TIRANË, 15 janar /ATSh/ Kolegji i Posaçëm i Apelimit, vendosi sot të konfirmoi vendimin për shkarkimin nga detyra të prokurores së Tiranës, Ornela Rrumbullaku.

Vendimi u mor në mënyrë unanime nga trupi gjykues i Kolegjit, i kryesuar nga Albana Shtylla, me relatore Natasha Mulaj dhe anëtarë, Sokol Çomo, Ina Rama e Rezarta Schuetz, pas shqyrtimit në dhomë këshillimi të ankimit të Rrumbullakut kundë vendimarrjes së Komisionit.

‘Trupi gjykues i Kolegjit të Posaçëm të Apelimit, i përbërë nga Albana Shtylla kryesuese, Natasha Mulaj relatore, Ina Rama, Rezarta Schuetz, Sokol Çomo anëtarë, shpalli vendimin për çështjen nr. 51/2024, datë 11.12.2024, që i përket ankimit të subjektit të rivlerësimit Ornela Rrumbullaku kundër vendimit të Komisionit të Pavarur të Kualifikimit nr. 792, datë 04.09.2024.

Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 792, datë 04.09.2024 të Komisionit të Pavarur të Kualifikimit, që i përket subjektit të rivlerësimit Ornela Rrumbullaku. Ky vendim është përfundimtar dhe ka efekt të menjëhershëm”, thuhet në vendim.

Ornela Rrumbullaku përfundoi studimet e Magjistraturës në vitin 2006 dhe pas një periudhe stazhi në Prokurorinë e Tiranës, u emërua në Prokurorinë e Rrethit Kavajë. Në vitin 2019, Rrumbullaku u komandua si këshilltare pranë Këshillit të Lartë të Prokurorisë. Deri në momentin e shkarkimit nga detyra ajo e ushtronte funksionin në Prokurorinë e Juridiksionit të Përgjithshëm në Tiranë.

/a.f/r.e/

The post KPA konfirmon shkarkimin nga detyra të prokurores Ornela Rrumbullaku appeared first on Agjencia Telegrafike Shqiptare.

PRISHTINË, 15 janar /ATSh/ Bashkimi Evropian ka nisur heqjen e masave ndaj Kosovës, duke hapur rrugën për lirimin e mbi 400 milionë eurove në mbështetje financiare për vendin.

Zëdhënësja e Komisionit Evropian, Anitta Hipper, në një përgjigje për KosovaPress, thotë se krahas 216 milionë eurove që janë liruar në dhjetor të vitit 2025, synojnë që shumë shpejt të lirojmë edhe 205 milionë euro në fillim të këtij viti.

Ajo tha se ky vendim është marrë pas ndryshimit të qetë dhe të rregullt të qeverisjes lokale në veri të Kosovës, pas zgjedhjeve të fundit lokale.

Hipper tregoi në detaje edhe se në cilat projekte do të përfitojë Kosova.

“Pas transferimit të qetë dhe të rregullt të qeverisjes lokale në veri pas zgjedhjeve të fundit lokale, ne po heqim masat për Kosovën. Prandaj, kemi liruar afërsisht 50% të ndihmës financiare që arrin në rreth 216 milionë euro. Kjo do të lejojë nënshkrimin e kontratave për katër projekte (që përfaqësojnë gjithsej 34,6 milionë euro kontribut të BE-së) dhe fillimin e zbatimit; për të përfunduar programimin e të gjitha fondeve të mbetura IPA III të destinuara për Kosovën (181 milionë euro; miratimi i planifikuar i vendimit të financimit të Komisionit në pranverën e vitit 2026 që do të lejonte që projektet e para të fillonin në gjysmën e dytë të vitit 2026). Për më tepër, Komisioni synon të lirojë shumën e mbetur prej 205 milionë eurosh në fillim të këtij viti, në përputhje me Përfundimet e Presidencës për Zgjerimin të miratuara më 16 dhjetor”, thuhet në përgjigjen e zëdhënëses së BE-së për KosovaPress.

Gjatë së enjtes, edhe Komisioni Evropian (KE) ka konfirmuar se pret heqjen e plotë të masave ndaj Kosovës në javët e ardhshme.

Jan Gert Koopman, drejtor i Drejtorisë për Zgjerim në KE, theksoi se bëhet fjalë për lirimin e më shumë se 400 milionë eurove, përfshirë edhe masat që KE-ja i kishte hequr fillimisht në dhjetor të vitit të kaluar.

Ai shpjegoi se institucionet po punojnë paralelisht në programimin e mjeteve dhe në kontraktimin e projekteve që do të financohen.

Bashkimi Evropian (BE) vendosi masa ndëshkuese ndaj Kosovës më 2023. Masat u vendosën si përgjigje për shkak të tensioneve në veriun e Kosovës, të banuar me shumicë serbe, pasi kryetarët shqiptarë të katër komunave në veri morën mandatin.

/KosovaPress//r.e/

The post Nis heqja e masave nga BE, mbi 400 milionë euro mbështetje për Kosovën appeared first on Agjencia Telegrafike Shqiptare.

TIRANË, 15 janar/ATSh/ Sulmuesi i Kombëtares, Rey Manaj pritet të firmosë me klubin e Superligës së Kinës, Zhejiang.

Futbollisti 28-vjeçar, sipas medieve, i ka thënë po ofertës së skuadrës nga Kina, e cila i ka ofruar një pagë prej 4 milionë eurosh në sezon, si dhe bonuse për dy sezonet e ardhshme.

Manaj mbyll kështu aventurën e tij te Sharjah FC, në Emiratet e Bashkuara Arabe, ku skuadra renditet në vendin e 11-të. Këtë sezon, Manaj ka shënuar dy gola në 11 ndeshje të luajtura, çka ka mjaftuar për të tërhequr vëmendjen e klubit kinez.

Manaj ka pasur oferta edhe nga Turqia, por skuadra kineze duket se ka bindur ambiciet e sulmuesit kuqezi.

/a.f/r.e/

The post Manaj drejt klubit kinez Sharjah FC appeared first on Agjencia Telegrafike Shqiptare.

TIRANË, 15 janar /ATSh/ Presidentja e Kosovës, Vjosa Osmani ka dekoruar sot Hasan Arat me Medaljen Presidenciale të Meritave.

Në një njoftim për medien, zyra e shtypit e presidentes së Kosovës informon se Hasan Arat u dekorua nga presidentja Osmani me Medaljen Presidenciale të Meritave, në shenjë mirënjohjeje institucionale për kontributin e tij të jashtëzakonshëm në zhvillimin dhe promovimin e sportit, si dhe për mbështetjen e vazhdueshme ndaj Republikës së Kosovës.

Gjatë ceremonisë solemne, vijon njoftimi, Presidentja Osmani theksoi se Arat është një personalitet i shquar i sportit dhe jetës publike ndërkombëtare, i cili me vizion, përkushtim dhe integritet ka dhënë një kontribut të çmuar edhe për shtetin e Kosovës. Ajo veçoi angazhimin e tij të rëndësishëm në mbështetjen e sportit kosovar në arenën ndërkombëtare.

Një vlerësim i veçantë iu kushtua rolit vendimtar të Arat në procesin e kandidaturës së Kosovës për organizimin e Lojërave Mesdhetare Prishtina 2030, një ngjarje historike për sportin kosovar dhe për afirmimin ndërkombëtar të shtetit të Kosovës.

Pas dekorimit nga Presidentja e Republikës së Kosovës, Vjosa Osmani, Arat ka theksuar se ky organizim përfaqëson jo vetëm një ngjarje madhore sportive, por edhe një moment të rëndësishëm për diplomacinë sportive dhe afirmimin ndërkombëtar të shtetit të Kosovës.

Duke folur për vlerën simbolike dhe praktike të Lojërave Mesdhetare, Arat ka theksuar se Kosova tashmë ka dëshmuar se është një vend me potencial të jashtëzakonshëm sportiv.

“Është një nder i madh për mua të marr këtë medalje nga Presidentja e Republikës së Kosovës. Dhe u uroj gjithë të mirat popullit të Kosovës që të kenë lojëra të shkëlqyera të Mesdheut 2030 në Prishtinë. Kosova është një vend i madh në sport dhe këto Lojëra Mesdhetare do të sjellin një trashëgimi të madhe për vendin dhe do të frymëzojnë brezat e rinj që t’i ndjekin ato. Është një ditë e madhe për diplomacinë sportive që lidh vendet, sjell paqe, solidaritet dhe frymëzon brezat e rinj. Kosova ka një potencial të madh dhe kjo e vërtetoi, Lojërat Mesdhetare 2030 në Prishtinë vërtetojnë se do të jenë lojëra fantastike dhe një njohje e madhe për shtetin e Kosovës”, theksoi Arat.

Në vijim, ai u ndal te dashuria e popullit të Kosovës për sportin, duke e cilësuar atë si një element kyç që lidh shoqëritë dhe shtetet mes vete. Ai thekson se sporti shërben si një gjuhë universale e dialogut dhe solidaritetit, e cila historikisht ka ndihmuar edhe në njohjen dhe afirmimin e Kosovës në arenën botërore.

“E dini, populli i Kosovës e do shumë sportin dhe sporti është një dialog ndërkombëtar që lidh vendet dhe njerëzit me njëri-tjetrin. Ju e keni parë kur morët medaljen e artë në vitin 2016, njohja e Kosovës ishte një nga më të mirat në atë kohë. Pra, ne patëm të njëjtën përvojë për Turqinë dhe sporti është gjithmonë një lidhje e madhe diplomatike dhe solidariteti i mbarë botës. Prandaj mendoj se është shumë e rëndësishme për brezat që do të vijnë. Kjo trashëgimi do të sjellë një frymëzim fantastik te të rinjtë. Për të rinjtë, kjo është shumë e rëndësishme”, deklaroi Arat.

Ai ka theksuar se Lojërat Mesdhetare janë ndër organizimet më të mëdha sportive dhe kërkojnë përgatitje të kujdesshme dhe profesionale. Sipas tij, mënyra se si do të organizohen këto lojëra do të përcaktojë trashëgiminë që do të mbetet për dekada, ndaj kujdesi, planifikimi dhe standardet e larta janë thelbësore për suksesin e tyre.

Arat është biznismen dhe adminsitrator sportiv nga Turqia, por me prejardhje shqiptare. Në karrierën e tij sportive ka qenë basketbollist, ndërsa si udhëheqës është anëtar i Komitetit Olimpik të Evropës, ish-nënpresident i Komitetit Olimpik të Turqisë,  kryetar i komisionit koordinues për Lojërat Evropiane Krakoë 2023, udhëheqës i kandidaturës së Stambollit për organizimin e LO 2020, ish-anëtar i komisioneve të ndryshme në IOC e ANOC, anëtar i Komitetit Ekzekutiv në Federatën Botërore të Atletikës, etj. Së fundi (2023-2024), për më shumë se një vit ishte president i klubit të madh turk të futbollit, Beshiktash.

/a.f/r.e/

The post Osmani dekoron Hasan Arat me Medaljen Presidenciale të Meritave appeared first on Agjencia Telegrafike Shqiptare.

TIRANË, 15 janar/ATSh/ Reparti i Xhenios i Forcave të Armatosura ka riparuar urën e Xhyrës në Librazhd, duke rikthyer në normalitet qarkullimin për rreth 2 000 banorë të kësaj zone.

Ministri i Mbrojtjes, Pirro Vengu, gjatë një inspektimi të urës së rivënë në funksion pas dëmtimeve të shkaktuara nga reshjet, bëri të ditur se puna është realizuar në kohë rekord.

Vengu nënvizoi se të gjitha strukturat e emergjencave, Forcat e Armatosura dhe bashkitë janë të angazhuara në rehabilitimin e zonave të dëmtuara nga rrëshqitjet e dherave, si edhe të infrastrukturës kritike që lidh zonat me njëra-tjetrën.

Ai theksoi se zona e Xhyrës ka një rëndësi të veçantë edhe për turizmin. “Këtu ka bujtina, verë, kulinari dhe është një zonë mjaft atraktive për turizmin”, u shpreh Vengu.

Ministri bëri të ditur se puna po zhvillohet paralelisht në disa qarqe, si në Selenicë të Vlorës, Gjirokastër dhe Delvinë. Ndërkohë, ndërhyrjet kanë përfunduar në Laç dhe Shkodër, ndërsa mbeten për t’u realizuar dy ura në Tiranë, në zonën e Baldushkut, si dhe në Elbasan e Librazhd, ndër të tjera.

Vengu kujtoi gjithashtu se në buxhetin e vitit 2026 Ministria e Mbrojtjes ka çelur thirrjen për infrastrukturën parandaluese, ku përfshihen edhe urat, jo vetëm ato të tipit “bailey”, por edhe ura klasike me betonarme, me qëllim përballimin e kushteve të vështira.

Vendi ynë u përfshi ditët e fundit nga reshje intensive shiu dhe bore, të cilat shkaktuan problematika në qarkullim, si edhe rrëshqitje dheu në disa akse rrugore, duke bllokuar ose kufizuar lëvizjen e automjeteve.

/a.f/r.e/

The post Riparohet ura e Xhyrës në Librazhd, Vengu: Sigurojmë infrastrukturën kritike pas reshjeve intensive appeared first on Agjencia Telegrafike Shqiptare.

PRISHTINË, 15 janar /ATSh/ Dhoma e Specializuar në Hagë ka njoftuar se nga data 9 deri më 13 shkurt dhe më 16 dhe 18 shkurt, do të paraqiten para gjykatës deklaratat përmbyllëse në gjykimin e Hashim Thaçit, Kadri Veselit, Rexhep Selimit dhe Jakup Krasniqit.

Seancat janë planifikuar të mbahen nga ora 09:00 deri në orën 16:30.

“Rendi i ditës më poshtë buron nga Njoftimi i Trupit Gjykues në lidhje me Mbylljen e Procedurës së Paraqitjes së Provave të datës 18 dhjetor 2025. Ky rend dite bazohet në vlerësimet aktuale dhe mund të ndryshojë, për shembull nëse një palë ka nevojë për më pak kohë seç mendohej. E hënë, 9 shkurt: Deklarata Përmbyllëse e Prokurorisë. E martë, 10 shkurt: Deklarata Përmbyllëse e Prokurorisë; Deklarata Përmbyllëse e Mbrojtjes së Viktimave. E mërkurë, 11 shkurt: Deklarata Përmbyllëse e Mbrojtjes së Thaçit; Deklarata Përmbyllëse e Mbrojtjes së Veselit. E enjte, 12 shkurt: Deklarata Përmbyllëse e Mbrojtjes së Veselit; Deklarata Përmbyllëse e Mbrojtjes së Selimit. E premte: 13 shkurt: Deklarata Përmbyllëse e Mbrojtjes së Selimit; Deklarata Përmbyllëse e Mbrojtjes së Krasniqit. E hënë, 16 shkurt: Deklarata Përmbyllëse e Mbrojtjes së Krasniqit; pyetje të mundshme nga Trupi Gjykues. E mërkurë, 18 shkurt: Përgjigje nga palët dhe deklarata nga të akuzuarit”, thuhet në njoftim.

Historiku i çështjes

Aktakuza fillestare kundër katër të akuzuarve u konfirmua më 26 tetor 2020, dhe u ndryshua më 3 shtator 2021, 29 prill 2022, dhe 30 shtator 2022. Versioni me më pak redaktime i aktakuzës u dorëzua më 27 shkurt 2023. Kjo është aktakuza në fuqi në këtë çështje.

Secili prej të akuzuarve akuzohet mbi bazën e përgjegjësisë penale individuale për gjashtë akuza që lidhen me krime lufte.

Në aktakuzë thuhet se krimet për të cilat janë ngritur akuza janë kryer nga të paktën marsi deri në shtator 1999 dhe kanë ndodhur në disa vende në Kosovë dhe në Kukës dhe Cahan, në veri të Shqipërisë.

Pas arrestimit të tyre nga Prokurori i Specializuar, Hashim Thaçi, Kadri Veseli, Rexhep Selimi dhe Jakup Krasniqi u transferuan në objektin e paraburgimit të Dhomave të Specializuara të Kosovës në Hagë më 4 dhe 5 nëntor 2020.

Gjykimi filloi më 3 prill 2023 me deklaratën hyrëse të Zyrës së Prokurorit të Specializuar (ZPS). ZPS-ja përfundoi paraqitjen e provave të saj më 15 prill 2025. Mbrojtja e Viktimave që përfaqëson 155 viktima pjesëmarrëse, paraqiti provat e saj në korrik 2025, dhe Mbrojtja e Thaçit dhe Mbrojtja e Krasniqit paraqitën provat e tyre nga shtatori deri në dhjetor 2025. Trupi Gjykues mbylli procedurën e paraqitjes së provave më 19 dhjetor 2025. Në këtë çështje, 134 dëshmitarë kanë dhanë dëshmi në gjykatë, 125 të thirrur nga Prokuroria, dy të thirrur nga Mbrojtja e Viktimave dhe shtatë të thirrur nga Mbrojtja. Gjithashtu, 164 deklarata dëshmitarësh u pranuan vetëm në formë të shkruar.

Pas deklaratave përmbyllëse, Trupi Gjykues do të vijojë me kuvendimet për nxjerrjen e aktgjykimit. Aktgjykimi duhet të shpallet brenda 90 ditësh nga mbyllja e paraqitjes së provave. Në rast se për shkak të rrethanave kërkohet kohë shtesë, ky afat mund të zgjatet me 60 ditë të tjera.

Data dhe ora e gjithë seancave publike të planifikuara mund të gjendet në kalendarin e gjykatës në faqen e internetit të DhSK-së. Ndryshimet e mundshme të seancave të planifikuara të përshkruara në këtë informim do të pasqyrohen në kalendar.

/KosovaPress//r.e/

The post Gjyqi ndaj ish-krerëve të UÇK-së në Hagë, datat e deklaratave përmbyllëse appeared first on Agjencia Telegrafike Shqiptare.

TIRANË, 15 janar/ATSH/ E ngarkuara me punë e Ambasadës së Shteteve të Bashkuara të Amerikës në Tiranë, Nancy VanHorn gjatë një aktiviteti për promovimin e teknologjisë amerikane të komunikimit, citoi fjalët e presidentit të ShBA-së, Donald Trump, duke theksuar se “siguria ekonomike është siguri kombëtare”.

Ambasada e ShBA-së në Tiranë, në një postim në rrjetet sociale ndau citimin e VanHorn: gjatë aktivitetit. “Siç ka thënë Presidenti Trump, ‘siguria ekonomike është siguri kombëtare’. Ky parim është veçanërisht i rëndësishëm për sigurinë publike dhe infrastrukturën kritike, ku teknologjia që zgjedhin vendet ndikon drejtpërdrejt në qëndrueshmërinë, sovranitetin dhe sigurinë e qytetarëve”, u shpreh e ngarkuara me punë, Nancy VanHorn, gjatë aktivitetit për promovimin e teknologjisë amerikane të komunikimit.

Deklarata e VanHorn vjen pas vendimit të ShBA-ve për pezullimin e dhënies së vizave për 75 vende, mes të cilave përfshihen Shqipëria dhe Kosova.

Ambasada e ShBA-së në Tiranë ka sqaruar se cilët qytetarë shqiptarë mund të vijojnë të udhëtojnë drejt ShBA-së dhe cilat kategori janë të ndaluara.

Sipas njoftimit të ambasadës amerikane, shtetasit shqiptarë që disponojnë vizë amerikane lejohen të udhëtojnë drejt ShBA-së vetëm për qëllime turizmi, pushimesh, blerjesh, takimesh biznesi ose vizitash te miqtë dhe të afërmit.

Ambasada thekson se nuk lejohet udhëtimi drejt ShBA-së me qëllim lindjen e fëmijës, studimin për një diplomë apo punësimin.

Departamenti Amerikan i Shtetit ka marrë vendim për pezullimin e vizave të emigrantëve për 75 vende, ku përfshihen edhe Shqipëria dhe Kosova.

“Është përgjegjësia juaj ta përdorni vizën tuaj në mënyrë korrekte”, deklaron Ambasada e ShBA-së në reagimin e saj në rrjetet sociale.

Aktiviteti për teknologjinë e konunikimit - Foto të publikuara nga Ambasada e ShBA në Tiranë

1 nga 9

/a.f/r.e/

The post Vendimi për vizat, VanHorn: Siguria ekonomike është siguri kombëtare appeared first on Agjencia Telegrafike Shqiptare.

TIRANË, 15 janar/ATSh/ Shërbimi Meteorologjik Ushtarak (SHMU) njofton se vendi ynë do të ndikohet sot nga kushte të qëndrueshme atmosferike.

Moti parashikohet i kthjellët me vranësira të pakta kalimtare deri në orët e mesditës. Pas mesditës pritet shtim gradual i vranësirave mesatare deri të dendura në pjesën më të madhe të territorit.

Era do të fryjë nga verilindja në juglindje me shpejtësi mesatare rreth 6 m/s, ndërsa përgjatë vijës bregdetare dhe zonave luginore pritet të arrijë deri në 9 m/s. Deti do të ketë valëzim 1–2 ballë.

/a.f/

The post Moti sot i qëndrueshëm, pasdite priten vranësira appeared first on Agjencia Telegrafike Shqiptare.

TIRANË, 14 janar/ATSh/ Presidentja e Kosovës, Vjosa Osmani ka reaguar pas takimit me përfaqësuesin e posaçëm të Bashkimit Evropian për dialogun Kosovë-Serbi, Peter Sørensen, duke theksuar se Kosova është e gatshme për kapitullin e radhës në rrugën evropiane, atë të statusit të vendit kandidat për anëtarësim në BE.

Në një reagim pas takimit, Osmani u shpreh se dialogu duhet të jetë i përqendruar në njohjen reciproke dhe në trajtimin e barabartë të palëve, duke nënvizuar njëkohësisht shkeljet e vazhdueshme të marrëveshjeve nga ana e Serbisë.

The post Osmani pas takimit me Sørensen: Kosova gati për statusin e vendit kandidat për anëtarësim në BE appeared first on Agjencia Telegrafike Shqiptare.

PRISHTINË, 14 janar /ATSh/ Kryetari i Lidhjes Demokratike të Kosovës, Lumir Abdixhiku, ka dhënë dorëheqjen nga posti i tij pas humbjes në zgjedhjet e Kosovës. Vendimin e ka bërë publik përmes një statusi të gjatë, ku thekson se ky është akti më moral dhe më i përgjegjshëm që një kryetar partie mund të marrë.

Ai bëri të ditur se pas një diskutimi prej 5 orë e gjysmë me anëtarë dhe struktura të partisë, është arritur një qëndrim i përbashkët, që sipas tij pasqyron vullnetin e “shumicës dërmuese”.

Abdixhiku tha se nuk i shmanget përgjegjësisë dhe reflektimit, duke theksuar se vendimi tashmë nuk është më i tij, por i LDK-së.

“Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së”, shkruan Abdixhiku.

Ai njoftoi se është thirrur Kuvendi i LDK-së, ku pritet të zhvillohet debat dhe të merren vendime “hapur”, duke shtuar se do ta respektojë çdo vendim që del nga Kuvendi.

“Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre. Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht”, deklaroi Abdixhiku.

Pak më parë, Hykmete Bajrami deklaron se ka ofruar dorëheqje të parevokueshme nga pozita e nënkryetares së LDK-së, mbi parimin se kush merr rezultate të rënda zgjedhore për LDK-në duhet marrë përgjegjësi dhe t’i hapë rrugë zgjedhjeve të brendshme, raporton KosovaPress.

Ajo po ashtu ka bërë të ditur se dje në mbledhjen e Kryesisë së LDK-së ka kërkuar dhe dorëheqje të parevokushme dhe për Lumir Abdixhikun nga pozita e kryetarit të LDK-së, siç shprehet ajo “si standard i vendosur vetë nga LDK-ja”.

/KosovaPress/

The post Lumir Abdixhiku jep dorëheqjen si kryetar i LDK-së appeared first on Agjencia Telegrafike Shqiptare.

TIRANË, 14 janar/ATSh/ Futbollisti i Kombëtares, Ernest Muçi shënoi sot një dygolësh dhe dhuroi një asist në fitoren 6-1 të arritur nga Trabzonspor ndaj Istanbulspor AS.

Muçi ka treguar edhe njëherë se po kalon një formë të mirë këtë sezon, duke nisur vitin sportiv me dy gola, të cilët i hapën rrugën fitores së Trabzonspor në sfidën e javës së 2-të të Kupës së Turqisë, Grupi A.

Muçi gjeti golin në minutën e 41-të për të barazuar rezultatin 1-1. Në pjesën e dytë të sfidës, Muçi dhuroi një asist në minutën e 57-të dhe shënoi sërish në minutën e 61′, duke vendosur rezultatin 3-1 për Trabzonin. Më pas, ekipi shënoi edhe tri gola të tjerë, duke çuar rezultatin përfundimtar në 6-1.

/a.f/r.e/

The post Ernest Muçi e nis vitin me dy gola, Trabzonspor mposht Istanbulspor appeared first on Agjencia Telegrafike Shqiptare.

PRISHTINË, 14 janar /ATSh/ Presidentja e Republikës së Kosovës, Vjosa Osmani pranoi sot letrat kredenciale të ambasadores së re të Estonisë në Kosovë, Karin Anna Maandi.

Me këtë rast, presidentja Osmani i uroi mirëseardhje ambasadores Maandi dhe e përgëzoi për emërimin, duke shprehur bindjen se mandati i saj do të kontribuojë në forcimin e mëtejshëm të marrëdhënieve ndërmjet Republikës së Kosovës dhe Estonisë.

Presidentja Osmani shprehu mirënjohje për mbështetjen e vazhdueshme, parimore dhe të zëshme të Estonisë ndaj pavarësisë, sovranitetit dhe fuqizimit të pozitës së Kosovës në arenën ndërkombëtare, duke theksuar se Kosova është e linjëzuar në mënyrë të vazhdueshme me politikat e Bashkimit Evropian.

Gjatë takimit u diskutua edhe për thellimin e bashkëpunimit ndërmjet dy vendeve në fusha si mbrojtja, digjitalizimi, shërbimet publike elektronike, siguria kibernetike, integrimi euroatlantik, si dhe në fusha të tjera me interes të ndërsjellë.

Sa i përket sigurisë dhe stabilitetit rajonal, presidentja Osmani riafirmoi përkushtimin e Kosovës ndaj paqes, sigurisë dhe stabilitetit në Ballkanin Perëndimor, duke falënderuar Estoninë për kontributin e saj në sigurinë evropiane.

Në këtë kuadër, ajo vlerësoi gjithashtu mbështetjen e vazhdueshme të Estonisë për aspiratat evropiane të Kosovës, veçanërisht për statusin e vendit kandidat për Bashkimin Evropian dhe për anëtarësimin në Këshillin e Evropës.

/KosovaPress//r.e/

The post Osmani pranon letrat kredenciale të ambasadores së re të Estonisë në Kosovë appeared first on Agjencia Telegrafike Shqiptare.

TIRANË, 14 janar /ATSh/ Vendi ynë do të ndikohet sot nga kushte të qëndrueshme atmosferike.

Moti parashikohet kryesisht i kthjellët në të gjithë territorin, ndërsa vranësirat do të jenë të pakta deri mesatare kalimtare, kryesisht në zonat veriore dhe pjesërisht në qendër të vendit.

Në orët e mëngjesit dhe të mbrëmjes, përgjatë zonave luginore pritet prezencë e mjegullës së dendur, si dhe ngrica të forta në akset rrugore, si pasojë e temperaturave në vlera negative.

Era do të fryjë me drejtim verilindje-juglindje, me shpejtësi mesatare rreth 4 m/sek, ndërsa përgjatë vijës bregdetare dhe në lugina era do të arrijë shpejtësi deri në 7 m/sek, duke sjellë dallgëzim në detet me forcë 1-2 ballë.

Temperaturat minimale dhe maksimale parashikohen si më poshtë:/r.e/

The post Moti sot kryesisht i kthjellët, me mjegull dhe ngrica në orët e mëngjesit appeared first on Agjencia Telegrafike Shqiptare.

PRISHTINË, 13 janar /ATSh/ Përfaqësuesi i lartë i Bashkimit Evropian për dialog, Peter Sørensen, do të vizitojë nesër (e mërkurë) Kosovën.

Sørensen do të pritet në takim nga Presidentja e Kosovës, Vjosa Osmani. Sipas njoftimit të Zyrës së Presidencës, takimi do të nisë në orën 10:00.

“Në orën 10:00, Presidentja e Republikës së Kosovës, Vjosa Osmani, pret në takim Përfaqësuesin e BE-së për Dialog, Peter Sørensen. Mediat mund të marrin pamje në fillim të takimit”, thuhet në njoftim.

Takimi mbahet në kabinetin e Presidentes, Vjosa Osmani.

/KosovaPress/

The post Presidentja Osmani pret nesër emisarin për dialog, Peter Sørensen appeared first on Agjencia Telegrafike Shqiptare.

PRISHTINË, 13 janar /ATSh/ Dhomat e Specializuara dhe Zyra e Prokurorit tё Specializuar tё Kosovёs, ka reaguar sot pasdite ndaj Avokatit të Popullit në Kosovës (AIP), që përmes një letre të dërguar në adresën e kryetares së kësaj gjykate, Ekaterina Trendafilova, ka ngritur shqetësime, ndër tjerash, për pranimin e disa dokumenteve nga Serbia.

Sipas një njoftimi për mediet, “FAKT: Një vendim për të pranuar prova nga Prokuroria ose Mbrojtja nuk është tregues sa peshë ose besueshmëri do t’u japin gjykatësit atyre, në qoftë se do t’u japin peshë. Ky vendim merret në kuadër të aktgjykimit në fund të paraqitjes së provave”, thuhet në postimin e Speciales në X.

Më tej, në reagimin e Gjykatës Speciale, thuhet se gjatë diskutimeve për lëshimin e aktgjykimit, trupi gjykues vlerëson çdo provë duke mbajtur parasysh tërësinë e provave të administruara në gjykim.

“Gjatë shqyrtimit, nëse janë vërtetuar pretendimet faktike, trupi gjykues bën një vlerësim dhe peshim tërësor duke i marrë provat në tërësi. Rregullorja nuk lejon që verdikti i fajësisë të bazohet vetëm në provat e një dëshmitari që Mbrojtja nuk ka pasur mundësinë ta marrë në pyetje”, thuhet në reagimin e Gjykatës Speciale.

/KosovaPress//r.e/

The post Specialja: Pranimi i të dhënave nga Serbia nuk do të thotë se janë të besueshme appeared first on Agjencia Telegrafike Shqiptare.

PRISHTINË, 13 janar /ATSh/ Ambasada e Shteteve të Bashkuara në Prishtinë bëri të ditur se është e gatshme të forcojë partneritetin me qeverinë e ardhshme të Kosovës dhe të rifillojë dialogun strategjik mes dy vendeve.

Megjithatë, në një përgjigje për Radion Evropa e Lirë, Ambasada theksoi se realizimi i këtij synimi do të kërkojë veprime nga Qeveria e Kosovës, të cilat “çojnë përpara agjendën e përbashkët për paqe dhe stabilitet rajonal”, si dhe “prosperitetin e ndërsjellë ekonomik”.

Këto qëndrime u shprehën në përgjigje të pyetjes se si Shtetet e Bashkuara planifikojnë bashkëpunimin me qeverinë e ardhshme të Kosovës, që pritet të formohet pas zgjedhjeve të parakohshme parlamentare të 28 dhjetorit.

Në këto zgjedhje, Lëvizja Vetëvendosje e kryeministrit në detyrë, Albin Kurti, fitoi mbi 51 për qind të votave.

Partia deklaroi se synon formimin e shpejtë të institucioneve të reja.

Numërimi i votave përfundoi më 9 janar, por procesi zgjedhor ende nuk është mbyllur zyrtarisht, për shkak të afateve ligjore për ankesa dhe certifikimin e rezultateve.

Kurti dhe Lëvizja Vetëvendosje kanë udhëhequr qeverinë e Kosovës edhe gjatë periudhës 2021-2025.

Viti i kaluar ka shkuar kryesisht me qeveri në detyrë, pasi Kurti – ndonëse i kishte fituar zgjedhjet e 9 shkurtit 2025 – nuk arriti të formojë Qeverinë e re, çfarë ka çuar në shpërndarjen e Kuvendit dhe zgjedhje të parakohshme.

Gjatë mandatit të mëparshëm, Qeveria e tij është përballur shpesh me kritika nga partnerët ndërkombëtarë, veçanërisht për shkak të veprimeve që janë cilësuar si të pakoordinuara dhe të njëanshme.

Nga mbyllja e shumicës së institucioneve serbe në Kosovë deri te heqja e dinarit serb nga përdorimi, këto veprime janë parë si të dëmshme për komunitetin serb dhe si faktor që ka rritur tensionet në veri të vendit.

Kritikat kanë shkuar deri në atë pikë sa është folur edhe për lëkundje të marrëdhënieve ndërmjet Kosovës dhe Shteteve të Bashkuara.

Megjithatë, Kurti ka insistuar vazhdimisht se SHBA-ja mbetet partneri kryesor i Kosovës, ndonëse ka pranuar se ekzistojnë dallime në qasje për disa çështje.

Vitin e kaluar, Shtetet e Bashkuara kanë marrë një nga masat më të ashpra ndaj Kosovës, duke pezulluar Dialogun Strategjik mes dy vendeve – një mekanizëm i krijuar për thellimin e marrëdhënieve dypalëshe.

Uashingtoni e ka lidhur këtë vendim me veprimet e qeverisë në detyrë të Kosovës, derisa vendi është përballur me bllokadë institucionale, dhe me rritjen e tensioneve në vend, por Qeveria e Kosovës i ka hedhur poshtë kritikat.

/REL//r.e/

The post ShBA-ja pret veprime nga qeveria e re e Kosovës për forcimin e bashkëpunimit appeared first on Agjencia Telegrafike Shqiptare.

TIRANË, 12 janar/ATSH/ Gjykata Kushtetuese zbardhi sot të plotë vendimin për shfuqizimin e vendimit të Këshillit të Ministrave dhe dekretit të Presidentit të Republikës për shkarkimin nga detyra të Kryetarit të Bashkisë së Tiranës, Erion Veliaj. Vendimi u mor pas seancës publike të zhvilluar më 31 tetor 2025.

Gjykata Kushtetuese, e kryesuar nga Holta Zaçaj dhe me pjesëmarrjen e të gjithë anëtarëve, shqyrtoi kërkesën e paraqitur nga Erion Veliaj, i përfaqësuar nga avokatët Alban Dokushi dhe Ermal Yzeiraj. Si subjekte të interesuara në proces ishin Presidenti i Republikës dhe Këshilli i Ministrave.

Pas seancës publike, Gjykata Kushtetuese njoftoi se ka pranuar me shumicë votash kërkesën e kryebashkiakut Erion Veliaj, duke shfuqizuar vendimin nr. 539, datë 25 shtator 2025 të Këshillit të Ministrave, “Për shkarkimin nga detyra të kryetarit të Bashkisë së Tiranës, Erion Veliaj”, të cilin e cilësoi si të papajtueshëm me Kushtetutën e Republikës së Shqipërisë.

Po ashtu, Gjykata Kushtetuese shfuqizoi dekretin nr. 350, datë 1 tetor 2025 të Presidentit të Republikës, “Për caktimin e datës së zgjedhjeve të pjesshme vendore”, për pjesën që lidhet me Bashkinë e Tiranës, duke konstatuar shkelje të nenit 115, pikat 2 dhe 3 të Kushtetutës. Vendimi parashikon gjithashtu vazhdimin e masës së pezullimit të efekteve juridike të dekretit presidencial për zgjedhjet vendore në Tiranë deri në hyrjen në fuqi të këtij vendimi. Vendimi i marrë më 3 nëntor 2025 është përfundimtar dhe hyn në fuqi ditën e botimit në Fletoren Zyrtare.

Në vendimin e zbardhur, Gjykata Kushtetuese thekson se nuk është marrë në shqyrtim arsyeja e mungesës për të paktën tre muaj në detyrë e kryebashkiakut Veliaj.

Në vendim thuhet: “Vendimi i Këshillit të Ministrave, i cili ka marrë për bazë vetëm faktin e mungesës tremujore në detyrë, nuk ka analizuar shkakun, rrethanat dhe as ndikimin e mungesës në ushtrimin e detyrës, duke mos vlerësuar nëse kjo situatë rridhte nga veprimet ose mosveprimet e vet kryetarit dhe nëse ajo mund të konsiderohej shkelje e rëndë e Kushtetutës ose e ligjeve.

Megjithatë, duhet vënë në dukje se është e mundur që mosparaqitja në detyrë për një periudhë të pandërprerë tremujore të përbëjë shkelje të rëndë në ushtrimin e detyrës nga kryetari i bashkisë, por vetëm në rastet kur ai mund dhe duhet të mbajë përgjegjësi. Kjo dallon nga rasti konkret, ku kërkuesit nuk i atribuohet asnjë lloj përgjegjësie juridike. Në këtë kuptim, shkelja e rëndë lidhet me mospërmbushjen thelbësore të detyrës me vullnetin e tij, duke pasur parasysh se kryetari i bashkisë është organ ekzekutiv monokratik.”

Gjykata Kushtetuese konstatoi gjithashtu se Erion Veliajt nuk i ishte garantuar e drejta për një proces të rregullt ligjor. “E drejta për t’u dëgjuar, si pjesë e së drejtës së mbrojtjes, garantohet edhe në procesin administrativ përpara çdo organi, pavarësisht nga instanca dhe rëndësia e tij. Kjo realizohet nëpërmjet pjesëmarrjes së vetë individit në proces dhe përmes parashtrimit të argumenteve prej tij ose avokatit të zgjedhur”, thuhet në vendim.

Në vendimin e pakicës, lexohet dy gjyqtaret Holta Zaçaj dhe Sonila Bejtja vlerësuan se kërkuesi nuk legjitimohet “ratione personae” për pretendimin e cenimit të së drejtës për proces të rregullt ligjor për shkak të mënyrës së votimit në këshillin bashkiak, me argumentin se kërkuesi nuk është mbartës i kësaj të drejte, e cila u përket anëtarëve të këshillit. Po ashtu, sipas tyre, kërkuesi nuk legjitimohet as për pretendimin se mbledhja e Këshillit të Ministrave është zhvilluar me urgjencë dhe në mungesë të pranisë fizike të anëtarëve të tij, pasi nuk ka provuar interes të drejtpërdrejtë, në kushtet kur kjo e drejtë u takon anëtarëve të këtij organi.

Po ashtu, në vendimin e pakicës theksohet se: “Qëllimi i ligjvënësit në përcaktimin e një periudhe kohore, kalimi i së cilës nuk justifikon më mosushtrimin e detyrës nga organi i zgjedhur vendor, nuk ka të bëjë me elementet subjektive të sjelljes, as me verifikimin e pasojave, e cila në këtë rast është e verifikueshme njëkohësisht me kohën e mungesës në detyrë. Për sa i përket rëndësisë së këtyre pasojave, pavarësisht shkakut që i ka sjellë, ato janë të nivelit kushtetues, për sa kohë lidhen me krijimin e pamundësisë objektive në ushtrimin e detyrave vetëqeverisëse nga organi i zgjedhur drejtpërdrejt nga populli”.

Vendimi përfundimtar, që riktheu në detyrë Erion Veliajn, u mor me shumicë votash. Pro shfuqizimit të vendimit për shkarkimin nga detyra të Veliajt votuan: Sander Beci, Ilir Toska, Fiona Papajorgji, Marsida Xhaferllari dhe Mariana Semini.

Kundër votuan: Holta Zaçaj, Sonila Bejtja dhe Gent Ibrahimi.

Vendimi i plote.pdf

/a.f/

The post Gjykata Kushtetuese zbardh vendimin për Veliajn: Nuk u analizua shkaku i mungesës në detyrë appeared first on Agjencia Telegrafike Shqiptare.

PRISHTINË, 12 janar/ATSH/ Kryeministri në detyrë i Republikës së Kosovës, Albin Kurti, mirëpriti në takim komandantin e Komandës së Forcave të Përbashkëta Aleate të NATO-s në Napoli, admiralin amerikan George M. Wikoff.

Sipas një komunikate të qeverisë së Kosovës, në takimin e parë mes tyre, Kurti e uroi për marrjen e detyrës së re, duke i ofruar bashkëpunim të plotë. Ai theksoi komunikimin dhe ndërveprimin e mirë të qeverisë me misionin e NATO-s në Kosovë në garantimin e sigurisë dhe paqes për të gjithë qytetarët.

Kosova është rrëfim suksesi i ndërhyrjes së NATO-s, çlirimit dhe pavarësisë, që është kthyer në motor të zhvillimit ekonomik, themel të shtetndërtimit demokratik dhe mundësi për mirëqenie sociale. Për këtë, kryeministri shprehu falënderimin e popullit të Kosovës për aleancën veri-atlantike.

Duke folur për situatën e sigurisë, kryeministri nënvizoi synimin dhe angazhimin e Republikës së Kosovës për anëtarësim të plotë në NATO, si përgjigjja më e mirë për paqen e qëndrueshme, stabilitetin afatgjatë dhe sigurinë në rajon. Kryeministri shtoi se siguria e Kosovës në radhë të parë është siguri e kufijve të saj.

Kryeministri gjithashtu e njoftoi admiralin Wikoff me veprimet dhe rezultatet e institucioneve në luftimin e krimit të organizuar dhe sundimit të ligjit, si dhe me investimet në mbrojtje. Ai e falënderoi admiralin Wikoff për takimin dhe bisedën dhe për kontributin e KFOR-it, misionit të NATO-s në Kosovë.

/KosovaPress/r.e/

The post Kurti në takim me Wikoff: Siguria e Kosovës nis nga kufijtë appeared first on Agjencia Telegrafike Shqiptare.

PRISHTINË, 12 janar/ATSH/ Agjencia e Statistikave të Kosovës (ASK) publikon indeksin e harmonizuar të çmimeve të konsumit për muajin dhjetor 2025, ku rezulton është më i lartë në një mesatare prej 5,3% në muajin dhjetor 2025, krahasuar me muajin dhjetor 2024.

Sipas ASK-së, inflacioni mujor ishte 0,7% në muajin dhjetor 2025.

Norma mesatare vjetore e inflacionit për vitin 2025 ishte 3,9%. Indeksi i tërësishëm i harmonizuar i çmimeve të konsumit në vend në vitin 2025 ishte më i lartë në një mesatare prej 3,9% krahasuar me vitin 2024.

“Ngritja e indeksit të çmimeve të konsumit është vërejtur te grupet dhe nëngrupet e COICOP-it: kafe, çaj dhe kakao (15,2%); shërbime të tjera në lidhje me pajisjet personale të transportit (11,6%); pemë (11,5%); energji elektrike (11,4%); mish (11,0%); pushime të organizuara (10,3%); mirëmbajtje dhe riparim i pajisjeve personale të transportit (9,2%); vajra dhe yndyra (8,4%); qumësht, djathë dhe vezë (7,2%); shërbime hoteliere (7,0%); shërbime ambulantore (6,3%); perime (5,9%); pije alkoolike (5,3%); mallra dhe shërbime për mirëmbajtjen e zakonshme të ekonomisë shtëpiake (5,2%); gazeta, libra dhe materiale për zyra (5,1%); ujë mineral, pije joalkoolike, lëngje nga pemët dhe perimet (4,8%); pajisje terapeutike (4,7%); kujdes personal (4,6%); vegla dhe pajisje për shtëpi dhe kopsht (4,0%); duhan (3,9%); bukë dhe drithëra (3,8%); prodhime ushqimore (3,6%); shërbime financiare (3,4%); furnizim me ujë dhe shërbime të ndryshme që kanë të bëjnë me vendbanimin (3,2%); këpucë (3,0 ); sheqer, reçel, mjaltë, çokollatë dhe ëmbëlsira (3,0%); veshje (2,6%); gjëra personale (2,6%); qelqurina, takëme dhe mjete të kuzhinës (1,8%); bileta të transportit rrugor (1,8%); mobilie dhe orendi, qilima dhe mbulesa të tjera dyshemeje (1,5%); dhe ndryshime të çmimeve të produkteve dhe shërbimeve të disa nëngrupe me një ndikim të vogël në IHÇK, me një ndikim të përbashkët të këtyre nëngrupeve prej 4,1 për qind në IHÇK”, thuhet në njoftim.

Ndërsa, rënie e çmimeve vërehet te karburante dhe lubrifikantë për pajisjet e transportit personal -4,6% me një ndikim prej -0,3 për qind në IHÇK.

“Indeksi i tërësishëm i harmonizuar i çmimeve të konsumit është më i lartë në një mesatare prej 5,3% në muajin dhjetor 2025, krahasuar me muajin dhjetor 2024. Kjo kryesisht është shpjeguar me ngritjen e çmimeve të konsumit në këtë periudhë te grupet dhe nëngrupet e COICOP-it: pemë (19,0%); energji elektrike (18,3%); shërbime të tjera në lidhje me pajisjet personale të transportit (18,1%); mirëmbajtje dhe riparim i pajisjeve personale të transportit (14,7%); mish (14,4%); pushime të organizuara (13,5%); lëndë djegëse të ngurta, dru zjarri, pelet etj. (13,1%); kafe, çaj dhe kakao (11,9%); qumësht, djathë dhe vezë (9,8%); shërbime ambulantore (8,9 %); shërbime hoteliere (8,8%); duhan (6,6%); kujdes personal (5,6%); mallra dhe shërbime për mirëmbajtjen e zakonshme të ekonomisë shtëpiake (5,4%); pije alkoolike (5,4%); bukë dhe drithëra (5,3%); vegla dhe pajisje për shtëpi dhe kopsht (5,1%); prodhime ushqimore (4,9%); mirëmbajtje dhe rregullim i vendbanimit (4,8%); sheqer, reçel, mjaltë, çokollatë dhe ëmbëlsira (4,5%); gjëra personale (4,1%); arsim (3,8%); veshje (3,7%); bileta të transportit rrugor (3,7%); perime (3,6%); furnizim me ujë dhe shërbime të ndryshme që kanë të bëjnë me vendbanimin (3,5%); ujë mineral, pije joalkoolike, lëngje nga pemët dhe perimet (3,0%); gazeta, libra dhe materiale për zyra (2,9%); dhe mobilie dhe orendi, qilima dhe mbulesa të tjera dyshemeje (2,5%) me një ndikim të përbashkët të këtyre nëngrupeve prej 5,4 për qind në IHÇK”, thuhet në njoftim.

Ndërsa, rënie e çmimeve vërehet te karburante dhe lubrifikantë për pajisjet e transportit personal -1,7%.

“Indeksi i tërësishëm i harmonizuar i çmimeve të konsumit është më i lartë në një mesatare prej 0,7% në muajin dhjetor 2025, krahasuar me muajin nëntor 2025. Kjo kryesisht është shpjeguar me ngritjen e çmimeve të konsumit në këtë periudhë te grupet dhe nëngrupet e COICOP-it: energji elektrike (8,7%); bileta të fluturimeve (8,4%); lëndë djegëse të ngurta, dru zjarri, pelet etj. (3,0%); perime (2,9%); bileta të transportit rrugor (2,2%); veshje (1,2%); mish (1,1%); qumësht, djathë dhe vezë (0,7%); mallra dhe shërbime për mirëmbajtjen e zakonshme të ekonomisë shtëpiake (0,5%); mobilie dhe orendi, qilima dhe mbulesa të tjera dyshemeje (0,4%) me një ndikim të përbashkët të këtyre nëngrupeve prej 0,8 për qind në IHÇK.

Ndërsa, rënie e çmimeve vërehet te grupi karburante dhe lubrifikantë për pajisjet e transportit personal -1,3%.

/KosvaPress//r.e/

The post Dhjetori me çmime më të larta, inflacioni vjetor arrin 5,3% në Kosovë appeared first on Agjencia Telegrafike Shqiptare.

TIRANË, 12 janar/ATSH/ Presidentja e Kosovës, Vjosa Osmani priti sot komandantin e Komandës së Forcave të Përbashkëta të NATO-s në Napoli, admiralin George M. Wikoff, me rastin e marrjes së detyrës në krye të një prej komandave më të rëndësishme strategjike të Aleancës Veriatlantike.

Gjatë takimit, presidentja Osmani e uroi admiralin Wikoff për detyrën e re dhe shprehu besimin e saj në lidershipin e tij, duke theksuar rolin kyç të komandës për sigurinë euroatlantike, stabilitetin rajonal dhe paqen ndërkombëtare.

Presidentja ritheksoi mirënjohjen e Kosovës ndaj NATO-s dhe Shteteve të Bashkuara për kontributin e tyre vendimtar në garantimin e paqes dhe sigurisë që nga viti 1999, duke vlerësuar veçanërisht misionin e KFOR-it si forcë parandaluese dhe garantuese për të gjithë qytetarët pa dallim.

Osmani konfirmoi përkushtimin për vazhdimin e bashkëpunimit me KFOR-in dhe theksoi se Kosova mbetet partner i besueshëm për sigurinë dhe stabilitetin rajonal, duke iu përkushtuar fuqishëm vlerave të paqes, demokracisë dhe sundimit të ligjit. Në këtë kontekst, Presidentja paralajmëroi edhe rreziqet nga aktet destabilizuese të Serbisë, përfshirë sulmet ndaj ushtarëve të KFOR-it në Banjskë dhe kanalin Ibër-Lepenc.

/a.f/r.e/

The post Osmani priti komandantin e NATO-s në Napoli: Përkushtim për sigurinë rajonale appeared first on Agjencia Telegrafike Shqiptare.