PRISHTINË, 31 gusht /ATSH/ Ushtruesja e detyrës së presidentes, Albulena Haxhiu, ka dekretuar anëtarët e rinj të Komisionit Qendror Zgjedhor.

Haxhiu, shkruan KosovaPress, ka dekretuar vetëm nëntë anëtarë të kësaj trupe zgjedhore, duke lënë të hapur anëtarin e dhjetë, për të cilin kanë pretendime LVV dhe PDK.

Nga radhët e LVV-së në KQZ do të jetë Hysen Durmishi dhe Violeta Salihu. PDK kësaj radhe do të përfaqësohet nga Rashit Qalaj. LDK nga Ilir Fetahu, kurse AAK nga Muharrem Nitaj. Katër përfaqësuesit të tjerë janë nga komunitetet jo shumicë. Edhe mandatin e kaluar, u.d e presidentes, Albulena Haxhiu nuk ka dekretuar anëtarin e dhjetë të KQZ-së.

LVV pretendon ti ketë tri anëtarë, ndërkaq PDK dy anëtarë.

Gjatë dekretimin e të anëtarëve të ri të KQZ në Kosovë

1 nga 3

/KosovaPress/

The post Haxhiu dekreton nëntë anëtarë të rinj të KQZ-së, mbetet pezull vendi i dhjetë appeared first on Agjencia Telegrafike Shqiptare.

TIRANË, 30 gusht/ATSH/ Shërbimi Meteorologjik Ushtarak njofton se vendi ynë ditën e diel  ndikohet nga kushte atmosferike relativisht të qëndrueshme.

Moti parashikohet i kthjellët si dhe vranësira të pakta deri mesatare kalimtare nga orët e mesditës deri ato të pasdites. Në relievet malore në lindje vranësirat hera-herës deri të dendura kalimtare.

Prezencë e lartë e grimcave të pluhurit dhe rërës në ajër.

Era parashikohet të fryjë me drejtim jugperëndim – jug me shpejtësi mesatare 7 m/s, përgjatë vijës bregdetare e zonat luginore era fiton shpejtësi deri në 12 m/s shoqëruar me valëzim në dete të forcës 1-3 ballë.

Temperaturat parashikohen:

/a.f/

The post Moti të dielën me kthjellime dhe vranësira kalimtare appeared first on Agjencia Telegrafike Shqiptare.

TIRANË, 29 gusht/ATSH/ Laçi ka marrë një fitore 2-1 ndaj Partizanit në Rrogozhinë, ndërsa Elbasani dhe Vllaznia janë ndarë në barazim 1-1 në “Elbasan Arena”, në ndeshjet e zhvilluar në  kuadër të  javë së dytë  të Superligës shqiptare të futbollit.

Sfida e zhvilluar në Rrogozhinë pa Kurbinasit që kaluan në avantazh që në minutën e 7-të me Bibon, i cili realizoi edhe golin e dytë në minutën e 74-t. Partizani, që mbeti me 10 lojtarë pas kartonit të kuq të Markut në fundin e pjesës së parë, shkurtoi diferencën me Aliun në minutën e 90+2-të, por nuk arriti të shmangte humbjen.

Në “Elbasan Arena”, Vllaznia kaloi në avantazh me Muratajn në minutën e 18-të, ndërsa Elbasani barazoi në të 75-ën me Hebajn. Shkodranët shënuan në minutën e 96-të me Tafilin, por goli u anulua, duke bërë që takimi të përfundonte 1-1.

Laçi siguroi kështu tri pikë, ndërsa Elbasani dhe Vllaznia ndanë nga një pikë.

The post Laçi mposht Partizanin, Elbasani dhe Vllaznia ndahen në barazim appeared first on Agjencia Telegrafike Shqiptare.

TIRANË, 29 gusjt/ATSH/Drejtuesi Politik i Partisë Socialiste për Qarkun e Tiranës, Taulant Balla, pa nga afër ecurinë e punimeve për një projekt të rëndësishëm urbanizimi në qytetin e Rrogozhinës, investim i cili synon transformimin e një zone që prej vitesh kishte mbetur pas dore.

Gjatë inspektimit në terren, Balla u shpreh se projekti do t’i japë lagjes standarde moderne infrastrukturore, duke përfshirë rrugë të gjera, sistemim të avllive sipas një projekti unik, si dhe ndërtimin e rrjeteve të kanalizimeve të ujërave të zeza dhe të bardha.

“Ky projekt do t’i japë kësaj zone pamjen e një qyteti modern, me rrugë të gjera dhe të gjitha shërbimet e nevojshme. Kërkohet edhe mirëkuptimi i banorëve, pasi rruga do të ndërtohet sipas standardeve, me gjerësi 7 metra”, u shpreh Balla.

Ai bëri të ditur se shumë shpejt, në kuadër të programit “Rilindja Urbane 2.0”, do të nisë edhe një tjetër projekt urbanizimi në lagjen e stacionit të trenit, duke vijuar investimet që synojnë përmirësimin e infrastrukturës dhe cilësisë së jetës për banorët.

Sipas Ballës, punët në Rrogozhinë jo vetëm që nuk do të ndalen, por do të shtohen, me synimin për të përmbyllur transformimin urban të të gjithë qytetit dhe për ta bërë atë një model zhvillimi modern.

/a.f/

The post Balla inspekton punimet në Rrogozhinë: Rilindja Urbane 2.0, transformim i mëtejshëm të qytetit appeared first on Agjencia Telegrafike Shqiptare.

PRISHTINË, 29 gusht/ATSH/ Laura Fazliu ka fituar medaljen e argjendtë në kategorinë deri në 63 kilogramë në Lojërat Mesdhetare “Taranto 2026”.

Xhudistja kosovare e nisi garimin nga xhiroja e dytë, pasi në të parën ishte e lirë. Në xhiron e dytë, Fazliu e mposhti turken Ozlem Yildiz, ndërsa në gjysmëfinale triumfoi ndaj francezes Doris Boursas, duke siguruar kështu finalen.

Në luftën për medaljen e artë, Fazliu u përball me italianen Carlota Avanzato, por nuk arriti ta mposhtë kundërshtaren dhe në fund u desh të kënaqej me medaljen e argjendtë.

Kështu, Laura Fazliu i sjell Kosovës një tjetër medalje nga Lojërat Mesdhetare “Taranto 2026”, duke u shpallur nënkampione në kategorinë deri në 63 kilogramë.

/Kosovapress/

The post Medalje e argjendtë për Laura Fazliun në Lojërat Mesdhetare appeared first on Agjencia Telegrafike Shqiptare.

TIRANË, 29 gusht/ATSH/ Shërbimi Meteorologjik Ushtarak njofton se vendi ynë ditën e Shtunë ndikohet nga kushte atmosferike relativisht të qëndrueshme.

Moti parashikohet kryesisht i kthjellët si dhe alternime vranësirash mesatare dhe hera-herës deri të dendura në relievet kodrinore – malore të territorit.

Vranësirat e dendura në relievet kodrinore – malore në lindje do të shoqërohen me reshje shiu të herëpashershme me intensitet të ulët nga orët e mesditës deri ato të pasdites. Prezencë e lartë e grimcave të pluhurit dhe rërës në ajër.

Era parashikohet të fryjë me drejtim veriperëndim – jugperëndim me shpejtësi mesatare 5 m/s, përgjatë vijës bregdetare e zonat luginore era fiton shpejtësi deri në 12 m/s shoqëruar me valëzim në dete të forcës 1-3 ballë.

Temperaturat parashikohen:

/a.f/

The post E shtuna me mot të qëndrueshëm, reshje të dobëta në lindje appeared first on Agjencia Telegrafike Shqiptare.

TIRANË, 28 gusht/ATSH/Shërbimet e Komisariatit të Policisë Bulqizë, pas njoftimit se në malin e fshatit Vajkal, Njësia Administrative Fushë-Bulqizë, kishte rënë zjarr, kanë shkuar menjëherë në vendngjarje, në mbështetje të forcave zjarrfikëse, si dhe për kryerjen e veprimeve hetimore për përcaktimin e rrethanave dhe zbardhjen e autorësisë së zjarrvënies.

Nga veprimet hetimore të kryera, specialistët për Hetimin e Krimeve të Komisariatit të Policisë Bulqizë kanë bërë të mundur identifikimin e autorit të dyshuar të zjarrvënies, shtetasin A. M., 49 vjeç, banues në fshatin Vajkal, ndaj të cilit u referuan materialet në Prokurori ku nisi procedimi penal në gjendje të lirë, pasi vuan nga probleme të shëndetit mendor. 49-vjeçari, u dërgua në Spitalin Psikiatrik Shkodër për trajtim të specializuar.

Drejtoria Vendore e Policisë Dibër apelon për të gjithë qytetarët të mos ndezin zjarre për djegien e mbetjeve, barishteve apo për qëllime të tjera, pasi përhapja e flakëve mund të sjellë pasoja të rënda për jetën, pronën dhe mjedisin.

Gjithashtu, policia fton qytetarët të denoncojnë në numrin 112 çdo rast zjarrvënieje apo paligjshmërie tjetër, duke garantuar reagim të menjëhershëm dhe të paanshëm.

The post Identifikohet autori i dyshuar i zjarrvënies në Vajkal, procedohet penalisht appeared first on Agjencia Telegrafike Shqiptare.

PRISHTINË, 28 gusht /ATSH/ Autoritetet në Kosovë thanë se të paktën dhjetë mbetje kockore të gjetura në tri varrezat masive në Zubin Potok, janë dërguar në Hagë për identifikim përmes ADN-së.

Ministri në detyrë për Punë, Familje dhe Vlerat e Luftës Çlirimtare, Andin Hoti, gjatë një vizite në Kalludër – një nga lokacionet ku u gjetën mbetje mortore – së bashku me familjarët e të zhdukurve, tha se mbetjet mortore të gjetura në këtë vend janë dërguar në laboratorin e Komisionit Ndërkombëtar për Persona të Zhdukur në Hagë, ku do të bëhet krahasimi me mostrat e dhëna nga familjarët e të zhdukurve.

Pritet që shpejt të arrijnë rezultatet e para nga Haga pas dërgimit të mbetjeve kockore, thanë nga Institutit i Mjekësisë Ligjore.

Gërmimet kishin nisur në korrik dhe më 21 gusht, autoritetet njoftuan se kishte përfunduar procesi i gërmimeve dhe i zhvarrosjes të mbetjeve mortore në tri lokacione në Kalludër të Vogël dhe Jabukë të Zubin Potokut. Në tri varret masive, Prokuroria Speciale ka deklaruar se janë gjetur mbetje mortore të të paktën 23 personave.

Lidhur me këtë rast, tre persona janë arrestuar nën dyshime për krime lufte kundër popullatës civile dhe aktualisht të njëjtit janë në paraburgim.

Autoritetet në Kosovë dyshojnë se mbetjet mortore të gjetura në varrezat masive në Kalludër të Vogël dhe në Jabukë të Zubin Potokut mund t’i përkasin “grupit të intelektualëve të Mitrovicës”.

Grupi prej 23 personash është i zhdukur që nga 19 prilli i vitit 1999. Në mesin e tyre kishte mjekë, profesorë, avokatë dhe profile të tjera.

Prokuroria Speciale e Kosovës tha se rastin e 23 personave të zhdukur e kanë trajtuar prej shtatë vjetësh dhe se provat e mbledhura deri tani çojnë hetimin drejt tyre, por vetëm përmes identifikimit me ADN do të vërtetohet nëse bëhet fjalë për ta.

Udhëheqësja e Komisionit Ndërkombëtar për Persona të Zhdukur (ICMP) në Ballkanin Perëndimor, Samira Krehiq, ditë më parë tha për Radion Evropa e Lirë se gjetja e mbetjeve mortore është vetëm fillimi i një procesi kompleks të identifikimit.

Sipas saj, gjendja e mbetjeve, degradimi i ADN-së dhe mungesa e mostrave të mjaftueshme nga familjarët mund ta vështirësojnë identifikimin. Në rastet më komplekse, sipas Krehiq, mund të kërkohen ekspertizë, analiza dhe përpjekje shtesë.

Ajo u shpreh se identiteti i viktimave dhe ngjarja nuk duhet të paragjykohen para përfundimit të analizave të ADN-së.

“Vetëm pasi ta dimë me siguri identitetin individual të të gjitha viktimave që janë gjetur, mund të fillojë rindërtimi i ngjarjes, jo anasjelltas”, tha Krehiq.

ICMP-ja është përfshirë në kërkimin dhe identifikimin e personave të zhdukur nga lufta në Kosovë që nga viti 1999.

Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.

Kosova ka kërkuar vazhdimisht nga Serbia bashkëpunim për zbardhjen e fatit të personave të zhdukur dhe qasje në arkivat ushtarake që sipas autoriteteve mund të ndihmojnë në identifikimin e lokacioneve të varreve të mundshme.

/REL/

The post Mbetjet mortore të gjetura në Zubin Potok dërgohen në Hagë për identifikim përmes ADN-së appeared first on Agjencia Telegrafike Shqiptare.

PRISHTINË, 28 gusht /ATSH/ Xhudistja kosovare Fatjona Kasapi ka fituar medaljen e bronztë në Lojërat Mesdhetare “Taranto 2026”.

Kasapi ishte e lirë në xhiron e parë, ndërsa në çerekfinale u mposht me Ippon nga francezja Pauline Cuq.

Ajo e vazhdoi garën përmes repasazhit, ku në luftën e parë ishte e lirë. Në duelin e dytë të repasazhit, Kasapi triumfoi me Yuko ndaj portugezes Maria Siderot, duke siguruar luftën për medaljen e bronztë.

Në përballjen vendimtare për podium, Kasapi e mposhti me Yuko italianen Gaia Stella dhe kështu fitoi medaljen e bronztë për Kosovën.

/Kosovapress/

The post Fatjona Kasapi fiton medaljen e bronztë në Lojërat Mesdhetare appeared first on Agjencia Telegrafike Shqiptare.

TIRANË, 28 gusht/ATSH/ Presidenti i Federatës Shqiptare të Futbollit, Armando Duka, ka përshëndetur përmes një reagimi në rrjetet sociale pjesëmarrjen e Egnatias në UEFA Conference League, duke e cilësuar këtë një arritje të rëndësishme për futbollin shqiptar.

“Me krenari të veçantë ndoqa sot shortin e UEFA Conference League!

Për herë të parë në histori, një klub shqiptar mes klubeve të Conference League! Një arritje e jashtëzakonshme për Egnatian dhe futbollin shqiptar!”, shkruan Duka.

Ai i ka përcjellë gjithashtu urimet klubit rrogozhinas për aventurën europiane.

“Urimet e mia dhe shumë suksese në Europë!”, përfundon presidenti i FSHF-së.

1 nga 2

The post Duka: Për herë të parë në histori, një klub shqiptar mes klubeve të Conference League appeared first on Agjencia Telegrafike Shqiptare.

TIRANË, 28 gusht/ATSH/ Shërbimi Meteorologjik Ushtarak bëri të ditur se vendi  ynë ditën e premte ndikohet nga kushte atmosferike të qëndrueshme.

Moti parashikohet me alternime kthjellimesh dhe vranësirash mesatare në orët e mesditës dhe pasdites kryesisht përgjatë relieveve malore të cilat pritet të shoqërohen me reshje lokale shiu me intensitet kryesisht të ulët.

Pas orëve të pasdites mot kryesisht i kthjellët.

Era me drejtim veriperëndim – verilindje me shpejtësi mesatare 7 m/s, përgjatë vijës bregdetare e kryesisht atë jugperëndimorë  e zonat luginore era fiton shpejtësi deri në 14m/s, valëzim në dete i forcës 1-3 ballë.

Temperaturat parashikohen:

The post E premtja me mot të qëndrueshëm, reshje të izoluara në relievet malore appeared first on Agjencia Telegrafike Shqiptare.

TIRANË, 27 gusht/ATSH/ Ministri i Kulturës, Turizmit dhe Sportit, Blendi Gonxhja, ka shprehur ngushëllimet për ndarjen nga jeta të piktorit dhe studiuesit Kujtim Buza, duke e cilësuar atë një prej emrave të rëndësishëm të artit pamor shqiptar.

Në një reagim në rrjetet sociale, Gonxhja shprehet se lajmi për ndarjen nga jeta të Buzës është pritur me “trishtim të thellë”, ndërsa vlerëson kontributin e tij shumëvjeçar në jetën artistike dhe kulturore të vendit.

Sipas ministrit, Kujtim Buza i përkiste një familjeje të lidhur ngushtë me historinë e artit shqiptar. Ai ishte i biri i piktorit Abdurrahim Buza, një prej themeluesve dhe mjeshtërve të pikturës moderne shqiptare.
“Kujtim Buza i përkiste një familjeje që është e lidhur pazgjidhshmërisht me historinë e artit tonë. Bir i Abdurrahim Buzës, një prej themeluesve dhe mjeshtërve të pikturës moderne shqiptare, ai u rrit pranë artit dhe e vijoi këtë trashëgimi me rrugëtimin e vet krijues”, shprehet Gonxhja.

Ministri thekson se Buza, përgjatë karrierës së tij, dha një kontribut të rëndësishëm në artin dhe jetën kulturore shqiptare, duke përmendur edhe drejtimin e Galerisë Kombëtare të Arteve.

“Nga studioja ku dikur pikturonte pranë të atit, te krijimtaria e tij shumëvjeçare, drejtimi i Galerisë Kombëtare të Arteve dhe angazhimi në jetën kulturore të vendit, Kujtim Buza i kushtoi artit një jetë të tërë”, shkruan ai.

Gonxhja nënvizon gjithashtu se veprat e Kujtim Buzës, të pranishme edhe në fondin e Galerisë Kombëtare të Arteve, përbëjnë pjesë të trashëgimisë kulturore shqiptare dhe kontribuojnë në pasurimin e kujtesës artistike të vendit.
Në përfundim të reagimit, ministri i shpreh ngushëllimet familjes Buza, të afërmve, miqve, kolegëve dhe komunitetit të artistëve.
“U prehtë në paqe!”, përfundon Gonxhja.

The post Gonxhja: Kujtim Buza i kushtoi artit një jetë të tërë, pjesë e trashëgimisë që pasuron kujtesën kulturore appeared first on Agjencia Telegrafike Shqiptare.

LllTIRANË, 27 gusht/ATSH/ Piktori, studiuesi dhe një prej emrave të rëndësishëm të artit pamor shqiptar, Kujtim Buza, është ndarë nga jeta mbrëmjen e kësaj të enjteje, duke lënë pas trishtim te familjarët, miqtë, kolegët dhe dashamirësit e artit të tij.

Kujtim Buza i përkiste një familjeje të lidhur ngushtë me historinë e artit shqiptar. Ai vinte nga një familje me tradita të forta patriotike nga Gjakova dhe ishte i biri i piktorit të njohur Abdurrahim Buza, një prej themeluesve dhe mjeshtërve të pikturës moderne shqiptare.

I rritur në një familje ku arti ishte pjesë e jetës së përditshme, Kujtim Buza u njoh me pikturën që në fëmijëri. Pranë të atit, ai u formua artistikisht dhe kultivoi dashurinë për artin, të cilit më pas do t’i kushtonte gjithë jetën.

Rrugëtimi i tij krijues u shtri në disa dekada, duke e bërë atë një emër të njohur në jetën artistike dhe kulturore shqiptare. Krahas krijimtarisë në pikturë, Buza u angazhua edhe në studimin dhe dokumentimin e artit, duke dhënë kontribut në njohjen dhe ruajtjen e trashëgimisë pamore shqiptare.

Një tjetër pjesë e rëndësishme e veprimtarisë së tij ishte drejtimi i Galerisë Kombëtare të Arteve, ku kontribuoi në jetën institucionale të artit shqiptar.

Krijimtaria e Kujtim Buzës është pjesë edhe e fondit të Galerisë Kombëtare të Arteve, duke mbetur pjesë e trashëgimisë artistike të vendit dhe e kujtesës kulturore shqiptare.

Ndarja e tij nga jeta shënon humbjen e një figure të rëndësishme të artit pamor shqiptar, por vepra dhe kontributi i tij mbeten pjesë e historisë së artit shqiptar.

Për ndarjen nga jeta të Kujtim Buzës kanë shprehur ngushëllime familjarët, miqtë, kolegët dhe personalitete të jetës kulturore e artistike të vendit.

/a.f/

The post Ndahet nga jeta piktori dhe studiuesi Kujtim Buza appeared first on Agjencia Telegrafike Shqiptare.

TIRANË, 27 gusht/ATSH/ – Egnatia, edhe pse mbizotëroi për më shumë se 80 minuta lojë, nuk arriti të kurorëzonte ëndrrën “Europa Ligë”, duke u eliminuar në fazën e fundit kualifikuese nga skuadra norvegjeze e Lillestrom. Nga ana tjetër, Dinamo City ka mbyllur rrugëtimin e saj në Evropë, pas humbjes 4-2 në Qipro përballë Pafosit.

Egnatia shënon e para, por rrëzohet në fund

Skuadra kampione e Shqipërisë, pasi gjeti avantazhin e para, nuk arriti të përfundonte me sukses sfidën në Norvegji përballë Lillestrom. Skuadra e Nevil Dedes preku iluzionin e kualifikimit pas golit të shënuar në minutën e 33-të nga Sota, por rrogozhinasit u shtangën tetë minuta para përfundimit të lojës.

Lillestrom reagoi në pjesën e dytë dhe, në minutën e 82-të, gjeti golin e barazimit me Moen Fos, pas asistit të Ibrahimajt.

Koha e rregullt u mbyll në barazim 1-1, duke e dërguar sfidën në shtesë. Në minutat shtesë, Egnatia pati mundësitë e saj për të rikthyer avantazhin, por nuk arriti të tregohej cinike përpara portës.

Në minutën e 94-t, Olsen shënoi golin e dytë për Lillestrom, duke përmbysur rezultatin dhe duke vendosur skuadrën norvegjeze në avantazh. Egnatia tentoi të reagonte deri në fund, por nuk arriti të gjente golin që do ta rikthente në garë.

Pas eliminimit nga gara për fazën e ligës së Europa League, rrogozhinasit do të vazhdojnë aventurën evropiane në Conference League.

Dinamo City, eliminim dramatik në Qipro

Blutë e Dinamo City, edhe pse mbijetuan për të paktën 115 minuta, nuk arritën të siguronin kualifikimin në Ligën e Konferencës. Skuadra dinamovite u mund 4-2 nga Pafosi në Qipro.

Ndeshja nisi në mënyrën më të mirë për ekipin e drejtuar nga Ilir Daja. Në minutën e 8-të, Fadairo përfitoi nga një aksion i mirë i bluve dhe kaloi Dinamon në avantazh.

Në të 12-ën, Sema barazoi shifrat me një gjuajtje nga distanca, me topin që u devijua dhe përfundoi në rrjetë.

Në minutën e 79-të, Pafosi përmbysi rezultatin me Ioannou, i cili shënoi me kokë pas një harkimi nga krahu i djathtë. Dinamo, megjithatë, reagoi menjëherë dhe tregoi karakter. Në minutën e 87-të, pas një goditjeje këndi, Silva-Richards u gjend në vendin e duhur dhe dërgoi topin në rrjetë, duke barazuar shifrat në 2-2.

Ky rezultat e çoi ndeshjen në kohën shtesë dhe gjithçka mbeti e hapur. Në minutën e 116-të, Quina shënoi golin e tretë të Pafosit dhe riktheu vendasit në avantazh.

Goditja për Dinamon ishte fatale. Në 120+1’, Silva vulosi fitoren 4-2 të Pafosit dhe i dha fund përfundimisht shpresave të bluve.

/a.f/

The post Lillestrom shuan ëndrrat e Egnatias për Europa League, Dinamo City mbyll rrugëtimin evropian appeared first on Agjencia Telegrafike Shqiptare.

TIRANË, 27 gusht/ATSH/ Kryeministri Edi Rama ka ndarë mbrëmjen e sotme pamje të Hënës që ndriçon në qiellin e Korçës, mbi malin e Moravës, duke krijuar një peizazh të veçantë dhe një spektakël natyror për banorët e qytetit të serenatave, por edhe për vizitorët vendas e të huaj.

Në fotografinë e realizuar gjatë mbrëmjes, disku i ndriçuar i Hënës shfaqet mbi majën e malit të Moravës, ndërsa poshtë tij dallohen silueta e kryqit monumental dhe dritat e kishës, duke krijuar një kontrast mes dritës së ftohtë të Hënës dhe ndriçimit të ngrohtë të monumenteve.

Kryqi i Moravës, i vendosur në majën e Shëndëllisë, rreth 1,365 metra mbi nivelin e detit, është një nga pikat më karakteristike panoramike mbi qytetin e Korçës. Kryqi i madh i bardhë është i dallueshëm nga larg dhe së bashku me kishën pranë tij përbën një prej simboleve të peizazhit të Moravës.

Pamja vjen në prag të hënës së plotë të gushtit. Sipas të dhënave astronomike, Hëna më 27 gusht ishte rreth 95% e ndriçuar, ndërsa faza e plotë e Hënës arrihet më 28 gusht.

Mbrëmja e kthjellët në Korçë ka favorizuar edhe më shumë pamjen, duke bërë që Hëna të dallohet qartë mbi siluetën e Moravës.

Kombinimi i Hënës së ndritshme, relievit malor dhe monumenteve të Moravës i ka dhënë qytetit një tjetër pamje karakteristike, duke sjellë një moment të veçantë për ata që kanë pasur mundësi ta shijojnë këtë panoramë.

/m.m/a.f/

The post Hëna mbi Moravë, Rama ndan pamjet spektakolare nga Korça appeared first on Agjencia Telegrafike Shqiptare.

TIRANË, 16 gusht/ATSH/ Shërbimi Meteorologjik Ushtarak njoftoi se ditën e hënë vendi ynë do të ndikohet nga kushte atmosferike të qëndrueshme.

Moti parashikohet i kthjellët, me vranësira të pakta deri mesatare kalimtare nga orët e mesditës deri në pasdite. Vranësirat do të jenë më të përqendruara në relievet kodrinore-malore në lindje të territorit, ku do të shoqërohen me reshje afatshkurtra shiu, në formën e pikave.

Era do të fryjë me drejtim veriperëndim-jugperëndim, me shpejtësi mesatare 4-7 m/s. Në dete pritet valëzim i forcës 1-2 ballë.

Temperaturat parashikohen:

The post Mot i qëndrueshëm të hënën, reshje të shkurtra shiu në zonat malore appeared first on Agjencia Telegrafike Shqiptare.

TIRANË, 14 gusht /ATSH/ – Byroja Kombëtare e Hetimit (BKH) ka shpallur procedurën e konkurrimit të hapur për rekrutimin e 40 hetuesve në profilin e përgjithshëm.

Sipas njoftimit zyrtar, konkurrimi do të jetë i hapur, transparent dhe i bazuar në meritë, integritet, aftësi profesionale e fizike, aftësi komunikimi dhe standarde të larta etike. Hetuesit do të ushtrojnë detyrën në selinë e BKH-së në Tiranë dhe, sipas nevojave të hetimit, në të gjithë territorin e vendit.

Kandidatët duhet të jenë shtetas shqiptarë, të kenë arsim të lartë policor, juridik, në kontabilitet ose në degë të tjera që lidhen me misionin e BKH-së, si dhe më shumë se një vit përvojë pune në institucionet e zbatimit të ligjit ose në fusha të lidhura me veprimtarinë e BKH-së. Ata duhet gjithashtu të plotësojnë kushtet e integritetit, sigurisë, pasurisë dhe figurës dhe të kalojnë me sukses të gjitha fazat e përzgjedhjes.

BKH veçon si fusha me interes hetimin penal dhe veprimtarinë operacionale, korrupsionin dhe krimin e organizuar, hetimin financiar e pasuror, krimin kibernetik dhe provat digjitale, telekomunikacionin dhe sistemet teknike, analizën e të dhënave dhe inteligjencën kriminale, si dhe fushat juridike e bashkëpunimin ndërinstitucional e ndërkombëtar.

Procedura e konkurrimit përfshin testin konjitiv, testimin e aftësive fizike, testin e zgjeruar me shkrim, intervistën e strukturuar, renditjen paraprake, poligrafin, verifikimin e pasurisë, figurës dhe sigurisë, kontrollin mjekësor e psikologjik, renditjen përfundimtare, trajnimin dhe emërimin. Fazat e pikëzuara kanë një total maksimal prej 106 pikësh.
Njoftimi përcakton se poligrafi, verifikimi i pasurisë, figurës dhe sigurisë, kontrolli mjekësor e psikologjik dhe trajnimi nuk pikëzohen, por janë të detyrueshme. Marrja e zeros në një nga komponentët e testimit fizik sjell skualifikimin e kandidatit.

Aplikimi duhet të bëhet elektronikisht dhe me postë. Dokumentacioni elektronik dërgohet në adresën bkh.aplikim@spak.gov.al, ndërsa kopja fizike në adresën e BKH-së, në rrugën “Jordan Misja”, nr. 1, Tiranë. Afati i aplikimit është 14 shtator 2026, ora 16:00.

Pozicioni i hetuesit të BKH-së ka statusin e oficerit të Policisë Gjyqësore. Pas përfundimit të trajnimit dhe emërimit, hetuesi shërben për një periudhë jo më pak se shtatë vjet pranë BKH-së, përveç rasteve të shkarkimit të parashikuara nga ligji.

SHPALLJE PUBLIKE PËR REKRUTIMIN E 40 (DYZET) HETUESVE TË BYROSË KOMBËTARE TË HETIMIT

/a.f/

The post BKH hap konkursin për 40 hetues të rinj, aplikimet deri më 14 shtator appeared first on Agjencia Telegrafike Shqiptare.

Kryeministri në detyrë i Kosovës, Albin Kurti, ka thënë të premten se partitë politike duhet të fillojnë diskutimet edhe për emrat konkretë të kandidatëve për presidentin e ardhshëm, me qëllim që të arrihet një marrëveshje dhe të shmangen zgjedhjet e reja.

“Duhet të fillojmë të flasim edhe me emra, sepse po humbim shumë kohë, por më së shumti humbim duke shkuar në zgjedhje”, tha Kurti.

Ai tha se presidenti i ardhshëm duhet të jetë “konsensual”, gjithëpërfshirës dhe të ketë mbështetje sa më të gjerë në Kuvend dhe në mesin e qytetarëve.

Kurti bëri të ditur se mbrëmë u ka shkruar kryetarëve të PDK-së, LDK-së dhe Aleancës, duke u kërkuar takim për të diskutuar për presidentin.

“Duam që për këtë të merremi vesh paraprakisht në mënyrë që të evitojmë zgjedhjet”, tha ai.

Ai vlerësoi se në Kosovë ka “me dhjetëra” personalitete nga jeta akademike, politike dhe shoqërore, përfshirë persona që kanë kontribuar në luftë dhe në shtetndërtim, që mund të konsiderohen për këtë post.

Deklaratat e Kurtit vijnë një ditë pasi LDK-ja njoftoi se tërhiqet nga negociatat për poste me LVV-në dhe se nuk kërkon asnjë pozitë institucionale, por do të votojë për një figurë jopartiake për president.

Ndërkohë, PDK-ja dhe AAK-ja qëndruan edhe të premten në sallën e Kuvendit, duke kërkuar vazhdimin e seancës konstituive, ndonëse për sot nuk është thirrur seancë.

Ata po kërkojnë që të vazhdojë seanca konstituive e Kuvendit, e cila ka mbetur e ndërprerë në kuadër të përpjekjeve për konstituimin e legjislaturës së re.

“LVV-ja e ka kaluar një kufi që nuk është dashur ta kalojnë kurrë. Ata qëllimshëm e kanë shkelur afatin kushtetues për konstituimin e Kuvendit”, tha kryetari i PDK-së, Bedri Hamza, në foltoren e Kuvendit.

PDK-ja dhe Aleanca kanë qëndruar në Kuvend edhe gjatë ditëve të kaluara, duke kërkuar që puna e Kuvendit të vazhdojë, ndërsa përplasjet me deputetët e Lëvizjes Vetëvendosje janë shoqëruar edhe me tensione në sallë.

Në anën tjetër, Lëvizja Vetëvendosje ka insistuar se para vazhdimit të procedurave për konstituimin e Kuvendit duhet të arrihet një marrëveshje politike për zgjedhjen e presidentit të ardhshëm.

Kriza institucionale në Kosovë po vazhdon prej përplasjes mbi mënyrën se si duhet të procedohet me konstituimin e Kuvendit dhe zgjedhjen e presidentit.

Pas zgjedhjeve të 7 qershorit, LVV-ja doli partia e parë me 53 deputetë, PDK-ja me 22, LDK-ja me 18 dhe AAK-ja me shtatë.

Zgjedhjet e qershorit u shkaktuan pikërisht për çështjen e presidentit, pasi palët nuk arritën konsensus, pasi Vjosa Osmanit i përfundoi mandati pesëvjeçar në krye të shtetit në prill.

LVV-ja e Kurtit ka fituar mandate të mjaftueshme për të konstituuar Kuvendin dhe për të votuar Qeverinë e re – duke llogaritur edhe në votat e partive të minoriteteve joshumicë.

Megjithatë, për zgjedhjen e presidentit nevojitet prania e 80 deputetëve në Kuvendin me 120 vende që votimi për presidentin e Kosovës të jetë i vlefshëm.

/REL/

The post Kurti iu bën thirrje partive për takim: Të diskutojmë emrat për presidentin appeared first on Agjencia Telegrafike Shqiptare.

TIRANË, 14 gusht/ATSH/ Shërbimi Meteorologjik Ushtarak bëri të ditur se ditën e premte vendi ynë do të ndikohet nga kushte atmosferike relativisht të paqëndrueshme.

Moti parashikohet me kthjellime në veri e përgjatë vijës bregdetare dhe alternime vranësirash, në lindje e jug, nga ku edhe do të pasohen me reshje afatshkurtra e lokale shiu me intensitet të ulët në mesditë e pasdite.

Era do të fryjë me drejtim veriperëndim-juglindje me shpejtësi mesatare 7 m/s, përgjatë vijës bregdetare dhe zonave luginore era do të arrijë shpejtësi deri në 10 m/s shoqëruar me valëzim në dete të forcës 1-3 ballë.

Temperaturat parashikohen:

/r.e/

The post E premtja me mot të paqëndrueshëm, reshje lokale në disa zona appeared first on Agjencia Telegrafike Shqiptare.

PRISHTINË, 13 gusht/ATSH/Udhëheqësi i Lidhjes Demokratike të Kosovës, Lumir Abdixhiku, tha se partia e tij heq dorë nga çdo kërkesë për postin e kryeparlamentarit, presidentit dhe pjesëmarrjes në Qeveri, duke theksuar se Lëvizja Vetëvendosje mund t’i mbajë të gjitha.

“Meqë LVV-ja nuk po e konsideron se ka nevojë për LDK-në si partnere, atëherë nuk do ta ketë dekor as për pushtetin e saj. Ne do të qëndrojmë në opozitë dhe do ta ushtrojmë këtë përgjegjësi me dinjitet”, tha Abdixhiku në një konferencë për media.

Megjithatë, Abdixhiku tha se LDK-ja do të kontribuojë për çështjen e presidentit, duke thënë se kanë kushte për kreun e ri të shtetit.

Sipas tij, presidenti i ri duhet ta mbrojë Republikën dhe kushtetueshmërinë.

“Nga ky moment, LVV mund ta zgjedhë stabilitetin përmes një presidenti që e zgjedhim bashkëshkrish ose mund ta çojmë vendin drejt një krize të re”, tha ai, duke e akuzuar LVV-në e Albin Kurtit se nuk po pranon “kompromis minimal”.

Ai tha se LDK-ja do të jetë pjesë e zgjedhjes së presidentit sepse nëse s’marrin pjesë në votim, vendi shkon në zgjedhje për shkak se me 61 votat e LVV-së “s’mund të zgjidhet” presidenti.

“Ta zgjedhim një president që i shërben Republikës, jopartiak, e jo një president karate”, tha ai, duke shtuar se propozimet partiake do të refuzohen.

“Propozimet e njëanshme janë të refuzueshme”, tha ai, duke shtuar se emri i presidentit të ri duhet të dalë pas diskutimeve të detajuara mes partive.

LDK ishte partia e vetme që pranoi të negocionte me LVV-në, fituesen e zgjedhjeve të qershorit.

Abdixhiku tha se Kurti i ofroi atij postin e zëvendëskryeministrit dhe tri ministri, por oferta nuk është pranuar, duke shtuar se LDK-ja kishte kërkuar postin e presidentit dhe pjesëmarrje në ekzekutiv.

“Meqë LVV-ja nuk po e konsideron se ka nevojë për LDK-në si partnere, atëherë nuk do ta ketë dekor as për pushtetin e saj”, tha Abdixhiku.

Ai kërkoi që Kuvendi të konstituohet pa vonesë dhe LVV-ja të formojë Qeverinë e re të vendit.

Kosova ndodhet në një ngërç të ri institucional pas zgjedhjeve të parakohshme të 7 qershorit.

Kuvendi ende nuk është konstituuar, ndonëse afati 30-ditor për përfundimin e këtij procesi ka skaduar më 7 gusht.

Lëvizja Vetëvendosje ka kërkuar që para vazhdimit të seancës të arrihet një marrëveshje politike, veçanërisht për zgjedhjen e presidentit të ardhshëm, ndërsa PDK-ja dhe Aleanca insistojnë që Kuvendi të konstituohet pa e kushtëzuar këtë proces me çështjen e presidentit.

/REL/

The post Abdixhiku: Heqim dorë nga çdo kërkesë, presidenti të jetë jopartiak appeared first on Agjencia Telegrafike Shqiptare.