Udhëheqësit politikë në Norvegji kanë dënuar ashpër vendimin “absurd” të udhëheqëses opozitare venezueliane, María Corina Machado, për t’i dhuruar medaljen e saj të Çmimit Nobel për Paqe Donald Trumpit. Ata akuzuan presidentin amerikan si një “ekspozues klasik” që merr merita për punën e të tjerëve. Machado ia dorëzoi medaljen Trumpit në Shtëpinë e Bardhë, duke e cilësuar si “një simbol personal…
Ashley St Clair, nëna e një prej fëmijëve të Elon Musk, ka paditur kompaninë e tij xAI për deepfake-e të seksualizuara të krijuara me imazhin e saj në platformën X. Padia, e depozituar në Nju Jork, pretendon se mjeti i inteligjencës artificiale Grok ka gjeneruar fotografi seksualisht eksplicite të St Clair. Nga ana tjetër, xAI, kompania mëmë e X dhe Grok, ka kundërpaditur St Clair për shkelje të…
Francesco Camarda ndodhet përballë dy vendimeve thelbësore për karrierën e tij, të cilat do t’i marrë në bashkëpunim me Lecce-n, ku aktualisht luan, dhe Milanin, që kontrollon të ardhmen e tij. Vendimi i parë lidhet me shpatullën e dëmtuar: të operohet në fillim të janarit apo të zgjedhë terapinë konservative? Vendimi i dytë është nëse do të kthehet te Milani për muajt e ardhshëm apo do të…
Një grup dypartiak i anëtarëve të Kongresit Amerikan ka vizituar Danimarkën për të shprehur mbështetjen e tyre përballë presionit në rritje nga Presidenti Donald Trump për aneksimin e Groenlandës nga SHBA-ja, një rajon gjysmë-autonom i Danimarkës në Arktik. Delegacioni prej 11 anëtarësh u takua me zyrtarë danezë dhe groenlandezë, përfshirë Kryeministren Mette Frederiksen. Udhëheqësi i grupit…
Të ftuar këtë të enjte në “Mirmbrëma Yje” të Arbana Osmanit ishin jo një, por 4 nga vajzat më të njohura të ekranit, blogeret të njohura dhe për pjesëmarrjen e tyre në Big Brother 1 dhe 2 Beniada Nishani, Jori Delli, Sarah Berisha dhe Dea Michel Hoxha.
Teksa biseda u ndal tek blogerja dhe modelja Beniada Nishani e cila foli hapur dhe për eksperiencën e saj televizive pranë Televizionit Publik Shqiptar si moderatore dhe kritikat që ka marrë si një person “jo adapt” për këtë vend pune duke qenë se nuk fliste një gjuhë shqipe të pastër.
Gjatë bisedës, Arbana Osmani theksoi se Beniada është zakonisht shumë e kujdesshme në mënyrën se si shprehet në intervista, por pas sulmeve të fundit ka zgjedhur të jetë edhe më korrekte dhe më e matur duke shtuar se ka pasur disa zëra kritikë që kanë vënë në dyshim praninë e saj në ekran për shkak të mënyrës së të folurit në shqip.
Dea Michele Hoxha doli në mbrojtje të Beniadës, duke theksuar se pikërisht ky stil i të folurit, i ndikuar nga jeta e saj në Itali, ishte arsyeja pse ajo fitoi dashurinë e publikut shqiptar. Sipas Deas, Beniada ishte pjesë e një formati argëtues dhe jo një emisioni politik apo informativ, ndaj autenticiteti i saj ishte një vlerë dhe jo një pengesë.
Arbana Osmani: Unë mendoj që Beniada përgjithësisht është e kujdesshme në intervista se si shprehet, por mesa vë re unë tani edhe nga fakti që është sulmuar së fundmi po përpiqet që të jetë akoma më korrekte.
Dea Michel: Beni është sulmuar, pse?
Arbana Osmani: Për ta sqaruar për Dean dhe ata që po na ndjekin që ndoshta nuk janë familjar me situatën. Beniada ka punuar në Televizionin Shqiptar, për sa kohë?
Beniada Nishani: E vërtetë, nga janari deri në korrik.
Arbana Osmani: Dhe ka pasur disa zëra, jo një por disa që kanë menduar që kjo nuk është një zgjedhje e duhur dhe ai nuk është një pozicion i merituar nga një vajzë e cila nuk flet mirë akoma gjuhën shqipe se di duhet punoj në një televizion.
Dea Michel: A mund të ngre një kundërargument për këtë se tani u kujtova dhe e kam parë. Beniada i fitoi zemrat e publikut shqiptar si një vajzë që kishte jetuar në Itali dhe pikërisht aty e kishte lezetin tek fakti që i miksonte ndonjëherë ca fjalë dhe njerëzit e adhuronin këtë gjë. Ndonjëherë njerëzit e adhuronin këtë gjë. Ndonjëherë njerëzit për atë gjënë që të duan më shumë më pas kthehen dhe të sulmojnë dhe është shumë e çuditshme. Në fund të ditës Beniada nuk është se bënte një emision për politikë dhe lajme të rënda. Ishte diçka entertaiment dhe me këtë njeriu duhet të argëtohet. Dhe Beniada është një njeri argëtues, prandaj dhe flasin për të.
Në fjalën e saj, Beniada Nishani falënderoi publikisht gazetaren dhe moderatoren Ilda Lumani, nën drejtimin e së cilës ka punuar në RTSH:
“Ka qenë një emision shumë i bukur nën drejtimin e Ilda Lumanit. Dua ta falënderoj publikisht sepse ajo ka besuar shumë tek figura ime. Falë Ildës kam bërë një rrugëtim të mrekullueshëm, jam rritur dhe jam pjekur. Nuk ka njerëz perfektë dhe ndoshta fakti që nuk e flas ende shqipen ashtu siç duhet ta flasë një moderator është ajo që më bën të veçantë.”/mxh
Fëmijët në Ukrainë rrezikojnë hipotermi për shkak të temperaturave të acarta, ndërsa stoqet emergjente të gjeneratorëve elektrikë po shterojnë pas sulmeve ruse ndaj infrastrukturës energjetike, njoftuan agjenci ndërkombëtare ndihme të premten, më 16 janar.
Agjencia e Kombeve të Bashkuara për fëmijët, UNICEF, tha se po përballet me një garë kundër kohës për të rivendosur shërbimet e ujit dhe ngrohjes, të cilat janë dëmtuar rëndë nga sulmet me raketa dhe dronë, teksa afrohet përvjetori i katërt i pushtimit rus të Ukrainës.
“Fëmijët dhe familjet janë në një gjendje të vazhdueshme mbijetese,” tha për gazetarët në Gjenevë Munir Mammadzade, përfaqësues i UNICEF për Ukrainën.
Ai theksoi se njerëzit po përpiqeshin të mbroheshin nga sulmet ndaj ndërtesave të larta, ndërsa temperaturat gjatë natës bien deri rreth minus 18 gradë Celsius.
Presidenti Volodymyr Zelenskiy njoftoi të mërkurën, më 14 janar, se do të shpallë gjendje emergjente në sektorin e energjisë, ndërsa ministri i Energjisë, Denys Shmyhal, tha të premten se Ukraina ka rezerva karburanti për më shumë se 20 ditë.
Kievi dhe rajonet pranë vijës së frontit po përballen me kushtet më të vështira, me mijëra shtëpi në kryeqytet, si dhe në Dnipropetrovsk, Kharkiv, Odesa dhe qytetet e frontit, të mbetura pa elektricitet ose ngrohje për ditë me radhë.
“Pa ngrohje, njerëzit janë në rrezik të lartë për hipotermi, ngrica dhe sëmundje të frymëmarrjes,” tha Jaime Wah, zëvendësdrejtor i Delegacionit në Kiev për Federatën Ndërkombëtare të Kryqit të Kuq dhe Gjysmëhënës së Kuqe, duke shtuar se ndërprerjet e paparashikueshme të energjisë po pengojnë furnizimin me ujë dhe shërbimet shëndetësore./mxh
Kremlini ka përshëndetur të premten sinjalet që, sipas tij, vijnë nga Italia, Franca dhe Gjermania për rifillimin e dialogut me Rusinë mbi luftën në Ukrainë, duke i cilësuar ato si një “ndryshim të rëndësishëm” që përputhet me qëndrimin e Moskës për mënyrën se si duhet të zhvillohet situata.
Zëdhënësi i Kremlinit, Dmitry Peskov, deklaroi se disa vende evropiane po tregojnë gatishmëri për të rihapur kanalet e komunikimit me Rusinë, ndërsa theksoi se Mbretëria e Bashkuar mbetet jashtë këtij qëndrimi.
Ministrja e Jashtme britanike, Yvette Cooper, ka bërë të ditur se Londra nuk mendon se ka ardhur momenti për një riangazhim me Moskën. Në një deklaratë për mediat, ajo u shpreh se nuk ka parë asnjë provë që Rusia synon paqe në Ukrainë.
“Sa i përket Britanisë, po, Britania vazhdon të mbajë një qëndrim radikal,” tha Peskov, duke komentuar dallimet mes qëndrimeve evropiane ndaj Rusisë.
Zëdhënësi i Kremlinit bëri të ditur gjithashtu se Rusia ka një dialog të vazhdueshëm me Shtetet e Bashkuara lidhur me përpjekjet për arritjen e një marrëveshjeje paqeje në Ukrainë, por se një dialog i tillë nuk ekziston aktualisht me qeveritë evropiane./mxh
Këngëtarja dhe producentja britanike PinkPantheress ka publikuar të enjten, më 15 janar, videoklipin e këngës së saj “Stateside”, në bashkëpunim me këngëtaren suedeze Zara Larsson.
Videoklipi hapet me një kalimtar që zbulon një manekin të PinkPantheress në vitrinën e një dyqani të stiluar sipas estetikës së albumit “Fancy That”. Papritur, manekini merr jetë dhe shpërthen në performancë, përpara se të zbulohet se Zara Larsson është shkaktarja e gjithë kaosit. Videoklipi është realizuar nga regjisorja Charlotte Rutherford, e njohur për bashkëpunimet e saj me emra të mëdhenj të muzikës pop si Charli XCX, Katy Perry dhe Little Mix.
Kënga “Stateside” u publikua fillimisht në prill të vitit 2025, ndërsa versioni remix me Zara Larsson doli në tetor 2025 si pjesë e albumit “Fancy Some More?”, një projekt me remikse të albumit të saj “Fancy That”. Në këtë album marrin pjesë edhe artistë të njohur ndërkombëtarë si Anitta, Kylie Minogue dhe grupi koreano-jugor i K-pop-it, SEVENTEEN.
PinkPantheress, emri i vërtetë i së cilës është Victoria Walker, njihet për hitet e saj “Boy’s a Liar Pt. 2” në bashkëpunim me reperen Ice Spice, si edhe këngët “Illegal” dhe “Nice to Meet You” me Central Cee.
Artistja është nominuar në çmimet Grammy 2026 për Albumin më të Mirë Dance/Electronic me “Fancy That” dhe për Regjistrimin më të Mirë Dance Pop me këngën “Illegal”.
Edhe Zara Larsson është pjesë e nominimeve të Grammy 2026, e nominuar për Regjistrimin më të Mirë Dance Pop me këngën e saj “Midnight Sun”./mxh
Pas njoftimit të Gjykatës Speciale se nga 9 deri më 18 shkurt do të zhvillohen deklaratat përmbyllëse në procesin gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit, të cilët ndodhen në paraburgim në Hagë që mbi pesë vjet, Partia Demokratike e Kosovës thekson edhe një herë nevojën që ky proces, i shoqëruar me problematika serioze, të përmbyllet me drejtësi.
PDK thekson se ky proces është karakterizuar me zvarritje të panevojshme, paqartësi procedurale dhe vendime që kanë ngritur shqetësime të vazhdueshme mbi standardet e drejtësisë dhe respektimin e të drejtave themelore të njeriut.
“Këto rrethana kanë cenuar perceptimin e drejtësisë së barabartë dhe kanë rënduar padrejtësisht mbi çlirimtarët dhe ish-udhëheqësit e shtetit tonë, të cilët tashmë kanë kaluar një periudhë të gjatë në paraburgim”, thuhet në njoftim.
PDK thekson tutje se në këtë fazë përmbyllëse është thelbësore që gjykimi të përqendrohet ekskluzivisht te drejtësia e paanshme, te faktet dhe te provat, duke u larguar nga çdo qasje politike, interpretuese apo spekulative që e ka shoqëruar këtë proces gjatë këtyre pesë viteve.
“Dëshmitarët kyç në këtë proces gjyqësor kanë hedhur poshtë në mënyrë të qartë pretendimet kryesore të aktakuzës, duke rrëzuar çdo dyshim mbi fajësi individuale, grupore apo komanduese. Këto dëshmi kanë kontribuar ndjeshëm në sqarimin e rrethanave faktike dhe kanë rrëzuar bazën e akuzave të prokurorisë.
Partia Demokratike e Kosovës mbetet e përkushtuar ndaj sundimit të ligjit, paqes dhe drejtësisë, duke besuar se vetëm një vendim i drejtë dhe profesional mund të kontribuojë në mbylljen e këtij kapitulli të rëndësishëm për Kosovën, drejtësinë ndërkombëtare dhe të ardhmen e rajonit tonë”, thuhet tutje në reagimin e PDK-së. /Telegrafi/
Ministria e Punëve të Brendshme ka publikuar një udhëzues përmes së cilës njoftohen shtetasit e huaj për detyrimet ligjore gjatë hyrjes, qëndrimit dhe punësimit në Republikën e Kosovës.
Një njoftimin e MPB-së bëhet e ditur se Ligji për të Huajt, i publikuar në Gazetën Zyrtare të Republikës së Kosovës fillon së zbatuari nga 15 marsi 2026.
Lexoni të plotë njoftimin e MPB-së:
Të dashur vizitorë, mirësevini në Republikën e Kosovës! Ju dëshirojmë qëndrim të këndshëm në vendin tonë. Jemi të obliguar të ju njoftojmë me të drejtat dhe obligimet për qytetarët e huaj e mysafirë në Republikën e Kosovës, për të bërë edhe qëndrimin tuaj në shtetin tonë më të lehtë e në përputhje me rregullat e ligjet e vendit tonë.
Ju lutem vini re që:
Me rastin e hyrjes në Republikën e Kosovës, i huaji duhet:
të posedojë dokument të vlefshëm udhëtimi;
të posedojë vizë ose leje qëndrimi, kur kërkohet;
të respektojë qëllimin dhe afatin e qëndrimit;
të lajmërojë adresën e qëndrimit në afat prej tri (3) ditësh nga dita e hyrjes, në kufi apo në stacionin më të afërt policor;
të ketë mjete të mjaftueshme për jetesë;
të respektojë ligjet e Republikës së Kosovës;
të mos ketë ndalim të hyrjes dhe qëndrimit në Republikën e Kosovës;
të mos përbëjë kërcënim për sigurinë shtetërore, rendin dhe shëndetin publik.
Me rast të qëndrimit afatshkurtër:
I huaji mund të qëndrojë deri në nëntëdhjetë (90) ditë brenda periudhës kohore prej njëqind e tetëdhjetë (180) ditë pa vizë ose me vizë kur kjo kërkohet,
Nuk i lejohet puna/punësimi gjatë kësaj periudhe pa leje pune;
Çdo qëndrim mbi 90 ditë kërkon aplikim për lejeqëndrim.
Me rast të qëndrimit në Republikën e Kosovës për çështje punësimi:
kërkohet leje qëndrimi e përkohshme për punë;
kërkohet leje pune;
Kërkohet licencim paraprak në rast të aplikimit për leje pune për profesionin që kërkon licencë;
puna pa leje është e ndaluar.
Aplikimi për leje të punës bëhet pranë Agjencisë së Punësimit.
Qëndrimi për qëllime të tjera:
Për çështje studimi, ribashkimi familjar ose arsye tjera humanitare, kërkime shkencore dhe rrethana tjera të parapara me ligj, kërkohet:
pajisja me lejeqëndrim të përkohshëm dhe
plotësimi i kritereve tjera ligjore në varësi nga qëllimi i qëndrimit.
Aplikimi mund të bëhet në misione diplomatike/konsullore ose në DSHAM, në rastet kur i huaji ka hyrë në Republikën e Kosovës dhe nuk ka nevojë për vizë.
Pasoja në rast shkeljeje
Atëherë kur nuk veprohet në pajtim me përcaktimet ligjore që lidhen me hyrjen, lëvizjen, qëndrimin dhe punësimin e të huajve, autoritetet kompetente mund të marrin masat e përcaktuara me ligj, të cilat mund të përfshijnë por nuk kufizohen në:
anulimin e lejeqëndrimit,
shqiptimin e gjobës,
urdhërimin e largimit dhe
ndalimin e hyrjes në territorin e Republikës së Kosovës.
Për më shumë informacion mund t’i referoheni Ligjit Nr.04/L-219 për të Huajt, të publikuar në Gazetën Zyrtare të Republikës së Kosovës.
MPB njofton se zbatimi i plotë fillon nga data 15 mars 2026.
“Çdo hyrje pas kësaj date që rezulton me mosparaqitje sipas rregullave të listuara brenda këtij udhëzuesi, do rezultojë me ndalim hyrje në Republikën e Kosovës”, thuhet në njoftim. /Telegrafi/
Kryeministri i Shqipërisë, Edi Rama gjatë fjalës së mbajtur në mbledhjen e grupit të PS e vuri theksin tek siguria ushqimore duke thënë se pavarësisht punës së bërë, ende nuk janë arritur standardet e BE.
Rama u shpreh se do të kërkojë një fazë të ndërmjetme, 5 vite pas anëtarësimit në BE, për të plotësuar kriteret për këtë sektor, ndërsa theksoi se nuk do të falet asnjë shkelje në këtë aspekt.
“Po përpiqemi të fitojmë një fazë të ndërmjetme prej 5 vitesh. Por vitet kalojnë shpejt dhe përgatitje duhet të fillojnë. Po të kemi parasysh kur ne kemi marrë detyrën rrugët e Shqipërisë, ishin tregje ushqimore dhe thertore. Duke u kthyer pas në vitin 2013, të gjithë të kalonin filmin e kujtesës, gjënë e gjallë që therej në rrugë. Apo të gjitha autostradat e Shqipërisë që veçse ishin lënë rrugëve ishin të kufizuara nga tezga dhe tregje informale ushqimore.
Që nga ajo kohë ka përparim por në raporte me kriteret e sigurisë ushqimore të BE jemi shumë larg. Por në momentin e anëtarësimit dhe kur përfundon periudha e ndërmjetme asnjë ushqim i prodhuar në Shqipëri nuk mund të shitet veçse në Shqipëri. Pra edhe në Shqipëri ushqimet mund të bllokohen sepse nuk përmbushin kriteret e sigurisë dhe në skenarit më pesimist do të thotë që gjithçka që hahet të importohet. Pra duhet punë dhe vendosmëri, nga ana jonë si vendimmarrës, për të mos falur asgjë dhe askënd në emër të nevojës që të vazhdojë të punojë. Të gjithë do vendosen në pozita të forta përgjegjësie. Pra në rastin më të mirë janë 10 vite përpara”, tha ai, raporton euronews.al.
Në Qendrën e Numërimit dhe Rezultateve (QNR) po vazhdon numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.
Ndryshime të votave ka në të gjitha partitë, në Lëvizjen Vetëvendosje, Partinë Demokratike të Kosovës, Lidhjen Demokratike të Kosovës, etj.
Te disa kandidatë vërehet rënie e numrit të votave, e te disa rritje.
Në linkun e KQZ-së, nga të dhënat e orës 10:50, del se lideri i LVV-së ka rënie për 86 vota, Glauk Konjufca ka rënie për 56 vota, Donika Gërvalla minus 6 vota, Avni Dehari – 29 vota, Albulena Haxhiu -18 vota.
Rritje të votave ka Hekuran Murati për 4 vota, Mimoza Kusari plus 7 vota, Shqipe Selimi plus 36 vota.
Në PDK rënie ka Bedri Hamza për 21 vota, Uran Ismaili – 20, Vlora Çitaku ka rënie për 11 vota, Enver Hoxhaj – 14.
Rritje të votave ka Ganimete Musliu për 10 vota, Përparim Gruda për 31 vota, Elmi Reçica për 27 vota.
Ndërkaq, te Lidhja Demokratike e Kosovës rënie të votave ka Lumir Abdixhiku për 20 vota, Kujtim Shala për 7 vota, Hykmete Bajrami minus 8 vota, Anton Quni – 16 vota.
Rritje të votave në LDK ka Jehona Lushaku për 1 votë, Adelina Thaçi Meta +3 vota, Visar Azemi +3 vota, etj.
Ndryshimin e votave pas rinumërimit mund ta përcillni në këtë LINK. /Telegrafi/
Sektori i Hetimeve të Kryeqytetit, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në identifikimin e një personi që dyshohet për grabitje.
Policia thekson se për çdo informatë që mund të identifikojë të dyshuarin qytetarët mund t’i shkruajnë Policisë.
“Personi i dyshuar kërkohet për përfshirje në veprën penale ‘Grabitje’. Të nderuar, për çdo informatë që mund të çojë në identifikimin e tij, ju lusim të kontaktoni policinë në numrin e telefonit: 192 ose përmes emailit: info@kosovopolice.com”, thuhet në njoftim. /Telegrafi/
Një sasi e konsiderueshme prej mbi 160 kilogramësh kokainë është sekuestruar nga Guardia di Finanza italiane gjatë një operacioni në një zonë industriale të provincës së Bergamos, ndërsa dy shqiptarë kanë përfunduar në pranga.
Droga ishte fshehur në shtatë çanta të mëdha dhe po transportohej me një automjet të tonazhit të rëndë (TIR), gati për t’u hedhur në tregun lokal, me një vlerë të përllogaritur rreth 20 milionë euro, raportojnë mediat italiane, përcjell A2.
Sipas autoriteteve, pas shërbimeve të posaçme të vëzhgimit dhe analizës së riskut në zonat industriale dhe tregtare të provincave Brescia dhe Bergamo, efektivët vunë re lëvizje të dyshimta.
Shoferi i mjetit u pa teksa hipte në rimorkio, duke pritur mbërritjen e një automjeti tjetër që iu afrua menjëherë. Gjatë momentit të dorëzimit të shtatë çantave voluminoze, forcat e rendit ndërhynë dhe gjetën 150 pako me kokainë, me peshë totale mbi 160 kilogramë.
Dy të dyshuarit, të shqiptarë, u arrestuan dhe u dërguan në burgun e Bergamos, në dispozicion të autoriteteve gjyqësore italiane.
Një aksident i rëndë ka ndodhur mbrëmjen e së enjtes në Durrës, te Ura e Dajlanit. Një automjet tip BMW X5 ka dalë nga rruga dhe ka rënë nga ura, duke përfunduar rreth 30 metra poshtë saj.
Si pasojë e aksidentit, pasagjerja 18-vjeçare ka humbur jetën, ndërsa drejtuesi i mjetit, 26 vjeç, ka mbetur i plagosur rëndë dhe është transportuar drejt spitalit për ndihmë mjekësore. Po ashtu janë plagosur edhe dy këmbësorë, raporton euronews.al.
“Rreth orës 22:15, të datës 15.01.2026, te Ura e Dajlanit, në lagjen nr. 4, automjeti me drejtues shtetasin A. Xh., 26 vjeç, banues në Fier, ka rënë nga mbikalimi. Si pasojë e aksidentit, ka ndërruar jetë pasagjerja, shtetasja V. G., 18 vjeçe, ndërsa janë dëmtuar drejtuesi i automjetit, shtetasi A. Xh., si dhe dy këmbësorë, shtetasit T. T., 33 vjeç, dhe A. M., 35 vjeç, të cilët ndodhen në spital nën kujdesin e mjekëve”, njofton policia.
Nga burime thuhet se është dashur ndërhyrja e forcave zjarrfikëse për nxjerrjen e dy të rinjve që ndodheshin brenda automjetit.
Grupi hetimor po punon për të zbardhur rrethanat dhe shkaqet e aksidentit.
Sot mbahet seanca gjyqësore për sulmin në Banjskë ndaj të akuzuarve Blagoje Spasojeviq, Vladimir Toliq dhe Dushan Maksimoviq.
Seanca nis në ora 09:30.
Ndryshe, Prokuroria Speciale, më 11 shtator 2024 ka ngritur aktakuzë kundër Milan Radoiçiqit dhe 44 të tjerëve, për sulmin terrorist të 24 shtatorit 2023 në Banjskë të Zveçanit.
Aktakuza e Prokurorisë Speciale të Kosovës për sulmin e armatosur në Banjkë i ngarkon shumicën e tyre me terrorizëm dhe krime të rënda kundër rendit kushtetues dhe sigurisë së Republikës së Kosovës.
Deri tani, të arrestuar dhe nën masën e paraburgimit për këtë rast janë: Blagoje Spasojeviq, Vladimir Toliq dhe Dushan Maksimoviq.
Radoiçiq akuzohet, gjithashtu, për lehtësimin dhe financimin e kryerjes së terrorizmit dhe pastrimit të parave, ndërsa i gjithë grupi akuzohet se me përdorim të dhunës dhe armëve të rënda, ka tentuar të ndajë pjesën veriore të Kosovës – ku gjenden komunat me shumicë serbe – dhe ta bashkojë atë me Serbinë.
Aktakuza e përshkruan Radoiçiqin si “udhëheqës të grupit terrorist”.
Në aktakuzë thuhet se më 24 shtator të vitit 2023, pasi bllokoi rrugën për në urën e fshatit me dy kamionë, ai dhe pjesëmarrësit e tjerë u fshehën dhe sulmuan oficerët e Policisë së Kosovës që shkuan për t’i larguar kamionët dhe për të liruar rrugën.
Në sulm mbeti i vrarë polici Afrim Bunjaku, ndërsa u plagosën policët: Alban Rashiti, Çlirim Shaqiri, Mirsad Kryeziu dhe Sedat Dushi.
Sipas aktakuzës, sulmi zgjati deri në orën 15:00, “kur shumica dërrmuese e grupit iku përmes rrugëve malore drejt Republikës së Serbisë”.
Në aktakuzë thuhet se ata ishin “trajnuar profesionalisht” dhe se kishin hyrë në Kosovë në mënyrë të paligjshme nga Serbia, përmes rrugëve malore, me dhjetëra makina, disa prej të cilave të blinduara dhe të ngarkuara me armë të rënda, municione, raketahedhës, eksplozivë, uniforma ushtarake kamufluese dhe pajisje të tjera ushtarake logjistike. /Telegrafi/
Shqipëria të premten do të ndikohet nga kushte atmosferike relativisht të qëndrueshme.
Shërbimi Meteorologjik Ushtarak bën të ditur se moti parashikohet alternime vranësirash mesatare dhe hera-herës deri të dendura në pjesën më të madhe të territorit, pas orëve të mesditës mot me kthjellime dhe vranësira kalimtare.
Në veriperëndim – perëndim, pjesërisht në qendër dhe në ekstremin jugor në orët e mëngjesit deri në orët e mesditës reshje shiu të herëpashershme me intensitet të ulët të karakterit lokal.
Ndërkaq, mjegull do të ketë përgjatë zonave luginore në orët e mëngjesit e të mbrëmjes.
Era do të fryjë me drejtim verilindje– juglindje, me shpejtësi mesatare 5 m/s, përgjatë vijës bregdetare dhe zonat luginore era me shpejtësi deri në 9 m/s.
Ministri i Jashtëm danez Lars Lokke Rasmussen, duke folur pas largimit nga Shtëpia e Bardhë, tha se një marrje e Grenlandës nga SHBA-të nuk ishte absolutisht e nevojshme.
Shtëpia e Bardhë tha të enjten se vendosja e trupave evropiane në Groenlandë nuk ka ndikim në planet e Presidentit të SHBA-së, Donald Trump, për të marrë kontrollin e ishullit Arktik nga Danimarka.
“Nuk mendoj se trupat në Evropë ndikojnë në procesin e vendimmarrjes së presidentit, as nuk ndikojnë fare në qëllimin e tij për blerjen e Grenlandës”, tha Sekretarja e Shtypit Karoline Leavitt kur u pyet për vendosjen e tyre.
Komentet e saj vijnë në të njëjtën ditë që personeli ushtarak evropian filloi të mbërrinte në Grenlandë , disa orë pasi një takim midis zyrtarëve amerikanë, danezë dhe të Groenlandës në Uashington dështoi të zgjidhte atë që ministri i jashtëm danez e quajti “mosmarrëveshje themelore” mbi ishullin e pasur me minerale Arktik.
Franca, Suedia, Gjermania dhe Norvegjia njoftuan të mërkurën se do të vendosnin personel ushtarak si pjesë e një misioni zbulimi në kryeqytetin e Groenlandës, Nuuk./mxh
Login
