Presidenti i SHBA-së, Donald Trump, tha se “Bordi i Paqes për Gazën” që është propozuar, është në proces formimi dhe do të përbëhet nga udhëheqës nga “kombet më të rëndësishme të botës”.

“Bordi i Paqes po formohet”, tha Trump për shtypin në bordin e Air Force One të dielën.

“Në thelb, janë udhëheqësit më të rëndësishëm të kombeve më të rëndësishme… Merrni udhëheqësit dhe kombet më të rëndësishme, ky do të jetë Bordi i Paqes”, tha ai.

Trump shtoi se ka një interes të fortë ndërkombëtar për të marrë pjesë në iniciativë, duke theksuar: “Të gjithë duan të jenë pjesë e tij”.

Bordi, i cili pritet të kryesohet nga Trump dhe të përfshijë rreth 15 udhëheqës botërorë, do të mbikëqyrë një qeveri teknokratike palestineze që ende nuk është formuar dhe do të mbikëqyrë procesin e rindërtimit në Gaza.

Vendet që pritet të bashkohen me bordin përfshijnë Mbretërinë e Bashkuar, Gjermaninë, Francën, Italinë, Arabinë Saudite, Katarin, Egjiptin dhe Turqinë, dhe ish-i dërguari i OKB-së për Lindjen e Mesme, Nikolay Mladenov, mund të veprojë si përfaqësuesi i “Bordit të Paqes” në terren.

Pavarësisht planeve të raportuara për të zbuluar panelin këtë javë, Trump nuk dha një afat kohor.

Administrata e tij e ka shtyrë vazhdimisht njoftimin, pasi fillimisht planifikoi të prezantonte “Bordin e Paqes” muajin e kaluar.

Kapet dhe vihet në pranga një 35-vjeçar, i cili vodhi shuma parash në subjektin ku ishte i punësuar.

Gjatë kontrollit fizik i gjendet dhe i sekuestrohet një pjesë e shumës së vjedhur.

Specialistët për Hetimin e Krimeve të Komisariatit të Policisë Nr. 4, në vijim të punës për parandalimin dhe goditjen e paligjshmërisë në fushën e vjedhjes së pronës dhe pasurisë, si dhe për identifikimin dhe vënien përpara përgjegjësisë penale të autorëve, pas kallëzimit të bërë nga menaxheri i një lokali për vjedhje të shumave të parave në subjektin e tij, kanë organizuar menjëherë punën hetimore.

Si rezultat i një pune të mirëorganizuar dhe këqyrjes së pamjeve filmike, u identifikua dhe u arrestua shtetasi J. N., 35 vjeç, banues në Tiranë.

Nga hetimet rezultoi se ky shtetas, ditën e djeshme, ka vjedhur shuma parash në subjektin ku ishte i punësuar si kamarier, një pjesë e të cilave u sekuestruan në cilësinë e provës materiale.

Materialet procedurale iu referuan Prokurorisë për veprime të mëtejshme.

Lokali “O gyros tou asyrmatou”, ku në orët e para të mëngjesit të sotëm u plagosën babë e bir shqiptarë me mbiemër Sinovarfaj, rezulton pjesë e dosjes “Sky ECC” në Greqi, ku në dhjetor 2024 u arrestuan 24 persona, mes të cilëve 14 shqiptarë, si pjesë e disa grupeve kriminale të përfshira në trafikun ndërkombëtar të drogës por edhe në ngjarje të rënda kriminale.

Konkretisht, lokali “O Gyros tou Asirmatou”, ku u plagos 39-vjecari Negri Sinovarfaj dhe babai i tij 70-vjecar, sipas dosjes së atëhershme, rezulton se pronar të “padukshëm” ka pasur 34-vjecarin nga Vlora, Andon Salati. Zyrtarisht lokali i llojit “Steakhouse”, sipas dosjes, rezulton në pronësi të shoqërisë “K SALATI N SINOVARFAJ O. E”.

Andon Salati, 32 vjec, lindur në Vlorë e banues në Nea Smyrni të Athinës, sipas dosjes së operacionit në dhjetor 2024, konsiderohet një nga krerët e një prej grupeve kriminal në bashkëpunim me Denis Grabockën. Salati, i cili njihet me pseudonimet “Sal”, “Salah” dhe “Toni”, rezulton përdorues i “Sky ECC” por edhe “Encrochat”.

Pjesë e grupit të Andon Salati ishte edhe Aleksandër Sadikaj nga Memaliaj, i ekzekutuar në Tiranë në vitin 2022 pas shpërthimit të eksplozivit në makinë.

Grupi i tyre rezulton i përfshirë në trafikun e marijuanës dhe kokainës nga Spanja dhe Shqipëria për në Greqi. Salati në shkurt 2016 rezulton të jetë ndaluar nga policia shqiptare në pikën kufitare të Kakavijës mes 148 mijë euro cash, të cilat po tentonte t’i fuste në Shqipëri, por për këtë është ndjekur në gjendje të lirë. Nga viti 2018 deri në vitin 2020, ai ka qenë i burgosur në Koridhalo si kreu i një grupi kriminal që shiste lëndë narkotike në Athinë dhe në Mykonos. Pavarësisht kësaj, ai vazhdonte kontrollin e trafikut dhe shpërndarjes së drogës nga burgu, përmes platformave të kriptuara.

Në mesazhet e shkëmbyera nga Andon Salati, gjatë kohës që ishte i burgosur, me Fotio Mplantoumi-Sioho, i burgosur gjithashtu në burgjet franceze, ai përshkruan situatën brenda burgut dhe në veçanti për komoditetet që ka si celulari, televizori inteligjent, router për internet. Ai i referohet marrëdhënieve të mira që ka me punonjësit e burgut, se me ndihmën e gardianëve vendos celularët në qendrën e paraburgimit, njeh një kryegardian dhe një gardian që kur punonin në Mykonos dhe se disa mbrëmje gjatë turnit të tij, gardiani përdor kokainë “i merr disa hundë”. Ai tregon se gjendja në burg ishte më e mirë para 2 vitesh, pasi atëherë të burgosurit pinin pije deri në orët e vona të natës dhe disa kishin edhe shoqërinë e femrave , të cilat i fuste një “kryegardian”.

Andon Salati dhe Denis Grabocka rezultojnë pronarë të fshehtë të një kompanie që jep makina me qira në Athinë, me pronarë të riregjistruar familjarë të tyre. Konkretisht kompania “CARENT” ka në pronësi 50 automjete dhe 18 motorrë, disa prej të cilave janë përdorur nga anëtarë të organizatës ose janë sekuestruar në ngjarje të ndryshme. Kompania u jepte me qira automjete anëtarëve të organizatës, me qëllim që ata të lëviznin nën hijen e një mbulesë ligjore, duke shmangur identifikimin nga autoritetet e drejtuesve të vërtetë (madje ka pasur raportime për marrjen me qira të automjeteve nga kompania me dokumenta fals identifikimi, pa mundur të konstatohet nëse ka ndodhur një gjë e tillë) dhe për të shmangur konfiskimin e mundshëm të automjeteve private të transportuesve të drogës, pasi automjetet me qira të sekuestruara për transport droge i kalojnë kompanisë përkatëse.

Kompania “CARENT” ka lidhje me kompaninë “I GO RENTAL” e cila është krijuar në vitin 2017 në Mykonos, kur atëherë ishte aktiv Andon Salati, para arrestimit të tij në vitin 2018.

Ministri e Arsimit dhe Sportit ka publikuar datat e provimit të Maturës Shtetërore 2026. Maturantët do të testojnë dijet e tyre në provime, për t’i hapur rrugë më pas studimeve të larta. Sipas njoftimit të ministrisë provimi i gjuhës së huaj do të jetë më 2 qershor, më 9 qershor i gjuhës shqipe, kurse provimi i matematikës do të jetë më 16 qershor dhe ai i lëndës me zgjedhje më 23 qershor.

Njoftimi:

Është tashmë publike rregullorja e Maturës Shtetërore 2026 dhe datat e provimeve për të gjithë maturantët që ndjekin arsimin e mesëm të përgjithshëm dhe atë profesional.

2 qershor ·  Provimi i gjuhës së huaj

9 qershor ·  Provimi i gjuhës shqipe dhe letërsisë

16 qershor ·  Provimi i matematikës

23 qershor · Provimi me zgjedhje

Janë publikuar dhe shpërndarë po ashtu testet model për orientimin e maturantëve gjatë procesit të përgatitjes.

Kujdes! Çdo shkelje e rregullave të provimit parashikon penalizim sipas rregullores. Përgatitja rigoroze është mundësia juaj e vetme për një garë që ju nxjerr fitues e faqebardhë.

Një atentat me armë zjarri ka lënë të plagosur dy shtetas shqiptar në orët e para të mëngjesit të sotëm në zonën e Agiou Dimitriou në Athinë.

Ngjarja ka ndodhur në orën 02.40 të mëngjesit të sotëm, kur një person ka hyrë brenda lokalit “O gyros tou asyrmatou” që ndodhet në rrugën “Politexniou 70” në pronësi të shtetasit Negri Sinovarfaj, 39 vjeç dhe ka hapur zjarr ndaj tij dhe babait të tij 70-vjeçar.

Autori i ka qëlluar të dy personat në këmbë duke i lënë të plagosur me nga një plumb secilin. Pas kësaj ai është larguar me automjet nga vendi i ngjarjes. Dy të plagosuri janë transportuar drejt spitalit në Paleo Faliro, ku ndodhen jashtë rrezikut për jetën.

Policia po heton për rrethanat e ngjarjes, pa përjashtuar pistën e rivalitetit mes tifozëve të ekipeve të futbollit, pasi Sinovarfaj është pjesë e grupimit të organizuar të tifozëve të ekipit “A.E.K”.

Kryeministri Edi Rama në parkun eolik të Tropojës, duke vlerësuar përgjegjësinë sociale dhe kontributin e kompanisë që menaxhon projektin në zhvillimin e komunitetit lokal. Rama theksoi se Shqipëria ka arritur një nivel të ri në fushën e energjisë, duke u pozicionuar si një partner strategjik për investimet ndërkombëtare, përfshirë ato me Arabinë Saudite, Italinë dhe Emiratet e Bashkuara Arabe.

Ai nënvizoi se vendi ka kapacitete të garantuara për sovranitet energjetik, mundësi eksporti drejt Europës dhe avantazhe konkurruese si prodhues 100% i energjisë së pastër, duke e bërë Shqipërinë një treg strategjik me vlerë të lartë për investitorët ndërkombëtarë.

“Kompania na ka bërë përshtypje në sensin e përgjegjësisë sociale, qoftë në aspektin e kujdesit, apo të vëmendjes për të mbështetur komunitetin dhe zhvillimin atje. Kjo kompani vërtet ka zënë një vend të merituar në territorin e respektit tonë dhe unë jam shumë falënderues. Dua të them që sot Shqipëria është në një nivel krejt tjetër, është krejt tjetër. Mendoj që një dekadë më parë që askush nuk e mendonte që Shqipëria do të behej palë trepalësh me Arabinë Saudite në investimet në energji.

Nevojat tona të brendshme për sovranitetin tonë ne i kemi të garantuara. Rritja e kapaciteteve këtu në Shqipëri, nga njëra anë të kontribuojmë për energjinë në Europë, por nga ana tjetër ne të kemi të ardhura. Do të kemi edhe një avantazh tjetër shumë të madh, për shembull në raport me Serbinë, sepse ne jemi 100% të gjelbër në prodhimin e energjisë, ne nuk e kemi barrën që t’i paguajmë të shkuarës taksën e karbonit, e cila në Serbi është shumë më e rëndë. Për këtë arsye kompanitë e shikojmë me shumë interes Shqipërinë. Italia dhe Emiratet janë të fokusuar në partneritet me ne, është se Shqipëria ka këtë avantazh, që prodhon dhe shet energji të pastër, vlera e së cilës në portofolin e Europës është shumë më e lartë. Shqipëria është treg i vogël, por është një pikë me një nivel të madh strategjik”, tha kryeministri Rama.

Presidenti amerikan Donald Trump ka postuar një imazh “duke e prezantuar veten presidenti në detyrë i Venezuelës”.

Dhe ky veprim vjen disa ditë pasi forcat amerikane kapën ish-presidentin e kombit të Amerikës së Jugut, Nicolás Maduro.

Postimi, i bërë në platformën e tij Truth Social të dielën, e listoi titullin si në fuqi nga janari 2026, duke përforcuar qëllimin e deklaruar të Trump për të mbikëqyrur vendin gjatë një periudhe kalimtare.

Imazhi vjen pas operacionit ushtarak amerikan të 3 janarit në Karakas që rezultoi në kapjen e Maduros dhe gruas së tij, Cilia Flores, të cilët tani përballen me akuza për drogë dhe armë në një gjykatë të Nju Jorkut.

Pas operacionit, zëvendëspresidentja e Maduros, Delcy Rodríguez, u betua si presidente e përkohshme.

Administrata Trump ka deklaruar se synon të “drejtojë” Venezuelën dhe asetet e saj jetësore të naftës gjatë këtij tranzicioni.

Saga revolucionare e Paul Thomas Anderson, “One Battle After Another”, triumfoi në Golden Globe Awards duke u shpallur filmi më i mirë në kategorinë komedi, ndërsa drama shekspiriane e Chloé Zhao, “Hamnet”, fitoi çmimin kryesor për filmin më të mirë dramatik, në ceremoninë e 83-të të Globes të mbajtur të dielën mbrëma.

“One Battle After Another” u vlerësua gjithashtu me çmimet për regjinë dhe skenarin më të mirë për Anderson, si edhe për aktoren më të mirë në rol dytësor për Teyana Taylor. Me këtë sukses, Anderson u bë vetëm regjisori i dytë në historinë e Globes që fiton njëherazi çmimet për film, regji dhe skenar, si producent, pas Oliver Stone me “Born on the Fourth of July”.

Në një mbrëmje që përgjithësisht ndoqi parashikimet e sezonit të çmimeve, surpriza më e madhe erdhi në fund, kur “Hamnet” mposhti filmin “Sinners” për çmimin e filmit më të mirë dramatik. “Hamnet”, i bazuar në romanin bestseller të Maggie O’Farrell, rrëfen një histori imagjinare mbi jetën e William dhe Agnes Shakespeare. Aktorja Jessie Buckley, protagoniste e filmit, fitoi gjithashtu çmimin për aktoren më të mirë në rol kryesor në dramë.

Filmi “Sinners” i Ryan Coogler fitoi çmimet për kolonën zanore më të mirë dhe për arritje kinematografike dhe të box-office. Pavarësisht vlerësimeve fillestare, filmi arriti të arkëtojë 278 milionë dollarë në SHBA dhe 368 milionë dollarë në rang botëror, duke u bërë filmi origjinal me fitimet më të larta në 15 vitet e fundit.

Ceremonia shënoi edhe fitore të tjera të rëndësishme, përfshirë çmimin e parë Golden Globe për Timothée Chalamet, i cili u shpall aktori më i mirë për rolin e tij në “Marty Supreme”.

Golden Globes u zhvilluan në një atmosferë festive dhe solidariteti mes kineastëve, duke konfirmuar rikthimin e plotë të ceremonisë si një nga ngjarjet më të rëndësishme të industrisë së filmit dhe televizionit.

Read More...

Situata hidrologjike në territorin e Bashkisë Shkodër paraqitet e qëndrueshme dhe nën monitorim të vazhdueshëm, me nivele uji nën kuotat kritike dhe pa banesa me prezencë të ujit në brendësi.

Uji është i pranishëm kryesisht në sipërfaqe të hapura bujqësore, duke prekur rreth 945 hektarë tokë, të shpërndarë kryesisht në njësitë administrative Ana e Malit, Velipojë, Dajç dhe Bërdicë.

Strukturat përgjegjëse po vijojnë monitorimin dhe ndërhyrjen në terren, ndërsa furnizimi me energji elektrike, qarkullimi dhe operimi i hidrovoreve mbeten normalë. Nivelet e lumenjve, përfshirë Bunën dhe Drinin, janë larg kuotave kritike, duke garantuar sigurinë e banorëve dhe infrastrukturës.

Ndryshime në strukturën e policisë, sipas burimeve me firmën e kryepolicit, Ilir Proda drejzuesi policisë në durrës Vilson Bala emërohet Drejtor i Drejtorisë Vendore të Policisë Korçë.

Drejtues Islor Islami caktohet përkohësisht Drejtor i Drejtorisë Vendore të Policisë Lezhë.

Drejtues Afrim Tafa caktohet përkohësisht Drejtor i Drejtorisë Vendore të Policisë Durrës.

Drejtorit të DVP Elbasan, Drejtues Fatmir Hoxha, për rezultatet e larta të arritura gjatë fundvitit 2025 në DVP Elbasan, Drejtori i Përgjithshëm i Policisë së Shtetit Drejtues Madhor Ilir Proda i ka revokuar dorëheqjen e tij, dhe për këtë fakt do të vijojë në detyrën e Drejtorit të Drejtorisë Vendore të Policisë Elbasan.

Bashkia Pogradec

Problematikat kryesore vijojnë të jenë rrëshqitjet e dherave.

Gjatë ditës së djeshme, rastet e rrëshqitjeve janë inspektuar nga inxhinierët e Shërbimit Gjeologjik, përfshirë zonat ku janë evakuuar familje në fshatrat Cërravë dhe Dardhas, si dhe në zonën e rezervuarit të Stropckës. Priten raportet teknike për të përcaktuar hapat e mëtejshëm të ndërhyrjes.

Njësia Administrative Trebinjë

Vijon të jetë e bllokuar rruga Dunicë. Gjatë ditës së sotme pritet inspektim nga specialistët e Shërbimit Gjeologjik, pasi rrëshqitja është e përmasave të mëdha.

Rruga e fshatit Malinë është jofunksionale. Një mjet është siguruar nga bashkia, por ndërhyrja aktualisht është e pamundur për shkak të kushteve të pafavorshme të motit.

Njësia Administrative Proptisht

Vijon të jetë e bllokuar rruga Zall–Torra.

Është riaktivizuar një rrëshqitje e ndodhur rreth 8 vite më parë në fshatin Verrri.

Lumenjtë paraqiten me prurje normale dhe nuk raportohen problematika.

Nga bashkitë e tjera të qarkut nuk raportohen problematika të reja, vijon puna për neutralizimin e plotë të situatave të krijuara më parë, situata vijon të monitorohet në mënyrë të vazhdueshme nga strukturat e emergjencave civile.

ARRSH – Rajoni Qendër–Lindje

Situata e akseve rrugore:

Boboshticë–Dardhë, Lapidar Podgorie–Podgorie–Liqenas

Gjatë natës ka pasur reshje bore. Po punohet për pastrimin dhe kriposjen e akseve.

Ersekë–Leskovik

Nuk ka pasur reshje bore gjatë natës. Rruga është e hapur dhe e kriposur.

Maliq–Kufi Gramsh

Reshje bore në orët e para të ditës. Po kryhet pastrimi dhe kriposja.

Problem mbeten aluvionet në formë balte që vijnë nga skarpatat, kryesisht në zonën e Lozhanit.

Korçë–Ersekë (k.3), Zemblak–Goricë, Bilisht–Miras,

gjatë natës nuk ka pasur reshje bore është kryer kriposja.

Nuk raportohen probleme në qarkullim. Qarkullimi kryhet me goma dimërore.

Akset Libonik–Rëmbec–Plasë dhe Korçë–Voskopojë

Reshje bore me intensitet mesatar, ndërsa nga km 1–19 reshje të lehta.

Është kryer pastrim dhe kriposje. Qarkullimi vijon normal.

OSSHEE – Rajoni Korçë

Raportohet se janë në funksion 6 grupe operative, të angazhuara për menaxhimin e problematikave në rrjetin e tensionit të mesëm.

Aktualisht pa energji elektrike:

Fideri “Frigorifer”, NST Gjanç – pjesërisht pa energji, 2 abonentë, kabina Krushovë.

Fideri Komunal 3 pjesërisht pa energji, 50 abonentë ruralë në zonat Sterkë, Nicë dhe Osnat.

Fideri 14, NST Petrushë  pjesërisht pa energji, zona Prenisht, 14 abonentë ruralë.

Fideri Podgoxhan, NST Guri i Kuq pa energji 4 antena, zona Podgoxhan.

Fideri Potgoxhan, NST Guri i Kuq pa energji zona Jollë dhe Tallë, 4 abonentë ruralë.

Fideri 3, NST Ersekë pjesërisht pa energji, 6 abonentë ruralë në zonat Kaduc, Shijan dhe Mreshtan.

Fideri J06, NST Ersekë pjesërisht pa energji, 20 abonentë ruralë në zonat Vreckë, Podë, Radash dhe Shalës.

Nga Grupi Operativ Bilisht nuk raportohen problematika.

Ekipet janë në gatishmëri për riparimin e defekteve në terren. Të gjithë fiderët që furnizojnë me energji elektrike konsumatorët e rëndësisë së veçantë janë në gjendje pune.

Hidrovori i Pogradecit, fideri (8–18) “Përpunim Druri”, NST Pogradec, është në punë normale.

Në qarkun Elbasan, moti sot vijon të karakterizohet nga temperatura shumë të ulëta, duke arritur në zonat malore nën -10°C. Në aksin rrugor Elbasan-Qafë Thanë ka pasur reshje dëbore dhe temperaturat kanë rënë deri në -15°C; rruga është pastruar dhe trajtuar me kripë për të garantuar kalueshmërinë.

Ndërkohë, akset Elbasan-Gjinar dhe Elbasan-Tiranë (aks i vjetër nga Krraba) nuk kanë regjistruar prezencë dëbore, por po vazhdohet kriposja në pikat problematike për sigurinë e trafikut.

Sa i përket situatës hidrologjike, prurjet e lumit Shkumbin dhe përroit të Zaranikës kanë rënë dhe nuk paraqesin rrezik për banorët. Përveç kësaj, vijojnë shkarkimet nga HEC Banjë, që aktualisht arrijnë 290 m³/sek, ndërsa së bashku me prodhimin e energjisë arrijnë në 390 m³/sek. Autoritetet presin vendimin e ditës së sotme për vijueshmërinë e shkarkimeve.

Në furnizimin me energji elektrike, raportohet problematika në Fidrin, që furnizon Njësitë Administrative Tunje, Kushovë dhe Skënderbegas të Bashkisë Gramsh. Sipas komunikimeve zyrtare, defektet pritet të zgjidhen gjatë orëve në vijim.

Banorët këshillohen të qëndrojnë të informuar për njoftimet e ardhshme lidhur me motin dhe situatën në rrugë.

Situata në qarkun Fier vazhdon të monitorohet nga autoritetet lokale, ndërsa lumi Seman ruan nivel të lartë ujit dhe paraqet rrezik për zonat e banimit dhe tokat bujqësore.

Ndërsa infrastruktura kritike dhe rrugët kombëtare dhe rurale janë të kalueshme normalisht, dhe furnizimi me energji elektrike e ujë të pijshëm nuk ka pësuar ndërprerje, lumenjtë po tregojnë dinamikë të ndryshme.

Lumi Vjosa është në kuota normale me tendencë të lehtë në ulje, ndërsa Seman vazhdon të ketë prurje të larta përgjatë gjithë argjinaturave nga Bashkia Lushnje, Roskovec, Patos e Fier. Brenda argjinaturave janë të përmbytura rreth 100 hektarë tokë bujqësore, ndërsa në fshatrat Mbrostar dhe Petov janë prekur kasolle bagëtish dhe oborre banesash. Rreziku për zonat e banimit nuk është larguar ende në fshatrat Beline, Kallm, Mbrostar, Mujalli, Gercalli dhe Petov.

Nga ana tjetër, lumi Shkumbin është tërhequr brenda shtratit të tij dhe nuk paraqet rrezik për banorët.

Autoritetet lokale dhe hidrovoret mbeten në gatishmëri të plotë dhe vazhdojnë monitorimin e lumit Seman për të parandaluar përmbytje të mundshme. Banorët këshillohen të jenë të kujdesshëm dhe të ndjekin njoftimet zyrtare.

Kryeministrja e Danimarkës, Mette Frederiksen, ka paralajmëruar se vendi ndodhet në një “moment vendimtar” pas kërcënimeve të ish-presidentit amerikan Donald Trump për të marrë nën kontroll Groenlandën. Ajo akuzoi SHBA-në se po rrezikon bashkëpunimin brenda NATO-s.

Duke folur në një debat politik të dielën, Frederiksen tha se Danimarka është “në një udhëkryq”. Deklarata e saj vjen përpara një jave të rëndësishme në marrëdhëniet mes Danimarkës, Groenlandës dhe SHBA-së. Ministrat e Jashtëm të Danimarkës dhe Groenlandës, Lars Løkke Rasmussen dhe Vivian Motzfeldt, pritet të takohen së shpejti me sekretarin amerikan të Shtetit, Marco Rubio.

“Jemi në një udhëkryq dhe ky është një moment vendimtar,” tha Frederiksen. “Në lojë është më shumë se sa duket, sepse nëse amerikanët i kthejnë shpinën aleancës perëndimore dhe bashkëpunimit tonë në NATO, duke kërcënuar një aleat diçka që nuk e kemi parë më parë, atëherë gjithçka ndalet.”

Të premten, Trump deklaroi se SHBA-ja do të vepronte për Groenlandën “qoftë me dëshirën e tyre apo jo”, duke shtuar: “Do të bëjmë diçka me Groenlandën, ose në mënyrë të butë, ose më të vështirë.” Administrata amerikane ka refuzuar të përjashtojë përdorimin e forcës ushtarake, pavarësisht se Danimarka dhe Groenlanda janë aleate të NATO-s.

Kryeministri i Groenlandës, Jens-Frederik Nielsen, dhe liderët e katër partive të tjera politike thanë në një deklaratë të përbashkët: “Nuk duam të jemi amerikanë, nuk duam të jemi danezë; duam të jemi groenlandezë. E ardhmja e Groenlandës duhet të vendoset nga groenlandezët.”

Frederiksen shtoi se Danimarka po bën “gjithçka që mundet për të mbrojtur qëndrimin e saj” dhe duhet të “qëndrojë e palëkundur” për çështjen e Groenlandës.

Ndërkohë, kryeministri suedez Ulf Kristersson shprehu mbështetje për Danimarkën, duke thënë se SHBA-ja duhet ta vlerësojë besnikërinë e saj në vend që të përdorë “retorikë kërcënuese”. Suedia gjithashtu njoftoi një investim prej rreth 15 miliardë kronash suedeze për kapacitetet e mbrojtjes ajrore.

“Bota që njohim vazhdon të tronditet. Duhet ta marrim seriozisht, por pa panik. Nuk duhet të kemi frikë, por duhet të jemi të përgatitur,” tha Kristersson.

Kryeministri Edi Rama ka ndarë në rrjetet sociale një video nga Kolonja e zbardhur nga dëbora, duke ofruar një pamje mahnitëse panoramike të zonës. Krahas videos, Rama shkruan: “Dhe me Kolonjën magjike dhe ftesën për ta vizituar, ju uroj një javë të mbarë”, duke ftuar qytetarët dhe turistët të vizitojnë këtë zonë të veçantë gjatë stinës së dimrit.

Malajzia dhe Indonezia kanë ndaluar aksesin në chatbot-in e inteligjencës artificiale Grok, të zhvilluar nga kompania e Elon Musk dhe i integruar në platformën X, për shkak të përdorimit të tij në krijimin e imazheve të manipuluara seksualisht pa pëlqim.

Autoritetet e dy vendeve deklaruan se Grok është përdorur për të redaktuar fotografi të personave realë, duke i paraqitur ata në përmbajtje me natyrë seksuale, përfshirë gra dhe fëmijë. Sipas tyre, ky përdorim shkel të drejtat e njeriut, dinjitetin dhe sigurinë online.

Ministritë e komunikimit njoftuan se janë vendet e para në botë që ndërmarrin një ndalim të tillë ndaj këtij mjeti të inteligjencës artificiale. Në Malajzi, rregullatori i medias tha se kishte konstatuar “keqpërdorime të përsëritura” të Grok për prodhimin e përmbajtjeve të dëmshme dhe se platforma X nuk ka ofruar masa të mjaftueshme mbrojtëse.

Edhe Indonezia i ka kërkuar platformës X sqarime zyrtare, ndërsa ministrja e Komunikimit dhe Çështjeve Digjitale, Meutya Hafid, deklaroi se gjenerimi i përmbajtjes seksuale përmes Grok përbën shkelje serioze të të drejtave themelore.

Ndërkohë, platforma X po përballet me presion edhe në Mbretërinë e Bashkuar, ku autoritetet po shqyrtojnë masa ndaj Grok për mosrespektim të ligjeve mbi sigurinë online. Kryeministri britanik Keir Starmer e ka dënuar përdorimin e këtij mjeti, duke e quajtur atë “të turpshëm” dhe “neveritës”.

Platforma Grok nuk ka reaguar ende publikisht ndaj vendimit të dy vendeve.

Prokurorët federalë në SHBA kanë hapur një hetim penal ndaj kryetarit të Rezervës Federale, Jerome Powell, njoftoi vetë ai të dielën, duke e cilësuar veprimin si “të paprecedentë” dhe politikisht të motivuar.

Powell tha se Departamenti i Drejtësisë i ka dorëzuar Rezervës Federale thirrje zyrtare dhe ka paralajmëruar ngritjen e një aktakuze penale në lidhje me dëshminë e tij përpara një komisioni të Senatit mbi rinovimin e ndërtesave të institucionit.

Sipas tij, hetimi lidhet me refuzimin për të ulur normat e interesit, pavarësisht presionit të vazhdueshëm publik nga presidenti Donald Trump.

“Kjo ka të bëjë me faktin nëse politika monetare do të udhëhiqet nga të dhënat ekonomike apo nga presioni dhe frikësimi politik”, deklaroi Powell, duke shtuar se askush nuk është mbi ligjin, por se veprimi duhet parë në kontekstin e presioneve të administratës.

Presidenti Trump, në një intervistë për NBC News, tha se nuk kishte dijeni për hetimin. “Nuk di asgjë për këtë, por ai nuk po bën një punë të mirë në Fed”, u shpreh ai.

Hetimi, i cili ende nuk është konfirmuar zyrtarisht nga prokurorët, do të përbënte një përshkallëzim të mëtejshëm të konfliktit mes Trump dhe Powell, të cilin presidenti e emëroi në krye të Rezervës Federale në vitin 2017. Trump e ka kritikuar vazhdimisht Powell-in për mosuljen e normave të interesit me ritmin e dëshiruar.

Në gjysmën e dytë të vitit 2025, Rezerva Federale uli normat e interesit tri herë.

Kritikët paralajmërojnë se presioni për largimin e kreut të Fed-it rrezikon të minojë pavarësinë e bankës qendrore amerikane.

Senatori republikan Thom Tillis deklaroi se do të bllokojë çdo emërim të ri në Bordin e Rezervës Federale derisa çështja ligjore të zgjidhet, ndërsa senatorja demokrate Elizabeth Warren akuzoi Trump se synon të marrë kontroll politik mbi bankën qendrore.

Sipas New York Times, hetimi po mbikëqyret nga Zyra e Prokurorit të SHBA-së për Distriktin e Kolumbias.

Presidenti amerikan Donald Trump ka deklaruar se ushtria e Shteteve të Bashkuara po shqyrton “opsione shumë të forta” ndaj Iranit, ndërsa protestat antiqeveritare në vend kanë hyrë në javën e tretë dhe, sipas raportimeve, kanë shkaktuar qindra viktima.

Agjencia Human Rights Activist News Agency (HRANA) njofton se ka konfirmuar vdekjen e rreth 500 protestuesve dhe 48 pjesëtarëve të forcave të sigurisë. Burime për BBC-në thonë se numri real i viktimave mund të jetë edhe më i lartë.

Trump tha se zyrtarë iranianë e kanë kontaktuar për negociata, por paralajmëroi se “mund të na duhet të veprojmë përpara një takimi”. Ai nuk dha detaje mbi natyrën e opsioneve ushtarake që po shqyrtohen.

Autoritetet iraniane i kanë cilësuar protestuesit si “vandalë” dhe kanë bërë thirrje për marshime proqeveritare. Qeveria ka shpallur gjithashtu tre ditë zie për “martirët” e vrarë në atë që e quan “betejë kombëtare kundër SHBA-së dhe Izraelit”.

Protestat nisën në fund të dhjetorit pas rënies së fortë të monedhës iraniane dhe janë shndërruar në një sfidë serioze për udhëheqësin suprem, Ajatollah Ali Khamenei. Sipas HRANA-s, mbi 10.600 persona janë arrestuar gjatë dy javëve të fundit.

BBC raporton për pamje nga një morg pranë Teheranit ku shihen rreth 180 trupa, ndërsa burime flasin për varrosje të shpejta dhe përdorim dronësh për identifikimin e protestuesve. Ndërkohë, autoritetet iraniane kanë ndërprerë internetin në pjesën më të madhe të vendit, duke e bërë të vështirë raportimin e pavarur.

Këto janë protestat më të mëdha në Iran që nga viti 2022, kur vdekja e Mahsa Amini në paraburgim shkaktoi trazira masive në mbarë vendin.

Moti në vendin tonë për ditën e sotme do të jetë kryesisht dimëror dhe i ftohtë me kthjellime dhe vranësira të shpërndara. Temperaturat ditore do të jenë të ulëta, duke luhatur rreth disa gradë mbi zero në zonat e ulëta dhe jo më shumë se rreth 5–9°C në disa qytete, ndërsa netët dhe mëngjeset do të mbeten nën zero, sidomos në zonat malore dhe të brendshme ku priten edhe ngrica.

Reshjet pritet të jenë të pakta ose të mungojnë në shumë vende, por vranësirat herë-herë mund të shfaqen. Era do të fryjë lehtë deri mesatare, veçanërisht nga veriperëndimi. Për mëngjeset e ftohta këshillohet kujdesi në trafik për shkak të ngricave në akse rrugore.

Në përgjithësi, dita do të jetë e acartë, me diell të alternuar me vranësira, dhe temperaturat deri rreth 5-9°C gjatë ditës, me ngrica gjatë mëngjesit dhe në zonat malore.