Në episodin më të ri të podcastit “Arena e Yjeve”, vjen analiza e gazetarëve të Telegrafit, të cilët diskutuan gjerësisht për zhvillimet aktuale në futbollin vendor dhe ndërkombëtar. Ky episod realizohet me mbështetjen e sponsorëve zyrtarë Golden Eagle dhe Exfis.

Gjatë bisedës, gazetarët ndanë opinione të drejtpërdrejta dhe shpesh kritike për futbollin kosovar, duke prekur temat më të nxehta të momentit.

Gazetari Lavdim Pireva u tregua i ashpër ndaj Prishtinës për rezultatet e tyre ndërsa vuri në pah rëndësinë e seriozitetit në ndeshjet vendimtare.

Nga ana tjetër, gazetari Romak Zeqiri adresoi një problem të kahershëm të klubeve vendore, duke bërë thirrje që kontratat e lojtarëve të rinovohen me kohë, në mënyrë që të mos largohen falas dhe të dëmtohen klubet financiarisht dhe sportivisht.

Diskutimi u zhvendos edhe te parashikimet për sezonin aktual. Gazetari Shkumbin Pireva dha mendimin e tij se kush pritet të shpallet kampion dhe cilat skuadra do të sigurojnë pjesëmarrje në garat evropiane, duke analizuar formën, kontigjentin dhe stabilitetin e klubeve.

Në një tjetër parashikim, Romak Zeqiri u shpreh se Drita është favorite për titullin kampion, ndërsa Gjilani pritet të përfundojë sezonin mbi Prishtinën, bazuar në performancat e deritanishme.

Lavdim Pireva vlerësoi Ballkanin si skuadrën me lojën më të mirë në kampionat, duke parashikuar se ekipi nga Suhareka do të shpallet kampion, falë organizimit dhe stabilitetit në lojë.

Një temë tjetër e rëndësishme ishte edhe formati i ri i garave të UEFA-s, për të cilin Shkumbin Pireva u shpreh se është “gjëja më e mirë që i ka ndodhur futbollit”, duke theksuar më shumë ndeshje cilësore dhe rivalitet më të madh.

Në fund, gazetarët dhanë edhe parashikimet e tyre për fituesin e Ligës së Kampionëve këtë sezon, duke ndarë mendime të ndryshme dhe argumente interesante për ekipet favorite.

Episodin e plotë me gazetarët e Telegrafit mund ta ndiqni në kanalin zyrtar të Telegrafit në YouTube./Telegrafi/

Mesfushori shqiptar Kristjan Asllani siguroi të premten kalimin në formë huazimi te gjiganti turk Besiktas.

Asllani do të luajë atje në formë huazimi deri në fund të sezonit aktual, me klubin turk që mban gjithashtu opsionin për blerjen përfundimtare të kartonit të tij.

Pasi veshi fanellën e Besiktasit, Asllani dha deklaratën e tij të parë, duke thënë se ka lindur si shqiponjë dhe këtë ja atribuon flamurit të Shqipërisë dhe e ndërlidh me ‘Shqiponjat’ që është nofka e Besiktasit.

“Kam lindur si shqiponjë, ky është në gjakun tim. Një shqiponjë kurrë nuk tërhiqet. Do ta tregoj këtë. Kam lindur për të fluturuar”.

“Jam krijuar për të luftuar. Nuk kam frikë. Nuk ka justifikime. Me zemër, plot përqendrim. Kam lindur si shqiponjë. Gjithmonë do të jem një shqiponjë", ka deklaruar Asllani.

Pasi kishte humbur minutat te Interi, 23-vjeçari ishte huazuar fillimisht te Torino por as atje nuk ia doli të gjejë hapësirat që ai dëshironte.

Mbetet të shihet tani nëse ai do të shkëlqejë nën urdhrat e trajnerit Sergen Yalcin, që këtë sezon kanë si objektiv kualifikimin në garat evropiane./Telegrafi/

Kapiteni i Sunderlandit, Granit Xhaka, do të vazhdojë të mungojë në fushë edhe për disa javë të tjera, duke i dhënë një goditje të ndjeshme ambicieve të skuadrës në këtë fazë të sezonit.

Trajneri Regis Le Bris ka konfirmuar se mesfushori shqiptar nuk është ende gati për t’u rikthyer, për shkak të lëndimit në nyjën e këmbës.

33-vjeçari, i cili është një nga figurat kyçe të Sunderlandit këtë edicion, mungoi edhe në humbjen 3-1 ndaj West Ham United fundjavën e kaluar.

Para përballjes të së hënës ndaj Burnleyt, tekniku francez sqaroi se gjendja e Xhakës po përmirësohet, por rikthimi i tij nuk do të jetë i menjëhershëm.

“Graniti është duke punuar mirë. Do ta vlerësojmë gjendjen e tij në javën e ardhshme, por me shumë gjasë do të mungojë edhe tri javë”, ka deklaruar Le Bris.

Xhaka iu bashkua Sunderlandit verën e kaluar nga Bayer Leverkuseni dhe menjëherë u shndërrua në lider të ekipit.

Deri tani, ai ka zhvilluar 23 ndeshje në të gjitha garat, duke qenë titullar në 22 prej tyre në Ligën Premier. Kontributi i tij është reflektuar edhe në statistika, me një gol dhe pesë asistime.

Për shkak të këtij lëndimi, mesfushori pritet të mungojë në dy ndeshje shumë të rëndësishme, përballjen ndaj ish-skuadrës së tij, Arsenalit, më 7 shkurt, si dhe sfidën në shtëpi ndaj Liverpoolit më 11 shkurt.

Rikthimi i tij pritet të jetë vendimtar për Sunderlandin në vazhdimësinë e sezonit, teksa klubi shpreson që kapiteni të kthehet sa më shpejt në formën e tij optimale./Telegrafi/

Trajneri i përkohshëm i Manchester United, Michael Carrick, raportohet se është i interesuar ta rikthejë Marcus Rashford në Old Trafford, nëse do ta marrë përfundimisht drejtimin e skuadrës.

Reprezentuesi i Anglisë është aktualisht i huazuar te kampionët e La Ligës këtë sezon, me skuadrën e drejtuar nga Hansi Flick që ka një opsion për ta bërë transferimin të përhershëm gjatë verës.

Rashford nuk ishte në planet e ish-trajnerit të United, Ruben Amorim, por situata duket ndryshe nën drejtimin e Carrick. Sulmuesi u largua nga United drejt Barcelonës në formë huazimi për këtë sezon dhe deri tani ka lënë përshtypje shumë pozitive te blaugranasit.

Deri më sot, ai ka shënuar nëntë gola, pesë prej tyre në Ligën e Kampionëve dhe ka regjistruar nëntë asistime në 31 paraqitje. 28-vjeçari ishte shpallur i tepërt nga Amorim në ‘Old Trafford’, ndërsa tani duket se është i interesuar ta bëjë të përhershëm qëndrimin e tij në ‘Camp Nou’. Megjithatë, mbetet për t’u parë nëse Barcelona mund ta përballojë klauzolën e blerjes prej 26 milionë eurosh.

Sipas The Telegraph, edhe pse Carrick do të dëshironte rikthimin e ish-shokut të tij të skuadrës te United sezonin e ardhshëm, në rast se ai vazhdon në krye të ekipit, është “e vështirë të shihet që kjo të ndodhë”.

Në të kaluarën, Amorim kishte deklaruar se do të preferonte të përfshinte në stol trajnerin 63-vjeçar të portierëve sesa një lojtar që nuk jep maksimumin, duke iu përgjigjur një pyetjeje në lidhje me Rashfordin.

Ndërkohë, Manchester United kishte interes edhe të ulte faturën e pagave të larta të lojtarit, kontrata e të cilit skadon në vitin 2028.

Për më tepër, raporti thekson se Rashford është ‘i lumtur’ në Barcelonë, Flick e dëshiron atë përfundimisht në skuadër, dhe njerëz pranë sulmuesit anglez thonë se ai ‘ka rifituar buzëqeshjen’./Telegrafi/

Ish-kampioni i botës në peshat e rënda, Anthony Joshua, foli për aksidentin tragjik me makinë në Nigeri, në të cilin humbën jetën dy persona.

Joshua pësoi lëndime jo kërcënuese për jetën në aksident dhe tani ai ka folur publikisht për herë të parë për incidentin në të cilin u vranë dy nga miqtë e tij më të ngushtë, shkruan MMAWeekly.com.

Aksidenti ndodhi dhjetë ditë pasi Joshua e mposhti Jake Paul me nokaut në raundin e gjashtë më 19 dhjetor në Miami.

Gjatë një vizite në Nigeri, makina në të cilën ndodhej Joshua u përfshi në një aksident fatal. Trajneri i tij Latif "Latz" Ayodele dhe trajneri i fitnesit Sina Ghami humbën jetën në aksident.

Joshua foli për tragjedinë të enjten në një videomesazh të gjatë dhe gjithashtu postoi një shënim falënderimi me shkrim së bashku me videon.

"Sinqerisht, më duheshin disa përpjekje për ta bërë këtë foto, por doja t'ju falënderoja të gjithëve për dashurinë dhe mbështetjen që më keni treguar që nga aksidenti”.

“Gjithashtu, do të doja të shfrytëzoja këtë rast për të falënderuar shërbimet e urgjencës, të gjithë ata që nxituan të ndihmonin Latzin dhe Sinën, ata që më ndihmuan të shkoja në spital dhe të gjithë vendasit që u lutën për ne në vendngjarje”.

Ai i bëri një homazh të veçantë stafit mjekësor, diplomatëve dhe biznesmenëve.

"Mjekëve dhe infermierëve në Spitalin Lagoon Ikoyi, përfshirë Dr. Ogunyankin, Dr. Tosin Majekodunmi dhe Dr. Ninalow, faleminderit për kujdesin tuaj”.

“Do të doja gjithashtu të falënderoja Zëvendës Komisionerin e Lartë Britanik, Simon Field. Një falënderim i madh për xhaxhain Femi Otedola dhe Alhaji Aliko Dangote për gjithë mbështetjen e tyre logjistike. Pa ju, kthimi në Mbretërinë e Bashkuar nuk do të kishte qenë kaq i qetë", ka deklaruar Joshua./Telegrafi/

Tregu evropian i transferimeve po nis të gjallërohet me lajme që lidhin drejtpërdrejt zyrat e 'Stamford Bridge' me Barcelonën.

Chelsea ka vënë në shënjestër Ferran Torres, sulmuesin e gjithanshëm spanjoll që po kalon një periudhë shumë të mirë realizuese në kampionatin spanjoll.

Drejtuesit sportivë të klubit londinez po kërkojnë me ngulm një pikë referimi në zonë për ta kompletuar eksplozivitetin e talenteve të rinj si Cole Palmer dhe Estevao. Me fundin e sezonit 2025/26 në horizont, lëvizjet strategjike për të siguruar lojtarë elitarë janë shndërruar në prioritet absolut.

Skuadra angleze po përgatit një ofertë financiare që mund të arrijë deri në 80 milionë euro, në përpjekje për ta bindur bordin katalanas të ndahet nga lojtari i saj.

Ferran ndodhet në një moment kyç të kontratës, pasi marrëveshja e tij aktuale me Barcelonën skadon në verën e vitit 2027.

Chelsea beson fuqishëm se premtimi për statusin e titullarit të padiskutueshëm do të jetë faktori vendimtar për finalizimin e transferimit të reprezentuesit spanjoll.

Ndryshe nga roli i tij aktual, në Angli atij do t’i garantohej pozita e sulmuesit qendror në një skemë tejet ofensive.

Trajneri aktual i “Bluve”, Liam Rosenior, është deklaruar admirues i madh i aftësive taktike të futbollistit spanjoll.

Ai vlerëson veçanërisht agresivitetin e tij natyral për të shfrytëzuar hapësirat e lira, lehtësinë në kombinime dhe aftësinë për të luajtur edhe në krahë./Telegrafi/

Dani Ceballos mund të jetë duke u penduar për vendimin që mori verën e kaluar për të refuzuar Marseillen dhe për të qëndruar te Real Madridi, pasi situata e tij aktuale po del jashtë kontrollit.

Mesfushori spanjoll nuk ishte një titullar i rregullt nën drejtimin e Xabi Alonsos, por ardhja e Alvaro Arbeloas si trajner i ri e ka përkeqësuar edhe më shumë pozitën e tij.

Në ndeshjet e para nën drejtimin e Arbeloas, Ceballos mezi ka luajtur , duke u shfaqur vetëm disa herë kundër Levantes (28 minuta ) dhe Monacos (45 minuta), duke mos arritur të ketë ndikim të mjaftueshëm për të bindur trajnerin.

Ceballos ka mbetur në bankë rezervë në tetë nga dhjetë ndeshjet e fundit, çka tregon qartë se ai ka rënë ndjeshëm në hierarkinë e mesfushës.

Vendimi i Arbeloas për të aktivizuar Jorge Cesteron nga stoli përpara Ceballosit në ndeshjen kundër Benficës këtë javë, e thekson edhe më shumë pasigurinë e së ardhmes së tij në ‘Santiago Bernabeu’.

29-vjeçari tashmë përballet me një detyrë shumë të vështirë për të rikthyer besimin e Arbeloas dhe për t’u shndërruar sërish në një lojtar të rregullt të ekipit./Telegrafi/

Elena Rybakina ka fituar Australian Open, duke triumfuar në finalen e së shtunës ndaj numrit një në botë, Aryna Sabalenka, me rezultat 6-4, 4-6, 6-4 në një përballje spektakolare që zgjati 2 orë e 18 minuta në Rod Laver Arena.

Tenistja kazake, e renditur e pesta në botë, arriti të mbajë qetësinë në momentet vendimtare, duke marrë revanshin për humbjen ndaj Sabalenkës në finalen e vitit 2023 në Melbourne.

Me këtë fitore, Rybakina siguron titullin e saj të dytë Grand Slam, pas triumfit në Wimbledon në vitin 2022.

Rybakina e nisi fuqishëm ndeshjen, duke thyer menjëherë shërbimin e kundërshtares dhe duke fituar setin e parë pas 37 minutash, në atë që ishte seti i parë i humbur nga Sabalenka gjatë gjithë turneut të vitit 2026.

Në setin e dytë, Sabalenka reagoi fuqishëm dhe barazoi ndeshjen, duke e çuar finalen në set vendimtar.

Seti i tretë ishte tejet i tensionuar, me Sabalenkën që mori epërsinë e parë, por Rybakina reagoi në mënyrë mbresëlënëse, riktheu baraspeshën dhe më pas siguroi një seri pikësh vendimtare.

Tenistja 26-vjeçare e mbylli ndeshjen me ace-in e saj të gjashtë, duke vulosur një fitore të madhe.

Ky ishte takimi i 15-të mes dy tenisteve, me Sabalenkën që kishte avantazh në përballjet direkte, por Rybakina ka qenë një nga lojtaret më në formë muajt e fundit.

Ajo kishte mposhtur gjithashtu Sabalenkën edhe në finalen e WTA Finals, ndërsa në Melbourne eliminoi emra të mëdhenj si Iga Swiatek dhe Jessica Pegula./Telegrafi/

Ngjarja shumë e pritur e UFC-së para Shtëpisë së Bardhë mund të ketë arritur një nivel tjetër.

Sipas Presidentit të Shteteve të Bashkuara, Donald Trump, ky event i UFC-së do të përfshijë një stadium përpara Shtëpisë së Bardhë, i cili do të ketë kapacitet deri në 100,000 persona.

Trump nuk dha detaje të tjera rreth strukturës së propozuar, por me më pak se pesë muaj deri në zhvillimin e eventit, ndërtimi mund të duhet të fillojë së shpejti.

Të premten, Trump foli me gazetarët për të njoftuar se Washington D.C. do të presë gjithashtu një garë IndyCar në rrugët e qytetit këtë gusht.

Ky event shtohet në festimet e përgjithshme për 250-vjetorin e Amerikës këtë verë, dhe kjo e nxiti Trumpin të përmendë ngjarjen e UFC-së para Shtëpisë së Bardhë dhe planet për të ndërtuar një stadium me 100,000 vende.

“UFC po vjen, siç e dini, përpara Shtëpisë së Bardhë. Ata po ndërtojnë, në kuptimin e plotë të fjalës, një stadium. Do të kemi mbi 100,000 njerëz”, ka deklaruar Trump.

Nëse kjo do të ndodhë vërtet, do të ishte diçka e jashtëzakonshme. Mos harrojmë se CEO i UFC-së, Dana White, tashmë ka konfirmuar se organizata do të vendoset në një park pranë për të pritur 85,000 tifozë të UFC-së.

White dhe ekipi i tij po përpiqen të “pushtojnë” Washington D.C.-në dhe t’i japin adhuruesve të sporteve luftarake një përvojë që nuk do ta harrojnë, sidomos duke pasur parasysh se vetë eventi i UFC-së para Shtëpisë së Bardhë do të jetë vetëm me ftesa./Telegrafi/

Taulant Hodaj ka reaguar ashpër ndaj zhvillimeve të fundit në Federatën e Futbollit të Kosovës (FFK), duke vënë në pikëpyetje ligjshmërinë dhe legjitimitetin e procesit zgjedhor të paralajmëruar për 5 shkurt.

Sipas tij, mënyra se si po organizohen këto zgjedhje e përjashton garën reale dhe bie ndesh me parimet bazë të demokracisë sportive.

Hodaj bën të ditur se është kontaktuar nga klube dhe media lidhur me një kandidaturë të mundshme për kryetar të FFK-së, por thekson se një garë e tillë mund të ketë kuptim vetëm nëse zhvillohet në kushte të barabarta dhe të ligjshme.

Ai nënvizon se problemi kryesor në futbollin kosovar është qeverisja aktuale dhe se çdo ndryshim i vërtetë duhet të nisë nga maja e federatës.

Në reagimin e tij, Hodaj e cilëson Kuvendin e 5 shkurtit si të jashtëligjshëm, duke iu referuar edhe vlerësimeve të Ministrisë së Sportit.

Sipas tij, kriteret aktuale për kandidim, veçanërisht kërkesa për 15 nënshkrime nga një numër i kufizuar anëtarësh, e bëjnë garën praktikisht të pamundur dhe favorizojnë vetëm një kandidat.

Ai shton se këto kritere janë në kundërshtim jo vetëm me ligjet vendore dhe statutin e FFK-së, por edhe me rregulloret e UEFA-s dhe FIFA-s.

Hodaj thekson se vetë institucionet ndërkombëtare të futbollit kanë vlerësuar se ky model përbën një dispozitë diskriminuese dhe se kërkesa për nënshkrime duhet të jetë shumë më e ulët për të garantuar konkurrencë të ndershme.

Hodaj mohon pretendimet se institucionet e Kosovës po ndërhyjnë në pavarësinë e federatës, duke theksuar se ligjshmëria dhe transparenca nuk përbëjnë ndërhyrje, por standard minimal të qeverisjes sportive./Telegrafi/

Raportimet nga Italia pretendojnë se Milani po afron drejt një marrëveshjeje të plotë me Crystal Palace për sulmuesin qendror Jean-Philippe Mateta, por “Rossonerët” ende kanë dy pengesa për t’i kapërcyer para se të mirëpresin francezin në “San Siro”.

Sipas raporteve të së premtes, Milani ka arritur një marrëveshje me Matetan, i cili po shtyn për t’u bashkuar me skuadrën e Massimiliano Allegri që në janar.

Përditësimet nga Gazzetta dello Sport të shtunën në mëngjes tregojnë se Mateta është gati të firmosë një kontratë deri në vitin 2030, me pagë rreth 3.5 milionë euro në sezon.

Sipas përditësimit të së shtunës, Milani po pret të kuptojë nëse do të jetë e mundur të finalizojë marrëveshjen me Crystal Palace në janar.

Nëse arrihet të mbyllet marrëveshja para mbylljes së afatit, Milani është i gatshëm të paguajë një shifër prej 35 milionë eurosh, përfshirë bonuse, e cila do të bjerë në 30 milionë euro, përfshirë bonuse, nëse ata detyrohen të presin deri në afatin e verës.

Për të realizuar transferimin në janar, Crystal Palace do të duhet së pari të gjejë një zëvendësues, pasi Oliver Glasner nuk do të kënaqet vetëm me një huazim për sulmuesin e Aston Villës, Evann Guessand.

Së dyti, Milani duhet të formalizojë edhe shitjen e Christopher Nkunku, i cili pritet të “sakrifikohet” për t’i hapur vendin ardhjes së Matetas.

Milani preferon ta shesë Nkunku në mënyrë të përhershme, por Gazzetta dello Sport raporton se ata mund të tundohen edhe nga një ofertë huazimi me obligim blerjeje të kushtëzuar./Telegrafi/

Mesfushori shqiptar Kristjan Asllani e kompletoi mbrëmë (e premte) transferimin te gjiganti turk Besiktas.

Asllani u transferua në elitën e futbollit turk në formë huazimi nga Interi, pas një aventure jo aq të mirë me Torinon.

Te Besiktasi, Asllani e ka gjetur edhe yllin kosovar Milot Rashica me të cilin ndau disa momente së bashku gjatë seancës së tij të parë stërvitore.

Aty ra në sy edhe komunikimi i Rashicës me një zyrtar të Besiktasit, me këtë të fundit që e pyeti yllin vushtrrias se a e njeh Asllanin.

“E njeh? E ke shok?”, ishte pyetja e zyrtarit të Besiktasit, teksa nuk vonoi përgjigja e Rashicës i cili i tha “Jo, e kam vëlla”.

Vlen të theksohet se Besiktasi mban gjithashtu opsionin për blerjen përfundimtare të kartonit të Asllanit, në rast se ky i fundit bën paraqitje të mira në Turqi./Telegrafi/

Manchester United raportohet se ndjehet i detyruar të shesë një lojtar të papritur te Barcelona.

Në javët e fundit, që nga zëvendësimi i Ruben Amorimit me Michael Carrick, United ka shfaqur një ngritje të formës.

“Djajtë e Kuq” kanë mposhtur rivalët Manchester City dhe Arsenal në dy ndeshjet e fundit të Ligës Premier.

Të dielën, ata do të synojnë fitoren e tretë radhazi në përballjen me Fulham në Old Trafford.

Së fundmi, një raport nga mediumi spanjoll Fichajes ka lidhur një lojtar befasues të United me një kalim të mundshëm në La Liga, te Barcelona.

Thuhet se trajneri i Barcelonës, Hansi Flick, është një admirues i madh i mbrojtësit të United, Lisandro Martinez.

Raporti përmend se Barcelona e sheh Martinezin, 28 vjeç, si një “përshtatje perfekte”, për shkak të agresivitetit të tij dhe aftësisë për të “prerë” linjat me pasimet e tij.

Për më tepër, besohet se stili i lojës së Martinezit i përshtatet mirë linjës së lartë mbrojtëse që preferon Flick.

Fichajes raporton se Barcelona është “e gatshme” të bëjë një ofertë gjatë verës, me një shifër rreth 30 milionë euro.

Kjo shumë duket e ulët, pasi Martinez do të mbetet pa kontratë në verën e 2027, dhe United raportohet se është “në presion të madh” për të vendosur ose t’i ofrojë argjentinasit një kontratë të re, ose ta shesë.

Për pasojë, raporti thekson se United “gati se ndjehet e detyruar” të diskutojë një transferim të mundshëm me Barcelonën për shkak të situatës së kontratës./Telegrafi/

Vallëzimi pas një goli, një teknikë e rafinuar dhe ajo pamje që shumëkujt i kujton Kakan. Lucas Paqueta, pas 263 paraqitjeve gjithsej për AC Milan, Lyon dhe West Ham, vendosi të largohet nga Evropa dhe të kthehet te Flamengo , klubi që e rriti para mbërritjes së tij në Itali.

Por si erdhi kjo zgjedhje? Për ta kuptuar, duhet të kthehesh në Brazil. Jose Boto, drejtori sportiv i Flamengos, tregoi menjëherë durim dhe pjekuri të madhe. Negociatat zgjatën pothuajse një muaj punë, ato u zhvilluan nga 23 dhjetori deri më 28 janar.

Kontributi i trajnerit portugez, i mbështetur nga vendosmëria e Paquetas, rezultoi vendimtar. Boto personalisht menaxhoi të gjithë negociatat me West Ham, agjentin e lojtarit, dhe me shoqërimin e mesfushorit brazilian.

Që në fillim, Boto sqaroi kushtet dhe arriti të ulte kërkesat financiare të klubit anglez, të vendosura fillimisht në 60 milionë euro.

Marrëveshja u mbyll në 42 milionë euro , me pagesën që do të realizohet deri në vitin 2028. Një investim që e bëri Paquetan, të njohur me nofkën "magjistari" në Brazil, blerjen më të shtrenjtë në historinë e kampionatit brazilian.

Paqueta kthehet te Flamengo: detajet prapa skenave të marrëveshjes

Por, a ishte West Ham i gatshëm ta shiste përgjithmonë numrin e tij 10 ? Jo tamam.

Ata fillimisht ofruan një marrëveshje huazimi dhe më pas një marrëveshje huazimi me mundësi blerjeje, opsione që, megjithatë, nuk e bindën as Flamengon dhe as lojtarin.

Paqueta, në fund të fundit, po kthehet në shtëpi. Braziliani dëshiron të kthehet në Rio De Janeiro , duke e ditur se do të ribashkohet me një klub ambicioz, të fortë financiarisht dhe të gatshëm të garojë për çdo titull të madh./Telegrafi/

Albert Riera do të jetë trajneri i ri i Eintracht Frankfurtit. Të dielën e ardhshme, spanjolli 43-vjeçar do të ulet në stol për herë të fundit si trajner i Celjes dhe do të marr pastaj drejtimin e klubit gjerman nga dita e hënë.

Riera ka nënshkruar kontratë me Frankfurtin deri në qershor të vitit 2028.

Por pse largimi i Rierës nga Celje është në fakt një lajm shumë i mirë për kampionin në fuqi të Kosovës, Dritën?

Tashmë siç dihet, Drita do ta ketë përballë Celjen në kuadër të fazës ‘play-off’ të Ligës së Konferencës.

Celje aktualisht udhëheq tabelën me 43 pikë në elitën e futbollit slloven, me një diferencë prej 12 pikës nga vendi i dytë që mbahet nga Koperi.

Albert Riera

E gjithë kjo për meritën kryesore të Rierës, i cili e ka shndërruar Celjen nga një ekip që synon vetëm garat evropiane në një skuadër që këtë sezon duket në rrugë të mbarë për ta fituar titullin.

Krejt kjo për shkak të etikës së tij të punës, gjë për të cilën dëshmitar ishte ylli kosovar Milot Avdyli, i cili luan në radhët e Celjes.

Avdyli në podcastin “Arena e Yjeve” që është prodhim i Telegrafit, kishte shpjeguar më shumë për mënyrën e punës së Rierës.

“E kam parë si e do punën, si punon, videot, stërvitjet, i jep shumë rëndësi si me u vendos në fushë, videot, bile ndonjëherë rrijmë duke shikuar video nga dy orë, gjë që nuk e kam parë as në Zvicër as në Ukrainë”.

“I sheh vetëm detajet shumë të vogla por që e vendosin lojën. Është shumë, shumë i përkushtuar pas punës”, kishte rrëfyer Avdyli në podcast.

43-vjeçari ka qenë në krye të Celjes në 91 ndeshje, ku ka arritur që të fitojë 49 prej tyre, ka 20 barazime dhe numëron 22 humbje.

Pra, një mesatare prej 1.84 pikësh për ndeshje dhe 53.85 për qind të ndeshjeve të fituara, një statistikë mjaft impresive.

Me që ra fjala, dueli i parë mes Dritës dhe Celjes do të zhvillohet më 19 shkurt me gjilanasit në cilësinë e vendasit, ndërsa ndeshja e kthimit një javë më vonë më 26 shkurt në Slloveni./Telegrafi/

Mesfushori i Barcelonës, Marc Casado, ka zbuluar se si e kuptoi humbjen e Real Madridit ndaj Benficës në Ligën e Kampionëve, që i detyroi gjigantët e kryeqytetit të luajnë në ‘play-off’, pas fitores së katalanasve 4-1 ndaj Copenhagen.

“Po dilja nga stadiumi kur ndeshja përfundoi, i lumtur që kishim bërë detyrën tonë. Është e vërtetë se ndërsa po bënim ushtrimet e ftohjes, dëgjohej njerëz që po festonin për një gol”, shpjegoi Casado.

“Kur përfundoi ndeshja, pashë nga tribunat, pashë një mik që ishte aty, dhe ai më tha: ‘4-2’, dhe tani ata (Real Madridi) duhet të luajnë play-off”.

“Po, duhet të luajnë edhe disa ndeshje ekstra, dhe mirë, në fund të fundit, kështu është. duhet të luash play-off, dy ndeshje ekstra, dy javë të mbushura me takime, dhe gjithmonë është më mirë ta shmangësh këtë”, ka deklaruar mesfushori spanjoll.

Pas kualifikimit në mesin e tetë më të mirave, Barcelona ka avancuar në fazën e 1/8 së finales në mënyrë automatike.

Në ndërkohë, fati ka bërë që Real Madridi të ndeshet sërish me Benfican në ‘play-off’, me një sistem vajtje-ardhje.

Lajm i mirë për ‘Los Blancos’ është fakti që ndeshjen kthyese ata do ta zhvillojnë në shtëpi, ku tashmë dihet efekti që ka ditur të ketë shpeshherë ‘Santiago Bernabeu’ në rezultatet e tyre./Telegrafi/

Tregu evropian i transferimeve është tronditur nga lëvizja e fundit e Arsenalit për të bërë një hap vendimtar cilësor në repartin ofensiv.

Klubi londinez ka vënë në shënjestër Julian Alvarez, sulmuesin argjentinas të nivelit elitar që aktualisht aktivizohet me Atletico Madridin.

Për ta realizuar këtë operacion të rëndësishëm, “Topçinjtë” janë të gatshëm të sakrifikojnë pjesë me vlerë si Gabriel Martinelli dhe Gabriel Jesus, në kuadër të një shkëmbimi strategjik.

Kjo formulë synon të ulë ndjeshëm shpenzimin financiar direkt për argjentinasin, një lojtar që ka tërhequr gjithashtu interesin e gjigantëve të tjerë si Chelsea dhe PSG.

Gabriel Martinelli shfaqet si elementi kryesor i negociatave në këtë projekt ambicioz që Mikel Arteta po përpiqet të ndërtojë për afatin kalimtar të verës së ardhshme.

Anësori brazilian, i vlerësuar rreth 45 milionë euro, është një profil që Atlético Madridi e ka monitoruar edhe më parë për skemën e tij.

Edhe pse Arsenali nuk ka një domosdoshmëri urgjente për t’u ndarë nga talenti 24-vjeçar, mundësia për të siguruar shërbimet e Alvarezit e justifikon plotësisht këtë lëvizje taktike.

Nga ana tjetër, përfshirja e Gabriel Jesus në bisedime sjell një dozë përvoje që mund të joshë drejtuesit sportivë të klubit madrilen.

Arsenali synon të përfitojë nga fakti që të dy sulmuesit brazilianë kanë qenë pranë largimit gjatë 18 muajve të fundit, për të finalizuar marrëveshjen.

Klubi londinez po planifikon një ristrukturim të thellë të repartit ofensiv në vitin 2026, duke i dhënë përparësi efikasitetit para portës që garanton ylli i Atleticos.

Alvarez përfaqëson profilin modern të sulmuesit që mund të luajë në disa pozicione të vijës së sulmit, duke mahnitur analistët dhe stafin teknik të ekipit anglez./Telegrafi/

Liverpooli po shqyrton mundësinë e transferimit të njërit prej mbrojtësve të krahut më të mirë në Evropë, sipas raportimeve nga Italia.

Arne Slot ka konfirmuar se Jeremie Frimpong do të mungojë për “disa javë”, pasi pësoi një dëmtim që në minutat e para të fitores së Liverpoolit ndaj Qarabag në Ligën e Kampionëve gjatë mesjavës.

Dëmtimi i Frimpongut, i cili iu bashkua Liverpoolit nga Bayer Leverkusen gjatë verës, do të thotë se “Të Kuqtë” nuk kanë asnjë mbrojtës të djathtë natyral në dispozicion për ndeshjen e së shtunës kundër Neëcastle.

Conor Bradley është përjashtuar për pjesën e mbetur të sezonit, ndërsa një tjetër alternativë në krahun e djathtë të mbrojtjes, Joe Gomez, do të mungojë këtë fundjavë pasi u detyrua të largohej nga fusha në ndeshjen kundër Bournemouth javën e kaluar.

Ka qenë një periudhë sfiduese për Slotin për shkak të mungesës së alternativave në repartin defensiv, por sipas gazetarit Gianluca Di Marzio, Liverpooli mund të ndërmarrë një lëvizje të vonshme për mbrojtësin e Interit, Denzel Dumfries.

Di Marzio sugjeron se Liverpooli ka “bërë pyetje” për reprezentuesin holandez pas dëmtimit të Frimpongut.

“Shumëçka do të varet nga koha përfundimtare e rikuperimit dhe, sigurisht, nga vendimi final i zikaltërve. Për këtë arsye, siç është raportuar, Interi ka shqyrtuar edhe emrin e Norton-Cuffy”, shton raporti.

Sipas Fabrizio Romano, Interi ndodhet në bisedime të avancuara për të transferuar Brooke Norton-Cuffy, ish-produkt i akademisë së Arsenalit, aktualisht pjesë e Genoas.

Përveç këtyre raportimeve, gazetari Nicolo Schira ka sugjeruar gjithashtu se janë zhvilluar bisedime mes Liverpoolit dhe përfaqësuesve të Dumfries për të “eksploruar kushtet” e një marrëveshjeje të mundshme, me Interin që kërkon 25 milionë euro.

29-vjeçari ka pasur një rol dytësor te Interi këtë sezon, pas një periudhe jashtë fushës për shkak dëmtimi, por aftësitë e tij mbeten të padiskutueshme./Telegrafi/

Skuadrat e përfshira në këtë edicion të Ligës së Kampionëve mund ta “rrëmbejnë” praktikisht avantazhin e fushës, nëse arrijnë të mposhtin një kundërshtar të renditur më lart, i cili gëzon avantazhin e ndeshjes së kthimit në fazat e mëvonshme të kompeticionit.

Arsenal, Bayern Munich, Liverpool, Tottenham, Barcelona, Chelsea, Sporting Lisbona dhe Manchester City janë kualifikuar drejtpërdrejt në fazën e 1/8-ave të finales, pasi e përfunduan fazën e ligës mes tetë vendeve të para.

Ndërkohë, skuadrat që u renditën nga vendi i nëntë deri në vendin e 24-t në fazën e ligës janë kualifikuar për shortin e “play-off”-it të fazës me eliminim direkt të Ligës së Kampionëve, i cili u hodh të premten në mëngjes në Zvicër.

Për ata që nuk janë në dijeni, pozicionet në fazën e ligës në këtë edicion kanë marrë shumë më tepër rëndësi, pasi UEFA ka ndryshuar rregullat e avantazhit të fushës, duke përcaktuar se skuadra e renditur më lart në fazën e ligës do të luajë gjithmonë ndeshjen e dytë në shtëpi.

Saktësisht kështu: Skuadrat që u renditën në vendin e parë dhe të dytë në fazën e ligës do t’i zhvillojnë të gjitha raundet me eliminim direkt duke luajtur ndeshjen e kthimit në shtëpi, ndërsa ekipet që u renditën në vendin e tretë dhe të katërt do ta kenë avantazhin e fushës në 1/8-at e finales dhe në çerekfinale.

Megjithatë, ky avantazh i fushës mund të “vidhet” në mënyrë efektive.

Siç theksohet në një raport të gazetës AS, nëse një skuadër e renditur më poshtë eliminon një kundërshtar të renditur më lart, ajo do ta trashëgojë atë pozicion të favorizuar për raundet pasuese, që do të thotë se përparimi në turne mund ta tejkalojë hierarkinë e fazës së ligës.

“Për shembull, nëse skuadra që u rendit e 16-ta eliminon ekipin që përfundoi i dyti në 1/8-at e finales, skuadra e renditur e 16-ta merr vendin e dytë të renditjes për pjesën e mbetur të turneut dhe fiton të drejtën për t’i luajtur ndeshjet e kthimit në shtëpi”, thuhej në raport.

Siç përcaktohet edhe në seksionin 19.04 të Rregullores së Ligës së Kampionëve të UEFA-s, skuadrat mund të trashëgojnë një pozicion të renditjes për raundet pasuese nëse eliminojnë një kundërshtar të renditur më lart./Telegrafi/

Interi po përgatit një ofertë të re për të transferuar sulmuesin e Al-Ittihad, Moussa Diaby, gjatë afatit kalimtar të dimrit sipas gazetarit Fabrice Hawkins.

Zikaltërit e kanë identifikuar ish-yllin e Aston Villës si një objektiv kryesor në këtë afat kalimtar. Ata tashmë kanë parë të refuzohet propozimi i tyre për huazim me opsion blerjeje në vlerë 35 milionë euro nga klubi arab.

Megjithatë, 26-vjeçari është i prirur të sigurojë një kalim në “San Siro”. Ai ka arritur një marrëveshje për kushtet personale me Interin për një kontratë me vlerë 4.5 milionë euro në sezon.

Al-Ittihad është i gatshëm të ndahet me Diaby vetëm në rast të një shitjeje përfundimtare ose nëse Interi përfshin një opsion blerjeje të detyrueshëm në marrëveshje.

Tottenhami ka pyetur për disponueshmërinë e francezit, por preferenca e tij për Interin u jep italianëve një avantazh të qartë.

Diaby ka qenë një figurë kyçe për Ittihad që nga bashkimi me ta në vitin 2024, duke regjistruar tetë gola dhe 27 asistime gjatë dy sezoneve të fundit.

Ai është një lojtar shumë i gjithanshëm, i aftë të luajë në të dy krahët e sulmit, dhe njihet për shpejtësinë e tij shpërthyese, driblimin dhe pasimet kreative.

Trajneri i Interit, Cristian Chivu, thuhet se e ka telefonuar personalisht Diabyn për t’i shpjeguar projektin e tij dhe për ta bindur të transferohet në “San Siro”.

Interi po tregohet shumë aktiv në tregun e transferimeve, duke punuar në disa marrëveshje përpara afatit përfundimtar të së hënës.

Zikaltërit kanë arritur marrëveshje për kushtet personale me mesfushorin e Liverpoolit, Curtis Jones, dhe janë në bisedime për të marrë dritën jeshile nga klubi anglez.

Ardhja e mesfushorit anglez mund të lehtësojë largimin e Davide Frattesit nga “San Siro”, me Nottingham Forest që po ushtron presion për të nënshkruar me reprezentuesin italian./Telegrafi/