Komandanti i Forcës së Sigurisë së Kosovës, Bashkim Jashari ka marr pjesë në fjalimin vjetor të ‘Agjutantit të Përgjithshëm’ të Gardës Kombëtare të Ajovës.

Me rastin e fjalimit vjetor të gjeneralit Osborn, Gjenerallejtënant Jashari u prit me nderime të larta nga senatorët dhe kongresmenët në legjislativin e Ajovës.

Ne këtë rast, Gjeneral Jashari pati rastin të takoi Guvernatoren e shteti të Ajovës si dhe kongresmenët dhe senatorit e shtetit të Ajovës, të cilët i falënderoi për mbështetjen e vazhdueshme dhe të pa kursyer të SHBA-së për Republikën e Kosovës.

Në njoftimin e FSK-së bëhet e ditur se ky aktivitet shënon përfundimin e suksesshëm të vizitës zyrtare të Komandantit të FSK-së në Ajova, ku edhe një herë dëshmon marrëdhëniet e shkëlqyera në mes të Forcës së Sigurisë së Kosovës dhe Gardës Kombëtare të Ajovës. /Telegrafi/

Ousmane Dembele është rikthyer në formën e tij më të mirë. Sulmuesi i Paris Saint-Germain shënoi dy herë kundër Lille në ndeshjen e javës së 18-të të Ligue 1.

Në konferencën e tij për shtyp pas ndeshjes, Luis Enrique zbuloi se pret më shumë prej tij sesa vetëm gola.

Sipas komenteve të bëra nga trajneri spanjoll dhe të raportuara nga Culture PSG, fituesi i Topit të Artë 2025 duhet të japë edhe rezultate në mbrojtje.

Kërkesat e çmendura që Dembele po bën për të rinovuar me PSG-në

“Por ajo që pres nga Ousmane është më shumë sesa thjesht të shënojë një, dy ose tre gola në një ndeshje. Ajo që presim dhe shpresojmë prej tij është aftësia e tij për të qenë një lider në anën mbrojtëse të fushës”, ka thënë fillimisht Enrique.

“Dhe në këtë drejtim, e gjithë skuadra duhet të përmirësohet. Ousmane, si pjesa tjetër e skuadrës. Sepse sot, në pjesën e parë, Lille luajti shumë mirë. Ata e kapërcyen presionin tonë shumë lehtë”.

“Sigurisht që vrapuam, por dobët. Dhe kur Lille kapërcen presionin tonë, kjo e bën ndeshjen të vështirë për t'u fituar. Dhe sot, patëm fat sepse shënuam tre gola”, përfundoi trajner i PSG-së. /Telegrafi/

Numri i punëtorëve të huaj në Maqedoninë e Veriut është trefishuar në pesë vitet e fundit, duke reflektuar ndryshime të thella në tregun e punës dhe në strukturën e fuqisë punëtore. Nga rreth 1.700 punëtorë të huaj në vitin 2021, ky numër është rritur në mbi 6.000 në vitin 2025. Trendi i rritjes së punëtorëve të huaj është i dukshëm edhe në jetën e përditshme, veçanërisht në Shkup, ku ata gjithnjë e më shpesh shihen të angazhuar në hotele, restorante si banakierë dhe pastrues, por edhe në kantieret e ndërtimit. Kjo prani e shtuar pasqyron mungesën e fuqisë punëtore vendore në disa sektorë kyç të ekonomisë.
Sipas dispozitave ligjore në Maqedoninë e Veriut, kuota për punësimin e shtetasve të huaj nuk duhet të tejkalojë 5 për qind të popullsisë në moshë pune. Megjithatë, të dhënat e fundit tregojnë se Qeveria ka vendosur ta rrisë ndjeshëm kuotën për lejet e punës për vitin 2025, duke e çuar atë në 10.000 angazhime.
Sipas vendimit që hyn në fuqi më 16 janar, 9750 leje janë të destinuara për punësim të rregullt të shtetasve të huaj, 200 leje për të huaj me përvojë specifike dhe 50 leje për angazhime sezonale. Nga totali, 4500 leje janë për punëtorë të rinj, ndërsa 5250 janë për vazhdimin e lejeve të punëtorëve të huaj që tashmë janë të punësuar në vend. Ministria e Ekonomisë dhe Punës do të monitorojë shfrytëzimin e kuotës dhe ndikimin në tregun e punës. Gjatë vitit të kaluar, Agjencia e Punësimit ka lëshuar gjithsej 8.509 opinione pozitive për leje pune, ndërsa Ministria e Punëve të Brendshme ka miratuar 6.128 leje qëndrimi për punëtorë të huaj. Bizneset kanë kërkuar prej vitesh rritje të kuotave, duke theksuar mungesën kronike të fuqisë punëtore në sektorë të caktuar.
Sipas të dhënave të Agjencisë së Punësimit, interesimi më i madh për punësimin e të huajve nga viti 2020 e këtej është evidentuar në ndërtimtari, industrinë përpunuese, akomodimin dhe shërbimin ushqimor, si dhe në tregtinë me shumicë dhe pakicë.
Me vite, në krye të listës së punëtorëve të huaj kanë qenë shtetasit nga Turqia. Vetëm vitin e kaluar rreth 2.800 prej tyre ishin të angazhuar në Maqedoni, kryesisht si pasojë e investimeve të mëdha turke. Pas tyre renditen punëtorët nga Bangladeshi (rreth 1600), si dhe nga Nepali dhe India (rreth 1100). Në vendin e pestë janë shtetasit e Kosovës, me 406 leje qëndrimi. Të dhënat historike tregojnë se numri i shtetasve të huaj me leje të rregullt pune në Maqedoni është rritur nga 918 në vitin 2007 në mbi 3.000 në vitin 2016. Në periudhat e mëhershme, kur kuotat ishin më të ulëta, këto vende pune kryesisht zinin punëtorë nga rajoni, si Kosova, Shqipëria dhe Serbia. Në pesë vitet e fundit, këto trende kanë ndryshuar ndjeshëm.
Vetëm në periudhën 01.01.2024 – 31.12.2024 janë paraqitur gjithsej 9.079 kërkesa, nga të cilat 844 kërkesa për dhënie leje pune dhe 8.233 kërkesa nga MPB për dhënie mendimi lidhur me shfrytëzimin e kuotës dhe nevojat e tregut të punës. Si rezultat, janë miratuar 815 vendime për leje pune, ndërsa një numër i vogël kërkesash janë refuzuar, tërhequr ose kanë mbetur të pazgjidhura. Profesionet ku janë angazhuar më së shumti punëtorë të huaj përfshijnë: menaxherë, punëtorë ndërtimi, zdrukthëtarë, elektricistë, operatorë makinerish, por edhe sportistë profesionistë, kryesisht futbollistë. Ata janë punësuar kryesisht në Shkup, Manastir, Tetovë, Kumanovë, Ohër, Prilep, Strumicë, Veles dhe Gjevgjeli.
Para vitit 2020, rritja e numrit të të huajve ishte e lidhur kryesisht me privatizimin e bankave, hyrjen e kapitalit të huaj në sektorët e telekomunikacionit, ushqimit, birrës, tekstilit, energjetikës, duhanit, metalurgjisë, dhënien me koncesion të aeroporteve, si dhe hapjen e institucioneve arsimore private, ku u angazhua edhe personel mësimor nga jashtë. Në vitet e fundit, hapja e bizneseve në teknologjinë informatike, ndërtimtari, hoteleri, si dhe angazhimi i mjekëve specialistë të huaj në spitalet private, e ka rritur edhe më tej numrin e profesionistëve të huaj që punojnë në Maqedoni.

Emmanuel Macron shkoi të mërkurën në punë duke mbajtur syze dielli dhe i kërkoi stafit dhe bashkëpunëtorëve ta “pranonin” kështu, duke ironizuar me situatën.

Kjo shfaqje vjen një ditë pas publikimit të pamjeve ku presidenti francez u shfaq në publik me një sy të kuq dhe të gjakosur, gjë që nxiti kuriozitet dhe shqetësim te qytetarët.

Pallati Elize reagoi menjëherë, duke kërkuar nga njerëzit që të mos shqetësoheshin dhe duke sqaruar se bëhej fjalë për një enë gjaku të çarë në sy.

Macron doli para ushtrisë me syrin e ënjtur dhe të skuqur

Zyrtarët theksuan se situata nuk përbënte rrezik për shëndetin e presidentit dhe se ishte një problem i përkohshëm.

Në një ton më lehtësues dhe humoristik, Macron shfrytëzoi rastin për të bërë shaka “tani kam shikimin e një tigri,” u shpreh ai, duke e kthyer problemin e vogël shëndetësor në një moment qesharak.

Shfaqja e tij me syze dielli u prit me buzëqeshje nga stafi dhe komentuesit e mediave sociale, disa prej të cilëve e komentuan se kjo i shton një “aura misterioze dhe sportive” figurës së presidentit. /Telegrafi/

Manchester City tashmë ka identifikuar objektivin e radhës për një transferim të madh financiar, teksa po finalizon marrëveshjen për mbrojtësin e Crystal Palace, Marc Guehi, për të cilin Pep Guardiola është një admirues i madh.

City ka rënë dakord të paguajë një shumë fillestare prej 20 milionë eurosh për shërbimet e Guehit, i cili më herët ishte lidhur fort me një transferim te Liverpool, por marrëveshja dështoi në ditën e fundit të afatit kalimtar.

Besohen se bisedimet për nënshkrimin e reprezentuesit anglez janë në fazë shumë të avancuar, ndërsa trajneri i Palace, Oliver Glasner, ka konfirmuar se mbrojtësi është “në fazat përfundimtare” të transferimit dhe nuk do të aktivizohet në ndeshjen ndaj Sunderlandit të shtunën.

Me ardhjen e Guehit, shpenzimet e Manchester Cityt do të shkojnë në rreth 450 milionë euro gjatë 12 muajve të fundit.

Megjithatë, “Qytetarët” tashmë po planifikojnë transferimin e radhës madhor. Sipas një raporti të TeamTalk, klubi nga Manchesteri synon të nënshkruajë tre objektiva kyç nga Liga Premier për vitin 2026.

Antoine Semenyo, i cili iu bashkua skuadrës së Pep Guardiolës nga Bournemouth këtë muaj në një marrëveshje prej 64 milionë eurosh, thuhet se ishte pjesë e këtij plani, së bashku me Marc Guehi dhe mesfushorin e Nottingham Forest, Elliot Anderson.

Që nga transferimi i tij te Forest nga Newcastle në vitin 2024, Anderson është shndërruar në një nga lojtarët më të spikatur të Ligës Premier.

Në muajin gusht, ai u shpërblye me ftesën e parë në kombëtaren A të Anglisë, ndërsa deri tani ka zhvilluar gjashtë ndeshje nën drejtimin e Thomas Tuchel, i cili pritet t’i japë mundësi edhe në Kupën e Botës këtë verë.

23-vjeçari ka zgjuar interesimin e disa klubeve të mëdha së fundmi, përfshirë Manchester United, Bayern Munich dhe Chelsea.

Ai është lavdëruar publikisht edhe nga disa trajnerë me emër, përfshirë Pep Guardiola, i cili beson se Anderson është një “përshtatje ideale” për sistemin e tij taktik, pasi mund të luajë si organizator i thellë i lojës apo si mesfushor box-to-box në rolin e numrit 8./Telegrafi/

Gazetari dhe publicisti Enver Robelli ka reaguar lidhur me filmin “Kill Me Today, Tomorrow I'm Sick!” (“Më vrit sot, nesër jam i sëmurë!”) që është transmetuar në televizionin publik gjerman ARD, duke thënë se është deformim, paragjykim, propagandë, madje edhe racizëm.

Robelli po ashtu thekson se filmi deformon historinë e luftës në Kosovë.

Lexoni të plotë, pa ndërhyrje postimin e Robellit në Facebook:

Deformim, paragjykim, propagandë, madje edhe racizëm: mbi një film për Kosovën të shfaqur në televizionin publik gjerman ARD

Magazina për kritikë të filmit në Gjermani “Kino-Zeit” (“Koha për kinema”) në një kritikë për filmin “Kill Me Today, Tomorrow I'm Sick!” (“Më vrit sot, nesër jam i sëmurë!”) që në hyrje shkruan: “Joachim Schroeder, i njohur për filmat e tij dokumentarë, tenton të realizojë bashkë me Tobias Streck një film artistik mbi Kosovën dhe misionet paqeruajtëse që erdhën në vend pas luftës - a ia dalin mbanë ata?”

E shikova mbrëmë këtë film në mediatekën e televizionit gjerman ARD dhe përgjigjja është: autorët e filmit jo vetëm që nuk ia dalin, por kanë arritur - në vitin 2018! - të prodhojnë një film thellësisht paragjykues e propagandistik, i cili deformon historinë e luftës në Kosovë. Me bollëk përdoren edhe klishetë raciste. Shqiptarët e Kosovës i trajtojnë gratë si shtazët. Edhe më keq: janë myslimanë dhe pothuaj të gjitha gratë e tyre janë të mbuluara. Kryengritësit e dikurshëm, të lavdëruar si çlirimtarë, mbajnë një kasaphanë ku u heqin organet civilëve serbë dhe i çojnë në Budapest për shitje. Kështu pretendon filmi.

Krimet e luftës të kryera me plan nga shteti serb ndaj popullsisë civile shqiptare nuk përmenden fare. Me të drejtë magazina gjermane “Kino-Zeit” shkruan: “Është mëkat, mbi të gjitha, që kësisoj lihet anash rrëfimi fillimisht i rëndësishëm mbi sulmet ndaj pakicave në Kosovën e pasluftës, por edhe mizoritë e mëparshme të luftës dhe politika kolonialiste e Serbisë ndaj banorëve të Kosovës - të cilat në film pothuajse janë injoruar plotësisht.”

Aktorët janë nga hapësira gjermane, serbë apo me origjinë sllave nga ish-Jugosllavia. Filmi është xhiruar në Novi Pazar dhe në Tirolin Jugor. Aktorët nuk dinë shqip. Andaj kur flasin shqip, ata tingëllojnë sikur mbajnë gurë në gojë.

Ngjarja vendoset në Kosovën e vitit 1999, menjëherë pas përfundimit të luftës, kur organizatat ndërkombëtare zbarkojnë në Prishtinë. Në qendër të filmit është Anna Neubert, një punonjëse e OSBE-së, e cila mbërrin me idealizmin e “shpëtimtares perëndimore”, e bindur se urrejtja ndëretnike mund të zhduket shpejt.

Megjithatë, entuziazmi i saj zbehet sapo ballafaqohet me realitetin në terren. Ajo vëren se misioni nuk po funksionon sipas planeve: dhuna ndaj civilëve serbë vazhdon, ndërsa OSBE-ja duket e painteresuar për të hetuar këto raste apo për të mbajtur përgjegjës figurat e fuqishme lokale (si personazhi Rhaci, i cili i ngjan Hashim Thaçit; rolin e tij e luan aktori serb Boris Millivojeviq). Anna fillon të dyshojë thellësisht te misioni dhe te njerëzit që e rrethojnë, të cilët rezultojnë të jenë të korruptueshëm dhe larg idealeve që proklamojnë. Ata ose përfundojnë te ndonjë prostitutë, ose kalojnë kohën duke treguar barcoleta seksiste.

Gjermania Anna Neubert i ndihmon shoferit të saj Plaka (Carlo Ljubek, aktor gjerman me prindër kroatë) të hap një radio multietnike, gazetarët e së cilës i sulmon me armë një bashkëpunëtor i afërt i “komandant Rhacit”. Kur nuk vret, bashkëpunëtori bën seks në tualetin e një bari në Prishtinë me një ndërkombëtar të OSBE-së, të cilin pastaj e vret me gjakftohtësi - po në tualet.

Në këtë film aludohet se shqiptarët i kanë inskenuar viktimat e luftës dhe bartin fajin për shkatërrimin e Jugosllavisë. Një fotografi e Josip Broz Titos bartet nga skena në skenë si dëshmi e rrejshme e parajsës jugosllave.

Po e citoj në fund sërish magazinën gjermane “Kino-Zeit”, e cila kritikën e përmbyll me këtë konstatim të drejtë: “Kill me today, Tomorrow I’m sick! përfaqëson mjerisht pikërisht atë sjellje hegjemoniste të Perëndimit ndaj Ballkanit, të cilën përpiqet gjoja ta kritikojë. Kështu, për shembull, personazhet gjermanë shfaqen me emër dhe mbiemër - ndërsa kjo gjë u mohohet natyrshëm figurave serbe dhe shqiptare, sikur të mos ishte asgjë e veçantë. Kjo vërehet njëlloj te produksioni, te politika e imazhit dhe te shakatë e personazhet shpesh të cekët, të cilët shërbejnë më shumë si shembuj për etni apo fe të tëra, sesa si personazhe të vërteta filmi, veprimet e të cilëve motivohen nga karakteri i tyre”.

Filmi ka qëndruar me ditë të tëra në mediatekën e ARD-së. Mbrëmë ka përfunduar afati i shfaqjes online. Ky film që pretendon të jetë artistik, duket si zgjatim i filmit gjoja dokumentar të ARD-së nga viti 2001 “Filloi me një rrenë” (“Es begann mit einer Lüge”), në të cilin deformohej historia e luftës së Kosovës dhe politikanët gjermanë akuzoheshin si gënjeshtarë që mashtruan opinionin për të siguruar përkrahjen e parlamentit për sulmet e NATO-s kundër Serbisë. Nuk është befasi që Sllobodan Millosheviqi me kënaqësi e citoi këtë dokumentar në procesin gjyqësor kundër tij në Hagë. /Telegrafi/

Gjatë podcastit "Shëndeti në rend të parë", e mbështetur nga United Hospital, gastroenterologu Avni Haziri ka treguar rrezikshmërinë dhe fshehtësinë e disa formave të kancerit të sistemit tretës, duke theksuar se mungesa e simptomave nuk do të thotë mungesë sëmundje.

Sipas Hazirit, në mbi 22 vite përvojë profesionale, ai ka hasur raste të shumta të pacientëve me kancer të avancuar të lukthit dhe zorrës së trashë, të cilët nuk kanë pasur asnjë simptomë paralajmëruese.

“Mua më ka ndodhur që gjatë këtyre 22 viteve përvojë të kem pacientë me kancer të avancuar të lukthit pa pasur asnjë simptomë. Po ashtu, kam pasur pacientë me karcinomë të zorrës së trashë pa asnjë shenjë klinike”, ka deklaruar Haziri.

Ai shpjegon se kanceri i zorrës së trashë konsiderohet një nga format më të rrezikshme, pikërisht për shkak se zhvillohet në heshtje dhe simptomat shfaqen shumë vonë.

“Ky lloj kanceri shpesh jep vetëm anemi. Pacienti nuk ka gjak në jashtëqitje, nuk ka kapsllëk, as barkqitje. Pra, nuk ka simptoma tipike që do ta alarmonin menjëherë”, thekson gastroenterologu.

Një tjetër aspekt shumë i rëndësishëm që Haziri vë në pah është faktori gjenetik.

Ai këshillon që personat që kanë raste të kancerit të lukthit apo zorrës së trashë në familje, duhet të jenë veçanërisht të kujdesshëm.

Për më shumë shikoni të plotë podcastin "Shëndeti në rend të parë". /Telegrafi/

- YouTube www.youtube.com

Aktorja amerikane Gwyneth Paltrow pretendon se u përjashtua nga filmi pas vëmendjes së medias rreth divorcit të saj nga vokalisti i Coldplay, Chris Martin.

Duke folur me Amy Poehler në podkastin "Good Hang", Paltrow zbuloi se divorci i saj në vitin 2014 nga Martin ndikoi në karrierën e saj.

"Në një moment duhej të bëja një film dhe kjo ndodhi menjëherë pas njoftimit për ndarjen me Chris dhe pati shumë reagime të ashpra në media. Mendoj se distributori tha më pas: 'Kjo mund të jetë shumë për filmin'", tha ajo.

Rastësisht, Paltrow dhe Martin bënë bujë në të gjithë botën kur njoftuan qëllimin e tyre për t'u "ndarë me ndërgjegje" pas më shumë se një dekade martesë dhe dy fëmijëve.

"Para së gjithash, ne jemi prindër të dy fëmijëve jashtëzakonisht të mrekullueshëm dhe kërkojmë që hapësira dhe privatësia e tyre dhe e jona të respektohet gjatë kësaj kohe të vështirë. Ne gjithmonë e kemi mbajtur marrëdhënien tonë private dhe shpresojmë që, ndërsa ndahemi me vetëdije dhe i rrisim fëmijët tanë së bashku, të mund të vazhdojmë në të njëjtën mënyrë", thanë ata në një deklaratë në atë kohë.

Edhe pse ajo nuk dha detaje të mëtejshme rreth filmit dhe kompanisë së përfshirë në të, Paltrow ishte qartësisht e pakënaqur me të.

"Kjo ishte shumë mirë sepse po kaloja një divorc dhe pastaj më pushuan nga puna", tha ajo. Paltrow tha se beson që qëllimi i tyre, i cili ishte të shmangnin një divorc të acaruar, u keqinterpretua.

Paltrow dhe Martin thuhet se kanë mbetur në marrëdhënie të mira që nga divorci i tyre në vitin 2016. Në vitin 2019, Paltrow zbuloi se Chris Martin ishte bashkuar me të dhe bashkëshortin e saj aktual Brad Falchuk në muajin e mjaltit, së bashku me fëmijët e tyre. /Telegrafi/

Real Madridi rikthehet sot (e shtunë) në ‘Santiago Bernabeu’ për herë të parë që nga shkarkimi i Xabi Alonsos, gjë që shkaktoi një valë kritikash si midis tifozëve ashtu edhe komentatorëve.

Edhe përkundër se iu pëlqente shumë Alonso, në tribunat e Bernabeut mund të dëgjoheshin përsëri pakënaqësi të forta, këtë herë jo vetëm në kurriz të Vinicius Junior, por edhe brenda klubit.

Duke pasur parasysh këtë, Real Madridi tashmë u ka dërguar një mesazh të ashpër tifozëve që do të donin të vërshëllenin në stadium kundër Levantes.

Pjesa e tifozëve që njihet si Grada de Animacion

Real Madridi do ta monitorojë në mënyrë strikte sektorin

Sipas mediumit Cadena SER, drejtuesit e klubit kanë vendosur një vijë të qartë në lidhje me sjelljen e tifozëve, veçanërisht ndaj "Grada de Animacion", sektorit me tifozët më të zhurmshëm. Ata thuhet se u kanë thënë anëtarëve të këtij sektori se do të ushtrohet mbikëqyrje e rreptë gjatë ndeshjes.

Udhëzimi është i qartë dhe nuk lë vend për interpretim: pas ndeshjes, klubi synon të shqyrtojë pamjet filmike të kamerave të sigurisë nga tribuna. Ultimatumi është që çdo anëtar i "Grada de Animacion" që filmohet duke vërshëllyer ekipin do të ndalohet të hyjë në atë sektor.

Qëndrimi i klubit është qartësisht ai i tolerancës zero ndaj atmosferës negative në sektorin kryesor të tifozëve. Mesazhi për këta tifozë është i drejtpërdrejtë: "Kushdo që dëshiron të vërshëllej, le të vërshëllej jashtë stadiumit".

Me Vinicius Jr. që është vërshëllyer në javët e fundit dhe shkarkimin e Xabi Alonsos që ka nxitur më tej tensionet midis tifozëve, bordi është i etur që “Grada de Animacion” të jetë një burim mbështetjeje e zëshme, jo proteste.

Ndërsa nuk mund ta kontrollojnë të gjithë stadiumin, klubi ka vendosur të shtypë agresivisht pakënaqësinë brenda sektorit të tij më të organizuar. /Telegrafi/

SPB Tetovë njofton se dje (11.01.2026) në ora 13:00 në rrugën “Boro Vuliq” në Tetovë, zyrtarë policorë nga Stacioni Policor për Sigurinë në Komunikacionin Rrugor Tetovë, kanë privuar nga liria personin Sh.M.(52) nga Tetova.
Siç thonë nga SPB, i njëjti është sjellë në mënyrë agresive ndaj policëve dhe i ka fyer gjatë kryerjes së detyrës zyrtare.
“Sh.M. është ndaluar në stacionin policor dhe pas dokumentimit të rasti ndaj tij do të parashtrohet kallëzim përkatës”, thonë nga SPB Tetovë.

Pse vitaminat B6, E dhe C nuk janë gjithmonë të padëmshme dhe kur doza e gabuar bëhet rrezik

Në vitet e fundit, suplementet ushqimore janë bërë pjesë e përditshme e shumë njerëzve. Vitamina B6, E dhe C merren shpesh “për nerva”, “për imunitet” ose “për zemrën”, pa u menduar shumë për dozën dhe kohëzgjatjen. Megjithatë, studimet shkencore dhe përvoja klinike tregojnë se vitaminat nuk janë gjithmonë të padëmshme, sidomos kur merren në doza të larta dhe për një kohë të gjatë.

Ekspertët e National Institutes of Health (NIH) dhe European Food Safety Authority (EFSA) theksojnë se, në megadoza, disa vitamina nuk sillen më si ushqyes, por si substanca me efekt farmakologjik, të afta të shkaktojnë pasoja të padëshiruara. Pikërisht vitaminat B6, E dhe C janë shembuj të mirë se pse parimi “më shumë është më mirë” nuk vlen gjithmonë.

Vitamina B6, e njohur si piridoksinë, është e nevojshme për funksionimin e nervave dhe metabolizmin, por vetëm në sasi shumë të vogla. Nevoja ditore për një të rritur është rreth 1.3 deri në 1.7 mg. Kur merret për muaj ose vite në doza të larta, sidomos mbi 25–50 mg në ditë, studimet e publikuara në revista neurologjike dhe të përmbledhura nga NIH kanë treguar rritje të rrezikut për dëmtime të nervave periferikë. Këto dëmtime shfaqen me mpirje, ndjesi shpimi gjilpërash, djegie në duar dhe këmbë, madje edhe vështirësi në ecje. Në disa raste, përmirësimi pas ndërprerjes së suplementit është i ngadalshëm dhe jo gjithmonë i plotë, transmeton Telegrafi.

Edhe vitamina E, e njohur si antioksidant i fuqishëm, nuk është pa rrezik kur merret pa kontroll. Doza ditore e rekomanduar është rreth 15 mg, ndërsa shumë suplemente përmbajnë qindra njësi ndërkombëtare (IU). Meta-analiza të publikuara në BMJ, Annals of Internal Medicine dhe rishikime të Cochrane Collaboration tregojnë se përdorimi i dozave të larta, veçanërisht mbi 200–400 IU në ditë, lidhet me rritje të rrezikut për gjakderdhje dhe goditje hemorragjike në tru. Ky rrezik është edhe më i madh te personat që përdorin aspirinë ose barna për hollimin e gjakut. Studimi i madh SELECT, i botuar në JAMA, nuk gjeti përfitime mbrojtëse nga vitamina E, por ngriti shqetësime për përdorimin e saj afatgjatë në doza të larta.

Vitamina C, ndoshta më e përdorura nga të gjitha, konsiderohet relativisht e sigurt, por edhe këtu doza bën diferencën. Nevoja ditore është rreth 75–90 mg, ndërsa shumë njerëz marrin 1 ose 2 gramë në ditë “për imunitet”. Sipas NEJM, BMJ dhe JAMA Internal Medicine, dozat e larta të vitaminës C mund të shkaktojnë shqetësime gastrointestinale dhe diarre, ndërsa te personat e predispozuar rrisin rrezikun për formimin e gurëve në veshka. Studimet tregojnë se përfitimi imunitar nuk rritet proporcionalisht me dozën, ndërsa rreziku po.

Mesazhi që del nga literatura shkencore është i qartë: suplementimi nuk duhet të bëhet sipas këshillave të internetit apo trendeve, por sipas nevojës reale të organizmit. Vitaminat duhen marrë në dozat e duhura, për kohën e duhur dhe me qëllim të qartë. Analizat laboratorike, gjendja shëndetësore dhe terapia që përdorni janë faktorë kyç që duhen marrë parasysh.

Në fund, ekspertët theksojnë një parim të thjeshtë, por shumë të rëndësishëm: suplementet nuk janë karamele dhe vitamina nuk është gjithmonë sinonim i sigurisë. Kur keni dilema, këshilla mjekësore është gjithmonë zgjidhja më e sigurt. /Telegrafi/

Trajneri i Barcelonës, Hansi Flick, është shprehur i kënaqur me ndikimin që ka pasur Marcus Rashford, i huazuar nga Manchester United, por ka theksuar se vendimi përfundimtar për një transferim të përhershëm i takon drejtorit sportiv Deco dhe drejtuesve të klubit.

“Paraqitjet e tij kanë qenë të mira deri më tani, por kjo është diçka që duhet ta menaxhojmë së bashku me Decon dhe klubin. Ende kemi mjaft kohë përpara, muaj të tërë,” ka deklaruar Flick.

“Marcus është një lojtar i nivelit të lartë dhe ne e kuptojmë situatën e tij. Ne jemi Barça dhe jemi një nga klubet më të mira në botë”.

Trajneri gjerman bëri edhe një krahasim me filozofinë e klubit ndaj lojtarëve të rinj nga La Masia.

“Është njësoj si ajo që them për lojtarët e La Masias. Ne u japim mundësinë të luajnë dhe u besojmë atyre”.

“Nëse dëshiron të luash për Barçën, ne do të jemi 100 për qind pas teje. Këtë dua ta shoh edhe nga lojtarët e tjerë”, përfundoi ai.

Kujtojmë se Barcelona do të zhvillojë ndeshjen e saj të radhës të dielën, ku do të luajë si mysafire e Real Sociedadit./Telegrafi/

Presidenti amerikan Donald Trump ofroi të premten të ndërmjetësojë në mosmarrëveshjen për ujërat e lumit Nil midis Egjiptit dhe Etiopisë.

“Jam i gatshëm të rinis ndërmjetësimin amerikan mes Egjiptit dhe Etiopisë për ta zgjidhur në mënyrë të përgjegjshme dhe përfundimtare çështjen e ‘ndarjes së ujërave të Nilit’”, shkroi Trump në një letër drejtuar presidentit egjiptian Abdel Fattah al-Sisi, e cila u publikua gjithashtu në llogarinë e tij në rrjetin social Truth Social.

Inaugurimi i Digës së Madhe të Rilindjes Etiopiane, i mbajtur më 9 shtator nga autoritetet etiopiane, ka shkaktuar zemërim në Kajro, pasi Egjipti ndodhet në pjesën e poshtme të rrjedhës së Nilit dhe varet ndjeshëm nga ujërat e tij.

Etiopia, shteti i dytë më i populluar në Afrikë me mbi 120 milionë banorë, e konsideron digën — me një kosto prej 5 miliardë dollarësh dhe të ndërtuar në një nga degët e Nilit — si një projekt kyç për zhvillimin dhe ambiciet e saj ekonomike.

Egjipti pretendon se diga shkel marrëveshjet ndërkombëtare dhe se funksionimi i saj mund të shkaktojë si thatësira ashtu edhe përmbytje, akuza që Etiopia i hedh poshtë.

Dy vendet nuk kanë ende një marrëveshje përfundimtare dhe ligjërisht detyruese për ndarjen e ujërave të Nilit, ndërsa mosmarrëveshja zgjat prej vitesh. Lumi Nil përbën një çështje ekzistenciale si për Egjiptin ashtu edhe për Etiopinë. Marrëveshjet e mëparshme historike u jepnin Egjiptit dhe Sudanit pothuajse të gjithë ujin e Nilit, pa përfshirë Etiopinë, e cila nuk i njeh këto marrëveshje.

Përpjekja e fundit e rëndësishme për një zgjidhje diplomatike u bë në vitin 2015, kur Etiopia, Egjipti dhe Sudani nënshkruan Deklaratën e Parimeve. Kjo marrëveshje shërbeu si një kornizë politike që njeh nevojën për bashkëpunim, por nuk përcakton rregulla të qarta dhe detyruese ligjërisht.

Më pas pasuan negociata shumëvjeçare, të ndërmjetësuara nga Bashkimi Afrikan, Shtetet e Bashkuara dhe Banka Botërore, por pa arritjen e një marrëveshjeje përfundimtare.

Egjipti kërkon garanci për sigurinë e furnizimit me ujë, ndërsa Etiopia insiston në të drejtën për të shfrytëzuar burimet e saj natyrore për zhvillim ekonomik. Për momentin, asnjëra palë nuk duket e gatshme të bëjë lëshime të mjaftueshme, duke e mbajtur të hapur një përplasje të vazhdueshme diplomatike mes dy vendeve. /Telegrafi/

Një grua nuk kishte mundësi të ngrohte ushqimin e saj në punë, por papritmas i erdhi një ide qesharake dhe krejt e pazakontë.

Ajo e realizoi këtë ide dhe rezultati ishte kaq i bukur sa menjëherë u bë hit në internet, duke shkaktuar të qeshura tek të gjithë që e panë.

Ky është një shembull perfekt i asaj që quhet shpikje dhe mendje e shpejtë!

Kur njerëzit hasin një problem, shpesh zgjidhja më kreative është ajo që nuk ta pret.

Disa gjëra të vogla, por të zgjuara, mund të bëhen të famshme menjëherë dhe të tërheqin vëmendjen e të gjithëve. /Telegrafi/

Një studim i ri tregon se ChatGPT në disa raste jep përgjigje më të sakta kur përdoruesit i bëjnë kërkesa të drejtpërdrejta dhe ashpra, krahasuar me pyetjet e formuluara shumë të sjellshme.

Kërkesa më të ashpra rezultuan me një saktësi përgjigjeje rreth 84.8 për qind, rreth katër për qind më shumë se formulimet më të buta.

Shkencëtarët shpjegojnë se tonet më të forta shpesh çojnë në udhëzime më të qarta dhe të përqendruara, që ndihmojnë modelin të përpunojë detyrën më mirë.

Megjithatë, ata paralajmërojnë se kjo nuk do të thotë se përdoruesit duhet të jenë qëllimisht të pasjellshëm ndaj sistemeve të inteligjencës artificiale.

Normalizimi i një stili të ashpër të komunikimit me AI mund të ndikojë negativisht edhe në komunikimin ndërnjerëzor dhe përdorimet e kësaj teknologjie në mësim, punë dhe jetë të përditshme. /Telegrafi/

Komisioni Qendror i Zgjedhjeve bën të ditur se në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Nga fillimi i këtij procesi (e martë, 13 janar 2026, ora 18:00) dhe deri më tani (e shtunë, 17 janar 2026, ora 10:00) janë rinumëruar 316 nga 914 vendvotime, të cilat u takojnë komunave: Deçan (5/5), Gjakovë (15/15), Gllogoc (7/7), Gjilan (13/13), Dragash (57/57), Istog (6/6), Kaçanik (45/45), Klinë (6/6), Fushë Kosovë (6/6), Kamenicë (5/5), Mitrovicë e Jugut (10/10), Leposaviq (25/25), Lipjan (9/9), Novobërdë (2/2), Obiliq (3/3), Rahovec (8/8), Pejë (14/14), Podujevë (11), Prishtinë (26/26) dhe Prizren (43/235).

“Sipas të dhënave, deri më tani procesi i rinumërimit është përmbyllur në 19 komuna, ndërkohë gjatë pjesës tjetër të ditës, të tjera komuna, sipas radhës, do të përfshihen në këtë proces.

Ndërkohë, në Qendrën e Numërimit dhe Rezultateve, është shtuar numri i tavolinave për rinumërim, nga 20 në 26 sosh”, thuhet në njoftim.

Në platformën e KQZ-së për rezultate https://resultsparliamentary2025.kqz-ks.org/, në hapësirën QNR Rinumërim, do të paraqiten rezultatet pas numërimit të çdo vendvotimi. /Telegrafi/

11 aktakuza për krime lufte janë ngritur deri në dhjetorin e vitit të kaluar. Gjatë kësaj periudhë janë akuzuar 36 persona, në mesin e tyre 33 për gjykim në mungesë.

Kështu ka bërë të ditur Prokuroria Speciale, derisa ka thënë se numri total i aktakuzave në mungesë është 20, ku akuzohen 102 persona, shkruan KosovaPress.

“Prokuroria Speciale e Republikës së Kosovës, ju njofton se gjatë vitit 2025, konkretisht deri më 01 dhjetor të këtij viti janë ngritur 11 aktakuza për veprën penale “Krim i luftës kundër popullsisë civile. Gjatë kësaj periudhe janë akuzuar 36 persona, prej tyre 33 persona të akuzuar për gjykim në mungesë, ndërsa janë parashtruar 8 kërkesa për caktim te paraburgimit ndaj 10 personave. Ndërsa, numri total i rasteve me aktakuza është: 74 raste me 80 aktakuza ndaj 216 personave. Numri i aktakuzave të dorëzuara me gjykim në mungesë është: 20 aktakuza për gjykim në mungesë ndaj 102 personave”, thuhet në këtë përgjigje.

Ish-kryetari i Gjykatës Supreme, Fejzullah Hasani flet për vështirësitë që kanë autoritetet vendore për të ndjekur penalisht kriminelët e luftës. Ai thekson se ka kaluar kohë e gjatë dhe se “provat janë lehtësisht të zhdukshme”.

“Mirë është bërë që është lejuar gjykimi në mungesë për krimet e luftës, domethënë krimet kundër njerëzimit, gjenocidit dhe krimit e luftës. Edhe pse në aspektin e efekteve nuk besoj që ka me pasur shumë efekte, për faktin se ligji atje thotë se në momentin që personat e tillë bëhen të qasshëm për organet e ndjekjes të Kosovës, procedura, nëse ata kërkojnë, duhet menjëherë të rigjykohen, të kthehet edhe njëherë çështja nga e para.

Kështu që problem është e para për t'i pasur të qasshëm për ta mbajtur dënimin dhe nëse vendimet marrin formën e prerë. E dyta ne e dimë që nuk kemi kurrfarë bashkëpunimi me Serbinë që pak është e besueshme se ajo mund t'i dorëzojë personat e tillë. Besoj që pavarësisht çfarë do presioni që i zhvillohet, ajo nuk është e gatshme që t'i dorëzojë. Kështu që e para është vështirë për të besuar se ato do të dorëzohen në Kosovë për ta mbajtur dënimin dhe e dyta është problem që Serbia të ekzekutojë vendimet tona edhe nëse ndërkohë arrin ndonjë marrëveshje”, thotë Hasani.

Ai thotë ndër tjera se është me rëndësi që Kosova të ketë aktgjykime të formës së prerë për krime lufte.

“Domethënë ato mund të ngelin vetëm aktgjykime në letër, po që mos të ekzekutohen kurrë. Po sido që të jetë, për neve është me rëndësi që Kosova me pas procese të përfunduara, me pasur aktgjykime të formës së prerë, pastaj e kemi më lehtë edhe në raport të negociatave që patjetër do të zhvillohen në të ardhmen me Serbinë, që ato vendime të ekzekutohen ose eventualisht që të personat e dënuar që të dorëzohen në Kosovë për ta mbajtur dënimin”, shton ai.

Amer Alija nga Fondi për të Drejtën Humanitare thotë se vitet e fundit kanë dominuar aktakuzat në mungesë për krime lufte.

“Këto dy-tre vitet e fundit gjykimet në mungesë apo aktakuzat të cilat ngriten ndaj të akuzuarve të cilët nuk gjenden në territorin e Kosovës janë duke dominuar karshi aktakuzave ndaj personave të cilët janë të arrestuar apo të cilët janë prezent në gjykatë. Siç e kemi parë edhe këtë vit ka pasur edhe aktgjykim të shkallës së parë edhe për dhunim seksual si krime lufte ndaj dy personave të akuzuar në mungesë. Ky është aktgjykimi i parë në mungesë për këtë lloj të veprës penale, pra të dhunimit seksual. Më herët ka pasur edhe dy apo tre aktgjykime të tjera të shkallës së parë në mungesë”, shprehet Alija.

Qendra Kosovare për Rehabilitimin e të Mbijetuarve të Torturës e konsideron vitin 2025 si vit të drejtësisë.

Fatmire Haliti nga kjo organizatë thotë se ka pasur progres në aspektin e qasjes në drejtësi të mbijetuarve të dhunës seksuale gjatë luftës në Kosovë.

“Gjatë vitit 2025 janë zhvilluar dhe kanë përfunduar tre gjykime për dhunë seksuale gjatë luftës në Kosovë, ndërsa dy gjykime janë duke u zhvilluar aktualisht, ku presim që të kemi gjykime sa më shpejt që është e mundur. Në mesin e tre gjykimeve që janë mbajtur, kemi një aktgjykim dënues me 15 vjet burgim, ku i akuzuari është dënuar dhe është në vuajtje të dënimit, si dhe kemi aktgjykimin e parë në mungesë për dhunë seksuale, ku janë dënuar dy kryes të dhunës seksuale me nga 15 vjet burgim.... Pra, në vitin 2025 e kemi pasur aktgjykimin e parë në mungesë, ku janë dënuar dy të akuzuar, Ivica Rajkoviq dhe Dragan Deniq, me nga 15 vjet burgim. Dhe ky rast domethënë ka hapur rrugë edhe për raste të tjera, ka krijuar domethënë një farë standardi se si të trajtohen, duke pasur parasysh që janë raste më të ndjeshme për sistemin e drejtësisë, sepse duhet të ndjekin një varg procedurash paraprakisht para se të fillojnë procesi gjyqësor”, përfundon Haliti.

Aktgjykimi i parë në mungesë është shpallur gjatë vitit 2024, ku i dënuari është Çedomir Aksiq i cili kreu krime lufte në Reçak, Mulapolc dhe Petrovë - fshatra në komunën e Shtimes.

Mbrojtësi portugez, Diogo Dalot ka bërë një ndërhyrje shumë të ashpër ndaj kundërshtarit të tij, Jeremy Doku, por ka shpëtuar pa u ndëshkuar me karton të kuq.

Derbi i qytetit mes Manchester United dhe Manchester City në Old Trafford ka nisur me një ritëm ta lartë, por edhe më lojë të ashpër.

Një ndërhyrje shumë e ashpër ka ndodhur pikërisht në minutën e 11-të të ndeshjes, me Dalot akterin kryesor.

Ishte sulmuesi anësor i Cityt, Doku, i cili në tentim për t’i ikur në sulm, Dalot bëri një ndërhyrje ‘horror’ duke e goditur me thumba në gju.

Megjithatë, mbrojtësi portugez shpëtoi mrekullisht nga kjo ndërhyrje, pasi gjyqtari Anthony Taylor vendosi t’i jap vetëm karton të verdhë.

I çuditshëm është edhe fakti se as dhoma e VAR-it nuk ndërhyri për ta ftuar gjyqtarin kryesor dhe ndeshja vazhdoi si mos të ndodh asgjë. /Telegrafi/

Projektligji për mbrojtjen nga pirja e duhanit, i përgatitur nga Ministria e Shëndetësisë, parashikon ndalimin e pirjes së duhanit në hapësirat e mbyllura publike dhe të punës, në përputhje me standardet evropiane dhe rekomandimet e Organizatës Botërore të Shëndetësisë. Kjo përcakton një rregull të qartë dhe universal që mbron të gjithë qytetarët, pa përjashtime dhe pa zona gri.
Sipas standardeve të shëndetit publik, pirja e duhanit është një zgjedhje personale, por një hapësirë e përbashkët e brendshme nuk duhet të jetë një vend ku kjo zgjedhje bëhet rrezik për shëndetin e të tjerëve.
Ligji nuk rregullon nëse dikush do të pijë duhan, por përcakton qartë se ku nuk mund të praktikohet, me qëllim mbrojtjen e shëndetit të të gjithë të pranishmëve.
Cilësia e ajrit të brendshëm lidhet drejtpërdrejt me rezultatet shëndetësore. Ajri i pastër do të thotë më pak acarim i traktit respirator, më pak sulme astme dhe një rrezik të reduktuar të zhvillimit të sëmundjeve kronike.
Projektligji e trajton ekspozimin ndaj tymit të duhanit si çështje të sigurisë dhe shëndetit në punë, dhe jo si çështje të stilit të jetesës. Në institucionet e ushqimit, është stafi që ekspozohet ndaj tymit të cigareve dhe produkteve të tjera të duhanit dhe nikotinës për më gjatë dhe më intensivisht, prandaj shteti ka një detyrim të qartë për të mbrojtur të drejtën e punonjësve për një mjedis pune të shëndetshëm dhe të sigurt.
“Përvojat nga vendet evropiane që tashmë kanë zbatuar zgjidhje të tilla ligjore, si Irlanda, Mbretëria e Bashkuar dhe shumë të tjera, tregojnë se këto masa nuk përbëjnë goditje për gastronominë dhe të ardhurat e saj, por një tranzicion drejt një ambienti më të rregulluar, më cilësor dhe më të parashikueshëm në objektet hoteliero-gastronomike”,- shpjegon ministri i Shëndetësisë, Azir Aliu.
Ai shton se masa të tilla mundësojnë frekuentim më të madh nga familjet, turistët dhe qytetarët që preferojnë ajër të pastër, gjë që në afat të gjatë përfaqëson përfitim të drejtpërdrejtë edhe për vetë objektet gastronomike./Telegrafi/

Pamje të rënda dhe tronditëse kanë qarkulluar së fundmi në rrjetet sociale, duke shkaktuar reagime të shumta nga publiku, pas një përballjeje sqaruese mes dy banorëve të Big Brother VIP Kosova 4, Albës dhe Limit.

Videoja, e cila nuk është transmetuar asnjëherë në Prime apo në kanalet zyrtare të spektaklit, tregon një moment tejet të tensionuar mes ish-çiftit.

Sipas pamjeve, gjithçka nis nga një deklaratë fyese e Limit drejtuar Albës, ku ai përdor një fjalor të rëndë dhe denigrues ndaj saj. Kjo deklaratë e ndez menjëherë situatën, ndërsa Alba dëgjohet duke bërtitur dhe duke shpërthyer në lot, çka bën që të zgjohen edhe disa nga banorët e tjerë të shtëpisë, të cilët ndërhyjnë për të qetësuar situatën.

E revoltuar dhe e lënduar, Alba i drejtohet Limit me tone të ashpra, duke e quajtur “të poshtër” dhe duke kërkuar sqarim për akuzat e tij. Nga ana tjetër, Limi vazhdon me replika të shkurtëra dhe provokuese, pa dhënë një shpjegim të qartë, duke e përshkallëzuar edhe më tej konfliktin mes tyre.

Ajo që ka ngritur edhe më shumë pikëpyetje është fakti se këto pamje janë mbajtur larg syrit të publikut nga produksioni dhe nuk janë transmetuar në asnjë moment gjatë spektaklit.

Publikimi i tyre në rrjete sociale ka hapur debate të forta mbi përzgjedhjen e materialeve që shfaqen në ekran dhe mbi trajtimin e situatave të ndjeshme brenda shtëpisë më të famshme në vend. /Telegrafi/