Futbollisti 22-vjeçar Gentrit Salihu do ta vazhdojë karrierën e tij në Kroaci, duke iu bashkuar klubit elitar Lokomotiva e Zagrebit si lojtar i lirë.

Së fundi, Salihu ishte pjesë e Prishtinës dhe ka treguar paraqitje të spikatura në Superligën e Kosovës. Ky transferim përfaqëson një hap të rëndësishëm për karrierën e mesfushorit defensivë.

“Jam i lumtur që jam bërë pjesë e një klubi që njihet për punën e shkëlqyer me lojtarët e rinj. Lokomotiva është një mjedis ideal për zhvillimin tim të mëtejshëm dhe do të bëj çmos për të justifikuar besimin e stafit të trajnerëve dhe për të ndihmuar ekipin të arrijë qëllimet e tij”, tha Salihu pas nënshkrimit të kontratës.

22-vjeçari ka kaluar edhe te të rinjtë e Portos, si dhe ka luajtur për Besën e Pejës dhe Dukagjinin, duke ndërtuar një eksperiencë të vlefshme në futbollin kosovar.

Lokomotiva e Zagrebit, aktualisht në vendin e shtatë me 22 pikë, ka një histori të pasur me futbollistë shqiptarë, dhe Salihu pritet të bëhet pjesë e kësaj tradite./Telegrafi/

Presidenti i Olympique Marseille, Pablo Longoria, ka zbuluar se përpara se të nënshkruante me Mason Greenwood, ai kërkoi këshillën e nënës së tij në lidhje me situatën e lojtarit.

Greenwood ishte përballur më parë me akuza për tentativë përdhunimi, sjellje shtrënguese dhe sulm, të cilat u rrëzuan të gjitha në shkurt 2023, gjatë kohës që ishte ende pjesë e Manchester United.

“Me të gjitha informacionet, e thirra nënën time. I thashë: ‘Çfarë mendon, duke e ditur të gjithë situatën?’ Ajo punonte në sistemin e burgjeve në Spanjë dhe ishte e vlerësuar me medalje shtetërore. Më tha: ‘Bëje!’ Për mua ishte e rëndësishme që dikush që nuk merret me sport të jepte një opinion objektiv", tha Longoria.

Ai shtoi se për klubin, vendimi për të sjellë Greenwood-in ishte një mundësi e madhe sportive dhe se analiza e situatës ishte bërë me shumë kujdes.

“Krijimi i tabuve në jetë nuk është kurrë pozitiv. Për ne, ishte një mundësi e madhe tregu nga një perspektivë sportive, ku analizuam me shumë kujdes se çfarë ndodhi në të vërtetë”, tha Longoria.

Marseille e solli Greenwood-in në verën e vitit 2024 nga Manchester United, në një transferim me vlerë 26 milionë euro.

Që nga ajo kohë, sulmuesi ka qenë i jashtëzakonshëm për klubin francez, duke shënuar 20 gola dhe dhuruar 6 asistime në 28 paraqitje këtë sezon. /Telegrafi/

Neil El Aynaoui ka shkëlqyer në Kupën e Kombeve të Afrikës me Marokun, dhe e ardhmja e tij mund të jetë larg Romës.

Sipas raportimeve të Sacha Tavolieri, Real Madridi po ndjek nga afër mesfushorin maroken, me gjigantët spanjollë që po shqyrtojnë mundësinë e një transferimi të mundshëm gjatë muajve të ardhshëm.

24-vjeçari, aktualisht te Roma, tërhoqi vëmendjen e skautëve të Realit me performancat e tij në turne, duke siguruar vendin e tij në listën e lojtarëve të synuar.

26/01/2026 14:47- Real Madridi po e vëzhgon yllin e Romës telegrafi.com

Edhe pse ka pasur diskutime të hershme me përfaqësuesit e lojtarit, ato mbeten joformale dhe nuk ka asnjë shenjë për një transferim gjatë afatit dimëror.

Klubi madrilen do ta monitorojë nga afër formën e El Aynaoui-t deri në fund të sezonit përpara se të marrë një vendim përfundimtar.

Nga ana e lojtarit, interesi për t’u bashkuar me Realin është i qartë, dhe ai e ka identifikuar Merengues si destinacionin kryesor nëse vjen një ofertë zyrtare, sidomos gjatë merkatos së verës. /Telegrafi/

Milot Rashica mund të jetë pranë një rikthimi në Bundesliga. Pas interesimit për mbrojtësin qendror gjerman Felix Uduokhai, Beşiktaşi ka marrë një tjetër ofertë nga Gjermania, kësaj radhe për anësorin kosovar.

Sipas raportimeve nga gazeta e madhe turke 'Fanatik', Hoffenheim ka shfaqur interes konkret për Rashicën dhe negociatat mes dy klubeve janë duke vazhduar.

Mësohet se klubi gjerman ka propozuar një marrëveshje shkëmbimi, duke përfshirë anësorin çek Adam Hlozek si pjesë të paketës.

Rashica së fundmi shënoi paraqitjen e tij të 100-të me fanellën e Beşiktaşit, në ndeshjen e Kupës ndaj Keçiorengücu.

Futbollisti 29-vjeçar ka qenë një nga lojtarët më të rëndësishëm të klubit turk, duke realizuar 12 gola dhe dhënë 22 asistime në të gjitha garat.

Përvoja e tij e mëparshme në Bundesligë me Werder Bremen e bën Rashicën një profil tërheqës për klubet gjermane, ndërsa e ardhmja e tij pritet të sqarohet në ditët në vijim, në varësi të zhvillimit të bisedimeve mes palëve.

Nëse arrihet marrëveshja, atëherë Rashica te Hoffenheim do t'i bashkohej futbollistëve të tjerë nga Kosova te kjo skuadër si Fisnik Asllani, Leon Avdullahu dhe Albian Hajdari. /Telegrafi/

Baseli e fitoi të dielën derbin e madh të futbollit zviceran ndaj Zurichut, por vetëm një ditë më vonë klubi mori një vendim të fortë duke u ndarë me trajnerin Ludovic Magnin.

Kampioni në fuqi i Zvicrës vendosi ta shkarkojë trajnerin e tyre Magninin pas vetëm gjashtë muajsh në krye të skuadrës, për shkak të mungesës së rezultateve të kënaqshme.

Aktualisht, Baseli renditet në vendin e katërt në Superligën helvetike, me dhjetë pikë më pak se lideri Thun, çka ka shtyrë drejtuesit të reagojnë.

Vendimi vjen pavarësisht paraqitjes së shkëlqyer të Xherdan Shaqirit në derbi, ku ai realizoi një hat-trik dhe dhuroi edhe një asistim në fitoren dramatike 4:3 ndaj Zurichut.

Në njoftimin zyrtar, klubi ka arsyetuar shkarkimin e Magninit me “mungesë të përparimit sportiv”, duke theksuar se objektivat e sezonit nuk po përmbushen sipas pritshmërive. /Telegrafi/

Fundi i ndeshjes mes Barcelonës dhe Oviedos në “Camp Nou” u shndërrua në një skenë të pazakontë, ku protagoniste nuk ishte asnjë nga lojtarët, por një stuhi e fuqishme që goditi qytetin katalanas.

Një rrebesh i rrëmbyeshëm shiu, i shoqëruar edhe me breshër, përfshiu Barcelonën, ndërsa reshjet intensive të shiut shkaktuan përmbytje në disa pjesë të stadiumit të rinovuar.

Pamjet e publikuara në rrjetet sociale treguan qartë rrjedhje uji në zona të ndryshme të “Camp Nou”-s, me tribunën e shtypit që rezultoi më e prekura.

Në videot e shpërndara, uji shihet duke rrjedhur nga tavani dhe duke u derdhur mbi shkallët e tribunave, çka e bëri tepër të vështirë punën e gazetarëve dhe stafit teknik të pranishëm në stadium.

Shkaku kryesor i këtyre problemeve lidhet me faktin se çatia e stadiumit ende nuk është përfunduar, pasi punimet e rinovimit janë ende në proces. Për shkak të mungesës së një strukture të plotë mbrojtëse, zona e shtypit mbeti plotësisht e ekspozuar ndaj stuhisë, duke përfunduar e përmbytur.

Kujtojmë se Barcelona ka marrë një kredi prej 1.45 miliardë eurosh për projektin e rindërtimit të “Camp Nou”-s, ndërsa borxhi total i klubit vlerësohet rreth 2.5 miliardë euro. Rinovimi synon modernizimin e stadiumit dhe garantimin e stabilitetit afatgjatë financiar të klubit.

Megjithatë, pamjet e fundit nga kjo ndeshje tregojnë se projekti ambicioz vazhdon të përballet me sfida dhe se puna drejt një “Camp Nou” plotësisht funksional ende nuk ka përfunduar. /Telegrafi/

Xherdan Shaqiri ka dhuruar një shfaqje të jashtëzakonshme të dielën në mesditë, ku Baseli triumfoi në derbi ndaj Zurichut me rezultat 3-4.

Ylli kosovar ishte i pandalshëm duke realizuar het-trik dhe duke bërë një asistim të mrekullueshëm për Philip Otelen.

Përveç tre golave fantastik, Shaqiri u ndal të flasë edhe për asistimin, pasi nga gjuajtja e lirë e dërgoi topin mbi murin e gjallë te Otele i cili realizoi me lehtësi.

Gjilanasit ka thënë pas ndeshjes se këtë skemë e kishin provuar në stërvitje, por që nuk kishte funksionuar.

"E provuam një herë në kampin stërvitor, por nuk na funksionoi. Pashë që ishte distanca perfekte dhe u thashë shokëve se do ta provoja", tha Shaqiri me buzëqeshje.

Ai në fund ka dalë edhe në përkrahje të trajnerit Ludovic Magnin, që rrezikonte shkarkimin nga Baseli nëse nuk merrte fitore.

"Ludo po e bën punën e tij shumë mirë. Ai po e shijon qartë këtu punën e tij dhe mendoj se të gjithë shkojmë në stërvitje çdo ditë me shumë entuziazëm dhe këtë përpiqemi ta përkthejmë në fushë", tha Shaqiri. /Telegrafi/

- YouTube www.youtube.com

Ushtria Çlirimtare për Preshevë, Medvegjë dhe Bujanoc doli në skenë në janar të vitit 2000 dhe për më shumë se një vit pati luftë në Luginën e Preshevës.

Një nga themeluesit e UÇPMB-së, Sami Azemi (Komandant Haxhija), ka kujtuar 26 vjetorin e daljes në skenë të UÇPMB-së, duke shkruar se lufta e kësaj ushtrie ishte zëri i një populli që refuzoi të nënshtrohej.

Azemi ka bërë thirrje nëpërmjet profilit të tij që Lugina e Preshevës mos të lihet në harresë, pasi çdo politikë që e lë në harresë Luginën është tradhti ndaj idealit për të cilin është derdhur gjak.

Shkrimi i plotë nga Sami Azemi (pa ndërhyrje):

"26 vite të daljes në skenë të UCPMB-së

Pas përfundimit të luftës së UÇK-së, forcat paramilitare dhe ushtarake serbe u pozicionuan masivisht në Luginë, duke shtuar represionin, frikën dhe dhunën mbi popullatën shqiptare.

Përballë kësaj gjendjeje të rëndë, më 26 janar të vitit 2000, një grup i vogël bashkëluftëtarësh, me zemër të madhe dhe ideal të pastër, dolën në skenë për të mbrojtur popullatën e pambrojtur.

Lufta e UÇPMB-së ishte zëri i një populli që refuzoi të nënshtrohej, ishte thirrja e ndërgjegjes kombëtare për drejtësi, barazi dhe liri.

Sot, pas 26 vitesh, kujtojmë dëshmorët dhe luftëtarët e UÇPMB-së si simbol të sakrificës dhe rezistencës.

Gjaku i tyre nuk ishte i kotë, sepse ai u bë themel i qëndresës dhe shpresës për brezat që vijnë. Lugina e Preshevës do ta kujtojë gjithmonë zërin e tyre, sepse ai zë ishte zëri i lirisë, i bashkimit dhe i dinjitetit kombëtar.

Sot, përballë sakrificës së UÇPMB-së, spektri politik në Kosovë dhe në Luginë nuk ka të drejtë të heshtë, të përçahet apo të harrojë.

Ata që luftuan nuk pyetën për parti, por për atdhe. Prandaj, çdo politikë që e lë Luginën në harresë, është tradhti ndaj idealit për të cilin u derdh gjak. Lavdi UÇPMB-së. Lavdi dëshmorëve të Luginës së Preshevës. Lavdi idealit për liri dhe bashkim kombëtar", ka shkruar Sami Azemi. /Telegrafi/

Endrick e ka nisur në mënyrë sensacionale aventurën e tij te Lyoni, pas huazimit nga Real Madridi, duke realizuar një tregolësh historik në fitoren bindëse 5-2 ndaj Metz në Ligue 1.

Në moshën vetëm 19 vjeç e 188 ditë, talenti brazilian u bë lojtari më i ri në historinë e Lyonit që shënon një hat-trick në kampionatin francez, duke thyer rekordin e Bernard Lacombe (19 vjeç e 196 ditë).

Me këtë arritje, Endrick i bashkohet gjithashtu një grupi elitar sulmuesish të shekullit XXI që kanë realizuar tregolësh në moshë shumë të re, përkrah emrave si Jérémy Ménez, Kylian Mbappé dhe Ousmane Dembélé.

Fitorja e ndihmoi Lyonin të ngjitet në vendin e katërt të tabelës së Ligue 1, ndërsa golat e tjerë të takimit u shënuan nga Ruben Kluivert dhe Tyler Morton.

Që nga mbërritja e tij në dhjetor për pjesën e dytë të sezonit 2025/26, Endrick ka lënë gjurmë të menjëhershme, duke shënuar katër gola në tri paraqitjet e para në të gjitha garat. Kjo është nisja më e mirë për një lojtar të Lyonit që nga Mariano Díaz, i cili realizoi tre gola në të njëjtën periudhë në gusht të vitit 2017.

Sulmuesi 19-vjeçar u bë gjithashtu braziliani i 25-të që shënon në Ligue 1 me fanellën e Lyonit. Përballë Metz, ai regjistroi gjashtë goditje në portë – shifra më e lartë e përbashkët për një lojtar të Lyonit në kampionat që nga sezoni 2006/07, kur Opta nisi mbledhjen e statistikave, duke barazuar rekordin e Alexandre Lacazette kundër Monacos në maj 2016. /Telegrafi/

Është mbyllur xhiro e 21-të në Superligën e Zvicrës, xhiro që prodhoi shumë gola.

Në gjashtë ndeshje të zhvilluara janë shënuar 27 gola, ku nuk kanë munguar paraqitjet fantastike nga futbollistët shqiptarë.

Nga 27 gola në xhiron e 21-të, pesë prej tyre u shënuan nga futbollistët shqiptarë si Xherdan Shaqiri (3), Kastriot Imeri (1) dhe Donat Rrudhani (1).

Por në formacionin më të mirë të javës janë përfshirë vetëm dy futbollistë nga Kosova.

SofaScore e ka vendosur Xherdan Shaqirin në formacion me yllin gjilanas që mori notën 10, derisa në portë është reprezentuesi kosovar Amir Saipi që pati paraqitje fantastike në fitoren e Luganos 4-1 ndaj Winterthurit. /Telegrafi/

Genoa ka marrë një fitore të pabesueshme ndaj Bolognës të dielën në mesditë me rezultat 3-2.

Ishin mysafirët që krijuan epërsi të dyfishtë 0-2, por rikthimi spektakolar ndodhi në 30 minutat e fundit të ndeshjes.

Fillimisht Bologna mbeti me 10 futbollistë në fushë, pasi portieri Lukasz Skorupski u ndëshkua me karton të kuq dhe pastaj erdhi koha e golit më të mirë të javës në Serie A dhe një nga më të mirët e vitit.

Ishte mesfushori ukrainas Ruslan Malinovskyi që realizoi një kryevepër nga gjuajtja e lirë prej një distance mbi 30 metra.

Shumë nga tifozët po e cilësojnë golin e ukrainasit si më të mirin e vitit, teksa mbetet të shihet nëse ky do të marrë edhe çmimin 'Puskas'. /Telegrafi/

- YouTube www.youtube.com

Basketbollistët e Oklahoma City Thunder pësuan një humbje të ngushtë në parketin e tyre, duke u mposhtur nga Toronto Raptors me rezultatin 103:101.

Skuadra kanadeze u udhëhoq drejt fitores nga Immanuel Quickley, i cili realizoi 23 pikë, 11 ribaunde dhe dy asistime. RJ Barrett kontribuoi me 14 pikë, gjashtë ribaunde dhe dy asistime, ndërsa Brandon Ingram shtoi 13 pikë, pesë ribaunde dhe katër asistime.

Me nga dhjetë pikë kontribuan Barnes, Dick dhe Mamukelashvili. Barnes regjistroi gjithashtu 11 ribaunde dhe tetë asistime, Dick shtoi tre ribaunde, ndërsa Mamukelashvili pesë ribaunde dhe tre asistime.

Në anën tjetër, Shai Gilgeous-Alexander ishte më i miri për Oklahoma Cityn me 24 pikë, gjashtë asistime dhe tre ribaunde. Luguentz Dort shtoi 19 pikë, tetë ribaunde dhe dy asistime, ndërsa Jalen Williams kontribuoi me 15 pikë dhe pesë ribaunde.

Në ndeshjet e tjera, Golden State Warriors regjistroi një fitore bindëse 111:85 ndaj Minnesota Timberwolves. Stephen Curry shkëlqeu me 26 pikë, shtatë asistime dhe dy ribaunde, ndërsa Anthony Edwards ishte më i miri për Minnesotan me 32 pikë, 11 ribaunde dhe dy asistime.

Me këtë paraqitje, Curry u bë shënuesi i 20-të më i mirë në historinë e NBA-së, duke kaluar legjendën John Havlicek dhe duke barazuar vendin e 19-të në listën e të gjitha kohërave me Paul Pierce, me nga 26,397 pikë secili.

Një tjetër surprizë u regjistrua në San Antonio, ku Spurs u mposhtën në shtëpi nga New Orleans Pelicans me rezultatin 104:95.

Rezultatet:

Detroit – Sacramento 139:116

Minnesota – Golden State 85:111

- YouTube www.youtube.com

Oklahoma City – Toronto 101:103

- YouTube www.youtube.com

San Antonio – New Orleans 95:104

Phoenix – Miami 102:111

LA Clippers – Brooklyn 126:89

- YouTube www.youtube.com

Enzo Fernández dhe Moises Caicedo vazhdojnë të jenë shtyllat kryesore të mesfushës së Chelseat, ndërsa mbrojtësi i talentuar anglez Levi Colwill konsiderohet si një nga projektet afatgjata më të rëndësishme të klubit.

Sipas BBC-së, Chelsea mund të përballet së shpejti me kërkesa nga disa prej lojtarëve të tij kyç, të cilët synojnë përmirësim të kontratave ekzistuese.

Raportohet se Caicedo, Fernandez dhe Colwill kanë shprehur dëshirën për të hapur bisedime me drejtuesit e klubit lidhur me kushtet personale, duke reflektuar rolin gjithnjë e më të rëndësishëm që ata kanë në skuadër.

Megjithatë, drejtuesit e Chelseat planifikojnë të shtyjnë çdo diskutim formal për kontratat të paktën deri në afatin kalimtar të verës.

“Blutë” ndodhen aktualisht nën presion për të respektuar rregullat financiare të UEFA-s, veçanërisht në menaxhimin e faturës së pagave.

Klubi duhet ose të rrisë të ardhurat ose të realizojë shitje të rëndësishme me fitim, përpara se të përcaktojë se çfarë kushtesh mund t’u ofrojë yjeve të ekipit. /Telegrafi/

Manchester City po ndjek me vëmendje zhvillimet rreth të ardhmes së Trent Alexander-Arnold te Real Madridi, teksa pasiguria mbi rolin e tij në “Santiago Bernabeu” po rritet, raporton TEAMtalk.

Mbrojtësi i djathtë 27-vjeçar ka nisur vetëm pesë ndeshje në La Liga që nga transferimi i bujshëm veror nga Liverpooli, duke mos arritur ende ndikimin e menjëhershëm që pritej pas nënshkrimit të kontratës pesëvjeçare deri në vitin 2029.

Pakënaqësia prapa skenave ka shtyrë ndërmjetësit të hapin bisedime eksploruese me Manchester Cityn, i cili po vlerëson aktivisht opsionet për krahun e djathtë të mbrojtjes përpara një merkatoje verore intensive.

Edhe pse ende nuk ka pasur një ofertë zyrtare, City e sheh Alexander-Arnold si një përforcim potencialisht transformues për repartin defensivë.

Kontrata afatgjatë me Real Madridin do të kërkonte një tarifë të konsiderueshme transferimi dhe një paketë të lartë page, por “Cityzens” mbeten ndër klubet e pakta që kanë kapacitetin financiar për të përmbushur këto kushte.

Gjatë periudhës së tij te Liverpooli, Alexander-Arnold regjistroi 23 gola dhe 92 asistime në 354 paraqitje, duke fituar tetë trofe madhorë.

Ambicia e Cityt është konfirmuar edhe nga drejtori i ri sportiv, Hugo Viana, i cili ka vepruar me vendosmëri në afatin e janarit me afrimet e Marc Guehi dhe Antoine Semenyo, duke sinjalizuar lëvizje të guximshme në verë./Telegrafi/

Lojtarët e Schalkes bënë një hap të gabuar sot në luftën për t’u rikthyer në elitën e futbollit gjerman. Në Veltins Arena, “Minatorët” barazuan 2:2 kundër Kaiserslautern, një rezultat që, duke pasur parasysh rrjedhën e ndeshjes, mund të konsiderohet sukses për ekipin vendas.

Skuadra e Miron Muslic zhvilloi një paraqitje të dobët dhe në mënyrë të papritur ishte e pafuqishme ndaj Kaiserslautern, gjë që u pa veçanërisht në pjesën e parë, kur rezultati 0:0 u mbajt vetëm falë pritjeve të portierit Karius.

Kaiserslautern qëndroi fort në fushë dhe rasti më i mirë i pjesës së parë u regjistrua në minutën e 31-të, kur Ritter gjuajti nga një pozicion ideal pas një aksioni të bukur, por Karius reagoi në mënyrë fenomenale. Më pas topi përfundoi te Haas, por gjuajtja e tij shkoi mbi portë.

Në pjesën e dytë, Schalke u shfaq dukshëm më ofensiv dhe kjo u shpërblye në minutën e 61-të. Skytta krosoi nga një goditje dënimi, ndërsa në kontaktin e tij të parë me topin, Prtajin u shkëput bukur dhe me kokë realizoi për 1:0.

Në vazhdim, mysafirët luajtën më mirë, ndërsa kapiteni Edin Dzeko hyri në lojë në minutën e 67-të. Ekipi vendas u përpoq të gjente sa më shpejt golin e barazimit, por një qasje e tillë la shumë hapësira në mbrojtjen e Schalkes për kundërsulme dhe gjysmë-kundërsulme.

Vizitorët shfrytëzuan një prej tyre në minutën e 83-të dhe shënuan për 0-2.

Megjithatë, dhjetë minutat e fundit sollën një dramë të vërtetë në Veltins Arena. Fillimisht, Dzeko tregoi klasin e tij. Në minutën e 88-të, “Diamanti” realizoi një gol mjeshtëror, të parin me fanellën e Schalkes.

Me këtë gol, Dzeko u bë gjithashtu golashënuesi më i vjetër në Bundesliga 2, duke shkruar emrin e tij në histori të nivelit të dytë të futbollit gjerman qysh në ndeshjen e parë.

Kur dukej se Kaiserslautern do të merrte një fitore të vlefshme, Karaman shënoi në minutën e 90-të, pas një rrëmuje në zonë, për ta barazuar rezultatin në 2:2.

Pas këtij raundi, Schalke kryeson renditjen me 39 pikë, dy më shumë se Darmstadt, që ndodhet në vendin e dytë. /Telegrafi/

Bisedimet mes Bernardo Silvës dhe Barcelonës janë intensifikuar në muajt e fundit, pasi lojtari portugez shihet si një përshtatje e përkryer për stilin e lojës së Blaugranëve dhe do të sillte një nivel shumë të vlefshëm përvoje në një skuadër që ende vuan nga mungesa e përvojës në nivelet më të larta.

Barcelona, pasi ka kaluar një periudhë shumë delikate sportive dhe ekonomike, duket se po sheh dritë në fund të tunelit me projektin e Hansi Flick, i cili tashmë i ka sjellë klubit një ligë dhe një kupë, si dhe një paraqitje konkurruese deri në fund në gjysmëfinalet e fundit të Ligës së Kampionëve, në një përballje ku katalanasit e merituan finalen gjatë shumë fazave të ndeshjes.

Akademia e të rinjve ka qenë një shenjë dalluese e klubit që nga rindërtimi i thellë i ndërmarrë pas epokës Bartomeu, por gjithsesi bordi drejtues është i vetëdijshëm se skuadra ka nevojë për tre ose katër lojtarë me përvojë në nivelin elitar për të udhëhequr të rinjtë. Për këtë arsye, ata e shohin si shumë interesante mundësinë e përfshirjes së Bernardo Silvës.

Natyrisht, Barcelona ende nuk është në gjendje të përballojë transferimin e një lojtari të kalibrit të yllit portugez, përveç rastit kur kontrata e tij të jetë drejt skadimit. Megjithatë, klubi është i gatshëm të bëjë një përpjekje shtesë në aspektin e pagës për të shfrytëzuar këtë mundësi tregu dhe për ta sjellë atë në kryeqytetin katalanas. Nga pikëpamja futbollistike, ai konsiderohet një përshtatje ideale dhe gjithmonë ka pasur një simpati të veçantë për Barçën, siç raporton gazeta Sport.

Nga një këndvështrim thjesht futbollistik, Silva do të aktivizohej kryesisht në mesfushën qendrore, pasi pozicioni i krahut të djathtë, ku ai gjithashtu mund të luajë pa problem, aktualisht është i zënë nga Lamine Yamal.

Pedri konsiderohet i pazëvendësueshëm në qendër të mesfushës, ndaj Bernardo do të konkurronte për një vend titullari me Fermin ose Dani Olmo, dy lojtarë që, kur janë plotësisht të gatshëm, mund të marrin role të rëndësishme në formacion.

Bernardo Silva tashmë e ka informuar bordin e Sky Blues për vendimin e tij që të mos qëndrojë përtej kësaj vere në Etihad, dhe shpreson që klubi të mos e pengojë transferimin, duke marrë parasysh se ai është shndërruar në një legjendë të Manchester City nën drejtimin e Pep Guardiolës. Silva ka qenë gjithmonë një nga lojtarët më të preferuar të Pepit dhe prej kohësh është konsideruar një pjesë kyçe e projektit.

Bernardo Silva, 31 vjeç, zhvilloi 49 ndeshje sezonin e kaluar në të gjitha garat, duke kaluar 3900 minuta lojë, gjatë të cilave shënoi 5 gola dhe dhuroi 4 asiste. /Telegrafi/

Barcelona dhe Paris Saint-Germain kanë arritur një marrëveshje të plotë për transferimin e mesfushorit të ri Dro Fernández, me marrëveshjen që tani ndodhet në fazat përfundimtare përpara një njoftimi zyrtar.

Tarifa e transferimit raportohet të jetë pak më e lartë se klauzola e lirimit prej 6 milionë eurosh.

Spanjolli 18-vjeçar ka vendosur të largohet nga FC Barcelona këtë janar dhe të bashkohet me PSG-në, duke i dhënë fund periudhës së tij në La Masia dhe duke u transferuar te kampionët francezë.

Të dy klubet kanë rënë dakord për të gjitha kushtet, ndërsa Dro ka arritur gjithashtu një marrëveshje kontraktuale me PSG-në, e cila pritet të jetë e vlefshme deri në vitin 2030.

Edhe pse ishte raportuar interes nga disa klube të mëdha evropiane, PSG duket se ka fituar garën për një nga talentet më premtuese të futbollit spanjoll. /Telegrafi/

Drita e ka nisur me trofe vitin 2026, pasi ka mposhtur Prishtinën në Superkupën e Kosovës 2-1.

Të parët që kaluan në epërsi ishin kryeqytetasit, ku në minutën e tetë kapiteni Leotrim Kryeziu shënoi për 0-1.

E në minutën e 39-të, Besnik Krasniqi realizoi gol për Dritën nga penalltia duke barazuar shifrat në 1-1.

Prishtina mbeti me një futbollist më pak në fushë, pasi Harun Karic u ndëshkua me karton të kuq në minutën e 45-të.

Pjesa e dytë nisi furishëm për Dritën që krijoi disa raste shënimi, teksa golin e gjetën në minutën e 50-të.

Kristal Abazaj u gjend bukur në zonë dhe realizoi me kokë për 2-1.

Deri në fund përkundër që kishin dy skuadrat raste shënimi, gola nuk pati dhe Drita arriti fitore duke fituar Superkupën e Kosovës për herë të tretë në histori të klubit. /Telegrafi/

Sulmuesi francez dhe lojtari i Real Madridit, Kylian Mbappe, po kalon një formë të shkëlqyer.

Ai është pa dyshim një nga lojtarët më të mirë të klubit mbretëror dhe, në 21 ndeshje në La Liga, ka shënuar po aq gola dhe ka dhënë katër asiste.

Gazetari italian Fabrizio Romano ka publikuar një krahasim interesant mes Kylian Mbappe dhe, sipas shumë njerëzve, sulmuesit më të mirë të të gjitha kohërave – Ronaldos brazilian.

Konkretisht, Mbappe ka shënuar më shumë gola në karrierë sesa Ronaldo, pasi statistikat tregojnë se francezi ka 415 gola, ndërsa legjenda braziliane ka 414 gola.

Duhet theksuar se Mbappé është vetëm 27 vjeç dhe pritet që në vitet në vazhdim ta përmirësojë edhe më tej bilancin e tij të golave. /Telegrafi/

Xabi Alonso po merr kohë për t’u rikuperuar pas një periudhe të lodhshme në krye të Real Madridit, duke miratuar atë që ai e sheh si një periudhë “pushimi aktiv”, në vend që të nxitojë për t’u rikthyer në menaxhim.

Spanjolli nuk po nxiton të pranojë mundësinë e parë që i paraqitet, duke i qëndruar besnik bindjes së tij për angazhim afatgjatë dhe vendimmarrje të kujdesshme. Ai kishte refuzuar më herët ofertat nga Bayern Munich dhe Liverpool në pranverën e vitit 2024, duke vlerësuar se nuk ishte momenti i duhur për të bërë hapin e radhës. Tani, Alonso është i përgatitur të presë sërish, i vetëdijshëm se mundësitë e profilit të lartë do të rikthehen.

Liverpooli mbetet një nga opsionet më realiste. Hierarkia e klubit thuhet se e sheh Alonson si një mundësi për të ardhmen, potencialisht që nga sezoni 2026/27, ndërsa kontakti me përfaqësuesit e tij ka qenë pozitiv, sipas AS.

telegrafi.com

Edhe pse Arne Slot pritet ta përfundojë sezonin aktual pavarësisht rezultateve të përziera dhe investimeve të mëdha, Liverpooli po planifikon në heshtje për të ardhmen.

Pas largimit nga Real Madridi, pas zhgënjimit në Superkupë ndaj Barcelonës, Alonso i ka shfrytëzuar dy javët e fundit për të fituar perspektivë.

Ideja e një rikthimi në Anfield, ku ai kaloi pesë vite si lojtar, është shumë tërheqëse, por për momentin ai mbetet i duruar, i përqendruar në rikuperim dhe selektiv sa i përket hapit të tij të ardhshëm. /Telegrafi/