TIRANË, 14 dhjetor/ATSH/ Ministri i Bujqësisë dhe Zhvillimit Rural, Andis Salla solli sot në rrjete sociale shembullin e suksesshëm të një të riu, që u kthye nga emigracioni në vendlindjen e tij për të ndërtuar një fermë moderne.

Fatjon Ukaj, 31 vjeç thotë se ka jetuar në shtete të ndryshme të Evropës, por nisur nga thirrja e Kryeministrit Rama për nismën “Paketa e Maleve”, vendosi të rikthehet në fshatin Selixë të Burrelit për t’iu përkushtuar blegtorisë, me synimin që së shpejti të ndërtojë edhe disa bujtina druri.

I riu ka ndërtuar një fermë moderne me rreth 480 dhi autoktone të Hasit dhe synon zgjerimin e tufës deri në 1 000 krerë, si dhe mbylljen e plotë të ciklit të prodhimit, duke besuar te potenciali i zonës malore dhe i vendlindjes së tij.

“Si fillim, gjithçka u nis para katër vitesh nga familja, duke u thyer te pronat e vjetra dhe për të investuar. Jemi marrë brez pas brezi me blegtori dhe synimi jonë është që të arrijmë në 1000 krerë bagëti, ndërsa prodhimin e qumshtit e bëjmë djathë në baxhon tonë”, tha Ukaj.

“Shumicën e viteve kam emigruar në shtete të ndryshme të Evropës, dhe pas kthimit në vendin tonë duke dëgjuar se për të investuar në fshatra në shtëpitë e vjetra vendosëm të kthehemi të dhe të investojmë te ferma jonë”, tha ai.

1 nga 7

/e.i/a.f/

The post Paketa e Maleve, i riu kthehet nga emigrimi dhe investon në fermë e bujtina druri appeared first on Agjencia Telegrafike Shqiptare.

TIRANË, 26 nëntor /ATSH/ Ministria e Bujqësisë dhe Zhvillimit Rural përfaqësoi Shqipërinë në punimet e Asamblesë së 122-të të Këshillit Ndërkombëtar të Ullirit (COI), e cila u zhvillua në Kordoba, të Spanjës.

Delegacioni shqiptar, i përbërë nga Bledi Mile dhe Ana Lelo, u prit nga ministri i Bujqësisë së Spanjës si dhe nga Sekretari i Përgjithshëm i COI.

Ministri i Bujqësisë dhe Zhvillimit Rural, Andis Salla i përcolli një videomesazh përshëndetës asamblesë, ku theksoi traditën mijëravjeçare të kultivimit të ullirit në Shqipëri dhe rëndësinë e tij në identitetin mesdhetar, zhvillimin rural dhe ekonominë bujqësore të vendit.

Gjatë punimeve, Shqipëria riafirmoi angazhimin për zhvillimin e mëtejshëm të sektorit të ullirit, forcimin e cilësisë së prodhimit, rritjen e konkurrueshmërisë dhe promovimin e produkteve Made in Albania në tregjet ndërkombëtare.

e.xh/j.p/

The post Shqipëria, pjesëmarrëse në asamblenë e Këshillit Ndërkombëtar të Ullirit në Spanjë appeared first on Agjencia Telegrafike Shqiptare.

TIRANË, 23 nëntor/ATSH/ Moti i keq dhe reshjet e dendura të shiut të ditëve të fundit, kanë krijuar problematika në zona të ndryshme të vendit.

Ministri i Bujqësisë dhe Zhvillimit Rural, Andis Salla u shpreh sot se shirat gjatë natës kanë qenë me intensitet më të ulët, çka ka krijuar kushte më të favorshme për ndërhyrjet në terren.

Në një reagim në rrjetet sociale, Salla tha se si rezultat, situata në infrastrukturën e kullimit po normalizohet, me ulje graduale të niveleve të ujit.

“Në ultësirën perëndimore, infrastruktura e kullimit po kthehet gradualisht në normalitet dhe uji po tërhiqet nga sipërfaqet e përmbytura. Paralelisht, nivelet në lumenj kanë pësuar rënie dhe rrjedhat po stabilizohen brenda shtratit natyral dhe argjinaturave ekzistuese”, tha Salla.

Ministri Salla nënvizoi se ekipet e drejtorive të ujitje-kullimit në Fier, Korçë, Durrës dhe Lezhë vijojnë pa ndërprerje në terren për stabilizimin e situatës, kryesisht në zonat më problematike.

Ministria e Bujqësisë dhe Zhvillimit Rural, në bashkëpunim me AKMC dhe Drejtoritë e Ujitje-Kullimit, vazhdon të monitorojë situatën dhe do të ndërhyjë sipas nevojës për parandalimin e përmbytjeve dhe garantimin e sigurisë së banorëve dhe tokave bujqësore. /e.i/a.f/

/e.i/

The post Salla: Infrastruktura e kullimit drejt normalitet, uji po tërhiqet nga sipërfaqet e përmbytura appeared first on Agjencia Telegrafike Shqiptare.

TIRANË, 19 tetor /ATSH/ Prokuroria e Tiranës ka përfunduar hetimet dhe ka dërguar për gjykim 20 nëpunës publikë, të akuzuar për shpërdorim detyre në të paktën shtatë procedura prokurimi, që kanë shkaktuar dëm ndaj Ministrisë së Bujqësisë dhe Zhvillimit Rural.

Në njoftimin e sotëm të Prokurorisë Tiranë thuhet se hetimet nisën pas kallëzimit të bërë nga Ministria bazuar në raportet e auditit nga KLSH, i cili konstatoi shkelje të rënda në këto prokurime me vlerë mbi 525 milionë lekë pa TVSH.

Në njoftim thuhet se nga hetimet e kryera mbi rezultoi se shtetasit M.K., E.H., G.Xh., I.A. A.Gj., L.K. E.P., L.H., M.P., E.F., A.L., E.R., I.B., A.Z., A.Gj., S.P., A.I., A.Dh., K.N., A.A. kanë kryer veprën e mësipërme në dëm të Ministrisë së Bujqësisë dhe Zhvillimit Rural.

Hetimet nisën pas kallëzimit të bërë nga Ministria e Bujqësisë dhe Zhvillimit Rural bazuar në raportet e auditit që Kontrolli i Lartë i Shtetit kreu, ku për shtatë procedura prokurimi, referohet se janë evidentuar shkelje të rënda ligjore në prokurime të zhvilluara kryesisht me negociim pa shpallje paraprake dhe fond limit 525.000.000 lekë pa TVSH.

“Procedurat për të cilat u konstatuan shkelje kishin të bënin me prokurimet për “Shpenzime mbrojtje bimësh dhe luftimi i parazitëve në bujqësi”, për ‘Blerje pajisje për shërbimin veterinar (motoçikleta, kaska, veshje, doreza, çanta), “Blerje kafshë të llojit gjedh për dëmshpërblimin e fermerëve të dëmtuar nga dermatoza nodulare e gjedhit” si dhe për ‘Sistem i monitorimit me kamera për hidrovoret’”, thuhet në njoftim.

Sipas Prokurorisë Tiranë, të pandehurit e mësipërm, në cilësinë e personave të ngarkuar me funksion publik, në bashkëpunim me njëri-tjetrin, për secilën procedurë tenderimi kanë vepruar në kundërshtim me ligjin ose ligjet që normojnë veprimtarinë përkatëse të personit që ushtron funksion publik konkret. Duke përbërë në këtë mënyrë mospërmbushje të rregullt të detyrës, duke dëmtuar interesat e ligjshme të shtetit, të shtetasve dhe të personave të tjerë juridikë.

Prokuroria nënvizon se hetimi i procedurave provoi se janë konsumuar elementet e veprës penale dhe se kanë kryer veprime që nuk janë të justifikuara në lidhje me mangësitë për përcaktimin e kritereve të mallrave që kërkohen, por mbi të gjitha krijohet bindja se testimi i tregut është kryer në mënyrë fiktive.

Pas njohjes me tërësinë e akteve të sipërcituara, Prokuroria cilëson në njoftim se ekziston bindja e bazuar në prova, se nga ana e anëtarëve të njësisë së prokurimit, është konsumuar vepra penale e shpërdorimit të detyrës, referuar llojit të procedurës së zgjedhur për prokurimet, krim i parashikuar përkatësisht nga neni 248-25 i Kodit Penal.

/e.i/r.e/

The post Shpërdoruan detyrën në dëm të Ministrisë së Bujqësisë, Prokuroria e Tiranës çon në gjyq 20 zyrtarë appeared first on Agjencia Telegrafike Shqiptare.

TIRANË, 3 tetor /ATSH/ Nga vetëm 6 analiza të akredituara në vitin 2013, sot ISUV numëron 1,945 teste të certifikuara, të vlefshme deri në vitin 2029. Mes tyre përfshihen edhe 12 analiza të reja për substanca të ndjeshme, si tetraciklinat në mjaltë dhe nitrofuranet në qumësht, duke e vendosur Shqipërinë në të njëjtin nivel kontrolli me vendet e BE-së për sigurinë ushqimore.

Ministri i Bujqësisë dhe Zhvillimit Rural, Andis Salla, vizitoi sot ambientet e Institutit të Sigurisë Ushqimore dhe Veterinarisë (ISUV), ku janë riakredituar dhe zgjeruar kapacitetet analitike të institutit sipas standardit ndërkombëtar ISO 17025:2017.

Gjatë vizitës, ministri u njoh nga afër me punën e përditshme të specialistëve dhe stafit teknik që garantojnë sigurinë e zinxhirit ushqimor, “nga ferma në tryezën e çdo familjeje shqiptare”.

Ministri i Bujqësisë dhe Zhvillimit Rural u shpreh se ky transformim është rezultat i profesionalizmit të burimeve njerëzore, investimeve të qëndrueshme në kapacitetet laboratorike dhe mbështetjes së politikave zhvillimore.

“Sigurojmë cilësi për konsumatorin, besim për fermerin dhe besueshmëri për produktet shqiptare në tregjet ndërkombëtare”, deklaroi ministri Salla.

Një rol të rëndësishëm në këtë arritje luan bashkëpunimi me partnerët ndërkombëtarë, ku veçohet projekti i Bankës Botërore, që mbështet fuqizimin e ISUV-it përmes investimeve në 7 laboratorë rajonalë dhe 6 pika të inspektimit kufitar (PIK), duke forcuar më tej rolin e ISUV-it si institucion referencë në nivel kombëtar për sigurinë ushqimore dhe shëndetin veterinar.

Ministri Salla theksoi se përpjekjet në këtë drejtim janë pjesë e vizionit “Bujqësia 2030”, që synon ngritjen e standardeve kombëtare në një nivel të ri cilësie dhe besueshmërie, si dhe përmbushjen me seriozitet të detyrimeve të Kapitullit 12 për Sigurinë Ushqimore, në kuadër të procesit të integrimit europian të Shqipërisë.

Nga vizita e ministrit të Bujqësisë dhe Zhvillimit Rural, Andis Salla, në ambientet e Instituti...

1 nga 8

/e.i/j.p/

The post Salla: 1945 teste të certifikuara nga ISUV për sigurinë ushqimore appeared first on Agjencia Telegrafike Shqiptare.

TIRANË, 22 shtator /ATSH/ Ministri i Bujqësisë dhe Zhvillimit Rural, Andis Salla zhvilloi sot një takim pune me stafin drejtues të ministrisë, me qëllim evidentimin e problematikave dhe adresimin e zgjidhjeve në çdo sektor të bujqësisë, blegtorisë, peshkimit dhe zhvillimit rural.

Salla shpreh se në një postim në rrjetet sociale, në takim u vendosën prioritetet për ndërhyrjet kryesore në bujqësi për të arritur objektivin Shqipëria në BE në vitin 2030.

Këto prioritete lidhen me mbështetjen e fermerëve, rritjen e prodhimit vendas, përmirësimin e infrastrukturës bujqësore, nxitjen e agroturizmit dhe përdorimin më efikas të fondeve publike dhe programeve mbështetëse.

“Sot me stafin drejtues të ministrisë realizuam një takim pune, me qëllim evidentimin e problematikave dhe adresimin e zgjidhjeve në çdo sektor të bujqësisë, blegtorisë, peshkimit dhe zhvillimit rural. Bashkë vendosëm prioritetet për ndërhyrjet kryesore që lidhen me mbështetjen e fermerëve, rritjen e prodhimit vendas, përmirësimin e infrastrukturës bujqësore, nxitjen e agroturizmit dhe përdorimin më efikas të fondeve publike dhe programeve mbështetëse për të arritur Shqipëria 2030 në BE”, shkroi Salla, në një postim në rrjetet sociale.

/gj.m/r.e/a.f/

The post Bujqësia drejt BE 2030, Salla vendos prioritetet kryesore appeared first on Agjencia Telegrafike Shqiptare.

TIRANË, 28 gusht/ATSH/ Instituti i Sigurisë Ushqimore dhe Veterinarisë (ISUV) gjatë periudhës janar-qershor 2025 ka realizuar 189 230 analiza për të garantuar sigurinë ushqimore, shëndetin e bimëve dhe kafshëve.

Ministrja e Bujqësisë dhe Zhvillimit Rural, Anila Denaj bëri me dije sot, se kjo shifër shënon “një rritje prej 15% krahasuar me të njëjtën periudhë të vitit të kaluar”.

Sipas Denajt, “përmes analizave dhe kontrolleve të vazhdueshme, ISUV garanton funksionimin cilësor të zinxhirit agroushqimor, sigurinë e produkteve që konsumojmë çdo ditë, si edhe mbrojtjen e biodiversitetit të bimëve dhe shëndetit të kafshëve”.

“Këto procese krijojnë besim tek konsumatori, mbështesin fermerët dhe prodhuesit vendas, si dhe rrisin konkurrueshmërinë e produkteve shqiptare në tregjet vendase e ndërkombëtare”, u shpreh Denaj në një postim në rrjetet sociale.

Në laboratorët e ISUV ekspertët analizojnë kampionë të ushqimeve për treguesit mikrobiologjikë, duke garantuar cilësi dhe siguri për produktet që arrijnë në tryeza.

/e.i/j.p/

The post Denaj: Mbi 189 mijë analiza për funksionimin cilësor të zinxhirit agroushqimor appeared first on Agjencia Telegrafike Shqiptare.

TIRANË, 27 gusht/ATSH/ Ministrja e Bujqësisë dhe Zhvillimit Rural, Anila Denaj bëri me dije se fermerët po mbështeten me financim për rrjetat antibreshër, për të mbrojtur prodhimin bujqësor nga risku klimatik.

Sipas Denajt, “me skemën e re të investimeve, financojmë rrjetat për mbrojtjen nga breshëri në blloqet ekzistuese me pemë frutore, agrume dhe vreshta, për sipërfaqe nga 1 ha deri në 5 ha”.

Ministrja Denaj u bëri thirrje fermerëve që të aplikojnë deri më 30 shtator në zyrat qendrore të AZHBR, në Skemën Kombëtare të Investimeve 2025 për 50% grant për instalimin e rrjetave antibreshër në blloqe ekzistuese me pemë frutore, agrume apo vreshta.

“Financojmë 50% e vlerës totale, deri në 1.5 mln lekë për hektarë. Përmes përfitimit të 50% grant nga skema dhe kombinimit me Kredinë e Butë me interes vetëm 2% dhe garanci sovrane prej 70% të kolateralit, siguroni financim të plotë për të gjithë investimin”, u shpreh Denaj.

Ministrja theksoi se me këtë skemë, mbështeten fermerët në përballimin e sfidave të klimës dhe garantohen prodhime cilësore për një bujqësi të qëndrueshme konkurruese në tregjet ndërkombëtare.

Sot përdorimi i rrjetave antibreshër lejon fermerët që të mbajnë një furnizim të vazhdueshëm në treg duke ulur rrezikun e humbjes së prodhimit, siguron rritjen e cilësisë, minimizimin e demit, uljen e shpenzimeve agroteknike, etj.

/e.i/j.p/

The post Skema e Investimeve, Denaj: 1.5 milionë lekë për hektar për rrjetat antibreshër appeared first on Agjencia Telegrafike Shqiptare.

TIRANË, 26 gusht/ATSH/ Certifikata fitosanitare është garanci për cilësinë dhe sigurinë e eksporteve të bimëve dhe produkteve me origjinë bimore drejt BE-së dhe vendeve të tjera të botës.

Ministrja e Bujqësisë dhe Zhvillimit Rural, Anila Denaj bëri të ditur sot, se gjatë periudhës janar-qershor 2025 janë lëshuar mbi 13 mijë certifikata fitosanitare për dërgesat e bimëve, produkteve bimore dhe produkte të tjera për eksport.

Sipas ministres Denaj, kjo shifër krahasuar me të njëjtën periudhë të një viti më parë është 19% më e lartë, duke treguar përkushtimin e fermerëve dhe përpunuesve në përmbushjen e standardeve fitosanitare sipas legjislacionit të BE-së.

Tashmë, pajisja me certifikatë fitosanitare ofrohet online, proces ky që lehtëson biznesin eksportues, redukton kohën e pritjes dhe ndikon në ruajtjen e standardeve të prodhimeve bujqësore në eksporte.

Plotësimi i certifikatës fitosanitare me dorë si dhe realizimi i monitorimit kërkon mesatarisht 1-1,5 orë punë. Ndërkohë, procesi online për të gjithë operatorët ekonomikë që do të kryejnë eksporte, nuk zgjat më shumë se 10 minuta.

/e.i/j.p/

The post Denaj: Mbi 13 mijë certifikata fitosanitare për eksportin e produkteve bimore appeared first on Agjencia Telegrafike Shqiptare.

TIRANË, 7 gusht /ATSH/ Ministria e Bujqësisë dhe Zhvillimit Rural ka ndaluar importin e shpendëve të prekur nga sëmundja e pseudopestit nga shtetet si Bullgaria e Polonia, si dhe të derrave të butë e të egër të prekur nga murtaja afrikane në vendet si Estonia, Letonia, Kroacia, Polonia, Estonia, Bosnjë-Hercegovina, Serbia dhe Moldavia.

Në vendimin e publikuar në fletoren zyrtare, nënvizohet se ndalohet importi i shpendëve të gjallë shtëpiakë, zogjve, mishit të freskët, materialit biologjik të shpendëve të pashoqëruar me test PCR të kryer në 14 ditët e fundit.

MBZHR njofton se importet nga shtetet e Bullgarisë, Polonisë dhe Spanjës lejohen, nga zona dhe stabilimente të cilat nuk kanë pasur njoftim të sëmundjes së pseudopestit të shpendëve për 12 muajt e fundit.

Po ashtu, me vendim të ministres Anila Denaj, është ndaluar importi i kafshëve të gjalla të llojit derra të butë dhe të egër, mishi i freskët  dhe  produktet e tij, materiali  biologjik dhe embrionet e  kafshëve  të gjalla të llojit derra, duke përjashtuar mishin në një kontenier të vulosur hermetikisht, xhelatinën, ushqimin e thatë të kafshëve shtëpiake dhe vakteve proteinike.

Ndërkaq, Ministria ka ndaluar importet nga Italia, Serbia, Greqia, Kosova dhe Kroacia të bagëtive të gjalla të imëta dhe thundrake, të llojit ruminantë dhe kamelidë, të prekura nga sëmundja e gjuhës blu.

/a.f/

The post Murtaja në derra dhe sëmundja e shpendëve, MBZHR ndalon importin nga disa shtete appeared first on Agjencia Telegrafike Shqiptare.

TIRANË, 5 gusht /ATSH/ Fermerët shqiptarë që synojnë të investojnë në mbjellje të reja pemësh frutore, agrumesh, ullishtesh dhe vreshtash do të përfitojnë 50% grant nga Skema Kombëtare e Investimeve 2025, e cila është hapur për aplikime deri më 30 shtator.

Ministrja e Bujqësisë dhe Zhvillimit Rural, Anila Denaj zhvilloi sot një takim me fermerë të qarkut të Beratit, me qëllim sqarimin e kritereve të aplikimit.

Ministrja Denaj u shpreh se “pjesëmarrësit patën mundësi të merrnin përgjigje të detajuara për çdo pyetje konkrete që kishin lidhur me aplikimin”.

Sipas Denajt, “Skema Kombëtare e Investimeve 2025 ofron 50% grant për investime në sektorin bujqësor dhe mund të kombinohet me Kredinë e Butë me normë interesi deri në 2% dhe Garancinë Sovrane me mbulim kolaterali deri në 70%”.

Aplikimet kryhen pranë zyrave qendrore të AZHBR-së, ndërsa skema përfshin gjithsej 9 masa mbështetëse për sektorin bujqësor.

Ky është një hap i rëndësishëm drejt forcimit të bujqësisë shqiptare dhe përmirësimit të kapaciteteve prodhuese në përputhje me objektivat e Bujqësisë 2030.

/e.i//r.e/

The post Mbështetje fermerëve, Denaj: 50% grant për investime në sektorin bujqësor appeared first on Agjencia Telegrafike Shqiptare.

TIRANË, 3 gusht /ATSH/ Ministrja e Bujqësisë dhe Zhvillimit Rural, Anila Denaj njoftoi se ka nisur tashmë procesi për regjistrimet në arsimin profesional, ndërsa i ftoi të rinjtë që përfundojnë klasën e 9-të që të zgjedhin drejtimin bujqësor, për punësim të sigurt.

“Nxënësit mund të regjistrohen në një nga shkollat profesionale bujqësore që janë në 5 qarqe të vendit: Shkolla profesionale “Rakip Kryeziu”, Fier; Shkolla profesionale “Mihal Shahini”, Cërrik; Shkolla e mesme profesionale Kamëz; Shkolla Profesionale Shërbime, Korçë; Shkolla profesionale “Ndre Mjeda”, Bushat dhe shkolla profesionale “Charles Telford Erickson”, Golem”, tha Denaj.

Ministrja i ftoi të rinjtë të investojnë në dije për t’u bërë pjesë e zhvillimit të bujqësisë së qëndrueshme në Shqipëri, teksa njoftoi se, regjistrimi bëhet lehtësisht përmes portalit e-Albania, në shërbimin “Regjistrohu në klasën e dhjetë”.

Të rinjtë që mbarojnë klasën e 9-të kanë tani një mundësi për të ndërtuar një karrierë të qëndrueshme dhe të suksesshme në sektorin bujqësor, përmes arsimit profesional në një nga tre drejtimet më të kërkuara në treg: bujqësi, veterinari dhe teknologji ushqimore.

/e.i//a.f/

The post Regjistrimet në arsimin profesional, Denaj: Drejtimi bujqësor, punësim i sigurt appeared first on Agjencia Telegrafike Shqiptare.

TIRANË, 31 korrik /ATSH/ Shqipëria ishte pjesë e Samitit të OKB-së për Sistemet Ushqimore që kishte në fokus angazhimin dhe veprimet globale për sigurimin e një zinxhiri vlere konkurrues në sistemet ushqimore.

Delegacioni i Ministrisë së Bujqësisë dhe Zhvillimit Rural, i kryesuar nga sekretari i përgjithshëm Dritan Palnikaj, përfaqësoi Shqipërinë në këtë samit, që u mbajt në kryeqytetin e Etiopisë, Adis-Abeba.

Samiti, i organizuar nga qeveria e Etiopisë dhe ajo e Italisë, solli në fokus diskutimet për forcimin e zinxhirit të vlerës, fuqizimin e tregjeve dhe garantimin e sigurisë ushqimore, si rrugë për një prodhim më të qëndrueshëm dhe ushqim më të sigurt në nivel global.

1 nga 3

/r.e/

The post Shqipëria merr pjesë në samitin e OKB-së për sistemet ushqimore appeared first on Agjencia Telegrafike Shqiptare.

TIRANË, 24 korrik /ATSH/ Kultivimi i frutit të mjedrës, një kulturë e re në vendin tonë, falë mbështetjes nga ekspertët e bujqësisë, po realizohet me sukses nga fermerët në vendin tonë.

Ministrja e Bujqësisë dhe Zhvillimit Rural, Anila Denaj, njoftoi realizimin me sukses të mbjelljes së fidanëve të mjedrës nga fermerët në Dibër dhe Kukës.

Ajo e cilësoi këtë iniciativë, një hap konkret drejt kultivimit të kësaj kulture të re, që është  fitimprurëse dhe ka kërkesë të lartë në treg për të.

“Falë mbështetjes së GIZ dhe njohurive të fituara nga trajnimet praktike dhe përgatitjet në terren, fermerët po zbatojnë teknika moderne që rrisin efikasitetin në përdorimin e tokës dhe cilësinë e prodhimit, duke e bërë sektorin bujqësor më të qëndrueshëm për të ardhmen”, u shpreh Denaj.

Mjedra bën pjesë në grupin e pemëve manore me vlera të larta ushqyese dhe ekonomike. Ajo është e pasur me vitamina, minerale dhe antioksidantë.

Mjedra kultivohet gjerësisht në Kosovë dhe falë mbështetjes nga Skemat Kombëtare, fermerët kanë nisur të investojnë për kultivimin e saj, që kërkon teknologji të posaçme, teksa kushtet klimaterike në Shqipëri e favorizojnë zhvillimin e mjedrës. /j.p/

1 nga 4

The post Mbështetje fermerëve të Kukësit dhe Dibrës për kultivimin e mjedrës appeared first on Agjencia Telegrafike Shqiptare.

TIRANË, 14 korrik /ATSH/ Në ambientet e Drejtorisë Rajonale të Bordit të Kullimit Durrës u zhvillua një takim pune me pjesëmarrjen e përfaqësuesve të bashkive Rrogozhinë, Kavajë dhe Peqin, përfaqësuesve të Ministrisë së Bujqësisë si dhe drejtori i Drejtorisë Rajonale të Bordit të Kullimit Durrës.

Kryetari i bashkisë Rrogozhinë, Edison Memolla ndau në rrjete sociale, momente nga ky takim, që kishte në fokus furnizimin me ujë për vaditjen e tokave bujqësore.

“Gjatë këtij takimi u firmos marrëveshja e bashkëpunimit ndërinstitucional që ka për synim garantimin e furnizimit me ujë për vaditje në tokat bujqësore të zonës, duke siguruar mbarëvajtjen e sezonit bujqësor dhe mbështetjen e fermerëve në kohë”, shkroi Memolla.

Sipas tij, ky bashkëpunim do të ndikojë drejtpërdrejt në përmirësimin e infrastrukturës bujqësore dhe rritjen e prodhimit vendor.

/a.f/

The post Marrëveshje ndërinstitucionale për furnizimin me ujë për vaditjen e tokave bujqësore appeared first on Agjencia Telegrafike Shqiptare.

TIRANË, 13 korrik /ATSH/ Në njësinë administrative Bërzhitë, të bashkisë Tiranë, po vijon me intensitet ndërtimi i “Urës së Bonarakëve” mbi lumin Erzen.

Ministrja e Bujqësisë dhe Zhvillimit Rural, Anila Denaj inspektoi sot nga afër punimet e kësaj ure, ndërsa u shpreh se ky “është një premtim i mbajtur që i jep zgjidhje një kërkese të kahershme të banorëve, duke lidhur lagjen e ‘Bonarakëve’ me pjesën tjetër të fshatit Ibë e Poshtme”.

Ministrja Denaj tha se ky është një investim që sjell siguri, akses dhe zhvillim për komunitetin!

“Është një punë e bërë në një kohë rekord, sepse brenda tre muajve të gjithë banorët, gati 27 familje që i kemi vizituar përpara pak muajve duke kaluar në një urë të vjetër, do kenë një urë të re që po bëhet realitet”, tha Denaj.

Ministrja Denaj tha se pavarësisht nga ndërtimi i urës së pjesshme, ndërtimi në kohë rekord i “Urës së Bonarakëve” duhet të jetë brenda të gjitha standardeve të projektuara dhe të zbatuara.

/e.i//a.f/

The post Ura e Bonarakëve, Denaj: Investim që sjell siguri dhe zhvillim për komunitetin appeared first on Agjencia Telegrafike Shqiptare.

TIRANË, 29 qershor /ATSH/ Në Korçë janë instaluar tre stacione moderne meteorologjike, të cilat synojnë të ndihmojnë fermerët duke sjellë një frymë të re në mënyrën e punës së tokës.

Ministrja e Bujqësisë dhe Zhvillimit Rural, Anila Denaj, bëri të ditur se këto stacione ndihmojnë fermerët të parashikojnë më mirë ndryshimet klimatike, të menaxhojnë dëmtuesit dhe sëmundjet dhe të përdorin burimet në mënyrë më efikase.

“Janë instaluar tre stacione meteorologjike moderne, të pajisura me sensorë dhe kurthe digjitale, për të mbështetur fermerët në kultivimin e mollëve dhe qershive, një hap konkret drejt fuqizimit të bujqësisë së zgjuar”, theksoi ministrja Denaj.

Nisma ndihmon drejtpërdrejt në ndërtimin e qëndrueshmërisë afatgjatë ekonomike për sektorin bujqësor në Korçë, duke e bërë bujqësinë një aktivitet më të qëndrueshëm dhe fitimprurës, pavarësisht sfidave të shkaktuara nga ndryshimet klimatike.

Sipas ministres Denaj, kjo iniciativë e Ministrisë së Bujqësisë dhe Zhvillimit Rural, në bashkëpunim me GIZ, është pjesë e vizionit “Bujqësia2030”, që synon një bujqësi të qëndrueshme, të pajisur me dije dhe teknologji, dhe i jep fermerit fuqinë për të përballuar sfidat e së ardhmes.

Ministrja Denaj tha se ky investim është realizuar nga GIZ Albania dhe WB Adapt, në bashkëpunim me QTTB Korçë, AREB Korçë dhe ADAD Malore.

Nga vendosja e tre stacioneve meteorologjike moderne për fermerët në Korçë

1 nga 6

/e.i/

The post Tre stacione meteorologjike moderne për fermerët në Korçë appeared first on Agjencia Telegrafike Shqiptare.

TIRANË, 22 qershor/ATSH/ Fiqiri Curri, fermer në Ndroq, prej vitesh kultivon rrush, pjepër, shalqi dhe perime sezonale në gjashtë dynimë serra.

Ministrja e Bujqësisë dhe Zhvillimit Rural, Anila Denaj, ndau sot në rrjete sociale historinë e tij, si shembullin model që, siç tha ajo, “kontribuon në ekonominë lokale dhe në promovimin e produkteve “Made in Albania” në tregjet ndërkombëtare”.

Ministrja bëri të ditur se me aktivitetin e tij bujqësor, ky fermer kontribuon në zhvillimin e ekonomisë lokale, duke siguruar të ardhura edhe për familjen e tij.

Sipas ministres Denaj, “përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%”.

Garancia Sovrane me fond prej 3 miliardë lekësh, ose 30 milionë euro, është një instrument i cili do të vihet në shërbim të sektorit privat me qëllim lehtësimin e aksesit në financë për fermerët dhe Ndërmarrjet e Vogla dhe të Mesme.

Garancia Sovrane, e kombinuar me kredinë e butë të Bankës së Shqipërisë, ul normën e interesit në vetëm 2% dhe mbulon deri në 70% të kolateralit për kredi, deri në 25 milionë lekë për subjekt, duke krijuar lehtësi për ndërmarrjet e vogla dhe të mesme që operojnë në prodhim bujqësor, agropërpunim, turizëm rural dhe akuakulturë.

Normat që parashikohen për këtë skemë do të jenë tejet të favorshme dhe me mbulim deri në 70% të principalit të kredisë, shuma e së cilës nuk do të kalojë 25 milionë lekë për secilin prej subjekteve aplikuese.

Nga serrat e Fiqiri Currit, fermer në Ndroq që kultivon rrush, pjepër, shalqi dhe perime sezona...

1 nga 6

/e.i//r.e/

The post Kredi të buta në bujqësi, Denaj: Financim me normë interesi 2% appeared first on Agjencia Telegrafike Shqiptare.

TIRANË, 20 qershor /ATSH/ Nën drejtimin e ministres së Bujqësisë dhe Zhvillimit Rural (MBZHR), Anila Denaj, u zhvillua sot mbledhja e grupit teknik për koordinimin e hapave dhe marrjen e masave të menjëhershme me qëllim ndalimin e përhapjes së sëmundjes së murtajes së ruminantëve të vegjël (PPR) në Shqipëri.

Në takim u theksua rëndësia kritike e marrjes së masave të shpejta dhe të koordinuara për të frenuar përhapjen e këtij infeksioni, i cili përbën një rrezik të madh për tufat dhe ekonominë blegtorale të vendit.

MBZHR u bën thirrje fermerëve për veprime të përgjegjshme dhe të mos rrezikojnë tufën e tyre dhe të zbatojnë me përpikëri masat e vendosura.

Gjithashtu thekson MBZHR tregtarët të mos rrezikojnë ekonominë blegtorale të vendit dhe të respektojnë ndalimin e përkohshëm të qarkullimit dhe tregtimit të kafshëve.

Në këtë takim morën pjesë përfaqësues dhe drejtues të institucioneve kyçe në mbrojtjen e shëndetit të kafshëve dhe sigurinë veterinare në vend.

Ministria e Bujqësisë dhe Zhvillimit Rural u bën thirrje qytetarëve, fermerëve dhe operatorëve të tregjeve të kafshëve që të respektojnë me përpikëri legjislacionin në fuqi.

Në rast shkeljesh, autoritetet do të ndërmarrin masa ligjore, përfshirë ndjekjen penale ndaj individëve apo subjekteve që cenojnë shëndetin publik veterinar, ashtu si në rastet e evidentuara deri më tani. /j.p/

The post Murtaja në blegtori, MBZHR thirrje fermerëve: Zbatoni ligjin për ndalimin e përhapjes së sëmundjes appeared first on Agjencia Telegrafike Shqiptare.

TIRANË, 18 qershor /ATSH/ Në ambientet e Ministrisë së Bujqësisë dhe Zhvillimit Rural u zhvillua një takim teknik me fokus të veçantë mbi menaxhimin e sëmundjes së Murtajës së Ruminantëve të Vegjël (Peste des Petits Ruminants – PPR), me pjesëmarrjen e prof. asoc. George Valiakos, ekspert në mikrobiologji dhe një nga figurat kyçe në çrrënjosjen e kësaj sëmundjeje në Greqi.

Prof. Valiakos ndau përvojën greke mbi kontrollin dhe eliminimin e PPR-së, duke paraqitur një analizë të hollësishme të masave të zbatuara dhe rezultateve të arritura në rajone me shpërthime të mëparshme, si specialist-supervizor i emëruar nga Ministria greke e Bujqësisë për menaxhimin e situatës së PPR në vendin e tij.

MBZHR bën të ditur se, në këtë takim u vlerësua bashkëpunimi ndërinstitucional në rritje, si dhe u analizua situata aktuale në vendin tonë dhe hapat e nevojshëm për një menaxhim të suksesshëm të sëmundjes, duke ndarë eksperienca konkrete, shkëmbyer ide dhe hedhur bazat për përmirësimin e planeve të kontrollit të PPR-së në Shqipëri.

Konfirmimi i parë për sëmundjen e Murtajës së Ruminantëve të Vegjël në vendin tonë është bërë më 4 qershor 2025, me vendndodhje në fshatin Domen, njësia administrative Postribë, Bashkia Shkodër, dhe më pas në disa njësi në bashkitë Dibër, Bulqizë, Skrapar, Devoll dhe Tiranë.

Ministria e Bujqësisë dhe Zhvillimit Rural u bën thirrje të gjithë fermerëve të zbatojnë me përpikëri masat e biosigurisë në fermat e tyre dhe të shmangin çdo lëvizje të kafshëve jashtë fermës, duke zbatuar rregullat në fuqi dhe duke bashkëpunuar për një të mirë të përbashkët: ekonominë blegtorale ne vend.

/r.e/a.f/

The post MBZHR përvojë nga Greqia për menaxhimin e murtajës tek të imtat appeared first on Agjencia Telegrafike Shqiptare.