Komisioni Qendror i Zgjedhjeve po vazhdon numërimin e votave për kandidatët për deputetë që nga e hëna, ndërsa deri më tani janë numëruar rreth 90 për qind e votave.
Sipas rezultateve aktuale, më poshtë janë kandidatët nga Aleanca për Ardhmërinë e Kosovës (AAK) që aktualisht sigurojnë mandatin e deputetit.
Megjithatë, duhet theksuar se rreth 10 për qind e votave nga vendvotimet ende nuk janë numëruar, si dhe ekziston një numër i konsiderueshëm i votave me postë, të cilat mund të ndikojnë në renditjen përfundimtare dhe numrin e mandateve për këtë subjekt politik.
Kandidatët e AAK-së që aktualisht fitojnë mandat deputeti:
Ramush Haradinaj – 37,133 vota Daut Haradinaj – 22,050 vota Besnik Tahiri – 21,964 vota Bekë Berisha – 16,098 vota Time Kadrijaj – 14,082 vota Albana Bytyqi – 8,797 vota
Agim Çeku me 14,880 vota aktualisht mbetet jashtë Kuvendit për shkak të kuotës gjinore.
Rezultatet përfundimtare pritet të konfirmohen pas përfundimit të numërimit të të gjitha votave, përfshirë edhe ato me postë, të cilat mund të sjellin ndryshime në shpërndarjen përfundimtare të mandateve në Kuvendin e Kosovës./Telegrafi/
Ushtarë dhe përfaqësues të lartë të Ushtrisë së Shteteve të Bashkuara të Amerikës, të angazhuar në Kampin Bondsteel, e kanë nisur vitin 2026 me një vizitë simbolike në një xhami në Prishtinë.
Delegacioni amerikan u prit nga imami i xhamisë, Labinot Maliqi, i cili mirëpriti mysafirët në frymën e respektit, partneritetit dhe miqësisë së ngushtë ndërmjet Kosovës dhe Shteteve të Bashkuara të Amerikës.
Në këtë vizitë morën pjesë Sekretari i Shtetit të Luizianës dhe Kolonel i Forcave Ajrore të SHBA-ve, Charlton J. Meginley, Kapelani i Komandës së Shtetit të Luizianës, Kolonel Page Brooks, si dhe Kapelani i Kampit Amerikan Bondsteel, Kolonel Walls, së bashku me përfaqësues të tjerë të Ushtrisë Amerikane.
Për nder të mysafirëve u shtrua tapeti i kuq dhe u ngrit flamuri i Shteteve të Bashkuara të Amerikës në shtizën e xhamisë, si shenjë e respektit të thellë dhe mirënjohjes për kontributin amerikan ndaj Kosovës.
Gjatë takimit, imami Labinot Maliqi falënderoi Ushtrinë e Shteteve të Bashkuara për rolin e saj vendimtar në çlirimin e Kosovës, në arritjen e pavarësisë, si dhe në garantimin e lirisë, paqes, sigurisë, rindërtimit dhe zhvillimit të vendit.
Vizita u cilësua si një fillim viti i denjë dhe domethënës, ndërsa një moment i veçantë ishte edhe mesazhi i lënë nga mysafirët në librin e përshtypjeve, ku u shpreh vlerësimi për përkujdesjen shpirtërore dhe mbështetjen e vazhdueshme, duke dëshmuar respektin e ndërsjellë dhe lidhjet e forta mes dy vendeve.
Komisioni Qendror i Zgjedhjeve po vazhdon numërimin e votave për kandidatët për deputetë që nga e hëna, ndërsa deri më tani janë numëruar rreth 90 për qind e votave.
Sipas rezultateve aktuale, më poshtë janë kandidatët nga Lidhja Demokratike e Kosovës (LDK) që aktualisht sigurojnë mandatin e deputetit.
Megjithatë, rreth 10 për qind e votave nga vendvotimet ende nuk janë numëruar, si dhe ekziston një numër i konsiderueshëm i votave me postë, të cilat mund të ndikojnë në renditjen përfundimtare dhe numrin e mandateve.
Kandidatët e LDK-së që aktualisht fitojnë mandat deputeti:
Lumir Abdixhiku – 70,737 vota Hykmete Bajrami – 44,191 vota Ukë Rugova – 38,919 vota Avdullah Hoti – 35,154 vota Doarsa Kica Xhelili – 34,264 vota Kujtim Shala – 31,514 vota Anton Quni – 25,334 vota Armend Zemaj – 22,515 vota Lutfi Haziri – 20,659 vota Jehona Lushaku Sadriu – 16,234 vota Janina Ymeri – 15,768 vota Besian Mustafa – 15,174 vota Adelina Thaqi Meta – 14,029 vota
Ndërkohë, për dy mandatet e fundit, atë të 14-të dhe të 15-të, është duke u zhvilluar një garë shumë e ngushtë mes katër kandidatëve, me këtë renditje aktuale:
Fadil Hadergjonaj – 13,789 vota Ermal Sadiku – 13,741 vota Gëzim Hazrolli – 13,446 vota Arben Gashi – 13,175 vota
Rezultatet përfundimtare pritet të qartësohen pas përfundimit të numërimit të të gjitha votave, përfshirë ato me postë, të cilat mund të sjellin ndryshime në renditjen përfundimtare të kandidatëve dhe shpërndarjen e mandateve./Telegrafi/
Në futbollin profesionist ekzistojnë disa raste lojtarësh që kanë qenë pjesë e ekipeve elitare në ligat më të mira dhe që kanë familjarë të cilët gjithashtu kanë arritur të njëjtin nivel, edhe pse jo gjithmonë ndajnë të njëjtin mbiemër.
Në futboll, talenti shpesh trashëgohet. Ka qindra futbollistë që kanë spikatur në nivelet më të larta dhe janë bij, vëllezër apo kushërinj të ish-lojtarëve profesionistë.
Këto raste janë veçanërisht të shpeshta në vende me traditë futbolli si Argjentina, Brazili, Holanda apo Anglia, por edhe në Afrikë.
Kur lojtarët ndajnë të njëjtin mbiemër, lidhja familjare është e qartë, por ka edhe shembuj ku kjo marrëdhënie mbetet pak e njohur për publikun e gjerë.
Më poshtë po rikujtojmë disa raste:
Jay Jay Okocha dhe Alex Iwobi
Ylli i madh nigerian që shkëlqeu me PSG-në dhe u tërhoq në vitin 2008 është xhaxhai i anësorit 29-vjeçar, i cili u formua te Arsenali, luajti për një kohë të gjatë me “Topçinjtë” dhe, që nga mesi i vitit 2023, mban veshur fanellën e Fulhamit në Angli.
Jay Jay është vëllai më i vogël i nënës së Alexit, i cili është gjithashtu nip i Austin Okochës, ish-lojtar i përfaqësueses nigeriane.
Leroy Fer dhe Patrick Van Aanholt
Futbollistët holandezë janë kushërinj. Leroy, i cili ka edhe shtetësi të Curaçaos, u formua te Feyenoordi në Holandë dhe luajti në Premier League, veçanërisht me Swansea City.
Në moshën 35-vjeçare, ai luan për Gulf United FC në Emiratet e Bashkuara Arabe.
Ndërkohë, kushëriri i tij, që luan si mbrojtës i majtë, ka kaluar nga akademia e Chelseat dhe më pas ka veshur fanellat e PSV-së, Galatasarayt dhe Crystal Palace. Aktualisht ai është rikthyer në vendin e tij te Sparta Rotterdam.
McDonald Mariga dhe Victor Wanyama
Futbollistët kenianë janë vëllezër dhe ndajnë të njëjtin mbiemër, edhe pse i pari nuk njihet shpesh me të. Të lindur në Nairobi, kryeqytetin e Kenias, ata kanë vetëm katër vite diferencë moshe.
McDonald, 38 vjeç, është tërhequr nga futbolli pasi ka luajtur për Interin, Parmën dhe Real Sociedadin, ndërsa Victor ka qenë pjesë e Celticut në Skoci, Southamptonit dhe Tottenhamit.
Ai është i lirë që nga mesi i vitit pas largimit nga Dunfermline Athletic në Skoci.
Lomana LuaLua dhe Yannick Bolasie
LuaLua, 44 vjeç dhe aktualisht pa skuadër, ka lindur në Kinshasa, në Republikën Demokratike të Kongos, dhe është kushëriri më i madh i Bolasies, futbollistit 36-vjeçar që aktualisht luan për Cruzeiron, pas një karriere të gjatë në Ligën Premier.
Sulmuesi ka luajtur gjithashtu për Evertonin, Crystal Palace dhe Sporting Lisbonën, ndërsa kushëriri i tij, po ashtu sulmues, ka kaluar nga Newcastle dhe Olympiacos.
Thiago, Rafinha dhe Rodrigo Moreno
Dihet se ish-futbollistët Thiago Alcantara dhe Rafinha, brazilianë të natyralizuar spanjollë që shkëlqyen në klube elitare si Barcelona dhe Bayern Munich, janë vëllezër.
Por ajo që shpesh anashkalohet është se, edhe pse nuk kanë lidhje gjaku, ata kanë një marrëdhënie shumë të ngushtë me Rodrigo Morenon, sulmues gjithashtu i lindur në Rio de Janeiro dhe i natyralizuar spanjoll.
Kjo për shkak se prindërit e tyre, Mazinho dhe Adalberto Machado, ishin miq shumë të afërt. Vëllezërit janë tërhequr nga futbolli, ndërsa Rodrigo luan aktualisht për Al-Rayyan në Katar./Telegrafi/
Viti 2025 shënoi një sërë ngjarjesh historike dhe zhvillimesh që ndikuan fuqishëm në politikën, ekonominë dhe shoqërinë globale.
Nga kthimi i Donald Trump në pushtet në Shtetet e Bashkuara, i cili solli ndryshime të mëdha në politikat e brendshme dhe të jashtme, te arritja e një armëpushimi delikat në Rripin e Gazës pas dy vjetësh konflikti të ashpër, ky vit ka pasur momente që nuk mund të injorohen.
Një tjetër zhvillim vendimtar ishte rritja e jashtëzakonshme e investimeve në inteligjencën artificiale, e cila jo vetëm ndryshoi tregjet dhe sektorin teknologjik, por edhe ngriti çështje të reja etike dhe ligjore në lidhje me përdorimin e saj, raporton ntv.
Përtej këtyre, 2025 u karakterizua nga kriza klimatike me ngjarje ekstreme të motit që përfshinë përmbytje, uragane dhe zjarre rekord, kriza ndërkombëtare si lufta në Ukrainë dhe tensionet në Lindjen e Mesme, dhe transformime të rëndësishme sociale, duke përfshirë protestat masive të gjeneratës Z për drejtësi sociale dhe qeverisje më transparente, transmeton Telegrafi.
Nga vjedhja spektakolare në Louvre e deri te zgjedhja e një Pape të ri, këto ngjarje treguan se bota po përballet me sfida të shumta dhe ndryshime të shpejta që do të ndikojnë për dekada në vijim.
Presioni i madh i SHBA-së çoi në arritjen e një armëpushimi mes Izraelit dhe Hamasit, dy vjet pas fillimit të luftës. Falë marrëveshjes, të mbijetuarit e fundit të pengjeve dhe shumica e të vdekurve u kthyen në Izrael.
Në të njëjtën kohë, të burgosurit palestinez u liruan. Edhe pse thuhet se ndihmat humanitare për Gazën janë rritur, OKB dhe organizatat ndihmëse vlerësojnë se rajoni ende është larg përmbushjes së nevojave të tij.
Procesi i çarmatimit të Hamasit, pika më e ndërlikuar e planit të paqes së Trumpit, po ecën me shumë kujdes. Sulmet ajrore të fundit të Izraelit në Gaza dhe operacionet kundër Hezbollahut në Liban mbajnë rajonin në tension të lartë, ndërsa sulmet izraelite ndaj objekteve bërthamore të Iranit, me mbështetjen e SHBA-së, ishin një nga pikat kyçe të vitit.
Veprimet tregtare që ndikojnë vendet e tjera, deportime masive të emigrantëve pa dokumente dhe shpërbërja faktike e disa agjencive federale…
Në muajin janar, kandidati republikan, Donald Trump rikthehet si president në Shtëpinë e Bardhë dhe ndërmerr ndryshime të shumta.
Ai dërgoi Gardën Kombëtare në shtetet demokratike, ushtroi presion mbi median dhe sulmoi programet për diversitet dhe përfshirje.
Politika e jashtme pati kontakte të gjera, por rezultatet ishin të përziera. Pakënaqësia ekonomike dhe rritja e çmimeve u pasqyruan qartë në sondazhe. Humbjet e mëdha në zgjedhjet lokale dobësuan pozitat e republikanëve para zgjedhjeve të mesit të mandatit në vjeshtën e 2025.
Kthimi i Donald Trumpit në Uashington përshpejtoi përpjekjet për të përfunduar luftën në Ukrainë.
Por, qëndrimi i tij i papërcaktuar mes Kievit dhe Moskës krijoi pasiguri. Akuzat e liderit amerikan ndaj presidentit ukrainas, Volodymyr Zelenskyt në Shtëpinë e Bardhë, duke e fajësuar për “shkaktimin e Luftës së Tretë Botërore”, nxiti reagime të forta.
Samiti Trump–Putin në Alaska në muajin gusht u ndërpre shpejt ndërsa SHBA-ja shpalli një paketë të re sanksionesh pasi Rusia nuk pranoi të negocionte.
Plani amerikan i prezantuar në fund të muajit nëntor u kritikua nga Zelensky dhe aleatët evropianë si i favorshëm për Moskën. Ndërkohë, forcat ruse vazhduan përparimin me humbje të mëdha, dhe qytetet ukrainase u bombarduan nga raketat dhe dronët në nivele rekord.
Më 8 maj, pas vdekjes së Papës Françesku, 69-vjeçari Robert Francis Prevost u zgjodh lideri i 267-të i Kishës Katolike.
Kleriku nga Chicago kishte marrë shtetësinë peruane dhe mori emrin Papa Leo XIV.-të
Ai vazhdoi fokusin te të varfrit, emigrantët dhe mjedisi, duke siguruar konservatorët se nuk do të ndërmerrte veprime të menjëhershme mbi çështje si priftërimi i grave si diakonë apo njohja e martesave homoseksuale.
Në Azi, Afrikë dhe Amerikën Latine, protestat masive u udhëhoqën nga të rinjtë nën 30 vjeç kundër standardeve të ulëta të jetesës, censurës në rrjetet sociale dhe korrupsionit.
Në Marakesh, qeveria premtoi reforma, por mbi 2000 protestues po ndiqen penalisht. Kryeministri i Nepalit, KP Sharma Oli dhe lideri i Madagaskarit, Andry Rajoelina u detyruan të japin dorëheqje, ndërsa pas zgjedhjeve në Tanzani, protestat u shtypën me forcë.
Flamuri i kapelës së piratëve nga manga “One Piece” u bë simbol i lëvizjes anti-shtypëse ndërkontinentale.
Korporatat teknologjike dhe investitorët derdhën miliarda në rritjen e inteligjencës artificiale (AI).
Sipas Gartner, shpenzimet për AI do të arrijnë 1.5 trilion dollarë në 2025 dhe 2 trilionë në 2026. Vlera e prodhuesit të çipeve Nvidia arriti përkohësisht pesë trilionë dollarë, duke ngjallur shqetësime për një “flluskë” të re në treg.
AI akuzohet për përhapjen e dezinformatave, ka rritje të padive për të drejtat e autorit dhe shumë kompani justifikojnë shkarkime masive me “transformimin AI”.
OpenAI është nën hetim pas një padie nga familja e një adoleshenti që kreu vetëvrasje. Kompania ka forcuar kontrollet për prindërit, dhe Kalifornia ka vendosur rregullime për chatbot-et.
Më 19 tetor, hajdutët me jelek pune hynë në Muzeun Louvre në Paris përmes një shkalle mobile.
Ata morën bizhuteri mbretërore me vlerë të 88 milionë eurove dhe u larguan me skuter elektrik, por humbën një kurorë të mbuluar me diamante.
Vjedhja, që bëri bujë në të gjithë botën, rihapi debatin mbi sigurinë në muzeun më të vizituar në botë. Tre persona u arrestuan si të dyshuar, por objektet e vjedhura janë ende të humbura.
Që nga muaji gusht, SHBA ka vendosur një prezencë të gjerë ushtarake në brigjet e Amerikës Latine, duke u justifikuar me luftën kundër drogës.
Javët e fundit janë kryer mbi 20 sulme ndaj anijeve që dyshohet se transportonin drogë, duke shkaktuar viktima të shumta.
Departamenti i Drejtësisë thotë se operacionet janë “ligjore”, ndërsa një zyrtar i OKB-së kritikoi “ekzekutimet pa gjyq”.
Sulmet rritën tensionet me qeverinë e Venezuelës, Nicolas Maduro, të cilin SHBA e akuzon si lider të një karteli dhe ofron 50 milion dollarë shpërblim për kapjen e tij.
Komisioni Qendror i Zgjedhjeve është duke vazhduar numërimin e votave për kandidatët për deputetë që nga e hëna, ndërsa deri më tani janë numëruar rreth 90 për qind e votave.
Sipas rezultateve aktuale, më poshtë janë 23 kandidatët për deputetë nga Partia Demokratike e Kosovës (PDK), të cilët aktualisht fitojnë mandatin e deputetit.
Në këtë përbërje është aplikuar edhe kuota gjinore prej 30 për qind.
Megjithatë, duhet theksuar se rreth 10 për qind e votave nga vendvotimet ende nuk janë numëruar, si dhe ekziston një numër i konsiderueshëm i votave me postë dhe me kusht, të cilat mund të ndryshojnë renditjen e kandidatëve ose edhe numrin e mandateve për partitë politike.
Kandidatët e PDK-së që aktualisht fitojnë mandat deputeti:
Bedri Hamza – 140,557 vota Arian Tahiri – 62,738 vota Përparim Gruda – 57,625 vota Uran Ismaili – 46,767 vota Sala Jashari – 42,344 vota Vlora Çitaku – 38,141 vota Enver Hoxhaj – 33,971 vota Arben Mustafa – 33,028 vota Nait Hasani – 27,124 vota Rrahman Rama – 25,279 vota Kujtim Gashi – 23,951 vota Ganimete Musliu – 23,584 vota Eman Rrahmani – 23,407 vota Artan Behrami – 21,796 vota Elmi Reçica – 21,276 vota Mergim Lushtaku – 20,487 vota Xhavit Haliti – 20,120 vota Besa Kabashi Ramaj – 19,723 vota Ferat Shala – 19,305 vota Bekim Haxhiu – 18,550 vota Blerta Deliu Kodra – 17,550 vota Ariana Musliu Shoshi – 17,242 vota Arbnore Salihu – 14,742 vota
Numërimi i votave pritet të vazhdojë edhe në ditët në vijim, ndërsa rezultatet përfundimtare do të konfirmohen pas përfshirjes së të gjitha votave, përfshirë ato me postë./Telegrafi/
Një nga përshtypjet më të forta që la futbolli në vitin 2025 ishte numri i jashtëzakonshëm i konflikteve.
Dhe jo konflikte mes rivalësh, ato janë pjesë e zakonshme e çdo sezoni, por përplasje të hapura brenda vetë skuadrave, mes futbollistëve dhe shokëve të ekipit, trajnerëve apo drejtuesve të klubeve.
Shpresa është që këto histori të mbeten në 2025 dhe që viti 2026 të sjellë tema më të këndshme për debat.
Por, përpara se t’i lëmë pas, ja një përmbledhje e konflikteve më të bujshme të vitit.
Mohamed Salah vs Liverpool
Pa dyshim, skandali i brendshëm më i zhurmshëm i vitit. Pas një barazimi me Leeds, Mohamed Salah shpërtheu publikisht, duke shprehur pakënaqësinë e tij ndaj klubit dhe trajnerit Arne Slot. Egjiptiani u ankua për mungesë besimi, premtime të pambajtura dhe përjashtim nga formacioni.
Reagimi i Slotit ishte i ftohtë, por i prerë, Salah u la jashtë për ndeshjen e Ligës së Kampionëve kundër Interit. Megjithatë, rikthimi i tij në fushë u shoqërua me një asistim kundër Brightonit.
Duartrokitjet e Salahut për tifozët në “Anfield” pas ndeshjes lanë shumë pikëpyetje. Lamtumirë apo thjesht një pauzë para Kupës së Afrikës? Vijimi i historisë pritet në janar.
Alexander Isak vs Newcastle
Një tjetër sagë ku Liverpooli ishte protagonist indirekt. Alexander Isak e bëri të qartë dëshirën për t’u transferuar në “Anfield”, duke refuzuar të luante për Newcastle dhe duke akuzuar klubin për thyerje marrëveshjesh.
Pas një vere të gjatë dhe tensionuese, marrëveshja u mbyll: Liverpooli pagoi 145 milionë euro, ndërsa Newcastle investoi paratë për dy sulmues të rinj. Të gjitha palët fituan, të paktën në letër.
Marc-Andre ter Stegen vs Barcelona
Kush do ta mendonte që kapiteni i Barcelonës do të përplasej me drejtuesit? Pas një operacioni në shpinë, ter Stegen deklaroi se do të mungonte tre muaj, një periudhë që nuk i lejonte klubit të lironte hapësirë për regjistrime të reja.
Situata përshkallëzoi: kapiteni u ndëshkua brenda klubit, refuzoi vizita mjekësore dhe u përfol për largim. Edhe pse u rikthye gradualisht, Flick e bëri të qartë se Joan Garcia ishte portieri numër një. E ardhmja e gjermanit në “Camp Nou” mbetet e pasigurt.
Robert Lewandowski vs përzgjedhësi i Polonisë
Një konflikt që tronditi futbollin polak. Robert Lewandowski pezulloi karrierën në kombëtare pasi iu hoq shiriti i kapitenit nga trajneri Michal Probierz.
Vendimi u mirëprit nga një pjesë e dhomës së zhveshjes, por Polonia pa pasoja të menjëhershme: humbje ndaj Finlandës dhe dorëheqje e tij. Lewandowski u rikthye më vonë dhe tregoi edhe një herë rëndësinë e tij.
Alejandro Garnacho vs Ruben Amorim (Manchester United)
Pas finales së humbur të Ligës së Evropës, Garnacho reagoi hapur ndaj vendimit të trajnerit për ta lënë në stol. Postime provokuese dhe deklarata publike vulosën fatin e tij. Amorim ishte i prerë: argjentinasi nuk ishte më pjesë e planeve.
Pas një vere të vështirë, Garnacho u transferua te Chelsea. Ai atje po luan rregullisht.
Viktor Gyokeres vs Sporting Lisbona
Një tjetër rast presioni për transferim. Sulmuesi suedez pretendoi një “marrëveshje xhentëlmenësh” për largim, por Sporting kërkonte më shumë se sa Arsenali ishte gati të paguante.
Pas tensioneve dhe bojkotit, marrëveshja u arrit. Gyokeres u transferua në Londër, edhe pse forma e tij mbetet larg asaj që tregoi në Portugali.
Yoane Wissa vs Brentford
Një tjetër bojkot veror. Wissa refuzoi të luante për Brentford për të detyruar transferimin te Newcastle.
Pas ofertave të refuzuara dhe presionit publik, marrëveshja u mbyll për 55 milionë euro vetëm pak para mbylljes së afatit kalimtar.
Adrien Rabiot vs Jonathan Rowe (Marseille)
Pas humbjes ndaj Rennes, një debat në dhomën e zhveshjes u shndërrua në përplasje fizike. Rabiot dhe Rowe u përfshinë në një sherr serioz, aq sa stafi i sigurisë ndërhyri.
Të dy lojtarët u larguan nga klubi deri në fund të afatit kalimtar, duke mbyllur një episod të turpshëm për Marseille. Rabiot shkoi te Milani, Eowe te Bologna.
Dominik Livakovic vs Girona
Një nga transferimet më të çuditshme të vitit. Portieri kroat u huazua te Girona, por refuzoi të luante në Kupë e Mbretit, sepse dëshironte të largohej në janar për të siguruar minuta para Kampionatit Botërorit 2026.
Trajneri Michel e konfirmoi publikisht refuzimin e lojtarit për të aktivizuar veten.
Dani Rodriguez vs Mallorca
Një legjendë e klubit u përjashtua pas një postimi kritik ndaj trajnerit Jagoba Arrasate. Rodriguez u ndëshkua, iu hoq shiriti i kapitenit dhe nuk u përfshi më në skuadër.
Mallorca dhe lojtari u ndanë në janar, në një mënyrë të hidhur për një figurë historike të klubit.
Davide Calabria vs Sergio Conceiçao (AC Milan)
Një përplasje e hapur pas ndeshjes me Parmën. Conceiçao i bërtiti Calabrias në fushë, pas pakënaqësive për disiplinën e lojtarëve.
Calabria u largua nga Milani, fitoi Kupën e Italisë me Bolognan dhe më pas u transferua te Panathinaikos.
Idrissa Gueye vs Michael Keane (Everton)
Një moment shokues: Gueye goditi shokun e skuadrës gjatë ndeshjes dhe u përjashtua me karton të kuq, një rast i rrallë në Ligën Premier.
Mesfushori kërkoi falje publike dhe konflikti u mbyll shpejt. Pas dy ditësh publikuan foto së bashku.
Hakan Çalhanoglu vs Lautaro Martinez (Inter)
Deklaratat e Lautaros pas eliminimit nga Botërori i Klubeve ndezën tensione. Çalhanoglu reagoi publikisht, duke kritikuar stilin e udhëheqjes.
Një mbledhje emergjente e skuadrës i shoi tensionet dhe të dy mbetën pjesë kyçe e Interit.
Luis Perez vs Juanmi Latasa (Valladolid)
Gjatë një sezoni katastrofik, një incident në stol tronditi publikun: Perez tentoi të godiste Latasan pas një zënke.
Klubi i ndëshkoi të dy dhe më pas rrugët e tyre u ndanë.
Lorenzo Lucca vs shokët e ekipit (Udinese)
Një episod sa komik aq edhe simbolik. Lucca refuzoi t’ua dorëzonte penalltinë shokëve, shënoi, por u zëvendësua menjëherë.
Asnjë nga protagonistët nuk është më te Udinese.
Përmbledhja
Në përmbledhje, viti 2025 u shënua nga një numër i jashtëzakonshëm konfliktesh të brendshme në futboll, duke nxjerrë në pah brishtësinë e ekuilibrave brenda klubeve moderne.
Përplasjet mes lojtarëve, trajnerëve dhe drejtuesve shpesh morën përmasa publike dhe dolën mbi interesin sportiv të skuadrave.
Mungesa e komunikimit, menaxhimi i dobët i situatave delikate dhe presioni i vazhdueshëm i rezultateve përshkallëzuan tensionet.
Në shumë raste, këto kriza u mbyllën me transferime të detyruara ose ndarje të hidhura, duke lënë pasoja të dukshme.
Efektet u reflektuan drejtpërdrejt në stabilitetin, imazhin dhe performancën sportive të klubeve.
Këto episode shërbejnë si një paralajmërim i qartë se harmonia, udhëheqja dhe dialogu janë elementë thelbësorë për suksesin afatgjatë në futbollin modern. /Telegrafi/
Bukuroshja shqiptare Agnesa Vuthaj po kalon një nga periudhat më të bukura dhe më të veçanta të jetës së saj.
Ajo ka ndarë me ndjekësit lajmin e ëmbël se është shtatzënë dhe në pritje të një bebushi. Përmes një videoje të publikuar në rrjetet sociale, Agnesa është shfaqur duke zbuluar barkun e rrumbullakosur, duke përcjellë emocione pozitive dhe gëzim për këtë kapitull të ri në jetën e saj.
Videon ajo e ka shoqëruar me mbishkrimin domethënës: “Viti kur një dëshirë është e realizuar”, një fjali që ka prekur ndjekësit dhe ka nxitur reagime të shumta pozitive në komente.
Lajmi është pritur me urime të shumta nga fansat, miqtë dhe figura publike, të cilët i kanë shprehur asaj mbështetje dhe gëzim për pritjen e ëmbël. Agnesa Vuthaj, e njohur për elegancën dhe prezencën e saj publike, po e ndan këtë moment të rëndësishëm me shumë natyrshmëri dhe emocion.
Ky njoftim shënon një etapë të re në jetën personale të saj, ndërsa ndjekësit presin me kureshtje të mësojnë më shumë rreth këtij rrugëtimi të bukur drejt mëmësisë. /Telegrafi/
Katër ditë pas mbajtjes së zgjedhjeve të parakohshme parlamentare të së dielës në Kosovë, po bëhet gjithnjë e më e qartë se kush do të jenë 120 deputetët e rinj të Kuvendit të Kosovës.
Komisioni Qendror i Zgjedhjeve është duke vazhduar numërimin e votave për kandidatët për deputetë që nga e hëna, ndërsa deri më tani janë numëruar rreth 90 për qind e tyre.
Sipas rezultateve aktuale, më poshtë janë 56 kandidatët e LVV që aktualisht rezultojnë fitues të mandatit të deputetit.
Megjithatë, duhet theksuar se rreth 10 për qind e votave nga vendvotimet ende nuk janë numëruar, si dhe ekziston një numër i konsiderueshëm i votave me postë, të cilat mund të ndikojnë në renditjen përfundimtare të kandidatëve, apo edhe në shpërndarjen e mandateve mes partive politike.
Lista e kandidatëve nga LVV që aktualisht fitojnë mandat deputeti:
Albin Kurti – 311,384 vota Glauk Konjufca – 241,429 vota Albulena Haxhiu – 127,039 vota Hekuran Murati – 125,824 vota Donika Gërvalla-Schwarz – 113,490 vota Xhelal Sveçla – 100,810 vota Hajrulla Çeko – 90,291 vota Avni Dehari – 83,520 vota Mimoza Kusari Lila – 74,698 vota Ejup Maqedonci – 70,530 vota Shqipe Mehmeti Selimi – 58,384 vota Andin Hoti – 51,067 vota Arben Vitia – 47,624 vota Saranda Bogujevci – 36,934 vota Alban Bajrami – 34,432 vota Rufki Suma – 30,886 vota Edona Lllalloshi – 30,871 vota Mefail Bajqinovci – 29,335 vota Jeta Statovci – 28,618 vota Nezir Kraki – 28,339 vota Ardian Gola – 28,212 vota Adriana Matoshi – 27,061 vota Armend Muja – 26,404 vota Haxhi Avdyli – 25,459 vota Adelina Grainca – 23,366 vota Albena Reshitaj – 22,322 vota Agim Bahtiri – 21,731 vota Blerim Gashi – 21,516 vota Arjeta Fejza – 21,064 vota Artane Rizvanolli Berisha – 20,922 vota Arbër Rexhaj – 20,778 vota Fatos Geci – 20,412 vota Hysen Durmishi – 20,409 vota Fitore Pacolli Dalipi – 20,273 vota Taulant Kelmendi – 20,145 vota Artan Abrashi – 20,112 vota Dimal Basha – 19,832 vota Arbërie Nagavci – 19,777 vota Labinotë Demi Murtezi – 19,485 vota Arbëreshë Kryeziu Hyseni – 18,913 vota Enver Haliti – 18,401 vota Adnan Rrustemi – 17,976 vota Valon Ramadani – 17,960 vota Jeton Raka – 17,420 vota Arsim Ademi – 17,010 vota Liza Gashi – 16,700 vota Sylejman Meholli – 16,505 vota Fjolla Ujkani – 16,365 vota Fatmire Kollçaku – 16,344 vota Fitim Haziri – 16,195 vota Drita Pajaziti – 16,154 vota Valon Hoti – 16,034 vota Naim Bardiqi – 15,681 vota Salih Zyba – 15,664 vota Rozeta Hajdari – 15,583 vota Ilir Kërçeli – 14,950 vota
Numërimi i votave pritet të vazhdojë edhe në ditët në vijim, ndërsa rezultatet përfundimtare do të konfirmohen pas përfshirjes së të gjitha votave, përfshirë ato me postë dhe nga diaspora./Telegrafi/
Viti 2025 ka qenë një nga vitet më të trazuara në botën e showbizit ndërkombëtar.
Ndërsa disa yje shijuan suksese dhe projekte të mëdha, shumë të tjerë u përballën me skandale serioze që vunë në pikëpyetje reputacionin, karrierën dhe jetën e tyre personale.
Nga akuza për ngacmime seksuale e deri te procese gjyqësore të bujshme, ky vit tregoi edhe një herë se fama shpesh shoqërohet me presion, polemika dhe pasoja të rënda.
Gjykatat, rrjetet sociale dhe mediat ndërkombëtare ishin skena kryesore ku u zhvilluan këto ngjarje, ndërsa publiku ndoqi çdo detaj me interes të madh. Shumë prej këtyre rasteve vazhdojnë të kenë ndikim edhe përtej vitit 2025, duke u shndërruar në çështje që pritet të marrin zgjidhje përfundimtare në vitet në vijim.
Më poshtë janë disa nga skandalet më të bujshme që shënuan vitin 2025 dhe që lanë gjurmë të forta në industrinë e argëtimit:
Blake Lively dhe Justin Baldoni
Blake Lively dhe Justin Baldoni
Një nga betejat ligjore më të përfolura të vitit ishte ajo mes Blake Lively dhe Justin Baldoni, ish-regjisor dhe bashkë-punëtor në filmin "It Ends With Us".
Blake e paditi Baldonin për ngacmim seksual duke kërkuar 161 milionë dollarë dëmshpërblim për dëme personale dhe financiare.
Në përgjigje, Baldoni paraqiti një kundërpadi prej 400 milionë dollarësh për shpifje dhe shantazh, por kjo u hodh poshtë nga gjykata.
Procesi kryesor për sjellje të papërshtatshme pritet të nisë në maj 2026, duke mbajtur ende të ndezur vëmendjen e mediave.
Diddy
P.Diddy
Reperi dhe biznesmeni i njohur u dënua me katër vjet e dy muaj burg federal për lidhje me prostitucion, pas një hetimi që fillimisht përfshinte akuza për trafikim seksual dhe organizim kriminal.
Gjatë qëndrimit në burgun federal 'Fort Dix', Diddy është angazhuar në programe rehabilitimi dhe ka organizuar edhe klasa për të burgosurit e tjerë.
Sipas zëdhënësit të tij, ai është i përkushtuar ndaj ndryshimit personal dhe disiplinës.
Coldplay 'Kiss Cam'
Skandali në koncertin e "Coldplay"
Një moment i sikletshëm gjatë një koncerti të "Coldplay" në Boston u shndërrua në një nga incidentet virale të vitit.
Një çift u kap duke u përqafuar në 'Kiss Cam', duke tentuar më pas të fshehë fytyrat.
U zbulua se bëhej fjalë për Andy Byron, drejtues i një kompanie dhe Kristin Cabot, shefe e burimeve njerëzore në të njëjtën kompani.
Skandali përfundoi me largimin e tyre nga puna dhe një reagim kreativ nga kompania, e cila përfshiu Gwyneth Paltrow në një reklamë promovuese.
Russell Brand
Russell Brand
Komediani u përball me akuza të rënda për përdhunim dhe ngacmime seksuale që datojnë nga vitet 1999–2005.
Akuzat përfshijnë incidente të shumta në Londër dhe në ambiente pune.
Brand i ka mohuar të gjitha pretendimet, ndërsa gjyqi i tij është planifikuar të zhvillohet në qershor 2026, duke mbetur një nga rastet më serioze që pritet të tronditin opinionin publik.
ASAP Rocky
ASAP Rocky
Reperi u shpall i pafajshëm për dy akuza për sulm me armë ndaj një miku të tij të mëparshëm, në një rast që daton nga viti 2021.
Gjatë procesit gjyqësor u argumentua se arma e përdorur ishte një replikë dhe se Rocky kishte vepruar në vetëmbrojtje.
Vendimi u shoqërua me emocione të forta, ku Rihanna shpërtheu në lot dhe reperi e përqafoi atë në sallën e gjyqit.
Sydney Sweeney
Sydney Sweeney
Aktorja shkaktoi polemika të mëdha me fushatën reklamuese të American Eagle me sloganin “Sydney Sweeney Has Great Jeans”. Loja e fjalëve u interpretua nga disa si promovim i eugjenikës dhe supremacisë së bardhë.
Sweeney reagoi duke theksuar se reklama kishte të bënte vetëm me modën dhe stilin personal, duke shtuar se ajo qëndron kundër urrejtjes dhe ndarjes.
Jay-Z
Jay Z
Një padi civile që e akuzonte reperin për përdhunim të një 13-vjeçareje në vitin 2000 u hodh poshtë, duke i dhënë fund një prej akuzave më të rënda ndaj tij. Jay-Z e quajti padinë të pabazuar dhe theksoi rëndësinë e mbrojtjes së viktimave, por edhe të individëve që akuzohen pa prova.
Lily Allen dhe David Harbour
Lily Allen dhe David Harbour
Ndarja e çiftit u shndërrua në një skandal publik, pasi Lily Allen zbuloi tradhti të supozuara dhe e ktheu përvojën personale në art.
Albumi i saj "West End Girl" përmban rrëfime të drejtpërdrejta për dhimbjen, zhgënjimin dhe përjetimet emocionale pas prishjes së martesës.
"MasterChef"
John Torode dhe Gregg Wallace
Emisioni i famshëm i gatimit u përball me një krizë të thellë pasi dy prezantuesit kryesorë, John Torode dhe Gregg Wallace, u shkarkuan pas akuzave për gjuhë raciste, komente seksuale dhe sjellje të papërshtatshme ndaj pjesëmarrësve, duke tronditur publikun.
"Strictly Come Dancing"
Programi "Strictly Come Dancing"
Programi u përfshi në disa skandale serioze, përfshirë akuza për ngacmime seksuale, bullizëm dhe përdorim të drogës.
Situata kulmoi me dorëheqjen e dy prezantuesve kryesorë pas më shumë se dy dekadash në ekran dhe arrestimin e disa pjesëmarrësve për akuza të rënda.
Viti 2025 dëshmoi edhe një herë se fama dhe pasuria nuk garantojnë qetësi dhe stabilitet.
Skandalet e vitit të kaluar do të mbeten një pikë referimi për botën e showbizit dhe një kujtesë se çdo veprim, në sytë e publikut, ka pasoja. /Telegrafi/
Komandanti i Korpusit Vullnetar Rus, Denis Kapustin, rezulton të jetë gjallë, njofton inteligjenca e Ukrainës në një deklaratë të fundit.
Kapustin, i njohur për rolin aktiv në radhët e luftëtarëve opozitarë rusë, ishte raportuar më parë si objekt i një operacioni për likuidim nga shërbimet sekrete ruse.
Kyrylo Budanov, kreu i inteligjencës ukrainase, u shpreh se uron komandantin e Korpsit Vullnetar Rus dhe ekipin e tij të inteligjencës për suksesin e një mashtrimi të sofistikuar.
— (@)
Sipas raportimeve, ekipi ukrainas arriti të mashtrojë shërbimet e sigurisë ruse, duke i bërë ato të paguanin 500 mijë dollarë për një “eliminim” të rremë të Kapustinit.
Ky operacion jo vetëm që dërgon një mesazh të fuqishëm për aftësitë e inteligjencës ukrainase, por gjithashtu dobëson moralin dhe besueshmërinë e shërbimeve ruse.
Ekspertët e sigurisë vlerësojnë se ky incident tregon nivelin e lartë të aftësive të operacioneve të inteligjencës ukrainase dhe rëndësinë e përdorimit të strategjive të avancuara për të ndikuar mbi kundërshtarët.
Suksesi i këtij operacioni, i cili duket si një “luftë psikologjike”, mund të ketë pasoja afatgjata për dinamiken e brendshme në radhët e forcave të Rusisë. /Telegrafi/
Manchester City nuk arriti të gjente rrugën e fitores ndaj Sunderlandit, në një ndeshje të luftuar dhe me raste, që u mbyll pa gola (0-0).
Skuadra e Pep Guardiolës dominoi posedimin dhe krijoi më shumë raste, por u ndal nga mungesa e konkretizimit.
Man City e nisi ndeshjen fuqishëm dhe arriti edhe të shënojë në minutën e 7-të me Bernardo Silvën, por goli u anulua për pozitë jashtë loje.
Gjatë pjesës së parë, kampionët në fuqi ushtruan presion të vazhdueshëm, me raste nga Haaland, Foden dhe Cherki, por portieri Robin Roefs ishte vendimtar për Sunderlandin, duke mbajtur portën e paprekur.
Nga ana tjetër, Sunderland nuk u mbyll plotësisht dhe pati momentet e veta. Brian Brobbey dhe Trai Hume testuan seriozisht Gianluigi Donnarummën, i cili reagoi në mënyrë spektakolare në disa raste, duke qenë një nga lojtarët më të mirë të Man Cityt në këtë ndeshje.
Në pjesën e dytë, Guardiola reagoi me ndryshime, por sërish mungoi finalizimi.
Sunderland rezistoi me disiplinë deri në fund, pavarësisht lodhjes, duke siguruar një barazim të madh përballë një kundërshtari të fortë. Ndeshja u mbyll pas katër minutash shtesë, pa ndryshim rezultati.
Në përfundim, një ndalesë zhgënjyese për Manchester City, që mbetet e dyta me 41 pikë, ndërsa Sunderland është i shtati me 33 pikë. /Telegrafi/
Afati kalimtar i transferimeve të janarit po afron me shpejtësi, dhe klubet do të jenë sërish në garë për të forcuar skuadrat për gjysmën e dytë të sezonit.
Në tregun dimëror të vitit 2025 janë shpenzuar 1.2 miliard euro në ligat kryesore evropiane dhe në Championship, shifra më e lartë në shtatë vitet e fundit, ku vetëm Manchester City ka shpenzuar 191 milion euro.
Mohamed Salah (Liverpool)
Në prill, Mohamed Salah u shpërblye me një kontratë të re dyvjeçare pas udhëheqjes së Liverpool drejt titullit të dytë në Ligën Premier. Por, rreth nëntë muaj më vonë, i ashtuquajturi “Mbreti Egjiptian” është përballë një largimi të tensionuar që mund të dëmtojë trashëgiminë e tij në ‘Anfield’.
Salah aktualisht është në Kupën e Kombeve të Afrikës me Egjiptin dhe është rikthyer te golat, por klubet e pasura të Arabisë Saudite e kanë identifikuar ende si objektiv.
Për herë të parë këtë sezon, Salah ka treguar shenja dobësimi, që do të thotë se kjo mund të jetë mundësia e fundit për Liverpool për të kërkuar një tarifë të madhe, pasi fuqia negociuese e fituar nga kontrata e re mund të mos zgjasë pas dimrit.
Conor Gallagher (Atletico Madrid)
Në fund të nëntorit, Sky Sports zbuloi se 16 klube të Ligës Premier kanë shfaqur interes për Conor Gallagher që nga transferimi prej 33 milionë eurosh nga Chelsea te Atletico Madrid në gusht 2024, duke treguar vlerësimin e tij të lartë në Angli.
The Guardian raporton se Manchester United po e monitoron gjithashtu Gallagher me synim një huazim në janar, por Atletico preferon një shitje të përhershme dhe dëshiron të rikuperojë investimin fillestar, gjë që mund të hapë mundësi për Tottenham dhe Leeds.
Marc-Andre Ter Stegen (Barcelona)
Marc-Andre ter Stegen u rikthye në fushë për Barcelonën pas tre muajsh mungesë në fitore ndaj Guadalajara në Kupën e Mbretit, pasi u rikuperua plotësisht nga operacioni në shpinë.
Megjithatë, trajneri Hansi Flick bëri të qartë se kjo ishte vetëm një rast i veçantë. Joan Garcia dhe Ëojciech Szczesny janë tani portierët kryesorë në ‘Camp Nou’, ndërsa Ter Stegen iu hoq përkohësisht shiriti i kapitenit në gusht pas refuzimit për të ndarë të dhënat mjekësore me La Liga, çka do të kishte liruar 50% të pagës së tij për regjistrim.
Sipas Mundo Deportivo, nuk duket të ketë rrugë kthimi, me klube nga Turqia dhe Arabia Saudite që mund të ofrojnë një rrugëdalje për Ter Stegen..
Kenan Yildiz (Juventus)
Juventus rrezikon të humbasë asetet e saj më të çmuara. Kenan Yildiz ka kontratë deri në 2029, por ndihet se paga aktuale nuk reflekton rëndësinë e tij në skuadër dhe ka kërkuar një zgjatje që do ta vendoste ndër pagat më të larta të klubit, sipas Tuttosport.
Derisa negociatat për rinovimin nuk kanë pasur përparim, Arsenal raportohet se ka kontaktuar agjentin e Yildiz, Jorge Mendes, për të diskutuar disponueshmërinë e tij.
Ruben Neves (Al-Hilal)
The Times raporton se Ruben Neves po kërkon një rikthim në Ligën Premier pas dy e gjysmë vitesh në Arabinë Saudite me Al-Hilal, të cilët nuk kanë arritur ta bindin ish-yllin e Ëolves të nënshkruajë një zgjatje kontrate.
‘Old Trafford’ është përmendur si “destinacioni i dukshëm” për Neves, për shkak të vështirësive të vazhdueshme të Manchester United në mesfushë, ku skuadra e Amorim ende nuk ka një specialist që mund të kontrollojë ritmin e ndeshjeve.
Antoine Semenyo (Bournemouth)
A ka ndonjë sulmues krahu më të mirë në Ligën Premier aktualisht se Antoine Semenyo? Sipas statistikave dhe vlerësimit vizual, përgjigjja është jo.
Liverpool, Chelsea, Manchester United dhe Tottenham kanë shfaqur nivele të ndryshme interesi për Semenyo para afatit të janarit, kur do të hyjë në fuqi klauzola e tij e lirimit prej 65 milionë eurosh.
Megjithatë, edhe pse Semenyo duket si zëvendësues i përsosur për Salah te Liverpool, konsensusi i zakonshëm tani është se Manchester City po udhëheq garën për nënshkrimin e sulmuesit nga Gana, i cili raportohet se dëshiron të vendosë të ardhmen e tij sa më shpejt të jetë e mundur.
Nico Schlotterbeck (Borussia Dortmund)
Nico Schlotterbeck është një futbollist shumë i kërkuar. Raportohet se Barcelona dhe Real Madrid e kanë ndjekur yllin e Borussia Dortmund për muaj me radhë, ndërsa BILD ka shkruar se Bayern Munich po planifikon të përpiqet ta transferojë mbrojtësin nga rivalët e tyre në Bundesliga, duke e parë atë si një alternativë strategjike për Dayot Upamecano, i cili së shpejti do të jetë lojtar i lirë.
Liverpool gjithashtu raportohet se ka shfaqur interes për 26-vjeçarin gjerman, i cili ka kontratë deri në vitin 2027.
Marc Guehi (Crystal Palace)
Marc Guehi ishte shumë pranë një transferimi prej 35 milionë eurosh te Liverpool verën e kaluar, aq sa kishte xhiruar edhe një video zyrtare për njoftimin, por Crystal Palace e bllokoi marrëveshjen pak para afatit.
‘Të Kuqtë’ mbeten admirues të mëdhenj të tij, por konkurrenca për Guehi është rritur ndjeshëm muajt e fundit, me Daily Mail që raporton se Man City, Bayern Munich dhe Atletico Madrid janë të gjithë të etur për të siguruar nënshkrimin e tij në vitin 2026.
Elliot Anderson (Nottingham Forest)
Mesfushorët defensivë nuk janë më të lirë, të paktën jo në Ligën Premier. Enzo Fernandez, Declan Rice dhe Moises Caicedo kanë kushtuar të gjitha më shumë se 100 milionë euro dhe ylli i Nottingham Forest, Elliot Anderson, mund të jetë i radhës.
Sipas gazetarit të Sky Sports, Florian Pletterberg, ky është çmimi minimal i kërkuar nga Forest për mesfushorin anglez, ndërsa klubi është bërë i vetëdijshëm për interes “konkret” nga Manchester United.
Karim Adeyemi (Borussia Dortmund)
Sipas BILD, Karim Adeyemi i ka bërë me dije drejtuesve të Borussia Dortmund se dëshiron të largohet, me të dashurën e tij që thuhet se po nxit një jetë të re në një qytet të madh evropian.
Sulmuesi gjerman ka ndryshuar agjent dhe ka nisur përpjekjet për një transferim në janar, dhe nuk do të ketë mungesë ofertash kur hapet afati i transferimeve.
Interi është lidhur me një transferim të mundshëm të Adeyemit, ndërsa The Mirror raporton se Manchester United dhe Arsenal janë gati të nisin garën për shërbimet e tij./Telegrafi/
Dritan Demiraj, në A2CNN, u pyet mbi tensione të mundshme në Ballkan gjatë vitit që sapo ka nisur.
Eksperti i sigurisë është i bindur që “Ballkani nuk po hyn në një fazë të re pasigurie”, pasi është nën mbështetjen “politike, ushtarake dhe diplomatike të Shteteve të Bashkuara të Amerikës”.
"Ballkani nuk po hyn në një fazë të re pasigurie. Më lejoni të risjell në vëmendjen tuaj atë që në fakt unë e kam deklaruar dhe më përpara, ligjin për Autorizimin e Mbrojtjes Kombëtare dhe Strategjinë e Sigurisë Kombëtare. Dy dokumenta strategjikë të firmosur kohët e fundit në Shtetet e Bashkuara të Amerikës dhe kur them kohët e fundit, në muajin dhjetor. Të dyja paraqesin rëndësinë e madhe të Ballkanit Perëndimor, në mënyrë të veçantë duke përcaktuar Shqipërinë, Kroacinë, Malin e Zi, Maqedoninë e Veriut dhe Kosovën si vende tashmë të afirmuara në rendin e ri global si pjesë e aksit të Perëndimit dhe nën mbikëqyrjen dhe modernizimin, nën mbështetjen politike, ushtarake dhe diplomatike të Shteteve të Bashkuara të Amerikës”, tha Demiraj.
Sipas tij, “pa diskutim që ka problematika të operacioneve hibride” në Ballkan, por shtoi se “angazhimi i madh amerikan nuk do të lejojë operacionet dhe ndikimet malinje të Serbisë për të krijuar destabilitet”.
“Për sa kohë që shërbimet inteligjente ruse, FSB-ja, GRU-ja janë prezente gjatë gjithë kohës në territorin e Serbisë, bashkëpunojmë me qeverinë e saj, me Ministrinë e saj të Mbrojtjes, me shërbimet inteligjente BIA, edhe në Bosnjën serbe do të ketë operacione të asaj që njihen si operacione të intensitetit të ulët, operacione propagandistike, të dezinformimit, pra pjesë të luftës hibride. Por, tendenca e këtyre për shkak të angazhimit të madh amerikan duke e përcaktuar si domejnin e saj territorin e këtyre shteteve që sapo thashë, nuk do të lejojë operacionet dhe ndikimet malinje të Serbisë për të krijuar destabilitet”, theksoi Demiraj.
IMDb ka publikuar listën vjetore të aktorëve më të popullarizuar, e bazuar në interesin e mbi 250 milionë vizitorëve mujorë.
Lista përmbledh një miks të aktorëve të rinj dhe atyre të vjetër, të cilët kanë tërhequr vëmendjen e publikut përmes projekteve të tyre filmike dhe televizive.
Ky vit ka qenë i pasur me role të larmishme, nga super-heronjtë dhe dramë psikologjike, tek serialet televizive me audiencë globale.
Shumë prej aktorëve në listë janë përfshirë edhe në projekte ndërkombëtare dhe kanë mbajtur interesin e fansave për muaj të tërë.
Lista pasqyron gjithashtu kombinimin mes sukseseve komerciale dhe popullaritetit në rrjetet sociale, duke treguar se cilët emra janë më të ndjekur dhe më të kërkuar nga publiku global.
10. Vanessa Kirby
Vanessa Kirby
Vanessa Kirby këtë vit ka kombinuar suksesin në ekran me përvojën e saj personale si nënë.
Në "The Fantastic Four: First Steps", roli i saj si Sue Storm e solli në situata emocionale komplekse, ndërsa publiku ndoqi edhe jetën e saj personale gjatë shtatzënisë.
Ky kombinim i jetës reale dhe rolit në ekran e mbajti të lartë në 'STARmeter' gjatë gjithë verës dhe vjeshtës.
9. David Corenswet
David Corenswet
David Corenswet solli fytyrën e re të Superman-it në universin e DC, duke tërhequr vëmendjen globale që nga publikimi i trailer-it.
Ai u konfirmua si një ikonë ndërkombëtare e super-heroizmit, duke ruajtur vendin e tij në top 10 falë interpretimit dhe mbështetjes së fansave jashtë ShBA-së.
8. Walton Goggins
Walton Goggins
Walton Goggins është shndërruar nga aktor televiziv në një yll të njohur ndërkombëtarisht.
U bë i njohur për rolet në "Fallout" dhe "The Righteous Gemstones", ndërsa performanca e tij në sezonin e tretë të "The White Lotus" e bëri të pëlqyer edhe nga një publik më i gjerë.
7. Sydney Chandler
Sydney Chandler
Sydney Chandler bëri një hap të madh me rolin e saj si Wendy në serinë "Alien: Earth".
Roli i saj si robot me vetëdije njerëzore e vuri në qendër të vëmendjes, duke e konfirmuar si një talent të pavarur dhe duke siguruar projekte të ardhshme si 'Coercion' dhe 'Anima'.
6. Britt Lower
Britt Lower
Pas një pauze prej tre vjetësh nga seria Severance, Britt Lower riktheu publikun në ekran me rolin e saj Helly R.
Interpretimi i saj kompleks mbajti aktoren për pesë javë në top 10 dhe një javë në vendin e parë, duke e bërë një nga figurat më të ndjekura të vitit.
5. Sydney Sweeney
Sydney Sweeney
Sydney Sweeney vazhdon të mbajë interesin e publikut pavarësisht disa projekteve që nuk patën sukses të madh në 'box office'.
Angazhimi i saj në SNL dhe projekti i ardhshëm "The Housemaid" kanë rindezur bazën e fansave, ndërsa sezoni i tretë i "Euphoria" pritet në 2026.
4. Tom Cruise
Tom Cruise
Tom Cruise mbetet një nga figurat më të ndjekura të kinemasë, pavarësisht se "Mission: Impossible - The Final Reckoning" nuk ishte hiti më i madh.
Romanca e tij me Ana de Armas dhe projektet e ardhshme, përfshirë komedinë "Digger", mbajnë interesin e publikut të lartë.
3. Matthew Goode
Matthew Goode
Matthew Goode u rikthye fuqishëm me hitin procedural të Netflix "Dept. Q", duke arritur vendet e para në 'STARmeter'.
Ky sukses e ka vënë përsëri në fokusin e studimeve dhe platformave të 'streaming'-ut, duke e rikthyer si një nga aktorët më të kërkuar.
2. Aimee Lou Wood
Aimee Lou Wood
Aimee Lou Wood u bë shumë e njohur me sezonin e tretë të The White Lotus, ku interpretoi Chelsea-n.
Performanca e saj e veçantë dhe kontrasti me personazhet e tjera e mbajti aktoren dy javë në krye dhe 12 javë në top 100, duke rritur interesin për karrierën e saj.
1. Isabela Merced
Isabela Merced
Në krye të listës është Isabela Merced, e njohur për rolet në "The Last of Us" dhe universin DC.
Si Dina dhe Kendra Saunders, ajo fitoi zemrat e publikut, ndërsa projektet e ardhshme përfshijnë "Man of Tomorrow", "Psyche" dhe sezonin tjetër të "The Last of Us", duke e bërë aktoren më të kërkuar të vitit 2025. /Telegrafi/
Një zjarr i përmasave të mëdha shpërtheu gjatë natës së Vitit të Ri në barin Le Constellation, duke marrë jetën e të paktën 40 personave dhe duke plagosur mbi 115 të tjerë.
Ngjarja ka tronditur kantonin Valais dhe komunitetin ndërkombëtar që frekuenton këtë resort të njohur për ski dhe golf, raporton skynews.
Komandanti i policisë së kantonit Valais, Frederic Gisler, konfirmoi numrin e të vdekurve dhe tha se identifikimi i viktimave mund të marrë disa ditë.
Mes të vdekurve dhe të plagosurve janë dy shtetas francezë dhe një duzinë italianë, ndërsa 15 italianë të tjerë rezultojnë të zhdukur.
Shumë të rinj ishin në bar kur shpërtheu zjarri, sipas Stephane Ganzer, kreut të sigurisë në kanton, transmeton Telegrafi.
Spitali rajonal u mbingarkua nga të plagosurit, duke tejkaluar kapacitetet e njësisë së kujdesit intensiv dhe sallës së operacionit, sipas Mathias Reynard, kreut të qeverisë rajonale.
Shkaku i zjarrit nuk është konfirmuar zyrtarisht, por kanë dalë dy teori: Ambasadori italian në Zvicër tha se dikush hapi një fishekzjarr brenda lokalit, duke ndezur tavanin, ndërsa dy dëshmitarë raportuan se një barman ngriti një tjetër mbi shpatulla, i cili mbante një qiri në një shishe. Zjarri shkaktoi shpërthime, ndoshta për shkak të gazrave djegës që u ndezën në mënyrë të dhunshme, sipas autoriteteve.
Një turmë njerëzish u përpoq me panik të shpëtonte nga bodrumi përmes një shkalle të ngushtë dhe një dere të vogël, ndërsa të tjerët thyen dritaret për t’u shpëtuar, tha Reynard.
Prokurorja e kantonit Valais, Beatrice Pilloud, përjashtoi çdo skenar sulmi terrorist. Nuk ka të dyshuar dhe askush nuk është arrestuar, tha Ganzer, duke e cilësuar ngjarjen si një “aksident”.
Për të menaxhuar situatën emergjente, u mobilizuan 13 helikopterë, 42 ambulanca, 150 paramedikë dhe 70 zjarrfikës.
Autoritetet vazhdojnë hetimet për të sqaruar shkaqet e sakta të kësaj tragjedie që ka lënë gjurmë të thella në komunitetin lokal dhe ndërkombëtar.
Ndryshe, flamujt zviceran do të qëndrojnë në gjysmështizë për pesë ditë në nderim të viktimave. /Telegrafi/
Prishtina këtë Vit të Ri mirëpriti edhe shumë mysafirë të huaj, të cilët për herë të parë zgjodhën Kosovën për të festuar ndërrimin e moteve.
Temperaturat e ulëta, që zbritën deri në -11 gradë Celsius, nuk i ndalën as vendasit e as turistët. Me pije, vallëzim dhe muzikë, festa në sheshin e kryeqytetit vazhdoi deri në orët e vona.
Edhe pse shumë prej tyre nuk e kuptonin gjuhën e këngëve, ritmi i muzikës i bashkoi të gjithë, duke krijuar një atmosferë festive dhe energjike.
“Urime Vitin e Ri! Uroj që ky vit t’ua plotësojë shqiptarëve të gjitha dëshirat,” u shpreh një qytetar gjatë festës.
Një tjetër pjesëmarrës theksoi se, përveç vendasve, kishte edhe shumë mysafirë që po e zbulonin Kosovën për herë të parë, duke e përshëndetur atmosferën dhe mikpritjen.
“Po kalojmë shumë mirë. Kishim dëshirë të madhe që Vitin e Ri ta presim në Kosovë. Urime!” tha një nga turistët.
Nga Turqia kishin ardhur disa vizitorë, të cilët u shprehën të impresionuar: “Është hera ime e parë këtu dhe më pëlqen shumë. I uroj gjithë botës sa më shumë paqe.”
Ndërsa një mysafire nga Gjermania tha se, edhe pse kishte qenë më parë në Kosovë, kjo ishte hera e parë që po festonte Vitin e Ri në Prishtinë: “Kosovës i uroj të gjitha të mirat dhe njerëzve të saj, që janë të mrekullueshëm. Urime Vitin e Ri!”
Në fund të festës, në shesh mbetën vetëm kutitë e fishekzjarrëve, të cilat më herët ndriçuan qiellin e Prishtinës, duke shënuar fillimin e vitit të ri mes gëzimit, muzikës dhe mikpritjes./KlanKosova
Në Prishtinë, Hagë, Tiranë, Strasburg e Shkup u ngrit zëri i shqiptarëve për drejtësi.
Shqiptarë nga të gjitha trevat u mblodhën në mbrojtje të ish-krerëve të Ushtrisë Çlirimtare të Kosovës.
Protesta e parë u organizua në Prishtinë nga kategoritë e dala nga lufta. Një muaj më pas, shqiptarë nga e gjithë bota protestuan në qytetin holandez, në Hagë, në afërsi të objektit të Gjykatës Speciale. Atje u protestua një ditë para fillimit të dëgjimit të dëshmitarit të parë të mbrojtjes, ish-ndihmëssekretar i shtetit amerikan, James Rubin.
Diplomati amerikan dëshmoi para trupit gjykues për procesin e Rambujesë, ku ndër tjera ka thënë se Hashim Thaçi nuk kishte rol udhëheqës në Ushtrinë Çlirimtare të Kosovës. Po ashtu, ai ka thënë se UÇK nuk ka pasur strukturë të organizuar komanduese. Dëshmia e tij u vlerësua si një nga më të rëndësishmet në këtë proces.
Edhe në Tiranë, zëri i shqiptarëve jehoi “Drejtësi për Çlirimtarët”.
Organizata e Veteranëve të Luftës së UÇK-së para Asamblesë së Këshillit të Evropës dorëzoi 285 letra, për të shprehur shqetësimin lidhur me procesin në Gjykatën Speciale.
Në fund të vitit, shqiptarët protestuan edhe në Shkup të Maqedonisë së Veriut, me të njëjtën kërkesë për drejtësi.
Gazmend Syla nga Organizata e Veteranëve të Luftës së Ushtrisë Çlirimtare të Kosovës (OVL-UÇK) thotë se gjithë këto protesta kanë pasur për qëllim sensibilizimin e opinionit publik dhe ndërkombëtar për procesin gjyqësor që po zhvillohet në Hagë.
“Pesë protesta, me një buxhet që organizatat e veteranëve të luftës, zero buxhet, do të thotë, prej ardhjes në pushtet të qeverisë Kurti. Me vështirësi të mëdha, kemi arritur me i organizuar këto pesë protesta, qysh e dini edhe ju. Njërën në Kosovë, tjetrën në Den Haag, tjetrën në Tiranë, Strasburg e kështu me radhë, e fundit në Maqedoni. Mendojmë që e kemi ngritë qytetarin, i kemi treguar qytetarit tonë se çka po ndodh atje, sepse duke pasur parasysh faktin se Gjykata Speciale nuk i ka dhënë shumë dritë gjithë procesit atje. Ka qenë tepër e rezervuar me publikun, me shqiptarët, me ato seanca të mbyllura, me ato padrejtësi që ndodhin kohë pas kohe, me gjasë qytetarët nuk kanë mujt me e ditë krejt çka po ndodh atje. Kjo thirrje e jona për qytetarët që me dalë, me u mobilizu e me u sensibilizu për ato që po ndodhin në Gjykatën Speciale, besoj që ka qenë e arritur tepër e madhe edhe besoj që e kemi bërë punën ashtu siç është më së miri, gjithmonë duke pasur parasysh kapacitetet e organizatës së veteranëve të luftës”, deklaron ai.
Syla ka theksuar se paralelisht me protestat, OVL e UÇK-së ka vepruar edhe në rrafshin diplomatik, përmes takimeve me personalitete dhe përfaqësues ndërkombëtarë.
“Neve asnjëherë nuk kërkojmë që të ndërhyjmë në drejtësi, apo të pengojmë drejtësinë, ne kërkojmë vetëm drejtësi. Krejt çka kërkojmë ne është një monitorim i ndonjë instituti të pavarur ndërkombëtar, ose qoftë ndonjë mekanizmi që do të nxirrte Këshilli i Evropës, Asambleja e Këshillit të Evropës, ku edhe e mori dritën jeshile themelimi i Gjykatës Speciale, ose qoftë çfarëdo mekanizmi qoftë ai i pavarur. Vetëm monitorim të punës së Gjykatës Speciale, çfarë ka ndodhur prej atëherë deri më sot. Nëse do të ndodhë një monitorim i mirëfilltë i kësaj gjykate, i punës së gjykatës deri në këto kohë pra, deri në përfundim të procesit, ne jemi të bindur që bashkëluftëtarët tanë do të kthehen të pafajshëm në shtëpitë e tyre. Prandaj, në qoftë se nuk do të ketë monitorim të punës të asaj çka ka ndodhur deri më sot në Gjykatën Speciale, i druhem faktit që do të kemi vendim negativ ose do t'i përcjellë fati edhe bashkëluftëtarët tanë që janë në proces, do t'i përcjellë fati i dy bashkëluftëtarëve tonë që janë veç të dënuar atje”, shton ai.
Në dy prej këtyre organizimeve ishte e pranishme edhe Nevenka Tromp, e cila punoi për shumë vjet në Tribunalin e Hagës për ish-Jugosllavi, ishte prezente në dy prej pesë organizimeve. Ajo për KosovaPress thotë se nuk është e zakonshme që qytetarët të interesohen për çështje penale.
“Nuk është shumë e zakonshme që njerëzit të interesohen për çështje penale, sigurisht jo në numra të mëdhenj. Nëse do të flisnim për protesta, nuk do të isha dakord me këtë përkufizim; këto ishin ngjarje publike për të rritur ndërgjegjësimin mbi atë që po ndodhte në Hagë dhe në gjykatë përmes këtyre proceseve. Një nga arsyet pse pranova me kënaqësi ftesat në gusht dhe tetor të kaluar ishte se njerëzit nga Kosova erdhën për të shprehur shqetësimin e tyre mbi funksionimin e Dhomave Speciale të Kosovës dhe ndikimin që mund të kenë mbi të akuzuarit, por edhe mbi Kosovën dhe luftën e saj për çlirim. Kurdo që një gjyq penal, veçanërisht për krime politike dhe mizori masive, ka elemente që shpesh neglizhohen publikisht, duhet të merret parasysh interesi publik i gjyqit që po vjen. Pra, çfarë është interesi publik? Për shembull, nëse akuzon dhe gjykon presidentin aktual të një shteti, a kontribuon ky veprim për drejtësinë dhe stabilitetin, apo ky veprim vetë mund të çojë në trazira publike, dhunë në rrugë dhe destabilizim më shumë sesa do të ndodhte nëse lihej pas dore. Ky interes publik është gjithashtu arsye pse disa njerëz shumë të lartë nuk u akuzuan për gjithë periudhën e konflikteve në Jugosllavi nga 1991 deri në 1999. Ky interes publik është mjaft i rëndësishëm”, deklaron ajo.
Fatmir Koci, i cili ka qenë përfaqësues i Këshillit të Protestës për Evropë pret se gjatë këtij viti të lirohen ish-krerët e UÇK-së.
“Një vendim të drejtë, të paanshëm, jo-politik dhe po besojmë shumë në pafajësinë e krerëve të UÇK-së dhe në pastërtinë e luftës tonë, dhe shpresojmë dhe presim që liderët tanë sa më shpejt të kthehen pranë familjeve të tyre në shtetin e tyre, ku shumë sakrifikuan si në luftën për çlirimin e Kosovës, po ashtu edhe në shtet-ndërtimin e Republikës së Kosovës...E vetmja mundësi e jona si OVL e UÇK-së ka qenë kjo, sepse ne faktikisht jemi duke i parë çdo ditë politika ditore ku, e them fatkeqësisht, shteti i Kosovës, Qeveria e Kosovës, institucionet e Kosovës janë marrë shumë pak ose hiç me rreth kësaj çështje, edhe përkundër asaj që deklarojnë që kemi dhënë fonde të mjaftueshme për gjykatën”, përfundon ai.
Rasti ndaj ish-krerëve të UÇK-së – Hashim Thaçit, Kadri Veselit, Rexhep Selimit e Jakup Krasniqit pritet të përfundojë gjatë këtij viti.
Katërshja e UÇK-së ndodhet në paraburgim që nga nëntori i vitit 2020.
Në prill të vitit 2023 ka nisur procesi gjyqësor në Hagë ndaj ish-krerëve të UÇK-së.
Zyra e Prokurorit të Specializuar, e cila i ngarkon ish-krerët e Ushtrisë Çlirimtare të Kosovës me përgjegjësi për krime të pretenduara të luftës, pati sjell në gjykatore rreth 125 dëshmitarë, ndërkaq është mbështetur në mbi 100 dëshmi me shkrim.
Më datë 01.01.2026, Njësiti i Hetimeve i Stacionit Policor në Ferizaj ka pranuar informatë se një person kishte publikuar në rrjete sociale një video-incizim duke shtënë me armë zjarri.
Pas një pune intensive hetimore në terren, policia ka identifikuar të dyshuarin T. I. (31 vjeç). I njëjti më pas ka dorëzuar armën e zjarrit, me të cilën dyshohet se kishte shtënë.
I dyshuari është intervistuar në prani të avokatit mbrojtës, ndërsa me urdhër të prokurorit kompetent është liruar në procedurë të rregullt.
Ndaj tij është iniciuar rast penal për veprat:
“Mbajtje në pronësi, kontroll ose posedim i paautorizuar i armëve”, dhe “Përdorim i armës apo mjetit të rrezikshëm”.
Viti 2025 shënoi një kapitull të ri dhe transformues në jetën e këngëtarit nga Peja, Gjesti.
Nga pjesëmarrës i Big Brother VIP Kosova 3 deri te fituesi i Big Brother VIP Albania 4, ai përjetoi famë të papritur, suksese muzikore dhe një tragjedi që do ta shënjonte përgjithmonë rrugëtimin e tij.
Ai nisi vitin si pjesëmarrës i Big Brother VIP Kosova 3, ku tregoi karakterin e tij, fëmijërinë e vështirë, përpjekjet për t’u bërë pjesë e skenës muzikore dhe sfidat personale që e shoqëruan gjatë rritjes.
GjestiFoto: YouTube
Ky format ishte një mundësi për t’u shfaqur përpara publikut dhe për të treguar jo vetëm talentin, por edhe karakterin e tij të fortë.
Pas eliminimit nga Big Brother Kosova, Gjesti nuk humbi kohë dhe u ftua të merrte pjesë në atë të Shqipërisë.
Ky kalim i menjëhershëm nga Kosova në Shqipëri shënoi një pikë kthese në karrierën e tij: nga një artist i njohur vetëm në Kosovë, ai u bë një figurë publike e dashur dhe e ndjekur në gjithë trojet shqiptare.
Në prill të 2025, pas një rrugëtimi të gjatë dhe sfidues, Gjesti u shpall fitues i Big Brother VIP Albania 4.
Foto: YouTube
Ky triumf jo vetëm i solli famë të madhe, por edhe një ndryshim rrënjësor në jetën e tij dhe karrierën muzikore.
Fama e papritur i dha mundësinë të shndërrohej në një figurë të njohur publikisht, të ftohej nëpër intervista, evente televizive dhe të kishte një audiencë të gjerë fansash që ndiqnin çdo lëvizje të tij.
Verën e 2025, ai ishte i angazhuar me koncerte dhe performanca të shumta, duke shfrytëzuar famën e fituar për të ndërtuar një karrierë muzikore më të qëndrueshme dhe të njohur.
Por ndërsa jeta profesionale shkëlqente, ajo personale solli një goditje tragjike.
Eldioni dhe Gjesti
Në shtator të 2025, Gjesti humbi vëllanë e tij, Eldionin, vetëm 15 vjeç, në një aksident me motoçikletë.
Kjo humbje dramatike erdhi vetëm disa muaj pas famës së madhe dhe suksesit muzikor, duke e përballur reperin me dhimbje të thellë dhe sfida emocionale të papërshkrueshme.
GjestiFoto: Instagram
Besart Kelmendi (emri i vërtetë) pas disa muajsh bëri rikthimin në Instagram, konkretisht pak para Vitit të Ri.
Njoftoi mes tjerash se në 2026 vazhdon me muzikë, botës ku edhe i përket.
Edhe pse ka kaluar periudha të vështira dhe nuk ka qenë aktiv për një kohë, shpresojmë se kjo do të jetë vetëm një ndalesë e përkohshme dhe se ai do t’i kthehet ëndrrave dhe muzikës që e kanë shoqëruar gjithmonë. /Telegrafi/
Login
