Ukraina dhe Shtetet e Bashkuara të Amerikës arritën një marrëveshje për një plan ushtarak për modernizimin e Forcave të Armatosura të Ukrainës.

Dokumenti, i koordinuar në nivelin e Shtabeve të Përgjithshme, përcakton mekanizmat e mbështetjes, furnizimit dhe përputhshmërisë, në një moment kur Ukraina kërkon garanci të forta sigurie pasluftës, shkruan Kyiv Post.

Kreu i Shtabit të Përgjithshëm të Forcave të Armatosura të Ukrainës, Andrii Hnatov, konfirmoi marrëveshjen gjatë një konferencë për shtyp.

“Bashkëpunimi bilateral me Shtetet e Bashkuara u zhvillua në nivelin e Shtabeve të Përgjithshme. Është dakordësuar një dokument ushtarak që përbëhet nga katër pjesë”, deklaroi Hnatov.

“Të gjitha këto pjesë lidhen me mënyrën se si do të ofrohet mbështetje për Ukrainën dhe Forcat e Armatosura të saj, si do të kryhet furnizimi dhe modernizimi i tyre, si dhe si do të monitorohet përputhshmëria me marrëveshjet dhe reagimi në rast të moszbatimit të tyre”, shtoi ai.

Ukraina prej kohësh ka kërkuar nga aleatët e saj një mekanizëm efektiv për modernizimin pasluftës të ushtrisë së saj, si dhe garanci të forta sigurie në rast të një agresioni të ri rus.

Ndryshe, gjatë fjalimit të Vitit të Ri, presidenti ukrainas, Volodymyr Zelensky deklaroi se “marrëveshja e paqes është 90 për qind gati”, ndërsa 10 për qind e mbetur lidhet me çështjet territoriale.

Rrëzimi i Presidentit të Venezulës, Nikolas Maduro, ka ngjallur një shpresë të re tek demokratë, e veçanërisht te Sali Berisha, në betejën e tyre kundër Edi Ramës.

Avokati Idajet Beiqir, i ftuar në “Ora e Fundit” në ABC News, vuri në dukje një paralelizëm mes Maduros dhe Sali Berishës, duke theksuar se veprimet e Berishës në vitin 1997 dhe më pas, përfshirë krimet dhe korrupsionin masiv, kishin rrezikuar stabilitetin e Shqipërisë dhe kishin bërë të domosdoshme ndërhyrjen e Shteteve të Bashkuara për të ruajtur rendin dhe demokracinë.

Beiqir tha se ndërhyrja ndërkombëtare, si në Venezuelë ashtu edhe në Shqipëri, është një sinjal i qartë se krimi dhe korrupsioni nuk mund të pranohen dhe se aktorët politikë përgjegjës për dhunë dhe keqadministrim nuk mund të lirohen nga përgjegjësia.

“Është vërtet lajm shumë i mirë rrëzimi i Maduros, që është pritur me entuziazëm në të gjithë botës, tjetër kush merret me politikë. Ndodhemi përpara një rendi të ri botëror. SHBA kanë marrë rolin parësor në këtë drejtim. Kur shikojnë që ai vend është problematik dhe nuk lulëzojnë dot zgjedhjet e lira dhe demokracia. SHBA me këtë ndërhyrje tregojnë që nuk mund të pajtohen dot, me krimin dhe korrupsionin.

Ky lajm i mirë, në rast se do të ishte zbatuar në Shqipëri në vitin 1997 kur Berisha u vodhi shqiptarëve me skemat piramidalëve mijëra lekë, kur i bëri atentat Ambasadës Amerikane, ku i mori të gjitha masat për ta hedhur në herë dhe që deshi t’i bënte antenat ambasadores amerikane, nuk do të kishte të gjitha ngjarjet që pasuan më pas, për shkak të Berishës. Në vitin 1997 po të mos ndërhynte SHBA, nuk do të kishim Shqipëri sot. Ndërhyrja më e fortë e SHBA në Shqipëri, ishte koha kur Sali Berisha bëri grusht shteti.

Ka pasur dhe raste të tjera, kur PS ka fituar zgjedhjet kanë dalë në protesta të dhunshme dhe ka marrë në duar armët për të shkaktuar tensione. Ne amerikanët i kemi pasur gjithmonë këtu, për sigurinë e vendit. Berisha barazon Maduron me Ramën, sepse është vetë si Maduro. Krimet e Berishës nuk mund të barazohen me të gjitha krimet e të gjithë të burgosurve të marra së bashku. Ka vrarë afro 10 mijë vetë. Është gjakatari më i madh dhe ka bërë korrupsionin më të madh në këtë vend”, tha Idajet Beqiri./abcnews.al

Avioni që transportonte presidentin e Venezuelës, Nicolás Maduro, dhe bashkëshorten e tij, Cilia Flores, ka mbërritur në Bazën Ajrore të Gardës Kombëtare Stewart në shtetin e Nju Jorkut, raporton partneri ynë në SHBA, CBS.

Avioni ka prekur pistën dhe disa agjentë të forcave të rendit janë ngjitur në bord.

BREAKING — The plane carrying Maduro lands in New York pic.twitter.com/nEhrY9j2qD

— Ragıp Soylu (@ragipsoylu) January 3, 2026

Kujtojmë se forcat speciale amerikane organizuan në orët e para të mëngjesit të kësaj të shtune, më 3 janar, një aksion të befasishëm duke kapur presidentin e Venezuelës, Nicolas Maduro, së bashku me bashkëshorten e tij, dhe i kanë dërguar ata në Shtetet e Bashkuara të Amerikës.

Një tjetër aksident rrugor është regjistruar mbrëmjen e sotme në bypass-in e Fierit, në afërsi të fshatit Mbrostar. Sipas informacioneve paraprake, një furgon ka goditur nga pas nga një automjet tjetër, ndërsa të dy mjetet po lëviznin në të njëjtin drejtim.
Si pasojë e përplasjes janë shkaktuar dëme materiale, ndërkohë që nuk raportohet për persona të lënduar rëndë. Menjëherë pas ngjarjes, në vendin e aksidentit kanë mbërritur shërbimet e Policisë.
Policia ka shoqëruar njërin prej drejtuesve të mjeteve për verifikime të mëtejshme, ndërsa po punohet për zbardhjen e shkaqeve dhe rrethanave të aksidentit.

Presidenti amerikan, Donald Trump, deklaroi gjatë një konference për shtyp se Shtetet e Bashkuara do të marrin drejtimin e Venezuelës përkohësisht, duke theksuar se kjo do të zgjasë deri në një “tranzicion të sigurt, të duhur dhe të drejtë”.

Trump shtoi se një “grup njerëzish” do të marrë përsipër menaxhimin e vendit dhe, kur u pyet për përbërjen e tij, ai përmendi se sekretari i tij i shtetit, Marco Rubio, kishte komunikuar me Delcy Rodríguez, ish-zëvendëspresidenten e Nicolas Maduros.

Rodríguez ishte zyrtarja e parë që reagoi publikisht pas sulmeve amerikane, duke kërkuar nga SHBA të japë prova të jetës së Maduros dhe bashkëshortes së tij.

Mesazhi i saj u transmetua vetëm në format audio, duke nxitur spekulime se ajo mund të ketë lënë Venezuelën. Agjencia Reuters citon katër burime që thonë se Rodríguez ndodhet në Rusi, por Ministria e Jashtme ruse ka mohuar këtë informacion, duke e quajtur “të rremë”.

Trump konfirmoi se Rodríguez kishte shprehur gatishmërinë për të bërë “çfarëdo që SHBA kërkon”. “Ajo është, mendoj, presidentja. Pati një bisedë të gjatë me Marcon dhe tha se do të bëjmë çfarë të duhet. Nuk kishte zgjidhje tjetër”, tha ai.

Ky zhvillim ka habitur shumë njerëz në Venezuelë, pasi Rodríguez dhe vëllai i saj, Jorge, kryetar i Asamblesë Kombëtare, kanë qenë tradicionalisht mbështetës të fuqishëm të qeverisë Maduro.

Edhe pse është e mundur që Rodríguez të ketë rënë dakord të bashkëpunojë me administratën Trump për të shpëtuar pozicionin e saj – ndërkohë që Trump paralajmëroi mundësinë e një valë të dytë sulmesh – ajo nuk pritet të jetë një forcë për ndryshime të thella në vend.

Kush është Delcy Rodriguez?

Avokatja 56-vjeçare me formim ligjor ka lindur më 18 maj 1969 si vajza e një luftëtari gueril të majtë. Ajo, e lindur në Karakas, punon ngushtë me vëllain e saj, Jorge Rodriguez, kreun e legjislaturës së Asamblesë Kombëtare.

Përveç rolit të saj si zv/presidente, Rodriguez ka shërbyer gjithashtu si ministre e Financave dhe e Naftës, gjë që e bëri atë figurë kyçe për ekonominë e Venezuelës dhe sektorin privat të dëmtuar.

Ajo u bë zv/presidente në 2018 pas shërbimit në poste të ndryshme qeveritare, përfshirë ministre e Komunikimit dhe Informacionit, ministre e Jashtme dhe kreu i një asambleje kushtetuese pro-qeveritare që rriti fuqitë e Madurós në 2017. Rodriguez aplikoi politika ekonomike ortodokse për të luftuar hiperinflacionin në Venezuelë. Maduro e quajti Rodriguez “tigër” për mbrojtjen e vendosur të qeverisë së tij socialiste. Ai gjithashtu tha se ajo është “një grua e re, e guximshme, e përvojshme, vajza e një martiri, revolucionare dhe e provuar në një mijë beteja”.

Emisioni “Gurët e Shtëpisë Time” në ABC News kësaj here ndodhet në Bogë të Malësisë së Madhe të Shqipërisë. Boga, një fshat tipik malor, ku në këto ditë dimri do shihni malet e mbuluara nga dëbora është kthyer në një zonë mjaft për preferuar nga vizitorët vendas, por edhe turistët e huaj.

Banorët vendas kanë lënë pas emigrimin, për t’u kthyer në vendin e tyre dhe për të investuar në të, duke ndërtuar bujtina dhe hotele, duke i dhënë kështu zë fshatit e kulturës së tyre. Gratë e fshatit shprehen për mikrofonin e ABC News se janë shumë të kënaqura më zhvillimin turistik që ka marrë zona, teksa tregojnë dhe specialitet që gatuajnë në kuzhinë.

“Është gjë e madhe, për ne dhe gjithë fshatin, sepse kur nuk kishim hotelin, rrinim në shtëpi, nuk punonim. Ishim shtëpiake, punonim kopshtin dhe mbanim bagëti”, tregon një prej grave.

Boga e Malësisë së Madhe po shndërrohet në një shembull të zhvillimit të qëndrueshëm turistik në zonat malore të Shqipërisë.

Rikthimi i banorëve pas emigrimit dhe investimet në bujtina e hotele kanë sjellë jo vetëm rritje të turizmit, por edhe ringjallje të jetës ekonomike e kulturore të fshatit. Ky zhvillim u ka dhënë mundësi të reja punësimi sidomos grave të zonës, të cilat tashmë janë pjesë aktive e mikpritjes tradicionale dhe promovimit të kulinarisë vendase, duke e kthyer Bogën në një destinacion gjithnjë e më të kërkuar për vizitorët vendas dhe të huaj.

Këshilli i Sigurimit i Kombeve të Bashkuara ka njoftuar se do të mbajë një mbledhje emergjente të hënën, lidhur me operacionin e Shteteve të Bashkuara në Venezuelë.

Pjesëmarrësit në mbledhje ende nuk janë konfirmuar, por pritet që në të të marrë pjesë edhe Sekretari i Përgjithshëm i OKB-së, António Guterres.

Kërkesa për mbajtjen e kësaj mbledhjeje është bërë nga Kolumbia, me mbështetjen e Rusisë dhe Kinës, të cilat janë anëtare të përhershme të Këshillit të Sigurimit.

Read More...

Abc News Live

Liderë të vendeve kryesore evropiane kanë reaguar ndaj operacionit të Shteteve të Bashkuara në Venezuelë, duke shprehur qëndrime të ndryshme mbi legjitimitetin e veprimit, respektimin e së drejtës ndërkombëtare dhe nevojën për përmbajtje.

Kryeministri i Mbretërisë së Bashkuar, Keir Starmer, deklaroi se Londra nuk ka qenë e përfshirë në operacion. Ai tha se do të zhvillojë një bisedë me presidentin amerikan Donald Trump “për të sqaruar fillimisht faktet”, përpara se të mbajë një qëndrim të plotë publik.

Nga Franca, presidenti Emmanuel Macron bëri thirrje për një tranzicion “paqësor dhe demokratik” në Venezuelë, duke kërkuar që kandidati i opozitës në zgjedhjet e vitit 2024, Edmundo González – të cilin ai e cilësoi si “president”, të udhëheqë këtë proces.

Kancelari gjerman, Friedrich Merz, u shpreh se Nicolás Maduro “e ka çuar vendin drejt shkatërrimit”, por theksoi se qeveria gjermane po analizon me kujdes nëse veprimet e SHBA-së përbëjnë shkelje të së drejtës ndërkombëtare.

Ndërkohë, kryeministrja italiane Giorgia Meloni deklaroi se ndërhyrjet ushtarake nga jashtë “nuk janë mënyra e duhur për t’i dhënë fund regjimeve totalitare”, por shtoi se mbrojtja kundër “sulmeve ndaj sigurisë kombëtare” është e ligjshme.

Kryeministri spanjoll Pedro Sánchez theksoi se Spanja nuk e njeh regjimin e Maduros, por njëkohësisht nuk do të njohë asnjë ndërhyrje që shkel të drejtën ndërkombëtare, duke bërë thirrje për respektimin e Kartës së Kombeve të Bashkuara.

Edhe Bashkimi Evropian reagoi përmes Përfaqësueses së Lartë për Politikën e Jashtme, Kaja Kallas, e cila deklaroi se BE-ja “ka theksuar vazhdimisht” mungesën e legjitimitetit të Maduros, por njëkohësisht u bëri thirrje palëve për përmbajtje dhe respekt të së drejtës ndërkombëtare.

Reagimet tregojnë një qasje të kujdesshme të Evropës ndaj zhvillimeve në Venezuelë, mes kritikave ndaj regjimit aktual dhe shqetësimeve për pasojat e veprimeve ushtarake.

Viti 2025 po shënon hapa të jashtëzakonshëm në shkencë dhe teknologji, duke ngritur njëkohësisht shpresë, kuriozitet dhe debate.

Nga përpjekjet për të rikthyer specie të zhdukura, te inteligjenca artificiale që “lexon” emocionet e kafshëve dhe robotët që mund të bëjnë sport apo kujdesen për të moshuarit, kufijtë mes shkencës dhe fantashkencës po bëhen gjithnjë e më të paqarte.

Një kompani amerikane e bioteknologjisë, Colossal Biosciences, pretendon se ka krijuar tre ujqër të ashtuquajtur “dire wolves”, një specie e zhdukur prej më shumë se 10 mijë vitesh. Sipas kompanisë, ADN-ja e gjetur në fosile është përdorur për të modifikuar ujkun gri modern.

Pamjet e publikuara tregojnë këlyshë të vegjël, të quajtur Romulus dhe Remus, që ulërijnë dhe ushqehen me biberon. Por komuniteti shkencor mbetet skeptik.

“Nuk mund të rikrijosh plotësisht një specie të zhdukur. ADN-ja degradohet me kalimin e mijëra viteve. A kemi një ujk gri pak të modifikuar? Po. A është ujk i zhdukur? Jo”, shprehet Corey Bradshaw, profesor i ekologjisë globale.

Ekspertët thone se kjo është më shuumë një eksperiment gjenetik sesa ringjallje e vërtetë e një specieje.

E njëjta kompani ka bërë bujë edhe me krijimin e ashtuquajturve “minj leshtorë”, të modifikuar gjenetikisht për të pasur qime të gjata, si hap i parë drejt rikrijimit të mamuthit. Sipas Colossal, kjo është vetëm faza fillestare e një projekti ambicioz.

Në Britani, një startup i quajtur Better Dairy po synon të ndryshojë industrinë ushqimore duke prodhuar djathë dhe kos pa qumësht lope. Produktet krijohen në laborator, me ndikim shumë më të ulët në mjedis.

Sipërmarrësit thonë se shija është identike.

Në Londër, studiuesit e King’s College kanë zhvilluar një trajtim revolucionar dentar duke përdorur keratinë, proteinë që gjendet në flokë dhe lesh.

“Keratinën e nxjerrim nga leshi i deles. Ideja është që smalti i dhëmbëve, si shtresë mbrojtëse, mund të forcohet dhe riparohet.”, shprehet Dr. Sherif Elsharkawy.

Produktet e para, si pasta apo xhel dentar, mund të dalin në treg brenda pak vitesh.

Një student dizajni në Londër ka krijuar papuçe nga pluhuri i shtëpisë, duke ricikluar mbetjet e fshesës me korrent në material të ndjeshëm si felt.

Ndërkohë, në Mançester, një grup muzikor përdor kërpudha dhe bimë për të prodhuar muzikë. Sensorët përkthejnë sinjalet elektrike biologjike në nota muzikore, një bashkim i natyrës dhe teknologjisë.

Në Britani, sistemi IntelliPig përdor kamera dhe inteligjencë artificiale për të analizuar fytyrën e derrave, duke identifikuar stresin apo shqetësimet shëndetësore. Studiuesit thonë se kjo mund të revolucionarizojë mirëqenien e kafshëve në ferma.

Në Kanada, një robot AI i quajtur Kia mirëpret studentët në universitet, bisedon, debaton dhe ndërvepron në kohë reale.

Ndërsa në Japoni, roboti Moflin, një shoqërues artificial, sillet si një kafshë shtëpiake dhe krijon lidhje të ngushtë me pronarin.

Nga droidët e Star Wars të ekspozuar në Kaliforni, te lojërat botërore të robotëve humanoidë në Kinë, ku robotët luajnë futboll dhe vrapojnë, teknologjia po avancon me shpejtësi.

Në Japoni, roboti AIREC po zhvillohet për të ndihmuar të moshuarit, ndërsa në Stanford, roboti OceanOneK eksploron thellësitë e oqeanit.

Në Itali, për herë të parë, një robot humanoid ka fluturuar me jetpack.

Dronë ultra të shpejtë në Hong Kong, dronë që transportojnë oksigjen dhe mbeturina në Everest, dhe një makinë elektrike britanike që mund të ecë përmbys, janë disa nga risitë më të pazakonta të vitit.

Ndërkohë, shkencëtarët në Oksford kanë krijuar një suplement ushqimor që ndihmon në shpëtimin e bletëve.

Në fushën e shëndetit, inteligjenca artificiale po ndihmon mjekët të zbulojnë çrregullimet në tru që shkaktojnë epilepsi, duke hapur rrugën për kura të reja.

Shkencëtarët që përdorin teleskopin James Webb thonë se kanë gjetur shenjat më të forta deri tani të mundësisë së jetës jashtë sistemit tonë diellor.

Në atmosferën e planetit K2-18 b janë zbuluar gazra që në Tokë prodhohen vetëm nga organizma të gjallë.

“Kemi gjetur prova të forta për molekula që lidhen me jetën biologjike. Është evidenca më e fortë deri më sot për jetë jashtë Tokës.”, shprehet Prof. Nikku Madhusudhan.

Nga ADN-ja e lashtë, te inteligjenca artificiale. A jemi gati për të ardhmen që po ndërtojmë, është një pyetje që mbetet për të gjithë ne.

Personi që po shihni në ekran është Nicolas Maduro, presidenti venezuelian, i cili u arrestua në orët e para të mëngjesit të kësaj të shtune në një operacion të forcave ushtarake brenda territorit të këtij shteti. Me syze të cilat s’e lënë të shikojë dhe kufje të mëdha për të mos dëgjuar asgjë, presidenti venezuelian shihet i prangosur, me vetëm një shishe uji në dorë, në anijen ushtarake amerikane Iwo Jima. Fotoja u publikua nga presidenti amerikan Donald Trump, i cili nga rezidenca e tij Mar-a-Lago, në një konferencë të jashtëzakonshme për shtyp, deklaroi se Shtetet e Bashkuara do të udhëheqin Venezuelën deri në një tranzicion paqësor.

“Ne do ta drejtojmë Venezuelën deri në momentin kur atje do të jetë e mundur të kemi një tranzicion të sigurt dhe të mençur. Nuk duam të lejojmë përfshirjen e dikujt tjetër që kërkon thjesht të vijë në pushtet dhe të kemi të njëjtën situatë që kemi pasur në vitet e shkuara. Ne do ta drejtojmë këtë shtet derisa atje të jetë i mundur një tranzicion i sigurt, i duhur dhe i mençur. Ne duam paqe, liri dhe drejtësi për popullin e madh të Venezuelës”, tha Trump.

Kreu i Shtëpisë së Bardhë theksoi se Shtetet e Bashkuara janë të gatshme të kryejnë një sulm akoma më të madh në Venezuelë, pasi kishin plan për një sulm të dytë, por shtoi se shpreson se diçka e tillë nuk do të jetë e nevojshme, duke paralajmëruar kështu çdo forcë që mendon të sjellë destabilitet. Donald Trump zbuloi gjithashtu se kompanitë amerikane do të investojnë në Venezuelë për të përfituar nga nafta e këtij shteti, që njihet si shteti që ka rezervat më të mëdha të arit të zi në botë.

“Do t’i bëjmë kompanitë amerikane kompanitë më të mëdha të naftës në botë. Kompanitë tona do të investojnë duke shpenzuar miliarda dollarë për të rregulluar infrastrukturën e dëmtuar rëndë të naftës në Venezuelë, duke filluar kështu të fitojnë para për vendin”, tha Trump.

Donald Trump deklaroi se Shtetet e Bashkuara kryen sulmin në orët e para të mëngjesit të së shtunës pasi ndalën elektricitetin në të gjithë Venezuelën si pasojë e një teknologjie të veçantë që ata zotërojnë. Sipas raporteve të mediave ndërkombëtare, të paktën 7 shpërthime u regjistruan në Karakas, kryeqytetin e këtij shteti. Avionët amerikanë bombarduan një bazë ajrore në shtetin e Mirandës, portin La Guaira, i cili është kanali kryesor i Karakasit për në Detin e Karaibeve, aeroportin Higuerote, ndërtesën e Parlamentit në Karakas, si dhe vendin e mauzoleumit të Çavezit.

Teksa ushtria amerikane kryente sulmet e saj tokësore, Njësia Delta, njësia më elitare e ushtrisë amerikane, kreu operacionin e arrestimit të Maduros dhe bashkëshortes së tij, pasi CIA dha të gjitha të dhënat mbi vendndodhjen e presidentit venezuelian. Sipas asaj që shkruajnë mediat amerikane, sulmi ndaj Venezuelës ishte parashikuar të kryhej përpara Krishtlindjeve, por u shty për shkak të trazirave në Nigeri.

Prokurorja e Përgjithshme e Shteteve të Bashkuara, Pam Bondi, zbuloi përmes një statusi në rrjetin social X se për Maduron dhe bashkëshorten e tij janë ngritur akuza zyrtare nga Gjykata e Distriktit Jugor të Nju Jorkut. Bondi deklaroi se Maduro akuzohet për narkoterrorizëm, transport kokaine, si dhe posedim të mitralozëve dhe pajisjeve shkatërruese, të cilat do të përdoreshin kundër Shteteve të Bashkuara. Presidenti venezuelian dhe bashkëshortja e tij do të gjykohen dhe do të vuajnë dënimin e tyre në tokë amerikane, tha Bondi.

Ministri i Jashtëm venezuelian, Vladimir Padrino Lopez, mbajti një konferencë për shtyp ku tha se vendi do t’u rezistojë trupave të huaja dhe shtoi se forcat e armatosura janë në gatishmëri për luftë, ndërsa Ministri i Jashtëm i Venezuelës i kërkoi Këshillit të Sigurimit në Kombet e Bashkuara të mbajë një takim urgjent.

Presidenti Donald Trump javët e fundit kishte lënë të kuptohej mundësinë e sulmeve tokësore kundër Venezuelës dhe kishte deklaruar se ditët e presidentit të Venezuelës, Nicolás Maduro, ishin “të numëruara”, pasi vendosi një flotë anijesh luftarake në Karaibe.

Një aksident ka ndodhur mbrëmjen e sotme në Petovë pranë repartit të FNSH- së, ku një automjet tip “ Benz” ka përplasur dy këmbësorë, çift bashkëshortësh të cilët kanë pësuar lëndime nga goditja e fortë.

Ata janë transportuar me urgjencë drejt Spitalit Rajonal Fier, për të marrë ndihmën e nevojshme mjekësore, ku ndodhen jashtë rrezikut për jetën.

Shërbimet e policisë dhe grupi hetimor ndodhen në vendngjarje për të përcaktuar shkaqet e këtij aksidenti.

Janë publikuar pamje të dëmeve që pasuan sulmet amerikane në Venezuelë, ku shihen dëme në infrastrukturë dhe automjete të djegura në bazën ajrore La Carlota, afër Karakasit.

Sulmet u kryen të shtunën nga Shtetet e Bashkuara të Amerikës, të cilat, sipas tyre, sulmuan Venezuelën dhe rrëzuan udhëheqësin e saj autokratik, Nicolás Maduro. Në transmetim të drejtpërdrejtë në televizionin qeveritar venezuelan u shfaqën disa automjete civile të djegura, dëmtime në gardhe dhe tym që ngrihej brenda bazës ajrore.

Trump tha se operacioni u zhvillua “në bashkëpunim me organet amerikane të zbatimit të ligjit” dhe premtoi më shumë detaje në një konferencë për media në Mar-a-Lago të Floridës.

Një zyrtar amerikan tha për Reuters se Maduro iu dorëzua forcave speciale elitë dhe u arrestua. Senatori republikan amerikan, Mike Lee tha se Sekretari amerikan i Shtetit, Marco Rubio i kishte thënë se Maduro do të përballet me drejtësinë amerikane për akuzat penale.

Autoritetet venezuelane thanë se në sulmet e së shtunës kanë vdekur civilë dhe ushtarakë, por nuk dhanë shifra të sakta të viktimave.

Ministri i Mbrojtjes së Venezuelës, Vladimir Lopez, njoftoi se ushtria po përgatitet dhe lëshoi mesazhe të forta për publikun. Ai e përshkroi atë që ndodhi si një “sulm kriminal dhe terrorist” ndaj popullit dhe vendit të tyre, duke shtuar se Venezuelanët duhet të qëndrojnë të qetë dhe të besojnë te udhëheqësit e tyre ushtarakë dhe politikë.

Një tërmet i fuqishëm me magnitudë 6.5 goditi të premten jugun dhe qendrën e Meksikës, duke shkaktuar të paktën dy viktima dhe dëme materiale në disa zona të vendit.

Epiqendra e lëkundjes u regjistrua pranë qytetit turistik Akapulko, afër San Markos, në shtetin jugperëndimor të Guerreros. Autoritetet lokale raportuan dëme të moderuara, ndërsa shërbimet e emergjencës u vendosën menjëherë në terren.

Guvernatorja e Guerreros, Evelyn Salgado, konfirmoi se një grua 50-vjeçare humbi jetën si pasojë e tërmetit. Ndërkohë, kryetarja e Bashkisë së Qytetit të Meksikos, Clara Brugada, bëri të ditur se një burrë 60-vjeçar ndërroi jetë në kryeqytet dhe se 12 persona të tjerë janë plagosur.

Në Qytetin e Meksikos u raportuan ndërprerje të energjisë elektrike, por autoritetet njoftuan se furnizimi është rikthyer në rreth 98% të zonave të prekura. Dy ndërtesa po vlerësohen për rrezik shembjeje, ndërsa dhjetëra objekte banimi dhe publike po inspektohen si masë parandaluese.

Sipas shërbimit sizmologjik, deri në mesditën lokale janë regjistruar mbi 400 pasgoditje. Raportohet gjithashtu për rrëshqitje dheu në disa rrugë kryesore në shtetin Guerrero, si dhe ndikime në infrastrukturë, përfshirë rrugë dhe spitale.

Presidentja e Meksikës, Claudia Sheinbaum, ndodhej në një konferencë për shtyp në momentin e tërmetit, ndërsa pamjet e publikuara në rrjetet sociale tregojnë ndërtesa që lëkunden dhe qytetarë që dalin me shpejtësi në rrugë pas aktivizimit të sistemit të alarmit sizmik.

Meksika është një nga vendet më të rrezikuara nga tërmetet, pasi ndodhet në zonën e takimit të katër pllakave tektonike. Autoritetet vijojnë monitorimin e situatës dhe vlerësimin e dëmeve.

Arabia Saudite ka bërë thirrje që fraksionet jugore të Jemenit të marrin pjesë në një dialog në kryeqytetin Riad, pas një përplasjeje mes Arabisë Saudite dhe Emirateve të Bashkuara të Arabisë (EBA) lidhur me situatën në jug të vendit.

Të dy vendet e Gjirit kanë ndërhyrë për të mbështetur qeverinë e njohur ndërkombëtarisht të Jemenit në luftën civile që vazhdon prej vitesh, por një ndarje e aleancës i ka shtyrë ata të mbështesin grupe rivale në terren. Një nga këto grupe po përpiqet të shpallë pavarësinë e një shteti të shkëputur në jug të vendit.

Më 2 dhjetor, Këshilli i Kthimit Jugor (STC), i mbështetur nga Emiratet e Bashkuara, nisi një ofensivë të gjerë ushtarake në juglindje, duke marrë kontrollin mbi provinca të pasura me naftë, përfshirë Hadramaut, që kufizohet me Arabinë Saudite. STC argumentoi se ofensiva ishte e nevojshme për të “ristabilizuar rendin” në jug. Por kreu i Këshillit Presidencial, Rashad al-Alimi, e quajti atë “rebelim”, duke paralajmëruar se mund të çonte në copëtimin e Jemenit dhe në kaos rajonal.

Situata u tensionua më tej me sulme ajrore nga koalicioni i udhëhequr nga Arabia Saudite, ku shtatë persona u vranë në një kamp ushtarak të STC-së në Hadramaut. Sulmet e mëparshme përfshinin portin e Mukallas, ku Arabia Saudite akuzoi Emiratet se kishin dorëzuar dy anije me pajisje ushtarake për separatistët, akuza që EBA e mohoi.

Pas këtyre zhvillimeve, Këshilli Presidencial i Jemenit urdhëroi të gjitha trupat e Emirateve të largoheshin nga vendi brenda 24 orëve, një vendim që u mbështet nga Arabia Saudite, duke e konsideruar sigurinë kombëtare të saj si “vijë e kuqe”. Emiratet pranuan të tërhiqen, por ekspertët paralajmërojnë se kjo nuk do të ndikojë në forcën e STC-së në terren.

Që nga fillimi i luftës civile në 2014, Jemen ka përjetuar një krizë të thellë humanitare, duke pasur një nga nivelet më të larta të urisë në botë dhe një sistem shëndetësor të shkatërruar. Mbi 377,000 persona janë vlerësuar të kenë vdekur si pasojë e luftës dhe mungesës së ushqimit, përfshirë 259,000 fëmijë nën pesë vjeç.

Ekspertët shprehin shqetësimin se diferencat mes Arabisë Saudite dhe Emirateve mbi logjikën strategjike në Jemen mund të çojnë në një konflikt më të gjerë, duke kërcënuar stabilitetin jo vetëm të Jemenit, por të gjithë rajonit. STC-ja, nga ana e saj, konfirmon aspiratat për një shtet të pavarur jugor dhe thotë se nuk do të jetë një kërcënim për sigurinë e Arabisë Saudite, duke premtuar stabilitet dhe mos-shpërndarje të ekstremizmit.

Riadit i takon tani të përpiqet të bashkojë fraksionet jugore në një konferencë për të diskutuar “zgjidhje të drejtë për çështjen jugore”, por rruga drejt një paqeje të qëndrueshme duket e gjatë dhe e vështirë.

Analisti Frrok Çupi, i ftuar në “Ora e Fundit” në ABC News, komentoi zhvillimet politike brenda Partisë Demokratike dhe figurën e Sali Berishës, duke u ndalur te bilanci i këtij viti për opozitën.

Sipas Çupit, Berisha duhet të reflektojë mbi humbjen e rreth 200 mijë votuesve nga PD, ndërsa theksoi se ai ka arritur të shmangë përballjen me drejtësinë dhe të konsolidojë pozitat e tij brenda partisë, duke mposhtur kundërshtarët e brendshëm. Analisti ngriti gjithashtu kritika për rolin e SPAK dhe mungesën e përgjegjësisë, sipas tij, për ngjarje të rënda si 21 Janari dhe Gërdeci.

“Berisha duhet të analizonte pse PD këtë vit ka humbur 200 mijë votues, dhe ky është vërtet një bilanc. Ai ia doli për një vit që drejtësia nuk arriti që të merrej me të. SPAK ka qenë në favor të familjes kriminale të Berishës të shpallur non grata.

Një sukses tjetër, mposhti armiqtë e brendshëm, Bashën, Salianjin. Më duket se po arrin një fitore të madhe që të mos përgjigjet për ’21 Janarin’ dhe të vdekuri e Gërdecit”, tha Çupi./abcnews.al

Kryeministri Edi Rama zhvilloi këtë të martë konferencën e fundit për mediat për vitin 2025, ku për rreth tre orë trajtoi një sërë çështjesh që lidhen me qeverisjen dhe funksionimin e shtetit.

Analisti Frrok Çupi, i ftuar në  “Ora e Fundit” në ABC News, vlerësoi se Rama doli nga klishetë e zakonshme të fundvitit, duke shmangur shifrat formale dhe duke u ndalur te ajo që ai e cilësoi si “qeverisje e shkathët”.

Sipas Çupit, fokusi kryesor i Kryeministrit ishte raporti mes pushteteve dhe veçanërisht roli i drejtësisë, duke ngritur shqetësime për balancën institucionale dhe nevojën për radhitjen e pushteteve në përputhje me parimet e shtetit demokratik.

“Kryeministri doli nga klishetë e përvitshme. Nuk ra në pozitat që të fliste me shifra të mërzitshme, që njerëzit gjatë gjithë vitit i kalojnë nëpër duar dhe i dinë. Rama kaloi tek ajo që quhet qeverisja e shkathët, që aplikohet në vendet më të zhvilluara të botës. Rama solli një problem shumë të madh, problemin e vitit, raportin e trupave të drejtësisë me trupa e tjerë të vendit. Janë thënë disa nga parimet kryesore të shtetit të cilat janë cenuar kohët e fundit. Kryeministri radha një kontribut për radhitjen e pushteteve, e cila është gjëja më e rëndësishme për funksionimin e pushteteve. Burimi i pushteteve është populli, sovrani. Këto vitet e fundit për ne është krijuar një tabu, tabuja e SPAK dhe të prokurorëve.

Mund të kishim një tragjedi, nëse shteti, parlamenti dhe presidenti nuk të kishin vendosur barrikadën ndaj specieve të gjyqtarëve dhe prokurorëve që kukonin të merrnin pushtetin. Ndalja e këtij vrulli do të thotë që të risistemohet shteti, pas një trilli shumë të madh të prokurorëve dhe gjyqtarëve që mendonin se mund të bënin gjithçka me të drejtën e njeriut. Një ditë do e shikonim veten në llumin e varfërisë. Pasi të mbaronin punë me zëvendëskryeministren do merreshin me kryeministrin, pa asnjë provë, dhe më pas do ishte rrënuar qeveria. Ajo që ishte e guximshme ishte fakti që parlamenti kërkon t’i vendosë gjërat në vijë. Këto gabime vijnë nga mazhoranca që u hapi syrin prokurorëve dhe gjyqtarëve”, tha Çupi./abcnews.al

Presidenti ukrainas Volodymyr Zelensky ka konfirmuar se po zhvillon bisedime me presidentin e SHBA-së, Donald Trump mbi vendosjen e mundshme të trupave amerikane në Ukrainë, por theksoi se një vendim i tillë do të varet vetëm nga udhëheqësi i SHBA-së.

Kreu i shtetit e tha këtë duke iu përgjigjur pyetjeve të gazetarëve, raporton Ukrinform.

Kur u pyet nëse, si pjesë e garancive të sigurisë, Shtetet e Bashkuara planifikojnë të vendosin trupat e tyre në Ukrainë – përgjatë vijës së demarkacionit apo në kufi – Zelensky tha: “Për të qenë i sinqertë, kjo mund të konfirmohet vetëm nga Presidenti i Shteteve të Bashkuara të Amerikës. Këto janë trupa amerikane, dhe për këtë arsye është Amerika që merr vendime të tilla. Sigurisht, ne po e diskutojmë këtë si me presidentin Trump ashtu edhe me përfaqësuesit e Koalicionit të Vullnetit”.

Ai shtoi se Ukraina do të donte të shihte trupat amerikane në territorin e saj si një garanci sigurie. Sipas Zelensky, ky do të ishte një pozicion i fortë për sa i përket garancive të sigurisë, transmeton Telegrafi.

Siç është raportuar, presidenti i SHBA-së, tha se është arritur shumë përparim në bisedimet për t’i dhënë fund luftës pas takimit të tij me presidentin ukrainas Volodymyr Zelensky, i cili u zhvillua të dielën, më 29 dhjetor, në rezidencën Mar-a-Lago në shtetin e Floridës.