Pas ditës së vështirë të djeshme ku disa zona në Rahovec, përfshirë Fortesën dhe Ratkocin, u prekën nga reshjet e mëdha dhe përmbytjet e mundshme, situata sot është më e qetë.

Kështu tha për Telegrafin Smajl Latifi, kryetari i Rahovecit.

“Situata është me qetë se dje, po kujdesemi për pasojat që janë në infrastrukturë rrugore, dhe po kujdesemi edhe për ata që po kërkojnë ndihmë. Jemi aktiv si shtab emergjent, por shpresojmë që nuk do të ketë reshje më,” tha Latifi.

Ai bëri të ditur se në Fortesë dhe Ratkoc, zona që dje u vunë më shumë nën rrezik, nuk ka pasur evakuime, ndërsa në Çifllakë ka pasur nevojë për ndërhyrje për dy gra të moshuara, por situata është tejkaluar.

“Në Ratkoc dhe Fortesë nuk ka pasur evakuime, në Çifllakë ka pas dy gra të moshuara, por e kemi tejkaluar atë situatë dhe gjithçka është në rregull tash,” shtoi kryetari Latifi.

Shtabi emergjent i Rahovecit vazhdon monitorimin e zonave të përfshira dhe po ndërmerr të gjitha masat për parandalimin e dëmeve të mëtejshme, ndërsa qytetarët mbeten të paralajmëruar për reshje të mundshme. /Telegrafi/

Qytetarë të shumtë në Kosovë po ndeshen me mesazhe mashtruese që pretendojnë se janë nga Autoritetet e Trafikut dhe kërkojnë pagesë për “gjoba trafiku”.

Ndër rastet e fundit, ish-deputetja Blerta Deliu dhe analisti Shenoll Muharremi kanë raportuar se kanë marrë mesazhe të tilla, duke treguar se fenomeni po prek qytetarë nga të gjitha shtresat.

“Sot në mëngjes u përballa me një mesazh të rremë për një ‘gjobë’. Këto mashtrime po prekin gjithnjë e më shumë qytetarë. I bëj thirrje të gjithëve të raportojnë rastet, ndërsa Policia e Kosovës duhet ta trajtojë këtë çështje me prioritet”, ka shkruar Deliu-Kodra.

Muharremi ka kërkuar angazhim më të madh të policisë kibernetike.

“Më erdhi një SMS për të paguar ‘gjobë’. Nuk dija a jam në Kosovë apo në Estoni me polici kaq digjitale. Këta kriminelë nuk di a janë më shumë hajna apo komedianë. Na duhet një polici kibernetike e fortë dhe institucione proaktive të sundimit të ligjit që dinë të adaptohen me kohë ndaj krimeve digjitale”, u shpreh Muharremi.

Në kontekstin e rritjes së këtyre mashtrimeve, Policia e Kosovës ka publikuar sërish një njoftim për qytetarët, duke paralajmëruar për kujdes maksimal. /Telegrafi/

Kompania Rajonale e Ujësjellësit “Mitrovica” ka njoftuar se furnizimi me ujë të pijes vazhdon të mbetet i ndërprerë, si pasojë e nivelit të lartë të turbullshmërisë në kanalin Ibër–Lepenc, i cili është mbi kufijtë e lejuar për trajtim të sigurt.

Sipas njoftimit zyrtar, për shkak të këtyre parametrave të papërshtatshëm, impiantet për trajtimin e ujit të pijes nuk janë në gjendje të operojnë normalisht.

“Ju njoftojmë se niveli i turbullshmërisë në kanalin Ibër–Lepenc vazhdon të jetë mbi kufijtë e lejuar për trajtim të sigurt të ujit, për çka Impiantet për Trajtimin e Ujit të Pijes nuk mund të operojnë. Edhe pse gjatë orëve të mbrëmjes është vërejtur një rënie e përkohshme e turbullshmërisë dhe janë bërë përpjekje për rifillimin e trajtimit të ujit, situata ka ndryshuar sërish dhe niveli i turbullshmërisë ka shënuar rritje, duke e bërë të pamundur vazhdimin e procesit të trajtimit dhe shpërndarjes së ujit për konsum. Si pasojë, furnizimi me ujë të pijes mbetet i ndërprerë, ndërsa uji që eventualisht mund të arrijë në rrjet NUK duhet të përdoret për pije, por vetëm për qëllime higjienike dhe teknike, deri në një njoftim të radhës”, njofton Kompania Rajonale Ujësjellësi “Mitrovica”

Më tej kanë njoftuar se “Ekipet tona janë në monitorim të vazhdueshëm të gjendjes dhe parametrave të ujit, dhe rifillimi i trajtimit do të bëhet menjëherë sapo kushtet teknike ta lejojnë këtë. Për çdo risi, ndryshim apo zhvillim të mëtejmë të situatës, konsumatorët do të informohen në kohë reale, përmes kanaleve tona zyrtare të komunikimit”. /Telegrafi/

Pas rezultatit të zgjedhjeve të 28 dhjetorit, që e nxori Lidhjen Demokratike të Kosovës në vendin e tretë me rënie të dukshme të votave, disa anëtarë të partisë kanë shprehur pakënaqësi për organizimin e brendshëm.

Shqipe Pantina, anëtare e LDK-së, ka kritikuar drejtimin e partisë, duke theksuar se fokusi ekskluziv në opozitë ndaj Qeverisë Kurti ka lënë pas dore ofrimin e një alternative konkrete për qytetarët.

“Pse ekziston një parti politike? A është vetëm për të bërë opozitë apo për të përfaqësuar vlera dhe parime? Kjo është huqja e LDK-së. U fokusuan shumë në opozitë dhe harruan vlerat që përfaqësojnë. Një qytetar që nuk është pjesë e asnjë partie dëshiron të dijë se çfarë i ofron alternativa jonë,” tha Pantina, duke kritikuar gjithashtu mungesën e vizitave të drejtuesve të partisë në nëndegë.

Pantina gjithashtu ka vënë në pikëpyetje reformën e nisur nga kryetari Lumir Abdixhiku, duke theksuar se largimi i strukturave të vjetra dhe pozicionimi i individëve pa përvojë politike ka krijuar rezistencë brenda partisë.

“Reforma është lënë në gjysmë. Nuk mund të bësh ndryshime duke eliminuar strukturat ekzistuese dhe duke i dhënë hapësirë dikujt që nuk njeh LDK-në,” tha ajo në Debat Plus në RTV Dukagjini.

Komentet e Pantinës shkaktuan reagime brenda partisë.

Kandidati për deputet Sokol Havolli e sulmoi atë, duke e akuzuar për “goditje pas shpine” ndaj LDK-së.

“Çka të duhen kundërshtarë jashtë kur disa janë brenda? Shqipe Pantina pas çdo dështimi politik personal ia dha edhe një goditje LDK-së,” shkroi Havolli.

Sipas rezultateve të deritanishme, ndërsa vazhdon numërimi i votave me postë, Lidhja Demokratike e Kosovës pritet të ketë 14 deputetë në Kuvend. /Telegrafi/

Kompania e Ujësjellësit KRU "Prishtina" njofton qytetarët se për shkak të turbullirave të larta në kanalin Ibër-Lepenc, si pasojë e reshjeve të dendura, stacioni ITU Shkabaj është jashtë funksionit.

Si rezultat, priten reduktime në furnizimin me ujë nga ora 10:30 deri në 17:00 në Fushë Kosovë, Obiliq dhe një pjesë e lagjes Kalabria – Prishtinë, dhe Drenasi.

KRU "Prishtina" njofton se zonat e prekura do të furnizohen me ujë nga ora 17:00 deri në 22:00, ndërsa ndikime mund të ketë edhe në zona të tjera të kryeqytetit.

Ekipet e kompanisë janë në terren dhe po monitorojnë situatën, ndërsa furnizimi do të rikthehet sapo të stabilizohen parametrat.

Gjatë orarit të reduktimeve, qytetarëve u rekomandohet të përdorin autobotet, të cilat do të jenë në dispozicion sipas orarit të përcaktuar nga kompania./Telegrafi/

Njësitë e Komunikacionit Rrugor në Ferizaj kanë ndërmarrë masa ndaj një personi për disa kundërvajtje në trafik, pas një ngjarjeje më 5 janar.

Sipas Policisë, E.A. (17 vjeç), duke drejtuar një automjet VW Golf me targa vendore, nuk është ndalur në shenjën “STOP” të dhënë nga policia në rrugën “Rexhep Bislimi”.

Më pas, në rrugën magjistrale në fshatin Bibaj ai ka shkaktuar një aksident trafiku me dëme materiale, duke u përplasur me një automjet tjetër.

Gjatë verifikimit të dokumentacionit, policia konstatoi se i riu nuk posedonte patentë shoferi, ndërsa automjeti ishte i paregjistruar, me afat regjistrimi të skaduar që nga 13 tetor 2024.

Për kundërvajtjet e konstatuara, janë shqiptuar këto masa: 150 euro gjobë për mosndalje në shenjën “STOP” të policisë, 250 euro gjobë për shkaktim të aksidenti, 200 euro gjobë për drejtim të automjetit me afat të skaduar të regjistrimit si dhe është inicuar rast për gjykatë për drejtim të automjetit pa patentë, ndërsa automjeti është konfiskuar përkohësisht.

Policia Rajonale e Ferizajt apelon tek qytetarët që të respektojnë rregullat e trafikut dhe të mos drejtojnë automjete pa patentë, për të rritur sigurinë në komunikacion. /Telegrafi/

Komuna e Malishevës vazhdon të mbetet në gjendje emergjente si pasojë e vërshimeve të shkaktuara të martën, edhe pse situata aktuale në terren është e qetë dhe niveli i ujërave ka shënuar rënie.

Zëdhënësi i Komunës së Malishevës, Artan Paçarizi, ka deklaruar për Telegrafin se aktualisht vetëm një hyrje-dalje e qytetit po paraqet vështirësi në qarkullim.

“Gjendja është e qetë. Ka rënë niveli i ujërave. Aktualisht vetëm një hyrje-dalje e qytetit ka vështirësi në qarkullim, por jemi duke punuar me makineri të rëndë për hapjen e kanaleve kulluese. Bëhet fjalë për rrugën Malishevë–Banjë”, ka thënë Paçarizi.

Ai ka shtuar se pavarësisht përmirësimit të situatës, komuna do të vazhdojë të mbetet në gjendje emergjente, për shkak të dëmeve të shkaktuara dhe rrezikut nga reshjet e reja.

“Gjendje emergjente nga fatkeqësitë natyrore po. Pasi edhe pjesa e sanimit të dëmeve, por edhe mundësia e rifillimit të reshjeve, na bën të mbetemi në këtë gjendje emergjente”, theksoi ai.

Kujtojmë se Komuna e Malishevës dje ka shpallur gjendje të jashtëzakonshme, pas reshjeve të dendura të shiut që shkaktuan vërshime dhe dëme në disa zona.

Autoritetet komunale po vazhdojnë monitorimin e situatës dhe intervenimet në terren për të parandaluar përkeqësimin e gjendjes. /Telegrafi/

Ministria e Kulturës, Rinisë dhe Sportit ka publikuar Strategjinë për Ekonominë Kreative të Kosovës 2026–2035 në platformën për konsultime me publikun.

Kosova bëhet vendi i parë në Ballkanin Perëndimor që harton një strategji të dedikuar posaçërisht për ekonominë dhe industritë kreative.

"Strategjia synon të shfrytëzojë potencialin e plotë të sektorëve kreativë, të fuqizojë talentin, të mbështesë sipërmarrjen dhe të forcojë lidhjen ndërmjet kulturës, inovacionit dhe zhvillimit ekonomik", thuhet në njoftim.

Ministria thekson se konsultimi publik është thelbësor për të siguruar që strategjia të reflektojë nevojat reale dhe të formësohet bashkërisht nga institucionet, sektori privat, shoqëria civile dhe profesionistët kreativë.

Konsultimi publik është i hapur deri më 20 janar 2026, dhe qytetarët mund të regjistrohen dhe të adresojnë komentet e tyre përmes këtij linku: rb.gy/4l1vfm /Telegrafi/

Presidentja e Republikës së Kosovës, Vjosa Osmani, ka uruar të gjithë qytetarët e besimit ortodoks me rastin e Krishtlindjes ortodokse, duke dëshiruar që kjo festë të jetë burim paqeje, harmonie dhe dashurie në çdo familje.

“Për të gjithë qytetarët e besimit ortodoks qoftë kjo festë një burim paqeje, harmonie dhe dashurie në çdo familje, duke afruar zemrat, forcuar mirëkuptimin dhe sjellë shpresë për ditë më të mira.

Uroj shëndet dhe begati për secilën shtëpi! Gëzuar për shumë mot Krishtlindjen ortodokse!”, thuhet në urimin e Osmanit në Facebook. /Telegrafi/

Policia e Kosovës ka njoftuar sërish qytetarët për fushatën mashtruese që po qarkullon përmes mesazheve SMS, të cilat në mënyrë të rreme pretendojnë se janë dërguar nga Autoritetet e Trafikut të Kosovës.

Sipas Policisë, këto mesazhe përmbajnë linqe mashtruese që synojnë të mashtrojnë qytetarët.

Autoritetet theksojnë se nuk kanë dërguar mesazhe të tilla dhe bëjnë thirrje që qytetarët të jenë të kujdesshëm.

“Të mos klikojnë në asnjë link të dyshimtë; të mos japin të dhëna personale apo të kartelave bankare; të mos kryejnë pagesa përmes këtyre linqeve; dhe të fshijnë menjëherë mesazhet mashtruese”, njofton policia.

Policia gjithashtu u rekomandon qytetarëve që nëse kanë kryer ndonjë pagesë përmes këtyre linqeve, menjëherë ta raportojnë rastin në bankën ku janë klientë dhe të kërkojnë anulimin e pagesës dhe të denoncojnë rastin në stacionin policor më të afërt.

Policia e Kosovës ka theksuar se mbetet “e përkushtuar në parandalimin dhe luftimin e mashtrimeve” dhe ka ftuar qytetarët për bashkëpunim dhe vigjilencë të shtuar. /Telegrafi/

Komisioni Qendror i Zgjedhjeve (KQZ), po vazhdon sot procesin e numërimit të pjesës së tjetër të votave të ardhura me postë për zgjedhjet e parakohshme për Kuvendin e Republikës së Kosovës 2025.

Sipas të dhënave preliminare të publikuara nga KQZ, deri tani janë numëruar 99 nga gjithsej 114 pako me vota nga diaspora, që përbëjnë rreth 86.84 për qind të totalit të votave me postë.

Rezultatet e deritanishme tregojnë një epërsi të thellë të Lëvizjes Vetëvendosje e cila ka siguruar 72.97 për qind të votave, përkatësisht 21,103 vota.

Në vendin e dytë renditet Lidhja Demokratike e Kosovës (LDK) me 9.86 për qind ose 2,852 vota, e ndjekur nga Partia Demokratike e Kosovës (PDK) me 9.33 për qind, që përkthehen në 2,699 vota.

Aleanca për Ardhmërinë e Kosovës (AAK) ka marrë 3.82 për qind të votave, ndërsa partitë më të vogla, si Partia Liberale Egjiptiane dhe Nova Demokratska Stranka, kanë siguruar nën një për qind secila.

Nga KQZ është bërë e ditur se procesi i numërimit po zhvillohet në QNR sipas planifikimit.

Zyrtarët kanë theksuar se rezultatet përfundimtare do të publikohen vetëm pas përfundimit të numërimit të të gjitha votave dhe trajtimit të ankesave eventuale. /Telegrafi/

Kryeministri Edi Rama komentoi të mërkurën mbi situatën e përmbytjeve që kanë prekur vendin, duke bërë një krahasim me vendet e tjera të rajonit.

Në një postim në rrjetet sociale, Rama shkruan: “Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf.”

Kjo deklaratë vjen ndërsa Shqipëria përballet me reshje intensive dhe përmbytje në disa zona, duke shkaktuar shqetësim për banorët dhe infrastrukturën lokale./euronews/

Një rast vdekjeje në rrethana të dyshimta është regjistruar më 6 janar në fshatin Joviq të Malishevës.

Një burrë është gjetur pa shenja jete dhe është dërguar në Qendrën Kryesore të Mjekësisë Familjare (QKMF) në Malishevë.

Policia njofton se vdekjen e viktimës e ka konstatuar mjeku kujdestar, ndërsa me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion.

Ndërkaq sipas mediave vendore raportohet se viktima është Q.K 49 vjeçar.

Hetimet për shkaqet e vdekjes janë duke u zhvilluar. /Telegrafi/

Kryeministri në detyrë, Albin Kurti ka uruar qytetarët e komunitetit serb dhe besimit ortodoks për festën e Krishtlindjes, e cila këtë vit kremtohet sipas kalendarit julian.

Në mesazhin e tij, Kurti i ka uruar festë të gëzuar gjithë besimtarëve, duke dëshiruar që kjo ditë e shenjtë t’u sjellë dashuri, mbarësi dhe begati në familjet e tyre.

“Festofshi në harmoni, mirëkuptim dhe respekt për njëri-tjetrin. Le të na bashkojë e mira, dhe të na udhëheqë vullneti për solidaritet dhe punë për më shumë mirëqenie”, ka theksuar Kurti.

Ai gjithashtu uroj që Krishtlindja të gjejë gjithë qytetarët pranë familjeve të tyre, në shëndet dhe gëzim. /Telegrafi/

Sipas Institutit Hidrometeorologjik të Kosovës (IHMK), gjatë periudhës nga 5 deri më 6 janar 2026, në territorin e Kosovës është regjistruar një sasi mesatare reshjesh prej 43 mm.

Në bazë të të dhënave sipas pellgjeve lumore, reshjet kanë qenë më të mëdha në: Drini Bardhë me 76.2 mm, Lepenci me 47.9 mm, Ibri me 27.8 mm dhe Morava e Binçës me 19.9 mm.

Si pasojë e këtyre reshjeve intensive, shumica e lumenjve në Kosovë, veçanërisht në pjesën perëndimore dhe qendrore, kanë pësuar ngritje të ndjeshme të niveleve, duke dalë në disa segmente nga shtrati dhe shkaktuar përmbytje lokale.

Situata më e vështirësuar paraqitet në lumenjtë: Drini Bardhë, Ereniku, Bistrica e Deçanit, Toplluha, Klina, Mirusha, Lumi Drenica dhe Lumi i Istogut, sidomos në degët e tyre malore.

Lumenjtë në lindje dhe jug të vendit, si Ibri, Sitnica, Morava e Binçës, Lepenci dhe Nerodimja, kanë pasur ngritje të lehtë të niveleve dhe aktualisht nuk paraqesin problem.

IHMK paralajmëron se reshjet do të vazhdojnë gjatë natës dhe ditës së nesërme, që do të vështirësojë edhe më shumë situatën e krijuar.

Banorët dhe autoritetet lokale kërkohen të jenë vigjilentë dhe të marrin masat e nevojshme për parandalimin e dëmeve nga vërshimet. /Telegrafi/

Rezultatet e përmbledhura preliminare të zgjedhjeve të 28 dhjetorit, tregojnë një epërsi të qartë të Lëvizjes Vetëvendosje, por me një ndarje mandatesh që mbetet ende e brishtë dhe e hapur për ndryshime pas numërimit të votave të mbetura me postë.

Sipas të dhënave të publikuara nga KQZ, me 99.47 për qind të vendvotimeve të numëruara, LVV prin me 50.72 për qind të votave, që përkthehet në 57 mandate.

Pas saj renditet PDK me 20.40 për qind dhe 23 mandate, ndërsa LDK ka 13.29 për qind dhe 14 mandate. AAK ka siguruar 6 mandate, ndërsa Lista Serbe 9 mandate.

Duhet theksuar se nga numërimi i votave me kusht, PDK rikthej ulësen e 23-të, kurse LDK e humbi një.

Megjithatë, sipas Eugen Cakollit nga KDI, ndarja aktuale e mandateve është ndikuar ndjeshëm nga votat me kusht, ku PDK ka performuar dukshëm më mirë se LDK, me pothuajse dyfish më shumë vota, ndërsa LVV ka qenë pak mbi përqindjen e saj në votimin e rregullt.

Cakolli thekson se dallimi mes koeficientëve më të ndjeshëm për ndarjen e mandateve – LVV (57), PDK (23) dhe LDK (15) është vetëm rreth 10 pikë, që në terma praktikë përkthehet në vetëm disa qindra vota diferencë në nivel kombëtar, të cilat kanë qenë vendimtare për ndarjen aktuale.

PDK rikthen ulësen e 23‑të, LDK bie në 14 deputetë pas numërimit të fundit të votave

“Me rreth 14 mijë vota me postë ende për t’u numëruar, mandati i fundit i të trija këtyre partive mbetet ende në lojë”, ka shkruar Cakolli.

Sipas tij, gjasat më reale për ndryshim janë në raportin PDK–LDK, veçanërisht nëse vazhdon trendi aktual i votave me postë, çka mund t’ia rikthejë LDK-së mandatin e 15-të, duke e zbritur PDK-në në 22 mandate sërish.

Cakolli shton se LVV e ka të vështirë të arrijë mandatin e 58-të, përveç nëse shënon një performancë dukshëm më të lartë në votat me postë, rreth ose mbi 80 për qind, krahasuar me rreth 72 për qind sa ka pasur deri më tani.

Numërimi i votave me postë pritet të jetë vendimtar për finalizimin e përbërjes së re të Kuvendit të Kosovës. /Telegrafi/

Lumi Vjosa ka dalë nga shtrati në zonën e pazarit, pranë Ura e Mifolit, si pasojë e prurjeve të larta të ujit. Sipas të dhënave të fundit, niveli i Vjosës ka arritur në 6.8 metra mbi nivelin e detit.

Autoritetet kanë njoftuar të gjitha familjet që jetojnë pranë lumit të marrin masa paraprake dhe të jenë të vëmendshme ndaj çdo rreziku të mundshëm.

Ndërkohë, prurjet vijojnë të mbeten të larta nga zonat e Gjirokastrës dhe Përmetit, çka po ndikon drejtpërdrejt në rritjen e mëtejshme të nivelit të lumit.

Situata po monitorohet në mënyrë të vazhdueshme, ndërsa u bëhet thirrje banorëve të respektojnë udhëzimet e strukturave të emergjencës./euronews/

Policia e Kosovës ka njoftuar se një burrë, shtetas i huaj ka ndërruar jetë në Qendrën Klinike Universitare të Kosovës (QKUK).

Rasti ka ndodhur të mërkurën rreth orës 06:00 të mëngjesit.

Vdekja e tij u konstatua nga ekipi mjekësor, ndërsa me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion.

Hetimet për shkaqet e vdekjes janë në zhvillim. /Telegrafi/

Komisioni Qendror i Zgjedhjeve (KQZ) ka bërë të ditur se gjatë ditës së sotme do të vazhdojë numërimi i pjesës tjetër të fletëvotimeve që i takojnë votimit jashtë Kosovës, respektivisht votimit përmes postës.

Zëdhënësi i KQZ-së, Valmir Elezi, ka njoftuar se bëhet fjalë për fletëvotimet e tërhequra më 2 dhe 5 janar 2026 nga kutitë postare jashtë Kosovës, të cilat tashmë janë sjellë në Qendrën e Numërimit dhe Rezultateve (QNR).

Sipas njoftimit të KQZ-së, më 2 janar janë tërhequr gjithsej 8,180 pako me fletëvotime nga kutitë postare në Pragë, Londër, Paris, Zagreb, Stokholm, Stamboll, New York, Kanbera dhe Kopenhagë.

Ndërkaq, më 5 janar janë tërhequr edhe 11,867 pako të tjera nga 13 kuti postare në qytete të ndryshme, përfshirë Tiranën, Berlinin, Vjenën, Bernën, Brukselin, Hagën, Podgoricën, Oslon, Shkupin, Otavën, Ljublanën, Romën dhe Prishtinën.

Numërimi i këtyre fletëvotimeve po zhvillohet në QNR dhe përfshin pjesën e dytë të votave të ardhura përmes postës nga diaspora.

KQZ ka theksuar se procesi do të vazhdojë gjatë ditës së sotme, deri në përfundimin e numërimit të këtyre pakove. /Telegrafi/

Situata e motit të keq dhe reshjet e dendura të shiut kanë shkaktuar probleme serioze në disa rajone të vendit, përfshirë përmbytje nga përroi i Ficos që ka dalë nga shtrati dhe ka mbuluar rrugë e zona të banuara në Gjirokastër.

Në këto kushte, ministri i Mbrojtjes, Pirro Vengu ka shprehur sot mirënjohje për punën e repartit të emergjencës së Gërhotit dhe ekipeve të tjerë të angazhuar në terren për të përballuar situatën e vështirë.

Ai thekson se deri në orët e vona të mbrëmjes së kaluar, “djemtë e Repartit të Gërhotit kanë luftuar me prurjet e vrullshme të reshjeve në Gjirokastër dhe kanë kontribuar në mbështetjen e operacioneve të shpëtimit dhe menaxhimit të ujit.

Në terren po punojnë mbi 100 efektivë, dhjetëra mjete dhe pompa me kapacitet të lartë, të vendosura jo vetëm në Gjirokastër, por edhe në Lezhë, Durrës, Gjirokastër dhe zonat fqinje, ku reshjet kanë shkaktuar vërshime dhe probleme me infrastrukturën rrugore.

Sipas Vengut, ky mobilizim synon të “garantojë sigurinë e banorëve dhe përballimin e çdo situate”, ndërsa ekipet përgatiten edhe për ditët në vijim.

Situata e motit ka qenë alarmante në shumë qarqe të vendit, ku reshjet intensive të shiut janë raportuar të përmbytura rrugë dhe zona të banimit, ndërsa emergjencat civile janë angazhuar për ndërhyrje dhe koordinim të masave të sigurisë për qytetarët në zonat më të prekura. /Telegrafi/