Ligjvënësit iranian kanë thënë të mërkurën se Republika Islamike nuk do të vazhdojë bisedimet bërthamore me Shtetet e Bashkuara të Amerikës, derisa të plotësohen disa parakushte të caktuara, ka shkruar Reuters.

“Kur SHBA-ja i përdor negociatat si një mjet për të mashtruar Iranin dhe për të mbuluar një sulm të papritur ushtarak nga regjimi zionist (Izraeli), bisedimet nuk mund të zhvillohen si më parë. Duhet të vendosen parakushte dhe nuk mund të ketë negociata të reja derisa ato të përmbushen plotësisht”, thuhet në deklaratën e trupit legjislativ.

Në deklaratë nuk specifikohen ose definohen parakushtet, porse kryediplomati iranian, Abbas Aragchi, kishte thënë kohë më parë se duhet të ofrohen garanci të forta që Teherani zyrtar s’do të sulmohet më.

Izraeli dhe SHBA-të patën lansuar sulme ndaj impianteve bërthamore të Iranit muajin e kaluar, duke pretenduar se ato kishin për qëllim të shkatërronin programin e orientuar drejt zhvillimit të armëve bërthamore. Në anën tjetër, lidershipi iranian ka argumentuar e konsideruar qëmoti se programi i tij bërthamor është tërësisht për qëllime civile.

Teherani dhe Washingtoni kishin zhvilluar pesë runde negociatash indirekte të ndërmjetësuara nga Omani përpara luftës 12-ditore, teksa kërkesë kyç e delegacionit amerikan ishte që Republika Islamike të hiqte dorë nga pasurimi i uraniumit.

Javën e kaluar, Aragchi e kishte riafirmuar qëndrimin se Teherani zyrtar nuk do të pranojë një marrëveshje që ia ndalon pasurimin e uraniumit, si dhe ka refuzuar të diskutojë për çështje të tjera jashtë këtij programi.

Presidenti amerikan, Donald Trump, ka thënë të martën se s’është aspak në nxitim për të negociuar me Iranin pasi që bazat e tij bërthamore tashmë janë “shkatërruar”, ndonëse SHBA-ja dhe tri vende evropiane janë pajtuar për të caktuar fundin e muajit gusht si afatin final për arritjen e marrëveshjes bërthamore.

Ministri i Punëve të Jashtme i Francës, Jean-Noel Barrot, ka theksuar po ashtu se Parisi, Londra e Berlini do ta aktivizojnë të ashtuquajturin mekanizmin “snapback” të Kombeve të Bashkuara, i cili do të rivendoste sanksionet ndaj Iranit, deri në fund të gushtit në rast se s’ka përparim konkret lidhur me marrëveshjen.

Në një vizitë që reflekton tensionet dhe dinamizmin e zhvillimeve në Lindjen e Mesme, kryeministri izraelit Benjamin Netanyahu u takua për herë të dytë brenda 48 orëve me ish-presidentin amerikan Donald Trump në Uashington. Takimet zhvillohen në një fazë vendimtare për përpjekjet diplomatike drejt një armëpushimi në Rripin e Gazës, ku përplasjet mes Izraelit dhe Hamasit kanë hyrë në muajin e tyre të nëntë.

Sipas të dërguarit të posaçëm amerikan për Lindjen e Mesme, Steve Witkoff, negociatat mes palëve janë ngushtuar në vetëm një pikë ende të pazgjidhur, çka e afron mundësinë për një marrëveshje 60-ditore që do të përfshinte ndalimin e përkohshëm të luftimeve dhe lirimin e pengjeve.

“Po punojmë pandërprerë për këtë marrëveshje. Angazhimi ynë është i plotë, por nevojitet bashkëpunim nga të dyja palët për të ecur përpara,” deklaroi Witkoff.

Pas takimit me Trump në Zyrën Ovale, Netanyahu zhvilloi takime edhe me drejtues të lartë të Kongresit amerikan, përfshirë kryetarin e Dhomës së Përfaqësuesve, Mike Johnson, dhe zëvendëspresidentin JD Vance. Në deklaratat për mediat, ai theksoi se lufta në Gaza është ende larg përfundimit.

“Ende nuk e kemi përmbushur misionin tonë në Gaza. Duhet të sigurohemi që të gjithë pengjet të lirohen dhe të shkatërrojmë aftësitë ushtarake dhe strukturat qeverisëse të Hamasit. Asnjë shtet nuk do të pranonte më pak – dhe as ne,” tha Netanyahu.

Ndërkohë, përpara vizitës së tij, në Uashington kishte mbërritur një delegacion nga Katari – vendi që po ndërmjetëson bisedimet mes Izraelit dhe Hamasit. Sipas burimeve nga media amerikane, delegacioni është takuar me zyrtarë të lartë të Shtëpisë së Bardhë për të diskutuar mbi hapat e mëtejshëm të procesit të armëpushimit.

“Ne kemi pranuar një propozim të ndërmjetësve që përkon me iniciativën e Witkoff. Mendoj se jemi shumë pranë arritjes së një marrëveshjeje. Megjithatë, do të shmangem nga komentet e mëtejshme për të mos rrezikuar procesin,” shtoi Netanyahu.

Kryeministri izraelit gjithashtu vlerësoi bashkëpunimin e ngushtë me SHBA-në, veçanërisht në operacionet e fundit kundër Iranit, të cilat i përshkroi si një “fitore strategjike madhore”./abcnews.al

Raundi i parë i bisedimeve të tërthorta për një armëpushim mes Izraelit dhe Hamasit ka përfunduar pa ndonjë përparim konkret, ka bërë të ditur për BBC një zyrtar palestinez i njohur me negociatat.

Sipas burimit, sesioni zgjati rreth tre orë e gjysmë dhe u zhvillua në dy ndërtesa të ndryshme në Doha, ku mesazhet dhe sqarimet u shkëmbyen përmes ndërmjetësve nga Katari dhe Egjipti. Megjithatë, nuk u arrit ndonjë progres i prekshëm.

Zyrtari shtoi se bisedimet pritet të rifillojnë të hënën, kur ndërmjetësit planifikojnë të zhvillojnë takime të ndara me secilën palë, me synimin për të kapërcyer pengesat aktuale dhe për të ngushtuar dallimet mes tyre. Sipas mediave mediave të huaja delegacioni izraelit nuk ka qenë “mjaftueshëm i autorizuar” për të arritur një marrëveshje, pasi nuk kishte “kompetenca reale”.

Këto zhvillime vijnë në një kohë kur kryeministri izraelit Benjamin Netanyahu ndodhet rrugës për në Uashington, ku pritet të takohet me ish-presidentin amerikan Donald Trump. Netanyahu shprehu besimin se takimi i planifikuar për të hënën do të ndihmojë në përparimin e përpjekjeve për lirimin e pengjeve të mbetura dhe arritjen e një armëpushimi në Gaza.

Ai deklaroi se u ka dhënë negociatorëve të tij udhëzime të qarta për të arritur një marrëveshje armëpushimi, në përputhje me kushtet që Izraeli tashmë i ka pranuar.

Nga ana tjetër, Hamasi ka deklaruar se i është përgjigjur propozimit të fundit për armëpushim me “frymë pozitive”, por duket se mes palëve ende ekzistojnë mospërputhje që duhet të tejkalohen për të arritur një marrëveshje përfundimtare.

Hamasi vazhdon të këmbëngulë në kërkesat e tij të përsëritura, përfshirë garancinë për përfundimin përfundimtar të luftimeve pas përfundimit të një armëpushimi dhe tërheqjen e plotë të forcave izraelite nga Gaza – kushte që qeveria izraelite i ka refuzuar më herët.

Pozicioni i Izraelit, gjithashtu, duket se nuk ka pësuar ndonjë ndryshim të madh. Gjatë nisjes drejt SHBA-së, Netanyahu theksoi se mbetet i përkushtuar ndaj tre objektivave kryesore: “Lirimi dhe kthimi i të gjithë pengjeve – të gjallë apo të rënë; shkatërrimi i kapaciteteve të Hamasit për ta larguar nga aty dhe sigurimi që Gaza të mos përbëjë më kërcënim për Izraelin”.

Ndërmjetësit nga Katari dhe Egjipti përballen me sfida të mëdha në përpjekjet për të kapërcyer pengesat që kanë penguar arritjen e një marrëveshjeje, që prej përfundimit të armëpushimit të mëparshëm në mars.

Që nga ajo kohë, Izraeli ka rifilluar ofensivën ndaj Hamasit me intensitet të lartë, ndërkohë që ka vendosur një bllokadë 11-javore ndaj ndihmave për Gazën, e cila është lehtësuar pjesërisht vetëm disa javë më parë.

Qeveria izraelite thotë se këto masa synojnë dobësimin e mëtejshëm të Hamasit dhe shtyrjen e tij drejt negociatave për lirimin e pengjeve.

Vetëm gjatë 24 orëve të fundit, ushtria izraelite njoftoi se ka goditur 130 objektiva të Hamasit dhe ka vrarë një numër militantësh. Por, kostoja në jetë njerëzore në Gaza vazhdon të rritet, zyrtarë të spitaleve në këtë territor njoftuan se mbi 30 civilë u vranë të dielën.

Ndërkohë, pyetja kryesore mbetet nëse bisedimet në Katar do të arrijnë një kompromis të pranueshëm për të dyja palët dhe nëse Donald Trump do të mund ta bindë Netanyahun në takimin e tyre që t’i japë fund luftës.

Shumë izraelitë besojnë se kjo është një çmim që ia vlen të paguhet për të shpëtuar pengjet e mbetura. Ata dolën sërish në rrugë të shtunën mbrëma, duke i bërë thirrje Netanyahut të arrijë një marrëveshje sa më shpejt për lirimin e tyre.

Megjithatë, zëra të linjës së ashpër brenda kabinetit izraelit përfshirë ministrin e sigurisë kombëtare Itamar Ben Gvir dhe ministrin e financave Bezalel Smotrich kanë kundërshtuar sërish çdo përfundim të luftës përpara se Hamasi të jetë eliminuar plotësisht.

Sërish duket se ka një lëvizje drejt një marrëveshjeje për armëpushim, por paqartësitë mbeten – mbi gatishmërinë reale të të dyja palëve për të bërë lëshime përtej kushteve që kanë përsëritur deri më tani.

Ndërkohë, populli në Gaza dhe familjarët e pengjeve izraelite vijojnë të shpresojnë se kjo nuk do të jetë edhe një tjetër shpresë e rreme.

Fushata ushtarake e Izraelit në Gaza nisi si reagim ndaj sulmeve të Hamasit më 7 tetor 2023, ku rreth 1,200 persona u vranë dhe 251 të tjerë u morën peng. Sipas Ministrisë së Shëndetësisë në Gaza, e drejtuar nga Hamasi, që nga ajo kohë janë vrarë të paktën 57,338 persona në territorin palestinez./abcnews.al

Konflikti në Lindjen e Mesme ka arritur në ditën e 639. Ndërkohë kryeministri izraelit Benjamin Netanyahu, është nisur drejt SHBA ku do të pritet nga presidenti amerikan Donald Trump në Shtëpinë e Bardhë.

Para se të nisej nga Tel Avivi, kryeministri izraelit, ka bërë të qarta objektivat kryesore, lirimin e pengjeve dhe shkatërrimin e Hamasit.

Mesazhet e Natanyahut janë përcjellë nga mediat ndërkombëtare, ku edhe është shprehur: “Po punojmë për një marrëveshje sipas kushteve tona, ekziston një mundësi për të zgjeruar rrethin e paqes. Jemi të vendosur t’i kthejmë të gjithë pengjet në shtëpi. Në të njëjtën kohë, këmbëngulim në eliminimin e aftësive ushtarake të Hamasit dhe që Gaza të mos përbëjë më kërcënim për Izraelin. Një takim me Presidentin Donald Trump mund të ndihmojë në arritjen e marrëveshjes”, tha ndër të tjera, kryeministri Benjamin Netanyahu.

Kjo është vizita e tretë e Netanyahut në Shtëpinë e Bardhë.

/abcnews.al/

Hamasi dhe Izraeli shprehën qëndrimet e tyre të mërkurën në prag të bisedimeve mbi thirrjen e Uashingtonit për armëpushim në Rripin e Gazës.

Derisa grupi militant – i shpallur organizatë terroriste nga SHBA-ja dhe fuqitë e tjera – la të kuptohej se është i hapur për një marrëveshje, kryeministri i Izraelit, Benjamin Netanyahu, u zotua se “nuk do të ketë Hamas” në Gazën e pasluftës.

Asnjëra palë nuk tha troç se e pranon propozimin e presidentit amerikan, Donald Trump.

Hamas këmbënguli në qëndrimin e vet të kahershëm se çdo marrëveshje duhet të sjellë përfundimin e luftës në Gazë.

Trump tha të martën se Izraeli ishte pajtuar për një armëpushim 60-ditor në Gazë dhe i bëri thirrje Hamasit ta pranojë marrëveshjen para se të përkeqësohen edhe më shumë kushtet për të.

Presidenti amerikan është duke e rritur trysninë mbi Qeverinë izraelite dhe Hamasin që të arrijnë pajtueshmëri për armëpushim, marrëveshje për pengjet dhe për t’i dhënë fund luftës.

Trump tha se koha prej 60-ditësh do të përdorej për të punuar drejt përfundimit të luftës. Por, Izraeli thotë se nuk do ta pranojë përfundimin e luftës derisa Hamasi të jetë mposhtur.

Trump theksoi se marrëveshja mund të arrihet qysh javën e ardhshme.

Por, reagimi i Hamasit, që theksoi kërkesën e vet për përfundimin e luftës, ngriti pikëpyetje nëse oferta e fundit nga ai mund t’i ndërpresë vërtet luftimet.

Zyrtari i Hamasit, Taher al-Nunu, tha se grupi militant është “i gatshëm dhe serioz për të arritur një marrëveshje”.

Ai theksoi se Hamasi është “i gatshëm ta pranojë çdo nismë që qartazi çon në përfundimin e plotë të luftës”.

Një delegacion i Hamasit pritet të takohet të mërkurën në Kajro me ndërmjetës nga Egjipti dhe Katari për të diskutuar propozimin, sipas një zyrtari egjiptian që foli në kushte anonimiteti.

Mosmarrëveshje mbi mënyrën se si duhet të përfundojë lufta

Gjatë pothuajse 21 muajve të luftës, bisedimet për armëpushim midis Izraelit dhe Hamasit kanë dështuar vazhdimisht për shkak të mospajtimeve nëse lufta duhet të përfundojë si pjesë e çdo marrëveshjeje.

Hamasi ka thënë se është i gatshëm t’i lirojë 50 pengjet e mbetura, më pak se gjysma e të cilëve besohet se janë gjallë, në këmbim të tërheqjes së plotë të Izraelit nga Gaza dhe përfundimit të luftës.

Izraeli thotë se do të pajtohet ta përfundojë luftën vetëm nëse Hamasi dorëzohet, çarmatoset dhe largohet në mërgim — diçka që Hamasi s’e pranon.

“Po ju njoftoj – nuk do të ketë Hamas”, deklaroi Netanyahu gjatë një fjalimi të mërkurën.

Një zyrtar izraelit tha se propozimi i fundit parashikon një marrëveshje 60-ditore që do të përfshijë një tërheqje të pjesshme të Izraelit nga Gaza dhe një rritje të ndihmave humanitare në territor.

Ndërmjetësit dhe SHBA-ja do të japin garanci për bisedime për përfundimin e luftës, por Izraeli nuk zotohet për këtë si pjesë e propozimit të fundit, tha zyrtari. Zyrtari nuk ishte i autorizuar të diskutonte detajet e marrëveshjes me median dhe foli në kushte anonimiteti.

Lufta në Gazë nisi kur militantët e udhëhequr nga Hamas sulmuan Izraelin më 7 tetor 2023, duke vrarë 1.200 njerëz dhe duke rrëmbyer 251 të tjerë, sipas zyrtarëve izraelitë.

Ministria e Shëndetësisë në Gazë thotë se lufta izraelite pas 7 tetorit i ka vrarë mbi 57.000 palestinezë.

Lufta ka shkaktuar gjithashtu krizë urie, ka zhvendosur tërë popullsinë e Gazës dhe ka nxitur akuza për gjenocid në Gjykatën Ndërkombëtare të Drejtësisë dhe për krime lufte në Gjykatën Ndërkombëtare Penale.

Izraeli i mohon këto akuza./REL

Presidenti Donald Trump do ta pres kryeministrin izraelit, Benjamini Netanyahun për bisedime në Shtëpinë e Bardhë të hënën e ardhshme, sipas administratës amerikane.

Vizita vjen në një kohë kur udhëheqësi amerikan ka nisur të intensifikojë përpjekjet ndaj qeverisë izraelite për të ndërmjetësuar një armëpushim dhe një marrëveshje për pengjet, si dhe për t’i dhënë fund luftës në Gaza.

Zyrtari që dha informacion nuk ishte i autorizuar të komentonte publikisht për vizitën që ende nuk është bërë zyrtare, dhe foli në kushte anonimiteti, shkruan AP.

Vizita e Netanyahut vjen pas vizitës së ministrit izraelit për Çështje Strategjike, Ron Dermer, në Washington këtë javë, për bisedime me zyrtarë të lartë të administratës amerikane lidhur me armëpushimin në Gaza, Iranin dhe çështje të tjera.

Presidenti, në komentet e tij publike ka sinjalizuar se po përqendrohet në përpjekjet për të ndalur luftimet midis Izraelit dhe Hamasit, që prej vendosjes së armëpushimit që i dha fund 12 ditëve përleshjesh ndërmjet Izraelit dhe Iranit, një javë më parë.

“Mendojmë se brenda javës së ardhshme do të arrijmë një armëpushim në Gaza”, u tha Trumpi gazetarëve të premten, duke mos dhënë shpjegim të mëtejshëm.

Zëdhënësja e Shtëpisë së Bardhë, Karoline Leavitt, tha të hënën se Trumpi dhe zyrtarët e administratës janë në komunikim të vazhdueshëm me udhëheqësit izraelitë dhe se përfundimi i konfliktit në Gaza është një përparësi për Trumpin.

Ushtria izraelite njoftoi këtë të hënë se një grup kolonësh hebrenj sulmuan forcat izraelite të sigurisë dhe vandalizuan mjete ushtarake si dhe instalime sigurie brenda dhe jashtë një baze ushtarake në Bregun e pushtuar Perëndimor.

Sipas raportimeve nga mediat izraelite, objektivi kryesor i sulmit ishte komandanti i bazës së Brigadës Rajonale Binjamin. Kolonët e quajtën atë “tradhtar”, pasi ai kishte qenë ndër ushtarët që tentuan të ndalonin hyrjen e tyre në një zonë të mbyllur ushtarake pranë fshatit palestinez Kafr Malik, ku më herët ishin vrarë të paktën tre palestinezë pas një sulmi nga kolonët.

Kryeministri izraelit Benjamin Netanyahu reagoi me tone të ashpra ndaj incidentit, duke e cilësuar si një akt “të dhunshëm dhe anarkik”. Ai theksoi se “asnjë shtet nuk mund të pranojë zjarrvënie ndaj bazave ushtarake, shkatërrim të pronës së ushtrisë apo sulme kundër personelit të sigurisë nga qytetarët e vet”.

Netanyahu kërkoi hetim të plotë dhe ndjekje penale për personat përgjegjës, të cilët i përshkroi si një “pakicë e dhunshme”. Ai mbrojti pjesën më të madhe të komunitetit të kolonëve, duke e cilësuar si “shembull për vendin”.

Ndërkohë, ministri i Mbrojtjes, Israel Katz, ka thirrur një mbledhje urgjente me agjencitë e sigurisë për të diskutuar incidentin. Ai shprehu mirënjohje për punën e ushtrisë që nga shpërthimi i luftës në Gaza dhe theksoi se Qeveria nuk do të lejojë që grupe të dhunshme të dëmtojnë forcat e saj të sigurisë.

Organizatat për të drejtat e njeriut kanë paralajmëruar për rritjen e dhunës nga ana e kolonëve në Bregun Perëndimor dhe për mungesën e masave ndëshkuese ndaj tyre.

Që nga nisja e lutës në Gaza, më 7 tetor 2023 pas sulmit të Hamasit ndaj Izraelit situata në Bregun Perëndimor është përshkallëzuar ndjeshëm, duke shënuar një rritje të incidenteve të dhunshme në këtë zonë të tensionuar./abcnews.al

Gjykata e Qarkut të Jerusalemit ka anuluar seancat dëgjimore të kësaj jave në gjyqin e gjatë për korrupsion të kryeministrit Benjamin Netanyahu, duke pranuar një kërkesë që kreu izraelit bëri duke përmendur arsye të klasifikuara diplomatike dhe të sigurisë.

Nuk ishte e qartë nëse një postim në mediat sociale nga presidenti i SHBA-së, Donald Trump, ka ndikuar në vendimin e gjykatës. Trumpi ka sugjeruar që gjyqi mund të pengonte Netanyahun për t’u bashkuar me negociatat me grupin militant palestinez Hamas dhe Iranin.

Vendimi, i parë nga Reuters, thotë se arsyet e reja të ofruara nga Netanyahu, kreu i agjencisë së spiunazhit të Izraelit, Mossad dhe shefi i inteligjencës ushtarake, justifikuan anulimin e seancave dëgjimore.

Netanyahu është paditur në vitin 2019 me akuza për ryshfet, mashtrim dhe shkelje të besimit. Ai i mohon të gjitha këto.

Netanyahu e ka cilësuar gjyqin kundër tij si një gjueti shtrigash të orkestruar nga krahu i majtë që synon të rrëzojë një udhëheqës të krahut të djathtë të zgjedhur në mënyrë demokratike.

Të premten, gjykata hodhi poshtë një kërkesë të Netanyahut për të shtyrë dëshminë e tij për dy javët e ardhshme për shkak të çështjeve diplomatike dhe të sigurisë pas konfliktit 12-ditor midis Izraelit dhe Iranit, i cili përfundoi të martën e kaluar.

Ai duhej të dilte në bankën e të akuzuarve të hënën për t’u marrë në pyetje.

“Është çmenduri të bësh atë që prokurorët e pakontrolluar po i bëjnë Bibi Netanyahut”, ka thënë Trump në një postim në Truth Social.

Ai ka shtuar se Uashingtoni, pasi i ka dhënë ndihmë Izraelit me vlerë miliarda dollarë, nuk do ta “durojë këtë”.

Trump ka bërë të ditur se Netanyahu po negocionte “tani” një marrëveshje me Hamasin, megjithëse asnjëri udhëheqës nuk ka dhënë detaje, dhe zyrtarët nga të dyja palët kanë shprehur skepticizëm mbi perspektivat për një armëpushim së shpejti.

Të premten, presidenti republikan u ka thënë gazetarëve se besonte se një armëpushim ishte afër.

Interesi për zgjidhjen e konfliktit në Gazë është rritur pas bombardimeve të SHBA-së dhe Izraelit ndaj objekteve bërthamore të Iranit.

Në mars, ndërsa i ktheu shpinën një procesi armëpushimi që po jepte rezultate, kryeministri izraelit mori një vendim të përshkruar nga disa komentatorë si të ngjashëm me “vetëvrasje politike”.

Marrëveshja e armëpushimit në Gaza, e ndërmjetësuar nga i dërguari i Donald Trump, Steve Witkoff, edhe para se presidenti amerikan të inaugurohej në mandatin e tij të dytë, kishte çuar në lirimin e dhjetëra pengjeve nga robëria e Hamasit, në këmbim të qindra të burgosurve palestinezë nga burgjet izraelite.

Faza tjetër pritej të shihte kthimin e më shumë pengjeve në shtëpi dhe një tërheqje graduale të trupave izraelite nga Gaza, përpara një përfundimi të negociuar të luftës, shkruan BBC.

Të lodhur nga konflikti, izraelitët dhe palestinezët menduan për fundin e luftës më shkatërruese në një histori të përbashkët, të ndërprerë shumë shpesh nga luftimet.

Por Benjamin Netanyahu nuk donte që lufta të mbaronte.

Ndërsa urdhëroi rifillimin e sulmeve në të gjithë Gazën, kryeministri deklaroi se luftimet do të vazhdonin derisa Hamasi të “shkatërrohej plotësisht”.

Një gjykatë në Izrael refuzoi kërkesën e kryeministrit Benjamin Netanyahu, për të shtyrë dëshmimin e tij në gjyqin për korrupsion, pasi presidenti amerikan, Donald Trump, tha se ky rast gjyqësor duhet të anulohet.

Të enjten, avokati i Netanyahut i kërkoi gjykatës që të mos e thërriste kryeministrin për të dhënë dëshminë për dy javë, duke thënë se atij i duhet të përqendrohet në “çështje të sigurisë” pas luftës 12-ditore mes Izraelit dhe Iranit.

Gjykata e qarkut në Jerusalem tha në vendimin e publikuar online se “forma aktuale [e kërkesës së Netanyahut] nuk ofron bazë apo justifikim të detajuar për anulimin e seancave dëgjimore”.

Trump tha të enjten se gjykimi kundër Netanyahut ishte një “gjueti shtrigash”, duke shtuar se gjykimi “duhet të anulohet menjëherë ose të falet ky hero i madh”.

Netanyahu e ka falënderuar Trumpin për mbështetjen e tij në luftën e shkurtër të Izraelit kundër Iranit, që përfundoi me një armëpushim të arritur më 24 qershor.

Kryeministri izraelit ka mohuar çdo keqbërje dhe mbështetësit e tij e kanë përshkruar gjykimin si të motivuar politikisht.

Në rastin e parë penal, ai dhe gruaja e tij, Sara, akuzohen se kanë pranuar më shumë se 260.000 euro në formë të dhuratave luksoze sikurse cigare, bizhuteri dhe shampanja nga miliarderë në këmbim të favoreve politike.

Në dy raste të tjera, Netanyahu akuzohet se tentoi të negocionte mbulim më favorizues nga dy media izraelite.

Presidenti amerikan Donald Trump ka shtuar presionin ndaj kryeministrit izraelit Benjamin Netanyahu për të përmbyllur luftën 20-mujore në Rripin e Gazës, menjëherë pas përfundimit të suksesshëm të ofensivës 12-ditore të Izraelit kundër Iranit. Lajmi është raportuar nga disa media hebraike, përfshirë transmetuesin publik Kan, që theksoi se presioni i Trump lidhet edhe me kërkesën e tij për të anuluar gjyqin penal ndaj Netanyahut.

Sipas burimeve të afërta me Netanyahun, postimi i Trump në rrjetin e tij Truth Social, ku kërkonte që Netanyahu të mos ndiqej më penalisht, ishte pjesë e një lëvizjeje më të gjerë: përfundimi i luftës, lirimi i pengjeve, amnistia për Netanyahun dhe një marrëveshje rajonale me pasoja të mëdha.

Raportet sugjerojnë se në biseda private, Trump dhe Netanyahu kanë rënë dakord për një plan që parashikon përfundimin e ofensivës izraelite në Gaza brenda dy javësh, lirimin e 50 pengjeve të mbetura nga Hamas, Largimine Udheheqesve te Hamas nga Rripi I Gazes, si dhe kalimin e kontrollit te enklaves palestineze ne kater shtete Arabe, perfshire Emiratet e Bashurara Arabe dhe Egjiptin. Marreveshja parashikon gjithashtu qe Qytetaret e Gazes te lejohet te Levizin ne vende te tjera.Pjese e marreveshjes parashikohet edhe detyrimi I Izraelit per te mbeshtetur zgjidhjen me dy shtete, me kusht që Autoriteti Palestinez të kryejë reforma. Si pjesë e marrëveshjes, SHBA do të njohin sovranitetin izraelit në disa pjesë të Bregut Perëndimor. Marrëveshja gjithashtu pritet të hapë rrugën për normalizimin e marrëdhënieve me Arabinë Saudite dhe Sirinë, si pjesë e zgjerimit të Marrëveshjeve të Abrahamit.

Në plan përfshihet edhe amnistia ose ndalimi i ndjekjes penale ndaj Netanyahut, duke përfshirë një ligj “francez” që ndalon ndjekjen e një kryeministri në detyrë, si dhe anulimin e akuzës për shpërdorim besimi — një nga pikat kyçe të aktakuzës ndaj tij.

Ndërkohë, negociatat për armëpushim mes Izraelit dhe Hamasit në Kajro nuk kanë sjellë ndonjë përparim konkret.

Presidenti izraelit Isaac Herzog i është bashkuar korit të thirrjeve për përfundimin e luftës dhe arritjen e një marrëveshjeje për lirimin e pengjeve, duke theksuar se ky është një “moment kyç pas suksesit kundër Iranit”. Familjarët e pengjeve gjithashtu po ushtrojnë presion publik ndaj qeverisë, duke kërkuar që fitoret e fundit të kthehen në veprim diplomatik të menjëhershëm.

Megjithatë, zbatimi i kësaj marrëveshjeje mbetet i paqartë. Hamas ka refuzuar në të kaluarën të pranojë largimin e udheheqesve te saj nga Rripi I Gazes drejt vendeve te treta , ndërsa shumë shtete arabe nuk pranojnë të përfshihen në rindërtimin e Gazës pa përfshirjen e Autoritetit Palestinez — një skenar që Netanyahu më herët e ka refuzuar.

Presidenti i Shteteve të Bashkuara të Amerikës, Donald Trump, ka kërkuar që Izraeli ta falë kryeministrin Benjamin Netanyahu, ose ta anulojë gjyqin ndaj tij për korrupsion, duke thënë se SHBA-ja do ta shpëtojë atë ashtu siç e shpëtoi vendin e tij.

Ndaj Netanyahut u ngrit aktakuzë për ryshfet, mashtrim dhe shkelje të besimit në vitin 2019. AI i mohon të gjitha akuzat.

Gjyqi ndaj tij filloi në vitin 2020 dhe përfshin tri çështje penale. Netanyahu është deklaruar i pafajshëm.

“Gjyqi i Bibi Netanyahut duhet të ANULOHET, MENJËHERË, ose të falet Heroi i Madh, i cili ka bërë kaq shumë për shtetin [e Izraelit]”, shkroi Trump në platformën Truth Social të mërkurën, duke shtuar se mori vesh që Netanyahu pritet të paraqitet në gjykatë të hënën.

Lideri i opozitës izraelite, Yair Lapid, tha se Trump nuk duhet të ndërhyjë në këtë çështje.

“Me gjithë respektin dhe mirënjohjen për presidentin e Shteteve të Bashkuara, ai nuk duhet të ndërhyjë në një proces ligjor të një shteti të pavarur”, tha Lapid.

“Shpresoj dhe besoj se ky është një shpërblim që ai [Trump] po i jep atij [Netanyahut], sepse synon të ushtrojë trysni ndaj tij për Gazën dhe për ta detyruar ta pranojë një marrëveshje për pengjet që do ta përfundojë luftën”, i tha Lapid faqes izraelite të lajmeve Ynet.

Trump e lavdëroi Netanyahun si një “luftëtar”, por shtoi në postimin e tij: “Ishin Shtetet e Bashkuara të Amerikës ato që e shpëtuan Izraelin, dhe tani do të jenë Shtetet e Bashkuara të Amerikës ato që do ta shpëtojnë Bibi Netanyahun”.

Duket se ai po i referohej përfshirjes dhe mbështetjes së SHBA-së për sulmet izraelite ndaj programit bërthamor të Iranit.

Nuk është e qartë nëse Trump nënkuptoi se SHBA-ja mund të bëjë diçka konkrete për ta ndihmuar Netanyahun në betejën e tij ligjore.

Presidenti republikan e përshkroi çështjen kundër udhëheqësit izraelit si “gjueti shtrigash” – një term që Trump e ka përdorur shpesh për t’i përshkruar përpjekjet për ta ndjekur atë penalisht në SHBA, dhe të cilin edhe Netanyahu e ka përdorur për ta përshkruar gjyqin ndaj tij.

Fjalët e ngrohta të Trumpit vijnë pas një qortimi të rrallë që ai ia bëri të martën Izraelit për sulmet ajrore ndaj Iranit pas armëpushimit./REL

Ish-presidenti amerikan Bill Clinton tha se kryeministri izraelit Benjamin Netanyahu ka dashur prej kohësh të luftojë Iranin, sepse në këtë mënyrë mund të qëndrojë në detyrë përgjithmonë.

“Netanyahu ka dashur prej kohësh të luftojë Iranin sepse në këtë mënyrë mund të qëndrojë në detyrë përgjithmonë. Dua të them, ai ka qenë atje pjesën më të madhe të 20 viteve të fundit”, tha ish-presidenti gjatë një paraqitjeje në “The Daily Show”.

Sipas Clinton, as Netanyahu dhe as Trump nuk duan të shkaktojnë një katastrofë rajonale në shkallë të plotë, raportojnë mediat e huaja.

Ai gjithashtu theksoi rëndësinë e mbrojtjes së aleatëve të SHBA-së në rajon.

“Ne duhet t’i bindim miqtë tanë në Lindjen e Mesme se do të qëndrojmë me ta dhe do të përpiqemi t’i mbrojmë”, deklaroi ai.

“Por zgjedhja e luftërave të pashpallura në të cilat viktimat kryesore janë civilët, të cilët nuk janë të përfshirë politikisht, në një mënyrë ose në një tjetër, të cilët thjesht duan të jetojnë jetë të mirë, nuk është një zgjidhje shumë e mirë”, shtoi Clinton.

SHBA deri tani ka qëndruar larg veprimeve të drejtpërdrejta në konfliktin midis Iranit dhe Izraelit. Por e ka ndihmuar Izraelin të rrëzojë raketat nga Teherani dhe e ka furnizuar atë me pajisje ushtarake

Kryeministri izraelit Benjamin Netanyahu deklaroi para gazetarëve se Izraeli nuk do të tërhiqet nga operacionet ushtarake kundër Iranit, pavarësisht presioneve ndërkombëtare dhe përshkallëzimit të situatës në Lindjen e Mesme. Komentet e tij vijnë në një moment kur Këshilli i Sigurimit i OKB-së po mban një mbledhje urgjente në New York, thirrur nga Irani pas sulmeve të fundit ajrore amerikane në territorin iranian.

Në orët e para të mëngjesit të kësaj të diele, avionë luftarakë amerikanë ndërmorën një seri goditjesh të koordinuara ndaj tri objekteve kryesore të programit bërthamor iranian, përfshirë kompleksin nëntokësor të Fordow. Ky veprim shënoi përfshirjen e drejtpërdrejtë të Shteteve të Bashkuara në konfliktin Izrael-Iran, duke rritur ndjeshëm tensionet në rajon.

Nga Izraeli, Netanyahu tha për gazetarët se “nuk do të lejojmë që të tërhiqemi në një luftë rraskapitëse, por as nuk do ta ndërpresim parakohe këtë fushatë jetike për sigurinë tonë kombëtare”.

Ai theksoi se Izraeli është shumë pranë përmbushjes së objektivave të tij strategjikë, duke përfshirë shkatërrimin e programit bërthamor iranian dhe të kapaciteteve të raketave balistike të Teheranit.

Duke iu referuar objektit të Fordow, të cilin SHBA e goditi me bomba speciale për depërtim në thellësi, Netanyahu tha se “kompleksi është dëmtuar rëndë”, megjithëse theksoi se “shkalla e plotë e dëmit do të vlerësohet në ditët në vijim”.

Deklaratat e kryeministrit izraelit pasojnë reagime të ashpra nga Teherani, i cili ka akuzuar SHBA-në dhe Izraelin për “agresion të paprovokuar” dhe ka paralajmëruar se do të ushtrojë të drejtën për vetëmbrojtje.

Tensionet në rajon mbeten në nivel të lartë, ndërsa komuniteti ndërkombëtar vijon thirrjet për përmbajtje dhe rikthim në tryezën e negociatave./abcnews.al

Vendimi i Presidentit të SHBA-së Donald Trump për të goditur objektet bërthamore të Iranit do të “ndryshojë historinë”, tha Kryeministri i Izraelit Benjamin Netanyahu të dielën në mëngjes.

“Urime President Trump, vendimi juaj i guximshëm për të synuar objektet bërthamore të Iranit me fuqinë e mrekullueshme dhe të drejtë të Shteteve të Bashkuara do të ndryshojë historinë”, tha Netanyahu në një deklaratë video.

“Presidenti Trump dhe unë shpesh themi: ‘Paqe përmes forcës’. Së pari vjen forca, pastaj vjen paqja. Dhe sonte, Presidenti Trump dhe Shtetet e Bashkuara vepruan me shumë forcë”, shtoi Netanyahu.

Një spital në jug të Izraelit ka pësuar goditje direkte nga një raketë iraniane të enjten, teksa zyrtarët raportuan për “dëme të mëdha” në këtë spital.

Qendra Shëndetësore Soroka është spitali kryesor në jug të Izraelit. Një zëdhënës i këtij spitali tha se ndërtesa ka pësuar “dëme të mëdha” në disa zona.Autoritetet në këtë qendër shëndetësore u kanë kërkuar qytetarëve që të mos kërkojnë trajtim mjekësor në këtë institucion.

Një tjetër raketë goditi një ndërtesë të lartë dhe disa ndërtesa banimi në Tel Aviv. Të paktën 40 persona u plagosën nga këto sulme, tha Shërbimi i Shpëtimit i Izraelit. Kryeministri izraelit, Benjamin Netanyahu, e dënoi sulmi ndaj spitalit dhe u zotua se do të kundërpërgjigjet.

“Tiranët në Teheran do të paguajnë çmim të lartë”, tha ai.

Spitali i goditur ka mbi 1.000 shtretër dhe ofron shërbim për pothuajse 1 milion banorë në jug të Izraelit, sipas uebfaqes së spitalit. Sulmi erdhi pasi Izraeli goditi reaktorin e ujit të rëndë [reaktor bërthamor që përdor ujë të rëndë].

Ushtria izraelite tha se sulmin ndaj ndërtesës Arak është kryer me avionë luftarakë.

“Sulmi shënjestroi komponentët e nevojshëm për prodhimin e plutoniumit, në mënyrë që të parandalohej që reaktori të përdorej për zhvillim të armëve bërthamore”, tha ushtria.

Sipas televizionit shtetëror iranian, “nuk ka asnjë rrezik nga rrezatimi”. Një gazetar i këtij televizioni, gjatë një lidhje të drejtpërdrejtë nga qyteti i afërt Hondab, tha se objekti është evakuuar dhe nuk ka dëme në zonat civile që gjenden përreth reaktorit.

Mëngjesin e së enjtes, Izraeli paralajmëroi se do të godiste këtë ndërtesë dhe u bëri thirrje banorëve që të largohen nga zona. Ushtria izraelite tha se gjatë sulmeve ajrore të së enjtes ka shënjestruar Teheranin dhe disa zona të tjera të Iranit, pa dhënë detaje të hollësishme. Më pas tha se Irani ka nisur një valë të re sulmesh raketore ndaj Izraelit dhe u bëri thirrje njerëzve të strehoheshin.

Dita e shtatë e sulmeve mes Izraelit dhe Iranit vjen një ditë pasi udhëheqësi suprem i Iranit refuzoi thirrjet e Shteteve të Bashkuara për t’u dorëzuar dhe paralajmëroi se çdo përfshirje ushtarake e amerikanëve do të shkaktonte “dëme të riparueshme për ta”. Izraeli po ashtu ka hequr disa kufizime për njerëzit, duke sugjeruar se kërcënimi nga raketat e Iranit është ulur. Përmes fushatës ajrore, Izraeli deri më tani ka goditur ndërtesat për pasurimin e uraniumit të Iranit në Natanz, objektet për prodhimin e centrifugave përreth Teheranit dhe centralin bërthamor në Isfahan. Po ashtu ka vrarë gjeneralë dhe shkencëtarë bërthamorë iranianë.Irani ka thënë se deri më tani, si pasojë e sulmeve izraelite janë vrarë 224 persona, ndërkaq Izraeli ka raportuar për 24 të vrarë.

Ndryshe, reaktori Arak – që ishte cak i sulmeve izraelite – gjendet 250 kilometra në jugperëndim të Teheranit.

Uji i rëndë ndihmon në ftohjen e reaktorëve bërthamorë, por gjithashtu prodhon si nënprodukt plutoniumin, i cili potencialisht mund të përdoret për krijimin e armëve bërthamore. Kjo do t’i ofronte Iranit edhe një rrugë tjetër drejt një bombe bërthamore, përveç përmes pasurimit të uraniumit, nëse vendi dëshiron të prodhojë armë të tilla.

Më 13 qershor, Izraeli nisi fushatë ajrore duke goditur qendra ushtarake dhe bërthamore brenda Iranit, duke thënë se synon t’ia pamundësojë armikut të tij posedimin e armëve bërthamore.

Irani, që është përgjigjur duke kryer sulme ndaj Izraelit, vazhdimisht ka mohuar se synon të ketë armë bërthamore, duke argumentuar se programi i tij bërthamor ka qëllime civile.

Presidenti Donald Trump në një komunikim me gazetarët ka ritheksuar faktin se Irani dëshiron të takohet.

Trump ndryshe nag reagimi i bërë nga Irani, pretendon se përfaqësuesit iranianë “duan të takohen”. Ai ka thënë, “përfaqësuesit iranian duan të vijnë në Shtëpinë e Bardhë”.

Kjo nuk është hera e parë që presidenti amerikan, i qëndron kësaj deklarate, pavarësisht se Teherani në reagimin e tij tha se asnjë zyrtar nuk ka kërkuar të shkojë në Shtëpinë e Bardhë.

Ndërkohë kryeministri Benjamin Netanyahu, tha se operacioni për të eliminuar kërcënimin bërthamor të Iranit po ecën përpara dhe se Izraeli po kontrollon qiellin mbi kryeqytetin e Iranit, Teheranin.

/abcnews.al/

Presidenti turk Rexhep Tayiip Erdogan është shprehur kritik ndaj Kryeministrit izraelit Benjamin Netanyahu.

Ai e ka cilësuar Netanyahun si “kërcënimin më të madh të sigurisë rajonale”. Në një telefonatë të zhvilluar me emirin e Katarit, Tamim bin Hamad Al Thani, Erdogan ka thënë se konflikti Izrael-Iran “nuk mund të heqë vëmendjen nga kriza humanitare dhe gjenocidi në Gaza.

Erdogan shtoi se do të vazhdojë përpjekjet e tij për t’i dhënë fund spirales së dhunës.

Benjamin Netanyahu ka mohuar raportet se Donald Trump vuri veton ndaj kërkesës së Izraelit për të vrarë Ajatollah Khamenein.

Në një intervistë me Bret Baier të Fox News, udhëheqësi izraelit tha: “Ka kaq shumë raportime të rreme për biseda që nuk kanë ndodhur kurrë dhe unë nuk do të hyj në këtë temë.

“Por mund t’ju them se mendoj se bëjmë atë që duhet të bëjmë, do të bëjmë atë që duhet të bëjmë. Dhe mendoj se Shtetet e Bashkuara e dinë se çfarë është e mirë për Shtetet e Bashkuara.”

Ai tha gjithashtu se sulmet do të përfundojnë “kur të heqim” aftësitë bërthamore të Iranit./abcnews.al

Kryeministri izraelit Benjamin Netanyahu i tha Fox News të dielën se ai nisi sulme ajrore kundër Iranit për të parandaluar “një holokaust bërthamor”, duke pretenduar se kishte inteligjenca izraelite kishte informacione se Irani ishte muaj larg zhvillimit të një arme bërthamore fillestare.

“Na u desh të vepronim”, i tha Netanyahu Bret Baier të Fox të dielën. “Ishte ora e 12-të dhe ne vepruam. Për të shpëtuar veten, por edhe… për të mbrojtur botën nga ky regjim nxitës.”

“Informacioni që morëm dhe që i ndamë Shteteve të Bashkuara ishte absolutisht i qartë: Se ata po punonin sipas një plani sekret për ta armatosur uraniumin, se po ecnin shumë shpejt, se do të arrinin një pajisje testimi dhe ndoshta një pajisje fillestare brenda disa muajsh, dhe sigurisht më pak se një viti”, tha ai.

Netanyahu pohoi gjithashtu se Izraeli pa mjaftueshëm uranium të pasuruar për nëntë bomba. “E tëra çfarë duhej të bënin ishte t’i armatosnin. Ne e ndaluam këtë.”

I pyetur nëse ndryshimi i regjimit ishte ndër objektivat e tij në Iran, Netanyahu tha: “Sigurisht që mund të jetë rezultati, sepse regjimi iranian është shumë i dobët.”

Netanyahu deklaroi se “80% e njerëzve do t’i dëbonin këta banditë teologjikë”.

“Ata qëllojnë gratë sepse flokët e tyre janë të zbuluara. Ata qëllojnë studentët. Ata thjesht thithin oksigjenin nga këta njerëz të guximshëm dhe të talentuar, populli iranian. Vendimi për të vepruar, për t’u ngritur këtë herë, është vendim i popullit iranian.”, theksoi Netanyahu./abcnews.al