i rinumërimit të fletëvotimeve për vendvotimet për të cilat KQZ ka marrë vendim për rinumërim.

Sipas njoftimit, nga fillimi i këtij procesi, më 13 janar 2026 në ora 18:00, e deri më 28 janar 2026 në ora 10:00, janë rinumëruar mbi 80 për qind e vendvotimeve, përkatësisht 2,061 nga gjithsej 2,557 vendvotime.

KQZ bën të ditur se deri më tani, 30 komuna e kanë përmbyllur tërësisht procesin e rinumërimit.

Rezultatet e rinumërimit publikohen në platformën zyrtare të KQZ-së për rezultate, në seksionin QNR > Rinumërim, dhe përditësohen pas përfundimit të numërimit të çdo vendvotimi. /Telegrafi/

Misioni i OSBE-së në Kosovë ka mirëpritur miratimin nga Këshilli Gjyqësor i Kosovës të Planit Strategjik për Përmirësimin e Qasjes në Drejtësi 2026–2028, duke e cilësuar atë si një hap të rëndësishëm drejt forcimit të mbrojtjes së gazetarëve dhe profesionistëve të medias.

“Misioni i OSBE-së në Kosovë mirëpret miratimin nga Këshilli Gjyqësor i Kosovës të Planit Strategjik për Përmirësimin e Qasjes në Drejtësi 2026–2028, një hap i rëndësishëm drejt mbrojtjes më të fuqishme të gazetarëve dhe profesionistëve të medias”, thuhet në njoftimin e OSBE-së.

Sipas Misionit, Strategjia kërkon nga gjyqtarët që t’u japin përparësi rasteve që përfshijnë gazetarët, përfshirë krimet ndaj profesionistëve të medias, procedurat për shpifje dhe paditë e ashtuquajtura “SLAPP”.

“Strategjia kërkon që gjyqtarët të prioritizojnë rastet që përfshijnë gazetarët, përfshirë krimet ndaj profesionistëve të medias, procedurat për shpifje dhe paditë që duket se janë ngritur me qëllim ngacmimin ose presionin ndaj gazetarëve”, thekson OSBE.

OSBE vlerëson se trajtimi më i shpejtë i këtyre rasteve ndihmon në adresimin pa vonesa të sulmeve ndaj gazetarëve dhe në identifikimin e shpejtë të padive të pabazuara.

“Trajtimi më i shpejtë i këtyre rasteve mund të ndihmojë që sulmet ndaj gazetarëve të adresohen pa vonesa, ndërsa pretendimet e pabazuara ose abuzive të identifikohen dhe të zgjidhen shpejt”, thuhet më tej në reagim.

Në fund, Misioni i OSBE-së thekson se zbatimi i Strategjisë është thelbësor dhe kërkon koordinim efektiv ndërinstitucional.

“Zbatimi tani ka rëndësinë më të madhe: monitorimi dhe raportimi për Strategjinë duhet të shoqërohen me koordinim efektiv ndërmjet policisë, prokurorisë dhe gjyqësorit”, thuhet në njoftim, duke përmendur mekanizmat e koordinimit në funksion që nga viti 2017 për trajtimin e rasteve të sulmeve ndaj gazetarëve dhe profesionistëve të medias. /Telegrafi/

Ambasada e Shteteve të Bashkuara në Prishtinë ka uruar zyrtarisht Kosovën për anëtarësimin si themeluese në organizatën ndërkombëtare “Bordi i Paqes”.

Në një postim në platformën X ambasada shkroi: “Urime Kosovë”.

Ky urim vjen pas njoftimit të “Bordi i Paqes”, i cili ka mirëpritur Kosovën si anëtare themeluese të organizatës së tyre.

Kujtojmë se në ceremoninë e nënshkrimit të “Bordit të Paqes” që u mbajt në Davos të Zvicrës, mori pjesë presidentja Vjosa Osmani,

Ky bord është krijuar me iniciativë të presidentit amerikan, Donald Trump, me synim rindërtimin dhe stabilizimin e Gazës pas luftës dyvjeçare shkatërrimtare.

Ky zhvillim shihet si një hap pozitiv për angazhimin e Kosovës në iniciativa globale për paqe dhe bashkëpunim ndërkombëtar, me mbështetjen e fortë të partnerit strategjik, Shteteve të Bashkuara. /Telegrafi/

Prokuroria Themelore e Gjakovës në bashkëpunim me policinë është duke zhvilluar një aksion në Malishevë lidhur me dyshimet për falsifikim të rezultateve zgjedhore të 28 dhjetorit.

Lajmin për Telegrafin e ka konfirmuar zëdhënësi i kësaj prokurorie Drin Domi.

“Aksioni është duke u zhvilluar me urdhër të Prokurorisë Themelore në Gjakovë mbi dyshimet për falsifikim të rezultateve zgjedhore të kandidatëve brenda subjekteve politike”, ka thënë Domi.

Ai ka shtuar se për detaje tjera do të njoftohemi pas përfundimit të këtij aksioni.

Kujtojmë se të premten e kaluar Prokuroria Themelore e Prizrenit realizoi aksion lidhur me dyshimet për falsifikim të rezultateve zgjedhore, që përfundoi me 109 të arrestuar. /Telegrafi/

Gjykata Themelore në Pejë, Departamenti për Krime të Rënda, i ka caktuar masën e paraburgimit në kohëzgjatje prej një muaji të pandehurit M.N.

Vendimi është marrë pas kërkesës së Prokurorisë Themelore në Pejë për shkak të dyshimit të bazuar se i pandehuri ka kryer veprën penale “Dhunimi”, nga neni 227 paragrafi 6 lidhur me paragrafin 1 të Kodit Penal të Republikës së Kosovës.

Dyshohet se është dhunuar një grua në Deçan, rasti nën hetim

Sipas njoftimit të gjykatës, paraburgimi është caktuar edhe për shkak të ekzistimit të kushteve ligjore për shqiptimin e kësaj mase, me qëllim të sigurimit të mbarëvajtjes së procedurës penale.

M.N u arrestua të hënën në Deçan, dhe paraburgimi do ti llogaritet nga data e arrestimit deri më 25 shkurt 2026, në ora 16:00. /Telegrafi/

Ministrja në detyrë e Arsimit, Arbërie Nagavci ka shprehur ngushëllimet e saj më të thella për ndarjen tragjike nga jeta të Zejn Zejnullahut, nxënës i shkollës “Zenel Hajdini” në Gadime të Lipjanit.

Në një reagim publik, ministrja Nagavci theksoi se humbja e një fëmije është një dhimbje e pamasë, e cila prek jo vetëm familjen, por edhe gjithë komunitetin.

“Me dhimbje të thellë mora lajmin për ndarjen tragjike nga jeta të vogëlushit Zejn Zejnullahu. Humbja e një fëmije është një plagë që fjalët vështirë se mund ta shërojnë,” u shpreh Nagavci.

Fillojnë hetimet për vdekjen e nxënësit që ra në lumin e Gadimes

Ajo shtoi se, në emër të saj dhe të Ministrisë së Arsimit, shpreh ngushëllimet më të sinqerta për familjen e të ndjerit, bashkëmoshatarët, mësimdhënësit dhe komunitetin shkollor.

“Në emrin tim dhe të Ministrisë së Arsimit, shpreh ngushëllimet më të sinqerta familjes Zejnullahu, bashkëmoshatarëve, mësimdhënësve dhe gjithë komunitetit që sot po përballet me këtë dhimbje të madhe,” theksoi ajo.

Në fund, ministrja Nagavci uroi që familja të gjejë forcë për ta përballuar këtë humbje të rëndë.

“Lutemi që prindërit dhe të afërmit të gjejnë forcën për ta përballuar këtë humbje të rëndë, ndërsa Zejni u prehtë në paqen e përjetshme”, ka shkruar Nagavci.

Nxënësi 13-vjeçar Zejn Zejnullahu, i cili më herët ishte raportuar si i zhdukur dhe më pas u gjet në lumin e Gadimes. /Telegrafi/

Një ngjarje tronditëse raportohet të ketë ndodhur në Çabrat të Gjakovës, ku persona të paidentifikuar dyshohet se kanë dëmtuar Kuranin.

Aktualisht nuk dihet identiteti i autorëve dhe motivi pas këtij veprimi, ndërsa autoritetet kanë nisur hetimet për sqarimin e rrethanave të ngjarjes.

Kështu ka deklaruar për Telegrafin, zëdhënësja e Policisë së Gjakovës, Vlera Krasniqi.

"Lidhur me ngjarjen është njoftuar prokurori i prokurorisë speciale, përderisa jemi duke ndërmarr veprimet e nevojshme për sqarimin e rrethanave të ngjarjes”, ka thënë Krasniqi.

Rasti është duke u hetuar, ndërsa qytetarët janë të inkurajuar të bashkëpunojnë me autoritetet për sqarimin e plotë të ngjarjes./Telegrafi/

Tre zyrtarët e Komunës së Prishtinës janë ndaluar për 48 orë pas aksionit të zhvilluar të martën nga Njësia për Krime Ekonomike.

Lajmin për Telegrafin e ka konfirmuar zëdhënësja e Prokurorisë Themelore në Prishtinë, Kaltrina Shala.

Nga prokuroria bëhet e ditur se të dyshuarit po hetohen për veprat penale “keqpërdorim i pozitës apo autoritetit zyrtar” dhe “marrja e ryshfetit”.

“Pas aksionit të zhvilluar nga Prokuroria Themelore në Prishtinë, prokurori i shtetit ka marrë aktvendim për ndalimin e tre personave, të cilët dyshohet se kanë kryer veprën penale ‘keqpërdorim i pozitës apo autoritetit zyrtar’ nga neni 414 i KPRK-së dhe ‘marrja e ryshfetit’ sipas nenit 421 të KPRK-së,” ka bërë të ditur Shala.

Arrestohen tre zyrtarë të Komunës së Prishtinës për ryshfet, njëri kapet në flagrancë

Ajo ka shtuar se gjatë aksionit janë sekuestruar edhe telefona dhe prova të tjera, të cilat do të shërbejnë në vazhdimin e procedurës hetimore.

“Janë sekuestruar telefona si prova materiale, të cilat do të përdoren në zhvillimin e mëtejmë të hetimeve. Prokurori i shtetit, brenda afatit ligjor, do të parashtrojë kërkesë me shkrim në gjykatën kompetente për caktimin e ndonjërës prej masave ndaj të dyshuarve,” ka theksuar ajo për Telegrafin.

Ky zhvillim vjen pas aksionit të raportuar më herët, ku njëri nga zyrtarët komunal u kap në flagrancë duke pranuar ryshfet. /Telegrafi/

Ish-kryetari i Këshillit Kombëtar Shqiptar, Ragmi Mustafi, ka reaguar ashpër ndaj deklaratave të kryetarit të Trupit Koordinues të Qeverisë së Serbisë, Aleksandar Martinoviq, duke i cilësuar ato si shembull të diskursit institucional që fsheh diskriminimin real ndaj shqiptarëve në Luginën e Preshevës.

Sipas Mustafit, pretendimi i Martinoviq se pasivizimi i adresave është një procedurë administrative neutrale nuk qëndron, pasi pasojat e saj prekin pothuajse ekskluzivisht shqiptarët.

“Ligji nuk bëhet diskriminues nga teksti i tij, por nga zbatimi. Dhe zbatimi i kësaj politike ka prodhuar pasoja të qarta etnike, duke u marrë qytetarëve e drejta e votës, sigurimi shëndetësor, arsimi, prona dhe vetë ekzistenca juridike”, ka theksuar Mustafi.

Ai nënvizon se heqja e adresës nuk është një akt teknik, por një formë e përjashtimit institucional.

“Kur një shtet i heq qytetarit adresën, ai nuk po e rregullon sistemin. Ai po e përjashton qytetarin nga sistemi”, shprehet ai.

Duke komentuar deklaratat e Martinoviq për të drejtat e garantuara me Kushtetutë, Mustafi vlerëson se të drejtat formale nuk përkthehen në barazi reale në terren.

“E drejta ekziston vetëm kur është e zbatueshme. Kur shqiptari nuk punësohet në polici, në gjykata apo administratë, kur diploma nga Prishtina nuk njihet dhe kur policia ia pasivizon adresën, atëherë nuk kemi barazi, por përjashtim institucional”, ka deklaruar Mustafi.

Ai shton se demokracia nuk matet me numrin e neneve kushtetuese, por me trajtimin praktik të qytetarëve.

Mustafi ka kritikuar gjithashtu listimin e projekteve simbolike nga autoritetet serbe, duke theksuar se ato nuk e zëvendësojnë barazinë strukturore.

“Dy çerdhe nuk e kompensojnë mungesën e përfaqësimit. Disa libra nuk e zgjidhin mosnjohjen e diplomave. Renovimi i një shkolle nuk e fshin realitetin e diskriminimit sistemik - aq më tepër kur këto projekte as nuk janë përfunduar”, ka thënë ai.

Në lidhje me thirrjet për dialog, Mustafi thekson se dialogu nuk mund të ndërtohet mbi mohimin e realitetit.

“Nuk mund të ketë dialog mbi mohimin. Nuk mund të ketë dialog kur njëra palë mohon ekzistencën e problemit, ndërsa pala tjetër jeton pasojat e tij çdo ditë”, është shprehur ai.

Në fund, Mustafi thekson se kërkesat e shqiptarëve të Luginës së Preshevës janë elementare dhe demokratike.

“Shqiptarët e Luginës së Preshevës nuk kërkojnë trajtim të veçantë. Kërkojnë barazi para ligjit, përfaqësim në institucione dhe të drejtën për të qenë qytetarë. Kjo nuk është kërkesë politike, por kërkesë demokratike”, ka përfunduar ai. /Telegrafi/

Anëtari i Kryesisë së LDK-së dhe ish-kryetari i Komunës së Podujevës, Agim Veliu, ka bërë një thirrje publike për reformim të menjëhershëm të Degës së LDK-së në Podujevë, duke e cilësuar gjendjen aktuale si krizë të thellë politike dhe organizative.

Në një reagim publik, Veliu tha se pesë humbjet e njëpasnjëshme zgjedhore janë pasojë direkte e një drejtimi të gabuar dhe mungesës së përgjegjësisë politike.

“Dega e LDK-së në Podujevë ndodhet në krizë të thellë politike dhe organizative. Pesë humbje rresht janë pasojë direkte e një kryetari të komanduar që ka humbur besimin e anëtarësisë, pa marrë asnjëherë përgjegjësi”, ka deklaruar Veliu.

Ai ka kujtuar se për më shumë se tri dekada, kjo degë ka qenë shembull i organizimit dhe fitoreve, duke theksuar se qytetarët e Podujevës i kanë besuar pesë herë drejtimin e komunës.

“Kjo tregon se partia di të fitojë kur respektohen parimet, demokracia e brendshme dhe baza e saj”, ka shtuar ai.

Sipas Veliut, pas largimit të tij nga drejtimi i degës, janë marrë vendime që i ka cilësuar si kundërstatutore dhe pa legjitimitet.

“Degës i janë imponuar vendime të mbyllura, përjashtuese dhe pa legjitimitet. Rezultati është i qartë: humbje, demotivim dhe largim i anëtarësisë”, u shpreh Veliu.

Veliu ka theksuar se për herë të parë në historinë e zgjedhjeve parlamentare, LDK në Podujevë nuk ka arritur të sigurojë përfaqësim në Kuvendin e Kosovës.

“Kjo është alarm serioz dhe kërkon reagim të menjëhershëm”, tha ai.

Në këtë kontekst, Veliu ka kërkuar marrje përgjegjësie politike, hapje të degës ndaj anëtarësisë dhe organizim të zgjedhjeve të lira dhe transparente.

“Kjo është thirrje për shpëtim politik të LDK-së. Heshtja dhe nënshtrimi përballë dështimit vetëm sa e thellojnë krizën”, ka deklaruar ai.

Ai ka theksuar se është i gatshëm të kontribuojë me përvojën e tij politike për reformimin dhe rikthimin e besimit të humbur.

“Nuk kërkoj privilegje. LDK nuk i përket një individi apo një grupi të vogël. Ajo është e anëtarëve dhe votuesve të saj”, përfundoi Veliu. /Telegrafi/

Zyra e Rregullatorit të Energjisë ka shtyrë afatin për dorëzimin e aplikimeve të operatorëve të sektorit energjetik në procesin vjetor të shqyrtimit të tarifave.

Afati i ri është caktuar për datë 28 janar, pasi kompanitë ende nuk i kanë kompletuar dokumentet. Vendimi për tarifat e reja pritet të merret para fundit të marsit, ndërsa ato do të hyjnë në fuqi më 1 prill.

Zyra e Rregullatorit të Energjisë ka shtyrë afatin për dorëzimin e aplikimeve fillestare nga operatorët e sektorit të energjisë në kuadër të procesit vjetor të shqyrtimit të tarifave.

Afati i ri është caktuar për datën 28 janar 2026. Drejtori menaxhues i ZRRE-së, Petrit Pepaj, ka bërë të ditur për Radio Kosovën se shtyrja është bërë pasi kompanitë ende nuk e kanë kompletuar dokumentacionin e tyre për aplikim. Sipas tij, pas pranimit të aplikimeve, ZRRE do të ndërmarrë një shqyrtim të hollësishëm ligjor, rregullativ dhe financiar.

Pepaj, në një përgjigje me email, ka theksuar se në këtë fazë nuk mund të paragjykohet nëse do të ketë rritje të tarifave të energjisë elektrike. Ai tha se vetëm pas analizës së plotë dhe procesit të konsultimit publik do të vlerësohet ndikimi i mundshëm tarifor për konsumatorët.

Nga ana tjetër, kryetari i Dhomës së Tregtisë dhe Industrisë, Kushtrim Ahmeti, ka deklaruar se operatorët e sektorit energjetik zakonisht presin momentin e fundit për dorëzimin e dokumenteve. Sipas tij, duke parë gjendjen aktuale në sektorin e energjisë dhe reduktimet e shpeshta, pritet se do të ketë ndryshime tarifore.

“Duke e parë situatën se si po shkon sektori energjetik, me gjithë këto reduktime të shumta që po ndodhin dhe duke ua lënë fajin njëra-tjetrës, na bën të kemi dyshimet tona se nga të gjitha kompanitë që do t’i dërgojnë kërkesat e tyre në ZRRE, do të ketë kërkesa për rritjen e të hyrave, gjë që pa dyshim do të ndikojë në rritje të tarifave për ne si konsumatorë”, tha Ahmeti.

Ai u ka bërë thirrje qytetarëve që të mos e pranojnë një rritje të re të çmimit të energjisë elektrike, duke kujtuar se pasojat e rritjes së fundit prej 16.1 për qind po ndihen çdo ditë.

“Jemi duke pasur rritje të vazhdueshme të çmimeve jo vetëm të produkteve, por edhe të shërbimeve. Për shembull, kemi pasur rritje të çmimeve të shërbimeve të ujësjellësit. Këto po i vërteton edhe Agjencia e Statistikave të Kosovës”, shtoi ai.

ZRRE pritet të marrë vendimin përfundimtar para fundit të muajit mars, ndërsa tarifat e reja të energjisë elektrike, cilat do qofshin ato, do të hyjnë në fuqi më 1 prill./RTK/

Një aksident i rëndë trafiku ndodhi të dielën mbrëma në Mamushë, ku mbetën të lënduar 6 persona.

Së fundmi janë publikuar edhe pamje ku shihet momenti i aksidentit në të cilin për pak sa nuk u godit edhe një zyrtar policor.

Në pamjet e shpërndara në rrjete sociale, vërehet se një veturë që po lëvizte me shpejtësi të madhe godet fillimisht një kamionetë të ndaluar nga policia dhe më pas përplaset edhe me veturën zyrtare policore.

Aksident mes tri veturash në Prizren, lëndohen gjashtë persona

Në video shihet qartë se polici, i cili ndodhej në afërsi të automjeteve, arrin të largohet vetëm disa sekonda para goditjes, duke shmangur kështu përplasjen direkte.

Si pasojë e aksidentit, raportohet se gjashtë persona kanë mbetur të lënduar, ndërsa të njëjtit janë dërguar për trajtim mjekësor dhe pastaj janë liruar për në shtëpi. Rasti është duke u hetuar nga Policia e Kosovës. /Telegrafi/

Kryeministri në detyrë i Kosovës, Albin Kurti ka zhvilluar të hënën një takim të përbashkët me ambasadorin e Suedisë në Kosovë, Jonas Westerlund, dhe ambasadorin e Mbretërisë së Bashkuar në Kosovë, Jonathan Hargreaves.

Sipas njoftimit për media bëhet e ditur se gjatë takimit, palët diskutuan për çështjet aktuale në vend, përmbylljen e procesit zgjedhor të 28 dhjetorit, si dhe hapat e ardhshëm drejt formimit të institucioneve të reja.

Po ashtu, në fokus të bisedimeve ishin prioritetet e qeverisë së ardhshme dhe bashkëpunimi ndërmjet Kosovës, Suedisë dhe Mbretërisë së Bashkuar në fusha me interes të përbashkët.

Kurti theksoi përkushtimin e Qeverisë ndaj sundimit të ligjit në të gjithë territorin e Kosovës, pa diskriminim dhe pa privilegje, për të gjithë qytetarët dhe komunitetet.

Ai vuri në pah rëndësinë e rritjes së vazhdueshme ekonomike, progresit shoqëror dhe avancimit demokratik.

Në takim u theksua gjithashtu angazhimi i Kosovës për paqe dhe siguri, ruajtjen e rendit publik dhe mbrojtjen e kufijve, si dhe synimi për integrim në Bashkimin Evropian dhe NATO. /Telegrafi/

Në Qendrën e Numërimit dhe Rezultateve (QNR) po vazhdon rinumërimi i fletëvotimeve për vendvotimet për të cilat Komisioni Qendror i Zgjedhjeve (KQZ) ka marrë vendim për rinumërim.

Sipas KQZ-së, deri më tani janë rinumëruar rreth 74 për qind e vendvotimeve, apo 1,887 nga gjithsej 2,557 vendvotime të përfshira në këtë proces.

Zëdhënësi i KQZ-së, Valmir Elezi, ka bërë të ditur se rinumërimi ka nisur të martën, më 13 janar 2026, në ora 18:00, dhe po vazhdon pa ndërprerje.

“Nga fillimi i këtij procesi dhe deri më tani, më 27 janar 2026, ora 10:00, janë rinumëruar rreth 74 për qind apo 1,887 nga 2,557 vendvotime”, ka njoftuar Elezi.

Ai ka shtuar se procesi i rinumërimit tashmë është përmbyllur në 27 komuna, ndërsa në komunat e tjera po vazhdon sipas planifikimit të KQZ-së.

KQZ ka bërë të ditur se rezultatet e rinumërimit publikohen pas përfundimit për secilin vendvotim dhe janë të qasshme për qytetarët në platformën zyrtare të rezultateve, në seksionin QNR > Rinumërim.

Procesi i rinumërimit po zhvillohet nën mbikëqyrjen e institucioneve përkatëse, me qëllim të garantimit të transparencës dhe integritetit të procesit zgjedhor./Telegrafi/

Një 30-vjeçar është arrestuar në Rinas teksa do të udhëtonte drejt Italisë, pasi nga kontrolli me skaner në bagazhet e tij është gjetur një pistoletë me municion luftarak.

Sipas njoftimit të policisë, arma do të trafikohej nga Shqipëria drejt vendit fqinj nga 30-vjeçari H.H., rezident në Itali.

Nga kontrolli nëpërmjet skanerit, në bagazhet e këtij shtetasi, u gjet 1 armë zjarri pistoletë me municion luftarak, e cila u sekuestrua në cilësinë e provës materiale.

Ai u arrestua me akuzën për veprën penale “Trafikimi i armëve dhe i municionit”.

Njoftimi i policisë:

Si rezultat i kontrolleve të dedikuara, bazuar në analizën e riskut dhe në informacionet e inteligjencës policore, të intensifikuara me qëllim parandalimin e çdo paligjshmërie, shërbimet e Policisë Kufitare të PKK Rinas, në bashkëpunim me shërbimet e sigurisë në aeroportin e Rinasit, finalizuan operacionin policor të koduar “Siguria”, në kuadër të të cilit u godit një rast i tentativës për të trafikuar armë zjarri, nga Shqipëria në Itali.

Gjatë këtij operacioni, u kap në flagrancë, në dalje të Shqipërisë, dhe u vu në pranga shtetasi shqiptar H. H., 30 vjeç, rezident në Itali. Nga kontrolli nëpërmjet skanerit, në bagazhet e këtij shtetasi, u gjet 1 armë zjarri pistoletë me municion luftarak, e cila u sekuestrua në cilësinë e provës materiale”./euronews/

Dhoma e Tregtisë dhe Industrisë Kosovë (DHTIK) ka shprehur shqetësim të madh lidhur me protestat që po mbahen në shtetet fqinje nga kompanitë transportuese, të cilat po shkaktojnë vështirësi të konsiderueshme për bizneset kosovare.

Sipas DHTIK-së, këto protesta kanë pamundësuar në masë të madhe eksportin dhe importin e mallrave të kompanive vendore drejt dhe nga tregjet evropiane, duke krijuar pengesa serioze në qarkullimin e mallrave.

Me këtë rast, DHTIK u ka bërë thirrje institucioneve të Kosovës që të vihen në kontakt me Bashkimin Evropian me qëllim të gjetjes së një zgjidhjeje sa më të shpejtë për tejkalimin e kësaj situate.

Po ashtu, DHTIK i ka bërë thirrje Bashkimit Evropian që të ndërmarrë veprime urgjente për menaxhimin dhe tejkalimin e problemeve të shkaktuara nga zbatimi i sistemit të ri Entry/Exit System (EES), i cili është vendosur në kufijtë e jashtëm të zonës Schengen dhe ka nisur të zbatohet gradualisht që nga 12 tetori 2025.

Sipas Dhomës së Tregtisë dhe Industrisë, zgjidhja e kësaj çështjeje është jetike për funksionimin normal të zinxhirit të furnizimit dhe për ruajtjen e stabilitetit të biznesit në Kosovë./Telegrafi/