Amnistia penale, pritet që të lirojë menjëherë nga qelia, 380 të burgosur, ndërsa do përfitojnë ulje të dënimit 980 të tjerë. Në draftin e Amnistisë Penale të siguruar nga ABC News, theksohet se kategoria për sa i përket burrave të dënuar që do të lirohen, janë ata që kanë dënim deri në 3 vite, apo që u ka mbetur më pak se 3 vite dënim për të vuajtur.

Një katëgori tjetër që do të përfitojnë janë burrat që janë 60-vjeç ose më shumë. Ndërkohë për sa u përket grave, do të lirohen nga qelia, ata që janë të dënuara me 4 vite , osë që u ka mbetur edhe 4 vite për të vuajtur, si dhe ata që janë 50-vjeç ose më shumë. Amnistia përfshin, edhe të gjithë ata që kanë qënë 18-vjeç kur kryen krimin. Amnisitia ka efekt, përr ata që kanë marrë dënim të formës së prerë brenda datës 31 Janar 2025. Për sa I përket përfitimit nga ulja e dënimit, në draftin e

Ministrisë së Drejtëisë, parashikohet  ulja e dënimit me 1 vit për burrat dhe 1 vit e gjysmë për gratë dhe të miturit.

Ajo që vihet re,  është zgjerimi i kategorive përfituese në Amnisti Penale. Për veprat penale që parashikohet dënim deri në 3 vjet burg, me përjashtim të veprave që kanë kriteret ndaluese, parashikohet përjashtimin nga ndjekja penale si dhe kallëzimet që ndodhen në këto organe. Nga kjo do të përfitojnë rreth 7 mijë, persona, përfshirë, veprat penale të vjedhjes dhe drejtimit të parregullt të automjetit.

Sipas draftit, asnjë prej të gjykuarve në Gjykatën e Posacme, nuk do të mund të përfitojë nga kjo amnisti. Po ashtu parashikohen edhe të paktën 19 kategori të veprave penale të rënda që do të mbeten jashtë amnistisë, krimet kundër njerëzimit, krime kundër jetës, krime seksuale, vepra kundër fëmijëve, veprat penale që prekin zgjedhjet e lira, bandat e armatosura dhe organizata kriminale, si dhe veprat e korrupsionit,si dhe Krime me qëllime terroriste. Drafti I Amnistisë Penale, është dërguar në Kuvend për tu miratuar.  / abcnews.al/

Ukraina ka mbetur pa energji elektrike si pasojë e sulmeve të vazhdueshme ruse, të cilat synojnë sektorin e energjisë së vendit.

Presidenti i Ukrainës, Volodymyr Zelensky, tha se më shumë se 200 ekipe riparimi po punojnë për të rikthyer energjinë elektrike në Kiev, pas sulmeve të gjera ruse që kanë shënjestruar sektorin energjetik të vendit.

Më shumë se 1,100 pallate banimi në kryeqytet vazhdojnë të jenë pa energji elektrike, tha Zelensky, duke shtuar se ka folur me zyrtarët për mbështetjen e komuniteteve në pjesë të tjera të vendit që janë prekur nga sulmet.

Rusia së fundmi ka rifilluar sulmet, pas një pauze njëjavore që presidenti amerikan Donald Trump i kishte kërkuar Vladimir Putinit ta respektonte, ndërsa Ukraina po përballej me një valë të ftohti.

Ndërkohë, zyrtarë nga SHBA-ja, Ukraina dhe Rusia po takohen sërish në Abu Dhabi për të diskutuar detajet e një plani paqeje.

“Deri më sot, situata më e vështirë është në Kiev dhe rrethinat e tij, në Kharkiv dhe rajonin përreth, në rajonin e Sumyt dhe të Poltavës,” shkroi Zelensky në rrjetet sociale të mërkurën.

Ai shtoi se do të angazhohen edhe më shumë ekipe riparimi për të ndihmuar në rikthimin e energjisë elektrike.

Banorët janë detyruar të kalojnë natën duke u strehuar në stacionet e metrosë së Kievit, ku disa kanë ngritur edhe tenda në platforma për t’u mbrojtur nga i ftohti i acartë.

Autoritetet kanë ngritur qendra nëpër qytet ku qytetarët mund të ngrohen. Po ashtu, po importohen më shumë gjeneratorë për të përballuar periudhat më të gjata të ndërprerjeve të energjisë, ndërsa inxhinierët përpiqen të riparojnë dëmet.

Më shumë se 160 persona u vranë në fshatin Woro në perëndim të Nigerisë nga sulmues të armatosur, duke u bërë sulmi më vdekjeprurës i këtij viti.

Banorët thanë se viktimat u mblodhën, iu lidhën duart dhe më pas u qëlluan. Sulmuesit dogjën edhe shtëpi dhe dyqane, raporton theguardian.

Disa banorë u arratisën në pyll me plagë nga armët, ndërsa disa, përfshirë sundimtarin e fshatit, janë të zhdukur. Banorët raportuan se sulmuesit ishin xhihadistë që kërkuan që ata të pranonin Sheriatin.

Kur banorët refuzuan, sulmuesit hapën zjarr gjatë predikimit. Policia konfirmoi sulmin, por nuk ka dhënë shifra të sakta, raporton theguardian.

Guvernatori i Kwara e dënoi si një akt frikacak të terrorizmit. Ushtria njoftoi se kishte neutralizuar 150 banditë dhe kishte pastruar strehimoret e tyre.

Nigeria po përballet me dhunë xhihadiste, grabitje dhe konflikte etnike në shumë rajone. SHBA kanë dërguar një skuadër të vogël ushtarake për të ndihmuar në luftën kundër dhunës.Siguria në vend mbetet e paqëndrueshme dhe komunitetet po përpiqen të rikuperohen nga dhuna.

Gazetari Behxhet Begu tha se procesi zgjedhor në Kosovë është dëmtuar rëndë, duke vënë në pikëpyetje legjitimitetin e zgjedhjeve dhe të deputetëve të zgjedhur.

Begu theksoi se çdo ndryshim i sistemit zgjedhor kërkon një debat të gjerë dhe konsensus politik e shoqëror, i cili nuk mund të arrihet në këtë fazë.

“Procesi ka dëmtuar rëndë zgjedhjet në Kosovë, duke e bërë procesin të pabesueshëm. Deri tani nuk ka pasur gatishmëri nga partitë për zgjedhje të tjera. Ekziston një zotim për t’i dhënë një epilog ligjor manipulimit të votave.

Diskutimi dhe debati se çfarë do të ndodhë me sistemin zgjedhor në Kosovë është një çështje e vjetër. Ai duhet t’i nënshtrohet një debati afatgjatë, i cili duhet të çojë në konsensus mes partive politike për sistemin zgjedhor, qoftë sipas modelit të Shqipërisë apo me lista të mbyllura.

Ky është një debat i gjerë dhe nuk mund të zhvillohet tani për tani, pasi kërkon konsensus politik dhe shoqëror. Ka shumë zëra që thonë se këto zgjedhje dhe deputetët e zgjedhur nuk kanë legjitimitet të plotë. Ndryshimi i votave është bërë vetëm në formularin përfundimtar.”  / abcnews.al /

“Pa rezultate në drejtësi, nuk ka rritje pagash”.

Ky ishte qëndirmi i presidentit malazez Jakov Milatoviç për kërkesën e rritjes me 30% të pagave të sistemit gjyqësor.

Milatoviç argumentoi se qytetarët e Malit të Zi nuk po shohin rezultate nga prokuroria dhe gjykatat, ndaj rritja është e pajustifikueshme.

“Gjyqësori dhe prokuroria nuk po ofrojnë drejtësi, nuk është e drejtë të rritet paga e të gjithëve. Individët përgjegjës për probleme në dhënien e drejtësisë nuk mund të shpërblehen.”

Kreu i shtetit i Malit të Zi tha se rritja e pagave duhet të ketë si kriter performancën, llogaridhënien dhe rezultatet. Pra rritja e pagave, duhet të vij pas dhënies së drejtësisë

Sistemi i drejtësisë është një kusht kyç për anëtarësimin e Malit të Zi në Bashkimin Europian. Vendi ka mbyllur deri tani 13 kapituj nga 33 në total, ndërsa Milatoviç ka kthyer për rishqyrtim 25 ligje të miratuara në parlament.

Ky hap mund të ngadalësojë mbylljen e disa negociatave të parashikuara në mars-prill.

Tregtonin në Vlorë, mallra që dyshohet se i kontrabandonin nga Italia, vihet në pranga 53-vjeçari, procedohet penalisht djali i tij. 53-vjeçari u kap në flagrancë duke transportuar medikamente mjekësore të dyshuara të kontrabanduara nga Italia.

Vijojnë hetimet për dokumentimin e veprimtarisë kriminale të këtyre shtetasve dhe identifikimin e shtetasve të tjerë që mund të jenë të përfshirë.

Materialet procedurale iu referuan Prokurorisë së Vlorës, për veprime të mëtejshme.

Aksidentet rrugore janë një problem alarmant për Kosovën.

Vetëm gjatë vitit 2025-janë shënuar mbi 100 viktima në rrugët e vendit, ndërsa në to kanë lënë jetën më shumë se 3000 qytetarë që nga viti 2000.

Të dhënat janë bërë publike nga Drejtoria e Përgjithshme e Policisë, gjatë konferencës vjetore të këtij institucioni, i cili ka kërkuar edhe ndihmën e qeverisë për ndërhyrje në menaxhimin e problematikës.

“Problemet që kanë shënuar rritje është rastet e rënda të fataliteteve që jo vetëm në Prishtinë por gjithandej Kosovës, kemi pasur rritje të rasteve me fatalitet në trafik mbi 100 persona të vdekur në trafik nga 89 që kemi pasur një vit më herët… Kosova që nga viti 2000 mijë deri më sot i ka humbur mbi 3 mijë e 111 njerëz në trafik. Është një numër i madh i jetëve të humbura në trafik dhe një prej prioriteteve ka me qenë siguria në trafik. Por që këtë punë policia nuk mund ta bëjë e vetme, na duhet mbështetja e komunave, e ministrisë së infrastrukturës dhe e gjithë shoqërisë sidomos te vetëdijesimi i njerëzve”, tha drejtori i policisë së Kosovës, Gazmend Hoxha.

“Lëvizjet e shpeshta të personelit dhe mungesat e personelit policor të graduar, angazhimet shtesë në Mitrovicë Veri, angazhimet në numër të lartë të organizimeve vendore e ndërkombëtare në kryeqytet, angazhimi në pika statike dhe objekte me rëndësi të veçantë, mungesa e hapësirë së mjaftueshme për DRP Prishtinë dhe kryeqytet”, tha drejtorit i policisë rajonale Prishtinë, Bastri Shabani.

Gjatë periudhës janar-dhjetor të vitit 2025, Drejtoria Rajonale e Policisë së Kosovës në Prishtinë ka trajtuar 19 mijë e 941 raste, një rritje në krahasim me vitin 2024 ku ishin raportuar 19 mijë e 874 raste, përfshirë aksidente, dhunë në familje, vrasje, tenttaivë për vrasje apo grabitje.

Persona të armatosur kanë vrarë të paktën 162 persona në një fshat në shtetin Kwara në Nigerinë perëndimore,ka deklaruar një zyrtar i Kryqit të Kuq, duke e bërë këtë një nga sulmet më vdekjeprurëse të muajve të fundit në vendin e përfshirë nga dhuna.

Bandat e armatosura, të njohura lokalisht si “banditë”, që plaçkisin fshatra dhe rrëmbejnë njerëz për shpërblim, veprojnë në zona të gjera të vendit, ndërsa grupe xhihadiste janë aktive në veri-lindje dhe veri-perëndim. Dhuna ndërkomunale është gjithashtu e përhapur në shtetet qendrore.

“Raportet thonë se numri i viktimave tani qëndron në 162, ndërsa kërkimi për trupa të tjerë vazhdon”, tha Babaomo Ayodeji, sekretari i Kryqit të Kuq në shtetin Kwara, duke përditësuar bilancin e mëparshëm prej 67 viktimash.

Më herët, një ligjvënës lokal në rajonin Kaiama, Sa’idu Baba Ahmed, tha se “35 deri në 40 trupa të pajetë u numëruan” pas masakrës të së martës mbrëma në fshatin Woro. Sulmi u konfirmua nga policia, e cila nuk dha shifra të viktimave, dhe nga qeveria e shtetit, e cila e fajësoi atë mbi “celula terroriste”.

“Shumë të tjerë u larguan në pyll me plagë nga armët”, tha Ahmed, duke shtuar se mund të gjenden edhe trupa të tjerë. Të armatosurit pushtuan Woron rreth orës 18:00, me orën lokale, të së martës dhe dogjën “dyqanet dhe pallatin e mbretit”, tha Ahmed. Ai shtoi se vendndodhja e mbretit tradicional mbetet e panjohur.

Guvernatori i shtetit Kwara, AbdulRahman AbdulRazaq, e dënoi sulmin si “një shprehje frikacake e frustrimit nga celulat terroriste pas fushatave kundër-terrorizmit që po zhvillohen në pjesë të shtetit”.

Ushtria nigeriane ka intensifikuar operacionet kundër xhihadistëve dhe banditëve të armatosur dhe shpesh pretendon se ka vrarë numra të mëdhenj luftëtarësh.

Muajin e kaluar, ushtria tha se kishte nisur “operacione të koordinuara të qëndrueshme kundër elementëve terroristë” në shtetin Kwara dhe kishte arritur suksese të dukshme. Mediat lokale raportuan se ushtria kishte “neutralizuar” 150 banditë, një term që përdoret për të nënkuptuar të vrarë. “Ata i neutralizuan me sukses… terroristët, ndërsa të tjerë arritën të shpëtonin në pyll”, tha ushtria në një deklaratë më 30 janar, duke shtuar se kishte pastruar strehimet e tyre.

“Trupat gjithashtu sulmuan kampet e largëta, deri më tani të paarritshme për forcat e sigurisë, ku disa kampe të braktisura dhe logjistika u shkatërruan, duke degraduar ndjeshëm aftësinë e terroristëve për t’u furnizuar”, thuhej në deklaratë.

Si përgjigje ndaj problemeve të shumta të sigurisë, autoritetet në shtetin Kwara kishin vendosur shtetrrethime në disa zona dhe kishin mbyllur shkollat për disa javë, përpara se të urdhëronin rihapjen e tyre të hënën.

Vendi më i populluar i Afrikës ka qenë nën vëzhgim intensiv muajt e fundit pasi presidenti i SHBA-ve, Donald Trump, pretendoi për një “gjenocid” të të krishterëve në Nigeri.

Ky pretendim është hedhur poshtë nga qeveria nigeriane dhe shumë ekspertë të pavarur, të cilët thonë se krizat e sigurisë në vend marrin jetë si të të krishterëve, ashtu edhe të myslimanëve, shpesh pa dallim.  / abcnews.al /

SHBA-të kanë miratuar një tjetër shitje potenciale armësh në Arabinë Saudite, këtë herë për pjesë mbështetjeje për aeroplanët luftarakë F-15 në një marrëveshje prej 3 miliardë dollarësh.

Një numër i vogël kontraktorësh civilë ose personeli ushtarak amerikan afatgjatë mund të kërkohet në Mbretëri, tha Pentagoni në një deklaratë.

“Mbretëria e Arabisë Saudite ka kërkuar të blejë artikujt e mëposhtëm jo të mëdhenj të pajisjeve mbrojtëse: pjesë këmbimi dhe riparimi, materiale konsumi dhe aksesorë, dhe mbështetje riparimi dhe kthimi; pajisje tokësore dhe të personelit; softuer dhe mbështetje softuerike të klasifikuar dhe të paklasifikuar; botime dhe dokumentacion teknik të klasifikuar dhe të paklasifikuar; pajisje trajnimi dhe trajnimi të personelit; shërbime mbështetjeje inxhinierike, teknike dhe logjistike të Qeverisë së SHBA-së dhe kontraktorëve; dhe elementë të tjerë të lidhur me logjistikën dhe mbështetjen e programit”, sipas njoftimit.

Kjo shitje thuhet se do të mbështesë objektivat e politikës së jashtme dhe të sigurisë kombëtare të Shteteve të Bashkuara duke përmirësuar sigurinë e një aleati të madh jo-NATO “që është një forcë për stabilitet politik dhe përparim ekonomik në rajonin e Gjirit”.

Siç theksohet më tej, F-15-at gjithashtu rrisin aftësinë e Mbretërisë për të penguar kërcënimet aktuale dhe të ardhshme.

Ndërkohë, vënë në pah mediat, në fund të javës së kaluar, administrata Trump miratoi shitjen e mundshme prej 9 miliardë dollarësh të 730 raketave PATRIOT Advanced Capability-3 Raketa të Përmirësuara të Segmentit të Raketave (PAC-3 MSE) Arabisë Saudite.

“Këto kapacitete të përmirësuara do të mbrojnë forcat tokësore të Arabisë Saudite, Shteteve të Bashkuara dhe aleatëve vendas dhe do të përmirësojë ndjeshëm kontributin e Arabisë Saudite në IAMD (mbrojtjen e integruar ajrore dhe raketore) në rajonin CENTCOM”, tha Pentagoni.

PAC-3 MSE është prodhuar nga Lockheed Martin dhe është një nga interceptorët më të përparuar, i aftë të zbulojë dhe rrëzojë raketa dhe dronë të avancuar.

Organizimi i Kupës së Botës 2026 po shoqërohet gjithnjë e më shumë me polemika, teksa FIFA po përballet me pakënaqësi në rritje nga tifozët që synojnë të ndjekin nga afër ndeshjet e turneut.

Një nga shqetësimet kryesore lidhet me çmimet e larta të biletave, ndërsa FIFA ka pranuar se nuk ka mundësi të ndalojë rishitjen e tyre, pasi në Shtetet e Bashkuara të Amerikës kjo praktikë është e ligjshme.

Së fundmi, ka dalë në pah edhe një tjetër problem, këtë herë i lidhur me infrastrukturën dhe aksesin në stadiume. Ndryshe nga Evropa, transporti publik në SHBA nuk është gjithmonë i zhvilluar në mënyrë që të lehtësojë lëvizjen e tifozëve, duke i detyruar shumë prej tyre të përdorin automjetet personale për të shkuar në impiantet sportive.

Sipas gazetarit Henry Bushnell të ‘The Athletic’, FIFA ka vendosur të shesë edhe vendet e parkimit pranë stadiumeve. Për shembull, një vend parkimi pranë “SoFi Stadium” në Los Angeles po ofrohet me çmim që varion nga 250 deri në 300 dollarë amerikanë për ndeshje.

Përveç kostos së lartë, tifozët janë ankuar edhe për distancën që duhet të përshkojnë nga parkingjet deri në stadium, e cila në disa raste arrin deri në rreth 1.500 metra.

Një tjetër vendim që rrezikon të rëndojë më tej marrëdhënien mes FIFA-s dhe tifozëve, vetëm pak muaj para fillimit të Botërorit më të madh në histori.  / abcnews.al /

Gazeta Washington Post ka njoftuar të mërkurën në mëngjes shkurtime masive të vendeve të punës, duke shënuar kështu një goditje të madhe për kompaninë e famshme mediatike dhe një redaksi lajmesh që ka arritur në një pikë krize.

Redaktori Ekzekutiv, Matt Murray, dhe shefi i burimeve njerëzore, Wayne Connell, u kanë dërguar një email stafit të mërkurën në mëngjes duke i udhëzuar të “qëndrojnë në shtëpi sot”, por të marrin pjesë në një takim në orën 8:30 të mëngjesit nëpërmjet Zoom-it, gjatë të cilit udhëheqja e Washington Post do të njoftonte “veprime të rëndësishme në të gjithë kompaninë”.

Këto veprime përfshijnë mbylljen e pothuajse të gjithë seksionit të Sportit, mbylljen e seksionit të Librave dhe anulimin e podkastit të përditshëm Post Reports, kanë thënë burime në gazetë.

Një nga shkurtimet më të rënda vjen në formën e një “ristrukturimi” të redaksisë Metro të Post, e cila mbulon D.C., Maryland dhe Virginia.

Mbulimi ndërkombëtar i The Post gjithashtu do të reduktohet ndjeshëm, megjithëse disa zyra jashtë SHBA-së do të mbeten të hapura.

Shkurtimet masive nga puna në The Post janë pritur prej disa javësh, veçanërisht pasi drejtuesit u thanë punonjësve, në një memo të brendshme, se nuk planifikonin të dërgonin asnjë reporter në Lojërat Olimpike Dimërore këtë muaj, një vendim që më pas u tërhoq.

Botuesi i The Post, Will Lewis, ka folur privatisht për gjetjen e një rruge drejt përfitueshmërisë duke përqendruar investimet e gazetës te politika dhe disa fusha të tjera kyç, ndërsa duke shkurtuar sektorë si sporti dhe çështjet ndërkombëtare.

Kjo i shtyu ekipe reporterësh t’i dërgonin pronarit Jeff Bezos letra, duke i kërkuar që të mos e zvogëlojë redaksinë.

Në një letër të siguruar nga CNN-i, e nënshkruar nga shefi i byrosë Matt Viser dhe shtatë reporterë të tjerë të Shtëpisë së Bardhë, stafi ka thënë se nuk do të jetë në gjendje të ruajë historinë e tij të ekselencës në raportim nëse The Post largon nga puna një numër të konsiderueshëm punonjësish nga njësi të tjera të lajmeve.

“Nëse plani, në masën që ekziston një i tillë, është të riorientohemi rreth politikës, duam të theksojmë se sa shumë mbështetemi te bashkëpunimi me redaksitë e çështjeve ndërkombëtare, sportit, lokale — në fakt, te e gjithë gazeta. Dhe nëse seksione të tjera dobësohen, ne të gjithë dobësohemi”, thuhet në letër.

Bill Gates ka thënë se ishte “budalla” që kaloi kohë me Jeffrey Epstein, se pendohet që e ka takuar ndonjëherë dhe e ka hedhur poshtë një email në publikimin e fundit të dosjeve si “të rremë”.

Në një intervistë në Australi, miliarderi tha: “Me sa duket, Jeffrey i shkroi një email vetes. Ai email nuk u dërgua kurrë, emaili ishte i rremë. Kështu që nuk e di se çfarë mendonte ai aty”.

Ai shtoi: “Më kujton se çdo minutë që kam kaluar me të pendohem dhe kërkoj falje që e bëra këtë”. Gates duket se po i referohet një emaili drejtuar “i dashur Bill” që Epstein ia dërgoi vetes në korrik 2013, shkruajnë mediat e huaja.

Në email, Epstein ankohet se Gates kishte “zgjedhur të shpërfillte miqësinë tonë” dhe i referohet “sëmundjes seksuale”. Epstein akuzon Gates se i ka kërkuar atij “të sigurojë antibiotikë që mund t’i japë fshehurazi Melindës” – duke nënkuptuar ish-gruan e tij, Melinda French Gates.

Gates foli për marrëdhënien e tij me Epstein në intervistën me 9 News Australia.

“Ishte faktikisht e vërtetë që unë isha vetëm në darka. Nuk shkova kurrë në Ishull, nuk takova kurrë asnjë grua…”.

Gates drejton Fondacionin Gates, një organizatë filantropike që punon për të zvogëluar sëmundjet dhe varfërinë në të gjithë botën.

Ai tha: “E takova Jeffrey-n në vitin 2011. Fokusi ishte gjithmonë se ai njihte shumë njerëz shumë të pasur dhe thoshte se mund t’i bindte ata të jepnin para për shëndetin global”.

Ai shtoi: “Isha budalla që kalova kohë me të. Isha një nga shumë njerëz që pendohen që e kanë njohur ndonjëherë”.

Para intervistës, një zëdhënës i Gates tha për akuzën: “Këto pretendime janë absolutisht absurde dhe plotësisht të rreme. E vetmja gjë që tregojnë këto dokumente është zhgënjimi i Epstein që ai nuk kishte një marrëdhënie të vazhdueshme me Gates dhe sa larg do të shkonte për të zënë në kurth dhe për të shpifur”.

Departamenti i Sigurisë Kombëtare të SHBA-së (DHS) do të reduktojë menjëherë praninë e tij në Minneapolis me 700 agjentë federalë, në përpjekje për të ulur tensionet pas vrasjes së dy qytetarëve amerikanë nga agjentë federalë, njoftoi Tom Homan, i emëruari i presidentit Donald Trump për çështjet e kufirit.

Homan, i dërguar nga Trump në Minneapolis si pjesë e një përpjekjeje për de-përshkallëzim, theksoi se autoritetet federale po kalojnë drejt një qasjeje më të synuar të zbatimit të ligjit, pas një rritjeje të madhe të agjentëve të emigracionit që shkaktoi protesta të gjera në qytet.

Sipas Homan, bashkëpunimi me autoritetet lokale për ndalimin e emigrantëve me precedentë penalë është përmirësuar ndjeshëm. Pas tërheqjes, rreth 2,000 agjentë federalë të emigracionit do të mbeten në Minesota — një numër më i ulët krahasuar me kulmin e fundit, por ende shumë më i lartë se rreth 150 oficerët që zakonisht janë të caktuar në këtë shtet.

Vendimi vjen pas javësh reagimesh të forta publike ndaj taktikave të përdorura nga autoritetet federale në Minesota, pasi agjentë të Patrullës Kufitare dhe të Shërbimit të Emigracionit dhe Doganave (ICE) qëlluan për vdekje dy qytetarë amerikanë gjatë operacioneve të ndara.

Alex Pretti, infermier i kujdesit intensiv, u vra gjatë një operacioni të Patrullës Kufitare në janar, vetëm disa javë pasi një agjent i ICE qëlloi për vdekje Renee Good, nënë e tre fëmijëve, gjatë një përballjeje tjetër.

Kryetari i Kuvendit të Shqipërisë, Niko Peleshi mori pjesë sot në Forumin për Sigurinë të organizuar nga Kongresi Amerikan, ku mbajti një fjalë mbi angazhimin e palëkundur të Shqipërisë ndaj partneritetit strategjik me Shtetet e Bashkuara të Amerikës dhe rëndësinë e rritjes së investimeve në mbrojtje.

Në fokus të diskutimeve ishin çështjet e sigurisë në kontekstin global e rajonal, sfidat e reja gjeopolitike dhe bashkëpunimi me vendet e Ballkanit Perëndimor, në përputhje me qëndrimet dhe prioritetet strategjike të SHBA-së dhe NATO-s.

Gjatë fjalës së tij, Kryetari Peleshi theksoi se Shqipëria është një aleat i besueshëm i SHBA dhe një anëtare e denjë dhe aktive e NATO-s, e cila është e vetëdijshme dhe mban mbi supe barrën e saj të sigurisë. Ai vuri në dukje se Shqipëria ka rritur investimet në mbrojtje në 2.12% të Prodhimit të Brendshëm Bruto, me një trajektore të qëndrueshme rritjeje në vitet në vijim, në përputhje me angazhimet e aleatëve për forcimin e kapaciteteve mbrojtëse dhe sigurisë kolektive.

Kryetari i Kuvendit nënvizoi gjithashtu se partneriteti Shqipëri-SHBA nuk është transaksional, por strategjik, afatgjatë dhe i bazuar në vlera të përbashkëta demokratike, sundimin e ligjit dhe respektimin e të drejtave të njeriut. Ai theksoi rolin aktiv të Shqipërisë si partnere operative, kontributin në misione ndërkombëtare dhe bashkëpunimin e ngushtë në fushën e modernizimit të forcave të armatosura dhe sigurisë kibernetike.

Në fjalën e tij, Peleshi vuri theksin edhe te rëndësia e stabilitetit në Ballkanin Perëndimor, duke e cilësuar rajonin si një hapësirë gjeopolitike të ndjeshme ndaj kërcënimeve hibride, ndërhyrjeve të huaja dhe dezinformimit, çka kërkon vigjilencë, qëndrueshmëri dhe koordinim të ngushtë me aleatët. Integrimet euroatlantike dhe anëtarësimi i Kosovës në NATO janë të domosdoshme për sigurinë dhe stabilitetin në rajon.

Forumi mblodhi drejtues komisionesh të Dhomës së Përfaqësuesve të SHBA, senatorë e kongresmenë, përfaqësues të lartë të sigurisë, parlamentarë dhe qeveritarë nga vendet e Europës dhe të rajonit si dhe personalitete të larta ushtarake të SHBA-së etj.

Në përfundim, Kryetari Peleshi ritheksoi se Shqipëria nuk kërkon përfitime pa kontribut, por synon të forcojë partneritetet strategjike mbi bazën e përgjegjësisë, besueshmërisë dhe veprimit konkret, duke e konsideruar sigurinë një investim thelbësor për paqen dhe stabilitetin afatgjatë.

Gjykata e Tiranës ka dënuar me 24 vite burg Ilir Beqarajn, i akuzuar si autor i vrasjes se Gentian Bejtjes ne Larushk te Fushë Krujës. Beqaraj akuzohet për “Vrasje me paramendim”, “Mbajtje pa leje dhe prodhim i armëve, armëve shpërthyese dhe i municionit” dhe “Falsifikim apo përdorim të dokumenteve të falsifikuara”.

I pandehur për këtë ngjarje është edhe Edison Haxhiu, i dënuar më parë me dy vite burg si dhe Florian Plaku, i arrestuar verën e kaluar në Vlorë dhe që po gjykohet i ndarë.

Sipas hetimeve Beqaraj dhe Plaku kanë kryer vrasjen në bashkëpunim, ndërsa Haxhiu ka siguruar kushtet për ekzekutimin e saj. Krimi dyshohet të ketë qenë i porositur nga subjekte kriminale jashtë vendit, në konflikt me Bejtjan.

Sipas dosjes hetimore ka rezultuar se persona të armatosur, pasi kanë kaluar rrethimin e jashtëm të banesës së Gentian Bejtjes kanë hyrë brenda oborrit dhe kanë qëlluar disa herë me armë zjarri ku si pasojë e të shtënave ka gjetur vdekjen e menjëhershme.

Pak minuta pas ngjarjes në rrugën dytësore në fshatin Hasan, Fushë Krujë u gjet i djegur një automjet tip Land Rover, që është përdoruar nga autorët në vendngjarje. Nga provat e administruara rezulton se Ilir Beqaraj në kohë të ndryshme përpara kësaj ngjarje me mjetin e tij ka qenë në afërsi të vendit ku ndodhet banesa e Bejtjes, kjo gjë provohet nga këqyrja e GPS të automjetit të cilin e ka të marrë me qira.

Viktima i kishte shpëtuar disa atentateve më herët, ndërsa më 4 korrik 2023 iu vra kunati në atentat në banesën e Bejtjes./abcnews.al

Izraeli dhe Shqipëria po thellojnë bashkëpunimin ekonomik, me një investim strategjik prej 100 milionë eurosh në sektorin e teknologjisë. Një kompani izraelite do të ndërtojë në Tiranë një qendër të madhe të të dhënave.

Qendra do të bazohet në procesorë grafikë të teknologjisë Nvidia dhe do të ketë një kapacitet fillestar prej 32 megavatësh, me mundësi zgjerimi deri në 100 megavatë. Investimi po realizohet nga kompania izraelite ADC, në bashkëpronësi të Happy Technologies dhe kompanisë konsulente DIT.

Si projekt qeveritar në një vend anëtar të NATO-s dhe kandidat për Bashkimin Europian, investimi ka përfituar procedura të përshpejtuara. Leja e ndërtimit është dhënë brenda 60 ditësh, ndërsa objekti po ndërtohet në një sipërfaqe prej 4.5 hektarësh tokë shtetërore në zonën e lirë ekonomike TEDA, në perëndim të Tiranës.

Qendra do të furnizohet me energji të gjelbër, ndërsa infrastruktura energjetike dhe e komunikimit është ndërtuar paraprakisht. Në aspektin financiar, ADC ka siguruar një kredi nga Banka Europiane për Rindërtim dhe Zhvillim, e cila mbulon 75 për qind të kostos totale të projektit.

Edhe pse ndërtimi nuk ka përfunduar ende, qendra ka siguruar tashmë tre klientë të mëdhenj, një kompani shqiptare të teknologjisë, një kompani gjermane të ruajtjes se të dhënave dhe një institucion qeveritar shqiptar, identiteti i të cilit mbetet konfidencial

Investimi vjen pas forcimit të ndjeshëm të marrëdhënieve mes Izraelit dhe Shqipërisë gjatë dy viteve të fundit, veçanërisht pas sulmit kibernetik Iranian ndaj vendit tonë në 2022-shin, pas të cilit Shqipëria nisi të perdorë teknologji izraelite të sigurisë kibernetike per mbrojtjen e institucioneve shteterore dhe subjekteve private. Gjate luftes, raportet mes dy vendeve u ngrohen edhe më tej, ndërsa Shqipëria u dallua si një nga aleatet më të afërta të Izraelit në Europë. Kryeministri shqiptar Edi Rama vizitoi Izraelin në kulmin e luftimeve dhe, në fjalimin e tij në OKB, dënoi Hamasin dhe mbajti simbolin e verdhë në mbështetje të lirimit të pengjeve.

Peter Mandelson e ka tradhtuar Britaninë e Madhe duke dërguar informacione drejt Jeffrey Epstein, tha sot kryeministri britanik, Keir Starmer.

Duke folur në Dhomën e Komuneve, Starmer deklaroi se Mandelson kishte gënjyer vazhdimisht për marrëdhënien e tij me financierin pedofil Epstein gjatë procesit të emërimit si ambasador në SHBA.

Kryeministri tha gjithashtu se kishte biseduar me mbretin Charles III për largimin e Mandelson nga Këshilli Privat (Privy Council).

”Mandelson e tradhtoi vendin tonë, Parlamentin dhe partinë time”, u shpreh Starmer.

”Ai gënjeu vazhdimisht ekipin tim kur u pyet për marrëdhënien e tij me Epstein para dhe gjatë mandatit të tij si ambasador. Pendohem që e emërova. Po ta dija atëherë çfarë di tani, ai nuk do të ishte kurrë pranë qeverisë”, theksoi ai.

Mandelson ka dhënë dorëheqjen nga Dhoma e Lordëve, por Starmer tha se po hartohet legjislacion për t’i ndaluar atij përdorimin e titullit ”lord”.

Ai shtoi se kishte rënë dakord me mbretin Charles III që Mandelson të mos ishte më anëtar i Këshillit Privat, çka i lejonte të përdorte titullin ”Right Honourable”, pasi kishte ”diskredituar reputacionin e Këshillit Privat”.

Dokumentet mbi emërimin e Mandelson si ambasador në SHBA do të publikohen nga qeveria pasi liderja konservatore, Kemi Badenoch përdori një procedurë parlamentare për të kërkuar dorëzimin e tyre.

Qeveria ka gati paketën ligjore për forcimin e kontrolleve dhe sigurisë ushqimore. Nisma është në përmbushje të rekomandimeve të Komisionit Europian për grupkapitullin e “Bujqësisë”, i cilësuar si më sfiduesi sa i përket negociatave për anëtarësim me Bashkimin Europian.

“Ligji i ri për kontrollet zyrtare dhe puna për ligjin e ri të ushqimit, përbëjnë hapa moderne dhe të besueshme për sigurinë ushqimore. Shqipëria është në rrugën e duhur, thjesht duhet të ndryshojë marshin, një marsh më të shpejtë.  Është kapitull me ndikim të drejtpërdrejt në politikë. Ajo lidhet me shëndetin e qytetarëve, besimin e konsumatorit, funksionimin e tregut të brendshëm në Shqipëri.  Një nga sfidat më të mëdha në procesin e sigurisë ushqimore, janë ushqimet e skaduara që hyjnë nga jashtë”, tha Balla.

Në një tryezën e Këshillit Kombëtar të Integrimit Europian, ministri I bujqësisë, Andis Salla, tha se prioritet mbetet rritja e kontrolleve për produktet e imporit, eksportit, dhe prodhimit vendor. Ndërsa njoftoi se janë intesifikuar negociatat për rihapjen e fondeve për bujqësinë në kuadër të IPARD 3.

Ky vit konsiderohet vendimtar për Shqipërinë, e cila duhet të përafrojë legjislacionin shqiptare me atë të Bashkimit Europian. Qeveria synon që këtë vit të mbyllë 16 kapituj, në mënyrë që brenda 2027 të përfundoi I gjithë procesi teknik. Por të vijuar me tej me votën politike, aty ku anëtarësimi duhet të ratifikohet në parlamentet e 27 vendeve anëtare./abcnews.al

Read More...

Gjatë vizitës së tij të parë zyrtare në Bruksel, ministri i Punëve të Jashtme i Moldavisë, Mihai Popşoi, tha se administrata e Trump ka treguar vullnet të sinqertë në angazhimin për paqe në Ukrainë.

“Kur raketat fluturojnë dhe fëmijët vdesin e njerëzit ngrijnë, mendoj se një bazë e mirë për fillimin e një dialogu do të ishte që këto lloj gjërash të ndalen”, tha ai.

Popşoi vlerësoi rezistencën ukrainase ndaj përpjekjeve të Rusisë për të goditur popullin ukrainas.

Ai tha se vendi ka “rezistuar heroikisht” dhe se bashkësia ndërkombëtare ka “ndihmuar në mënyrë kuptimplote”, por shtoi se tani është koha për një “paqe të qëndrueshme dhe të drejtë”.