E ardhmja e mbrojtësit Denzel Dumfries te Interi pritet të marrë një drejtim të qartë pas Kupës së Botës, me turneun që shihet si një “vitrinë” e madhe për holandezin, në prag të një lëvizjeje të mundshme verore.

Edhe pse 29-vjeçari ndihet i lumtur në Milano, situata e tij po ndiqet nga afër në gjithë Evropën, për shkak të një klauzole lirimi prej 25 milionë eurosh që aktivizohet në korrik – duke e bërë reale mundësinë e largimit, pavarësisht qëndrimit të Interit.

Sipas “FCInterNews”, një nga klubet që po monitoron zhvillimet është Liverpooli, i cili thuhet se tashmë ka kontaktuar përfaqësuesit e lojtarit për të konfirmuar interesimin e hershëm.

Në garë është edhe Barcelona, e cila po e konsideron Dumfries si një opsion, në rast se vendos të arkëtojë para nga shitja e Jules Kounde. Një skenar i tillë do të kërkonte një shitje të madhe, por brenda klubit katalanas nuk është përjashtuar.

Vlerësimi i Barcelonës për Dumfries është rritur edhe nga paraqitjet e tij në duelet e mëparshme në Ligën e Kampionëve, ku holandezi la përshtypje të forta ndaj katalanasve./Telegrafi/

Federico Dimarco ka hyrë zyrtarisht në historinë e futbollit evropian, duke u bërë mbrojtësi ofensiv më produktiv në pesë ligat më të mëdha të Evropës gjatë dy dekadave të fundit.

Ylli i Inter Milan ka regjistruar plot 24 kontribute në gola gjatë sezonit, me shtatë gola dhe 17 asistime, duke vendosur një rekord të ri për një mbrojtës që nga sezoni 2006/07.

Me këtë arritje të jashtëzakonshme, italiani ka kaluar rekordin e mëparshëm të mbajtur nga Alejandro Grimaldo i Bayer Leverkusen, i cili kishte realizuar 23 kontribute në gola — 10 gola dhe 13 asistime — gjatë sezonit fantastik 2023/24.

Paraqitjet e Dimarcos këtë sezon kanë qenë vendimtare për Interin, me mbrojtësin italian që ka treguar ndikim të jashtëzakonshëm në fazën sulmuese dhe është kthyer në një nga armët më të forta të skuadrës italiane.

Përveç statistikave individuale mbresëlënëse, Dimarco këtë edicion ka festuar edhe dy trofe me Interin, duke fituar titullin kampion në Serie A si dhe Coppa Italia. /Telegrafi/

Interi e ka mbyllur sezonin me një barazim në udhëtim te Bologna.

“Neurazzurët” zhvilluan një paraqitje solide pavarësisht që epilogu përfundimtar rezultoi 3-3.

Federico Dimarco kaloi Interin në epërsi pas një supergoli nga gjuajtja e lirë (22’).

Megjithatë, tre minuta më vonë Federico Bernardeschi përfitoi nga një top i kthyer për të barazuar rezultatin (25’).

Ndërsa, ishte Pobega që shënoi një gol të bukur për ta përmbysur epërsinë (42’).

Situata veçse u bë edhe më e mirë për Bolognan pasi Pietr Zielinski shënoi një autogol për ta dërguar rezultatin në 3-1.

Mirëpo nuk u dorëzua. Pio Espisito shënoi një gol të lehtë nga afërsia pas një topi të kthyer për ta ngushtuar epërsinë (64’).

Ndërsa, Andy Diof e barazoi rezultatin krejt në fund për të mos mbyllur ndeshjen e fundit me ndonjë humbje (86’).

Kësisoj, Interi e mbyll sezonin me 87 pikë në Serie A, kurse Bologna si pozitë e tetë me 56 sosh./Telegrafi/

Dani Carvajal po përballet me një nga vendimet më të rëndësishme të karrierës së tij, pasi ka mbyllur kapitullin te Real Madridi. Mbrojtësi spanjoll do të largohet nga klubi në fund të sezonit, ndërsa Interi ka lëvizur me shpejtësi për të tentuar ta sigurojë si transferim të lirë.

Klubi italian e sheh te kapiteni madrilen një mundësi të rrallë në merkato: përvojë, lidership, konkurrueshmëri dhe mentalitet fitues të ndërtuar për më shumë se një dekadë në nivelin më të lartë.

Mbrojtësi pritet të largohet pas 13 sezonesh me ekipin e parë, me një palmares që e vendos mes mbrojtësve të krahut më të mëdhenj të kohëve të fundit. Tani, Interi synon ta shfrytëzojë këtë situatë kontraktuale për t’i paraprirë edhe klubeve të tjera të Serie A që po e ndjekin.

Interi po kërkon të forcojë krahun e djathtë me një lojtar që jep ndikim të menjëhershëm. Largimi i mundshëm i Denzel Dumfries e ka përshpejtuar nevojën për të afruar një profil të besueshëm dhe konkurrues, të mësuar me ndeshje me intensitet të lartë.

Në këtë skenar, Carvajal përshtatet në mënyrë të përkryer. Nuk do të ishte një lëvizje për të ardhmen, por për një futbollist të gatshëm të performojë që nga dita e parë dhe ta rrisë nivelin e skuadrës.

Christian Chivu beson se ish-lojtari i Real Madridit mund të ofrojë më shumë se thjesht siguri në mbrojtje.

Pesë alternativa në listën e Real Madridit për pasuesin e Carvajalit

Leximi taktik, agresiviteti në duele, përvoja evropiane dhe aftësia për t’i menaxhuar momentet e tensionuara janë cilësi shumë të vlerësuara në “San Siro”.

Interi është i vendosur të mos humbasë kohë dhe synon t’i finalizojë sa më shpejt kushtet e marrëveshjes, për të shmangur një “luftë ofertash” me klube të tjera italiane./Telegrafi/

Klubi italian, Interi po mendon për sezonin e ri dhe tashmë ka vendosur dy objektiva të mëdha për të forcuar mesfushën.

Sipas Gazzetta dello Sport, Interi po ndjek në mënyrë aktive një marrëveshje ambicioze transferimi të dyfishtë për të nënshkruar me mesfushorët Manu Kone dhe Curtis Jones këtë verë.

Kampionët italianë duan të injektojnë më shumë energji dhe intensitet fizik në skuadrën e tyre, duke e parë dyshen si pasardhës idealë afatgjatë për mesfushën e tyre.

Roma duhet të gjenerojë fitime të konsiderueshme kapitale deri më 30 qershor për të përmbushur rregulloret financiare, duke e bërë Konen asetin e tyre më të vlefshëm për t'u shitur në treg.

Interi më parë për pak nuk arriti të nënshkruante me Konen për 35 milionë euro, por vlerësimi i tij aktual tani është rritur afër 50 milionë eurove.

Ndërkohë, Interi krijoi marrëdhënie të shkëlqyera me Liverpoolin pasi e ndoqi nga afër Jonesin gjatë ndeshjeve të tyre intensive në Ligën e Kampionëve në stadiumin San Siro.

Me kontratën e tij që skadon në vitin 2027, Jones preferon një transferim në Itali mbi Anglinë, pavarësisht interesit konkret nga Neëcastle dhe Aston Villa. /Telegrafi/

Trajneri i Comos Cesc Fabregas ka bërë të qartë se mesfushori Nico Paz nuk do t’i bashkohet Interit në verë.

Ylli argjentinas thuhej se ishte top prioritet i gjigantit italian për në verë, pavarësisht që Real Madridi edhe po e konsideron për sezonin 2026/27.

Fabregas megjithatë për “Sportmediaset” bëri të ditur se nuk ka gjasa që Paz të luajë për Interin.

“Nico është 50 për qind lojtar i Comos. I vetmi klub që mund të flet është Real Madridi. Unë e di që Zanetti nuk punon për Madridin ose Comon, prandaj duhet të shfaqë respekt”.

“Një gjë është e sigurt: Nico Paz nuk do të luajë për Interin. Ose do të rikthehet te Real Madridi, ose do të luajë për Comon vitin tjetër”, deklaroi ai.

Ndërkohë, Real Madridi ende nuk ka vendosur për të ardhmen e argjentinasit pavarësisht spekulimeve, me përgjigjen vendimtare që do ta jep trajneri i ri Jose Mourinho.

Skuadra madrilene pritet të jetë mjaftë aktive në afatin kalimtar veror./Telegrafi/

Raportimet nga Italia pretendojnë se Bayern Munich po shqyrton një lëvizje verore për mbrojtësin e Interit, Yann Bisseck, ndërsa “Nerazzurrët” shpresojnë të sjellin dy zëvendësues nga Serie A në rast se gjermani rikthehet në vendlindje gjatë afatit kalimtar.

Interi pritet të ndahet me disa figura me përvojë në repartin defensiv këtë verë: Matteo Darmian dhe Francesco Acerbi do të largohen nga klubi në fund të kontratave të tyre në qershor, ndërsa ende nuk është marrë vendim për Stefan De Vrij, i cili po ashtu mbetet pa kontratë muajin e ardhshëm.

Megjithatë, Gazzetta dello Sport raporton se edhe një tjetër “emër i madh” mund të shitet për të lehtësuar afrimet e reja.

Alessandro Bastoni ishte lidhur me një transferim te Barcelona këtë verë, por reprezentuesi i Italisë tani duket i prirur të qëndrojë në “San Siro”. Tani, sipas raportimeve, Bayern Munich është i interesuar për Bisseck.

Vitin e kaluar u raportua për interesim ndaj Bisseck edhe nga Crystal Palace, por klubi anglez nuk ishte i gatshëm të shkonte përtej shifrës 30 milionë euro.

Gazzetta dello Sport pohon se këtë herë çmimi i kërkuar nga Interi është rreth 40 milionë euro, pas suksesit të skuadrës në sezonin 2025/26, ku fitoi dopietën Serie A dhe Kupën e Italisë.

Nëse Interi vendos të shesë një mbrojtës të ekipit të parë këtë verë, Gazzetta dello Sport raporton se dëshira e klubit është të afrojë si Tarik Muharemovic nga Sassuolo, ashtu edhe Oumar Solet nga Udinese./Telegrafi/

Zëvendëspresidenti i Interit, Javier Zanetti, ka konfirmuar se klubi shpreson të nënshkruajë mesfushorin e Comos, Nico Paz.

Lojtari argjentinas, i cili ka shkëlqyer në Serie A në dy sezonet e fundit, është lidhur me një rikthim te Real Madridi, të cilët thuhet se janë të interesuar të aktivizojnë klauzolën e riblerjes prej 10 milionë eurosh.

Megjithatë, një ofertë në rreth 50 dhe 60 milionë euro nga Interi mund t’i bindë Los Blancos për shitjen e përhershme të Paz dhe ylli i ri është gjithashtu pjesë e dëshirave të Nerazzurrëve.

Zanetti dhe Milito takohen me Nico Paz, shtohen zërat për transferimin e yllit të Comos te Interi

“Më pëlqen shumë Nico Paz. Për mënyrën se si luan dhe për personin që është. Jam me fat që e njoh babanë e tij, i cili ishte shoku im i dhomës në Kupën e Botës 1998", ka thënë fillimisht legjenda e Interit.

“Jeta na bashkoi përsëri në Como (me babanë e Nicos, Pablon,) pas shumë vitesh pa u parë”.

“Jam i lumtur për praninë e Nicos në Como. Në këto dy vite në futbollin italian, ai ka treguar të gjitha cilësitë e tij. Nico është në rrugën e duhur për t'u bërë një lojtar i shkëlqyer”.

“Nga sa di unë, ai do të kthehet te Real Madridi, por kurrë nuk duhet ta humbasësh shpresën për ta parë me fanellën e Interit”, përfundoi Zanetti. /Telegrafi/

Sipas Corriere dello Sport, Interi është seriozisht i interesuar për kapitenin e Barcelonës, Ronald Araujo, duke e konsideruar atë si një nga objektivat kryesorë të verës.

Kjo lëvizje po studiohet si pjesë e një plani më të gjerë në afatin kalimtar pas “dopietës” në garat vendore, teksa klubi synon të forcojë edhe më tej mbrojtjen për një sulm të fortë drejt Ligës së Kampionëve.

Emri i Araujos po diskutohet tashmë në të njëjtin kontekst me Alessandro Bastonin. Barcelona vazhdon të kërkojë një qendërmbrojtës mëngjarash, dhe Bastoni mbetet shumë i vlerësuar, por kërkesa e Interit prej mbi 60 milionë eurosh e ka bërë të vështirë këtë operacion.

Pikërisht për këtë arsye, Barcelona po shqyrton mënyra për ta ulur koston, përfshirë edhe mundësinë e përfshirjes së një lojtari në marrëveshje.

Në këtë kuadër, Araujo ka dalë si një opsion i mundshëm në një skemë shkëmbimi, e cila mund të ndihmojë në “çeljen” e largimit të Bastonit.

Megjithatë, vetë Araujo dëshiron të qëndrojë te Barcelona. Thuhet se ai është i kënaqur me paraqitjet e fundit, gëzon respekt në dhomat e zhveshjes dhe vazhdon të shihet nga klubi si një pjesë e rëndësishme e projektit të ardhshëm.

Kështu, edhe pse Interi po shtyn fort për të dhe ideja e një shkëmbimi po eksplorohet, situata mbetet e ndërlikuar.

Barcelona e pëlqen Bastonin, Interi e pëlqen Araujon, por dëshira e mbrojtësit për të qëndruar në “Camp Nou” mund ta bëjë këtë plan jashtëzakonisht të vështirë për t’u finalizuar./Telegrafi/

Barcelona ka nisur lëvizjet konkrete për të siguruar shërbimet e sulmuesit argjentinas Lautaro Martinez, ndërsa kontaktet e para me Interin tashmë janë vendosur.

Klubi katalanas po kërkon me prioritet një qendërsulmues të ri për të rindërtuar repartin ofensiv pas largimit të veteranit polak Robert Lewandowski.

Sipas raportimeve, Barcelona e ka admiruar prej kohësh kapitenin e Interit, ndërsa interesimi për të është rikthyer fuqishëm pas sezonit mbresëlënës që argjentinasi zhvilloi në Itali.

Martinez ishte një nga lojtarët kyç në suksesin e Interit në Serie A, duke e udhëhequr skuadrën drejt titullit kampion me paraqitje të nivelit të lartë.

Sulmuesi 28-vjeçar realizoi 22 gola dhe kontribuoi me 6 asistime në të gjitha garat, duke konfirmuar statusin e tij si një nga sulmuesit më të kompletuar në Evropë.

Megjithatë, një marrëveshje nuk pritet të jetë e lehtë për Barcelonën, Interi e konsideron Lautaron një figurë qendrore të projektit sportiv dhe nuk ka ndërmend ta lërë të largohet pa një ofertë të rëndësishme financiare.

Nga ana tjetër, Barcelona po punon për të ulur moshën mesatare të skuadrës dhe për të ndërtuar një ekip konkurrues për vitet e ardhshme. Lautaro Martinez shihet si një lider në fushë dhe një lojtar që mund të përshtatet menjëherë me filozofinë sulmuese të klubit blaugrana.

Në javët e ardhshme pritet të ketë zhvillime të reja rreth këtij operacioni, ndërsa tifozët e Barcelonës po ëndërrojnë një repart ofensiv të udhëhequr nga sulmuesi argjentinas. /Telegrafi/

Denzel Dumfries ka rikthyer sërish dyshimet mbi të ardhmen e tij te Interi. Mbrojtësi i krahut i kombëtares së Holandës ka bërë të ditur se vendimi përfundimtar mbi të ardhmen e tij do të merret pas Kupës së Botës, duke lënë të hapur mundësinë e largimit nga klubi zikaltër gjatë verës.

Sipas raportimeve të mediave italiane, Dumfries ka zgjedhur të mos krijojë tensione me klubin, por njëkohësisht nuk ka garantuar qëndrimin e tij në “Giuseppe Meazza”.

Futbollisti është shprehur i lumtur te Interi dhe ka marrëdhënie të mira me drejtuesit, megjithatë ka shmangur çdo premtim për vazhdimësi afatgjatë.

Kontrata e tij me Interin është e vlefshme deri në vitin 2028, por klauzola e largimit prej 25 milionë eurosh konsiderohet mjaft e favorshme për disa klube të mëdha evropiane.

Në një treg ku çmimet janë rritur ndjeshëm, Dumfries shihet si një mundësi ideale për skuadrat që kërkojnë përforcime cilësore në krahun e djathtë.

Aktualisht, prioriteti i lojtarit mbetet përfaqësimi i Holandës në Kupën e Botës, ndërsa pas turneut pritet të zhvillojë bisedime me drejtuesit e Interit për të analizuar të gjitha opsionet e mundshme.

Si mund të luajë sezonin e ardhshëm Liverpooli me Xabi Alonson dhe katër transferime të reja?

Nga ana tjetër, Interi nuk dëshiron të humbasë një nga elementët më të rëndësishëm të skuadrës. Dumfries ka pasur një rol vendimtar në pjesën e dytë të sezonit, duke sjellë energji, forcë fizike dhe kontribut ofensiv në krahun e djathtë. Brenda Serie A, ai konsiderohet ndër mbrojtësit e krahut më të kompletuar për shkak të kombinimit të fuqisë dhe depërtimit në sulm.

Klubi italian e vlerëson lart profesionalizmin dhe ndikimin e tij që nga momenti kur u transferua nga PSV Eindhoven.

Dumfries kishte mbërritur në Milano si kapiten i skuadrës holandeze dhe u përshtat shumë shpejt me kërkesat e futbollit italian.

Vetë lojtari ka kujtuar edhe kontaktin e parë me drejtorin sportiv Piero Ausilio, i cili i kërkoi të udhëtonte menjëherë drejt Italisë për të finalizuar transferimin.

Që prej asaj kohe, Dumfries ka fituar eksperiencë dhe status të rëndësishëm brenda skuadrës zikaltër.

Megjithatë, klauzola e lirimit mbetet elementi që mund të trazojë merkaton. Edhe pse largimi nuk është i sigurt, ajo u jep hapësirë klubeve të interesuara të provojnë transferimin e tij. Për këtë arsye, vera pritet të jetë vendimtare si për lojtarin, ashtu edhe për Interin.

Pas përfundimit të Kupës së Botës, Dumfries pritet të marrë vendimin final: të vazhdojë projektin me Interin ose të nisë një aventurë të re larg futbollit italian. /Telegrafi/

Barcelona vazhdon punën për ndërtimin e skuadrës për sezonin e ardhshëm, me drejtuesit katalanas që kanë vendosur si prioritete kryesore afrimin e një sulmuesi dhe një qendërmbrojtësi të ri.

Klubi fillimisht synon të finalizojë transferimin e një sulmuesi, ku emri kryesor në listën e dëshirave mbetet Joao Pedro, përpara se të fokusohet plotësisht në përforcimin e repartit defensivë.

Një nga objektivat kryesorë për mbrojtjen është Alessandro Bastoni i Inter Milan. Barcelona raportohet se ka muaj që zhvillon kontakte me mbrojtësin italian, ndërsa Interi pret ofertën e parë zyrtare nga klubi katalanas.

Gjiganti italian kërkon rreth 60 milionë euro për kartonin e 27-vjeçarit dhe dëshiron ta zgjidhë situatën sa më shpejt për të planifikuar merkaton verore.

Flick nuk është i bindur, transferimi i Bastoni te Barcelona mund të dështojë telegrafi.com

Megjithatë, sipas raportimeve të gazetarit Matteo Moretto, trajneri Hansi Flick nuk është plotësisht i bindur nga profili i Bastonit. Tekniku gjerman dyshohet se ka rezerva për përshtatjen e italianit me stilin e lojës që dëshiron të implementojë te Barcelona.

Për këtë arsye, Flick i ka kërkuar klubit të shqyrtojë alternativa të tjera për qendrën e mbrojtjes. Një nga opsionet që po monitorohet është Cristian Romero i Tottenham Hotspur, i cili shihet si plan rezervë në rast se transferimi i Bastonit dështon.

Raportet shtojnë se situata e Tottenhamit mund të ndikojë drejtpërdrejt në negociata, pasi një rënie e mundshme nga kategoria do ta bënte më të lehtë largimin e mbrojtësit argjentinas.

Javët e ardhshme pritet të jenë vendimtare për të ardhmen e Bastonit dhe planet e Barcelonës në merkato./Telegrafi/

Interi është lidhur me një lëvizje befasuese për Phil Foden, teksa gazetari italian Paolo Condo ka sugjeruar se sulmuesi i Manchester Cityt mund të tundohet nga një transferim te ‘Nerazzurrët’, në një kohë kur përpjekjet e klubit për objektivin kryesor kreativ, Nico Paz, po duken gjithnjë e më pak të realizueshme.

Sipas Calciomercato.it, Interi prej kohësh e ka identifikuar Nico Paz si profilin ideal – një lojtar i aftë të krijojë epërsi individuale dhe të “hapë” mbrojtjet kundërshtare.

Megjithatë, Real Madridi pritet ta aktivizojë klauzolën e riblerjes për argjentinasin dhe nuk ka asnjë garanci se më pas do të lejonte një shitje të re.

Duke folur në Sky Sport 24, Condo e propozoi Foden si një alternativë serioze.

“Ai ka pasur më pak hapësirë te City këtë vit, ndoshta për shkak të disa problemeve jashtë fushe. Por, me një ofertë serioze dhe interesante, ai mund të tundohet nga një eksperiencë në Itali”, u shpreh Condo.

Foden ka kontratë me Manchester Cityn deri në qershor të vitit 2027, çka do të thotë se i ka mbetur edhe pak më shumë se një vit nga marrëveshja aktuale.

Edhe pse talenti i tij është i padiskutueshëm dhe ai do të përfaqësonte një afrim të nivelit më të lartë, Condo pranoi se gjasat që reprezentuesi i Anglisë të largohet nga Liga Premioer për në Serie A mbeten të ulëta./Telegrafi/

Interi është fituesi i Kupës së Italisë, pasi në finalen e luajtur ndaj Lazios në 'Stadio Olimpico' triumfoi me rezultat 2-0.

Nerazzurrët e nisën ndeshjen me presion dhe e gjetën shpejt avantazhin. Në minutën e 14-të, Lazio u ndëshkua nga një gabim fatal, kur Adam Marusic, i çorientuar në mbrojtje, devijoi topin me kokë në portën e vet për 0-1.

Interi vazhdoi ta kontrollojë ritmin dhe e dyfishoi epërsinë në minutën e 35-të, kur Lautaro Martinez u shërbye në mënyrë perfekte, doli “një kundër një” me portierin dhe finalizoi saktë në këndin e majtë të poshtëm për 0-2.

Lazio tentoi të rikthehej në lojë me goditje nga distanca dhe aksione në zonë, por pa efikasitet. Isaksen (45’) dhe Noslin (58’) provuan nga jashtë zonës, por të dy tentimet shkuan jashtë.

Një nga momentet më të spikatura të pjesës së dytë ishte pritja vendimtare e Josep Martinez në minutën e 76’, kur Boulaye Dia gjuajti në drejtim të këndit të poshtëm të djathtë, por portieri i Interit reagoi shkëlqyeshëm dhe ruajti portën e paprekur.

Nga ana tjetër, Interi ishte pranë golit të tretë me Zielinskin, në minutën e 82’, kur gjuajtja e tij kaloi pranë shtyllës së djathtë.

Me këtë fitore 2-0 në finale, Interi ngre lart trofeun e Kupës së Italisë, pasi titullit kampion. /Telegrafi/

Fituesi i edicionit të 79-të të Kupës së Italisë (Coppa Italia) do të përcaktohet sonte pas 90 minutave, ndërsa nëse rezultati mbetet i barabartë, ndeshja do të shkojë në vazhdime dhe, nëse është e nevojshme, edhe në penallti.

Interi e sheh këtë finale si mundësi për të kompletuar “dopietën”, pas triumfit në Serie A dhe fitimit të Scudettos. Në anën tjetër, Lazio synon trofeun, por edhe një objektiv po aq të rëndësishëm: sigurimin e një bilete për në Ligën e Evropës.

Skuadrat vijnë në këtë përballje vetëm një javë pas ndeshjes në kampionat, ku Nerazzurrët fituan bindshëm 3-0, megjithëse kjo finale luhet në terren neutral.

Për Lazion, i gjithë sezoni varet nga kjo ndeshje, pasi në Serie A skuadra po lufton dhe ka vështirësi edhe për të siguruar një pozitë brenda 10-shes së parë.

Maurizio Sarri dhe Cristian Chivu kanë zbuluar formacionet zyrtare.

Lazio: Motta; Marusic, Gila, Romagnoli, Nuno Tavares; Basic, Patric, Taylor; Isaksen, Noslin, Zaccagni.

Inter: J. Martinez; Bisseck, Akanji, Bastoni; Dumfries, Barella, Zielinski, Sucic, Dimarco; Thuram, Lautaro Martinez.

/Telegrafi/

Për herë të tretë në gjashtë sezonet e fundit, Interi u shpall kampion i Serie A. Fitorja 2-0 ndaj Parmës, e kombinuar me barazimin 0-0 të Napolit (rivali kryesor për titull) kundër Comos dhe humbjen 0-2 të Milanit në transfertë ndaj Sassuolos, bëri që “zikaltërit” ta sigurojnë titullin e 21-të kampion të Italisë me tri ndeshje pa u luajtur.

Edhe pse u eliminuan në mënyrë befasuese nga Ligën e Kampionëve në raundin “play-offit” nga norvegjezët e Bodo/Glimt, Interi mund ta mbyllë sezonin me dopietë nëse e mposht Lazion në finalen e Kupës së Italisë më 13 maj.

Gjatë gjithë sezonit, Interi është shtyrë përpara nga golat e dyshes sulmuese Lautaro Martinez dhe Marcus Thuram, të cilët së bashku kanë shënuar 38 gola.

Megjithatë, një pjesë e madhe e suksesit këtë sezon (dhe në sezonet e fundit) lidhet me një mesfushë që e përzien punën e madhe me kreativitetin, duke e lidhur mbrojtjen me sulmin dhe duke krijuar vazhdimisht raste për Martinez dhe Thuram. Si te çdo skuadër elitare në futbollin evropian, mesfusha është “motori” i ekipit. Por çfarë e bën mesfushën e Interit kaq të balancuar?

Përvojë dhe fitues të mëdhenj

Bërthama e mesfushës së Interit ndër vite është ndërtuar mbi lojtarë me përvojë dhe mentalitet fituesi. Me Hakan Çalhanoğlu (32) dhe Henrikh Mkhitaryan (37), kampionët e Italisë kanë dy “shtylla” me CV të pasur. Sidomos Mkhitaryan ka luajtur për klube të mëdha evropiane dhe ka fituar Ligën e Evropës me Manchester United dhe Liga e Konferencës me Romën.

Edhe pse është 37 vjeç, Mkhitaryan ka luajtur mbi 1800 minuta në sezonin e titullit. Pavarësisht moshës, ai – me Davide Frattesi (26) si zëvendësues shumë të aftë – i jep Interit këmbëngulje, agresivitet dhe cilësi me topin, duke e ndihmuar skuadrën ta kontrollojë betejën në mesfushë.

Kjo u jep hapësirë lojtarëve si Çalhanoglu, Piotr Zielinski dhe i riu Petar Sucic (22) që ta shfaqin kreativitetin e tyre, për t’i ushqyer sulmuesit në krye. Këta mesfushorë kanë dhënë kontribut të madh në gola dhe asistime, ndërsa punojnë pa u kursyer edhe në fazën mbrojtëse.

Nëse merren parasysh edhe shifrat e krahëve (anësorëve) Federico Dimarco dhe Denzel Dumfries, del edhe më qartë sa i fortë është “pesëshi” i mesfushës në skemën fluide 3-5-2.

“Diamanti” i mesfushës: Nicolo Barella

Edhe pse Interi ka shumë cilësi në mesfushë, ylli kryesor konsiderohet zëvendëskapiteni Nicolò Barella. 29-vjeçari iu bashkua Interit nga Cagliari në korrik 2019 për 32.5 milionë euro dhe që atëherë ka qenë thuajse gjithmonë ndër emrat e parë në formacion.

Barella i kombinon në mënyrë ideale presionin e pandalshëm ndaj kundërshtarit, pasimet vendimtare dhe kontributin në të dyja fazat e lojës.

Ai është bërë i pazëvendësueshëm jo vetëm për Interin, por edhe për Italinë, ku ka 70 paraqitje. Përveç përvojës, ai ka edhe inteligjencën për ta “marrë ndeshjen në dorë” kur skuadra ka nevojë.

Pikërisht ky kombinim i punës së madhe dhe kreativitetit – që e ofron Barella bashkë me shokët e tij – është arsyeja pse Interi e ka atë balancë në mesfushë që i lejon ta kontrollojë lojën në çdo fazë.

Edhe pse në Evropë kanë mbetur prapa pritshmërive vitet e fundit, në Itali Interi mbetet skuadra që duhet mposhtur. Dhe edhe pse Mkhitaryan e Çalhanoğlu po hyjnë në fazën e fundit të karrierës, Interi duket se ka mjaftueshëm cilësi për ta ruajtur këtë ekuilibër që është shndërruar në çelësin e suksesit. /Telegrafi/

Interi ka shënuar fitore bindëse në udhëtim te Lazio, sfidë e vlefshme për xhiron e 36-të në Serie A.

“Neurazzurët” vazhduan me rezultate pozitive pavarësisht që fituan titullin një xhiro më parë, për të triumfuar me rezultat 0-3.

Lautaro Martinez përfitoi nga një top i kthyer për t’i dhënë Interit një epërsi të hershme (6’).

Ndërsa, ishte Petar Sucic që shënoi një superogl nga distanca për ta lënë portierin plotësisht të shtangur duke dyfishuar epërsinë (39’).

Situata për Lazion veçse u përkeqësua kur Alessio Romagnoli u ndëshkua me karton të kuq pas një ndërhyrje (59’).

Fitoren e Interit pastaj e vulosi Ange-Yoan Bonny me një gol të bukur pas asistimit të Mkhitaryan (76’).

Interi kësisoj mbledh 85 pikë ndërsa Lazio qëndron në pozitën e tetë me 51 sosh./Telegrafi/

Sulmuesi i Interit, Ange-Yoan Bonny, ka përfunduar me sukses ndërrimin e kombësisë dhe do të jetë i disponueshëm për t'u përzgjedhur nga Bregu i Fildishtë kur të shpallë skuadrën e tyre për Kupën e Botës 2026.

Kërkesa e Bonnyt të lindur në Francë për të ndryshuar kombësinë e tij futbollistike nga Franca, për të cilën luajti për ekipin U-21 dy vjet më parë, u miratua nga organi qeverisës i futbollit botëror, FIFA.

Njoftimi zyrtar për pranimin e kërkesës erdhi gjatë ditës së premte, ku ylli i Interit u prit nga ambsadaroi i Bregut të Fildishtë në Itali, me fanellën e kësaj kombëtare.

Bonny, 22 vjeç, është me prejardhje nga Bregu i Fildishtë dhe pritet të përfshihet në skuadrën prej 26 lojtarësh për Kupën e Botës 2026.

Ai ndihmoi Interin të fitonte titullin e Serie A këtë sezon, duke dëshmuar se ishte një zëvendësues i shkëlqyer për klubin italian me pesë gola në ligë.

Bregu i Fildishtë është në Grupin E të Kupës së Botës me kombëtaren e Ekuadorit, atë të Gjermanisë dhe Kuraçaon.

Bonny mund të debutojë para turneut kur vendasit e Bregut të Fildishtë do të përballen me Francën në Lens më 4 qershor në një ndeshje miqësore. /Telegrafi/

Raporti i dytë “Global State of Football” tregon se Fiorentina, Atalanta dhe Napoli kanë qenë klubet më të qëndrueshme financiarisht në Serie A gjatë sezonit 2024-25, ndërsa Gian Piero Gasperini është vlerësuar si trajneri më efikas në elitën e futbollit italian.

Studimi, i realizuar nga teknologjia kryesuese botërore e inteligjencës artificiale PLAIER dhe Universiteti i St. Gallen, ka analizuar 226 klube në 14 liga gjatë sezonit 2024-25, duke vlerësuar faktorë si cilësia e skuadrës, performanca e drejtorit sportiv, efektiviteti i trajnerit dhe stabiliteti financiar.

Raporti nuk nxjerr në pah vetëm se cilat klube patën sukses, por edhe se si e arritën atë sukses dhe me çfarë kostoje financiare.

Fiorentina doli klubi më i qëndrueshëm financiarisht në Serie A, duke regjistruar një raport kapitali prej 72%, e ndjekur nga Atalanta dhe Napoli në vendin e dytë dhe të tretë.

Como u vlerësua me departamentin sportiv më efikas, duke sjellë rezultatet më të forta në raport me burimet që kishte në dispozicion.

Napoli, që fitoi titullin sezonin e kaluar, u rendit i treti, ndërsa Interi nënkampion, u pozicionua vetëm në vendin e 14-të.

Në skajin tjetër të renditjes, Parma shënoi performancën më të dobët të departamentit sportiv në kampionat, duke dështuar ta shndërrojë investimin financiar në rezultate konkrete në fushë./Telegrafi/

Sezonet në top ligat evropiane të futbollit janë drejt fundit dhe skuadrat po luftojnë për t'i arritur objektivat e tyre.

Të gjithë thonë se në futboll mbrojtja ta fiton titullin dhe për Interin kjo gjë ka funskionuar, por duket se njësoj do të funskionojë edhe për PSG-në dhe Arsenalin që janë afër ta fitojnë titullin kampion.

SofaScore ka publikuar listën me 10 skuadrat që kanë mbajtur portën e paprekur më së shumti në top pesë ligat evropiane.

Arsenali, Como dhe Interi kanë arritur ta mbajnë portën e paprekur nga 17 herë në 35 ndeshje të zhvilluara këtë edicion.

Ndërkohë PSG është e katërta me 16 porta të paprekura në 31 ndeshje.

Nga 15 herë portën e paprekur e kanë mbajtur skuadrat si Lyon në Ligue 1 si dhe Roma, Lazio, Milan dhe Juventusi në Serie A. Top 10-shja mbyllet me gjigantin gjerman Borussia Dortmund që ka mbajtur 14 herë portën e paprekur.

Interesant është fakti se nga kjo top 10-she gjashtë skuadra janë italiane, duke treguar edhe njëherë se në Serie A i kushtohet shumë rëndësi repartit defensivë. /Telegrafi/