TIRANË, 9 maj/ATSH/ Ekspozita e hapur sot me titullin “ATSH – Një rrugëtim në historinë e lajmit shqiptar” nuk është thjesht një rikthim në të kaluarën, por një përpjekje për të kuptuar se si është ndërtuar informacioni publik në Shqipëri, dhe se si ai ka diktuar mënyrën që shoqëria ka parë dhe kuptuar realitetin.

Kështu u shpreh drejtoresha e përgjithshme e ATSH-së Valbona Zhupa në fjalën përshëndetëse në hapjen e ekspozitës, që mblodhi në mjediset e Kalasë së Tiranës dashamirës të shumtë, profesionistë të medias dhe gazetarë.

“Nëpërmjet kësaj ekspozite kemi dashur të rikthejmë jo vetëm ngjarjet, por edhe atmosferën e epokave të ndryshme: gjurmët e makinave të para të transmetimit, fotografitë bardhezi të dala nga laboratorët, radiostacionet e hershme, buletinet e shtypura me urgjencë, kamerat, negativët, telegrafët, newsroom-et dhe njerëzit që kanë qenë pas lajmit”, theksoi Zhupa.

Ajo informoi se përmes materialeve arkivore të Agjencisë Telegrafike Shqiptare, në bashkëpunim me Drejtorinë e Përgjithshme të Arkivave, janë sjellë fotografi dhe materiale të papublikuara më parë.

“Nga dokumentet e para të shtypit shqiptar, te krijimi i ATSH-së si institucioni qendror i lajmit, kjo ekspozitë sjell fragmente të historisë së informacionit në Shqipëri përmes fotografive, dokumenteve dhe dëshmive arkivore që kanë shoqëruar momentet më të rëndësishme të vendit”, vuri në dukje drejtoresha e përgjithshme e ATSH-së.

Sipas saj, mes materialeve të ekspozuara gjenden marrëveshje historike të ATSH-së me agjenci ndërkombëtare, ligji i shtypit i vitit 1931, dokumente mbi transmetimin e lajmit në periudha lufte, fotografi të gazetarëve në terren, si edhe materiale që pasqyrojnë zhvillimin e organizimit institucional të lajmit ndër vite.

Po ashtu, Zhupa vlerësoi se ekspozita është gjithashtu një homazh për njerëzit që e kanë ndërtuar ATSH-në ndër dekada.

“Nga Mihal Sherko dhe drejtuesit e parë të agjencisë, te gazetarët, fotoreporterët, redaktorët, përkthyesit, teknikët dhe arkivistët – secili prej tyre ka lënë një gjurmë në historinë e informacionit shqiptar”, theksoi ajo.

Në këtë rrugëtim, një vend të veçantë zë puna e fotoreporterëve të ATSH-së.

“Si kronikanë të kohës, ata kanë qenë dëshmitarë në ngjarje politike, në transformime sociale, në përditshmëri, në festa, në jetën politike, sociale ekonomike të vendit, në kohë krize e në ndryshime epokash. Shumë prej imazheve që sot i konsiderojmë pjesë të memories kolektive të shqiptarëve, kanë kaluar fillimisht përmes objektivit të tyre”, vlerësoi Zhupa.

Një dimension tjetër i rëndësishëm i ekspozitës është edhe teknologjia, sepse historia e lajmit është edhe historia e mënyrës se si ai ka udhëtuar.

“Nga transmetimet e para me telegraf, tek radioja, televizioni dhe platformat digjitale të sotme, informacioni ka ndryshuar vazhdimisht formë, shpejtësi dhe ndikim. Bashkë me të, ka ndryshuar edhe mënyra si njerëzit e kanë kuptuar botën përreth”, theksoi ajo.

Duke u kthyer serisht tek arkivi i ATSH-së, Zhupa përmendi se më në fund ka nisur procesi e digjitalizimit.

“Ky fond përfshin mbi 300 mijë fotografi dhe negativë filmikë, mes tyre dhe materiale të hershme në xham, që sot po digjitalizohen për t’u ruajtur dhe bërë më të aksesueshme për publikun dhe brezat që vijnë”, theksoi ajo.

“Në një kohë kur gjithçka qarkullon me shpejtësi dhe rrezikon të humbasë po aq shpejt, ruajtja e arkivës mbetet një mënyrë për të mos lejuar harresën. Siç shkruante Milan Kundera: “Lufta e njeriut kundër pushtetit është lufta e kujtesës kundër harresës””, vuri në dukje Zhupa.

“Nuk është rastësi që kjo ekspozitë hapet më 9 maj, në Ditën e Evropës, një ditë që na kujton se informimi i lirë dhe i besueshëm është themeli i çdo shoqërie demokratike”, përfundoi drejtoresha e përgjithshme e ATSH-së, Valbona Zhupa.

/r.e/

The post Zhupa: Arkivi i ATSH-së pjesë e memories kolektive të shqiptarëve, kemi nisur digjitalizimin appeared first on Agjencia Telegrafike Shqiptare.

MOSKË, 8 maj /ATSH-AA/ – Operacionet në 13 aeroporte në jug të Rusisë u pezulluan sot përkohësisht pasi sulmet me dronë goditën ndërtesën administrative të degës së Navigimit Ajror të Rusisë Jugore në Rostov-on-Don, tha Ministria ruse e Transportit.

Në një deklaratë të postuar në Telegram, ministria tha se procedurat e kontrollit të trafikut ajror në jug të Rusisë jugore po përshtateshin pas sulmit. “Personeli është i sigurt dhe autoritetet po vlerësojnë funksionalitetin e pajisjeve”, tha ministria.

Operacionet e aeroportit u pezulluan në Astrakhan, Vladikavkaz, Volgograd, Gelendzhik, Grozny, Krasnodar, Makhachkala, Magas, Mineralnye Vody, Nalchik, Sochi, Stavropol dhe Elista.

Rusia dhe Ukraina shkëmbyen akuza sot për shkelje të dyshuara të një armëpushimi dy-ditor të shpallur nga Moska që përkon me përkujtimet e Ditës së Fitores në Rusi më 9 maj.

Presidenti ukrainas, Volodymyr Zelenskyy tha se Rusia kishte nisur më shumë se 850 sulme me dronë ndërsa Ministria e Mbrojtjes e Rusisë tha se kishte regjistruar 1.365 shkelje të armëpushimit.

Ministria e Mbrojtjes e Rusisë njoftoi të hënën se do të zbatonte një armëpushim më 8-9 maj gjatë festimeve të Ditës së Fitores dhe shprehu shpresën se Ukraina do të ndiqte të njëjtën gjë.

Më vonë atë ditë, Zelenskyy tha se Kievi d

The post MOSKË – Sulmet ukrainase me dronë ndërpresin operacionet në 13 aeroporte në jug të Rusisë appeared first on Agjencia Telegrafike Shqiptare.

KIEV/BAKU, 25 prill /ATSH– DPA/ – Ukraina dhe Azerbajxhani ranë dakord për thellimin e bashkëpunimit ushtarak gjatë vizitës së presidentit ukrainas Volodymyr Zelensky në Baku.

“Gjashtë dokumente u nënshkruan”, njoftoi presidenti Zelensky në rrjetin X pas takimit me presidentin Ilham Aliyev në kryeqytetin azerbajxhanas.

“Çelësi qëndron në kompleksin e armatimeve. Ne do të zgjerojmë dhe thellojmë bashkëpunimin tonë”  tha Zelensky, pa dhënë detaje të mëtejshme.

Në fillim të vizitës, Zekensky u takua me specialistë ukrainas të luftës me dronë, të cilët prezantuan përvojën e tyre para palës azerbajxhanase.

Ukraina ka nënshkruar më herët marrëveshje të ngjashme me vende të Lindjes së Mesme, duke u bazuar në përvojën e saj në përballjen me dronë të dizajnit rus dhe iranian.

Disa vende të Gjirit janë goditur nga dronë iranianë gjatë konfliktit aktual me Iranin.

Nën udhëheqjen e Aliyevit, Azerbajxhani ka ofruar mbështetje për Ukrainën në përballjen me pushtimin rus dhe është një furnizues i rëndësishëm nafte, me shkëmbime tregtare vjetore që arrijnë rreth 500 milionë dollarë.

Presidenti Aliyev tha se synimi është rritja e mëtejshme e tregtisë mes dy vendeve. Azerbajxhani, një ish-republikë sovjetike e pasur me naftë, ka ndjekur një linjë gjithnjë e më të pavarur në marrëdhëniet me Moskën. /Ad.Ab./

The post FOKUS – Ukraina dhe Azerbajxhani bien dakord për bashkëpunim ushtarak dhe rritje të tregtisë appeared first on Agjencia Telegrafike Shqiptare.

BRUKSEL, 24 prill /ATSH-AA/ – Shefja e politikës së jashtme të BE-së, Kaja Kallas, ka deklaruar se bota ndodhet në një udhëkryq kritik dhe rendi ndërkombëtar po përballet me presion në rritje.

“Bota ndodhet në një moment kritik”, theksoi Kallas me rastin e Ditës Ndërkombëtare të Multilateralizmit dhe Diplomacisë për Paqe.

Në deklaratën e publikuar nga Shërbimi Evropian i Veprimit të Jashtëm, Kallas tha se e drejta ndërkombëtare po shtrembërohet, shpërfillet ose shkelet hapur, ndërsa institucionet e krijuara për të ruajtur paqen dhe sigurinë po sfidohen.

“Parimet e Kartës së OKB-së janë nën sulm të drejtpërdrejtë”, tha Kallas, duke përmendur konfliktet, përfshirë luftën Rusi-Ukrainë, si dhe luftërat në Lindjen e Mesme dhe Sudan, si shembuj të presionit në rritje mbi rendin ndërkombëtar të bazuar në rregulla.

Ajo shtoi se OKB-ja mbetet e vetmja kornizë universale me legjitimitetin për të përfaqësuar interesin global, por theksoi se vetëm legjitimiteti nuk mjafton.

Kallas tha se multilateralizmi nuk po dështon sepse është i vjetëruar, por sepse parimet e tij nuk po respektohen ose zbatohen.

BE-ja, shtoi ajo, mbetet e përkushtuar për forcimin e sistemit multilateral, duke bërë thirrje që ai të bëhet më efektiv, gjithëpërfshirës dhe i përgjegjshëm.

Ajo gjithashtu theksoi rëndësinë e proceseve gjithëpërfshirëse të paqes dhe përpjekjeve ndërmjetësuese që përfshijnë aktorët lokal, gratë, shoqërinë civile dhe të rinjtë.   /os/

The post BRUKSEL – Kallas: Parimet e Kartës së OKB-së janë nën “sulm të drejtpërdrejtë” appeared first on Agjencia Telegrafike Shqiptare.

ROMË, 14 prill /ATSH/- Kryeministrja italiane, Giorgia Meloni ka dalë në mbrojtje të Papa Leone XIV pas kritikave të ashpra të presidentit amerikan, Donald Trump, duke i cilësuar sulmet ndaj kreut të Kishës Katolike si “të papranueshme”.

Sipas raportimeve të “Reuters” dhe medieve ndërkombëtare, përplasja shpërtheu pasi Trump e quajti Papën “të dobët në luftën kundër krimit” dhe “të tmerrshëm për politikën e jashtme” në një seri postimesh publike.

Reagimi i Melonit erdhi në një moment delikat politik, pasi ajo konsiderohej një aleate e afërt e Trump.

Megjithatë, ajo theksoi se është “normale dhe e drejtë” që Papa të flasë për paqen dhe të dënojë luftën, duke mbrojtur rolin e tij moral në arenën ndërkombëtare.

Nga ana tjetër, Papa Leone – i pari papë amerikan në histori – nuk u tërhoq nga qëndrimet e tij dhe deklaroi se “nuk kishte frikë” nga administrata Trump, duke premtuar se do të vazhdonte të kritikonte luftën dhe politikat që ai i konsideron të padrejta.

Përplasja lidhet ngushtë me qëndrimet e Papës kundër luftës së udhëhequr nga SHBA-ja ndaj Iranit dhe politikave të migracionit, të cilat ai i ka kritikuar vazhdimisht.

Ndërkohë, tensionet janë përshkallëzuar edhe më tej pasi Trump publikoi një imazh të gjeneruar me inteligjencë artificiale ku paraqitej në një formë të ngjashme me figurën e Jezusit, duke shkaktuar reagime të forta nga liderë fetarë dhe opinioni publik.

Analistët theksojnë se kjo përplasje rrezikon të thellojë krizën mes SHBA-së dhe Vatikanit, duke krijuar një ndarje të rrallë mes politikës dhe autoritetit fetar në skenën globale.

Mbështetja e Melonit për Papën tregon një balancim të vështirë mes aleancave politike dhe presionit të brendshëm në Itali, ku figura e Papës mbetet me ndikim të madh, ndërsa përplasja me Trump vazhdon të tensionojë marrëdhëniet ndërkombëtare. //a.i/

The post ITALI – Meloni del në mbrojtje të Papa Leone XIV pas kritikave të ashpra të Trump appeared first on Agjencia Telegrafike Shqiptare.

TIRANË, 7  prill/ATSH/ Më 7 prill 1939, lindi në Lushnjë këngëtarja Vaçe Zela, e cila do të kthehej në ikonën e padiskutueshme të skenës sonë muzikore.

Vaçe Zela përfundoi studimet për aktrim në Institutin e Lartë të Arteve dhe më pas nisi rrugëtimin e saj muzikor, duke spikatur që në Festivalin e Parë të Këngës në 1962, duke fituar çmimin e parë me këngën “Fëmija i parë”.

Nga arkivi i ATSH-së përzgjodhëm disa fotografi të artistes e cila ka fituar 11 herë çmimin e parë në Festivalet e Këngës në RTSH.

Karriera e saj u pasurua përmes angazhimeve në institucionet kryesore të kohës. Ajo lëvroi me mjeshtëri si muzikën e lehtë, ashtu edhe atë popullore. Si pjesë e Ansamblit Shtetëror, Vaçe Zela i dha një frymë emancipuese dhe moderne këngës shqiptare. Përmes interpretimeve legjendare si “Valsi i lumturisë”, “Mesnatë”, “Trëndelinë”, “Moj e bukura More”, ajo la një gjurmë të pashlyeshme në historiografinë kulturore.

Vaçe Zela është vlerësuar me titullin “Nderi i Kombit”. /j.p/

1 nga 6

The post Vaçe Zela fituese e 11 çmimeve të para në Festivalin e Këngës në RTSH, ATSH sjell fotot e kohës appeared first on Agjencia Telegrafike Shqiptare.

TEHERAN, Irani sot hodhi poshtë idenë e një armëpushimi me SHBA-në, duke thënë se çdo pauzë në luftime mund t’u lejojë kundërshtarëve të tij të riorganizohen dhe të rifillojnë sulmet.

Zëdhënësi i Ministrisë së Jashtme të Iranit, Esmaeil Baqaei tha gjatë një konference për media se Teherani do të shqyrtojë vetëm marrëveshjet që përfshijnë garanci që parandalojnë kthim në armiqësi.

“Një armëpushim do të thotë pauzë për të rindërtuar forcat për sulme të rinovuara. Asnjë aktor racional nuk do ta pranonte këtë”, tha ai.

“Kërkesat e Iranit duhet të përfshijnë garanci për të parandaluar një cikël armëpushimi dhe konflikti të rinovuar”, shtoi Baqaei duke theksuar se vendimet që lidhen me sigurinë kombëtare duhet të sigurojnë që të mos ketë akte të mëtejshme agresioni.

Tensionet rajonale janë përshkallëzuar që kur SHBA-ja dhe Izraeli nisën një ofensivë të përbashkët ndaj Iranit më 28 shkurt, duke vrarë deri më tani mbi 1.340 njerëz, përfshirë ish-liderin suprem të Iranit, Ali Khamenei.

Irani është është kundërpërgjigjur me sulme me dronë dhe raketa që kanë shënjestruar Izraelin, së bashku me Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë ndërsa kanë prishur tregjet globale dhe aviacionin.   /os/

The post TEHERAN – Irani refuzon armëpushimin me SHBA-në, kërkon garanci për mosripërtëritjen e luftës appeared first on Agjencia Telegrafike Shqiptare.

TEHERAN, 4 prill /ATSH-AA/ – SHBA-ja ka propozuar një armëpushim 48-orësh me Iranin më 2 prill përmes një vendi të tretë..

Duke cituar një burim të informuar, agjencia gjysmëzyrtare Fars News Agency tha se “SHBA, më 2 prill, propozoi një armëpushim 48-orësh përmes njërit prej vendeve mike”.

Burimi tha se propozimi erdhi pas “përshkallëzimit të tensioneve dhe sfidave me të cilat përballen forcat amerikane në rajon”.

Sipas agjencisë, Irani nuk iu përgjigj me shkrim, por reagoi “në terren” duke vazhduar sulmet e rënda.

Burimi gjithashtu tha se “përpjekjet diplomatike të SHBA-së për të ndalur luftimet janë intensifikuar, veçanërisht pas një sulmi të raportuar ndaj një depoje ushtarake amerikane në ishullin Bubiyan në Kuvajt”.

SHBA-ja dhe Izraeli më 28 shkurt nisën një ofensivë ajrore ndaj Iranit, duke vrarë më shumë se 1.340 persona deri më tani, përfshirë edhe liderin suprem të atëhershëm, Ali Khamenei.

Irani është kundërpërgjigjur me sulme me dronë dhe raketa që kanë në shënjestër Izraelin, si dhe Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë, si dhe duke ndërprerë tregjet globale dhe aviacionin.   /os/

The post FOKUS – Mediat iraniane: SHBA propozoi një armëpushim 48-orësh me Teheranin appeared first on Agjencia Telegrafike Shqiptare.

LONDËR, 27 mars /ATSH/- Qeveria hungareze e udhëhequr nga kryeministri Viktor Orban po përballet me akuza të rënda për frikësim dhe manipulim të votuesve, vetëm pak javë përpara zgjedhjeve parlamentare, duke ngritur pikëpyetje mbi integritetin e procesit zgjedhor në vend, sipas BBC.

Sipas një investigimi disa mujor të publikuar në një dokumentar të titulluar “Çmimi i votës”, janë zbuluar praktika të përhapura në zona rurale dhe qytete të vogla, ku qytetarëve u ofrohen përfitime të ndryshme në këmbim të votës për partinë në pushtet, “Fidesz”.

Hetimi evidenton një gamë të gjerë motivimesh të përdorura për të ndikuar votuesit, përfshirë para në dorë, oferta për vende pune, furnizim me dru për ngrohje, transport drejt qendrave të votimit, si dhe ndihma të tjera sociale, përfshirë ilaçe.

Sipas gjetjeve, këto praktika nuk janë raste të izoluara, por dyshohet se shtrihen në dhjetëra zona elektorale dhe mund të kenë prekur qindra mijëra votues.

Kjo ka nxitur shqetësime serioze mbi standardet demokratike dhe barazinë në garën zgjedhore.

Akuzat vijnë në një moment të ndjeshëm politik, ndërsa sondazhet sugjerojnë se partia në pushtet mund të përballet me sfidë reale nga opozita e udhëhequr nga Péter Magyar, duke rritur tensionet në skenën politike hungareze.

Kritikët i cilësojnë këto praktika si forma të presionit dhe manipulimit elektoral, ndërsa përfaqësues të qeverisë i kanë mohuar ose minimizuar akuzat, duke i konsideruar ato të motivuara politikisht.

Zhvillimet vijnë në një klimë të tensionuar politike në Hungari, ku prej vitesh institucionet ndërkombëtare kanë ngritur shqetësime për funksionimin e demokracisë, lirinë e mediave dhe standardet zgjedhore në vend. //a.i/

The post HUNGARI – Qeveria e Orban akuzohet për frikësim masiv të votuesve appeared first on Agjencia Telegrafike Shqiptare.

PARIS, 23 mars /ATSH/ – Parisi ka zgjedhur të vijojë në të njëjtën linjë politike, duke i besuar drejtimin e bashkisë kandidatit socialist Emmanuel Grégoire.

Grégoire fitoi balotazhin për kryetar bashkie, duke mposhtur kandidaten konservatore Rachida Dati dhe rivalen e majtë radikale Sophia Chikirou. Sipas rezultateve, ai siguroi rreth 52% të votave.

“Sot Parisi vendosi të qëndrojë besnik historisë së tij”, deklaroi Grégoire pas fitores, duke theksuar se do të kundërshtojë të djathtën dhe të djathtën ekstreme në prag të zgjedhjeve presidenciale të vitit të ardhshëm.

48-vjeçari pritet të pasojë në këtë detyrë kryebashkiaken aktuale, Anne Hidalgo.

The post Grégoire fiton bashkinë e Parisit: “Qyteti mbetet besnik historisë së tij” appeared first on Agjencia Telegrafike Shqiptare.

TIRANË, 21 mars /ATSH/ Kryetari i grupit parlamentar të Partisë Socialiste, Taulant Balla reagoi pas mbledhjes së Asamblesë Kombëtsre të Partisë Socialiste, ku u caktua drejtues politik i PS për qarkun e Tiranës dhe vijimin e detyrës si drejtues politik i PS për Diasporën.

Përmes një postimi në rrjetet sociale Balla shkruan se Partia Socialiste në zgjedhjet e 11 Majit mori dy ndër tre vota të shqiptarëve jashtë territorit, në çerek milioni të regjistruar.

Ndërsa si drejtues politik i qarkut Tiranë, Balla deklaron se në zgjedhjet vendore 2027, PS synon fitoren në të gjitha bashkitë e qarkut, pa asnjë përjashtim.

“Vota për herë të parë e diasporës më 11 Maj ishte historike. Partia Socialiste mori dy ndër tre vota të shqiptarëve jashtë territorit, në çerek milioni të regjistruar. Objektivi për 2029 do jetë trefish më i lartë. Në Tiranë, në zgjedhjet vendore 2027, ne synojmë t’i fitojmë të gjitha bashkitë e qarkut, pa asnjë përjashtim”, tha Balla.

/e.i/j.p/

The post Balla, drejtues politik i PS për Tiranën: Synojmë fitoren në të gjitha bashkitë e qarkut appeared first on Agjencia Telegrafike Shqiptare.

TIRANË, 13 mars /ATSH/ Kryeministri Edi Rama ndau në rrjetet sociale momente nga festa tradicionale “Daulinat e Pranverës”, e zhvilluar në Mat, një rit që përcillet brez pas brezi dhe që simbolizon ardhjen e pranverës në vigjilje të Ditës së Verës.

Rama e përshkroi këtë traditë në një postim në rrjetet sociale ku solli edhe pamje nga festa, si një ritual të trashëguar ndër breza, i cili shpall ardhjen e stinës së re dhe ruan gjallë kulturën dhe zakonet e zonës.

“Daulinat e Pranverës” është në mbrëmje plot simbolikë, tinguj tradite dhe gëzim, që bashkon komunitetin dhe mban gjallë trashëgiminë tonë kulturore jomateriale.

/gj.m/j.p/

The post Rama: “Daulinat e Pranverës” në Mat, rit që shpall ardhjen e stinës së re appeared first on Agjencia Telegrafike Shqiptare.

UASHINGTON, 13 mars /ATSH-DPA/- Kuba ka konfirmuar sot se ka zhvilluar bisedime me Shtetet e Bashkuara të Amerikës me synimin për të ulur tensionet mes dy vendeve.

Presidenti kuban, Miguel Díaz‑Canel, u tha gazetarëve në Havanë se përfaqësues të Kubës janë takuar së fundmi me zyrtarë të qeverisë amerikane për të kërkuar një zgjidhje të mundshme për mosmarrëveshjet dypalëshe që ekzistojnë mes dy vendeve.

Sipas tij, shkëmbimet janë lehtësuar nga aktorë ndërkombëtarë.

Më herët, gjatë një mbledhjeje të Byrosë Politike të Partisë Komuniste, Díaz-Canel tha se diskutimet synojnë identifikimin e problemeve mes dy vendeve, gjetjen e zgjidhjeve dhe shqyrtimin e fushave të mundshme të bashkëpunimit.

Presidenti kuban shtoi se Havana ka shprehur gatishmërinë për të zhvilluar këtë proces mbi bazën e barazisë dhe respektit të ndërsjellë, duke përfshirë respektimin e sistemeve politike, sovranitetit dhe vetëvendosjes së secilit shtet.

Nën administratën e presidentit amerikan, Donald Trump, Uashingtoni ka rritur presionin ekonomik ndaj Kubës, me synimin për të kufizuar hyrjen e valutës së huaj dhe furnizimet me naftë në ishullin e Karaibeve.

Presioni është shtuar edhe pas operacionit të autoriteteve amerikane në janar, kur presidenti i Venezuelës, Nicolas Maduro, u arrestua në Karakas dhe u dërgua në Shtetet e Bashkuara të Amerikës.

Ky zhvillim i largoi Kubës një nga aleatët e saj më të rëndësishëm, i cili e kishte mbështetur prej kohësh, veçanërisht përmes furnizimeve me naftë.

Bisedimet mes Havanës dhe Uashingtonit konsiderohen ende në fazat fillestare, ndërsa të dyja palët po vlerësojnë mundësinë e arritjes së një marrëveshjeje për përmirësimin e marrëdhënieve. //a.i/

The post FOKUS – Kuba konfirmon bisedimet me SHBA-në për lehtësimin e tensioneve appeared first on Agjencia Telegrafike Shqiptare.

TIRANË, 9 mars /ATSH/ Futbollistët e Kombëtares shqiptare që aktivizohen në kampionatet europiane vijojnë të japin sinjale pozitive me paraqitjet e tyre edhe këtë fundjavë, duke qenë protagonistë me gola dhe asiste për skuadrat respektive.

Qazim Laçi ishte vendimtar për Rizespor në fitoren 1-0 ndaj Antalyaspor. Mesfushori kuqezi realizoi golin e vetëm të takimit nga pika e penalltisë në minutën e 10-të, duke i dhënë skuadrës së tij tri pikët.

Protagonist në Rusi ishte edhe Nazmi Gripshi. Mesfushori shqiptar shënoi golin e parë në fitoren 2-1 të Rubin Kazan ndaj Krasnodar, duke realizuar në minutën e 24-t. Në fund të takimit, Gripshi u vlerësua edhe si lojtari më i mirë i ndeshjes.

Një paraqitje shumë të mirë zhvilloi edhe Taulant Seferi në ndeshjen mes Bodrumspor dhe Erokspor, e përfunduar 3-4. Sulmuesi shqiptar realizoi një gol nga pika e penalltisë në fundin e takimit dhe dha asistin për golin e dytë të Bodrumspor.

Gol shënoi edhe Arbnor Muja në fitoren 2-1 të St. Truiden ndaj Cercle Brugge. Futbollisti shqiptar zhbllokoi sfidën në minutën e 24-t, duke realizuar golin e parë për skuadrën e tij.

Titullarë me skuadrat e tyre këtë javë u aktivizuan edhe Thomas Strakosha, Arlind Ajeti, Ardian Ismajli, Kristjan Asllani, Ylber Ramadani, Juljan Shehu, Rey Manaj dhe Myrto Uzuni.

Ndërkohë, nga stoli u aktivizuan Berat Gjimshiti dhe Nedim Bajrami.

/gj.m/a.f/

The post Legjionarët – Laçi, Seferi dhe Muja gjejnë rrugën e rrjetës, Gripshi shënon dhe shpallet lojtari i ndeshjes appeared first on Agjencia Telegrafike Shqiptare.

TIRANË, 9 mars /ATSH/- Ndërsa çmimet në resortet më të njohura të Mesdheut vazhdojnë të rriten, të njëjtat dete me ngjyrë bruz, udhëtime panoramike nëpër male dhe mikpritje e ngrohtë mund t’i gjeni edhe në Shqipëri – por me kosto më të ulët.

Nëse e vizitoni në sezonin midis verës dhe vjeshtës, mund të shijoni perëndimin e diellit dhe plazhet pothuajse të zbrazëta, në një ritëm të qetë dhe relaksues.

Mbërritja me avion në kryeqytetin e Tiranës është një fillim i mirë për një udhëtim rrugor për të eksploruar vendin.

Merrni një makinë me qira në aeroport, dhe shijoni rrugën përmes qafave malore, përgjatë gjireve bregdetare dhe nëpër qytetet me histori shekullore.

Ndalesa e parë e madhe është qyteti i trashëgimisë botërore të UNESCO-s, Berat.

Shtëpitë e bardha osmane ngrihen njëra mbi tjetrën në shpatin e kodrës si kuba sheqeri, me dritaret prej druri që shkëlqejnë në diell – duke i dhënë qytetit emrin “qyteti i një mbi një dritareve”.

Vizitorët mund të qëndrojnë edhe brenda mureve të Kalasë së Beratit, duke jetuar mes mureve të lashta ndërsa fëmijët luajnë futboll në rrugicat me kalldrëm dhe gjyshet shesin vaj ulliri te dyert e shtëpive të tyre.

Atmosfera të jep ndjesinë sikur je kthyer në një shekull tjetër. Në dalje të qytetit ndodhet edhe “Veraria Alpeta”, e drejtuar nga familja Fiska.

Vreshtat kultivojnë varietete rrushi dhe pronari, kalon mes tavolinave gjatë darkës për të përshëndetur vizitorët dhe për të treguar histori për vreshtat.

Turistët mund të bëjnë edhe një tur degustimi vere, ku mund të provojnë verëra të kuqe, të bardha dhe raki frutash, të shoqëruara me djathëra dhe vaj ulliri vendas.

Sipas medias britanike, kjo është historia e plotë e kuzhinës “nga prodhimi bujqësor deri te konsumi” në Shqipëri.

Pas kësaj, shumica e turistëve që kërkojnë diell dhe det shkojnë drejt Sarandës, por Vlora ofron një alternativë të shkëlqyer dhe me më pak turistë.

Nga Vlora mund të beni një udhëtim të shkurtër me makinë për në “Green Coast”, ku ndodhen disa nga plazhet më të bukura në Shqipëri.

Gjiret me ujëra bruz, të rrethuar nga kodra me pisha dhe ujëra të kristaltë të cekët, rivalizojnë çdo destinacion tjetër në Mesdhe.

Në kryeqytetin e Tiranës, vizitorët befasohen nga energjia krijuese, arti i rrugës dhe kafenetë. Një nga zonat më të gjalla është Blloku.

Dikur një zonë e rezervuar për elitën komuniste, sot ajo është plot jetë nate, bare dhe restorante.

Qyteti është i mbushur me mijëra bunkerë të periudhës së Luftës së Ftohtë, të cilët janë shndërruar në muze, kafene dhe hapësira arti.

Vizitorët nuk duhet të humbasin një vizitë në Bunk’Art 1 dhe Bunk’Art 2, muzetë interaktivë që japin një pasqyrë të fortë mbi të kaluarën komuniste të vendit.

Po ashtu, rekomandohet ngjitja në Piramidën e Tiranës, një ish-monument i epokës komuniste që sot është shndërruar në një pikë panoramike me pamje mbi qytetin.

Pas errësirës, qyteti gjallërohet. Sipas gazetës, një nga përvojat më të veçanta është spektakli kulturor “Albania Night” – qendra e parë etnokulturore në Tiranë që u mëson vizitorëve gjithçka rreth traditave, zakoneve, gastronomisë dhe historisë shqiptare.

Vizitorët mund të veshin kostume tradicionale shqiptare, të kërcejnë deri sa t’u lodhen këmbët dhe të bëhen pjesë e performancës.

Shqipëria po evoluon me shpejtësi. Muzika live dhe festat po e kthejnë Tirana në një qendër plot kulturë dhe energji.

Sipas artikullit, po ndërtohen rrugë të reja bregdetare dhe po hapen hotele në qytetet historike – ndërsa gjithnjë e më shumë njerëz po zbulojnë këtë destinacion.

Megjithatë, pjesë e bukurisë së Shqipërisë është fakti se ajo ende mbetet një destinacion relativisht i pazbuluar.

“Shqipëria nuk është “Kroacia e re” apo “Greqia e ardhshme”. Ajo ka historinë e saj – të ashpër, autentike dhe plot surpriza”, shkruan “The Sun”.

Nga qytetet me kala të vendosura në kodra, te gjiret e qeta pranë detit, nga darkat në vreshta te netët e gjalla të qytetit, Shqipëria ofron një udhëtim që mbetet gjatë në kujtesë!

Për këdo që kërkon aventurë, autenticitet dhe çmime të përballueshme, Shqipëria është destinacioni ideal! //a.i/

The post “The Sun”: Shqipëria – destinacioni sekret i Evropës me qytete antike dhe bregdet mahnitës appeared first on Agjencia Telegrafike Shqiptare.

TIRANË, 27 shkurt /ATSH/  Komisioni Rregullator miratoi disa ndryshime dhe shtesa në vendimin “Për miratimin e rregullores për mënyrën e funksionimit dhe zhvillimit të seancave të Komisionit të Ankimimeve dhe Sanksioneve”.

Vendimmarrja e sotme synon përmirësimin e Rregullores së seancave të Komisionit të Ankimimeve dhe Sanksioneve, me qëllim qartësimin e procedurave, forcimin e transparencës dhe garantimin e një procesi sa më të rregullt dhe efektiv shqyrtimi.

Ndryshimet e miratuara konsistojnë në rregullimin më të detajuar të mënyrës së depozitimit të kërkesave ankimore, përfshirë edhe paraqitjen e tyre nëpërmjet platformës online të KQZ-së; përcaktimin e procedurës në rastet kur një anëtar nuk mund të caktohet relator; si dhe saktësimin e fazës së verifikimit paraprak dhe të afateve për shqyrtimin e ankimeve.

Gjithashtu, akti forcon rregullat mbi zhvillimin solemn dhe të rregullt të seancës publike, rolin dhe përgjegjësitë e relatorit, si dhe parashikon mundësinë e marrjes së vendimeve të ndërmjetme gjatë shqyrtimit administrativ. Saktësohet edhe shumica e kërkuar për pranimin ose rrëzimin e kërkesave, sidomos në rastet që lidhen me kundërshtimin e tabelës përmbledhëse të rezultatit të zgjedhjeve, si dhe rregullohet paraqitja e mendimeve paralele ose kundër.

Në tërësi, ndryshimet konsolidojnë praktikën vendimmarrëse të KAS-it, të rrisin sigurinë juridike të palëve dhe të harmonizojnë rregulloren me dispozitat e Kodit Zgjedhor dhe me nevojat praktike të funksionimit të tij.

/a.f/

The post Komisioni Rregullator miraton disa ndryshime në Rreguloren e KAS appeared first on Agjencia Telegrafike Shqiptare.

TIRANË, 26 shkurt /ATSH/ Ministrja e Shtetit dhe Kryenegociatorja, Majlinda Dhuka, deklaroi sot se Shqipëria ndodhet në një moment kyç në rrugëtimin e saj drejt anëtarësimit në Bashkimin Europian, ndërsa viti 2025 shënoi një kapërcim historik me çeljen e negociatave në të 33 kapitujt.

Duke folur në mbledhjen e zgjeruar të grupit parlamentar të Partisë Socialiste të Shqipërisë dhe të kabinetit qeveritar, të zhvilluar në Pallatin e Brigadave, Dhuka theksoi se hapja e të gjithë kapitujve përbën një moment të paprecedentë për vendin.

“Në vitin 2025, në një kapërcim historik përpara, Shqipëria çeli negociatat në të gjitha fushat, në 33 kapitujt, siç quhen në gjuhën e negociatave. Kjo çelje e mundësisë për bisedime për anëtarësim është një portë e madhe që hapet në rrugën drejt destinacionit- anëtarësimit në familjen europiane”, u shpreh ajo.

Sipas ministres, kjo portë e hapur për t’u ulur në tryezën e bisedimeve është “shprehja më e lartë e vullnetit të qartë, kristal, të mbështetjes politike për Shqipërinë europiane nga 27 vendet anëtare të BE-së”.

“Në këtë rrugë ecim në çdo hap me Komisionin Europian dhe kemi mbështetjen fuqizuese të Komisionit Europian”, deklaroi Dhuka.

Ajo nënvizoi se ky zhvillim mund të duket surprizues për disa, por është rezultat i një pune të përditshme dhe sistematike, veçanërisht gjatë pesë viteve të fundit, pas rekomandimit pozitiv të Komisioni Europian në vitin 2019 për çeljen e negociatave me Shqipërinë.

“Ky kapërcim historik flet për aftësinë e vendit si i tërë, për institucionet shqiptare dhe profesionistët tanë. Ai ka energjinë e një vullneti politik të palëkundur për Shqipërinë Europiane 2030”, tha ajo.

Duke e cilësuar integrimin europian si një mision të përbashkët, Dhuka falënderoi deputetët për bashkëpunimin e treguar gjatë vitit 2025.

Ministrja bëri të ditur se gjatë 14 muajve të fundit janë miratuar 75 ligje dhe akte nënligjore me karakter transformues europian, në drejtësi, luftën kundër krimit dhe korrupsionit, sigurinë, barazinë sociale dhe të drejtat e njeriut.

“Shqipëria miratoi 75 ligje dhe akte të tjera të ngjashme vetëm në 14 muajt e fundit, të gjitha të biseduara me kujdes dhe nën frymën e rekomandimeve cilësore të Komisionit Europian dhe të trupës së ligjit europian”, u shpreh ajo.

Sipas saj, Kuvendi me një vullnet të palëkundur europian ka mandatuar standardin europian në disa paketa të rëndësishme ligjore, përfshirë ndryshimet në Kodin Penal, ligjet për sistemin e drejtësisë, ligjet për substancat psikotrope, luftën kundër drogës, kontrollin e eksporteve dhe parandalimin e trafikut të armëve, si dhe ligjin për Zyrën e Rikuperimit të Aseteve nga veprimtaritë kriminale.

Në kuadër të paketës antikorrupsion, ajo përmendi ligjet kundër konfliktit të interesit, për sinjalizuesit dhe për lobimin.

“Për herë të parë, Shqipëria normon lobimin në ligjbërje. Ndërkohë kemi në proces një projektligj të ri për donacionet dhe sponsorizimet si masë për parandalimin e korrupsionit”, tha Dhuka.

Ministrja theksoi gjithashtu progresin e institucioneve të drejtësisë, veçanërisht në luftën kundër krimit dhe korrupsionit, duke përmendur punën e SPAK dhe GJKKO.

“Institucionet e drejtësisë gjatë vitit 2025 forcuan dhe konsoliduan rezultatet në luftën kundër krimit dhe korrupsionit, si në hetim ashtu edhe në gjykim penal”, deklaroi ajo.
Sa i përket procesit të negociatave, Dhuka bëri të ditur se BE i rekomandon Shqipërisë të përmbushë rreth 101 piketa përmbyllëse në të 33 kapitujt.

“Puna për këto piketa ka filluar. Për vitin 2026 po përgatitemi për disa paketa të reja ligjore në fusha kyçe të ekonomisë dhe tregut”, tha ajo.

Në fushën e biznesit dhe shoqërive tregtare, sipas saj, është përgatitur një paketë me nëntë projektligje në konsultim me Komisionin Europian, ndërsa në fushën e mbrojtjes së konsumatorit është hartuar një paketë ligjore me në qendër projektligjin për mbrojtjen e konsumatorit dhe ngritjen e një agjencie të posaçme.

Sa i përket shërbimeve, ajo theksoi se Shqipëria ka hartuar ligjin për shërbimet sipas standardit europian dhe do ta paraqesë së shpejti në Kuvend.

“Kjo është shumë e rëndësishme sepse Shqipëria do të nxisë eksportin e shërbimeve drejt BE-së dhe potenciali është i madh”, përfundoi Dhuka.

/gj.m/a.f/

The post Dhuka: Shqipëria në moment kyç drejt BE-së, 2025-a vit historik për çeljen e 33 kapitujve appeared first on Agjencia Telegrafike Shqiptare.

LONDER, 18 shkurt, ATSH/ Një ngjarje tronditëse ka ndodhur në zonën e Twickenham, në Londër, ku një 59-vjeçar hodhi tre kotele të vogla nga Twickenham Bridge në lumin River Thames, duke bërtitur “lërini të vdesin”.

Andrew Shephard, i dehur në momentin e ngjarjes, i hodhi kafshët nga një kuti në nëntor të vitit të kaluar. Më vonë ai deklaroi para policisë se “nuk e di çfarë më pushtoi”.

Ai pranoi fajësinë për tre akuza për shkaktim vuajtjeje të panevojshme ndaj një kafshe të pambrojtur dhe u dënua me 17 javë burg, dënim i pezulluar për 18 muaj.

Pavarësisht aktit mizor, të treja kotelet mbijetuan. Dy prej tyre jetojnë në Chiswick dhe e treta është adoptuar në Suffolk.

Rasti ka shkaktuar reagime të forta në opinionin publik britanik, ndërsa shumë qytetarë kanë vlerësuar faktin që kotelet u shpëtuan dhe gjetën shtëpi të reja.

The post Burri që hodhi kotelet në lumin Thames dënohet appeared first on Agjencia Telegrafike Shqiptare.

TIRANË, 14 shkurt /ATSh/ Sulmuesi Ernest Muçi është i pandalshëm me Trabzonsporin. Sot ka shënuar një tjetër gol fantastik, kësaj radhe përballë gjigantëve të Fenerbahçes, rivalëve për titullin kampion.

Ishte minuta e gjashtë e takimit, kur futbollisti i Kombëtares shqiptare mori një top të gjatë në mesfushën e Fenerbahçes dhe në hyrje të zonës së rreptësisë, me një parabol shtangu portierin mik Ederson.

Muçi është kthyer në fenomen te Trabzonspori. I huazuar nga Beshiktashi dhe në më pak se tre muaj numëron tashmë 13 gola dhe pesë asistime, si askush tjetër.

The post Muçi shënon ndaj gjigantëve të futbollit turk appeared first on Agjencia Telegrafike Shqiptare.

TIRANË, 12 shkurt/ATSH/ Shërbimi Meteorologjik Ushtarak bëri të ditur se vendi ynë ditën e enjte do të ndikohet nga kushte të paqëndrueshme atmosferike.

Moti parashikohet me intervale të herëpashershme me kthjellime, kryesisht në pjesën e parë të ditës, dhe alternime vranësirash mesatare deri të dendura më të theksuara pas orëve të mesditës. Reshjet e shiut priten të herëpashershme (me ndërprerje), me intensitet të ulët në pothuajse të gjithë vendin, deri në mesditë, ndërsa gradualisht në orët e pasdites përgjatë Ultësirës Perëndimore e në jug të vendit, në intervale afatshkurtra kohore reshjet parashikohen me intensitet deri mesatar në formë shtrëngatash.

Era do të fryjë me drejtim kryesor nga kuadrati i jugut me shpejtësi mesatare 8 m/s, ndërsa në bregdet dhe zonat luginore era pritet të fitojë shpejtësi deri 17 m/s, me valëzimin në detet Adriatik e Jon të forcës 3-4 ballë.

Temperaturat parashikohen:

/r.e/

The post Mot me kthjellime dhe reshje me intensitet të ulët appeared first on Agjencia Telegrafike Shqiptare.