Walid Regragui ka zbuluar detaje të reja nga përpjekjet e Federatës së Futbollit të Marokut për të bindur yllin e Barcelonës, Lamine Yamal, që të zgjidhte përfaqësimin e Marokut në vend të Spanjës.

Ish-trajneri i kombëtares marokene ka treguar se çështja e Yamal ishte një nga prioritetet e para me të cilat u mor pas marrjes së drejtimit të ekipit kombëtar, në bashkëpunim me presidentin e federatës. Në atë kohë, talenti i Barcelonës ishte vetëm 14 vjeç.

“E ftuam babanë dhe gjyshin e Lamine Yamal në Marok dhe biseduam me ta. Kishim dy vite që punonim për këtë çështje dhe gjithçka po shkonte mirë, deri në momentin kur erdhi koha për të marrë vendimin përfundimtar”, ka rrëfyer Regragui.

Ai tregoi se më pas delegacioni maroken shkoi edhe në Barcelonë për të zhvilluar një takim personal me lojtarin.

“Shkuam te Barcelona për ta takuar Yamal pas një prej ndeshjeve të tij. Në takim ishin edhe kushëriri dhe avokati i tij. I prezantuam projektin e kombëtares së Marokut, i cili përfshinte bashkimin direkt me ekipin senior, zhvillimin e tij me ‘Luanët e Atlasit’ dhe mundësinë për të luftuar për trofe”, u shpreh ai.

Megjithatë, vetëm dy ditë më vonë, Regragui mori lajmin se Yamal kishte vendosur të përfaqësonte Spanjën.

“Dy ditë më vonë, avokati i tij më telefonoi dhe më tha se Lamine kishte zgjedhur Spanjën. Por unë doja ta dëgjoja vendimin drejtpërdrejt nga ai. Lamine më telefonoi dhe më tha: ‘Trajner, e kam marrë vendimin tim. Do të luaj për Spanjën’”, tregoi Regragui.

Pavarësisht vendimit të Yamal, trajneri maroken theksoi se ai nuk e sheh këtë si një arsye për të shkëputur lidhjen e lojtarit me prejardhjen e tij.

“Unë i thashë se, pavarësisht se çfarë ndodh, ai do të mbetet maroken. Nuk mund ta fajësojmë një lojtar për një vendim që lidhet me vendin ku ka lindur dhe është rritur”, përfundoi Regragui.

Yamal, i cili ka prejardhje marokene nga babai, zgjodhi Spanjën dhe tashmë është një nga figurat kryesore të kombëtares. /Telegrafi/

Real Madridi do ta nisë aventurën në Ligën e Kampionëve ndaj Interit pa tre prej lojtarëve të tij kryesorë, pasi Arda Guler, Eduardo Camavinga dhe Bernardo Silva do të mungojnë për shkak të pezullimeve të bartura nga edicioni i kaluar i kompeticionit.

UEFA i anulon kartonët e verdhë të grumbulluar në përfundim të çdo sezoni, por pezullimet e shkaktuara nga kartonët e kuq mbeten në fuqi dhe bartën në edicionin pasues.

Arda Guler dhe Eduardo Camavinga u ndëshkuan me kartonë të kuq pas dy të verdhëve në ndeshjen çerekfinale ndaj Bayern Munichut, duke u dënuar me nga një ndeshje pezullim.

Ndërkohë, Bernardo Silva mori karton të kuq direkt gjatë kohës kur luante për Manchester Cityn, pasi përdori dorën për të ndalur një goditje që po shkonte drejt portës në ndeshjen e dytë të fazës së 1/8 së finales ndaj Real Madridit.

Nëse UEFA nuk vendos për ndonjë masë të jashtëzakonshme, trajneri Jose Mourinho nuk do të ketë në dispozicion asnjërin prej këtyre tre futbollistëve për përballjen e shumëpritur ndaj Interit, e cila do të zhvillohet më 8 shtator në “Santiago Bernabeu”.

Mungesa e tyre përbën një goditje të rëndësishme për Real Madridin, që synon ta nisë me fitore rrugëtimin në kompeticionin më prestigjioz evropian për klube. /Telegrafi/

Chelsea ka vendosur mesfushorin e Romës, Manu Kone, si objektivin kryesor për të zëvendësuar Enzo Fernandez, në rast se mesfushori argjentinas largohet nga “Stamford Bridge” për t’iu bashkuar Manchester Cityt.

Sipas gazetarit Santi Aouna të Foot Mercato, Kone është shndërruar në alternativën e preferuar të londinezëve, të cilët po përgatiten për mundësinë e humbjes së Fernandez para mbylljes së afatit kalimtar.

Mesfushori francez, i cili aktualisht aktivizohet te Roma, është konsoliduar si një nga lojtarët e rëndësishëm të klubit italian, ndërsa gjithashtu është bërë pjesë e rëndësishme e përfaqësueses së Francës.

E ardhmja e Fernandez vazhdon të mbetet e pasigurt, për shkak të interesimit të raportuar nga Manchester City.

Në këtë situatë, Chelsea tashmë ka nisur të shqyrtojë alternativat për mesfushën dhe Kone duket se është zgjedhja e parë e klubit.

Vlera e francezit raportohet të jetë rreth 60 milionë euro, megjithëse mbetet për t’u parë nëse Roma do të ishte e gatshme të shqyrtonte një ofertë për lojtarin. /Telegrafi/

Aprilia Racing e ka mbyllur fundjavën në MotorLand Aragon me një tjetër podium, pasi Marco Bezzecchi u rendit i treti në garën kryesore të MotoGP-së.

Bezzecchi, i cili e nisi garën nga pole position, ishte protagonist në luftën për fitoren gjatë xhirove të para. Piloti italian qëndroi në mesin e pretendentëve kryesorë, por në fund e përfundoi garën në pozitën e tretë.

Ky ishte podiumi i dytë për Bezzecchin gjatë fundjavës në Aragon, pas suksesit të arritur edhe në garën Sprint.

Ndërkohë, Jorge Martin zhvilloi një garë të qëndrueshme, duke qëndruar vazhdimisht në top pesëshe. Spanjolli e kaloi vijën e finishit në vendin e pestë dhe vazhdon të kryesojë renditjen e kampionatit me 256 pikë.

Marco Bezzecchi

"Në përgjithësi, ishte një fundjavë pozitive dhe jam jashtëzakonisht i lumtur. Erdhëm në Aragon me pak pritshmëri, pasi vitin e kaluar kishim nisur nga pozitat e prapme. Kisha zhvilluar dy gara të mira, por të ishe konkurrues ishte diçka krejt tjetër”.

“Megjithatë, këtë fundjavë isha i shpejtë – i pari të premten dhe pole position të shtunën. Në gara më mungonte diçka, por të jem i sinqertë, as që mendoja se do të isha në gjendje të luftoja për fitoren, ndaj jam mjaft i lumtur. I gjithë ekipi im ishte fantastik".

Jorge Martin

"Jam i kënaqur me fundjavën. Ndjesitë në garë ishin të ngjashme me ato të Sprintit, por mendoj se kemi bërë ende një hap përpara. Është e vërtetë që u ndjeva më mirë gjatë garës, aq sa xhiron time më të shpejtë e realizova në fund”.

“Ishte një fundjavë ku ndërtuam besimin në një pistë që është jashtëzakonisht e komplikuar për mua. Arritëm të përmirësoheshim në çdo sesion, duke bërë hapa përpara dhe duke kuptuar se çfarë mund të na ndihmonte në pistë".

Massimo Rivola

"Një rezultat i mirë i ekipit në një pistë që nuk është veçanërisht e favorshme për ne. Jorge e pati të vështirë të gjente ndjesinë e duhur gjatë gjithë fundjavës, por, pavarësisht kësaj, ai arriti ta maksimizojë rezultatin”.

“Marco siguroi dy podiume shumë të vlefshme, pavarësisht vështirësive fizike. Edhe pole position i tij ishte një vepër magjie, që besoj se do të mbahet mend për një kohë të gjatë”.

“Jemi të vetëdijshëm se pistat e ardhshme, të paktën në letër, nuk janë të preferuarat tona, por mezi presim të shkojmë në Misano dhe të ndiejmë mbështetjen e tifozëve tanë italianë".

Aprilia vazhdon të jetë një nga emrat e rëndësishëm në botën e motociklizmit, ndërsa prania e markës në Kosovë mund të gjendet edhe përmes Auto Mita, përfaqësuesit të autorizuar të Aprilia-s në vend. /Telegrafi/

Nga data 28 deri më 30 gusht Pallati i Sporteve, në Prishtinë ka tubuar pingpongistë nga shumë vende të Evropës.

Mbi 200 lojtarë, gjatë tri ditëve, në grupmosha U13, U17, U21 dhe për seniorë kanë dhënë shumë emocione dhe pingpong të nivelit ndërkombëtar.

Ditën e fundit, më 30 gusht vlen të përmendet suksesi i Sara Hoxhës (U17), e cila arriti deri në finale dhe pas një dueli dramatik doli e dyta, kurse e para ishte Jovevska e Maqedonisë Veriore, njëherit kampionia e vitit të kaluar.

Seniorët me shumë lojtarë që vinin nga vendet me pingpong të zhvilluar, si Ukrainë, Bullgari, Austri dhe Turqi kënaqën shijet e pingpongdashëve.

Aleksandër Çen nga Austria, e ka mbrojtur titullin kampion pasi në finale e mundi Sina Keyhan, kurse Tarik Ozbek doli i treti pasi e mundi bullgarin Daniel Kostadinov.

Te femrat, e para doli, Jagmur Karaxha, e cila në finale e mundi bashkëvendësen e saj Zejnep Karaxha me 3:2, në seta, kurse vendin e tretë e zuri Zhale Xhan, po ashtu nga Turqia, e cila e mundi bullgaren Kostadinova me 3:2 në seta.

Vlen të përmendet paraqitja shumë e mirë e Leoresa Imerit, e cila hyri ndër 8 më të mirat dhe në duelin për gjysmëfinale humbi ngushtë (2:3), nga bullgarja Kostadinova.

Dita finale u përmbyll me lojën shpërblyese për shikuesit ku organizatori e ndau një IPhone 17.

Përveç garave në tavolinë, pjesëmarrësit kanë pasur rastin ti provojnë aftësitë e tyre edhe me pingpong me teknologjinë e realitetit virtual. /Telegrafi/

Augsburgu ka arritur marrëveshjen me Bayern Munich për transferimin në formë huazimi të Arijon Ibrahimovicit, me klubin bavarez që i ka dhënë dritën jeshile largimit të talentit të tij.

Sipas informacioneve ekskluzive të Fabrizio Romano, palët kanë gjetur gjuhën e përbashkët për një huazim që përfshin edhe një opsion blerjeje prej 8 milionë eurosh.

Nëse Augsburg vendos ta aktivizojë këtë klauzolë në fund të periudhës së huazimit, Ibrahimovic do të bëhej përfundimisht lojtar i klubit të Bundesligës.

Marrëveshja është arritur gjatë mëngjesit të sotëm, ndërsa Ibrahimovic ka qenë objektivi kryesor i Augsburgut për këtë afat kalimtar.

Klubi gjerman e ka parë 20-vjeçarin si një përforcim të rëndësishëm për repartin ofensiv dhe ka lëvizur shpejt për të siguruar shërbimet e tij.

Një tjetër tregues se transferimi është pranë zyrtarizimit është fakti se testet mjekësore të Ibrahimovicit janë planifikuar për më vonë gjatë ditës së sotme. Nëse gjithçka shkon sipas planit, lojtari pritet të firmosë dokumentet dhe të kompletojë kalimin te Augsburgu.

Ibrahimovic, i cili është pjesë e strukturave të Bayern Munichut, është konsideruar prej vitesh një prej talenteve interesantë të futbollit gjerman.

Huazimi te Augsburgu pritet t'i ofrojë atij më shumë minuta dhe një rol më të rëndësishëm në futbollin e nivelit të lartë, duke i dhënë mundësinë të zhvillohet më tej në Bundesligë.

Për Bayernin, marrëveshja përfaqëson një mundësi për ta lejuar Ibrahimovicin të fitojë eksperiencë të rëndësishme jashtë klubit, ndërsa opsioni i blerjes prej 8 milionë eurosh i jep Augsburgut mundësinë për ta mbajtur përfundimisht lojtarin nëse paraqitjet e tij bindin gjatë sezonit.

Transferimi pritet të marrë formë zyrtare pas përfundimit të testeve mjekësore dhe procedurave të fundit administrative. /Telegrafi/

Sulmuesi veteran francez Karim Benzema do të largohet nga Al-Hilal vetëm gjashtë muaj pas transferimit të tij nga Al-Ittihad, ndërsa tashmë po shqyrton mundësitë për klubin e ardhshëm.

Benzema, 38 vjeç, ka arritur marrëveshje për të ndërprerë bashkëpunimin me klubin saudit dhe nuk ka ndërmend të tërhiqet nga futbolli. Në tavolinë janë një ofertë nga MLS-ja amerikane, si dhe disa alternativa të tjera brenda Arabisë Saudite.

Vendimi vjen vetëm pak ditë pasi vetë Benzema kishte mohuar publikisht mundësinë e largimit. Megjithatë, situata ndryshoi në ditët e fundit të afatit kalimtar dhe francezi tashmë është i lirë të shqyrtojë destinacionin e tij të ardhshëm.

Benzema iu bashkua Al-Hilal më 3 shkurt 2026 si lojtar i lirë, pasi mbylli aventurën e tij te Al-Ittihad. Në atë kohë, ai nënshkroi kontratë për një sezon e gjysmë, por largimi i tij do të ndodhë shumë më herët nga sa ishte parashikuar fillimisht.

Gjatë periudhës së tij te klubi nga Riadi, Benzema regjistroi 16 paraqitje, 10 gola dhe 5 asistime. Madje, ai e kishte nisur sezonin 2026/27 me gol, duke shënuar në fitoren 4-2 ndaj Al-Faisaly më 14 gusht.

Megjithatë, Al-Hilal ka ndryshuar ndjeshëm repartin ofensiv gjatë ditëve të fundit. Klubi ka zyrtarizuar transferimin e Ollie Watkins nga Aston Villa për rreth 51 milionë funte. Sulmuesi anglez 30-vjeçar ka firmosur kontratë trevjeçare.

Për më tepër, Al-Hilal ka negociuar edhe transferimin e Gabriel Martinellit nga Arsenali. Operacioni për brazilianin raportohet të jetë në vlerën 65-70 milionë euro, duke konfirmuar projektin e klubit saudit për të rinovuar repartin e sulmit.

Largimi nga Al-Hilal nuk nënkupton fundin e karrierës së Benzemas. Francezi dëshiron të vazhdojë të luajë dhe aktualisht ka disa opsione në dispozicion, mes tyre edhe një ofertë nga MLS-ja.

Në garë mbeten gjithashtu klubet e Arabisë Saudite. Al-Ittihad, skuadra ku Benzema luajti nga viti 2023 deri në shkurt të vitit 2026, është rikthyer si një nga destinacionet e mundshme për sulmuesin. Një tjetër alternativë është Al-Shabab.

Në periudhën e tij te Al-Ittihad, Benzema shënoi 38 gola në 64 ndeshje në Superligën e Arabisë.

Në sezonin 2024/25, ai ndihmoi skuadrën të fitonte kampionatin dhe Kupën e Mbretit të Arabisë Saudite, ndërsa realizoi 21 gola vetëm në kampionat.

Në moshën 38-vjeçare, Benzema tani do të duhet të vendosë për një nga kontratat e fundit të karrierës së tij. MLS-ja dhe klubet saudite janë aktualisht opsionet kryesore dhe ditët në vijim pritet të përcaktojnë destinacionin e radhës të fituesit të Topit të Artë. /Telegrafi/

Real Madridi ka hedhur një tjetër hap në strategjinë për të ardhmen, duke siguruar shërbimet e mesfushorit 19-vjeçar Sergio Martinez nga Racing Santander.

Klubi madrilen ka aktivizuar klauzolën e lirimit të lojtarit, në vlerën e 3 milionë eurove, duke përmbyllur kështu transferimin e tij në kryeqytetin spanjoll.

Martinez do ta nisë aventurën e re te Real Madrid Castilla, skuadra e dytë e klubit, ndërsa do të ketë mundësinë të stërvitet edhe me ekipin e parë të drejtuar nga trajneri i “Los Blancos”.

Mesfushori pritet të nënshkruajë kontratë që do ta mbajë në Madrid deri në vitin 2030.

Talenti me origjinë nga Laredo ka kaluar një periudhë të rëndësishme zhvillimi në futbollin spanjoll.

Ai arriti të debutonte në La Liga këtë sezon dhe e nisi aventurën në elitë në mënyrë spektakolare, duke shënuar gol që në paraqitjen e tij të parë.

Racing Santander ka konfirmuar zyrtarisht marrëveshjen, duke bërë të ditur se Real Madridi ka paguar të plotë shumën e përcaktuar në klauzolën e lirimit të futbollistit.

Transferimi i Martinezit është pjesë e politikës së Real Madridit për të investuar te lojtarët e rinj me potencial të madh, me synimin për t’i zhvilluar ata përmes Castillas dhe për t’i afruar gradualisht me ekipin e parë. /Telegrafi/

Barcelona është pranë transferimit të sulmuesit brazilian Gabriel Jesus nga Arsenali, në një lëvizje që ka marrë formë në ditët e fundit të afatit kalimtar.

Operacioni pritet të kushtojë rreth 10 milionë euro, ndërsa sulmuesi 29-vjeçar do të firmosë kontratë për dy sezone, me mundësi zgjatjeje edhe për një vit tjetër, nëse kalon me sukses testet mjekësore.

Lëvizja ka përparuar me shpejtësi pasi drejtori sportiv i Barcelonës, Deco, aktivizoi një opsion që ishte diskutuar prej disa sezonesh. Gabriel Jesus ka pranuar propozimin e klubit katalanas, ndërsa Arsenali i ka dhënë leje për të udhëtuar drejt Barcelonës, ku do të kryejë hapat e fundit të transferimit.

Gabriel Jesus pranon ofertën e Barcelonës

Interesi i Barcelonës për Gabriel Jesusin nuk ka lindur vetëm në ditët e fundit të afatit kalimtar.

Emri i brazilianit ishte propozuar edhe në afatet e mëparshme kalimtare, ndërsa Deco e njihte prej kohësh situatën e tij kontraktuale dhe sportive.

Sulmuesi kishte shqyrtuar edhe mundësi të tjera për t'u larguar nga Londra gjatë kësaj vere, por i dha përparësi Barcelonës pasi mori ofertën nga klubi katalanas.

Kontrata e propozuar është dyvjeçare me opsion për një sezon të tretë, një formulë që i lejon Barcelonës të kufizojë angazhimin financiar ndaj një lojtari që mbushi 29 vjeç në prill.

Sezoni i fundit i Gabriel Jesusit u ndikua ndjeshëm nga rikuperimi pas dëmtimit të rëndë në ligamentin e kryqëzuar anterior të gjurit të majtë. Pas rikthimit në fushë, ai regjistroi më pak se 1,000 minuta lojë, duke shënuar 6 gola dhe 2 asistime.

Barcelona vlerëson gjithashtu eksperiencën e tij në Ligën Premier, e cila mund ta ndihmojë të përshtatet shpejt me futbollin spanjoll.

Jesus u transferua në Angli në vitin 2017, nga Palmeiras, dhe më pas luajti për Manchester Cityn dhe Arsenalin, duke punuar nën drejtimin e trajnerëve si Pep Guardiola dhe Mikel Arteta.

Arsenali pranon një marrëveshje prej rreth 10 milionë eurosh

Negociatat mes Barcelonës dhe Arsenalit janë zhvilluar mbi bazën e një shume prej rreth 10 milionë eurosh, një investim që konsiderohet i përballueshëm për klubin katalanas në këtë fazë të afatit kalimtar.

Megjithatë, marrëveshja duhet të kalojë ende testin përfundimtar: kontrollet mjekësore të Gabriel Jesusit.

Braziliani shihet si një përforcim që mund t'i ofrojë Barcelonës alternativa në disa pozicione të repartit ofensiv. Gjatë karrierës së tij në Angli, ai ka luajtur si sulmues qendror, por edhe në krahë.

Në total, Jesus ka kaluar shifrën e 150 golave në karrierën e tij me klubet dhe kombëtaren braziliane.

Transferimi i tij i jep Barcelonës mundësinë të plotësojë një nevojë të menjëhershme në sulm pa bërë një investim të madh financiar si ai që do të kërkonte një marrëveshje për Julian Alvarez.

Sulmuesi i Atletico Madridit mbetet një objektiv më i komplikuar për momentin, ndaj Barcelona mund ta rikthejë në konsideratë këtë opsion në afatet e ardhshme kalimtare.

Nëse transferimi finalizohet, Hansi Flick do të ketë në dispozicion një sulmues të mësuar me skema taktike që kërkojnë presion të menjëhershëm pas humbjes së topit dhe lëvizje të vazhdueshme jashtë zonës.

Pikëpyetja kryesore lidhet me gjendjen e tij fizike dhe aftësinë për të rikuperuar vazhdimësinë pas një periudhe të vështirë të karakterizuar nga dëmtimet në gju.

Ardhja e Gabriel Jesusit do të jetë gjithashtu një tjetër operacion që Barcelona duhet ta regjistrojë në La Liga përpara mbylljes së afatit kalimtar.

Kostoja relativisht e ulët e transferimit i jep klubit katalanas më shumë hapësirë financiare për të përfunduar regjistrimet e lojtarëve të tjerë.

Hapi i radhës është tashmë i përcaktuar: Gabriel Jesus duhet t'i nënshtrohet kontrolleve mjekësore në Barcelonë dhe më pas të firmosë kontratën e re.

Nëse testet mjekësore kalohen pa probleme dhe dokumentacioni me Arsenalin përfundon në kohë, braziliani do të zyrtarizohet si lojtari më i ri i Barcelonës përpara mbylljes së afatit kalimtar. /Telegrafi/

Al-Hilal ka njoftuar zyrtarisht se ka arritur marrëveshje me Karim Benzeman për ndërprerjen e kontratës së sulmuesit francez.

38-vjeçari francez largohet nga klubi saudit vetëm gjashtë muaj pas transferimit të tij, duke mbetur tashmë lojtar i lirë dhe pa kontratë.

Benzema pritet të vendosë së shpejti për të ardhmen e tij, ndërsa në tavolinë ka dy opsione kryesore: të varë këpucët në gozhdë ose të vazhdojë karrierën në një tjetër klub të Arabisë Saudite.

Sipas gazetarit të njohur të afateve kalimtare, Fabrizio Romano, një rikthim i Benzemas në futbollin evropian është përjashtuar plotësisht.

Ish-fituesi i Topit të Artë e kaloi pjesën më të madhe dhe më të suksesshme të karrierës te Real Madridi, ku shënoi 354 gola, fitoi pesë trofe të Ligës së Kampionëve dhe në vitin 2022 u shpall fitues i Topit të Artë.

Largimi i Benzemas nga Al-Hilal vjen në të njëjtën kohë me afrimin e sulmuesit anglez Ollie Watkins, të cilin klubi saudit e ka siguruar si përforcim për repartin ofensiv.

Tashmë mbetet për t’u parë nëse Benzema do të vendosë t’i japë fund një karriere të jashtëzakonshme apo do të vazhdojë aventurën në futbollin saudit. /Telegrafi/

Juventusi ka bërë hapin e parë zyrtar për transferimin e Joshua Zirkzees nga Manchester United, teksa negociatat mes dy klubeve raportohet se kanë hyrë në një fazë konkrete.

Sipas gazetarit të njohur italian Gianluca Di Marzio, klubi torinez ka paraqitur një ofertë për sulmuesin holandez, e cila përfshin një huazim fillestar me vlerë rreth 2.5 milionë euro, si dhe një opsion blerjeje prej 30 milionë eurosh në fund të periudhës së huazimit.

Megjithatë, Manchester United kërkon një paketë totale prej rreth 35 milionë eurosh, ku përfshihet edhe tarifa e huazimit dhe shuma e transferimit përfundimtar.

Kjo diferencë në vlerësim ka bërë që dy klubet të vazhdojnë diskutimet për strukturën e marrëveshjes, ndërsa negociatat mes Juventusit dhe Manchester Unitedit janë ende në zhvillim.

Zirkzee iu bashkua Manchester Unitedit në vitin 2024 nga Bologna dhe aktualisht është nën kontratë me klubin anglez. /Telegrafi/

Real Madridi është bërë zyrtarisht skuadra e parë në pesë ligat kryesore të Evropës – Spanjë, Angli, Itali, Gjermani dhe Francë – që arrin kuotën e 10 golave në sezonin e ri.

Kjo shifër mbresëlënëse konfirmon startin e fuqishëm të ekipit madrilen në aspektin ofensiv dhe tregon qartë filozofinë sulmuese të skuadrës nën drejtimin e Jose Mourinhos, duke sfiduar edhe perceptimin tradicional për trajnerin portugez si një strateg me qasje kryesisht defensive.

Rekordi u kompletua pas fitores bindëse 4-0 ndaj Malagas, në kuadër të javës së tretë të La Ligës.

Real Madridi e zgjidhi praktikisht ndeshjen që në pjesën e parë. Jude Bellingham zhbllokoi rezultatin në minutën e 19-të, ndërsa shtatë minuta më vonë, një autogol i shkaktuar nga portieri Alfonso Herrero i dha madrilenëve epërsinë e dyfishtë.

Në minutën e 30-të, ishte radha e Kylian Mbappes për të gjetur rrjetën dhe për ta çuar rezultatin në 3-0.

Golin e fundit të takimit e realizoi Arda Guler, i cili në minutat shtesë të pjesës së dytë përmbylli një kundërsulm të shpejtë, duke vulosur fitoren 4-0.

Me këtë triumf, Real Madridi ruan një fillim perfekt të sezonit, me tri fitore në tri ndeshjet e para të kampionatit.

Për më tepër, skuadra e Mourinhos po tregon një potencial të jashtëzakonshëm në fazën ofensive, duke u bërë e para nga klubet e pesë ligave më të forta evropiane që arrin shifrën e 10 golave këtë sezon. /Telegrafi/

E ardhmja e Julian Alvarez mund të marrë një kthesë të papritur, pasi Atletico Madrid raportohet se i ka dhënë sulmuesit argjentinas miratimin për t’u transferuar te Barcelona.

Sipas gazetarit Jota Jordi, i cili foli në emisionin spanjoll El Chiringuito, drejtuesit e Atletico Madridit i kanë dorëzuar Alvarezit një dokument me shkrim, përmes të cilit konfirmojnë se nuk do ta pengojnë një transferim të tij te klubi katalanas.

“Atletico ia ka dhënë me shkrim Julianit miratimin për transferimin e tij te Barcelona”, deklaroi Jota Jordi.

Ky zhvillim mund t’i japë Barcelonës një shtysë të rëndësishme në përpjekjet për të siguruar shërbimet e kampionit të botës me Argjentinën.

Alvarez thuhet se dëshiron të veshë fanellën e Barcelonës, ndërsa dokumenti i pretenduar nga Atletico mund të lehtësojë negociatat dhe t’i hapë rrugë një marrëveshjeje mes klubeve.

Megjithatë, mbetet për t’u parë nëse Barcelona do të jetë në gjendje të përmbushë kërkesat financiare të Atletico Madridit për një prej sulmuesve më të rëndësishëm të skuadrës madrilene. /Telegrafi/

Gabriel Martinelli pritet të largohet nga Arsenali për t’iu bashkuar Al Hilalit, pasi klubi saudit ka arritur një marrëveshje verbale për transferimin e sulmuesit brazilian.

Sipas gazetarit të njohur të afatit kalimtar, Fabrizio Romano, marrëveshja kap vlerën e më shumë se 65 milionë eurove, përfshirë bonuset dhe shtesat e parashikuara në kontratë.

Romano ka konfirmuar se transferimi ka arritur në fazën e tij “Here We Go”, që nënkupton se palët kanë dhënë dritën jeshile për përfundimin e operacionit.

Martinelli pritet të nënshkruajë një kontratë afatgjatë me klubin që garon në Superligën e Arabisë Saudite.

Reprezentuesi i Brazilit raportohet se ka marrë leje për të udhëtuar brenda 24 orëve të ardhshme drejt Arabisë Saudite, ku do të kryejë procedurat e fundit për finalizimin e transferimit.

Marrëveshja është konfirmuar edhe nga gazetari Matteo Moretto, ndërsa tashmë priten vetëm hapat përfundimtarë për zyrtarizimin e lëvizjes.

Largimi i Martinellit do të përbënte një ndryshim të rëndësishëm në repartin ofensiv të Arsenalit.

25-vjeçari ishte bërë një nga lojtarët e rëndësishëm të skuadrës së Mikel Artetës që prej transferimit nga Ituano në vitin 2019.

Pas shtatë sezonesh në Londrën veriore, Martinelli është pranë një kapitulli të ri në karrierë.

Ai largohet nga Arsenali pasi ka ndihmuar klubin të fitojë titullin e Ligës Premier sezonin e kaluar.

Al Hilal ndërkohë po ndërton një repart ofensiv të fuqishëm, pasi Martinelli pritet t’i bashkohet sulmuesit të Aston Villës, Ollie Watkins, i cili gjithashtu është pjesë e planeve të klubit saudit. /Telegrafi/

Janë publikuar formacionet zyrtare të Dritës dhe Vushtrrisë për përballjen e tyre në kuadër të Albi Mall Superligës së Kosovës.

Gjilanasit do ta nisin takimin me Malokun në portë, ndërsa para tij do të rreshtohen Mjaki, Bytyqi, Hajdini, Sheji, Broja, Ismajlgreci, Rroca, Jashari, Balaj dhe Manaj.

Në anën tjetër, Vushtrria do ta nisë ndeshjen me Isufin, ndërsa formacioni plotësohet nga Spahiu, Miftari, Islami, Ibrasagic, Paloka, Bahtiri, Behrami, Maxhuni, Demiri dhe Statovci.

Të dyja skuadrat synojnë një paraqitje sa më të mirë në këtë përballje dhe pikët e plota nga kjo ndeshje. /Telegrafi/

Tottenhami dhe Juventusi janë pranë finalizimit të një marrëveshjeje për mesfushorin Pape Matar Sarr, i cili pritet të largohet nga Liga Premier për të vazhduar karrierën në Serie A.

Dy klubet mund të kenë ende lëvizje të rëndësishme në ditët e fundit të afa. Tottenham, pasi ka përforcuar repartin e mesfushës dhe mbrojtjes, po kërkon një tjetër lojtar për fazën ofensive.

Klubi londinez kishte shfaqur interes për Cody Gakpo, por holandezi duket se është shumë pranë transferimit te Manchester City.

Nga ana tjetër, Juventusi po punon në disa fronte. Klubi italian është i përfshirë në situatën e Jonathan David, i cili mund të transferohet te Atletico Madrid.

Nëse ky transferim realizohet, “Zonja e Vjetër” do të duhet të kërkojë një tjetër sulmues. Paralelisht, bardhezinjtë po synojnë edhe përforcimin e mesfushës.

Pape Matar Sarr drejt Juventusit

Sipas gazetarit të njohur të afatit kalimtar, Fabrizio Romano, Tottenham dhe Juventus janë shumë pranë marrëveshjes për Pape Matar Sarr.

23-vjeçari pritet të transferohet në Torino në formën e huazimit, ndërsa marrëveshja do të përfshijë edhe opsionin e blerjes në verën e vitit 2027.

Mesfushori senegalez ka qenë në afatin kalimtar që prej fillimit të kësaj vere, pasi nuk bën pjesë në planet afatgjata të trajnerit Roberto De Zerbi.

Për Sarr kishte interes nga disa klube, me Besiktas që fillimisht dukej destinacioni më i mundshëm.

Më pas, në garë u përfshi edhe Nottingham Forest, por Juventusi duket se ka arritur të bëjë hapin vendimtar dhe është pranë sigurimit të shërbimeve të mesfushorit të Tottenhamit. /Telegrafi/

Barcelona ka arritur marrëveshje me Arsenalin për transferimin e sulmuesit brazilian Gabriel Jesus, në një lëvizje surprizë të afatit kalimtar.

Lajmi është bërë i ditur nga gazetari i njohur i transferimeve, Fabrizio Romano, i cili ka konfirmuar se palët kanë arritur një marrëveshje verbale dhe tashmë kanë nisur përgatitjet për dokumentacionin përfundimtar.

Sipas Romanos, Gabriel Jesus pritet të udhëtojë drejt Spanjës për t’iu nënshtruar testeve mjekësore, të planifikuara për të hënën.

Nëse gjithçka shkon sipas planit, transferimi mund të zyrtarizohet brenda 24 orëve.

Barcelona do të paguajë rreth 10 milionë euro si shumë fikse për kartonin e sulmuesit, ndërsa marrëveshja përfshin edhe bonuse shtesë që mund ta rrisin vlerën totale të transferimit.

Gabriel Jesus raportohet se ka dhënë tashmë dritën jeshile për transferimin, ndërsa klubet po punojnë për përfundimin e të gjitha dokumenteve.

Ky është një transferim i kërkuar nga drejtori sportiv i Barcelonës, Deco, dhe sipas raportimeve të Fernando Polos për Mundo Deportivo, katalanasit e kanë parë brazilianin si një përforcim të rëndësishëm për repartin ofensiv.

Gabriel Jesus, i cili ka eksperiencë të madhe në Ligën Premier dhe në arenën ndërkombëtare me Brazilin, pritet të sjellë më shumë alternativa në sulmin e Barcelonës dhe konkurrencë për vendin në formacion.

Tashmë mbetet vetëm përfundimi i procedurave të fundit dhe testet mjekësore për të mbyllur zyrtarisht një nga lëvizjet më të papritura të Barcelonës në këtë afat kalimtar. /Telegrafi/

Kapiteni i Liverpoolit, Virgil van Dijk, ka komentuar transferimin e pritshëm të Bradley Barcolës te “Reds”, ndërsa ka bërë të qartë dëshirën e tij që Cody Gakpo të refuzojë interesimin e Manchester Cityt dhe të qëndrojë në “Anfield”.

Barcola po i nënshtrohet testeve mjekësore këtë të diel, përpara se të finalizojë transferimin nga Paris Saint-Germain, në një marrëveshje që mund të arrijë deri në 123 milionë paund.

Sulmuesi francez pritet të firmosë një kontratë pesëvjeçare dhe, nëse gjithçka përfundon sipas planit, do të bëhet transferimi i dytë më i shtrenjtë në historinë e Liverpoolit, pas Alexander Isak.

Van Dijk, i cili e ka përballuar më parë Barcolan në fushë me fanellën e Liverpoolit, beson se 23-vjeçari do t’i bashkohej një prej destinacioneve më tërheqëse në futbollin botëror.

“Është një lojtar i mirë, kjo është e vetmja gjë që mund të them. Nuk mendoj se ka dyshim që një klub si Liverpooli është shumë tërheqës për lojtarë të nivelit të lartë. Ky është një nga klubet më të mëdha në botë”, deklaroi Van Dijk pas barazimit 2-2 ndaj Nottingham Forest.

“E dimë të gjithë se po kalojmë në një periudhë tranzicioni. Ose dëshiron të jesh pjesë e kësaj, ose jo. Merkatoja është e hapur deri të martën, apo jo? Le të shohim se çfarë do të ndodhë”.

Duke folur për cilësitë e Barcolës, Van Dijk shtoi: “Është një lojtar me shumë shpejtësi. Më kujtohet një gol që shënoi ndaj Chelseat. Nëse vjen këtu, do të mirëpritet me krahë hapur. Derisa të bëhet zyrtare, nuk ka kuptim të flasim shumë për këtë”.

Kapiteni i Liverpoolit theksoi gjithashtu rëndësinë e konkurrencës për një vend në formacion, ndërsa skuadra synon të ndërtojë një grup më të fortë nën drejtimin e trajnerit të ri, Andoni Iraola.

“Duhet të vazhdojmë ta shtyjmë njëri-tjetrin përpara. Trajneri tha para ndeshjes se çfarë kërkon nga treshja apo katërshja e sulmit: të japin gjithçka dhe, nëse duhet të fusim një lojtar tjetër për ta përfunduar punën, ai duhet ta bëjë këtë. Na duhen të gjithë për të qenë të suksesshëm”.

“Kur shton cilësi në skuadër, gjithmonë bën diferencën. Le të shohim se çfarë do të sjellin ditët e ardhshme. Pas së martës duhet të luftojmë për gjithçka dhe të mos kemi pendesa”.

Van Dijk foli edhe për problemet që Liverpooli duhet të korrigjojë pas barazimit me Nottingham Forest.

“Duhet të shënojmë më shumë, të pësojmë më pak dhe të dominojmë më shumë, si me topin ashtu edhe pa të. Nottingham Forest ka ardhur këtu në tri sezonet e fundit dhe ka mbetur i pamposhtur”.

“Kjo nuk duhet të ndodhë. Në të gjitha vitet që kam qenë në klub, kjo nuk kishte ndodhur. Është detyra jonë të sigurohemi që të jemi një njësi e vetme – çdo anëtar i skuadrës së bashku me tifozët tanë”.

“Duhet pak kohë. Të gjithë duam që gjithçka të funksionojë sa më shpejt dhe për 90 minuta. Në dy ndeshje radhazi na është dashur të rikthehemi në rezultat. Është një shenjë e mirë që kemi reaguar, por mund të bëjmë shumë më mirë. Është një proces dhe po punojmë për të”.

Megjithatë, deklarata më e qartë e Van Dijk erdhi kur u pyet për të ardhmen e Cody Gakpos.

Manchester City raportohet se është në bisedime për një transferim të holandezit, në një marrëveshje që mund të arrijë rreth 85 milionë paund.

Kapiteni i Liverpoolit nuk e fshehu dëshirën që bashkëkombësi i tij të qëndrojë në “Anfield”.

“Çfarë mendoni ju? Ai është një lojtar cilësor. Mendoj se duhet t’i mbajmë lojtarët cilësorë”.

“Le të shohim se çfarë do të sjellin ditët e ardhshme. Unë dua që ai të qëndrojë, jo vetëm sepse është një lojtar cilësor, por edhe sepse është mik i imi. Ai është shumë i rëndësishëm për ne”, përfundoi Van Dijk. /Telegrafi/

Një moment i veçantë ka shoqëruar ndeshjen mes Ajaxit dhe Sionit në kuadër të Ligës së Konferencës, ku një 11-vjeçar i akademisë së klubit mahniti tifozët me aftësitë e tij në mbajtjen e topit në ajër.

Para fillimit të takimit, Ajax kishte organizuar një sfidë interesante për të rinjtë e akademisë.

11-vjeçari Sybu Zeldenthuis iu bashkua aktivitetit, me klubin holandez që kishte premtuar se për çdo prekje të topit do të dhuronte 1 euro për bamirësi.

Ajo që filloi si një sfidë argëtuese, shumë shpejt u shndërrua në një spektakël.

Zeldenthuis nisi të mbante topin në ajër dhe vazhdoi për minuta të tëra, duke mos lejuar që ai të prekte tokën.

Tifozët në stadium prisnin që seria të përfundonte, por 11-vjeçari vazhdoi të impresiononte.

Kur numri i prekjeve kaloi shifrën e 3,000, organizatorët u detyruan ta ndërprisnin sfidën, pasi ndeshja duhej të fillonte.

Në fund, Zeldenthuis u ndal në shifrën e jashtëzakonshme prej 3,085 prekjeve, duke fituar duartrokitjet dhe simpatinë e të gjithë tifozëve të Ajaxit.

Në aspektin sportiv, Ajax triumfoi 5-3 ndaj Sionit, ndërsa me rezultatin e përgjithshëm 9-5 pas dy ndeshjeve, siguroi kualifikimin në fazën e ligës të Ligës së Konferencës. /Telegrafi/

Galatasaray ka zyrtarizuar transferimin e bujshëm të Rafael Leaos nga Milani, duke bërë publike edhe detajet e marrëveshjes me klubin italian dhe sulmuesin portugez.

Pavarësisht interesimit serioz nga Aston Villa, Leao ka zgjedhur të transferohet te Galatasaray, pasi oferta e klubit anglez për pagën nuk ishte në nivelin e kërkesave të tij.

Klubi turk do të paguajë 38 milionë euro si tarifë fikse transferimi, ndërsa marrëveshja mund të arrijë në një vlerë prej rreth 44 milionë eurosh, duke përfshirë kushtet e parashikuara në kontratë.

Milani ka ruajtur gjithashtu 20 për qind të fitimit nga një shitje e ardhshme e Leaos.

Galatasaray bëri të ditur se ka arritur marrëveshje me Milanin për transferimin e Rafael Alexandre da Conceiçao Leaos, ndërsa futbollisti ka firmosur një kontratë katërvjeçare, e vlefshme nga sezoni 2026/27.

Sipas detajeve të publikuara nga klubi, Leao do të përfitojë një pagë neto të garantuar prej 10 milionë eurosh për sezon, çka e bën atë një nga lojtarët më të paguar në historinë e klubit turk.

Në deklaratën zyrtare, Galatasaray konfirmoi se përveç 38 milionë eurove të tarifës fikse, Milani do të përfitojë edhe 20% të fitimit që do të realizohet nga shitja e ardhshme e futbollistit.

Transferimi i Leaos përfaqëson një nga goditjet më të mëdha të Galatasarayt në këtë afat kalimtar, me klubin turk që ka investuar fuqishëm për të përforcuar skuadrën. /Telegrafi/