MOSKE, 31 dhjetor /ATSH-ANSA/ – Jam i bindur se natyra raciste e regjimit të Kievit dhe cinizmi i sponsorëve të tij të jashtëm janë qartësisht të dukshme për anëtarët e ndershëm të bashkësisë ndërkombëtare, theksoi ministri i Jashtëm rus Sergei Lavrov, duke falënderuar “miqtë dhe partnerët tanë të huaj që dënuan sulmin terrorist ndaj rezidencës së Vladimir Putinit”.

Kievi nuk e kupton se pa i dhënë fund gjithë kësaj politike kriminale, negociatat për të arritur një zgjidhje të besueshme dhe të qëndrueshme për krizën ukrainase nuk do të jenë të suksesshme”, theksoi Lavrov.

Ndërkohë presidenti ukrainas, Volodymyr Zelensky njoftoi sot se javën e ardhshme në Francë do të zhvillohet një takim me liderët e vendeve aleate të Kievit, në kuadër të përpjekjeve diplomatike për t’i dhënë fund pushtimit rus të Ukrainës.

”Takimi, i planifikuar për më 6 janar, pritet të paraprihet nga një tjetër takim në Ukrainë, në nivelin e këshilltarëve të sigurisë të vendeve aleate të Kievit”, shtoi Zelensky në platformën X. /os/

The post RUSI – Lavrov: Nuk ka zgjidhje nëse Ukraina vazhdon të na sulmojë appeared first on Agjencia Telegrafike Shqiptare.

TIRANË, 31 dhjetor /ATSH/ Kredia për bizneset ka vijuar të rritet me një ritëm të qëndrueshëm gjatë vitit 2025, duke reflektuar një përmirësim të ndjeshëm veçanërisht në gjysmën e dytë të vitit, bëjnë të ditur të dhënat e publikuara nga Banka e Shqipërisë.

Sipas statistikave të BSH-së, për periudhën 11-mujore të vitit 2025, sektori bankar ka disbursuar gjithsej rreth 250 miliardë lekë kredi të reja për bizneset, duke shënuar një rritje vjetore prej 6.8% krahasuar me të njëjtën periudhë të vitit 2024.

Të dhënat tregojnë se rritja e kreditimit është mbështetur kryesisht nga sektorët kryesorë të ekonomisë, ku pjesën më të madhe të kredisë së re e kanë përfituar sektori i shërbimeve dhe hoteleri-turizmit, industria përpunuese, si dhe industria ushqimore.

Sipas Bankës së Shqipërisë, përmirësimi i kërkesës për kredi nga bizneset reflekton rritjen e aktivitetit ekonomik, përmirësimin e klimës së besimit dhe kushte më të favorshme financimi në sistemin bankar.

Banka Qendrore vlerëson se tendenca pozitive e kreditimit për bizneset ka dhënë një kontribut të rëndësishëm në mbështetjen e investimeve, zgjerimin e kapaciteteve prodhuese dhe forcimin e sektorëve kyç të ekonomisë.

BSH thekson do të vijojë të ndjekë nga afër zhvillimet në tregun e kreditimit, me synimin për të ruajtur stabilitetin financiar dhe për të mbështetur rritjen e qëndrueshme ekonomike në vend. e.xh/j.p/

The post Rreth 250 miliardë lekë kredi të reja për bizneset appeared first on Agjencia Telegrafike Shqiptare.

TIRANË, 31 dhjetor/ATSH/ Aplikacioni TEA (Tourism Events of Albania) gjatë këtij viti që po mbyllet ka ofruar një përvojë të përmirësuar dhe më gjithëpërfshirëse për të gjithë ata që kanë eksploruar bukuritë natyrore dhe kulturore të Shqipërisë.

Falë TEA-s turistët kanë shijuar krahas natyrës, maleve, detit e kulinarisë, edhe eventet kulturore e artistike.

Drejtoresha e Agjencisë Kombëtare të Turizmit, Zana Çela bën të ditur për ATSH-në se “TEA, guida digjitale e eventeve është shkarkuar 170 mijë herë, në krahasim me 2024 kur është shkarkuar 90 mijë herë”.

“Ky aplikacion në krahasim me vitin 2024 ka pësuar rritje. Në 2024 në TEA janë përfshirë 2144 aktivitete, ndërsa në 2025, 3331 aktivitete, ku vendin kryesor e zënë ato të Agroturizmit, Art Fest, Festivale Muzikore, Artet Pamore, Trashëgimi Kulturore dhe Teatër”, tha Çela.

AKT promovon Shqipërinë globalisht si një destinacion autentik, të sigurt dhe mikpritës, me një ofertë të larmishme.

“Agjencia zbaton një paketë të integruar promovimi; përveç prezantimit të Shqipërisë në panaire të rëndësishme ndërkombëtare, promovimi digjital ka qenë shumë i rëndësishëm për suksesin. Promovimi digjital dhe marketingu tradicional ecin krah për krah, duke përdorur teknologjitë e reja dhe duke krijuar aplikacione digjitale, si aplikacioni TEA, TEA Digital Tourism App”, theksoi Çela.

Sipas saj, aplikacioni TEA është një zgjidhje inovative e zhvilluar nga AKT-ja, që vendos teknologjinë digjitale në qendër të promovimit të turizmit.

“TEA shërben si një asistent personal për udhëtarët, duke ofruar aktivitete kulturore, artistike dhe sportive, si dhe shërbime praktike”, tha Çela.

Disa nga vendet ku është shkarkuar ky aplikacion janë Shqipëria, Italia, SHBA, Anglia, Franca, Spanja, Turqia, Holanda, Kosova etj.

Aplikacioni TEA, i vetmi udhërrëfyes digjital i Shqipërisë turistike është një shembull i shkëlqyer sesi teknologjia mund të përdoret për të përmirësuar dhe modernizuar përvojën turistike, duke ofruar informacion të shpejtë, të saktë dhe të përshtatur për turistët.

Me TEA, turistët navigojnë nëpër destinacione të ndryshme turistike të Shqipërisë. Ata njihen me monumentet historike, aktivitetet kulturore dhe artistike, por edhe informacion mbi shërbimet utilitare në nevojë të turistëve, si: hotele, bare e restorante, kontakte, etj.

/k.s/j.p/

The post Çela për ATSH-në: Aplikacioni TEA, 170 mijë shkarkime në 2025-ën appeared first on Agjencia Telegrafike Shqiptare.

The post Lamallari: Kompensohen përfundimisht mbi 13 mijë familje ish-pronarësh appeared first on Agjencia Telegrafike Shqiptare.

TIRANË, 31 dhjetor/ATSH/ Çdo vit, më 31 dhjetor, njerëzit në mbarë botën festojnë Natën e Vitit të Ri, nata që ndan ditën e fundit të vitit për të sjellë agimin e vitit të ri kalendarik.

Kjo festë mbarëbotërore është një ditë për t’i thënë “lamtumirë” të vjetrës dhe si një përshëndetje për gjërat e reja që do të vijnë. Vigjilja e Vitit të Ri në kalendarin Gregorian i referohet mbrëmjes, ose zakonisht të gjithë ditës së fundit të vitit, 31 dhjetorit. Në shumë vende, nata e Vitit të Ri festohet me vallëzim, ngrënie, pije dhe hedhje fishekzjarresh.

E njohur edhe si Dita e Shën Silvestrit, vigjilja e Vitit të Ri është një nga festat më emocionuese të vitit. Disa vende, si Filipinet dhe Letonia, e festojnë Natën e Vitit të Ri si një festë publike. Në Japoni, është një festë qeveritare. Në vende të tjera, shumë biznese i lënë punonjësit e tyre të lire në mënyrë që ata të mund të marrin pjesë në festimet e shumta.

Ka shumë arsye pse kultura të ndryshme e konsiderojnë këtë ditë si një nga më të rëndësishmet e vitit. Jo vetëm sepse është një kohë festash dhe festimesh të mëdha në të gjithë botën, por edhe sepse shihet si një pikë kthese e rëndësishme. Përveç se është një kohë për të reflektuar mbi vitin e kaluar, gjithashtu shërben për marrjen e zotimeve të reja.

Shumë njerëz bëjnë premtime të Vitit të Ri. Megjithatë, nga anketimet është vënë re se vetëm 8% e njerëzve i arrijnë ato në të vërtetë. Sociologët thonë se në vend që të bëni premtime që nuk do t’i mbani, është më mirë të vendosni tre ose katër qëllime. Ndarja e qëllimeve në hapa të zbatueshëm dhe rishikimi i progresit tuaj çdo ditë ndihmon në mbajtjen e tyre.

Shumë qytete në të gjithë botën kanë përgatitur tashmë fishekzjarrë, koncerte, numërim mbrapsht dhe argëtime të tjera nga më të ndryshmet. Disa nga qytetet më të famshme për të festuar janë: New York City, Sydney, Bangkok, Dubai, Cape Town, Londër, Paris dhe Las Vegas.

Në Spanjë dhe vende të tjera spanjishtfolëse, është traditë të hash 12 kokrra rrushi gjatë numërimit mbrapsht deri në mesnatë, duke simbolizuar shpresat për vitin e ri. Në të gjithë botën, të hash çdo gjë në formën e një rrethi ose unaze simbolizon përmbushjen e rrethit dhe konsiderohet fat i mirë. /j.p/

The post Vigjilja e Vitit të Ri, traditat e festimet anembanë globit appeared first on Agjencia Telegrafike Shqiptare.

TIRANË, 31 dhjetor /ATSH/ Në prag të festave të fundvitit, Autoriteti Kombëtar i Ushqimit (AKU) ka intensifikuar kontrollet dhe këshillimet në terren për garantimin e sigurisë ushqimore, bën të ditur ministri i Bujqësisë dhe Zhvillimit Rural, Andis Salla.

Sipas ministrit, kjo nismë po zhvillohet në kuadër të fushatës ndërgjegjësuese “Shijo Festat me Siguri”, e cila synon rritjen e standardeve të sigurisë ushqimore në një periudhë kur konsumi i produkteve ushqimore shënon rritje të ndjeshme.

Qarku i Vlorës ishte ndalesa e radhës e grupeve të AKU-së, ku fokusi kryesor ishte orientimi dhe këshillimi i operatorëve të biznesit ushqimor mbi rëndësinë e etiketimit të saktë të produkteve ushqimore të paketuara.

Salla nënvizoi se etiketimi në përputhje me legjislacionin në fuqi nuk është vetëm një detyrim ligjor për subjektet tregtare, por një element kyç për mbrojtjen e shëndetit të konsumatorëve dhe garantimin e transparencës ndaj tyre.

Ministri i Bujqësisë dhe Zhvillimit Rural bën të ditur se kontrollet dhe aktivitetet informuese të AKU-së do të vijojnë edhe në qarqe të tjera të vendit gjatë gjithë periudhës së festave, në bashkëpunim me operatorët e biznesit ushqimor, me qëllim garantimin e produkteve të sigurta dhe cilësore për qytetarët.

Fushata synon gjithashtu rritjen e ndërgjegjësimit të konsumatorëve për rëndësinë e leximit të etiketave ushqimore dhe zgjedhjen e produkteve që përmbushin standardet e sigurisë. e.xh/j.p/

The post Shtohen kontrollet për sigurinë ushqimore gjatë festave appeared first on Agjencia Telegrafike Shqiptare.

TIRANË, 31 dhjetor/ATSH/ Presidenti i Federatës së Futbollit, Armand Duka, në prag të festës së ndërrimit të viteve uron të gjithë komunitetin shqiptar të futbollit përmes një video-mesazhi për një vit sa më të mbarë.

Në një video-urim, kreu i qeverisë së futbollit shqiptar shpreh mirënjohjen e tij për të gjithë ata që kontribuojnë çdo ditë që futbolli shqiptar të zhvillohet, ndërsa vlerëson vitin 2025 si historik për lojën tonë të bukur.

Në mesazhin e tij, Presidenti Duka përmend organizimet e suksesshme të FSHF-së, finalet e Euro U-17 dhe mbledhjen e Komitetit Ekzekutiv të UEFA-s në Tiranë, si edhe kualifikimin historik të Kombëtares shqiptare në fazën play-off të Botërorit 2026.

“Në prag të ndërrimit të viteve, dua t’i drejtohem të gjithë komunitetit të futbollit shqiptar për të shprehur mirënjohjen time të sinqertë për një vit që do të mbetet gjatë në kujtesën tonë.

Viti që po lëmë pas ka qenë një vit historik për futbollin shqiptar. Një vit ku puna, vizioni dhe përkushtimi u kthyen në rezultate konkrete. Në fushë, në organizim dhe në rritjen e gjithë sistemit tonë futbollistik”, tha ai.

“Shqipëria u konfirmua si një vend dhe partner i besueshëm për futbollin europian, duke pritur me sukses finalet e Kampionatit Europian U-17 dhe duke mikpritur për herë të parë në Tiranë Komitetin Ekzekutiv të UEFA-s. Këto ngjarje treguan se futbolli ynë ka arritur një nivel të ri profesionalizmi dhe organizimi”, u shpreh Duka.

Duka nënvizoi se emocionet më të forta i dhuroi Kombëtarja, e cila për herë të parë në histori siguroi kualifikimin në fazën play-off të Botërorit 2026.

“Një arritje që na bëri krenarë dhe që dëshmon se ëndrrat e mëdha janë të arritshme kur punohet me seriozitet dhe besim. Uroj shumë që ky rrugëtim i bukur të kurorëzohet me kualifikimin për herë të parë në finalet e Botërorit”, tha Duka.

Presidenti i FSHF-së shtoi se “gjatë këtij viti kemi vijuar të investojmë në bazat e së ardhmes: në fëmijët dhe të rinjtë, në futbollin e vajzave, në infrastrukturë dhe në mbështetjen e klubeve. Futbolli shqiptar po rritet në numra, në cilësi dhe në ndikim shoqëror”.

“Dua të falënderoj nga zemra të gjithë ata që kontribuojnë çdo ditë në këtë rrugëtim: futbollistët, trajnerët, arbitrat, drejtuesit e klubeve, stafet teknike, administratën e FSHF-së, partnerët tanë, institucionet shtetërore, qeverinë shqiptare për ndihmën e madhe dhe mbështetjen e tyre”, tha Duka.

Në mbyllje të mesazhit, Duka shtoi se me këtë frymë pozitive, hyhet në vitin 2026 me ambicie të forta për të bërë akoma më shumë, për ta çuar më përpara futbollin shqiptar dhe me një ëndërr të madhe për të qenë pjesë Botërorit 2026.

/e.i/j.p/

The post Duka uron Vitin e Ri 2026: Mirënjohje për të gjithë kontributorët e zhvillimit të futbollit appeared first on Agjencia Telegrafike Shqiptare.

TIRANË, 31 dhjetor/ATSH/ Këshilli i Ministrave miratoi një udhëzim të ri që rregullon regjistrimin e punimeve në fazën e karabinasë dhe krijon regjistrin e posaçëm të karabinasë, duke sjellë më shumë siguri juridike dhe lehtësi konkrete për qytetarët që blejnë pasuri të paluajtshme.

Udhëzimi, i miratuar në mbështetje të ligjit “Për kadastrën”, shton një kre të ri në aktin ekzistues për regjistrin e lejes së ndërtimit dhe përcakton procedura të detajuara për regjistrimin e përkohshëm të karabinasë nga Agjencia Shtetërore e Kadastrës, pas konfirmimit të përfundimit të kësaj faze ndërtimore. Ky regjistrim do të administrohet në format digjital dhe do të shërbejë për efekt të kreditimit të zhvilluesve, si dhe për regjistrimin e kontratave të sipërmarrjes, porosisë dhe premtimshitjes.

Për qytetarët, ky akt sjell përfitime të drejtpërdrejta, pasi u jep mundësi blerësve të apartamenteve ose njësive të shërbimit që kontratat e lidhura në fazën e karabinasë të regjistrohen zyrtarisht në kadastër. Kjo rrit ndjeshëm sigurinë juridike, ul rrezikun e mashtrimeve dhe shmang rastet e shitjes së njëjtë të pasurisë tek më shumë se një person.

Regjistrimi i karabinasë krijon gjithashtu një gjurmë ligjore për njësitë ndërtimore që në këtë fazë, duke mbrojtur interesat e blerësve dhe duke reduktuar konfliktet pronësore. Lidhja e të dhënave të truallit, lejes së ndërtimit dhe kontratave noteriale në një regjistër të vetëm rrit transparencën dhe besueshmërinë e transaksioneve.

Një tjetër lehtësi për qytetarët dhe zhvilluesit lidhet me aksesin në kredi, pasi dokumentet e përkohshme të regjistruara në regjistrin e karabinasë mund të përdoren nga bankat për financim, pa pritur përfundimin total të ndërtimit. Procedurat parashikohen të jenë të koordinuara dhe të digjitalizuara, duke ulur burokracinë, kohën dhe kostot për subjektet e interesuara.

Udhëzimi parashikon gjithashtu mbrojtje për qytetarët edhe në rastet kur zhvilluesi nuk shlyen detyrimet financiare, pasi kontratat e regjistruara në regjistrin e karabinasë mbeten të vlefshme dhe bankat mund të disponojnë vetëm njësitë e lira.

Për zbatimin e këtij udhëzimi ngarkohen Agjencia Shtetërore e Kadastrës dhe autoritetet përgjegjëse për zhvillimin e territorit, ndërsa akti hyn në fuqi pas botimit në “Fletoren zyrtare”. j.p/

The post Regjistrim objekteve në ndërtim, më shumë siguri për blerësit e banesave appeared first on Agjencia Telegrafike Shqiptare.

PARIS, 31 dhjetor /ATSH-ANSA/ – Kompania hekurudhore Eurostar njoftoi këtë mëngjes rifillimin e shërbimeve midis Londrës dhe kontinentit pasi një problem teknik ndërpreu operacionet për disa orë, por paralajmëroi për ndërprerje të mundshme.

“Ne planifikojmë të rifillojmë të gjitha shërbimet tona sot, por për shkak të ndikimit të vazhdueshëm, mund të ketë vonesa dhe anulime të minutës së fundit”, sipas faqes zyrtare të internetit të Eurostar.

Dje, mijëra pasagjerë përjetuan një makth përpara natës së Vitit të Ri kur shërbimi i trenit me shpejtësi të lartë Eurostar që lidh Londrën me kryeqytete të tjera të mëdha – Parisin, Brukselin dhe Amsterdamin – u pezullua për disa orë.

Shkaku ishte një ndërprerje e energjisë elektrike në Tunelin e Kanalit, së bashku me ndërprerjen e një treni LeShuttle që transportonte pasagjerë dhe automjete, duke ndërprerë kështu të gjithë linjën.

Eurostar njoftoi një rifillim të pjesshëm të shërbimeve vetëm këtë pasdite, por ndërkohë, dhjetëra trena janë anuluar, shumë prej të cilëve mbërrijnë dhe nisen nga stacioni ndërkombëtar St Pancras i Londrës.   /os/

The post PARIS – Eurostar rifillon të gjitha shërbimet midis Londrës dhe kontinentit appeared first on Agjencia Telegrafike Shqiptare.

TIRANË, 31 dhjetor /ATSH/- Nga petullat që mbrojnë nga shtrigat deri te ëmbëlsirat që  tregojnë fatin, vendet në mbarë botën shpesh e fillojnë Vitin e Ri me ushqim të shkëlqyer, sipas “National Geographic”.

Për disa mijëvjeçarë, njerëzit në mbarë botën e kanë festuar Vitin e Ri duke shpresuar se ai do të sjellë shëndet, pasuri dhe sukses.

Shpesh, këto festime sillen rreth disa ushqimeve simbolike – si makarona të gjata për një jetë të gjatë, 12 kokrra rrush për 12 muaj me fat dhe lakër për më shumë para.

Duke lënë mënjanë shampanjën, ushqimi i Vitit të Ri në disa vende është mjaft i zakonshëm dhe i lirë. Për shembull, në Brazil gatuhen thjerrëza, ndërsa në Jugun Amerikan festohet me bizele.

Më poshtë renditen disa prej traditave ushqimore më pak të njohura të Vitit të Ri nga e gjithë bota:

Petulla “Oliebollen” në Holandë

Viti i Ri në Holandë do të ishte i paplotë – pa oliebollen. Petulla holandez, emri i të cilit përkthehet fjalë për fjalë, top vaji, hahet gjatë gjithë vitit – dhe thuhet se ka fuqi mbrojtëse gjatë vitit të ri.

Historitë thonë se perëndesha pagane Perchta, e njohur edhe si “shtriga e Krishtlindjeve”, fluturon nëpër qiellin e natës dimërore duke hapur stomakun e njerëzve në kërkim të ushqimit.

Oliebollen është e vetmja mënyrë për ta penguar atë – sipas legjendës, yndyra nga brumi i skuqur do të bënte që shpata e saj të rrëshqiste nga barku i tyre.

Të spërkatura zakonisht me kanellë, karafil dhe xhenxhefil, oliebollen shpesh mbushen me manaferra të thata, mollë të grira dhe bajame.

Supë “joumou” në Haiti

Pjata tradicionale e Haitit është një supë e dashur me bazë kungulli që shërbehet çdo vit më 1 janar, një ditë e rëndësishme në kombin e Karaibeve për shumë arsye.

Pjata filloi të shërbehej gjatë festës së çlirimit të Haitit nga Franca.

Nën sundimin kolonial, afrikanët e skllavëruar u detyruan të kultivonin kungull dhe të përgatisnin supën për zotërinjtë e tyre francezë – por atyre u ndalohej të merrnin pjesë në konsumin e saj.

Kur Haiti shpalli pavarësinë më 1 janar 1804, besohet se Marie Claire Heureuse Félicité Bonheur Dessalines – gruaja e një revolucionari kryesor – shpërndau supë “joumou” për të gjithë haitianët e sapoçliruar.

Është, në shumë mënyra, një shenjë sfide dhe një simbol i ndryshimit dhe bashkimit.

Ndërsa receta ndryshon sipas familjeve, shumica përfshijnë mish viçi, patate, makarona dhe disa perime, së bashku me kungull dhe erëza.

Përgatitja zakonisht fillon një natë më parë, më 31 dhjetor, dhe shpesh është një aktivitet i përbashkët familjar.

“Banitsa” në Bullgari

Në qendër të festimeve të Vitit të Ri në Bullgari gatuhet një brumë filo festiv dhe i shijshëm i quajtur “banitsa”.

Midis shtresave të brumit të shkrifët është një përzierje vezësh, kosi natyral dhe djathi të bardhë të kripur.

Ndërsa hahet edhe si një mëngjes i përditshëm, versioni festiv është diçka e veçantë.

Në Vitin e Ri, “banitsa” zakonisht është e mbushur me shenja simbolike dhe mesazhe fati të mirë.

Disa familje fshehin monedha argjendi që kanë për qëllim t’i sjellin fat kujtdo që i gjen, ndërsa të tjera e zbukurojnë brumin me degëza, të mbështjella me copa letre që urojnë fat të shkruar me dorë.

Qofte orizi në Filipine

Festat filipinase të Vitit të Ri zakonisht përfshijnë një gamë të hollësishme gatimesh me rëndësi simbolike – madje edhe supersticioze.

Vendi gatuan një shumëllojshmëri ëmbëlsirash orizi. Këto ushqime festive mund të jenë të kripura, si puto (kek me oriz të zier në avull që zakonisht shërbehet me supë ose gjellë) dhe bibengka (kek me oriz i pjekur në gjethe bananeje, shpesh i mbuluar me vezë dhe djathë), si dhe ëmbëlsira, si biko (kek me oriz i bërë me qumësht kokosi dhe sheqer kafe) dhe tikoy (një kek me oriz të zier në avull dhe i ëmbël që hahet në fund të vaktit).

Këto gatime kanë për qëllim të simbolizojnë forcimin e lidhjeve familjare dhe shërbejnë si një magnet për fat të mirë në vitin e ri.

Prania e orizit gjatë Vitit të Ri (dhe festave të tjera) daton që nga Filipinet para-koloniale.

Përpara kolonizimit spanjoll, orizi ishte aq i vështirë për t’u kultivuar saqë shërbehej vetëm në raste shumë të veçanta.

Qumështi i Drerit në Kanada

Çfarë përftohet kur kombinoni rumin me vezë të rrahur, qumësht dhe sheqer, një akullore dhe alkool? Sigurisht, Qumësht Dreri.

Kokteji festiv kanadez, i njohur për shijen e tij të shijshme dhe të rrezikshme, është një pije e preferuar festive brenda mjedisit ushtarak.

Pija zakonisht bëhet nga një kombinim i qumështit, rumit dhe akullores.

Qumështi i Drerit ka qenë një shtyllë kryesore në ngjarjet shoqërore ushtarake, duke përfshirë pritjet zyrtare të Vitit të Ri që bashkojnë zyrtarë qeveritarë dhe ushtarakë me anëtarë të publikut.

Megjithëse origjina absolute është e vështirë të gjurmohet, referencat e para për Qumështin e Drerit datojnë që para Luftës së Parë Botërore.

“Kambako” në Japoni

Në Japoni, një kategori e tërë ushqimesh i kushtohet vitit të ri. Osechi-ryōri, e cila e ka origjinën më shumë se 1,000 vjet më parë gjatë periudhës Heian, tradicionalisht shërbehet në kuti.

Midis shumëllojshmërisë shumëngjyrëshe të ushqimeve të paketuara në këto kuti është një tortë delikate peshku e kuqe dhe e bardhë e quajtur “kamaboko”.

Forma e kupolës, me shtresën e kuqe të veshur mbi të bardhë, i ngjan një dielli në lindje dhe ka për qëllim të simbolizojë fat të mirë për vitin e ri.

Kamaboko shpesh shërbehet në o-zōni, një supë me bazë soje e mbushur me kek orizi dhe perime.

Ushqime tradicionale në Amerikën Latine

Mishi i derrit zë një vend të rëndësishëm në tryezën e Vitit të Ri në Amerikën Latine.

Zëvendësimi i mishit të dhisë me ate të derrit – më të bollshëm dhe më pak të shtrenjtë – është një adaptim latino-amerikan i traditës së pjekjes së një kafshe të tërë për të festuar – që daton shekuj më parë në Lindjen e Mesme.

Mishi i derrit është një simbol i prosperitetit, një besim që vjen nga kinezët, të cilët u vendosën në territoret latine duke filluar nga fundi i shekullit XIX.

Ushqimet tradicionale të Vitit të Ri – që përfshijnë bishtajore si thjerrëzat dhe fasulet – janë të përhapura në Amerikën Latine.

Thjerrëzat, për shkak të ngjashmërisë së tyre me monedhat e arit, janë simbole të njohura të pasurisë në Brazil, Kili dhe Venezuelë, ku njerëzit zakonisht hanë një lugë (ose më shumë) thjerrëza në mesnatë.

Në Kolumbi, është traditë të mbash thjerrëza të pagatuara në xhep ditën e fundit të vitit.

Megjithatë, jo të gjitha traditat që lidhen me ushqimin janë të ngrënshme.

Kubanezët, brazilianët dhe meksikanët shpesh përdorin qese të vogla me thjerrëza të thata si dekorime ose dhurata, për t’i uruar njëri-tjetrit fat të mirë në vitin e ardhshëm.

Në Brazil, farat e shegës simbolizojnë gjithashtu monedhat.

Është e zakonshme që brazilianët të hanë frutin, ose madje të mbajnë disa nga farat në portofolet e tyre gjatë gjithë vitit, si një mjet për të tërhequr pasuri. //a.i/

The post Traditat e ushqimit të Vitit të Ri që sjellin fat të mirë appeared first on Agjencia Telegrafike Shqiptare.

The post Rijetësim i qendrës historike të Pogradecit appeared first on Agjencia Telegrafike Shqiptare.

TIRANË, 31 dhjetor/ATSH/ Në prag të mbylljes së vitit 2025, qyteti i Durrësit është gjallëruar mes muzikës, koncerteve dhe aktiviteteve për të gjitha grup-moshat. Sheshet dhe rrugët kryesore të qytetit janë veshur me dekore festive, ndërsa organizimet argëtuese kanë shtuar ndjesinë e festës në çdo cep të qytetit.

Migena Muhaj, drejtore pranë Drejtorisë së Arsimit, Kulturës, Rinisë, Sporteve dhe Komuniteteve Fetare në bashkinë Durrës, tha për ATSH-në se “programi i festimeve ka përfshirë një gamë të larmishme aktivitetesh, duke nisur nga panairet e Krishtlindjes dhe Panairi i Fundvitit, të cilët kanë krijuar hapësira takimi për familjet dhe vizitorët, si dhe kanë shërbyer si platforma promovimi për produktet artizanale dhe punimet tradicionale të bizneseve dhe artizanëve të Durrësit”.

“Një vend të rëndësishëm në kalendar kanë zënë edhe ekspozitat artistike, ku veçohet aktiviteti i ekspozitave “Magjia e Dhjetorit” dhe “Ekspresione Urbane”, të cilat kanë pasqyruar krijimtarinë bashkëkohore dhe frymën festive përmes formave të ndryshme të artit vizual. Një pjesë kyçe e programit kanë qenë edhe koncertet festive, si Koncerti i Rinisë dhe “Tingujt e Adriatikut” për fëmijë, të cilat kanë sjellë në skenë artistët e rinj Durrsakë, duke ofruar programe muzikore për audienca dhe grupmosha të ndryshme”, tha Muhaj.

Muhaj tha se kalendari i festimeve të dhjetorit në Durrës pasqyron angazhimin e bashkisë Durrës për të ofruar aktivitete cilësore, gjithëpërfshirëse dhe me ndikim kulturor, social dhe ekonomik, duke e kthyer qytetin në një hapësirë aktive, dinamike dhe festive gjatë gjithë muajit dhjetor.

Sipas Muhajt, programi festiv shtrihet përgjatë gjithë muajit dhjetor, duke u ndërtuar si një kalendar i vazhdueshëm aktivitetesh që i jep qytetit një atmosferë festive nga fillimi deri në ditët e para të vitit të ri.

Muhaj shtoi se kalendari i festimeve sjell disa risi të rëndësishme krahasuar me vitet e mëparshme, të cilat synojnë pasurimin e përvojës kulturore, rritjen e përfshirjes së publikut dhe forcimin e lidhjes mes artit, komunitetit dhe institucioneve vendore.

“Brenda këtij programi të zgjeruar, përqendrimi i veçantë te të rinjtë e qytetit përbën risinë më domethënëse të këtij viti. Arti pamor, teatri dhe muzika kanë zënë një vend të rëndësishëm përmes ekspozitave, shfaqjeve dhe koncerteve, duke nxitur pjesëmarrjen aktive të brezit të ri në jetën kulturore dhe duke i kthyer të rinjtë jo vetëm në spektatorë, por edhe në kontribues të drejtpërdrejtë”, vijoi ajo.

“Një vëmendje e posaçme i është kushtuar gjithashtu fëmijëve, përmes shfaqjeve artistike dhe aktiviteteve interaktive të dedikuara për ta, si dhe përmes bashkëpunimeve me kopshtet dhe shkollat e qytetit dhe të rrethit, duke e kthyer festën në një përvojë njëkohësisht edukative dhe argëtuese për brezin më të vogël”, tha Muhaj, teksa theksoi se një vëmendje e veçantë i është dhënë traditës dhe identitetit kulturor, duke ndërthurur elementë bashkëkohorë me vlerat kombëtare dhe lokale, në mënyrë që festimet të pasqyrojnë më qartë identitetin kulturor të Durrësit.

Muhaj tha se njëherësh janë parashikuar edhe masa për menaxhimin e fluksit të qytetarëve dhe vizitorëve përgjatë ditëve festive.

“Në bashkëpunim me forcat e rendit dhe policinë bashkiake, janë marrë masa për rregullimin e qarkullimit në hapësirat publike. Për aktivitetet që zhvillohen në ambiente të mbyllura, si Pallati i Sportit, galeritë apo qendrat kulturore, është marrë parasysh kapaciteti maksimal i hapësirave, në mënyrë që çdo pjesëmarrës të ketë një eksperiencë të sigurt dhe të rehatshme. Në këtë mënyrë, sigurojmë që festimet e dhjetorit të jenë të gjalla, por të menaxhueshme dhe të sigurta, duke garantuar një përvojë pozitive për të gjithë qytetarët dhe vizitorët”, përfundoi ajo.

Momente nga dhjetori festiv në Durrës

1 nga 16

/e.i/j.p/r.e/

The post Panaire, ekspozita dhe aktivitete për të gjitha grup-moshat në Durrës appeared first on Agjencia Telegrafike Shqiptare.

TIRANË, 31 dhjetor /ATSH/ – Hollivudi dhe jo vetëm u ka thënë lamtumirë artistëve të televizionit, filmave, muzikës dhe më shumë këtë vit, sipas prestigjiozes amerikane ”Entertainment Weekly”.

Më poshtë janë 12 më të famshmit:

Robert Redford (18 gusht 1936 – 16 shtator 2025)

Robert Redford ishte një aktor dhe regjisor legjendar amerikan. Ai fitoi famë me rolet e tij në filma si ”Butch Cassidy”, ”Sundance Kid” dhe ”The Sting”. Redford ishte gjithashtu themelues i Sundance Film Festival, që mbështet kinemanë e pavarur. Ai fitoi një Oscar për kontribut gjithëpërfshirës në filmin amerikan. Karriera e tij përfshinte mbi pesë dekada në film dhe televizon. Redford njihej për përkushtimin e tij ndaj mjedisit dhe çështjeve sociale. Humbja e tij konsiderohet një nga më të mëdhatë në industrinë e filmit në dekadën e fundit.

Brigitte Bardot (28 shtator 1934 – 28 dhjetor 2025)

Aktorja, e njohur për rolet e saj në “Dhe Zoti krijoi gruan” dhe “Përçmim”, vdiq në rezidencën e saj të famshme, ”La Madrague”, në Saint-Tropez, në jug të Francës.

Val Kilmer (31 dhjetor 1959 – 6 tetor 2025)

Val Kilmer ishte një aktor i njohur amerikan. Ai fitoi famë me rolet e tij në ”Top Gun” dhe ”Batman Forever”. Kilmer njihej për aftësinë e tij për të portretizuar karaktere të ndryshme dhe sfidues. Ai gjithashtu interpretoi historinë e Jim Morrison në filmin ”The Doors”.  Karriera e tij përfshinte mbi katër dekada në film dhe teatër. Kilmer u përball me sfida shëndetësore, por vazhdoi të kontribuojë në art. Ai mbetet një ikonë e viteve ’80 dhe ’90 në kinematografi.

Diane Keaton (5 janar 1946 – 3 mars 2025)

Diane Keaton ishte një aktore dhe producente amerikane. Ajo fitoi një Oscar për rolin e saj në ”Annie Hall”.’Keaton ishte e njohur për stilin e saj unik dhe personalitetin karizmatik. Ajo luajti në filma klasikë si ”The Godfather” dhe ”Something’s Gotta Give”.Keaton ka pasur një karrierë të gjatë dhe të larmishme në teatrin dhe filmin amerikan. Ajo ishte gjithashtu një autore dhe fotografe e talentuar. Keaton mbetet një prej aktoreve më të respektuara dhe të dashura nga publiku.

Ozzy Osbourne (3 dhjetor 1948 – 21 gusht 2025)

Ozzy Osbourne ishte një muzikant britanik dhe ikonë e heavy metal-it. Ai ishte vokalisti kryesor i grupit legjendar ”Black Sabbath”. Osbourne fitoi famë për stilin e tij unik muzikor dhe performancat energjike. Ai njihej si “Princi i Errësirës” për kontributin e tij në muzikën metal. Karriera e tij solo përfshinte albume të suksesshme dhe turne botërorë. Ai gjithashtu u bë një figurë e njohur televizive me ”The Osbournes”. Humbja e tij konsiderohet një humbje e madhe për industrinë e muzikës rock dhe metal.

Claudia Cardinale (15 prill 1938 – 23 shtator 2025)

Claudia Cardinale ishte një aktore e shquar italiane, e lindur më 15 prill 1938 në Tunizi. Ajo u rrit si një figurë kryesore e kinemasë evropiane dhe luajti në filmat klasikë që nga fundi i viteve 1950. Cardinale u bë e famshme për rolet e saj në filma si ”8½” të Federico Fellinit dhe ”The Leopard” të Luchino Viscontit. Gjatë karrierës së saj, ajo punoi me regjisorë të njohur dhe u shndërrua në një ikonë elegante të kinemasë. Ajo shquhej për bukurinë, talentin dhe praninë e fuqishme në ekran, duke luajtur edhe në produksione ndërkombëtare. Claudia Cardinale vdiq më 23 shtator 2025, në moshën 87 vjeçare, në shtëpinë e saj në Nemours të Francës. Ajo la pas një trashëgimi të pasur filmike dhe konsiderohet një nga aktoret më të rëndësishme të kinemasë evropiane.

Gene Hackman (30 janar 1930 – 15 prill 2025)

Gene Hackman ishte një aktor amerikan i njohur për rolet e tij dramatike dhe komplekse. Ai fitoi dy çmime Oscar për rolet në ”The French Connection” dhe ”Unforgiven”. Hackman ishte i njohur për interpretimet e tij të fuqishme dhe të thella emocionale. Ai luajti në shumë filma klasikë si ”Hoosiers” dhe ”The Royal Tenenbaums”. Karriera e tij përfshinte mbi gjashtë dekada në film dhe televizon. Hackman ishte i njohur për përkushtimin ndaj artit dhe profesionalizmit të tij. Ai mbetet një nga aktorët më të respektuar dhe të influencuar në historinë e Hollivudit.

Malcolm-Jamal Warner (18 shkurt 1970 – 12 qershor 2025)

Malcolm-Jamal Warner ishte një aktor amerikan i njohur nga seriali ”The Cosby Show”. Ai luajti rol kryesor si Theo Huxtable, djali i familjes Huxtable. Warner gjithashtu ka punuar në teatër, film dhe produksione televizive të ndryshme. Ai ka qenë gjithmonë aktiv në çështje sociale dhe edukative. Karriera e tij ka zgjatur mbi tre dekada, duke përfshirë edhe regjistrime muzikore. Warner njihej për talentin e tij të larmishëm si aktor dhe producent. Humbja e tij për publikun ishte një tronditje, sidomos për fansat e serialit klasik.

James Ransone (2 tetor 1979 – 9 gusht 2025)

James Ransone ishte një aktor amerikan i njohur për rolet e tij në film dhe televizion. Ai luajti në serialin e njohur ”The Wire” dhe filmat ”It Chapter Two”. Ransone ishte i vlerësuar për interpretimet e tij autentike dhe emocionalisht të fuqishme. Ai gjithashtu ka punuar në produksione teatrale dhe film të pavarur. Karriera e tij përfshinte role të shumta që demonstruan talentin e tij të thellë. Ai njihej për personalitetin e tij modest dhe profesionalizmin në punë. Humbja e tij konsiderohet një humbje e rëndë për komunitetin artistik.

Nora Aunor (21 maj 1953 – 17 nëntor 2025)

Nora Aunor ishte një aktore dhe këngëtare legjendare filipineze. Ajo fitoi famë për talentin e saj të jashtëzakonshëm në film dhe muzikë. Aunor ishte një ikonë e kulturës filipineze dhe konsiderohej yll në vendin e saj. Karriera e saj përfshinte dhjetëra filma dhe albume muzikore. Ajo fitoi shumë çmime lokale dhe ndërkombëtare për kontributin e saj artistik. Nora ishte gjithashtu një aktiviste kulturore dhe humanitare. Humbja e saj shënoi fundin e një epoke të artit dhe kulturës filipineze.

Connie Francis (12 dhjetor 1938 – 22 janar 2025)

Connie Francis ishte një këngëtare amerikane e njohur për hitet e saj në vitet ’50 dhe ’60. Ajo ishte një nga gratë më të suksesshme në industrinë e muzikës pop. Francis këndoi shumë hite të njohura ndërkombëtare dhe fitoi popullaritet masiv. Ajo ishte gjithashtu një ikonë e modës dhe kulturës pop. Karriera e saj përfshinte dhjetëra albume dhe turne të ndryshme. Francis njihej për zërin e saj të fuqishëm dhe stilin emocional të interpretimit. Humbja e saj konsiderohet një humbje e madhe për historinë e muzikës amerikane.

David Lynch (20 janar 1946 – 25 nëntor 2025)

David Lynch ishte një regjisor, skenarist dhe artist amerikan. Ai njihet për filma dhe seriale me stil unik dhe shpesh surrealist, si ”Twin Peaks”. Lynch ka fituar shumë çmime për kontributin e tij në kinematografi. Ai ishte gjithashtu piktor dhe muzikant, duke shprehur talentin e tij në fusha të ndryshme. Filmat e tij shpesh përzien misterin, psikologjinë dhe stilin vizual unik. Lynch kishte një ndikim të madh mbi kinemanë moderne dhe artistët e rinj. Humbja e tij ishte një goditje për artin modern dhe fansat e tij globalisht./ a.jor.

The post RETROSPEKTIVË 2025 – Humbjet e mëdha të artit botëror appeared first on Agjencia Telegrafike Shqiptare.

ROMË, 31 dhjetor /ATSH-ANSA/ – Nga Kiritimati në Samoa, kalimi global nga viti 2025 në vitin 2026 do të zgjasë 26 orë, jo 24.

Mesnata, që do të shënojë fillimin e vitit 2026, do të fillojë si zakonisht nga Kiritimati ose Ishulli i Krishtlindjeve (i quajtur kështu sepse u zbulua nga kapiten Cook më 25 dhjetor 1777), në oqeanin Paqësor, ndryshe ishulli më lindor i banuar.

Kiritimati, i cili është pjesë e Kiribatit dhe, në përgjithësi, e Sporadeve Ekuatoriale, del nga oqeani në lindje të arkipelagut të Kiribatit dhe dy zona kohore në lindje të vijës që shënon ndryshimin global të datës, 13 zona kohore përpara Evropës.

Ishulli i Krishtlindjeve e filloi festën dje.

Dhe madje edhe Sidnej, i cili prej kohësh e ka shpallur veten “Kryeqyteti botëror i Vitit të Ri”, do të duhet të presë edhe katër orë të tjera pas Ishullit të Krishtlindjeve për të hapur shampanjën dhe për të ndezur fishekzjarrët.

Vija Ndërkombëtare e të Dhënave, e cila zgjatet zig-zag pak nga veriu në jug dhe ndjek vetëm pjesërisht meridianin e 180-të, antipodet e Greenwich-it, ka pasur një devijim të theksuar drejt lindjes që nga viti 1995, duke prerë dy zona kohore, përfshirë, ndër të tjera, arkipelagun e Kiribatit, Samoan dhe Tongën.

Nga Kiritimati, duke fluturuar në jugperëndim për rreth 2 500 kilometra, arrini në ishujt e Samoas, të cilët do të jenë të fundit që do të festojnë natën e Vitit të Ri, 26 orë më vonë.

Derisa të kalojë mesnata, ishulli i vogël i Tutuilas, më perëndimori i Samoas, ishulli Midway dhe madje edhe Havai, Viti i Ri do të ketë përfshirë të gjithë planetin.

Vendi me më shumë “Nata të Vitit të Ri” është padyshim Rusia, e cila shtrihet në 11 zona kohore nga enklava baltike e Kaliningradit deri në gadishullin Chukotka, i cili kufizohet me Alaskën përtej Ngushticës së Beringut.

Meqenëse vija ndërkombëtare e datës kalon nëpër Ngushticën e Beringut, Chukotka ruse dhe Alaska amerikane, pavarësisht se ndahen vetëm nga disa kilometra det, festojnë me 24 orë diferencë./  a.jor.

The post SOFT NEWS – Nga Kiritimati në Samoa, kalimi nga viti në vit do të zgjasë 26 orë dhe jo 24 appeared first on Agjencia Telegrafike Shqiptare.

BOTË – Festimet e Vitit të Ri në të gjithë botën.

PEKIN (Kinë) – Fjalimi i Vitit të Ri i presidentit kinez, Xi Jinping.

MOSKË (Rusi) – Përshëndetjet e Vitit të Ri të presidentit rus, Vladimir Putin.

KOMBET E BASHKUARA (Shtetet e Bashkuara) – Fundi i Mandatit të Misionit të OKB-së në Irak.

MAROK – Kupa e Afrikës në futboll.

ANGLI – Ndeshjet e Premier League./  a.jor.

The post AXHENDA NDËRKOMBËTARE 31/12/2025 appeared first on Agjencia Telegrafike Shqiptare.

TIRANË, 31 dhjetor /ATSH/ Shërbimi Meteorologjik Ushtarak bën të ditur se vendi ynë sot, në ditën e fundit të vitit 2025, do të ndikohet nga kushte atmosferike relativisht të paqëndrueshme.

Sipas parashikimit, moti do të jetë kryesisht i kthjellët, me vranësira të pakta deri mesatare, kryesisht në formën e reve të mesme dhe të larta transparente në juglindje, në pjesën e parë të ditës.

Parashikohet prezencë e ngricave në akset rrugore, veçanërisht në zonat malore, si dhe mjegull e dendur dhe mjegullinë në orët e mëngjesit dhe të mbrëmjes, kryesisht në zonat luginore të vendit.

Era do të fryjë me drejtim nga kuadrati i veriut, me shpejtësi mesatare 8 m/s, ndërsa përgjatë vijës bregdetare dhe zonave luginore do të arrijë shpejtësi deri në 17 m/s. Deti parashikohet me valëzim të forcës 3–4 ballë.

Temperaturat do të luhaten nga -8 gradë Celsius minimumi në zonat verilindore, deri në 11 gradë Celsius maksimumi në zonat bregdetare dhe të Ultësirës Perëndimore.

Temperaturat e parashikuara në qytete:
Shkodër: -2 / 6°C – diell
Kukës: -8 / 5°C – diell
Lezhë: -2 / 6°C – diell me pak re
Dibër: -8 / 2°C – diell
Durrës: 1 / 11°C – diell me pak re
Tiranë: 1 / 10°C – diell me pak re
Elbasan: 0 / 9°C – diell
Berat: -2 / 10°C – diell me pak re
Vlorë: 2 / 11°C – diell
Korçë: -4 / 6°C – diell, vranësira dhe reshje bore lokale
Gjirokastër: -5 / 5°C – diell
Sarandë: 4 / 9°C – diell

/r.e/

The post Moti në ditën e fundit të vitit: kthjellime, vranësira të pakta dhe borë në Korçë appeared first on Agjencia Telegrafike Shqiptare.

TIRANË, 30 dhjetor /ATSH/ Një ngjarje e rëndë është shënuar në një fshat të Pogradecit. Sipas raportimeve në medie, një 12-vjeçare nga ky fshat dyshohet se është abuzuar seksualisht, para 4 muajsh nga një 67-vjeçar, po nga i njëjti fshat.

Ngjarja ka ndodhur 4 muaj më parë në banesën e 67-vjeçarit, por është zbuluar vetëm tani pasi 12-vjeçarja ka mbetur shtatzënë dhe është 4-muajshe.

E mitura, sipas medieve ka rrëfyer në praninë e psikologut të gjithë ngjarjen dhe se si autori kishte abuzuar seksualisht me të me forcë duke e lidhur, në banesën e tij.

Kanë qenë prindërit e vajzës të cilët e kanë çuar për vizitë atë pasi ajo po shtonte peshë në mënyrë të pakuptimtë dhe mjekët i kanë informuar se vajza ishte shtatzënë 4-muajshe.

Pas ngjarjes, policia ka arrestuar 67-vjeçarin. Të afërmit e tij, sipas medieve, thonë se 67-vjeçari është baba i katër fëmijëve dhe është bërë gjysh.

/m.q/a.f/r.e/

The post Arrestohet 67-vjeçari në Pogradec, dyshohet se abuzoi seksualisht me një të mitur appeared first on Agjencia Telegrafike Shqiptare.

BERLIN, 30 dhjetor /ATSH-DPA/ – Ministri gjerman i Mbrojtjes, Boris Pistorius dënoi ashpër sot një sërë shkeljesh të rënda disiplinore të zbuluara në një nga regjimentet elitare të parashutistëve të vendit.

”Rastet e raportuara të ekstremizmit të djathtë, sjelljeve seksuale të papërshtatshme dhe përdorimit të drogës në Zweibrucken janë tronditëse”, tha Pistorius.

Sipas tij, këto veprime bien në kundërshtim të hapur me vlerat themelore të Bundeswehr-it, Forcave të Armatosura të Gjermanisë.

Ushtria njoftoi se ka shkarkuar disa ushtarë pas hetimeve për Regjimentin e Parashutistëve 26, i vendosur në qytetin Zweibrucken, në landin perëndimor Rheinland-Pfalz, dhe ka paralajmëruar masa të tjera.

Ndërkohë, prokuroria po heton 19 ushtarë.

Megjithatë, Pistorius shprehu pakënaqësi me mënyrën se si udhëheqja lokale ushtarake reagoi fillimisht ndaj rasteve të raportuara.

Edhe pse hetimi u nis menjëherë dhe çështja u sqarua plotësisht me pasoja të rënda, sipas tij pati mangësi.

”Ajo që është e papranueshme është fakti se sjelljet e gabuara duket se nuk u njohën menjëherë si të tilla në terren dhe për këtë arsye nuk u ndoqën me konsistencën e nevojshme. Kjo duhet të përjashtohet”, tha Pistorius.

Ministri falënderoi Inspektorin e Ushtrisë, gjenerallejtnant Christian Freuding, për ndërmarrjen e menjëhershme të masave për të parandaluar vazhdimin e shkeljeve.

“Freuding do t’i përmbledhë këto masa në një plan veprimi për forcat ajrore-desantuese dhe do të sigurojë zbatimin e tyre”, shtoi Pistorius.

‘Prioriteti im tani është, së pari, të sigurohem që incidentet individuale të vazhdojnë të hetohen plotësisht; së dyti, nëse akuzat e tjera konfirmohen, që rastet të ndëshkohen me të gjithë forcën e ligjit dhe së treti, të rikthehet besimi te udhëheqja ushtarake në terren”, përfundoi ministri./ /Ad.Ab./

The post BERLIN – Pistorius: Shkeljet në repartin elitar ushtarak gjerman janë tronditëse appeared first on Agjencia Telegrafike Shqiptare.

TIRANË, 30 dhjetor/ATSH/ Kalaja e Rozafës, një prej dëshmive më tërheqëse të historisë shqiptare, këtë fundvit ndriçon më shumë.

Përveç dritave shumëngjyrëshe që e rrethojnë atë, në qiell ndrit lahuta shqiptare tashmë pasuri e trashëgimisë kulturore jomateriale në listën e UNESCO-s.

Kryeministri Edi Rama ndau në rrjetet sociale pamje nga lahuta, e cila ka stolisur Kalanë e Shkodrës, që këto ditë të fundit të vitit pret vizitorë vendas dhe të huaj, që shijojnë mbrëmjet mes historisë dhe panoramës që ajo ofron mbi qytet.

Një nga thesaret më të çmuara të identitetit tonë kulturor, arti i të luajturit, të kënduarit dhe bërjes së lahutës u shpall më 9 dhjetor të këtij viti pasuri e trashëgimisë kulturore jomateriale në listën e UNESCO-s.

Arti i të kënduarit, të luajturit dhe bërja e lahutës përfaqësojnë një element thelbësore të identitetit në hapësirën shqiptare rurale të kultivuar ndër shekuj në krahinat veriore dhe përtej që nga Malësia e Madhe, Dukagjini, Malësia e Gjakovës, Rugova, Drenica, Plava dhe Gucia. Eposi i Kreshnikëve dhe balada të traditës shqiptare veriore, në duart e lahutarit kanë shprehur në shekuj virtytet e trimërisë, qëndresës, nderit, besës dhe mikpritjes.

/k.s/a.f/r.e/

The post Lahuta “stolis” kalanë e Shkodrës appeared first on Agjencia Telegrafike Shqiptare.

TIRANË, 30 dhjetor/ATSH/ Këshilli i Ministrave miratoi sot krijimin e bazës së të dhënave shtetërore të Sistemit të Menaxhimit të Informacionit të Arsimit të Lartë (SMIAL).

Sipas vendimit të miratuar në mbledhjen e sotme të qeverisë institucioni administrues i bazës së të dhënave shtetërore SMIAL është Qendra e Shërbimeve Arsimore.

Të dhënat e bazës shtetërore ndahen në të dhëna parësore dhe dytësore. Ndërkohë që të dhënat parësore të SMIAL-it konsiderohen të dhënat e mbledhura nga Qendra e Shërbimeve Arsimore.

Të dhënat dytësore të SMIAL-it konsiderohen të dhënat që merren nga Regjistri Kombëtar i Gjendjes Civile, Regjistri Elektronik Kombëtar për të Huajt në Republikën e Shqipërisë, Regjistri Tregtar dhe nga Sistemi i Tatimit Elektronik.

The post Miratohet krijimi i bazës së të dhënave të Sistemit të Menaxhimit të Informacionit të Arsimit të Lartë appeared first on Agjencia Telegrafike Shqiptare.