Kapiteni i Sunderlandit, Granit Xhaka, do të mungojë të paktën dy javë për shkak të një lëndimi në kyçin e këmbës, i cili do të kërkojë ekzaminime të mëtejshme, ka konfirmuar trajneri Regis Le Bris.
Xhaka, i cili iu bashkua Sunderlandit gjatë verës nga Bayer Leverkusen në një marrëveshje që mund të arrijë vlerën deri në 20 milionë euro, kishte luajtur çdo minutë në këtë edicion të Ligës Premier, por mungoi në humbjen 3-1 ndaj West Ham United të shtunën.
Pas ndeshjes, Le Bris konfirmoi gjendjen e mesfushorit shqiptar, duke sqaruar se periudha e rikuperimit do të zgjasë të paktën dy javë, përpara se të bëhet një vlerësim i ri mjekësor.
“Ai ka një lëndim në kyçin e këmbës, i duhen të paktën dy javë për t’u rikuperuar dhe më pas do të bëjmë një vlerësim tjetër”, deklaroi trajneri francez.
Xhaka ka qenë një nga lojtarët më të rëndësishëm të skuadrës këtë sezon, duke u paraqitur në të gjitha 23 ndeshjet në të gjitha garat, ku ka shënuar një gol dhe ka dhënë pesë asistime.
Gjatë ndeshjes ndaj West Hamit, reprezentuesi i Zvicrës u pa duke shkëmbyer fjalë me disa tifozë vendas, teksa ishte ulur pas stolit së Sunderlandit, çka bëri që loja të ndërpritej për pak çaste.
Një situatë e ngjashme u raportua edhe pas përfundimit të takimit. Megjithatë, si Le Bris ashtu edhe Nuno Espirito Santo deklaruan se nuk e kishin vërejtur incidentin.
“Pankina është shumë larg vijës anësore, nuk e pashë çfarë ndodhi”.
“Nuk duam të mendojmë për ambientin, po mendojmë vetëm për veten tonë”, u shpreh Le Bris./Telegrafi
KB Prishtina i është rikthyer fitores në Superligën e Kosovës në basketboll pas një serie prej tri humbjesh radhazi, duke marrë një triumf të rëndësishëm ndaj Rahovecit 029.
Në ndeshjen e zhvilluar të shtunën në palestrën “Mizahir Isma”, Prishtina e mposhti Rahovecin 029 me rezultat 68:59, në kuadër të xhiros së 17-të të kampionatit. Kjo fitore vjen vetëm pak ditë pasi skuadra kryeqytetase siguroi edhe kualifikimin në gjysmëfinale të Kupës së Kosovës, duke i dhënë fund një periudhe jo të lehtë në kampionat.
Takimi nisi më mirë për Rahovecin 029, i cili e fitoi çerekun e parë me rezultat 14:13. Megjithatë, Prishtina reagoi fuqishëm në vazhdim, duke marrë kontrollin e lojës dhe duke fituar çerekun e dytë 23:20, si dhe të tretin 22:13, diferencë që rezultoi vendimtare për epilogun e ndeshjes. Çerekun e fundit e fitoi Rahoveci 029 me rezultat 12:10, por kjo nuk mjaftoi për ta rrezikuar fitoren e vendasve.
Te Sigal Prishtina u dallua Adrio Bailey, i cili regjistroi një paraqitje të kompletuar me nëntë pikë, 12 kërcime dhe pesë asistime. Kontribut të madh dha edhe Khalil Dukes, që ishte shënuesi më i mirë i ndeshjes për Prishtinën me 20 pikë, tri kërcime dhe pesë asistime.
Në anën tjetër, te Rahoveci 029 më efikasi ishte Julian Roche me 14 pikë dhe tetë kërcime./Telegrafi
Bournemouth ka shkaktuar një befasi të madhe për ta mposhtur në shtëpi Liverpoolin, në kuadër të xhiros së 23-të në Ligën Premier.
“Reds” zhvilluan paraqitje më të mirë, por Bournemouth realizuan në minutën e fundit të kohës shtesë për ta mposhtur në fund me rezultat 3-2.
Evanilson me një volej fantastike e kaloi Bournemouthin në epërsi pas asistimit të Scott (26’).
Ndërsa shtatë minuta më vonë, Alejandro Jimenez shënoi lehtësisht nga afërsia për të dyfishuar epërsinë (33’).
Liverpooli u këndell në fundin e pjesës së parë, ku Virgil van Dijk realizoi me kokë pas harkimit të Dominik Szoboszlait (45’).
Hungarezi ishte protagonist edhe te goli i barazimit, ku bashkëpunoi me Mo Salah për ta dërguar topin në rrjetë nga një gjuajtje e lirë (80’).
Liverpooli kishte rast edhe për ta kompletuar përmbysjen, sidoqoftë Florian Wirtz dështoi ta konkretizojë.
Kur mendohej se dy skuadrat do të ndaheshin me nga një pikë, Adli doli në skenë për të fituar nga një tollovi pas rivëndjes këndore dhe e dërgoi topin brenda rrjetës së klubit mysafir (90+5’).
Liverpool kësisoj qëndron në pozitën e katërt me 36 pikë ndërsa Bournemouth zë vendin e 13-të me 30 sosh./Telegrafi/
Arsenali po monitoron nga afër mbrojtësin e Real Madridit, Victor Valdepenas, raporton mediumi i njohur britanik “BBC”.
Talenti 19-vjeçar, i cili ka një klauzolë lirimi prej 43 milionë funte, ka qenë nën vëzhgim intensiv nga “Topçinjtë” gjatë muajve të fundit.
Valdepenas është mbrojtës me këmbën e majtë dhe mund të luajë si qendërmbrojtësi ashtu edhe në krahun e majtë të mbrojtjes, çka e bën një profil shumë të vlefshëm për të ardhmen.
Mbrojtësi i ri ka bërë debutimin e tij me ekipin e parë të Real Madridit vetëm këtë sezon, duke startuar në ndeshjen e La Ligës ndaj Alavesit në muajin dhjetor. Edhe pse eksperienca e tij në nivelin më të lartë është ende e kufizuar, paraqitjet dhe potenciali i tij kanë tërhequr vëmendjen e klubit londinez.
Mbetet për t’u parë nëse Arsenali do të vendosë ta konkretizojë interesimin gjatë këtij muaji apo do ta shtyjë për afatin kalimtar të verës.
Në çdo rast, bëhet fjalë për një transferim të orientuar drejt së ardhmes, pasi skuadra e Liga Premier aktualisht është mjaft e mbushur në repartin defensiv, por po mendon edhe për përforcime afatgjata.
Ndërkohë, ende nuk është e qartë nëse Real Madridi do ta lirojë lojtarin pasi vazhdojnë të kenë probleme në aspektin defansiv./Telegrafi
Pedro Fernandez Sarmiento, i njohur si “Dro”, është shumë pranë largimit nga FC Barcelona për t’u transferuar te Paris Saint-Germain.
Sipas Mundo Deportivo, dy klubet janë afër finalizimit të një marrëveshjeje me vlerë pak mbi 8 milionë euro.
Mesfushori 18-vjeçar tashmë ia ka komunikuar vendimin e tij trajnerit Hansi Flick dhe ka informuar edhe bashkëlojtarët se destinacioni i tij i ardhshëm do të jetë PSG-ja.
Edhe pse në tryezë kanë qenë oferta serioze nga Anglia dhe Gjermania, përfshirë Manchester Cityn dhe Borussia Dortmundin, klubi francez pritet të fitojë garën për firmën e talentit spanjoll. Raportohet se transferimi po shtyhet fort me kërkesë të drejtpërdrejtë të Luis Enrique.
PSG-ja ka mundësinë ta aktivizojë klauzolën e lirimit të lojtarit, e cila është 6 milionë euro, por burimet bëjnë të ditur se kampionët e Francës janë të gatshëm të paguajnë pak më shumë. Kjo lëvizje synon ruajtjen e marrëdhënieve të mira me Barcelonën, si dhe përfitime të mundshme në aspektin fiskal.
Nëse gjithçka mbyllet sipas planit, Barcelona do të arkëtojë mbi 8 milionë euro nga largimi i një tjetër talenti të akademisë./Telegrafi
Mesfushori i Sunderlandit, Granit Xhaka, ka treguar edhe një herë se sa vendimtar është për skuadrën, madje edhe kur nuk është në fushë.
Humbja 3-1 ndaj West Ham United në Londër e ka nxjerrë qartë në pah mungesën e kapitenit zviceran, i cili ishte i detyruar të mungonte për shkak të një lëndimi në kyçin e këmbës.
Këto ishin minutat e para që Xhaka ka munguar këtë sezon dhe pasojat u ndjenë menjëherë.
Pak para fundit të takimit, Granit Xhaka u bë protagonist i një momenti tensioni, pavarësisht se ishte i dëmtuar dhe në stol. Pas një provokimi të dyshuar nga një tifoz i West Hamit pas pankinës, 33-vjeçari u përfshi në një debat të ashpër verbal me të, duke shkaktuar ndërprerje të përkohshme të ndeshjes.
“Çfarë do?”, dëgjohej duke bërtitur vazhdimisht Xhaka drejt tifozit të vendasve.
Pas këtij episodi, ndeshja vazhdoi dhe disfata e Sunderlandit u vulos. Me këtë rezultat, epërsia e skuadrës së sapongjitur në elitë ndaj West Hamit, që aktualisht mban vendin e 18-të, është reduktuar në 13 pikë./Telegrafi
Augsburgu ka shkaktuar një surprizë të madhe në Bundesliga, duke triumfuar me rezultat 2-1 ndaj Bayern Munichut në Allianz Arena, fitore që i shkaktoi bavarezëve humbjen e parë në kampionat këtë sezon.
Që në minutat e para u vendos qartë skenari i ndeshjes, me Bayernin dominues në sulm dhe Augsburgun të përqendruar në mbrojtje. Luis Díaz, Lennart Karl dhe Michael Olise ushtruan presion të vazhdueshëm mbi prapavijën mike, por skema 5-4-1 e Augsburgut funksionoi në mënyrë perfekte, duke i mbajtur vendasit larg portës, pavarësisht posedimit 74 për qind në pjesën e parë.
Goli i epërsisë për Bayernin erdhi në minutën e 23-të, kur Olise ekzekutoi një goditje këndi dhe Hiroki Ito u ngrit më lart se të gjithë për të shënuar me kokë. Megjithatë, para pushimit, edhe Augsburg pati momentet e veta, por Han-Noah Massengo nuk ishte i saktë, ndërsa Robin Fellhauer goditi traversën me goditjen e fundit të pjesës së parë.
Në fillimin e pjesës së dytë, një gabim i Jonas Urbig pothuajse i kushtoi Bayern-it, por Anton Kade nuk reagoi në kohë.
Dy raste të tjera për mysafirët e nervozuan trajnerin Vincent Kompany, ndërsa me afrimin e minutës së 60-të, liderët e kampionatit po shfaqnin mungesë të theksuar idesh në sulm ndaj një skuadre që deri tani kishte vetëm katër fitore dhe 20 gola të shënuar në sezon.
Elvis Rexhbeçaj humbi një rast të artë pasi Karl rrëshqiti me topin në zonën e vet, duke bërë që Augsburg të dukej gjithnjë e më i rrezikshëm.
Presioni i mysafirëve u rrit, me Rexhbeçajn dhe Alexis Claude-Maurice që testuan Urbigun, ndërsa ky i fundit u detyrua të intervenonte edhe nga një goditje dënimi. Nga këndi që pasoi, Urbig doli keq dhe topi përfundoi në rrjetë pasi u devijua nga koka e Arthur Chaves.
Kulmi i befasimit erdhi në minutën e 80-të, kur, pavarësisht pranisë së gjashtë mbrojtësve në zonë, askush nga Bayern nuk e ndoqi vrapimin e vonshëm të Massengos, i cili realizoi qetësisht për të heshtur tribunat.
Edhe pse Augsburg vazhdoi të sulmonte, ndërsa Bayern hodhi të gjithë lojtarët përpara në minutat e fundit, gjithçka ishte e kotë për skuadrën e Kompanyt.
Humbja nuk ndryshon shumë situatën e Bayernit në renditje, pasi ata mbeten 12 pikë përpara ndjekësve, ndërsa Augsburgu, falë kësaj fitoreje të madhe, është larguar gjashtë pikë nga zona e rënies.
Legjenda e Arsenalit Xavi Hernandez ka zbuluar se dikur u qortua keq nga ish mesfushori Xavi Hernandez, pasi ai fillojë të qeshte me pjesën ku lexonte “Më shumë se një klub” në “Camp Nou”.
Henry kaloi te Barcelona nga Arsenali, aty ku edhe u bë një legjendë e skuadrës katalunase si dhe e ndihmoi klubin të fitonte disa trofe.
Megjithatë, duke biseduar në podcastin “Overlap”, Henry ka zbuluar se në fillim ishte kritikuar nga Xavi për deklaratat e tij të para si lojtar i Barcelonës.
“Më kujtohet një ditë kur po ngjitesha në shkallët e Camp Nou dhe e pashë “Më shumë se një klub”. I Thashë Samuel Eto’o: “Çfarë është kjo dhe fillova të qeshja”. Xavi Hernandez ishte prapa meje dhe më dëgjoi”.
“Ai më thotë “Çfarë the?”. Kurrë mos guxo të flasësh ashtu për klubin tim, nuk ke fituar ende asgjë këtu. Thjesht mbylle gojën dhe puno. Nëse fiton diçka atëherë të lë të flasësh”.
“E shikova dhe në atë moment kishte të drejtë sepse nuk ai e dinte çfarë nënkupton klubi dhe unë jo. Pastaj fitova dhe humba atje, e mësova çfarë nënkupton klubi. Por, në atë moment ai më bëri të kuptoja se për çka ka të bëjë klubi dhe pse është ku është tani”.
“Nuk thashë asgjë në atë moment. E shikova dhe i thashë “Më fal”, kujton Henry.
Ndërkohë, Henry shumicën e kohës është kthyer në një analist ndërsa Xavi është i papunë që kur u shkarkua nga Barcelona./Telegrafi/
Kosova ka lënë gjurmë të forta në Marok, në turneun ndërkombëtar “Casablanca Cadet African Cup 2026”, duke konfirmuar edhe një herë potencialin e madh të xhudos kosovare në arenën ndërkombëtare.
Xhudisti kosovar Jon Kuka, nën drejtimin e kampiones olimpike Majlinda Kelmendi, ka arritur një sukses të rëndësishëm duke fituar medaljen e bronztë në këtë garë prestigjioze. Paraqitja e tij ishte bindëse dhe plot siguri, duke treguar rritje të vazhdueshme në nivelin garues.
Në duelin vendimtar për vendin e tretë, Kuka triumfoi me Ippon ndaj xhudistit nga Luksemburgu, Ugo Marchiori, duke e mbyllur ndeshjen në mënyrë autoritare. Rruga drejt medaljes nuk ishte e lehtë, pasi në repasazh ai mposhti po ashtu me IPPON xhudistin nikoqir El Mehdi Boudarham, duke eliminuar një rival të fortë përpara publikut maroken.
Përveç Jon Kuka, Kosova po përfaqësohet edhe nga xhudistja Arba Hasanaj, e cila gjithashtu është në garë për medaljen e bronztë dhe pritet të zhvillojë ndeshjen e saj vendimtare.
Këto rezultate dëshmojnë edhe një herë nivelin e lartë të përgatitjes dhe punës së shkollës kosovare të xhudos në arenën ndërkombëtare./Telegrafi
Sulmuesi i Juventusit Jonathan David ka mbështetur yllin Edon Zhegrova, duke thënë se tifozët e skuadrës italiane ende s’e kanë parë çfarë mund të bëjë.
Zhegrova ka filluar të kritikohet te “Zonja e Vjetër”, ndërsa trajneri Luciano Spalletti nuk po i jep shumë minuta, ku zakonisht po luan vetëm si inkuadrues ose qëndron në stol gjatë tërë ndeshjes.
Sidoqoftë, David, i cili e ka pasur Zhegrovën bashkëlojtar edhe te Lille, i ka dalë në mbrojtje.
“Edon Zhegrova ka pasur shumë probleme fizike, ende nuk e keni parë se çfarë mund të bëjë”, tha francezi për “Repubblica”.
Ndërkohë, David ka kërkuar durim nga tifozët edhe për paraqitjet e tij duke deklaruar se i nevojitet më shumë kohë.
“Nuk jam penduar që zgjodha Juventusin, më jepni edhe pak kohë. Po përshtatem, futbolli italian është shumë më ndryshe nga ai francez, edhe tek Lille vuajta në fillim. Pastaj shënova çdo sezon nga 20 gola”, nënvizoi ai.
Përndryshe, David po luan si titullar te Juventusi edhe shkaku që sulmuesi Dusan Vlahovic mungon shkaku i lëndimit./Telegrafi/
Mesfushori i Real Madridit, Arda Guler po rikthen gradualisht formën e tij më të mirë në ndeshjet e fundit, një periudhë që ka përkuar edhe me ardhjen e Alvaro Arbeloas si trajneri i ri i ekipit të parë.
Talenti turk ka qenë ndër lojtarët më në formë së fundmi dhe paraqitja e tij ndaj Monacos në Ligën e Kampionëve u vlerësua si një nga më të mirat e sezonit.
Guler spikati jo vetëm për cilësinë në ndërtimin e lojës nga thellësia, por edhe për punën e madhe pa top dhe kontributin në aspektin defensiv, duke treguar një pjekuri gjithnjë e më të madhe në rolin e tij në mesfushë.
Sipas asaj që raporton “Marca”, Arbeloa e ka identifikuar Gulerin si organizatorin kryesor të lojës së Real Madridit për të ardhmen. Plani i trajnerit është që 20-vjeçari të shndërrohet në boshtin e mesfushës, lojtarin rreth të cilit do të ndërtohet loja dhe ritmi i ekipit.
Forma e shkëlqyer e Gulerit reflektohet edhe në statistika. Ai ka regjistruar asist në katër ndeshjet e fundit radhazi, duke e çuar bilancin e tij sezonal në tri gola dhe 11 asistime në të gjitha garat.
Këto shifra konfirmojnë rritjen e ndikimit të tij në lojën e “Los Blancos” dhe besimin gjithnjë e më të madh që stafi teknik po i jep një prej talenteve më premtuese të futbollit evropian./Telegrafi
Alvaro Arbeloa mori përsipër ndoshta detyrën më të vështirë në futboll, me presionin jo vetëm për ta rikthyer Real Madridin në binarë, por edhe për të korrigjuar gabimet e epokës jetëshkurtër të Xabi Alonsos.
Ish-trajneri i Bayer Leverkusen e përmbushi vetëm shtatë muaj nga kontrata e tij trevjeçare me “Los Blancos”, duke humbur postin më pak se 24 orë pasi Real Madridi pësoi humbje 3–2 nga Barcelona në finalen e Superkupës së Spanjës.
Rezultati mund t’ia ketë vulosur fatin Alonsos, por vendimet taktike që ngjallën habi, përplasja publike me Vinicius Junior dhe pamundësia për t’i dhënë skuadrës një identitet të qartë, e shndërruan një nga trajnerët e rinj më premtues në futboll në diçka më shumë se një titull të bujshëm në gazetat spanjolle.
Arbeloa dështoi testin e parë
Sa faj i takon realisht Alonsos për gjendjen e Real Madridit mbetet e debatueshme, por ajo që nuk vihet në dyshim është detyra e frikshme që trashëgoi Arbeloa: një dhomë zhveshjeje e lodhur, nën presion për të fituar trofe, pa një drejtim të qartë se si.
Pa asnjë përvojë si trajner në elitë, Arbeloa mori drejtimin e klubit më të madh në botë dhe e nisi aventurën e tij në mënyrën më të keqe të mundshme vetëm dy ditë më vonë. Real Madridi u eliminua nga Kupa e Mbretit pas një humbjeje befasuese 3–2 ndaj Albacetes, skuadër e kategorisë së dytë, duke u ndalur në fazën e 1/8-ave.
Nuk kishte rëndësi që shumë prej yjeve kryesorë kishin mbetur në Madrid për atë ndeshje; nëse Arbeloa nuk ishte në gjendje të udhëhiqte një formacion me Vinicius Junior, Federico Valverde, Arda Guler dhe Gonzalo Garcia drejt fitores ndaj një ekipi të La Liga 2, atëherë e ardhmja e Real Madridit dukej vërtet në rrezik.
Arbeloa deklaroi besnikëri te numri 7 i Real Madridit
Megjithatë, pavarësisht asaj që ndodhi në fushë, trajneri i ri la përshtypje në konferencën për shtyp pas ndeshjes, duke marrë të gjithë përgjegjësinë mbi vete dhe duke refuzuar t’i ekspozonte lojtarët e tij që kishin zhgënjyer. Ish-trajneri i Real Madrid Castilla u shfaq shumë në stilin e Carlo Ancelottit para mikrofonit, duke e mbrojtur skuadrën me bindje të plotë, me vlerësimin më të madh të rezervuar për Vinicius Jr.
“Ai ishte i gatshëm ta ndihmonte ekipin dhe ta merrte mbi shpinë, të vraponte kudo dhe të mos fshihej kurrë. Ky është Vini Jr. që dua të shoh, ai që guxon, që merr përgjegjësi dhe që bën diferencën”.
“Do të ketë ditë më të shkëlqyera dhe të tjera më pak të mira, por kam parë se është i përkushtuar dhe se është një kapiten. Jam i bindur se do të na dhurojë net të mëdha dhe se nëse Real Madridi dëshiron të fitojë trofe, na duhet versioni më i mirë i tij”.
Arbeloa shpalli besnikërinë e tij ndaj numrit 7 të Real Madridit. Më pak se katër javë para këtyre deklaratave, Alonso ishte gjendur në një situatë të ngjashme, i pyetur për vështirësitë e Vinicius Jr në fushë, të cilat kishin sjellë fishkëllima nga tifozët në Santiago Bernabeu. Ish-reprezentuesi spanjoll ishte shprehur thjesht se tifozët kishin “të drejtën të shprehnin mendimin e tyre”.
Nuk ishte sekret që marrëdhënia mes Alonsos dhe Vinicius Jr ishte e thyer. Braziliani u largua me zemërim nga fusha dhe u fut në tunel kur u zëvendësua në El Clasico-n e parë të sezonit, e la Alonson jashtë ndjesës së tij publike për incidentin dhe heshti, ndryshe nga bashkëlojtarët, kur klubi u nda me trajnerin spanjoll.
Madje, raportet pretendonin se Vinicius Jr kishte ndalur negociatat për rinovimin e kontratës me Real Madridin për shkak të marrëdhënies së keqe me Alonson, i cili e la anësorin në fushë për 90 minuta vetëm në nëntë ndeshje gjatë periudhës së tij në stol.
Të kesh një nga fytyrat kryesore të klubit në konflikt të vazhdueshëm me trajnerin ishte e dëmshme për të gjithë, dhe Arbeloa u sigurua që të ndërtonte që në fillim një marrëdhënie pozitive me numrin 7, duke e quajtur Vinicius Jr “një nga lojtarët më emocionues në botë” në konferencën e tij të parë për shtyp.
Mbështetja e hapur e Arbeloas tashmë ka ndihmuar brazilianin të rizbulojë formën. Vinicius Jr krijoi tre gola kundër Monacos dhe shënoi një gol spektakolar në fitoren 6–1 ndaj skuadrës së Ligue 1. Me një buzëqeshje të madhe, 25-vjeçari vrapoi drejt vijës anësore për të përqafuar trajnerin e tij të ri pasi realizoi.
Real Madridi ngadalë po gjen një identitet të ri
Arbeloa hodhi tej librin e lojës së Alonsos. Një tjetër problem i vazhdueshëm i epokës Alonso ishte taktika e çuditshme. Ish-ikona e Liverpoolit nuk kishte frikë të eksperimentonte me formacione dhe rotacione, shpesh në dëm të vetes.
Që nga vendosja e Vinicius Jr në krahun e djathtë kundër Paris Saint-Germain e deri te lënia e tij në stol në ndeshjen e parë të Ligës së Kampionëve, apo aktivizimi i Fran Garcia si mesfushor i majtë kundër Elches, Alonso krijoi lëvizje të panevojshme dhe kryesisht të pasuksesshme në Bernabéu.
Ish-trajneri madje mbrojti me pesë lojtarë në finalen e Superkupës së Spanjës, një sistem që vështirë se mund të funksiononte kur dy nga mbrojtësit ishin mesfushorë natyralë, përballë emrave si Lamine Yamal, Robert Lewandowski dhe Raphinha.
Arbeloa, në anën tjetër, ka bërë të qartë se do të largohet nga taktikat e Alonsos dhe do t’u japë liri yjeve të tij vendimtarë, duke ndjekur edhe një herë shembullin e Ancelottit.
“Ne duam të shohim një Madrid, përtej ideve taktike, sistemeve të lojës apo organizimit”.
Shembulli më i mirë i asaj që mund të bëhet nën drejtimin e tij u pa kundër Monacos. Mbappe, Vinicius Jr, Jude Bellingham dhe Franco Mastantuono shënuan gola, Guler dhe Valverde dhuruan tre asistime, ndërsa Aurelien Tchouaméni gaboi vetëm dy pasime në 90 minuta.
Do të ketë kundërshtarë më të fortë në të ardhmen, por Arbeloa tashmë po tregon se më pak taktikë dhe më shumë liri i jep skuadrës dritën jeshile për të luajtur pa kufizime dhe si një njësi e bashkuar.
Real Madridi po ndërton gradualisht një identitet të ri. Një tjetër problem i madh nën Alonson ishte mungesa e identitetit. Skuadra shpesh dukej pa dëshirë dhe kohezion, sikur thjesht po e kryente detyrën edhe në ndeshjet më të mëdha.
Edhe kur fitonin, lojtarët nuk përmbushnin standardet dhe pritshmëritë e fanellës. Nuk kishte shkëlqim, nuk kishte pasion, aq sa tifozët në shtëpi i fishkëllenin lojtarët e tyre në disa raste.
Edhe nën Arbeloan, skuadra u fishkëllua rëndë në pjesën e parë kundër Levantes fundjavën e kaluar. Megjithatë, një pjesë e dytë brilante tregoi shenja të një identiteti të ri që po formohet, të cilin ish-trajneri i Castilla-s po e vendos mbi gjithçka tjetër.
“Karakteri dhe mentaliteti nuk mund të mungojnë kurrë dhe përfaqësojnë atë që është Real Madridi. Ai mentalitet, ajo ambicie, ajo dëshirë, ai pasion, të gjithë së bashku, uniteti. Këto janë vlerat tona. Janë ato që duhet të na përfaqësojnë dhe që nuk duhet t’i braktisim kurrë. Pas tyre do të vijnë edhe idetë futbollistike”.
Skuadra mbetet pa dyshim një punë në proces dhe Arbeloa nuk mund t’i rregullojë menjëherë problemet sistematike të Real Madridit. Por spanjolli tashmë duket si një përshtatje më e mirë për atë që kërkon klubi: një menaxher, jo thjesht një trajner./Telegrafi
Lionel Messi do t’i shtojë edhe një tjetër territor listës së vendeve ku ka luajtur gjatë karrierës së tij, pasi Inter Miami do të vizitojë territorin amerikan të Porto Rikos për një ndeshje miqësore parasezonale ndaj kampionëve të Serie A të Ekuadorit, Independiente del Valle, më 13 shkurt.
Edhe pse Porto Riko nuk konsiderohet një shtet i pavarur, ai merr pjesë në garat ndërkombëtare sportive, me përfaqësuesen e meshkujve të renditur në vendin e 156-të në përditësimin e janarit të renditjes botërore të FIFA-s. Messi është përballur së fundmi edhe me Porto Rikon, duke udhëhequr Argjentinën drejt një fitoreje 6–0 në një miqësore ndërkombëtare në Chase Stadium të Miamit, në tetor.
Udhëtimi në Karaibe do të jetë ndeshja e katërt parasezonale për Inter Miamin, pas vizitave në Peru, Kolumbi dhe Ekuador, ku skuadra do të luajë miqësore ndaj Alianza Lima, Atletico Nacional dhe Barcelona SC.
Messi ka luajtur tashmë në 49 vende të ndryshme, ndërsa udhëtimi i tij i fundit në Karaibe erdhi në Kupën e Kampionëve të Concacaf 2025, kur Inter Miami mposhti Cavalier FC të Xhamajkës me rezultat të përgjithshëm 4–0.
Që nga nënshkrimi me Inter Miamin në vitin 2023, Messi ka luajtur në Shtetet e Bashkuara, Meksikë, Kanada, Xhamajkë, Peru, Panama, Honduras, Hong Kong, Arabinë Saudite dhe Japoni. Tani, edhe Porto Riko do t’i shtohet kësaj liste me ndeshjen e ardhshme miqësore.
Edhe kundërshtari i Miamit do të udhëtojë një distancë të konsiderueshme për të mbërritur në Bayamon, pasi territori amerikan aktualisht nuk ka ekipe profesioniste – ekziston vetëm një ligë amatore, Liga Puerto Rico – e cila nuk do të ofronte përgatitje të mjaftueshme për fushatat e skuadrës amerikane në MLS 2026 dhe Kupën e Kampionëve të Concacaf.
Në epoka të mëparshme, megjithatë, një ekip profesionist nga Porto Riko mund të kishte qenë kundërshtar i mundshëm. Ishulli kishte më parë Puerto Rico Islanders, të cilët luajtën në North American Soccer League dhe USL First Division nga viti 2003 deri në shpërbërjen e tyre në vitin 2012.
Duke sjellë kampionët e Serie A të Ekuadorit, “Herons” do të përballen me një kundërshtar të fortë në testin e tyre të katërt parasezonal, ndërsa sytë janë tashmë nga starti i sezonit të rregullt të MLS 2026, me përballjen hapëse ndaj LAFC të Son Heung-min dhe Denis Bouanga më 21 shkurt./Telegrafi
Interi ka shënuar fitore të madhe në shtëpi ndaj Pisa, në kuadër të xhiros së 22-të në Serie A.
“Neurazzurët” triumfuan me rezultat të thellë 6-2, ku mysafirët faktikisht ishin në avantazh prej dy golave.
Stefano Moreo përfitoi nga një gabim i Yan Sommer për të zhbllokuar rezultatin pas 11 minutave lojë.
I njëjti u asistua nga Matteo Tramoni dhe me një goditje të bukur e finalizoi për ta dyfishuar epërsinë (23’).
Pas këtyre dy golave, Interi u këndell duke zhvilluar lojë krejtësisht tjetër. Fillimisht fituan një penallti, të cilën e finalizoi Piotr Zielinski (39’).
Kurse, dy minuta më vonë Lautaro Martinez shënoi me kokë për ta barazuar rezultatin pas harkimit të DiMarcos (41’).
Përmbysjen e madhe e siguroi Pio Esposito pas asistimit të Bastonit (45+2’).
Për golin e katërt u përkujdes Thuram që shënoi me një vollej fantastike pas tjetër asistimi të DiMarcos (82’).
Kurse, fitoren e vulosi talenti Ange-Yoan Bonny (86’). Në minutën e fundit, "Neurazzurët" realizuan sërish - këtë herë përmes Henrikh Mkhitaryan (90+3').
Interi vazhdon si lider me 52 pikë në Serie A ndërsa Pisa zë pozitën e fundit me 14 sosh./Telegrafi/
Manchester United po shtyn për bisedime urgjente me kapitenin Bruno Fernandes lidhur me të ardhmen e tij afatgjatë, mes shqetësimeve në rritje se mesfushori portugez mund të jetë lodhur nga ndryshimet e shpeshta të trajnerëve dhe të largohet gjatë verës.
Sipas “The i Paper”, disa drejtues të klubit frikësohen se Fernandes është gati të mbyllë kapitullin në “Old Trafford”, me klubet e Saudi Pro League – përfshirë ato që synojnë emra të mëdhenj si Mohamed Salah – që po përgatisin lëvizje të mëdha në verë, në një periudhë kur disa yje pritet të rikthehen në Evropë.
Vetë Fernandes e ka pranuar publikisht se është tunduar nga interesi saudit, ndërsa zyrtarët e United kërkojnë qartësi përpara se ai t’i bashkohet Portugalisë për Kupën e Botës 2026.
Kapiteni i “Djajve të Kuq” kishte deklaruar më herët se do ta trajtonte çështjen e së ardhmes pas turneut, por brenda klubit besohet se një afat i tillë do t’i linte shumë vonë për të planifikuar në mënyrë adekuate sezonin e ardhshëm.
Në këto rrethana, Manchester United po përgatitet për të dy skenarët: ose një shitje të leverdishme që do të gjeneronte fonde të konsiderueshme për investim, ose qëndrimin e Fernandes për të udhëhequr një proces ringritjeje.
Situata përshkruhet nga brenda si një skenar “fitore-fitore”, duke marrë parasysh përfitimin financiar potencial që do të sillte çdo transferim i mundshëm i portugezit./Telegrafi
Talenti Gert Behxheti ka nisur të ambientohet në futbollin spanjoll, si dhe po jep më të mirën për ta dëshmuar vetën, tani te FC Andorra, klub që bë gara në La Liga 2 dhe pronar të klubit ka legjend spanjolle të futbollit, Gerard Pique, ku do të qëndrojë deri në fund të sezonit 2025/26.
Pas shkëlqimit te Prishtina U17, Behxheti mori një mundësi të madhe në karrierë, ku u ftua fillmisht nga Osasuna dhe Mallorca për prova, në një periudhë një mujore, pastaj te FC Andorra, ku po qëndron aktualisht.
17-vjeçari gjatë një interviste për Telegrafi thotë se gjithçka po shkon për mrekulli, ku është pritur në mënyrë fantastike nga lojtarët e tjerë.
“Po kaloj shumë mirë, shokët e ekipit më kanë pritur shumë mirë dhe jam ambientuar për mrekulli. Po punoj fortë çdo ditë dhe po jap më shumë se maksimumin”.
I pyetur për dallimin mes nivelit të të rinjve të futbollit spanjoll dhe të Kosovës, Behxheti e pranoi se spanjollët janë në nivel më të lartë në të gjitha aspektet.
“Dallimi me futbollin e Kosovës është shumë i madh, gjithashtu intensiteti i stërvitjeve dhe lojve është shumë më i fortë. Përpos këtyre edhe në aspektin teknik dhe taktik janë dukshëm më të avancuar”.
Ai në fund shtoi se po tenton të përfitojë nga mundësia e artë për ta dëshmuar vetën tani te FC Andorra në La Liga 2, vetën në një ambient profesional dhe premtoi se do të jep më të mirën. Ai do të jetë në këtë klub deri në fund të sezonit 2025/26.
“Përparësitë janë të shumta, luan më shpejtë, ke mundësi më të mira për ta treguar vetën si dhe rritësh në një ambient profesional, ku futbolli është më shumë se një sport. Jam krenar që jam këtu dhe do të jap më të mirën time”, përfundoi ai për Telegrafi.
E ardhmja e Gert Behxhetit mbetet për t’u parë, por ky hap i madh është vetëm fillimi i rrugës së tij drejt niveleve më të larta të futbollit profesionist. Në të njëjtën kohë, është një histori frymëzuese për futbollin kosovar që po dëshmon se është gati të prodhojë yjet e së ardhmes. /Telegrafi/
Qendërmbrojtësi i Interit, Alessandro Bastoni, është shndërruar në një objektiv konkret për Barcelonën dhe Liverpoolin, ndërsa vetë lojtari tashmë ka bërë të qartë dëshirën e tij për hapin e radhës në karrierë.
Kontrata e Bastonit me Interin është e vlefshme deri në vitin 2028, por kjo nuk i ka ndalur klubet e mëdha të Evropë që të pozicionohen për një lëvizje të mundshme në verën e ardhshme, në një merkato ku pritet kërkesë e madhe për qendërmbrojtës të nivelit të lartë.
Në këtë kontekst, Bastoni pritet të ketë oferta konkrete në tavolinë, ndërsa edhe Interi do të jetë i gatshëm të dëgjojë propozime serioze financiare. Mes gjithë këtyre spekulimeve, italiani ka sinjalizuar qartë preferencën e tij.
Aktualisht, në garë janë dy opsione kryesore. Liverpooli ka shfaqur interes të fortë, sidomos pas dështimit për të siguruar shërbimet e objektivit kryesor Marc Guehi, i cili përfundoi te Manchester City.
Megjithatë, sipas “AS”, drejtori sportiv i Barcelonës, Deco, është plotësisht i informuar se Alessandro Bastoni e dëshiron një transferim te “Camp Nou”.
Problemi kryesor për katalanasit mbetet bindja e Interit, pasi klubi zikaltër kërkon një shumë të konsiderueshme financiare, ndërkohë që Barcelona vazhdon të operojë nën kufizime të forta buxhetore.
Bastoni ka kaluar pothuajse një dekadë te Interi dhe konsiderohet si një nga qendërmbrojtësit e majtë më të kompletuar në Evropë.
Edhe pse publikisht ka deklaruar se është i lumtur në Itali, burime pranë lojtarit sugjerojnë se ai do të ishte i hapur për një sfidë të re, nëse paraqitet një projekt bindës sportiv.
Barcelona e vlerëson shumë profilin e tij dhe e sheh si një përshtatje ideale stilistike për filozofinë e lojës së klubit. Megjithatë, Interi nuk është nën asnjë presion për ta shitur, për shkak të kohëzgjatjes së kontratës së Bastonit.
Për këtë arsye, zikaltërit kanë vendosur një çmim rreth 70 milionë euro. Me Liverpoolin të gatshëm të investojë fuqishëm për ta përforcuar repartin defensiv, Barcelona mund të detyrohet të lëvizë shpejt nëse dëshiron ta fitojë garën për nënshkrimin e Alessandro Bastonit./Telegrafi
Rikthimi i Kostas Tsimikas te Liverpooli nga Roma duket edhe më i mundshëm, pasi disa burime raportojnë se “Reds” janë gati t’i drejtohen klubit italian për të ndërprerë huazimin e mbrojtësit.
Reprezentuesi i Greqisë pritet të kthehet në “Anfield” gjatë këtij muaji, sidomos nëse Andy Robertson realizon kalimin te Tottenham. Mediat italiane kishin raportuar që në fillim të javës se Roma ishte e gatshme ta dërgonte Tsimikasin mbrapsht, pasi 29-vjeçari nuk ka bindur gjatë periudhës së tij të huazimit në Olimpico.
Tashmë, sipas gazetarëve Ben Jacobs dhe Fabrizio Romano, Liverpooli është i përgatitur të bëjë një kërkesë zyrtare për rikthimin e Tsimikasit, me Robertson që është pranë transferimit te Tottenham.
Kapiteni i Skocisë raportohet se është i etur për t’u zhvendosur në Londrën e Veriut, çka do ta bënte Tsimikasin zëvendësuesin e tij në skuadrën e Liverpoolit.
Ben Jacobs shton se burime pranë Tsimikasit konfirmojnë se vetë lojtari është i interesuar për një rikthim te Liverpooli.
Mbrojtësi i majtë grek ka grumbulluar vetëm 672 minuta lojë gjatë huazimit te Roma, duke dhënë një asistim në 16 paraqitje gjithsej./Telegrafi
Login
