Aeroplanë dhe personel ushtarak amerikan u panë në ish-bazën detare Roosevelt Roads në Ceiba, Porto Riko, ndërsa tensionet mes administratës së presidentit amerikan Donald Trump dhe qeverisë së presidentit venezuelian Nicolas Maduro janë në rritje.
Më herët këtë muaj, Trump urdhëroi një “bllokadë” ndaj të gjitha naftëtarave të sanksionuara që hyjnë ose dalin nga Venezuela, në një përpjekje për të rritur presionin mbi presidentin Maduro.
Administrata amerikane ka akuzuar Venezuelën për dërgim të drogës drejt Shteteve të Bashkuara dhe prej muajsh ka bombarduar anijet që dyshohet se transportonin drogë nga Amerika e Jugut. Veprimet e SHBA-së janë dënuar nga shumë vende, të cilat i konsiderojnë si vrasje jashtë ligjit.
Presidenti Trump ka kërcënuar shpesh se mund të fillojë sulme ajrore ndaj infrastrukturës së drogës në tokë dhe gjithashtu ka autorizuar operacione të fshehta të CIA-s të drejtuara ndaj Karakasit.
Vetëm këtë muaj, Garda Bregdetare e SHBA-së ka ndaluar dy tankerë në Detin Karaibe, të dy plot me naftë venezueliane, ndërsa tensionet mes dy vendeve mbeten të larta dhe situata mund të përshkallëzohet në ditët në vijim./mxh
Një ushtar rezervist izraelit ka përplasur me automjet një palestinez, ndërsa ky i fundit po falej në anë të rrugës në Bregun Perëndimor të pushtuar, të enjten më 25 dhjetor. Lajmi u konfirmua nga ushtria izraelite, e cila tha se më herët në zonë ishin dëgjuar edhe të shtëna me armë zjarri.
Në një deklaratë zyrtare, ushtria bëri të ditur se ka marrë pamje filmike që tregojnë një person të armatosur duke përplasur me makinë një civil palestinez. Sipas saj, autori ishte një ushtar rezervist, shërbimi ushtarak i të cilit është ndërprerë menjëherë pas incidentit.
Autoritetet izraelite theksuan se veprimi është kryer në “shkelje të rëndë të autoritetit”, ndërsa arma e rezervistit është sekuestruar. Mediat izraelite raportojnë se ai po mbahet në arrest shtëpie, ndërsa policia izraelite nuk ka dhënë ende një reagim zyrtar.
Personi i lënduar, palestinezi Majdi Abu Mukho, u dërgua në spital për kontrolle mjekësore, por fatmirësisht nuk pësoi lëndime dhe tashmë ndodhet në shtëpi.
Pamjet e transmetuara nga televizioni palestinez dhe të verifikuara nga agjencia Reuters tregojnë një burrë me rroba civile, me armë në sup, duke drejtuar një automjet tip “off-road” drejt një personi që po falej në anë të rrugës. Reuters konfirmoi vendndodhjen e ngjarjes në zonën Deir Jareer, bazuar në pamjet satelitore dhe raportimet nga terreni.
Sipas të dhënave të Kombeve të Bashkuara, ky vit është ndër më të dhunshmit për sulmet e civilëve izraelitë ndaj palestinezëve në Bregun Perëndimor, me mbi 750 palestinezë të plagosur. Po sipas OKB-së, nga 7 tetori 2023 deri më 17 tetor 2025, më shumë se një mijë palestinezë janë vrarë në këtë territor, kryesisht gjatë operacioneve të forcave të sigurisë dhe disa si pasojë e dhunës nga kolonët. Në të njëjtën periudhë, 57 izraelitë janë vrarë në sulme palestineze./mxh
Prej disa ditësh platforma e-Albania po përballet me një bllokim teknik serioz, që ka sjellë pasoja për të gjithë: qytetarë brenda dhe jashtë Shqipërisë, por edhe biznese.
Në sistem nuk shfaqen data të lira për rezervime, për shërbime si aplikime për pasaportë, shërbime konsullore, dhe procedura të lidhura me Qendrën Kombëtare të Biznesit (QKB), si regjistrime, ndryshime të të dhënave apo dokumente zyrtare për kompani.
Dojce velle nw shqip shkruan se bllokimi i platformës e-Albania ka krijuar një zinxhir konfuzioni. Konsullatat thonë se aplikimet për ripërtëritjen e pasaportave bëhen vetëm përmes e-Albania, rrugë tjetër nuk ka.
Platforma e-Albania deklaron se oraret janë të mbushura ose sistemi është i bllokuar dhe i referon qytetarët te Ministria e Jashtme. Nga ana tjetër Ministria e Jashtme në Tiranë u kërkon qytetarëve të presin një “moment të dytë”, pa një afat konkret.
Ndërkohë vetë konsullatat kanë pranuar se sistemi është i ngrirë për shkak të një defekti teknik të paparashikuar, i cili nuk dihet sa zgjat.
Deutsche Welle shkruan se problemi kryesor nuk është vetëm defekti teknik, por mungesa e një plani alternativ: kur platforma e vetme bie, i gjithë shteti online bllokohet. Rezultati: qytetarë që s’mund të rinovojnë dokumentet, dhe biznese që nuk kryejnë dot procedura ligjore bazë, me pasoja reale financiare dhe administrative.
Ky bllokim vjen në një moment delikat për sistemet digjitale shtetërore, pas incidenteve të mëparshme që kanë goditur infrastrukturën e Agjencisë Kombëtare të Shoqërisë së Informacionit (AKSHI), e cila administron platformat kryesore elektronike të shtetit, raste që kanë qenë objekt verifikimi edhe nga SPAK./mxh
Presidenti rus Vladimir Putin deklaroi se Rusia ka rritur ndjeshëm prodhimin e armëve që nga nisja e luftës në Ukrainë.
Gjatë një mbledhjeje kushtuar zhvillimit të industrisë ruse të mbrojtjes për dhjetë vitet e ardhshme, Putin tha se në vitin 2025, krahasuar me vitin 2022, prodhimi i armëve më të kërkuara për atë që Moska e quan “operacioni ushtarak special” është rritur disa herë.
Sipas tij, prodhimi i raketave dhe artilerisë është rritur me 9.6 herë, pajisjet e komunikimit dhe të luftës elektronike me 12.5 herë, mjetet e mbrojtjes personale me 17.9 herë, ndërsa armatimet konvencionale dhe municionet janë rritur më shumë se 22 herë.
Putin i cilësoi këto shifra si rezultat të punës së industrisë ushtarake ruse, duke theksuar se kapacitetet prodhuese janë forcuar ndjeshëm për të mbështetur nevojat e ushtrisë.
Deklaratat vijnë në një kohë kur lufta në Ukrainë vazhdon dhe Rusia përballet me sanksione të gjera ndërkombëtare, ndërsa Moska synon të sigurojë qëndrueshmëri afatgjatë në sektorin e mbrojtjes./mxh
Nëse dikush do të na pyeste sot: “A është Shqipëria në krizë?”. “Përgjigjja nuk do të ishte as “po” e prerë, as “jo” bindëse. Shqipëria ndodhet në një gjendje paradoksale, ku zhvillimi dhe degradimi ecin paralelisht, ku progresi shihet me sy, por nuk ndihet me shpirt.
Nga njëra anë, realiteti flet për; ndërtime, rrugë, autostrada, tunele, projekte madhore infrastrukturore dhe një shtet që formalisht duket se funksionon. Statistikat flasin dhe raportojn për ekonomi me rritje të qëndrueshme për vitin 2025, ndërsa buxheti për vitin 2026 parashikohet me theks social dhe me rritje të ndjeshme, në përmirësimin e jetës dhe mirëqenies së qytetarëve. Negociatat për anëtarësim në Bashkimin Europian janë hapur dhe avancojnë me ritme të kënaqshme, duke e vendosur Shqipërinë më afër familjes europiane sesa kurrë më parë.
Por nga ana tjetër; përditshmëria e qytetarit tregon një tablo krejt tjetër.
Korrupsioni është shndërruar në një fenomen horizontal dhe vertikal: nga qeliza më e vogël e administratës, deri në majat e pushtetit dhe “trurin” e shtetit. Ligji ekziston, por drejtësia perceptohet si selektive dhe vështirë ta arrish atë. Institucionet funksionojnë, por besimi tek ato është i ulët, për të thënë që nuk ekziston fare.
Në këtë realitet, ajo që lë më shumë për të dëshiruar dhe shuan çdo shpresë është roli i opozitës. Ky është ndoshta dështimi më i madh politik i këtyre viteve tranzicion, apo në shtetin pluralist. Opozita shqiptare fatëmirësisht ekziston de jure dhe de facto, por fatëkqësishtë mungon si alternativë reale, apo si mundësi dhe shpresë për ndryshim. Ajo është e fragmentuar, pa objektiva të qarta dhe pa vizion.
Premtimet e saj për protesta madhështore, për rrëzim pushteti, për “shporrje me kuç e maç” të Qeverisë Rama dhe mazhorancës më jetëgjatë, përsëriten vazhdimisht, por mbeten vetëm fjalë. Realiteti i premtimeve dhe veprimi praktik i saj, shpesh i ngjan fabulës së Mezhgorallinjve: Të cilët në darkë bëjnë shkopinjtë gati, se do vrasin e presin Peshtanakëto, në mëngjes i thyejnë vetë.
Shoqëria shqiptare dhe biznesi janë po aq kontradiktorë. Shajnë qeverinë, ankohen për sistemin, por nuk identifikohen realisht me asnjë alternativë. Një pjesë nuk ikën plotësisht, por as nuk qëndron me bindje. Ikën në Europë, por shpesh as atje nuk gjejnë qetësi.
Kjo nuk është krizë urie dhe as krizë mbijetese. Është një krizë besimi, përfaqësimi dhe kuptimi. Shqipëria nuk është një vend që po shembet, por një vend që po ngec. Ajo të jep përshtypjen e një shoferi që mbanë këmbën në gaz, por gomat e makinës xhirojnë në baltë. Fatëkeqsisht për një vend ngecja është, jo vetëm më e keqija, por më e rrezikshme se kriza.
Prandaj, përgjigjja është e qartë: Ne jemi në krizë sepse kemi mësuar të jetojmë me të. Ne nuk bëjmë dot pa kriza. Më e keqja është se ne pa ndërkombëtarët, jo vetëm që nuk e zgjidhim dot krizën, por mbetemi mot e jetë me krizën. Në këtë far feje dhe ferexhe ku gjendemi dhe jemi katandisur vështirë të pranojmë , e pa mundur të themi me plot bindje se jemi në krizë, ashtu si mund të themi me po aq krenari dhe siguri se ne nuk jemi në krizë… Hajde merre vesh dhe pastaj bëji derman dhe jepi dum …
Bota magjike e filmit “Wicked” u rikrijua për një ditë të vetme në Nju Jork, në kuadër të publikimit të versionit për t’u parë në shtëpi të “Wicked: For Good”. Fansat më të përzgjedhur dhe influencerë nga e gjithë bota u ftuan në një ekspozitë unike, ku u prezantuan kostume origjinale, rekuizita nga filmi, ambiente multisensoriale dhe instalacione digjitale.
Vizitorët patën mundësinë të përjetojnë dhoma tematike, përfshirë një ambient të mbushur me lule dhe aromë trëndafilash, një simulim tornadoje si dhe dhomën ikonike të flluskës së Glindës. Universal Pictures Home Entertainment krijoi gjithashtu hapësira të posaçme për foto dhe video, për të nxitur ndarjen e përvojës në rrjetet sociale dhe promovimin e filmit.
“Wicked: For Good” sjell rikthimin e Ariana Grande dhe Cynthia Erivo në rolet e Glindës dhe Elphabës, dy shtrigat e Oz-it, duke shënuar përfundimin e adaptimit kinematografik të muzikalit të famshëm të Broadway-t. Të dy filmat janë drejtuar nga regjisori Jon M. Chu dhe bazohen në muzikalin e Stephen Schwartz, i cili vetë është frymëzuar nga romani i vitit 1995 i Gregory Maguire.
Filmi tregon historinë e Elphabës, vajzës me lëkurë të gjelbër dhe të keqkuptuar, e cila më pas shndërrohet në Shtrigën e Keqe të Perëndimit, personazh i njohur nga përralla klasike “Magjistari i Ozit”.
Sipas Universal Pictures dhe Comscore, pjesa e dytë e “Wicked” regjistroi fundjavën e tretë më të mirë të hapjes në kinematë amerikane për një muzikal, pas “The Lion King” të vitit 2019 dhe “Beauty and the Beast” të vitit 2017.
Mes fansave të emocionuar ishte edhe Louie Fevola, i cili u shpreh se historia e filmit e ka prekur që në moshë të vogël, për shkak të mesazhit të tij për ndjenjën e të qenit ndryshe dhe të përjashtuar, duke e bërë “Wicked” një përvojë shumë personale dhe të veçantë për të.
Nga data 31 dhjetor, publiku do të ketë mundësinë ta marrë filmin me qira ose ta blejë në platformat digjitale. Versioni përfshin materiale shtesë ekskluzive, një opsion Sing-Along dhe një dokumentar 50-minutësh mbi realizimin e filmit./mxh
Nga bota e imobiliareve te kinemaja, Mariglen Çika ka debutuar në filmin shqiptar Bad Drop. I njohur për prezencën e tij në ekranin e telefonave dhe videot kreative, ai tregon si u fut në rolin e Nikut, krahu i djathtë i dy kapove të bandave, dhe si e përjetoi eksperiencën e parë përball kamerës.
Në një intervistë pwr “E Vërteta.al”, Marigleni rrëfen ftesën që e bëri pjesë të filmit, sfidat gjatë xhirimeve dhe bashkëpunimin me aktorët profesionistë Behar Meren dhe Bujar Asqeriun. Ai shpjegon se roli nuk ka lidhje me jetën e tij reale, por eksperienca i dha mundësinë të përjetojë emocionet dhe kompleksitetin e një filmi aksion. Gjithashtu, aktori ndan këshilla për të rinjtë që duan të provojnë veten në fusha të reja dhe shpreh dëshirën për të eksploruar edhe zhanre të tjera në të ardhmen.
Si erdhi ftesa për të qenë pjesë e filmit Bad Drop dhe cili ishte reagimi juaj i parë?
Ftesa erdhi nëpërmjet mikut tim, Eni Gurra, i cili pasi më kishte parë edhe në videot në rrjetet sociale me kolegen time, Viola, i kishin pëlqyer videot dhe mënyrat sesi realizonim videot për reklamimin e pronave me ide kreative dhe me doza të vogla aktrimi.
Çfarë ju bindi të pranoni një rol në kinematografi, duke ardhur nga fusha e imobiliareve?
Pranimi i ftesës ishte i menjëhershëm, pasi doja të shfrytëzoja këtë mundësi që më u dha, e cila do më jepte shansin të eksperimentoja në fushën e aktrimit.
A kishit më parë eksperiencë me aktrimin apo ishte hera e parë para kamerës?
Ndër vite jam marrë me art, muzikë, kërcim, DJ dhe gjithmonë kam prekur skena, ekrane dhe televizione si i ftuar. Kështu që marrëdhënia me kamerën nuk ishte problem, dhe futja në rol ishte diçka që e kisha provuar më parë edhe në formate të tjera televizive.
Na tregoni më shumë për personazhin që interpretoni në Bad Drop.
Kush është Marigleni në Bad Drop?
Marigleni në Bad Drop luan rolin e Nikut, i cili është krahu i djathtë i dy kapove të bandave, konkretisht Behar Meres dhe Bujar Asqeriut. Unë jam i besuari i të dyja grupeve, si ndërmjetës dhe si shërbëtor korrekt në çdo punë të kryer më parë, deri sa shfaqet Lisa, e cila më ekzekuton 4 prej miqve të mi që punonim bashkë dhe mua më kursen, duke pasur të tjera misione në mendje dhe më kërcënon që të bëj gjithçka që ajo thotë, që mos të më heqë qafe.
Sa afër apo larg është ky rol nga vetja juaj reale?
0% nuk kemi lidhje fare me rolin, pasi filmi është fiction dhe nuk është se në realitet gjërat ndodhin kaq artistikisht sa në film. Në jetën reale nuk ka si të jetë gjithçka kaq e skenuar.
Cila ishte skena më sfiduese për ju gjatë xhirimeve?
Koha e nxehtë, xhirimet me kostum dhe kollare deri në fyt, teksti dhe emocionet përball aktorëve të mëdhenj, ku duhej të jepnim maksimumin.
A pati momente ku u ndjetë të pasigurt përpara kamerës?
Disa herë, kur ndodhte që harronim tekstin, ishin shumë syra dhe shumë kamera drejtuar drejt meje, që prisnin rezultatin. Por, dashje pa dashje, me pak improvizim kalonim situatën pa u kuptuar dhe pa krijuar ngërç në xhirime.
Përvoja në xhirime
Si ishte bashkëpunimi me kastin dhe regjisorin e filmit?
Për mua kënaqësia më e madhe ishte që kisha rol dhe skenar me të dy aktorët, si Behar Meren ashtu dhe Bujar Aqeriun. Ishte fat dhe nder që punova me ta. Regjia gjithmonë ishte e hapur dhe e qetë me punën tonë, duke e bërë më të lehtë transformimin nga jo-aktor në aktor.
Çfarë atmosfere mbizotëronte gjatë xhirimeve?
Shumë miqësore, shumë argëtuese, gjë që na la shije të mirë dhe mezi presim xhirimet e rradhës.
A keni ndonjë episod interesant apo të veçantë nga prapaskenat që mund ta ndani me publikun?
Prapaskenat me Behar Meren ishin fantastike, plot humor dhe të qeshura. Një grup i tërë xhirimi dhe kastë duke mbajtur brinjët nga të qeshurat.
Kalimi nga imobiliare në film
Sa e vështirë ishte të balanconi jetën profesionale si agjent imobiliar me angazhimin në film?
Ka pasur sfidat e veta. Disa ditë xhirimesh nga puna shkoja direkt në shesh xhirim ose e kundërta, nga xhirimet direkt te klientët. Më ka krijuar pak vështirësi në menaxhimin e kohës, por ja dola me sukses t’i menaxhoja. Tani shohim në serinë e dytë, uroj të shkojë mirë dhe të mos krijoj përplasje mes datave dhe orareve të punës.
A mendoni se profesioni juaj ju ndihmoi në ndërtimin e personazhit?
Nuk besoj se lidhen karakteret nga personazhi i filmit me atë në punën e përditshme si reklamues. Por prezenca në publik, të qenit person publik tashmë prej vitesh në ekranin e vogël të telefonave të miliona shqiptarëve, na ka dhënë edhe shansin për ftesa të tilla, si të qenit protagonist në një film.
Çfarë kanë të përbashkët, sipas jush, bota e biznesit dhe ajo e filmit?
Janë të dyja biznese fitimprurëse .
Filmi tashmë ka hapur dyert për publikun.
Si kanë qenë reagimet e para të publikut pas shfaqjes së filmit?
Unë personalisht kam marrë shumë nota të larta vlerësuese, si nga publiku, ashtu edhe nga miqtë dhe aktorë profesionistë, të cilët më kanë dhënë kritikat e tyre për pjesën aktoriale në film. Ka shumë elementë pozitivë, që nëse punohen edhe më mirë, nxjerrin rezultate finale shumë të këndshme për shikuesin.
A do ta konsideronit seriozisht aktrimin si një rrugë të dytë profesionale?
Sigurisht, e shijova shumë gjithçka: xhirimet, premierën, duartrokitjet dhe punën me aktor profesionist. Dua të jem pjesë e zhanreve të ndryshme të filmave të tjerë dhe nuk dua të mbyll vetëm me këtë serial aksion.
Nëse do t’ju ofrohej një tjetër rol, çfarë lloj personazhi do të dëshironit të luanit?
Zhanri që dua të eksperimentoj do të ishte komedia-dramë. Normalisht, personazhin e vendos regjizori, dhe çfarëdo roli të kem, do bëj maksimumin për t’u përfshirë dhe për t’u bërë njësh me personazhin.
Çfarë ju ka mësuar kjo eksperiencë për veten?
Që mundësitë në jetë duhet t’i shfrytëzosh në maksimum.
Cili është mesazhi që do të donit të përcillnit për publikun që shkon ta shohë Bad Drop?
Përgatituni për një rrëmujë të madhe, plot intriga që shkaktohen në ujrat e qeta të dy bandave. Gjithçka ndodh nga hakmarrja e një femre dhe intrigat e një personazhi të kërcënuar dhe të dashuruar me pengmarresen, si isha unë (Niku).
Një këshillë për të rinjtë që duan të provojnë veten në fusha të reja, jashtë profesionit të tyre?
Fillimisht, ndiqni studimet për aktrim, pasi shumë elementë fitohen nga shkolla. Gjë të cilën unë, si jo-profesionist, e ndjeva në trysni dhe presion. Ju këshilloj të jeni shumë gati kur të dilni përball kamerës, për të fituar të gjithë benefitet dhe për të shkëlqyer. Uroj që sa më shumë të rinj të sjellin filma shqiptarë, sepse kemi nevojë. Janë ushqim për shpirtin dhe argëtim për publikun e gjerë./mxh
Qytetarët e Kosovës me të drejtë vote, të dielën e 28 dhjetorit do t’i drejtohen kutive të votimit për të zgjedhur përfaqësuesit e tyre për katër vitet e ardhshme.
Ligji nr. 08/l-228 për Zgjedhjet e Përgjithshme në Republikën e Kosovës përcakton rregullat e organizimit të sistemit zgjedhor, duke përfshirë rregullat për përgatitjen, zhvillimin, administrimin, mbikëqyrjen dhe shpalljen e rezultatit të zgjedhjeve për Kuvendin e Republikës së Kosovës.
Por, çfarë duhet të dinë qytetarët para se t’i drejtohen kutive të votimit?
Neni 110 i Ligjit bën të ditur se Kosova është një zonë e vetme zgjedhore dhe se secili subjekt politik i certifikuar paraqitet në votim me “listë të hapur”.
Votuesi pajiset me një fletëvotim të vetëm për zgjedhje dhe në të shënjon: votën për një subjekt politik dhe votën për një deri në dhjetë kandidatë nga lista e subjektit politik për të cilin ka votuar votuesi.
Por, çka ndodh nëse në fletëvotim shënohen më shumë se 10 kandidatë?
Pika 5, në nenin 110 në Ligjin për Zgjedhjet e Përgjithshme tregon qartë se nëse një fletëvotim shënohen më shumë se dhjetë kandidatë, atëherë numërohet vetëm vota për subjektin politik.
Cilat dokumente mund t’i keni me vete për të votuar?
Shtetasi me të drejtë vote brenda vendit dhe në përfaqësi diplomatike, mund të votojë nëse ai ose ajo identifikohet saktësisht në Listën e Votuesve dhe ofron njërin prej dokumenteve të vlefshme të identifikimit, të lëshuara nga Republika e Kosovës: letërnjoftimin, pasaportën, lejen e vozitjes.
Ndërkaq, neni 89 i Ligjit përcakton po ashtu të drejtën e votës dhe siguron fshehtësinë.
Votuesi më të drejtë për të votuar ka të drejtë vote nëse ai/ajo është i regjistruar në Kosovë ose ka aplikuar suksesshëm për votim jashtë Kosovës siç përcaktohet në nenet 6 dhe 7 të këtij ligji.
Ligji garanton se askush nuk e parandalon ose orvatet të parandalojë një votues me të drejtë për të votuar nga ushtrimi i së drejtës së tij/saj për të votuar.
Po ashtu, askush nuk lejohet të votojë në emër të një votuesi tjetër, përveç përmbushjes së rrethanave nga paragrafi 5 i këtij neni.
Pika e 4-të e këtij neni përcakton se secili votues e plotëson fletëvotimin e vet në fshehtësi mbrapa kabinës së votimit, ndërkaq vetëm një person lejohet mbrapa kabinës së votimit gjatë një intervali të caktuar kohor përveç nëse votuesi ka kërkuar ndihmë nga personi tjetër, siç përcaktohet në paragrafin 5 të këtij neni.
Votuesi i cili është me aftësi të kufizuara në atë mënyrë që nuk është në gjendje të shënojë ose hedh fletëvotimin, mund të ndihmohet nga një person tjetër i zgjedhur nga votuesi, me kusht që personi që ndihmon është votues në qendrën e njëjtë të votimit me votuesin. Personi i tillë e ndihmon vetëm një votues dhe nuk është anëtar i KVV-së ose vëzhgues i akredituar, përjashtimisht për anëtarët e ngushtë të familjes. Për këtë lloj të votimit, KQZ do t’i caktojë kriteret me rregullën zgjedhore.
Kryesuesi i Këshillit të vendvotimit obligohet që të shënojë në librin e votimit, rastet e votimit me asistencë, duke përfshirë arsyet konkrete dhe të shënojë të dhënat personale të votuesit dhe të dhënat personale të personit që ka ndihmuar.
Personi i miratuar për të ndihmuar votuesin shkruan dhe nënshkruan emrin e tij/saj në Listën e duhur të Votuesve ose Zarfin për Fletëvotim me Kusht, afër emrit ose një hapësire tjetër të ofruar nga votuesi i cili është ndihmuar dhe arsyen e votimit me kusht.
Anëtarët e KVV-së nuk mund në asnjë mënyrë të ndikojnë në vendimin e votuesit, por anëtarët e Këshillit të Vendvotimit dhe/ose stafi i Vendvotimit shpjegojnë procedurën e votimit vetëm nëse u kërkohet nga zgjedhësi
Anëtarët e KVV-së kujdesen veçanërisht për të siguruar që zgjedhësi nuk shqetësohet nga askush përderisa shënjon fletën e tij të votimit, dhe se fshehtësia e votimit është plotësisht e siguruar.
Sa i përket orarit të votimit, kjo është e rregulluar me nenin 88.
Qendrat e votimit hapen në orën 7:00 dhe mbyllen në orën 19:00.
Në këtë theksohet qartë se askush nuk mund të votojë pas kohës së mbylljes së qendrave të votimit, përveç votuesve të cilët presin në radhë në VV në kohën e mbylljes. /Telegrafi/
Një studim i publikuar nga Fondacioni Friedrich Ebert në shtator 2025 hedh dritë mbi dimensionet shqetësuese të pastrimit të parave në sektorin e pasurive të paluajtshme në Shqipëri gjatë dekadës së fundit.
Analiza e kryer nga Prof. Asoc. Dr. Adriatik Kotorri dokumenton se një pjesë e konsiderueshme e boomit të ndërtimit në vend mund të jetë financuar nga burime me origjinë të dyshimtë, shkruan faktoje.al
Sipas të dhënave të analizuara në studim, gjatë periudhës 2015-2024 në Shqipëri janë dhënë leje ndërtimi për 11.48 milionë metra katrorë me vlerë tregu mesatarisht prej 16.238 miliardë Euro. Nga kjo shumë, vetëm 7.108 miliardë Euro janë identifikuar si të financuara nga burime të ligjshme, konkretisht 5.521 miliardë Euro nga kredia bankare dhe 1.587 miliardë Euro nga investime të huaja direkte.
Diferenca prej së paku 9.13 miliardë Euro ngre pyetje serioze mbi origjinën e fondeve. Ndonëse një pjesë e kësaj diference mund të përfaqësojë sipërfaqe të pashitura ose të financuara nga kursime legjitime, studiuesi Kotorri argumenton se treguesi më shqetësues lidhet me burime të paligjshme.
Investimet e huaja
Një ndër gjetjet më të rëndësishme të studimit lidhet me rritjen dramatike të investimeve të huaja nga vende që kanë qenë ose janë aktualisht në listën gri të Task Forcës për Veprim Financiar (FATF), organizata ndërkombëtare që monitoron pastrimin e parave dhe financimin e terrorizmit.
Rasti i Turqisë është i pari. Investimet nga ky vend janë rritur nga 86 milionë Euro në 2015 në 257 milionë Euro në 2024. Turqia ka qenë pjesë e listës gri të FATF deri në qershor 2024, periudhë që përkon me intensifikimin e investimeve të saj në sektorin shqiptar të pasurive të paluajtshme.
Bullgaria paraqet rastin e dytë në aspektin e rritjes relative. Nga praktikisht zero investime në 2015, ky vend arriti në 74 milionë Euro investime në 2019 dhe vazhdoi me 28 milionë Euro investime në 2024. Bullgaria gjithashtu ka qenë pjesë e listës gri të FATF deri kohët e fundit.
Studiuesi Kotorri thekson se edhe Emiratet e Bashkuara Arabe, një tjetër juridiksion me kontroll historikisht të dobët financiar, kanë rritur investimet nga zero me një kulm prej 19 milionë eurosh në 2023.
Raporti argumenton se “këto prurje investimesh, nga vende me kontroll të dobët financiar, ngrenë pikëpyetje mbi natyrën e vërtetë të këtyre investimeve dhe rrezikun potencial që ato paraqesin për pastrimin e parave në Shqipëri”
Mekanizmat e depërtimit
Studimi identifikon disa rrugë kryesore përmes të cilave paratë e paligjshme depërtojnë në sektorin e ndërtimit, siç janë:
Themelimi i kompanive me kapacitete të dyshimta: Nga 2015 në 2023, numri i kompanive të ndërtimit u rrit me 40%, duke arritur në 6,955 kompani. Shqetësuese është se 82% e kompanive të reja kanë vetëm 1-4 të punësuar dhe nuk disponojnë kapacitete reale për të realizuar projekte ndërtimi. Sipas raportit, për periudhën 2017-2019, rreth 59% e kompanive që morën leje për objekte mbi 6 kate nuk kishin kapacitete financiare të mjaftueshme.
Depozitimi i fondeve në vende të treta: Metoda përfshin depozitimin e fondeve në banka të vendeve me kontroll të dobët (si Turqia, Bullgaria dhe EBA) dhe rikthimin e tyre në Shqipëri si “investime të huaja direkte”. Kjo skemë mundëson që paratë me origjinë të dyshimtë të fitojnë një “pamje legjitime” përmes sistemit bankar ndërkombëtar.
Pagesat cash dhe nënvlerësimi: Praktika e deklarimit të vlerave të ulëta në kontrata, ndërsa pjesa tjetër paguhet në dorë, mbetet e zakonshme. Megjithëse çmimet e referencës minimale u vendosën në 2018, diferenca mes çmimeve reale dhe atyre të deklaruara arrin deri në 100% në zonat elitare.
Depozitimi i fragmentuar: Shumat ndahen në depozitime të vogla për të shmangur alarmet automatike bankare (zakonisht nën 7,000 euro) dhe më pas përdoren për blerje pronash.
Deformimi i tregut
Një ndër gjetjet më alarmante të studimit lidhet me paradokset që ka krijuar ky fenomen në tregun shqiptar të pasurive të paluajtshme.
Paradoksi i sasisë: Gjatë periudhës 2011-2023, ndërsa popullsia ra me 478,590 banorë, numri i banesave u rrit me 74,286 njësi. Megjithatë, numri i familjeve të pastreha u rrit me 88%, nga 70,630 në 132,563 familje. Shqipëria sot ka më shumë banesa se familje, por më shumë njerëz pa strehë.
Paradoksi i çmimit: Çmimet janë rritur me 139% (nga 862 euro/m² në 2015 në 2,057 euro/m² në 2024) ndërkohë që oferta ka shënuar një rritje prej 46%. Kjo shkel logjikën bazë ekonomike ku rritja e ofertës duhet të ulë çmimet.
Ndikimi në aksesibilitetin e strehimit: Në 2015, një personi me pagë mesatare i duheshin 38 vite për të blerë një apartament në periferi. Në 2024, kjo kohë është rritur në 47 vite, një rritje prej 23%. Për një çift, koha është zgjatur nga 19 në 23 vite.
Evazioni
Studimi vlerëson se gjatë periudhës 2015-2024, korrupsioni dhe evazioni fiskal kanë gjeneruar të paktën 8.168 miliardë Euro të ardhura të paligjshme në Shqipëri. Këto shifra bazohen në të dhëna nga ALTAX, i cili shfrytëzon burime zyrtare përfshirë INSTAT, Ministrinë e Financave, SPAK, KLSH, FMN, Bankën Botërore dhe Transparency International.
Një pjesë e konsiderueshme e këtyre fondeve besohet të ketë gjetur rrugë drejt sektorit të ndërtimit. Sipas raportit të “Global Initiative Against Transnational Organized Crime”, pastrimi i vlerësuar i parave në Shqipëri vetëm për periudhën 2017-2019 arrin deri në 1.6 miliardë Euro.
Paradoksalisht, ndërsa fenomeni ka rritur të ardhurat vendore përmes taksave dhe tarifave të ndërtimit (nga 12.9 miliardë lekë në 2015 në 30.5 miliardë lekë në 2022), ai ka krijuar një varësi të rrezikshme. Pesha e taksave të lidhura me pasuritë e paluajtshme në totalin e të ardhurave vendore është rritur nga 37% në 51%.
Performanca
Një ndër kritikuat më të forta të studimit i drejtohet Agjencisë së Inteligjencës Financiare (AIF). Analiza tregon se aktiviteti i AIF ka rënë dramatikisht gjatë 5-vjeçarit të fundit:
Rastet e dërguara në organet ligjzbatuese ranë nga 1,856 (2015-2019) në 1,204 (2020-2024).
Inspektimet në vend u reduktuan nga 806 në 550.
Pasuritë e bllokuara ranë nga 71.4 milionë euro (2015-2019) në vetëm 15.8 milionë euro (2020-2024), një rënie 4.5 herë
Veçanërisht shqetësuese është vëzhgimi se aktiviteti i AIF bie në vitet zgjedhore. Me përjashtim të 2019 (kur nuk pati garë elektorale për shkak të bojkotit), në të gjitha vitet zgjedhore (2013, 2015, 2017, 2021, 2023) u shënua rënie e pasurive të bllokuara krahasuar me vitin paraardhës.
Për mosdeklarimin e shumave në kufi, një metodë kyçe e sjelljes së parasë së paligjshme nga jashtë, AIF ka dërguar vetëm 26 raste gjatë dekadës, mesatarisht 2.6 raste në vit, me një rënie të theksuar vitet e fundit.
Dimensioni ndërkombëtar dhe lista gri
Shqipëria ka qenë pjesë e listës gri të FATF për një periudhë trevjeçare, duke u klasifikuar si vend me nivel të ulët të përpjekjeve për parandalimin e pastrimit të parave.
Raporti thekson se, zhvendosja progresive e ekonomisë shqiptare drejt sektorit të pasurive të paluajtshme, e shoqëruar me tolerancë institucionale ndaj fondeve me origjinë të dyshimtë, ka krijuar një “terren të favorshëm” për operatorë që synojnë të integrojnë kapitale të paligjshme në ekonomi.
Vakuumi ligjor
Një gjetje tjetër e rëndësishme lidhet me vakuumin ligjor që karakterizon tregun shqiptar. Ndryshe nga shumica e vendeve evropiane që kanë mekanizma mbrojtës për blerësit e pronave të papërfunduara (si llogaritë Escrow ose garancitë bankare), Shqipëria ofron mbrojtje minimale.
Kontratat e “Premtimit të Shitjes” dhe “Kalimit të të Drejtave”, që dominojnë tregun, nuk kanë bazë specifike ligjore dhe mbështeten në interpretim të përgjithshëm të Kodit Civil. Studiuesi Kotorri argumenton se “kontratat me të cilat shiten pjesa dërrmuese e pasurive të paluajtshme në Shqipëri janë të pabazuara në ligj.”
Indikatorët e “Kartelit”
Raporti identifikon shenja të një tregu të kontrolluar në mënyrë joformale, me karakteristika të ngjashme me kartelet:
Mungesa e konkurrencës mes projekteve në të njëjtën zonë
Rritje e koordinuar e çmimeve në periudha të njëjta (pranverë dhe vjeshtë)
Çmim pothuajse identik për parkingun në të gjitha projektet (së paku 15,000 Euro)
Rritje uniforme e sipërfaqes së përbashkët që i shtohet pronës (nga 7-12% në 17-35%)
Konkluzioni
Raporti arrin në konkluzionin se, “pastrimi i parave në sektorin e ndërtimit funksionon si një sistem përfitimi të gjithanshëm, ku të gjithë aktorët e përfshirë, nga blerësit me fonde të dyshimta që legalizojnë kapitalin, te ndërtuesit që sigurojnë financim të shpejtë, deri te agjentët imobiliarë që marrin komisione dhe qeveria që rrit të ardhurat tatimore, përfitojnë nga ky fenomen”.
Studiuesi Kotorri argumenton se kjo strukturë krijon një rezistencë të fortë ndaj reformave: sa më të mëdha të jenë përfitimet, aq më e madhe është kundërshtia për ta luftuar fenomenin. Vakumi ligjor, mungesa e garancive për blerësit dhe roli i agjentëve imobiliarë si ndërmjetës kyç në negociatat për pagesa “cash” janë identifikuar si faktorë që lehtësojnë penetrimin e parave të paligjshme.
Analiza përfundon se ndërtuesit, përmes marrëveshjeve të tipit “kartel”, kanë arritur të diktojnë tregun në vend që të diktohet nga blerësit, duke cenuar konkurrencën dhe rritur çmimet në mënyrë artificiale.
Blerësit vendas dhe investitorët, nga ana tjetër, shfaqin atë që raporti e quan “sjellje tufe” dhe frikë se mos humbasin mundësinë (FOMO), duke blerë jo nga nevoja reale për strehim, por nga perceptimi i një tregu në rritje të vazhdueshme.
Studiuesi Kotorri konkludon se në këtë “vallëzim” mes aktorëve të ndryshëm të tregut, ku përfitojnë spekulantët, ndërtuesit dhe agjentët, e vetmja palë që humbet janë familjet dhe çiftet e reja me nevoja reale për banesë, të cilët e kanë gjithnjë e më të pamundur të sigurojnë strehim, pavarësisht ekzistencës së një stoku të madh apartamentesh të pabanuara.
Komisioni Qendror i Zgjedhjeve në mbledhjen e sotme përcolli mesazhin për qytetarët dhe stafin që do të angazhohet në ditën e zgjedhjeve të parakohshme parlamentare të 28 dhjetorit.
Në emër të KQZ-së, kryesuesi Kreshnik Radoniqi u bëri thirrje qytetarëve me të drejtë vote, që ta realizojnë të drejtën e tyre kushtetuese, raporton KosovaPress.
“Në emër të Komisionit Qendror të Zgjedhjeve, ftojmë të gjithë qytetarët me të drejtë vote që të ushtrojnë të drejtën e tyre kushtetuese dhe demokratike: të votojnë dhe të shprehin lirshëm vullnetin e tyre për të zgjedhur përfaqësuesit. Pjesëmarrja juaj është e një rëndësie të veçantë, andaj ju bëjmë thirrje të bëheni pjesë e këtij procesi”, tha Radoniqi.
Ai u bëri apel të gjithë anëtarëve të Këshillave të Vendvotimit që të përkujdesen për mbarëvajtjen e procesit zgjedhor.
“U bëjmë thirrje të gjithë anëtarëve të Këshillave të Vendvotimeve që do të jenë të angazhuar gjatë ditës së zgjedhjeve, që të veprojnë me përgjegjësi, profesionalizëm dhe paanshmëri, duke respektuar në përpikëri të gjitha procedurat ligjore dhe rregullat zgjedhore, në mënyrë që vullneti i qytetarëve të garantohet dhe të mbrohet plotësisht”, tha Radoniqi.
Radoniqi tha se Policia e Kosovës dhe Prokuroria e Shtetit do të jenë të pranishme me ekipet e tyre në të gjitha komunat e vendit, për të siguruar një proces zgjedhor të qetë, të drejtë dhe të sigurt, si dhe kujtoi se KQZ është në kontakt me KEDS-in për qëllimin e furnizimit me energji të qendrave të votimit.
Ai u bëri thirrje shtetasve të Kosovës që janë regjistruar për votim fizik në përfaqësi diplomatike, që ta shfrytëzojnë të drejtën e tyre kushtetuese, duke votuar në përfaqësinë ku janë regjistruar.
Zgjedhjet e 28 dhjetorit janë të dhjetat në historinë e pasluftës në Kosovës dhe ato mbahen pas dështimit të formimit të institucioneve të reja nga zgjedhjet e rregullat parlamentare të datës 9 shkurt.
Lista votuese e zgjedhjeve të parakohshme është certifikuar nga KQZ më 10 dhjetor 2025. Sipas të dhënave nga kjo listë, numri i shtetasve të Kosovës me të drejtë vote është 2,076,290.
Numri i qytetarëve me të drejtë vote në vendvotime në Kosovë është 1,999,204, ndërkaq numri i qytetarëve që janë regjistruar për të votuar jashtë Kosovës është 77,086. Kjo listë përmban 7,192 votues më shumë se në zgjedhjet lokale më 12 tetor 2025.
Procesi zgjedhor brenda vendit do të zhvillohet në 948 qendra të votimit, me gjithsej 2,614 vendvotime, prej të cilave 910 qendra me 2,557 vendvotime për votimin e rregullt dhe 38 qendra, nga një për çdo komunë, me 57 vendvotime për të mundësuar votimin me kusht.
Në zgjedhjet e parakohshme më 28 dhjetor marrin pjesë 24 subjekte politike me 1,180 kandidatë për deputetë.
Posta e Kosovës ka njoftuar qytetarët se persona të panjohur po dërgojnë mesazhe në telefon, duke u paraqitur në mënyrë të rreme në emër të Postës së Kosovës.
Posta me këtë rast u bën apel qytetarëve që të mos bien pre e këtij mashtrimi.
“Persona të panjohur po dërgojnë mesazhe SMS qytetarëve, duke u paraqitur në mënyrë të rreme në emër të Postës së Kosovës. Menjëherë pas identifikimit të këtij rasti, Posta e Kosovës ka njoftuar organet kompetente dhe është duke bashkëpunuar ngushtë me to për adresimin e kësaj çështjeje”, thuhet në njoftim.
“U bëjmë thirrje qytetarëve që të mos klikojnë asnjë lidhje (link) të dërguar përmes këtyre mesazheve mashtruese dhe të mos bashkëpunojnë me numra apo kontakte që nuk janë zyrtare. Në asnjë rrethanë, Posta e Kosovës nuk kërkon të dhëna personale apo informacione bankare përmes SMS-ve apo kanaleve jozyrtare.
Raste të ngjashme janë evidentuar edhe në administrata postare të vendeve të tjera të rajonit”, thuhet në njoftim. /Telegrafi/
Nënkryetari i Partisë Demokratike të Kosovës dhe i dyti në listën zgjedhore të kësaj partie për zgjedhjet e 28 dhjetorit, Uran Ismaili, ka mbajtur një takim me qytetarët e Kodrës së Trimave, Arbërisë dhe Tophanës, ku ka prezantuar pikat kryesore të programit të PDK-së për zhvillim ekonomik dhe mirëqenie.
Në fjalën e tij, Ismaili theksoi rëndësinë e zgjedhjeve të 28 dhjetorit, duke i cilësuar ato si një moment vendimtar për drejtimin e ardhshëm të Kosovës. “28 dhjetori është një datë ku e kemi mundësinë të kemi një kahje të re dhe një shtytje përpara për Kosovën”, tha Ismaili.
Ai foli edhe për klimën e përçarjes politike, duke theksuar se kjo ka ndikuar drejtpërdrejt edhe në raportet shoqërore dhe familjare. “Përçarja ka hyrë edhe në familjet tona, mes vëllezërve, motrave dhe fqinjëve, si rezultat i një politike që ka investuar në ndarje”, u shpreh ai.
Sipas Ismailit, pikërisht për këtë arsye PDK ka zgjedhur sloganin “Bashkë”, si reflektim i nevojës për unitet dhe bashkëpunim. “Nuk është rastësi që kemi dalë me sloganin ‘Bashkë’. Kosova ka nevojë për bashkim dhe për angazhim të përbashkët për të ecur përpara”, theksoi ai.
Duke folur për programin qeverisës të kandidatit për kryeministër Bedri Hamza, Ismaili u shpreh i bindur se ky program do të sjellë përmirësim konkret në jetën e çdo familjeje.
“Nuk ka familje që nuk do të jetojë më mirë me qeverinë e Bedri Hamzës”, tha Ismaili.
Ai shtoi se programi i PDK-së parasheh masa konkrete për uljen e kostos së jetesës, përfshirë fatura më të përballueshme të energjisë elektrike, ulje të tatimit në paga për sektorin publik dhe privat, si dhe politika që synojnë rritjen e mirëqenies për të gjithë qytetarët.
Një 27-vjeçar ka humbur jetën aksidentalisht në Shkodër pasi ka rënë në kontakt me rrymën elektrike.
Policia tha se ngjarja ndodhi rreth mesditës në qytetin e Koplikut, ku shtetasi E. K., 27 vjeç, dyshohet se duke punuar në një magazinë për të vendosur disa panele diellore, ka rënë në kontakt me energjinë elektrike dhe si pasojë, ka humbur jetën.
Grupi hetimor po punon për sqarimin e rrethanave të ngjarjes, raporton euronews.al
Juventusi po përgatitet për merkaton e janarit me një qasje të kujdesshme, duke synuar përforcime thelbësore pa shpenzime të tepruara. Klubi nuk ka ndërmend të bëjë lëvizje të improvizuara, por vetëm blerje që sjellin siguri dhe ndikim vendimtar. Nëse nuk gjenden lojtarë të tillë, atëherë nuk do të ketë blerje. Lista e dëshirave është e gjatë, me Sandro Tonalin si ëndrrën kryesore.
Shtetet e Bashkuara kanë kryer sulme ajrore kundër militantëve të Shtetit Islamik në Nigeri, një veprim i shpallur nga ish-presidenti Donald Trump. Komanda Amerikane për Afrikën (AFRICOM) konfirmoi se sulmet u kryen në koordinim me autoritetet nigeriane në shtetin Sokoto, duke eliminuar disa objektiva. Trump, përmes platformës së tij Truth Social, deklaroi se si Komandant i Përgjithshëm…
Gjykata Themelore në Prishtinë ka shpallur aktgjykim dënues ndaj të akuzuarit për krime lufte, Slagjan Trajkoviq, duke e dënuar me 10 vjet burim.
Aktgjykimi u shpall të premten nga kryetari i trupit gjykues, Ngadhnjim Arrni dhe anëtarët Arben Hoti dhe Donikë Shala-Abdyli, raporton “Betimi për Drejtësi“.
Gjykatësi Arrni tha se Trajkoviq është fajtor për pikën C të aktakuzës dhe të njëjtin Gjykata e gjykon me dënim me 10 vjet burgim.
Në dënimin me burgim, të akuzuarit do t’i llogaritet edhe koha e kaluar në paraburgim. Kjo masë, atij i vazhdohet me aktvendim të veçantë.
Trajkoviq obligohet t’i paguajë edhe shpenzimet e procedurës dhe atë 200 euro për paushallin gjyqësor dhe 100 euro për fondin për kompensimin e viktimave të krimit.
Palët e dëmtuara për realizimin e kërkesës pasurore-juridike udhëzohen në kontest civil.
Sa i përket pikës A, B dhe D të aktakuzës, gjykatësi Arrni tha se nuk është vërtetuar se i akuzuari ka kryer ato veprime inkriminuese për të cilat e ngarkon aktakuza.
Kundër këtij vendimi, palët e pakënaqura kanë të drejtë ankese në afat prej 30 ditësh, në Gjykatën e Apelit.
Qeveria në detyrë ka prezantuar të premten Bursën e Mobilitetit për studentët përfitues.
Kryeministri në detyrë, Albin Kurti, para studentëve tha se përmes kësaj burse mbulohet kosto e udhëtimit për studentët, derisa shtoi se e njëjta paraqet një vizion më të gjerë, ku arsimi është i qasshëm, i drejtë dhe i barabartë për të gjithë.
Ai nënvizoi se investimi në arsim është investim në të ardhmen e Kosovës.
“Nuk jemi duke folur vetëm për një skemë mbështetëse financiare, por edhe për një vizion më të gjerë, atë për një Republikë ku arsimi është i qasshëm, i drejtë dhe i barabartë për të gjithë. Me Bursën e Mobilitetit për studentët, qeveria jonë po adreson një sfidë reale me të cilën janë përballur shumë studentë ndër vite, e kjo është kostoja e udhëtimit drejt universitetit. Kjo skemë është e bazuar në nevojën dhe e dizajnuar mbi parimin e drejtësisë sociale. Ne besojmë që distanca gjeografike dhe gjendja ekonomike nuk duhet të jenë pengesë për arsimin cilësor. Investimi në arsim është investim në të ardhmen e Kosovës”, tha ai, raporton kp.
Kurti shtoi se gjatë mandatit qeverisës janë ndarë afër 18 mijë bursa me një buxhet përreth 20 milionë euro për studentët, derisa u zotua se të njëjtat do të dyfishohen.
“Gjatë këtij mandati qeverisës i kemi ndarë afër 18 mijë bursa me një buxhet të gjithmbarshëm prej 20 milionë eurove. Në vijim do të dyfishojmë buxhetin për bursa. Nuk ka kategori shoqërore e cila mund të tregojë se kah po shkon zhvillimi socioekonomik dhe kulturor mbi vendin, sikurse ajo e studentëve të universitetit”, theksoi Kurti.
Qeveria në detyrë gjatë këtij viti ka ndarë nga 100 euro për secilin student, derisa ditë më parë ndau mbi 1 milion euro për Bursën e Mobilitetit për studentë.
Policia e Kosovës ka njoftuar për një rast të sulmit ndaj personit zyrtar.
Rasti ka ndodhur në rrugën “Nëna Terezë” në Gjilan, të enjten në ora 10:15.
“Është arrestuar i dyshuari mashkull kosovar, pasi që në shenjë revolte për shqiptimin e një tikete për kundërvajtje në trafik, ka ofenduar edhe sulmuar zyrtarët policorë”, thuhet në raport.
Me vendim të prokurorit i dyshuari është liruar dhe rasti shkon në procedurë të rregullt. /Telegrafi/
Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit I.K., për shkak të dyshimit të bazuar mirë se i njëjti ka kryer veprën penale “Keqpërdorimi i pozitës apo autoritetit zyrtar”.
Sipas aktakuzës, më 16 korrik 2025, rreth orës 19:17 min, në Pikën Kufitare në Vërmicë, i pandehuri I.K., në cilësinë e personit zyrtar, si zyrtar i Doganës së Kosovës, ka tejkaluar kompetencat e tij duke shkelur procedurat standarde të operimit të Doganës së Kosovës.
“I njëjti, duke mos zbatuar detyrimet ligjore për kontroll të automjeteve, personave dhe mallrave, ka lejuar kalimin pa kontroll të një automjeti komercial të tipit ‘Mercedes Sprinter’, të cilin e drejtonte A.K., të cilin e ka regjistruar në sistem si të zbrazët”, thuhet në njoftim.
I njëjti dyshohet se pas kalimit të pikës kufitare, automjeti është ndaluar nga njësia për antikontrabandë dhe gjatë kontrollit është konstatuar se ishte i ngarkuar me mallra komerciale në vlerë prej 11,457.60 euro.
Pas kryerjes së ekspertizës financiare, ka rezultuar se i njëjti, buxhetit të Republikës së Kosovës i ka shkaktuar dëm material në shumë prej 3,414.36 €.
Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartcekur për veprën penale për të cilën akuzohet të shpallet fajtor dhe të dënohet sipas ligjit, po ashtu përveç dënimit kryesor t’i shqiptohet dënimi plotësues ndalimi i ushtrimit të funksioneve në administratën publike ose shërbimin publik. /Telegrafi/
Login
