Pretendimi: Kjo video tregon një mace duke pritur një fëmijë që bie nga ballkoni

Verdikti: E pavërtetë, Gjeneruar me AI

—————————————————————————

Një video që ka marrë mbi 7 mijë pëlqime në Facebook pretendohet se tregon aktin heroik të një maceje të zezë, e cila shpëton një foshnje që po bie nga lartësia.

Megjithatë, video prekëse me gjasa është gjeneruar nga programe kompjuterike të inteligjencës artificiale (AI), specifikisht modele që gjenerojnë videoklipe të shkurtra bazuar në udhëzimet me tekst të përdoruesit.

Origjina e gjeneruar e videos është e dukshme në detajet jorealiste. 

Në një moment të videos duket sikur krahu i një gruaje kalon tejpërtej trupit të maces për të kapur fëmijën. Më tej, një burrë ngre fëmijën në mënyrë të panatyrshme me dorën e djathtë, duke e ngritur pa e mbajtur. Në një çast, një pllakë e trotuarit ndryshon ngjyrë pa arsye.

http://faktoje.al/wp-content/uploads/2025/12/Untitled-design.mp4

Facebook i detyron përdoruesit të etiketojnë imazhet dhe videot e gjeneruara me AI si të tilla.

Megjithëse kjo video është e rreme, ka patur raste të vërteta kur një mace ka shpëtuar fëmijë nga rreziku. Në 2014, një mace në Kaliforni shpëtoi fëmijën e familjes nga sulmi i një qeni. Një video e botuar 10 vite më parë tregon një mace duke ndaluar një fëmijë të prekë sobën e nxehtë. Në një tjetër video autentike, një mace duket se ndalon një fëmijë të vogël që të kacavirret nga ballkoni.

Faktoje ka përgënjeshtruar dhe më parë video të maceve që shpëtojnë fëmijë të gjeneruara me AI.

The post E gjeneruar video e maces heroinë që shpëton foshnjën appeared first on Faktoje.al.

Një pronare maceje përjetoi një shok të vërtetë kur, pasi dëgjoi një “mjaullimën”, zbriti shkallët dhe gjeti një mace të panjohur të ulur nën pemën e Krishtlindjes në shtëpi - ndërsa macja e saj ishte jashtë dhe shikonte e hutuar nga dera për mace.

Pronaren, e quajtur Keira, e tregoi këtë moment në një video në TikTok, ku shihet kur ajo zbulon “macen e paditur” duke u relaksuar nën pemën e Krishtlindjes në shtëpinë e saj. Ajo shpjegoi se kishte dëgjuar macen e saj Eddie duke mjaullitur, ndaj u përpoq të kuptonte çfarë po ndodhte.

Në vend të Eddies, në shtëpi ajo gjeti një mace tjetër, për të cilën askush nuk e dinte pronarin dhe ende nuk dihej se si kishte arritur atje. Eddie katërvjeçar qëndronte jashtë dhe shikonte macen e paftuar përmes vrimës për mace.

Mace e panjohur dukej mirë dhe e kujdesur, kështu që Keira e xhiroi momentin, dhe videoja u bë viral në TikTok, duke arritur më shumë se 1.3 milion shikime në disa ditë.

Pas zbulimit, macja nuk u largua menjëherë - ajo qëndroi rreth 30 minuta nën pemën e Krishtlindjes, shumë e qetë dhe e rehatshme. Për fat të mirë, Eddie nuk u ofendua shumë dhe gjithçka përfundoi mirë. /Telegrafi/

ROMË, 17 dhjetor /ATSH/- Raftet e supermarketeve dhe dyqanet e luleve janë plot me to. Dhe kështu janë edhe shtëpitë. “Euphorbia pulcherrima” tradicionale, e njohur si “Lulja i Krishtlindjeve” ka qenë gjithmonë bima më e blerë dhe më e dhuruar gjatë festave të Krishtlindjeve, sipas “Corriere Della Sera”.

Gjethet e saj të kuqe që rrethojnë lulet e vogla të verdha, e bëjnë atë një dekorim ideal për ambientet e brendshme të shtëpive.

Por jo për të gjithë ata që jetojnë atje, si qentë dhe macet.

Kjo bimë është toksike për kafshët. Ajo që e bën të rrezikshme është lëngu i saj i qumështit, i cili përmban euforbone, alkaloide dhe triterpene.

Të gjitha këto komponentë shkaktojnë një reaksion tek qentë dhe macet kur gjethet gëlltiten ose edhe përtypen.

Megjithatë, këto helmime rrallë janë serioze.

Efektet, ndonëse jo kërcënuese për jetën, mund të jenë vërtet shqetësuese për miqtë tanë me katër putra.

Simptomat variojnë nga djegia e gjuhës dhe buzëve me pështymë të bollshme, deri te dermatiti vezikular, ënjtja e fytyrës, konjuktiviti dhe lotimi, duke çuar në rastet më akute në të vjella, diarre dhe dridhje. //a.i/

The post Lulja e Krishtlindjeve rrezik për qentë dhe macet, çfarë të bëni në rast helmimi appeared first on Agjencia Telegrafike Shqiptare.

NJU JORK, 7 dhjetor /ATSH/- Barnat popullore për humbje peshe GLP-1 mund të jenë së shpejti të disponueshme edhe për kafshët shtëpiake, sipas CBS News.

“Okava Pharmaceuticals”, me seli në San Francisko, sapo lançoi MEOW-1 — një studim klinik – gjatë të cilit u përdor një implant i vogël nën lëkurë te 50 mace për të përfituar një ilaç GLP-1 gjatë gjashtë muajve.

“Implanti, i quajtur OKV-119, është projektuar për të imituar shumë nga efektet fiziologjike të agjërimit — ndjeshmëri të përmirësuar ndaj insulinës, masë të reduktuar të yndyrës dhe metabolizëm më efikas të energjisë — pa kërkuar ndryshime të rëndësishme në rutinat e të ushqyerit ose pa prishur lidhjen njeri-kafshë që shpesh përqendrohet rreth ushqimit”, tha Michael Klotsman, CEO i “Okava”.

Sipas kompanisë, ky ilaç ka potencialin të përmirësojë cilësinë e jetës së maceve dhe të nxisë plakjen e shëndetshme.

Ekspertët thonë se afërsisht gjashtë në 10 mace në SHBA vuajnë nga mbipesha.

“Në mjekësinë veterinare për 100 vitet e fundit, e vetmja recetë që kishim ishte pakësimi i ushqimit dhe kjo nuk funksionon për të gjitha llojet e obezitetit”, tha Dr. Ernie Ward, një ekspert i lartë i obezitetit për kafshët shtëpiake.

Ward tha se përfitimet mund të shkojnë përtej humbjes së peshës, duke iu referuar të dhënave njerëzore që tregojnë përmirësime në rrezikun e diabetit dhe shëndetin afatgjatë.

Sipas “Okava”, ilaçi t’u kushtojë pronarëve rreth 100 dollarë në muaj.

Rezultatet nga prova MEOW-1 priten verën e ardhshme.

Kompania do të kërkojë miratimin e FDA-së për përdorim nga macet në dy vitet e ardhshme – dhe shumë shpejt edhe nga qentë. //a.i/

The post Radha e kafshëve shtëpiake për të humbur peshë appeared first on Agjencia Telegrafike Shqiptare.

Miley Cyrus dhe partneri i saj, Maxx Morando, janë zyrtarisht të fejuar pas katër vjetësh romancë, ka raportuar Page Six. Lajmi vjen pasi çifti u shfaq së bashku në tapetin e kuq të premierës botërore të filmit “Avatar: Fire and Ash”, ku fansat vunë re menjëherë detajin që i tradhtoi: unazën e saj të re vezulluese.

Në paraqitjen e tyre të përbashkët në Los Angeles, dyshja pozuan të buzëqeshur e të qetë, ndërsa Miley poziciononte dorën në mënyrë strategjike për të nxjerrë në pah unazën mahnitëse me diamant. Thashethemet nisën menjëherë, por nuk zgjati shumë deri sa u konfirmuan.
Sipas përfaqësueses së këngëtares, Francesca Consulting, unaza është krijuar me porosi nga dizajnerja e famshme e bizhuterive Jacquie Aiche, e njohur për stilin boho-luksoz dhe bashkëpunimet me shumë yje të Hollywood-it. Detajet zbuluan se diamanti ka prerje cushion, i vendosur në një shirit të trashë prej ari të verdhë 14-karatësh, duke i dhënë copës një dukje klasike, por njëkohësisht moderne e të fuqishme, pikërisht si vetë Cyrus.

Në event, Miley mahniti me një fustan elegant të zi pa rripa, të mbushur me shkëlqim, pjesë e sipërme të strukturuar dhe fund me pala që i jepte një siluetë glamuroze. Ndërsa Maxx Morando, muzikanti dhe partneri i saj prej vitesh, u shfaq me një kostum të zi klasik dhe këmishë të bardhë, duke kompletuar një pamje harmonike me artisten.

Fejesa e tyre shënon një kapitull të ri për çiftin, të cilët kanë preferuar gjithmonë të mbajnë një profil të ulët publik, duke e ruajtur romancën larg zhurmës së mediave.

The post Pas 4 vitesh romancë, Miley Cyrus thotë “Po”! Zbulohen detajet e unazës luksoze appeared first on Albeu.com.

LONDËR, 29 nëntor /ATSH/- Hulumtimet e reja kanë konfirmuar se macet kanë një preferencë kur bëhet fjalë për përdorimin e putrës së majtë ose të djathtë, njësoj si njerëzit me dorën e majtë dhe të djathtë, sipas “Science Alert”.

Duket se ekziston edhe një lidhje gjinore. Sipas studimit të ri, macet preferojnë të përdorin putrën e djathtë për të marrë një kafshatë të shijshme ushqimi ose për të zbritur shkallët, ndërsa maçokët preferojnë të përdorin putrën e majtë.

Sipas ekipit të Universitetit Queen’s, në Belfast në Britaninë e Madhe – tregohet se kjo preferencë lidhet me strukturat e trurit të miqve tanë me gëzof.

Ndryshe nga studimet e mëparshme mbi preferencën e përdorimit të putrave, të cilat u kryen në kushte laboratorike të kontrolluara, kjo analizë u zhvillua në shtëpitë e vetë maceve ndërsa ato kryenin detyra të përditshme, duke analizuar gjithsej 24 maçokë dhe 20 mace.

Ashtu si njerëzit, macet mund të përdorin më shumë putrat e djathta ose të jenë mëngjarashe.

Hulumtimet tregojnë se maçokët kanë më shumë gjasa të jenë mëngjarashë, ndërsa macet kanë tendencë të përdorin putrat e djathta.

Megjithatë, disa mace janë ambidekstra dhe i përdorin të dyja putrat në mënyrë të barabartë.

Sipas studimit ekziston një ndryshim individual brenda gjinive.

Çdo mace tenton të favorizojë më shumë njërën putër për aktivitete si, ngrënia e ushqimit, kujdesi ose kapërcimi i pengesave.

Një model i dukshëm i vërejtur në studime është se maçokët kanë më shumë gjasa të favorizojnë putrën e tyre të majtë, dhe macet kanë më shumë gjasa të favorizojnë të djathtën.

Macet ambidekstra i përdorin të dyja putrat me aftësi të barabartë.

Preferenca e përdorimit të putrave është e lidhur me lateralizimin e trurit, e ngjashme me mënyrën se si dora tek njerëzit është e lidhur me strukturën dhe funksionin e trurit.

Këto janë një tregues – se sa mirë kafshët shtëpiake mund t’i përgjigjen stresit, pasi ana e majtë e trurit kontrollon anën e djathtë të trupit dhe anasjelltas.

“Kafshët mëngjarashe, të cilat mbështeten më shumë në hemisferën e tyre të djathtë për përpunimin e informacionit, kanë tendencë të shfaqin reagime më të forta ndaj frikës, shpërthime agresive dhe përballojnë më keq situatat stresuese – sesa kafshët që përdorin më shumë gjymtyrët e djathtë dhe mbështeten më shumë në hemisferën e tyre të majtë.

Macet dhe maçokët ishin sterilizuar dhe kastruar para se të fillonin eksperimentet, por studiuesit nuk i përjashtojnë hormonet – si arsye pse disa mace e vënë putrën e majtë përpara dhe disa të tjera të djathtën. //a.i/

The post Ashtu si njerëzit, macet mund të përdorin më shumë putrat e djathta ose të jenë mëngjarashe appeared first on Agjencia Telegrafike Shqiptare.

Zelanda e Re ka një plan për të eliminuar të gjitha macet endacake në natyrë deri në vitin 2050 për të mbrojtur biodiversitetin, njoftoi Ministrja e Mjedisit e vendit. Në një deklaratë, Ministrja Tama Potaka njoftoi shtimin e maceve të endacake në strategjinë pionere botërore “Pa Grabitqarë 2050”. Planet fillestare u hartuan një dekadë më parë dhe kishin provokuar reagime të forta nga aktivistët e të drejtave të kafshëve.

Macet endacake tashmë po mblidhen dhe vriten në disa zona, por ka një përpjekje më të bashkërenduar për të zhdukur grabitqarët e listuar, raporton Guardian.

Vlerësohet se më shumë se 2.5 milionë mace endacake enden në Zelandën e Re. Ato mund të rriten deri në një metër të gjata, përfshirë bishtin e tyre, dhe të peshojnë deri në 7 kg.

Ato kanë shkatërruar jetën e egër në shumë zona, duke i çuar disa specie në prag të zhdukjes. Ato janë “vrasëse me gjak të ftohtë”, tha Potaka në një deklaratë, duke thënë se macet do të ishin në të njëjtën listë me gjitarët si ferretat, nuselalat, minjtë dhe oposumët.

Macet shtëpiake, të cilat nuk përfshihen në program, konsiderohen gjithashtu një kërcënim serioz për biodiversitetin. Çështja ka shkaktuar debat të nxehtë në një vend që i do macet me një nga normat më të larta të maceve shtëpiake në botë, por rregulla të paqarta mbi pronësinë e tyre.

The post Plan drastik: Zelanda e Re synon të eliminojë të gjitha macet e egra brenda 25 viteve appeared first on iconstyle.al.

NJU JORK, 23 nëntor /ATSH/- Hulumtimet sugjerojnë se macet mund të jenë krijesat më të përsosura biologjikisht, që ekzistojnë, sipas “Scientific American”.

Sipas disa analizave shkencore të anatomisë dhe fiziologjisë, macet mund të jenë ndër krijesat më efikase, biologjikisht në Tokë.

Strukturat e tyre skeletore dhe muskulore janë të optimizuara për shkathtësi, ekuilibër dhe fshehtësi – duke i lejuar ato të bien nga lartësi të mëdha dhe të ulen në mënyrë të sigurt falë “refleksit të tyre të drejtimit”.

Shikimi i tyre natën rivalizon atë të disa grabitqarëve të natës, dëgjimi i tyre zbulon frekuencat tejzanore (si thirrjet e brejtësve) dhe mustaqet e tyre shërbejnë si sensorë hapësinorë hipersensitivë.

Edhe mjaullima e tyre ka një rol kryesor – duke prodhuar frekuenca midis 25-150 Hz, të cilat lidhen me shërimin e indeve dhe rigjenerimin e kockave.

Studiuesit thonë se evolucioni i ka formuar macet në krijesa pothuajse të përsosura: të heshtura, të ekuilibruara, vetë-shëruese dhe të adaptueshme në pothuajse çdo mjedis.

Ndërsa asnjë organizëm nuk është vërtet “i përsosur” nga pikëpamja shkencore, pasi e gjithë jeta përfshin kompromise evolucionare, shumë biologë i konsiderojnë macet si krijesa shumë të rafinuara dhe të suksesshme për një grabitqar të specializuar.

Ideja që macet mund të jenë “biologjikisht të përsosura” rrjedh nga përshtatjet e tyre të jashtëzakonshme fizike dhe shqisore gjatë miliona viteve.

Tiparet kryesore biologjike që kontribuojnë në këtë përshtatje “pothuajse të përsosur” përfshijnë:

Shkathtësi dhe fleksibilitet të jashtëzakonshëm: Macet kanë një shpinë shumë fleksibile dhe asnjë klavikulë të ngurtë, duke lejuar një gamë të pabesueshme lëvizjesh, lëvizje të heshtura dhe refleksin e famshëm të drejtimit për t’u ulur në këmbë.

Perceptim akut shqisor: Shqisat e tyre janë shumë të specializuara për gjueti.

Ato posedojnë një shikim superior natën (që kërkon vetëm një të gjashtën e dritës që u nevojitet njerëzve), dëgjim të mprehtë të akorduar ndaj frekuencave të larta dhe mustaqe të ndjeshme që veprojnë si sensorë lëvizjeje.

Anatomi e specializuar:

Kthetra të tërheqshme: Kthetra e tyre janë të mbështjella kur nuk janë në përdorim, duke i mbajtur të mprehta për momentin e sulmit.

Muskuj të fuqishëm: Ndërtimi i tyre muskulor lejon shpejtësi, precizion dhe aftësinë për të kërcyer në distanca të mëdha (deri në gjashtë herë gjatësinë e trupit të tyre).

Tretje efikase: Si mishngrënëse, macet kanë një trakt të shkurtër gastrointestinal të projektuar për të përpunuar në mënyrë efikase një dietë me proteina të larta dhe të bazuar në mish. //a.i/

The post Macet mund të jenë krijesat më të përsosura biologjikisht që ekzistojnë appeared first on Agjencia Telegrafike Shqiptare.

Një familje nga New Jersey, e cila humbi një mace të vogël që doli jashtë nga një dritare e hapur, u ribashkua me kafshën e tyre të dashur 10 vjet më vonë falë një mikroçipi.

Strehimorja për kafshët e qytetit Montclair Township tha në rrjetet sociale se një mace endacake ishte sjellë nga një qytetar kohët e fundit dhe zyrtarët e skanuan për një mikroçip.

Ky i fundit identifikoi macen dhe Asa, dhe një telefonatë tek pronarët e saj zbuloi se ajo ishte zhdukur për një dekadë të tërë.

“Para dhjetë vjetësh, një familje adoptuan dy mace të vogla nga një strehimore. Pak kohë më pas, njëra prej tyre doli jashtë nga një dritare dhe u zhduk,” shkruante postimi. “Kjo familje kërkoi dhe kërkoi. Ata vendosën afishe, kontaktuan çdo strehimore, biseduan me fqinjët — bënë gjithçka siç duhet.”

Strehimorja ndau një foto nga ribashkimi i gëzuar.

“Mikroçipet kanë rëndësi. Mikroçipet funksionojnë. Dhe ndonjëherë, ato sjellin një anëtar të humbur të familjes në shtëpi — pavarësisht se sa kohë ka kaluar,” shkruan zyrtarët. /Telegrafi/

- YouTube www.youtube.com

LONDËR, 21 nëntor /ATSH/- Stambolli është një qytet që mjaullin pa pushim, plot dashuri dhe jetë. Lidhja e tij me macet daton shumë shekuj më parë, sipas BBC.

Më shumë se 15 milionë njerëz konkurrojnë për hapësirë ​​në qytetin më të madh të Turqisë, i cili shtrihet në Evropë dhe Azi në të dyja anët e Bosforit, ashtu si një mace shtëpiake e ulur gjysmë në divan dhe gjysmë në tavolinë.

Rreth një çerek milioni mace të humbura jetojnë kudo në Stamboll, nga rrugët e tij dredha-dredha, xhamitë, stacionet e metrosë dhe kafenetë.

Macet enden në vetë pëlhurën dhe historinë e qytetit, janë aq të kudondodhura sa qilimat në shitje në çdo cep.

“Macet e Stambollit, në përgjithësi, nuk janë as kafshë shtëpiake as kafshë të humbura, por një hibrid i këtyre termave”, tha Marcel Heijnen, fotograf dhe autor i “Macet e Qytetit të Stambollit”, duke shtuar se macet nuk janë në pronësi të njerëzve të caktuar – por, për to kujdeset komuniteti në lagjet e tyre përkatëse.

Kujdesin e komunitetit vendas për macet ai thekson se nuk e ka parë askund tjetër.

“Çdo komunë ka një departament veterinar që ndihmon kafshët e rrugës me shërbime falas sterilizimi”, tha Fatih Dagli, bashkëthemelues i Muzeut të Maceve në Stamboll.

“Klinika private për kafshët ofron gjithashtu shërbime me zbritje për macet e rrugës, dhe banorët shpesh kontribuojnë për të paguar faturat e veterinerit”, shtoi ai.

Ky përkushtim ndaj maceve nuk është diçka e re.

“Adhurimi i maceve endacake daton që nga koha kur Stambolli ishte nën sundimin osman”, tha Heijnen.

“Gjatë kësaj periudhe, fondacionet lokale u siguruan për kujdesin ndaj kafshëve endacake. Kjo dashuri për to u shndërrua në një profesion me kohë të plotë kur u krijua një punë e quajtur “kujdestar macesh”, tha ai.

“Kujdestarët ishin të ngarkuar me detyrën e sigurimit që macet e qytetit të ushqeheshin, ndërsa banorët kishin gjithashtu mundësinë të blinin ushqim dhe t’i ushqenin vetë macet”, shtoi ai.

“Që nga fenikasit, ishte shumë e zakonshme që tregtarët detarë të mbanin macet në bord për t’u mbrojtur nga brejtësit”, tha Dagli duke shtuar se me mbërritjen e anijeve tregtare të mëndafshit dhe erëzave në portet e ngarkuara të Stambollit gjatë epokës romake – erdhën edhe macet e panumërta.

Sot, banorët “njerëzorë” të Stambollit ende ndajnë me kënaqësi hapësirat e tyre, brenda dhe jashtë qytetit me macet.

“Catstanbul” përdoret gjerësisht nga adhuruesit e maceve në të gjithë botën – dhe shumë turistë vizitojnë Stambollin vetëm për shkak të maceve.

Në një metropol kaq të zhurmshëm, macet e rrugës së Stambollit dëshmojnë se janë qytetarët e tij më të qetë.

Qoftë duke ndarë një stol druri ndërsa uleni për t’u qetësuar pasi keni vizituar Kullën e Gallatës, qoftë duke u mbështetur në një mur ndërsa admironi pamjen 360 gradë të qytetit, macet e Stambollit të japin një ndjesi qetësie shumë të nevojshme në një vend që ndonjëherë mund të duket kaotik.

Gjithashtu, ka mace të panumërta që ofrojnë të njëjtin kujdes për të tjerët, ato ndalen me dëshirë dhe mund të ulen në prehrin tuaj mikpritës, një ftesë miqësore që nuk njeh kufij apo barriera gjuhësore.

Të gjitha qëniet e gjalla, madje edhe macet që mbijetojnë në rrugë, meritojnë një mirësi të tillë.

Kur një mace e Stambollit zgjedh prehrin tuaj për një sy gjumë, ndërsa aroma e mishit të qebapit, shafranit, misrit të pjekur në skarë dhe të freskët rrotullohet rreth jush, Stambolli bëhet një qytet më i butë dhe më i këndshëm ndaj shqisave.

Qytetet rrallë njihen për “butësinë” e tyre. Ato janë ndërtuar për njerëzit, të mbushura me elementë si rrugë, ndërtesa dhe ura, dhe të bëra nga materiale të forta si tulla, beton, qelqi dhe çeliku.

“Të kesh një specie tjetër të gjallë që kërkon vendin e vet në atë ndërthurje është vërtet e veçantë. Të shohësh vendasit që kujdesen për këta bashkëtokësorë është edhe më speciale”, Heijnen.

Ndryshe nga disa vende më pak mikpritëse anembanë globit, ku jeta në rrugë është shumë më pak e sjellshme ndaj kafshëve endacakë, macet e Stambollit duket se ia kanë dalë.

Nëse vizitoni zonën historike të Fatih-ut për të parë xhamitë e famshme Blu dhe Shën Sofia, ka të ngjarë të shihni maçokun Sulo.

Në Sheshin Sultanahmet, do të shihni një qen të shëndoshë në ngjyre gri dhe të bardhë duke pozuar për foto turistike.

Në lagjet kodrinore dhe përgjatë Bosforit, macet pushojnë në stola dhe shkallë dhe mblidhen për një sy gjumë në mesditë – në shtëpizat prej druri të ndërtuara posaçërisht për macet.

Jashtë tregjeve dhe stacioneve të metrosë, tasa me ushqim të thatë dhe ujë presin që macet e uritura të kalojnë, ndërsa vendasit dhe vizitorët ndajnë porcione nga vaktet e tyre në kafene me macet e rrugës duke i fërkuar butësisht ato.

Këto ditë, macet kanë një punë tjetër. Ato janë ambasadore jozyrtare turistike, duke zbutur një qytet të vështirë dhe të zhurmshëm.

Shumë nga macet e rrugës së Stambollit do të shfaqen te këmbët dhe në fotot tuaja, fytyrat, putrat dhe mjaullimat e tyre do të mbeten të ngulitura në kokën dhe zemrën tuaj shumë kohë pasi të largoheni nga ky vend.

Ato janë një kujtesë joshëse e asaj që është e mundur kur ne i ndajmë në paqe hapësirat tona, ushqimin dhe jetën tonë me të tjerët, në shtëpi dhe gjatë udhëtimit. //a.i/

The post Macet e Stambollit, ambasadoret jozyrtare turistike që përhapin dashuri dhe jetë appeared first on Agjencia Telegrafike Shqiptare.

TIRANË, 19 nëntor /ATSH/ – Helmimi i kafshëve endacake në rrugët e Tiranës po kthehet në një makth social që tashmë prek jo vetëm katërputroshët e braktisur, por edhe kafshët e shtëpive. Rasti i Alma Ismailajës është shembulli më tronditës i kësaj situate që po përshkallëzohet çdo ditë.

Para dy javësh, Alma humbi Pikason, dalmatin e saj 3 vjeç e gjysmë, pasi konsumoi ushqim të helmuar me fosfor organik në sheshin “Skënderbej”. Ngjarja ndodhi në orët e para të 31 tetorit, në zonën me bar pas bustit, një hapësirë ku gjatë ditës luajnë edhe fëmijë.

“Pikaso gjeti diçka përdhe dhe pas pak minutash filloi të dridhej, nxori shkumë nga goja… çdo gjë ndodhi aq shpejt. E çova me urgjencë në spitalin e kafshëve, por nuk arriti të mbijetojë. Mjekët konfirmuan helmim të rëndë me fosfor organik”, tregon Ismailaja.

Ajo thotë se pasojat kanë qenë të rënda edhe emocionalisht.

“Ka qenë një traumë e madhe. Kam kërkuar ndihmë psikologjike. Pikaso ishte pjesë e familjes sime. Asnjë njeri nuk e përjeton lehtë humbjen e një kafshe që e do.”

Por ajo që shqetëson më shumë është indiferenca që po i rrethon këto ngjarje. Është e dhimbshme të shohësh sa shumë raste të ngjashme qarkullojnë çdo ditë. Helmi është hedhur për kafshët endacake, ndërkohë  viktima po bëhen edhe kafshët e shtëpive.  Por jeta e tyre vlen njësoj. Kush e sheh ndryshe është pjesë e problemit.

Kjo nuk është një plagë për ata që duan kafshët—është çështje e shëndetit dhe moralit publik.

Të enjten, në orën 11:00, në sheshin “Skënderbej”, organizatat për mbrojtjen e kafshëve do të zhvillojnë një protestë kundër helmimeve dhe dhunës ndaj tyre.

Nuk mund të pranojmë normalizimin e mizorisë. Kjo i prek të gjithë. Vetëm duke u ngritur së bashku mund të tregojmë se jeta – çdo jetë – duhet mbrojtur.

Alma Ismailaja me Pikason...

1 nga 3

/r.e/

The post Helmimi i kafshëve endacake, një makth social që po i prek të gjithë appeared first on Agjencia Telegrafike Shqiptare.

Disa pronarë përdorin televizorin për t’i argëtuar kafshët e tyre shtëpiake ndërsa janë të zënë, por për macen Mila, e quajtur "TV-ja për mace", kjo është bërë kuptimi i jetës.

Obsesioni i saj shkoi aq larg sa që ajo kërkon nga pronarja të ndizë programin e saj të preferuar, dhe reagimi i saj i çmendur kur pronarja përpiqet ta fikë u bë një hit viral, shkruan PetHelpful.

Videoja e publikuar tregon Milën tërësisht të përqendruar në përmbajtjen në ekran dhe që reagon aktivisht ndaj skenave sikur të ishin reale.

Reagimi i saj shumë i ëmbël nxiti pronaren të shkruante në përshkrimin e videos "A ka ndonjë mace tjetër që çmendet pas TV-së për mace?", dhe përgjigjet shpejt treguan se Mila nuk është aspak e vetme. /Telegrafi/

Iluzionet optike mund të testojnë funksionin e trurit dhe shikimin tonë, duke na mbajtur të mprehtë dhe të gatshëm për ditën që na pret.

Shikoni peizazhin e vjeshtës të paraqitur më poshtë. Mund të duket si një rrëmujë gjethesh që kanë rënë së fundmi nga pemët, por një mace është fshehur diku në foto, transmeton Telegrafi.

Një përdorues i mediave sociale e ndau foton në Reddit në faqen 'Gjej Snajperin', me sfidën: 'Gjej macen e kushëririt tim'.

Faqja përmban foto origjinale të objekteve, kafshëve ose njerëzve të kamufluar në pamje të qartë.

Sfida e peizazhit të vjeshtës u shënua si mesatare në nivel vështirësie, por shumë ende kishin vështirësi për të gjetur macen me qime.

A jeni një nga të paktët njerëz që mund ta dallojnë macen në më pak se 30 sekonda? /Telegrafi/

TIRANË, 15 nëntor /ATSH/ Helmimi i kafshëve endacake në rrugët e Tiranës po shndërrohet në një shqetësim serioz. Organizatat në mbrojtje të kafshëve kanë ndarë në rrjetet sociale video që tregojnë raste të helmimit të qenve dhe maceve endacake.

Në këtë kuadër, Animal Rescue Albania, së bashku me disa organizata të tjera, do të organizojnë të enjten, në orën 11:00, një protestë në Sheshin “Skënderbej”, në Tiranë, kundër helmimit të kafshëve.

Në videot e shpërndara në rrjetet sociale, shfaqen persona të ndryshëm në disa lagje të kryeqytetit, të cilët dyshohet se kanë shpërndarë ushqim të helmuar për qentë dhe macet endacake, duke shkaktuar ngordhjen e tyre. Ushqimi i helmuar në rrugët e Tiranës, mund të shndërrohet në problem edhe armë vrasëse edhe për kafshët që e kanë një shtëpi.

Vullnetarë dhe organizata të mbrojtjes së kafshëve i bëjnë thirrje institucioneve për hetim dhe ndëshkim të autorëve, ndërsa ftojnë qytetarët dhe të gjithë dashamirësit e kafshëve t’i bashkohen protestës.

“Kafshët nuk kanë zë. Kafshët nuk protestojnë. Kafshët nuk mbrohen dot vetë. Ne jemi zëri i tyre!”, thuhet në një postim të organizatorëve.

Ndër të tjera, ata theksojnë se: “Dora e njeriut që duhet t’i mbrojë, po i dëmton, po i helmon, po i zhduk. Nuk mund të heshtim dhe as të kthejmë kokën anash. Mbrojtja e kafshëve nuk është opsion, është detyrë dhe humanizëm.”

Protesta do të zhvillohet më 20 nëntor 2025, në ora 11:00, në Sheshin “Skënderbej”, Tiranë.

/a.f/

The post Të enjten në Tiranë protestë kundër helmimit të qenve dhe maceve appeared first on Agjencia Telegrafike Shqiptare.

Në Turqi, një burrë pranoi të paguajë alimentacion… për dy mace pas shkurorëzimit.

Sipas marrëveshjes së shkurorëzimit, ai u angazhua të transferojë 10 mijë lira turke (330 dollarë euro) çdo tre muaj për ish-gruan e tij - për dhjetë vjet ose sa kohë që macet jetojnë.

Shuma do të rregullohet sipas inflacionit.

Ish-gruas iu dha kujdestaria e plotë e maceve, si dhe një kompensim prej 550 mijë lirash (18 mijë dollarë).

Gjykata ende nuk ka nxjerrë një vendim përfundimtar, por kjo duket të jetë rasti i parë zyrtar i alimentacionit për mace në historinë ligjore turke.

Kur dashuria shkon, por macet mbeten. /Telegrafi/

Pretendimi: Kjo video tregon një mace duke shpëtuar një fëmijë të vogël nga rënia nga ballkoni.

Verdikti: E pavërtetë, Gjeneruar me AI

———————————————————————-

Një video që ka marrë gati 800 pëlqime në Facebook pretendohet se tregon një mace që shpëton një fëmijë të vogël nga rënia nga ballkoni.

Me anë të motorrit të kërkimit Google Lens, Faktoje gjeti se video e mësipërme ka pak ditë që qarkullon në rrjet.

Në një version të hershëm të saj, botuar në Facebook më 13 tetor 2025, video është etiketuar si e gjeneruar me anë të programeve kompjuterike të inteligjencës artificiale, specifikisht Sora, një model që gjeneron videoklipe të shkurtra bazuar në udhëzimet me tekst të përdoruesit dhe gjithashtu mund të zgjasë video ekzistuese.

Në fakt, origjina e gjeneruar e videos është e dukshme në detajet jorealiste. 

Fëmija i vogël duket se ka një forcë dhe ekuilibër të pabesueshëm për t’u mbajtur me një dorë në hekurat e ballkonit. Ndërsa macja duket se ka fuqi fluturuese teksa kalon hekurat e ballkonit.

Megjithëse kjo video është e rreme, ka patur raste të vërteta kur një mace ka shpëtuar fëmijë nga rreziku. Në 2014, një mace në Kaliforni shpëtoi fëmijën e familjes nga sulmi i një qeni. Një video e botuar 10 vite më parë tregon një mace duke ndaluar një fëmijë të prekë sobën e nxehtë. Në një tjetër video autentike, një mace duket se ndalon një fëmijë të vogël që të kacavirret nga ballkoni.

The post E gjeneruar kjo video virale e maces heroinë appeared first on Faktoje.al.

Shumë pronarë kafshësh përpiqen t’u ofrojnë ushqime “të shëndetshme” miqve të tyre me katër putra, duke menduar se frutat dhe perimet që janë të mira për njerëzit janë po aq të mira edhe për ta. Por ekspertët paralajmërojnë se kjo nuk është gjithmonë e vërtetë. Sipas veterinerëve, qepët dhe hudhrat janë ndër ushqimet më të rrezikshme për macet dhe qentë, dhe duhen shmangur me çdo kusht.

Këto dy perime përmbajnë substanca toksike të quajtura tiosulfate dhe disulfide, të cilat dëmtojnë rëndë qelizat e kuqe të gjakut tek kafshët. Si pasojë, mund të zhvillohet anemia hemolitike, një sëmundje e rrezikshme që pengon transportin normal të oksigjenit në trup. Gjendja mund të përkeqësohet me shpejtësi dhe, në raste ekstreme, të çojë në vdekje.

Edhe një sasi e vogël qepë ose hudhër mund të shkaktojë pasoja serioze, sidomos nëse konsumohen rregullisht ose në formë të përpunuar, si në ushqime të gatuara për njerëz. Simptomat e helmimit zakonisht shfaqen brenda disa orësh deri në disa ditë, dhe përfshijnë:

-vjellje dhe diarre

-mungesë oreksi

-dobësi dhe lodhje të theksuar

-zbehje të mishrave të gojës

-frymëmarrje të shpejtë ose vështirësi në frymëmarrje

Veterinerët theksojnë se as qepët e njoma, as pluhurat e hudhrës apo përbërësit që i përmbajnë këto nuk janë të sigurta. Madje, edhe ushqimet e gatshme për njerëz si qoftet, salcat, supat apo byrekët mund të jenë të rrezikshme nëse kafsha i konsumon.

Nëse dyshoni se macja apo qeni juaj ka ngrënë ndonjë nga këto perime, është jetike të kërkoni menjëherë ndihmë veterinarë. Mos prisni që simptomat të përkeqësohen, pasi sa më herët të trajtohet kafsha, aq më të mëdha janë shanset për shërim të plotë.

Për të parandaluar raste të tilla, specialistët këshillojnë që kafshët të ushqehen vetëm me produkte të përshtatura për to dhe që pronarët të jenë gjithmonë të kujdesshëm me mbetjet e ushqimit në shtëpi. Kujdesi dhe informimi janë mënyra më e mirë për të mbajtur shëndetin dhe jetën e gjatë të miqve tanë me gëzof.

The post Këto janë dy nga perimet më të rrezikshme për macet dhe qentë appeared first on iconstyle.al.

NJU JORK, 28 shtator /ATSH/ –  Prej kohësh, macet janë parë si krijesa të ftohta, të pavarura dhe shpesh indiferente ndaj njerëzve që i ushqejnë e i strehojnë, sipas ” The Times”.

Por një studim i ri shkencor ka sjellë një këndvështrim krejt ndryshe: macet mund të krijojnë lidhje të thella emocionale me pronarët e tyre, të ngjashme me ato që shfaqin fëmijët ndaj prindërve.

Hulumtimi, i publikuar në revistën “Current Biology”, u zhvillua nga një grup studiuesish në Shtetet e Bashkuara që analizuan sjelljen e dhjetëra maceve shtëpiake në prani dhe në mungesë të kujdestarëve të tyre.

Metoda e përdorur ishte e njëjtë me atë që psikologët aplikojnë për të matur lidhjet emocionale tek fëmijët e vegjël, testi i quajtur “Strange Situation”.

Rezultatet ishin befasuese: rreth 65 për qind e maceve shfaqën shenja të qarta “lidhjeje të sigurt”, që do të thotë se ato ndiheshin të qeta kur pronari ishte pranë dhe tregoheshin të shqetësuara kur ai largohej. Por sapo pronari kthehej, macet e rifitonin shpejt ndjenjën e sigurisë, një reagim që tregon lidhje të fortë emocionale.

“Macet shfaqin të njëjtën lloj lidhjeje që shohim tek qentë apo madje tek fëmijët”, shpjegon Kristyn Vitale, autorja kryesore e studimit. “Ato nuk janë aspak të ftohta apo të pandjeshme, siç mendohet shpesh. Thjesht e shprehin dashurinë në mënyra më të qeta dhe më delikate”.

Kërkuesit theksojnë se kjo sjellje tregon një ndjenjë besimi dhe sigurie që macet e ndërtojnë me njerëzit. Ato nuk i shohin pronarët vetëm si burim ushqimi, por si figura të rëndësishme për stabilitetin e tyre emocional.

Në fakt, në shumë raste, macet që kishin krijuar lidhje të forta me njerëzit e tyre, shfaqnin më pak stres edhe në situata të reja apo të panjohura.
Studimi hedh dritë mbi mënyrën se si mund të përmirësohet kujdesi ndaj maceve shtëpiake. Sipas ekspertëve, kalimi i kohës cilësore me to, përkëdheljet, loja dhe kontakti i butë janë elementë që forcojnë marrëdhënien dhe ulin ankthin te kafshët.

“Mesazhi është i qartë”, shton Vitale. “Macet nuk janë të ftohta. Ato janë krijesa të ndjeshme dhe sociale, që mund të krijojnë lidhje po aq të thella sa çdo kafshë tjetër shtëpiake. Thjesht duhet t’i kuptojmë dhe t’u japim hapësirën për ta treguar këtë”.

Ky studim sfidon stereotipin e vjetër të maces si një krijesë të vetmuar e të mbyllur në botën e saj, duke treguar se nën atë pamje misterioze fshihet një zemër që lidhet fort me njeriun që e do dhe kujdeset për të. /Ad.Ab./

The post Macet, më të ndjeshme nga sa mendohej appeared first on Agjencia Telegrafike Shqiptare.

Gati se nuk ka asgjë më të bukur se të jesh dëshmitar i lindjes së një miqësie të re, dhe një e tillë – midis haskit siberian dhe një maçoku të vogël – ka pushtuar zemrat e përdoruesve të internetit.

Pamjet prekëse të takimit të tyre të parë u bënë virale, dhe arsyeja është e qartë: duket se këta të dy do të bëhen miqtë më të mirë, shkruan Pethelpful.

Në video shihet North plotësisht i qetë, ndërsa maçoku në fillim është shumë i pasigurt përballë qenit të madh.

I duhej pak kohë për të mbledhur guximin dhe për t’u afruar, por momenti kur më në fund u shtri ngjitur me mikun e tij të ri është thjesht i papërballueshëm.

North tregoi butësi dhe durim të jashtëzakonshëm, dhe maçoku e kuptoi shpejt se te ai kishte gjetur siguri dhe shoqëri. /Telegrafi/

- YouTube www.youtube.com

Në Egjiptin e lashtë, macet nuk ishin thjesht kafshë shtëpiake, por krijesa të shenjta që gëzonin respekt dhe adhurim të jashtëzakonshëm. Ato lidheshin ngushtë me perëndeshën Bastet, hyjnesha me kokë mace, që simbolizonte shtëpinë, pjellorinë dhe mbrojtjen. Përmes saj, macet morën një status tjetër: të shenjtë, duke u bërë jo vetëm shoqëruese të njerëzve, por edhe mbrojtëse të rendit dhe bollëkut. Përveç rolit shpirtëror, ato kishin edhe rëndësi praktike, pasi mbronin rezervat e drithërave nga minjtë, duke garantuar ushqimin e popullit.

Vlera e tyre ishte aq e madhe, saqë nëse dikush do të dëmtonte një mace, qoftë edhe nëse ajo gjë do të ndodhte pa dashje, konsiderohej një shkelje e rendit hyjnor dhe shpesh ndëshkohej me vdekje.

Ndërsa për egjiptianët, humbja e një maceje nuk ishte një ngjarje e zakonshme: ata i vajtonin ato si anëtarë të familjes, kryenin rituale dhe shpesh i mumifikonin për t’i ruajtur përjetësisht.

Zbulimet arkeologjike kanë treguar varreza të tëra të mbushura me mace, dëshmi e qartë e statusit të tyre të lartë në shoqëri. Për egjiptianët e lashtë, macet ishin më shumë se kafshë, ato ishin mbrojtëse të shtëpisë, ura me botën hyjnore dhe simbole të së shenjtës që i jepnin shumë kuptim jetës së përditshme.

The post Mace apo perëndi? Misteret e Egjiptit të lashtë appeared first on iconstyle.al.