Real Madridi pësoi një tronditje duke u eliminuar nga Kupa e Mbretit, pas disfatës me rezultat 2-1 në udhëtim te Albacete.

‘Los Blancos’ erdhën në këtë sfidë pas humbjes së pësuar me rezultat 3-2 në finale të Superkupës së Spanjës nga Barcelona dhe me një trajner të ri në stol.

Menjëherë pas përfundimit të finales, klubi madrilen mori vendimin për të ndarë rrugët me trajnerin Xabi Alonso, duke e zëvendësuar atë menjëherë me Alvaro Arbeloan.

Sidoqoftë, ky ndryshim nuk duket se ka sjellë ndonjë risi te gjiganti spanjoll pasi ata u eliminuan nga Kupa e Mbretit nga një skuadër që renditet e 17-ta në La Liga 2.

Para kësaj ndeshje Albacete kishe tri ndeshje radhazi pa fitore dhe ky fakt ka bërë që tifozët e klubit të tallen me Real Madridin.

“Faleminderit që erdhët, ne me në fund fituam një ndeshje. Ju lutem ejani sërish javën tjetër”, po këndonin në kor tifozët e Albacetes pas përfundimit të ndeshjes.

Pas kësaj disfate, Real Madridi tashmë do të përqendrojë forcat në La Liga, aty ku xhiron e ardhshme do të jetë nikoqire e Levantes në ‘Santiago Bernabeu’./Telegrafi/

Bayern Munich ka shënuar fitore me rezultat 3-1 në udhëtim ndaj Kolnit në kuadër të javës së 17-të në elitën e futbollit gjerman.

Ndeshja nisi me intensitet nga vendasit e Këlnit, të cilët rrezikuan që në minutat e para. Said El Mala dhe më pas Linton Maina testuan seriozisht portierin Manuel Neuer, i cili u tregua vendimtar për Bayernin.

Presioni i Kolnit u shpërblye në minutën e 41-të, kur Maina realizoi një gol spektakolar pas një depërtimi individual, duke e dërguar topin saktësisht pas portierit për avantazhin 1-0.

Megjithatë, reagimi i Bayernit ishte i shpejtë. Vetëm pak minuta para përfundimit të pjesës së parë, në minutën e 45+5’, Michael Olise asistoi bukur për Serge Gnabry, i cili goditi fuqishëm për të barazuar rezultatin në 1-1.

Në pjesën e dytë, skuadra e drejtuar nga Vincent Kompany mori kontrollin e plotë të lojës.

Goli i përmbysjes erdhi në minutën e 71-të, kur Min-jae Kim shfrytëzoi hapësirën në zonë dhe me një goditje të fuqishme me kokë dërgoi topin në rrjetë, duke i dhënë epërsinë Bayernit prej 2-1.

Zëvendësimet e Kompanyt dhanë menjëherë efekt. Lennart Karl, i futur në lojë në minutën e 67-të, vulosi fitoren në minutën e 82-të, pas një asistimi të saktë nga Luis Diaz, duke realizuar një gol të bukur në këndin e poshtëm të majtë për rezultatin përfundimtar 3-1.

Me këtë fitore Bayerni shkon në kuotën e 47 pikëve me 11-të më shumë se Borussia Dortmundi në pozitën e dytë që ka 36 sosh./Telegrafi/

Një tërmet institucional ka tronditur zyrat e Real Madridit pas një sezoni plot kthesa të rrezikshme dhe vendime drastike nën diellin e kryeqytetit.

Epoka e Xabi Alonsos përfundoi papritur, duke lënë një boshllëk që Alvaro Arbeloa po përpiqet ta mbushë si një zgjidhje e përkohshme emergjente.

Në këtë skenar pasigurie, Real Madridi tashmë ka nisur të hartojë planin e tij për sezonin e ardhshëm me një prioritet të qartë.

Florentino Perez ka përqendruar vëmendjen te Lionel Scaloni, strategu që i solli lavdi të përjetshme kombëtares së Argjentinës.

Drejtuesit e klubit kërkojnë një profil që të kombinojë autoritetin taktik me aftësinë e veçantë për të menaxhuar një skuadër të mbushur me yje të nivelit botëror.

Emri i Lionel Scalonit gëzon konsensus të gjerë në nivelet më të larta të klubit, falë aftësisë së tij të dëshmuar për të fituar në situata me presion të lartë.

Bilanci i tij është kartëvizita më e fortë: një Kupë Bote, dy Copa America dhe Finalissima konfirmojnë metodologjinë e tij fituese të punës.

Shumë analistë brenda ambientit madrilen shohin te Scaloni një pasardhës natyral të stilit që dikur imponoi italiani Carlo Ancelotti.

Qetësia dhe aftësia për të lexuar lojën janë tipare të përbashkëta që e lehtësojnë kalimin drejt një cikli të ri fitues.

Presidenti tashmë ua ka lënë të kuptohet bashkëpunëtorëve të afërt se trajneri nga Santa Fe është zgjedhja e tij për të udhëhequr projektin pas Kupës së Botës 2026.

Argjentina do të shkojë në atë turne si një nga favoritët kryesorë dhe Scaloni e di se ai mund të jetë kulmi i karrierës së tij përpara se të kalojë Oqeanin Atlantik./Telegrafi/

Tifogrupi i njohur “Plisat” ka dalë me një reagim të ashpër publik pas zhvillimeve të fundit në klubin e basketbollit Sigal Prishtina, duke e cilësuar zgjdhjen e kryetarit të ri si një nga ngjarjet më të turpshme në historinë e sportit të kryeqytetit.

Sipas Plisave, në një “kuvend të paligjshëm”, është zgjedhur në mënyrë të dhunshme dhe tinëzare kryetari i ri i klubit, pa transparencë dhe pa një proces të hapur garues.

Ata theksojnë se zgjedhja e udhëheqjes së klubit do të duhej të bëhej përmes ideve dhe vizionit për të ardhmen e KB Prishtinës, e jo në mënyrë të fshehtë.

Plisat akuzojnë drejtuesit aktualë të klubit për mungesë dashurie dhe interesi për zhvillimin e klubit, duke pretenduar se veprimet e tyre janë të motivuara nga frika dhe përpjekja për të mbuluar, siç thonë ata, keqpërdorime dhe shkatërrim të klubit ndër vite.

Në reagim përmendet edhe emri i Bekë Berishës, i cili sipas Plisave është zgjedhur kryetar i klubit, duke e cilësuar atë si joprofesional dhe të papërshtatshëm për këtë pozitë, si dhe si një person pa lidhje me klubin, sportin apo qytetin e Prishtinës.

“Plisat” kështu kanë deklaruar qartë se nuk i japin mbështetje këtij emërimi dhe as kryesisë aktuale.

Reagimi i plotë nga "Plisat":

/Telegrafi/

Hoffenheimi po udhëheq me rezultat të thellë 4-0 pas pjesës së parë në shtëpi ndaj Borussia M’Gladbach në kuadër të javës së 17-të në elitën e futbollit gjerman.

Vendimtar për këtë epërsi të thellë të klubit gjerman po del të jetë sulmuesi kosovar Fisnik Asllani.

Ani pse jo me gola, Asllani ka kontribuar në dy nga këta gola të shënuar të Hoffenheimit duke asistuar për mrekulli për shokët e skuadrës.

Ylli kosovar fillimisht asistoi për mrekulli në minutën e 24-të për Tim Lemperle, i cili realizoi për rezultatin 2-0.

Asllani doli në skenë sërish, duke asistuar kësaj radhe për Andrej Kramaric, i cili në minutat shtesë të pjesës së parë realizoi për 3-0.

Kujtojmë se Asllani deri më tani këtë sezon ka gjashtë gola të realizuar në kampionat, teksa me këto dy asistime tani shkon në shifrën e katër ‘dhuratave’ për bashkëlojtarët./Telegrafi/

Gjatë 18 muajve të fundit, Raphinha ka qenë një nga sulmuesit më të mirë në futbollin botëror dhe gjithashtu një nga lojtarët më të rëndësishëm të Barcelonës.

Sulmuesi 29-vjeçar ka treguar një formë shumë të mirë që nga ardhja e Hansi Flick, i cili e ka ndihmuar brazilianin të rikthejë karrierën e tij në kryeqytetin spanjoll.

Raphinha, i cili ishte ylli i Barcelonës gjatë fitimit të Superkupës së Spanjës kundër Real Madridit, kishte hasur vështirësi gjatë dy sezoneve të tij të para në klub.

Në një intervistë për BBC, ai zbuloi se kishte planifikuar të largohej para ardhjes së Flick si trajner në verën e vitit 2024.

“Po të mos vinte Hansi Flick, unë do të largohesha nga Barça. Ai ndryshoi gjithçka. Më tha që do të isha i rëndësishëm. Kjo është çfarë i duhet një lojtari: besim”.

“Kisha shumë dyshime për veten. Kam zakon të kritikoj veten shumë ashpër, dhe ky presion më bëri të mendoja për të lënë klubin”.

Po të kishte ikur nga Barcelona, Raphinha do të kishte pasur shumë mundësi për klubin e tij të ardhshëm.

Ai është lidhur vazhdimisht me një rikthim në Ligën Premier, ku ka luajtur më parë për Leeds United, ndërsa një kalim në Arabinë Saudite gjithashtu është përmendur.

Megjithatë, për momentin, asnjë nga këto opsione nuk duket se do të realizohet, duke marrë parasysh dëshirën e tij për të qëndruar në ‘Spotify Camp Nou’.

Flick ka treguar shumë besim te Raphinha dhe marrëdhënia mes tyre është e afërt. Nuk është çudi që ky besim është reflektuar në performancat fantastike të brazilianit për Barcelonën që nga fillimi i sezonit të kaluar./Telegrafi/

Shkarkimi i Xabi Alonsos nga posti i trajnerit të Real Madridit, vetëm një ditë pas humbjes në finalen e Superkupës së Spanjës ndaj Barcelonës, u ndikua ndjeshëm nga refuzimi i tij për të përfshirë Antonio Pintus si trajner të përgatitjes fizike të ekipit të parë, sipas Mundo Deportivo.

Tekniku bask qëndroi i palëkundur në mbrojtje të trajnerit të tij të besuar të përgatitjes fizike, Ismael Camenfort, një qëndrim që ra ndesh me pakënaqësinë në rritje të klubit lidhur me përgatitjen fizike të skuadrës këtë sezon.

Real Madridi ka hasur vështirësi të vazhdueshme në minutat e fundit të ndeshjeve — shpesh duke humbur intensitetin pas minutës së 70-të, si dhe një krizë të përsëritur dëmtimesh që ka prekur lojtarë kyç.

Presidenti i klubit, Florentino Perez dhe bordi drejtues nuk kishin pasur kurrë besim të plotë te stafi i ri dhe relativisht i papërvojë i Alonsos.

Pintus, një aleat i hershëm i Pérezit që sezonin e kaluar ishte zhvendosur në një rol administrativ, shihej si zgjidhja e problemeve fizike të ekipit.

Rikthimi i italianit në detyra të plota me ekipin e parë u shty fort nga drejtuesit e lartë të klubit, por Alonso refuzoi kategorikisht ta përfshinte atë me kohë të plotë.

Ky qëndrim i palëkundur rezultoi vendimtar.

Me Pintus tashmë të integruar në stafin e ri të Alvaro Arbeloas, ai kishte nisur punën me lojtarët që të martën, përpara ndeshjes së Kupës së Mbretit kundër Albacetes, kjo lëvizje nënvizon vendosmërinë e klubit për të adresuar mangësitë fizike që kontribuuan në largimin e Alonsos./Telegrafi/

Nigeria dhe Maroku do të takohen me fillim nga ora 21:00 në kuadër të gjysmëfinales së Kupës së Kombeve të Afrikës.

Ndeshja që do të zhvillohet në Rabat të Marokut, premton të jetë një ndeshje spektakolare, ku fituesi i këtij takimi do të luajë në finale ndaj Senegalit që triumfoi minimalisht ndaj Egjiptit.

Tek Nigeria nga minuta e parë e nisin yjet si Ademola Lookman dhe Victor Osimhen, por nuk mungojnë as emra si Alex Iëobi dhe Calvin Bassey.

Maroku në anën tjetër udhëhiqet nga kapiteni Achraf Hakimi, teksa në përbërje nuk mungojnë as Noussair Mazraoui e Brahim Diaz.

Formacionet zyrtare:

Nigeri: Nwabali, Osayi-Samuel, Ajayi, Bassey, Onyemaechi, Onyeka, Onyedika, Iwobi, Lookman, Osimhen, Adams.

Marok: Bono, Mazraoui, Masina, Aguerd, Hakimi, El Aynaoui, Ezzalzouli, Saibari, Khannouss, Diaz, El Kaabi.

/Telegrafi/

Senegali ka siguruar kualifikimin në finale të Kupës së Kombeve të Afrikës pas një fitoreje minimale 1-0 ndaj Egjiptit, në një ndeshje të fortë dhe të tensionuar, të vendosur nga një moment cilësie individuale.

Goli i vetëm i takimit erdhi në minutën e 78-të, kur Sadio Mane realizoi një goditje të saktë nga jashtë zonës, duke e dërguar topin në mënyrë perfekte në shtyllën e majtë për 1-0.

Pjesa e parë u karakterizua nga lojë fizike dhe ndërhyrje të forta, me disa kartonë të verdhë që ndikuan ndjeshëm.

Kalidou Koulibaly dhe Habib Diarra u ndëshkuan me kartonë të verdhë, duke humbur automatikisht ndeshjen e radhës.

Edhe Hossam Abdelmaguid te Egjipti u penalizua herët, që në minutën e gjashtë, duke lënë gjurmë në ekuilibrat defensiv të skuadrës së tij.

Në fillim të pjesës së dytë, të dy trajnerët ndërhynë për të ndryshuar rrjedhën e lojës. Senegali aktivizoi Lamine Camara në vend të Habib Diarrës, ndërsa Egjipti bëri dy zëvendësime të menjëhershme, me Trezeguet dhe më pas Mostafa Mohamed që hynë në fushë për t’i dhënë më shumë energji repartit ofensiv.

Pavarësisht përpjekjeve të Egjiptit për të barazuar, mbrojtja e Senegalit qëndroi e organizuar dhe e disiplinuar deri në fund.

Zëvendësimet e vonshme, përfshirë hyrjen e Zizo në minutën e 81-të, nuk mjaftuan për të ndryshuar rezultatin.

Me këtë fitore, Senegali kualifikohet në finale, ku do të përballet me fituesin e çiftit tjetër gjysmëfinal Nigeri - Marok./Telegrafi/

Një incident serioz ka ndodhur në palestrën “Shani Nushi” në Gjakovë gjatë zhvillimit të ndeshjes së basketbollit mes Vëllaznimit dhe Bashkimit.

Një tifoz i Vëllaznimit nga tribunat ka goditur me shishe ndihmëstrajnerin e skuadrës së Bashkimit nga Prizreni, Bledar Gjeqaj.

Si pasojë e goditjes, Gjeqaj ka pësuar lëndim dhe është rrëzuar në parket, duke shkaktuar reagime të menjëhershme nga stafet dhe zyrtarët e ndeshjes.

Pas këtij incidenti, gjyqtari kryesor vendosi ta ndërpresë ndeshjen, për shkak të mungesës së sigurisë dhe pamundësisë për vazhdimin normal të takimit.

Ky rast vjen vetëm pak ditë pas një tjetër ngjarjeje shqetësuese në Prizren, ku basketbollisti i Pejës, Dardan Berisha, ishte goditur nga tifozët e Bashkimit, duke ngritur sërish alarmin për dhunën në sport dhe mungesën e kontrollit në palestra.

Ngjarja pritet të ketë jehonë të madhe në organet disiplinore të basketbollit kosovar, ndërsa kërkohet reagim institucional për të garantuar sigurinë e sportistëve dhe stafit teknik në ndeshjet e ardhshme./Telegrafi/

Arijon Ibrahimovic iu bashkua Heidenheimit në formë huazimi nga Bayern Munich verën e kaluar dhe shpejt u bë titullar.

Sipas Transfermarkt, disa klube si në Gjermani ashtu edhe jashtë vendit kanë shprehur interes për 20-vjeçarin, i cili debutoi për ekipin kombëtar gjerman U21 në fund të vitit të kaluar.

Këto përfshijnë katër klube të Bundesligës, si dhe klube nga Italia dhe Spanja.

Lojtari me këmbë të djathtë luajti në çdo ndeshje për Heidenheim në gjysmën e parë të sezonit dhe aktualisht është një pjesë e domosdoshme e formacionit titullar të trajnerit Frank Schmidt.

Vlera e tregut e yllit kosovar është rritur në 5 milionë euro në përditësimin e fundit të Transfermarkt.

Duke pasur parasysh zhvillimin e tij mbresëlënës, nuk është çudi që Heidenheim do të donte ta mbante lojtarin sulmues përtej marrëveshjes së tij të huazimit me Bayern Munich, megjithatë, performancat e Ibrahimovic kanë tërhequr interes nga klube të tjera.

Sipas Transfermarkt, klubet e Serie A , Fiorentina dhe Cagliari, kanë sinjalizuar gatishmërinë e tyre për ta transferuar atë.

I riu është tashmë shumë i njohur me ligën e parë italiane nga periudhat e tij të mëparshme të huazimit te Frosinone dhe Lazio, ku ka 17 paraqitje dhe dy asiste.

Ekziston gjithashtu një interesim nga Villarreali teksa edhe disa klube tjera të Bundesligës i kanë vënë syrin atij.

Se vetë lojtari dëshiron një klub të përhershëm në lëvizjen e tij të ardhshme iu bë e qartë së fundmi gazetës me seli në Mynih, Abendzeitung.

"Nuk dua të huazohem përsëri", i tha ai gazetës në fund të vitit të kaluar, duke lënë të kuptohet se mund të parashikojë një të ardhme më afatgjatë në Mynih./Telegrafi/

Manchester United pritet të përshpejtojë negociatat për Ruben Neves pasi ka arritur një marrëveshje parimore me Michael Carrick për të marrë drejtimin e skuadrës si trajner i përkohshëm.

Me 44-vjeçarin që fitoi garën ndaj Ole Gunnar Solskjaer për të pasuar Ruben Amorim, drejtuesit e INEOS po përgatiten të lirojnë menjëherë fondet e nevojshme për të siguruar shërbimet e yllit të Al-Hilal, i vlerësuar rreth 20 milionë euro, në afatin kalimtar të janarit.

Vendimmarrësit e klubit kanë identifikuar mesfushën si një nga pikat më të dobëta të skuadrës dhe janë të gatshëm të miratojnë një transferim përfundimtar të Ruben Neves që këtë muaj, me qëllim që trajneri i ri të ketë mjetet e duhura për të shpëtuar një vend në katërshen e parë të Ligës Premier.

Në krye të listës së dëshirave është ish-kapiteni i Wolves, Neves. Reprezentuesi portugez, i cili aktualisht aktivizohet me Al-Hilal në Arabinë Saudite, është admiruar prej kohësh në “Old Trafford” për aftësinë e tij për të diktuar lojën dhe për të kontrolluar ritmin e ndeshjeve, cilësi që Unitedit i kanë munguar ndjeshëm këtë sezon.

Sipas The Guardian, Neves do të kërkonte një shifër rreth 20 milionë euro, një shumë që bordi i klubit e sheh si një rrezik të kalkuluar dhe të vlefshëm për t’u marrë.

Edhe pse Carrick do ta mbajë drejtimin vetëm në mënyrë të përkohshme, departamenti i afatit kalimtar e konsideron Neves si një aset afatgjatë që përshtatet me strategjinë më të gjerë të klubit.

Nëse marrëveshja bëhet e realizueshme, fondet janë të gatshme të përdoren menjëherë, duke sinjalizuar se INEOS nuk ka ndërmend ta quajë të humbur sezonin, pavarësisht eliminimeve të fundit nga kompeticionet e kupave./Telegrafi/

Liverpooli mund të “padisë” rivalët e tij, Arsenalin, për incidentin e ndodhur në fund të barazimit 0-0 në 'Emirates Stadium', sipas ish-drejtuesit të PGMOL

“Të Kuqtë” arritën të ndalnin kryesuesit e Ligës Premier me një barazim pa gola të enjten, në një ndeshje ku momenti më i diskutuar ishte dëmtimi i Conor Bradleyt në minutat e fundit.

Mbrojtësi i Irlandës së Veriut pësoi një dëmtim të rëndë teksa tentonte të largonte topin në krahun e djathtë dhe mbeti i shtrirë në fushë, duke shfaqur dhimbje të mëdha.

Gabriel Martinelli, i futur si zëvendësues gjatë ndeshjes, mendoi se Bradley po vononte lojën dhe hodhi topin mbi të, përpara se ta shtynte jashtë vijës anësore.

Ky veprim shkaktoi reagim të ashpër nga lojtarët e Liverpoolit, ndërsa Martinelli u ndëshkua me karton të verdhë për sjelljen e tij.

Më vonë u konfirmua se Bradley kishte pësuar një dëmtim serioz në gju, i cili kërkoi ndërhyrje kirurgjikale dhe e përjashtoi atë nga pjesa e mbetur e sezonit.

Edhe pse Martinelli kërkoi falje publikisht në rrjetet sociale dhe zbuloi se kishte shkëmbyer mesazhe me Bradleyn, incidenti vazhdoi të mbetej temë diskutimi.

Keith Hackett, ish-gjyqtar i Ligës Premier dhe ish-kreu i PGMOL-it, sugjeroi se Liverpooli mund të ndërmarrë hapa të mëtejshëm.

“Kam qenë së fundmi i përfshirë në çështje gjyqësore, ku një lojtar e çon në gjykatë një tjetër, me pretendimin se një dëmtim i ka shkatërruar karrierën”.

“Gjithmonë ekziston ai rrezik dhe një klub mund të përpiqet ta padisë një lojtar, sepse ka humbur shërbimet e futbollistit të tij”.

“Është një pikë e vlefshme për t’u ngritur, sepse në futboll, në përgjithësi, lojtarët kanë një detyrim kujdesi ndaj kundërshtarëve”.

“A mund të kishte ndërhyrë gjyqtari më herët? Ajo që është befasuese është se disa njerëz nuk e kuptuan sa serioz ishte dëmtimi, pasi nuk pati një reagim të tepruar”, ka deklaruar Hackett./Telegrafi/

Jude Bellingham ka reaguar ndaj raportimeve se kishte një marrëdhënie të keqe me Xabi Alonson, duke lëshuar një deklaratë të ashpër ku ka kritikuar hapur median.

Pas humbjes së Real Madridit ndaj rivalëve historikë të Barcelonës në finalen e Superkupës së Spanjës, e zhvilluar në Xhedah të Arabisë Saudite, klubi konfirmoi ndarjen nga Alonso.

Trajneri spanjoll drejtoi ish-klubin e tij vetëm për shtatë muaj, një periudhë gjatë së cilës u përball me presion të vazhdueshëm.

Që nga publikimi i lajmit për largimin e tij, janë shfaqur disa raportime që pretendojnë të zbardhin atë që ndodhi prapa skenave gjatë mandatit të Alonsos, me disa media që sugjeronin se ai kishte një marrëdhënie të tensionuar me yllin e skuadrës, Jude Bellingham.

Tashmë që Alonso ka lënë Real Madridin, mesfushori anglez ka vendosur të flasë dhe t’u përgjigjet këtyre thashethemeve, duke e bërë të qartë se nuk është aspak i kënaqur me to.

Dihet se gjatë kohës sa ishte trajner i Real Madridit, Alonso pati një përplasje mjaft publike me Vinicius Junior, i cili ende nuk ka reaguar pas largimit të trajnerit spanjoll.

Megjithatë, Bellingham ka hedhur poshtë raportimet që e krahasonin marrëdhënien e tij me Alonson me atë situatë, duke i quajtur “klounë” mediat që pretenduan se ai dhe ish-trajneri i tij ishin në marrëdhënie të këqija.

“Deri tani kam lënë të kalojnë shumë prej këtyre gjërave, gjithmonë duke shpresuar se e vërteta do të dilte në dritë në kohën e vet. Por sinqerisht… çfarë marrëzie”.

“Vërtet më vjen keq për njerëzit që kapen pas çdo fjale të këtyre klounëve dhe ‘burimeve’ të tyre”.

“Mos besoni gjithçka që lexoni. Herë pas here, këta duhet të mbahen përgjegjës për përhapjen e këtij lloj dezinformimi të dëmshëm, vetëm për klikime dhe për të shtuar polemika”, ka shkruar anglezi./Telegrafi/

Kombëtarja e Senegalit do të përballet me atë të Egjiptit sot (e mërkurë) në kuadër të gjysmëfinaleve të Kupës së Kombeve të Afrikës.

Këto dy skuadra do të luajnë me fillim nga ora 18:00 në stadiumin “Ibn Batouta” që ka një kapacitet prej 75,500 mijë personash.

Te Senegali nga minuta e parë nisin emra të njohur si Edouard Mendy, Kalidou Koulibaly, Sadio Mane dhe Nicolas Jackson.

Ndërkohë te Egjipti nga minuta e parë e nisin yjet si Mohamed Salah dhe Omar Marmoush që udhëheqin sulmin e tyre.

Kujtojmë se fituesi i kësaj përballje do të takohet në finale me fituesin e çiftit tjetër Niger-Marok që zhvillohet me fillim nga ora 21:00.

Formacionet zyrtare:

Senegal: Mendy, Diatta, Koulibaly, Niakhate, Diouf, Diarra, Gueye, P.Gueye, Ndiaye, Jackson, Mane.

Egjipt: El Shennawy, Ibrahim, Fatouh, Abdelmaguid, Rabia, Hany, Fathy, Attia, Ashour, Salah, Marmoush.

/Telegrafi/

Daniele De Rossi po punon intensivisht për ta nxjerrë Genoan nga momenti i vështirë, ndërsa drejtuesit e klubit janë gati ta mbështesin me përforcime në afatin kalimtar.

Pas barazimit 1-1 ndaj Milanit dhe fitores bindëse 3-0 kundër Cagliarit, kuqeblutë kanë nisur lëvizjet konkrete për të rritur cilësinë në mesfushë.

Sipas raportimeve nga Italia, Kristjan Asllani është një nga objektivat kryesorë të Genoas në këtë afat kalimtar.

Sky Sport bën me dije se klubi po monitoron nga afër situatën e mesfushorit shqiptar dhe po shqyrton mundësinë e afrimit të tij.

Ideja e Genoas është t’i ofrojë De Rossit një mesfushë më të ekuilibruar dhe funksionale, me lojtarë që dinë të menaxhojnë ritmin e lojës dhe presionin në momentet delikate.

Në këtë kuadër, profili i Asllanit vlerësohet shumë: një organizator para mbrojtjes, i saktë në pasime, i fortë në ndërprerje dhe me eksperiencë në Serie A.

Aktualisht Asllani është i huazuar nga Interi te Torino, por aventura me “Granata” duket drejt fundit, pasi mesfushori shqiptar nuk bën më pjesë në planet e trajnerit Marco Baroni.

Ndërsa pritet një zgjidhje mes Interit dhe Torinos për të ardhmen e tij, Genoa është futur seriozisht në garë për ta transferuar.

Në këtë sezon të Serie A, Asllani ka regjistruar 15 paraqitje me Torinon, pa mundur të gjejë rrugën e rrjetës.

Megjithatë, vlerat e tij mbeten të padiskutueshme dhe interesi për shërbimet e tij ka qenë i madh, me klube si Parma, Fiorentina, Sassuolo, Girona dhe Paris FC që janë përmendur më herët.

Nëse Genoa arrin të plotësojë këto kërkesa dhe të gjejë gjuhën e përbashkët me Interin, Asllani mund të jetë një nga përforcimet kyçe për ekipin e De Rossit në pjesën e mbetur të sezonit./Telegrafi/

I ftuari i radhës në podcastin “Arena e Yjeve” ishte portieri i njohur Betim Halimi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Portieri kosovar, Betim Halimi, ka ndarë një nga përvojat më të paharrueshme në karrierën e tij, duke folur për momentet kur ka pasur fatin të punojë dhe të udhëtojë me legjendën e futbollit, Yaya Toure.

Halimi tregon se ajo që e bëri Touren të veçantë nuk ishte vetëm cilësia e jashtëzakonshme e stërvitjeve, por edhe thjeshtësia dhe sjellja e tij si njeri.

“Ja nisën mediat në Ukrainë të shkruanin për Yaya Toure po vjen ndihmëstrajner. Po e pabesueshme ka qenë deri sa e pamë me sytë tanë”.

“Domethënë është prej krejt lojtarëve me emër që i kam takuar e që kam luajtur kundër tyre, si Yaya Toure nuk më kanë parë sytë”.

“Aq i thjeshtë. Domethënë ai ka qenë i privilegjuar në klubin tonë me kushte se ne udhëtonim për shembull me tren nga 9 orë me një qytet tjetër për të luajtur, Yaya e ka pasur avionin privat për të udhëtuar”.

“Kurrë nuk ka shkuar, vetëm me ne. 9 orë me tren ne 9 ai. Kur shkonim në Mariupol për të luajtur, i bënim nga 17 orë rrugë”.

“Sidoqoftë, trenat kanë qenë të mirë me dhomë gjumi, por pa marrë parasysh 17 orë janë shumë. Yaya Toure asnjëherë nuk është ndarë nga ekipi, gjithmonë me neve”.

“Me çka kemi shkuar ne edhe ai me neve. Por edhe kështu e ka pasur filozofinë e lojës e këto i ka pasur tjetër nivel”.

“Me qenë një lojtar i nivelit të Yaya Toures që ka luajtur në kohë të artë të Barcelonës, edhe të jesh aq djalë i mirë, i sjellshëm dhe i thjeshtë, nuk e kisha imagjinuar”, ka rrëfyer Halimi.

Episodin e plotë me Betim Halimin mund ta ndiqni edhe në kanalin zyrtar të Telegrafit në YouTube./Telegrafi/

- YouTube www.youtube.com

I ftuari i radhës në podcastin “Arena e Yjeve” ishte portieri i njohur Betim Halimi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Betim Halimi ka rrëfyer një histori tejet interesante duke treguar se si ai dhe shokët e tij të skuadrës te Olimpik Donetsk, kishin marrë 10 mijë euro premio nga Shakhtar Donetsk për të ndalur me barazim rivalin e tyre për titull Dinamo Kiev.

“Para lojës futet brenda, thasë me vete kishte pasur. Ka 15 mijë dollarë për kokë lojtari, nëse fitoni i keni nga Shakhtari nëse fitoni, 10 mijë për barazim”.

“Ka pas qenë Demir Imeri që ka luajtur në Shqipëri. Pati ardhur në atë sezon edhe ndeshja e tij e parë e dytë ke kur ndodhi, edhe kur e pa po kthehet ka unë dhe po thotë seriozisht e ka a, thashë bablok këto para ne po i kapim tash ti bëje një përpara se e bëjmë zero mbrapa”.

“Edhe e fillojmë ndeshjen, shumë presion bën Dinamo sepse i ka pasur këta Tsygankov që po luan në Girona. Ka qenë si Arjen Robben, veç mos me i lënë hapësirë sepse të majtën e ka pasur tjetër nivel”.

“Edhe shumë ka qenë ky Yarmolenko, Andriy Yarmolenko, pra ka pasur lojtarë Dinamo krejt emra i ka pasur”.

“Edhe ne mirë u mbajtëm në pjesën e parë, prej zonës së 16 metërshit nuk dilnim por mirë 0-0 përfundoi pjesa e parë. Si fillon pjesa e dytë, një kundërsulm i yni i pari, 1-0 për ne”.

“Edhe po tash referat atje janë pak të çuditshëm. Menjëherë pas golit kontakti i parë jashtë zonës, direkt karton i kuq, edhe pse i kishte ai kapiteni ynë na kishte pesë gjashtë lojtarë mbrapa, sepse ne krejt aty ishim”.

“Deri në minutën 75-80-të u mbajtëm dhe pastaj na e bëri Tsygankov një super gol, 1-1 dhe e vazhduam ashtu lojën duke u mbrojtur, mbaroj loja 1-1 dhe tash as nuk ishim që të gëzoheshim aq shumë sepse ishte 1-1, por edhe mu hidhëru jo sepse e dije që si të futesh brenda të presin 10 mijë dollarë”, ka rrëfyer Halimi.

Episodin e plotë me Betim Halimin mund ta ndiqni edhe në kanalin zyrtar të Telegrafit në YouTube./Telegrafi/

- YouTube www.youtube.com

I ftuari i radhës në podcastin “Arena e Yjeve” ishte portieri i njohur Betim Halimi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Portieri i njohur kosovar, Betim Halimi, ka ndarë përvojën e tij të jashtëzakonshme kur kishte mundësinë të stërvitej për një javë në Cobham, qendra stërvitore e Chelseat, duke e përshkruar atë si një eksperiencë “të pabesueshme”.

Gjatë asaj periudhe, portieri kosovar pati mundësinë të stërvitej me emra të njohur të futbollit botëror, duke përfituar përvojë të çmuar.

“Me thënë të drejtën hala nuk mundem me besu. E kam harruar si histori se është e pabesueshme se kam qenë një javë në Cobham, qendra stërvitore e Chelseat”.

“Tash kur shkon ti nga Vllaznia e Pozheranit, në një qendër stërvitore ku i sheh krejt grupmoshat, me ekip të parë, mandej kushtet, 28 fusha të stërvitjes”.

“Dukej sikur ke humbur brenda, nuk e dije ku do të stërvitesh, domethënë diçka që është e pabesueshme”.

“Në atë kohë nuk kemi pasur në futboll të Kosovës ne asgjë, nuk i kemi pasur kushtet elementare”.

“Shkova të ushtroja me Tammy Abraham, me Charly Musonda me lojtarë shumë emra që sot janë në klube të mëdha”, ka rrëfyer Halimi.

Episodin e plotë me Betim Halimin mund ta ndiqni edhe në kanalin zyrtar të Telegrafit në YouTube./Telegrafi/

I ftuari i radhës në podcastin “Arena e Yjeve” ishte portieri i njohur Betim Halimi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Portieri i njohur kosovar, Betim Halimi, ka ndarë përvojën e tij të veçantë kur mori mundësinë për të shkuar në prova te Chelsea, një moment që ai e përshkruan si “shumë të pabesueshëm dhe të çuditshëm”.

“Me të tregu drejtën ka qenë shumë e pabesueshme edhe e çuditshme edhe më kujtohet shumë mirë kur pata apliku për vizë të Anglisë në ambasadë, nuk e besonte askush”.

“Po çka Chelsea? Edhe pati ndodhur prej një menaxhere shqiptar, në fakt nuk ka qenë menaxher por ka pasur shoqëri me menaxhera”.

“Është e çuditshme se ajo ka qenë e gjinisë femërore ka qenë e Zvicrës dhe më kishte ofruar tri-katër mundësi me ekipe shumë të mëdha si Chelsea, tash nuk po më kujtohet cilat pasi kjo punë i ka 10 vjet dhe nuk po më kujtohet cilat ekipe kanë qenë dhe vendos ku dëshiron të shkosh ta provosh vetën”.

“Edhe me ardh përshembull në atë kohë, tash me qenë tash pak më ndryshe janë gjërat, por në atë kohë ka qenë diçka e pabesueshme edhe unë po i them jo në Chelsea e kam qejf Chelsean po shkoj aty”.

“Edhe kur filluan bisedat të bëheshin më serioze ma dërgoi ftesën e Chelseat, mi mori njëherë të dhënat e mia e disa video çfarë iu interesonin atyre dhe kur më erdhi ftesa ishte e pabesueshme”, ka rrëfyer Halimi.

Episodin e plotë me Betim Halimin mund ta ndiqni edhe në kanalin zyrtar të Telegrafit në YouTube./Telegrafi/