UASHINGTON, 17 gusht /ATSH-ANSA/ – Presidenti amerikan Donald Trump deklaroi se presidenti kinez Xi Jinping do të mbërrijë më 24 shtator dhe se ai do të dëshironte të organizonte në Shtëpinë e Bardhë një pritje madhështore me rreth 3 mijë të ftuar, por për momentin nuk mund ta bëjë këtë.

Trump iu referua sallës së re të pritjeve në Shtëpinë e Bardhë, projekti i së cilës është bllokuar nga një gjykatë.

Presidenti amerikan tha se do të dëshironte ta përdorte këtë hapësirë për evente të rëndësishme dhe për të pritur figura të larta ndërkombëtare, përfshirë Xi Jinping.

Deklaratat u bënë gjatë një aktiviteti në Zyrën Ovale, në nderim të Ryder Williams, një 16-vjeçari që shpëtoi nga deti në Kaliforni një fëmijë 10-vjeçar.

Gjatë ceremonisë, Trump foli edhe për gjendjen e ndërtesës presidenciale, duke deklaruar se “Shtëpia e Bardhë po bie copë-copë”.

Ai e përdori këtë argument për të theksuar nevojën, sipas tij, për ndërhyrje dhe punime në godinë. /os/

The post SHBA – Trump: Shtëpia e Bardhë po bie copë-copë, nuk mund të ftoj dot 3 000 persona appeared first on Agjencia Telegrafike Shqiptare.

TEL AVIV,, 17 gusht /ATSH-ANSA/ – Një burim izraelit i tha Channel 12 se, ndërsa Izraeli zyrtarisht nuk beson se Hamasi do të dorëzojë armët, amerikanët shprehen se besojnë se kjo mund të ndodhë.

I dërguari amerikan Jared Kushner, gjatë takimit të sotëm në Jerusalem me kryeministrin izraelit Benjamin Netanyahu, përsëriti frazën: “Nuk ka asgjë për t’u rindërtuar përpara se Rripi i Gazës të çmilitarizohet.

“Ne i treguam Kushnerit se gjatë kësaj periudhe nuk ka pasur asnjë proces real të çarmatimit të Hamasit. Gjithashtu i treguam informacione mbi financimet turke për Hamasin”, thekson burimi,

Gjatë takimit me përfaqësuesit e Board of Peace dhe të dërguarin amerikan Jared Kushner, kryeministri Benjamin Netanyahu kërkoi që hapi i parë në kuadër të rindërtimit të Rripit të Gazës të jetë dorëzimi i armëve të Hamasit te komandanti i Forcës Ndërkombëtare të Stabilizimit për Gazën (ISF), gjenerali Jasper Jeffers, me qëllim shkatërrimin e tyre.

Sipas një zyrtari të lartë izraelit, cituar nga Ynet, ky operacion do të zhvillohej nën mbikëqyrjen amerikane.  /os/

The post FOKUS – Izraeli kërkon dorëzimin e armëve të Hamasit si hap të parë për rindërtimin e Gazës appeared first on Agjencia Telegrafike Shqiptare.

PRISHTINË, 17 gusht /ATSH/ Instituti Kombëtar i Shëndetësisë Publike të Kosovës (IKSHPK) tha se vetëm gjatë javës së fundit në Kosovë janë regjistruar 25 raste të reja me fruth.

Sipas IKSHPK-së nga 16 prilli deri më 17 gusht, në Kosovë janë konfirmuar 137 raste me fruth.

Për krahasim, në periudhën 2021-2024, ishin regjistruar vetëm tri raste me fruth, të gjitha të importuara.

Sipas të dhënave të këtij instituti, më së shumti raste janë regjistruar në Prishtinë, përkatësisht 47, teksa IKSHPK se ka intensifikuar aktivitetin për vaksinim në komunat me numrin më të lartë të rasteve, duke vaksinuar 276 fëmijë që nuk kishin marrë me kohë, sipas kalendarit të rregullt të vaksinimit, vaksinën MMR.

“IKSHPK rekomandon që çdo person me simptoma të dyshimta të fruthit, si temperaturë e lartë, skuqje apo ndryshime në lëkurë, kollë, rrufë ose konjuktivit, të paraqitet menjëherë në institucionet më të afërta shëndetësore”, thuhet në njoftim, ku shtohet se vaksinimi është mënyra më efektive për parandalimin e sëmundjes.

Fruthi është ndër sëmundjet më ngjitëse dhe transmetohet përmes ajrit.

Epidemiologia e Institutit Kombëtar të Shëndetësisë Publike të Kosovës (IKSHPK), Edita Goranci, në podkastin 5 pyetje të Radios Evropa e Lirë deklaroi se rikthimi i sëmundjes në Kosovë lidhet drejtpërdrejt me rënien e e vaksinimit të fëmijëve me vaksinën MMR.

“Kur e kishim mbulueshmërinë mbi 95 për qind me vaksinën kundër fruthit, situata epidemiologjike ishte e qetë. Rastet paraqiten pikërisht ku ka fëmijë të pavaksinuar”, tha Goranci.

Epidemiologia Goranci tha se doza e parë e vaksinës kundër fruthit mrbon në 93 për qind të rasteve, ndërkaq e dyta në 97 për qind.

“Është një ndër vaksinat më të sigurta”, theksoi ajo.

Sipas saj, një fëmijë i infektuar infekton rreth 90 për qind të kontakteve që nuk janë të vaksinuara.

“Virusi përhapet gjatë të folurit, kollitjes apo teshtitjes, dhe mund të qëndrojë deri në dy orë në ajër dhe në sipërfaqe”, shpjegoi Goranci.

Temperatura, ethet, rrjedhja e hundëve, skuqja e syve dhe dhimbja e fytit janë simptomat e para të fruthit, sipas saj.

Kjo sëmundje është vdekjeprurëse. Sipas të dhënave të Organizatës Botërore të Shëndetësisë, mbi 95 mijë njerëz kanë vdekur nga fruthi gjatë vitit 2024, shumica fëmijë nën moshën pesëvjeçare, megjithëse e kishin pasur një vaksinë në dispozicion. /REL/

The post Raste të reja me fruth në Kosovë appeared first on Agjencia Telegrafike Shqiptare.

TIRANË, 17 gusht/ATSH/ Në Tiranë u zhvillua sot protesta e 79-të radhazi kundër investimit në Zvërnec.

Pas organizimit në sheshin “Skënderbej”, qytetarët vijuan marshimin drejt Kryeministrisë, ku folës të ndryshëm vijuan të përsërisin kërkesat për dorëheqjen e kryeministrit Edi Rama, largimin e “kastës së vjetër” politike, shfuqizimin e ndryshimeve në ligjin për zonat e mbrojtura, ndryshimin e ligjit zgjedhor etj.

Aktivistja Sidorela Vatnikaj u shpreh se sheshi para Kryeministrisë është bërë sheshi i bashkimit të shqiptarëve brenda dhe jashtë kufijve që vendi të mos qeveriset më nga autokratë dhe deputetë të inkriminuar.

E nisur si reagim ndaj ndikimit mjedisor të projektit turistik në Zvërnec, tashmë pjesëmarrësit kërkojnë ndryshime politike dhe institucionale dhe shprehin shqetësimet e tyre për korrupsionin, meritokracinë, mundësitë e punësimit dhe largimin e të rinjve nga vendi.

Pas fjalimeve të rastit, protestuesit vijuan me marshimin në rrugët e Tiranës.

Dita e 79-të e protestës; Fotoreporter: Florian Abazi

1 nga 4

/m.m/r.e/

The post Mbahet protesta e 79-të në Tiranë me të njëjtat kërkesa appeared first on Agjencia Telegrafike Shqiptare.

GJENOVË, 17 gusht /ATSH – ANSA/ –  “Një ditë, ti do të jesh president i Amerikës”.Këtë profeci ia bëri atëherë një Donald Trumpi ende i ri,  këngëtari famoz Frank Sinatra, në prani të Ronald Reaganit dhe George Bushit senior.

Episodin e ka risjellë në kujtesë Luciano Belloni, pronari i restorantit historik gjenovez Zeffirino i cili është nga Val Fontanabuona, ku lindi nëna e yllit, Natalina “Dolly” Garaventa.

Mes historive për kuintalë pestoje të dërguar përtej Atlantikut dhe darkave private, Belloni kujtoi lidhjen e fortë të artistit me Ligurinë dhe me kuzhinën e saj.

Një urë simbolike mes Val Fontanabuona-s dhe Shteteve të Bashkuara, të cilën festivali e rinovon çdo verë përmes koncerteve, shfaqjeve dhe kujtesës historike.

Këto zona, në fakt, kanë qenë vendlindja e gjyshërve të Kristofor Kolombit.

Brenda një rrezeje prej rreth dhjetë kilometrash kanë lindur edhe Amedeo Giannini, themeluesi i Bank of America, Blandina, e njohur si “murgesha e Far West-it”, dhe Dolly, nëna e Frank Sinatra-s.

“Ky është edicioni i nëntëmbëdhjetë, një traditë që e përsërisim çdo vit, sepse çdo herë krijon diçka të re”, shpjegoi kryetari i bashkisë së Lumarzos, Guido Guelfo.

Ka gjithmonë një vëmendje të veçantë për bashkëqytetarët, por edhe në nivel provincial e rajonal, si dhe me Siçilinë, vendin e origjinës së babait të Frankut.  /os/

The post SOFT NEWS – Profecia e Frank Sinatrës për Trumpin: “Do të bëhesh president i SHBA-së” appeared first on Agjencia Telegrafike Shqiptare.

LONDËR, 17 gusht /ATSH/ Muzikanti britanik Moby ndau një moment të veçantë dhe emocional me publikun gjatë koncertit të tij “Labyrinth on the Thames” në Greenwich, duke shfaqur një video-mesazh të papublikuar më parë nga primatologia dhe etologia e njohur Jane Goodall, të regjistruar pak para ndarjes së saj nga jeta.

Në videon prekëse, Goodall i drejtohet Moby-t me një mesazh mirënjohjeje për mbështetjen e tij ndaj Jane Goodall Legacy Foundation, duke vlerësuar angazhimin e tij për mbrojtjen e kafshëve dhe të mjedisit.

Shfaqja e mesazhit gjatë koncertit mori një ngarkesë të veçantë emocionale, pasi Goodall, një prej figurave më të njohura në botë në mbrojtje të natyrës dhe kafshëve, u nda nga jeta më 1 tetor 2025, në moshën 91-vjeçare.

Moby, i cili prej vitesh është i njohur edhe për aktivizmin e tij në çështjet e të drejtave të kafshëve dhe mbrojtjes së mjedisit, e ka mbështetur publikisht punën e Goodall dhe fondacionin e saj.

Momenti në Greenwich u kthye kështu në një homazh të ndjerë për një prej zërave më të fuqishëm të brezave të fundit në mbrojtje të natyrës. 

The post Moby shfaq mesazhin e papublikuar të Jane Goodall gjatë koncertit në Greenwich appeared first on Agjencia Telegrafike Shqiptare.

TIRANË, 17 gusht/ATSH/ Në vijim të ngjarjes së ndodhur një ditë më parë në një strukturë akomoduese në Vlorë, u mblodh sot task-forca ndërinstitucionale e sezonit turistik, me fokus të posaçëm te forcimi i masave të sigurisë në strukturat akomoduese, koordinimi ndërinstitucional dhe garantimi i një reagimi të menjëhershëm në çdo situatë emergjente gjatë sezonit turistik.

Në mbledhjen e task-forcës, ministri i Turizmit, Kulturës dhe Sportit, Blendi Gonxhja theksoi se siguria e pushuesve dhe standardet në strukturat akomoduese janë prioritet absolut.

“Parandalimi, bashkëpunimi, protokollet dhe përgjegjshmëria e të gjithë aktorëve mbeten thelbësore. Siguria e çdo vizitori dhe qytetari janë në qendër të punës sonë për një sezon turistik të sigurt dhe cilësor. Ndërgjegjësimi dhe masat ndëshkuese, mirorganizimi, vigjilenca dhe përditësimi i sistemeve operative janë domosdoshmëri”, u shpreh ministri Gonxhja, në mbledhjen e zhvilluar online.

Task-forca nënvizoi se siguria e pushuesve, qytetarëve dhe punonjësve të sektorit turistik është e panegociueshme dhe kërkon respektim rigoroz të standardeve nga çdo strukturë që ushtron aktivitet në sektorin e turizmit.

Në këtë kuadër, u kërkua intensifikimi i kontrolleve në strukturat akomoduese në të gjithë territorin, me vëmendje të veçantë ndaj respektimit të kushteve teknike dhe masave të mbrojtjes nga zjarri, funksionimit të sistemeve dhe pajisjeve të sigurisë, daljeve të emergjencës, sinjalistikës dhe planeve të evakuimit.

Gjithashtu, institucionet përgjegjëse u ngarkuan të forcojnë koordinimin në terren dhe shkëmbimin e informacionit, në mënyrë që evidentimi i çdo problematike të pasohet nga ndërhyrje e shpejtë dhe masa konkrete.

Në mbledhje u theksua nevoja që kontrollet të shoqërohen edhe me një komunikim të drejtpërdrejtë me operatorët turistikë, për rritjen e ndërgjegjësimit dhe përgjegjshmërisë në zbatimin e standardeve të sigurisë.

Task-forca vlerësoi gjithashtu reagimin solidar të komunitetit të biznesit turistik në Vlorë, si një shembull të përgjegjësisë dhe bashkëpunimit që duhet të karakterizojë sektorin, veçanërisht në situata të jashtëzakonshme.

Institucionet shtetërore do të vijojnë monitorimin e situatës gjatë gjithë sezonit turistik, me prezencë të shtuar në destinacionet me fluks të lartë dhe me masa të menjëhershme ndaj çdo rasti që cenon standardet e sigurisë dhe cilësinë e shërbimit.

Shqipëria mbetet një destinacion i sigurt dhe mikpritës dhe garantimi i sigurisë dhe mirëqenies së çdo vizitori është përgjegjësi e përbashkët e institucioneve dhe sektorit privat.

/m.m/r.e/

The post Gonxhja: Siguria e pushuesve dhe standardet në strukturat akomoduese, prioritet absolut appeared first on Agjencia Telegrafike Shqiptare.

TIRANË, 17 gusht /ATSH/ Në vitin 1950, Museum of Modern Art në New York i kushton një ekspozitë të veçantë fotografive të Pablo Picasso-s, të realizuara nga dy fotografë të jashtëzakonshëm të shekullit XX: Gjon Mili dhe Robert Capa.

Por për Milin, ky nuk ishte thjesht një rast për të fotografuar një nga artistët më të rëndësishëm të kohës. Takimi me Picasso-n në Vallauris, në vitin 1949, u shndërrua në një nga bashkëpunimet më të famshme të historisë së fotografisë.

Mili i propozon Picasso-s të vizatojë në ajër me një burim drite, ndërsa kamera, përmes ekspozimit të gjatë, regjistron gjurmët e padukshme të lëvizjes. Në errësirë lindin centaurë, figura dhe forma abstrakte që ekzistojnë vetëm për pak sekonda – por fotografia i bën të përjetshme.

Këto “light drawings” shënojnë një moment të jashtëzakonshëm ku piktura, fotografia, koha dhe lëvizja bashkohen në një imazh të vetëm.

Më shumë se shtatë dekada më vonë, historia e këtij bashkëpunimi rikthehet në Shqipëri, në ekspozitën “Gjon Mili: Retrospektivë” në Muzeun Kombëtar të Fotografisë “Marubi” Shkodër.

Në Muzeun “Marubi” ekspozohet një objekt i rrallë që dëshmon jo vetëm krijimtarinë e Gjon Milit, por edhe rrjetin ndërkombëtar të marrëdhënieve profesionale që ai ndërtoi në zemër të skenës artistike të Nju-Jorkut të pasluftës.

Ky Presentation Album, i realizuar në vitin 1950 për ekspozitën “Photographs of Picasso by Gjon Mili and Robert Capa” në Muzeun e Artit Modern (The Museum of Modern Art – MoMA), në Nju-Jork, nuk është një katalog i zakonshëm ekspozite.

Albumi përmban një dokumentim profesional të ekspozitës duke përfshirë disa nga imazhet më ikonike të Gjon Milit me Pablo Picasso-n, si dhe serinë e famshme të “Light Drawings”, ku Picasso “vizaton” në ajër me dritë, ndërsa aparati fotografik i Milit regjistron gjurmët e lëvizjes.

Ky album u prodhua në një numër shumë të kufizuar kopjesh si Presentation Album, një format prestigjioz i rezervuar për personalitete të botës së artit, muzeve dhe botimeve kulturore.

Kopja e ekspozuar në Muzeun “Marubi” mban në kopertinë emrin e Alexander Liberman (1912–1999), një prej figurave më me ndikim të kulturës vizuale amerikane të shekullit XX, drejtor artistik i Condé Nast, më pas Editorial Director i Vogue, fotograf dhe mik i shumë prej artistëve më të rëndësishëm modernë.

Albumi është i nënshkruar, i datuar (19 maj 1950) dhe i dedikuar nga Gjon Mili për Alexander Liberman, duke e shndërruar këtë objekt në një dëshmi të drejtpërdrejtë të marrëdhënies profesionale dhe respektit reciprok mes dy figurave të rëndësishme të fotografisë dhe kulturës vizuale ndërkombëtare.

Përtej vlerës së tij bibliografike, ky album përfaqëson një fragment të historisë së fotografisë moderne, ku arti, fotografia, muzeu dhe botimet ndërkombëtare takohen në një objekt të vetëm.

Nëpërmjet tij, Gjon Mili nuk paraqitet vetëm si autori i fotografive ikonike të Picasso-s, por edhe si një protagonist aktiv i rrjetit kulturor që formësoi historinë e artit të shekullit XX.

Objekte të tilla na kujtojnë se trashëgimia fotografike nuk përbëhet vetëm nga imazhet, por edhe nga historitë, marrëdhëniet dhe dialogët që ato kanë krijuar ndër vite.

Ekspozita “Gjon Mili: Retrospektivë” qëndron e hapur që nga data 12 qershor. Ajo është e kuruar nga Howard Greenberg dhe mbështetet nga Ministria e Turizmit, Kulturës dhe Sportit.

The post “Marubi” rikthen pas shtatë dekadash bashkëpunimin Gjon Mili – Picasso appeared first on Agjencia Telegrafike Shqiptare.

TIRANË, 17 gusht/ATSH/ Policia Rrugore e Vlorës dhe Sarandës po vijon monitorimin intensiv të qarkullimit në të gjitha akset rrugore të qarkut, me përdorimin e dronëve, radarëve dhe automjeteve inteligjente, me qëllim rritjen e sigurisë rrugore dhe parandalimin e aksidenteve gjatë sezonit veror.

Kontrollet janë përqendruar veçanërisht te drejtuesit e mjeteve që drejtojnë nën efektin e alkoolit, pa leje drejtimi, tejkalojnë shpejtësinë e lejuar apo kryejnë manovra të rrezikshme, në kushtet e fluksit të shtuar të automjeteve në akset e qarkut.

Gjatë një jave, si rezultat i kontrolleve, janë arrestuar dhe proceduar penalisht 21 drejtues mjetesh. Konkretisht, 17 persona janë arrestuar për drejtim të mjetit në gjendje të dehur, një për shkelje të rregullave të qarkullimit rrugor dhe largim nga vendi i aksidentit me pasojë, ndërsa tre të tjerë janë proceduar në gjendje të lirë për drejtim të mjetit pa leje drejtimi.

Gjatë së njëjtës periudhë janë vendosur 1124 masa administrative për tejkalim të kufijve të shpejtësisë, 593 për mospërdorimin e kaskës mbrojtëse, 56 për parakalime të gabuara dhe 98 për mospërdorimin e rripit të sigurimit.

Policia Rrugore ka vendosur gjithashtu 31 masa për përdorimin e xhamave të zinj, 5 për mosdhënie përparësie këmbësorëve, 32 për përdorimin e celularit gjatë drejtimit të mjetit dhe 18 për pozicionim të gabuar të mjetit.

Në kuadër të kontrolleve janë evidentuar edhe 47 raste të drejtimit të mjetit në efektin e alkoolit, ndërsa 1248 masa administrative janë vendosur për shkelje të tjera të Kodit Rrugor.

Kontrollet do të vijojnë në të gjitha akset urbane, interurbane dhe rurale të qarkut Vlorë, me përdorimin e mjeteve dhe pajisjeve bashkëkohore të monitorimit, në funksion të menaxhimit të trafikut dhe parandalimit të aksidenteve rrugore.

Policia Rrugore apelon drejtuesit e mjeteve të respektojnë me rigorozitet rregullat e qarkullimit rrugor, veçanërisht kufijtë e shpejtësisë, përdorimin e rripit dhe kaskës mbrojtëse, si dhe të mos drejtojnë automjetin nën efektin e alkoolit.

/m.m/r.e/

The post Kontrolle intensive gjatë sezonit veror në Vlorë e Sarandë, procedohen 21 drejtues mjetesh appeared first on Agjencia Telegrafike Shqiptare.

TEL AVIV, 17 gusht /ATSH -AA/ – Një raport i fundit zyrtar i Knesset-it tregoi një rënie të mprehtë të numrit të izraelitëve që kthehen në Izrael gjatë viteve të fundit, krahas një rritje të numrit të atyre që largohen nga vendi, raportoi të hënën Yedioth Ahronoth.

“Vala e armiqësisë ndaj Izraelit në botë dhe ndjenja e përkatësisë mund të ketë çuar në një rritje të numrit të izraelitëve që kthehen, pavarësisht luftës,” tha gazeta duke cituar një raport nga Qendra e Kërkimit dhe Informacionit të Knesset.

Raporti vjen mes zemërimit të gjerë publik dhe zyrtar ndaj Izraelit në mbarë botën për luftën gjenocidale të mbështetur nga SHBA në Gaza që nga 8 tetori 2023.

Gjenocidi ka vrarë më shumë se 73.000 palestinezë dhe ka plagosur mbi 174.000, shumica prej tyre gra dhe fëmijë, ndërsa ka shkatërruar 90 për qind të infrastrukturës së Gazës. OKB-ja ka vlerësuar koston e rindërtimit në rreth 70 miliardë dollarë.

“Në vitet 2022-2024, ka pasur një rënie drastike prej 53 për qind të numrit të banorëve të kthyer”, theksohet në raportin e Knesset, sipas gazetës.

Raporti nuk trajtoi përqindjen e izraelitëve të kthyer në vitin 2025.

Gazeta tha se rënia përkon me të dhënat e publikuara së fundmi nga Byroja Qendrore e Statistikave të Izraelit dhe studiues akademikë që tregojnë një rritje të mprehtë të numrit të izraelitëve që largohen nga vendi.

“Studimi trajtoi gjithashtu një sërë sfidash burokratike, ekonomike dhe sociale që e bëjnë të vështirë për izraelitët marrjen e një vendimi për t’u kthyer,” tha gazeta.

Këto përfshijnë periudha të gjata pritjeje për të marrë sigurimin shëndetësor shtetëror, më pak përfitime në krahasim me emigrantët e rinj, sfidat e punësimit dhe vështirësitë në integrimin e fëmijëve në sistemin arsimor.

Yedioth Ahronoth tha se numri mesatar vjetor i izraelitëve të kthyer ishte rreth 9.300 midis 2008 dhe 2012, përpara se të binte në rreth 7,400 midis 2013 dhe 2020.

“Ka pasur një rënie të madhe në numrin e të kthyerve nga rreth 8.000 në 2020 në rreth 3.800 në 2024 – numri më i ulët në vitet e fundit”, tha ai.

Sipas gazetës, raporti thotë se rënia më e madhe ka ndodhur në vitin 2023, pa dhënë detaje të mëtejshme.

Rënia e migracionit të kthimit kontribuoi gjithashtu në deficitin e bilancit të migracionit të Izraelit midis 2022 dhe 2024, i cili mat diferencën midis atyre që hyjnë dhe dalin nga vendi.

Sipas të dhënave të Byrosë Qendrore të Statistikave të cituara në raport, Izraeli regjistroi një deficit migrimi prej rreth 140.000 njerëzve gjatë këtyre tre viteve.

Gazeta tha se Amerika e Veriut ka zënë prej kohësh pjesën më të madhe të izraelitëve të kthyer, por numri i të kthyerve nga atje gjithashtu ka rënë ndjeshëm.

Rreth gjysma e të gjithë të kthyerve midis 2005 dhe 2024 erdhën nga Amerika e Veriut, ndërsa 13 për qind të tjerë u kthyen nga Britania, Gjermania dhe Franca, dhe 6 për qind nga Rusia dhe Ukraina.

Numri i të kthyerve nga SHBA-ja ra ndjeshëm, nga rreth 3.700 në 2020 në vetëm 1.500 në 2024.

“Përqindja e banorëve të kthyer nga Rusia dhe Ukraina u rrit ndjeshëm në vitin 2022 në 9 për qind nga Ukraina dhe 8 për qind nga Rusia e të gjithë të kthyerve, me sa duket për shkak të luftës Rusi-Ukrainë”, tha gazeta.  /os/

The post DEMOGRAFI – Izraeli sheh një rënie prej 53% të të kthyerve, ndërsa largimet rriten appeared first on Agjencia Telegrafike Shqiptare.

TIRANË, 17 gusht/ATSH/ Ministri i Turizmit, Kulturës dhe Sportit, Blendi Gonxhja mori pjesë sot në ceremoninë e dorëzimit të flamurit, delegacionit shqiptar që merr pjesë në Lojërat Mesdhetare “Taranto 2026”.

Në fjalën e mbajtur me këtë rast, Gonxhja vlerësoi përfaqësimin e Shqipërisë në një prej ngjarjeve të rëndësishme të sportit ndërkombëtar.

Sipas ministrit, sportisti elitar është një nga pasuritë më të mëdha të sportit shqiptar, ndaj dhe qeveria po krijon kushte për t’i mbështetur më tej ata.

“Pas çdo rezultati qëndrojnë vite pune, sakrifice, stërvitje dhe disiplinë. Prandaj, detyra jonë si institucione nuk është vetëm t’ju kërkojmë rezultate, por të krijojmë kushtet që ju të mund t’i arrini ato. Dhe pikërisht këtë kemi filluar ta bëjmë në mënyrë konkrete.”

Me ndryshimet e fundit në skemën e shpërblimeve për sportistët e nivelit të lartë, Gonxhja theksoi se është rritur ndjeshëm vlera që shteti shqiptar i jep suksesit sportiv.

“Në Lojërat Olimpike, shpërblimi për medaljen e artë është rritur me 50%, për medaljen e argjendtë me rreth 86%, ndërsa për medaljen e bronztë është dyfishuar. Në Kampionatet Evropiane, rritja shkon nga 50% deri në 200%, në varësi të vendit të arritur. Edhe në Lojërat Mesdhetare, ku ju do të garoni në Taranto, shpërblimi për vendin e parë është rritur me 50%, ndërsa për vendin e dytë është dyfishuar”, informoi Gonxhja.

Kjo, sipas tij, “është një dëshmi konkrete se si shteti shqiptar po e rrit vlerësimin për sportistin elitar dhe për rezultatet që ai arrin në arenën ndërkombëtare”.

Po ashtu, ministri theksoi se kjo mbështetje nuk ndalet vetëm te sportisti. “Shpërblimi i trajnerëve është rritur nga 40% në 50% të shpërblimit të sportistit, ndërsa trajtimi ushqimor është dyfishuar, nga 2500 në 5000 lekë në ditë”, shtoi ai.

Një tjetër lehtësi, sipas ministrit Gonxhja është thjeshtimi i procedurave për sportistët.

“Verifikimi antidoping tashmë bëhet përmes konfirmimit nga OKAD-i, duke shmangur një barrë të panevojshme administrative për sportistin, pa cenuar luftën kundër dopingut. Përkundrazi, kjo forcon rolin e OKAD-it në garantimin e integritetit të sportit”, theksoi Gonxhja.

Këto, sipas tij, “janë hapa konkretë që synojnë ta vendosin sportistin elitar në qendër të politikave tona sportive dhe të krijojnë një marrëdhënie më të drejtë mes rezultateve, sakrificës dhe mbështetjes që ofron shteti”.

“E ardhmja e financimit të sportit duhet të jetë më e gjerë dhe më e qëndrueshme.
Në këtë drejtim, një nga prioritetet tona është projektligji për sponsorizimet në sport, për të krijuar një kuadër më të përshtatshëm për përfshirjen e sektorit privat në mbështetjen e sportit. Ne duam që sporti shqiptar të ketë më shumë burime financimi, më shumë partneritete dhe një rol gjithnjë e më të madh të sipërmarrjes private në zhvillimin e tij”, shtoi ai.

Një sport i qëndrueshëm, sipas ministrit, nuk mund të mbështetet vetëm në fondet publike, por duhet të ndërtohet një model ku shteti, biznesi dhe komuniteti sportiv bashkëpunojnë për të krijuar më shumë mundësi për sportistët dhe federatat.

Po ashtu, Gonxhja solli në vëmendje Lojërat Mesdhetare “Prishtina 2030”, të cilat sipas tij, “do të sjellin një tjetër sfidë dhe mundësi të rëndësishme për sportin shqiptar”.

“Shqipëria, përmes Durrësit, do të jetë pjesë e këtij eventi, duke mirëpritur zhvillimin e garave të lundrimit. Përgatitja për këtë event duhet të fillojë që tani, jo vetëm në aspektin e organizimit dhe infrastrukturës, por edhe duke menduar për trashëgiminë që këto Lojëra do të lënë për sportin shqiptar. Prishtina 2030 është gjithashtu një mundësi e rëndësishme për të forcuar bashkëpunimin mes Shqipërisë dhe Kosovës përmes sportit dhe për të treguar se mund të organizojmë së bashku një event me standarde të larta ndërkombëtare”, theksoi ai.

1 nga 4

/m.m/r.e/

The post Shqipëria në Lojërat Mesdhetare “Taranto 2026”, Gonxhja: Rritëm mbështetjen për sportistët elitarë appeared first on Agjencia Telegrafike Shqiptare.

TIRANË, 17 gusht /ATSH/ – Robert De Niro, një prej aktorëve më të mëdhenj dhe më të respektuar të kinemasë botërore, feston sot 83-vjetorin e lindjes, pas më shumë se gjashtë dekadash në skenë dhe në ekran.

I lindur më 17 gusht 1943 në Nju Jork, De Niro u afrua me aktrimin që në moshë të hershme. Ai ka treguar se ishte rreth 9 ose 10 vjeç kur kuptoi se dëshironte të bëhej aktor, ndërsa mbështetja e prindërve dhe mundësia për të ndjekur kurse aktrimi në fëmijëri i dhanë shtysën e parë një karriere që do ta kthente në një ikonë të Hollywood-it. 

Ajo që e dalloi De Niron që në fillimet e karrierës ishte mënyra fizike dhe e drejtpërdrejtë me të cilën i afrohej një personazhi. Për të, kostumi, pamja, mënyra e të lëvizurit dhe çdo detaj i jashtëm nuk ishin thjesht elemente të rolit, por një mënyrë për ta ndjerë dhe për ta kuptuar personazhin nga brenda.

Karriera e tij në film nisi në vitet ’60, por dekada e artë do të vinte në vitet ’70, kur ai u shfaq në filma që do të hynin përgjithmonë në historinë e kinemasë, mes tyre Mean Streets, The Godfather Part II, Taxi Driver dhe The Deer Hunter. 

Në The Godfather Part II, De Niro interpretoi Vito Corleonen e ri, personazhin që në filmin e parë ishte luajtur nga Marlon Brando. Roli i solli Oscar-in e parë, në vitin 1975, për aktorin më të mirë në rol dytësor.

Disa vite më vonë, ai do të fitonte një tjetër Oscar, këtë herë për aktorin më të mirë, për interpretimin e boksierit Jake LaMotta në Raging Bull. Për këtë rol, De Niro u shndërrua fizikisht në personazh, duke dëshmuar edhe një herë përkushtimin e jashtëzakonshëm ndaj artit të aktrimit. 

Por lista e roleve që kanë përcaktuar karrierën e tij nuk ndalet këtu. Taxi Driver, Goodfellas, Casino, Heat dhe shumë filma të tjerë e konsoliduan figurën e De Niros si një aktor që mund të interpretonte personazhe të errëta, komplekse, të dhunshme, por edhe role komike dhe dramatike me të njëjtën bindje.

Në ekran, ai ka krijuar personazhe që nuk harrohen lehtë. Shpesh mjaftonte një shikim, një heshtje apo një gjest i vogël për të përcjellë tensionin e një skene. Pikërisht kjo aftësi për ta bërë personazhin të duket i vërtetë e ka kthyer De Niron në një nga figurat më të rëndësishme të aktrimit amerikan.

Përveç dy çmimeve Oscar, De Niro ka fituar edhe një Golden Globe për Raging Bull, ndërsa në vitin 2011 u nderua me çmimin Cecil B. DeMille për kontributin e tij të jashtëzakonshëm në kinematografi. (Parade⁠)

Në moshën 83-vjeçare, Robert De Niro vazhdon të jetë aktiv në kinema dhe në jetën publike. Karriera e tij është një nga ato histori të rralla të Hollywood-it ku koha nuk e ka zbehur figurën e aktorit, por vetëm e ka forcuar atë.

Nga një djalë i ri i Nju Jorkut që zbuloi aktrimin në fëmijëri, te Vito Corleone, Travis Bickle, Jake LaMotta dhe Henry Hill, Robert De Niro ka lënë pas një galeri personazhesh që janë bërë pjesë e kujtesës së kinemasë botërore.

83 vite jetë dhe më shumë se gjashtë dekada në ekran – Robert De Niro mbetet një nga emrat që i dhanë fytyrë, zë dhe shpirt kinemasë moderne.

The post Robert De Niro feston 83-vjetorin: Një kthim pas në karrierën e tij të jashtëzakonshme appeared first on Agjencia Telegrafike Shqiptare.

TIRANË, 17 gusht/ATSH/ Saranda vijon të jetë një nga destinacionet më të frekuentuara turistike të jugut gjatë muajit gusht, në kulmin e sezonit veror.

Përveç bregdetit, turistët kanë mundësi të vizitojnë edhe atraksione të tjera turistike si Parku i Butrintit, “Syri i Kaltër” apo Kalanë e Lëkurësit, e vendosur në kodrat mbi Sarandë, nga ku hapet një panoramë e gjerë mbi qytet.

Kryeministri Edi Rama ndau sot pamje nga një pasdite vere në qytetin jugor, ku turistë të shumtë kanë zgjedhur Kalanë e Lëkurësit, si pikë e preferuar panoramike mbi gjirin e Sarandës.

Me një fluks në rritje të turistëve vendas dhe të huaj, muaji gusht mbetet piku i sezonit turistik në Sarandë.

Kombinimi i bregdetit, trashëgimisë historike dhe peizazheve natyrore e pozicionon Sarandën ndër destinacionet kryesore të turizmit shqiptar gjatë sezonit veror.

/m.m/r.e/

The post Pasdite vere në Sarandën e mbushur me turistë appeared first on Agjencia Telegrafike Shqiptare.

LONDËR, 17 gusht /ATSH AA/ – Kryetari i Bashkisë së Londrës, Sadiq Khan, u bëri thirrje të hënën banorëve të qëndrojnë vigjilentë, pasi rreziku nga zjarret në natyrë mbetet i lartë pas javësh me kushte të thata.

“Disa ditë më të freskëta nuk do t’i zhbëjnë javët me kushte të thata. Rreziku nga zjarret në natyrë mbetet i lartë”, shkroi Khan në rrjetin social amerikan X.

Ai tha se terreni i thatë dhe sjellja e pakujdesshme mund të shkaktojnë shpejt një zjarr, duke u bërë thirrje londinezëve të “veprojnë me përgjegjësi” dhe të raportojnë në polici çdo rast të dyshuar zjarrvënieje të qëllimshme.

Javën e kaluar, Britania ndaloi përkohësisht barbekjut njëpërdorimëshe në gjithë Mbretërinë e Bashkuar, për shkak të shqetësimeve se ato paraqesin një “rrezik të konsiderueshëm për publikun” në mes të thatësirës dhe valëve të të nxehtit.

Masa u ndërmor pasi çështja u diskutua gjatë një takimi emergjent të enjten të ministrave të kabinetit dhe zyrtarëve të tjerë, të kryesuar nga kryeministri Andy Burnham, lidhur me reagimin e qeverisë ndaj temperaturave rekord.

Burnham tha se vendi është si “një fuçi baruti”, ndërsa ekipet e zjarrfikësve në West Midlands vazhdojnë të luftojnë me disa vatra zjarri.

Në një video-mesazh të publikuar në X, ai tha veçmas se zjarret e fundit në natyrë janë tregues të ndryshimeve klimatike.

“Ky është ndryshimi klimatik ashtu siç duket, këtu dhe tani”, tha Burnham, duke shtuar se Mbretëria e Bashkuar është përballur me një numër zjarresh në natyrë gjatë ditëve të fundit.

“Nuk duhet ta pranojmë thjesht këtë si diçka të pashmangshme, dhe unë nuk e pranoj”, shtoi ai.

The post BM – Londinezëve u kërkohet të qëndrojnë vigjilentë pasi kërcënimi i zjarreve “mbetet i lartë” appeared first on Agjencia Telegrafike Shqiptare.

TIRANË, 17 gusht/ATSH/ Forcat e Armatosura vijojnë angazhimin intensiv në operacionet për përballimin e zjarreve në disa zona të vendit.

Ministri i Mbrojtjes, Ermal Nufi ndau sot pamje nga aksioni që po zhvillohet për fikjen e zjarreve nga ajri në zona të ndryshme të vendit, ku terreni është i vështirë.

Konkretisht, Nufi theksoi se në malin e Dajtit në Tiranë po vijon puna e forcave operacionale, të mbështetura nga 50 efektivë të FA-së dhe 2 helikopterë të Forcës Ajrore. Aktualisht, nuk ka rrezik për zonat e banuara.

Ndërsa në Lufaj, Mirditë po vijon puna e strukturave në terren me 2 mjete zjarrfikëse të FA-së dhe me 9 efektivë. Aktualisht, vatra nuk paraqet rrezik për banesat.

Nufi informoi po ashtu se në Fushë-Lajë, Pukë po vijon operacioni me angazhimin e 40 efektivëve të FA-së. Aktualisht, nuk ka rrezik për zonat e banuara.

/m.m/r.e/

The post Nufi: Ndërhyrje nga toka dhe ajri për fikjen e zjarreve, nuk ka rrezik për banesat appeared first on Agjencia Telegrafike Shqiptare.

KATANIA, 17 gusht /ATSH -DPA/ –  Emetimet e reja të hirit nga mali Etna kanë shkaktuar sërish kufizime të pjesshme të trafikut ajror në aeroportin ndërkombëtar të Katanias, në ishullin italian të Siçilisë.

Për shkak të hirit vullkanik, një pjesë e hapësirës ajrore është mbyllur, duke kufizuar numrin e avionëve që mund të mbërrijnë në aeroport.

Sipas kufizimeve të reja, vetëm 10 avionë në orë lejohen të ulen në Katania deri në orën 12:00 të së martës. Nisjet e avionëve nuk janë të kufizuara.

Pasagjerëve u është kërkuar të kontaktojnë kompanitë e tyre ajrore për të kontrolluar statusin e fluturimeve.

Situata në aeroport ishte kthyer vetëm gjatë fundjavës në normalitet, pasi operacionet e fluturimeve ishin ndërprerë rëndë për më shumë se një javë.

Etna kishte lëshuar vazhdimisht re hiri pas një shpërthimi vullkanik, duke shkaktuar probleme të konsiderueshme për trafikun ajror. Shumë fluturime u anuluan ose u devijuan, duke prekur mijëra turistë.

Të shtunën, niveli i alarmit për vullkanin më në fund u ul dhe fluturimet rifilluan normalisht. Megjithatë, emetimet e fundit të hirit kanë rikthyer kufizimet në aeroport. /os/

The post FOKUS – Alarm në Siçili: hiri i Etna-s prek trafikun ajror appeared first on Agjencia Telegrafike Shqiptare.

TIRANË, 17 gusht/ATSH/ Korporata Shqiptare e Investimeve (AIC) po vijon punën për zhvillimin e projekteve të reja dhe krijimin e mundësive për investime në Tiranë dhe në qarqe të ndryshme të vendit.

Ministrja e Ekonomisë dhe Inovacionit, Delina Ibrahimaj bëri të ditur sot se AIC ka përfunduar 14 konkurse publike ndërkombëtare, ndërsa dy të tjera janë aktualisht në proces.

Sipas Ibrahimajt, deri tani janë nënshkruar 12 kontrata me partnerë privatë, ndërsa dy kontrata janë në proces negocimi. Po ashtu, janë lidhur 21 marrëveshje bashkëpunimi me partnerë publikë dhe janë identifikuar 20 projekte investimi me interes publik.

Ibrahimaj theksoi se këto projekte sjellin një përfitueshmëri prej 523 milionë eurosh për Korporatën Shqiptare të Investimeve dhe shtetin, ndërsa ndikimi i tyre në ekonomi vlerësohet në 1,41 miliardë euro. Përmes tyre parashikohet gjithashtu gjenerimi i rreth 94 milionë eurove në taksa dhe tarifa për shtetin.

Një tjetër drejtim i rëndësishëm, sipas saj, është zhvillimi dhe menaxhimi i parkut teknologjik dhe shkencor, i cili vetëm në një vit ka krijuar 570 vende pune. Në të njëjtën periudhë janë eksportuar 14 milionë euro shërbime të teknologjisë së informacionit.

“Dhe kjo është vetëm një pjesë e punës sonë”, theksoi Ibrahimaj, duke nënvizuar potencialin që projektet e AIC kanë për zhvillimin ekonomik dhe krijimin e mundësive të reja për investitorët.

Ibrahimaj ftoi investitorët dhe subjektet e interesuara të eksplorojnë thirrjet e hapura, projektet në zhvillim dhe mundësitë për t’u bërë pjesë e projekteve të Korporatës Shqiptare të Investimeve.

/m.m/r.e/

The post Ibrahimaj: AIC po krijon mundësi të reja investimi në gjithë vendin appeared first on Agjencia Telegrafike Shqiptare.

TIRANË, 17 gusht/ATSH/ Shqipëria vijon të mbetet një destinacion i kërkuar për turistët e huaj të cilët vlerësojnë veçanërisht mikpritjen, kulinarinë dhe bregdetin.

Zëvendëskryeministrja Albana Koçiu ndau sot në rrjetet sociale opinionet e disa turistëve të huaj që kanë zgjedhur Vlorën për të pushuar.

“Hera e parë në Vlorë, dhe me siguri jo e fundit, për miqtë e rinj të Shqipërisë, që vijnë nga e gjithë bota për të vizituar bukuritë e bregdetit dhe për të përjetuar mikpritjen shqiptare”, u shpreh Koçiu.

Dy turistë nga Brazili, të cilët e vizitojnë për herë të parë Vlorën, shprehen se u pëlqen shumë Shqipëria, ndërsa ftojnë edhe turistë të tjerë ta vizitojnë.

Një tjetër turist, nga Argjentina, shprehet se është hera e parë në Vlorë dhe se i pëlqen shumë bregdeti dhe njerëzit.

“Është hera e parë në Vlorë dhe hera e parë në Shqipëri. Njerëzit, e duan këtë vend. Është dita ime e dytë, por deri tani është shkëlqyeshëm. Po mendonim për një qëndrim prej 2 muajsh”, thotë ai.

Një tjetër turist i huaj shprehet se qyteti i duket fantastik dhe se ka pamje të mrekullueshme.

“Pishina është vërtet e këndshme. Pra, po, jam shumë i lumtur për këtë. Do të shkojmë në këmbë drejt plazhit dhe do të shijojmë kohën. Ndoshta do të pimë diçka. Ejani në Shqipëri. Do t’ju pëlqejë shumë”, shprehet ai.

Një tjetër turiste nga Polonia vlerëson ushqimin e mirë dhe njerëzit miqësorë.

“Më pëlqen qyteti. Kam dëgjuar shumë vlerësime pozitive në rrjetet sociale: sa i bukur është, ushqim i mirë, njerëz miqësorë, pushime shumë të mira këtu. Do t’u shkruaj të tjerëve se është fantastike dhe se duhet të vijnë”, thotë ajo.

/m.m/r.e/

The post Turistët e huaj në Vlorë: Ushqim i mirë dhe njerëz miqësorë appeared first on Agjencia Telegrafike Shqiptare.

UASHINGTON, 17 gusht /ATSH-AFP/ – Presidenti amerikan, Donald Trump kërcënoi sot të bombardojë Omanin nëse vendi pengon një marrëveshje për Ngushticën e Hormuzit, pasi Muskati dhe Teherani kanë zhvilluar bisedime për javë të tëra pa Uashingtonin në lidhje me këtë rrugë ujore strategjike.

“Nëse Omani na pengon, ne do t’i bombardojmë ata”, i tha presidenti amerikan gazetarit të ‘’Fox News’’, Trey Yingst, sipas postimit të tij në X, në përgjigje të një pyetjeje në lidhje me diskutimet e vazhdueshme midis dy vendeve.

Zyrtarët iranianë dhe omanë kanë qenë në bisedime për disa javë për të arritur një marrëveshje mbi kalimin e anijeve përmes Ngushticës së Hormuzit, e cila kalon midis brigjeve të dy vendeve.

Teherani ka qenë duke e mbyllur ngushticën pothuajse vazhdimisht që nga fundi i shkurtit, pas sulmit izraelito-amerikan ndaj Iranit, i cili shkaktoi luftën në Lindjen e Mesme.

Në përgjigje, Shtetet e Bashkuara vendosën një bllokadë në portet iraniane.

“Bisedimet midis Iranit dhe Omanit po vazhdojnë në një mënyrë serioze”, deklaroi sot një zëdhënës i Ministrisë së Jashtme iraniane.
Trump gjithashtu i bëri thirrje Iranit të ngrejë flamurin e bardhë të dorëzimit.

“Nuk kam asnjë nxitim”, shtoi ai, duke deklaruar se zgjedhjet e mesmandatit në nëntor “nuk e ndryshojnë mënyrën time të të menduarit”./ /os/

The post SHBA – Trump kërcënon të bombardojë Omanin nëse pengon marrëveshjen e Hormuzit appeared first on Agjencia Telegrafike Shqiptare.

RIGA, 17 gusht /ATSH-DPA/ – Një dron i rrëzuar nga avionët luftarakë të NATO-s mbi territorin e Letonisë javën e kaluar kishte hyrë në hapësirën ajrore të vendit nga Bjellorusia fqinje, deklaroi sot ministri letonez i Mbrojtjes, Raivis Melnis.

Megjithatë, ministri theksoi se origjina e dronit mbetet ende e paqartë.

Avionë luftarakë italianë “Eurofighter” rrëzuan të premten dronin mbi rajonin e Balvit, në verilindje të Letonisë, rreth 20 kilometra nga qyteti me të njëjtin emër.

Ushtria letoneze kontrolloi vendin ku u rrëzua droni dhe shpërtheu në mënyrë të kontrolluar mbetjet e rrezikshme.

Sipas Melnis, pjesë të mjetit fluturues vazhdojnë të analizohen nga ekspertët për të përcaktuar origjinën dhe funksionin e tij.

Sipas ushtrisë letoneze, droni hyri në hapësirën ajrore të vendit si pasojë e ndërhyrjeve ruse në sinjalet e navigimit.

Kjo ka nxitur dyshimet se mund të bëhej fjalë për një dron ukrainas që kishte devijuar nga trajektorja e tij.

Letonia kufizohet me Rusinë në lindje dhe që nga fillimi i luftës në Ukrainë janë regjistruar disa incidente me dronë në territorin e saj.

Në disa raste, dronë që kishin humbur drejtimin kanë hyrë në hapësirën ajrore letoneze dhe janë rrëzuar pasi ishin devijuar nga objektivat e tyre në veriperëndim të Rusisë.

Në fillim të qershorit, avionët luftarakë të NATO-s rrëzuan një tjetër dron të devijuar mbi territorin e Letonisë.

Melnis paralajmëroi se dronët që hyjnë në territorin letonez do të vazhdojnë të rrëzohen për të mbrojtur sigurinë e banorëve dhe pronën e tyre.

Sipas tij, rreziku i incidenteve të tjera me dronë mbetet i pranishëm.

“Ukraina po mbron veten dhe vazhdon të sulmojë territorin rus me dronë, ndërsa Rusia po merr kundërmasa”, tha ministri letonez i Mbrojtjes. /Ad.Ab./ a.jor.

The post LETONI – Rrëzohet një dron i ardhur nga Bjellorusia appeared first on Agjencia Telegrafike Shqiptare.