DUBAI, 3 shkurt /ATSH-AA/ – Samiti Botëror i Qeverive 2026 filloi në Dubai të Emirateve të Bashkuara Arabe (EBA) të martën nën temën “Formësimi i Qeverive të së Ardhmes”, duke shënuar pjesëmarrjen më të madhe ndërkombëtare në historinë e këtij eventi.

Samiti tre-ditor, që do të zhvillohet midis 3 dhe 5 shkurtit, bashkon më shumë se 6.250 vendimmarrës dhe ekspertë, duke përfshirë mbi 60 krerë shtetesh dhe qeverish dhe zëvendësit e tyre, më shumë se 500 ministra dhe përfaqësues nga mbi 150 qeveri, raportoi agjencia shtetërore e lajmeve WAM.

Kjo shënon pjesëmarrjen më të madhe të lidershipit në këtë event deri më sot që nga themelimi i tij në vitin 2013.

Pjesëmarrësit pritet të diskutojnë trendet globale, të adresojnë sfidat globale dhe të eksplorojnë rolin e qeverive në formësimin e zhvillimit të qëndrueshëm të komunitetit.

Edicioni i këtij viti do të përfshijë çmime në katër kategori: Çmimin e Ministrit më të Mirë, Çmimin Global të Qeverisë më të Reformuar, Çmimin Ndërkombëtar të Praktikave më të Mira të Dubait për Zhvillim të Qëndrueshëm dhe Çmimin Global të Mësuesit.   /os/

The post DUBAI – Nis punimet Samiti Botëror i Qeverive 2026 appeared first on Agjencia Telegrafike Shqiptare.

SARAJEVË, 2 shkurt /ATSH-ANSA/ – Nëse Sekretari i Përgjithshëm i OKB-së deklaron se Groenlanda ka të drejtën e vetëvendosjes, atëherë e njëjta gjë vlen edhe për Republikën Serbe, theksoi Milorad Dodik, ish-president i entitetit serb të Bosnjës dhe Hercegovinës (RS).

Në një intervistë me stacionin televiziv serb të Bosnjës RTRS, Dodik, tani nominalisht udhëheqës i partisë së tij nacionaliste, SNSD, përsëriti se qëllimi i tij kryesor është një Republika Serbe e pavarur.

‘’Ky qëllim nuk është zhdukur dhe unë dua ta arrij atë përmes një procesi politik paqësor, duke përfituar nga momentumi ndërkombëtar që po zhvillohet’’, shton ai.

Sipas tij, “Republika Serbe, sapo të shpallet pavarësia, do të njihet nga 15 vende brenda pak ditësh”.

Dodik u takua sot në Beograd me presidentin serb Aleksandar Vuçiç, me të cilin diskutoi problemet më të rëndësishme rajonale dhe bashkëpunimin midis Beogradit dhe Banja Lukës.

“Armiqtë e Republikës Srpska janë në Sarajevë dhe midis elitave perëndimore. Do të duhet të vlerësojmë mundësinë për t’u bashkuar, qeveria dhe opozita, dhe të tërhiqemi nga Marrëveshjet e Dejtonit. Kjo duhet të ndodhë në rrugën e vetëvendosjes. Unë ia kushtoj jetën time Serbisë, popullit serb, paqes dhe lirisë”, shton ai.

Dodik u detyrua të jepte dorëheqjen si president i RS gushtin e kaluar, pas një vendimi nga Komisioni Zgjedhor i Bosnjës, i cili e shpalli atë të papërshtatshëm për detyrë pasi u dënua në apel me një vit burg (i cili u fal) dhe një ndalim gjashtëvjeçar nga mbajtja e një posti publik.  /os/

The post BH – Dodik: Dua një RS të pavarur, 15 vende janë gati ta njohin atë appeared first on Agjencia Telegrafike Shqiptare.

BRUKSEL, 2 shkurt /ATSH/ – Udhëtarët mund të presin fushata informuese dhe aktivitete ndërgjegjësimi në pikat kufitare.

Sistemi i Hyrjes/Daljes në BE (EES), i vonuar prej kohësh, për qytetarët jo-BE, filloi prezantimin e tij në faza tetorin e kaluar.

Zbatimi gradual i teknologjisë biometrike kufitare ka hasur tashmë probleme fillestare, duke shkaktuar vonesa të konsiderueshme për pasagjerët e linjave ajrore, trageteve dhe Eurotunnel.

Një anketë e kryer nga Holiday Extras vitin e kaluar zbuloi se 82% e të anketuarve nuk ishin të qartë se si EES-ja e re do të ndikonte në udhëtime, ndërsa 35% nuk ​​ishin në dijeni se rregullat e reja do të hynin në fuqi këtë fundjavë.

Sistemi duhej të bëhej plotësisht funksional në të gjithë kufijtë e BE-së në prill 2026, por kjo tani është shtyrë për në shtator 2026 për shkak të frikës së kaosit të udhëtimit gjatë verës.

Vendimi do të thotë që shtetet anëtare kanë fleksibilitet më të madh për të menaxhuar kalimin në mbledhjen e të dhënave biometrike bazuar në mënyrën se si po përballen qendrat e tyre të transportit.

Për udhëtarët, kjo do të thotë që pasaporta juaj mund të vuloset manualisht në kufij gjatë disa muajve të ardhshëm.

Pothuajse një në pesë turistë tashmë ka ndryshuar ose anuluar planet e udhëtimit, dhe shumë prej tyre kanë shprehur shqetësime për vonesat në kufi.

Bashkimi Europian ka konfirmuar zyrtarisht nisjen e Sistemit të Hyrje-Daljes (Entry/Exit System – EES), një reformë e rëndësishme që do të ndryshojë mënyrën se si kontrollohen udhëtarët nga vendet jashtë BE-së në kufijtë e zonës Schengen, shkruan euronews.com.

Sipas njoftimit, sistemi i ri ka nisur zbatimin më 12 tetor 2025, ndërsa do të aplikohet gradualisht deri më 10 prill 2026, kur pritet të jetë plotësisht funksional në të gjitha pikat kufitare të 29 vendeve të Schengenit.

Çfarë është EES dhe pse po futet në përdorim?

EES është një sistem digjital që zëvendëson vulat tradicionale në pasaportë. Ai regjistron automatikisht hyrjet dhe daljet, si dhe kohëzgjatjen e qëndrimit të shtetasve jo-BE që udhëtojnë në zonën Schengen për qëndrime afatshkurtra.

Sistemi do të mbledhë edhe të dhëna biometrike, përfshirë fotografinë e fytyrës dhe gjurmët e gishtërinjve, me qëllim rritjen e sigurisë, luftimin e emigracionit të parregullt dhe parandalimin e qëndrimeve përtej afatit të lejuar.

Çfarë do të thotë kjo për udhëtarët?

Për udhëtarët nga vendet që nuk kanë nevojë për vizë – përfshirë Shqipërinë – kjo do të thotë se në hyrjen e parë pas aktivizimit të EES:
do të kërkohet regjistrimi biometrik,
kontrolli kufitar mund të zgjasë më shumë se zakonisht,
të dhënat do të ruhen në një bazë të përbashkët europiane.

Autoritetet europiane paralajmërojnë se gjatë fazës fillestare mund të ketë vonesa në aeroporte, porte dhe pika tokësore kufitare, derisa sistemi të funksionojë plotësisht.

ETIAS, hapi i radhës në kontrollin e udhëtimeve

Pas vendosjes së EES, BE planifikon të aktivizojë edhe ETIAS – një sistem autorizimi udhëtimi që do t’u kërkojë shtetasve të vendeve pa viza të aplikojnë online përpara udhëtimit në zonën Schengen. ETIAS pritet të hyjë në fuqi më vonë gjatë vitit 2026.

Një ndryshim i madh për udhëtimet drejt Europës

Autoritetet e BE-së theksojnë se këto masa synojnë të modernizojnë menaxhimin e kufijve dhe të rrisin sigurinë, ndërsa u bëjnë thirrje udhëtarëve të informohen paraprakisht dhe të planifikojnë udhëtimet me më shumë kohë në dispozicion.  /os/

The post FOKUS – Shtyhet deri në shtator sistemi i hyrje/daljeve në BE appeared first on Agjencia Telegrafike Shqiptare.

ROMË, 2 shkurt /ATSH-ANSA/ – Lojtarët profesionistë të futbollit, lojtarët e regbit dhe boksierët janë në rrezik jashtëzakonisht të lartë për të zhvilluar sëmundjen e Alzheimerit dhe Parkinsonit, ose forma të ndryshme të demencës, shkruan salute.eu.

Teknikisht, gjendja e tyre quhet CTE (Encefalopati Traumatike Kronike) dhe disa studime e kanë hetuar atë.

Megjithatë, duhet thënë se rreziqet e sporteve të kontaktit kanë ekzistuar për gati një shekull.

Në vitin 1928, patologu amerikan Harrison Martland botoi një artikull shkencor në të cilin argumentoi se ‘boksierët e kanë njohur prej kohësh një gjendje të veçantë që ndodh midis boksierëve profesionistë, të cilën, në zhargonin e ringut, e quajnë të dehur nga grushtet’’.

Simptomat? Një ecje e lëkundur dhe konfuzion mendor. Dhe në disa raste, dehja nga grushtet është zhvilluar në demencë, e klasifikuar më vonë si demenca pugilistica sepse ndodh tek atletët që kanë pësuar trauma të përsëritura në kokë.    /os/

The post FOKUS – Cilët sportistë janë më të prirur për të zhvilluar Alzheimer-in dhe Parkinsion-in? appeared first on Agjencia Telegrafike Shqiptare.

UASHINGTON, 2 shkurt /ATSH-ANSA/ – Ishte një nder të flisja me kryeministrin indian Modi, dhe ai është një nga miqtë e mi më të mirë, shkroi nç X presidenti amerikan Donald Trump në platformën e tij të mediave sociale, Truth.

”Ai ka rënë dakord të ndalojë blerjen e naftës ruse dhe të blejë shumë më tepër nga Shtetet e Bashkuara dhe, potencialisht, nga Venezuela. Kjo do të ndihmojë në përfundimin e luftës në Ukrainë”, shkroi ai.

Donald Trump do të ulë tarifat ndaj Indisë nga 25% në 18% pasi kryeministri Narendra Modi u zotua të ndalojë blerjen e naftës ruse. Vetë presidenti e tha këtë në platformën e tij të mediave sociale, Truth.   /os/

The post SHBA – Trump: India do të blejë naftë nga SHBA dhe jo Rusia, i ulim tarifat appeared first on Agjencia Telegrafike Shqiptare.

KIEV/MOSKË, 2 shkurt /ATSH/ – Në juglindje të qytetit të sulmuar ukrainas, Kupjansk, gjendet qyteza e vogël, Kupjansk-Vuzlovi.

Në nëntor të vitit 2025, komandanti më i lartë i ushtrisë ruse pretendoi se Kupjansku ka rënë në duart e tyre…Nuk ishte e vërtetë.

Në fakt, trupat ushtarake ukrainase kishin punuar në kundërofensivë dhe tani duket se po i largojnë edhe ushtarët e fundit rusë nga qyteti.

Javën që lamë pas, komandanti i njëjtë, gjenerali Valery Gerasimov, ka thënë se forcat ruse e kanë marrë kontrollin e Kupjansk-Vuzlovit.

Sipas vëzhguesve rusë dhe ukrainas të fushëbetejës, situata reale ishte kështu: forcat ruse ishin larg fshatit – rreth 10 kilometra – dhe as afër kontrollimit të tij.

Disa javë pas hyrjes së luftës në vitin e pestë, Rusia është duke goditur me sukses rrjetin energjetik të Ukrainës dhe shumë qendra të ngrohjes, duke i lënë qytetarët ukrainas nën temperatura të ulëta atmosferike. Por, Moska nuk është duke shënuar ndonjë fitore bindëse në fushëbetejë.

Forcat ushtarake të Moskës po e luftojnë mbrojtjen ukrainase në disa zona në frontin e luftës në gjatësi prej 1.100 kilometrash. Mirëpo, lëvizja e tyre është shumë e ngadalshme, ndoshta më e ngadalshmja në ndonjë lufte moderne, sipas një studimi. Dhe një realitet i tillë e ka koston e vet.

“Fronti i luftës përshkruhet më së miri si ‘stagnim dinamik’ që nënkupton luftime intensive me ndryshime gjeografike margjinale”, ka thënë Ivan Torres, major i pensionuar i ushtrisë amerikane, i cili tani punon si analist i lartë i ushtrisë ruse në grupin politik kërkimor Rochan Consulting.

Lodhja e Ukrainës u atribuohet edhe bisedimeve për paqe të mbështetura nga Shtetet e Bashkuara, të cilat kanë shënuar përparim, mirëpo mospajtimet për një mori çështjesh vazhdojnë të jenë pengesë.

“Ukraina nuk po humb dhe Rusia nuk po fiton”, ka vlerësuar Instiuti Royal United Services, me seli në Londër.

Më poshtë i kemi renditur rajonet kryesore që meritojnë vëmendje:

KUPJANSKU

Qyteti njihet për një kryqëzim të rëndësishëm hekurudhor dhe deri më tani është përballur disa herë me luftë: Rusia e ka pushtuar atë pas nisjes së luftës në shkurt të vitit 2022. Më pas, forcat ukrainase i kanë marrë nën kontroll pozicionet ruse në shtator, dhe kanë arritur deri në Oskil.

Mirëpo, për më shumë se një vit, forcat ruse – më shumë në numër, me më shumë armë – i janë afruar sërish Kupjanskut.

Në shtator, njësitet ruse kanë depërtuar përmes gazsjellësve të papërdorur nëntokësorë të Oskilit dhe kanë arritur në paralagjet e Kupjanskut në veri. Kështu, ata kanë infiltruar grupe të vogla ushtarësh në brendësi të qytetit.

Autoritetet lokale më pas kanë ngritur alarmin dhe komandantët ukrainas i kanë angazhuar kompanitë e specializuara për dronë, dhe para Vitit të Ri, njësitet ukrainase i kanë shtyrë tutje pozicionet ruse.

Megjithatë, moti i keq në tetë javët e fundit ka ndikuar në performancën e ushtarëve ukrainas për t’i larguar të gjithë ushtarët rusë nga ato zona.

Forcat ruse, në anën tjetër, nuk dorëzohen, ato tentojnë vazhdimisht t’i thyejnë bllokadat ukrainase dhe të rimarrin qytetin.

“Pastrimi i plotë i Kupjanskut duket i vështirë, por rusët e kanë humbur momentumin”, ka thënë Emil Kastehelmi, analist ushtarak në organizatën për kërkime, Black Bird Group.

“Nuk pres ndryshime të mëdha në të ardhmen në atë zonë”, i ka thënë ai Radios Evropa e Lirë.

“Është e mundshme që Ukraina të humbë pozicionet në lindje të lumit Oskil në një pikë, mirëpo kjo nuk do të thotë që rusët do të avancojnë shumë në brendësi”.

KOSTIANTINIVKA

Një tjetër qytet me rëndësi për kryqëzime hekurudhore dhe furnizim të ushtrisë, Kostiantinivka, ka qenë shumë e rrezikuar prej kur ushtarët rusë arritën t’i largonin forcat ukrainase prej Çasiv Jar-it vitin e kaluar.

Ky rezultat u dha përparim rusëve. Çasiv Jar-i gjendet në lartësi më të madhe, duke u dhënë mundësi rusëve që të bombardojnë mbrojtjen ukrainase prej lartësisë.

Duke bërë presion prej jugut dhe jugperëndimit, ushtarët rusë tani synojnë disa lidhje të rëndësishme rrugore që shtihen drejt Kramtorskut. Ky qytet, bashkë me Sllovianskun, janë dy pika të rëndësishme përmes së cilave ukrainasit i mbrojnë pjesët e rajonit të Donjeckut që i kanë ende në duar.

“Kostiantinivka mund të jetë në listën e operacioneve kryesore të rusëve”, ka thënë Torres.

“Këto zona janë shumë problematike për Ukrainën. Forcat ruse kanë kaluar muaj duke tentuar të krijojnë qendra logjistike. Luftimet aty karakterizohen nga sulme të shpejta të këmbësorisë që synojnë t’i lodhin mbrojtësit ukrainas, në vend të një depërtimi të thellë”.

POKROVSKU DHE MIRNOHRADI

Dikur një qendër e rëndësishme logjistike për mbrojtjen ukrainase në rajonin e Donjeckut, Pokrovsku ka muaj është dërmuar, pasi njësite të vogla ukrainase janë infiltruar gradualisht në qytet. Strategjia ka funksionuar dhe tani ushtarët rusë kontrollojnë rreth 80-90 për qind të qytetit. Komandantët ukrainas po i mbajnë me vështirësi vijat e kontrollit në veriperëndim.

Rënia e Pokrovskut në duart e rusëve do t’i rrezikojë edhe pozicionet tjera ukrainase, përfshirë ato rreth qytezës së Mirnohradit, e cila është kryesisht nën kontrollin rus.

Ushtarët ukrainas kanë thënë se njësitet ruse kanë zhvendosur pajisje të rënda në qytezë dhe e kanë tashmë një zonë komanduese.

“Forcat ruse kontrollojnë pjesën më të madhe të të dyja qyteteve, ndonëse rezistenca ukrainase mund të jetë ende e vërejtshme në disa vende, qytetet mund të konsiderohen të humbura”, ka thënë Kastehelmi, i cili sapo është kthyer nga një udhëtim në Ukrainë.

HULJAPOLE DHE ORIHIVI

Në Hulyaypole, jugperëndim të Pokrovskut, kapacitetet e mbrojtjes ukrainase varen nga lumi Hajçur, i cili ndan qytetin në zona. Ekspertët kanë paralajmëruar që forcat ruse i kanë tejkaluar disa zona përtej lumit dhe i kanë konsoliduar pozicionet e tyre, dhe që ukrainasit po përpiqen t’i pengojnë përparimet e mëtejme.

Disa ekspertë kanë thënë se mbrojtja ukrainase mund të jetë dobësuar për shkak të forcave të dërmuara dhe vendimeve të komandantëve për t’i zhvendosur të gjitha resurset për ta zotëruar Kupjanskun në veri.

“Rënia e Hujlapoles ishte një ngjarje fatkeqe, mirëpo rusët nuk kanë avancuar shumë përtej saj”, ka thënë Kastehelmi.

Humbja e Huljaypoles është problematike sepse në zonën perëndimore është një stepë relativisht e hapur që nuk ka vija mbrojtëse dhe mund të kalohet lehtësisht nga automjete të blinduara. Kjo do t’ua hapte derën njësiteve ruse për të rritur presionin në perëndim drejt Orikhivit, qytet më i madh, rreth 70 kilometra larg.

“Kapja e këtij qyteti dhe thyerja e mbrojtjes ukrainase përgjatë lumit Hajçur kërcënojnë qëndrueshmërinë e mbrojtjes së Orikhivit nga Ukraina”, vlerëson Torres.

KAMJANSKE DHE ZAPORIZHJA

Vëmendje shumë më e vogël – ukrainase apo ruse – i është dhënë avancimit gradual të ushtarëve rusë në brigjet e atij që dikur ishte rezervuar i Kahovkas në lumin Dnjepër. Diga e Kahovkas është shkatërruar sa ka qenë në kontrollin rus në qershor të vitit 2023.

Në fund të dhjetorit të vitit 2025, trupat ruse kanë arritur të depërtojnë në qytezën Kamjanske, në drejtim të kryeqytetit rajonal, Zaporizhjas.

“Ata mund të shkaktojnë më shumë probleme në muajt në vijim, nëse arrijnë ta marrin qytetin në copëza të vogla”, vlerëson Kastehelmi.

“Në periudhë afatmesme dhe afatgjatë, situata në Zaporizhja mund të shkojë në drejtim shqetësues, por disa pengesa lokale dhe taktike tani, nuk nënkuptojnë se situata e përgjithshme po shkon drejt një krize të madhe”, shton ai pçr REL.   /OS/   /os/

The post KOMENT – Ukraina nuk po humb, Rusia nuk po fiton, si paraqitet situata në frontin e luftës? appeared first on Agjencia Telegrafike Shqiptare.

BRUKSEL, 2 shkurt /ATSH-ANSA/ – Ne të gjithë synojmë të qëndrojmë në NATO. Kur flasim për pavarësi dhe autonomi, e gjithë kjo duhet të ndodhë brenda NATO-s,  deklaroi sot Komisioneri Evropian për Mbrojtjen dhe Hapësirën, Andrius Kubilius.

‘’Duke folur për mbrojtjen konvencionale, në doktrinën e mbrojtjes të publikuar së fundmi, vetë amerikanët shprehin shumë qartë pritjen se ne do të mbajmë mbi supe pjesën më të madhe të barrës së mbrojtjes evropiane. Por kjo gjithashtu do të thotë se amerikanët synojnë të vazhdojnë të menaxhojnë dhe të na garantojnë mbrojtjen e tyre bërthamore”, deklaroi Kubilius.

“Kjo strategji e re kërkon plane shumë të qarta dhe një kuptim të qartë të asaj që duhet të bëjmë për të zëvendësuar aftësitë që amerikanët mund të fillojnë të zvogëlojnë”, shtoi Kubilius.

“Por çështja duhet të merret vesh hapur me amerikanët për të shmangur keqkuptimet dhe lëvizjet e papritura”, theksoi ai.    /os/

The post FOKUS – Kubilius: SHBA do të garantojnë mbrojtjen bërthamore të antarëve NATO appeared first on Agjencia Telegrafike Shqiptare.

LONDËR, 2 shkurt /ATSH-AA/ – Ambasadori rus në Londër, Andrey Kelin, u thirr në Ministrinë e Jashtme të Mbretërisë së Bashkuar për t’u informuar për dëbimin e një diplomati britanik nga vendi i tij.

Një deklaratë me shkrim nga zëdhënësi i Ministrisë së Jashtme të Mbretërisë së Bashkuar tha: “Ne dënojmë me fjalët më të ashpra dëbimin e pajustifikuar nga Rusia të njërit prej diplomatëve tanë muajin e kaluar dhe akuzat e saj të pabaza kundër stafit tonë”.

Në deklaratë thuhet se Kelin u thirr në Ministrinë e Jashtme në lidhje me këtë çështje, duke shtuar: “Një zyrtar i lartë i Ministrisë së Jashtme thirri ambasadorin rus dhe e bëri të qartë se Mbretëria e Bashkuar nuk do të tolerojë provokime kundër stafit të ambasadës. Prandaj, sot, si një hap reciprok, ne po ia revokojmë akreditimin një diplomati rus”.

Thuhet se Rusia “përpiqet vazhdimisht të prishë punën e misionit diplomatik britanik me qëllim pengimin e mbështetjes për Ukrainën”, dhe theksoi se çdo veprim i mëtejshëm nga Rusia do të konsiderohej një përshkallëzim i tensioneve dhe do të përballej me një përgjigje të ngjashme.

Danae Dholakia, e Ngarkuara me Punë në Ambasadën Britanike në Moskë, u thirr në Ministrinë e Jashtme muajin e kaluar dhe u informua se diplomati Gareth Samuel Davies, i cili punonte për ambasadën, ishte dëbuar me arsyetimin se ishte i lidhur me inteligjencën britanike.

Rusia i lëshoi ​​një notë proteste Mbretërisë së Bashkuar, duke kërkuar që Davies të largohej nga Rusia brenda dy javësh.   /os/

The post LONDËR – BM dëbon një diplomat rus appeared first on Agjencia Telegrafike Shqiptare.

BERLIN, 2 shkurt /ATSH-AA/ – Sasia e magazinimit të gazit natyror të Gjermanisë kanë rënë mes temperaturave të ulëta, duke nxitur thirrje nga opozita për masa të menjëhershme për të shmangur mungesa të mundshme.

Objektet e magazinimit ishin në 32,9 për qind kapacitet më 1 shkurt 2026 – një rënie e thellë nga 56,4 për qind në të njëjtën periudhë vitin e kaluar dhe rreth 57 për qind në fund të dhjetorit 2025. Rënia ndodh ndërsa gjermanët rrisin ngrohjen gjatë një nga dimrat më të ftohtë në vitet e fundit.

Michael Kellner, zëdhënësi për politikën energjetike i Partisë së Gjelbër opozitare, kritikoi qeverinë për “përgatitje të dobët” dhe paralajmëroi për kufizime të mundshme.

“Ne po dridhemi gjatë këtij dimri,” tha ai për transmetuesin publik ARD të dielën vonë, duke shtuar se ministria tani duhet të kërkojë kursim të gazit për të shmangur një krizë më të madhe.

Por Ministrja e Ekonomisë, Katherina Reiche, minimizoi shqetësimet mbi rezervat e shteruara. “Ne e monitorojmë situatën çdo ditë – nuk ka arsye për shqetësim,” tha ajo para një udhëtimi në Arabinë Saudite.

Reiche theksoi kapacitetin e Gjermanisë për të importuar gaz natyror të lëngshëm, ose LNG, nga jashtë, duke shprehur besim se vendi do ta kalojë dimrin pa probleme.

Gjermania ka luftuar me furnizime të qëndrueshme energjie që nga ndërprerja e importeve ruse pas shpërthimit të luftës Rusi-Ukrainë në 2022. Rusia kishte siguruar pothuajse 55 për qind të gazit natyror dhe 35 për qind të naftës bruto të Gjermanisë para konfliktit.

Që atëherë, vendi është kthyer te alternativa nga Norvegjia, Holanda dhe Belgjika – me çmime të rritura. Portet kryesore në Belgjikë dhe Holandë përpunojnë mbërritjet e LNG-së, të cilat pastaj transportohen me tubacione në Gjermani. Shumica e importeve të LNG-së së Gjermanisë vjen nga SHBA-ja.

The post GJERMANI – Temperaturat e ulëta ulin rezervat e gazit, opozita ndez alarmin appeared first on Agjencia Telegrafike Shqiptare.

BRUKSEL, 2 shkurt /ATSH-AA/ – Shefja e politikës së Jashtme të BE-së, Kaja Kallas, deklaroi se OKB-ja “nuk po i zbaton veprimet ashtu siç duhet” dhe përsëriti nevojën për të zhvilluar një ligj ndërkombëtar me vendet që kërkojnë rend të bazuar në rregulla.

“Siç dëgjuam, Kombet e Bashkuara definitivisht nuk po i zbatojnë veprimet ashtu siç duhet”, tha Kallas ndërsa po fliste në Konferencën e Sigurisë në Oslo.

Ajo pranoi se ka shumë vende që duan një rend të bazuar në rregulla, duke nënvizuar se rendi ndërkombëtar i mbron ato.

“Ne jemi në këtë situatë ku duhet ta zhvillojmë më tej këtë ligj ndërkombëtar me ato vende që duan rend të bazuar në rregulla”, tha Kallas.

Duke theksuar se parimet e Kartës së OKB-së janë “shumë të mira”, ajo tha se pjesa e llogaridhënies “mungon”.

– “Të kesh varësi po të bën të prekshëm”

Kallas gjithashtu theksoi nevojën që Evropa të ndërtojë mbrojtjen e vet, duke shtuar se të kesh varësi e bën bllokun “të prekshëm”.

“Ne e kemi mësuar me vështirësi se (…) të kesh varësi po të bën të prekshëm”, tha ajo.

Ndërkohë, Kallas gjithashtu tha se njerëzit që thonë se kanë nevojë për një ushtri evropiane “nuk e kanë menduar vërtet këtë praktikisht”.

“Kjo është arsyeja pse them se duhet të forcojmë mbrojtjen evropiane, e cila është gjithashtu pjesë e NATO-s. Është vërtet plotësuese për NATO-n. Le të mos e hedhim NATO-n nga dritarja”, tha ajo.    /os/

The post BRUKSEL – Kallas: OKB nuk po jep rezultatet e duhura appeared first on Agjencia Telegrafike Shqiptare.

KIEV, 31 janar /ATSH-ANSA/ – Një defekt në sistemin elektrik të Ukrainës ka shkaktuar ndërprerje të energjisë elektrike në një pjesë të konsiderueshme të vendit.

“Sot në orën 10:42 të mëngjesit, ndodhi një defekt teknologjik që shkaktoi ndërprerjen e njëkohshme të linjës 400 kW midis sistemeve elektrike rumune dhe moldave dhe linjës 750 kW midis Ukrainës Perëndimore dhe Qendrore”, tha Ministri ukrainas i Energjisë Shmyhal, në Telegram.

”Ajo shkaktoi një ndërprerje të menjëhershme të energjisë elektrike në rrjetin elektrik ukrainas dhe aktivizimin e pajisjeve automatike të mbrojtjes në nënstacione.
Metroja e Kievit është gjithashtu jashtë shërbimit sot”, shtoi ai.   /os/.

The post KIEV – Një defekt teknik shkakton ndërprerje të rënda të energjisë në Ukrainë appeared first on Agjencia Telegrafike Shqiptare.

GAZA, 31 janar /ATSH-AA/ – Të paktën 12 palestinezë u vranë mëngjesin e sotëm në një seri sulmesh ajrore izraelite që goditën zona të ndryshme në të gjithë Rripin e Gazës.

Burime mjekësore thanë se pesë palestinezë, tre fëmijë dhe dy gra, u vranë, si dhe shumë të tjerë u plagosën nga një sulm ajror izraelit që goditi një apartament banimi në lagjen Rimal në perëndim të Qytetit Gaza.

Sipas ndihmësve mjekësorë në Spitalin Nasser në Khan Younis, shtatë palestinezë të tjerë, një burrë, tre djemtë e tij dhe tre nga nipërit e vegjël, u vranë në një tjetër sulm ajror izraelit që goditi një tendë ku strehoheshin persona të zhvendosur në zonën Asdaa, në veriperëndim të qytetit Khan Younis në jug të enklavës.

Disa palestinezë u plagosën gjithashtu në një sulm izraelit që goditi një apartament banimi në lagjen al-Tuffah, në lindje të Qytetit Gaza.

Avionët luftarakë izraelitë gjithashtu kryen një sulm ajror në rrugën al-Jalaa në veriperëndim të Qytetit Gaza, si dhe dy sulme në lindje të kampit të refugjatëve Bureij në Gazën qendrore, pa raportime për viktima.

Sipas zyrës së mediave të Gazës, që nga hyrja në fuqi e armëpushimit në fillim të tetorit, veprimet izraelite kanë vrarë të paktën 524 palestinezë dhe kanë plagosur më shumë se 1.360 të tjerë, duke kryer 1.450 shkelje.

Në një zhvillim të ndërlidhur, zyra e mediave tha se ushtria ka arrestuar 50 palestinezë që nga hyrja në fuqi e marrëveshjes, duke i ndaluar ata nga zona larg “vijës së verdhë” dhe nga brenda lagjeve të banuara.   /os/

The post GAZA – Të paktën 12 palestinezë të vrarë pas sulmeve ajrore izraelite appeared first on Agjencia Telegrafike Shqiptare.

UASHINGTON, 31 janar /ATSH-ANSA/ – Shtetet e Bashkuara të Amerikës miratuan shitjen e sistemeve Patriot me vlerë 9 miliardë dollarë për Arabinë Saudite.   (…VIJON)

The post UASHINGTON – SHBA miraton shitjen e sistemeve Patriot me vlerë 9 miliardë dollarë për Arabinë Saudite appeared first on Agjencia Telegrafike Shqiptare.

UASHINGTON, 31 janar /ATSH-AA/ – Presidenti i SHBA-së, Donald Trump, deklaroi se beson se një marrëveshje midis Ukrainës dhe Rusisë mund të jetë afër, edhe pse pranoi armiqësinë e thellë midis udhëheqësve të të dy vendeve.

Duke folur për gazetarët në Shtëpinë e Bardhë, Trump tha se armiqësia personale dhe politike midis presidentit ukrainas Volodymyr Zelenskyy dhe presidentit rus Vladimir Putin ka komplikuar përpjekjet për t’i dhënë fund konfliktit.

“Zelenskyy dhe Putin e urrejnë njëri-tjetrin dhe kjo e bën shumë të vështirë. Por mendoj se jemi shumë afër arritjes së një marrëveshjeje”, tha Trump.

Ai nuk dha detaje për përmbajtjen e diskutimeve në vazhdim.

“Mendoj se kemi një shans të mirë për ta zgjidhur”, shtoi presidenti amerikan.   /os/

The post SHBA – Trump: Jemi shumë afër arritjes së një marrëveshjeje Ukrainë-Rusi appeared first on Agjencia Telegrafike Shqiptare.

UASHINGTON, 31 janar /ATSH-AA/ – Çmimet e arit, pasi u rritën vazhdimisht për rreth dhjetë javë, shënuan një rënie të fortë të premten.

Rreth orës 18:30 GMT, çmimi i arit për ons ra në nivelin 4.775 dollarë, me rreth 11 për qind rënie në bazë ditore.

Megjithatë, ari është rritur me rreth 88 për qind gjatë 12 muajve të fundit dhe rreth 19 për qind që nga fillimi i vitit, i mbështetur nga tensionet e shtuara tregtare dhe gjeopolitike, si dhe nga uljet e normave të interesit nga bankat kryesore qendrore.

Edhe çmimet e argjendit pësuan një rënie të fortë, duke u ulur me mbi 33 për qind në 76,1 dollarë për ons. Rritja e tij gjatë 12 muajve ishte 255,6 për qind.

Vendimi i Rezervës Federale (Fed) të mërkurën për të mbajtur normat e interesit të pandryshuara ndihmoi dollarin të rikuperohej nga nivelet më të ulëta të shumë viteve, megjithëse ai mbeti pranë një rënieje të dytë radhazi javore.

Presidenti i SHBA-së, Donald Trump, njoftoi sot se ka zgjedhur ish-guvernatorin e Rezervës Federale, Kevin Warsh, si kandidat për postin e kryetarit të ardhshëm të Fed-it, duke thënë se ai do të jetë “një nga kryetarët më të mëdhenj të Fed-it, ndoshta më i miri”.

Megjithatë, procesi i konfirmimit mund të rezultojë i vështirë, pasi disa senatorë republikanë janë zotuar të bllokojnë çdo nominim për Fed-in derisa Departamenti amerikan i Drejtësisë të përfundojë hetimin mbi rinovimin e selisë së bankës qendrore në Washington.   /os/

The post UASHINGTON – Çmimi i arit bie mbi 10 për qind pas deklaratës së Trumpit mbi Rezervën Federale appeared first on Agjencia Telegrafike Shqiptare.

TIRANË, 31 janar /ATSH/ – Turizmi në Shqipëri po ndryshon profil: Rritet ndjeshëm interesi nga Franca, Gjermania dhe Shtetet e Bashkuara, shkruan faqja e njohur ‘’Travel and Tour Word’’.

Turizmi në Shqipëri po hyn në një fazë të re zhvillimi, me një ndryshim të dukshëm të strukturës së vizitorëve të huaj dhe një rritje të fortë të interesit nga Franca, Gjermania dhe Shtetet e Bashkuara të Amerikës.

Kjo prirje evidentohet në një analizë të publikuar nga portali ndërkombëtar Travel and Tour World, i cili thekson se ‘’vendi po fiton gjithnjë e më shumë vëmendje në tregjet turistike perëndimore’’.

Sipas raportimit, ndonëse Kosova dhe Italia vijojnë të jenë burimet kryesore të turistëve për Shqipërinë, ritmet më të shpejta të rritjes po regjistrohen nga tregje më të largëta dhe me fuqi më të madhe blerëse.

Turistët nga Gjermania dhe Franca po shfaqin interes në rritje për destinacione kulturore, natyrore dhe bregdetare, ndërsa vizitorët amerikanë po e shohin Shqipërinë si një destinacion të ri, ende të paeksploruar plotësisht në Mesdhe.

Tirana, Durrësi dhe bregdeti mbeten në qendër të vëmendjes.

Tirana vazhdon të jetë porta kryesore e hyrjes për turistët e huaj, falë lidhjeve ajrore në rritje dhe zhvillimit të shërbimeve urbane.

Ndërkohë, Durrësi mbetet një nga destinacionet më të frekuentuara për turizmin familjar dhe atë detar, për shkak të afërsisë me kryeqytetin dhe infrastrukturës hoteliere ekzistuese.

Një vëmendje e veçantë po i kushtohet edhe bregdetit shqiptar, veçanërisht Rivierës së Jugut, ku zonat si Vlora, Himara, Dhërmiu dhe Saranda po tërheqin gjithnjë e më shumë turistë të huaj gjatë sezonit veror. Artikulli vëren se rritja e fluksit po shoqërohet edhe me shtim të kërkesës për struktura akomoduese cilësore dhe shërbime turistike më të standardizuara.

Fluturimet dhe çmimet, një faktor ndikues

Një nga faktorët kryesorë që po nxit rritjen e turizmit është zgjerimi i rrjetit të fluturimeve ndërkombëtare, veçanërisht nga kompanitë ajrore low-cost, të cilat kanë shtuar ndjeshëm destinacionet drejt Tiranës. Kjo ka lehtësuar aksesin për turistët europianë dhe ka ulur kostot e udhëtimit.

Gjithashtu, çmimet relativisht më të ulëta krahasuar me destinacione të tjera të Mesdheut, së bashku me natyrën e paprekur dhe trashëgiminë kulturore, e bëjnë Shqipërinë një alternativë gjithnjë e më tërheqëse për pushime.

Sfida për zhvillimin e qëndrueshëm

Pavarësisht rritjes së fortë sektori përballet me sfida serioze. Ndër to përmenden presioni mbi infrastrukturën, menaxhimi i mbetjeve, mbipopullimi sezonal dhe rritja e çmimeve në disa zona turistike, çka mund të ndikojë negativisht në përvojën e vizitorëve.

Ekspertët vlerësojnë se për të ruajtur ritmet e rritjes dhe për të përmirësuar cilësinë e ofertës turistike, Shqipëria duhet të investojë më shumë në turizëm të qëndrueshëm, planifikim urban dhe mbrojtje të mjedisit.

Turizmi, një shtyllë gjithnjë e më e rëndësishme e ekonomisë

Sipas të dhënave zyrtare, numri i turistëve të huaj në Shqipëri ka arritur nivele rekord, duke e shndërruar turizmin në një nga sektorët kryesorë të ekonomisë kombëtare.

Rritja e interesit nga tregje të reja shihet si një mundësi për të rritur të ardhurat, për të zgjatur sezonin turistik dhe për të diversifikuar ofertën përtej turizmit masiv veror.

Në këtë kontekst, Shqipëria po pozicionohet gjithnjë e më shumë si një destinacion emergjent europian, me potencial të madh, por edhe me nevojën për politika afatgjata që të garantojnë zhvillim të balancuar dhe cilësor./  /os/

The post KOMENT – TTW: Turistët francezë, gjermanë dhe amerikanë rrisin interesin për të eksploruar Shqipërinë appeared first on Agjencia Telegrafike Shqiptare.

TIRANË, 30 janar /ATSH/ – Si kameraman në Bosnjë-Hercegovinë, Sulejman Mulaomeroviç dokumentoi rrethimin e Sarajevës nga fillimi deri në fund, por, për të, rënia e përgjakshme e Jugosllavisë filloi dy vjet më pas, në një fshat në verilindje të Kosovës, shkruan faqja balkaninsight.com.

Në kohën kur Mulaomeroviç mori telefonatën për të shkuar në Kosovë, në fund të janarit 1990, Jugosllavia socialiste tashmë po shkonte drejt humnerës mes një kapjeje të pushtetit nga Slobodan Millosheviçi i Serbisë dhe thirrjeve në rritje për pavarësi në Slloveni dhe Kroaci.

Në vitin 1989, Millosheviçi revokoi autonominë e Kosovës me shumicë shqiptare dhe i përjashtoi shqiptarët nga vendet e punës në sektorin publik. Shpërthyen protesta dhe u përballën me një përgjigje brutale nga policia serbe.

“Përpara gjykatës në Prishtinë, mijëra njerëz brohorisnin për demokracinë duke kërkuar heqjen e gjendjes së jashtëzakonshme njëvjeçare, lirimin e të burgosurve politikë dhe fundin e gjyqeve politike”, kujtoi Mulaomeroviç, 72 vjeç, në një intervistë nga shtëpia e tij në Sarajevë.

Mulaomeroviç ishte kameraman për Radio Televizionin e Sarajevës. Në Bosnjën e tij të lindjes, thirrjet për pavarësi po shtoheshin gjithashtu, dhe trazirat në Kosovë u morën si provë e mëtejshme e rritjes së armiqësisë së Serbisë nën Milosheviçin.

Më 1 shkurt 1990, pasi filmuan në Prishtinë, Mulaomeroviç dhe ekipi i tij morën vesh për një protestë tjetër në Podujevë, në veri të Prishtinës.

Gjatë rrugës, ata u përplasën me tanke dhe automjete policie në fshatin bujqësor Lupc i Poshtëm dhe qindra protestues.

Policia e lejoi makinën e tyre të kalonte, por me paralajmërimin “Kini kujdes dhe mos filmoni”.

Megjithatë, kur policia filloi të hidhte gaz lotsjellës, Mulaomeroviç gjeti një vend të sigurt për të filmuar.

“Së pari, milicët qëlluan granata gazi lotsjellës drejt turmës. Pastaj u urdhëruan demonstruesve të shtriheshin dhe qëlluan mbi kokat e tyre me një mitraloz,” tha ai.

“Gazi lotsjellës arriti tek unë dhe unë nuk munda të shihja, por kamera ishte fiksuar dhe vazhdoi të filmonte. Dëgjova britma dhe të shtëna me armë. Pastaj pashë njerëz që mbanin një vajzë. Ajo ishte qëlluar nga zjarri i mitralozëve nga një kolonë militantësh serb”, shton ai.

Ylfete Humolli ishte 16 vjeçe dhe kishte lënë shkollën për t’u bashkuar me protestën me vëllanë e saj më të vogël, Mentorin, atëherë 14 vjeç.

Sipas Mulaomeroviçit, ajo u qëllua dy herë në kokë.

“Mbaj mend se ajo mbante veshur një xhaketë gri”, tha ai.

Duke parë pamjet që kishte kapur, Mulaomerovic vuri re një makinë policie dhe dy oficerë, të cilët kishin ngritur armët dhe kishin qëlluar drejt turmës.

“Policët kishin dalë nga automjeti dhe kishin qëlluar drejt demonstruesve”, tha ai.

“Atëherë ishte e qartë se të shtënat fatale erdhën prej tyre”, shton fotografi.

Dhjetëra njerëz vdiqën në trazirat pas heqjes së autonomisë së Kosovës nga Milosheviçi.

Por, vdekja e Humollit ishte veçanërisht rrëqethëse.

Atë pasdite, Mulaomerovic dhe kolegët e tij shkuan për të montuar pamjet në Radio Televizionin e Prishtinës, i cili në atë kohë ende transmetohej në shqip, dhe morën sinjalin për të transmetuar në TV Sarajevo.

“Ndërsa po montonim, një redaktor në TV Prishtina vendosi të transmetonte materialin. Në të njëjtën kohë, një ekip nga ZDF i Gjermanisë ofroi një shumë të madhe parash për pamjet filmike, por ne refuzuam”, thotë ai.

Pamjet filmike patën një ndikim të menjëhershëm.

“Media ndërkombëtare raportonte se policia kishte hapur zjarr ndaj fëmijëve”, tha Mulaomeroviç.

Gjatë dy muajve të ardhshëm, Serbia vendosi masa më represive, duke përfshirë një shtetrrethim natën, dhe, në korrik 1990, mbylli me forcë Radio Televizionin e Prishtinës, duke pushuar nga puna të gjithë punonjësit e tij shqiptarë.

Pamjet filmike të tij u transmetuan në Sarajevë, Prishtinë, Lubjanë dhe Zagreb.

“Pastaj kuptova diçka”, tha Mulaomeroviç.

“Atë ditë filloi lufta”, shton ai./  /os/

The post HISTORI – Mulaomeroviç kameramani boshnjak që dokumentoi vrasjet në Kosovë appeared first on Agjencia Telegrafike Shqiptare.

MOSKË, 30 janar /ATSH-AA/ – Kremlini ka konfirmuar se presidenti i SHBA-së, Donald Trump kërkoi nga homologu i tij rus, Vladimir Putin, të ndalojë sulmet në Ukrainë për një javë për shkak të motit jashtëzakonisht të ftohtë.

“Në të vërtetë, presidenti Trump i bëri kërkesë personale presidentit Putit që të përmbahet nga sulmet ndaj Kievit për një javë, deri më 1 shkurt, në mënyrë që të krijohen kushte të favorshme për negociata”, u tha gazetarëve Dmitry Peskov, zëdhënës i Kremlinit.

Peskov nuk pranoi të tregojë nëse Putini është dakord me kërkesën, duke u shprehur: “Nuk kam asgjë për të shtuar në atë që tashmë është thënë”.

Dje, presidenti Trump gjatë një takimi të kabinetit tha se ai “kërkoi personalisht” nga homologu i tij rus të mos qëllojë mbi Kievin dhe qytete të tjera ukrainase për shkak të kushteve të motit “jashtëzakonisht të ftohtë”.

Presidenti ukrainas, Volodymyr Zelenskyy më vonë në rrjetet sociale falënderoi presidentin Trump, duke njoftuar se çështje u diskutua gjatë bisedimeve në kryeqytetin Abu Dhabi të Emirateve të Bashkuara Arabe më 23 dhe 24 janar.

Sot më herët, Zelenskyy u tha gazetarëve se Ukraina është e gatshme të ndërpesë sulmet ndaj infrastrukturës energjetike ruse nëse Moska vepron në të njëjtën mënyrë, por theksoi se nuk ka pasur dialog ose marrëveshje të drejtpërdrejtë midis Kievit dhe Moskës për këtë çështje.   /os/

The post RUSI – Kremlini: Trumpi kërkoi nga Putini të ndalojë sulmet në Ukrainë për një javë appeared first on Agjencia Telegrafike Shqiptare.

NJU JORK, 30 janar /ATSH-AA/ – Pretendohet se ka “indikacione të kufizuara” që Irani ka bërë përparim të konsiderueshëm në ristrukturimin e programit të tij bërthamor që nga përplasjet e qershorit 2025.

New York Times (NYT) përpiloi një analizë nga intervistat me zyrtarë amerikanë dhe evropianë si dhe grupe të pavarura që monitorojnë programin bërthamor të Iranit.

Sipas kësaj analize, administrata e Teheranit nuk e ka avancuar ndjeshëm programin e saj bërthamor që nga përplasjet që shpërthyen me sulmet izraelite më 13 qershor.

Në këtë kontekst, u sugjerua se ka “indikacione të kufizuara” se Teherani ka ndërmarrë hapa të rëndësishëm drejt rindërtimit të kapacitetit të tij të pasurimit të karburantit bërthamor dhe zhvillimit të kokave bërthamore në gjashtë muajt e fundit.

Pretendohet se agjencitë e inteligjencës besojnë se uraniumi i pasuruar në tre objektet bërthamore në Natanz, Fordo dhe Isfahan, të cilat u goditën gjatë përplasjeve, është “ende i varrosur dhe i paprekur”, duke e bërë kështu të pamundur që Irani të prodhojë shpejt armë bërthamore.

Pavarësisht kësaj, pretendohet se Teherani ka rritur punën e gërmimit në objektet bërthamore pranë Natanz dhe Isfahan.

Wall Street Journal (WSJ) pretendon se presidenti i SHBA-së, Donald Trump u informua mbi opsionet e mundshme të sulmit kundër Iranit, të përgatitura bashkërisht nga Shtëpia e Bardhë dhe Departamenti i Mbrojtjes (Pentagoni).

Thuhet se këto opsione përfshinin një “plan të madh” që përfshinte një bombardim në shkallë të gjerë që synonte objektet që i përkisnin regjimit iranian dhe Korpusit të Gardës Revolucionare.  /os/

The post SHBA – NYT: Irani ka dështuar në përparimin e programit bërthamor që nga konflikti i qershorit 2025 appeared first on Agjencia Telegrafike Shqiptare.

BERLIN, 30 janar /ATSH-ANSA/ – Numri i të papunëve në Gjermani kaloi shifrën e 3 milionëve në muajin janar, treguan shifrat zyrtare, ndërsa shkalla e papunësisë u rrit në 6.6%.

Agjencia Federale e Punësimit regjistroi 3 085 milionë të papunë, 177 000 më shumë se muaji i kaluar dhe 92 000 nga janari i vitit 2025.

Shifra është më e larta e parë në muajin janar që nga viti 2014, ndërsa numri i të papunëve kaloi 3 milionë në gusht për herë të parë në më shumë se 10 vjet.

Krahasuar me dhjetorin, shkalla e papunësisë u rrit me 0.4 pikë përqindjeje në 6.6%.   /os/

The post BERLIN – Gjermania kalon shifrën e tre milionë të papunëve appeared first on Agjencia Telegrafike Shqiptare.