Shtetet e Bashkuara, Meksika dhe Kanadaja, do të mirëpresin Kupën e Botës pas disa muajsh. Situata nuk është aspak e mirë, pasi arrestimi i presidentit venezuelian Maduro nga SHBA ka sjellë një klimë të papërshtatshme.

Të rejat e fundit kanë ndezur kambanat e alarmit brenda FIFA-s në lidhje me vendin që do mbajë Meksika në Kupës e Botës.

Një detaj tjetër që duhet marrë në konsideratë janë fjalët e Presidentit të SHBA-së Donald Trump rreth kapjes së Nicolas Maduro në Venezuelë, ç`ka lë shumë hije pas.

Presidenti i SHBA-së ka komentuar se ka një marrëdhënie të shkëlqyer diplomatike me Claudia Sheinbaum, presidenten e Meksikës, por theksoi se ky vend mbetet problematik për shkak të drogës.

“Diçka do të duhet të bëhet me Meksikën”, tha Donald Trump, i cili në disa raste ka përmendur mundësinë e ndërhyrjeve ushtarake në tokën meksikane në disa zona.

Vlen të theksohet se Meksika nuk ka mbështetur ndërhyrjen e SHBA në Venezuelë.

The post Krisje mes Meksikës dhe SHBA-së, arrestimi i Maduros “trazon” Amerikën para Kupës së Botës appeared first on Albeu.com.

Drejtoria Vendore e Policisë Gjirokastër, ka njoftuar se për shkak të kushteve të rënduara atmosferike me reshje të dendura shiu, në aksin rrugor “Gjirokastër-Tepelenë”, ka ndodhur rrëshqitje e një masivi dheu dhe gurësh.

Si pasojë, qarkullimi i mjeteve në vendin e quajtur “Shkalla e Zezë”, po zhvillohet vetëm me një sens lëvizjeje.

Sipas njoftimit zyrtar, strukturat e Policisë së Gjirokastrës, në bashkëpunim me strukturat e Emergjencave Civile dhe Autoritetin Rrugor Shqiptar (ARRSH), po punojnë intensivisht për pastrimin e rrugës dhe normalizimin e qarkullimit.

Ndërkohë, është rritur prezenca e shërbimeve policore në të gjitha akset e qarkut, me punonjës me uniformë dhe automjete të pajisura me fenelina, me qëllim parandalimin e aksidenteve rrugore dhe ofrimin e ndihmës për drejtuesit e mjeteve, në rast nevoje.

The post Rrëshqitje dheu në aksin Gjirokastër-Tepelenë, qarkullimi me një sens te “Shkalla e Zezë” appeared first on Albeu.com.

Këtë të mërkurë, në një intervistë për News 24, deputeti i Partisë Mundësia, Erald Kapri, shprehet se dosja e SPAK për Belinda Ballukun, të depozituar në Kuvend krahas kërkesës për autorizimin për arrestimin e saj, duhet të publikohet.

Ai kërkoi nga deputetët anëtarë të Këshillit të Mandateve dhe Imunitetit, të njohur me dosjen, duhet ta publikojnë për interesin publik, në mënyrë që shqiptarët të njihen me korrupsion galopant të zëvendës kryeministres.

Ai ngriti pyetjen se si ka mundësi që dosja e Ballukut nuk publikohet ndërkohë që e AKSHI-t u bë publike.

“Për sa kohë që kuvendi nuk shprehet që brenda dy javësh të niste nga puna që të shprehej në seancë për votimin e mandatit, kemi të bëjmë me puç kushtetues nga kryeministri për ta zvarritur këtë çështje që të fitojë kohë në betejën me drejtësinë pë të mbrojtur veten e vet politikisht. Duke marrë edhe deputetet e tjerë të opozitës që pavarësisht se kanë kërkuar të mblidhet Këshilli, ka mbetur vetëm një gjë që dosja që ka ardhur në Kuvend të publikohet sepse është interes publik.

Ne na shqetëson shumë se si ka mundësi që dosja e Ballukut nuk publikohet. E AKSHI-t u publikua. Shqiptarët panë se bota e krimit kishte marrë këtë institucion. Këtu bëhet fjalë për një shpërdorim 1.2 miliardë euro deri tani dhe nuk na bëhet e ditur asgjë”, u shpreh ai.

Më tej, Kapri shtoi se kryeministri Edi Rama po bën “puç kushtetues” me mbrojtjen që po i bën Belinda Ballukut, duke përdorur Kuvendin dhe duke shtyrë sa më shumë kërkesën e SPAK për t’i hequr imunitetin zëvendës kryeministres së marrë të pandehur për shkelje të barazisë në tendera.

Sipas tij, përmes drejtësisë, do të vijë edhe rrëzimi i kryeministrit Rama.

The post Erald Kapri: Mbrojtja që po i bëhet Ballukut, puç kushtetues, dosja e SPAK ndaj saj duhet të publikohet për interesin publik, ka bërë korrupsion galopant appeared first on Albeu.com.

Pas 7 janarit 2026, jeta nis të përmirësohet ndjeshëm për tre shenja të zodiakut. Retrogradi i Jupiterit na fton të rishqyrtojmë bindjet, pritshmëritë dhe premtimet që i kemi bërë vetes: a janë ende të vlefshme, apo është koha të ecim përpara?

Ky tranzit ngadalëson zgjerimin e jashtëm për të na ndihmuar të rifitojmë besimin tek ajo që po bëjmë.

Para se të ecim përpara me siguri, duhet të ndalemi dhe të reflektojmë. Edhe pse mund të nisim nga pasiguria dhe dyshimi, Jupiteri – qoftë në retrograd apo direkt – sjell gjithmonë energji pozitive.

Për këto shenja, 7 janari sjell qetësi dhe siguri. Ankthi ndalet përpara se të përshkallëzohet dhe rezultati është një përmirësim i madh i jetës.

Gaforrja

Gaforre, kohët e fundit je përgatitur emocionalisht për diçka që mund të mos ndodhë kurrë. Mendja jote ka krijuar skenarë shqetësues pa arsye të qarta.

Më 7 janar, gjatë retrogradit të Jupiterit, ky cikël shqetësimi ndërpritet papritur. Një valë energjie pozitive të bën të kuptosh se gjithçka do të shkojë mirë.

Mbështetja është aty, mjafton ta pranosh. Në vend të frikës, vjen besimi, dhe sistemi yt nervor më në fund gjen qetësinë që i nevojitej.

Akrepi

Akrep, ke qenë duke vënë në dyshim kohën dhe vendimet e tua, duke menduar se mos ke humbur diçka të rëndësishme. Një ndjenjë e paqartë të shqetëson, pa e ditur saktësisht pse.

Retrogradi i Jupiterit sjell pak ankth, por edhe sqarim. Ajo që të shqetëson nuk është asgjë negative. Instinktet e tua kanë punuar në heshtje për të të mbrojtur.

Më 7 janar, vetëbesimi rikthehet dhe kupton se je më i fortë dhe më i zgjuar sesa mendoje. Jeta nis të përmirësohet ndjeshëm.

Peshqit

Pasiguria ka rënduar mbi ty, sidomos lidhur me ëndrrat dhe shpresat për të ardhmen. Ke filluar të dyshosh nëse dëshirat e tua do të realizohen ndonjëherë.

Retrogradi i Jupiterit më 7 janar sjell siguri emocionale. Kupton se pengesa e vetme mes teje dhe qetësisë është mendja jote. Sapo fillon të besosh se gjithçka do të shkojë mirë, shqetësimet shpërbëhen.

Ky tranzit të rikthen besimin tek vetja. Të lodhësh veten me ankth nuk ka më kuptim. Ky është momenti i kthesës: zgjedh gëzimin dhe, si rezultat, jeta bëhet më e mirë.

The post Pas 7 janarit, jeta përmirësohet ndjeshëm për këto 3 shenja appeared first on Albeu.com.

Këtë të mërkurë, në një prononcim për mediat, deputeti demokrat Oerd Bylykbashi, teksa po ndjek nga afër situatën e rëndë nga përmbytjet në Durrës, theksoi se kjo katastrofë nuk është vetëm natyrore, por e shkaktuar edhe nga njeriu.

Gjithashtu, deputeti theksoi se autoritetet kanë shpenzuar 30 milionë euro për sistemin e kanalizimeve, ndërkohë që përmbytjet vijojnë të jenë një ndër problemet më të mëdha të qytetit.

Ai theksoi se në zonën ndodhej aktualisht, banorët janë përmbytur tre herë brenda pak kohësh, ndërkohë që ende nuk kanë marrë si duhet dëmshpëblimet e herëve të para.

Për deputetin, situata nuk është thjesht një katastrofë natyrore por edhe njerëzore, për faktin se paratë publike kanë shkuar dëm dhe nuk është zgjidhur asgjë.

“Situata është më shumë se dramatike, është katastrofë e shkaktuar nga njeriu. Është një histori e madhe korrupsioni. Janë mbi 30 mln euro të hedhura në sistemet e kanalizimeve gjatë këtyre viteve dhe ky është rezultati. Brenda një viti kjo zonë është përmbytur tre herë. Janë mbi 400 familje që presin dëmshpërblim të dy përmbytjeve të tjera dhe i zuri i treti. Një pjese ia kanë dhënë me këste më pak se 25%, një pjese 100% por në mënyrë selektive. Edhe këtu funksionon patronazhimi. Kjo është histori jo vetëm keqmenaxhimi por kriminale, para që hidhen në mënyrë të qëllimshme vetëm për të kaluar kohën”, shprehet ai.

Sipas tij, edhe hidrovori i ri, që ka kushtuar 19 milionë euro nuk e bën si duhet punën.

“Kemi hidrovorin e vjetër, për arsye krejt korruptive e kanë transferuar në një zonë tjetër që nuk përmbush kushte teknike. Nuk garanton tërheqjen e ujërave në kohë dhe ja ku është pasoja. Kanë mbyllur kanalin e ujërave të larta të zonës së kodrës, e ka deklaruar kryetarja e bashkisë se do të mbyllin 2.6 km kanal për shëtitore. Praktikisht këtu ka punë prokuroria e shtetit, të vijë dhe të marrë në përgjegjësi penale të gjithë ata që në këto vite 25 vite qeverisje të socialistëve në Durrës kanë sjellë në këtë situatë. Specialistët tanë thonë se hidrovori i ri i ndërtuar me 19 mln euro nuk është në kushtet për të bërë atë që është detyra, ndërkohë që i vjetri duhet të spostohet për shkak se kanë përplasur me ndërtimin e portit që është në koncesion”, shtoi ai.

Kërkoi gjithashtu, auditim nga KLSH dhe hetim nga Prokuroria për të bënë para përgjegjësisë abuzuesit.

Ai bëri me dije se kanë kërkuar në Këshillin Bashkiak të qytetit që të miratohet një fond i posaçëm për krijimin e një plani që do të zgjidhte përfundimisht situatën e përmbytjeve.

Do të kërkojnë komision hetimor, shtoi ai, në bashki edhe parlament dhe nëse do të konstatojnë shkelje, do të bëjnë edhe kallëzim penal.

“Zgjidhjet teknike duhet t’i bëjnë ata që shpenzojë paratë. Nëse nuk ka funksionim hidrovori, ka përgjegjësi penale. Duke filluar nga prokuroria, KLSH duhet të vijë, të auditojë dhe të çojë para përgjegjësisë ata. Ne si opozitë kemi propozuar në këshill bashkiak në dhjetor, gjatë miratimit të buxhetit, që të vendoset një fond për të bërë një masterplan të plotë për një zgjidhje përfundimtare. Durrësi këtë e ka problemin më të madh. Do të kërkojmë komision hetimor qoftë në nivelin e bashkisë por edhe parlament dhe aty ku të konstatojmë nevojën do të bëjmë edhe kallëzim penal”, përfundoi Bylykbashi.

The post Bylykbashi për përmbytjet në Durrës: Hodhën mbi 30 mln euro në sistemet e kanalizimeve, hidrovori i ri s’e bën si duhet punën appeared first on Albeu.com.

Një makinë luksoze me vlerë 140 mijë euro, është sekuestruar në Shqipëri dhe dyshohet se ishte vjedhur në Gjermani.

Policia e kryeqytetit, sqaron se mjeti i sekuestruar është një BMW M-8”, me vlerë rreth 140 000 euro.

Ndërkohë, është proceduar penalisht blerësi i automjetit të trafikuar, njëkohësisht drejtues i tij, në momentin e ndalimit në Vorë.

Po ashtu, policia thotë se ka identifikuar dhe ka shpallur në kërkim një shtetas kosovar që dyshohet se ka trafikuar këtë automjet, në Shqipëri.

“Në lidhje me këtë rast u identifikua dhe u shpall në kërkim shtetasi që dyshohet se ka sjellë automjetin në Shqipëri, me qëllim shitjen, F. H., 42-vjeç (shtetas kosovar), si dhe u procedua penalisht blerësi i automjetit (njëkohësisht drejtues i automjetit, në momentin e ndalimit), shtetasi E. D., 39-vjeç”, thotë policia.

Njoftimi:

Vijon operacioni policor i koduar “Stolen line”, kundër trafikimit në Shqipëri, të automjeteve luksoze të vjedhura jashtë shtetit.

Shkon 5 numri i automjeteve të sekuestruara që nga nisja e operacionit.

Sekuestrohet 1 automjet tip “BMW M-8”, me vlerë rreth 140 000 euro, i dyshuar i vjedhur në Gjermani.

Procedohet penalisht blerësi i automjetit të trafikuar, njëkohësisht drejtues i tij, në momentin e ndalimit në Vorë.

Identifikohet dhe shpallet shtetasi kosovar që dyshohet se ka trafikuar këtë automjet, në Shqipëri.

Si rezultat i punës hetimore, të kryer në kuadër të operacionit “Stolen line”, me objektiv goditjen e rasteve të trafikimit në Shqipëri, të automjeteve luksoze, të vjedhura jashtë shtetit, specialistët e Seksionit për Hetimin e Trafiqeve të Paligjshme konstatuan një tjetër rast në këtë fushë.

Në vijim të veprimeve procedurale u sekuestrua 1 automjet tip “BMW M-8”, me vlerë rreth 140 000 euro, i cili nga verifikimet rezultoi i vjedhur në Gjermani.

Në lidhje me këtë rast u identifikua dhe u shpall në kërkim shtetasi që dyshohet se ka sjellë automjetin në Shqipëri, me qëllim shitjen, F. H., 42-vjeç (shtetas kosovar), si dhe u procedua penalisht blerësi i automjetit (njëkohësisht drejtues i automjetit, në momentin e ndalimit), shtetasi E. D., 39-vjeç.

Punohet për kapjen e 42-vjeçarit.

Materialet procedurale iu referuan Prokurorisë së Tiranë, për veprime të mëtejshme, për veprën penale “Trafikimi i mjeteve motorike”.

The post Sekuestrohet makina luksoze me vlerë 140 mijë euro, dyshohet se ishte vjedhur në Gjermani, u shit në Shqipëri… appeared first on Albeu.com.

Futbollisti francez, Aleksis Vergos, ka ndërruar jetë pasi rrëshqiti nga shkëmbinj të lagur teksa bënte selfie me të dashurën e tij në një vend të bukur në Tajlandë.

Sipas policisë së Koh Samui, autopsia e 22-vjeçarit konfirmoi shkakun e vdekjes si traumë në kokë. Vendi i aksidentit, një nga atraksionet turistike më të njohura të Tajlandës jugore, ka qenë skenë e tragjedive të ngjashme në të kaluarën.

Quimper Ergué Armel FC, klubi ku luante ai, shprehu ngushëllimet e tij në rrjetet sociale: “Me hidhërim të madh njoftojmë vdekjen e Aleksis Vergos, djalit të Tierrit, trajneri të ekipit C dhe vullnetarit të klubit.

Aleksis filloi të luante futboll me ne në moshën 6 vjeç dhe luajti në ekipin e të rriturve deri dy sezone më parë. Klubi bashkohet me familjen dhe miqtë e tij në zi”.

The post E rëndë/ U përpoq të bënte selfie me partneren, futbollisti 22-vjeçar bie nga ujëvara dhe humb jetën appeared first on Albeu.com.

Në një deklaratë nga selia blu, lideri demokrat Sali Berisha, kërkon shpalljen e menjëhershme të gjendjes së fatkeqësisë natyrore, në zonat e përmbytura ditët e fundit nga reshjet e shiut.

Berisha akuzoi kryeministrin Edi Rama për mungesë reagimi, duke deklaruar se mosshpallja e kësaj gjendjeje vjen vetëm për të shmangur detyrimin ligjor për dëmshpërblimin e plotë të qytetarëve të prekur.

“Mijëra e mijëra familje shqiptare kanë pësuar pasoja të rënda nga përmbytjet. Vetëm në Durrës përllogariten rreth 4 mijë banesa, biznese dhe objekte të tjera. Dëmet janë të mëdha, por nuk është vetëm Durrësi. Nga Gjirokastra deri në Shkodër janë mijëra banesa, biznese, fabrika që kanë pësuar dëme të parikuperueshme.

PD kërkon menjëherë shpalljen e gjendjes së fatkeqësisë natyrore. Rama apo Ramaduro që bën sehir nuk shpall gjendjen e fatkeqësisë natyrore, vetëm se ligji e detyron ata tu përgjigjet një për një dëmeve të krijuar nga fatkeqësia. Ky qëndrim indiferent, cinik është një krim në vetvete. Rama reagon me cinizëm ekstrem, pasi është në kaos ekstrem”, tha Sali Berisha.

The post Përmbytjet në vend, Berisha: Të shpallet gjendja e fatkeqësisë natyrore, Rama bën sehir… appeared first on Albeu.com.

Gjykata e Posaçme Kundër Krimit dhe Korrupsionit (GJKKO), ka rrëzuar kërkesën e zyrtares së lartë të Policisë së Shtetit, Ervina Gjana, për kthimin e pajisjeve elektronike të sekuestruara gjatë kontrollit të banesës së saj dhe të bashkëjetuesit Renato Hristic.

Gjatë kontrollit në banesën e Drejtoreshës së Krimit Kibernetik, autoritetet kanë sekuestruar tetë telefona celularë dhe dy laptopë, në kuadër të hetimeve mbi grupin kriminal të lidhur me Agjencinë Kombëtare të Shoqërisë së Informacionit (AKSHI).

Sekuestrimi i telefonave dhe laptopëve u krye në kuadër hetimit për përfshirje në grup të strukturuar kriminal me aktivitet mashtrime online, call-center, ndërhyrje në sistemet informatike dhe TIMS, si dhe bashkëpunim në krimin kibernetik, ku rezulton i përfshirë edhe bashkëshorti i saj, Renato Hristiç.

Ndërkohë, emri i saj është përmendur edhe në bisedat e publikuara të Ergys Agasit.

Ergys Agasi: (flet ne telefon) O mo vlla, hë ça bën mirë je ti… mirë, mirë. Shiko tashi, do të vi ERVINA se do të bëhet një aksion për disa falsifikime…”.

Nga hetuesit ka dyshime se Ergys Agasi, përmes Gjanës vinte në lëvizje strukturat e hetimit kibernetik për të goditur biznese të ligjshme apo grupe kriminale rivale, me qëllim largimin e tyre nga veprimtaria ku ai, apo miq të tij, kishin interesa.

The post Skandali me tenderat te AKSHI/ GJKKO rrëzon kërkesën e zyrtares së lartë të policisë, i refuzohet kthimi i 8 celularëve të sekuestruar appeared first on Albeu.com.

Këtë të mërkurë, një aksident me pasojë vdekjen e një 70-vjeçari është regjistruar në Lushnje.

I moshuari është identifikuar si Bujar Dingozi. Sipas informacionet paraprake, ai ishte duke udhëtuar me motor kur ka humbur kontrollin, e më pas është përplasur në tokë.

Si pasojë i moshuari ka ndërruar jetë.

Sipas të afërmeve të viktimës, 70-vjeçari vuante nga zemra, ç`ka dyshohet për një atak të mundshëm

The post Aksident me vdekje në Lushnje (EMRI) appeared first on Albeu.com.

Elisaveta Treska, është emëruar drejtoreshë e Spitalit ‘Shefqet Ndroqi’ në Tiranë, duke zëvendësuar në këtë detyrë doktoreshën Silva Bala.

Emërimi i Treskës, është bërë 2 ditë më parë, konkretisht më 5 janar.

Sipas dokumenteve zyrtare të Qendrës Kombëtare të Biznesit (QKB), Elisaveta Treska, rezulton të jetë pronare e “ROYAL HILL” një resorti eventesh në Vorë.

Ndërkohë, administratore e këtij subjekti ka qenë Shpresa Breçani, që është edhe mbesa e kreut të Partisë Demokratike, Sali Berisha.

Përveç kompleksit “Royal Hill” në periferi të Tiranës, Elisaveta Treska, njihet në qarqet e biznesit edhe si pronare e një Bar-Restorant-Hoteli në zemër të Tiranës.

Më konkretisht, bëhet fjalë për një biznes të pozicionuar në një nga rrugicat më të lakmuara në kryeqytet.

The post Elisaveta Treska emërohet Drejtoresha e Spitalit “Shefqet Ndroqi”, lidhjet e biznesit me mbesën e kreut të PD-së appeared first on Albeu.com.

Një tjetër skandal ka ndodhur në rrugën Qukës-Qafë Plloçë, e cila ka kushtuar 260 mln euro dhe që u inaugurua disa muaj më parë nga ministrja Belinda Balluku, tashmë nën hetim nga SPAK për disa vepra penale.

Pas rreth një muaji nga shembja e një masivi dherash në këtë aks, situata është përsëritur, duke rrezikuar jetën e qytetarëve.

Sot një rrëshqitje dherash ka goditur një automjet që po kalonte në atë zonë.

Fatmirësisht, nga ngjarja nuk ka pasur të lënduar, ndërsa automjeti ka pësuar dëme materiale vetëm në pjesën e përparme.

Autoritetet ndërkohë po punojnë për pastrimin e zonës dhe rikthimin e qarkullimit normal.

Kujtojmë se një rrëshqitje masive e dheut dhe shkëmbinjsh u shënua në nëntor të 2024 në këtë aks, pranë tuneleve, si pasojë e shirave të shumtë.

Rrëshqitja shkaktoi bllokimin total të rrugës, duke vështirësuar qarkullimin e mjeteve, ndërsa kompania kontraktore përgjegjëse për mirëmbajtjen e aksit, vendosi një baypass provizor për të lehtësuar kalimin e automjeteve.

Rruga Qukës-Qafë Plloçë që shmang Prrenjasin, Qafë-Thanën dhe Pogradecin, u inaugurua në muajin shtator nga ministrja e pezulluar nga detyra Belinda Balluku dhe ka kushtuar 260 milionë euro.

Aksi përfundoi pas 14 vitesh, por mjaftuan vetëm dy muaj përdorim që rruga të dalë jashtë funksioni.

Shembjet masive zbuluan se cilësia e punimeve ishte mjaft e dobët dhe në terren kanë munguar studimet e mirëfillta gjeologjike.

The post Kushtoi 260 mln euro/ Shembet sërish aksi Qukës-Qafë Plloçë, rruga e Ballukut shkakton aksidente (VIDEO) appeared first on Albeu.com.

Agjencia e Mbikëqyrjes Policore, ka pezulluar nga detyra 3 efektivë dhe një inspektor policie, pasi akuzohen për shpërdorim detyre.

Caktimi i masave të sigurisë u bë i mundur pas veprimeve hetimore proaktive të kryera nga AMP në bashkëpunim me Prokurorinë e Juridiskionit të Përgjithshëm Berat, nga ku ka rezultuar se këta punonjës policie gjatë ushtrimit të detyrave funksionale, me veprime dhe mosveprime në shkelje të ligjit kanë penalizuar / favorizuar drejtues të mjeteve të konstatuar në shkelje ose jo të Kodit Rrugor.

Efektivët e pezulluar janë: 

Artan Selami

Myftar Dauti

Adem Qevani

Karafil Guçe

NJOFTIMI I AMP

Agjencia e Mbikëqyrjes Policore (Rajoni Fier-Berat) ka ekzekutuar Vendimin e Gjykatës së Shkallës së Parë të Juridiksionit të Përgjithshëm Berat, e cila ka caktuar masat e sigurimit personal me karakter ndalues “Pezullim i ushtrimit të një detyre a shërbimi publik” parashikuar në nenin 242 të Kodit të Pr. Penale ndaj katër punonjësve të policisë të dyshuar për kryerjen e veprës penale “Shpërdorim i detyrës” parashikuar në nenin 248 të Kodit Penal.

Inspektor Artan Selami, me detyrë Trupë shërbimi në Seksionin për Trafikun Urban dhe Interurban, pranë DVP Berat

Inspektor Myftar Dauti, me detyrë Trupë shërbimi në Seksionin për Trafikun Urban dhe Interurban, pranë DVP Berat

Inspektor Adem Qevani, me detyrë Trupë shërbimi në Seksionin për Trafikun Urban dhe Interurban, pranë DVP Berat

Inspektor Karafil Guçe, me detyrë Oficer i Patrullës së Përgjithshme në Komisariatin e Policisë Berat.

Caktimi i masave të sigurisë u bë i mundur pas veprimeve hetimore proaktive të kryera nga AMP në bashkëpunim me Prokurorinë e Juridiskionit të Përgjithshëm Berat, nga ku ka rezultuar se këta punonjës policie gjatë ushtrimit të detyrave funksionale, me veprime dhe mosveprime në shkelje të ligjit kanë penalizuar / favorizuar drejtues të mjeteve të konstatuar në shkelje ose jo të Kodit Rrugor.

AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të strukturave, duke telefonuar në numrin e gjelbër 0800 9090, ose duke dërguar Email në adresën ankesa@amp.gov.al.

Për ankesa me Whatsapp 0694151511
Ose shkarkoni në Play Store dhe App Store aplikacionin “Agjencia Digjitale”.

The post AMP pezullon 3 efektivë dhe një inspektor policie në Berat appeared first on Albeu.com.

Një ditë pas reshjeve të dendura të shiut, që përmbytën Durrësin dhe periferinë e tij, situata në burgun e  Durrësit vijon të jetë kritike.

Si pasojë e përmbytjeve, lëvizet me gomone siç duket edhe nga këto pamje.

Pamjet që shihni tregojnë shkallën e përmbytjeve në burgun e Durrësit.

Sic shihet edhe nga pamjet nga jashtë këtij institucioni të vuajtjes së dënimit, situata paraqitet e rënduar edhe ditën e sotme.

Kujtojmë se në këtë burg vuajnë dënimin ish-ministri Ilir Beqaj apo dhe kryebashkiaku i Tiranës, Erion Veliaj apo dhe ish-deputeti socialist Jurgis Çyrbja.

The post Rruga dhe oborri i burgut të Durrësit edhe sot “pushtohen” nga uji (VIDEO) appeared first on Albeu.com.

Mmëngjesin e kësaj të mërkure, një aksident rrugor është regjistruar te mbikalimi i “Pallatit me Shigjeta”, në Tiranë.

Dy makina janë përplasur me njëra-tjetrën në rrethana ende të paqarta, ku si pasojë njëra prej tyre ka përfunduar e përmbysur.

Siç mund të shihet dhe nga pamjet e mësipërme përplasja ka qënë e fortë, ndërsa si pasojë janë shkaktuar dëme të konsiderueshme materiale.

Nuk dihet ende nëse ka persona të lënduar, policia ndodhet në vendngjarje.

The post Aksident në Tiranë, dy makina përplasen me njëra-tjetrën appeared first on Albeu.com.

Këtë të mërkurë, për shkak të motit të keq, autoritetet lokale kanë vendosur pezullimin e mësimit në të gjitha shkollat e Gjirokastrës.

Në pjesën më të madhe të qytetit ka prezencë të inerteve, të cilat kërkojnë mjete të rënda për largimin e tyre. Për momentin, reshjet e shiut kanë ulur intensitetin.

Niveli i lumit Vjosa në Memaliaj, ka shkuar në 6.5 metra. Nga bashkitë e tjera të qarkut, deri tani, nuk raportohen situata emergjente.

Ndërkohë, raportohet se aksi nacional Gjirokastër–Kakavijë, është i bllokuar në zonën e Kordhocës, përballë fshatit Lazarat.

Në vendngjarje janë punonjësit e firmës mirëmbajtëse, të cilët po punojnë për hapjen e rrugës. Gjithashtu, ka bllokim të rrugës Gjirokastër–Valare, në vendin e quajtur Ura e Aznakut.

The post Pezullohet mësimi në shkollat e Gjirokastrës, bllokohet rruga drejt Kakavijës appeared first on Albeu.com.

Reshjet e dendura të shiut kanë shkaktuar rrëshqitje dheu në fshatin Vajzë, duke dëmtuar rrugën e fshatit dhe dy banesa.

Sipas informacioneve paraprake, si pasojë e shirave intensive, fillimisht është dëmtuar rruga që lidh fshatin, ndërsa më pas masa e dheut e shkëputur nga kodra është spostuar drejt zonës së banuar, duke shkaktuar dëmtime në dy banesa.

Në vendngjarje kanë ndërhyrë forcat e Policisë, të cilat kanë bërë evakuimin e banorëve për arsye sigurie.

Ndërkohë, qarkullimi i automjeteve në këtë segment rrugor po zhvillohet në mënyrë të kontrolluar, për shkak të rrezikut nga rrëshqitje të tjera të mundshme.

The post Rrëshqitje e dherave dëmton rrugën dhe dy banesa në Vlorë appeared first on Albeu.com.

Kryetari i Kuvendit, Niko Peleshi, refuzoi për të disatën herë kërkesën e opozitës për mbledhjen e Këshillit të Mandateve për çështjen Balluku, sjellje që sipas ekspertëve të ligjit, bie ndesh me frymën e Rregullores dhe cenon parimin kushtetues të barazisë para ligjit.

Deputetët e Partisë Demokratike, anëtarë të Këshillit për Rregulloren, Mandatet dhe Imunitetin, ngjitën më kot të martën shkallët e Kryesisë së Kuvendit në pritje për të zhvilluar mbledhjen e kërkuar prej tyre për shqyrtimin e kërkesës së Prokurorisë së Posaçme për heqjen e imunitetit ndaj zv.kryeministres Belinda Balluku.

Kërkesa e tyre u refuzua për herë të tretë nga kryetari i Kuvendit, Niko Peleshi.

Peleshi nuk iu përgjigj të martën pyetjeve të BIRN mbi arsyet e shtyrjes pa afat të thirrjes së Këshillit që prej mbledhjes së vetme të zhvilluar më 19 dhjetor, ndërkohë që një këshilltar i tij referoi një përgjigje zyrtare të dhënë prej tij më datë 24 dhjetor për anëtarët e opozitës.

Në këtë letër, Peleshi e justifikonte refuzimin për thirrjen e mbledhjes me kërkesën e mbrojtjes së Ballukut për 3 javë kohë për t’u njohur me dokumentacionin përkatës në mënyrë që të zhvillohej një proces i rregullt ligjor.

“Për sa kohë ky proces nuk është përmbyllur dhe palët nuk janë pajisur realisht me kohën e nevojshme për ushtrimin e kësaj të drejte, nuk plotësohen kushtet procedurale për caktimin e një date të re mbledhjeje”, shkruan kreu i Kuvendit në përgjigje.

Opozita e hedh poshtë argumentin e Peleshit dhe e akuzon këtë të fundit se me refuzimin për të mbledhur Këshillin po kryen vepër penale.

“Sot përfundoi edhe afati 3 javë që iu dha Ballukut. Duke nisur nga nesër, çdo sekondë vonesë nënkupton shpërdorim detyre nga Peleshi”, deklaroi të martën kreu i grupit parlamentar të PD-së, Gazmend Bardhi.

Dhënia e autorizimit për caktimin e një mase sigurie ndaj deputetit parashikohet në nenin 118 të Rregullores së Parlamentit, pa afate të qarta për shyrtimin paraprak.

Sipas këtij neni, kryetari i Kuvendit është i detyruar që t’u kalojë anëtarëve të Këshillit dhe deputetit në fjalë kërkesën e Prokurorisë dhe dokumentet shoqëruese, ndërkohë që i bën të ditur këtij të fundit koha në të cilën Këshilli për Rregulloren, Mandatet dhe Imunitetin do të fillojë shqyrtimin e kërkesës.

Në përfundim të shqyrtimit, Këshilli brenda 2 javëve harton një raport për në seancë plenare, në të cilin rekomandon rrëzimin ose miratimin e dhënies së autorizimit dhe shqyrtimi i kësaj kërkese vendoset si pikë e parë e rendit të ditës në seancën pasardhëse.

Sipas ekspertëve të ligjit, Kuvendi në rastin e Ballukut, po shtyn pa afat shqyrtimin e kërkesës së Prokurorisë së Posaçme, ç`ka sipas tyre bie në kundërshtim me frymën e dispozitave ligjore dhe vendos një precedent të rrezikshëm të qëndrimit të Kuvendit.

Erida Skëndaj, drejtuese e Komitetit Shqiptar të Helsinkit, i tha BIRN se, shtyrja pa afat e mbledhjes së këtij këshilli, “nuk është në frymën e nenit 118 të Rregullores së Kuvendit dhe dispozitave të Kodit të Procedurës Penale, dhe cenon parimin kushtetues të barazisë para ligjit”.

Skëndaj arsyeton se mospërcaktimi i afateve të qarta në Rregullore ka krijuar një artificë për të vonuar procesin, duke shfrytëzuar një boshllëk ligjor në dëm të administrimit të procesit hetimor në afat të arsyeshëm, sikurse po ndodh aktualisht.

Nga ana tjetër, Skëndaj thekson se konsiderohet “shkelje” mosrespektimi i parashikimit të Rregullores së Kuvendit për mbledhjen e Këshillit kur këtë e kërkon ½ e anëtarëve të saj.

“Kjo sjellje dëmton veprimtarinë e organeve të drejtësisë të ngarkuara me luftën kundër pandëshkueshmërisë së zyrtarëve të nivelit të lartë”, tha Skëndaj.

Për avokatin Gentjan Serjani, “ky rast krijon një precedent të rrezikshëm institucional, ku qëndrimi politik vendoset mbi detyrimin ligjor”.

“Një qasje e tillë cenon parimin e shtetit të së drejtës dhe nënkupton se, ndonëse Rregullorja është miratuar me konsensus për t’u zbatuar në mënyrë strikte, interesat politike kanë diktuar shmangien nga zbatimi i saj “gërmë për gërmë”. Një praktikë e tillë minon besueshmërinë e institucioneve parlamentare dhe autoritetin e vetë Rregullores së Kuvendit”, tha ai.

Sipas Serjanit, sjellja e anëtarëve të Këshillit të Mandateve dhe Imunitetit dëshmon qartazi mosfunksionimin e Rregullores së Kuvendit në rastin konkret dhe kjo strukturë që duhej të garantonte respektimin e normave procedurale, është pikërisht ajo që ka kryer një shkelje flagrante të pikës 6 të nenit 13 të Rregullores së Kuvendit

“Kjo dispozitë përcakton shprehimisht se Këshilli mblidhet me kërkesë të Kryetarit të Kuvendit ose të gjysmës së anëtarëve të tij, se rendi i ditës caktohet nga Kryetari dhe se mbledhja është e vlefshme vetëm kur janë të pranishëm jo më pak se pesë anëtarë. Mosrespektimi i këtyre kritereve procedurale përbën një shkelje të drejtpërdrejtë dhe të pajustifikueshme të Rregullores”, arsyeton Serjani.

Kuvendi nuk mund luajë rolin e gjykatës

Edhe pse justifikimi kryesor për shtyrjen pa afat të mbledhjes për imunitetin e Ballukut lidhet me fitimin e kohës së mjaftueshme për t’u njohur me provat e sjella nga SPAK, asnjë prej deputetëve socialistë, anëtarë të këtij Këshilli, nuk e ka tërhequr USB-në me 16 mijë faqe të dorëzuar në Kuvend.

Vetë kryeministri Rama në konferencën vjetore për mediat pranoi këtë fakt, ndërsa ironizoi përmbajtjen e dosjes si e mbushur me dokumente arkivore të ministrisë.

“USB-në e sjellë nga Prokuroria nuk e ka tërhequr asnjë deputet i PS dhe nuk e ka tërhequr as ministrja, avokati. Që të jemi shumë të qartë. Për të mos krijuar asnjë shteg që pastaj të tjerët të thonë ‘i kanë nxjerrë këta ato”, tha Rama duke lënë të hapur mundësinë e rrëzimit të kërkesës së SPAK.

“Këshilli i Mandateve nuk është një zyrë noterie, është një kuazi gjykatë, dhe Parlamenti nuk noterizon kërkesat që vijnë”, shtoi ai.

Juristët megjithatë argumentojnë se Këshilli i Mandatave, nuk mund të sillet si një gjykatë dhe se detyra e tij është vetëm të shohë nëse kërkesa e prokurorisë, është ligjërisht në rregull dhe jo të marrë përsipër të shyrtojë provat hetimore.

“Sipas standarteve të Komisionit të Venecias, nëse kërkesa për kufizimin e imunitetit shqyrtohet në detaje, përveç se bie ndesh me parimin e prezumimit të pafajësisë, krijon perceptimin publik se jemi në kushtet e një procesi politik”, tha Skëndaj nga Komiteti Shqiptar i Helsinkit.

Për rrjedhojë, shton ajo, “argumentat e shtyrjes pa afat të mbledhjes së Këshillit, për të marrë kohë mbi leximin e të gjitha dokumenteve në dosje dëmtojnë efikasitetin e hetimit, pasi Këshilli nuk është organ gjyqësor, duke krijuar kushtet e favorizimit të funksionarit publik, veçanërisht kur ky vazhdon të mbajë poste të larta publike”.

Edhe për anëtarin e PD-së në këtë Këshill, Oerd Bylykbashi, Kuvendi nuk mund të kthehet në gjykatë dhe të shqyrtojë provat hetimore të prokurorisë, por shikon vetëm nëse kërkesa e prokurorisë nuk ka karakter politik.

“Unë e kam marrë, por nuk e kam hapur USB-në e prokurorisë, sepse si deputet më bind relacioni i SPAK, ku referohen të dhëna të mjaftueshme pse kërkohet masa e sigurisë për ministren”, tha Bylykbashi./ BIRN

The post SPAK kërkoi lejimin e arrestimit të Ballukut/ BIRN: Zvarritja pa afat e mbledhjes për zëvendës kryeministren, precedent i rrezikshëm appeared first on Albeu.com.

Ditën e sotme, reshjet e dendura të shiut kanë rritur nivelin e lumit Lana. Pamjet tregojnë se për pasojë, lumi është fryrë, me rritje të dukshme të prurjeve të ujit përgjatë gjithë shtratit të tij.

Aktualisht, uji vijon të rrjedhë brenda shtratit të lumit, ndërsa situata po monitorohet.

The post Moti i keq në Tiranë, fryhet lumi Lana, rrezikon të dalë nga shtrati (VIDEO) appeared first on Albeu.com.

Gjetja e një pune jashtë vendit, qoftë edhe përkohësisht është bërë një tendencë e qëndrueshme gjatë viteve të fundit dhe kjo reflektohet dhe në të ardhurat që ata po gjenerojnë nga punësimi sezonal.

Afërsia me vendet si Italia e Greqia, por dhe mundësia për të punuar online kanë zgjeruar gjeografinë e shteteve nga të cilët shqiptarët gjenerojnë të ardhura.

Eurostat, në sistemin e vet të të dhënave, krahas prurjeve nga emigrantët, publikon dhe të ardhurat nga transferta nga puna sezonale për shtetasit shqiptarë për vitin 2024.

Nga rreth 2.1 miliardë euro, janë dërguar në Shqipëri gjatë vitit 2024 nga transfertat personale dhe kompensimi i punonjësve, sipas të dhënave të publikuara nga Eurostat, transfertat personale përbënin 31.6% të totalit, ose 663 milionë euro.

Kjo është shuma e fituar nga ata që punojnë jashtë shtetit dhe e transferuar në Shqipëri, të paktën zyrtarisht. (Kompensimi i punonjësve përfshin paga dhe të ardhura që rezidentë të një vendi fitojnë duke punuar përkohësisht jashtë shtetit, p.sh. punë sezonale, përpara se të zbriten taksat dhe kontributet).

Emigrantët dhe ata që punojnë përkohësisht jashtë dërguan 2.1 miliardë euro në Shqipëri në 2024-n

Të ardhurat nga puna jashtë vendit janë rritur vazhdimisht vitet e fundit, duke reflektuar rritje e emigrimit, qoftë edhe të përkohshëm.

Në vitin 2022, po sipas Eurostat, transfertat personale ishin 455 milionë euro, në 2023-n arritën në 629 milionë euro, me një rritje prej 38%. Në 2024-n rritja u ngadalësua në 5.1%, duke arritur në 663 milionë euro.

Vendin e parë e mban Greqia. Shteti fqinjë bëhet pritës sidomos në verë e vjeshtë i qindra shqiptarëve që shkojnë të punojnë në bujqësi.

Transfertat personale nga puna sezonale nga Greqia ishin 156 milionë euro në 2024-n.

Në vend të dytë është Italia, gjithashtu një vend i preferuar për emigrantët për shkak të afërsisë gjeografike dhe mundësive që ka për punësim.

Tranfertat nga Italia ishin 126 milionë euro në 2024-n, sipas Eurostat.

Në vend të tretë është Gjermania, që vitet e fundit është bërë një vend i preferuar nga shumë profesionistë. Transfertat nga Gjermania ishin 69 milionë euro në 2024-n.

Mbretëria e Bashkuar është destinacioni tjetër i preferuar i të punësuarve sezonalë, që kanë gjeneruar rreth 65 mln euro në 2024-n.

Pas tij renditen Zvicra me 27 milionë euro, Turqia me 20 milionë euro.

Edhe Irlanda është një vend i preferuar, me 19.7 milionë euro transferta.

Franca, ndonëse është shteti kryesor për kërkesat e azilantëve është i teti për transfertat e të punësuarve sezonalë.
Destinacione të tjera nga ku sigurohen të ardhura nga puna e përkohshme janë Austria (16.9 milionë euro), Shtetet e Bashkuara (14.2 milionë euro), Polonia (13.5 mln euro), Holanda (11.5 mln euro).

Gjeografia e shqiptarëve që punojnë përkohësisht jashtë ka arritur deri në vendet arabe të Gjirit Persik, ku transfertat arritën në 2.3 milionë euro në 2024.

Në punët sezonale dhe të përkohshme jashtë vendit, shtetasit shqiptarë angazhohen tradicionalisht në sektorë që kërkojnë fuqi punëtore intensive dhe fleksibile.

Pjesa më e madhe punon në bujqësi, veçanërisht në mbledhjen e frutave, perimeve dhe ullinjve, në serra dhe në përpunimin fillestar të produkteve bujqësore.

Ky profil mbetet dominues, sidomos në vendet fqinje dhe në disa tregje të Europës Perëndimore.

Një tjetër sektor i rëndësishëm është turizmi dhe shërbimet, ku shqiptarët punësohen sezonalisht në hotele, restorante dhe struktura akomoduese gjatë muajve të verës.

Punët tipike përfshijnë shërbimin në restorante, kuzhinë ndihmëse, pastrim, mirëmbajtje dhe shërbime mbështetëse.

Ndërtimi vijon të jetë një fushë e rëndësishme e punësimit sezonal dhe të përkohshëm, me angazhime në punime fizike, përfundime ndërtimi, rikonstruksione dhe projekte infrastrukturore.

Në disa vende, shqiptarët angazhohen edhe në industri përpunuese dhe logjistikë, kryesisht në linja paketimi, magazina dhe përpunim ushqimor.

Së fundmi, po vihet re edhe një rritje graduale e përfshirjes së shqiptarëve në shërbime të lidhura me teknologjinë e informacionit, kryesisht në forma fleksibile ose kontrata afatshkurtra.

Këto përfshijnë zhvillim softuerësh, testim aplikacionesh, mbështetje teknike, shërbime digjitale dhe punë të tjera IT të ofruara nga distanca për kompani të huaja.

Edhe pse ky segment është ende më i vogël krahasuar me punët tradicionale sezonale, ai po zgjerohet me shpejtësi, i nxitur nga aftësitë e të rinjve shqiptarë, puna në distancë dhe kërkesa në rritje për shërbime digjitale./Monitor

The post Nga Greqia në Irlandë, e vendet arabe, shqiptarët që punojnë jashtë fituan 663 mln euro në 2024 appeared first on Albeu.com.