Këtë të enjte, kryeministri i vendit Edi Rama, ka sqaruar arsyen pse nuk ishte në Davos për të nënshkruar marrëveshjen e aderimit në Bordin e Paqes, nismë e ndërmarrë nga Presidenti Donald Trump.

Në përgjigje të interesit të deputetëve të opozitës, Rama deklaroi se duhet të bënte një zgjedhje mes ftesës së Trump, apo pritjes së vajzës së tij Ivanka Trump në Shqipëri.

Kreu i qeverisë deklaroi se me lejen e Donald Trump, zgjodhi që të priste vajzën e tij.

“Që mos shqetësoheni pse nuk jam atje, Unë duhet të bëja një zgjedhje midis ti përgjigjesha ftesës së babait, apo të mirëprisja vajzën në Shqipëri dhe zgjidha vajzën. Natyrisht që vajzën e zgjodha me lejen e babait.

Duke qenë se zoti Mediu është ura që lidh Amerikën me rrugën e shpresës prisja nga Mediu që të hidhte poshtë pretendimin e Britanisë dhe të mbante anën e Amerikës, por ne nuk shohim arsye për të parë divergjenca të tilla. Kështu që zoti Mediu rrini i qetë, analizat i kanë bërë ata që na kanë ftuar dhe ne s’na ka ardhur koha të analizojmë ata që na ftojnë”, u shpreh Rama.

The post Pse nuk mori pjesë në Davos? Rama i përgjigjet opozitës: Zgjodha të mirëprisja vajzën e Trump me lejen e babait appeared first on Albeu.com.

Këtë të enjte, një aksident i rëndë rrugor ka ndodhur në qytetin e Durrësit, ku si pasojë janë plagosur pesë persona.

Ngjarja u regjistrua në rrugën “Ankona”, ku dy automjete u përplasën me njëra-tjetrën.

Sipas njoftimit zyrtar të Policisë së Durrësit, specialistët e qarkullimit rrugor arrestuan në flagrancë shtetasin E. Ç., 33-vjeç, banues në Durrës.

Ai ishte drejtuesi i njërit prej automjeteve të përfshira në aksident, ndërsa mjeti tjetër drejtohej nga shtetasi A. I.

Nga përplasja u dëmtuan të dy drejtuesit e automjeteve, të cilët ndodhen nën kujdesin e mjekëve në spital.

Po ashtu, tre pasagjerë pësuan lëndime, por pas marrjes së ndihmës mjekësore u larguan në banesat e tyre.

The post Aksident i rëndë në Durrës, plagosen 5 persona appeared first on Albeu.com.

Këtë të enjte, gjatë seancës për të shqyrtuar kërkesën e kryeministrit, lidhur me vendimin e GJKKO-së për pezullimin nga detyra të zv.kryeministres Belinda Balluku, përfaqësuesi i kryeministrisë u pyet edhe për dallimin mes pozitës së kreut të qeverisë dhe ministrit, sa i përket pezullimit nga gjykata.

Gjyqtari Asim Vokshi, pyeti nëse mund të bëhet një dallim mes kryeministrit që nuk mund të pezullohet dhe ministrit i cili është i zëvendësueshëm.

Herald Jonuzaj, përfaqësues i Kryeministrisë, tha se kryeministrit i është shtrënguar dora për të bërë zëvendësimin e ministres, ndërkohë që Apeli mund ta rrëzojë masën e pezullimit të vendosur në shkallën e parë të GJKKO.

Gjyqtari Asim Vokshi: Ju e konsideroni shkarkim pezullimin nga detyra. Ka vend për të bërë një dallim mes pozitës së kryeministrit, i cili mund të argumentohet se është i pamundur të pezullohet, me atë të ministrave të cilët janë të zëvendësueshëm?

Herald Jonuzaj, drejtor juridik i Kryeministrisë: A është duke iu shtrënguar dora kryeministrit për të zëvendësuar një ministër sepse është marrë një masë pezullimi? Kjo mund të bjerë në Apel. A po i shtrëngohet dora kryeministrit? Ne për këtë i jemi drejtuar Gjykatës.

The post Masa e pezullimit ndaj Ballukut në GJKKO/ Përfaqësuesi i Qeverisë: Çfarë ndodh nëse Apeli e rrëzon? appeared first on Albeu.com.

Ditën e sotme, kreu i Komisionit të Prokurimeve Publike, Jonaid Myzyri, është paraqitur në ambientet e Prokurorisë së Posaçme (SPAK).

Jonaid Myzyri, është i marrë i pandehur për shkelje të barazisë në tendera dhe ankande publike.

Më 5 tetor 2025, Gjykata e Posaçme e pezulloi Myzyrin nga detyra, ndërsa ai u rikthye në detyrë 3 muaj më pas, më 30 qershor, ditë kur edhe iu komunikuan akuzat.

SPAK e akuzon Myzyrin për një tender me vlerë rreth 2.2 milionë euro në vitin 2020 për mirëmbajtjen e segmentit rrugor rreth 59 kilometra Rrëshen (Ura e Fanit)-Shpal, Shpal-Qafë Bene-Hadroj dhe Shpal-Ura e Repsit.

Tenderi është zhvilluar nga Autoriteti Rrugor Shqiptar më 18 shtator 2020, proces në të cilin janë konstatuar shkelje të mëdha ligjore, të cilat KPP me kryetar Myzyrin i ka shpërfillur.

Sipas SPAK, ky Komision, në kundërshtim me ligjin ka favorizuar bashkimin e kompanive AEK MUNELLA dhe DRINI-1, të cilat e kanë fituar tenderin 2.2 milionë eurosh me dokumente të falsifikuara.

Në këtë proces ka pasur ankesa nga operatorë të tjerë, si “KTHELLA”, i cili është skualifikuar nga KPP me arsyetimin se oferta me vlerë më të ulët që kishte paraqitur ishte anormale.

Në vendimin për skualifikim, thuhej se autoriteti kontraktor duhej ta refuzonte këtë operator për shkak të “riskut të lartë për mospërmbushjen e detyrimeve kontraktore”.

The post I pandehur për shkelje të barazisë në tendera, Jonaid Myzyri paraqitet në SPAK appeared first on Albeu.com.

Presidenti i SHBA Donald Trump, ka firmosur marrëveshjen për krijimin e Bordit të Paqes.

Pas Trump, marrëveshja është nënshkruar nga krerët e shteteve që kanë pranuar ftesën e Trump për të qenë pjesë e institucionit.

E pranishme në ceremoni ka qenë edhe presidentja e SHBA Vjosa Osmani, e cila ka pasur një takim të përzemërt me Trump, përpara nënshkrimit.

The post Donald Trump firmos/ Nënshkruhet në Davos marrëveshja për Bordin e Paqes appeared first on Albeu.com.

Këtë të enjte, kryetari i Partisë Demokratike, Sali Berisha, komentoi investimet amerikane në Jug të vendit nga kompania e dhëndrit të Donald Trump, Jared Kushner.

Jashtë Parlamentit, Berisha u shpreh se Rama bëri influencë politike, por sipas tij dështoi.

Gjithashtu, Berisha tha se edhe ai e ka ofruar ishullin e Sazanit tek Berlusconi, u pranua, por filloi kriza dhe nuk u realizua.

Sipas Berishës, Rama nuk e firmosi marrëveshjen para se Donald Trump të zgjidhej presidenti i SHBA-ve.

“Për sa i përket Zvërnecit është një çështje private. Unë nuk di të jetë dhënë tokë publike aty, por do ta shohim. Për sa i përket Sazanit, e kam deklaruar, deklarata ime është kjo: ne mbështesim investimet amerikane, por natyrisht ky e bëri atë për influencë politike.

I sigurt që dështoi, sepse po të mos dështonte, nuk merrte përsipër të përpiqej të bënte gazi i dheut presidentin e SHBA në një samit që u bë kryelajm i atij samiti. Ndaj dhe këtu duhet t’i ndajmë gjërat. Zvërneci është investim publik. Sazanin ai e dha, por po të më çosh pak më tutje, mund të them disa gjëra të tjera, të palidhura me këtë.

Sazanin edhe qeveria ime e ka ofruar. Unë nuk mund të mos jem ai që jam. E kemi ofruar, sepse në kohën kur ne kemi bërë vlerësimin, ai ka qenë një ishull aspak i lakmuar. E ofroi Fatos Nano para meje. E ofrova unë, ra kriza. Ia ofrova mikut të shquar të kombit shqiptar, Silvio Berluskoni.

E pranoi dhe bëri projektin. Bëri një projekt shumë të mirë, por erdhi kriza financiare. Aty janë dokumentet. Pse e ofruam? Sepse nuk është i lehtë për t’u zhvilluar. Tani fondet janë shumë të mëdha sepse sipas asaj që kam dëgjuar janë dy miliardë euro të fondit sovran arab. Në qoftë se bëhet, unë nuk kam asnjë kundërshtim.

Sazanin e ka ofruar Fatos Nano. E ka ofruar Sali Berisha dhe janë bërë projektet nga i ndjeri Silvio Berluskoni. Sazanin e ofroi ky. Dhe ky gjeti Xhared Kushner, i cili erdhi me një fond shumë të madh. Por çfarë bëri ky? Në qoftë se marrëveshja ishte që ta firmoste para zgjedhjes së presidentit Trump, ky mashtroi. Ky nuk e firmosi para zgjedhjes së presidentit dhe ky u përpoq gjer në fund ta përdorë atë për të paktën edhe një fotografi me Lindën”, tha Berisha.

The post Investimet e Kushner në Shqipëri/ Berisha: S’kam kundërshtim, Rama bëri influencë politike, por dështoi, Sazanin e kam ofruar edhe unë tek Berlusconi appeared first on Albeu.com.

Gjatë festës së organizuar nga “Vëllai i Madh” në shtëpinë e Big Brother VIP Kosova, është regjistruar një tjetër moment tensioni mes banorëve, kësaj radhe mes Alba dhe Dolce, ku në qendër të situatës ishte Limit.

Gjatë vallëzimit, Limi ka tentuar fillimisht ta afrojë Albën, duke e marrë nën krah, por ajo ka refuzuar këtë veprim.

Situata është ndërlikuar edhe më tej në momentin kur Dolce i ka bërë thirrje Albës që t’i bashkohej asaj dhe Limit në vallëzim, por Alba ka refuzuar sërish, duke kërkuar që të mos prekej me dorë.

Ky moment ka krijuar tension të dukshëm mes tre banorëve, duke u reflektuar edhe në reagimet e tyre të mëvonshme gjatë festës.

Situata mes Albës, Limit dhe Dolces vazhdon të mbetet e ndjeshme, veçanërisht për faktin se Dolce aktualisht është në një lidhje me Limin.

Nga ana tjetër, Alba ka shprehur më herët se ndihet e lënduar emocionalisht, duke parë ish-të dashurin e saj në një marrëdhënie me një banore tjetër brenda shtëpisë. Kjo ka ndikuar që çdo ndërveprim mes tyre të shoqërohet me tension dhe keqkuptime.

Raportet mes tre banorëve mbeten një nga temat më të diskutuara të këtij edicioni, ndërsa publiku vijon të ndjekë me interes zhvillimet e radhës në Big Brother VIP Kosova.

The post “Big Brother VIP Kosova”/ Alba konflikohet me Limin dhe Dolcen appeared first on Albeu.com.

Përfaqësuesja e Kryeministrit, Jona Qosja, ka parashtruar argumentet se pse pezullimi i Belinda Ballukut nuk mund të bëhet nga një gjykatë.

Në fjalën e saj ajo tha se ankimi nuk është personal, por ka të bëjë me marrëdhëniet mes tre pushteteve.

Sipas përfaqësueses së Kryeministrit pezullimi i një anëtari të këshillit të ministrave pezullon edhe punën. Ndërsa e detyron kryeministrin të propozojë shkarkimin e saj dhe emërimin e një ministri të ri.

“Ky nuk është një ankim kushtetues individual, nuk kanë të bëjnë më objektin e procedimi penal, por kanë të bëjmë me marrëdhëniet mes tre pushteteve.

A ka të drejtë gjykata penale të pezullojë nga detyra një ministër? Ne vlerësojmë se jo, megjithëse argumentet i përkasin çështjes në themel.

GJKKO duke pezulluar ministrin ka pezulluar vendimmarrjen e ministrit, pasi nuk mund të propozojë asnjë projekt akt.

Pezullimi e detyron kryeministrin që të propozojë shkarkimin e ministrit të ri dhe të propozojë një ministër të ri.

Nuk mund të mohohet se masa e sigurimi penal sjell pasoja në veprimtarin e Këshillit të Ministrave dhe kryeministrit. Nëse këto pasoja janë të devijueshme apo jo, kjo i përket themelit të çështjes”, tha perfaqesusja e kryeministrise, Jona Qosja.

The post Pezullimi i Ballukut në ‘Kushtetuese’/ Përfaqësuesja e Kryeministrisë: Nuk është një ankim individual, pse s’është e lejuar kjo masë appeared first on Albeu.com.

Situata në qarkun Elbasan pas reshjeve të dendura të dëborës dhe ngricave të ditëve të fundit paraqitet normale dhe pa problematika.

Temperaturat në zonat malore gjatë natës zbritën deri në -8 gradë Celcius. Sipas komunikimeve me strukturat e Emergjencave Civile në bashkitë e qarkut, nuk raportohen situata emergjente apo shqetësime për komunitetin.

Të gjitha akset rrugore, si ato nacionale ashtu edhe rurale, janë të hapura dhe nuk paraqesin rrezikshmëri për qarkullimin e mjeteve.

Në aksin nacional Elbasan–Qafë Thanë është kryer trajtimi me kripë dhe qarkullimi vijon normalisht, pa pengesa.

Ndërkohë, lumenjtë dhe përrenjtë kanë prurje në kuota nën mesatare dhe nuk paraqesin rrezik për përmbytje.

Po ashtu, nuk raportohet asnjë problem në furnizimin me energji elektrike apo me ujë të pijshëm për popullatën.

Strukturat përgjegjëse vijojnë të jenë në gatishmëri për të monitoruar situatën dhe për të ndërhyrë në rast nevoje.

The post Temperaturat deri në -8 gradë celcius/ Si paraqitet situata në qarkun Elbasan pas reshjeve të dëborës appeared first on Albeu.com.

Mëngjesin e kësaj të enjte, në seancë plenare për shqyrtimin dhe miratimin e projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Edi Rama, në Kartën e Bordit të Paqes”.

Në urdhrin për thirrjen e seancës nga Niko Peleshi, thuhet se marrëveshja kërkon shumicë absolute votash, ndërkohë që pavarësisht kundërshtimit për mënyrën se si po miratohet marrëveshja, pala demokrate pritet të votojë pro.

Ndërkohë sipas marrëveshjes së miratuar nga Këshilli i Ministrave, bërja palë në këtë Kartë, që themelon Bordin e Paqes, do të shoqërohet me efekte financiare për Republikën e Shqipërisë, që do të derdhen në formën e kontributit vullnetar nga çdo shtet anëtar, kosto këto që nuk janë parashikuar në këtë moment.

The post Kuvendi në seancë plenare, votohet “Bordi i Paqes” appeared first on Albeu.com.

Meteorologia e njohur Tanja Porja, foli në “Dita jonë” se Shqipëria pritet të përballet me një përkeqësim të kushteve të motit pas dy ditësh, si pasojë e një qendre të re ciklonare që po fuqizohet mbi Italinë qendrore dhe që do të përfshijë gradualisht gjithë Ballkanin.

“Një qendër ciklonare është e pozicionuar prej disa ditësh në Italinë jugore, kryesisht Sicili, por përgjithësisht Italinë jugore. Kjo qendër ciklonare po zvogëlohet dhe zhvendoset drejt juglindjes, pra po vjen drejt jugut të Ballkanit. Megjithatë ka një spostim dhe një dhe një devijim të tillë që po i shkon Greqisë. Kjo stuhi e këtyre ditëve nuk na prek, por një tjetër stuhi ciklonare po fuqizohet me Mesdheun perëndimor. Ajo qendër ciklonare do të na prekë dhe neve, përgjithësisht Ballkanin, duke prodhuar reshje me intensitet të paktën mesatar për të gjithë territorin shqiptar”, tha meteorologia, Tanja Porja.

Sipas saj, aktualisht vendi ndodhet në kushte relativisht të qëndrueshme, me reshje të pakta dhe lokale, ndërsa temperaturat kanë shënuar rritje, duke arritur deri në 15 gradë Celsius në zonat jugperëndimore.

Por kjo situatë do të ndryshojë në fundjavë, kryesisht të dielën dhe të hënën, kur sistemi ciklonar do të sjellë reshje shiu me intensitet mesatar në të gjithë territorin.

“Deri të dielën reshjet janë krejt të pakta dhe të karakterit lokal, janë vetëm në disa zona ndërsa kjo qendër ciklonare sjell një sistem të fuqishëm me vranësira për të gjithë Ballkanin. Në disa zona të Ballkanit do të sjellë reshje shiu, në disa zona më në brendësi reshje dëbore. Në territorin shqiptar do të sjellë kryesisht shi, por edhe pak dëborë, duke qenë se temperaturat nuk është se do të luhaten shumë në vlerat minimale. Do të qëndrojnë rreth zeros dhe lehtësisht negative, gjë e cila reshjet i bën që të jenë dëbore vetëm në zonat e thella malore. Pjesa më e madhe do ketë reshje shiu”, shtoi ajo.

The post Paralajmërimi i meteorologes Tanja Porja: Shqipëria goditet nga stuhia ciklonare… appeared first on Albeu.com.

Mbrëmjen e djeshme, kryeministri Edi Rama dhe Ivanka Trump, pasi konsumuan kafe në zonën e Ujit të Ftohtë, kanë shkuar në një restorant në Orikum, ku kanë konsumuar edhe darkën.

Zbardhen detaje të reja në lidhje me vizitën e vajzës së presidentit të SHBA në Vlorë.

Mes tyre kanë qenë dhe 60 arkitektë që kanë qëndruar dhe diskutuar, deri në orën 23:00 të mbrëmjes.

The post Darka e Ivanka Trump me Ramën, zbardhen detaje nga takimi appeared first on Albeu.com.

Gjykata e Posaçme e Shkallës së Parë për Korrupsionin dhe Krimin e Organizuar (GJKKO), ka njoftuar se nuk do të marrë pjesë në seancën plenare publike që zhvillohet sot në Gjykatën Kushtetuese, lidhur me kërkesën e paraqitur nga Kryeministri Rama për çështjen e pezullimit të Belinda Ballukut.

Objekti i gjykimit kushtetues, lidhet me zgjidhjen e një mosmarrëveshjeje kompetencash ndërmjet Kryeministrit dhe Këshillit të Ministrave, nga njëra anë, dhe Gjykatës së Posaçme të Shkallës së Parë për Korrupsionin dhe Krimin e Organizuar, nga ana tjetër, në lidhje me pezullimin e ushtrimit të detyrës së një anëtari të Këshillit të Ministrave, në këtë rast Belinda Ballukut.

Në qëndrimin e saj zyrtar, GJKKO vlerëson se nuk mund të legjitimohet si palë në një gjykim kushtetues ku kërkues është Kryeministri.

Sipas gjykatës, në një shtet demokratik të së drejtës, të bazuar në parimin e sundimit të ligjit dhe ndarjes së pushteteve, një gjykatë nuk mund të thirret dhe as të marrë pjesë si palë për të bërë parashtrime apo për të mbrojtur vendime të dhëna prej saj.

“Në vendimmarrje, gjyqtarët duhet të jenë të pavarur dhe të aftë të veprojnë pa ndikim të papërshtatshëm, presione, kërcënime ose ndërhyrje, të drejtpërdrejta ose jo, nga kushdo dhe për çfarëdo arsye. Gjyqtarët duhet të kenë liri të plotë për t’i vendosur rastet me paanësi, në përputhje me ndërgjegjen dhe interpretimin e tyre për faktet dhe në zbatim të normave të së drejtës. Gjykata Kushtetuese është shprehur, se pushteti gjyqësor ushtrohet i shkallëzuar sipas parimit të kontrollit të vendimeve gjyqësore të gjykatave më të ulta nga gjykatat më të larta. Vendimet gjyqësore kontrollohen vetëm nga gjykata më e lartë dhe asnjë organ tjetër nuk mund të vlerësojё ligjshmërinë dhe bazueshmërinë e vendimeve gjyqësore, për sa kohë ato nuk janë ndryshuar ose prishur nga një gjykatë më e lartë”, thekson në arsyetim GJKKO.

GJKKO thekson se pjesëmarrja e saj si palë e interesuar në një proces kushtetues, do të cenonte parimin kushtetues të ndarjes së pushteteve, si dhe pavarësinë e brendshme të pushtetit gjyqësor.

The post Pezullimi i Ballukut/ GJKKO nuk merr pjesë në seancën plenare të Gjykatës Kushtetuese appeared first on Albeu.com.

Luksemburgu ka hyrë në histori, duke u bërë vendi i parë në botë që ofron transport publik falas në shkallë kombëtare.

Që nga rrugët urbane më të frekuentuara deri te zonat piktoreske rurale, banorët, udhëtarët ditorë dhe turistët mund të udhëtojnë pa pagesë me autobusë, tramvaje dhe trena të klasit të dytë në të gjithë territorin e vendit.

Kjo nismë konsiderohet një hap revolucionar, që jo vetëm po transformon lëvizjen e përditshme, por po ndryshon rrënjësisht edhe përvojën turistike në Luksemburg.

Reforma historike hyri në fuqi më 1 mars 2020, kur qeveria hoqi tarifat për të gjitha shërbimet e transportit publik brenda vendit.

Politika përfshin autobusët, tramvajet dhe trenat e klasit standard, ndërsa përjashton vetëm shërbimet e klasit të parë dhe linjat ndërkombëtare.

Për lëvizjet brenda kufijve kombëtarë, udhëtimi është plotësisht falas, pa bileta dhe pa barriera.

Vendimi për transport falas nuk ishte thjesht një masë sociale, por pjesë e një vizioni më të gjerë për një të ardhme më të gjelbër dhe më të aksesueshme.

Luksemburgu synon të ulë ndjeshëm trafikun e dendur, një problem i kahershëm në vend, si dhe të reduktojë emetimet e karbonit në përputhje me objektivat ambicioze klimatike.

Duke hequr pengesat financiare, qeveria po inkurajon qytetarët dhe vizitorët të zgjedhin transportin publik në vend të automjeteve private.

Për turizmin, kjo politikë ka pasur ndikim të menjëhershëm. Vizitorët mund të eksplorojnë lirshëm atraksionet kulturore dhe natyrore të vendit, pa u shqetësuar për koston e lëvizjes.

Nga qendra historike e Luksemburgut, e përfshirë në listën e Trashëgimisë Botërore të UNESCO-s, te fshatrat piktoreske dhe parqet natyrore në veri, transporti falas ka nxitur eksplorimin spontan dhe ka përmirësuar ndjeshëm përvojën turistike.

Një tjetër shtyllë kryesore e kësaj nisme është ndikimi mjedisor. Duke e bërë transportin publik zgjedhjen më të lehtë dhe më tërheqëse, Luksemburgu synon të ulë ndotjen e ajrit dhe emetimet nga automjetet private.

Kjo masë është pjesë e një strategjie më të gjerë për të arritur neutralitetin klimatik deri në vitin 2050, e cila përfshin edhe investime në autobusë elektrikë, infrastrukturë për biçikleta dhe zgjidhje të tjera të qëndrueshme të mobilitetit.

Autoritetet kanë theksuar se skema e transportit falas do të vazhdojë të përmirësohet. Planet për të ardhmen përfshijnë rritjen e frekuencës së shërbimeve, modernizimin e infrastrukturës dhe integrimin e mëtejshëm të mjeteve ekologjike të transportit, për të krijuar një sistem sa më efikas dhe funksional.

Modeli i Luksemburgut ka tërhequr vëmendjen ndërkombëtare dhe po shihet si burim frymëzimi për vende të tjera.

Ndërsa disa qytete evropiane kanë aplikuar transport falas në nivel lokal, Luksemburgu mbetet i pari që e ka zbatuar këtë politikë në shkallë kombëtare. Ky hap e pozicionon vendin si lider global në politikat e transportit të qëndrueshëm dhe turizmit të gjelbër.

The post Historike/ Luksemburgu, shteti i parë në botë që ofron transport publik falas në të gjithë vendin appeared first on Albeu.com.

Pasditen e djeshme, moti i keq që goditi periferitë jugore të Atikës të Greqisë rezultoi vdekjeprurës, pasi një grua 56-vjeçare humbi jetën në Ano Glyfada, pasi u rrëmbye nga ujërat e rrëmbyeshme të shiut.

Ngjarja e rëndë ndodhi pak pas orës 20:00 të mërkurën, kur viktima, duke u kthyer nga puna, tentoi të kalonte rrugën në kryqëzimin e rrugëve Kyrillou dhe Methodiou me Konstantinou Paleologou.

Në atë moment, një përrua i fuqishëm zbriste nga mali drejt rrugës Kyrillou dhe Methodiou, duke e rrëmbyer gruan dhe duke e bllokuar nën një automjet që ishte zhvendosur më parë nga sasia e madhe e ujit.

Banorët e zonës, të cilët panë skenën, njoftuan menjëherë autoritetet. Zjarrfikësit arritën në vendngjarje dhe e nxorën 56-vjeçaren nga poshtë makinës, por fatkeqësisht ajo ishte pa ndjenja dhe nuk arriti të mbijetojë.

Një dëshmitar okular përshkroi momentet dramatike: “Ajo po kalonte rrugën për t’u kthyer në shtëpi. Përroi e mori menjëherë. U bllokua nën makinë dhe nuk mundëm ta shpëtonim. Uji ishte shumë i fortë, me gurë. Vetëm këmbët e saj dukeshin. Ishte 56-vjeçe dhe kishte familje, një vajzë”.

Autoritetet po hetojnë rrethanat e ngjarjes, ndërsa moti i keq ka shkaktuar probleme të shumta në zonë, me përmbytje dhe dëme materiale.

Sakaq, një aksident tragjik ndodhi në Astros të Kynourias, ku një roje bregdetare 53-vjeçare humbi jetën gjatë ushtrimit të detyrës. Viktima mbante gradën nëntoger dhe shërbente si oficer në Departamentin Portual të zonës.

Sipas njoftimit zyrtar të Rojës Bregdetare Helenike, 53-vjeçari ndodhej në patrullim këmbësor në port, së bashku me komandantin e Departamentit Portual.

Gjatë ankorimit të anijeve, një valë e fortë e rrëmbeu, duke i shkaktuar një dëmtim të rëndë në kokë.

Roja bregdetare, u nxor menjëherë nga uji pa ndjenja dhe u transportua në Qendrën Shëndetësore të zonës, ku mjekët konstatuan vdekjen e tij.

Autoritetet po hetojnë rrethanat e sakta të ngjarjes, ndërsa shërbimi i Rojës Bregdetare shprehu ngushëllimet për humbjen e oficerit, i cili humbi jetën në krye të detyrës.

The post Moti i keq godet Greqinë/ Humb jetën një grua dhe roja bregdetare appeared first on Albeu.com.

Ernest Muçi, do të bëhet shumë shpejt një lojtar i Trabzonsporit edhe zyrtarisht, pasi klubi ka ndër mend të paguajë klauzolën e tij të transferimit te Beshiktashi.

Por kjo nuk do të thotë se ai do të mbetet pjesë e klubit turk, siç ka lënë të kuptohet vetë presidenti i Trabzonspor, Ertugrul Dogan, në një intervistë të dhënë sot.

AI u pyet rreth të ardhmes së sulmuesit dhe ishte i qartë në shpjegimin e tij.

“Ai u pëlqye nga ekipi ynë i skautimit. Ne bëmë një ofertë para se Beshiktashi të firmoste me të, por ishte vetëm për gjysmën e çmimit që dhanë ata. Në momentin aktual, vazhdojmë diskutimet se si do të jetë pagesa, por në momentin që Trabzonspor do të aktivizojë klauzolën, ajo do të paguhet me 5 këste.

Lojtari mund të bëhet pjesë e ekipit duke paguar këstin e parë prej 1,5 apo 2 milionë eurosh para fundit të majit, siç parashikohet në kontratë. Shuma nuk duhet paguar e plotë. Nëse trajneri na kërkon që të aktivizohet ky opsion në fund të sezonit, siç duket se do të ndodhë për mënyrën si po shkojnë gjërat, procesi më pas do të bëhet në bazë të vlerësimeve teknike”, tha fillimisht ai duke shpjeguar se Trabzonspori nuk kishte nevojë të paguante menjëherë shifrën prej 8,5 milionë eurosh që është vendosur në klauzolën e Muçit.

Ai më pas u ndal në borxhet e klubit dhe aty theksoi se po mbahej një skuadër cilësore, edhe pse kishte lojtarë që kërkoheshin me shifra të larta nga të tjerët.

“Ne kemi një ofertë edhe për një lojtar që ne e kemi në huazim. Po shitëm ndonjë, mund të shlyejmë të gjitha borxhet tona”, theksoi ai.

Sipas mediave turke, lojtari në huazim të cilit i referohet Dogan është pikërisht Muçi, që do të thotë se për sulmuesin shqiptar ka ofertë interesante që po shqyrtohet nga Trabzonspori.

Ndaj duke pasur parasysh situatën financiare të klubit, nuk është çudi që Trabzonspori të ushtrojë të drejtën e blerjes së Muçit, por për ta shitur menjëherë në një klub tjetër, nëse oferta është e pëlqyeshme edhe për vetë futbollistin e Kombëtares shqiptare.

Në momentin që Trabzonspor aktivizon klauzolën e blerjes, aktivizohet edhe kontrata individuale e Muçit, i cili do të ishte i lidhur me këtë klub deri ne verën e vitit 2029.

The post Trabzonspori ka marrë ofertë për të shitur Muçin/ Presidenti i klubit zbulon detajet e kontratës appeared first on Albeu.com.

Ditën e sotme, në Gjykatën Kushtetuese zhvillohet seancë në lidhje me masën e sigurisë të vendosur ndaj zëvendës kryeministres Belinda Balluku, “pezullimi i ushtrimit të detyrës publike”, vendim i marrë nga Gjykata e Posaçme Anitkorrupsion.

Seanca nis në orën 10:00 dhe mbahet pas ankimimit të kryeministrit Edi Rama, i cili pretendon se me vendimin e pezullimit të Ballukut, gjykata ka shkelur kompetencat e tij si kryeministër.

“Nëse pezullimi i një ministri nga një prokuror dhe gjykatës sot do të legjitimohej si një e drejtë e ligjshme e drejtësisë, atëherë shtrirja e krahut të gjyqësorit përtej kufirit ndarës me ekzekutivin dhe me vetë jetën politike do krijonte precedent unikal, të rrezikshëm dhe kërcënues, sepse duke i hapur rrugë presioneve politike ndaj qeverisë, destabilizimit institucional dhe manipulimit të ekzekutivit nëpërmjet procesve penale, do ndodhte diçka që është e panjohur në Europë”, ëhstë shprehur më parë kreu i qeverisë.

Rama e ka justifikuar ankimin në Kushtetuese, si një betejë për pavarësinë e pushtetit ekzekutiv dhe mbrojtjen e kompetencave kryeministrore.

Gjykata e Posaçme, vendosi që ta pezullonte Ballukun nga detyra dhe të ndalonte udhëtimin jashtë vendit, duke i bllokuar pasaportën, pasi ajo u mor e pandehur për akuzën e shkeljes së barazisë në tendera.

Ndërkohë vendimmarrja e Gjykatës Kushtetuese, do të vijë në një kohë kur SPAK ka dorëzuar në Kuvend edhe kërkesën për autorizim për arrestimin e Ballukut.

Kjo lëvizje e SPAK erdhi menjëherë pasi Kushtetuesja e ktheu Ballukun në detyrë, ndërsa mbledhja e radhës e Këshillit të Mandateve është më datë 28 janar.

Balluku akuzohet se ka manipuluar dy tendera me vlerë 210 milionë euro, së bashku me vartësit e saj më të ngushtë, Evis Berberi, Gentian Gjyli dhe Erald Elezi, duke favorizuar kompanitë fituese, ndërsa akuzave u është shtuar edhe shkelje e barazisë me tendera në Unazën e Madhe.

The post GJKKO e pezulloi nga detyra, Gjykata Kushtetuese merr sot vendimin për Ballukun, SPAK kërkon ta arrestojë për abuzimet me tenderat appeared first on Albeu.com.

Prokuroria e Posaçme, deklaroi se kishte regjistruar një procedim pas kallëzimit të depozituar nga PD, ndërkohë që Këshilli i Lartë Gjyqësor administroi informacionin e Prokurorisë së Përgjithshme dhe nis procedurën për gjyqtaren e Gjykatës së Posaçme.

Prokuroria e Posaçme, SPAK regjistroi një procedim penal pas një kallëzimi ndaj gjyqtares Irena Gjoka, e cila akuzohet se ka fshehur nga formulari i vetëdeklarimit të pastërtisë së figurës një dënim penal të dhënë nga drejtësia greke për falsifikimin e një pasaporte dhe një vize në mesin e viteve 2000.

Kallëzimi ishte depozituar në SPAK nga Adriana Kalaja.

Sipas SPAK, procedimi është regjistruar për veprën penale të parashikuar nga neni 190 i Kodit Penal, “falsifikimi i vulave, i stampave ose i formularëve”, por ende nuk është regjistruar ndonjë emër si person nën hetim.

Pas një hetimi administrativ që zgjati rreth 20 muaj, Prokuroria e Përgjithshme, njoftoi të martën se i kishte dërguar zyrtarisht më datë 19 janar 2026 rezultatet e këtij verifikimi pranë KLGj-së, që është organi kompetent që duhet të interpretojë rezultatet e gjetjeve.

Këshilli i Lartë Gjyqësor, KLGJ administroi të mërkurën vendimin e Prokurorisë së Përgjithshme për rezultatet e verifikimit të thelluar të deklarimeve të kryera në formularin e vetëdeklarimit për pastërinë e figurës nga ana e gjyqtares së Gjykatës së Posaçme, Irena Gjoka.

Burime zyrtare të KLGJ-së i bënë me dije BIRN se aktet e mbërritura nga Prokuroria e Përgjithshme, do t’i vendosen në dispozicion Komisionit të Zhvillimit të Karrierës në KLGJ, që do të hartojë raportin.

Ky raport do t’i kalohet më pas seancës plenare publike. KLGJ nuk bëri me dije ndonjë afat të përafërt se kur do të përfundojë kjo procedurë.

Edhe pse Prokuroria e Përgjithshme e mbajti të fshehtë rezultatin e verifikimit, një burim pranë saj i tha BIRN në kushtet e anonimatit se vendimi i gjykatës greke ndaj Gjokës ishte autentik.

Tashmë, KLGj do të duhet të shqyrtojë nëse gjetjet e prokurorisë përbëjnë kusht ndalimi për ushtrimin e funksionit publik, bazuar në ligjin nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.

Akuzat ndaj Gjokës u bënë publike pasi ajo firmosi masat e sigurisë ndaj ish-kryeministrit Sali Berisha në lidhje me dosjen “Partizani”.

Berisha dhe mbështetësit e tij e kanë akuzuar vazhdimisht Gjokën, duke pretenduar se ajo është në konflikt interesi dhe se ka fshehur të kaluarën e saj, përfshi dënimin penal në Greqi.

KLGJ e cila shqyrton ankesat, kërkoi verifikim të rastit nga Prokuroria e Përgjithshme.

Akuzat publike sugjeronin se ajo ishte dëbuar nga Greqia për përdorim të dokumenteve të falsifikuara ose shkelje të rregullave të qëndrimit, një fakt që pretendohet se nuk është pasqyruar në formularin e dekriminalizimit nga gjyqtarja.

Gjyqtarja Gjoka e ka kaluar më herët procesin e vetingut, pasi KPK nuk gjeti probleme që do të çonin në shkarkimin e saj.

Komisioneri Publik fillimisht e ankoi vendimin në Kolegjin e Posaçëm të Apelimit, por gjatë procesit ish-komisionerja Publike Irena Nino, u tërhoq nga ankimi duke bërë që vendimi i konfirmimit në detyrë të mbetej në fuqi./BIRN

The post SPAK regjistron procedim penal për gjyqtaren Irena Gjoka/ BIRN: Aktet e Prokurorisë së Përgjithshme, do t’i vendosen në dispozicion KLGJ-së appeared first on Albeu.com.

Në kuadrin e ri makroekonomik, 2027-2029, qeveria mbajti të pandryshuar skenarin për rritjen ekonomike, me pritshmëri zgjerimi 4% këtë vit, 3.9 për qind në 2027 dhe 4.1% në 2028, sipas dokumentit që u botua në Fletoren Zyrtare.

Qeveria shqiptare projekton një rritje të qëndrueshme të ekonomisë në vitet 2027–2029, të mbështetur nga konsumi, investimet dhe turizmi, në një kohë kur tre shtyllat kryesore të ekonomisë prodhuese, eksportet, bujqësia dhe industria janë në rënie.

Sipas projeksioneve afatmesme, rritja pritet të gjenerohet kryesisht nga kërkesa e brendshme, veçanërisht nga konsumi privat dhe investimet, ndërsa kërkesa e huaj neto (eksport-import) parashikohet të ketë vetëm një ndikim të moderuar pozitiv.

Konsumi pritet të rritet mesatarisht me rreth 2.9% në vit, ndërsa investimet me 4.9%, të nxitura nga përmirësimi i besimit dhe nga kushtet më të lehta të kreditimit.

Eksportet parashikohen të vijojnë “trendin pozitiv”, me një rritje mesatare prej 4.6% në vit në periudhën 2027–2029, të mbështetur kryesisht nga turizmi.

Por këto parashikime, bien në kontrast të fortë me zhvillimet reale të viteve të fundit, ku eksportet e mallrave kanë rënë, prodhimi bujqësor është tkurrur dhe industria ka humbur peshë në ekonomi, duke reflektuar dobësimin e bazës prodhuese dhe konkurruese të vendit.

Edhe nga ana e ofertës, vetë projeksionet e qeverisë tregojnë një ekonomi që po mbështetet gjithnjë e më shumë te shërbimet, dhe gjithnjë e më pak te prodhimi.

Bujqësia parashikohet të rritet me vetëm 0.2% në vit, praktikisht pa ndikim në PBB. Industria me 2.6%, me një kontribut minimal në rritje.

Ndërkohë, shërbimet dhe ndërtimi do të mbajnë peshën kryesore të zgjerimit ekonomik.

Edhe punësimi pritet të rritet vetëm simbolikisht, me rreth 0.1% në vit, ndërsa zgjerimi i forcës së punës do të vijë kryesisht nga rritja e pjesëmarrjes dhe jo nga hapja e vendeve të reja të punës në sektorët prodhues.

Në këtë kuadër, projeksionet optimiste të rritjes nuk mbështeten në zhvillime reale në ekonomi, por në supozime për konsum më të lartë, turizëm më të fortë dhe klimë më të mirë financiare, ndërkohë që baza prodhuese e vendit po dobësohet./ Monitor

The post Qeveria mban të pandryshuar skenarin për rritjen ekonomike, parashikime jo realiste appeared first on Albeu.com.

Këtë të enjte, mbahet seanca e radhës në Kuvend, seancë që nis në orën 10:00.

Për ditën e sotme, në rend dite është projektligji “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri, Edi Rama, në Kartën e Bordit të Paqes”.

Në lidhje me projektligjin do të zhvillohen diskutime dhe pyetje e më pas dhe votimi.

The post Sot seancë në Kuvend, votohet projektligji për “Bordin e Paqes” appeared first on Albeu.com.