Energjia jote është e lartë dhe të shtyn të marrësh iniciativa, sidomos në çështje pune. Kujdes me reagimet e shpejta në biseda personale, sepse jo të gjithë ecin me të njëjtin ritëm. Një vendim i matur sot sjell përfitime afatgjata.
Demi
Kjo ditë të fton të përqendrohesh te stabiliteti dhe siguria personale. Mund të mendosh më seriozisht për financat ose për një hap të rëndësishëm profesional. Në marrëdhënie, sinqeriteti është çelësi për të shmangur keqkuptimet.
Binjakët
Komunikimi është pika jote më e fortë sot dhe të ndihmon të zgjidhësh çështje të mbetura pezull. Ide të reja mund të lindin nga një bisedë e papritur. Mos e shpërnda energjinë në shumë drejtime njëkohësisht.
Gaforrja
Ndjeshmëria është e theksuar dhe të bën më të vëmendshëm ndaj nevojave të të tjerëve. Është një ditë e mirë për të forcuar lidhjet familjare ose emocionale. Kujdes të mos neglizhosh veten duke u marrë vetëm me problemet e të tjerëve.
Luani
Dëshira për t’u dalluar është e fortë, por sot vlerësohet më shumë bashkëpunimi sesa imponimi. Një projekt i përbashkët mund të sjellë rezultate pozitive. Në dashuri, gjestet e vogla kanë më shumë peshë se fjalët e mëdha.
Virgjëresha
Detajet kërkojnë vëmendje dhe aftësia jote organizative del në pah. Është moment i mirë për të rregulluar çështje praktike ose për të planifikuar ditët në vijim. Mos u bëj tepër kritik, as me veten dhe as me të tjerët.
Peshorja
Balanca mes dëshirave personale dhe kërkesave të të tjerëve është tema kryesore e ditës. Mund të përballesh me një zgjedhje që kërkon diplomaci. Harmonia arrihet kur shpreh qartë atë që ndjen.
Akrepi
Intuita është shumë e fortë dhe të ndihmon të kuptosh situata që nuk janë të qarta në sipërfaqe. Është ditë e mirë për vendime strategjike dhe për reflektim të brendshëm. Shmang debatet e panevojshme.
Shigjetari
Optimizmi të shtyn të shohësh përpara dhe të mendosh për plane të reja. Një lajm ose kontakt mund të hapë mundësi interesante. Kujdes me premtimet, sepse jo çdo ide është gati për t’u realizuar menjëherë.
Bricjapi
Përgjegjësitë janë në plan të parë dhe kërkojnë përqendrim maksimal. Puna e palodhur sot vë bazat për suksesin e ardhshëm. Në aspektin personal, lejoji vetes pak më shumë fleksibilitet.
Ujori
Origjinaliteti yt bie në sy dhe të ndihmon të dalësh nga rutina. Është ditë e favorshme për ide kreative dhe për diskutime ndryshe nga zakonisht. Dëgjo mendimet e të tjerëve, edhe nëse nuk pajtohesh menjëherë.
Peshqit
Imagjinata dhe ndjeshmëria të udhëheqin në vendimet e ditës. Një moment qetësie të ndihmon të kuptosh më mirë dëshirat e tua. Në marrëdhënie, empatia krijon afërsi dhe mirëkuptim më të thellë.
Bashkëshortja e ambasadorit William Walker dje ka pasur një shqetësim shëndetësor gjatë vizitës së saj në qytetin e Vitisë.
Ajo u trajtua menjëherë nga ekipi i Qendrës Kryesore të Mjekësisë Familjare (QKMF).
Drejtoresha e QKMF-së në Viti, Vjollca Kadolli, ka bërë të ditur për Plus TV se pas trajtimit të menjëhershëm, gjendja shëndetësore e saj është stabilizuar dhe ajo është liruar për të vazhduar aktivitetet e planifikuara.
Siç raportojnë mediat lokale, reagimi i shpejtë dhe profesional i Qendrës së Emergjencës në Viti ka qenë kyç për menaxhimin e situatës dhe trajtimin me sukses të saj.
Me këtë rast, ambasadori Walker ka falënderuar stafin mjekësor për intervenimin e tyre profesional.
Kur janë rinumëruar gati gjysma e kutive të votimit nga 914 që janë dërguar për verifikim, janë vërejtur ndryshime të dukshme në votat e kandidatëve për deputetë.
Nga tri partitë më të votuara në zgjedhjet e parakohshme parlamentare të 28 dhjetorit, Partia Demokratike e Kosovës (PDK) shfaq më së shumti ndryshime në votat për kandidatët pas nisjes së rinumërimit të pjesshëm.
Në shumicën e rasteve, kandidatëve të caktuar u janë shtuar vota në masë të madhe, derisa pas rinumërimit ka pasur edhe kandidatë të dëmtuar me mbi 500 vota.
Dyshime për manipulime masive janë raportuar në Prizren, ku mbi 4 mijë vota iu shtuan vetëm një kandidati. Në partitë tjera, ndryshimet kanë qenë të vogla.
PDK – Kandidatët që më së shumti iu hoqën vota pas rinumërimit:
Fetah Paçarizi: -4,633 vota
Nait Hasani: -2,603 vota
Kujtim Gashi: -1,819 vota
Arianit Çollaku: -1,416 vota
PDK – Kandidatët që më së shumti iu rikthyen votat nga KQZ pas rinumërimit:
Uran Ismaili: +563 vota
Arian Tahiri: +502 vota
Përparim Gruda: +324 vota
Vlora Çitaku: +372 vota
LDK – Kandidatët që më së shumti iu hoqën vota pas rinumërimit:
Xhavit Uka: -1,202 vota
Driton Selmanaj: -828 vota
Anton Quni: -425 vota
Visar Azemi: -353 vota
LDK – Kandidatët që më së shumti iu rikthyen votat nga KQZ pas rinumërimit:
Paris Guri: +125 vota
Gëzim Hazrolli: +118 vota
Festim Kabashi: +89 vota
Ukë Rugova: +74 vota
LVV – Kandidatët që më së shumti iu hoqën vota pas rinumërimit:
Arbër Rexhaj: -526 vota
Rea Krasniqi: -430 vota
Valon Ramadani: -382 vota
Dafina Alishani: -321 vota
LVV – Kandidatët që më së shumti iu rikthyen votat nga KQZ pas rinumërimit:
Glauk Konjufca: +100 vota
Hajrulla Çeku: +91 vota
Ejup Maqedonci: +72 vota
Xhelal Sveçla: +61 vota
Shqipe Mehmeti Selimi: +60 vota
Procesi i rinumërimit pritet të vazhdojë edhe në ditët në vijim. KQZ-ja ka bërë të ditur se rezultatet përfundimtare do të publikohen vetëm pas përfundimit të plotë të verifikimit të të gjitha vendvotimeve të përfshira në këtë proces.
Mbrëmë, në shtëpinë e Big Brother u hap Zarfi i Zi, një vendim që ndryshoi menjëherë rrjedhën e lojës.
Si pasojë e shkeljes së rregullave, Ina, Kejisi dhe Eriku u dërguan direkt në televotim.
Pas këtij vendimi, në qendër të vëmendjes u vendos Brikena, liderja aktuale e shtëpisë, e cila kishte avantazhin e shpëtimit. Ajo kishte mundësinë të zgjidhte mes Inës dhe Stelinës, dy banoreve të vetme që mund të përfitonin nga ky avantazh.
Në vend të kësaj, ajo zgjodhi ta bashkonte Mateon me televotimin, duke dhënë qartë mesazhin se mes saj dhe Mateos nuk ka asgjë të veçantë.
Ky lëvizje e Brikenës ka ngjallur reagime të ndryshme brenda shtëpisë dhe ka rikthyer tensionin mes banorëve.
Një kërcënim nga presidenti i SHBA-së, Donald Trump, për të vendosur tarifa të reja ndaj tetë aleatëve që kundërshtuan planin e tij për marrjen nën kontroll të Grenlandës, ka nxitur reagime dhe dënime të forta nga liderët evropianë.
Kryeministri i Mbretërisë së Bashkuar, Keir Starmer, e quajti këtë veprim “plotësisht të gabuar”, ndërsa presidenti francez, Emmanuel Macron, tha se është “i papranueshëm”.
Këto reagime erdhën pasi Trump njoftoi se një tarifë prej 10 për qind ndaj mallrave nga Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda do të hyjë në fuqi më 1 shkurt, por mund të rritet më vonë në 25 për qind dhe të zgjasë deri në arritjen e një marrëveshjeje, njofton bbc, transmeton Sinjali.
Trump këmbëngul se territori autonom danez është jetik për sigurinë e SHBA-së dhe nuk e ka përjashtuar marrjen e tij edhe me forcë. Pas këtyre kërcënimeve, Bashkimi Evropian thirri një takim urgjent për të dielën në orën 17:00 në Bruksel (16:00 GMT). Në takim do të marrin pjesë ambasadorët e 27 vendeve anëtare të BE-së, sipas agjencisë Reuters.
Ndërkohë, mijëra persona dolën në rrugë në Grenlandë dhe Danimarkë të shtunën për të protestuar kundër planit amerikan për marrjen nën kontroll të territorit.
Grenlanda është pak e populluar, por e pasur me burime natyrore dhe pozicioni i saj mes Amerikës së Veriut dhe Arktikut e bën strategjike për sistemet e paralajmërimit të hershëm në rast sulmesh raketore dhe për monitorimin e lëvizjeve detare në rajon.
Trump ka deklaruar më herët se Uashingtoni do ta marrë territorin “në mënyrën e lehtë” ose “në mënyrën e vështirë”. Vendet evropiane janë rreshtuar në mbështetje të Danimarkës, duke argumentuar se siguria e rajonit të Arktikut duhet të jetë përgjegjësi e përbashkët e NATO-s.
Franca, Gjermania, Suedia, Norvegjia, Finlanda, Holanda dhe Mbretëria e Bashkuar kanë dërguar një numër të vogël trupash në Grenlandë në kuadër të një misioni të ashtuquajtur zbulues.
Duke shpallur tarifat e reja përmes një postimi në platformën e tij Truth Social, Trump tha se këto vende po luanin “një lojë shumë të rrezikshme”. Në rrezik, sipas tij, është “siguria dhe mbijetesa e planetit tonë”.
Ai shtoi se tarifa prej 10 për qind për mallrat e eksportuara drejt SHBA-së do të rritet në 25 për qind në qershor dhe do të mbetet në fuqi “derisa të arrihet një marrëveshje për blerjen e plotë dhe totale të Grenlandës”.
Në reagimin e tij, Starmer tha: “Vendosja e tarifave ndaj aleatëve për shkak të ndjekjes së sigurisë kolektive të NATO-s është plotësisht e gabuar. Ne do ta trajtojmë këtë çështje drejtpërdrejt me administratën amerikane”.
Edhe liderët opozitarë në Mbretërinë e Bashkuar e kritikuan njoftimin e Trump. Kryetarja e Partisë Konservatore, Kemi Badenoch, i quajti tarifat “një ide të tmerrshme”, ndërsa lideri i Reform UK, Nigel Farage, tha se ato “do të na dëmtojnë”.
Presidenti francez Emmanuel Macron deklaroi: “Kërcënimet me tarifa janë të papranueshme në këtë kontekst… Ne nuk do të ndikohemi nga asnjë formë intimidimi”.
Kryeministri suedez, Ulf Kristersson, tha: “Ne nuk do të lejojmë të shantazhohemi”. Ai shtoi se Suedia po zhvillon diskutime intensive me vendet e tjera të BE-së, Norvegjinë dhe Mbretërinë e Bashkuar për të gjetur një përgjigje të përbashkët.
Presidentja e Komisionit Evropian, Ursula von der Leyen, shkroi në X se “integriteti territorial dhe sovraniteti janë parime themelore të së drejtës ndërkombëtare”, duke paralajmëruar se tarifat do të minonin marrëdhëniet transatlantike dhe do të rrezikonin një spiralë të rrezikshme përshkallëzimi.
Shefja e politikës së jashtme të BE-së, Kaja Kallas, tha se “Kina dhe Rusia po përfitojnë nga kjo situatë”, duke shtuar se ndarjet mes aleatëve u shërbejnë vetëm atyre.
Presidenti i Këshillit Evropian, Antonio Costa, deklaroi se Bashkimi Evropian do të jetë “shumë i vendosur në mbrojtjen e së drejtës ndërkombëtare”, duke theksuar se kjo nis nga territori i shteteve anëtare të BE-së.
Ministri i Jashtëm i Danimarkës, Lars Løkke Rasmussen, tha se kërcënimi kishte ardhur “si befasi”.
Ndërkohë, eurodeputeti gjerman Manfred Weber, kreu i grupit konservator PPE në Parlamentin Evropian, tha se veprimi i Trump ngre pikëpyetje për marrëveshjen tregtare BE-SHBA, e cila ende nuk është ratifikuar.
Sipas kësaj marrëveshjeje, SHBA-ja do të vendoste tarifa prej 15 për qind ndaj mallrave të BE-së, ndërsa blloku evropian do të hapte tregjet për eksportuesit amerikanë me tarifa zero për disa produkte.
“PPE është pro marrëveshjes BE-SHBA, por për shkak të kërcënimeve të Donald Trump lidhur me Grenlandën, miratimi nuk është i mundur në këtë fazë”, shkroi Weber në X, duke shtuar se tarifat zero për produktet amerikane duhet të pezullohen.
Nga ana tjetër, ambasadori i SHBA-së në OKB, Mike Waltz, tha se Danimarka “nuk ka burimet apo kapacitetet e nevojshme” për rajonin verior, duke shtuar se jeta e banorëve të Grenlandës do të ishte “më e sigurt, më e fortë dhe më e begatë nën ombrellën e Shteteve të Bashkuara”.
Trump ka deklaruar shpesh se “tarifa” është fjala e tij e preferuar dhe e sheh atë si një mjet presioni për të detyruar vendet të përshtatin politikat e tyre sipas interesave të Shtëpisë së Bardhë.
Megjithatë, ky njoftim përfaqëson një përshkallëzim të madh të përpjekjeve të tij për të marrë Grenlandën, pavarësisht kundërshtimeve.
Nuk është e qartë se çfarë e nxiti menjëherë këtë vendim, i cili u përmend për herë të parë nga Trump të premten gjatë një deklarate për gazetarët në Shtëpinë e Bardhë.
Kjo ndodhi vetëm pak ditë pasi zyrtarë amerikanë dhe danezë ranë dakord për krijimin e një grupi të nivelit të lartë pune për të diskutuar të ardhmen e ishullit, një zhvillim që në qarqet diplomatike u pa si skenari më i mirë i mundshëm për Danimarkën dhe aleatët e saj evropianë.
Në vend të kësaj, tarifat e fundit kanë shtuar urgjencën e çështjes dhe kanë tensionuar marrëdhëniet me aleatët e NATO-s dhe partnerët tregtarë.
Gregory Meeks, demokrati më i lartë në Komitetin për Punë të Jashtme të Dhomës së Përfaqësuesve të SHBA-së, tha se do të propozojë një rezolutë për t’i dhënë fund menjëherë këtyre “tarifave të paligjshme dhe absurde”.
Ai shtoi se Trump po krijon një krizë të rreme të jashtme, ndërkohë që po injoron shqetësimin kryesor të amerikanëve: koston e jetesës.
Sipas sondazheve, 85 për qind e banorëve të Grenlandës kundërshtojnë bashkimin me SHBA-në.
Protesta kundër planeve të Trump u mbajtën të shtunën në qytete daneze dhe në kryeqytetin e Grenlandës, Nuuk, ku u panë pankarta me mbishkrimet “Duart larg Grenlandës” dhe “Grenlanda për grenlandezët”.
Kompania Google ka prezantuar një funksion të ri në versionin beta të aplikacionit të saj të inteligjencës artificiale, Gemini, të quajtur “Personal Intelligence”.
Ky funksion i ri synon të ndryshojë mënyrën se si inteligjenca artificiale ndihmon përdoruesit në detyrat e përditshme, duke ofruar përgjigje më të personalizuara dhe më kontekstuale. Përmes tij, përdoruesit mund të lidhin disa nga shërbimet e Google-it, si Gmail, Google Photos, Search dhe YouTube, në mënyrë që Gemini të ketë qasje të sigurt në disa të dhëna personale.
Falë kësaj qasjeje, në vend që të japë vetëm informacion të përgjithshëm, Gemini mund të “kuptojë” kontekstin nga emailet, fotot apo kërkimet e mëparshme dhe të sugjerojë zgjidhje më të sakta, të përshtatura për situata specifike të përdoruesit.
Google bën të ditur se funksioni “Personal Intelligence” është i fikur si parazgjedhje dhe se përdoruesit vendosin vetë se cilat aplikacione duan t’i lidhin me Gemini. Kompania thekson se privatësia është në qendër të këtij sistemi, pasi të dhënat mbeten nën kontrollin e përdoruesit dhe përdoren vetëm pasi ai të ketë dhënë leje.
Aktualisht, “Personal Intelligence” është i disponueshëm vetëm në versionin beta në Shtetet e Bashkuara të Amerikës, kryesisht për abonentët e paketave Google AI Pro dhe AI Ultra. Megjithatë, Google ka paralajmëruar se ka plane për ta zgjeruar këtë funksion edhe në vende të tjera, si dhe për përdoruesit falas në muajt e ardhshëm.
Me këtë risi, Google synon të bëjë një hap përpara në konkurrencë me sistemet e tjera të inteligjencës artificiale, duke shfrytëzuar ekosistemin e vet të shërbimeve të ndërlidhura.
Sot parashikohet që vranësirat e ulëta të jenë të pranishme deri në orët e mëngjesit, ndërsa gjatë orëve vijuese të ditës pritet të tërhiqen. Në jug të vendit, vranësirat mund të mbeten deri vonë pasdite ose në mbrëmje.
Era do të fryjë nga veriu dhe lindja me shpejtësi prej 10-33 km/h, njofton MeteoKosova, transmeton Sinjali.
Temperaturat do të pësojnë ulje të mëtejshme, me minimale që do të lëvizin prej -5 deri në 0°C, ndërsa ato maksimale prej 1 deri në 6°C.
Florjan Alla, i njohur në rrjetet sociale si Flori, është larguar me vetëdëshirë nga Big Brother VIP Albania 5, vetëm pak ditë pasi kishte nisur aventurën e tij në shtëpinë më të famshme në vend.
Vendimi i tij i papritur ka surprizuar publikun dhe banorët, duke u shoqëruar me shumë pikëpyetje mbi arsyet e largimit.
Sipas asaj që u bë e ditur gjatë spektaklit, shkak për ndërprerjen e garës ka qenë gjendja shëndetësore e djalit të tij.
Flori u thirr në Dhomën e Rrëfimit, ku mori një telefonatë nga vëllai i tij, i cili e informoi se situata nuk ishte serioze nga ana shëndetësore, por se familja po e përjetonte rëndë mungesën e tij dhe nuk ishte mësuar me largimin e tij për një periudhë kaq të gjatë.
Edhe pse lajmi nuk kishte të bënte me një emergjencë shëndetësore, emocioni dhe përgjegjësia familjare duket se kanë qenë vendimtare për Florin, i cili zgjodhi të largohej nga loja për të qenë pranë familjes dhe fëmijës së tij.
Vendimi i tij u prit me mirëkuptim nga publiku, i cili në rrjete sociale shprehu mbështetje për këtë zgjedhje personale. /Telegrafi/
Rizoto me pulë është një nga ato gatime që bashkon përbërës të thjeshtë me një shije të pasur dhe të plotë. Përgatitet ngadalë, duke u përzier vazhdimisht, gjë që i jep teksturën e veçantë kremoze dhe e kthen në një ushqim që sjell rehati të vërtetë.
Është zgjedhje ideale si për një drekë të shpejtë familjare, ashtu edhe për një darkë elegante, sepse me pak kujdes dhe teknikën e duhur gjithmonë lë përshtypjen e kuzhinës shtëpiake me një dozë sharmi italian, transmeton Telegrafi.
Informacione bazë
Lloji i gatimit: Pjatë kryesore / Drekë / Darkë Koha e përgatitjes: 10–15 minuta Koha e gatimit: 25–30 minuta Vështirësia e përgatitjes: Mesatare – e lehtë
Përbërësit
200 g oriz
200 g mish pule (fileto), i prerë në kube
1 qepë e vogël, e grirë imët
1 gotë verë e bardhë
600–700 ml lëng pule i nxehtë (bujon)
1 lugë gjelle gjalpë
2 lugë gjelle vaj ulliri
kripë dhe piper sipas shijes
40–50 g parmixhan i grirë
majdanoz i freskët (opsional
Përgatitja
1. Përgatitja e lëngut të pulës Në një tenxhere të veçantë ngrohni lëngun e pulës dhe mbajeni gjithmonë të nxehtë – ky është çelësi për një rizoto të mirë.
2. Kaurrdisja e qepës Në një tenxhere të gjerë dhe të cekët ngrohni vajin e ullirit dhe gjysmën e gjalpit. Shtoni qepën dhe kaurrdiseni në zjarr mesatar derisa të bëhet transparente (nuk duhet të marrë ngjyrë).
3. Mishi i pulës Shtoni mishin e pulës dhe kaurdiseni 5–7 minuta, derisa të marrë lehtë ngjyrë dhe të lëshojë lëngun. Kriposeni dhe piperoseni.
4. Orizi Shtoni orizin (mos e lani!) dhe skuqeni lehtë 1–2 minuta duke e përzier vazhdimisht, që çdo kokërr të vishet me yndyrë.
5. Vera e bardhë Hidhni verën dhe përzieni derisa alkooli të avullojë, duke lënë vetëm aromën e këndshme.
6. Shtimi gradual i bujonit Shtoni një garuzhde me bujon të nxehtë dhe përzieni derisa orizi ta përthithë lëngun. Vazhdoni kështu, garuzhde pas garuzhde, duke përzier vazhdimisht.
7. Gatimi deri në perfeksion Pas 18–22 minutash, orizi duhet të jetë kremoz, por në qendër pak i fortë.
8. Finalizimi Hiqeni nga zjarri. Përzieni gjalpin e mbetur dhe parmixhanin. Provojeni dhe, nëse është e nevojshme, rregulloni shijen.
Sekrete të vogla për rizoton perfekte
Mos e lani orizin – niseshteja i jep teksturën kremoze
Përzieni shpesh, por me kujdes
Rizoto duhet të jetë e lëngshme dhe kremoze, jo e thatë dhe jo si qull
Aktivisti politik në Serbi, Miodrag Kapor, ka nxitur tensione gjatë protestës së mbajtur të shtunën në Novi-Sad, pasi ka shpalosur flamurin kombëtar shqiptar mes turmës së protestuesve.
Sapo flamuri u pa nga pjesëmarrësit në protestë, situata u tensionua, duke rezultuar në shtyrje dhe fyerje verbale ndaj Kaporit, i cili më pas u nxor me dhunë nga turma.
“Ai e solli flamurin shqiptar këtu për t’u tallur me ne”, citohet të ketë thënë një nga protestuesit.
Pas incidentit, Kapor ka deklaruar se ka dhënë dëshmi në Polici, duke sqaruar se me vete kishte pasur edhe një flamur kroat.
“I solla një flamur të Shqipërisë dhe një të Kroacisë. Dua të jem i qartë: këta flamuj janë simbole zyrtare të njohura nga Këshillat e Komuniteteve në Serbi. I solla sepse studentët kanë thënë se këta janë flamujt që mund të sillen në protesta”, ka deklaruar Kapor.
Ai shtoi se qëllimi i tij ishte rritja e tolerancës dhe unitetit mes protestuesve.
“Siç e kemi parë edhe më herët, flamuri boshnjak shfaqet rregullisht në protesta. I sollëm këta dy flamuj për të promovuar tolerancën, në mënyrë që të gjithë të jemi bashkë në këtë luftë”, theksoi ai.
Protesta në Novi-Sad u mbajt nga studentët dhe qytetarët që vazhdojnë të kërkojnë drejtësi për vdekjen e 16 personave, të cilët humbën jetën vitin e kaluar si pasojë e shembjes së një strehe në stacionin e trenit.
Demonstratat janë shndërruar në simbol të pakënaqësisë qytetare ndaj institucioneve, duke kërkuar përgjegjësi dhe transparencë për ngjarjen tragjike.
Kryeministri në detyrë Albin Kurti e ka përkujtuar përvjetorin e vrasjes së Smajl Hajdarajt, ish-deputetit të Kuvendit të Kosovës dhe veteranit të Ushtrisë Çlirimtare të Kosovës (UÇK).
Në 24-vjetorin e vrasjes së Hajdarajt, kryeministri Kurti thotë se atë e qëlluan dhe e vranë afër banesës së tij në Pejë, persona të panjohur të urdhëruar nga qarqe të tjera të panjohura.
“Edhe pas 24 vitesh, institucionet e drejtësisë nuk e kanë zbardhur rastin e tij. Lidhjet e mundshme dhe të dyshuara të kësaj vrasje me të tjera atentate në ato vite të para pas luftës në Kosovë, kanë lënë të kuptohen motivet politike dhe përçarëse të planifikuesve dhe ekzekutorëve të vrasjes së Smajl Hajdarajt.” – ka shkruar Kurti në Facebook.
Kurti ka kujtuar po ashtu se Smajl Hajdaraj ishte zgjedhur deputet i Kuvendit të Kosovës në zgjedhjet e para parlamentare pas luftës, ndërsa ishte një profesor i matematikës i cili si i përjashtuar nga sistemi arsimor prej regjimit serb më 1990, ishte angazhuar politikisht në partinë Lidhja Demokratike e Kosovës.
“Më 1998, ai iu bashkua Ushtrisë Çlirimtare të Kosovës, duke u caktuar më pas komandant i shtabit rajonal për Rugovë. Pas çlirimit të Kosovës në qershor të vitit 1999, Smajl Hajdaraj iu rikthye punës në sistemin arsimor dhe angazhimit të tij politik. Ai ishte njëri nga deputetët e zgjedhur të legjislaturës së parë të Kuvendit të Kosovës, por shërbimi i tij u ndërpre dhunshëm nga atenati ndaj tij.” – ka shtuar Kurti.
Kurti ka theksuar se vrasjet e motivuara politikisht dhe vrasjet e aktivistëve politikë dhe veteranëve të Ushtrisë Çlirimtare të Kosovës, nuk janë krime ordinere, por goditje në jetën politike të Kosovës dhe në ecurinë e shtetndërtimit të Republikës së Kosovës.
“Andaj mbetet shumë me rëndësi zbardhja e plotë e këtyre vrasjeve, si vënie e drejtësisë për viktimat, për familjarët, për bashkëveprimtarët dhe për mbarë shoqërinë e popullin tonë.” – ka thënë ai.
Komanda Qendrore e SHBA-së (CENTCOM) njoftoi të shtunën se një udhëheqës i lidhur me al-Kaedën, i cili kishte lidhje të drejtpërdrejta me një terrorist të ISIS-it përgjegjës për vrasjen e dy anëtarëve të shërbimit amerikan dhe një përkthyesi amerikan më 13 dhjetor, u vra në një sulm amerikan në veriperëndim të Sirisë të premten.
Zyrtarët e CENTCOM thanë se Bilal Hasan al-Jasim ishte një udhëheqës terrorist me përvojë i cili komplotoi sulme dhe ishte “i lidhur drejtpërdrejt” me personin e armatosur të ISIS-it i cili vrau dhe plagosi personelin amerikan dhe sirian muajin e kaluar në Palmyra, Siri, raporton Fox News.
“Vdekja e një operativi terrorist të lidhur me vdekjen e tre amerikanëve tregon vendosmërinë tonë në ndjekjen e terroristëve që sulmojnë forcat tona”, tha komandanti i CENTCOM-it, Admirali Brad Cooper. “Nuk ka vend të sigurt për ata që kryejnë, komplotojnë ose frymëzojnë sulme ndaj qytetarëve amerikanë dhe luftëtarëve tanë. Ne do t’ju gjejmë.”
Operacioni Hawkeye Strike rezultoi në goditjen e më shumë se 100 objektivave të infrastrukturës dhe vendeve të armëve të ISIS-it nga forcat amerikane dhe partnere me mbi 200 municione precize.
Më shumë se 300 operativë të ISIS-it u kapën dhe më shumë se 20 u vranë në të gjithë Sirinë brenda vitit të kaluar, sipas CENTCOM.
I Dërguari Special i SHBA-së për Sirinë, Tom Barrack, u takua me Presidentin sirian Ahmed al-Sharaa, Ministrin e Jashtëm Asaad al-Shaibani dhe anëtarët e ekipit të tyre në Damask më 10 janar për të diskutuar zhvillimet e fundit në Aleppo dhe rrugën më të gjerë përpara për tranzicionin historik të Sirisë.
Në një deklaratë për X, Barrack tha se Presidenti Donald Trump ra dakord të heqë sanksionet në mënyrë që “t’i japë Sirisë një shans” për të ecur përpara.
“Qeveria e Shteteve të Bashkuara mirëpret tranzicionin historik të Sirisë dhe i ofron mbështetjen e saj qeverisë siriane nën Presidentin Ahmed al-Sharaa ndërsa ajo punon për të stabilizuar vendin, për të rindërtuar institucionet kombëtare dhe për të përmbushur aspiratat e të gjithë sirianëve për paqe, siguri dhe prosperitet”, shkroi Barrack në postim.
Ai shtoi se qeveria siriane ka riafirmuar angazhimin e saj ndaj marrëveshjes së integrimit të marsit 2025 me Forcat Demokratike Siriane (SDF), por i quajti zhvillimet në Aleppo që “duket se sfidojnë kushtet e kësaj marrëveshjeje”, thellësisht shqetësuese.
“Ne i nxisim të gjitha palët të ushtrojnë përmbajtje maksimale, të ndërpresin menjëherë armiqësitë dhe të kthehen në dialog në përputhje me marrëveshjet e 10 marsit dhe 1 prillit 2025 midis qeverisë siriane dhe SDF-së”, shkroi Barrack. “Dhuna rrezikon të minojë progresin e arritur që nga rënia e regjimit të Asadit dhe fton ndërhyrje të jashtme që nuk i shërbejnë interesave të asnjë pale. … Objektivi mbetet një Siri sovrane dhe e bashkuar – në paqe me veten dhe fqinjët e saj – ku barazia, drejtësia dhe mundësitë u ofrohen të gjithë njerëzve të saj.”
Ambasadorët e Bashkimit Evropian janë thirrur për një takim emergjent në Bruksel.
Kjo vjen në një kohë kur vendet evropiane po diskutojnë se si të përgjigjen ndaj kërcënimit të Donald Trump për tarifa lidhur me Groenlandën, raportonSky News.
Tre diplomatë të BE-së i kanë thënë Reuters-it se bisedimet do të zhvillohen nesër.
Aktivisti politik në Serbi, Miodrag Kapor, ka nxitur tensione në protestën e mbajtur të shtunën në Novi-Sad duke e shpalosur flamurin kombëtar shqiptar.
Sapo që turma e kishte parë, aty nisën shtyrjet e fyerjet. Kapor menjëherë u nxor nga turma me dhunë.
“Ai e solli flamurin shqiptar këtu që të tallet me ne”, tha një nga protestuesit, sipas gazetës serbe “blic”.
Pas ngjarjes, Kapor ka thënë se ka dhënë deklaratë në Polici. Siç ka thënë ai, me vete e ka pasur edhe një flamur kroat.
“I solla një flamur të Shqipërisë dhe një të Kroacisë. Të qartësohem, këta flamuj janë simbole zyrtare të njohura nga Këshillat e Komuniteteve në Serbi. I solla sepse studentët kanë thënë se janë pikërisht këta flamuj që mund të sillen në protesta. Siç e kemi parë rregullisht, flamuri boshnjak shfaqet në protesta. I sollëm këta dy flamuj për të rritur tolerancën, ashtu që të gjithë të jemi bashkë në këtë luftë”, ka thënë ai.
Në Novi-Sad u protestua sërish nga studentët që vazhdojnë të kërkojnë drejtësi për vdekjen e 16 personave vitin e shkuar nga rënia e një strehe të një stacioni të trenit.
Ministri i Jashtëm i Danimarkës, Lars Løkke Rasmussen, tha se paralajmërimi i presidentit amerikan Donald Trump për tarifa ndaj vendeve që dërgojnë trupa në Groenlandë ishte “një surprizë”.
Rasmussen sapo kishte kthyer nga Uashingtoni, ku gjatë javës zhvilloi një takim me sekretarin e Shtetit, Marco Rubio, dhe zëvendëspresidentin JD Vance për të diskutuar çështjet e Groenlandës. Ai theksoi se takimi ishte konstruktiv dhe se qëllimi i pranisë ushtarake në Groenlandë është për të forcuar sigurinë në Arktik.
“Qëllimi i pranisë së shtuar ushtarake në Groenlandë, të cilës i referohet Presidenti, është rritja e sigurisë në Arktik.
Ne pajtohemi me SHBA-në që duhet të bëjmë më shumë, pasi Arktiku nuk është më një zonë me tension të ulët. Pikërisht për këtë arsye ne dhe partnerët e NATO-s po rrisim praninë në mënyrë të plotë dhe transparente me aleatët tanë amerikanë,” shtoi Rasmussen.
Deklarata e tij vjen pas përshkallëzimit të tensioneve mbi sovranitetin e Groenlandës dhe paralajmërimeve për vendosjen e tarifave nga Trump.
Në një veprim kryesisht të pazakontë, udhëheqësja e opozitës venezueliane, Maria Corina Machado, ia dorëzoi medaljen e saj të Çmimit Nobel për Paqen presidentit të SHBA-së, Donald Trump, në Shtëpinë e Bardhë të enjten, në atë që ajo e quajti "njohje për angazhimin e tij unik ndaj lirisë".
Machado u vlerësua me Çmimin Nobel për Paqen për vitin 2025 për udhëheqjen e saj të lëvizjes opozitare të Venezuelës mes një shtypjeje nga Nicolas Maduro, veçanërisht në zgjedhjet presidenciale shumë të përfolura të vitit 2023 në vendin e Amerikës së Jugut.
Ndërkohë, Trump urdhëroi një operacion të shpejtë ushtarak amerikan më 3 janar që rezultoi në kapjen e Maduros.
Ish-udhëheqësi venezuelian dhe bashkëshortja e tij tani përballen me akuza të lidhura me trafikimin e drogës në New York.
"I dorëzova presidentit të Shteteve të Bashkuara medaljen, Çmimin Nobel për Paqen", u tha Machado gazetarëve ndërsa po largohej nga Shtëpia e Bardhë të enjten.
Trump konfirmoi në rrjete sociale se Machado ia kishte lënë medaljen për ta mbajtur, dhe tha se ishte një nder që e takoi atë.
“Ajo është një grua e mrekullueshme që ka kaluar kaq shumë. Maria më dha Çmimin e saj Nobel për Paqen për punën që kam bërë”, tha Trump.
“Një gjest kaq i mrekullueshëm respekti të ndërsjellë. Faleminderit Maria”, shtoi ajo.
Edhe pse gjesti i Machados shënon një rast të rrallë të një laureati të gjallë që ndahet nga medalja e tij menjëherë pasi e ka marrë atë, nuk është i pashembullt dhe rregullat thonë se Machado mund ta dhurojë medaljen e saj të vërtetë, por jo vetë nderin.
Statutet e Fondacionit Nobel dhe testamenti i Alfred Nobelit — të cilat diktojnë meritat që duhet të kenë fituesit e çmimit — përcaktojnë se titulli i fituesit i përket personalisht individit dhe nuk mund të ndahet ose t’i caktohet ligjërisht një personi tjetër.
Medalja ose diploma e shoqëruar mund të jepet fizikisht, të shitet ose të nxirret në ankand, por kjo nuk ia jep titullin e çmimit askujt tjetër.
Disa laureatë të tjerë të Çmimit Nobel kanë dhuruar ose shitur më parë medaljet e tyre, megjithëse rrethanat dhe motivimet ndryshonin.
Ankand për refugjatët ukrainas
Gazetari rus Dmitry Muratov, i cili fitoi Çmimin Nobel për Paqen në vitin 2021 — së bashku me Maria Ressa nga Filipinet — për përpjekjet e tij për të mbrojtur lirinë e shprehjes në Rusi, e nxori në ankand medaljen e tij në qershor 2022 për një shumë rekord prej 103.5 milionë dollarësh (89.1 milionë euro).
Të gjitha të ardhurat nga shitja e mbajtur në Heritage Auctions në New York për një blerës anonim u dhuruan për fondin e UNICEF-it për fëmijët refugjatë ukrainas pas agresionit rus në Ukrainë.
Ankandi erdhi vetëm disa muaj pasi Rusia nisi agresionin në Ukrainë në shkurt të vitit 2022.
Mbledhja e fondeve gjatë luftës dhe gjestet famëkeqe
Në ditët e para të Luftës së Dytë Botërore, medaljet Nobel që u përkisnin fizikantëve danezë Niels Bohr dhe August Krogh, të cilët fituan përkatësisht në vitet 1922 dhe 1920, u shitën në ankand për të mbledhur fonde për ndihmën civile finlandeze gjatë Luftës së Dimrit midis Finlandës dhe Bashkimit Sovjetik në vitet 1939-1940.
Medaljet u dhuruan më vonë muzeve në Danimarkë.
Gjatë Luftës së Dytë Botërore, fizikantët gjermanë Max von Laue dhe James Franck, të dy laureatë të Çmimit Nobel, i dhanë medaljet e tyre Niels Bohrit ndërsa Gjermania naziste pushtoi vendet e tyre.
Për të parandaluar që medaljet të binin në duart e nazistëve, kimisti hungarez George de Hevesy, i cili punonte në laboratorin e Bohrit, i treti ato në acid.
Pas luftës, ari u gjet dhe Fondacioni Nobel i rimodeloi medaljet, të cilat iu kthyen familjes së von Laue dhe Franck.
Megjithatë, jo të gjitha historitë rreth medaljeve të Çmimit Nobel janë pozitive, dhe disa nga zgjedhjet e bëra nga laureatët ishin mjaft të diskutueshme.
Autori norvegjez Knut Hamsun, i cili fitoi Çmimin Nobel në Letërsi në vitin 1920, thuhet se ia dha medaljen e tij Ministrit të Propagandës të Gjermanisë naziste, Joseph Goebbels, gjatë Luftës së Dytë Botërore.
Hamsun, i cili u takua me Adolf Hitlerin dhe Goebbelsin në vitin 1943, ishte një simpatizant i nazistëve që mbështeti pushtimin gjerman të Norvegjisë.
Të dhënat historike tregojnë se ai ia dha medaljen e tij Nobel Goebbelsit si një gjest simbolik mbështetjeje.
Reputacioni i Hamsunit u shkatërrua pas luftës, megjithëse veprat e tij letrare vazhdojnë të studiohen.
Rasti i James Watson
James D Watson shiti medaljen e tij mes polemikave në shtëpinë e ankandeve Christie's në dhjetor 2014 për rreth 4.8 milionë dollarë (4.13 milionë euro).
Watson, i cili fitoi Çmimin Nobel në Fiziologji ose Mjekësi në vitin 1962 së bashku me Francis Crick dhe Maurice Wilkins për zbulimin e strukturës së ADN-së, tha se të ardhurat do të mbështesin institucionet kërkimore shkencore dhe kauzat e ruajtjes së natyrës.
Ai u bë laureati i parë i gjallë i Çmimit Nobel që shiti medaljen e tij, shkruan euronews.
Miliarderi rus Alisher Usmanov bleu medaljen vetëm për t'ia kthyer Watson në një ceremoni zyrtare në Moskë në vitin 2015, duke thënë se shkencëtari "e meritonte" ta kishte atë.
Vendimi i Watson për ta shitur erdhi mes vështirësive financiare dhe pas deklaratave kontroverse në lidhje me racën dhe inteligjencën, veçanërisht në lidhje me njerëzit me trashëgimi afrikane, të cilat dëmtuan reputacionin e tij dhe çuan në largimin e tij nga Laboratori Cold Spring Harbor, ku ai kishte shërbyer si kancelar.
Laboratori ia hoqi Watsonit titujt e tij dhe ia preu të gjitha lidhjet me të në vitin 2019.
Watson fillimisht kërkoi falje për vërejtjet e tij, por më vonë tha se pikëpamjet e tij mbetën të pandryshuara.
BE-ja i vendosi sanksione Usmanovit në vitin 2022, duke i vendosur një ndalim udhëtimi në të gjithë bllokun dhe duke i ngrirë të gjitha asetet për shkak të lidhjeve të tij me presidentin rus Vladimir Putin dhe qeverinë e tij.
Watson gëzonte lidhje të ngushta me Rusinë në fund të karrierës së tij.
Medalja e Çmimit Nobel të Crick, e fituar së bashku me Watson dhe Crick, u shit gjithashtu në Heritage Auctions në vitin 2013 për 2.27 milionë dollarë (1.95 milionë euro).
Një pjesë e të ardhurave nga shitja iu dhurua Institutit Francis Crick në Londër.
Medalja e Çmimit Nobel për Paqen e Norman Angell nga viti 1933, e fituar për promovimin e mirëkuptimit ndërkombëtar, u shit në Sotheby's në vitin 1983. Medalja tani mbahet nga Muzeu Imperial i Luftës në Londër.
Medalja e Aage Bohr, i cili fitoi Çmimin Nobel në Fizikë në vitin 1975, u shit në ankand në vitin 2011 dhe përsëri në vitin 2019. Bohr ishte djali i Niels Bohr, i cili fitoi Çmimin Nobel në Fizikë në vitin 1922.
Donacione me para çmimesh
Disa laureatë i kanë dhuruar paratë e çmimit Nobel në vend që të ndahen nga medaljet e tyre.
Albert Einstein i cili fitoi Çmimin Nobel në Fizikë në vitin 1921, ia la paratë e çmimit gruas së tij të parë Mileva Maric dhe fëmijëve të tyre sipas një marrëveshjeje divorci të paracaktuar.
Marrëveshja u bë përpara se Einstein të fitonte çmimin.
Në vitin 1979, laureatja e Çmimit të Paqes, shqiptare e lindur në Maqedoni, Nënë Tereza, kërkoi që eventi tradicional i Nobelit të anulohej dhe që fondet, së bashku me paratë e çmimit, t'u dhuroheshin drejtpërdrejt të varfërve.
Paul Greengard, i cili fitoi Çmimin Nobel në Fiziologji ose Mjekësi në vitin 2000, dhuroi të gjitha fitimet e tij nga çmimi për të themeluar Çmimin Pearl Meister Greengard, një çmim vjetor që mbështet shkencëtaret gra.
Gunter Blobel, i cili fitoi Çmimin Nobel në Fiziologji ose Mjekësi në vitin 1999, i dhuroi paratë e çmimit të tij për projektet e restaurimit për Dresdenin dhe për ndërtimin e një sinagoge në qytetin e tij të lindjes.
E Donnall Thomas, i cili fitoi Çmimin Nobel në Fiziologji ose Mjekësi në vitin 1990, i dhuroi paratë e çmimit qendrës së tij kërkimore për të mbështetur punën e vazhdueshme në transplantimin e palcës së kockave.
Çmimi Nobel aktualisht përfshin një shpërblim monetar prej 11 milionë kronash suedeze (rreth 1 milion euro), megjithëse shuma ka ndryshuar gjatë dekadave. /Telegrafi/
Trajneri Alvaro Arbeloa nuk ka hezituar të bëjë një deklaratë të fortë pas fitores 2-0 të Real Madridit ndaj Levantes, duke zbuluar publikisht se cilët janë liderët e skuadrës së tij.
Trajneri madrilen vuri në qendër katër emra kryesorë të ekipit, për të cilët tha se japin gjithçka për klubin madrilen.
“Jude Bellingham është një nga liderët, ashtu si Mbappe, Vini Jr. dhe Valverde”.
“Janë lojtarë të destinuar të bëjnë gjëra të mëdha te Real Madridi. Janë katër nga lojtarët më të mirë në botë dhe liderët e këtij ekipi”.
“Janë futbollistët te të cilët duhet të mbështetesh gjithmonë kur gjërat nuk shkojnë mirë”.
“Do të përpiqem të punoj me ta për të nxjerrë më të mirën e tyre, për t’i bërë të lumtur, për t’i bërë ta shijojnë lojën dhe për t’u siguruar që do të qëndrojnë te Real Madridi për të fituar shumë tituj, sepse këtë e meritojnë dhe sepse e kanë cilësinë për ta bërë”, deklaroi Arbeloa.
Fillimi i Arbeloas në stolin e “Los Blancos” nuk ishte ideal, pasi debutimi i tij erdhi me një eliminim surprizë në Kupë ndaj Albacetes. Megjithatë, ndeshja e parë në La Liga nisi me fitore dhe trajneri spanjoll shpreson të vazhdojë në këtë ritëm.
Ajo që ka rënë në sy është fakti se Arbeloa nuk e përmendi Dani Carvajalin mes liderëve të ekipit, pavarësisht rolit të rëndësishëm dhe eksperiencës së mbrojtësit në dhomat e zhveshjes./Telegrafi
Kur mungon interesimi, ndershmëria dhe vizioni për të ardhmen, lidhja nuk ka shanse të zgjasë
Nëse në fillim të lidhjes e kapni veten duke arsyetuar vazhdimisht sjelljen e dikujt, në vend që të ndiheni të qetë dhe të sigurt, kjo zakonisht nuk është një fazë, por një sinjal. Një lidhje e shëndetshme nuk kërkon shpjegime, arsyetime dhe negociata të brendshme me vetveten. Pikërisht disa modele sjelljeje përsëriten shpesh te burrat që, në plan afatgjatë, kanë një jetë dashurie të keqe ose krejtësisht të munguar.
Në vijim janë shtatë zakone që përsëriten më shpesh te këta burra, sipas analizave popullore-psikologjike dhe teksteve të portalit YourTango, përcjell Telegrafi.
Nuk u intereson si ju ka shkuar dita Nëse kurrë nuk ju pyesin si jeni, si ju ka shkuar puna apo çfarë ju shqetëson, por çdo bisedë e kthejnë tek vetja, kjo flet për mungesë serioze interesi. Studimet tregojnë se lidhjet mbijetojnë vetëm kur të dyja palët investojnë përafërsisht të njëjtin përpjekje. Kur ky ekuilibër prishet, marrëdhënia dobësohet ngadalë, por me siguri.
Gënjejnë shpesh, madje edhe për gjëra të vogla Gënjeshtrat e vogla nuk janë të padëmshme. Këshilltari Alan Roger Currie shpjegon se burrat shpesh gënjejnë sepse besojnë se kështu mbrohen ose ruajnë një imazh të idealizuar për veten. Problemi është se gënjeshtra, me kalimin e kohës, e minon besimin dhe krijon një marrëdhënie ku e vërteta është gjithmonë në pikëpyetje.
Kurrë nuk shprehin ndjenjat Mbyllja emocionale nuk do të thotë forcë. Kur një burrë nuk i ndan mendimet, ndjenjat apo frikërat e tij, mes partnerëve krijohet distancë. Afërsia pa komunikim të hapur thjesht nuk mund të ndërtohet, sado që pala tjetër të përpiqet ta “kuptojë”.
Nxjerrin më të keqen nga ju Nëse pranë dikujt bëheni xhelozë, nervozë, të pasigurt ose vazhdimisht në prag konflikti, kjo nuk është rastësi. Sjellje të tilla shpesh fillojnë në mënyrë subtile, përmes komenteve dhe veprimeve të vogla, por me kohën grumbullohen dhe e dëmtojnë seriozisht marrëdhënien.
Gjithmonë kanë një arsyetim Shtyrja e vazhdueshme e takimeve, planeve dhe marrëveshjeve me justifikime të pafundme zakonisht do të thotë një gjë: mungesë e përkushtimit të vërtetë. Një lidhje e shëndetshme kërkon kohë, prani dhe gatishmëri për të dalë nga zona e rehatisë. Pa këto, marrëdhënia mbetet në vendnumëro.
Sjellin më shumë ditë të këqija sesa të mira Nëse lidhja prodhon më shumë stres sesa gëzim, ky është një alarm i qartë. Këshilltarja Janet Ong Zimmerman thekson se qëndrimi në një marrëdhënie të keqe nuk e bën ndarjen më të lehtë, por vetëm e thellon dëmin emocional. Injorimi i realitetit shpesh e zgjat vuajtjen.
Nuk planifikojnë një të ardhme të përbashkët Mungesa e çdo vizioni për një të nesërme të përbashkët është një shenjë e fortë se marrëdhënia nuk ka themele. Investimi emocional në një lidhje pa perspektivë pothuajse gjithmonë çon në zhgënjim shtesë. Njohja e këtij momenti, sado e dhimbshme, shpesh sjell lehtësim afatgjatë.
Përfundimi është mjaft i qartë dhe aspak romantik. Burrat që i përsërisin këto modele sjelljeje zakonisht nuk mbeten vetëm sepse nuk kanë fat në dashuri, por sepse kurrë nuk e kanë ndryshuar mënyrën se si hyjnë në marrëdhënie. /Telegrafi/
Vëllezërit Bakaj, më saktësisht Roberto dhe Amarildo e kanë ruajtur rekordin si të pamposhtur në boks, duke shënuar fitore kundër kolumbianit Brayan Santander dhe italianit Francesco Morandi.
Fillimisht në mbrëmjen e boksit, Roberto Bakaj arriti fitore spektakulare ndaj kolumbianit Brayan Santander në “BBC Arena”.
Bakaj ishte larg më i mirë thuajse në secilin ring, duke e dominuarn në çdo aspekt kundërshtarin, kësisoj siç pritej edhe gjyqtarët ia dhanë fitoren.
Roberto Bakaj vazhdon me rekordin perfekt, pra plot 16 fitore në po aq meçe të zhvilluara.
E nata pastaj veçse u bë edhe më e mirë për të gjithë tifozët shqiptarë, sidomos ata që ishin në arena, kur vëllau i Robertos, Amarildo e rrahu italianin Francesco Morandi, i cili e kishte ngacmuar që sa kohë.
Si Roberto, ashtu edhe Amarildo ishte larg më e mirë duke e gjakosur italianin në raundin e pestë.
Me vendim të gjyqtarëve, Amarildo e regjistroi fitoren e 15-të në karrierë, po në aq meçe. Pas ndeshjes, edhe vetë Morandi e përgëzoi duke e ngritur para tifozëve.
Kësisoj, vëllezërit Bakaj vazhdon me rekordin e mrekullueshëm ndërsa në të ardhmen e afërt synojnë tituj të botës./Telegrafi/
Kur janë rinumëruar gati gjysma e kutive të votimit nga 914 që janë dërguar për verifikim, janë vërejtur ndryshime të dukshme në votat e kandidatëve për deputetë.
Nga tri partitë më të votuara në zgjedhjet e parakohshme parlamentare të 28 dhjetorit, Partia Demokratike e Kosovës (PDK) shfaq më së shumti ndryshime në votat për kandidatët pas nisjes së rinumërimit të pjesshëm, raporton Telegrafi.
Në shumicën e rasteve, kandidatëve të caktuar u janë shtuar vota në masë të madhe, derisa pas rinumërimit ka pasur edhe kandidatë të dëmtuar me mbi 500 vota.
PDK– Kandidatëve që më së shumti iu hoqën vota pas rinumërimit
Fetah Paçarizi: -4,416 vota
Nait Hasani: -2,416
Kujtim Gashi: -1,710
Arianit Çollaku: -1,434
PDK– Kandidatëve që më së shumti iu rikthyen votat nga KQZ pas rinumërimit
Uran Ismaili: +531 vota
Arian Tahiri: +464
Përparim Gruda: +379
Vlora Çitaku: +353
LDK– Kandidatëve që më së shumti iu hoqën vota pas rinumërimit
Xhavit Uka: -1,105 vota
Driton Selmanaj: -773
Anton Quni: -440
Visar Azemi: -352
LDK– Kandidatëve që më së shumti iu rikthyen votat nga KQZ pas rinumërimit
Paris Guri: +150 vota
Gëzim Hazrolli: +112
Festim Kabashi: +89
Ukë Rugova: +82
LVV– Kandidatëve që më së shumti iu hoqën vota pas rinumërimit
Arbër Rexhaj: -457 vota
Rea Krasniqi: -425
Valon Ramadani: -380
Dafina Alishani: -310
LVV– Kandidatëve që më së shumti iu rikthyen votat nga KQZ pas rinumërimit
Hajrulla Çeku: +111 vota
Alban Bajrami: +91
Driton Hyseni: +74
Hekuran Murati: +68
Procesi i rinumërimit pritet të vazhdojë edhe në ditët në vijim, ndërsa KQZ-ja ka bërë të ditur se rezultatet përfundimtare do të publikohen vetëm pas përfundimit të plotë të verifikimit të të gjitha vendvotimeve të përfshira në këtë proces./Telegrafi/
Login
