Terreni i pakalueshëm nuk i ndaloi zjarrfikësit e Gramshit të ndërhynin për shuarjen e një zjarri të rënë në malin e Vinës. Për të mbërritur në vatrën e flakëve, efektivët ecën rreth dy orë në këmbë, pasi mjetet zjarrfikëse nuk mund të depërtonin në zonë.
Të pajisur me pompa krahu dhe mjete rrethanore, ata arritën ta izolojnë dhe më pas ta shuajnë zjarrin, duke parandaluar përhapjen e tij në sipërfaqe të tjera.
Me temperaturat që vijojnë të mbeten të larta, Shërbimi i Mbrojtjes nga Zjarri dhe Shpëtimi apelon për kujdes të shtuar, duke u kërkuar qytetarëve të mos ndezin zjarre në natyrë dhe të sinjalizojnë menjëherë çdo vatër të konstatuar.
Të paktën pesë persona kanë vdekur dhe 41 të tjerë rezultojnë të zhdukur pasi një zjarr shpërtheu në një traget pranë ishullit indonezian të Madurës, njoftoi të dielën agjencia e kërkim-shpëtimit e vendit.
Trageti mbante 271 pasagjerë dhe anëtarë të ekuipazhit, 225 prej të cilëve janë shpëtuar, thanë gjithashtu shërbimet e shpëtimit.
Një operacion kërkim-shpëtimi është duke u zhvilluar. Trageti ishte nisur nga Surabaya me destinacion qytetin e Makassarit në jug të ishullit Sulawesi.
Temperaturat ekstreme që kanë përfshirë vendin kanë shtuar angazhimin e Shërbimit të Mbrojtjes nga Zjarri dhe Shpëtimit në Bashkinë Cërrik. Përveç gatishmërisë për ndërhyrje në raste emergjente, ekipet po zbatojnë një sërë masash parandaluese për të reduktuar rrezikun e zjarreve.
Mes masave të ndërmarra janë lagia e akseve rrugore për të lehtësuar efektet e vapës, monitorimi i zonave me rrezik të lartë për shpërthim zjarresh, si dhe verifikimi i hidrantëve për të garantuar funksionimin e tyre në çdo situatë emergjente.
Autoritetet bëjnë thirrje për kujdes të shtuar gjatë kësaj periudhe, duke u kërkuar qytetarëve të shmangin ndezjen e zjarreve në ambiente të hapura dhe të sinjalizojnë menjëherë çdo vatër zjarri pranë shërbimeve emergjente
Ministria për Evropën dhe Punët e Jashtme ka njoftuar se po bashkëpunon me autoritetet e Kroacisë dhe Malit të Zi për të lehtësuar kalimin e qytetarëve shqiptarë në pikat kufitare gjatë sezonit turistik, për shkak të rritjes së ndjeshme të fluksit të udhëtarëve.
Sipas njoftimit zyrtar, gjatë periudhave të pikut, veçanërisht në fundjavë dhe ditët me lëvizje të lartë, në pikat kufitare mes dy vendeve krijohen pritje të gjata për shkak të numrit të madh të automjeteve dhe udhëtarëve që kalojnë drejt Shqipërisë përmes këtij korridori rrugor.
Ministria bën të ditur se, së bashku me përfaqësitë diplomatike shqiptare, është në komunikim të vazhdueshëm me institucionet përgjegjëse të vendeve përkatëse, me qëllim rritjen e kapaciteteve dhe përshpejtimin e procedurave kufitare.
“Vetëm gjatë sezonit veror, rreth 300 mijë shtetas shqiptarë kalojnë përmes këtij korridori rrugor. Një volum i tillë lëvizjesh krijon, në periudha të caktuara, ngarkesa të konsiderueshme për infrastrukturën dhe shërbimet kufitare”, thuhet në njoftimin e Ministrisë.
Plazhi i Qeparoit ka qenë i mbushur me pushues këtë të diel, duke konfirmuar edhe një herë se mbetet një nga destinacionet më të frekuentuara të rivierës shqiptare për pushimet familjare.
I njohur për ujin e pastër e të kristaltë, si edhe për alternimin e rërës me gurët, Qeparoi ka tërhequr në këtë fillim të muajit gusht një numër të lartë vizitorësh, si vendas ashtu edhe të huaj.
Përgjatë gjithë vijës bregdetare janë parë qindra pushues, ku mbizotëronin familjet me fëmijë, të cilët shijonin detin, lojërat në breg dhe temperaturat e larta tipike të kësaj periudhe. Fluksi i lartë i vizitorëve pritet të vijojë edhe gjatë ditëve në vazhdim, ndërsa muaji gusht konsiderohet kulmi i sezonit turistik në rivierën shqiptare.
Tre persona kanë humbur jetën dhe shtatë të tjerë kanë mbetur të plagosur pas një sulmi me armë zjarri në një restorant të rrjetit “In-N-Out Burger” në qytetin Twin Falls, në shtetin Idaho të Shteteve të Bashkuara.
Ngjarja e rëndë ndodhi pasditen e së shtunës në një qendër tregtare të frekuentuar, ku në momentin e të shtënave ndodheshin qindra persona.
Sipas autoriteteve lokale, policia që mbërriti në vendngjarje gjeti trupin e personit të dyshuar si autor i sulmit në një zonë pranë restorantit. Ende nuk është konfirmuar nëse ai është pjesë e bilancit të viktimave.
Disa prej të plagosurve mësohet se ndodhen në gjendje kritike për jetën, ndërsa identitetet dhe moshat e viktimave nuk janë bërë ende publike, pasi autoritetet po vijojnë procedurat për njoftimin e familjarëve.
Dëshmitarët kanë përshkruar momente paniku gjatë sulmit. Një 34-vjeçar ka treguar se pa një person të armatosur me një pushkë të tipit “AR” duke dalë nga zona e shërbimit të restorantit, ndërsa një person tjetër iu kundërpërgjigj duke qëlluar me armë.
Sipas dëshmive, një punonjës i restorantit është parë duke tërhequr zvarrë një kolege të plagosur në gjoks, duke u përpjekur ta largonte nga zona e rrezikut, ndërsa qëndroi pranë saj deri në mbërritjen e ekipeve të emergjencës.
Një tjetër dëshmitare, e cila ndodhej në restorant me vajzat e saj, tha se të shtënat erdhën nga pjesa e kuzhinës. Punonjësit u kanë kërkuar klientëve të shtriheshin në dysheme dhe më pas të largoheshin me shpejtësi nga ambienti.
Policia amerikane vijon hetimet për zbardhjen e plotë të ngjarjes, duke marrë në pyetje dëshmitarët dhe duke mbledhur prova. Deri tani nuk është bërë e ditur nëse sulmi kishte në shënjestër persona të caktuar apo ishte një veprim i rastësishëm.
Kosova ka shënuar një sukses të rëndësishëm në Lojërat Mesdhetare “Taranto 2026”, ku kickboksi u përfshi për herë të parë në programin zyrtar të kësaj ngjarjeje shumë-sportëshe.
Në mesin e vetëm 10 shteteve mesdhetare pjesëmarrëse në këtë disiplinë, përfaqësuesi i Kosovës, Edmond Sallahu, arriti të fitojë medaljen e bronztë, duke regjistruar rezultatin më të mirë për vendin në debutimin historik të kickboksit në Lojërat Mesdhetare, shkruan KosovaPress.
Delegacioni i Kosovës u përfaqësua nga kryetari i Federatës së Kick-Box-it të Kosovës, Fatmir Makolli, selektori i përfaqësueses, Ilir Menxhiqi, si dhe sportistët Shaban Duraku dhe Edmond Sallahu.
Gjatë qëndrimit në Taranto u zhvillua edhe mbledhja e Bordit të WAKO Mediterranean, ku kryetari i FKBK-së, Fatmir Makolli, paraqiti zyrtarisht kandidaturën e Kosovës për organizimin e Kampionatit Mesdhetar të Kickboksit për vitin 2027 në Prishtinë.
Sipas Federatës së Kick-Box-it të Kosovës, kandidatura e vendit është pritur pozitivisht dhe ekzistojnë gjasa të mira që organizimi i kampionatit t’i besohet Kosovës. Vendimi përfundimtar pritet të merret gjatë javëve në vijim.
Një apartament është përfshirë nga flakët në katin e tretë të një pallati, në rrugën Transballkanike. Menjëherë pas marrjes së njoftimit, në vendngjarje kanë mbërritur disa mjete dhe forca të shumta të shërbimit zjarrfikës, të cilat kanë ndërhyrë me shpejtësi për të vënë situatën nën kontroll dhe për të shuar flakët.
Falë reagimit të shpejtë të zjarrfikësve, është bërë e mundur izolimi i zjarrit, duke shmangur përhapjen e tij në apartamentet përreth. Fatmirësisht, nga ngjarja nuk raportohet për persona të lënduar, ndërsa janë shkaktuar vetëm dëme materiale brenda banesës së përfshirë nga zjarri.
Shkaqet e rënies së zjarrit mbeten ende të paqarta, ndërsa pritet që grupi hetimor dhe specialistët përkatës të përcaktojnë rrethanat që çuan në shpërthimin e flakëve.
Një person është arrestuar në Suharekë pasi dyshohet se, pas një mosmarrëveshjeje familjare, ka plagosur me armë zjarri djalin e tij.
Sipas raportit të Policisë së Kosovës, rasti ka ndodhur më 1 gusht rreth orës 19:00. Policia ka dale në vendin e ngjarjes ku kanë konfiskuar një pistoletë me pesë fishekë, e cila dyshohet se është përdorur në incident.
Viktima është dërguar për trajtim mjekësor në Spitalin e Prizrenit, ndërsa i dyshuari është arrestuar. Me vendim të prokurorit, ai është dërguar në mbajtje, ndërsa rasti është iniciuar për veprat penale “Dhunë në familje”, “Armëmbajtje pa leje” dhe “Përdorim i armës”.
Ministria e Punëve të Brendshme e Serbisë njoftoi më 2 gusht se në pikëkalimin kufitar me Hungarinë, Horgosh, e ka arrestuar një person të identifikuar me inicialet M.M., i lindur më 1981, nën dyshimin për kryerjen e veprës penale “krim lufte kundër popullsisë civile”.
MPB-ja serbe nuk bëri të ditur emrin e plotë dhe as shtetësinë e të arrestuarit.
Sipas njoftimit, ai dyshohet se më 26 korrik 1999, në fshatin Kllobukar të Kosovës, kishte “kryer krim lufte ndaj dy personave me inicialet T.S. dhe S.S”.
Autoritetet serbe thanë se arrestimi u krye nga pjesëtarë të Shërbimit për Zbulimin e Krimeve të Luftës, në bashkëpunim me Shërbimin për Luftimin e Terrorizmit dhe Policinë Kufitare.
Të dyshuarit i është caktuar masa e ndalimit deri në 48 orë, pas së cilës, së bashku me kallëzimin penal, pritet të dërgohet në Prokurorinë Publike për Krime Lufte në Serbi.
Në të njëjtën kohë, avokati nga Kosova, Arianit Koci, shkroi në Facebook se autoritetet serbe kanë ndaluar shtetasin e Kosovës Mentor Mustafa, 44 vjeç, nga fshati Jasenovik i Komunës së Novobërdës. Sipas tij, Mustafa u ndalua rreth orës 22:30 në pikëkalimin kufitar ndërmjet Hungarisë dhe Serbisë, teksa po udhëtonte me autobus nga Shtutgarti drejt Kosovës, së bashku me vëllain e tij, Fejzullah Mustafën.
Koci tha se, sipas vëllait të Mustafës, i cili ishte i pranishëm gjatë ndalimit, autoritetet serbe kishin thënë se ndalimi lidhej me një letërnjoftim të dëmtuar.
Ai shtoi se ka nisur të angazhohet për sqarimin e rrethanave të ndalimit dhe për t’i ofruar Mustafës ndihmë juridike.
Institucionet e Kosovës nuk kanë dhënë ende informacione për këtë rast.
Radio Evropa e Lirë kontaktoi Qeverinë e Kosovës dhe avokatin Arianit Koci për informacione shtesë dhe për të konfirmuar nëse bëhet fjalë për të njëjtin rast, por deri në publikimin e artikullit nuk mori përgjigje.
Në një periferi të Stokholmit, një burrë i veshur me të zeza u shfaq nga nata e dimrit. Duke mbajtur një pistoletë, ai iu afrua 20-vjeçarit Murad Abdelkader, një student që po kthehej nga një turn në McDonald’s.
Personi i armatosur hapi zjarr, duke qëlluar vazhdimisht ndërsa i afrohej objektivit të tij. Ai qëlloi plumbin e fundit në kokën e viktimës së tij, ndërsa ky i fundit shtrihej i pafuqishëm në tokë.
Vrasësi ishte 18-vjeçari Atilla Azimov. Atë natë të shkurtit të vitit të kaluar, ai kishte vrarë njeriun e gabuar.
Ai e kishte bërë këtë për para – i punësuar nga Foxtrot Network, një grup i krimit të organizuar me lidhje me regjimin iranian i cili është bërë famëkeq për taktikat e tij të dhunës si shërbim (VaaS). Që nga viti 2022, mendohet se Rrjeti Foxtrot ka qenë përgjegjës për rreth 35 vrasje, si dhe një numër sulmesh dhe përpjekjesh për sulme ndaj objektivave izraelite në Evropë, përfshirë dy që përfshinin eksplozivë dhe granata dore.
Banda rekruton adoleshentë për të kryer sulmet për para në dorë, por pothuajse kurrë nuk i duhet të paguajë pasi ata shpesh kapen.
Ashtu si Johannes Natland, një adoleshent norvegjez i cili u dënua për komplot për vrasje nga një juri në Old Bailey në Londër të mërkurën për një vrasje të planifikuar në West Yorkshire. Sipas Task Forcës Operacionale (OTF) GRIMM, grupi i Europolit i ngritur për të trajtuar problemin, vrasësit adoleshentë me pagesë rekrutohen në mediat sociale dhe u jepen udhëzimet në një mënyrë “të lojërazuar”, duke imituar mënyrën se si funksionojnë lojërat kompjuterike.
Andy Kraag, kreu i Qendrës Evropiane Kundër Krimit të Organizuar dhe të Rëndë të Europolit, e quan këtë “delegim i llogaritur i vrasjes” te të rinjtë e cenueshëm.
OTF GRIMM aktualisht përfshin 11 vende të prekura nga fenomeni VaaS – Belgjika, Danimarka, Finlanda, Franca, Gjermania, Islanda, Holanda, Norvegjia, Spanja, Suedia dhe Mbretëria e Bashkuar. Udhëheqësi i Rrjetit Foxtrot, Rawa Majid, është larguar nga Suedia dhe nga baza e tij e mëvonshme operative në Turqi, dhe tani ndodhet në kryeqytetin iranian, Teheran. Policia beson se disa nga sulmet e VaaS janë kryer për regjimin iranian, përfshirë një sulm me granatë dore në ambasadën izraelite në Kopenhagen, megjithëse sulme të tjera janë pjesë e luftërave të Foxtrot për territorin e drogës.
Diamant Salihu, një gazetar investigativ për transmetuesin suedez SVT, ka bërë kërkime mbi Foxtrot dhe lidhjet e tij me Iranin për tre vjet.
“Regjimi po i urdhëron udhëheqësit të Rrjetit Foxtrot që ta nxisë rrjetin e tij për të kryer sulme kundër armiqve të regjimit iranian”, tha ai.
“Mund të jenë disidentë, gazetarë që janë në opozitë kundër regjimit, dhe gjithashtu mund të jenë objektiva izraelitë.” Lidhjet me regjimin iranian filluan pas tetorit 2023 kur Majid iku në Teheran, tha Salihu.
“Ai duhej të bënte një marrëveshje që të mund të jetonte i lirë në Iran, me kusht që ai dhe rrjeti i tij të punonin për regjimin”.
Rrjeti Foxtrot dhe Majid u sanksionuan nga qeveria e Mbretërisë së Bashkuar në prill 2025.
Ky ishte muaji pas arrestimit të Natland, i cili në atë kohë ishte 18 vjeç. Ai kishte fluturuar për të kryer një atentat në emër të Foxtrot diku pranë Huddersfield. Rasti i Natland ilustron se si funksionon sistemi VaaS.
Natland është djali i dy gazetarëve në Stavanger dhe pati një edukim të rehatshëm, por ai u zhyt në varësi të drogës dhe zhvilloi psikozë, duke përfunduar duke kaluar kohë në qendër rehabilitimi dhe një periudhë të shkurtër në një shtëpi fëmijësh. Atje ai takoi një adoleshent tjetër që përdorte pseudonimin online UnknownHustler.
Ishte UnknownHustler ai që i dërgoi i pari Natland kërkesën online për dikë që të kryente një vrasje në Mbretërinë e Bashkuar – “Vrasje në Angli 270 mijë dollarë” (270,000 korona norvegjeze janë rreth 21,000 paund). Kjo shumë kishte ardhur nga një adoleshent tjetër me pseudonimin Generalen. Generalen – i cili ishte 16 vjeç në atë kohë dhe kishte kaluar tre vitet e fundit duke jetuar në një shtëpi fëmijësh – më pas e rekrutoi Natland për vrasjen.
Natland iu kalua më pas një anëtari të Foxtrot me emrin e përdoruesit online Agent 47, i cili është huazuar nga ekskluziviteti i lojërave Hitman. Policia suedeze ka akuzuar Ali Shehad Ahmed, i cili është i afërt me udhëheqësin e Foxtrot, Majid, si Agjent 47.
Agjenti 47 i rezervoi Natlandit biletë vajtje për në Aeroportin e Mançesterit dhe e ndihmoi atë në procesin e marrjes së një pasaporte emergjence. Duke përdorur aplikacionin e mesazheve Signal, ai e udhëhoqi Natlandin në çdo fazë të udhëtimit të tij përpara se t’ia dorëzonte një punonjësi të logjistikës me emrin e përdoruesit “1”.
Duke e trajtuar Natlandin pak si një personazh në një lojë kompjuterike, “1” i dërgoi atij një hartë dhe video që i tregonin se ku mund të gjente armët e fshehura në pyllin në Huddersfield, dhe më pas një video tjetër që i tregonte se si të qasej në një sasi parash të fshehura në shkurret pranë një tuneli këmbësorësh.
Pasi Natland u vendos në hotelin e tij në Huddersfield me armët, Agjenti 47 i dërgoi përsëri një mesazh: “Kemi shumë për të bërë nesër”.
Natland u arrestua të nesërmen në mëngjes. Atij ende nuk i ishte thënë se kë do të vriste dhe detektivët e antiterrorizmit ende po përpiqen të përcaktojnë nëse do të ishte një vrasje kriminale apo një vrasje politike e kryer për Iranin.
Një lokal në Velipojë është gjobitur me 200 mijë lekë të rinj pasi gjatë kontrolleve të Policisë u konstatua se gjeneronte muzikë mbi nivelin e lejuar të zhurmës.
Sipas Policisë së Shkodrës, masa administrative u vendos ndaj administratores së lokalit, E. Gj., 23 vjeçe, pas verifikimeve të kryera nga shërbimet e Stacionit të Policisë Velipojë në kuadër të kontrolleve për ndotjen akustike dhe respektimin e rregullave gjatë sezonit turistik.
Efektivët testuan me matës të posaçëm nivelin e zhurmës në disa ambiente dhe subjekte, të hapura dhe të mbyllura, në zonat turistike. Nga matjet rezultoi se një prej lokaleve tejkalonte kufijtë e lejuar të zhurmës, duke sjellë ndëshkimin e administratores.
Policia bëri të ditur se kontrollet do të vijojnë gjatë gjithë sezonit veror, jo vetëm për nivelin e zhurmës, por edhe për respektimin e orarit të lejuar për muzikën në ambientet e hapura, i cili është nga ora 11:00 deri në 24:00, me qëllim garantimin e qetësisë publike dhe sigurisë në zonat turistike.
Spanja ka përfunduar instalimin e një barriere lundruese 500 metra të gjatë në Ceuta, me synim frenimin e emigracionit të paligjshëm.
Barriera ngrihet 30-70 centimetra mbi sipërfaqen e ujit dhe zgjatet rreth një metër nën ujë për të penguar kalimet drejt territorit spanjoll.
Instalimi i saj vjen pas fluksit të madh të emigrantëve nga Afrika drejt Ceutës. Autoritetet spanjolle e konsiderojnë masën pjesë të përforcimit të kontrollit kufitar në këtë enklavë në brigjet e Afrikës.
Një 50-vjeçar i shpallur në kërkim ndërkombëtar nga autoritetet italiane është arrestuar në Durrës në kuadër të fazës së radhës të operacionit policor të koduar “FAST”.
Sipas Policisë së Shtetit, si rezultat i bashkëpunimit mes Sektorit për Kërkimin FAST Albania në Drejtorinë e Forcës së Posaçme Operacionale dhe Drejtorisë Vendore të Policisë Durrës, u bë i mundur lokalizimi, identifikimi dhe ndalimi me qëllim ekstradimi i Gentian Likës, 50 vjeç, lindur në Kavajë.
Autoritetet italiane e kishin shpallur në kërkim ndërkombëtar, pasi Gjykata e Apelit e Romës, me një vendim të dhënë në mars të vitit 2025, e ka dënuar me 6 vite burgim për veprën penale të trafikimit të narkotikëve, kryer në bashkëpunim.
Interpol Tirana, në bashkëpunim me homologët italianë, po ndjek procedurat për ekstradimin e 50-vjeçarit drejt Italisë, ku ai do të vuajë dënimin e dhënë nga drejtësia italiane.
Një aksident rrugor është regjistruar në aksin Peqin–Elbasan, pranë hyrjes së fshatit Gjocaj, ku një automjet dyshohet se ka hyrë gabim në rrugë, duke u përfshirë në një përplasje.
Sipas informacioneve paraprake, në aksident është përfshirë automjeti me targa AB 344 SR. Si pasojë e përplasjes, një pasagjer që udhëtonte në këtë mjet ka mbetur i plagosur.
I lënduari është transportuar me ambulancë drejt Spitalit Rajonal të Elbasanit, ku ndodhet nën kujdesin e mjekëve.
Në vendngjarje kanë mbërritur shërbimet e Policisë, të cilat kanë nisur hetimet për të zbardhur shkaqet dhe rrethanat e plota të aksidentit.
Policia e Tiranës ka identifikuar, shoqëruar dhe proceduar penalisht tetë të mitur, të moshës 13 deri në 15 vjeç, të dyshuar si të përfshirë në konfliktin ku mbeti i plagosur lehtë një 20-vjeçar italian.
Sipas Policisë, ngjarja ndodhi më 29 korrik 2026 pranë Pallatit të Kulturës.
‘Pas veprimeve të shpejta hetimore, specialistët për Hetimin e Krimeve në Komisariatin e Policisë Nr. 1 arritën të identifikojnë dhe procedojnë në gjendje të lirë tetë të miturit, të cilët dyshohen se kanë marrë pjesë në konfliktin gjatë të cilit i riu italian pësoi lëndime të lehta trupore.
Hetimet vijojnë për identifikimin e personave të tjerë të dyshuar si të përfshirë në ngjarje, si dhe për dokumentimin e plotë ligjor të rrethanave të konfliktit’, beri me dije policia.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.
Një parcelë me 1121 bimë të dyshuara narkotike kanabis aativa është zbuluar nga Policia e Dibrës gjatë një operacioni antidrogë, i mbështetur nga kontrollet intensive në terren dhe monitorimi me dronë nga ajri.
Gjatë ndërhyrjes, efektivët kapën në flagrancë dhe arrestuan A. K., 38 vjeç, banues në Kamëz, si dhe A. B., 39 vjeç, banues në fshatin Derjan të bashkisë Mat. Sipas Policisë, parcela ndodhej në vendin e quajtur “Liqeni i Lukanit”, pronë publike në territorin e bashkisë Dibër.
Pas verifikimeve, bimët e dyshuara narkotike u asgjësuan me djegie në vendngjarje, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër për vijimin e hetimeve.
Një person tjetër është arrestuar në kuadër të hetimeve për krime lufte në komunën e Zubin Potokut.
Sipas një komunikate të përbashkët të Policisë së Kosovës dhe Prokurorisë Speciale të Republikës së Kosovës, i dyshuari me inicialet J.R. është arrestuar me urdhër të Prokurorisë Speciale, nën dyshimin se ka kryer veprën penale “Krime lufte kundër popullsisë civile”.
Autoritetet bëjnë të ditur se arrestimi është rezultat i një pune intensive hetimore të zhvilluar nga Drejtoria për Hetimin e Krimeve të Luftës në bashkëpunim me Prokurorinë Speciale, në kuadër të angazhimit institucional për hetimin dhe zbardhjen e krimeve të luftës.
Policia e Kosovës dhe Prokuroria Speciale kanë njoftuar se hetimet do të vazhdojnë dhe se do të ndërmerren të gjitha veprimet e nevojshme për këtë rast, ndërsa publiku do të informohet për zhvillimet e mëtejshme.
Një aeroplan turistik u rrëzua sot në mes të fluturimit mbi Vijat Nazca, një vend arkeologjik me famë botërore në Perunë jugore.
Në këtë aksident të tmerrshëm, të 13 personat që ishin në aeroplan – 11 pasagjerë dhe dy pilotë – vdiqën, njoftoi televizioni shtetëror peruan TVPerú.
Sipas autoriteteve lokale, avioni po transportonte turistë në një fluturim panoramik mbi gjeoglife të mëdha në shkretëtirë që përshkruanin kafshë dhe forma të tjera, të cilat shihen më së miri nga ajri. Avioni u rrëzua në një fushë jo shumë larg qytetit të Nazkës.
Aeroplani u nis nga qyteti i afërt i Icës dhe fluturimi u operua nga kompania peruane Aerodiana. Kjo kompani deklaron në faqen e saj të internetit se për vite me radhë ka organizuar ture panoramike mbi linjat e Nazkës duke përdorur avionët Cessna Grand Caravan.
Shkaku i saktë i rrëzimit të avionit është aktualisht i panjohur. Autoritetet peruane kanë nisur një hetim urgjent dhe më shumë detaje rreth rrethanave të aksidentit do të dihen pas hetimit në vendngjarje dhe identifikimit të viktimave.
Vijat Nasca janë një nga destinacionet turistike më të rëndësishme në Peru. Po flasim për vizatime të lashta në shkretëtirë, më shumë se një mijë vjeçare, të cilat shtrihen në një sipërfaqe të madhe dhe për të cilat mijëra turistë vendosin të bëjnë fluturime të shkurtra panoramike çdo vit për t’i parë ato në lavdinë e tyre të plotë.
A small tourist plane crashed on Saturday while conducting a sightseeing flight over Peru’s famous Nazca Lines, killing all 13 people on board. Authorities said the aircraft was carrying 11 passengers and two pilots when it went down near the UNESCO World Heritage site in… pic.twitter.com/6yFqmtUDxs
Në një shpërthim jashtë një baze policore në Kolumbi sot, 11 oficerë policie u plagosën dhe qeveria e vendit fajësoi grupin më të madh rebel të mbetur për sulmin.
Sulmi ndodhi në Cucuta, një qytet në kufirin midis Kolumbisë dhe Venezuelës, ku bandat e drogës dhe grupet rebele kanë luftuar prej kohësh për kontrollin e rrugëve të kontrabandës, raportoi AP.
Gjenerali William Rincón, drejtor i policisë kolumbiane, tha se shpërthimi u shkaktua nga një kamion i lënë përpara ndërtesës që shërben si seli e policisë për provincën e Santanderit Verior.
Shpërthimi, i cili ndodhi para agimit, dëmtoi pjesën më të madhe të çatisë së ndërtesës dhe theu dritaret, si dhe vrau një qen policie.
“Ky ishte një sulm i shëmtuar terrorist. Nuk do të pushojmë derisa të gjejmë përgjegjësit dhe t’i nxjerrim para drejtësisë “, tha Rincon.
Në një mesazh në Platformën X, Ministri kolumbian i Mbrojtjes Pedro Sanchez fajësoi grupin rebel të Ushtrisë Çlirimtare Kombëtare (ELN) për sulmin dhe ofroi një shpërblim prej 60,000 dollarësh për informacionin që çon në kapjen e autorëve të sulmit me makinë-bombë.
Sulmi ndodhi në një kohë kur Kolumbia po përgatitet për inaugurimin e një presidenti të ri.
Ultrakonservatori Abelardo de la Espriella, i cili është zotuar të pezullojë bisedimet e paqes me grupet rebele të mbetura në vend, do të betohet të premten e ardhshme në Cali, një qytet tjetër kolumbian ku grupet rebele kanë kryer sulme së fundmi.
Ushtria Çlirimtare Kombëtare (ELN) ka luftuar qeverinë kolumbiane për dekada të tëra dhe besohet se ka 6,000 luftëtarë që veprojnë në Kolumbi dhe Venezuelën fqinje, tha agjencia.
Grupi u themelua në vitet 1960 nga udhëheqës sindikalë, studentë dhe fshatarë në kërkim të drejtësisë sociale, por kryesisht është shndërruar në një organizatë kriminale që përfiton nga minierat e paligjshme të arit dhe trafikimi i drogës, sipas autoriteteve kolumbiane.
Login
