Prokuroria Themelore në Prizren ka kërkuar nga Gjykata Themelore caktimin e masës së paraburgimit prej 30 ditësh ndaj dy personave të dyshuar për marrje dhe dhënie të ryshfetit.

Sipas njoftimit zyrtar, paraburgimi është kërkuar ndaj A.K., zyrtar policor, për veprën penale “Marrja e ryshfetit” nga neni 421 paragrafi 1 i Kodit Penal të Republikës së Kosovës, si dhe ndaj B.C., shtetas serb, për veprat penale “Dhënia e ryshfetit” nga neni 422 paragrafi 1 dhe “Kalimi i paautorizuar i vendkalimeve kufitare ose i vijës kufitare” nga neni 140 paragrafi 1 i KPRK-së.

Sipas prokurorisë, më 22 dhjetor 2025, rreth orës 08:10, në Pikën Kufitare në Vërmicë, i pandehuri A.K., në cilësinë e zyrtarit policor, ka kërkuar dhe pranuar ryshfet nga B.C., me qëllim të përfitimit pasuror për vete.

Dyshohet se A.K., duke shfrytëzuar pozitën zyrtare dhe i veshur me uniformë policore, i ka mundësuar B.C.-së hyrjen në Republikën e Kosovës, ndonëse këtij të fundit i ishte ndaluar hyrja për shkak të mungesës së dokumentacionit të nevojshëm.

Pas marrjes së parave, sipas hetimeve, A.K. e ka kaluar në mënyrë ilegale kufirin me veturën e tij bashkë me B.C., duke e dërguar më pas në qytetin e Prizrenit.

Prokuroria Themelore në Prizren ka theksuar se mbetet e përkushtuar në luftën kundër kriminalitetit, forcimin e sundimit të ligjit dhe vënien para drejtësisë të të gjithë personave që shkelin ligjin. /Telegrafi/

Kandidati për Kryeministër nga LDK, Lumir Abdixhiku në qytetin e Prizrenit, ka folur për programin politik rreth shëndetësisë.

Ai ka premtuar QKUK të re, digjitalizim të sistemit si dhe sigurimin e specializimit dhe punësimit për mjekët e diplomuar.

“Në shëndetësi e kemi spitalin e ri të Kosovës. QKUK të re dhe një operimi një modeli të një ndërmarrje publike e cila jep shërbime dhe merr pagesë prej fondit të sigurimeve shëndetësore. Mjekëve të diplomuar duhet t’i sigurohet specializimi menjëherë”, tha Abdixhiku.

Sipas tij, nuk ka tmerr më të madh se ‘’me kry mjekësinë edhe mos me arritë me pasë specializim’’.

Punimet për ndërtimin e çerdhes së fëmijëve në fshatin Bresanë vazhduan edhe gjatë fundjavës, në kuadër të angazhimeve të Komunës së Dragashit për përmirësimin e infrastrukturës arsimore dhe kujdesit ndaj fëmijëve.

Kryetari i Komunës së Dragashit, Bexhet Xheladini, ka vizituar nga afër ecurinë e punimeve, duke theksuar rëndësinë që ky projekt ka për komunitetin lokal dhe për të ardhmen e gjeneratave të reja.

“Nuk ka pushim kur punohet për të ardhmen e fëmijëve tanë. Edhe sot, në ditë vikendi, vizitova punimet në ndërtimin e çerdhes së fëmijëve në fshatin Bresanë”, ka shkruar Xheladini.

Sipas tij, ndërtimi i çerdhes do të krijojë kushte më të mira për edukimin dhe mirëqenien e fëmijëve, si dhe do t’u lehtësojë familjeve qasjen në shërbime cilësore të kujdesit parashkollor.

Komuna e Dragashit ka theksuar se investimet në arsim dhe në kujdesin ndaj fëmijëve mbeten prioritet, me synim krijimin e një mjedisi të sigurt dhe të përshtatshëm për zhvillimin e tyre. /Telegrafi/

Policia e Kosovës ka nisur hetimet lidhur me një rast të shkaktimit të rrezikut të përgjithshëm në fshatin Reçan të Prizrenit.

Ngjarja ka ndodhur në intervalin kohor nga ora 00:30 deri në 03:15, kur autoritetet janë njoftuar se persona të panjohur kanë tentuar t’i vënë flakën një restoranti.

Sipas njoftimit policor, në afërsi të restorantit është gjetur edhe një mjet shpërthyes me fitil ndezës. Njësia e specializuar për trajtimin e mjeteve shpërthyese (IEDD) ka dalë në vendin e ngjarjes dhe ka konstatuar se bëhet fjalë për një mjet të punuar në mënyrë artizanale.

Po ashtu, dyshohet se edhe rreth një javë më parë ka pasur një tentativë të ngjashme për zjarrvënie ndaj të njëjtit objekt. Për fat, nuk raportohet për persona të lënduar.

Rasti është duke u hetuar nga organet kompetente, ndërsa policia po punon për identifikimin e të dyshuarve dhe sqarimin e plotë të rrethanave të ngjarjes./Telegrafi/

Në Prizren, në ambientet e Shtëpisë së Kulturës, u zhvillua një aktivitet në kuadër të Projektit të Partneritetit të Dhomave dhe Shoqatave Shqipëri & Kosovë, me mbështetjen e Dhomës së Zejeve Koblenz, duke shënuar një hap të rëndësishëm në forcimin e bashkëpunimit ndërkufitar në fushën e zejeve. Projekti bazohet në bashkëpunimin mes Dhomës Kombëtare të Zejtarisë në Shqipëri dhe Odës së Prizrenit, me synimin për të fuqizuar sektorët artizanalë në të dy vendet.

Dhoma e Zejeve Koblenz është prej vitesh aktive në Ballkanin Perëndimor dhe në nivel ndërkombëtar, në mbështetje të zejtarëve, bizneseve të vogla dhe të mesme dhe arsimit profesional dual. Projekti në Shqipëri dhe Kosovë synon forcimin e zejtarive si trashëgimi kulturore dhe si një shtyllë e rëndësishme e zhvillimit ekonomik dhe social, duke i kushtuar vëmendje edhe përmirësimit të imazhit dhe rritjes së ndërgjegjësimit për ndikimin e tyre në ekonomi dhe punësim.

Aktiviteti iu kushtua sektorit të tekstilit, një fushë me potencial të lartë zhvillimi. Në Shqipëri janë ndërmarrë iniciativa për rigjallërimin e këtij sektori përmes takimeve me artizanë dhe përfaqësues të tekstilit, të shoqëruara me analizën e nevojave dhe përgatitjen e një studimi për masa të qëndrueshme zhvillimi.

Në të njëjtën frymë, aktiviteti në Kosovë shërbeu si një takim i parë dhe domethënës, me fokus përmirësimin e imazhit të zejtarive dhe krijimin e një platforme të përbashkët dialogu mes Shqipërisë dhe Kosovës për të diskutuar sfidat, perspektivat dhe mundësitë e bashkëpunimit në sektorin e tekstilit.

Motoja e projektit, “Crafting a Better Future”, pasqyron vizionin për forcimin e zejtarive përmes investimit në aftësi dhe bashkëpunimit ndërkufitar, me synimin për një zhvillim më të qëndrueshëm të komuniteteve lokale.

Programi përfshiu një panel diskutimi me artizanë dhe përfaqësues të dhomave dhe institucioneve të arsimit profesional, duke krijuar një hapësirë shkëmbimi përvojash dhe idesh konkrete. Aktiviteti u përmbyll me një ekspoze punimesh dhe sfilatë veshjesh që ndërthurën traditën me inovacionin.

Një rast i vjedhjes së rëndë është raportuar pasditen e së martës në fshatin Lubizhdë të Prizrenit, ku persona të panjohur dyshohet se kanë vjedhur para të gatshme dhe stoli ari nga një veturë.

Sipas raportit nga Policia e Kosovës, rasti ka ndodhur më 17 dhjetor 2025 rreth orës 17:30, ndërsa viktimë e vjedhjes është një mashkull kosovar.

Të dyshuarit ende të paidentifikuar kanë marrë sendet me vlerë dhe janë larguar nga vendi i ngjarjes.

Në vendin e ngjarjes kanë dalë njësitë përkatëse të Policisë së Kosovës, të cilat kanë ndërmarrë veprimet e nevojshme hetimore.

Rasti është iniciuar si “vjedhje e rëndë” dhe po hetohet nga organet kompetente, ndërsa autorët e dyshuar mbeten ende në kërkim. /Telegrafi/

Drejtoria e Turizmit dhe Zhvillimit Ekonomik në Komunën e Prizrenit ka bërë të ditur se është publikuar lista përfundimtare e përfituesve nga thirrja publike për shfrytëzimin e shtëpizave të drurit, në kuadër të aktivitetit “Dimri Kulturor”, që do të mbahet në “Sheshin e Lidhjes”.

Sipas njoftimit të komunës, lista përfshin aplikuesit që kanë përmbushur kriteret e përcaktuara dhe që do të marrin pjesë në këtë aktivitet, i cili synon promovimin e kulturës, artizanatit dhe zhvillimit ekonomik lokal gjatë sezonit dimëror.

Komuna e Prizrenit njofton se lista e plotë dhe e detajuar e përfituesve është publikuar në uebfaqen zyrtare të institucionit.

Linku i dokumentit këtu. /Telegrafi/

Rreth orës 12:00, në fshatin Nashec të Prizrenit, ka ndodhur një rast i vrasjes në tentativë.

Sipas informacioneve nga Policia e Kosovës, një mashkull kosovar ka mbetur i plagosur nga arma e zjarrit, pasi dyshohet se në drejtim të tij ka shtënë një tjetër mashkull kosovar.

Lidhur me rastin, i dyshuari është arrestuar nga njësitet policore, ndërsa arma e zjarrit një pistoletë e cila dyshohet se është përdorur në rast, së bashku me dy karikatorë, është sekuestruar.

Me vendim të prokurorit të shtetit, i dyshuari është dërguar në mbajtje, ndërsa rasti po hetohet nga autoritetet kompetente./Telegrafi/

Ekipet e mirëmbajtjes së “Eko Regjion-it” kanë vijuar sot punimet për pastrimin e kanalit kullues në lagjen Marash të Prizrenit.

Sipas njoftimit të Komunës, gjatë aksionit janë larguar mbeturinat, balta dhe materialet e grumbulluara, me qëllim parandalimin e bllokimeve dhe përmbytjeve të mundshme, si dhe rikthimin e pamjes së pastër dhe të hijshme në këtë zonë të gjelbër në qendër të qytetit.

Komuna e Prizrenit thekson se këto aksione janë pjesë e përpjekjeve të vazhdueshme për mirëmbajtjen e hapësirave publike dhe sigurimin e një ambienti të pastër dhe të sigurt për qytetarët. /Telegrafi/

Një aksident trafiku me pasojë vdekjen ka ndodhur sot në lagjen Lakuriq të Prizrenit.

Sipas të dhënave fillestare, drejtuesi i një kamioni, duke lëvizur në afërsi të një punishte, nga pakujdesia ka goditur viktimën.

Shërbimet e urgjencës u njoftuan menjëherë dhe mjekët në vendngjarje konstatuan vdekjen e personit të aksidentuar.

Drejtuesi i kamionit është ndaluar nga policia dhe po qëndron në stacionin policor.

Policia e Kosovës, në bashkëpunim me prokurorinë, po ndërmerr të gjitha veprimet e nevojshme ligjore për sqarimin e plotë të rrethanave të ngjarjes.

Hetimet po zhvillohen nga Njësia Rajonale e Komunikacionit Rrugor në Prizren. /Telegrafi/

Ministri i Kulturës, Rinisë dhe Sportit, Hajrulla Çeku, ka vizituar sot Suharekën për të parë nga afër ecurinë e punimeve në stadiumin e ri të qytetit, një investim prej 11 milionë eurosh që pritet t’i sigurojë klubit KF Ballkani kushte të standardeve bashkëkohore dhe mbi 6,500 ulëse për tifozët.

Gjatë vizitës, ministri Çeku inspektoi edhe fushën ndihmëse në Studençan, e cila tashmë ka përfunduar dhe ofron hapësira moderne për klubet lokale dhe sportistët e rinj.

Sipas MKRS-së, punimet në stadiumin e ri po vazhdojnë me dinamikë, ndërsa investimet në infrastrukturën sportive mbeten prioritet i ministrisë, “me synim mbështetjen e sportit, rinisë dhe komunitetit”. /Telegrafi/

KRU “Hidroregjioni Jugor” ka njoftuar se ekipet e Inspektoriatit po vazhdojnë aksionin e shkyçjeve nga rrjeti i ujësjellësit për konsumatorët me borxhe të pashlyera, pavarësisht njoftimeve të mëhershme dhe mundësive të ofruara për pagesë.

Sipas njoftimit, vetëm gjatë ditës së djeshme (10/12/2025) janë realizuar 52 shkyçje për mospagesë, prej tyre 40 në Prizren dhe 12 në njësinë e Suharekës.

Kompania ka paralajmëruar se nuk do të ketë më tolerime për konsumatorët që nuk i përmbushin detyrimet financiare.

“Nuk do të ketë më falje apo tolerim për asnjë konsumator që nuk i përmbush obligimet financiare ndaj kompanisë”, thuhet në njoftim.

KRU “Hidroregjioni Jugor” u ka bërë thirrje të gjithë borxhlinjve që të kryejnë pagesat për të shmangur masat e mëtejshme. /Telegrafi/

Në mbledhjen konstituive të Kuvendit të Komunës së Prizrenit, Kryetari Shaqir Totaj u betua për mandatin e tij të dytë, duke premtuar se do t’i përmbushë detyrat dhe do të ushtrojë kompetencat e tij me nder, besnikëri dhe paanshmëri, me qëllim krijimin e kushteve për një jetë më të qetë dhe më cilësore për të gjithë qytetarët e komunës.

Në fjalën e tij, Totaj falënderoi qytetarët për besimin dhe mbështetjen e dhënë, duke theksuar se angazhimi i tij do të jetë për të gjithë pa dallim, raporton Telegrafi.

“Zotohem se së bashku do ta bëjmë Prizrenin edhe më funksional, edhe më të bukur, ashtu siç e meriton, përmes bashkëpunimit të drejtpërdrejtë me qytetarin”, tha ai.

Në të njëjtën seancë, u betuan edhe asambleistët e rinj, të cilëve Kryetari Totaj u uroi suksese në mandatin e tyre, duke theksuar nevojën për bashkëpunim në proceset që do të përmirësojnë jetën e qytetarëve në të gjithë komunën. /Telegrafi/

KRU “Hidroregjioni Jugor” Sh.A në Prizren ka njoftuar se ekipet inspektuese po vazhdojnë aksionin e gjerë të shkyçjeve nga rrjeti i ujësjellësit për të gjithë konsumatorët që nuk kanë shlyer detyrimet financiare, pavarësisht njoftimeve dhe mundësive të ofruara më herët për pagesë.

Vetëm gjatë ditës së sotme, kompania ka realizuar gjithsej 61 shkyçje:
– 39 në Prizren,
– 14 në njësinë e Suharekës,
– 8 në njësinë e Malishevës.

Në njoftim theksohet se nuk do të ketë më falje apo tolerim për konsumatorët që vazhdojnë të mos e përmbushin obligimin e pagesës së ujit, ndërsa paralajmërohet se aksioni do të vazhdojë në të gjitha zonat operuese.

Kompania ka kërkuar nga qytetarët që t’i kryejnë pagesat me kohë për të shmangur masa të mëtejshme shkyçjeje. /Telegrafi/

Policia e Kosovës ka njoftuar se një person është gjetur pa shenja jete në një lokal në Prizren.

Policia njofton se trupi i pajetë është dërguar për obduksion.

“Prizren 07.12.2025 – NN. Më 08.12.2025 është raportuar se viktima mashkull është gjetur në një lokal pa shenja jete”, thuhet në raport.

Policia tutje njofton se ekipi i urgjencës ka dalë në vendin e ngjarjes dhe ka konstatuar vdekjen e viktimës.

Me urdhër të prokurorit trupi i pajetë është dërguar në IML për obduksion. /Telegrafi/

Policia e Kosovës, stacioni Policor Prizren, përmes Sektorit të Hetimeve, ka shënuar një tjetër sukses kundër veprave penale të vjedhjes.

Sipas një njoftimi për media bëhet e ditur se gjatë një pune intensive hetimore, më datë 08.12.2025, hetuesit policorë kanë arritur të identifikojnë dhe arrestojnë dy persona të dyshuar, meshkuj të moshës së re, të cilët dyshohen për kryerjen e pesë (5) rasteve të vjedhjes në qytetin e Prizrenit.

“Gjatë intervistimit , të dyshuarit kanë pranuar se kanë kryer vjedhjen e pesë trotineteve në pesë lokacione të ndryshme. Lidhur me rastin është njoftuar Prokurori i Shtetit, i cili ka lëshuar aktvendim për ndalimin e tyre për 48 orë, ndërsa hetimet po vazhdojnë për zbardhjen e plotë të rrethanave dhe për procedurat e mëtejshme ligjore”, thuhet në njoftim.

Policia e Kosovës mbetet e përkushtuar në garantimin e sigurisë së qytetarëve dhe mbrojtjen e pronës së tyre. Ky rast është dëshmi e angazhimit të vazhdueshëm të policisë në parandalimin dhe zbardhjen e veprave penale. /Telegrafi/

Komuna e Prizrenit ka njoftuar se ka filluar punimet për rehabilitimin dhe rivitalizimin e “Kejit” në zonën e Shadërvanit, një prej hapësirave më të frekuentuara të qytetit dhe pjesë e rëndësishme e shëtitores përgjatë Lumbardhit.

Sipas njoftimit komunal, intervenimi ishte i domosdoshëm për shkak të degradimit të sipërfaqeve dhe nevojës për përmirësimin e sigurisë, funksionalitetit dhe pamjes së këtij segmenti të rëndësishëm urban.

Projekti synon rikthimin e estetikës dhe gjallërisë në këtë zonë, e cila mbetet një prej pikave më atraktive për qytetarët dhe vizitorët, përcjell Telegrafi.

Punimet pritet të përfshijnë sanimin e infrastrukturës ekzistuese, rregullimin e hapësirave për këmbësorë dhe shtimin e elementeve që kontribuojnë në përmirësimin e përvojës publike në qendër të Prizrenit.

Komuna ka paralajmëruar se ndërhyrjet do të zhvillohen me kujdes të shtuar për të ruajtur karakterin kulturor e historik të Shadërvanit, ndërsa qytetarët janë ftuar për mirëkuptim gjatë kohës së zhvillimit të punimeve. /Telegrafi/

Partia Guxo në Prizren ka njoftuar sot se në zgjedhjet e jashtëzakonshme të 28 dhjetorit do të garojë në listë të përbashkët me Lëvizjen Vetëvendosje, duke përfaqësuar degën me dy kandidatë.

Dy emrat e propozuar janë figura të njohura në skenën politike dhe institucionale:

Dr. Haxhi Avdyli, ish-deputet me katër mandate në Kuvendin e Kosovës

Dr. Arsim Berisha, zëvendësministër aktual i Shëndetësisë

Partia Guxo tha se këta kandidatë përfaqësojnë përvojë të konsoliduar dhe angazhim të vazhdueshëm në shërbim të qytetarëve, duke besuar se do të jenë kontribuues të çmuar në listën e përbashkët./Telegrafi/

Lidhja Demokratike e Kosovës – Dega në Prizren, të premten ka prezantuar listën e kandidatëve për deputetë.

Nga kjo degë janë propozuar

Driton Selmanaj

Anton Quni

Hyre Tejeci

Xhavit Ukaj

Shaban Osmanaj

Fadil Kryeziu

“Prizreni gjithmonë ka dhënë njerëz të urtë, të përgjegjshëm dhe të vendosur, dhe edhe këtë herë kemi listën që na nderon”, thuhet në reagim.

LDK-ja u ka kërkuar qytetarëve mbështetjen për të çuar përpara punët që vlerësohen si të mira dhe për të forcuar besimin në institucionet vendore dhe qendrore.

PRISHTINË, 5 dhjetor /ATSH/ Stadiumi “Përparim Thaçi” në Prizren ka hyrë në fazën e transformimit të plotë, pasi u nënshkrua kontrata për investimin prej mbi 12 milionë eurosh, ndërsa punët përgatitore tashmë kanë nisur.

Kryeministri në detyrë i Republikës së Kosovës, Albin Kurti, njoftoi se projekti parashikon zgjerimin e tribunave ekzistuese lindje dhe perëndim me tribuna të reja në veri dhe jug, duke e shndërruar objektin në një ndër arenat më moderne sportive në vend.

Sipas njoftimit të tij, stadiumi i rinovuar do të ketë kapacitet prej afro 7800 ulësesh, duke krijuar kushte më të mira për tifozët besnikë dhe adhuruesit e shumtë të futbollit, të cilët do të mund të mbështesin KF Lirinë në një ambient bashkëkohor dhe të sigurt. Ky projekt është pjesë e investimeve të mëdha të qeverisë në infrastrukturën sportive, ku në total janë duke u dedikuar mbi 200 milionë euro për stadiume të futbollit në gjithë territorin e Republikës.

Kurti theksoi se këto investime synojnë ta vendosin Kosovën në krye të rajonit për nga infrastruktura sportive, duke krijuar kushte më të mira për klubet, sportistët dhe tifozët, si dhe duke e ngritur nivelin e zhvillimit të futbollit vendas. Stadiumi i Prizrenit pritet të shndërrohet në një pikë të rëndësishme sportive për qytetin dhe për vendin.

/KosovaPress/

The post Nis transformimi 12 milionë euro i stadiumit “Përparim Thaçi” në Prizren appeared first on Agjencia Telegrafike Shqiptare.