Real Madrid ka plane për të nënshkruar me një mbrojtës të ri qendror verën e ardhshme, duke pasur parasysh se mund të humbasin dy opsione të skuadrës së parë.

David Alaba pritet të largohet pas rënies në hierarkinë e skuadrës gjatë viteve të fundit, dhe mund t’i bashkohet Antonio Rudiger, i cili gjithashtu ka kontratë që skadon në qershor.

Në javët e fundit, disa mbrojtës qendrorë janë lidhur me Real Madridin. Ibrahima Konate i Liverpool ishte më i përfoluri, por një lëvizje për ta nënshkruar si lojtar i lirë është përjashtuar nga zyrtarët e Bernabeut.

Dayot Upamecano dhe Marc Guehi gjithashtu janë përfolur, por në rastin e fundit, ai gjithashtu do të mos konsiderohet.

Sipas ESPN, Real Madrid nuk ka plane për të nënshkruar me Guehi gjatë muajve në vijim, pavarësisht që lojtari është i hapur për t’iu bashkuar skuadrës së Xabi Alonsos.

Ky qëndrim mund të shpjegojë pse reprezentuesi anglez është më afër për t’u bashkuar me kampionët aktualë të Ligës Premier, Liverpool.

Interesante është se raporti thekson se Real Madrid kanë filluar të shqyrtojnë opsione të tjera, duke përfshirë Jeremy Jacquet dhe Nico Schlotterbeck.

I pari ka qenë në radar për 18 muaj, ndërsa për rastin e fundit, ai mund të jetë një mundësi e tregut për shkak se kontrata e tij me Borussia Dortmund skadon në 2027, megjithatë paga mund të jetë një çështje./Telegrafi/

Robert Lewandowski raportohet se ka bërë një hap më afër largimit nga Barcelona, teksa përfaqësuesit e tij po përgatiten të zhvillojnë një raund të ri bisedimesh me përfaqësues nga Arabia Saudite për një transferim të mundshëm dhe shumë fitimprurës në Lindjen e Mesme.

Reprezentuesi i Polonisë po ashtu është në radarin e klubit të MLS-së, Chicago Fire, në prag të skadimit të kontratës së tij në fund të sezonit.

Sipas një raporti të ri nga e përditshmja spanjolle AS, agjenti izraelit i Lewandowskit, Pini Zahavi, pritet të zhvillojë një takim të ri me zyrtarët e Arabisë Saudite përpara hapjes së afatit kalimtar të janarit, më 1 janar.

Raporti pretendon se Lewandowski tashmë ka marrë një ofertë nga Lindja e Mesme, ndonëse nuk specifikohet se cilat klube janë të interesuara për shërbimet e sulmuesit, i cili këtë sezon ka shënuar tetë gola në 18 paraqitje në të gjitha garat me Barcelonën.

37-vjeçari besohet se është i tërhequr nga mundësia për të luajtur në Lindjen e Mesme, ku Superliga e Arabisë strehon disa nga emrat më të mëdhenj të futbollit botëror, përfshirë Al-Nassr me yllin portugez Cristiano Ronaldo, si dhe dyshen e Al-Ittihad, Karim Benzema dhe N’Golo Kante.

Në një raport të veçantë të BBC më herët gjatë këtij muaji, u bë e ditur se përfaqësuesit e Leëandoëskit kanë zhvilluar bisedime edhe me Chicago Fire për një transferim të mundshëm në Shtetet e Bashkuara të Amerikës.

Chicago Fire, klub që më parë ka tentuar të transferojë emra të mëdhenj si Neymar dhe Kevin De Bruyne në vitin 2025, raportohet se e ka vendosur Lewandowskin si objektiv prioritar për të paktën gjashtë muaj, veçanërisht duke pasur parasysh se Çikago ka komunitetin më të madh polak në SHBA./Telegrafi/

E ardhmja e Mohamed Salah te Liverpool është rikthyer në qendër të vëmendjes pas raporteve që tregojnë për një qasje nga Fenerbahce, ndërkohë që po rritet spekulimi rreth rolit të tij nën drejtimin e Arne Slot.

Megjithatë, agjenti i yllit egjiptian ka reaguar për të sqaruar situatën dhe për të përjashtuar mundësinë e një transferimi në Stamboll, duke dhënë qartësi mbi të ardhmen e menjëhershme të 33-vjeçarit.

Raportohet se Salah ka përjashtuar mundësinë e bashkimit me gjigantin turk Fenerbahce, pas kontakteve të drejtpërdrejta mes klubit të Stambollit dhe përfaqësuesve të tij.

Ky zhvillim ndodh në një kohë kur e ardhmja e sulmuesit të Liverpoolit është nën vëzhgim të shtuar për shkak të rolit të reduktuar që ka pasur te skuadra këtë sezon.

Sipas raporteve nga Turqia, zyrtarët e Fenerbahçes zhvilluan bisedime me agjentin e gjatë të Salah, Ramy Abbas, më herët gjatë kësaj jave.

Qëllimi i takimit ishte të shqyrtohej nëse ndërkombëtari egjiptian do të konsideronte një lëvizje drejt Stambollit, me palën turke të vetëdijshme për spekulimet se Salah është ndjerë i pasigurt te Liverpool nën drejtimin e trajnerit Slot.

Agjenti i Salah, Abbas, nuk la shumë vend për paqartësi kur iu përgjigj interesimit të klubit turk, ndërkohë që ish-lojtari i Chelseat përfaqëson Egjiptin në Kupën e Afrikës.

"Salah do të qëndrojë ose te Liverpool, ose do të shkojë në Arabinë Saudite”, raportohet të ketë thënë Abbas për përfaqësuesit e Fenerbahces, sipas portalit turk sabah.com.tr./Telegrafi/

Real Madridi është lidhur me një transferim të mundshëm për një mesfushor që nga largimi i Toni Kroosit dy sezone më parë, por gjithnjë e më shumë po duket se klubi madrilen mund të dalë në treg verën e ardhshme për ta plotësuar këtë pozicion.

Një nga emrat që është përfolur më së shumti është mesfushori i AZ Alkmaar, Kees Smit.

Mesfushori holandez 19-vjeçar ka qenë në radar të Real Madridit dhe Barcelonës gjatë vitit 2025, por publikisht ka deklaruar se dëshiron të vazhdojë zhvillimin e tij në Eredivisie.

Së bashku me Adam Wharton dhe Rodri Hernandez, ai është një nga pak lojtarët për të cilët “Los Blancos” duket se janë bindur për këtë rol.

Dëshira e vetë Smitit për të luajtur rregullisht dhe për t’u zhvilluar gradualisht ka ndihmuar pa dyshim AZ Alkmaar që ta mbajë talentin e tyre në rritje.

Megjithatë, një numër klubesh të mëdha tani duket se po e ndjekin nga afër situatën, dhe një transferim i madh financiar nuk përjashtohet në vitin 2026.

Sipas The Athletic, nëse AZ vendos ta shesë Smitin, do të kërkojë një shumë prej 60 milionë eurosh.

Real Madridi ka investuar më parë shuma të mëdha në talente të rinj, me Vinicius Junior që u transferua për 40 milionë euro, ndërsa Endrick u ble për 35 milionë euro plus 25 milionë në bonuse, shifër që potencialisht mund të arrijë shumën e kërkuar nga AZ Alkmaar për Smitin./Telegrafi/

Legjenda e Manchester Unitedit, Louis Saha, u ka bërë thirrje “Djajve të Kuq” që ta transferojnë Morgan Rogers gjatë afatit kalimtar të janarit.

Manchester United do të hyjë në një ndeshje të Ligës Premier pa Bruno Fernandes vetëm për herë të dytë në gati gjashtë vjet, kur të presë Newcastle United, një mungesë e rrallë që ka rritur debatet rreth kreativitetit dhe thellësisë në repartin kreativ të skuadrës.

Mungesa e portugezit pritet të lërë një boshllëk të madh në formacionin e Ruben Amorimit, në një moment kur diferencat në krye të tabelës janë minimale dhe çdo detaj ka peshë të madhe.

Duke folur për FootItalia, Saha vlerësoi se Rogers përfaqëson profilin ideal për t’i dhënë energji dhe kreativitet mesfushës së Amorimit.

“Besoj se Manchester United ka bërë disa lëvizje shumë të mira dhe më ka pëlqyer të shoh rritjen e ekipit. Portieri Senne Lammens ishte një transferim i shkëlqyer dhe mendoj se ka ndihmuar shumë në stabilitetin tonë”.

“Në janar, shoh nevojën për një përforcim që mund të ndezë kreativitetin në mesfushë. Përveç Bruno Fernandes dhe Mason Mount, ka nevojë për shpejtësi dhe dinamizëm në krijimin e lojës”.

“E shoh Rogers si një lojtar që mund të shpërthejë përpara, por edhe të përballojë presionin, ta mbajë topin dhe t’u japë kohë lojtarëve të tjerë të pozicionohen më mirë”.

“Ai është tipi i lojtarit që i duhet Unitedit. Është një profil shumë interesant dhe i rrallë, sepse shumë lojtarë janë atletikë, por të bësh zgjedhjet e duhura me atë atletizëm nuk është e lehtë. Prandaj, Rogers mund të jetë një transferim ëndrrash”, ka deklaruar ai./Telegrafi/

Disa, si Karl-Heinz Rummenigge, menduan se ishte çmenduri. "E përgëzoj Stuttgartin që gjeti një idiot që do të paguante kaq shumë para për Woltemade", deklaroi legjenda e Bayern Munich me një sinqeritet të jashtëzakonshëm. Bayern, rastësisht, kishte bërë gjithashtu një ofertë për sulmuesin në afatin e verës. Fjalët e Rummenigges ishin të ashpra në përshkrimin e kalimit të sulmuesit gjerman në Newcastle verën e kaluar. Nënshkrimi i tij sigurisht që nuk la askënd indiferent.

Historia e Nick Woltemade, tani 23 vjeç, duket e pabesueshme. Të thuash se vlera e tij është rritur me 833% në vetëm një vit, sipas të dhënave të Transfermarkt, tingëllon si një përrallë. Megjithatë, është shumë reale.

Më 20 dhjetor 2024, ai luante për VfB Stuttgart, një ekip të cilit i ishte bashkuar si transferim i lirë nga Werder Bremen verën e kaluar, dhe vlerësimi i tij në fund të vitit të kaluar ishte 7.5 milionë euro. Tani, 12 muaj më vonë, ai është bërë transferimi më i shtrenjtë i të gjitha kohërave i Newcastle, me klubin që pagoi 85 milionë euro për shërbimet e tij - një marrëveshje që provokoi një reagim të zemëruar nga Rummenigge.

Vlerësimi i tij në Transfermarkt është rritur në 70 milionë euro, një rritje prej 62.5 milionë eurosh krahasuar me vitin e kaluar, që përkthehet në një shifër marramendëse prej 833%.

Ngritja e gjigantit Woltemade, i cili është gati dy metra i gjatë (198 centimetra për të qenë i saktë), ka qenë spektakolar në muajt e fundit. Ai e përfundoi sezonin e kaluar në Stuttgart me 17 gola në 33 paraqitje në të gjitha garat dhe më pas fitoi Këpucën e Artë në Kampionatin Evropian U-21, ku shënoi gjashtë gola.

Ai ishte tashmë në rrugën e tij për t'u bërë një yll. Por para kësaj, në sezonin 2023/24, gjërat nuk ishin shumë të mira: ai kishte shënuar vetëm dy gola në Bundesligë në 30 ndeshje për Werder Bremen, gjë që, megjithatë, nuk e pengoi Stuttgartin ta nënshkruante zyrtarisht atë në maj 2024. Është e vërtetë që ai mbërriti si transferim i lirë. Ai nënshkroi deri në vitin 2028, por koha e tij në Stuttgart ishte e destinuar të ishte e shkurtër.

"Nick demonstroi cilësitë e tij sezonin e kaluar dhe e vendosi veten në Bundesligë. Ai është një sulmues i fuqishëm, por edhe i aftë, zhvillimin e të cilit e kemi ndjekur nga afër. Jemi të bindur se Woltemade do të vazhdojë zhvillimin e tij pozitiv me ne dhe do të bëhet një lojtar kyç në sulmin tonë", ka thënë drejtori sportiv i VfB, Fabian Wohlgemuth dhe ai e bëri me të vërtetë mirë, pasi kjo është pikërisht ajo që ndodhi.

Sepse pastaj, ju e dini pjesën tjetër: një vit te Stuttgart, 17 gola dhe një transferim rekord te Newcastle. Një lëvizje që shkaktoi një ndryshim sizmik në treg. "Dua të vdes i lumtur për nënshkrimin e Woltemade", u ankua Klaus Filbry, drejtori i Werder Bremen. Fjalët e tij erdhën pasi u zbulua shuma e madhe e paguar për mbërritjen e sulmuesit në Ligën Premier dhe pasi klubi i tij, Werder Bremen, e kishte lënë të lirë sezonin e kaluar.

Pavarësisht humbjes së marrëveshjes, Filbry ishte i lumtur për Woltemade. "Urime Stuttgartit që nënshkroi një lojtar falas dhe e shiti atë një vit më vonë, pas 7 ose 8 muajsh, për 85 ose 90 milionë. Jam i lumtur për Nick. Ai është një djalë i shkëlqyer. Ne, në të njëjtën kohë, marrim një përqindje të tarifës së transferimit si një pagesë solidariteti", vazhdoi ai.

Aventura e sulmuesit gjerman në Ligën Premier po fillonte. Në fund të gushtit, më 30, transferimi i tij te Newcastle u bë zyrtar, duke shënuar fillimin e një kapitulli të ri për Wolterman. "Largimi nga Gjermania është një hap i madh në jetën time, por të gjithë më kanë pritur aq ngrohtësisht saqë tashmë ndihem si pjesë e familjes. Pasi fola me trajnerin, kam ndjesinë se ky është vendi ideal për të arritur potencialin tim të plotë", deklaroi gjermani pas mbërritjes në Angli.

Deri më tani, ai ka shënuar nëntë gola, shtatë në Ligën Premier, një në Ligën e Kampionëve dhe një në Kupën EFL, dhe ka dhënë dy asistime në 23 ndeshje në të gjitha garat me Newcastle.

Woltemade është një sulmues shumë i kompletuar. "Ai është i fortë në shumë aspekte, ka aftësi të shkëlqyera teknike dhe ka provuar të jetë një kërcënim i vërtetë në një nga ligat më të mira të Evropës, por ai është gjithashtu ende në një moshë ku ka shumë hapësirë për t'u zhvilluar dhe për t'u rritur këtu", tha Eddie Howe, trajneri i tij te Newcastle United, kur mbërriti sulmuesi gjerman.

Përveç një gjuajtjeje të fuqishme, ai ka aftësinë për të bërë vrapime pa top dhe vizionin për t'u kombinuar me shokët e ekipit . Është pikërisht kjo lehtësi e lidhjes me të tjerët që Howe, tani që e njeh më mirë, thekson: "Shumë herë ai është personi që bën pasimin për anësorët që ta marrin topin, kështu që përfshirja e tij pothuajse gjithmonë varet nga aftësia e tij për të arritur atë krosim”.

Rudi Voller, drejtor sportiv i Federatës Gjermane të Futbollit, ndan të njëjtin mendim. Edhe ai është një admirues i Nick dhe kënaqet duke e parë të luajë për ekipin kombëtar. "Është kënaqësi ta shohësh të luajë. Ai jo vetëm që shënon gola, por di edhe si të lidhet me shokët e ekipit, gjë që e bën edhe më të vlefshëm", tha ai verën e kaluar, kur Nick ishte golashënuesi më i mirë në Kampionatin Evropian U-21.

Duke parë performancën e tij në Ligën Premier, Voller shkon edhe më tej. "Tani askush nuk flet për 85 milionë eurot që paguan për transferimin e tij te Newcastle. Në fund, ishte praktikisht një marrëveshje e mirë [qesh]. Cilësia e tij është vërtet e jashtëzakonshme", tha Voller për Kicker disa ditë më parë.

Jeta e tij në Angli... me mikun e tij më të mirë

Përveç performancës së tij në fushë, Woltemade njihet si një lojtar i qetë në jetën e tij personale. Të paktën, kjo është ajo që thonë ata që e njohin. "Jashtë fushës, ai është shumë i mirë. Nuk duket i shqetësuar. Ka mbërritur në një vend tjetër dhe nuk ka shkaktuar ndonjë trazirë", komentoi Howe.

Bëri bujë të madhe në Angli fakti që Woltemade solli shokun e tij më të mirë për të jetuar me të. "Nuk e di pse të gjithë flasin për këtë. Mendoj se është normale kur mbërrin në një vend të ri", tha sulmuesi në një konferencë për shtyp kur u pyet për këtë. "Jam këtu vetëm, kështu që e pyeta shokun tim më të mirë: 'A do të vish me mua në Newcastle?'", shpjegoi lojtari me qetësi.

Meqenëse Nick rrallë jep diçka për të folur në jetën e tij personale, shtypi dëshiron ta dijë dhe madje e ka pyetur nëse ka takuar ndonjë vajzë në Angli deri më tani. "Jo, kam shumë ndeshje, kështu që nuk kam takuar askënd", u përgjigj sulmuesi me një buzëqeshje.
Ajo që Woltemade ka gjetur me siguri te Newcastle është suksesi në fushë. Kjo është arsyeja pse vlera e tij është 833% më e lartë se vitin e kaluar. E pabesueshme. /Telegrafi/

Marrëdhëniet mes Paris Saint-Germain dhe Real Madridit nuk janë më të mirat, pas transferimit të Kylian Mbappes, por klubi francez duket i vendosur të ndërmarrë një ofensivë për një prej lojtarëve të skuadrës së Xabi Alonsos që ka gjasa të largohet nga Santiago Bernabeu.

Që kur PSG nisi të kryente transferime milionëshe që e vendosën në qendër të vëmendjes në futbollin evropian dhe synuan Ligën e Kampionëve, marrëdhëniet me Real Madridin kanë pasur ulje-ngritje.

Sipas burimeve, klubi francez tashmë po synon një përforcim në mbrojtjen qendrore të “Los Blancos” për sezonin 2026.

Problemet në mbrojtjen e Real Madrid

Real Madridi ka një skuadër të gjerë, por zhvillimet e fundit kanë treguar se mbrojtja qendrore nuk është planifikuar mjaftueshëm mirë.

Fillimisht, Dean Huijsen dhe Eder Militao ishin parashikuar si titullarë, por performanca e huajit ka rënë në javët e fundit, ndërsa lëndimet kanë penguar brazilianin të mbulojë boshllëqet.

Në këtë situatë, trajneri Xabi Alonso nuk mund të mbështetet te David Alaba, i cili ndjen dhimbje në gjurin e tij kur luan më shumë se tre ndeshje radhazi, ashtu si dhe te Antonio Rudiger, i cili për shkak të artrozës në gjurin e tij nuk mund të rikthehet në formën që e bëri një nga qendërmbrojtësit më të mirë të Evropës në 2024.

Raul Asencio, zgjidhja emergjente

Në mungesë të David Alabas dhe Antonio Rudiger, Raul Asencio po luan një rol kyç, duke u aktivizuar pothuajse në çdo ndeshje dhe në pozicione të ndryshme, qoftë si qendërmbrojtës, qoftë si mbrojtës i djathtë.

Fillimisht, konsiderohej një opsion rezervë, por tani po përfiton nga koha e shtuar e lojës për të treguar potencialin e tij.

PSG në kërkim të Rudigerit

Sipas raportimeve të gazetës ‘El Nacional’, PSG po tenton të bindë Rudiger me një kontratë të majme, duke marrë parasysh se kjo mund të jetë paga e tij e fundit e madhe në karrierë.

Nga ana tjetër, drejtuesit e Real Madridit duket se janë më të gatshëm ta lejojnë largimin e gjermanit sesa ta mbajnë.

Kjo ofertë mund të shërbejë si shtysë për një transferim të mundshëm.

Antonio Rudiger, 32 vjeç, ka luajtur 50 ndeshje me Real Madridin në të gjitha kompeticionet, duke kaluar mbi 4,000 minuta në fushë, me 3 gola të shënuar dhe pa asistime. /Telegrafi/

Interi po sheh përpara drejt afatit të ardhshëm dimëror të transferimeve, i cili hapet pas pak ditësh.

Ndër emrat që zikaltërit duket se po shqyrtojnë është edhe Federico Chiesa.

Sipas Alfio Musmarrës, gazetar i lidhur ngushtë me Interin, klubi ka shprehur tashmë interesim pranë Liverpoolit.

Marrëveshja mund të realizohet në formën e huazimit me opsion blerjeje.

Ideja e transferimit të Federico Chiesës vjen nga fakti se lojtari mund t’i japë Cristian Chivut mundësinë të kalojë në skemën 3-4-2-1 kur të jetë e nevojshme.

Gjithashtu ai mund të shërbejë si alternativë në krahun e djathtë, duke pasur parasysh se në disa rrethana, veçanërisht te Fiorentina dhe Juventusi, italiani ka luajtur herë pas here në atë pozicion.

Deri më tani gjatë vitit 2025, Chiesa ka zhvilluar rreth 30 ndeshje në të gjitha garat me Liverpoolin, duke numëruar katër gola dhe dy asistime./Telegrafi/

Dani Carvajal po përballet me një nga momentet më delikate të karrierës së tij profesionale.

Mbrojtësi i djathtë i Real Madridit e sheh kontratën e tij duke përfunduar verën e ardhshme dhe, në moshën 34-vjeçare, gjithçka tregon se klubi madrilen nuk do t’i ofrojë rinovim.

Dëmtimet e grumbulluara gjatë sezoneve të fundit kanë pasur një peshë të madhe në reflektimin e brendshëm të klubit.

Në Valdebebas ekziston një respekt i thellë për figurën e Dani Carvajalit, një nga simbolet më të mëdha të ciklit më të suksesshëm të klubit në La Liga.

Megjithatë, planifikimi sportiv mbizotëron dhe Real Madridi tashmë po punon mbi idenë e një ndryshimi brezash në pozicionin e mbrojtësit të djathtë.

Konsumimi fizik ka qenë vendimtar. Dani Carvajal është përballur me probleme të përsëritura muskulore që e kanë penguar të ruajë rregullsinë konkurruese të kërkuar në nivelin më të lartë.

Në Real Madrid besohet se koha e lojtarit në elitën e futbollit evropian po i afrohet fundit.

Ndërkohë, klubi nuk dëshiron të improvizojë. Drejtoria sportive ka analizuar profile të ndryshme prej muajsh për të zëvendësuar Dani Carvajalin dhe një nga emrat që gëzon konsensus më të madh ka një komponent të fortë emocional: Alex Jimenez.

I formuar në akademinë e Real Madridit, Jimenez u largua nga klubi në kërkim të minutave të lojës dhe zhvillimit profesional.

Edhe faktori ekonomik luan në favor. Alex Jimenez ka një vlerë tregu rreth 18 milionë euro, një shifër e përballueshme për Real Madridin, veçanërisht kur krahasohet me alternativa të tjera në tregun ndërkombëtar./Telegrafi/

Klubi katalunas, Barcelona thuhet se ka mundësi për të marrë qendërmbrojtësin e Chelseat, Axel Disasi, por Blutë nuk lejojnë marrëveshje huazimi.

Blaugranët po kërkojnë të rekrutojnë një qendërmbrojtës në afatin kalimtar dimëror pas dëmtimit të ligamentit të kryqëzuar anterior të Andreas Christensen, i cili do ta lërë atë jashtë fushave për të paktën katër muaj.

Sipas gazetarit Fabrizio Romano, Barcelonës i është ofruar mundësia për të nënshkruar me mbrojtësin e Chelseat, Axel Disasi, në janar.

Megjithatë, pika kritike është se Chelsea nuk do ta lejojë Disasin të largohet në formë huazimi, me një transferim të përhershëm si opsionin e vetëm të mundshëm.

Duke pasur parasysh kufizimet e tyre në Fair Play Financiarit, do të jetë e vështirë për Blaugranat të paguajnë një tarifë të konsiderueshme.

Qendërmbrojtësi i Bournemouth, Marcos Senesi, është një objektiv alternativ për kampionët e La Ligës, por ai ka më shumë gjasa të jetë i disponueshëm si lojtar i lirë verën e ardhshme. /Telegrafi/

Manchester United vazhdon të mbajë kontakte për mesfushorin Conor Gallagher, megjithatë Atletico Madrid po qëndron i palëkundur në kërkesën e tyre për një transferim të përhershëm, raporton Fabrizio Romano.

Sipas Romanos, klubi madrilen po e prioritarizon një marrëveshje definitive me vlerë rreth 30 milionë euro dhe aktualisht nuk është i gatshëm të marrë në konsideratë një huazim.

Ky ka qenë i njëjti qëndrim edhe gjatë ditëve të fundit të afatit kalimtar veror, kur Manchester United kishte shqyrtuar një lëvizje të minutës së fundit për Gallagherin.

Pavarësisht lidhjeve të reja mes lojtarit dhe “Djajve të Kuq”, pozicioni i Atleticos mbetet i pandryshuar: ose transferim i përhershëm, ose nuk ka marrëveshje. Man United vazhdon të mbajë komunikim me njerëz të afërt të mesfushorit anglez, por mesazhi që vjen nga Madridi është i qartë.

Gallagher, i cili ka qenë pjesë e rëndësishme e skuadrës së Atleticos këtë sezon, vlerësohet shumë për energjinë, intensitetin dhe aftësinë për të mbuluar disa role në mesfushë.

Pikërisht këto cilësi e bëjnë atë një objektiv interesant për Manchester United, që po kërkon të forcojë repartin e mesfushës për pjesën e dytë të sezonit. /Telegrafi/

Klubi ukrainas Polissya Zhytomyr ka finalizuar edhe transferimin e mbrojtësit të Kolos dhe lojtarit të Kombëtares së Kosovës, Ilir Krasniqi.

Kjo lëvizje është pjesë e angazhimeve të vazhdueshme të klubit ukrainas në tregun e transferimeve për të forcuar ekipin për sezonin e ardhshëm, pasi sot gjatë ditës prezantoi Lindon Emërllahun.

Sipas raportimeve të mediumit ukrainas sport.ua ,prezantimi i lojtarit do të bëhet së shpejti, ndoshta gjatë natës së Vitit të Ri.

Ana financiare e marrëveshjes ende nuk është zbuluar, megjithatë më parë mediat raportuan një shifër rreth 2 milionë eurosh.

Transfermarkt e vlerëson Krasniqin me 1 milion euro. Ai iu bashkua Kolos në verën e vitit 2024 dhe kishte kontratë deri në verën e vitit 2027.

Në sezonin 2025/26, Krasniqi luajti 14 ndeshje në UPL, duke shënuar një gol.

Krasniqi ka 17 paraqitje me ekipin kombëtar të Kosovës dhe vazhdon të jetë një lojtar aktiv i ekipi tone që po lufton për play-off. /Telegrafi/

Klubi ukrainas, FC Polissya Zhytomyr ka njoftuar zyrtarisht transferimin e mesfushorit kosovar, Lindon Emërllahu nga CFR Cluj.

Pritjes i erdhi fundi. Emërllahu është prezantuar tashmë si lojtar i ri i ukrainasve të Polissya Zhytomyr.

Është vet faqja zyrtare e klubit ukrainas që ka prezantuar lojtarin, teksa ka zbuluar detajet e marrëveshjes.

“Klubi i futbollit Polissya ka arritur një marrëveshje për bashkëpunim me mesfushorin kosovar Lindon Emërllahu”.

“Kontrata me lojtarin është nënshkruar për një periudhë trevjeçare. Lojtari do të luajë nën numrin 14. Mirë se vini në grup, Lindon!”, thuhet në njoftim.

Ndryshe, këtë sezon, mesfushori therandas luajti 24 ndeshje, në të cilat shënoi 4 gola dhe 2 asistime si pjesë e CFR Cluj në Rumuni. /Telegrafi/

Sipas mediumit Gazzetta dello Sport, objektivi më i madh i transferimit të Juventusit ka një emër: Sandro Tonali i Newcastle United.

Marrëveshja është e ndërlikuar, por jo e pamundur. Në klub, askush nuk e konsideron të pamundur, sepse në futboll, veçanërisht kur përfshihet gatishmëria e lojtarit - edhe marrëveshjet më komplekse mund të gjejnë një rrugëdalje.

Tonali është vendosur te Newcastle, por ideja e rikthimit në Itali i pëlqen atij, veçanërisht nëse destinacioni është një klub i nivelit të lartë. Në Serie A, Juventusi aktualisht duket të jetë opsioni i vetëm realist në atë nivel.

Ndërkohë, Newcastle nuk ka ndërmend ta lërë mesfushorin italian të largohet lehtësisht. Çdo mundësi e mundshme do të vinte vetëm nëse lojtari e kërkon shprehimisht dhe nëse një ofertë përmbush pritjet e klubit.

Këtu qëndron sfida: Juventusi nuk mund të përballojë menjëherë një investim të madh. Po merren në konsideratë zgjidhje alternative, të tilla si një huazim me opsion blerjeje të lidhur me kualifikimin në Ligën e Kampionëve sezonin e ardhshëm. Kjo do të zvogëlonte rrezikun, duke mundësuar njëkohësisht një nënshkrim të profilit të lartë.

Për ta bërë marrëveshjen të zbatueshme, Juventusi së pari do të duhet të krijojë hapësirë - si në skuadër ashtu edhe në buxhet. Një zgjidhje e mundshme përfshin pagën e Tonalit, rreth 7 milionë euro plus bonuse, pak mbi kufirin e ri të pagave të Juventusit prej rreth 6 milionë eurosh, të vendosur me arritjen e Jonathan David.

Lojtari kanadez mund të bëhet një lojtar kyç: integrimi i tij nuk e ka bindur plotësisht, dhe nëse Newcastle tregon interes për një negociatë më të gjerë, Juventusi mund të marrë në konsideratë ndryshime të menjëhershme.

Nga ana tjetër, drejtori sportiv i klubit, Comolli, mund të ndjekë shitje të synuara. Fokusi është te Miretti, një produkt i akademisë së të rinjve i vlefshëm për fitimet kapitale, dhe Adzic, i cili ka kosto dhe potencial tregu më të ulët. Mundësi të tjera të minutës së fundit për të balancuar llogaritë nuk mund të përjashtohen.

Ëndrra mbetet sfiduese, por jo e pamundur. Te Juventusi e dinë se me lëvizjet e duhura dhe gatishmërinë nga të gjitha palët, Tonali mund të mos jetë më vetëm një dëshirë. /Telegrafi/

Klubi ukrainas, FC Polissya Zhytomyr është gati ta prezantojë si lojtar të ri reprezentuesin e Kosovës, Lindon Emërllahu.

Emërllahu pritet ta vazhdoj karrierën në Superligën e Ukrainës, pasi presidenti i CFR Cluj konfirmoi para disa ditësh shitjen e tij te Polissya Zhytomyr.

Cluji do të përfitojë 1.5 milionë euro si dhe ka 15 për qind në shitjen e radhës, ndërsa Emërllahu pritet të zyrtarizohet shumë shpejt te skuadra e re.

E kryer: Presidenti i Clujit e konfirmon shitjen e Lindon Emërllahut te Polissya Zhytomyr

Se zyrtarizimi i ish-yllit të Ballkanit te klubi ukrainas është afër, këtë e tregon një postim i fundit i tyre në rrjetet sociale.

Faqja zyrtare e Polissya Zhytomyr ka publikuar një fotografi enigmatike, por që vërehet se është transferimi i tyre i ri, Emërllahu.

Në postim ata kanë vendosur një bredh, duke paralajmëruar se reprezentuesi i Kosovës do të jetë “dhurata” e Krishtlindjeve dhe Vitit të Ri për tifozë.

Ndryshe, Polissya Zhytomyr e ka mbyllur pjesën e parë të sezonit në pozitën e tretë me 30 pikë apo pesë ma pak se LNZ dhe Shakhtar që renditen në vendin e parë dhe të dytë. /Telegrafi/

Barcelona, nën drejtimin e trajnerit Hansi Flick dhe drejtorit sportiv Deco, ka përcaktuar prioritetet për afatin kalimtar të verës 2026, sipas La Vanguardia.

Prioriteti kryesor është afrimi i një mbrojtësi qendror, për shkak të problemeve të vazhdueshme me dëmtimet e Andreas Christensen dhe formës jo të qëndrueshme të Ronald Araujo.

Po ashtu, në plan është edhe zëvendësimi i Inigo Martinez, i cili u largua në drejtim të Al-Nassr.

Një tjetër fokus i rëndësishëm është përforcimi i repartit ofensiv. Pavarësisht paraqitjeve të mira të Raphinha dhe Lamine Yamal, klubi kërkon më shumë alternativa si në krahë, ashtu edhe në qendër të sulmit.

Marcus Rashford është një nga objektivat kryesorë, me Barcelonën që po shqyrton mundësinë e një transferimi të përhershëm prej rreth 30 milionë eurosh për sulmuesin anglez.

Në rast se Robert Lewandowski largohet, klubi katalanas do të synojë afrimin e një sulmuesi të nivelit të lartë për të ruajtur cilësinë e golave.

Strategjia e verës së Barcelonës parashikon një “mini-ristrukturim” të skuadrës, me synim rritjen e thellësisë së ekipit dhe konkurrueshmërisë për sezonin 2026-2027./Telegrafi/

CFR Cluj ka marrë një ofertë konkrete prej 2 milionë eurosh për sulmuesin anësor, kosovarin Meriton Korenica.

Futbollisti ynë po kërkohet nga Apollon Limassol, klub nga kampionati i Qipros, i cili po synon përforcime të rëndësishme gjatë afatit kalimtar të dimrit.

Sipas burimeve të mediumit rumun GSP, bisedimet mes dy klubeve janë në vazhdim dhe pritet që deri në natën e Vitit të Ri, drejtuesit e CFR Cluj t’i japin një përgjigje përfundimtare klubit qipriot lidhur me ofertën për Korenicën.

Apollon përgatit kontratën për Korenicën

Po sipas të njëjtave burime, Apollon Limassol e ka përgatitur tashmë kontratën për futbollistin kosovar. Në rast transferimi, Korenica do të përfitonte një pagë vjetore prej 500 mijë eurosh, shifër që e bën ofertën mjaft tërheqëse për lojtarin.

Pas shitjes së Lindon Emerllahut në Ukrainë, te Polissya, për shumën prej 1.5 milionë eurosh, CFR Cluj është përballë mundësisë për të humbur një tjetër titullar. Këtë herë, klubi rumun do të përfitonte edhe më shumë financiarisht, me një shumë prej 2 milionë eurosh për Korenicën. Diskutimet mes palëve pritet të vazhdojnë deri në fund të vitit.

Korenica, pjesë kyçe e CFR Cluj

Meriton Korenica është një nga lojtarët më të rëndësishëm të ekipit transilvanian këtë sezon. Ai mund të aktivizohet si anësor i majtë, por edhe si mesfushor, duke ofruar fleksibilitet të madh taktik.

Në edicionin aktual të Superligës rumune, Korenica ka zhvilluar 20 ndeshje, ka shënuar 4 gola dhe ka dhënë 2 asistime, duke qenë një element i rëndësishëm në lojën ofensive të CFR Cluj.

Futbollisti iu bashkua CFR Cluj në vitin 2024, pasi u transferua nga Manisa në Turqi. Gjatë karrierës së tij ka luajtur edhe për Rahovecin, Shkëndijën, Metalurgun e Shkupit, Lirinë, Prishtinën dhe Ballkanin, duke ndërtuar një profil të qëndrueshëm në futbollin rajonal dhe më gjerë.

Sipas Transfermarkt, vlera aktuale e kartonit të Meriton Korenicës është 2.4 milionë euro. Në total, ai ka zhvilluar 79 ndeshje me fanellën e CFR Cluj, duke shënuar 18 gola dhe duke dhënë 14 asistime.

Situata e Apollon Limassol

Skuadra qipriote që kërkon shërbimet e Korenicës po kalon një sezon nën pritshmëri. Apollon Limassol aktualisht renditet në vendin e 6-të në kampionat, me 24 pikë, plot 10 pikë më pak se lideri Pafos.

Në historinë e tij, klubi nga Limassoli ka fituar 4 tituj kampioni dhe 9 Kupa të Qipros, ndërsa afrimi i Korenicës shihet si pjesë e planit për të rikthyer ekipin në garë për pozita më të larta./Telegrafi/

Rayan është pa dyshim një nga talentet më premtuese të futbollit brazilian në vitin 2025. Sulmuesi i Vasco da Gamës shkëlqeu veçanërisht në fund të sezonit, duke qenë një nga faktorët kryesorë që i solli klubit të tij titullin e Kupës kundër Corinthians.

Paraqitijet e tij kanë tërhequr menjëherë vëmendjen e klubeve të mëdha evropiane, përfshirë Bayern Munich dhe Zenit, i cili ka dërguar një ofertë konkrete prej 31 milionë eurosh.

Megjithatë, klubi i Rio de Janeiro nuk po shqyrton largimin e Rayan për më pak se 50 milionë euro, duke treguar vendosmërinë për ta mbajtur yllin e tyre të ri.

Kontrata e re dhe klauzola rekord

Për të shmangur largimin e parakohshëm të talentit, Vasco ia zgjati kontratën Rayanit deri në vitin 2028 dhe e rriti klauzolën e lirimit në 80 milionë euro. Ky veprim ka bërë që shumica e klubeve të interesuara të tërhiqen, ndërsa Vasco shpreson që një shitje e mundshme në të ardhmen të sigurojë një rekord financiar dhe të rrisë ambiciet e klubit për vitin 2026.

Për krahasim, transferimi më i shtrenjtë i Vasco deri tani ishte ai i Paulinhos te Bayer Leverkusen për 18.5 milionë euro, ndërsa Andrey Santos u shit te Chelsea për 12.5 milionë euro. Shitja e Rayan do të tejkalonte këto shuma shumëfish.

Sezoni i jashtëzakonshëm i Ryan

Rayan ka pasur një sezon të shkëlqyer. Ai shënoi 5 gola në Kupën e Brazilit, duke qenë golashënuesi më i mirë i turneut, ndërsa në kampionatin Brasileirão realizoi 14 gola, duke u renditur vetëm pas lojtarëve të provuar si Vitor Roque, De Arrascaeta dhe Kai Jorge.

Viti për Ryanin nisi në mënyrë perfekte me fitimin e Kampionatit të Amerikës së Jugut nën 20 vjeç, ku shënoi dy gola.

Me kalimin e muajve, ai u përmirësua në të gjitha aspektet e lojës – nga gjendja fizike dhe shpejtësia, te vetëbesimi dhe ekzekutimi. Sot, Rayan konsiderohet një sulmues i kompletuar, gati për sfidat më të mëdha në arenën evropiane. /Telegrafi/

Fisnik Asllani, sulmuesi i Kosovës, është duke tërhequr vëmendjen e disa klubeve evropiane të mëdha, por kushdo që dëshiron shërbimet e tij duhet të jetë gati të paguajë një shumë të konsiderueshme.

Sipas raportimeve të gazetarit Ekrem Konur për “Arma Sports TV” dhe “CaughtOffside”, Hoffenheim ka vendosur një klauzolë lirimi prej 50 milionë eurosh për 23-vjeçarin.

Asllani konsiderohet si një nga zëvendësuesit kryesorë të mundshëm të Robert Lewandowskit te Barcelona, pasi veterani polak pritet të largohet në verë.

Më parë u raportua se sulmuesi kosovar kishte një klauzolë lirimi prej 30 milionë eurosh, por me rinovimin e kontratës së tij, kjo klauzolë është hequr, duke rritur kështu kërkesën për të transferuar Asllanin.

Përveç Barcelonës, interesim për Asllanin ka shfaqur edhe Bayern Munich dhe dy klube nga Liga Premier, emrat e të cilëve ende nuk janë bërë publikë. /Telegrafi/

Me afrimin e afatit kalimtar dimëror, përsëri po qarkullojnë thashetheme rreth disa prej lojtarëve kryesorë të Interit, të cilët mbeten në listat e dëshirave të klubeve në të gjithë Evropën dhe më gjerë.

Ndër ta është Hakan Calhanoglu, i cili lidhej shumë me Galatasaray verën e kaluar.

Sipas Turkiye Gazetesi, bisedimet midis Galatasaray dhe Interit duket se janë rikthyer.

Galatasaray po planifikon për sezonin e ardhshëm, duke shpresuar të përfitojë nga kontrata e Calhanoglut, e cila skadon në 2027.

Klubi i Serie A do të përballet me një zgjedhje: ose të negociojë një zgjatje kontrate, ose të pranojë që afati i ardhshëm kalimtar mund të jetë mundësia e fundit për të përfituar nga mesfushori.

Inter janë të vetëdijshëm për interesin, por ende e konsiderojnë Calhanoglu-n pjesë kyçe të skemës së tyre taktike.

Pavarësisht se mesfushori turk do të mbushë 32 vjet në shkurt, ‘Nerazzurri’ nuk kanë asnjë qëllim ta shesin për më pak se 25-30 milionë euro, vlera që ata i japin lojtarit të tyre kreativ./Telegrafi/