Bruno Fernandes beson se Michael Carrick ka sjellë “diçka të veçantë” te Manchester United pas fitores 2-0 ndaj Tottenhamit të shtunën.

United regjistroi fitoren e katërt radhazi në Ligën Premier nën drejtimin e Carrick, pasi ndeshja në “Old Trafford” mori kthesë të hershme kur Cristian Romero u ndëshkua me karton të kuq për një ndërhyrje të ashpër ndaj Casemiros pas vetëm 29 minutash lojë.

Bryan Mbeumo kaloi vendasit në epërsi para pushimit, duke finalizuar një skemë të zgjuar nga goditja e shkurtër e këndit, ndërsa Fernandes vulosi tri pikët kur devijoi në rrjetë krosimin e Diogo Dalotit në këndin e poshtëm të djathtë.

Djajtë e Kuq tani janë në serinë e tyre më të gjatë të fitoreve në elitë që nga shkurti i vitit 2024, si dhe në një ecuri prej tetë ndeshjesh pa humbje – diçka që nuk e kishin arritur që nga shkurti i vitit 2022.

Fernandes, i cili regjistroi kontributin e tij të 200-të në gola për United në paraqitjen e 314-të në të gjitha garat, nuk i kurseu lavdërimet për Carrick.

“Ky është futbolli. Ai ndryshon nga një ndeshje në tjetrën. Carrick erdhi me idetë e duhura, duke u dhënë lojtarëve përgjegjësi dhe liri në fushë”, deklaroi ai për TNT Sports.

“Është shumë mirë. Isha i sigurt se do të ishte një trajner i madh dhe ai po e tregon këtë. Shpresojmë që mund ta ndihmojmë edhe më shumë”.

“Të gjithë e kuptojnë presionin e të luajturit për këtë klub, të gjithë i dinë pritshmëritë që e rrethojnë. Ai e di çfarë do të thotë për këtë klub të fitojë. Kjo i shton diçka të veçantë ekipit”.

“Kemi pasur momente kur nuk kemi qenë të mirë, por tifozët kanë qenë sërish kështu. Energjia është ndryshe sepse fitojmë, gjithçka duket më e ndritshme”.

Duke folur për BBC, portugezi shtoi se skuadra duhet të mbetet e përqendruar për të mos humbur ritmin pozitiv.

“Është shumë e rëndësishme për ne të ruajmë fokusin dhe të mos e teprojmë tani. Kjo është shumë mirë dhe shumë bukur, por duhet të vazhdojmë.

“Nëse nuk fiton ndeshjen tjetër dhe tjetrën pas saj, rikthehesh në të njëjtin vend ku nuk ndihesh rehat, humb besimin dhe e ke të vështirë të besosh në gjithçka që ke bërë deri tani.

“Deri më tani kemi bërë shumë mirë duke realizuar gjithçka që Michael dhe stafi kanë kërkuar nga ne, dhe kemi qenë shumë të guximshëm duke marrë përgjegjësi në disa momente të lojës për të luajtur dhe për të bërë gjithçka që duhet për të fituar ndeshjen.

“Fokusi kryesor është ndeshja e radhës. Janë katër fitore radhazi. Kjo është e bukur, por tani duhet ta bëjmë pesë”./Telegrafi

Trajneri i Barcelonës, Hansi Flick, ka zbuluar se Robert Lewandowski i ka shprehur hapur pakënaqësinë e tij lidhur me rolin që ka këtë sezon në skuadër.

Sulmuesi polak, i cili ndodhet në gjashtë muajt e fundit të kontratës me klubin katalanas, ka nisur vetëm tetë ndeshje në La Liga këtë edicion, me Flick që shpesh ka preferuar Ferran Torresin si qendërsulmues, për shkak të fleksibilitetit dhe formës së mirë.

“Kemi folur për situatën e tij, sezoni ende nuk ka përfunduar, ai duhet të qëndrojë i fokusuar dhe ta shijojë atë”.

“E di që dëshiron më shumë minuta, por ai po bën gjërat siç duhet dhe shpresoj ta shijojë situatën aktuale dhe klubin. Tani nuk është momenti për të folur për këtë dhe të gjithë e dimë situatën e klubit, por unë jam i qetë sepse po punojmë mirë”, ka deklaruar Flick.

Aftësia e Lewandowskit për të shënuar gola nuk vihet në dyshim. Edhe pse ka përfunduar shpesh në rolin e rezervistit, veterani ka realizuar 12 gola në 27 paraqitje në të gjitha garat, duke shënuar mesatarisht një gol çdo 117.8 minuta. Nga ana tjetër, Ferran Torres shënon mesatarisht çdo 107.8 minuta.

Shqetësimet kryesore lidhen me aspektin fizik dhe qëndrueshmërinë e Lewandowskit. Edhe pse ai është në formë shumë të mirë për moshën e tij, nuk arrin më të krahasohet plotësisht me lojtarë më të rinj si Ferran. Pikërisht për këtë arsye, Flick ka zgjedhur shpesh alternativa të tjera këtë sezon.

Sipas ESPN, Barcelona është e hapur t’i ofrojë polakut një zgjatje njëvjeçare të kontratës, por vetëm nëse ai pranon uljen e pagës dhe një rol rotacioni, e jo më statusin e titullarit të padiskutueshëm./Telegrafi

Në ndjekje të medaljes së artë olimpike, atletët profesionistë shpesh i nënshtrohen sakrificave që për shumicën e njerëzve duken të paimagjinueshme. Por a shkojnë këto përpjekje deri aty sa kërcyesit e skive të injektojnë organin gjenital me acid hialuronik për të fluturuar më larg?

Kjo është pyetja që Agjencia Botërore Anti-Doping (WADA) pritet ta hetojë, pasi akuza tronditëse dolën fillimisht në gazetën gjermane Bild, në një histori që tashmë është pagëzuar si “Penisgate”.

Sipas “Bild”, disa atletë dyshohet se kanë injektuar acid hialuronik në organin gjenital për të manipuluar procesin e matjeve për kostumet e kërcimit, të cilat rregullohen në mënyrë shumë strikte për të parandaluar çdo avantazh aerodinamik të padrejtë.

Ndërsa rezultatet e hetimit ende priten, lindin disa pyetje të tjera: pse një kërcyes skiash do të ndërhynte në këtë mënyrë në trupin e tij, a është e sigurt kjo praktikë dhe çfarë lidhje ka madhësia e organit gjenital me aerodinamikën?

Çfarë bën injektimi i acidit hialuronik në organin gjenital?

Acidi hialuronik është një mbushës i përdorur gjerësisht në kirurgjinë estetike dhe, sipas profesor Eric Chung, kirurg urolog, ai përdoret edhe në procedura për rritjen e perimetrit të organit gjenital.

Injektimi i acidit hialuronik do ta bënte organin gjenital më të madh në trashësi, por për një efekt të dukshëm do të nevojitej një sasi e konsiderueshme e këtij materiali, shpjegon Chung, i cili më parë ka qenë drejtues i grupit këshillues të andrologjisë në Shoqatën Urologjike të Australisë dhe Zelandës së Re.

Efekti i acidit hialuronik është i përkohshëm dhe kërkon ripërsëritje çdo gjashtë deri në dymbëdhjetë muaj, në varësi të mënyrës se si trupi e përthith ose si migrojnë grimcat, shton ai.

Si ndikon madhësia e organit gjenital në kërcimin me ski?

Para fillimit të sezonit, kërcyesit me ski duhet të matin trupin e tyre për prodhimin e kostumit, bazuar në gjatësinë trupore, përfshirë lartësinë e ijëve. Këto matje kryhen me një skaner 3D të miratuar nga FIS, në prani të një mjeku, me atletët të veshur vetëm me të brendshme dhe me kërkesa shumë specifike për qëndrimin e trupit.

Përmasat e kostumit rregullohen rreptësisht, sepse madhësia totale e tij ka një ndikim të madh në sasinë e ngritjes aerodinamike që mund të gjenerohet, gjë që lejon kërcime më të gjata, shpjegon profesori i asociuar Dan Dwyer nga Universiteti Deakin.

Rritja artificiale e organit gjenital me acid hialuronik mund t’i japë atletit një avantazh gjatë procesit të matjes standarde, pasi dimensionet e trupit të regjistruara do të ishin më të mëdha sesa në kushte normale. Kjo, sipas Dwyer, do t’i lejonte atletit të përdorte një kostum pak më të madh.

“Ky kostum pak më i madh ka një sipërfaqe më të madhe dhe mund të gjenerojë një sasi shtesë të vogël ngritjeje aerodinamike”, shpjegon ai.

Drejtori i garave për meshkuj në Federatën Ndërkombëtare të Skive (FIS), Sandro Pertile, thekson se çdo detaj ka rëndësi.

“Çdo centimetër shtesë në kostum ka vlerë. Nëse kostumi yt ka 5 për qind më shumë sipërfaqe, ti fluturon më larg. Është një sport shumë konkurrues dhe të gjithë janë në limit të rregullave, sepse të gjithë duan të fitojnë.”

Cilat janë rreziqet shëndetësore?

Profesori Chung paralajmëron se injektimi i acidit hialuronik në organin gjenital mbart rreziqe serioze, si afatshkurtra ashtu edhe afatgjata.

Teknika e gabuar e injektimit ose doza e pasaktë mund të shkaktojë dhimbje, probleme estetike dhe deformime, infeksione, inflamacion, ndryshime ndjeshmërie dhe çrregullime të funksionit seksual.

Në raste të rralla, infeksioni mund të përhapet më tej dhe të shkaktojë gangrenë, nekrozë të indeve dhe madje humbjen e organit gjenital./Telegrafi

Sulmuesi Vedat Muriqi e ka falënderuar Barcelonën për krahasimin me Robert Lewandowskin, por është treguar modest duke thënë se nuk është në nivel me polakun.

Barcelona befasoi të gjithë para disa orëve kur publikoi një foto të Lewandowskit, ndërsa në mbishkrim shkroi “Lewy kundër Muriqit”.

Pra, thënë më thjeshtë, një krahasim mes dy qendërsulmuesve që kanë shënuar shumë gola këtë edicion në La Liga.

Tani, ka reaguar edhe Muriqi i cili ka deklaruar se nuk është në nivel të Lewas, por e ka falënderuar klubin katalunas për postimin.

“Janë pak sulmues që mund të garojnë me Lewy... dhe unë nuk jam një prej tyre, por faleminderit”, shkroi ai.

Ndërkohë, edhe Mallorca e ka ripostuar postimin e Lewas duke vendosur një foto të Muriqit në stërvitje.

Kujtojmë, përballja mes Barcelonës dhe Mallorcas do të zhvillohet të shtunën me fillim prej orës 16:15./Telegrafi

Zërat e fundit në Itali sugjerojnë se Thiago Motta mund të rikthehet te Bologna, në rast se klubi rossoblu vendos të ndahet nga trajneri aktual, Vincenzo Italiano. Një lëvizje e tillë nuk do të kishte rëndësi vetëm për Bolognën, por edhe për Juventusin, i cili do të përfitonte financiarisht nga largimi përfundimtar i Mottas.

Thiago Motta është pa punë që nga marsi i vitit të kaluar, kur u shkarkua nga posti i trajnerit të Juventusit. 43-vjeçari qëndroi më pak se një vit në krye të “Zonjës së Vjetër”, pasi ishte emëruar si pasues i Massimiliano Allegrit për sezonin 2024/25.

Që prej asaj kohe, Motta është përfolur për disa vende të lira në stol, përfshirë Real Sociedadin, AS Monacon, Bayer Leverkusenin dhe Spartak Moskën. Megjithatë, sipas “Calciomercato.com”, ai nuk është me nxitim për t’u rikthyer në trajnim dhe dëshiron të marrë sa më shumë kohë për të vlerësuar hapin e radhës, në mënyrë që zgjedhja e tij e ardhshme të jetë e duhura.

Ditët e fundit janë shtuar zërat se Motta mund të rikthehet te Bologna, klubi ku kishte lënë gjurmë pozitive, nëse drejtuesit vendosin të ndahen nga Vincenzo Italiano.

Ky i fundit e udhëhoqi Bolognën drejt triumfit historik në Kupën e Italisë sezonin e kaluar, trofeu i parë pas 51 vitesh, duke siguruar edhe kualifikimin në Ligën e Evropës. Megjithatë, këtë sezon skuadra po kalon një periudhë të vështirë, me vetëm një fitore në Serie A që nga fillimi i dhjetorit.

Aktualisht, Bologna renditet në vendin e 10-të në tabelë dhe rrezikon të bjerë në gjysmën e poshtme të renditjes nëse nuk arrin të mposhtë Parmën në fundjavë. Nëse klubi vendos të shkarkojë Italianon, Motta pritet të jetë një nga kandidatët kryesorë për ta zëvendësuar.

Edhe pse u largua nga Juventusi në mars, Motta nuk e ka ndërprerë ende kontratën me klubin torinez, çka do të thotë se ai vazhdon të përfitojë pagë deri në skadimin e marrëveshjes, në verën e vitit 2027.

Ai përfiton rreth 3 milionë euro neto në sezon nga Juventusi, një shifër që i kushton klubit rreth 5.5 milionë euro bruto në vit.

Në rast se Motta merr drejtimin e Bolognës, kjo pagë do të hiqej menjëherë nga bilanci i Juventusit, duke i kursyer klubit torinez një shpenzim të konsiderueshëm financiar për vitet e mbetura të kontratës./Telegrafi

Qendërmbrojtësi i Kosovës Lumbardh Dellova ka shënuar një gol të bukur për CSKA Sofian.

Dellova shënoi gjatë fitores 3-1 kundër Arda, ku realizoi golin e dytë të ndeshjes.

Pas një topi të kthyer nga rivëndja këndore, Dellova goditi fuqishëm në portën kundërshtare, duke mos i dhënë asnjë shans portierit mysafir as për të reaguar.

Për ta për golin: VIDEO

Kujtojmë, Dellova thuhet se e ka refuzuar rinovimin e kontratës kësisoj në verë pritet të bëhet me klub të ri.

Ndërkohë, Sofia mbetet në garë për titull, por është plot 10 pikë prapa liderit Levski./Telegrafi

Real Madridi po planifikon të përforcojë mesfushën në verën e ardhshme dhe një nga objektivat kryesorë të “Los Blancos” është Alexis Mac Allister.

Presidenti Florentino Perez e admiron mesfushorin argjentinas dhe dëshiron ta sjellë atë në “Santiago Bernabeu”. Po ashtu, paraqitjet e Mac Allister këtë sezon nuk kanë arritur nivelin e shkëlqyer që tregoi edicionin e kaluar, çka ka shtuar spekulimet se ai mund të largohet nga Liverpooli drejt kryeqytetit spanjoll.

Megjithatë, agjenti dhe njëkohësisht babai i lojtarit, Carlos Mac Allister, ka reaguar ndaj zërave që e lidhin djalin e tij me Real Madridin.

Në një prononcim për “winwin”, Carlos Mac Allister ka theksuar se djali i tij mbetet i përqendruar te Liverpooli dhe sezoni aktual.

“Ajo që mund të them për momentin është se Alexis është i fokusuar te Liverpooli dhe sezoni aktual. Alexis është shumë i lumtur dhe ndihet shumë rehat te Liverpooli”.

Duhet theksuar se Mac Allister nuk është i vetmi mesfushor në listën e madrilenëve, pasi ata po monitorojnë edhe emra si Enzo Fernandez, Vitinha dhe Joao Neves.

Ndërkohë, disa nga objektivat e tjerë të Real Madridit kanë situata kontraktuale të ndërlikuara. Vitinha së fundmi ka rinovuar kontratën me Paris Saint-Germain deri në vitin 2029, ndërsa Enzo Fernandez është i lidhur me Chelsean deri në vitin 2032, duke e bërë çdo lëvizje për ta jashtëzakonisht të shtrenjtë.

Në anën tjetër, kontrata e Mac Allister me Liverpoolin do të hyjë në dy vitet e fundit në fund të këtij sezoni, një detaj që klubi anglez e ka parasysh. Në moshën 27-vjeçare, argjentinasi po hyn në një fazë vendimtare të karrierës së tij, gjë që e bën të ardhmen e tij edhe më interesante për t’u ndjekur./Telegrafi

Trajneri Hansi Flick thotë se Barcelona duhet të ketë kujdes të veçantë për Vedat Muriqin.

Katalunasit do të përballen me Mallorcan në vikend, ndërsa në konferencë për media – tekniku gjerman e ka paralajmëruar klubin se duhet të kenë kujdes të shtuar ndaj yllit të Kosovës.

Flick e përmendi faktin se Muriqi ka shënuar plot 14 gola në La Liga, prandaj mund të jetë i rrezikshëm për portën e tyre.

“Ndonjëherë është më lehtë kur shënon gola, por jam në përgjithësi i kënaqur me stilin e lojës. Duhet të fokusohemi t’i përfundojmë sulmet tona”.

“Ekipi është në nivel të mirë. Mallorca e fitoi ndeshjen e fundit me rezultat 4-1 dhe Muriqi po kalon një sezon fantastik me 14 gola në La Liga. Duhet të kemi kujdes të veçantë ndaj tij”.

Përndryshe, përballja mes Barcelonës dhe Mallorcas zhvillohet të shtunën prej orës 16:15./Telegrafi

Arsenali po shqyrton mundësinë e një goditjeje të madhe në afatin kalimtar të verës për sulmuesin e Atletico Madridit, Julian Alvarez, me “Topçinjtë” që janë të gatshëm të hyjnë në garë me Chelsean dhe Barcelonën për firmën e tij.

Ish-sulmuesi i Manchester Cityt ka lënë përshtypje shumë të mira në futbollin spanjoll, duke shënuar 40 gola në 88 paraqitje që nga transferimi i tij te Atletico Madridi. Këto paraqitje kanë bërë që klubi madrilen ta vlerësojë argjentinasin rreth 87 milionë funte.

Edhe pse Barcelona besohet se është destinacioni i preferuar i Alvarezit, problemet e vazhdueshme financiare të katalanasve mund t’u hapin rrugë klubeve të Ligës Premier për të tentuar transferimin e tij.

Arsenali e di se rikthimi i reprezentuesit argjentinas në Angli nuk do të jetë i lehtë, por sheh një mundësi reale nëse Atletico Madridi qëndron i palëkundur në çmimin e kërkuar, në një kohë kur interesimi për lojtarin është i madh nga e gjithë Evropa.

Sipas raportimeve, drejtuesit e Arsenalit nuk do ta kishin problem të shpenzonin një shifër të tillë për të siguruar shërbimet e një sulmuesi të nivelit të Julian Alvarez, duke e parë atë si profilin ideal për të forcuar repartin ofensiv në sezonet e ardhshme./Telegrafi

Ish-sulmuesi i Anglisë, Alan Shearer ka kritikuar sjelljen e Cristiano Ronaldos, duke e cilësuar atë si të papërshtatshme për nivelin dhe statusin e tij.

Më herët, sulmuesi portugez mungoi në ndeshjen e kampionatit ndaj Al-Riyadh, të cilën skuadra e tij e fitoi 1-0. Po ashtu, u raportua se ai nuk mori pjesë as në stërvitje pas kësaj përballjeje.

Para kësaj, u bë e ditur se Ronaldo është i pakënaqur me mënyrën se si Fondi Sovran i Arabisë Saudite (PIF) po e menaxhon klubin e tij, krahasuar me rivalët, veçanërisht Al-Hilal. Gjithashtu, kishte raportime se portugezi ishte kundër transferimit të Karim Benzemas te Al-Hilal, duke e konsideruar atë si “dëm për konkurrencën”.

Për zhvillimet në Ligën Saudite ka reaguar edhe Shearer, i cili kritikoi Ronaldon që paguhet tepër dhe vendosë të hyjë në “grevë”.

“Jo shumë njerëz fitojnë më shumë se 400 mijë euro në ditë dhe vendosin të hyjnë në grevë. Duhet të jetë bukur të thuash se nuk do të shkosh në punë, pavarësisht parave që fiton”.

“Kur e mendon mirë, kjo duket e çuditshme. Ai është një superyll, por një grevë në atë nivel duket keq”, ka deklaruar ai.

Ndërkohë, Ronaldo ka refuzuar të luajë edhe ndaj Al Ittihad, kurse nuk dihet për sa kohë do ta vazhdojë këtë qëndrim./Telegrafi

Juventus ka vendosur mesfushorin e Newcastle United, Sandro Tonali, si objektivin kryesor të tregut të transferimeve të verës.

Sipas “Gazzetta dello Sport”, drejtuesit e “Zonjës së Vjetër” janë të bindur se italiani dëshiron të rikthehet në Itali, duke e parë skuadrën italiane si destinacion ideal për hapin e radhës në karrierë.

Megjithatë, Juve është e vetëdijshëm se një operacion i tillë do të kërkonte një investim të konsiderueshëm financiar. Klubi bardhezi shpreson që situata e Newcastle United në garën për kualifikim në Ligën e Kampionëve sezonin e ardhshëm të luajë rol vendimtar në negociata.

Në rast se skuadra angleze nuk arrin të sigurojë pjesëmarrjen në Ligën e Kampionëve, ekziston mundësia që ajo të detyrohet të shesë një nga yjet e saj për të respektuar rregullat e Fair Play-it Financiar, duke hapur kështu derën për një rikthim të Tonalit në Serie A.

Kujtojmë se 25-vjeçari në të kaluarën ishte pjesë e Milanit. /Telegrafi/

Bayern Munich ka vënë në shënjestër dy mbrojtës të rinj, Yann Aurel Bisseck nga Interi dhe Luka Vuskovic nga Tottenhami, si zëvendësues të mundshëm të ish-yllit të Napolit, Kim Min-jae.

Sipas raportimit të “Sport1”, gjiganti i Bundesligës po shikon nga Serie A dhe Liga Premier për përforcime në repartin defensiv për sezonin 2026/27. “Bavarezët” janë të gatshëm të dëgjojnë oferta për Kim Min-jae në sezonin e ardhshëm dhe tashmë kanë identifikuar dy kandidatë seriozë për ta zëvendësuar mbrojtësin nga Koreja e Jugut.

Një nga opsionet kryesore është qendërmbrojtësi i Interit, Yann Aurel Bisseck. Gjermani 25-vjeçar është shndërruar së fundmi në titullar të rregullt në “Stadio Meazza” dhe këtë edicion ka regjistruar 21 paraqitje në të gjitha garat. Interesimi për të nuk është i ri, pasi verën e kaluar Crystal Palace kishte bërë një ofertë prej 32 milionë eurosh, por Interi e refuzoi atë.

Raportimet e mëparshme bënin të ditur se Interi e kishte vendosur çmimin e Bisseck rreth 40 milionë euro verën e kaluar. Megjithatë, paraqitjet gjithnjë e më bindëse të mbrojtësit me fanellën e zikaltërve sugjerojnë se shifra e kërkuar në afatin e ardhshëm kalimtar mund të jetë edhe më e lartë.

Alternativa tjetër për Bayern Munich është Luka Vuskovic, një talent 18-vjeçar që është nën kontratë me Tottenhamin. Kroati aktualisht është i huazuar te Hamburger SV për sezonin 2025/26, ku po fiton përvojë të rëndësishme në futbollin gjerman dhe po monitorohet nga afër nga drejtuesit bavarezë.

Bayern Munich duket i vendosur të rinovojë mbrojtjen e tij në vitet e ardhshme dhe emra si Bisseck e Vuskovic tregojnë qartë fokusin te lojtarët e rinj me potencial të madh zhvillimi./Telegrafi

Sulmuesi Brajan Gruda thotë se është i nderuar që i lejohet të luajë me këpucët e Lionel Messit, ndërsa ëndërron ftesë nga Gjermania për Kupën e Botës 2026.

Gruda ka qenë një nga lojtarët që Messi i ka zgjedhur si talentët e ardhshëm, ndërsa ditë më parë kompletoi kalimin në formë huazimi te RB Leipzigu nga Brightoni.

Në një intervistë për “BILD”, Gruda ka treguar për çfarë arsye i përdorë këpucët e Lionel Messit.

“Jam fans shumë i madh i Messit. Është lojtari më i mirë i të gjitha kohërave. Është motivim i madh. Nder për mua që mund t’i mbajë këpucët e tij”.

Gruda ka ardhur me ambicie të qartë te Leipzigu, ngase synon t’iu ndihmojë ta sigurojnë një vend për Kampionatin Botëror 2026.

“Jam 100 për qind gati që të luaj qysh në ndeshjen e radhës. Trajneri do të vendos nëse luaj apo jam rezervë, do të jap më të mirën”.

“Jam rritur personalisht dhe si futbollist te Brightoni, por tani dua ta ndihmoj Leipzigun që të kualifikohemi për garat evropiane. Stili i Leipzigut më përshtatet. Stërvitet janë të ngjashme si në Angli, tani dua të luaj dhe të tregoj çfarë mund të bëj”.

Edhe pse kërkohet me ngulm nga Shqipëria, Gruda për ambicie vazhdon ta ketë Gjermaninë, ku pret ftesë nga Julian Nagelsmann për Botërorin.

“Do të gënjeja nëse do të thosha se nuk është në mendjen time. Dua të shkoj në Kupën e Botës, për këtë që të ndodhë, paraqitja ime në fushë duhet të jetë e duhura. Nëse paraqitem mirë, gjërat mund të ndodhin shpejtë”./Telegrafi

Serge Gnabry ka vendosur ta vazhdojë bashkëpunimin edhe më gjatë të Bayern Munichun, duke rinovuar kontratën me klubin bavarez deri në vitin 2028.

Lajmi është konfirmuar zyrtarisht nga Bayern Munichu të enjten, duke i dhënë fund çdo dileme rreth së ardhmes së anësorit gjerman, i cili mbetet një nga figurat kyçe të skuadrës.

Gnabry është pjesë e Bayernit që nga viti 2018 dhe gjatë kësaj periudhe është shndërruar në një element të rëndësishëm të repartit ofensiv. Në edicionin aktual, 30-vjeçari ka regjistruar 24 paraqitje në të gjitha garat, duke dhënë kontribut të drejtpërdrejtë në fazën sulmuese të skuadrës.

Futbollisti i lindur në Stuttgart ka shënuar shtatë gola dhe ka dhuruar tetë asistime këtë sezon, duke dëshmuar rëndësinë e tij në skemat e trajnerit dhe në sukseset e ekipit.

Në total, Gnabry ka zhvilluar 309 ndeshje me fanellën e Bayern Munichut, statistika që pasqyrojnë vazhdimësinë dhe besimin e klubit ndaj tij. Në këto paraqitje, ai ka realizuar 100 gola dhe ka asistuar 70 herë për bashkëlojtarët.

“Synimi është që të vazhdoj kështu. Jemi të bashkuar dhe mund të arrijmë gjëra të mëdha. Ndihem rehat te Bayerni, me ekipin, stafin e trajnerëve, gjithë klubin, tifozët, qytetin dhe ambientin”, ka deklaruar Gnabry pas rinovimit të kontratës.

Me këtë marrëveshje të re, Bayern Munichu siguron vazhdimësinë e një prej lojtarëve më me përvojë dhe më produktivë të skuadrës, ndërsa vetë Gnabry konfirmon përkushtimin e tij ndaj klubit më të madh gjerman./Telegrafi

Atalanta ka shënuar fitore bindëse në shtëpi ndaj Juventusit, për ta prerë biletën për në gjysmëfinale të Kupës së Italisë.

Vendasit regjistruan fitore 3-0 pavarësisht që “Zonja e Vjetër” ishte larg më dominuese edhe më krijuese.

Juventusi e nisi fuqishëm për të rrezikuar me Francisco Cocecaion dhe Manuel Locatellin, që dështuan t’i finalizojnë rastet.

Ishte Bremer që preku topin me dorë brenda zonës, kësisoj gjyqtari akordoi penallti. Nga pika e bardhë Gianluca Scamacca ishte i pagabueshëm për ta zhbllokuar rezultatin (27’).

Mysafirët sërish ishin afër të barazonin përmes Weston McKennie, por goditja e amerikanit doli të jetë afër shtyllës së djathtë.

Derisa Juventusi po sulmonte, Atalanta krijoi një kundëraksion fantastik, me Kamaldeen Sulemana që shënoi nga afërsia për ta dyfishuar epërsinë (77’).

Ndërsa, fitoren e thellë të Atalantas e vulosi Mario Pasalic me një goditje të saktë nga distanca (85’).

Vlen të ceket se sulmuesi Edon Zhegrova u inkuadrua vonë, pra në minutën e 80-të.

Atalanta kësisoj avancon në gjysmëfinale, ku do të përballet me fituesin e çerekfinales Bologna – Lazio./Telegrafi

Liga Profesionale Saudite ka reaguar zyrtarisht pas protestës së Cristiano Ronaldos, duke theksuar se struktura e kampionatit bazohet në pavarësinë e plotë të klubeve.

Ronaldo ka refuzuar të luajë në ndeshjen e fundit ndaj Al Riyadh, si dhe ka vazhduar “protestën” pasi do të mungojë edhe në sfidën e radhës, pra të premten kundër Al Ittihad.

Liga Saudite për herë të parë ka reaguar zyrtarisht, duke ia bërë të qartë Ronaldos se vendimet e transferimeve i takojnë klubeve dhe jo individëve.

“Liga Profesionale Saudite është e ndërtuar mbi një parim të thjeshtë: çdo klub operon në mënyrë të pavarur sipas të njëjtave rregulla”.

“Klubet kanë bordet e tyre drejtuese, drejtuesit ekzekutivë dhe strukturën e tyre futbollistike. Vendimet për rekrutimin, shpenzimet dhe strategjinë i takojnë vetë klubeve, brenda një kuadri financiar të projektuar për të garantuar qëndrueshmëri dhe balancë konkurruese. Ky kuadër zbatohet në mënyrë të barabartë për të gjithë kampionatin”.

“Cristiano ka qenë plotësisht i përfshirë me Al Nassr që nga ardhja e tij dhe ka luajtur një rol të rëndësishëm në rritjen dhe ambiciet e klubit. Si çdo konkurrues elitar, ai dëshiron të fitojë. Por asnjë individ – sado i rëndësishëm të jetë – nuk përcakton vendime përtej klubit të tij”.

“Aktiviteti i fundit në merkato e dëshmon qartë këtë pavarësi. Një klub u përforcua në një mënyrë të caktuar. Një tjetër zgjodhi një qasje ndryshe. Këto ishin vendime të klubeve, të marra brenda parametrave financiarë të miratuar”.

“Konkurrenca e kampionatit flet vetë. Me vetëm pak pikë diferencë mes katër skuadrave të para, gara për titull mbetet plotësisht e hapur. Ky nivel ekuilibri pasqyron një sistem që po funksionon ashtu siç është menduar”.

“Fokusi mbetet te futbolli – në fushë, aty ku i takon – dhe te ruajtja e një gare të besueshme dhe konkurruese për lojtarët dhe tifozët”.

Mbetet të shihet nëse Ronaldo do të ndryshojë qasje dhe të fillojë sërish të luajë për Al Nassr./Telegrafi

Arsenali provoi në ditën e fundit të afatit kalimtar dimëror ta bind mesfushorin e Bayern Munichut, Leon Goretzka, por ky i fundit e refuzoi ofertën.

Londinezët shprehën interesim për të marrë një mesfushor rreth 24 orë para se të mbyllet afati i janarit, pasi mësuan se Mikel Merino do të mungojë për një periudhë të gjatë shkaku i lëndimit.

Sipas gazetarit të BILD, Christian Falk, Goretzka i cili ka konfirmuar se do të largohet nga Bayerni në verë ishte në “radarin” e Arsenalit, megjithatë refuzoi edhe të negocionte.

“Lideri i Ligës Premier kishte interesim serioz për ta transferuar Goretzkan para se të mbyllet afati dimëror. Sidoqoftë, ish mesfushori i Schalke e ka informuar Bayernin se dëshiron të qëndrojë për pjesën e mbetur të sezonit dhe nuk kishte interesim për këtë lëvizje”, raporton ai.

Megjithatë, Falk konfirmoi se gjasat janë të mëdha që gjermani t’i bashkohet Arsenalit në verën e vitit 2027.

“Ekziston një shans i fortë që Goretzka të shkojë te Arsenali në verën e ardhshme nëse klubi londinez bënë ndonjë ofertë me të. Gjermani beson se i përshtatet stilit të lojës së Ligës Premier në mënyrë perfekte, prandaj një lëvizje potenciale nuk mund të mohohet”.

Përpos Arsenalit, interesim për Goretzkan kanë shprehur edhe Tottenhami e Atletico Madridi./Telegrafi

Shtëpitë e futbollit, UEFA dhe FIFA kanë dërguar letra në zyrën e Federatës së Futbollit të Kosovës (FFK) për ta uruar presidentin Agim Ademi për rizgjedhjen si kryetar edhe për katër vite.

Ademi si kandidat i vetëm e siguroi edhe një mandat në krye të FFK-së, ku të gjithë e votuan, ndërsa nuk kishte asnjë abstenim apo kundërshtim.

Urimet drejt Ademit kanë ardhur edhe nga shtëpitë e futbollit, që e kanë uruar për rizgjedhjen në krye.

“I nderuar presidenti Agim, jam i lumtur të ndaj urimet për rizgjedhjen tuaj si president i Federatës së Futbollit të Kosovës”.

“Rritja dhe zhvillimi me një ritëm shumë të qëndrueshëm janë qartësisht të dukshme si në futbollin e femrave ashtu edhe në futbollin e meshkujve, ku për herë të parë së shpejti do ta shohim përfaqësuesen kombëtare të garojë në “play-off” për një vend në Kupën e Botës, duke shënuar një moment vërtet të veçantë në kohën e duhur për futbollin në Kosovë”.

“Ju uroj gjithë të mirat, Agim, teksa hyni në kapitullin e radhës plot entuziazëm që ju pret përpara”, thuhet në letrën e presidentit të UEFA-s Aleksandr Ceferin.

Ndërsa, presidenti i FIFA-s Gianni Infantino përpos Ademit, uroi edhe Komitetin Ekzekutiv, si dhe i falënderoi për kontributin e punës që po bëjnë në Kosovë.

“I nderuar z. President,

Ju lutem pranoni përshëndetjet e mia më të përzemërta dhe urimet më të sinqerta për rizgjedhjen tuaj si President i Federatës së Futbollit të Kosovës.

Do të isha mirënjohës nëse do t’i përcillnit gjithashtu urimet e mia edhe anëtarëve të Komitetit Ekzekutiv të zgjedhur bashkë me ju, ndërsa shfrytëzoj këtë rast për t’ju falënderuar për të gjitha përpjekjet tuaja, punën tuaj dhe kontributin e rëndësishëm në zhvillimin e sportit tonë dhe promovimin e vlerave të tij në Kosovë.

Ju dërgoj juve dhe ekipit tuaj urimet më të mira për këtë mandat të ri dhe shumë suksese për të gjitha sfidat që ju presin përpara. Pres me kënaqësi, i nderuar z. President, të vazhdojmë bashkëpunimin për rritjen dhe prosperitetin e futbollit në Kosovë në vitet në vijim”, thuhet në letrën e FIFA-s./Telegrafi

Fondi Publik i Investimeve të Arabisë Saudite jo vetëm që nuk ka bërë investime të reja te Al Nassr dhe klubet e tjera rivale, por tashmë ka edhe raportime për vonesa në pagesën e pagave.

Në këto rrethana, bojkoti i Cristiano Ronaldos ndaj ndeshjeve të Al Nassr mund të vazhdojë. Kapiteni i Portugalisë thuhet se është i vetëdijshëm se nuk ka pasur asnjë ndryshim në qasjen e fondit saudit, deri në atë pikë sa, pas mungesës së investimeve në treg – sidomos në krahasim me rivalët si Al Hilal – tani kanë dalë në pah edhe vonesa të konsiderueshme në pagesën e pagave të lojtarëve.

Sipas “A BOLA”, Cristiano Ronaldo do të presë që situata të zgjidhet përpara se të rikthehet në garë. Nëse problemi zgjidhet me kohë, ai mund të jetë i gatshëm për Jorge Jesus që këtë të premte, pikërisht në ndeshjen kundër Al Ittihadit, skuadër e drejtuar nga Sergio Conceiçao.

Në të kundërtën, nëse pagat nuk shlyhen, portugezi pritet të vazhdojë bojkotin, duke thelluar edhe më shumë krizën te Al Nassr.

Një pjesë e madhe e punëtorëve te skuadra e Al Nassr thuhet se nuk janë paguar për një periudhë, gjë që ka zemëruar edhe më shumë pesë herë fituesin e Topit të Artë.

Ndërkohë, Nassr mbetet në garë për titull – duke u renditur në pozitën e dytë me 46 pikë, një më pak se lideri Al Hilal./Telegrafi

Mohamed Salah është shfaqur si objektivi kryesor i transferimeve për një klub të Liga Saudite, pas largimit të Karim Benzemas nga Al Ittihadi.

Kjo është hera e parë që një klub i Liga Saudite shfaq interes konkret për yllin egjiptian. Pa asnjë dyshim, Cristiano Ronaldo mbetet fytyra kryesore e kampionatit saudit, por drejtuesit e ligës kanë dashur prej kohësh ta sjellin Mohamed Salah dhe ta bëjnë atë figurën qendrore të projektit të tyre.

Sipas “winwin”, një klub i mbështetur nga PIF po përgatit një ofensivë të re për sulmuesin e Liverpoolit, me synimin për të zëvendësuar një ish-fitues të Topit të Artë.

Sezonin e kaluar, Salah ishte ndoshta në formën e tij më të mirë dhe ndihmoi Liverpoolin të fitonte titullin në Ligë Premier, në sezonin e parë të Arne Slot në krye të skuadrës në "Anfield". Megjithatë, raportimet për një përplasje me Slot dhe drejtuesit e klubit më herët gjatë sezonit kanë ngritur pikëpyetje të reja mbi të ardhmen e tij afatgjatë.

Pikërisht këtë situatë dëshiron ta shfrytëzojë Al Ittihad, duke planifikuar një lëvizje për Mohamed Salah në verën e ardhshme, pas largimit të Karim Benzema gjatë afatit dimëror. Ikja e francezit ka lënë një boshllëk të madh në strukturën sulmuese të klubit arab dhe Salah shihet si nënshkrimi ideal për ta mbushur atë hapësirë.

Deri më tani nuk ka pasur kontakte zyrtare mes klubeve, por besohet se Salah do të ishte i hapur për një transferim nëse Al Ittihad arrin marrëveshje me Liverpoolin.

Megjithatë, klubi saudit do të veprojë me kujdes, pasi egjiptiani ka kontratë deri në vitin 2027, ndërsa pasiguria rreth të ardhmes së Arne Slot e bën këtë operacion edhe më të ndërlikuar./Telegrafi