RIAD,  3 mars /ATSH/ – Lufta mes Shteteve të Bashkuara të Amerikës dhe Iranit po hyn në ditën e katërt me tensione në rritje, ndërsa ambasada amerikane në Riad u godit nga dy dronë, duke shkaktuar një zjarr të vogël dhe dëme materiale të kufizuar, sipas Reuters.

Sipas autoriteteve saudite, nuk raportohet për të lënduar. Ambasada u ka bërë thirrje qytetarëve amerikanë në Riad, Xhedah dhe Dahran të qëndrojnë në strehime.

Presidenti Donald Trump deklaroi nga Shtëpia e Bardhë se përgjigjja e Uashingtonit ndaj sulmit do të bëhet e ditur “së shpejti”, duke theksuar se SHBA disponon “furnizime praktikisht të pakufizuara” municionesh.

Ai shtoi se nuk parashikohet dërgimi i trupave tokësore, ndërsa paralajmëroi se konflikti mund të zgjasë më shumë se sa ishte parashikuar fillimisht.

Ndërkohë, Irani njoftoi mbylljen e Ngushticës së Hormuzit, një arterie kyçe për furnizimin global me naftë dhe gaz. Ky zhvillim ka rritur frikën për një tronditje të tregjeve energjetike, me çmimet e naftës që janë rritur ndjeshëm dhe me paralajmërime se mund të kalojnë 100 dollarë për fuçi në rast të një bllokade të zgjatur.

Përplasjet janë zgjeruar edhe në Liban, pasi Izraeli konfirmoi sulme të njëkohshme në Teheran dhe Bejrut, pas goditjeve me raketa dhe dronë nga grupi Hezbollah ndaj Tel Avivit. Në të njëjtën kohë, Departamenti amerikan i Shtetit ka urdhëruar evakuimin e personelit jo-thelbësor nga Bahreini, Iraku dhe Jordania, duke rritur nivelin e paralajmërimeve për udhëtim në rajon.

Konflikti ka ndikuar edhe në infrastrukturën teknologjike. Amazon konfirmoi se tre qendra të të dhënave të Amazon Web Services në Emiratet e Bashkuara Arabe dhe Bahrein u dëmtuan nga sulme me dronë, duke dalë jashtë funksionit dhe duke shkaktuar ndërprerje të shërbimeve.

Tregjet globale po reagojnë me nervozizëm: aksionet në Azi dhe kontratat futures në SHBA ranë, ndërsa ari, i konsideruar si strehë e sigurt në kohë pasigurie, shënoi luhatje të forta.

Ndërkohë, Kongresi amerikan pritet të votojë këtë javë për një rezolutë mbi kompetencat e luftës lidhur me Iranin, ndërsa përplasjet ushtarake në Lindjen e Mesme vazhdojnë me intensitet të lartë. /Ad.Ab./

The post FOKUS – Lufta SHBA–Iran përshkallëzohet; sulm ndaj ambasadës amerikane në Arabinë Saudite appeared first on Agjencia Telegrafike Shqiptare.

NJU JORK  3 mars /ATSH/ – Zonja e Parë e Shteteve të Bashkuara të Amerikës, Melania Trump, drejtoi dje një mbledhje  të  Këshillit të  Sigurmit t  të Kombeve të  Bashkuara mbi fëmijët dhe arsimin në zonat e konfliktit, në një moment kur Shtetet e Bashkuara  vijon veprimet ushtarake ndaj Iranit, sipas BBC.

Fjalimi i saj u përqendrua në rolin e edukimit për fëmijët në “avancimin e tolerancës dhe paqes botërore”.

Kjo është hera e parë që bashkëshortja e një lideri botëror kryeson një seancë të Këshillit të Sigurimit. Zoinja  Parë e drejtoi takimin në emër të SHBA-së, e cila këtë muaj mban presidencën e radhës të Këshillit të Sigurimit të OKB-së. Plani që ajo të kryesonte mbledhjen ishte njoftuar që në fund të muajit të kaluar.

Gjatë fjalës së saj, ajo shprehu ngushëllime për familjet e ushtarakëve amerikanë të vrarë, pa përmendur drejtpërdrejt ndonjë operacion të caktuar ushtarak.

“Trimëria dhe përkushtimi i tyre do të kujtohen gjithmonë” ,tha ajo. “Shpreh urimet e mia të sinqerta për një shërim të shpejtë dhe të lehtë për të gjithë të plagosurit. Jeni në mendimet dhe lutjet e mia gjatë këtyre kohëve sfiduese”.

Si pjesë e angazhimit të saj për çështjet e fëmijëve, ajo deklaroi gjithasht se “Shtetet e Bashkuara qëndrojnë pranë të gjithë fëmijëve në mbarë botën. Shpresoj që së shpejti paqja të jetë e juaja.”

Zëvendëssekretarja e Përgjithshme e OKB-së, Rosemary DiCarlo, theksoi gjatë takimit se “kur shpërthejnë konfliktet, fëmijët janë ndër më të prekurit”. Ajo shtoi se gjatë dy ditëve të fundit shkollat në Israel,  Emiratet  e Bashkuara Arabe, Qatar, Bahrein dhe Oman janë mbyllur ose kanë kaluar në mësim online për shkak të operacioneve ushtarake në rajon. Ajo përmendi gjithashtu raportimet nga Irani për një sulm ndaj një shkolle fillore. /Ad.Ab./

The post SHBA – Melania Trump kryesoi Këshillin e Sigurimit të OKB-së për fëmijët, mes tensioneve me Iranin appeared first on Agjencia Telegrafike Shqiptare.

BERLIN, 2 mars /ATSH-DPA/ – Kancelari gjerman Friedrich Merz do të udhëtojë sot drejt Uashingtonit për një takim me presidentin amerikan Donald Trump, i planifikuar për nesër.

Kjo është vizita e dytë e Merz në Shtëpinë e Bardhë që prej marrjes së detyrës 10 muaj më parë dhe kishte qenë e planifikuar prej kohësh.

Megjithatë, sulmet e fundit të Shteteve të Bashkuata të Ameikës  dhe Izrael ndaj Iranit pritet të dominojnë diskutimet në Zyrën Ovale.

Pas bisedimeve është planifikuar edhe një drekë pune me Trump.

Fillimisht, takimi pritej të përqendrohej në mosmarrëveshjen tregtare me SHBA-në, luftën e Rusisë në Ukrainë dhe politikën ndaj Kinës, por kriza në Iran tashmë do të jetë tema kryesore e diskutimeve. /Ad.Ab./

The post FOKUS – Merz udhëton drejt Uashingtonit për bisedime me Trump appeared first on Agjencia Telegrafike Shqiptare.

ESEN,  2 mars /ATSH-DPA/ – Të paktën 30 000 klientë të agjencive turistike gjermane janë prekur nga lufta në Lindjen e Mesme, bëri të ditur sot një shoqatë kryesore e industrisë së turizmit, ndërsa një operator turistik gjerman ka ngritur një strukturë krize për udhëtarët në rajon.

Anëtarja e Bundestagut dhe kryetarja e komisionit parlamentar për turizmin, Anja Karliczek, deklaroi se “siguria e turistëve të bllokuar në rajonin e krizës është prioritet absolut”.

Sipas të dhënave të Shoqatës Gjermane të Udhëtimeve, rreth 30 000 turistë nuk mund të kthehen në Gjermani pas ofensivës së Shteteve të  Bashkuar adhe  Izrael kundër Iran,i e cila shkaktoi përshkallëzim rajonal dhe shkëmbime me rakta ndaj bazave amerikane në disa shtete të Gjirit.

Ajo shprehu besimin se autoritetet dhe industria e turizmit do të ndërmarrin masat e nevojshme pas një analize të shpejtë të situatës. Sipas saj, shpresohet që pushuesit e bllokuar të mund të largohen shpejt përmes rrugëve të sigurta.

Operatori gjerman i udhëtimeve “Dertour”, një nga më të mëdhenjtë në Gjermani, njoftoi se një numër i ulët katërshifror i klientëve të tij ndodhen në Emiratet e Bashkuara Arabe , Arabi Sudite, Katar, Bahrein, Oman, Jordan,i Israel dhe Kuvajt.

Sipas kompanisë, aktualisht është e paqartë sa kohë do të mbetet i mbyllur hapësira ajrore në rajon. Udhëtarët që nuk mund të kthehen për shkak të kufizimeve të fluturimeve janë informuar dhe po mbështeten në vend. Janë vënë në dispozicion kontakte të posaçme krize dhe zgjidhje alternative për akomodim.

“Dertour” ka anuluar të gjitha udhëtimet drejt këtyre tetë vendeve deri të paktën të enjten. Klientët mund të rishikojnë datën e udhëtimit pa pagesë ose të kërkojnë rimbursim të plotë.

Po ashtu po kërkohen alternativa fluturimi për pasagjerët transit, ndërsa po shqyrtohen opsione të reja për kthimin e udhëtarëve drejt Gjermanisë. /Ad.Ab./

The post LM – Të paktën 30 mijë turistë gjermanë të bllokuar për shkak të luftës në Iran appeared first on Agjencia Telegrafike Shqiptare.

MOSKË, 2 mars /ATSH/ – Kremlini deklaroi sot se është në interesin e vetë Rusisë të vazhdojë bisedimet e paqes me Ukrainën dhe se preferenca e Moskës mbetet arritja e një zgjidhjeje diplomatike për t’i dhënë fund luftimeve, sipas Reuters.

Bisedimet e paqes duket se kanë ngecur javët e fundit për shkak të këmbënguljes së Rusisë që Ukraina të dorëzojë pjesën e mbetur të rajonit lindor të Donbas, të cilën Moska nuk e kontrollon, një ide që presidenti ukrainas Volodymyr Zelenskiy e ka hedhur poshtë vazhdimisht.

“Bloomberg News” raportoi të shtunën, duke cituar burime të njohura me çështjen, se zyrtarët rusë po shohin gjithnjë e më pak arsye për të vazhduar bisedimet e ndërmjetësuara nga SHBA-ja, nëse Kievi nuk sinjalizon gatishmëri për të hequr dorë nga territori.

“Rusia mbetet e përkushtuar ndaj bisedimeve dhe se qasja e saj nuk ka ndryshuar”,  tha sot zëdhënësi i Kremlinit, Dmitry Peskov

“Ne kemi interesat tona që duhet t’i mbrojmë dhe është në interesin tonë të vazhdojmë këto negociata. Sigurisht që mbetemi të hapur për këto bisedime”, shtoi Peskov, duke theksuar se “një zgjidhje politike dhe diplomatike është mënyra e preferuar e Moskës për t’i dhënë fund luftimeve”.

I pyetur nëse sulmet amerikane ndaj Iranit do të ndikonin në procesin e paqes për Ukrainën, Peskov tha se Rusia vazhdon të vlerësojë përpjekjet ndërmjetësuese të SHBA-së, por shtoi se Moska mbi të gjitha i beson vetes dhe do të udhëhiqet nga interesat e saj. /Ad.Ab./

The post FOKUS – Kremlini : Vazhdimi i bisedimeve me Ukrainën është në interesin e vetë Rusisë appeared first on Agjencia Telegrafike Shqiptare.

NJU DELHI, 2 mars /ATSH/ – India dhe Kanadaja kanë njoftuar një seri marrëveshjesh të reja, përfshirë një marrëveshje 10-vjeçare në fushën e energjisë bërthamore, pas takimit mes kryeministrit indian Narendra Modi dhe homologut të tij kanadez Mark Carney në kryeqytetin indian, sipas BBC.

Dy liderët synojnë të rivendosin marrëdhëniet që u përkeqësuan ndjeshëm pas tensioneve diplomatike të viteve të fundit.

Marrëveshja parashikon furnizim afatgjatë me uranium për Indinë, si dhe bashkëpunim në zhvillimin e reaktorëve të vegjël modularë dhe teknologjive të avancuara bërthamore. Modi theksoi se të dy vendet do të thellojnë gjithashtu bashkëpunimin në inteligjencën artificiale, superkompjuterë dhe gjysmëpërçues, si dhe do të organizojnë së bashku një samit për energjinë e rinovueshme.

Në planin tregtar, palët synojnë të përmbyllin deri në fund të vitit 2026 një marrëveshje gjithëpërfshirëse për partneritet ekonomik, e diskutuar prej më shumë se një dekade. Objektivi i shpallur është rritja e shkëmbimeve tregtare dypalëshe në 50 miliardë dollarë, në një kohë kur të dyja vendet kërkojnë të diversifikojnë tregtinë dhe të ulin varësinë nga tarifat ndëshkuese të SHBA-së.

Marrëdhëniet mes dy vendeve u tensionuan pas akuzave të ish-kryeministrit kanadez Justin Trudeau lidhur me një rol të mundshëm të Indisë në vrasjen e separatistit sikh Hardeep Singh Nijjar në vitin 2023. India i mohoi me forcë akuzat dhe kriza çoi në dëbime diplomatike reciproke dhe pezullim të shërbimeve të vizave.

Që prej marrjes së detyrës nga Carney vitin e kaluar, palët kanë ndërmarrë hapa për të rindërtuar marrëdhëniet mes dz vendeve . Aalistët vlerësojnë se afrimi i ri reflekton një qasje pragmatike përballë zhvillimeve gjeopolitike, ndërsa India kërkon partnerë të rinj energjetikë dhe tregtarë për të reduktuar varësinë nga furnizimet ruse. /Ad.Ab./

The post FOKUS – India dhe Kanadaja, marrëveshje historike për energjinë bërthamore dhe tregtinë appeared first on Agjencia Telegrafike Shqiptare.

UASHINGTON, 2 mars /ATSH/ –  Ndërsa Izraeli nisi një përgjigje të gjerë ushtarake ndaj sulmit brutal të 7 tetorit 2023 nga Hamas, ai goditi vazhdimisht fuqinë e Iran, sponsorit të gjatë të grupit militant, si dhe proxy-ve dhe aleatëve të tjerë të tij në rajon, sipas AP.

Rezultati ka qenë një dobësim i shpejtë dhe sistematik i ndikimit të Iranit në Lindjen e Mesme gjatë  rrthe 3 viteve të fundit, një ndryshim sizmik që çoi drejtpërdrejt në sulmet shkatërruese të këtij fundjave ndaj Iranit nga shtete e bAshkuar dhe Izraeli.

“Sigurisht, ngjarjet e 7 tetorit ishin një pikë kthese në këtë konflikt të gjatë mes Iranit dhe Izraelit”, tha Mehrzad Boroujerdi, ekspert i politikës iraniane në “Missouri University of Science and Technology”. “Mendoj se i dha Izraelit argumentin ose justifikimin për të dhënë një goditje të fortë.”

Goditja më e rëndë deri tani erdhi të shtunën, kur presidenti Donald Trump dhe udhëheqësit izraelitë nisën një valë sulmesh ndaj Iranit, duke vrarë udhëheqësin suprem të Iranit, Ali Khamenei, dhe duke shkaktuar shkatërrime të mëdha.

Megjithatë, lufta, edhe pse ende në fazat e saj të hershme, është pjesë e një zinxhiri më të gjatë ngjarjesh që kanë dobësuar ndjeshëm Iranin, Hezbollahun dhe forcat të  tjera  të milicisisë, duke ndryshuar balancën politike në rajon.

“Është një moment shumë i përgjakshëm, shumë i dhunshëm, por transformues për Lindjen e Mesme”, tha Renad Mansour, studiues i lartë në Chatham House, një institicion kërkimor  britanik.

Lufta në Gaza si burim i përshkallëzimit

Dëmtimi i fuqisë së Iranit nisi me luftën në Gaza, ku forcat izraelite ndoqën Hamasin pasi militantët vranë 1 200 njerëz dhe morën 251 pengje më 7 tetor.

Qysh atëherë, sipas Ministrisë së Shëndetësisë të Gazës (nën qeverisjen e Hamasit), janë vrarë më shumë se 72 000 palestinezë. pothuajse gjysma gra dhe fëmijë.

Konflikti u zgjerua shpejt duke përfshirë edhe grupet e tjera të të ashtuquajturit “Boshti i Rezistencës” , një rrjet i mbështetur nga Irani.

Në Liban,  grupi i fuqishëm militant Hezbollah prej kohësh konsiderohej linja e parë e mbrojtjes së Iranit kundër Izraelit. Ai besohej se kishte rreth 150 000 raketa dhe një forcë të madhe luftarake.

Pas 7 tetorit, Hezbollahu lëshoi raketa drejt Izraelit në mbështetje të Hamasit, duke shkaktuar sulme ajrore dhe përplasje të zgjeruara që kulmuan me luftë të plotë në vjeshtën e vitit 2024.

Izraeli i shkaktoi dëme të rënda Hezbollahut, duke vrarë liderë të lartë dhe duke shkatërruar pjesë të mëdha të arsenalit të tij, përpara një armëpushimi të ndërmjetësuar nga SHBA-ja që ndaloi formalisht konfliktin. Izraeli vazhdon të kryejë sulme ajrore dhe të ketëë prani në jug të Libanit.

Hezbollahu u dobësua më tej kur rebelët rrëzuan regjimin e presidentit sirian Bashar al-Assad në Siri, duke ndërprerë një rrugë të rëndësishme furnizimi me armë nga Irani.

Në Jemen, rebelët Houthi,  gjithashtu të mbështetur nga Irani, u përfshinë në konflikt duke lëshuar raketa ndaj anijeve në Red Sea dhe duke synuar Izraelin. Anijet luftarake amerikane dhe ushtria izraelite u përgjigjën me zjarr.

Izraeli braktisi status-quo-në

Ndërsa konflikti u zgjerua, drejtuesit e Iranit dhe aleatëve të tij nuk e kuptuan se Izraeli kishte braktisur status-quo-në e gjatë dhe po përpiqej të ndryshonte rrënjësisht balancën e fuqisë.

Një përshkallëzim i madh ndodhi në qershor të vitit të kaluar kur Izraeli nisi një ofensivë surprizë kundër programit bërthamor të Iranit, në një kohë kur Teherani dhe SHBA-ja  po negocionin për një marrëveshje bërthamore. Lufta 12-ditore përfshiu bombardime ndaj infrastrukturës energjetike dhe selive të Ministrisë së Mbrojtjes së Iranit.

Grupet e dobësuara të Iranit qëndruan kryesisht mënjanë ndërsa sponsori i tyre sulmohej drejtpërdrejt.

“Ka të bëjë me mbijetesën për Hezbollahun dhe grupet e tjera”, tha Mansour. Ai theksoi se me kalimin e kohës këto grupe janë bërë më autonome dhe vendimet e tyre nuk varen gjithmonë nga urdhrat e drejtpërdrejtë të Teheranit.

Që nga sulmet e fundit të SHBA-së dhe Izraelit ndaj Iranit, aleatët dhe proxy-t e tij kanë pasur rol të kufizuar në përgjigje.

Hezbollahu reagoi me deklarata që dënonin sulmet dhe nderonin vdekjen e Khameneit, më pas lëshoi raketa drejt Izraelit, duke shënuar herën e parë në më shumë se një vit që grupi pranoi një sulm aktiv ndaj Izraelit.

Si mund të reagojnë grupet e tjera

Mbetet e paqartë se si do të reagojnë forcat e tjera të milicis[, pjesë “ Boshtit të Rezistencës”.

Në Irak, një koalicion të forcave të  milicisë të mbështetura nga Irani,  i quajtur “Rezistenca Islamike në Irak”, ka kryer sulme me dron ndaj bazave amerikane në Erbil. Dëmi nuk është plotësisht i qartë, por rajoni kurd ka përjetuar ndërprerje të energjisë pas mbylljes së një fushe gazi për arsye sigurie.

Sipas burimeve të milicive, dy muaj më parë u zhvillua një takim mes zyrtarëve iranianë dhe grupeve aleate për të planifikuar një përgjigje në rast sulmi ndaj Iranit, duke ndarë detyra mes grupeve të armatosura.

Megjithatë, ekziston një keqkuptim se Irani jep urdhra të drejtpërdrejta dhe të gjitha grupet i zbatojnë ato automatikisht. Dobësimi i rrjetit të tij është tregues se shumë vendime tani merren në mënyrë më të pavarur.

“Dominot filluan të bien me ngjarjet e 7 tetorit”, tha Boroujerdi. “Vini re gjithçka që ka ndryshuar që atëherë në balancën e fuqisë”. /Ad.Ab./

The post ANALIZË – Goditjet ndaj fuqisë së Iranit dhe forcave të milicisë krijuan terrenin për sulmet nga SHBA dhe izraeli    appeared first on Agjencia Telegrafike Shqiptare.

UASHINGTON, 2 mars /ATSH/ –  Irani po përjeton një ndërprerje thuajse totale të internetit, ndërsa konflikti me Shtetet e Bashkuara dhe Izraelin vijon, sipas Reuters.

Sipas të dhënave të organizatës së monitorimit “NetBlocks”, lidhja kombëtare e internetit ka rënë në rreth 1% të nivelit normal, duke prekur mbi 90 milionë qytetarë. “NetBlocks” e ka cilësuar ndërprerjen si të imponuar nga autoritetet iraniane, por qeveria nuk ka bërë ende koment.

Organizata thekson se ndërprerjet e tilla janë përdorur më parë nga regjimi gjatë protestave dhe krizave. Në janar, një blackout i ngjashëm zgjati disa javë dhe u përdor për të mbuluar trazirat dhe shkelje të të drejtave të njeriut.

Raportime të tjera tregojnë se aktorë nga SHBA dhe Izraeli kanë kryer sulme kibernetike kundër infrastrukturës iraniane, paralelisht me goditjet ajrore.

Sipas njoftimi,  u ndërhy në faqet e lajmeve të lidhura me qeverinë iraniane dhe në një aplikacion popullor fetar me mbi 5 milionë shkarkime, duke shfaqur mesazhe që u bënin thirrje forcave të armatosura të dorëzonin armët.

Zyrtarët amerikanë nuk kanë komentuar mbi pretendimet për përfshirje në sulme kibernetike.

Analistë të sigurisë kibernetike paralajmërojnë se aktorë të lidhur me Iranin mund të përgjigjen me sulme kibernetike ndaj objektivave në rajon, përfshirë energjinë, financat dhe infrastrukturën kritike. /Ad.Ab./

The post FOKUS- Internet i bllokuar në Iran, njoftohen sulme kibernetike appeared first on Agjencia Telegrafike Shqiptare.

ISLAMABAD, 2 mars /ATSH-AFP/- Në Pakistan, numri i të vrarëve nga protestat e dhunshme të fundjavës kundër vrasjes së udhëheqësit suprem iranian ka arritur të paktën në 25 persona.

Demonstratat shpërthyen në disa qytete të mëdha, përfshirë metropolin jugor të Karachi, ku protestuesit tentuan të hynin me forcë në ambientet diplomatike amerikane.

Sipas raportimeve, përleshjet mes protestuesve dhe policisë shkaktuan të paktën 10 viktima dhe mbi 70 të plagosur në Karachi, ndërsa në rajonin verior të Gilgit-Baltistan u regjistruan 13 të vrarë në përballje me forcat e rendit. Autoritetet vendosën shtetrrethim natën në disa zona dhe dislokuan ushtrinë për të kontrolluar situatën.

Në kryeqytetin Islamabad, mijëra persona u mblodhën në protesta, shumë prej tyre duke mbajtur fotografi të liderit të ndjerë iranian. Policia përdori gaz lotsjellës për të shpërndarë turmat pranë zonës diplomatike ku ndodhet ambasada amerikane.

Kryeministri pakistanez, Shehbaz Sharif, e cilësoi vrasjen e liderit iranian si shkelje të së drejtës ndërkombëtare dhe shprehu solidaritet me popullin iranian në “momentin e tyre të dhimbjes”.

Protestuesit në disa qytete dënuan Shtetet e Bashkuara dhe Izraelin, ndërsa ambasadat amerikane dhe britanike u bënë thirrje qytetarëve të tyre të tregohen të kujdesshëm në Pakistan. /Ad.Ab./

The post ISLAMABAD – Të paktën 25 të vrarë në protestat pro-Iranit në Pakistan appeared first on Agjencia Telegrafike Shqiptare.

KAJRO, 2 mars /ATSH-DPA/- Tymi u pas sot duke dalë mbi ambasadën e Shteteve të Bashkuara në shtetin e Gjirit, Kuvajt, thanë dëshmitarët.

Shkaku i zjarrit nuk ishte menjëherë i qartë. Ambasada kishte lëshuar një paralajmërim, duke thënë se ekzistonte një kërcënim i vazhdueshëm nga raketat dhe dronët mbi Kuvajt dhe duke këshilluar njerëzit të mos shkonin në ambasadë. Qytetarët amerikanë u këshilluan të qëndronin në shtëpi dhe të tregoheshin vigjilentë për shkak të sulmeve të mundshme.

Mbrojtja ajrore interceptoi disa “dronë armiqësorë” që iu afruan vendit nga deti, sipas agjencisë së mbrojtjes civile KUNA. Nuk u raportuan të lënduar dhe agjencia tha se situata e sigurisë mbetet “e qëndrueshme”.

Kuvajti, si shtetet e tjera të Gjirit, ka përjetuar sulme që nga vrasja e liderit suprem të Iranit, Ali Khamenei. Objektivat në rajon kanë përfshirë objektet ushtarake amerikane.

Në shenjë hakmarrjeje për sulmet ajrore SHBA-Izrael, Irani ka sulmuar gjithashtu objekte në Emiratet e Bashkuara Arabe, Katar dhe Bahrein. /Ad.Ab./

The post FOKUS – Tym mbi ambasadën amerikane në Kuvajt appeared first on Agjencia Telegrafike Shqiptare.

BEJRUT, 2 mars /ATSH-DPA/- Sulmet ajrore izraelite në Lebanon kanë shkaktuar vdekjen e dhjetëra personave, njoftuan sot  autoritetet lokale.

Ministria e Shëndetësisë bëri të ditur se të paktën 31 persona janë vrarë dhe 149 të tjerë janë plagosur, sipas të dhënave paraprake nga periferitë jugore të Bejrutit dhe nga rajonet jugore të vendit. Autoritetet paralajmëruan se bilanci i viktimave mund të rritet ndërsa ekipet e shpëtimit vijojnë kërkimet.

Presidenti libanez, Joseph Aoun, dënoi sulmet që shënjestruan periferitë jugore të kryeqytetit, duke e cilësuar të papranueshme përdorimin e Libanit si platformë për “luftëra me përfaqësues”. Ai theksoi se përgjegjësia për rreziqet në rritje bie mbi ata që kanë shpërfillur thirrjet për ruajtjen e sigurisë dhe stabilitetit.

Ushtria izraelite deklaroi se ndërmori një valë të re sulmesh ajrore në jug të Libanit, duke goditur pozicione të milicisë Hezbollah, e mbështetur nga Irani. Sipas saj, objektivat përfshinin depo armësh dhe infrastrukturë tjetër të grupit.

Nga ana tjetër, Hezbollah njoftoi se kishte lëshuar raketa drejt Izraelit, duke pretenduar se shënjestroi një objektiv ushtarak në jug të Haifës, në përgjigje të vrasjes së udhëheqësit suprem iranian, Ali Khamenei, në një sulm izraelito-amerikan në Teheran.

Si kundërpërgjigje, Izraeli nisi bombardime në Bejrut dhe zona të tjera të vendit, duke pretenduar se kishte goditur drejtues të lartë të Hezbollahut. Ushtria izraelite u bëri thirrje banorëve në jug të Libanit të evakuohen menjëherë, duke deklaruar se nuk do të lejojë që Hezbollah të përbëjë kërcënim për sigurinë e Izraelit dhe civilëve të tij.

Kryeministri libanez, Nawaf Salam, e cilësoi lëshimin e raketave nga jugu i vendit si një akt të papërgjegjshëm që rrezikon sigurinë kombëtare dhe i jep Izraelit justifikime për të vazhduar sulmet. Ai njoftoi se do të mbahet një mbledhje urgjente e qeverisë për të koordinuar reagimin kombëtar, ndërsa tensionet rrezikojnë të minojnë armëpushimin e arritur në nëntor 2024 mes Izraelit dhe Hezbollahut. /Ad.Ab./

The post LIBAN – Dhjetëra të vrarë pas sulmeve izraelite kundër Hezbollah appeared first on Agjencia Telegrafike Shqiptare.

UASHINGTON, 2 mars /ATSH-DPA/ – Sipas presidentit amerikan Donald Trump, konflikti i armatosur aktual me Iranin mund të zgjasë katër javë.

“Që në fillim është supozuar se do të duhen rreth katër javë”, tha Trump në një intervistë telefonike për gazetën britanike “Daily Mail”. “Është një vend i madh, do të duhen katër javë, ose më pak”,  theksoi presidenti amerikan.

Tre ushtarë amerikanë janë vrarë dhe pesë të tjerë janë plagosur rëndë në operacionin ushtarak të SHBA-së kundër Iranit. Kundërsulmet iraniane kanë goditur baza ushtarake amerikane në rajonin e Gjirit dhe objektiva të tjerë.

Presidenti Trump i vlerësoi ushtarët e vrarë si “njerëz të mrekullueshëm”. “Dhe, e dini, ne presim që kjo të ndodhë, për fat të keq. Mund të ndodhë vazhdimisht, mund të ndodhë sërish”, shtoi ai.

Një vlerësim të ngjashëm dha edhe shefi i shtabit të ushtrisë izraelite, Eyal Zamir, i cili deklaroi se Izraeli ka arritur “suksese të rëndësishme” në Iran gjatë 48 orëve të para, por se “shumë ditë të tjera luftimeje janë përpara”. /Ad.Ab./

The post SHBA – Trump: Konflikti me Iranin mund të zgjasë katër javë appeared first on Agjencia Telegrafike Shqiptare.

DUBAI, 2 mars /ATSH/ – Lufta në Lindjen e Mesme është përshkallëzuar më tej, pasi Irani dhe forcat e milicisë së mbështetura prej tij lëshuan raketa drejt Izraelit dhe disa shteteve arabe, ndërsa avionët izraelitë dhe amerikanë goditën objektiva të shumta brenda territorit iranian, sipas AP.

Sipas njoftimeve, një nga sulmet goditi kompleksin e Ambasadës Amerikane në Kuvajt, ku u panë flakë dhe tym, megjithëse nuk pati menjëherë të dhëna për viktima.

Ndërkohë, zyrtarë të lartë iranianë deklaruan se nuk do të negociojnë me Shtetet e Bashkuara të Amerikës. Në Irak, një milici pro-iraniane mori përgjegjësinë për një sulm me dron ndaj trupave amerikane në aeroportin e Bagdadit, ndërsa autoritetet në Qipro raportuan për një tentativë sulmi ndaj një baze britanike në ishull.

Hezbollah njoftoi se kishte lëshuar raketa nga Libani drejt Izraelit, në reagim ndaj vrasjes së udhëheqësit suprem iranian, Ali Khamenei. Izraeli u kundërpërgjigj me sulme ajrore në Liban, ku sipas Ministrisë së Shëndetësisë u vranë të paktën 31 persona dhe u plagosën mbi 100 të tjerë, shumica në jug të vendit.

Sipas autoriteteve iraniane, mbi 200 persona janë vrarë që nga nisja e sulmeve ajrore izraelito-amerikane.

Ushtria amerikane bëri të ditur se bombarduesit “Stealth B-2” goditën objekte të programit të raketave balistike të Iranit, ndërsa presidenti amerikan, Donald Trump, deklaroi se disa anije luftarake iraniane janë fundosur dhe se selia e marinës iraniane është shkatërruar në masë të madhe.

Ndërsa tensionet rriten, Britania e Madhe, Franca dhe Gjermania shprehën gatishmëri për të bashkëpunuar me SHBA-në për të ndalur sulmet iraniane, ndërsa disa shtete arabe të Gjirit paralajmëruan se rezervojnë të drejtën për t’u kundërpërgjigjur.

Organizata Botërore e Shëndetësisë bëri thirrje për mbrojtjen e civilëve dhe objekteve shëndetësore, duke theksuar se përshkallëzimi i konfliktit rrezikon destabilizim të mëtejshëm të rajonit. /Ad.Ab./

The post FOKUS – Irani përshkallëzon luftën me SHBA-në dhe Izraelin appeared first on Agjencia Telegrafike Shqiptare.

AUSTIN, 2 mars /ATSH/ – Dy persona humbën jetën dhe dhjetëra të tjerë u plagosën në një sulm me armë zjarri jashtë një lokali në Austin, Teksas, sipas BBC.

Sipas Zyrës Federale të Hetimit (FBI), ngjarja mund të ketë lidhje me terrorizmin, ndonëse hetimet janë ende në fazat e para. I dyshuari, i identifikuar nga mediet amerikane si Ndiaga Diagne, një shtetas amerikan i natyralizuar me origjinë nga Senegali, u qëllua për vdekje nga policia, duke e çuar numrin total të viktimave në tre

Ngjarja ndodhi pranë lokalit Buford’s, në një zonë të njohur argëtimi të qytetit.

Sipas shefes së policisë së Austin, Lisa Davis, autori fillimisht hapi zjarr nga një automjet tip SUV drejt klientëve që ndodheshin jashtë lokalit, duke i goditur ata në verandë dhe në trotuar.

Më pas ai doli nga makina me një pushkë dhe u drejtua sërish drejt lokalit, ku u përball me tre oficerë policie që e qëlluan për vdekje.

Autoritetet kontrolluan automjetin e tij dhe nuk gjetën eksplozivë, por një zyrtar i FBI-së nga zyra e San Antonios deklaroi se në automjet dhe te i dyshuari ishin zbuluar elementë që sugjerojnë një lidhje të mundshme me terrorizmin.

Megjithatë, ai theksoi se është ende herët për të dhënë detaje të mëtejshme mbi motivin e sulmit.

Nga 14 të plagosurit që u transportuan në spital, tre ndodhen në gjendje kritike, sipas shërbimeve të emergjencës.

Dëshmitarët përshkruan skena kaotike dhe tronditëse, me disa persona të shtrirë në tokë pas të shtënave.

Zona ku ndodhi sulmi frekuentohet shpesh nga studentë të University of Texas në Austin, i cili ndodhet pranë qendrës së qytetit. /Ad.Ab./

The post SHBA – Tre të vdekur, dhjetëra të plagosur pas një sulmi me armë në Teksas appeared first on Agjencia Telegrafike Shqiptare.

TEHERAN, 28 shkurt /ATSH-AFP/ – Teherani i bën thirrje Këshillit të Sigurimit të OKB-së të veprojë menjëherë pas sulmeve izraelite dhe amerikane.

Ministri i Jashtëm i Iranit, Abbas Araghchi, i bëri thirrje sot Këshillit të Sigurimit të OKB-së që të veprojë menjëherë, pas sulmeve të ndërmarra nga Izraeli dhe Shtetet e Bashkuara kundër vendit të tij.

Në një letër drejtuar Kombeve të Bashkuara, Araghchi deklaroi se SHBA-ja dhe Izraeli duhet të ”mbajnë plotësisht dhe tërësisht përgjegjësi për pasojat e veprimeve të tyre të paligjshme”.

Ai theksoi se Irani po vepron në vetëmbrojtje legjitime dhe kërkoi që komuniteti ndërkombëtar të dënojë këtë akt agresioni.

Sipas njoftimit të OKB-së, Këshilli i Sigurimit, ku Shtetet e Bashkuara gëzojnë të drejtën e vetos, do të mblidhet sot në orën 21:00 GMT për të diskutuar situatën në Lindjen e Mesme pas operacionit ushtarak të nisur nga Uashingtoni kundër Iranit.

Takimi pritet të zhvillohet në një klimë tensionesh të larta diplomatike, ndërsa komuniteti ndërkombëtar po bën thirrje për përmbajtje dhe rikthim në dialog për të shmangur një përshkallëzim të mëtejshëm në rajon./  /Ad.Ab./  a.jor.

The post IRAN – Teherani kërkon veprim urgjent nga OKB pas sulmeve nga SHBA-Izrael appeared first on Agjencia Telegrafike Shqiptare.

BRUKSEL, 28 shkurt /ATSH-AFP/ – Forca Detare e Bashkimit Evropian njoftoi se Garda Revolucionare e Iranit po u dërgonte njoftime me radio anijeve për t’i paralajmëruar se kalimi nëpër Ngushticën e Hormuzit, një pikë kyçe për tregtinë globale të naftës, nuk lejohej.

Agjencia iraniane e lajmeve Tasnim kishte raportuar më parë se Garda kishte paralajmëruar disa anije se, për shkak të klimës së pasigurisë në zonë, ishte “e rrezikshme” të kalohej nëpër ngushticë, e cila ishte “de facto e mbyllur”.

Zyrtarët iranianë dhe disa media kanë ngritur kërcënimin e bllokimit të ngushticës në rast të një konflikti, por deri më tani nuk është marrë asnjë vendim zyrtar për ta bërë këtë./ /Ad.Ab./ a.jor.

The post FOKUS – Forca Detare e BE-së: Garda Revolucionare paralajmëron anijet për mbylljen e Ngushticës së Hormuzit appeared first on Agjencia Telegrafike Shqiptare.

TEL AVIV, 28 shkurt /ATSH-AFP/ – Ushtria e Izraelit njoftoi sot pasdite se ka nisur një valë të re sulmesh kundër objektivave ushtarake në Iranit, si pjesë e operacionit të përbashkët të ndërmarrë më herët me Shtetet e Bashkuara kundër Republikës Islamike.

Sipas një komunikate të shkurtër ushtarake, forcat ajrore izraelite kanë goditur lëshues raketash dhe sisteme të mbrojtjes ajrore në qendër të Iranit, duke i cilësuar ato si objektiva të lidhura me regjimin terrorist iranian.

Njoftimi vjen në një moment tensionesh të larta në rajon, ndërsa përshkallëzimi i operacioneve ushtarake rrit shqetësimet për një konflikt më të gjerë në Lindjen e Mesme./   /Ad.Ab./  a.jor.

The post TEL AVIV – Valë e re sulmesh izraelite në Iran appeared first on Agjencia Telegrafike Shqiptare.

PARIS, 28 shkurt /ATSH-DPA/- Presidenti francez, Emmanuel Macron i cilësoi sot sulmet e kryera nga Izraeli dhe Shtetet e Bashkuara kundër Irani si të rrezikshme për të gjithë dhe bëri thirrje për mbledhje urgjente të Këshillit të Sigurimit të OKB-së.

Në një reagim të publikuar në rrjetin social X, Macron theksoi se shpërthimi i një konflikti të hapur mes SHBA-së, Izraelit dhe Iranit do të kishte pasoja serioze për paqen dhe sigurinë ndërkombëtare.

Ai kërkoi ndalimin e menjëhershëm të përshkallëzimit të tensioneve.

Presidenti francez u shpreh se Teherani duhet të kuptojë se e vetmja rrugë është nisja e negociatave serioze për programin e tij bërthamor dhe për çështjet që lidhen me destabilizimin rajonal.

Sipas tij, kjo është thelbësore për sigurinë në Lindjen e Mesme.

Macron gjithashtu theksoi se populli iranian duhet të ketë të drejtën të vendosë lirisht për të ardhmen e tij duke shtuar se veprimet e regjimit iranian e diskreditojnë atë dhe kërkojnë që zëri i qytetarëve të dëgjohet sërish.

Sipas Pallatit Elysee, Macron ka zhvilluar biseda telefonike të veçanta sot me liderët e Arabisë Saudite, Emirateve të Bashkuara Arabe, Katarit dhe Jordanisē./  /Ad.Ab./  a.jor.

The post FRANCË – Macron kërkon takim urgjent të Këshillit të Sigurimit, pas sulmeve kundër Iranit appeared first on Agjencia Telegrafike Shqiptare.

TEHERAN, 28 shkurt /ATSH-DPA-AFP/ – Pas një sulmi ajror në jug të Iranit, raportohet se të paktën 85 nxënëse të një shkolle fillore janë vrarë dhe rreth 90 të tjera janë plagosur, sipas medias shtetërore.

Ngjarja ka ndodhur, pasi Izraeli dhe Shtetet e Bashkuara nisën sulme ndaj territorit iranian, sipas raportimeve.

Deri tani, të dy vendet nuk kanë bërë koment zyrtar mbi pretendimet se shkolla ishte objektiv i drejtpërdrejtë.

Sulmi ka prekur një shkollë fillore në provincën e Hormozganit  në zonën e Minabit.

Rajoni njihet për praninë e disa bazave detare iraniane.

Sipas raportimeve, rreth 170 nxënës ndodheshin në shkollë në momentin e goditjes.

Operacionet e kërkim-shpëtimit dhe pastrimit të rrënojave janë ende duke vijuar.

Ministria e Jashtme iraniane publikoi një imazh të një ndërtese të shkatërruar, duke deklaruar se bëhej fjalë për shkollën e goditur.

Zëdhënësi i ministrisë, Esmail Baghaei, e cilësoi ngjarjen si një krim të pastër dhe bëri thirrje që bota të reagojë ndaj asaj që ai e quajti një padrejtësi të madhe.

Ngjarja është raportuar nga agjencia shtetërore “Tasnim News”, e cila njoftoi rritjen e numrit të viktimave nga shifrat fillestare./   /Ad.Ab./  a.jor.

The post IRAN – Dhjetëra nxënëse vriten në një shkollë, pas sulmit izraelito-amerikan appeared first on Agjencia Telegrafike Shqiptare.

KIEV, 28 shkurt /ATSH-DPA/ – Ukraina ka deklaruar sot mbështetje për popullin e Iranit, por jo për autoritetet e tij, pas sulmeve të ndërmarra nga Izraeli dhe Shtetet e Bashkuara ndaj objektivave në vendin e Lindjes së Mesme.

Ministria e Jashtme theksoi në rrjetin social X se udhëheqja iraniane kishte pasur “të gjitha mundësitë” për të shmangur një përshkallëzim të dhunshëm, por kishte injoruar mjetet diplomatike.

Në deklaratë thuhet se situata aktuale është pasojë e veprimeve të regjimit iranian, përfshirë, sipas Kievit, shkeljet e të drejtave të njeriut dhe mbështetjen për grupe të armatosura që kanë shkaktuar destabilitet në rajon, si dhe mbështetjen e Teheranit për luftën e Rusisë kundër Ukrainës që nga viti 2022.

Sipas njoftimeve,  Izraeli dhe SHBA-ja kryen një sulm të cilësuar si “parandalues” ndaj Iranit sot në mëngjes, vetëm dy ditë pas një raundi tjetër të dështuar bisedimesh mes Uashingtonit dhe Teheranit për programin e diskutueshëm bërthamor të vendit./ /Ad.Ab./  a.jor.

The post KIEV – Ukraina shpreh mbështetje për popullin iranian, por jo për autoritetet e regjimit appeared first on Agjencia Telegrafike Shqiptare.