Adriatik Kelmendi, autori i emisionit “Rubikon” në Klan Kosova, ka publikuar një postim në Facebook ku ka shprehur pakënaqësinë e tij për shërbimet e kompanisë “N’Post”, pas vonesave në dorëzimin e kartelës së tij të kreditit nga ProCredit Bank.
Sipas Kelmendit, kartela e tij u mor nga posta më 13 janar, por deri të enjten nuk ishte dorëzuar ende.
Ai tregon se ka kontaktuar disa herë me shërbimin për konsumatorë dhe ka kërkuar dorëzim të shpejtë, por përgjigjet që ka marrë kanë qenë të njëjta: vonesë dhe mosdorëzim.
“Shërbimi që e quan veten ‘postë e shpejtë’ e merr kartelën e kreditit prej ProCredit Bank ditën e hënë, sot e enjte ende nuk e dorëzon. I thirra dje për t’i pyet pse nga e hëna ende nuk e kam pranu porosinë, thanë s’kemi arritë me i procesu krejt dërgesat se kemi shumë. I thashë a mundet nesër në mëngjes, para se të shkoj në punë. Thanë, po, pa problem. Sot më thërret postieri në 12:17. I thashë nuk jam në shtëpi, se nuk erdhët në mëngjes. Leje te kutia e letrave. Tha, s’bën. Leje te një person në hyrje të lagjes. Tha, s’bën. Bjere në Klan Kosova. Tha, s’muj. Pas pak minutash më erdhi sms ‘Pranuesi nuk lajmërohet në telefon’”, shkruan Kelmendi.
Ai tregon se ka kontaktuar edhe njëherë me numrin e konsumatorëve dhe është njoftuar se kartela do të dorëzohej “shumë shpejt”, por deri në orën 16:30 asgjë nuk kishte ndodhur.
“Po më vjen keq, s’kemi çka me të ba, zotni. Veç nesër. E si, prej të hënës deri të premten, krejt një javë nuk ma keni sjellë kartelën e bankës, material sensitiv, edhe thoni jeni postë e shpejtë?! Posta e shpejtë nënkupton brenda ditës, ose më së largu ditën tjetër. Zotni, kurku në botë nuk ta bjen posta brenda ditës. S’kam çka me të ba. More ju jo brenda ditës e as të nesërmen, por shkoi java edhe nuk e sollët. Zotni, s’kam çka me të ba. Ja thashë, kam unë çka bëj. Do të kujdesem që krejt ta marrin vesh se sa efikas jeni edhe mundësisht kurrë të mos kemi punë me ju,” ka shkruar Kelmendi.
Policia e Kosovës ka kryer bastisje në tri lokacione të lojërave të fatit në komunën e Zubin Potokut.
Lajmin për Gazetën Sinjali e ka konfirmuar zëdhënësi i Policisë për Mitrovicën e Veriut, Veton Elshani.
Sipas tij, bastisjet janë kryer në kuadër të veprimeve për parandalimin e aktiviteteve të kundërligjshme në fushën e lojërave të fatit dhe për grumbullimin e provave për procedura të mëtejshme.
Në fjalimin e tij vjetor drejtuar forcave të armatosura, presidenti francez, Emmanuel Macron, u përqendrua veçanërisht në nevojën që Franca dhe Evropa të forcojnë kapacitetet e tyre të mbrojtjes dhe të sigurojnë sovranitetin e tyre, shkruan The Guardian.
Ai foli për punën e bërë gjatë një dekade në fushën e riarmatimit, duke theksuar se përpjekjet e deritanishme kanë filluar të “japin fryte”, por ndryshimi i shpejtë i rendit botëror kërkon më shumë urgjencë dhe përpjekje.
“Për të mbetur i lirë, duhet të të kenë frikë. Që të të kenë frikë, duhet të jesh i fuqishëm. Dhe për të qenë i fuqishëm në këtë botë brutale, duhet të veprosh më shpejt dhe më fort,” tha Macron.
Presidenti francez pranoi gjithashtu se Franca mbetet prapa Ukrainës në disa teknologji, veçanërisht në fushën e dronëve, duke vënë në dukje ritmin e shpejtë të inovacionit në këtë sektor.
Në një pjesë të veçantë të fjalimit, ai theksoi rëndësinë e koalicionit European Long-Range Strike Approach (ELSA), i cili synon zhvillimin e kapaciteteve evropiane për goditje në thellësi. Macron theksoi se kjo ka marrë urgjencë pas përdorimit së fundmi nga Rusia të raketës Oreshnik në Ukrainë.
“Ky lëshim është një sinjal shumë i qartë nga një fuqi që tashmë i ka këto kapacitete dhe ka vendosur të sigurojë edhe më shumë, si dhe një mesazh i qartë për të gjithë ata që mendojnë se Rusia nuk është shqetësim për ne,” tha ai.
Zv/kryeministri Besnik Bislimi ka njoftuar se nga dita e nesërme fillon zbatimi i ligjit për të huajt dhe ligjit për automjetet.
Siç ka shkruar ai në Facebook, në fazën e parë të zbatimit, vizitorët që hyjnë në vendkalimet kufitare do të pajisen me material informues rreth procedurave dhe rregullave specifike. Kjo periudhë do të zgjasë deri më 15 mars.
Pas kësaj, sipas Bislimit, do të nisë zbatimi i plotë i ligjit.
Postimi:
Nga dita e nesërme fillon zbatimi i ligjit për të huajt dhe ligjit për automjetet. Në fazën e parë të zbatimit, vizitorët që hyjnë në vendkalimet kufitare do të pajisen me material informues rreth procedurave dhe rregullave specifike, dhe kjo periudhë do të zgjasë deri më datën 15 mars. Pas kësaj fillon zbatimi i plotë i procedurave dhe rregullave që parashihen me ligjet e lartëpërmendura. Qeveria e Republikës së Kosovës njofton se kjo periudhë e zbatimit afirmativ duhet të përdoret maksimalisht për të filluar me procesin e integrimit përmbajtësor të sistemit shëndetësor dhe atë të arsimit në gjithë territorin e vendit.
Ish-ambasadori William Walker ka rrëfyer se ish-presidenti Hashim Thaçi i kishte thënë se “asnjëherë nuk ishte zemëruar me kritikat që ky i fundit ia bënte”.
Walker thotë në një emision të televizonit7 se që prej atëherë “u trash miqësia mes tij dhe Thaçit”.
“Deri vonë isha kritik me Hashim Thaçin dhe qeverinë e tij. Dëgjoja storie korrupsioni jo kundër tij, por ndaj disa ministrave, dhe isha kritik. Mendoja se po bëheshin shumë lëshime ndaj kërkesave të SHBA-së dhe BE-së. Kur erdha këtu rreth 10 vite më parë, ai më shpjegoi se nuk ishte i zemëruar me mua dhe kritikat e mia ndaj qeverisë së tij sepse e kuptonte që unë po e bëja për të mirën e Kosovës. Më pas, ne u bëmë miq më të mirë nga atëherë”, tha ish-ambasadori.
Komisioneri i Këshillit të Evropës për të Drejtat e Njeriut, Michael O’Flaherty ka dënuar sulmet e Rusisë ndaj infrastrukturës energjetike të Ukrainës.
Të dhënat e reja të OKB-së që tregojnë se viti 2025 ishte viti më vdekjeprurës për civilët në Ukrainë që nga pushtimi në shkallë të plotë i Rusisë në 2022.
Sipas Misionit të Monitorimit të të Drejtave të Njeriut të OKB-së (HRMMU), në 2025 u vranë 2,514 civilë dhe u plagosën 12,142 — një rritje prej 31% në vdekje krahasuar me 2024 dhe numri më i lartë që nga viti i parë i luftës.
O’Flaherty e quajti shkatërrimin sistematik të infrastrukturës energjetike gjatë dimrit të ftohtë një sulm ndaj shëndetit fizik dhe mendor, dinjitetit dhe sigurisë së popullit ukrainas.
Në javët e fundit, Rusia ka nisur valë të përditshme raketash dhe dronësh kundër termocentraleve, nënstacioneve dhe objekteve të ngrohjes në të gjithë Ukrainën.
Goditje të mëdha kanë pësuar Dnipro, Zaporizhzhia, Kyiv, Lviv, Odesa, Chernihiv dhe Kharkiv, duke lënë qindra mijëra pa energji elektrike në temperatura deri në -15°C.
“Këto sulme të përditshme po pengojnë seriozisht përpjekjet për riparim dhe po lënë miliona civilë pa shërbime thelbësore në mes të temperaturave të ngrira dimërore”, tha O’Flaherty.
Pjesa e majtë e qytetit Dnipro ka mbetur pa energji për pesë ditë radhazi. Spitalet, sistemet e ngrohjes dhe rrjetet e furnizimit me ujë janë ndërprerë në disa rajone. Ndërprerje emergjente të energjisë vazhdojnë në të gjithë vendin.
Komisioneri kujtoi se Gjykata Ndërkombëtare Penale ka lëshuar urdhër-arrest për komandantë ushtarakë rusë për sulmet ndaj infrastrukturës elektrike të Ukrainës.
Gjenerallejtënant Sergei Kobylash dhe Admiral Viktor Sokolov akuzohen për drejtimin e sulmeve ndaj objekteve civile dhe krime kundër njerëzimit.
Uji që vjen nga fabrika për trajtimin e ujit në Badovc vazhdon të mos rekomandohet për pije, për shkak të vlerës së rritur të turbullirës pas vërshimeve që kanë ndodhur në nivel vendi.
Lajmërimi është bërë nga Instituti Kombëtar i Shëndetësisë Publike të Kosovës (IKSHPK), i cili ka theksuar të enjten se cilësia e ujit në rajonin e Prishtinës ka mbetur e njëjtë si një ditë më parë.
Ndërkaq, në rajonin e Prishtinës, uji që vjen nga fabrikat për trajtimin e ujit në Shkabaj dhe Batllavë është brenda standardeve dhe rekomandohet për konsum.
Sipas njoftimit të IKSHPK-së, ndryshime nga një ditë më parë janë vërejtur në rajonin e Gjilanit dhe të Pejës.
Rajoni i Gjilanit
Në zonën e Kamenicës – Stacioni nr. 1 dhe Besa Center, cilësia e ujit është brenda standardeve të lejuara.
Në Stacionin e pompimit nr. 2, Bahqja dhe fshatin Berivojcë, është vërejtur rritje e vlerave të nitrateve mbi kufijtë e lejuar, dhe uji në këto zona nuk rekomandohet për pije.
Rajoni i Pejës
Në Pejë, Deçan, Junik dhe Istog, cilësia e ujit është brenda standardeve të lejuara për konsum.
Në Klinë – rrjeti nga puset dhe rrjeti nga burimi Jarinë, për shkak të vlerave të rritura të turbullirës, uji nuk rekomandohet për pije.
Nga 9 deri më 13 shkurt, si dhe më 16 dhe 18 shkurt 2026, në Dhomat e Specializuara të Kosovës në Hagë do të zhvillohen deklaratat përmbyllëse në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, të akuzuar për krime lufte dhe krime kundër njerëzimit.
Sipas njoftimit zyrtar të DHSK-së, seancat janë planifikuar të mbahen nga ora 09:00 deri në 16:30 dhe mund të ndiqen përmes transmetimit në faqen zyrtare të gjykatës me 45 minuta vonesë, në tri gjuhët zyrtare: shqip, serbisht dhe anglisht, si dhe nga galeria publike në ndërtesën e gjykatës në Hagë.
DHSK njofton se për shkak të interesimit të madh, pjesëmarrja fizike në seanca kërkon regjistrim paraprak.
“Për të përcjellë seancat nga galeria publike në ndërtesën e gjykatës në Hagë, regjistrimi paraprak është i domosdoshëm”, thuhet në njoftim. Afati për regjistrim është deri më 30 janar në orën 17:30.
Sipas rendit të ditës, deklaratat përmbyllëse do të nisin me Prokurorinë më 9 shkurt, ndërsa mbrojtja e të akuzuarve do të paraqesë qëndrimet e saj në ditët pasuese. Më 18 shkurt janë paraparë përgjigje nga palët dhe deklarata nga vetë të akuzuarit.
Në njoftim rikujtohet se aktakuza në këtë çështje u konfirmua fillimisht më 26 tetor 2020 dhe u ndryshua disa herë, ndërsa versioni aktual është dorëzuar më 27 shkurt 2023.
“Secili prej të akuzuarve akuzohet mbi bazën e përgjegjësisë penale individuale për gjashtë akuza për krime kundër njerëzimit dhe katër akuza për krime lufte”, thuhet më tej.
Sipas aktakuzës, krimet dyshohet se janë kryer nga marsi deri në shtator 1999 në disa lokacione në Kosovë dhe në veri të Shqipërisë. Prokuroria pretendon se këto vepra janë kryer nga pjesëtarë të UÇK-së kundër civilëve dhe personave që nuk merrnin pjesë në luftime.
Gjykimi ka filluar më 3 prill 2023, ndërsa Trupi Gjykues mbylli procedurën e paraqitjes së provave më 19 dhjetor 2025. Në total, në këtë proces kanë dëshmuar 134 dëshmitarë, ndërsa janë pranuar edhe 164 deklarata vetëm në formë të shkruar.
Pas përfundimit të deklaratave përmbyllëse, Trupi Gjykues do të nisë kuvendimet për aktgjykimin.
“Aktgjykimi duhet të shpallet brenda 90 ditësh nga mbyllja e paraqitjes së provave”, bën të ditur DHSK, me mundësi zgjatjeje edhe për 60 ditë të tjera nëse rrethanat e kërkojnë këtë.
Ambasadori i Gjermanisë në Kosovë, Rainer Rudolph, ka shprehur nderime për viktimat e masakrës së Reçakut, raporton Gazeta Sinjali.
Përmes një njoftimi, Ambasada gjermane ka bërë të ditur se ambasadori Rudolph ka marrë pjesë në ceremoninë zyrtare përkujtimore të mbajtur sot, me rastin e përvjetorit të masakrës së Reçakut/Racakut të 15 janarit 1999.
“Në ceremoninë zyrtare përkujtimore të sotme, Ambasadori Rainer Rudolph nderoi viktimat e masakrës së Reçakut/Racakut të 15 janarit 1999. Ambasadori i SHBA-së, William Walker, i cili mori pjesë në ceremoni, udhëhoqi Misionin Verifikues të Kosovës që e bëri krimin publik menjëherë pas ndodhjes. Le të shërbejë kjo ditë si kujtesë për rëndësinë e ndërtimit të një të ardhmeje paqësore, ku mizori të tilla të mos përsëriten më kurrë”, shkruhet në njoftimin e ambasadës.
Drejtori i Përgjithshëm i Policisë së Kosovës, kolonel Gazmend Hoxha, së bashku me menaxhmentin e lartë të PK-së, ka pritur në Prishtinë në një takim zyrtar Atasheun Ligjor të FBI-së, Brendan Collins, si dhe Atasheun e Departamentit të Drejtësisë së Shteteve të Bashkuara të Amerikës (DOJ-ICITAP), Kimberly Riffe.
Sipas një njoftimi për media, gjatë këtij takimi, atashetë amerikanë prezantuan para nivelit të lartë ekzekutiv të Policisë së Kosovës dy përfaqësues të FBI-së, përkatësisht një agjent special të FBI-së dhe një analist të inteligjencës të FBI-së, të cilët do të punojnë ngushtë dhe paralelisht me Policinë e Kosovës gjatë muajve në vijim.
“Takimi u fokusua në planet e bashkëpunimit të ardhshëm, forcimin e partneritetit strategjik dhe thellimin e bashkëpunimit ndërinstitucional. Të dyja palët riafirmuan përkushtimin për bashkëpunim të plotë dhe koordinim të vazhdueshëm në fushën e hetimeve penale dhe inteligjencës, me qëllim të rritjes së sigurisë dhe luftimit efektiv të krimit. Policia e Kosovës vlerëson lart mbështetjen e vazhdueshme të institucioneve të sigurisë së SHBA-së, duke e konsideruar këtë bashkëpunim si shembull të shkëlqyer të partneritetit profesional dhe strategjik në shërbim të sigurisë së qytetarëve”, thuhet në njoftim.
Brikena Selmani dhe Ina Aderi janë përfshirë në një debat të ashpër gjatë ditës së sotme (e enjte).
Ato kanë hedhur akuza ndaj njëra-tjetrës, e madje kaluan edhe në ofendime.
"Çfarë nuk bën për një copë famë", iu drejtua banorja nga Kosova.
Foto: Instagram
"Ti mendon se këtu kam ardhur për famë. Mendon se më mungon. Po ti për çfarë ke ardhur apo për të gjetur ndonjë sponsor për të të paguar Miss-in", ia ktheu në anën tjetër Ina.
"Nuk më nxjer nga vetja se nuk më djegin fjalët e tua", u përgjigj mes tjerash Selmani.
Foto: Instagram
Konkurrentet kanë përmendur gjëra nga jashtë që i kanë sjell brenda shtëpisë.
Veç tyre, këto ditë ka pasur debate edhe mes të tjerëve, ndonëse secili synon të jetë në vëmendje. /Telegrafi/
Sulmuesi Endrick ka folur hapur për vështirësitë e periudhës së tij të parë te Real Madridi, duke zbuluar se momenti më i vështirë për të ishte konfirmimi se do ta humbiste Kupën e Botës për Klube të FIFA-s, e cila u zhvillua në Shtetet e Bashkuara të Amerikës.
Sulmuesi i ri brazilian pësoi një lëndim në muskujt e pasmë të kofshës drejt fundit të sezonit të kaluar, i cili u përkeqësua gjatë seancave stërvitore para turneut.
Si pasojë, ai mbeti jashtë fushave për disa muaj dhe nuk arriti të marrë pjesë fare në këtë kompeticion. Në një intervistë së fundmi, Endrick u shpreh se ishte momenti më i rëndë i karrierës.
“Konfirmimi se do ta humbja Kupën e Botës për Klube në Shtetet e Bashkuara. Se nuk do të mund të luaja për disa muaj”.
“Është momenti kur e kupton se nuk do të mund të garosh. Humbjet janë të këqija, por janë pjesë e futbollit. Ne fitojmë dhe humbim. Të gjithë e bëjnë këtë. Pak janë ata që fitojnë trofe”.
“Askush nuk fiton gjatë gjithë kohës. Por lëndimet mund të të largojnë krejtësisht nga futbolli”, deklaroi ai.
Ndërkohë, Endrick po synon të gjejë formën sa më të mirë te Lyoni, me shpresën që të merr një ftesë nga Carlo Ancelotti për Kupën e Botës 2026./Telegrafi/
Personeli ushtarak evropian ka filluar të mbërrijë në Grenlandë, disa orë pasi një takim midis zyrtarëve amerikanë, danezë dhe të Grenlandës në Uashington dështoi të zgjidhte atë që ministri i jashtëm danez e quajti "mosmarrëveshje themelore" mbi ishullin e pasur me minerale Arktik.
Franca, Suedia, Gjermania dhe Norvegjia njoftuan se do të dërgojnë personel ushtarak si pjesë e një misioni zbulimi në kryeqytetin e Grenlandës, Nuuk.
Ministria e Mbrojtjes e Gjermanisë tha se misioni i zbulimit në Grenlandë nga disa anëtarë evropianë të NATO-s synon "të shqyrtojë mundësitë për të siguruar vendin në dritën e kërcënimeve ruse dhe kineze në Arktik".
Një ekip zbulimi prej 13 trupash të Bundeswehr do të vendoset në Nuuk me ftesë të Danimarkës, sipas ministrisë.
Presidenti francez Emmanuel Macron tha se Franca së shpejti do të dërgojë më shumë forca “tokësore, ajrore dhe detare” për t'u bashkuar me stërvitjen ushtarake në Grenlandë.
Ndërkohë, Holanda dhe Estonia njoftuan se do të bashkoheshin me stërvitjen, të cilën Ministri i Jashtëm holandez Ruben Brekelmans e përshkroi si një sinjal se çështjet e sigurisë në Grenlandë dhe në rajon janë "me rëndësi strategjike për të gjithë aleatët e NATO-s".
Estonia ishte gjithashtu "e gatshme të dërgonte ushtarë në tokë nëse kërkohej".
Vendosja u njoftua të njëjtën ditë kur ministrat e jashtëm të Danimarkës dhe Grenlandës u takuan me zëvendëspresidentin e SHBA-së JD Vance dhe Sekretarin e Shtetit Marco Rubio në Uashington. /Telegrafi/
“Bravo Mickoskit! Më në fund gjeti një “strategji” se si t’i mbajë të rinjtë në Maqedoni – në mënyrë që SHBA-të të mos u japin viza. Jo me paga më të mira, jo me arsim cilësor, jo me institucione të sigurta, por me kufizime ndërkombëtare”, shkruan ish-kryetari i Shkupit Andrej Zhernovski në Facebook.
Sipas tij, “nga njëra anë, qeveria thotë se do të bëjë gjithçka për t’i mbajtur të rinjtë në shtëpi. Nga ana tjetër, nën udhëheqjen e saj, Maqedonia përfundon në listën e vendeve për të cilat SHBA-të pezullojnë politikën e imigracionit. Nëse ky është plani – atëherë funksionon vërtet: nuk largohesh sepse do, por sepse nuk mundesh.
Ai thekson se kjo nuk është një politikë për të rinjtë, por një politikë mbylljeje. Në vend që të krijojë kushte që do t’i bënin të rinjtë të zgjidhnin të qëndronin, qeveria po krijon kushte që e bëjnë botën t’u mbyllë dyert.
"Mickoski premton të ardhme në Maqedoni, por sjell izolim. Ai premton shpresë, por sjell kufizime. Ai premton perspektivë, dhe ne morëm një alarm zgjimi nga realiteti. "Marrëdhëniet e tij të shkëlqyera dhe të veçanta" me SHBA-në dhe Trumpin janë aq të shkëlqyera sa realiteti na ka sjellë tarifa më të larta për produktet maqedonase dhe viza të pezulluara për qytetarët e vendit", shton Zhernovski./Telegrafi/
Zgjedhjet e parakohshme parlamentare të 28 dhjetorit të vitit të kaluar sollën rezultatin e dytë më të keq për Lidhjen Demokratike të Kosovës (LDK), partinë më të vjetër në Kosovë, që nga paslufta.
Por, përballë këtij momenti vendimtar për të ardhmen e partisë, Radios Evropa e Lirë (REL) s’i folën shumë nga përfaqësuesit e LDK-së, si: Lumir Abdixhiku, Lutfi Haziri, Hykmete Bajrami, Jehona Lushaku Sadriu, Avdullah Hoti, Anton Quni, Doarsa Kica Xhelili, Besian Mustafa, Arben Gashi e Agim Veliu.
Për politologun Dritëro Arifi, kjo simbolizon “mbylljen” e LDK-së, që kur u morën vesh rezultatet e zgjedhjeve, se ajo mori vetëm 13.23 për qind të votave.
Arifi shpreson që, të paktën, kjo kohë po shfrytëzohet për të menduar për “risitë që duhet të sjellë LDK-ja në strukturat e partisë”.
Për njohësen e zhvillimeve politike, Donika Emini, risia kryesore që i duhet LDK-së është ikja nga një lloj “gjumi letargjik”.
“Prej 2021 deri më 2025, partia nuk ka qenë aktive në mënyrë të qëndrueshme, dhe kjo ka pasur pasoja të dukshme në perceptimin e saj si forcë politike”, thotë Emini për REL-in.
Por, mbrëmjen e së mërkurës u shpërfaqën në Facebook disa mosmarrëveshje nga debati i brendshëm në LDK. Nënkryetarja e partisë, Hykmete Bajrami, tha se ka dhënë dorëheqje nga posti i saj, dhe kërkoi që të njëjtën ta bënte edhe kryetari Abdixhiku.
Ky i fundit, duke kërkuar që të tjerët “të sillen pa dramë e pa protagonizëm”, përsëriti se e ka ofruar dorëheqjen, por se vendimin për pranimin ose jo të saj do ta marrë Kuvendi i partisë.
LDK-ja përballë dy testeve të para
Një test i parë për të ardhmen e LDK-së pritet të jetë reformimi ose jo i udhëheqjes së saj.
“Derisa e kemi një kryetar, që thotë: ‘Unë po shkoj; por, nëse ju më besoni, unë mund të vazhdoj’… Kjo tregon që këtu nuk ka qasje [për të ardhmen e partisë]. Këtu ka më shumë interesa personale sesa partiake”, thotë Arifi për REL-in.
Një tjetër moment kyç që mund ta formësojë LDK-në është edhe bashkëpunimi ose jo me partinë fituese të zgjedhjeve, Lëvizjen Vetëvendosje (LVV), për mandatin e ri pesëvjeçar të presidentit, që duhet të zgjidhet më 4 mars.
“Hapi më i mençur për LDK-në do të ishte ta pranonte rezultatin e zgjedhjeve dhe të mos e bllokonte procesin e zgjedhjes së presidentit”, thotë Emini.
Ajo beson se nëse LDK-ja nuk tregohet bashkëpunuese, asaj mund t’i largohen deputetë drejt LVV-së, ose të pësojë rënie edhe më të madhe në zgjedhjet e ardhshme.
Ku gaboi LDK-ja dhe si mund ta rikthejë besimin e elektoratit?
Rezultatet e veta më të mira, LDK-ja i gëzoi në vitet e para të pasluftës, nën udhëheqjen e Ibrahim Rugovës. Atëbotë, kjo parti fitonte rreth 45 për qind, por tani ka rënë në rreth 13 për qind.
Për Arifin, sinjale për rënien e LDK-së ka pasur mjaft.
“Këto janë gjëra që partitë nuk duan t’i pranojnë, jo që nuk i dinë”, thotë ai, duke shtuar se rënia e tillë tregon se ka dështuar e gjitha struktura e LDK-së në nivel vendi.
Një nga arsyet pse LDK-ja ka humbur besimin e shumë qytetarëve, thotë Arifi, është se ardhjet e fundit në parti e kanë përmirësuar listën për deputetë, por s’kanë sjellë shumë vota, pasi nuk janë integruar në udhëheqje të partisë.
Për Eminin, gabimi i LDK-së qëndron te “ngrirja në kohë” dhe insistimi në “frymën rugoviane”, ndërkohë që “votuesit kërkojnë zgjidhje të reja dhe përfaqësim të gjeneratave të reja”.
Por, ajo thekson edhe disa përçarje brenda partisë.
“Heqja e Agim Veliut nga lista ishte e kushtueshme politikisht. Veliu përfaqësonte një pjesë më tradicionale të LDK-së, dhe mungesa e tij ndikoi në rezultatin e partisë”, thotë Emini, duke shtuar se, në anën tjetër, njerëzit e rinj s’tërhoqën votat e të rinjve që kërkonin ide të reja.
Ajo shton se me sfida të ngjashme përballet edhe Partia Demokratike e Kosovës (PDK). Si dy partitë kryesore në vitet e para të pasluftës dhe pas pavarësisë së Kosovës, tani këto dy parti po e kanë të vështirë të shfaqen si alternative serioze qeverësise ndaj LVV-së.
E, si mund të ndryshojë kjo? Duke u reformuar, thotë Emini.
Si hap i parë, shton ajo, është pranimi i realitetit: LDK-ja radhitet si partia e tretë më e madhe në vend, me vetëm 15 vende të fituara në Kuvend nga gjithsej 120.
Hapat e radhës i theksojnë po aq fuqishëm edhe Emini, edhe Arifi: LDK-ja duhet të bëjë matje e analiza se pse ka humbur, e pastaj të pozicionohet si opozitë sa aktive, po aq edhe konstruktive.
Duke qenë aktive në Kuvend, në raport me mediat, me shoqërinë civile, me pozitën e opozitën, Emini thotë se LDK-ja mund të paraqitet si forcë e madhe politike edhe me numër të vogël deputetësh./Radio Evropa e Lirë/
Sot (e enjte) feston ditëlindjen e 45-të muzikanti amerikan, Pitbull, emri i vërtetë i të cilit është Armando Christian Perez.
Ai u bë i famshëm në mbarë botën me hite si “Give Me Everything” dhe “Timber”, si dhe me bashkëpunime të shumta me emra të mëdhenj të industrisë muzikore.
Pitbull lindi më 15 janar 1981 në Miami, në një familje emigrantësh kubanë.
Pitbull
Fëmijëria e tij ishte e vështirë: prindërit u divorcuan herët, familja u përball me probleme serioze dhe ai vetë, në adoleshencë, përfundoi në rrugë dhe në shoqëri të keqe.
Megjithatë, hip-hopi dhe muzika u bënë shpëtimi i tij, duke i ndryshuar rrënjësisht jetën.
Pas shkollës së mesme, ai iu përkushtua seriozisht muzikës.
Talentit të tij i dha hov reperi dhe producenti Luther Campbell, ndërsa më pas bashkëpunimet me artistë të njohur e çuan drejt suksesit ndërkombëtar.
Pitbull
Rreth vitit 2007 krijoi stilin e tij karakteristik dhe filloi të këndojë si në anglisht, ashtu edhe në spanjisht.
Me këngë si “Give Me Everything”, “Feel This Moment” dhe “Timber”, Pitbull arriti majat e top-listave botërore.
Pitbull
I njohur si “Mr. Worldwide”, ai u shndërrua jo vetëm në një yll muzike, por edhe në një figurë të fuqishme në botën e biznesit dhe argëtimit. /Telegrafi/
Nga Prokuroria njoftojnë se pasditen e sotme po zhvillohen bastisje në disa rajone të Maqedonisë.
Sipas Prokurorisë, po kërkohen persona të dyshuar për shoqërim kriminal, pastrim parash dhe për evazion fiskal në shkallë të madhe.
“Që nga pasditja, nën drejtimin e prokurorit publik nga Prokuroria Themelore Publike për Ndjekje të Krimit të Organizuar dhe Korrupsion, hetues me asistencë të punonjësve të policisë nga MPB, po kryejnë bastisje në disa lokacione në vend dhe po sigurohen persona të dyshuar për shoqërim kriminal, pastrim parash, mashtrim fiskal dhe evazion fiskal në shkallë të lartë.
Më shumë informacion do të bëhet i ditur gjatë ditës”, thonë nga Prokuroria.
Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.
Nga fillimi i këtij procesi (e martë, 13 janar 2026, ora 18:00) dhe deri më tani (e enjte, 15 janar 2026, ora 16:00) janë rinumëruar 158 nga 914 vendvotime, të cilat u takojnë komunave të ndryshme, si: Deçan (5), Gjakovë (15), Gllogoc (7), Gjilan (13), Dragash (57), Istog (6), Kaçanik (44), Klinë (5), Fushë Kosovë (3) dhe Mitrovicë e Jugut (3).
Sipas vendimit të KQZ-së, në 10 komuna do të rinumërohen 100% të vendvotimeve (Dragash, Kaçanik, Lespoaviq, Prizren, Skënderaj, Shtime, Ferizaj, Vushtrri, Mamushë dhe Ranillug), ndërkaq në 28 komunat tjera, do të rinumërohen nga 10% e vendvotimeve (Deçan, Gjakovë, Gllogoc, Gjilan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut)./Telegrafi/
Raportimet nga Italia bëjnë të ditur se Juventusi ka arritur një marrëveshje paraprake për transferimin pa pagesë të Oscar Minguezas në qershor, por drejtori i klubit bardhezi, Marco Ottolini, ka qëndruar në Spanjë për të negociuar një kalim të mundshëm që në afatin e janarit me Celta Vigo.
Mbrojtësi i krahut nga Spanja pritet të bëhet lojtar i ri i Juventusit, qoftë gjatë verës, qoftë që në këtë afat kalimtar dimëror, në varësi të ecurisë së bisedimeve mes dy klubeve.
Sipas “Gazzetta dello Sport” dhe “Tuttosport”, bardhezinjtë kanë arritur marrëveshje personale me Minguezan për një kontratë katërvjeçare me vlerë 1 milion euro në sezon, pothuajse dyfish i pagës që ai përfiton aktualisht te Celta Vigo, e cila sillet rreth 600 mijë euro në vit.
Juventusi po ushtron tani presion për ta transferuar 26-vjeçarin që në janar, duke synuar një marrëveshje me kosto të reduktuar për klubin spanjoll, në mënyrë që të shmangë pritjen deri në verë.
Bisedimet mes Juventusit dhe Celta Vigos pritet të vazhdojnë në orët në vijim, ndërsa raportet nga Italia sugjerojnë se “Zonja e Vjetër” do të duhet të paguajë një shumë që varion nga 3 deri në 5 milionë euro për ta siguruar nënshkrimin e mbrojtësit gjatë afatit dimëror.
Mingueza ka regjistruar një gol dhe tri asistime në 22 paraqitje në të gjitha garat këtë sezon, ndërsa në nivel ndërkombëtar ka grumbulluar katër paraqitje me përfaqësuesen e Spanjës.
Mingueza thuhet se pëlqehet edhe nga Real Madridi, por aktualisht nuk ka asgjë konkrete./Telegrafi
Banorja e Big Brother VIP Kosova 4, Alba Pollozhani, ka folur me disa nga banorët për bashkëjetesën e saj me Lim Hotin.
Ajo është shprehur se ndarja ka ndodhur në shtator, më pas ka pasur një rikthim, siç u shpreh ajo, problematik.
“Ne kemi pasur bashkëjetesë deri në shtator, në shtator e bëmë një ndarje, pas ndarjes kishim një rikthim shumë problematik, ku në mes ishte edhe tradhtia”.
Foto: YouTube
“Kishim rikthim, por jo më bashkëjetesë, kishim si një gjysmë bashkëjetese, por non stop rrinim bashkë”, u shpreh Alba.
E njëjta tregoi në detaje edhe se si ishin ndarë dhe se çfarë bëri të vinte deri aty.
Sidoqoftë, pretendon se një natë para se të hynte në Big Brother kishte folur me Limin.
Ky i fundit nga ana tjetër ka mohuar gjërat që ka thënë Alba për raportin e tyre.
Login
