Zëvendëskryeministrja dhe ministrja e Energjisë dhe Infrastrukturës, Belinda Balluku, ka uruar Persida Shkrepa për marrjen e detyrës së re në krye të Institutit të Ndërtimit, duke vlerësuar karrierën dhe përvojën e saj profesionale.

Sipas Ballukut, profesionalizmi dhe përkushtimi i Shkrepës përbëjnë një garanci të fortë për drejtimin dhe zhvillimin e mëtejshëm të këtij institucioni të rëndësishëm, si dhe për forcimin e rolit të tij në shërbim të industrisë së ndërtimit në vend.

“Suksese Persida Shkrepa në këtë detyrë dhe sfidë të re, në drejtimin e Institutit të Ndërtimit. Me një karrierë të spikatur si arkitekte, profesionalizmi, përkushtimi dhe përvoja e saj janë një garanci e fortë për drejtimin dhe zhvillimin e këtij institucioni kaq të rëndësishëm, si edhe për forcimin e rolit të tij në shërbim të industrisë së ndërtimit në vend”, shkruan zëvendëskryeministrja Balluku në “Facebook”.

Sekretari i Shtetit polak për Çështjet Evropiane, Ignacy Niemczycki, “shpreson vërtet” që SHBA-të mund ta “bindin Rusinë të jetë më krijuese” në bisedimet trepalëshe të paqes që do të rifillojnë në Abu Dhabi këtë të mërkurë.

Por, sipas tij, ndërsa “Ukraina bëri një përpjekje të konsiderueshme për t’i dhënë fund luftës”, Rusia po “përpiqet ta zgjasë diskutimet”.

Gjatë një interviste me Europe Today, Niemczycki tha se sulmet ruse në infrastrukturën energjetike civile në Kiev janë provë se Moska dëshiron të vazhdojë luftën.

Ukraina aktualisht po përjeton një mot jashtëzakonisht të ashpër, me temperatura që bien në minus 20 gradë Celsius.

“Ne e kemi parë Rusinë të synojë gjeneruesit e nxehtësisë, gjeneruesit e energjisë elektrike. Kjo është shumë shqetësuese”, tha Niemczycki.

Por Niemczycki mbetet optimist.

“Presidenti (Donald) Trump ka njoftuar se negociatat janë premtuese”, tha ai për Euronews, duke thënë se pret një “një lloj marrëveshjeje që është e dobishme për Evropën dhe që është e dobishme për SHBA-në” – por edhe “për paqen botërore, sepse kjo është ajo që është në lojë këtu”.

Se a përmban ndonjë marrëveshje e tillë ndonjë lëshim territorial ndaj Rusisë, tha ai, duhet të jetë një çështje për popullin ukrainas.

“Nuk mendoj se varet nga ne të themi se Ukraina duhet të bëjë këtë apo atë”, tha politikani, i cili këmbënguli që bisedimet duhet të “ushtrojnë presion mbi Rusinë, jo mbi Ukrainën”. Ndërsa i pyetur për afatin e fundit të vitit 2027 për Ukrainën për t’u bashkuar me Bashkimin Evropian, Niemczycki tha se “do të ishte shumë e vështirë” dhe se ndërsa ai beson se Ukraina mund t’i bashkohet bllokut së shpejti, ai “nuk do të përqendrohej aq shumë në një datë”, por në “faktin e bashkimit të Ukrainës me BE-në”

Tre persona humbën jetën pasi një aeroplan trajnimi u rrëzua në rajonin Orenburg të Rusisë të hënën, tha Ministria e Situatave të Emergjencave.

Aeroplani Diamond DA, i operuar nga Universiteti Shtetëror i Aviacionit Civil të Shën Petersburgut, po kryente një fluturim trajnimi pranë qytetit të Orskut kur u rrëzua me një instruktor dhe dy kadetë në bord, të cilët të gjithë vdiqën, tha ministria në një deklaratë.

“Një aeroplan trajnimi u rrëzua në rajonin e Orenburgut. Rrëzimi u raportua në fshatin Dzhanatalap, Orsk. Ai ishte në një fluturim trajnimi. Kur ekipet e shpëtimit nga Ministria Ruse e Situatave të Emergjencave mbërritën në vendngjarje, nuk kishte zjarr. Fatkeqësisht, tre persona u vranë”, tha deklarata.

Autoritetet rajonale do t’u ofrojnë ndihmë familjeve të viktimave, sipas shërbimit për shtyp të guvernatorit të Orenburgut dhe qeverisë rajonale.

Operacionet e shpëtimit po vazhdonin në vendin e rrëzimit dhe zyrtarët thanë se nuk kishte zjarr. Ministria nuk dha informacion paraprak mbi shkakun e mundshëm të rrëzimit.

Dosja Epstein ka tronditur edhe Ballkanin.

Dokumentet e fundit të publikuara nga Departamenti Amerikan i Drejtësisë si pjesë e hetimit për Jeffrey Epstein zbulojnë akuza tronditëse për përfshirje të mundshme të një shtetasi të Maqedonisë, profesor në Universitetin e Kolumbias – në eksportimin e trurit të njerëzve nga Maqedonia e Veriut me qëllim fundor, eksperimente shkencore në Shtetet e Bashkuara.

Në një email që mban titullin: Ilaçi 50-vjeçar që mund të zgjidhë krizën e vetëvrasjeve në Amerikë, të dërguar me datë 5 shkurt 2019-të, me emër dërguesi dhe marrësi të censuruar, thuhet se nga Maqedonia kanë mbërritur në SHBA rreth 1000 tru njerëzish, disa prej tyre nga persona që kanë kryer vetëvrasje.

Hetimi nuk përmban asnjë informacion nëse familjet e të ndjerëve dhanë pëlqimin e tyre për një përdorim të tillë të organeve, as nëse institucionet shtetërore ishin në dijeni ose dhanë leje për një lëvizje të tillë.

Në emailin e datës 5 shkurt 2019, diskutohen kërkime që lidhen me shkaqet dhe aspektet biologjike të vetëvrasjeve.

Në dokumente përmenden gjithashtu shkencëtarë nga disa universitete të njohura amerikane, duke përfshirë Pittsburgh, Columbia, Neë York dhe Yale.

Në pjesën për Maqedoninë, thuhet se “vendi i vogël ballkanik siguron “material” referuar organit të trurit tek njerëzit, falë një anëtari të fakultetit të Universitetit të Kolumbias i cili vjen nga atje dhe ndihmoi në organizimin e të gjithë procesit”.

Sipas përshkrimit, organet janë dërguar menjëherë pas heqjes, janë transportuar me aeroplan nën eskortë speciale dhe u dërguar me anije në Shtetet e Bashkuara.

Atje, ata kanë përfunduan në kuti speciale, të shënuara me kode, sipas anës së trurit dhe datës së marrjes, pa specifikuar vendin ku organet i nënshtroheshin më pas procedurave eksperimentale.

Këto pretendime tërheqin edhe një herë vëmendjen ndaj rrjetit të kontakteve dhe aktiviteteve të lidhura me Jeffrey Epstein të shtrira në të gjithë botën.

Në gusht 2019, Epstein u gjet i vdekur në qelinë e tij të burgut në Nju Jork dhe vdekja e tij u cilësua zyrtarisht si vetëvrasje, edhe pse rasti i tij vazhdon të gjenerojë polemika dhe dyshime…

Policia ka arrestuar një 24-vjeçar të shpallur në kërkim, pasi në datën 24 janar bleu karburant, në një subjekt në rrugën “Egnatia”, me 2 kartëmonedha (në prerjen 100 dollarë) false.

Nga verifikimet, 24-vjeçari rezultoi në kërkim nga Policia e Vlorës, për 2 raste të tjera të së njëjtës veprimtari kriminale, të kryera gjatë muajit janar, 2026. Vijon hetimi për të zbardhur raste të tjera në këtë fushë, në të cilat mund të jetë përfshirë shtetasi E. K.

Stuhia “Epstein’ ka përfshirë dy ish presidentë të Kosovës: Atifete Jahjaga dhe Behgjet Pacolli.

Ata përmenden repsektivisht në emailet e datës 12 dhe 19 shtator 2012 nga një person me emrin Daniel dërguar Jefrey Epstein.

Emri i presidentes së Kosovës, qëndron sëbashku me emrin e priceshës së Tajlandës, ku sipas personit që dërgon emailin, të dyja do të vizitojnëAmerikën, për shkak të një takimi në Kombet e Bashkuara.

Ish presidentja Jahjaga ka reaguar pas “lakimit” të emrit të saj në këtë dosje.

Sipas ish presidentes lidhja e emrit të saj më dosjen Epstein është e pabazuar dhe e pavërtetë, duke theksuar se me Epstein nuk ka patur asnjëherë asnjë njohje apo kontakti personal gjatë

“Përmendja e emrit tim nga mediat me rastin e dokumenteve të publikuara së fundmi lidhet vetëm me një korrespondencë elektronike të palëve të treta, e cila nuk përbën dhe nuk dëshmon asnjë takim, njohje apo lidhje personale me mua.” thotë ajo.

Një reagim e ka patur edhe Pacolli, emri i të cilit në email shoqërohet me linkun e një video youtube, link i cili është fshirë tashmë nga kjo platformë, por mban shënimin “Kush është Behgjet Pacolli”?

Edhe ish presidenti i malit të zi Milo Gjuklanoviç është përmendur gjatë dosjeve të hapura për hetimin mbi rastin Epstein, specifikisht në mesazhet e këmbyera mes tij dhe ish emisarit të BE për dialogun Kosovë-serbi Miroslav Lajçak. Të njëjtin qëndrim mohues për njohje me të ka mbajtur apo kontakt personal me të ka mbajtur edhe ish presidenti malazez./abcnews.al

Sulmet e fundit ruse po synojnë rrjetin hekurudhor të Ukrainës u shpreh Presidenti Volodymyr Zelensky.

Këto reagime vijnë pasi vendi përballet me krizën më të keqe energjetike, gjendur përballë një dimri të ftohtë pasi një seri sulmesh ruse dëmtuan infrastrukturën e saj energjetike.

“Ushtria ruse, ashtu si në ditët e mëparshme, po përqendron përpjekjet e saj në terrorizimin e zinxhirit të furnizimit, para së gjithash të rrjetit tonë hekurudhor”, tha Zelensky.

Sulmet ruse kanë goditur rrjetin hekurudhor në rajonet Dnipropetrovsk dhe Zaporizhia.

/abcnews.al/

20 shkurti, është dita e rrëzimit të mitit të Enver Hoxhës. Por protesta e javës tjetër e Partisë Demokratike, mund të rrëzojë një tjetër mit. Berisha shpalli 10 shkurtin si ditën Pro SPAK.

“Edi Rama ka asgjësuar drejtësinë, ka asgjësuar institucionin e akuzës për faktin e vetëm se nga ky institucion një prokuror guxoi të hetojë dosjen e tij. Ndaj përparësi absolute për çdo orë të ditës tuaj, organizimi sa më i fuqishëm i protestës së 10 shkurtit”,- tha Berisha.

Mesa duket, edhe data nuk është rastësi. Pavarësisht se 10 shkurti, dikur ka qenë festa e Debatikut, ajo përkon në të njëjtën javë me Shën Valentinin. A po nis një romancë e re mes doktorit dhe SPAK? Për momentin, Berisha është i entuziazmuar me sukseset e janarit. Udhëtimi në Strasburg i ka lënë shije të mirë. Rama tha se është në rreth të kuq, mund të shkelë vërtet në Amerikë, por edhe ai nuk shkel dot aty ku shkel doktori. Sali Berisha e shpalli Këshillin e Europës, ekstraterritorialitet të PD-së.

“Unë e di se ky po bën përpjekje të mëdha për të shkuar përsëri, se ky kështu e ka, por do të më falin shqiptarët, por aty nuk ka vend për narkodiktatorë. Në rast se ky synon të shkojë në atë seli, shqiptarët e Francës dhe Gjermanisë do t’i ketë para saj. Po, do të organizohet një nga protestat më të fuqishme”- shtoi Berisha.

Pra në Tiranë, apo Strasburg, Sali Berisha mendjen e ka te rruga. Por jo të gjithë mendojnë si ai. Deputeti i PD-së, Bujar Leskaj, mendon se braktisja e reformave, është autogoli më i madh edhe se i Lulzim Bashës.

“Nëse ne, si PD, nuk i shkojmë deri në fund rishikimit të Reformës Administrativo-Territoriale, i japim një mundësi të dytë qeverisë së sektit Rama për ta deformuar edhe më tej këtë reformë, me efekte tërësisht jashtë interesit të qytetarëve. Gabimi i dytë është gjithmonë më i madh se i pari.”-shprehet Leskaj.

Leskaj nuk ishte në mbledhjen e grupit për t’ia thënë mendimin e tij Berishës. Mungesa ishte pa arsye. Të tjerë munguan me arsye. Disa deputetë kanë ikur në SHBA për Mëngjesin e Lutjeve. Lutja e Gazit nuk dihet, kurse e Belindit me siguri për t’i hequr non gratën. Shanset kësaj radhe që lutjet të dëgjohen, janë më të mëdha. Bashkë me ta, udhëton edhe Albana Vokshi.

Emri i presidentit rus Vladimir Putin përmendet 1 mijë e 56 herë në më shumë se tre milionë dokumente që lidhen me Jeffrey Epstein, financierin e dënuar për abuzime seksuale, i cili u gjet i vdekur në burg në vitin 2019. Moska citohet gjithsej 9.629 herë. Edhe pse nuk ka prova konkrete për një lidhje direkte mes Epstein dhe Kremlinit, hetuesit amerikanë e konsiderojnë të pazakontë një numër kaq të lartë referencash.

Sipas shërbimeve sekrete amerikane, Epstein mund të jetë përfshirë në rrjete spiunazhi për shkak të lidhjeve të tij me Robert Maxwell, ish-agjent i Moskës në vitet ’70 dhe babai i Ghislaine Maxwell, bashkëpunëtores së tij, e dënuar me 20 vjet burg.

Gazeta britanike Daily Mail raporton se Epstein dyshohet se ka drejtuar një operacion të gjerë shantazhi seksual (“kompromat”) për llogari të shërbimeve sekrete ruse, duke rekrutuar gra, përfshirë edhe nga Rusia, për rrjetin e tij të personave me ndikim. Në dokumente përmenden email-e dhe letra ku flitet për takime të mundshme me Putinin, përfshirë komunikime të viteve 2011–2014.

Në një email të vitit 2014, sipërmarrësi japonez Joey Ito përmend mundësinë që Reid Hoffman, bashkëthemelues i LinkedIn, t’i bashkohej një takimi me presidentin rus. Megjithatë, pas rrëzimit të avionit Malaysia Airlines MH17 mbi Ukrainë, ideja u braktis. Në email-e të tjera, Epstein i referohet “dokumenteve Putin”, pa sqaruar përmbajtjen e tyre.

Epstein kishte ndërtuar një rrjet të gjerë ndërkombëtar kontaktesh politike dhe financiare. Ai kishte kryer pagesa ndaj figurave politike britanike dhe kishte komunikuar me ish-kryeministrin norvegjez Thorbjørn Jagland lidhur me takime me liderë botërorë, përfshirë Putinin.

Sipas dokumenteve, Epstein kishte pretenduar se mund t’i siguronte Kremlinit informacione komprometuese për Donald Trump, në prag të samitit të Helsinkit në vitin 2018. Në email-e të tjera, ai përshkruan aktivitetet e Robert Maxwell dhe lidhjet e tij me shërbime të huaja inteligjence.

Në korrik 2019, pas arrestimit në New York, avokatët e Epstein i njoftuan FBI-në se ai ishte i gatshëm të bashkëpunonte. Tre javë më vonë, ai u gjet i vdekur në qelinë e tij. Autoritetet amerikane e cilësuan vdekjen si vetëvrasje, një përfundim që vijon të ngjallë dyshime dhe debate.

Sali Berisha ka reaguar lidhur me kërkesën e bërë nga gjyqtarët në vend që t’u rritet paga, kërkesë kjo që ka përfunduar në Gjykatën Kushtetuese nëse do të pranohet apo jo.

Për Sali Berishën, gjykatesit nuk mund t’i caktojnë pagat vetë, por është kompetencë vetëm e ekzekutivit. Këto deklarata në dukje në të njëjtën linjë me qeverinë Sali Berisha i bëri në zbatim të masës së sigurisë detyrim paraqitje në SPAK.

“Ka dy aspekte, së pari që ai po bën gjithçka që të ndikojë sepse e ka të rëndësishme, por lidhur me pagat dua të them një të vërtetë. Piramida e pagave është kompetencë e ekzekutivit dhe vetëm e tij, përvçse ndërmarrjet publike”,- tha Berisha

Pasi firmosi në SPAK detyrimin për t’u paraqitur, masë sigurie kjo e vendosur ndaj tij për dosjen Partizani, Sali Berisha nuk harroi të sulmonte edhe gjyqtaren e Posacme Irena Gjoka.

“Irena me nockën e saj cilindo që prek i bën me nockë si veten” – tha ai.

Sulmet ndaj Irena Gjokës, Sali Berisha i bëri një dite pasi KLGJ nuk e pranoi nisjen e verifikimit nëse gjyqtarja e GJKKO Irena Gjoka është në kushtet e mos ushtrimit të detyrës apo jo me argumentin se vendimarrja i takon ILD./abcnews.al

71-vjeçari nga Fieri që u arrestua të premten me akuzën  “ngacmim seksual të të miturve”, është liruar nga masa e arrestit në të cilën ndodhej pret tre ditësh.

Policia e Fierit arrestoi 71-vjeçarin,  me inicialet M.M me akuzën e ngacmimit seksual të premten e javës së kaluar.

Burime nga komisariati i Fierit thanë se 71-vjeçari tentoi ta prekë në mënyrë të papërshtatshme vajzën e mitur të fqinjit. Ngacmimi për të cilin u akuzua i moshuari ndodhi në dyqanin pranë banesës së saj ku ndodhej edhe 71-vjeçari.

Denoncimi u bë nga prindërit e vajzës pasi e mitura u tregoi çfarë kishte ndodhur. Megjithatë gjykata e Fierit në seancën e zhvilluar me dyer të mbyllura, vlerësoi të ligjshëm arrestimin por caktoi si masë sigurie “arrestin në shtëpi”.

Gjyqtarja Bora Shaholli ka pranuar kërkesën e avokatit mbrojtës për një masë të lehtë sigurie për shkak të gjendjes shëndetësore të te akuzuarit. Hetimi për ngjarjen vazhdon

Read More...

Komisioni i Ekonomisë ka nisur dëgjesat me kandidatet  për të plotësuar vendet vakante në Këshillin Mbikëqyrës të Bankës të Shqipërisë. Në total kanë shfaqur interesin njëzet kandidatë për të plotësuar vendet e mbetura bosh që prej dhjetorit të vitit të kaluar.

Aplikimet janë depozituar pranë Kuvendit të Shqipërisë, dhe kandidatët kanë  kryesisht formim ekonomik dhe financiar , me përjashtim të ish kryetares së Gjykatës Kushtetuese, Holta Zaçaj e cila vjen nga fusha e jurisprudencës. Tre anëtarët, Luljeta Minxhozi, e cila mbante edhe postin e zv- guvernatores së parë, Violeta Staka dhe Artan Hoxha kanë rikandiduar.

Si pasojë e vakancave Këshilli Mbikëqyrës i Bankës së Shqipërisë nuk  mund të marrë vendime deri në plotësimin me anëtarët e rinj. Pavarësisht se mund të realizojë mbledhje.

Të gjithë anëtarët e Këshillit Mbikëqyrës të Bankës së Shqipërisë zgjidhen dhe emërohen nga Kuvendi me një mandat 7-vjeçar, me të drejtë rizgjedhjeje, nga të cilët pesë anëtarë propozohen nga Kuvendi; tre anëtarë propozohen nga Këshilli i Ministrave si dhe një anëtar propozohet nga Këshilli Mbikëqyrës.

Tashmë Kuvendi ka shpallur 3 vakanca me kandidatët e vetëofruar, ndërsa 3 propozime do të bëhen nga qeveria.

Dy ditë pas shpalljes së rezultateve përfundimtare të zgjedhjeve të parakohshme parlamentare të 28 dhjetorit nga Komisioni Qendror i Zgjedhjeve (KQZ), Lista Serbe ka dorëzuar një ankesë në Panelin Zgjedhor për Ankesa dhe Parashtresa (PZAP) kundër vendimit të këtij institucioni për mosmiratimin e listës së kandidatëve të saj.

Në një deklaratë për media, Igor Simiç, përfaqësues i Listës Serbe, e ka cilësuar vendimin si “të paligjshëm, anti-serb dhe diskriminues” dhe ka thënë se KQZ-ja ka mohuar “42.759 vota të serbëve”, duke u munduar të pengojë komunitetin serb të zgjedhë përfaqësuesit e tij.

“Presim që PZAP-ja ta shfuqizojë vendimin e turpshëm të Komisionit Qendror të Zgjedhjeve dhe të marrë një vendim në përputhje me ligjin, me ç’rast do të mbrojë të drejtat e popullit serb, ligjshmërinë dhe integritetin e procesit zgjedhor”, tha Simiq.

Misioni i OSBE-së në Kosovë ka thënë se është duke ndjekur këto zhvillime dhe ka theksuar nevojën për “përputhje të plotë dhe respektim të standardeve ndërkombëtare zgjedhore, veçanërisht publikimin transparent dhe të plotë të rezultateve zgjedhore”.

Gjatë fundjavës, ministri i Punëve të Jashtme i Serbisë, Marko Gjuriq, e ka dënuar gjithashtu vendimin e KQZ-së, duke e cilësuar si një sulm të ri ndaj të drejtave politike të popullit serb në Kosovë.

Ai tha se heqja e të drejtës së votës së serbëve nuk duhet të jetë praktikë dhe se Serbia do të insistojë bashkë me partnerët ndërkombëtarë për respektimin e të drejtave politike dhe elektorale të komunitetit serb.

KQZ-ja kishte përfunduar të premten procesin e rinumërimit të votave, i cili u krye pas dyshimeve për manipulime gjatë numërimit të votave të kandidatëve për deputetë.

Pas rinumërimit, disa vota ndryshuan deri në 6 mijë për një kandidat, por rezultatet për partitë nuk u prekën.

Anëtarët e KQZ-së i miratuan listat e kandidatëve të të gjitha partive përveç Listës Serbe, ku tre anëtarë votuan për, dy kundër (nga Lëvizja Vetëvendosje) dhe të tjerët abstenuan.

Sipas KQZ-së, rezultatet përfundimtare janë:

-Lëvizja Vetëvendosje: 51.10% të votave, 57 ulëse

-Partia Demokratike e Kosovës: 20.19%, 22 ulëse

-Lidhja Demokratike e Kosovës: 13.24%, 15 ulëse

-Aleanca për Ardhmërinë e Kosovës: 5.50%, 6 ulëse

Nga ulëset e rezervuara për komunitetin serb, Lista Serbe fitoi nëntë ulëse dhe Partia për Liri, Drejtësi dhe Mbijetesë një ulëse.

Eugen Cakolli nga Instituti Demokratik i Kosovës (KDI) ka kritikuar shpalljen e rezultateve “të pjesshme” dhe veprimet e KQZ-së, duke thënë se situata nuk mund të zgjidhet me votim politik brenda institucionit dhe se vendimi për mosmiratimin e Listës Serbe është i pakuptimtë./REL

TIRANË- Besimi i bizneseve në ekonominë shqiptare ka shënuar rritje në fillim të këtij viti. Sipas Treguesit të Ndjesisë Ekonomike, publikuar nga Banka e Shqipërisë, niveli i besimit të agjentëve ekonomikë u rrit me 4.2% gjatë muajit janar.

Kjo rritje është nxitur nga përmirësimi i besimit të bizneseve në sektorët kryesorë të ekonomisë, përfshirë industrinë, ndërtimin, tregtinë dhe shërbimet. Ndërkohë, besimi i konsumatorëve ka mbetur i pandryshuar.

E ftuar në emisionin “Money Report”, ekspertja e ekonomisë Romina Ramdonshiqi u shpreh se viti 2026 pritet të sjellë një rritje të qëndrueshme ekonomike për vendin.

Radonshiqi theksoi gjithashtu se për vitin 2026 pritet një rritje e inflacionit, si pjesë e zhvillimeve të pritshme ekonomike.

Sipas saj, rivlerësimi i pasurive pritet të zhbllokojë stokun e pronave të pashitura, duke i dhënë një shtysë të re sektorit të ndërtimit, ndërsa sektorët shërbimet dhe tregtia do të vijojnë të përfitojnë nga lidhja e drejtpërdrejtë me turizmin.

“Viti 2026 do të sjellë rritje vërtet të qëndrueshme. Jemi ekonomi e vogël, por i kemi superuar krizat dhe tani ekonomia shqiptare është e qëndrueshme. Kemi një rritje të besimit, sepse bizneset kanë mundësi të parashikojnë tregun për mënyrën se si do të vijojë ekonomia.

Bizneset kanë klientë dhe është rritur besimi në ekonomi. Ndërkohë që rivlerësimi do të zhbllokojë pasuritë e pashitura dhe do t’i japë një mundësi të mirë sektorit të ndërtimit. Shërbimi dhe tregtia janë të lidhura direkt me sektorin e turizmin. Presim që inflacioni të rritet në 2026”, tha ajo./abcnews.al

Ekonomia shqiptare e ka nisur vitin 2026 me optimizëm. Banka e Shqipërisë ka publikuar vrojtimin e ndjesisë ekonomike i cili nxjerr në pah se në janar bizneset në të gjithë sektorët e ekonomisë kanë vlerësime më të mira për ecurinë e aktivitetit të tyre përgjatë muajve në vijim.

Treguesi i ndjesisë ekonomike regjistroi një rritje prej 4.2 pikësh në muajin janar, duke qëndruar 10 pikë mbi mesataren historike . Ky përmirësim u ndikua nga rritja e besimit të bizneseve në katër sektorët e ekonomisë: industri, ndërtim, shërbime dhe tregti. Ndërkohë, besimi i konsumatorëve mbeti i pandryshuar krahasuar me muajin e mëparshëm.

Një ndër sektorët me pritshmëritë më të mira rezulton se janë sektori i shërbimeve duke u rrit me 7.4 pikë përqindje këtë muaj  duke u ndikuar pozitivisht nga vlerësimet më optimiste të bizneseve për nivelin e kërkesës dhe ecurinë aktuale të biznesit të tyre.

Pritshmëritë e aktorëve janë të larta përsa i përket  numrit të turistëve të huaj  që pritet të vizitojnë vendin gjatë këtij viti ndërsa 2025 u mbyll me rreth 12 milionë turistë të huaj.

Treguesi i besimit të industrisë u rrit me 4.8 pikë përqindje në janar, nga përmirësimi në të tre komponentët përbërës: vlerësimi i bizneseve për prodhimin industrial, për kontratat porositëse në total dhe nga eksportet. në ndërtim pritshmëritë mbeten gjithashtu optimiste dhe treguesi i ndjesisë u rrit me 3.1 pikë përqindje e ndikuar nga  vlerësimi i bizneseve për aktivitetin ndërtues dhe porositë aktuale.

Sipërmarrjet që ushtrojnë aktivitetin në tregti gjithashtu presin ecuri më ët mirë  të shitjeve dhe rritje të nivelit të punësimit në të ardhmen

Pas shumë vitesh larg ekranit, Fatime Bici rikthehet në vëmendje jo si figurë televizive, por si një grua që i ka qëndruar besnike një misioni jetësor: jogës si mënyrë jetese dhe shërimi shpirtëror.
E njohur si zonja që futi për herë të parë ushtrimet e jogës në një televizion shqiptar, Fatimja zgjodhi më pas një rrugë më të qetë, por shumë më të thellë, jetën përtej famës, larg zhurmës mediatike.

Me profesion inxhiniere elektrike, ajo rrëfen se studimet fillestare nuk ishin kurrë pasioni i saj i vërtetë. “Ishte një profesion që nuk e doja aspak”, shprehet ajo, ndërsa momenti i njohjes me jogën do të ndryshonte përgjithmonë rrjedhën e jetës së saj.

Kur Fatime Bici nisi të studionte jogën, në Shqipëri kjo disiplinë pothuajse nuk praktikohej dhe nuk pritej me interes. Pikërisht kjo mungesë do ta shtynte të zhvendosej në Greqi, ku vijoi studimet profesionale dhe përkushtimin ndaj jogës, si në aspektin fizik ashtu edhe shpirtëror. Pas rikthimit në Shqipëri, ajo hapi studion e saj në Tiranë, por sërish vuri re se interesi ishte i vakët. Vendimi për t’u zhvendosur në Elbasan do të rezultonte një hap i suksesshëm: sot, Fatime Bici zhvillon klasa joge dhe vëren se në qytetet më të vogla njerëzit janë më të hapur ndaj përmirësimit të jetës përmes praktikave shpirtërore.

Prej 25 vitesh dedikim të pandërprerë, instruktoria e jogës beson fort se kjo disiplinë mund të parandalojë shumë sëmundje, ndaj këshilla e saj është e drejtpërdrejtë: “Ua them të gjitha grave dhe vajzave që ta praktikojnë jogën”. Joga është tashmë pjesë e familjes së saj. Vajza e Fatimes është gjithashtu e përfshirë në këtë praktikë, ndërsa bashkëshorti ndan një pasion tjetër për natyrën, alpinizmin, një harmoni perfekte mes trupit, mendjes dhe lartësive.

Seanca e sotme për kryebashkiakun Erion Veliaj është shoqëruar me debate. Veliaj kërkoi përjashtimin e gjyqtares Etleva Deda pasi sipas tij nuk i dha të drejtën të mbrohej efektivisht.

Avokatja e caktuar kryesisht Valentina Teodoresku u shpreh se ka udhëtuar në drejtim të Durrësit dhe taksia e priti vetëm një orë në IVEP Durrës, ndaj nuk pati më shumë kohë të njihej me aktet.

Teodoresku gjithashtu kërkoi shtyrje të seancës, kërkesë e cila u rrëzua nga GJKKO. Veliaj është larguar nga salla e gjyqit me pretendimin se nuk është dëgjuar nga trupi gjykues. Gjyqtarja Etleva Deda kaloi në konkluzionet përfundimtar të personave të tjerë.

Ndërkohë, në përfundim të seancës, u njoftuar se më 9 shkurt do të vendoset nëse do të kalojë apo jo.

Emri i Jeffry Epstein nuk mbeti larg vëmendjes edhe në çmimet Grammy. Prezantuesi i eventit më të madh muzikor të vitit, Trevor Noah, gjatë batutave të tij përmendi pedofilin që ndërroi jetë në burg në vitin 2019, por edhe presidentin amerikan Donald Trump, i cili është përfolur për lidhjet me Epstein.

“Ky është një Grammy që çdo artist e dëshiron  pothuajse aq sa Trump dëshiron Groenlandën. Gjë që ka kuptim sepse, që kur Epstein është zhdukur, ai ka nevojë për një ishull të ri për të kaluar kohë me Bill Clinton”, tha Noah gjatë batutave të tij.

Por këto fjali shkaktuan zemërim te presidenti amerikan Donald Trump, i cili veçse e cilësoi ceremoninë të pashikueshme, kërcënoi dhe me hapa ligjorë.

Trump tha se nuk mund të flasë në emër të Bill Clinton, por ai vetë nuk ka qenë në ishullin famëkeq në Karaibe e madje as nuk është akuzuar për diçka të tillë.

Kreu i shtëpisë së bardhë paralajmëroi padi ndaj Noah, të cilit i kërkoi të kontrollojë mirë faktet që ka.

Më shumë se tre milionë dokumente për Jeffrey Epstein, u publikuan të premtennga Departamenti i Drejtësisë  që përfshinin përmendjen e figurave të shumta të fuqishme, Elon Musk, Bill Gates, Bill Clinton dhe ish-princin Andrew.

Në reagimin e tij Musk tha se kishte refuzuar vazhdimisht ftesat për të shkuar në ishullin e Epstein, edhe pse email-et e këmbyera mes të dyve treguan në fakt se miliarderi kishte kërkuar vetë të bënte vizita të tilla.

Ndërkohë në Britaninë e Madhe skandali ka qenë i madh, ku veç princit Andreë, i përfshirë ka qenë edhe ish ambasadori britanik në Uashington, Peter Mandelson. Ky i fundit dha dorëheqjen nga Partia Laburiste, pasi iu publikuan emaile me Epstein dhe foto intime me një grua të paidentifikuar.

Në dokumentet e bëra publike përmendet edhe princesha e kurorës e Norvegjisë Mette Marit, e cila i kërkonte Epstein këshilla për djalin e saj. Ky i fundit del para gjyqit në Norvegji, ku përballet me akuza të shumta, ndër to edhe përdhunimi. Nëse dënohet, ai rrezikon deri në 16 vjet burg.

Ora 11 e kësaj të hënë shënoi edhe përfundimin e afateve për subjektet politike dhe kandidatët për të paraqitur ankesat e tyre në Panelin për Ankesa dhe Parashtresa, përpara se Komisioni Qendror i Zgjedhjeve të nisë procesin e certifikimit të rezultateve.

Kandidati i Partisë Demokratike të Kosovës për deputet, Bekim Haxhiu ka dorëzuar dy ankesa zyrtare në PZAP kundër rezultateve përfundimtare të shpallura nga KQZ më 31 janar 2026.

Një ankesë e ka edhe Igor Simiç, i Listës Serbe, pas vendimit të marrë të shtunën, kur dy vota kundër nga Lëvizja Vetëvendosje dhe abstenimi i anëtarëve të tjerë të KQZ-së pamundësuan miratimin e listës së saj me kandidatët për deputet që fituan garën e 28 dhjetorit.

Lidhur me këtë zhvillim ka reaguar OSBE, që ka deklaruar se po e monitoron nga afër situatën dhe pret që vendi të veproj në përputhje me standardet demokratike.

Sipas Ligjit për Zgjedhjet, PZAP ka afat katër ditë për shqyrtimin e ankesave. Ndërkaq, palët e pakënaqura me vendimin e PZAP-it kanë të drejtë ankese në Gjykatën Supreme brenda dy ditësh, ndërsa kjo e fundit ka afat prej tri ditësh për të marrë vendim përfundimtar.

Duke u bazuar në këto afate ligjore, certifikimi përfundimtar i zgjedhjeve të 28 dhjetorit pritet të merret në mes të muajit shkurt.

Ndërkohë, drejtësia vijon punën e saj. Prokuroria Themelore në Prishtinë, ka njoftuar opinionin publik se ka autorizuar Policinë e Kosovës, për grumbullimin dhe mbledhjen e provave lidhur me dyshimet për kryerjen e veprave penale kundër të drejtave të votimit, në Podujevë.

Edhe kjo komunë do të jetë nën lupën e Krimeve Ekonomike, si pasojë e dyshimeve për manipulim. Prokuroria e përgjithshme konfirmon se hetimet pritet të shtrihen edhe në dy komuna të tjera: Skenderaj dhe Vushtria.

Në fundjavë, aksioni i fundit është ai i Prokuroria Themelore në Mitrovicë. Prokuroria kërkoi paraburgimin e 10 personave të dyshuar për manipulim të votave nga 43 të ndaluar për intervistim.