TIRANË, 26 janar /ATSH/ Federata Shqiptare e Futbollit (FSHF) prezantoi këtë të hënë strategjinë e re katërvjeçare “Vision to Victory 2026-2030”, e cila synon të sjellë zhvillime cilësore në të gjitha nivelet e futbollit shqiptar. Strategjia është ndërtuar në bashkëpunim me ekspertët e UEFA-s dhe mbështetet në një punë kërkimore të gjatë.

Në prezantim morën pjesë presidenti i FSHF-së, Armand Duka, ministri i Turizmit, Kulturës dhe Sportit, Blendi Gonxhja, përfaqësues të klubeve dhe shoqatave rajonale të futbollit, ish-futbollistë, sponsorë dhe media.

Presidenti Duka bëri një bilanc të strategjisë së kaluar “Futbolli për Kombin”, duke nënvizuar se 95% e objektivave janë realizuar ose janë në fazë të avancuar zbatimi. Ai theksoi se strategjia e re synon rritjen e pjesëmarrjes dhe cilësisë së futbollit, forcimin e strukturave organizative, investime të qëndrueshme në infrastrukturë dhe zhvillimin e talenteve të rinj.

“Kjo strategji është ndërtuar për të qenë e matshme, e zbatueshme dhe e lidhur drejtpërdrejt me realitetin e futbollit shqiptar. Deri në vitin 2030, synojmë të arrijmë 26 mijë futbollistë të regjistruar, nga 24.078 që janë sot”, tha presidenti Duka. Ai shtoi se rritja do të arrihet përmes zgjerimit të programeve në shkolla dhe komunitete, mbështetjes së klubeve për moshat e vogla, aktiviteteve të organizuara për fëmijët dhe vazhdimit të projekteve “Uniforma Ime” dhe “Topi YT”.

Në aspektin e infrastrukturës, strategjia parashikon shtimin e 30 deri në 40 fushave të reja futbolli deri në vitin 2030, kryesisht në rajonin e Tiranës. Duka theksoi se objektivi kombëtar është ndërtimi i 200 fushave të reja, një synim që kërkon mbështetje nga buxhetet e shtetit.

“Objektiv strategjik mbetet gjithashtu rritja e numrit të spektatorëve në stadiumet kombëtare, forcimi financiar i klubeve dhe akademive të futbollit dhe përfundimi i ligjit të Sponsorizimeve në Sport. Progresi i futbollit shqiptar do të jetë shumë i ngadaltë pa një ligj të tillë”, shtoi ai.

Presidenti i FSHF-së prezantoi edhe objektivat për ekipet kombëtare: pjesëmarrjen e ekipit A të djemve në turnetë finale europiane dhe botërore, kalimin e fazës së grupeve nga ekipi U-21 në Euro 2027 dhe Euro 2029, si dhe qëndrimin në Ligën B për ekipin kombëtar të vajzave dhe synimin për kualifikimin në Kampionatin Europian 2029.

Ministri i Turizmit, Kulturës dhe Sportit, Blendi Gonxhja, vlerësoi rëndësinë e partneritetit me Federatën Shqiptare të Futbollit (FSHF) dhe angazhimin e ministrisë për të çliruar potencialet e sportit dhe futbollit në vend.

Gonxhja theksoi se sporti është një nga gjeneratorët më të mëdhenj ekonomikë dhe turistik të vendit, ndërsa ligji i sponsorizimit do të përfaqësojë një hap kyç për zhvillimin e sportit, artit dhe kulturës.

“Kur kemi një partneritet dhe një aktor kaq të rëndësishëm dhe kaq të strukturuar siç është Federata Shqiptare e Futbollit, çfarë do të duhet të bënte më shumë Ministria që drejtoj sesa të sinkronizohej në strategji, në plan veprimi, në mendim, në gjithçka me FSHF, që është një organizatë në funksion të interesit publik”, tha ministri.

Ai shtoi se MTKS synon të çlirojë çdo mundësi dhe energji të bllokuara deri më sot, duke lidhur sportin me artin, kulturën dhe turizmin, të cilat sipas tij përbëjnë fitime të jashtëzakonshme për vendin.

“Ligji i sponsorizimit nuk është më zotim, është në masat e një betimi tim dhe të Presidentit të Federatës, sepse do të vijë për artin, sportin dhe rininë. Një kampionat, një skuadër e suksesshme, një sport i zhvilluar janë automatikisht gjeneratorë ekonomikë të jashtëzakonshëm”, deklaroi Gonxhja.

Ministri nënvizoi gjithashtu rëndësinë e mbështetjes së futbollit në të gjitha nivelet dhe bashkëpunimin me klubet, akademitë dhe institucionet për të forcuar zhvillimin e sportit në Shqipëri.

1 nga 3

/e.xh/a.f/r.e/

The post Strategjia për zhvillimin e futbollit 2026-2030, Gonxhja: Ligji për sponsorizimet, hap kyç appeared first on Agjencia Telegrafike Shqiptare.

TIRANË, 26 janar /ATSH/ Bankat tregtare kanë rritur lehtë fondin rezervë, ose siç njihet ndryshe të provigjioneve, për kreditë me probleme, konform kërkesave regullatore të Bankës së Shqipërisë.

Banka e Shqipërisë bëri të ditur se, gjendja e provigjioneve në fund të tremujorit të tretë të vitit 2025 ishte 30 miliardë lekë, në rënie me 3,3% krahasuar me të njëjtën periudhë të një viti më parë.

Shpenzimet e provigjioneve janë të lidhura direkt me cilësinë e portofolit të aseteve të sektorit bankar.

Sipas të dhënave të Bankës së Shqipërisë, raporti i kredive me probleme ka qenë në stanjacion gjatë vitit 2025. Në fund të nëntorit kredia me probleme zbriti në 4,19%, nga 4,48% që kishte qenë në nëntor të vitit 2024.

Për kreditë standarde bankat duhet të llogarisin provigjione në masën 1%, ndërsa për ato në vonesë nga 30 deri në 60 ditë, provigjionimi kërkohet në masën 5%.

Shkalla e provigjionimit rritet kur fillon klasifikimi si kredi me probleme (me vonesë në shlyerje prej më shumë se 60 ditë). Për këtë kategori (nën standarde) kërkohet provigjionim jo më pak se 20%, për kategorinë “e dyshimtë” (me vonesë më shumë se 90 ditë) jo më pak se 50% dhe për kategorinë “e humbur” (me vonesë mbi 180 ditë) kërkohet provigjionim i plotë, në masën 100%.

/e.xh/r.e/a.f/

The post Fondi rezervë për kreditë me probleme u ul me 3,3% appeared first on Agjencia Telegrafike Shqiptare.

TIRANË, 26 janar /ATSH/ Autoriteti për Informimin mbi Dokumentet e ish-Sigurimit të Shtetit (AIDSSH), në bashkëpunim me Ministrinë e Turizmit, Kulturës dhe Sportit dhe Fondacionin “Besa”, organizoi Klubin e Librit “Mësojmë nga e kaluara”, me diskutimin e romanit “Rrufeja në shtëpinë e mikpritësit” të shkrimtarit Marçel Hila, në kuadër të Ditës Ndërkombëtare të Përkujtimit të Holokaustit.

Në aktivitet morën pjesë mësues të historisë dhe edukimit qytetar, studentë të masterit “Mësues në Histori”, pedagogë, përfaqësues të institucionit, gazetarë dhe studiues të fushës së historisë dhe kujtesës. Diskutimet u fokusuan te kujtesa historike, edukimi qytetar dhe përgjegjësia morale e shoqërisë.

Kryetarja e Autoritetit, dr. Gentiana Sula, theksoi rëndësinë e kujtesës aktive dhe rolin e saj në edukimin qytetar.

“Dita Ndërkombëtare e Përkujtimit të Holokaustit nuk është thjesht një datë kalendarike, por një provë morale për shoqëritë dhe një thirrje për kujtesë aktive. Shqipëria, në një Evropë të përkulur nga frika dhe urrejtja racore, vendosi njeriun mbi politikën dhe jetën mbi urdhrin. Rezultati është i pakontestueshëm: Shqipëria është i vetmi vend në Evropë që doli nga Lufta e Dytë Botërore me më shumë hebrenj të shpëtuar sesa kishte përpara luftës. Kjo nuk ishte rastësi, por kulturë morale dhe zgjedhje njerëzore – ishte Besa”, tha Sula.

Drejtori ekzekutiv i Fondacionit “Besa”, Albi Greva, vlerësoi bashkëpunimin me Autoritetin e Dosjeve dhe nënvizoi rëndësinë e edukimit mbi Holokaustin dhe historinë e shpëtimit të hebrenjve.

“Ky muze do të dokumentojë dhe përcjellë ndër breza historinë e mikpritjes, solidaritetit dhe shpëtimit të hebrenjve në Shqipëri, jo si narrativë mitizuese, por si dëshmi të bazuar në fakte, dokumente dhe histori njerëzore. Ruajtja dhe transmetimi i kësaj historie është një mënyrë për të ndërtuar rezistencë shoqërore ndaj ideologjive të urrejtjes dhe për të forcuar kulturën e bashkëjetesës”, tha Greva.

Ndërsa Skënder Vrioni, anëtar i Autoritetit, vuri në dukje rolin e veçantë të qytetit të Beratit dhe komunitetit të tij në strehimin e hebrenjve gjatë Luftës së Dytë Botërore, duke përmendur veprën heroike të Kadri Cakranit.

“Kadri Cakrani udhëhoqi mbrojtjen dhe shpëtimin e qindra hebrenjve në qytetin e Beratit, duke rrezikuar jetën e tij dhe të familjes. Berati u shndërrua në një strehë shpëtimi në një nga periudhat më të errëta të historisë evropiane. Sot, Kadri Cakrani nderohet ndërkombëtarisht si simbol i besës dhe solidaritetit shqiptar”, u shpreh Vrioni.

Autori Marçel Hila prezantoi librin “Rrufeja në shtëpinë e mikpritësit”, që sjell histori konkrete dhe dëshmi njerëzore të familjeve hebreje të strehuara në Shqipëri, ndërsa gazetarja Monika Stafa, autore e librit “Hebrenjtë në Shqipëri”, theksoi se bashkëjetesa mes hebrenjve dhe shqiptarëve nuk ishte rastësore, por e ndërtuar mbi vlera të thella si mikpritja, toleranca dhe respekti për tjetrin.

Simon Mirakaj, ish-i përndjekur politik dhe ish-anëtar i Autoritetit, shtoi se aktet pozitive të administratës shqiptare gjatë luftës për shpëtimin e hebrenjve janë një mësim i rëndësishëm për brezat e rinj: “Kjo datë na vë përballë kujtesës historike dhe ideologjive të çmendura që plagosën hebrenjtë dhe mbarë njerëzimin. Akti i Kadri Cakranit, që strehoi rreth 200 hebrenj, si dhe kontributi i Kolë Bibë Mirakës, Mustafa Krujës, Eqerem Bej Libohovës dhe Zef Kadarjes, dëshmojnë guximin dhe përgjegjësinë morale të shqiptarëve”, tha Mirakaj.

Diskutimi në klubin e librit nxiti reflektime mbi mënyrat se si letërsia, dëshmitë personale dhe dokumentet arkivore mund të përdoren si mjete edukative për të nxitur mendimin kritik dhe për të shmangur banalizimin e së shkuarës.

Në përfundim u theksua se Klubi i Librit “Mësojmë nga e kaluara” synon të lidhë letërsinë me historinë, arkivat me edukimin qytetar dhe përkujtimin me përgjegjësinë, duke e kthyer kujtesën e Holokaustit në një instrument aktiv për formimin e brezave të rinj dhe ndërtimin e një shoqërie më humane dhe më të ndërgjegjshme.

1 nga 6

/e.xh/a.f/r.e/

The post Holokausti si mësim qytetarie dhe instrument edukimi kundër urrejtjes appeared first on Agjencia Telegrafike Shqiptare.

TIRANË, 26 janar /ATSH/ Kryeministri i Izraelit, Benjamin Netanyahu vlerësoi rolin historik dhe unik të Shqipërisë gjatë Luftës së Dytë Botërore, duke theksuar se shpëtimi i hebrenjve nga shqiptarët përbën një shembull të rrallë humanizmi dhe guximi që nuk do të harrohet kurrë.

Në fjalën e mbajtur sot në një seancë plenare të veçantë të parlamentit të Izraelit, ku ishte i ftuar kryeministri Edi Rama, Netanyahu, tha se “ai kapitull i historisë sonë nuk do të harrohet kurrë ndër breza. Por ajo që nuk do të harrohet po kështu është edhe shembulli i atyre njerëzve që shpëtuan hebrenjtë dhe i ndihmuan të iknin nga persekutimi”.

Sipas tij, ajo që ndodhi në Shqipëri gjatë pushtimit italian dhe nazist ishte unike. “Dhjetëra e qindra shqiptarë myslimanë rrezikuan jetën për të shpëtuar hebrenjtë. Ata i fshehën, ndanë bukën me ta dhe vunë në rrezik jo vetëm veten, por edhe anëtarët e fundit të familjeve të tyre për t’i mbrojtur”, tha Kryeministri izraelit.

Netanyahu theksoi se Shqipëria përfaqësonte një shembull të rrallë në Evropën e asaj kohe. “Shqipëria ishte ishulli i paqes në oqeanin e së keqes dhe këto akte heroike tregojnë vlerat më të mëdha të një vendi që nderonte miqtë”, deklaroi ai.

Duke iu referuar marrëdhënieve dypalëshe pas Luftës së Dytë Botërore, Netanyahu kujtoi se Shqipëria kaloi dekada të vështira nën regjimin komunist, ndërsa Izraeli u njoh zyrtarisht nga Shqipëria në vitin 1969. “Pas ndryshimeve politike 35 vite më parë, Shqipëria dhe Izraeli forcuan marrëdhëniet diplomatike”, u shpreh ai.

Kryeministri izraelit vlerësoi gjithashtu reformat e ndërmarra nga Shqipëria vitet e fundit. “Nën drejtimin tuaj, Shqipëria është kthyer në një kopsht të gjallë të Evropës që ka sukses. Unë i vlerësoj reformat që keni ndërmarrë për të përmirësuar situatën e tregut në Shqipëri dhe këtë e vlerësojnë edhe investitorët izraelitë që po vijnë në Shqipëri. Ne jemi të gatshëm t’ju ndihmojmë me çdo gjë: mbështetje për siguri, në luftën kundër terrorit, novacion, teknologji, tregti e kulturë”, deklaroi Netanyahu.

/e.xh/r.e/a.f/

The post Netanyahu: Shqipëria ishte “ishull paqeje” gjatë Holokaustit, të gatshëm t’ju mbështesim me çdo gjë appeared first on Agjencia Telegrafike Shqiptare.

TIRANË, 26 janar /ATSH/ Në një seancë plenare speciale të mbajtur në Knesset, parlamentin e Izraelit, kryeministri Benjamin Netanyahu në fjalën e rastit vlerësoi si mjaft pozitive marrëdhëniet mes Shqipërisë dhe Izraelit, duke i cilësuar ato si më të fortat ndonjëherë si në aspektin qeveritar, ashtu edhe në atë personal.

“Sot marrëdhëniet midis Shqipërisë dhe shtetit të Izraelit janë më të mira se kurrë, si në aspektin qeveritar, ashtu edhe në atë personal”, u shpreh Netanyahu, duke theksuar simbolikën e flamurit shqiptar. “Kur shoh sot dy kokat e shqiponjës që shikojnë në drejtime të ndryshme, shoh një shembull të së shkuarës dhe të së ardhmes”.

Ai shtoi se kjo simbolikë përfaqëson një vizion të përbashkët drejt së ardhmes, të bazuar në forcimin e mirëqenies dhe sigurisë mes dy vendeve. “Shoh diçka që simbolizon një shikim drejt së ardhmes, që bëhet më i fortë, me më shumë mirëqenie dhe më shumë siguri midis dy vendeve tona”, tha ai.

Kryeministri izraelit vlerësoi gjithashtu rolin e Shqipërisë në arenën ndërkombëtare, duke theksuar mbështetjen e saj të hapur për Izraelin. “Qeveria juaj po hap krahët, ashtu si shqiponja në flamurin tuaj. Përpjekjet që po bëni për ta çuar Shqipërinë përpara dhe miqësia e thellë për Izraelin, e shfaqur hapur në forume ndërkombëtare, duke qëndruar në anën e së vërtetës dhe kundër gënjeshtrës, janë të çmuara për ne”, u shpreh Netanyahu.

Duke folur për situatën e sigurisë, Netanyahu iu referua sulmit të 7 tetorit 2023 nga Hamasi, duke e cilësuar atë si një akt terrorist çnjerëzor. “Ajo që pamë ishte çnjerëzore. Terroristët vranë, përdhunuan dhe dogjën njerëz të pafajshëm. Ky ishte akti hapës i një lufte që synonte të na fshinte nga faqja e dheut”, tha ai.

Netanyahu theksoi se Izraeli do të vijojë përpjekjet për të garantuar sigurinë e tij. “Ne do të luftojmë kundër kujtdo që na sulmon. Ushtarët tanë do të mbrojnë shtëpitë tona dhe vlerat tona”, u shpreh ai, duke shtuar se Izraeli ka arritur të kthejë të gjithë pengjet, si ata të gjallë, ashtu edhe ata që kanë humbur jetën.

Sipas tij, faza e radhës është çarmatimi dhe shpërbërja e Hamasit. “Faza tjetër është shpërbërja e Hamasit dhe çarmatimi i Gazës, dhe ne duam ta përshpejtojmë këtë proces”, deklaroi Netanyahu.

Në fjalën e tij, Kryeministri izraelit vlerësoi edhe rolin e Shqipërisë si një vend me shumicë myslimane që promovon bashkëjetesën dhe paqen. “Shqipëria është shembull i bashkëjetesës. Ky është islam i moderuar, krejtësisht kundër ekstremizmit dhe xhihadit”, tha ai.

“Ju, Edi, keni shumë vlera. Shkalla juaj morale është e lartë. Por, fatkeqësisht, disa shtete janë bërë pjesë e propagandës që mbështesin islamin në vend të liberalizmit. Shohim urrejtje në vendet europiane duke mbështetur terrorin. Heshtja e shumë vendeve europiane teksa shohin terrorin në Iran është standard i dyfishtë i politikës së tyre. Pra nëse do të sulmohej Izraeli atëherë nuk do flisnin për gjenocid, por nëse do të sulmojë Izraeli do të flitej për gjenocid”, tha kryeministri izraelit Netanyahu.

/r.e/a.f/

The post Netanyahu: Marrëdhëniet Shqipëri-Izrael më të mira se kurrë appeared first on Agjencia Telegrafike Shqiptare.

TIRANË, 26 janar /ATSH/ Kanë përfunduar restaurimet në Urën e Niçës në Pogradec, një monument kulture me rëndësi të veçantë historike dhe kulturore, i cili deri para ndërhyrjes ishte pjesë e listës së objekteve më të rrezikuara për shkak të degradimit të avancuar strukturor.

Ministri i Turizmit, Kulturës dhe Sportit, Blendi Gonxhja, ndau në rrjetet sociale pamje nga ura e restauruar, teksa bëri të ditur se ndërhyrja garantoi stabilitetin e saj afatgjatë.

“Ndërhyrja restauruese e vitit 2025 e shpëtoi monumentin nga rrënimi, duke garantuar stabilitetin e tij dhe ruajtjen e vlerave historike dhe kulturore”, u shpreh ministri Gonxhja.

Sipas ministrit, restaurimi u fokusua në konsolidimin strukturor të urës, restaurimin e elementëve karakteristikë arkitektonikë dhe përdorimin e materialeve tradicionale, në përputhje me standardet e ruajtjes së trashëgimisë kulturore.

E vendosur në fshatin Niçë, në bashkinë Pogradec, Ura e Niçës gëzon një ndjeshmëri të veçantë në komunitetin vendas, pasi konsiderohet pjesë e identitetit kulturor të zonës dhe një dëshmi e rëndësishme e trashëgimisë historike lokale.

Përfundimi i restaurimit i jep monumentit një rol të ri jo vetëm në ruajtjen e vlerave kulturore, por edhe në promovimin e turizmit kulturor në rajonin e Pogradecit, duke e kthyer Urën e Niçës në një aset të rëndësishëm për zhvillimin e qëndrueshëm të zonës.

/e.xh/a.f/

The post Përfundojnë restaurimet në Urën e Niçës në Pogradec appeared first on Agjencia Telegrafike Shqiptare.

TIRANË, 19 janar /ATSH/ Zëvendësministri i Bujqësisë dhe Zhvillimit Rural, Fatmir Guri deklaroi se siguria ushqimore mbetet një nga kapitujt më sfidues në procesin e integrimit të Shqipërisë në Bashkimin Europian.

Në një intervistë për Agjencinë Telegrafike Shqiptare, Guri bëri të ditur se kapitujt 11, 12 dhe 13, që përfshijnë bujqësinë dhe zhvillimin rural, sigurinë ushqimore dhe peshkimin, janë hapur të fundit në procesin e negociatave me BE-në.

“Skema Kombëtare 2026 do të shërbejë si një instrument për përafrimin me BE-në, duke përfshirë masat mbështetëse dhe kërkesat ligjore për fermerët dhe blegtorët. Në vitin 2026 ky proces do të jetë vullnetar, ndërsa në 2027 do të bëhet i detyrueshëm, me qëllim që në 2030-ën fermerët shqiptarë të gjejnë në BE të njëjtat kushte që u janë krijuar gradualisht përmes skemës kombëtare”, tha Guri.

Ai theksoi rëndësinë e standardizimit të sigurisë ushqimore brenda fermave dhe blegtorisë. “Këto kushte do të rrisin sigurinë ushqimore në nivelin e fermës, duke përfshirë përdorimin e pesticideve dhe gjurmueshmërinë e produkteve nga ferma, deri te konsumatori final. Agronomi do të kontrollojë përdorimin e produkteve dhe do të firmosë fletoren e fermerit, duke krijuar një zinxhir të pandërprerë gjurmueshmërie”, sqaroi ai.

Sa i përket Kapitullit 12 për sigurinë ushqimore, Guri nënvizoi se numri i akteve nënligjore që duhen hartuar dhe zbatuar është i madh, duke vënë theksin tek projekti i Bashkimit Europian “CC Food Safety” me një vlerë prej 13,5 milionë euro, që synon kategorizimin e operatorëve ushqimorë dhe përafrimin me standardet e BE-së.

Zëvendësministri shtoi se ky proces do të mbështetet edhe financiarisht nga Banka Shqiptare e Sigurimeve (BShS), kredia sovrane dhe Banka e Zhvillimit, për të siguruar implementimin e standardeve të BE-së në prodhimin ushqimor dhe blegtoral.

“Skema Kombëtare e vitit 2026 do t’u kërkojë fermerëve dhe blegtorëve jo vetëm të prodhojnë, por të prodhojnë sipas kushteve që afrohen me standardet e BE-së, duke krijuar një zinxhir të sigurt dhe të gjurmueshëm të produkteve ushqimore”, përfundoi Guri.

Guri: Vijon vlerësimi i dëmeve nga reshjet, investim tek argjinaturat problematike

Zëvendësministri i Bujqësisë dhe Zhvillimit Rural, Fatmir Guri, bëri të ditur se 87 ekspertë të MBZHR janë angazhuar në procesin e verifikimit dhe vlerësimit të dëmeve në tetë rajone të vendit, të prekura nga reshjet e shumta të javës së kaluar.

“Ne kemi angazhuar 87 specialistë të Ministrisë së Bujqësisë dhe Zhvillimit Rural, të cilët janë në funksion të bashkive për të kryer procesin e vlerësimit të dëmeve, proces që nis nga strukturat vendore”, tha Guri, teksa bëri të ditur se, “qëllimi ynë ka qenë të jemi pranë fermerëve, jo vetëm për vlerësimin e dëmeve, por edhe për mbështetje teknike dhe ndërhyrje të menjëhershme aty ku ka qenë e nevojshme”.

Zv.ministri Guri deklaroi se “sot, situata e përmbytjeve në tokat bujqësore është drejt përmirësimit. Vetëm disa sipërfaqe të vogla mbeten ende nën ujë, për shkak të kushteve morfologjike të terrenit”.

Sa i përket dëmeve në blegtori, Guri bëri të ditur se janë raportuar humbje të kufizuara, konkretisht rreth 50 krerë gjedhë dhe 12 krerë bagëti të imta.

Në lidhje me prodhimin bujqësor, ai theksoi se dëmet kanë qenë minimale në parcelat ku uji është tërhequr shpejt, ndërsa më të konsiderueshme në zonat ku uji ka qëndruar për një periudhë më të gjatë.

“Duhet pasur parasysh që në këtë periudhë kemi të kultivuara kulturat e lashta, si gruri dhe thekra. Aty ku uji është larguar menjëherë, dëmet janë minimale, ndërsa në zonat ku uji ka qëndruar më gjatë, dëmtimet janë më të ndjeshme”, u shpreh Guri.

Duke folur për masat afatmesme dhe afatgjata, ai theksoi se investimet në ujitje dhe kullim janë një prioritet kryesor i buxhetit të vitit 2026, me fokus zonat që shfaqën problematika gjatë situatës së fundit.

“Në investimet që nisim këtë vit, prioritet janë të gjitha pikat ku argjinaturat dhe kanalet ujitëse-kulluese patën probleme gjatë kësaj situate, konkretisht në argjinaturat e lumenjve Devoll, Seman, Drojë të Lezhës”, tha ai.

Guri kujtoi se reshjet intensive të shiut të javës së kaluar, sollën përmbytjen e 13 100 hektarëve tokë bujqësore në rajonet Shkodër, Lezhë, Kurbin, Durrës, Fier, Vlorë, në grykëderdhjen e Semanit dhe zonën e Karavastasë.

Sipas tij, për t’u ardhur në ndihmë fermerëve dhe për të adresuar çdo problematikë që paraqitej, MBZHR angazhoi në terren 200 veterinerë, specialistë të ujitjes dhe kullimit, si dhe të mbrojtjes së bimëve.

Në kuadër të masave emergjente, Guri bëri të ditur se ekspertët e bordeve të ujitjes dhe kullimit, në varësi të MBZHR, vunë në përdorim 28 ekskavatorë për pastrimin dhe hapjen e kanaleve të bllokuara, kryesisht nga mbetjet e ardhura si pasojë e proceseve bujqësore. Ndërkohë që të gjithë hidrovoret kanë qenë në funksion.

/e.xh/r.e/a.f/

The post Guri për ATSH: Gjurmueshmëria do të garantohet nga ferma deri te konsumatori final appeared first on Agjencia Telegrafike Shqiptare.

1 nga 4

The post Delegacioni i KFOR-it vizitë në Portin e Durrësit për bashkëpunim logjistik appeared first on Agjencia Telegrafike Shqiptare.

TIRANË, 24 janar /ATSH/ Drejtoria e Përgjithshme e Burgjeve bëri të ditur se, për shkak të rikonstruksionit të Institucionit të Ekzekutimit të Vendimeve Penale (IEVP) Fushë-Krujë, ka nisur procesi i transferimit të të dënuarve drejt institucioneve të tjera të vuajtjes së dënimit.

Konkretisht, janë transferuar gjithsej 142 të burgosur, nga të cilët 85 për në IEVP Peqin dhe 57 për në IEVP Durrës. Për realizimin e këtij procesi janë marrë të gjitha masat e nevojshme për ruajtjen dhe shoqërimin e të burgosurve nga forcat operacionale, nën drejtimin e specialistëve përkatës. Gjithashtu, për lëvizjen janë njoftuar Drejtoria Vendore e Policisë Tiranë, Drejtoria Vendore e Policisë Elbasan, si dhe komisariatet përkatëse, në përputhje me itinerarin e përcaktuar.

Autokolona me 57 të burgosur ka mbërritur pa probleme në IEVP Durrës, ku nga ana e institucionit janë marrë masat e plota për pritjen, kontrollin dhe sistemimin e tyre, nën drejtimin e drejtuesve të institucionit.

Po ashtu, autokolona me 85 të burgosur ka mbërritur pa probleme në IEVP Peqin, ku janë zbatuar të gjitha procedurat standarde për pritjen, kontrollin dhe sistemimin e të burgosurve, nën drejtimin e drejtuesve të institucionit.

Procesi i transferimit është zhvilluar në mënyrë të qetë, të sigurt dhe në përputhje të plotë me aktet ligjore dhe rregulloret në fuqi, njofton Drejtoria e Pergjithshme e Burgjeve.

e.xh/j.p/

The post Rikonstruksioni i godinës, 142 të dënuar të burgut të Fushë-Krujës transferohen në Peqin dhe Durrës appeared first on Agjencia Telegrafike Shqiptare.

TIRANË, 24 janar /ATSH/ Ministria e Infrastrukturës dhe Energjisë (MIE) vijon punën intensive për përmbylljen e negociatave të integrimit në Bashkimin Evropian për katër nga kapitujt më të rëndësishëm, me fokus të veçantë te Kapitulli 15 – Energjia.

Zëvendëskryeministrja dhe njëherazi ministre e Infrastrukturës dhe Energjisë, Belinda Balluku duke publikuar momente nga mbledhja e skuadrës së drejtuar nga Enkeleda Muçaj, kryenegociatore e Ministrisë së Infrastrukturës dhe Energjisë, Balluku u shpreh se të gjithë janë angazhuar plotësisht në këtë proces historik.

“Të gjithë drejtuesit e skuadrës sonë janë mobilizuar për të çuar përpara negociatat, si dhe për të informuar dhe përgatitur grupet e interesit të lidhura me këto kapituj,” tha Balluku.

Shqipëria synon që në vitin 2027 t’i ketë plotësuar të gjitha kushtet për mbylljen e negociatave me Bashkimin Europian.

Ndërkohë në 2025-ën Shqipëria i çeli negociatat për 33 kapituj. Në 17 nëntor çeli negociatat për 5-së kapitujt e fundit.

Në 2026 Shqipëria do të kalojë, dhe po punon intensivisht për këtë, për t’u futur në fazën e mbylljes së negociatave për anëtarësim me një numër të mirë fushash nga këto 33 kapituj.

Procesi përfshin koordinimin e drejtuesve të institucioneve dhe ekspertëve të fushave përkatëse, me qëllim përgatitjen e plotë të vendit për kërkesat dhe standardet e BE-së në këtë sektor kyç.

e.xh/j.p/

The post Balluku: MIE, e anagazhuar në përmbylljen e kapitujve kyç të negociatave me BE appeared first on Agjencia Telegrafike Shqiptare.

TIRANË, 24 janar /ATSH/ Ministri i Financave, Petrit Malaj, së bashku me drejtorin e Përgjithshëm të Doganave, Genti Gazheli, zhvilluan një vizitë pune në dy kompani shqiptare, të cilat kanë përfituar statusin e Operatorit Ekonomik të Autorizuar, kompaninë “Everest” dhe “Albaelettrica”.

Gjatë vizitës, ministri Malaj u njoh nga afër me aktivitetin e kompanive dhe me përfitimet që ka sjellë statusi i Operatorit Ekonomik të Autorizuar për to. Kompania Everest ushtron aktivitetin e saj ekonomik prodhues dhe eksportues në sektorin e profileve të duraluminit dhe industrisë së automotivës, ka rreth 530 punonjës dhe operon në të gjithë zinxhirin e prodhimit, nga përpunimi i aluminit deri te produktet e gatshme për tregun vendas dhe eksport. Rreth 60–65% e prodhimit të saj eksportohet në tregje si Italia, Shtetet e Bashkuara të Amerikës, Kanadaja dhe vendet e rajonit.Administratori i kompanisë “Everest” vlerësoi përfitimet që statusi OEA i ka sjellë biznesit, duke theksuar thjeshtimin e procedurave doganore, reduktimin e kontrolleve, përshpejtimin e transportit dhe kursimin e kohës, element kyç për rritjen e eficiencës dhe konkurrueshmërisë.

Vizita vijoi në kompaninë “Albaelettrica”, një tjetër subjekt përfitues i statusit Operator Ekonomik i Autorizuar, e specializuar në tregtimin me shumicë e pakicë të materialeve elektrike, civile, industriale, si dhe projektimin dhe instalimin e tyre. Edhe përfaqësuesit e kësaj kompanie theksuan se certifikimi OEA ka sjellë lehtësira të ndjeshme në procedurat doganore, duke ndikuar drejtpërdrejt në uljen e kostove dhe përmirësimin e performancës operacionale.

Nga ana e tij, ministri i Financave vlerësoi lehtësitë që sjell statusi iOperatorit Ekonomik të Autorizuar dhe i bëri thirrje të gjithë bizneseve që të aplikojnë për të përfituar këtë status.

“Jemi sot këtu për t’i bërë thirrje të gjithë bizneseve nëpër Shqipëri, të cilët kanë një aktivitet që i lidh me importin dhe eksportin në drejtorinë e Doganave, që të shohin mundësinë për të marrë certifikimin e Operatorit Ekonomik të Autorizuar, sepse ju jep procedura doganore më të thjeshtuara, më pak kontrolle nëpër doganë por, edhe në ato raste kur ka kontrolle, subjektet të cilët kanë këtë certifikim kanë një prioritet përsa i përket procesimit të procedurave doganore”, u shpreh  Malaj.

Nga ana e tij, drejtori i Përgjithshëm i Doganave vuri në dukje se statusi OEA bazohet në besim dhe bashkëpunim të ndërsjellë ndërmjet administratës doganore dhe bizneseve korrektë. Ai theksoi se përfitimet përfshijnë, ndër të tjera, më pak kontrolle dokumentare dhe fizike, zhdoganim lokal në ambientet e subjektit dhe kursim të ndjeshëm të kohës dhe kostove.

Gjatë vizitës, Malaj përfitoi nga rasti për të informuar se aktualisht Shqipëria po punon intensivisht për përafrimin e Kodit Doganor me legjislacionin e Bashkimit Europian, proces që pritet të përfundojë brenda këtij viti.

“Shqipëria po ecën me hapa të shpejtë drejt përafrimit të të gjithë kuadrit të saj ligjor me direktivat e Bashkimit Europian. Drejtoria e Përgjithshme e Doganave është aktualisht duke punuar për të përafruar dhe për të harmonizuar të gjithë Kodin Doganor me kërkesat e direktivave të BE dhe brenda këtij viti ne do ta përfundojmë të gjithë këtë proces. Kodi Doganor shqiptar do të jetë njësoj si Kodi Doganor që aplikohet në Bashkimin Europian. Prandaj, këto fasilitete të cilat ju tashmë i keni përfituar duhet t’i përfitojnë edhe operatorët e tjerë, në mënyrë që të jenë edhe ata më efikasë dhe më konkurrues në tregun ku do të aderojmë shumë shpejt”, tha ministri i Financave.

Operatori Ekonomik i Autorizuar (OEA) është një status që u jepet operatorëve ekonomikë të besueshëm, të cilët përfitojnë nga thjeshtime dhe lehtësira doganore, si dhe nga një trajtim më i favorshëm nga administrata doganore. Deri më tani, këtë status e kanëpërfituar 18 kompani, të cilat operojnë në sektorë të ndryshëm në treg.Për të përfituar statusin OEA, operatorët duhet të plotësojnë kritere të caktuara, si: respektimi i legjislacionit doganor dhe tatimor, kapacitet i mirë financiar, sisteme të përshtatshme menaxhimi dhe, për OEA-S, standarde të larta sigurie dhe mbrojtjeje të zinxhirit tregtar.Përfitimet e statusit të OEA-ve jepen në varësi të llojit të autorizimit, si: një trajtim më i favorshëm në lidhje me vlerësimin e riskut dhe kontrollet; një akses i thjeshtuar apo ekskluziv në disa thjeshtime doganore; si dhe marrëveshje për njohje të përbashkët me shtete të tjera.

e.xh/j.p/

The post Malaj: Bizneset të aplikojnë për statusin OEA për procedura më të thjeshtuara doganore appeared first on Agjencia Telegrafike Shqiptare.

TIRANË, 24 janar /ATSH/ Stenda e Shqipërisë në Panairin Ndërkombëtar të Turizmit FITUR 2026, në Madrit, Spanjë, ka tërhequr interes të lartë nga vizitorë dhe operatorë turistikë nga vende të ndryshme të botës, duke reflektuar rritjen e vëmendjes ndërkombëtare ndaj Shqipërisë si destinacion turistik.

Në stendën shqiptare prezantohen destinacionet kryesore turistike të vendit, vlerat e trashëgimisë kulturore, si dhe produktet tradicionale, të cilat përfaqësojnë një pjesë të rëndësishme të ofertës turistike kombëtare. Ky prezantim synon të pasqyrojë diversitetin e Shqipërisë dhe potencialin e saj për zhvillimin e turizmit gjatë gjithë vitit.

Ministri i Turizmit, Kulturës dhe Sportit, Blendi Gonxhja, ndau në rrjetet sociale momente nga aktivitetet në stendën e Shqipërisë, duke theksuar interesin dhe kureshtjen e vizitorëve për të njohur më nga afër destinacionet shqiptare.

“Çdo moment pulson me interes dhe kureshtje për të zbuluar e përjetuar Shqipërinë në të gjitha dimensionet e saj”, u shpreh ministri Gonxhja.

Pjesëmarrja e Shqipërisë në FITUR 2026 vlerësohet si një mundësi e rëndësishme për promovimin e turizmit shqiptar në tregjet ndërkombëtare, për forcimin e bashkëpunimit me operatorë turistikë dhe për rritjen e numrit të vizitorëve të huaj në vend.

Referuar të dhënave të fundit të publikuara nga Instituti i Statistikave (INSTAT) 12,466,038 shtetas të huaj kanë vizituar vendin tonë gjatë vitit që lamë pas.

Kjo shifër shënon një rritje vjetore prej 6.6% krahasuar me vitin 2024, duke dëshmuar se trendi rritës i Shqipërisë si destinacion turistik po konsolidohet.

e.xh/j.p/

The post Gonxhja: Interes për të zbuluar e përjetuar Shqipërinë në panairin Fitur në Madrid appeared first on Agjencia Telegrafike Shqiptare.

TIRANË, 24 janar /ATSH/ Leku fitoi terren ndaj monedhave kryesore të huaja gjatë javës 19–23 janar në tregun e brendshëm të këmbimit valutor.

Sipas kursit zyrtar të Bankës së Shqipërisë, dollari amerikan u këmbye në fundjavë me 82,17 lekë, nga 83,01 lekë në fillim të javës, duke shënuar një rënie prej 0,84 lekësh.

Edhe euro shënoi një rënie të lehtë ndaj lekut. Monedha evropiane u kuotua këtë fundjavë me 96,43 lekë, nga 96,51 lekë ditën e hënë, ose 0,08 lekë më pak.

Në raport me lekun u dobësuan gjithashtu paundi britanik dhe franga zvicerane.

Paundi britanik u këmbye nga 111,27 lekë në fillim të javës, në 111,21 lekë në fundjavë, ndërsa franga zvicerane u zhvlerësua lehtë me 0,01 lekë, duke u kuotuar në 103,92 lekë.

Banka e Shqipërisë vijon të zbatojë një regjim të lirë të kursit të këmbimit, ku ecuria e tregut valutor përcaktohet nga raporti i kërkesës dhe ofertës. Sipas institucionit, luhatjet e regjistruara reflektojnë zhvillimet pozitive në ekonominë shqiptare, si edhe ndikimet nga tregjet ndërkombëtare financiare.

e.xh/j.p/

The post Leku fiton terren ndaj valutave kryesore appeared first on Agjencia Telegrafike Shqiptare.

TIRANË, 24 janar /ATSh/ Hyrja e bankës së parë digjitale në tregun financiar shqiptar përbën një risi të rëndësishme për sistemin bankar, duke shënuar një hap drejt modernizimit të shërbimeve financiare dhe përafrimit me standardet evropiane.

Ky zhvillim pritet të sjellë një model të ri operimi, të bazuar tërësisht në teknologji digjitale, si dhe të rrisë konkurrencën në treg.

Ekspertja e ekonomisë, Romina Radonshiqi, në një intervistë për Agjencinë Telegrafike Shqiptare, vlerësoi se Shqipëria ka treguar gatishmëri për të përqafuar risitë, edhe pse përballet ende me sfida infrastrukturore dhe informuese.

“Hyrja e bankës digjitale do të na afrojë më shumë me tregjet bankare evropiane dhe do të rrisë konkurrueshmërinë e sistemit financiar”, u shpreh Radonshiqi.

Sipas saj, përvoja pozitive e qytetarëve me shërbimet online ka treguar se digjitalizimi sjell përfitime konkrete, duke reduktuar kohën dhe kostot si për individët, ashtu edhe për bizneset, përfshirë zonat rurale. E njëjta prirje pritet të reflektohet edhe në sistemin bankar, përmes rritjes së efikasitetit dhe aksesit në shërbime financiare.

“Banka digjitale nënkupton kosto më të ulëta transaksionesh, kursim kohe dhe rritje të konkurrueshmërisë, si në aspektin e të bërit biznes, ashtu edhe në realizimin e operacioneve financiare”, tha ajo.

Radonshiqi theksoi se banka e re digjitale pritet të shërbejë si model për bankat e tjera tregtare, duke nxitur digjitalizimin e mëtejshëm të shërbimeve dhe orientimin e tregut bankar drejt inovacionit teknologjik.

Megjithatë, krahas risive që sjell, digjitalizimi i plotë i shërbimeve bankare shoqërohet edhe me sfida të rëndësishme, ku kryesorja mbetet siguria kibernetike. Sipas ekspertes, rritja e përdorimit të platformave digjitale ekspozon sistemin financiar ndaj rreziqeve të reja, përfshirë sulmet kibernetike, të cilat mbeten një shqetësim për qytetarët dhe bizneset.

“Pavarësisht lehtësive dhe efikasitetit që ofron banka digjitale, sfida kryesore lidhet me garantimin e sigurisë së të dhënave dhe transaksioneve financiare. Kjo kërkon masa të shtuara sigurie dhe bashkëpunim të ngushtë mes bankave dhe institucioneve rregullatore”, theksoi Radonshiqi.

Sipas saj, adresimi i sfidës së sigurisë kibernetike do të jetë vendimtar për ndërtimin e besimit të publikut dhe për suksesin afatgjatë të modelit të bankës digjitale në Shqipëri, duke e kthyer këtë risi në një faktor pozitiv për zhvillimin e gjithë sistemit bankar.

Banka e parë digjitale, e cila ka marrë miratimin nga Banka e Shqipërisë, do të operojë pa degë fizike, duke ofruar shërbime bankare përmes platformave digjitale. Modeli i saj synon të kombinojë teknologjinë e avancuar me procedura të thjeshtuara, kosto më të ulëta transaksionesh dhe një qasje të përqendruar te klienti, duke ndryshuar mënyrën tradicionale të ndërveprimit me bankën.

/e.xh/r.e/ /a.g/

The post Banka e parë digjitale në Shqipëri, risi teknologjike dhe test për sigurinë kibernetike appeared first on Agjencia Telegrafike Shqiptare.

The post Korrupsion dhe shpërdorim detyre, arrest shtëpie ndaj 3 efektivëve në Orikum appeared first on Agjencia Telegrafike Shqiptare.

TIRANË, 23 janar /ATSH/ Ministri i Turizmit, Kulturës dhe Sportit, Blendi Gonxhja takoi në Panairin Ndërkombëtar të Turizmit FITUR 2026 në Madrid, kryebashkiakun e qytetit, José Luis Martínez-Almeid.

Gonxhja ndau në rrjete sociale momente nga takimi me kryetarin e bashkisë së Madridit, José Luis Martínez-Almeida në një panair lider qv siç u shpreh ai që mbetet një platformë kyçe për dialogun dhe bashkëpunimin ndërkombëtar në fushën e turizmit.

Më herët gjatë ditës së sotme, ministri Gonxhja u takua me Sekretaren e Përgjithshme, të UN Tourism, Sheikha Al Nowais.

Panairi Fitur është  nga më të mëdhenjtë në fushën e turizmit, i njohur për numrin e lartë të kontratave dhe marrëveshjeve që lidhen gjatë ditëve të para të tij. Shqipëria po merr pjesë me synimin për të zgjeruar ofertën turistike gjatë gjithë vitit. /j.p/

The post Gonxhja, takim me kryebashkiakun e Madridit gjatë panairit “Fitur” appeared first on Agjencia Telegrafike Shqiptare.

TIRANË, 23 janar /ATSH/ Ministri i Turizmit, Kulturës dhe Sportit, Blendi Gonxhja, gjatë qëndrimit në Madrid, në kuadër të Panairit Ndërkombëtar të Turizmit FITUR 2026, zhvilloi takim me ministrin e Industrisë dhe Turizmit të Spanjës, Jordi Hereu i Boher.

Gonxhja tha se në fokus të takimit ishte shkëmbimi i përvojave dhe modeleve të suksesshme në sektorin turistik.

“Diskutuam mbi mundësitë për forcimin e bashkëpunimit në fusha me interes të përbashkët, duke përfshirë turizmin e qëndrueshëm, promovimin e destinacioneve kulturore, diversifikimin e ofertës turistike dhe zgjatjen e sezonit”, u shpreh ministri.

Ministri Gonxhja dhe homologu i tij spanjoll theksuan potencialin në rritje të Shqipërisë si destinacion turistik, si dhe interesin e shtuar të tregut spanjoll për ofertat turistike shqiptare. Po ashtu, gjatë takimit u vlerësua rëndësia e partneriteteve institucionale dhe të biznesit për nxitjen e investimeve dhe bashkëpunimit afatgjatë.

Të dy ministrat konfirmuan vullnetin e përbashkët për thellimin e dialogut dypalësh, duke kontribuar në forcimin e marrëdhënieve turistike dhe kulturore midis Shqipërisë dhe Spanjës dhe promovimin e vendit si destinacion gjithëvjetor të turizmit ndërkombëtar.

Ky takim shënon një hap të rëndësishëm në intensifikimin e bashkëpunimit midis dy vendeve dhe në zhvillimin e mëtejshëm të sektorit turistik shqiptar, duke u mbështetur në praktikat më të mira evropiane dhe standardet ndërkombëtare.

Pjesëmarrja e Shqipërisë në Panairin Ndërkombëtar të Turizmit Fitur në Madrid, Spanjë është tashmë një traditë e konsoliduar.

Në këtë edicion të panairit Shqipëria prezantohet me moton “Albania All Senses”, duke promovuar destinacionet turistike, produktet autentike dhe ofertën e plotë të shërbimeve turistike të vendit.

e.xh/j.p/

The post Gonxhja me homologun në Madrid: Interes i shtuar i tregut spanjoll për ofertat turistike shqiptare appeared first on Agjencia Telegrafike Shqiptare.

TIRANË, 6 qershor /ATSH/ Drejtoria Vendore e Policisë Tiranë bëri me dije se ka marrë masa organizative dhe operacionale për garantimin e rendit publik dhe sigurisë gjatë zhvillimit të tubimit të Partisë Demokratike që do të zhvillohet ditën e nesërme, përpara Kryeministrisë, në orën 17:00.

Si pjesë e këtyre masave, Policia njofton se ditën e sotme dhe të nesërme do të ketë kufizime në qarkullimin e automjeteve në disa akse rrugore:

Nga ora 23:45, të ditës së sotme, do të bllokohet lëvizja dhe nuk do të lejohet parkimi i automjeteve deri në përfundim të tubimit në bulevardin ”Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”.

Nga ora 15:00 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Në varësi të zhvillimit të tubimit, mund të ketë kufizime të qarkullimit të automjeteve edhe në akse të tjera rrugore. Në rast bllokimi, për të ndihmuar qytetarët që do të qarkullojnë në këto akse, Policia e Tiranës ka marrë masa për të devijuar qarkullimin e automjeteve në rrugë alternative.

Policia e Tiranës apelon për qytetarët që të shmangin lëvizjen me automjete në akset rrugore që do të bllokohen dhe të përdorin rrugë alternative, për të mos penguar lëvizjen e lirë të pjesëmarrësve në tubim.

e.xh/j.p/

The post Policia masa për tubimin e PD-së, nesër bllokim i qarkullimit në disa akse rrugore appeared first on Agjencia Telegrafike Shqiptare.

TIRANË, 23 janar /ATSH/ Shqipëria vijon të tërheqë vizitorë të huaj, me një rritje prej 6,8 % të turistëve të huaj gjatë muajit dhjetor 2025, krahasuar me të njëjtin muaj të vitit 2024, sipas të dhënave të publikuara nga INSTAT.

Instituti i Statistikave (INSTAT) publikoi sot të dhënat për muajin dhjetor, të cilat vulosin bilancin vjetor: 12,466,038 shtetas të huaj kanë vizituar vendin tonë gjatë vitit që lamë pas.

Kjo shifër shënon një rritje vjetore prej 6.6% krahasuar me vitin 2024, duke dëshmuar se trendi rritës i Shqipërisë si destinacion turistik dhe tranzit nuk ishte i përkohshëm.

Gjatë dhjetorit, 698.742 shtetas të huaj hynë në territorin e vendit, ndërsa daljet e tyre arritën në 638.680 persona, duke shënuar një rritje prej 5,5 % krahasuar me një vit më parë.

Të dhënat tregojnë se Shqipëria po vazhdon të konsolidohet si destinacion turistik i preferuar, për shkak të rritjes së udhëtimeve ndërkombëtare, kthimeve sezonale të emigrantëve dhe promovimit të vendit si destinacion gjithëvjetor.

INSTAT bën të ditur se flukset e lëvizjes së shtetasve shqiptarë dhe të huaj drejt dhe nga Shqipëria vijuan të shënojnë rritje edhe gjatë muajit dhjetor 2025.

Gjatë muajit dhjetor 2025, në territorin e Republikës së Shqipërisë kanë hyrë gjithsej 1.542.889 shtetas shqiptarë dhe të huaj, duke shënuar një rritje prej 7,0 % krahasuar me të njëjtin muaj të vitit 2024. Ndërkohë, numri i daljeve nga territori i vendit ka arritur në 1.353.137 shtetas shqiptarë dhe të huaj, ose 8,1 % më shumë krahasuar me dhjetorin e vitit të kaluar.

Sipas INSTAT, hyrjet e shtetasve shqiptarë gjatë muajit dhjetor 2025 janë regjistruar në 844.147 persona, duke pësuar një rritje prej 7,1 % krahasuar me dhjetorin 2024. Edhe daljet kanë shënuar rritje. Gjatë dhjetorit 2025, nga Shqipëria kanë dalë 714.457 shtetas shqiptarë, ose 10,6 % më shumë krahasuar me dhjetorin 2024.

e.xh/j.p/

The post INSTAT: Mbi 12,4 milionë vizitorë të huaj gjatë 2025-ës, rritje vjetore 6.6 % appeared first on Agjencia Telegrafike Shqiptare.

TIRANË, 23 janar /ATSH/ Ministri i Bujqësisë dhe Zhvillimit Rural, Andis Salla, në vijim të turit të dëgjesave me fermerët për hartimin e Skemës Kombëtare 2026, zhvilloi sot takime në qarkun Shkodër, me dy ndalesa në Shkodër dhe Malësi të Madhe, duke vijuar dialogun e drejtpërdrejtë me fermerët mbi nevojat reale të sektorit bujqësor.

Gjatë dëgjesës me fermerët, ministri Salla theksoi rëndësinë e dialogut të drejtpërdrejtë për të reflektuar mbi problematikat ekzistuese dhe për të ndërtuar një skemë më të drejtë dhe gjithëpërfshirëse.

“Në dëgjesën e radhës me fermerët, po flasim hapur për atë që nuk ka funksionuar dhe po konceptojmë Skemën Kombëtare 2026 mbi siguri, gjithëpërfshirje dhe adresimin e mbështetjes së munguar”, u shpreh ministri.

Ai nënvizoi se Skema Kombëtare 2026 do të bazohet në parime të qarta dhe të barabarta për të gjithë fermerët. “Një skemë me rregulla të qarta e të barabarta për të gjithë, të përafruara me standardet e Bashkimit Europian, që garanton pagesa të drejta, duke e bërë sektorin më të fortë, më konkurrues dhe më të qëndrueshëm”, theksoi Salla.

Gjatë takimeve në Shkodër dhe Malësi të Madhe, ministri Salla u shoqërua edhe nga kryetarët e bashkive përkatëse, ndërsa bashkëbisedimi me fermerët u përqendrua në nevojat reale të terrenit dhe në sugjerimet për përmirësimin e mbështetjes publike për sektorin bujqësor.

Turi i dëgjesave për Skemën Kombëtare 2026 do të vijojë edhe në qarqe të tjera të vendit, me synimin që politikat mbështetëse të ndërtohen mbi kontributin e drejtpërdrejtë të fermerëve dhe në përputhje me standardet e Bashkimit Europian.

1 nga 2

e.xh/j.p/

The post Salla në Shkodër dhe Malësi të Madhe: Dëgjesa të hapura me fermerët për adresim mbështetjeje gjithëpërfshirëse appeared first on Agjencia Telegrafike Shqiptare.