Rikthehet masa e pezullimit për zv.kryeministren dhe ministren e Infrastrukturës dhe Energjisë, Belinda Balluku.

Pas 3 javësh shqyrtim, Gjykata Kushtetuese nuk arriti të marrë dot një vendim shumice për padinë e kryeministrit Edi Rama, duke rrëzuar kërkesën, për shkak se 8 gjyqtarët u ndanë në 4 pro dhe 4 kundër.

4 gjyqtarë, sipas vendimit, kërkuan ashtu si kryeministri që për masën e pezullimit të kërkohet dhënia e autorizimit paraprak nga Kuvendi, pasi për nga shkalla dhe intensiteti i saj prek funksionin kushtetues politik të ministrit dhe cenon ndarjen dhe balancimin e pushteteve.

4 të tjerët argumentuan se në masat për të cilat duhet kërkuar autorizim paraprak nga Kuvendi, nuk parashikohet masa ndaluese e pezullimit sipas Kodit të Procedurës Penale, edhe pse pranojnë se kjo masë në vetvete pamundëson ushtrimin e funksioneve të ministrit dhe ndërhyn edhe në veprimtarinë e Këshillit të Ministrave.

Kurse njëzëri, gjykata vlerësoi se ministri nuk e ka të garantuar imunitetin edhe pse është i zgjedhur nga qytetarët, pasi ministrat i nënshtrohen ligjit dhe mbahen përgjegjës nëse e shkelin atë.

Këtë vendim e komunikoi vetë kryetarja e Gjykatës Kushtetuese Fiona Papajorgji në një takim të mbyllur për mediat, pa praninë e anëtarëve të tjerë, duke refuzuar t’u përgjigjet pyetjes se cilët gjyqtarë votuan pro dhe cilët kundër padisë së kryeministrit.

Ndërkohë, në fund të vitit të kaluar, ishte po kjo Gjykatë Kushtetuese e cila pranoi padinë e kryeministrit për ta shqyrtuar, atëherë gjyqtarët u ndanë 5 me 3.

Por me këtë vendim 4-4, ku nuk u arrit shumicë numerike, Gjykata Kushtetuese në fakt i dha të drejtë Gjykatës së Posaçme për masën e pezullimit nga detyra të Belinda Ballukut, kurse qeverisë, ndonëse e rrëzoi, nuk i shpjegoi as se si mund të funksionojë ende normalisht me një zv.kryeministre dhe ministre të pezulluar.

Presidentja e Komisionit Evropian nuk ka marrë ende një vendim mbi zbatimin e përkohshëm të marrëveshjes së tregtisë së lirë me Mercosur.

Ursula von der Leyen është në parim pro, por është ende duke vlerësuar rreziqet e kësaj vendimi. Tema duhej të diskutohej dje në Paris me Emmanuel Macron, si dhe në samitin informal të krerëve të shteteve dhe qeverive javën e ardhshme.

Von der Leyen dëshiron të dijë cilët liderë e konsiderojnë zbatimin e përkohshëm të marrëveshjes Mercosur si një çështje ekzistenciale në planin e politikës së brendshme. Do të konsultohen liderët e Francës, Polonisë, Irlandës dhe Austrisë.

Në llogaritjen e rrezikut, von der Leyen duhet të marrë parasysh edhe Parlamentin Evropian, i cili, nëse do të rrëzonte ratifikimin, do ta dështonte përfundimisht marrëveshjen me Mercosur.

Megjithë presionet e kancelarit gjerman, Friedrich Merz, për zbatimin e përkohshëm, von der Leyen ka ende pak kohë për të përfunduar vlerësimet e saj.

Kërkohet një ratifikim nga një prej katër vendeve të Amerikës së Jugut (Brazili, Argjentina, Paraguaji dhe Uruguaji). Paraguaji pritet të jetë i pari pas disa muajsh.

Kryeministri i Izraelit, Benjamin Netanyahu, ka përdorur vëmendjen e ripërtërirë ndaj dosjeve Epstein për të sulmuar paraardhësin e tij Ehud Barak, duke deklaruar se Jeffrey Epstein “nuk ka punuar për Izraelin”.

E përditshmja The Jerusalem Post raportoi se lidhjet e ish-kryeministrit Barak me Epstein morën vëmendje të gjerë mediatike pasi të dy u takuan disa herë në vitet 2015 dhe 2016, vite pas dënimit të parë penal të Epsteinit.

Fotografi të qarkulluara në atë kohë tregonin Barakun duke hyrë në rezidencën e Epsteinit në Manhattan, New York.

Në komentin e tij të parë publik mbi dokumentet e Epsteinit, Netanyahu tha se “marrëdhënia e pazakontë dhe e ngushtë e Epsteinit me Ehud Barakun nuk sugjeron se Epsteini ka punuar për Izraelin, ajo provon të kundërtën”.

“I mbërthyer pas humbjes së tij zgjedhore nga më shumë se dy dekada më parë, Baraku prej vitesh ka tentuar në mënyrë obsesive të minojë demokracinë izraelite duke bashkëpunuar me të majtën radikale anti-sioniste në përpjekje të dështuara për të rrëzuar qeverinë izraelite të zgjedhur”, tha Netanyahu, duke iu referuar administratës së tij.

Netanyahu akuzoi Barakun se është angazhuar “në aktivitete publike dhe prapa skenave për të minuar qeverinë e Izraelit, përfshirë nxitjen e lëvizjeve masive të protestës, shkaktimin e trazirave dhe ushqimin e narrativave të rreme mediatike”. Ndryshe, Baraku prej vitesh ka qenë një kritik i zëshëm i Netanyahut dhe ka bërë thirrje të përsëritura për largimin e qeverisë.

Gjykata në Kishinjev dënoi tre persona për pjesëmarrje në një grup të organizuar kriminal, i cili gjatë vitit 2024 kishte përgatitur trazira të dhunshme masive në Moldavi dhe kishte organizuar trajnime në Bosnje e Hercegovinë dhe Serbi.

Sipas aktakuzës, trajnimet ishin organizuar dhe drejtuar nga persona nga Rusia, në bashkëpunim me shtetas moldavianë, me qëllim shkaktimin e trazirave në Moldavi, në prag të zgjedhjeve presidenciale dhe referendumit për anëtarësim në Bashkimin Evropian në vitin 2024.

Informacionet për “kampet ruse” në Bosnje e Hercegovinë u shfaqën në tetor të vitit 2024. Atëherë, agjencitë e sigurisë së Moldavisë deklaruan se kishin identifikuar më shumë se 100 të rinj, të cilët dyshohet se ishin trajnuar në Rusi, Bosnje e Hercegovinë dhe Serbi, për destabilizimin e vendit.

Gjykata në kryeqytetin e Moldavisë, më 6 shkurt, dënoi Aliona Gotcon dhe Ludmila Costencon me nga katër vjet e një muaj burgim, ndërsa Vladimir Harcevnicov u dënua me pesë vjet e katër muaj burgim.

Vendimi u mor në gjykatën e shkallës së parë, ndërsa të akuzuarit nuk ishin të pranishëm në shpalljen e dënimit. Gjykata urdhëroi arrestimin e tyre për t’i dërguar në vuajtje të dënimit, ndërsa aktgjykimi mund të ankimohet.

Në vendim thuhet se të akuzuarit kanë vepruar si pjesë e një strukture kriminale të qëndrueshme, nën koordinim nga Rusia, dhe kishin të ndara qartë rolet.

Sipas gjykatës, aktivitetet e tyre përfshinin rekrutimin e anëtarëve të rinj, mbështetje logjistike, sigurimin e pajisjeve, si dhe trajnime për veprime të dhunshme dhe destabilizuese.

Një pjesë e veçantë e aktgjykimit i referohet trajnimeve që, sipas gjetjeve të gjykatës, janë mbajtur jashtë territorit të Moldavisë, kryesisht në Bosnje e Hercegovinë dhe Serbi.

Gjykata thekson se të akuzuarit kanë qëndruar disa herë në Bosnje e Hercegovinë, përfshirë zonën e Gllamoqanit, ku kanë marrë pjesë në trajnime teorike dhe praktike.

Sipas aktgjykimit, këto trajnime përfshinin menaxhimin dhe përdorimin e avancuar të dronëve, lidhjen e tyre me qendrat komanduese, zbulimin ajror në kuadër të grupeve sulmuese, si dhe simulime të hedhjes së mjeteve shpërthyese me ndihmën e dronëve.

Përveç kësaj, në vendim thuhet se trajnimet kanë përfshirë edhe taktika për shkaktimin e panikut dhe kaosit, metoda për çarjen e kordonëve policorë, aktivitete diversant-subversive, si dhe përgatitjen e mjeteve ndezëse dhe shpërthyese.

Gjykata konstatoi se këto aktivitete ishin të lidhura drejtpërdrejt me planet për organizimin e trazirave të dhunshme në Moldavi.

Serbia përmendet në dokumentet gjyqësore si një nga vendndodhjet e qëndrimit dhe trajnimit, por edhe si vend transit në rrugën e të akuzuarve drejt Bosnje e Hercegovinës.

Në aktgjykim thuhet se koordinatori i grupit qëndronte në Rusi, nga ku u jepte udhëzime anëtarëve, ndërsa trajnimet dhe aktivitetet praktike zhvilloheshin në Bosnje e Hercegovinë dhe Serbi.

Sipas gjetjeve të gjykatës, të akuzuarit udhëtonin në itinerarin Moldavi-Serbi-Bosnje e Hercegovinë, ndërsa gjatë hetimeve janë gjetur prova materiale që tregojnë qëndrimin e tyre në të dyja vendet.

Ndër to janë kartëmonedha nga Serbia dhe Bosnje e Hercegovina, karta SIM, pajisje telekomunikimi, si dhe regjistrime digjitale të krijuara gjatë qëndrimit në kampet e trajnimit.

Gjykata në aktgjykim thekson gjithashtu se gjatë bastisjeve te të akuzuarit janë gjetur pjesë për dronë, syze VR, telekomandë, bateri, pajisje për ruajtjen e dokumenteve dhe materiale digjitale që, sipas gjykatës, dokumentojnë trajnimet dhe aktivitetet e planifikuara.

Regjistrimet digjitale përfshijnë fotografi dhe video të realizuara gjatë trajnimeve, si dhe udhëzime për përdorimin e dronëve dhe përgatitjen e mjeteve ndezëse dhe shpërthyese.

Gjatë gjykimit, të akuzuarit e kanë mohuar fajësinë, duke pretenduar se nuk ishin të vetëdijshëm për karakterin penal të aktiviteteve në të cilat kishin marrë pjesë dhe se qëndrimet jashtë vendit i kishin konsideruar si angazhime private ose profesionale.

Gjykata, megjithatë, nuk i pranoi këto pretendime, duke përfunduar se provat e mbledhura tregojnë ekzistencën e një qëllimi të qartë dhe koordinimi brenda grupit kriminal.

Ngritje e aktakuzave të reja

Gjatë zhvillimit të gjykimit, Prokuroria e Moldavisë ngriti aktakuzë edhe ndaj disa personave të tjerë të lidhur me trajnimet për nxitjen e trazirave.

Po ashtu, policia në Serbi arrestoi më 26 shtator të vitit të kaluar dy persona, nën dyshimet se kishin organizuar trajnime luftarako-taktike për shtetas të Moldavisë dhe Rumanisë, me qëllim nxitjen e trazirave në Moldavi.

Arrestimet pasuan pasi autoritetet në Kishinjev paralajmëruan publikisht për ekzistencën e kampeve luftarake në Serbi, duke deklaruar se ato ishin organizuar nga shërbimi sekret rus me synim destabilizimin e Moldavisë.

Në fillim të dhjetorit të vitit 2025, Moldavia kreu rreth 50 bastisje në disa lokacione në vend dhe gjeti prova se një grup i organizuar, i trajnuar më herët në një kamp në Serbi, dyshohet se kishte planifikuar të shkaktonte trazira në Moldavi./REL

Read More...

Hapja e Lojërave Olimpike Dimërore “Milano Cortina 2026” u shënua nga një moment simbolik për Shqipërinë, teksa flamuri kuqezi u valëvit në stadiumin legjendar “San Siro”.

Kryeministri Edi Rama theksoi praninë shqiptare në këtë event madhor sportiv dhe u uroi suksese sportistëve Lara, Denni, Lisa dhe Semir, që përfaqësojnë vendin në arenën olimpike dimërore.

“Flamuri kuqezi valëvitet në “San Siro”, në hapjen e Lojërave Olimpike Dimërore, Milano Cortina 2026.  Suksese Lara, Denni, Lisa dhe Semir!”, ka shkruar Rama.

Presidenti i Republikës së Shqipërisë, Bajram Begaj, ka marrë pjesë në ceremonitë zyrtare të hapjes së Lojërave Olimpike Dimërore Milano–Cortina 2026, me ftesë të Presidentit të Republikës Italiane, Sergio Mattarella.

Kreu i shtetit e ka cilësuar këtë ngjarje si një moment krenarie dhe përfaqësimi dinjitoz për Shqipërinë, ndërsa ka shprehur mbështetjen dhe urimet e tij për sportistët shqiptarë Lara Colturi, Lisa Brunga, Semire Dauti dhe Denni Xhepa, duke u dëshiruar suksese dhe paraqitje sa më të denja në arenën olimpike.

“I nderuar që së bashku me miq te mirë u mikpritëm nga Presidenti i Republikës Italiane, Sergio Mattarella në ceremonitë zyrtare të hapjes së Lojërave Olimpike Dimërore Milano- Cortina 2026.

Ky është një moment krenarie dhe përfaqësimi dinjitoz për vendin tonë.

Uroj që sportistët tanë – Lara Colturi, Lisa Brunga, Semire Dauti dhe Denni Xhepa – të na bëjnë krenarë me paraqitjen dhe shpirtin e tyre garues. Forca Shqipëri!”, tha Presidenti Begaj.

Njerëzit në Korenë e Veriut po ekzekutohen sepse kanë parë Squid Game.

Qytetarët gjithashtu përballen me vrasjen për dëgjimin e K-pop, një zhanër muzikor i Koresë së Jugut që përfshin grupe si BTS.

Dëshmitë u zbuluan nga Amnesty International pas kryerjes së 25 intervistave të hollësishme me të arratisurit që kanë ikur nga shteti i drejtuar nga regjimi i Kim Jong-un .

Të arratisurit thanë se shikimi i dramave të njohura të Koresë së Jugut si “Squid Game”, “Crash Landing on You” dhe “Descendants of the Sun”, mund të çojë në pasojat më ekstreme, përfshirë vdekjen.

Një i intervistuar tha se kishte dëgjuar nga një i arratisur me lidhje familjare se si njerëz, përfshirë nxënës të shkollës së mesme, ishin ekzekutuar për shkak se kishin parë Squid Game.

Një tjetër ekzekutim u dokumentua më parë nga Radio Free Asia në vitin 2021, shkruan skynews.

“Të marra së bashku, këto raporte sugjerojnë ekzekutime të shumta që lidhen me serialin”, tha Amnesty në një deklaratë.

Të intervistuarit përshkruan gjithashtu rreziqet e dëgjimit të muzikës së huaj, veçanërisht K-pop nga Koreja e Jugut, ku në dëshminë e tyre u përmend edhe grupi i njohur BTS.

Në vitin 2021, The Korea Times raportoi se një grup adoleshentësh u kapën dhe u hetuan për dëgjimin e grupit.

Choi Suvin, i cili iku nga Koreja e Veriut në vitin 2019, tha se njerëzit shisnin shtëpitë e tyre për të shmangur ndëshkimin.

“Njerëzit kapen për të njëjtin akt, por dënimi varet tërësisht nga paratë”, tha 39-vjeçari.

“Njerëzit pa para shesin shtëpitë e tyre për të mbledhur 5,000 ose 10,000 dollarë për të paguar për të dalë nga kampet e riedukimit”, shtoi ai.

Kjo pabarazi u dëshmua më tej nga rasti i Kim Joonsik, i cili u kap tre herë duke parë drama të Koresë së Jugut, por i shpëtoi ndëshkimit sepse familja e tij kishte lidhje.

Në fund të viteve 2010, vajzat u dënuan me dënime me vite në kampet e punës së Koresë së Veriut, sepse familjet e tyre nuk mund të përballonin të paguanin.

Sarah Brooks, zëvendësdrejtoreshë rajonale në Amnesty, tha: “Këto dëshmi tregojnë se si Koreja e Veriut po zbaton ligje distopike që nënkuptojnë se shikimi i një shfaqjeje televizive të Koresë së Jugut mund t’ju kushtojë jetën – përveç nëse keni mundësi të paguani”.

“Njerëzit që përpiqen të mësojnë më shumë rreth botës jashtë Koresë së Veriut, ose kërkojnë argëtim të thjeshtë nga jashtë shtetit, përballen me ndëshkimet më të ashpra”, shtoi ajo.

Sipas Aktit të Mendimit dhe Kulturës Anti-Reaksionare të Koresë së Veriut të vitit 2020, përmbajtja e Koresë së Jugut është “e quajtur ideologji e kalbur që paralizon ndjenjën revolucionare të popullit”.

Ata që kapen duke konsumuar media të tilla përballen me pesë deri në 15 vjet punë të detyruar sipas këtij akti, me dënime më të rënda – përfshirë vdekjen – për shpërndarjen e tyre ose organizimin e shikimeve në grup.

Shumica e të intervistuarve ishin të moshës midis 15 dhe 25 vjeç kur u arratisën. Largimi më i fundit kishte ndodhur në qershor 2020, me 11 të tjerë që ishin larguar midis viteve 2019 dhe 2020.

Arratisjet kanë qenë të rralla që nga viti 2020, kur mbylljet e kufijve për shkak të COVID-19 e izoluan vendin nga bota e jashtme.

Drejtoresha e Shoqatës Kombëtare të Bashkive, Adelina Farrici, e ftuar në emisionin “Sheshi i Dollarit” në ABC News, ka theksuar rëndësinë e reformës territoriale dhe nevojën urgjente për konsensus politik.

Ajo u ndal te tre shtyllat kryesore të reformës, elementi territorial, përmirësimi i shërbimeve dhe efiçenca ekonomike, duke nënvizuar se autonomia financiare e bashkive mbetet thelbësore. Farrici vlerësoi faktin që të dyja krahët e politikës do të ulen në tryezë, duke theksuar se koha është e kufizuar dhe se mosmarrëveshjet politike, si në reformën e vitit 2014, nuk duhet të përsëriten.

Sipas saj, konsultimi politik dhe ekonomik synon arritjen e një konsensusi që do t’i hapë rrugë zhvillimit ekonomik lokal, rritjes së investimeve dhe përmirësimit të të ardhurave për qytetarët.

“Elementi i parë është elementi territorial, elementi i dytë është përmirësimi i shërbimi dhe elementi i tretë është efiçenca ekonomike, nuk duhet të harrojmë dhe autonominë financiare. Është gjë shumë e mirë që të dyja krahët e politikës do të jenë në tavolinë, Nuk duhet që të humbasim më shumë kohë. Koha është shumë e limituara.

Konsensusi politik është shumë e rëndësishme. Një nga problematikat që kishte reforma e vitit 2014 ishte fakti që pati një braktisje nga njëra prej palët politike. Do të jetë një konsultim në nivel politik, ekonomik të cilat do të çojnë më pas në konsensus. Një nga objektivat kryesore të kësaj strategjie është që bashkitë të marrin zhvillim ekonomik lokal. Kjo kërkon burime natyrore dhe njerëzore të shtuara, në mënyrë që t’i gjenerosh politika dhe që çdo investitor të jetë i garantuar, për të nxitur zhvillimin ekonomik lokal. Zhvillimi ekonomik lokal do të sjellë më shumë të ardhura për qytetarët”, tha Farrici.

Drejtoresha e Shoqatës Kombëtare të Bashkive, Adelina Farrici, ka deklaruar se reforma territoriale e vitit 2014 ka sjellë si përmirësime të ndjeshme, ashtu edhe problematika që kërkojnë rishikim, veçanërisht në drejtim të pabarazive rajonale dhe shpërndarjes së shërbimeve.

E ftuar në emisionin “Sheshi i Dollarit” në ABC News, Farrici theksoi se pas 12 vitesh nga zbatimi i reformës janë evidentuar sfida të rëndësishme, duke nënvizuar nevojën për një trajtim më të barabartë të bashkive në aspektin financiar, të shërbimeve dhe të demokracisë lokale.

“Në vitin 2014 u ballafaquam me një reformë të thellë territoriale që kishte ambiciet e saj. 12 vite ishin të mjaftueshme për të parë problematikat dhe sfidat. Reforma 2014 nuk duhet të shihet bardhe e zi, pati shumë gjëra pozitive. Kemi përmasime të ndjeshme në shërbime, në anën financiare,  në burimet njerëzore në bashki. Por, kemi edhe elemente të tjera, siç është pabarazia në rajone të ndryshme. Kemi bashki që janë totalosht të varura nga grandi shoqëror, kemi bashki që nuk kanë mundësi, kemi dhe bashki që kanë një lloj autonomie.

Problematika kryesore që duhet të diskutohet është shpërndarja e shërbimeve në mënyrë të barabartë në të gjithë territorin e vendit. Mirëpo bashkitë nuk shihen vetëm si institucione shërbimi. Edhe elementi i demokracisë lokale është një element shumë pozitiv, ka të bëjë me përfaqësinë, a janë të mirëpërfaqësuar. Është një element që duhet të adresohet”, tha Farrici.

Irani nuk ka pranuar të heq dorë nga programi I tij për pasurim të Uraniumit që mund të sjell prodhimin e armëve bërthamore, por Shtetet e Bashkuara duan që të vijojnë negociatat.

Ky ishte përfundimi i ditës së parë të bisedimeve mes Teheranit dhe Ëashingtonit sipas asaj që raporton media Amerikenae Axios. Përpjekjet diplomatike dhe ulja e palëve në tryezën e negociatave vjen teksa Shtetet e Bashkuara kanë zhvendosur një armadë të madhe në Lindjen e Mesme në gatishmëri për të sulmuar Iranin. Teherani ka paralajmëruar se një lëvizje e tillë do të sillte një luftë më të gjërë rajonale.

Ministri i Jashtëm iranian, Abbas Araghchi, deklaroi për televizionin shtetëror pas përfundimit të bisedimeve se negociatorët do të kthehen në kryeqytetet e tyre për konsultime, duke e cilësuar takimin si “një fillim të mirë”.

Teherani kishte deklaruar më parë se bisedimet do të kufizoheshin vetëm në programin bërthamor të Iranit. Ndërkohë, Uashingtoni ka kërkuar që në tryezë të përfshihen edhe programi i raketave balistike të Iranit dhe mbështetja që ai u jep grupeve të armatosura në rajon.

Bisedimet mes Shteteve të Bashkura dhe Iranit ishin në strukturën që njihet si bisedime indirrekte. Ministri i Jashtëm I Omanit ishte ai që bisedo me secilën pale vec e veç duke përçuar tek secila prej tyre mesazhet e njëri tjetrit. Irani u përfaqësua në këto bisedime nga Ministri I jashtëm Abas Aragchi ndërsa Shtetet e Bashkuara nga I Dërguari special për Lindjen e Mesme Steve Ëitkoff si dhe nga Jared Kushner, dhëndrri I presidentit Trump.

Raundi i fundit i bisedimeve mes SHBA-së dhe Iranit për programin bërthamor ishte planifikuar për në qershor të vitit të kaluar, por u ndërpre pas sulmit të papritur të Izraelit ndaj Iranit. Sipas analistëve ushtarak , për udhëheqjen iraniane këto bisedime mund të përbëjnë shansin e fundit për të shmangur një veprim ushtarak amerikan që mund të destabilizojë më tej regjimin, i cili ndodhet në pozitën më të dobët që nga Revolucioni Islamik i vitit 1979.

Franca ka hapur një konsullatë në kryeqytetin e Grenlandës, Nuuk, duke forcuar praninë e saj diplomatike në Arktik dhe duke mbajtur premtimin e bërë nga presidenti Emmanuel Macron gjatë vizitës së tij në ishull qershorin e kaluar.

Duke vepruar kështu, Franca bëhet vendi i parë i BE-së që hap një konsullatë të përgjithshme në Grenlandë, përpara partnerëve të saj në bllokun me 27 anëtarë.

Megjithatë, Brukseli është tashmë i përfaqësuar në ishull, pas hapjes së një zyre të Komisionit Evropian në vitin 2024.

Jean-Noël Poirier, ish-ambasadori francez në Vietnam, e mori detyrën me mbërritjen në Nuuk, ku do të përfaqësojë Francën në këtë territor gjysmë-autonom danez me rreth 56,000 banorë.

Deri më tani, shtetasit francezë që jetonin në Grenlandë mbështeteshin në një marrëveshje të kufizuar konsullore.

Një konsulle nderi, Kristine Winberg, merrej me procedurat themelore administrative dhe asistencën konsullore në emër të ambasadës franceze në Danimarkë.

Roli i saj përfshinte lëshimin e dokumenteve të identitetit, ofrimin e mbështetjes në rastet e çështjeve ligjore ose vdekjeve, dhe veprimin si një lidhje me komunitetin e vogël francez, sipas transmetuesit francez BFM TV.

Një burim diplomatik tha se vetëm “tetë qytetarë francezë janë të regjistruar në Nuuk, por ndoshta rreth 30 jetojnë në Grenlandë”.

Megjithatë, pavarësisht madhësisë së vogël të popullsisë franceze në ishull, konsullata e re do të ketë përgjegjësi të zgjeruara.

Përveç ofrimit të mbështetjes administrative për shtetasit francezë, do të punohet “për të thelluar projektet ekzistuese të bashkëpunimit me Grenlandën në fushat kulturore, shkencore dhe ekonomike, duke forcuar njëkohësisht lidhjet politike me autoritetet lokale”, sipas një deklarate të publikuar nga ministria e jashtme.

Parisi thotë se qëllimi është të forcohen lidhjet midis Grenlandës, Francës dhe BE-së në një rajon që është bërë burim mosmarrëveshjesh të konsiderueshme midis Evropës dhe SHBA-së, mes kërkesave të përsëritura të presidentit të SHBA-së Donald Trump që Uashingtoni të marrë kontrollin e territorit që është pjesë e Mbretërisë së Danimarkës.

Analisti politik Martin Leka, i ftuar në emisionin “Tirana Live” në ABC News, ka komentuar zhvillimet e fundit brenda Partisë Demokratike, duke u ndalur veçanërisht te përjashtimi i Dash Sulës nga gara elektorale dhe situata e përgjithshme e opozitës.

Sipas Lekës, mënyra se si PD ka trajtuar figura të votuara dhe me mbështetje në bazë përbën një “tragjedi-komedi” për partinë, në një kohë kur ajo nuk ka luksin të mënjanojë vlera të tilla. Ai theksoi se kryeministri Rama po tregohet më largpamës politikisht, ndërsa opozita, e drejtuar nga Sali Berisha, ndodhet në krizë të thellë dhe e përçarë, duke mos arritur të trondisë mazhorancën. Leka vlerësoi gjithashtu takimet e Ervin Salianjit si pozitive, duke nënvizuar se ato kanë ekspozuar ndarjet e forta në bazën e PD-së.

“Nuk e kuptuam asnjëherë se për çfarë arsye Dash Sula u shmang nga PD. Unë ende nuk e di se për çfarë u përjashtua si kandidat edhe nga listat e mbyllura, por edhe të hapura edhe pse mori një shumë votash dhe doli më i votuari në qarkun e Elbasanit. Një gjë e tillë, është një tragjedi-komedi për PD. Në këtë situatë ku ndodhet PD nuk e ka aspak luksin që të tilla vlera në PD t’i mënjanojë dhe të bëjë sikur nuk ka ndodhur asgjë.

Rama po luan politikë, është më largpamës se kundërshtari.  Duhen parë me kujdes partitë e vogla. Ne jemi në kushtet që kemi një hall më të madh se sa qeverisja, kemi hallin e opozitës, ku në krye është Sali Berisha, një ‘non grata’. Opozita normale mund të kushte tronditur mazhorancën. Duhet të kthehemi pas në kohë dhe të kuptojmë se si është një parti nën drejtimin e Sali Berishës, një parti brutaliteti dhe dhune. Mund të kenë shumë gjëra në PD, përveç “kalit të Trojës”, Berisha. Takimet e Salianjit janë një akt për t’u përshëndetur, mbledh njerëz kudo ku shkon. Baza e PD-së është shumë e ndarë në këtë periudhë. Salianji ka prekur thembrën e Akilit në PD”, tha Leka.

BE-ja ka njoftuar propozimet për paketën e saj të 20-të të sanksioneve kundër Rusisë, që mbulojnë energjinë, shërbimet financiare dhe tregtinë.

Ajo përfshin një ndalim të plotë të shërbimeve detare për naftën bruto ruse, si dhe shtimin e 43 anijeve të tjera pjesë e të ashtuquajturës ‘flotë në hije’ të Kremlinit, njoftoi presidentja e Komisionit Evropian Ursula von der Leyen.

Një ndalim i ri për mallrat dhe shërbimet do të shtrëngojë kufizimet e eksportit që vijnë nga Rusia, ndërsa ndalimet e reja të importit për metalet, kimikatet dhe mineralet kritike do të vlejnë më shumë se 570 milionë euro.

Do të merren masa gjithashtu kundër kompanive dhe platformave që mundësojnë tregtinë e kriptomonedhave dhe do të listohen 20 banka të tjera rajonale ruse në listën e sanksioneve.

“Rusia do të ulet në tryezën e bisedimeve vetëm me qëllim të sinqertë nëse i bëhet presion ta bëjë këtë. Kjo është e vetmja gjuhë që Rusia e kupton. Kjo është arsyeja pse po bëjmë një hap përpara sot”, tha von der Leyen.

Ndryshe, propozimi duhet të miratohet nga 27 shtetet anëtare të BE-së përpara se të hyjë në fuqi zyrtarisht. Paketa e 19-të e sanksioneve të bllokut – e cila synonte flotën e saj në hije dhe ndaloi importet e gazit natyror të lëngshëm – hyri në fuqi në nëntor.

Ismail Tasholli, organizator, “Liria ka emer” ka bërë thirrje për mobilizim mbarëkombëtar më 17 shkurt në Prishtinë, në kuadër të një proteste për lirimin e ish-krerëve të UÇK-së.

Duke folur në emisionin “Balkan Update” në ABC News, Tasholli deklaroi se Gjykata Speciale në Hagë ka humbur besueshmërinë e saj, duke e cilësuar atë si një institucion me prapavijë politike, mungesë transparence dhe elemente të qasjes totalitare në trajtimin e çështjeve ndaj ish-drejtuesve të UÇK-së.

Ai theksoi se protesta synon të evidentojë, sipas tij, padrejtësitë e kësaj gjykate dhe të kërkojë drejtësi, jo vendimmarrje politike.

 “17 shkurti të jetë e Shqipërisë. Të gjithë shqiptarët ngado që janë, janë të ftuar që të jenë në Prishtinë për të marrë pjesë për protestën për lirimin e ish-krerëve të UÇK-së. Ajo gjykatë ka kohë që ka premisa politikë, që nga fakti se si ata kanë marrë vendimet. Raporti asimetrik se si është ndërtuar ndaj qytetarëve, që ajo gjykatë është e bunkerizuar dhe ka hequr bazën, transparencën. Ne si qytetari do të krijojmë mundësinë që të evidentojmë padrejtësinë dhe për t’i stopuar.

Mënyra aludive e fajit i ka vendosur në totaliratet. Gjykata është e rrethuar në dyshime. Mënyra se si janë trajtuar krerët e UÇK-së, na ka dhënë shenja që ata janë brenda habitatit totalitar. Asnjë qytetar nuk u frikësohet vendimeve totalitare. Gjykata e Hagës e ka humbur pikënisjen e saj. Kanë përdoru çdo gjë për të dhënë pretendime propagandistike. Drejtësi, jo politikë në datën 17 shkurt, në Prishtinë”, tha Tasholli.

Është një fitore e vonuar, por me ndikim të fortë politik dhe institucional, ajo që arriti dje Carles Puigdemont së bashku me dy ish-eurodeputetë të tjerë katalanas. Gjykata e Drejtësisë e Bashkimit Europian anuloi përfundimisht vendimin e Parlamentit Europian për heqjen e imunitetit parlamentar të Puigdemont, Toni Comín dhe Carla Ponsatí.

Sipas gjyqtarëve në Luksemburg, emërimi i raportuesit të ngarkuar me kërkesat për heqjen e imunitetit ishte në kundërshtim me parimin e paanshmërisë.

Rasti ka lidhje të forta me lojërat politike spanjolle brenda Parlamentit Europian. Partia Popullore Europiane, nën presionin e Partido Popular, kishte organizuar emërimin e një eurodeputeti të partisë ekstremiste nacionaliste VOX si raportues, pa hasur rezistencë nga grupi i Socialistëve & Demokratëve, i kryesuar nga socialistja spanjolle Iratxe García Pérez.

Gjykata thekson se, duke qenë se VOX ishte në origjinë të procedimit në Spanjë ndaj Puigdemont dhe të tjerëve për referendumin e vitit 2017 mbi pavarësinë e Katalonjës, raportuesi nga VOX mund të perceptohej si i paanshëm.

Ky vendim përbën një goditje jo vetëm për nacionalizmin spanjoll, por edhe, dhe mbi të gjitha, për përdorimin politik të procedurave të imunitetit në Parlamentin Europian.

Nga blu në rozë.

Ish deputeti i PD, Dashnor Sula, është emëruar kryeinspektor i përgjithshëm me vendim të Këshillit të Ministrave.

Sula do të zvëndësojë në këtë post Shkëlqim Hajdarin, i cili është emëruar prefekt i qarkut të Tiranës.

Distancimi i Sulës me Partinë Demokratike nisi në zgjedhjet parlamentare të 11 majit, pasi Sali Berisha, nuk e përfshiu në listën e deputetëve edhe pse Sula fitoi primaret në Elbasan si kandidati më i preferuar nga demokratët.

Më pas Sula bëri një tentativë për t’iu bashkuar koalicionit Lapaj-Shabani, por dhe aty, aventura zgjati vetëm 24 orë.

Derën për të zhgënjyerin e radhës së Berishës, Edi Rama e hapi që në muajin mars, kur nga Elbasani, e ftoi ti bashkohet por Sula refuzoi të angazhohej në zgjedhjet e 11 majit.

“Kjo është partia jonë, e mbajmë derën mbyllur nëpër territore por sot jemi këtu për t’ju thënë këtu mirësevini përveç salamandrave dhe kukumjaçkave të kënetës nuk kanë vend. Kurse Dash Sula …duhet të dezinfektohet. Po duhet të heqë morrat e kënetës. Aty të mbyt morri, është tmerr”, tha Rama.

Por nga krahu tjetër, megjithëse e la jashtë listave, një gjysmë derë të hapur e la dhe Berisha për të kontribuar në partinë demokratike.

Por kur po mbushet viti nga krisja me Berishën dhe ftesa e Ramës, Sula, tashmë e ka të qartë të ardhmen.

Ai do të mbajë postin e kryeinspektorit të përgjithshëm, duke ndarë përfundimisht rrugët me Partinë Demokratike.

Kështu, Sula, është rasti i fundit I dhjetërave demokratëve të mërzitur të cilët vendosin ti bashkohen Ramës duke marrë poste të larta nga qeveria socialiste.  Pak muaj më parë, një tjetër ish deputete demokrate, Zheni Gjergji, pranoi ofertën e qeverisë për të drejtuar spitalin rajonal të Elbasanit.

Pak ditë pasi u rrëzua  kërkesa, për verifikimi ndaj gjyqtares së Gjykatës së Posaçme, Irena Gjoka lidhur me mosdeklarimin e një dënimi të dhënë nga Greqia në vitin 2005, një prej anëtarëve të Këshillit të Lartë Gjyqësor, Klodian Kurushi, ka bërë dorëzuar, në Inspektoratin e Lartë të Drejtësië, një ankesë me objekt fillimin e hetimit për shkelje ndaj magjistrates.

Deri në këtë fazë, mësohet se Inspektori i Lartë i Drejtësisë, ka nisur verifikimet e kësaj ankese, ligjshmëria e saj dhe nëse meriton apo jo të merret në shqyrtim. Më 30 janar, 6 anëtarë të Këshillit të Lartë Gjyqësor, votuan kundër një projektvendimi që e çonte çështjen në Komisionin e Karrierës, me argumentin se vendimmarrja i takon Inspektorit të Lartë të Drejtësisë.

Vetë magjistratja Gjoka në një letër që i ka dërguar Këshillit të Lartë gjyqësor, shprehet e bindur se nuk ka bërë asnjë shkelje kur nuk e ka deklaruar në formularin e dekriminalizimit vendimin e Gjykatës së Janinës së korrikut 2005. Ajo shpjegon se vetëm i është refuzuar pa shpjegime hyrja në territorin grek, ndërsa nuk ka patur dijeni as për procesin dhe as vendimin gjyqësor, i cili sipas vetë ligjeve greke është arkivuar dhe asnjëherë nuk mori vendim të formës së prerë. Po për këto arsye ajo deklaron se nuk është në kushtet ligjore ku funksioni i saj si gjyqtare, mund të vihet në dyshim.

Ndërkohë për sa i përket anëtarët të KLGJ, Klodian Kurushi, ai ishte një prej 6 anëtarëve që votuan kundër verifikimi ndaj gjyqtares së Gjykatës së Posaçme, dhe pro mendimit që çështjen duhet ta verifikonte Inspektorati i Lartë i Drejtësisë.

Klodian Kurushi, i është bashkuar Këshillit të Lartë Gjyqësor në fund të vitit 2021, ndërsa më herët ka qenë gjyqtar në Gjykatën e Posaçme, në Gjykatën e Krimeve të Rënda, ndërsa fillimet I ka pasur në Gjykatën e Sarandës.

Për sa i përket kontributit që Klodian Kurushi ka në sistemin në drejtësi, ndër çështjet që ai ka gjykuar, është ajo e Suel Celës, gjatë kohës kur ishte tek Krimet e Rënda.  Klodian Kurushi ishte kryesuesi i trupës gjyqësores, tek Krimet e Rënda, që shpalli të pafajshëm Suel Çelën për goditjen me një makinë të blinduar të punonjësve të policisë në shtator 2017 në Elbasan. Ndërkohë në një tjetër gjyq të bujshëm që ai ka marrë pjesë si trupë Gjykuese, është ajo e vitit 2015.

Klodian Kurushi dhe 4 gjyqtarë të tjerë, firmosën pafajësi për  Arben Frrokut i cili ishte personi  i akuzuar për vrasjen e kryepolicit Dritan Lamaj. Pavarësisht se Shkalla e Parë e shpalli të pafajshëm, me të njëjtat prova, Gjykata e Shkallës së Dytë ajo e Apelit vendosi burg të përjetshëm për Arben Frrokun. Po ashtu Klodian Kurushi tek krimet e Renda ka qenë pjesë edhe e trupës gjykues të Izet Haxhise.

Presidenti i Ukrainës, Volodymyr Zelensky, ka deklaruar se raundi i ardhshëm i bisedimeve të paqes me Rusinë mund të mbahet në SHBA.

Zelensky në platformën Telegram tha se “takime të mëtejshme janë planifikuar për të ardhmen e afërt, me gjasë në Amerikë”.

“Sot mora një raport nga ekipi ynë negociator pas dy ditësh takimesh dhe bisedimesh në Emirate me palën amerikane dhe atë ruse. E pres ekipin në Kiev për një raport të plotë. Shumë aspekte nuk mund të diskutohen në telefon. Nga ajo që tashmë mund të thuhet, takime të mëtejshme janë planifikuar për të ardhmen e afërt, me gjasë në Amerikë”, shkroi ai.

Zelensky rikonfirmoi gatishmërinë e Ukrainës për t’u angazhuar në formate “që realisht e afrojnë paqen dhe e bëjnë atë të besueshme dhe afatgjatë, duke ia hequr Rusisë çdo oreks për të vazhduar luftën”.

“Është e rëndësishme që kjo luftë të përfundojë në një mënyrë që Rusia të mos shpërblehet për agresionin e saj. Ky është një nga parimet kyçe që rikthen dhe garanton siguri të vërtetë. I falënderoj të gjithë partnerët tanë që na mbështesin në këtë”, tha ai.

Të mërkurën dhe të enjten, Rusia, Ukraina dhe SHBA-ja zhvilluan një takim dyditor për zgjidhjen e çështjes ukrainase në kryeqytetin Abu Dhabi të Emirateve të Bashkuara Arabe.

Në përfundim, palët ranë dakord të kryejnë shkëmbimin e parë të robërve të luftës pas pesë muajsh, i cili u realizua menjëherë.

Një komunikatë e përbashkët mbi rezultatet e takimit i përshkroi diskutimet si “konstruktive” dhe “të përqendruara në mënyra për të krijuar kushtet për arritjen e një paqeje të qëndrueshme”.

Kurora e Mbretëreshës Eugenie, bashkëshortes së Napolonit III, një prej thesarëve më të çmuar të Luvrit, u gjet e shtypur pas grabitjes spektakolare që tronditi muzeun më 19 tetor të vitit të kaluar.

Megjithëse grabitësit vodhën bizhuteri me vlerë rreth 88 milionë euro (£76 milion, $104 milion), kurora e dekoruar me diamante mbeti pas, e dëmtuar, por sipas muzeut është gati e paprekur dhe mund të rikthehet në gjendjen e saj origjinale.

Fotografitë e para të publikuara nga muzeu tregojnë se kurora ishte lënë “shumë e deformuar”, pasi grabitësit përpiqeshin ta nxirrnin nga një vrimë e ngushtë në vitrinën e saj prej qelqi. Kurora ka humbur një nga tetë shqiponjat prej ari që e zbukuronte, por ruan 56 smeralde dhe pothuajse të gjitha diamantet e saj (vetëm 10 nga 1,354 diamantet mungojnë). Sipas muzeut, rikthimi do të bëhet pa nevojën për rindërtim, duke ruajtur kështu pamjen dhe strukturën origjinale të shekullit XIX.

Rikthimin e kurorës do ta mbikëqyrë një komitet ekspertësh i udhëhequr nga presidentja e Luvrit, Laurence des Cars, që do të sigurojë se çdo detaj historik do të rikthehet me kujdes maksimal. Grabitja e tetorit të kaluar ishte mjeshtërisht e planifikuar. Grabitësit përdorën një ngritës mekanik të vjedhur për të hyrë në Galerinë e Apollonit përmes një ballkoni pranë lumit Sena.

Ngjarja tronditi jo vetëm muzeun, por edhe publikun ndërkombëtar, duke nxjerrë në pah pasurinë e jashtëzakonshme të Luvrit dhe rrezikun që i kanoset objekteve të rralla historike. Kurora e Mbretëreshës Eugenie mbetet një simbol i madhështisë dhe elegancës franceze të shekullit XIX, dhe rikthimi i saj i plotë do të jetë një fitore e madhe për trashëgiminë kulturore dhe për muzeun më të vizituar në botë.