Zëvendëspresidenti i Interit, Javier Zanetti, ka konfirmuar se klubi shpreson të nënshkruajë mesfushorin e Comos, Nico Paz.
Lojtari argjentinas, i cili ka shkëlqyer në Serie A në dy sezonet e fundit, është lidhur me një rikthim te Real Madridi, të cilët thuhet se janë të interesuar të aktivizojnë klauzolën e riblerjes prej 10 milionë eurosh.
Megjithatë, një ofertë në rreth 50 dhe 60 milionë euro nga Interi mund t’i bindë Los Blancos për shitjen e përhershme të Paz dhe ylli i ri është gjithashtu pjesë e dëshirave të Nerazzurrëve.
“Më pëlqen shumë Nico Paz. Për mënyrën se si luan dhe për personin që është. Jam me fat që e njoh babanë e tij, i cili ishte shoku im i dhomës në Kupën e Botës 1998", ka thënë fillimisht legjenda e Interit.
“Jeta na bashkoi përsëri në Como (me babanë e Nicos, Pablon,) pas shumë vitesh pa u parë”.
“Jam i lumtur për praninë e Nicos në Como. Në këto dy vite në futbollin italian, ai ka treguar të gjitha cilësitë e tij. Nico është në rrugën e duhur për t'u bërë një lojtar i shkëlqyer”.
“Nga sa di unë, ai do të kthehet te Real Madridi, por kurrë nuk duhet ta humbasësh shpresën për ta parë me fanellën e Interit”, përfundoi Zanetti. /Telegrafi/
Sipas Corriere dello Sport, Interi është seriozisht i interesuar për kapitenin e Barcelonës, Ronald Araujo, duke e konsideruar atë si një nga objektivat kryesorë të verës.
Kjo lëvizje po studiohet si pjesë e një plani më të gjerë në afatin kalimtar pas “dopietës” në garat vendore, teksa klubi synon të forcojë edhe më tej mbrojtjen për një sulm të fortë drejt Ligës së Kampionëve.
Emri i Araujos po diskutohet tashmë në të njëjtin kontekst me Alessandro Bastonin. Barcelona vazhdon të kërkojë një qendërmbrojtës mëngjarash, dhe Bastoni mbetet shumë i vlerësuar, por kërkesa e Interit prej mbi 60 milionë eurosh e ka bërë të vështirë këtë operacion.
Pikërisht për këtë arsye, Barcelona po shqyrton mënyra për ta ulur koston, përfshirë edhe mundësinë e përfshirjes së një lojtari në marrëveshje.
Në këtë kuadër, Araujo ka dalë si një opsion i mundshëm në një skemë shkëmbimi, e cila mund të ndihmojë në “çeljen” e largimit të Bastonit.
Megjithatë, vetë Araujo dëshiron të qëndrojë te Barcelona. Thuhet se ai është i kënaqur me paraqitjet e fundit, gëzon respekt në dhomat e zhveshjes dhe vazhdon të shihet nga klubi si një pjesë e rëndësishme e projektit të ardhshëm.
Kështu, edhe pse Interi po shtyn fort për të dhe ideja e një shkëmbimi po eksplorohet, situata mbetet e ndërlikuar.
Barcelona e pëlqen Bastonin, Interi e pëlqen Araujon, por dëshira e mbrojtësit për të qëndruar në “Camp Nou” mund ta bëjë këtë plan jashtëzakonisht të vështirë për t’u finalizuar./Telegrafi/
Barcelona ka nisur lëvizjet konkrete për të siguruar shërbimet e sulmuesit argjentinas Lautaro Martinez, ndërsa kontaktet e para me Interin tashmë janë vendosur.
Klubi katalanas po kërkon me prioritet një qendërsulmues të ri për të rindërtuar repartin ofensiv pas largimit të veteranit polak Robert Lewandowski.
Sipas raportimeve, Barcelona e ka admiruar prej kohësh kapitenin e Interit, ndërsa interesimi për të është rikthyer fuqishëm pas sezonit mbresëlënës që argjentinasi zhvilloi në Itali.
Martinez ishte një nga lojtarët kyç në suksesin e Interit në Serie A, duke e udhëhequr skuadrën drejt titullit kampion me paraqitje të nivelit të lartë.
Sulmuesi 28-vjeçar realizoi 22 gola dhe kontribuoi me 6 asistime në të gjitha garat, duke konfirmuar statusin e tij si një nga sulmuesit më të kompletuar në Evropë.
Megjithatë, një marrëveshje nuk pritet të jetë e lehtë për Barcelonën, Interi e konsideron Lautaron një figurë qendrore të projektit sportiv dhe nuk ka ndërmend ta lërë të largohet pa një ofertë të rëndësishme financiare.
Nga ana tjetër, Barcelona po punon për të ulur moshën mesatare të skuadrës dhe për të ndërtuar një ekip konkurrues për vitet e ardhshme. Lautaro Martinez shihet si një lider në fushë dhe një lojtar që mund të përshtatet menjëherë me filozofinë sulmuese të klubit blaugrana.
Në javët e ardhshme pritet të ketë zhvillime të reja rreth këtij operacioni, ndërsa tifozët e Barcelonës po ëndërrojnë një repart ofensiv të udhëhequr nga sulmuesi argjentinas. /Telegrafi/
Denzel Dumfries ka rikthyer sërish dyshimet mbi të ardhmen e tij te Interi. Mbrojtësi i krahut i kombëtares së Holandës ka bërë të ditur se vendimi përfundimtar mbi të ardhmen e tij do të merret pas Kupës së Botës, duke lënë të hapur mundësinë e largimit nga klubi zikaltër gjatë verës.
Sipas raportimeve të mediave italiane, Dumfries ka zgjedhur të mos krijojë tensione me klubin, por njëkohësisht nuk ka garantuar qëndrimin e tij në “Giuseppe Meazza”.
Futbollisti është shprehur i lumtur te Interi dhe ka marrëdhënie të mira me drejtuesit, megjithatë ka shmangur çdo premtim për vazhdimësi afatgjatë.
Kontrata e tij me Interin është e vlefshme deri në vitin 2028, por klauzola e largimit prej 25 milionë eurosh konsiderohet mjaft e favorshme për disa klube të mëdha evropiane.
Në një treg ku çmimet janë rritur ndjeshëm, Dumfries shihet si një mundësi ideale për skuadrat që kërkojnë përforcime cilësore në krahun e djathtë.
Aktualisht, prioriteti i lojtarit mbetet përfaqësimi i Holandës në Kupën e Botës, ndërsa pas turneut pritet të zhvillojë bisedime me drejtuesit e Interit për të analizuar të gjitha opsionet e mundshme.
Nga ana tjetër, Interi nuk dëshiron të humbasë një nga elementët më të rëndësishëm të skuadrës. Dumfries ka pasur një rol vendimtar në pjesën e dytë të sezonit, duke sjellë energji, forcë fizike dhe kontribut ofensiv në krahun e djathtë. Brenda Serie A, ai konsiderohet ndër mbrojtësit e krahut më të kompletuar për shkak të kombinimit të fuqisë dhe depërtimit në sulm.
Klubi italian e vlerëson lart profesionalizmin dhe ndikimin e tij që nga momenti kur u transferua nga PSV Eindhoven.
Dumfries kishte mbërritur në Milano si kapiten i skuadrës holandeze dhe u përshtat shumë shpejt me kërkesat e futbollit italian.
Vetë lojtari ka kujtuar edhe kontaktin e parë me drejtorin sportiv Piero Ausilio, i cili i kërkoi të udhëtonte menjëherë drejt Italisë për të finalizuar transferimin.
Që prej asaj kohe, Dumfries ka fituar eksperiencë dhe status të rëndësishëm brenda skuadrës zikaltër.
Megjithatë, klauzola e lirimit mbetet elementi që mund të trazojë merkaton. Edhe pse largimi nuk është i sigurt, ajo u jep hapësirë klubeve të interesuara të provojnë transferimin e tij. Për këtë arsye, vera pritet të jetë vendimtare si për lojtarin, ashtu edhe për Interin.
Pas përfundimit të Kupës së Botës, Dumfries pritet të marrë vendimin final: të vazhdojë projektin me Interin ose të nisë një aventurë të re larg futbollit italian. /Telegrafi/
Barcelona vazhdon punën për ndërtimin e skuadrës për sezonin e ardhshëm, me drejtuesit katalanas që kanë vendosur si prioritete kryesore afrimin e një sulmuesi dhe një qendërmbrojtësi të ri.
Klubi fillimisht synon të finalizojë transferimin e një sulmuesi, ku emri kryesor në listën e dëshirave mbetet Joao Pedro, përpara se të fokusohet plotësisht në përforcimin e repartit defensivë.
Një nga objektivat kryesorë për mbrojtjen është Alessandro Bastoni i Inter Milan. Barcelona raportohet se ka muaj që zhvillon kontakte me mbrojtësin italian, ndërsa Interi pret ofertën e parë zyrtare nga klubi katalanas.
Gjiganti italian kërkon rreth 60 milionë euro për kartonin e 27-vjeçarit dhe dëshiron ta zgjidhë situatën sa më shpejt për të planifikuar merkaton verore.
Flick nuk është i bindur, transferimi i Bastoni te Barcelona mund të dështojë telegrafi.com
Megjithatë, sipas raportimeve të gazetarit Matteo Moretto, trajneri Hansi Flick nuk është plotësisht i bindur nga profili i Bastonit. Tekniku gjerman dyshohet se ka rezerva për përshtatjen e italianit me stilin e lojës që dëshiron të implementojë te Barcelona.
Për këtë arsye, Flick i ka kërkuar klubit të shqyrtojë alternativa të tjera për qendrën e mbrojtjes. Një nga opsionet që po monitorohet është Cristian Romero i Tottenham Hotspur, i cili shihet si plan rezervë në rast se transferimi i Bastonit dështon.
Raportet shtojnë se situata e Tottenhamit mund të ndikojë drejtpërdrejt në negociata, pasi një rënie e mundshme nga kategoria do ta bënte më të lehtë largimin e mbrojtësit argjentinas.
Javët e ardhshme pritet të jenë vendimtare për të ardhmen e Bastonit dhe planet e Barcelonës në merkato./Telegrafi/
Interi është lidhur me një lëvizje befasuese për Phil Foden, teksa gazetari italian Paolo Condo ka sugjeruar se sulmuesi i Manchester Cityt mund të tundohet nga një transferim te ‘Nerazzurrët’, në një kohë kur përpjekjet e klubit për objektivin kryesor kreativ, Nico Paz, po duken gjithnjë e më pak të realizueshme.
Sipas Calciomercato.it, Interi prej kohësh e ka identifikuar Nico Paz si profilin ideal – një lojtar i aftë të krijojë epërsi individuale dhe të “hapë” mbrojtjet kundërshtare.
Megjithatë, Real Madridi pritet ta aktivizojë klauzolën e riblerjes për argjentinasin dhe nuk ka asnjë garanci se më pas do të lejonte një shitje të re.
Duke folur në Sky Sport 24, Condo e propozoi Foden si një alternativë serioze.
“Ai ka pasur më pak hapësirë te City këtë vit, ndoshta për shkak të disa problemeve jashtë fushe. Por, me një ofertë serioze dhe interesante, ai mund të tundohet nga një eksperiencë në Itali”, u shpreh Condo.
Foden ka kontratë me Manchester Cityn deri në qershor të vitit 2027, çka do të thotë se i ka mbetur edhe pak më shumë se një vit nga marrëveshja aktuale.
Edhe pse talenti i tij është i padiskutueshëm dhe ai do të përfaqësonte një afrim të nivelit më të lartë, Condo pranoi se gjasat që reprezentuesi i Anglisë të largohet nga Liga Premioer për në Serie A mbeten të ulëta./Telegrafi/
Interi është fituesi i Kupës së Italisë, pasi në finalen e luajtur ndaj Lazios në 'Stadio Olimpico' triumfoi me rezultat 2-0.
Nerazzurrët e nisën ndeshjen me presion dhe e gjetën shpejt avantazhin. Në minutën e 14-të, Lazio u ndëshkua nga një gabim fatal, kur Adam Marusic, i çorientuar në mbrojtje, devijoi topin me kokë në portën e vet për 0-1.
Interi vazhdoi ta kontrollojë ritmin dhe e dyfishoi epërsinë në minutën e 35-të, kur Lautaro Martinez u shërbye në mënyrë perfekte, doli “një kundër një” me portierin dhe finalizoi saktë në këndin e majtë të poshtëm për 0-2.
Lazio tentoi të rikthehej në lojë me goditje nga distanca dhe aksione në zonë, por pa efikasitet. Isaksen (45’) dhe Noslin (58’) provuan nga jashtë zonës, por të dy tentimet shkuan jashtë.
Një nga momentet më të spikatura të pjesës së dytë ishte pritja vendimtare e Josep Martinez në minutën e 76’, kur Boulaye Dia gjuajti në drejtim të këndit të poshtëm të djathtë, por portieri i Interit reagoi shkëlqyeshëm dhe ruajti portën e paprekur.
Nga ana tjetër, Interi ishte pranë golit të tretë me Zielinskin, në minutën e 82’, kur gjuajtja e tij kaloi pranë shtyllës së djathtë.
Me këtë fitore 2-0 në finale, Interi ngre lart trofeun e Kupës së Italisë, pasi titullit kampion. /Telegrafi/
Fituesi i edicionit të 79-të të Kupës së Italisë (Coppa Italia) do të përcaktohet sonte pas 90 minutave, ndërsa nëse rezultati mbetet i barabartë, ndeshja do të shkojë në vazhdime dhe, nëse është e nevojshme, edhe në penallti.
Interi e sheh këtë finale si mundësi për të kompletuar “dopietën”, pas triumfit në Serie A dhe fitimit të Scudettos. Në anën tjetër, Lazio synon trofeun, por edhe një objektiv po aq të rëndësishëm: sigurimin e një bilete për në Ligën e Evropës.
Skuadrat vijnë në këtë përballje vetëm një javë pas ndeshjes në kampionat, ku Nerazzurrët fituan bindshëm 3-0, megjithëse kjo finale luhet në terren neutral.
Për Lazion, i gjithë sezoni varet nga kjo ndeshje, pasi në Serie A skuadra po lufton dhe ka vështirësi edhe për të siguruar një pozitë brenda 10-shes së parë.
Maurizio Sarri dhe Cristian Chivu kanë zbuluar formacionet zyrtare.
Për herë të tretë në gjashtë sezonet e fundit, Interi u shpall kampion i Serie A. Fitorja 2-0 ndaj Parmës, e kombinuar me barazimin 0-0 të Napolit (rivali kryesor për titull) kundër Comos dhe humbjen 0-2 të Milanit në transfertë ndaj Sassuolos, bëri që “zikaltërit” ta sigurojnë titullin e 21-të kampion të Italisë me tri ndeshje pa u luajtur.
Edhe pse u eliminuan në mënyrë befasuese nga Ligën e Kampionëve në raundin “play-offit” nga norvegjezët e Bodo/Glimt, Interi mund ta mbyllë sezonin me dopietë nëse e mposht Lazion në finalen e Kupës së Italisë më 13 maj.
Gjatë gjithë sezonit, Interi është shtyrë përpara nga golat e dyshes sulmuese Lautaro Martinez dhe Marcus Thuram, të cilët së bashku kanë shënuar 38 gola.
Megjithatë, një pjesë e madhe e suksesit këtë sezon (dhe në sezonet e fundit) lidhet me një mesfushë që e përzien punën e madhe me kreativitetin, duke e lidhur mbrojtjen me sulmin dhe duke krijuar vazhdimisht raste për Martinez dhe Thuram. Si te çdo skuadër elitare në futbollin evropian, mesfusha është “motori” i ekipit. Por çfarë e bën mesfushën e Interit kaq të balancuar?
Përvojë dhe fitues të mëdhenj
Bërthama e mesfushës së Interit ndër vite është ndërtuar mbi lojtarë me përvojë dhe mentalitet fituesi. Me Hakan Çalhanoğlu (32) dhe Henrikh Mkhitaryan (37), kampionët e Italisë kanë dy “shtylla” me CV të pasur. Sidomos Mkhitaryan ka luajtur për klube të mëdha evropiane dhe ka fituar Ligën e Evropës me Manchester United dhe Liga e Konferencës me Romën.
Edhe pse është 37 vjeç, Mkhitaryan ka luajtur mbi 1800 minuta në sezonin e titullit. Pavarësisht moshës, ai – me Davide Frattesi (26) si zëvendësues shumë të aftë – i jep Interit këmbëngulje, agresivitet dhe cilësi me topin, duke e ndihmuar skuadrën ta kontrollojë betejën në mesfushë.
Kjo u jep hapësirë lojtarëve si Çalhanoglu, Piotr Zielinski dhe i riu Petar Sucic (22) që ta shfaqin kreativitetin e tyre, për t’i ushqyer sulmuesit në krye. Këta mesfushorë kanë dhënë kontribut të madh në gola dhe asistime, ndërsa punojnë pa u kursyer edhe në fazën mbrojtëse.
Nëse merren parasysh edhe shifrat e krahëve (anësorëve) Federico Dimarco dhe Denzel Dumfries, del edhe më qartë sa i fortë është “pesëshi” i mesfushës në skemën fluide 3-5-2.
“Diamanti” i mesfushës: Nicolo Barella
Edhe pse Interi ka shumë cilësi në mesfushë, ylli kryesor konsiderohet zëvendëskapiteni Nicolò Barella. 29-vjeçari iu bashkua Interit nga Cagliari në korrik 2019 për 32.5 milionë euro dhe që atëherë ka qenë thuajse gjithmonë ndër emrat e parë në formacion.
Barella i kombinon në mënyrë ideale presionin e pandalshëm ndaj kundërshtarit, pasimet vendimtare dhe kontributin në të dyja fazat e lojës.
Ai është bërë i pazëvendësueshëm jo vetëm për Interin, por edhe për Italinë, ku ka 70 paraqitje. Përveç përvojës, ai ka edhe inteligjencën për ta “marrë ndeshjen në dorë” kur skuadra ka nevojë.
Pikërisht ky kombinim i punës së madhe dhe kreativitetit – që e ofron Barella bashkë me shokët e tij – është arsyeja pse Interi e ka atë balancë në mesfushë që i lejon ta kontrollojë lojën në çdo fazë.
Edhe pse në Evropë kanë mbetur prapa pritshmërive vitet e fundit, në Itali Interi mbetet skuadra që duhet mposhtur. Dhe edhe pse Mkhitaryan e Çalhanoğlu po hyjnë në fazën e fundit të karrierës, Interi duket se ka mjaftueshëm cilësi për ta ruajtur këtë ekuilibër që është shndërruar në çelësin e suksesit. /Telegrafi/
Sulmuesi i Interit, Ange-Yoan Bonny, ka përfunduar me sukses ndërrimin e kombësisë dhe do të jetë i disponueshëm për t'u përzgjedhur nga Bregu i Fildishtë kur të shpallë skuadrën e tyre për Kupën e Botës 2026.
Kërkesa e Bonnyt të lindur në Francë për të ndryshuar kombësinë e tij futbollistike nga Franca, për të cilën luajti për ekipin U-21 dy vjet më parë, u miratua nga organi qeverisës i futbollit botëror, FIFA.
Njoftimi zyrtar për pranimin e kërkesës erdhi gjatë ditës së premte, ku ylli i Interit u prit nga ambsadaroi i Bregut të Fildishtë në Itali, me fanellën e kësaj kombëtare.
𝐎𝐟𝐟𝐢𝐜𝐢𝐚𝐥:
Ange-Yoan Bonny has committed his international future to the Ivory Coast national team. 🇨🇮
Bonny, 22 vjeç, është me prejardhje nga Bregu i Fildishtë dhe pritet të përfshihet në skuadrën prej 26 lojtarësh për Kupën e Botës 2026.
Ai ndihmoi Interin të fitonte titullin e Serie A këtë sezon, duke dëshmuar se ishte një zëvendësues i shkëlqyer për klubin italian me pesë gola në ligë.
Bregu i Fildishtë është në Grupin E të Kupës së Botës me kombëtaren e Ekuadorit, atë të Gjermanisë dhe Kuraçaon.
Bonny mund të debutojë para turneut kur vendasit e Bregut të Fildishtë do të përballen me Francën në Lens më 4 qershor në një ndeshje miqësore. /Telegrafi/
Raporti i dytë “Global State of Football” tregon se Fiorentina, Atalanta dhe Napoli kanë qenë klubet më të qëndrueshme financiarisht në Serie A gjatë sezonit 2024-25, ndërsa Gian Piero Gasperini është vlerësuar si trajneri më efikas në elitën e futbollit italian.
Studimi, i realizuar nga teknologjia kryesuese botërore e inteligjencës artificiale PLAIER dhe Universiteti i St. Gallen, ka analizuar 226 klube në 14 liga gjatë sezonit 2024-25, duke vlerësuar faktorë si cilësia e skuadrës, performanca e drejtorit sportiv, efektiviteti i trajnerit dhe stabiliteti financiar.
Raporti nuk nxjerr në pah vetëm se cilat klube patën sukses, por edhe se si e arritën atë sukses dhe me çfarë kostoje financiare.
Fiorentina doli klubi më i qëndrueshëm financiarisht në Serie A, duke regjistruar një raport kapitali prej 72%, e ndjekur nga Atalanta dhe Napoli në vendin e dytë dhe të tretë.
Como u vlerësua me departamentin sportiv më efikas, duke sjellë rezultatet më të forta në raport me burimet që kishte në dispozicion.
Napoli, që fitoi titullin sezonin e kaluar, u rendit i treti, ndërsa Interi nënkampion, u pozicionua vetëm në vendin e 14-të.
Në skajin tjetër të renditjes, Parma shënoi performancën më të dobët të departamentit sportiv në kampionat, duke dështuar ta shndërrojë investimin financiar në rezultate konkrete në fushë./Telegrafi/
Sezonet në top ligat evropiane të futbollit janë drejt fundit dhe skuadrat po luftojnë për t'i arritur objektivat e tyre.
Të gjithë thonë se në futboll mbrojtja ta fiton titullin dhe për Interin kjo gjë ka funskionuar, por duket se njësoj do të funskionojë edhe për PSG-në dhe Arsenalin që janë afër ta fitojnë titullin kampion.
SofaScore ka publikuar listën me 10 skuadrat që kanë mbajtur portën e paprekur më së shumti në top pesë ligat evropiane.
Arsenali, Como dhe Interi kanë arritur ta mbajnë portën e paprekur nga 17 herë në 35 ndeshje të zhvilluara këtë edicion.
Ndërkohë PSG është e katërta me 16 porta të paprekura në 31 ndeshje.
Nga 15 herë portën e paprekur e kanë mbajtur skuadrat si Lyon në Ligue 1 si dhe Roma, Lazio, Milan dhe Juventusi në Serie A. Top 10-shja mbyllet me gjigantin gjerman Borussia Dortmund që ka mbajtur 14 herë portën e paprekur.
Interesant është fakti se nga kjo top 10-she gjashtë skuadra janë italiane, duke treguar edhe njëherë se në Serie A i kushtohet shumë rëndësi repartit defensivë. /Telegrafi/
Raportimet në Itali pretendojnë se Barcelona ka mbetur e “zhgënjyer” nga fakti se një marrëveshje e mundshme për Alessandro Bastonin e Interit duket se po zbehet, por ka edhe sugjerime se gjigantët e La Ligës që po përballen me vështirësi financiare, duhet t’i japin përparësi transfeirmit të një sulmuesi të ri, e jo një mbrojtësi.
Për disa javë me radhë, raportime nga Spanja dhe Italia e kanë lidhur Barcelonën me një lëvizje verore për reprezentuesin italian Bastoni, i cili ishte pjesë e skuadrës që festoi titullin e 21-të të Interit në Serie A gjatë fundjavës.
Presidenti i “Nerazzurrëve”, Beppe Marotta, e ka pranuar së fundmi: “Nuk do ta mohoj se ka interesim nga Barcelona (për Bastonin), por ende nuk ka asgjë konkrete”.
Megjithatë, sipas përditësimeve më të fundit nga Gazzetta dello Sport, interesimi i Barcelonës për mbrojtësin e majtë tashmë ka nisur të venitet.
Ka disa arsye për këtë, por ndoshta më e rëndësishmja lidhet me hezitimin e vetë lojtarit për t’u larguar nga “San Siro” këtë verë.
Gazzetta dello Sport raporton se Interi e vlerëson Bastonin rreth 70 milionë euro, ndërsa Barcelona kishte besuar se do të mund të negocionte një shifër më të ulët, afër 50 milionë eurove.
Që kjo të ndodhte, katalanasit do të kishin pasur nevojë që Bastoni të shprehte dëshirën e tij për t’u transferuar te Barcelona, duke e vënë Interin nën presion për ta shitur.
Sipas Gazzetta dello Sport, një gjë e tillë nuk ka ndodhur, dhe “Nerazzurrët” nuk kanë asnjë synim ta lënë Bastonin të largohet me një çmim të reduktuar.
Qoftë 50 milionë apo 70 milionë euro, gjithsesi bëhet fjalë për një investim të konsiderueshëm për një klub që vazhdon të ndiejë ndikimin e rregullave të rrepta financiare të LaLigës.
Interi ka nisur të mendojë menjëherë për të ardhmen pas fitimit të titullit të 21-të në Serie A, dhe drejtuesit zikaltër po planifikojnë një goditje të madhe në merkato.
Sipas “Tuttosport”, objektivi kryesor i klubit për verën është talenti argjentinas Nico Paz, aktualisht pjesë e Comos, i cili ka spikatur me paraqitjet e tij në dy sezonet e fundit dhe konsiderohet një nga emrat më premtues në futbollin evropian.
Interi raportohet se do të ketë një buxhet prej 40 deri në 45 milionë euro për merkato, ndërsa një pjesë e këtyre fondeve mund të vijë nga shitjet e mundshme të lojtarëve, përfshirë edhe Alessandro Bastonin, i cili është lidhur me një kalim te Barcelona.
Megjithatë, situata e Paz mbetet komplekse për shkak të interesit të Real Madrid, që sipas raportimeve ka një opsion rikthimi pothuajse të sigurt për lojtarin. E ardhmja e tij do të varet nga vendimet e trajnerit të ri në “Santiago Bernabeu”.
Pavarësisht kësaj, Interi beson se mund t’i ofrojë argjentinasit një rol më të rëndësishëm dhe më të qëndrueshëm në skuadër, duke e bërë atë një figurë qendrore të projektit të ri sportiv.
Zikaltërit po shqyrtojnë një ofertë në vlerën 45 deri në 50 milionë euro, me shpresën për të bindur si lojtarin ashtu edhe klubet e përfshira në këtë operacion kompleks.
E ardhmja e Nico Paz pritet të jetë një nga sagat më interesante të merkatos së verës./Telegrafi/
Interi ka vendosur një çmim të qartë për Alessandro Bastonin, duke e bërë të vështirë çdo përpjekje të mundshme të Barcelonës për ta transferuar mbrojtësin italian këtë verë.
Sipas ekspertit të transferimeve Fabrizio Romano, klubi zikaltër nuk është i gatshëm të negociojë nën shifrën prej 70 milionë eurosh për kartonin e qendërmbrojtësit, i cili është një nga shtyllat kryesore të skuadrës.
Interi do të lejonte largimin e tij vetëm në rast se lojtari paraqet kërkesë zyrtare për transferim, por deri më tani Bastoni nuk ka shprehur dëshirë të tillë, pavarësisht interesimit nga Barcelona.
Nga ana tjetër, situata financiare e Barcelonës mund ta komplikojë edhe më shumë një marrëveshje të tillë, duke e bërë transferimin një objektiv të vështirë për këtë afat kalimtar.
telegrafi.com
Klubi katalanas është në kërkim të një qendërmbrojtësi të nivelit të lartë për të forcuar repartin defensivë, dhe Bastoni është në krye të listës së dëshirave. Megjithatë, si alternativa janë përmendur edhe Jon Martin i Real Sociedad dhe Cristian Romero i Tottenham Hotspur.
E ardhmja e Bastonit mbetet e hapur, por për momentin Interi duket i vendosur ta mbajë nën kontroll situatën dhe të mos lejojë largimin e tij pa një ofertë të madhe financiare. /Telegrafi/
Interi e vulosi titullin e kampionit në Serie A pas fitores 2-0 ndaj Parmës të dielën, duke e rikthyer Scudetton në Milano tri xhiro para përfundimit të kampionatit. “Nerazzurrët” tashmë kanë 12 pikë më shumë se Napoli në renditje.
Skuadra e Cristian Chivut mund ta mbyllë sezonin me dy trofe vendorë, nëse triumfon edhe në finalen e Kupës së Italisë ndaj Lazios më 13 maj.
Herën e fundit kur Interi i fitoi të dy trofetë në Itali ishte në epokën e Jose Mourinhos, në vitin 2010, kur klubi arriti edhe tripletën historike.
Nga “dëshpërimi i trefishtë” te rikthimi i fuqishëm
Festa e së dielës ishte në kontrast të plotë me zhgënjimin e hidhur të sezonit të kaluar, kur një edicion premtues përfundoi pa asnjë trofe.
Një muaj para fundit të kampionatit të kaluar, Interi ishte në garë për tre trofe të mëdhenj, por në fund mbeti një pikë prapa Napolit në Serie A, u eliminua në gjysmëfinale të Kupës së Italisë dhe pësoi humbje të rëndë 5-0 nga PSG-ja në finalen e Ligës së Kampionëve.
Largimi i Simone Inzaghit në fund të sezonit të kaluar nuk u konsiderua befasi e madhe, sidomos në një klimë ku për javë të tëra ishte përfolur për ndarjen, para se trajneri italian të pranonte një kontratë të majme në Arabinë Saudite, te Al-Hilal.
Megjithatë, emërimi i Cristian Chivut – një trajner me përvojë të kufizuar në nivelin më të lartë – ngriti dilema. Chivu e kishte drejtuar Parman vetëm në 13 ndeshje në Serie A, pasi kishte marrë detyrën në shkurtin e vitit të kaluar dhe i kishte dhënë ekipit më shumë siguri.
Rumuni e njihte mirë Interin, pasi shtatë vitet e fundit kishte punuar me grupmoshat e klubit. Si lojtar, ai e kishte mbyllur karrierën te Interi në vitin 2014 dhe ishte pjesë e ekipit legjendar që fitoi tripletën në vitin 2010. Chivu kontribuoi edhe në dy tituj të tjerë kampioni me “nerazzurrët”.
Qasja e Chivut dhe idetë e tij të reja e rigjallëruan Interin. E bëri skuadrën më agresive, riktheu harmoninë në dhomën e zhveshjes dhe integroi edhe talente nga akademia, si Pio Esposito.
Ai solli gjithashtu metoda të reja stërvitore me synim rritjen e nivelit fizik të ekipit, një aspekt që i kishte kushtuar shumë Interit në sezonin e kaluar për shkak të lëndimeve të shumta.
Këtë sezon, me përjashtim të Denzel Dumfries dhe Hakan Çalhanoglut, shumica e lojtarëve kyç shmangën mungesat e gjata. Ndryshe ndodhi te rivalët, sidomos te Napoli, që u përball me probleme të vazhdueshme me lëndime gjatë gjithë edicionit – madje që para nisjes së sezonit.
Në një fazë të sezonit dukej se Interi mund të përsëriste rënien e vitit të kaluar. U eliminua nga Bodo/Glimt në Ligën e Kampionëve, por reagoi shpejt me fitore ndaj Genoas në Serie A dhe u shkëput deri në 13 pikë.
Më pas erdhi një periudhë e vështirë: vetëm dy fitore në tetë ndeshje, çka bëri që diferenca të zbriste në gjashtë pikë. Seria negative u ndërpre me fitoren spektakolare 5:3 ndaj Romës dhe prej asaj pike Interi nuk u kthye më prapa.
Skuadra e mbajti epërsinë deri në fund, e siguroi titullin dhe tani e ka vëmendjen te finalja e Kupës së Italisë, ku synon ta kompletojë sezonin me një tjetër trofe. /Telegrafi/
Presidenti i Interit, Beppe Marotta, ka konfirmuar interesimin e Barcelonës për mbrojtësin Alessandro Bastoni, duke theksuar se lojtari mbetet i kënaqur te klubi zikaltër.
Duke folur për “Radio Anch’Io Sport”, Marotta pranoi se ekziston admirim për reprezentuesin italian, por nënvizoi se nuk ka ende ndonjë ofertë konkrete.
“Është një talent i madh”, deklaroi Marotta.
“Nuk do ta mohoj se ka interes nga Barcelona, por deri tani asgjë konkrete. Një lojtar largohet vetëm nëse shpreh dëshirën për t’u larguar. Aktualisht, ai është i lumtur me ne dhe ne jemi të kënaqur me të”.
Bastoni, një figurë kyçe në strukturën mbrojtëse të Interit, ka qenë pjesë e pandashme e ekipit në sukseset e fundit në arenën vendase, përfshirë triumfin e fundit në kampionat.
“Italia prodhon talente. Ne duam të ndërtojmë një bërthamë të fortë lojtarësh italianë… Për të fituar titullin, duhet një grup që e kupton futbollin italian”, shtoi ai.
Në fund, Marotta theksoi ambiciet e klubit në arenën evropiane, duke përmendur dështimet e mëparshme në finale:
“Kam arritur në katër finale dhe fatkeqësisht i kam humbur të gjitha. Është diçka që ende dua ta arrij”, u shpreh ai, duke nënvizuar fokusin e vazhdueshëm të klubit për të fituar Ligën e Kampionëve. /Telegrafi/
Sipas portalit analitik Football Meets Data, tashmë janë konfirmuar 12 skuadra që kanë siguruar pjesëmarrjen në fazën e Ligës në Ligën e Kampionëve për sezonin e ardhshëm.
Në këtë listë bëjnë pjesë disa nga klubet më të mëdha të futbollit evropian, të cilat kanë siguruar matematikisht vendin e tyre në fazën e ligës, përfshirë Barcelonën, Real Madrid dhe Villarreal nga Spanja, Bayern Munich dhe Borussia Dortmund nga Gjermania, PSV Eindhoven nga Holanda, Arsenal, Manchester City dhe Manchester United nga Anglia, si dhe Inter nga Italia, Paris Saint-Germain nga Franca dhe Porto nga Portugalia.
Kualifikimi i këtyre skuadrave vjen pas një sezoni të fortë në kampionatet përkatëse, ku performancat në ligat vendase kanë vendosur tashmë një pjesë të madhe të pjesëmarrësve të sezonit të ardhshëm në kompeticionin më prestigjioz për klube në Evropë.
Ndërkohë, lista nuk është ende e plotë, pasi shumë vende të tjera do të përcaktohen në javët e fundit të kampionateve evropiane dhe përmes renditjeve të mbetura në ligat përkatëse.
Në formatin e ri të Ligës së Kampionëve, faza e ligës do të përbëhet nga 36 skuadra gjithsej. Deri tani janë konfirmuar 12 prej tyre, ndërsa 24 skuadrat e tjera pritet të mësohen në tre javët e ardhshme, teksa garat në kampionatet kryesore evropiane po shkojnë drejt fundit. /Telegrafi/
Sulmuesi i Interit, Marcus Thuram, i ka bërë homazh legjendës së NBA-së, Kobe Bryant, përmes një postimi në Instagram gjatë festimeve për titullin e 21-të kampion të Serie A-së nga “Nerazzurrët”.
Thuram ka rikrijuar një nga fotografitë ikonike të Bryant, duke pozuar në dhomën e zhveshjes me dy trofe të “Scudetto”-s, teksa Interi po festonte suksesin e madh të sezonit.
Sulmuesi francez kishte shënuar golin e parë në fitoren 2-0 ndaj Parma Calcio 1913, rezultat që i siguroi Interit titullin kampion tre ndeshje para përfundimit të kampionatit.
Menjëherë pas ndeshjes, ai publikoi imazhin në rrjete sociale, duke imituar një fotografi të famshme të Bryant të realizuar në qershor të vitit 2001, pas fitores së Los Angeles Lakers ndaj Philadelphia 76ers në finalen e NBA-së.
Login
