TIRANË, 27 dhjetor /ATSH/ Presidenti i Partisë së Lirisë, Ilir Meta nga qelia e paraburgimit, nëpërmjet një postimi të gjatë në rrjetet sociale, ka reaguar në lidhje me situatën politike në vend dhe ka sulmuar organet e reja të drejtësisë.

Sipas presidentit të PL-së, drejtësia po funksionon me regji dhe sipas interesit të qeverisë.

“Këtë na e provojnë çdo ditë me sjelljen e tyre politike institucionet e drejtësisë së “re” apo të kapur gati totalisht nga Rama prej kohësh, që nuk njohin as Kushtetutën, as Gjykatën e të Drejtave të Njeriut, as procesin e rregullt ligjor”, nënvizon Meta.

Meta tha se kjo u provua edhe një ditë më parë (kur në SPAK u paraqitën Belind Këlliçi dhe Erion Veliaj), “që në të njëjtën ditë u thirr edhe denoncuesi kryesor i skemës kriminale 5D, por edhe arkitekti dhe përfituesi kryesor i saj, apo se në të njëjtën ditë që Partia e Lirisë organizonte protestën e saj para SPAK-ut, BKH që në mëngjes u zgjua me “Harabelin” e me të edhe u ngrysën lajmet”.

Meta hodhi akuza edhe në drejtim të kreut të Prokurorisë së Posaçme, Altin Dumani.

“Dumani ka treguar bindshëm se është një mercenar i Edi Ramës dhe pa dyshim edhe i atyre lloj ndërkombëtarëve që e duan Ramën, sepse shet sovranitet për të vjedhur pushtet”, shkruan Meta.

Meta u ndal edhe te burgosja e tij.

“Sot unë jam në burg, i rrëmbyer në mënyrë të paligjshme, siç e kanë parë të gjithë dhe i izoluar në mënyrën më ekstreme dhe vetëm për shkak të zgjedhjeve të 11 Majit. Ndërkohë që për mua ekziston vetëm një çështje: Çështja Meta”, shkruan Meta.

Meta shkruan më tej se duke qenë në 30 vite të jetës publike në mënyrën më ekstreme i kujdesshëm me ligjin dhe Kushtetutën, është i pashantazhueshëm.

“Unë as jam trembur, as jam fshehur dhe as i jam shmangur kurrë me procedurë përballjes me drejtësinë, përkundrazi i kam fituar të gjitha përballjet me të”.

Meta shton më tej se “është në burg sepse është dëshmitari kryesor, si Kryetar i Kuvendit e President Republike, i korrupsionit më të madh që ka ndodhur këtë dekadë që është shndërrimi i Reformës në Drejtësi në Ramaformë”.

Në fund të fjalës së tij Meta rendit edhe 5 prioritetet e Partisë së Lirisë të miratuara në Konventën e 27 Prillit, e që sipas tij janë rruga e qartë dhe konkrete që i jep fund dramës së shpopullimit dhe që e kthen Shqipërinë në fuqi eksportuese.

“Ndërsa për Reformën në Drejtësi ne si Parti e Lirisë i qëndrojmë Reformës të votuar në Parlament me 140 vota dhe jo Ramaformës me 69 vota”, shkruan Meta.

“Dihet botërisht që falë insistimit tim Reforma në Drejtësi u miratua me 140 vota. Ky miratim ka gjurmën time të pashlyeshme dhe për të cilën u falënderova publikisht edhe nga ambasadori i SHBA”, nënvizon Meta.

Sipas Metës “fundi i Drejtësisë me Regji është i pashmangshëm dhe i afërt, siç është edhe rrëzimi i Narkoregjimit të vetëm në kontinent, krimet “intelektuale” të të cilit janë grabitje pa maska në mes të ditës të qindra-milionë euro të qytetarëve më të varfër të rajonit, në vendin më të pasur të rajonit me burime natyrore”.

/r.e/

The post Meta: Drejtësia me regji drejt fundit pa lavdi, jam burgosur për shkak të zgjedhjeve të 11 majit appeared first on Agjencia Telegrafike Shqiptare.

TIRANË, 26 dhjetor /ATSH/ Ilir Meta, presidenti i Partisë së Lirisë, i cili ndodhet në “arrest me burg”, në një postim në rrjetet sociale shkruan se vendimi i qeverisë për të shkurtuar fondet buxhetore për Arsimin me 700 milion lekë, për Shëndetësinë me 2.6 miliard lekë dhe për Bujqësinë me 800 milion lekë është tregues i vijimit të moskujdesit dhe braktisjes së tre sektorëve jetikë socialë.

Meta kritikon uljen e fondeve për arsimin, duke theksuar nevojën urgjente për “rritjen e pagave, për ndërtimin e shkollave, kopshteve dhe çerdheve të reja”, dhe shton “mungesa e fondeve do të thellojë akoma më shumë rezultatet negative të Shqipërisë, që renditet e fundit në botë për cilësinë e Arsimit”.

Për shëndetësinë, Meta thekson se të shkurtosh fondet “do të thotë të braktisësh stafin mjekësor, të thellosh mungesën e ilaçeve dhe investimeve në spitale, në një kohë kur skandalet e mostrajtimit dinjitoz të pacientëve thellohen dhe shpërthejnë çdo ditë, si skandali i Onkologjikut, i sëmundjeve kronike e plot të tjera”.

Po ashtu, për sektorin e bujqësisë, Meta shkruan se “të ulësh fondet për Bujqësinë, në kushtet kur fermerët po falimentojnë, po hedhin në kanal prodhimet e tyre dhe po detyrohen të largohen nga Shqipëria, do të thotë ta çosh këtë sektor përfundimisht drejt kapitullimit”.

Më tej Meta kritikon politikat e qeverisë.

“Braktisja e këtyre tre sektorë është një nxitje tjetër e shpopullimit, kësaj axhende antikombëtare të projektuar prej kohësh”, shkruan Meta.

Presidenti i PL-së theksoi se “pesë Prioritetet e Partisë së Lirisë për 4 milion shqiptarë plus që ndalin shpopullimin dhe kthejnë Shqipërinë në fuqi eksportuese janë e vetmja rrugë për zhvillimin e qëndrueshëm ekonomik dhe social të vendit, për mbështetjen e familjeve, si dhe për rritjen e mirëqenies të qytetarëve, në veçanti për pensionistët dhe shtresat në nevojë”.

/a.f/

The post Meta: Qeveria shkurtoi fondet për tre sektorët jetikë të vendit, nxit shpopullimin appeared first on Agjencia Telegrafike Shqiptare.

TIRANË, 24 dhjetor/ATSH/ Presidenti i Partisë së Lirisë, Ilir Meta uroi sot Krishtlindjen për të gjithë besimtarët e krishterë dhe mbarë popullin shqiptar.

Në një mesazh në rrjetet sociale, Meta u shpreh se “Krishtlindja është lindja e shpresës dhe e paqes, fuqia e dritës hyjnore mbi errësirën dhe konfirmim i dashurisë së Perëndisë ndaj njerëzimit”.

Meta citoi Biblën: “Dashuria është zemërgjerë, kërkon të mirën. Dashuria nuk ka smirë. Dashuria nuk gëzohet me padrejtësinë, por gëzohet me të vërtetën. Dashuria përballon gjithçka, beson gjithçka, shpreson gjithçka dhe duron gjithçka. Dashuria nuk shteron kurrë”.

“Bekimet dhe ngrohtësia e dashurisë së Zotit qofshin gjithmonë me ju, në çdo familje shqiptare dhe veçanërisht pranë të gjithë atyre që sot përballen me varfërinë, sëmundjet dhe padrejtësitë”, shkruan Meta.

/m.m/a.f/

The post Meta uron Krishtlindjen: Lindja e shpresës dhe e paqes appeared first on Agjencia Telegrafike Shqiptare.

TIRANË, 24 dhjetor/ATSH/ Imzot Gjergj Meta, president i Konferencës Ipeshkvore të Shqipërisë (KISH), uroi përmes një mesazhi të gjithë besimtarët katolikë me rastin e Krishtlindjes, për një botë me paqe dhe shpresë.

Presidenti i KISH, solli në vëmendje një prodhim të kinematografisë botërore “Joyeux Noël”, ku tregohet një histori nga Lufta e Parë Botërore, se si ushtarët e dy fronteve armike, për Krishtlindje bënë një armëpushim dhe festuan me njëri-tjetrin.

“Për ne të krishterët fëmija që lind, pra Jezusi, është Princi i paqes, ai që na jep paqen, por jo si e jep bota. Ai nuk na jep një armëpushim të përkohshëm, por një paqe që nuk mund të na e marrë askush, sepse është paqja e zemrës, është paqe që vjen nga lart dhe zë vend në shpirtin e atyre që e duan Hyjin. Natën e Krishtlindjes në të gjitha kishat tona do të jehojë fjala e Ungjillit dhe kënga e engjëjve: “Lavdi Hyjit në qiell e paqe mbi tokë njerëzve që ai i ka për zemër”, tha imzot Gjergj Meta në mesazhin e tij të Krishtlindjes.

Një urim për besimtarët katolikë ka ardhur edhe nga imzot Arjan Dodaj, arqipeshkvi i Arqidioqezës Tiranë-Durrës.

“Le të shkojmë në Betlehem dhe të shohim çfarë Zoti kumtoi për ne. Kjo është ftesa që na vjen nga Zoti në këtë Krishtlindje: të vihemi në ecje, në ecje si shtegtarë të shpresës në dyert e jubileut që shënon 2025 vite nga lindja e Krishtit.

Imzot Arjan Dodaj nënvizoi se ka ardhur koha të reflektojmë dhe të promovojmë vlerat për femijët dhe atdheun.

1 nga 2

/r.e/

The post Urimi për besimtarët katolikë: Paqe e shpresë për një botë të trazuar appeared first on Agjencia Telegrafike Shqiptare.

TIRANË, 8 dhjetor /ATSH/ Presidenti i Partisë së Lirisë, Ilir Meta uroi sot 8 Dhjetorin, Ditën Kombëtare të Rinisë.

Meta publikoi një video në rrjetet sociale, teksa shpreh “mirënjohje të veçantë ndaj Lidershipit Heroik të Azem Hajdarit, të gjithë djemve dhe vajzave, që 34 vite më parë, duke vrarë frikën i prinë me guxim, kurajë e patriotizëm Lëvizjes Studentore që e futi Shqipërinë në rrugën e Lirisë dhe të Demokracisë”.

“Unë besoj shumë në shpirtin energjik të të rinjve të Shqipërisë për të marrë në dorë fatet e tyre dhe të mbarë vendit, sot më shumë se kurrë, kur pluralizmi politik, liria dhe demokracia janë nën agresionin e një regjimi të dhunshëm”, thekson Meta në një postim në rrjetet sociale.

Meta nënvizon se, “kjo është rruga për të ndaluar shpopullimin dhe garantuar një Shqipëri që u përket të rinjve”.

Presidenti i Partisë së Lirisë, Ilir Meta ndodhet në burg, pasi u arrestua më 21 tetor, nën dyshimet për disa vepra penale, “korrupsion” në 3 raste, “pastrim parash” dhe “fshehje të pasurisë”.

/r.e/

The post 8 Dhjetori, Meta: Mirënjohje të veçantë ndaj lidershipit heroik të Azem Hajdarit appeared first on Agjencia Telegrafike Shqiptare.

TIRANË, 6 dhjetor /ATSH/ Partia e Lirisë zhvilloi sot protestë para godinës së Prokurorisë së Posaçme kundër Korrupsionit dhe Krimit të Organizuar (SPAK), e para protestë politike e zhvilluar ndonjëherë më parë në Shqipëri para godinës së SPAK.

Protesta u thirr nga qelia e paraburgimit nga vetë presidenti i Partisë së Lirisë, Ilir Meta, pas arrestimit të këtij të fundit nga SPAK në tetor të këtij viti, pasi ky i fundit e akuzon për tre vepra penale.

Me pankartat, të cilat ishin të shkruara edhe në gjuhën angleze, “Jo drejtësi me regji”, “Altin Dumani mercenar i Rilindjes”, “SPAK turpi i reformës në Drejtësi”, mbështetësit e Partisë së Lirisë protestuan para godinës së SPAK.

Protesta kryesohej nga Sekretari i Përgjithshëm i PL-së Tedi Blushi, deputetja Erisa Xhixho si dhe avokati i Metës, Genc Gjokutaj, njëkohësisht anëtar i kryesisë së PL-së.

Në fjalën e tij sekretari i PL-së Tedi Blushi e akuzoi SPAK si shkatërruesin e reformës në drejtësi dhe që po mbron korrupsionin.

“Ky institucion me veprimtarinë e tij antikushtetues e antiligjore ka vrarë besimin e qytetarëve të drejtësia e shteti ligjor duke u bërë njësh me mafien në pushtet. SPAK është shkatërruesi përfundimtar i reformës në drejtësi dhe i çdo shprese të shqiptarëve të lirë të ndershme patriotë për barazi para ligjit. Ky institucion prodhon padrejtësi, antiligj dhe antiarbitraritet. Jemi sot këtu, sepse SPAK-u është tubi i oksigjenit për narkoqeverisjen më të korruptuar në Europë dhe në botë. SPAK është mbrojtësi ligjor i krimit elektoral”, tha Blushi.

Blushi akuzoi kreun e SPAK si mercenar të rilindjes, që sipas tij ka mision persekutimin politik të opozitës.

“Është ky Altin Dumani që shkul një fshat të tërë për ta hetuar për një autokombajnë pa leje. Është një institucion mashtrues e montues procesesh të rreme me zero fakte e dokumente dhe zero prova ndaj liderëve të opozitës vetëm për llogari të narkomafies. Dumani është armiku i shtetit të së drejtës, lirive, dinjitetit njerëzor të çdo shqiptari. Është mercenari më i verbër i rilindjes, misioni i të cilit është persekutimi politik i opozitës””, tha Blushi.

Për të siguruar rendin dhe shmangur përshkallëzimin e situatës, forca të shumta policie kanë rrethuan godinën SPAK.

Në protestë u vu re mungesa e figurave kryesore politike nga radhët e Partisë Demokratike.

Protestë e PL para SPAK, foto: Florian Abazaj

1 nga 5

vijon….

The post Partia e Lirisë protestë para SPAK për arrestimin e Metës: Jo drejtësi me regji appeared first on Agjencia Telegrafike Shqiptare.

TIRANË, 4 dhjetor /ATSH/ Në komisionin për Çështjet Ligjore, Administratën Publike dhe të Drejtat e Njeriut, zëvendësministri i Drejtësisë Klajd Karameta, prezantoi projektligjin për  “Për mbrojtjen e të dhënave personale”.

Karameta tha se “shpejtësia e zhvillimit teknologjik dhe globalizimi kanë ndryshuar në mënyrë thelbësorë, për mënyrën si mblidhen e transferohen të dhënat personale duke i bërë asete të rëndësishme për shumë biznese si pjesë të aktiviteteve ekonomike”.

Sipas zëvendësministrit, procesi ka “sjellë mundësinë dhe rrezikun që të dhënat personale të qytetarëve të bëhen të aksesueshme dhe të shpërndahen nga persona të paautorizuar”.

“Kuadri ligjor nuk është i përfaruar me legjislacionin e ri të BE-së “për mbrojtjen e të dhënave personale”, u shpreh zëvendësministri.

Zëvendësministri theksoi se objektiv i projektligjit është harmonizimi dhe zbatimi standardeve të BE-së në fushën e mbrojtës së të dhënave personale.

Një tjetër objektiv, shtoi Karamata është “garantimi ndaj qytetarëve i një niveli më të lartë kontrolli për të dhënat tyre personale”.

“Garantimi i mbrojtjes së të dhënave në mënyrë sa më efektive. Sigurimi i mbikëqyrjes efektive të zbatimit të legjislacionit nëpërmjet forcimit të rolit të zyrës së Komisionerit. Garantimi i një trajtimi më të mirë të mbrojtjes së të dhënave lidhur me sfida e privatësisë në botë digjitale. Krijimi i një kuadri ligjor gjithëpërfshirës”, tha Karameta.

Sipas zëvendësministrit, synohet “përfshirja e Shqipërisë në listën e shteteve për të cilat Komisioni Europian ofron sistem të përshtatur të mbrojtjes së të dhënave me qëllim që importimi i të dhënave nga BE-ja të kryhet lehtësisht”.

Deputetja Ermonela Felaj, në cilësinë e relatores tha se ligji aktual është një ligj goxha i hershëm.

“Më duket më se e arsyeshme që Këshilli i Ministrave dhe Komisioneri për Mbrojtjen e të Dhënave Personale të paraqiten me një ligj. Synohet që qytetarëve shqiptar t’u garantohen standarde më të larta në fushën e mbrujtjes së të dhënave personale”, tha Felaj. /j.p/

The post Projektligji “Për mbrojtjen e të dhënave personale”, Karamata: Përafrim me legjislacionin e BE-së appeared first on Agjencia Telegrafike Shqiptare.

TIRANË, 30 nëntor /ATSH/ Kryetari i Partisë së Lirisë, Ilir Meta, ka dënuar “sulmet e fundit terroriste në stacionin policor në Zveçan, dhe shpërthimin e detonuar ndaj kanalit kryesor të Ibër Lepencit”.

Në një postim në rrjetet sociale, Meta ka theksuar se këto sulme janë të orkestruara nga bandat e dirigjuara nga Serbia, duke nënvizuar se Serbia ende nuk i ka dënuar këto akte kriminale.

“Dënoj me ashpërsinë më të madhe sulmet e fundit terroriste në stacionin policor në Zveçan, në Komunën e Zveçanit dhe shpërthimin e detonuar ndaj kanalit kryesor të Ibër Lepencit, prej nga furnizohen me ujë disa qytete në Kosovë, si dhe Korporata Energjitike e Kosovës. Ky sulm kriminal dhe terrorist, që ka synuar të dëmtojë infrastrukturën kritike dhe ndër më të rëndësishmet të Kosovës, vjen nga bandat e dirigjuara dhe të orkestruara nga Serbia, që ende nuk i ka dënuar këto akte kriminale”, shkruan Meta.

Meta akuzon Serbinë për mbështetje të strukturave kriminale dhe për mungesë të vullnetit për të respektuar marrëveshjet me Prishtinën.

“Fajin dhe përgjegjësinë për këto sulme terroriste nuk e ka formati ekzistues i dialogut mes Kosovës dhe Serbisë, por mungesa e plotë e vullnetit të Beogradit zyrtar për respektimin e marrëveshjeve me Prishtinën zyrtare, si edhe marrja zyrtarisht në mbrojtje nga Serbia të strukturave kriminale, me në krye Millan Radojçiçin, që mbështeten nga institucionet serbe, që kanë glorifikuar edhe sulmin terrorist në Banjskë, si edhe nga ata shqipfolës, që i mbajnë ison Serbisë, që mbështesin dhe implementojnë nisma proserbe si “Ballkani i Hapur” apo që fajësojnë dhe penalizojnë qëndrimet parimore dhe patriotike të Qeverisë së Kosovës, siç ka vepruar dhe vepron çdo ditë Edi Rama”, shkruan Meta.

Meta i ka kërkuar faktorit ndërkombëtar që të ushtrohet presion ndaj Beogradit për të hequr dorë nga këto akte kriminale, që rrezikojnë paqen dhe stabilitetin në rajon.

“Partia e Lirisë, në mbështetje të palëkundur të popullit dhe institucioneve, të integritetit territorial dhe sovranitetit të Republikës së Kosovës u bën thirrje të gjithë vende partnere ndërkombëtare, Shteteve të Bashkuara të Amerikës dhe Bashkimit Europian, të dënojnë me forcën më të madhe këto sulme terroriste, si dhe t’i ushtrojnë presionin e duhur Beogradit zyrtar për të hequr dorë nga këto akte kriminale që rrezikojnë paqen, stabilitetin dhe sigurinë në rajonin tonë”, e përmbyll Meta reagimin. /j.p/

The post Sulmet në veri të Kosovës, Meta: BE dhe SHBA të ushtrojnë presion ndaj Beogradit appeared first on Agjencia Telegrafike Shqiptare.

TIRANË, 29 nëntor/ATSH/ Presidenti i Partisë së Lirisë, Ilir Meta uroi sot 80-vjetorin e Çlirimit të vendit.

“Në këtë ditë të madhe të historisë sonë, mirënjohja dhe respekti i pakufijshëm shkon për të gjithë martirët e luftës për liri, për të gjithë partizanët, heronjtë dhe dëshmorët e Luftës Antifashiste Nacionalçlirimtare, të cilët megjithëse në moshë tepër të re sakrifikuan gjithçka për çlirimin e Shqipërisë nga pushtuesit nazifashistë”, shkruan Meta në mesazhin e tij në rrjetet sociale, ndërkohë që ndodhet në qeli pas vendimit të GJKKO-së për “arrest me burg”.

Meta theksoi se të rinjtë duhet të marrin më shumë përgjegjësi dhe angazhim publik për të garantuar fatet e tyre dhe të ardhmen e Atdheut.

“Sot të rinjtë dhe të rejat, veçanërisht në këto kohë jo të lehta për vendin, kanë një detyrë po aq të madhe dhe historike, sa edhe bashkëmoshatarët e tyre tetë dekada më parë, që të marrin më shumë përgjegjësi dhe angazhim publik për të garantuar fatet e tyre dhe të ardhmen e Atdheut, të rrezikuar nga tradhtarët e kombit që shesin kufijtë e Shqipërisë, që dëshmorët i mbrojtën me gjak, nga grabitqarët e pashpirt të pronës dhe interesit publik, si dhe nga kolonizatorët e rinj të juntës sorosiane që kërkojnë të zhbëjnë vlerat kombetare, familjare dhe të shtetit të së drejtës”, u shpreh Meta në mesazhin e tij.

/m.m/r.e/

The post Meta uron 80-vjetorin e Çlirimit: Të rinjtë të marrin më shumë përgjegjësi për të garantuar të ardhmen appeared first on Agjencia Telegrafike Shqiptare.

TIRANË, 28 Nëntor /ATSH/ Presidenti i Partisë së Lirisë, Ilir Meta, ka uruar sot nga burgu të gjithë shqiptarët me rastin e 28 Nëntorit, Ditës së Pavarësisë dhe Flamurit Kombëtar.

Në mesazhin e tij në rrjetet sociale, Meta përkujton figurat historike si Gjergj Kastrioti Skënderbeu, Ismail Qemali, Isa Boletini dhe Adem Jashari, duke theksuar rëndësinë e bashkimit kombëtar dhe mbrojtjes së idealeve të lirisë, sovranitetit dhe integritetit territorial.

“Gëzuar Ditën e Flamurit Kombëtar!
Urime të gjithë shqiptarëve kudo janë 28 Nëntorin e Gjergj Kastrioti Skënderbeut, Ismail Qemalit, Isa Boletinit dhe Adem Jasharit!”, shkruan Meta.

“Kremtimi i 112-vjetorit të Pavarësisë së Shqipërisë na fton të gjithëve të bashkohemi në mbrojtje të idealit të Lirisë, vlerave, identitetit dhe çështjes kombëtare, të Sovranitetit dhe integritetit territorial kundër çdo pushtuesi dhe kolonizatori të vjetër apo të ri, në mënyrë që Flamuri Kuqezi me shqiponjën dykrenare, simboli ynë i shenjtë dhe përbashkues, të valvitet krenar në këto troje, i pastër dhe i pacënuar, njësoj si gjaku i derdhur për të, nga bijat dhe bijtë më të mirë të kombit”, tha Meta.

Ai bëri thirrje për angazhim dhe patriotizëm në mbrojtjen e vlerave dhe realizimin e aspiratave të nisura nga etërit e Pavarësisë për të ndërtuar një Shqipëri si gjithë Europa.

“Të dëshmojmë vendosmërinë e palëkundur, mençurinë dhe patriotizmin më të lartë për mbrojtjen e këtyre idealeve e vlerave, si dhe në përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora dhe gjithë etërit e Pavarësisë, për ta bërë Shqipërinë si gjithë Europa.
Zoti e bekoftë Flamurin Kombëtar!
Zoti i bekoftë shqiptarët kudo që ata ndodhen!”, përfundon Meta.

/a.f/

The post Meta uron 28 Nëntorin: Të bashkuar për ta bërë Shqipërinë si gjithë Europa appeared first on Agjencia Telegrafike Shqiptare.

TIRANË, 27 nëntor/ATSH/ Presidenti i Partisë së Lirisë, Ilir Meta ka reaguar nga qelia, pas vendimit të Gjykatës së Posaçme për të liruar nga arresti shtëpiak, kreun e PD-së, Sali Berisha. Meta përshëndet vendimin e GJKKO-së dhe thotë se “Berisha, por edhe qytetarët duan dhe meritojnë një shtet të së drejtës”.

“Përshëndetjet më të përzemërta për liderin e Partisë Demokratike, Prof. Dr. Sali Berisha dhe urime për të gjithë qytetarët që duan dhe meritojnë një shtet të së drejtës!

Në veçanti, dua të përshëndes Prof. Dr. Berishën me deklaratën time, si President i Republikës, të bërë më 22 maj 2021, kur ai u shpall “non grata”, sepse gjithmonë kam qenë i bindur se ajo fletërrufe u hartua kundër tij nga Edi Rama, Sorosi, Charles McGonigal, Rossini dhe Mcgonigalët e tjerë për të shkatërruar pluralizmin politik për qëllime korruptive dhe helmuar marrëdhëniet mes Shqipërisë dhe SHBA”, shprehet Meta, përmes një postimi në rrjetet sociale.

Meta thekson se vendimi i Strasburgut e ka klasifikuar “rastin “Berisha” si “leading case”, pra të rëndësishëm dhe e kanë komunikuar shumë shpejt këtë njoftim, pa pritur shterim të gjykatave të brendshme”.

“Desorosifikimi i drejtësisë dhe shoqërisë tonë është një emergjencë kombëtare për të rivendosur shtetin e së drejtës dhe mbrojtur interesat kombëtare”, thekson Meta.

/r.e//a.f/

The post Lirimi i Berishës, Meta: Përgëzime për liderin e PD-së appeared first on Agjencia Telegrafike Shqiptare.

TIRANË, 25 nëntor/ATSH/ Presidenti i Partisë së Lirisë, Ilir Meta iu drejtua pasditen e sotme me një letër publike shtabit drejtues të Tiranës, duke u ndalur tek Reforma në Drejtësi, që sipas tij, pësoi metamorfozë nga e votuar me 140 vota në një Ramaformë që instaloi grushtin e shtetit.

Ky grusht shteti, sipas Metës, ekzekutohet çdo ditë jo vetëm përmes një qeverie arbitrare, të dhunshme e bullizuese ndaj qytetarëve, por edhe përmes një junte spakistësh të cilët dhunojnë Kushtetutën, Konventën Europiane të të Drejtave të Njeriut dhe kanë asgjësuar pavarësinë e gjykatave në çdo nivel, përfshirë edhe atë të Gjykatës Kushtetuese.

Sipas Metës,  edhe buxheti 2025 është më antisociali dhe mizori për shumicën e qytetarëve e sidomos për 700.000 pensionistët që do të varfërohen më tej, për shumicën dërrmuese të punonjësve dhe një goditje e pamëshirshme ndaj bujqësisë dhe prodhimit vendas.

“Është thjesht një projekt për megavjedhje të reja të parave publike përmes disa klientëve”, u shpreh ai.

Ndaj, sipas Metës, edhe Partia e Lirisë ka përgatitur amendamentet për rishikimin e buxhetit.

Sipas Metës, e vetmja rrugë që mundëson programin e Partisë së Lirisë është përballja me atë që e cilësoi narkoregjim.

“Të shumëfishojmë forcat dhe bashkëveprimin me njëri tjetrin dhe të gjithë opozitarët e vërtetë për të shporrur këtë pakicë të instaluar përmes krimit dhe korrupsionit”, u shpreh Meta.

The post Meta, letër shtabit të PL-së për Tiranën: Bashkëveprim me të gjithë opozitarët e vërtetë appeared first on Agjencia Telegrafike Shqiptare.

TIRANE, 24 nëntor/ATSH/ Kryetari i Demokratëve Euroatlantikë, Lulzim Basha bëri thirrje për një bashkim të të gjithëve që duan të largojnë Ramën dhe të ndërtojnë një alternativë të vërtetë për të ardhmen e Shqipërisë, duke ofruar programin dhe ekipin e Demokratëve Euroatlantikë si një mundësi për të zhbërë çdo marrëveshje të korruptuar.

Në një intervistë për televizionin MCN, Basha theksoi se qëndrimet e tij dhe të partisë së tij nuk vijnë nga interesat e askujt, por janë parimore dhe të vërtetuara nga koha.

Basha e përjashtoi kategorikisht koalicionin me Berishën. “Dera e Demokratëve Euroatlantikë mbetet e hapur për çdo faktor opozitar që refuzon qeverisjen e korruptuar dhe marrëveshjet e fshehta me disa pjesë të opozitës”, tha ai.

Kreu i PD-Demokratët Euroatlantikë, Lulzim Basha u shpreh se ish-kryeministri Sali Berisha dhe kreu i PL, Ilir Meta, kanë dalë në krye të opozitës për t’u mbrojtur nga drejtësia, dhe nuk janë të izoluar nga SPAK-u.

Basha shtoi se ata që mbështesin Berishën dhe Metën shpresojnë të përfitojnë nga situata e tyre në raport me drejtësinë dhe faktorët ndërkombëtarë, duke theksuar se shqiptarët nuk mund të mashtrohen nga këto veprime.

Ai gjithashtu nënvizoi se është një pjesë e opozitës që është marrë peng nga individë me probleme me drejtësinë.

The post Basha: Berisha dhe Meta vetëdolën në krye të opozitës për t’u mbrojtur nga drejtësia appeared first on Agjencia Telegrafike Shqiptare.

TIRANË, 23 nëntor /ATSH/ Në ‘York Hall Arena’ të Londrës dy boksierët nga Shqipëria, Alban Barmeta dhe Nelson Hysa fituan ndeshjen respektive me knockout, duke veshur kuqezi arenën, me shumë bashkëkombas që i mbështetën.

Nelson Hysës i mjaftoi vetëm një raund e gjysmë për të gjunjëzuar me knockout kundërshtarin e tij për peshat super të rënda, argjentinasin Brakamonte. Një super paraqitje kjo e Nelsonit i cili mbi 90% të ndeshjeve të tij që janë të gjitha fitore, i ka me knockout.

Pasi e rrëzoi dy herë kundërshtarin, për argjentinasin ishte e pamundur për të qëndruar në superndeshjen e mbrëmjes së gjatë, që startoi në arenën më të famshme të boksit në Londër.

Boksieri nga Tirana, Alban Bermeta arriti të fitojë po me knockout përballë kampionit të Bullgarisë Mario Verger. Pas 4 raundesh nga 8 që do të zhvilloheshin, Bermeta arriti të hedh me knockout kampionin e Bullgarisë në Your Hall Arena duke e çuar në 14 numrin e fitoreve me KO nga 18 ndeshjeve të fituara, ndërkohë që nuk ka asnjë humbje.

The post Londra ‘vishet’ kuqezi në boks, Alban Bermeta dhe Nelson Hysa fitojnë me ‘K.O.’ appeared first on Agjencia Telegrafike Shqiptare.

TIRANË, 22 nëntor /ATSH/ Presidenti i Partisë së Lirisë, Ilir Meta përcolli sot urimin me rastin e Ditës së Alfabetit të Gjuhës Shqipe.

“Gëzuar të gjithë shqiptarëve Ditën e Alfabetit të gjuhës sonë më të bukur në botë, të shkruar me gërma gjaku dhe plot sakrifica heroike të intelektualëve dhe patriotëve tanë!”- shkruan Meta.

“Mirënjohje përjetë kolosëve të gjuhës shqipe dhe Rilindasve të vërtetë të kombit, që në Kongresin e Manastirit, njehsuan 116 vite më parë elementin më të rëndësishëm përbashkues të shqiptarëve duke i paraprirë shpalljes së Pavarësisë në 28 nëntor 1912 në Vlorë”- shkruan kreu i Partisë së Lirisë.

Kjo është hera e parë që 22 Nëntori festohet si festë zyrtare dhe iniciativa u mor në vijim të diskutimeve në samitin e diasporës, që zhvilloi punimet në Tiranë në nëntor të vitit të shkuar.

Dita e Alfabetit Shqip u miratua nga Kuvendi në shkurt të këtij viti. Këshilli i Ministrave miratoi një vendim për një ndryshim për ligjin për festat kombëtare dhe ditët përkujtimore, duke i propozuar Kuvendit të Shqipërisë shtimin e Ditës së Alfabetit si një nga festat tona kombëtare.

Kjo ditë vjen në përkujtim të Kongresit të Manastirit, i zhvilluar mes datave 14 deri në 22 nëntor të vitit 1908. Sipas numrit dhe rëndësisë së pjesëmarrësve, Kongresi i Manastirit ka qenë ngjarja më e rëndësishme e popullit shqiptar në fillimet e shekullit XX, ku si rezultat i kësaj pune më 28 nëntor të vitit 1912 u shpall edhe pavarësia e Shqipërisë. /j.p/

The post Dita e Alfabetit, Meta: Gjuha shqipe u shkrua me gërma gjaku appeared first on Agjencia Telegrafike Shqiptare.

TIRANË, 20 nëntor /ATSH/ Presidenti i Partisë së Lirisë, Ilir Meta, i arrestuar me urdhër të SPAK, pasi akuzohet për tre vepra penale, u ka bërë thirrje nga burgu simpatizantëve të tij që të protestojnë para Prokurorisë së Posaçme.

Nëpërmjet një letre, e cila u bë publike për mediat, nga sekretari i Përgjithshëm i Partisë së Lirisë, Tedi Blushi, Meta u ka kërkuar anëtarëve, simpatizantëve dhe Kryesisë së Partisë së Lirisë që të nisin protestat paqësore periodike para SPAK.

Sipas Metës protestat do të zhvillohen për të denoncuar të gjitha manipulimet skandaloze të SPAK në dosjen kundër tij dhe për të denoncuar aferat skandaloze të Edi Ramës që SPAK nuk i heton.

Letra vjen një ditë pasi Apeli i GJKKO-së vendosi ta lërë në burg Metën, i cili u arrestua më 21 tetor, nën dyshimet për disa vepra penale, “korrupsion” në 3 raste, “pastrim parash” dhe “fshehje të pasurisë”.

/a.f/

The post Meta thirrje simpatizantëve të PL-së: Protesta paqësore para SPAK appeared first on Agjencia Telegrafike Shqiptare.

TIRANË, 20 nëntor/ATSH/ Sekretari i Përgjithshëm i Partisë së Lirisë, Tedi Blushi tha se sot, procesi gjyqësor ndaj presidentit të kësaj partie, Ilir Meta është politik. Sipas Blushit, është e nevojshme që shqiptarët të sqarohen për këtë dosje, edhe pse hetimi është i paligjshëm dhe izolimi tërësisht politik.

Në një konferencë për mediet së bashku me anëtarin e Kryesisë Av.Genc Gjokutaj, Blushi sqaroi ato që i cilësoi argumente të pakundërshtueshme pse hetimi i paligjshëm, rrëmbimi kriminal dhe izolimi politik me masë ekstreme i Presidentit të Partisë së Lirisë, partisë së dytë opozitare në vend dhe partisë së tretë prej 20 vitesh, Ilir Meta është kryekëput një proces i neveritshëm politik.

“Tërësisht i papranueshëm dhe totalisht mafioz, i pabazuar në ligj, në shkelje flagrante të Kushtetutës, të Konventës Evropiane të të Drejtave të Njeriut, krejtësisht i pambështetur në asnjë dokument, në asnjë fakt penal dhe në asnjë provë, në dhunim brutal dhe të plotë të parimit të prezumimit të pafajësisë dhe të një procesi të rregullt ligjor”, u shpreh Blushi.

Për Blushin, dosja hetimore ndaj Metës është e sponsorizuar nga armiqtë e mëdhenj të Shqipërisë kundër Presidentit Meta, pa asnjë fakt apo provë.

“Dosja e fëlliqur dhe e sponsorizuar nga armiqtë më të mëdhenj të Shqipërisë dhe të kombit shqiptar kundër Presidentit Meta, që nuk ka asnjë fakt penal dhe asnjë provë ndaj tij, vërteton botërisht se drejtësia e sorosifikuar nuk funksionon mbi bazën e parimeve kushtetuese dhe të së drejtës, por mbi bazën e urrejtjes, hakmarrjes primitive, urdhrave politikë dhe metodave policeske të një shteti diktatorial”, vijoi ai.

“Presidenti i Partisë së Lirisë është sot i burgosur politik vetëm për shkak të qëndrimeve të tij shumë të drejta institucionale, politike, patriotike dhe qytetare në mbrojtje të interesit kombëtar dhe sovranitetit të Republikës së Shqipërisë”, tha Blushi. /j.p/

The post Blushi: Asnjë fakt penal ndaj Ilir Metës, procesi tërësisht politik appeared first on Agjencia Telegrafike Shqiptare.

TIRANË, 19 nëntor /ATSH/ Në Gjykatën e Posaçme të Apelit zhvillohet këtë të martë seanca për shqyrtimin e ankimit të bërë nga Ilir Meta dhe Monika Kryemadhi.

E paraqitur në Apelin e GJKKO, Kryemadhi u tha gazetarëve “u mësuam tani” ndërsa ata i kërkuan koment për paraqitjen e saj sot.

Ish-presidenti dhe kryetari i Partisë së Lirisë, Ilir Meta është me masë sigurie arrest në burg, ndërsa Kryemadhi me masë detyrim paraqitje. Të dy i kanë ankimuar masat e sigurisë të vendosura ndaj tyre, duke kërkuar lirinë.

Meta dhe Kryemadhi akuzohen nga SPAK se gjatë ushtrimit të detyrave të tyre në të shkuarën janë përfshirë në korrupsion, pastrim parash dhe mosdeklarim pasurie.

Prokurorët e Posaçëm argumentojnë se hetimet treguan se ata kishin përdorur pushtetin për favorizime të njerëzve të tyre dhe kishin marrë prej tyre vlera monetare. /j.p/

The post Ankimuan masat e sigurisë, Meta e Kryemadhi në Apelin e GJKKO appeared first on Agjencia Telegrafike Shqiptare.

TIRANË, 15 nëntor/ATSH/ Presidenti i Partisë së Lirisë, Ilir Meta ka reaguar nga ambientet e burgut 313 përmes një shkrimi në rrjetet e tij sociale. Meta theksoi në shkrim se “tymnajat e propagandës rilindase, nuk mbulojnë dot faktet dhe të vërtetat që provojnë qëndrueshmërinë e Metës përballë Reformës në Drejtësi gjatë roleve publike që ka pasur në politikën shqiptare ndër vite”.

“Tymnajat nuk mbulojnë dot faktet dhe të vërtetat e mëdha, që provojnë koherencën e Ilir Metës në raport me Kushtetutën në çdo kohë e sidomos me Reformën në Drejtësi, që në mënyrë antikushtetuese u kthye në Ramaformë si një kobure në duart e tij për të asgjësuar kundërshtarët kryesorë politikë dhe garantuar pandëshkueshmërinë e tij”, tha Meta.

Ai e përshkroi rolin e tij si kryetar i Kuvendit dhe kryetar i LSI-së, si faktor përcaktues i mazhorancës në atë periudhë. “U ra dakord për Reformën në Drejtësi me kusht që ajo të ekzaminohej dhe certifikohej nga Komisioni i Venecias”, shtoi Meta.

“Edhe kështu u bë dhe u votua, pavarësisht nga lojërat e Edi Ramës dhe McGonigalëve nga të dyja brigjet e Atlantikut. Edhe kur Edi Rama bashkë me ata e prishi konsensusin që ishte arritur më parë falë insistimit tim dhe bllokuan Komisionin e Reformës Zgjedhore të mblidhej për të reflektuar konsensusin që ishte arritur, përsëri i keni të dokumentuara me zë e figurë momentet kur unë si Kryetar i Kuvendit ndërpreva seancën plenare dhe i thirra të dy ambasadorët që ishin në lozhë (të SHBA dhe BE), si edhe Edi Ramën dhe Lulzim Bashën për t’u takuar për të kuptuar se kush po prishte konsensusin. Dihet se i vetmi që nuk erdhi ishte Edi Rama pasi ai qëndronte pas gjithë kësaj intrige, që synonte kapjen e sistemit të drejtësisë direkt përmes ndryshimeve kushtetuese, gjë që nuk e arriti dot atëherë, ndaj u votua me 140 vota”, theksoi Presidenti i PL-së.

Meta nuk i ndali akuzat për bashkëpunimet mes Prokurorëve, Këshillit të Lartë Drejtues dhe McGonigal.

“Por kuptohet, ai së bashku me McGonigalët e tij e arritën qëllimin më vonë dhe hap pas hapi”, tha Meta duke sjellë si argument, sipas tij, zgjedhjen antikushtetuese të Prokurores së Përgjithshme, Arta Marku,

Sipas Metës, “opozita jo vetëm që nuk ndërmori asnjë hap për të parandaluar skenarin e lexueshëm të Ramës për kapjen e Prokurorisë, por edhe pasi hodhi shashka tymuese në sallën e Kuvendit kur u zgjodh Arta Marku me 69 vota, nuk u ankua në Gjykatën Kushtetuese edhe pse ajo ishte ende funksionale dhe shkelja e Kushtetutës ishte shumë flagrante”.

Meta theksoi se “zvarritja e ndërtimit të Gjykatës Kushtetuese prej vitesh, konfliktet e hapura e të panevojshme President-Parlament nuk ishin pasoja dhe cenimi i besueshmërisë të institucionit më të rëndësishëm që mund të ketë një vend demokratik i vërtetë, që është Gjykata Kushtetuese”.

Sipas tij, djegia e mandateve të opozitës e përshpejtoi kapjen totale jo vetëm të drejtësisë, por edhe të gjithë institucioneve të tjera të pavarura në vend.

“Ndaj për të gjithë ata që përrallisin se mirë t’i bëhet Ilir Metës se vetë e votoi Reformën, përgjigja ime është se jam krenar që kam kundërshtuar në çdo moment këtë grusht shteti që ndodhi në vendin tonë dhe këtë betejë do ta vazhdoj deri në çmontimin e tij. Denoncimet e mia të vazhdueshme ndaj kapjes së Reformës në Drejtësi dhe instalimit të grushtit të shtetit sigurisht që do kishin dhe do të kenë pasojat e tyre edhe për mua, të cilave as u jam shmangur dhe as do t’u shmangem ndonjëherë”, tha Meta.

Meta u ndal sërish te momenti i arrestimit të tij, duke e quajtur atë “një rrëmbim dhe tregues i grushtit të shtetit, ku SPAK nxjerr urdhër-arrestin të bazuar në një ligj që është shfuqizuar 4 vite më parë”.

Ai shtoi se SPAK pret që të shpërblehet pas zgjedhjeve në maj 2025 me një mandat tjetër 9-vjeçar. /j.p/

The post Meta: Kam qenë koherent me Reformën në Drejtësi përballë grushtit të shtetit appeared first on Agjencia Telegrafike Shqiptare.

TIRANË, 14 nëntor/ATSH/ Presidenti i Partisë së Lirisë, Ilir Meta u shpreh sot se po synohet tjetërsimi i vullnetit politik të shqiptarëve dhe shkatërrimi i opozitës së vërtet.

Në një intervistë televizive nga ambientet e burgut 313 ndërsa është në hetim nga SPAK për tre vepra penale, Meta u shpreh se “edhe arrestimi i Berishës si lider i PD edhe rrëmbimi im politik janë pjesë e një skenari të vetëm, atij të tjetërsimit të vullnetit politik të shqiptarëve dhe shkatërrimit të opozitës së vërtetë, për të garantuar pandëshkueshmërinë e qeverisë më të korruptuar në kontinent”.

“SPAK është një kobure në duart e regjimit i cili është i pashpresë”, tha Meta.

I pyetur për akuzat që rëndojnë ndaj tij, Meta tha se nuk ka asnjë akuzë zyrtare të ngritur ndaj tij.

“Çdo gjë bazohet vetëm në hamendësime dhe në deklarata dhe kallëzime të personave të inkriminuar dhe me probleme me drejtësinë. Po jua përsëris që nuk kanë asnjë akuzë, asnjë provë apo fakt penal kundër meje, prezumohem i pafajshëm dhe në këto kushte dënimi ekziston vetëm në mendjet perverse të atyre që e ideuan dhe ekzekutuan këtë plan rrëmbimi politik për të përjetësuar Shqipërinë si koloni të Sorosit dhe mafias ndërkombëtare”, tha ai.

I pyetur mbi qëndrimin e ashpër ndaj ish-bashkëshortes, Monika Kryemadhi, Meta tha se “qëndrimet e mia për çështje parimore janë të prera dhe pa kompromis”.

“Lidhur me përgjegjësitë ligjore ato janë individuale dhe jo kolektive apo të transferueshme. Qëndrimet e saj mediatike dhe ligjore janë pjesë e konceptit të mbrojtjes së saj për mbrojtjen dhe nuk më shërbejnë aspak mua. Ajo që më shërben dhe më duhet mua është e vërteta dhe ajo është me mua”, shtoi ai. /m.m/j.p/

The post Meta: Po synohet shkatërrimi i opozitës së vërtetë appeared first on Agjencia Telegrafike Shqiptare.