Barcelona i ka ngushtuar opsionet për zëvendësimin e Robert Lewandowskit në vetëm dy lojtarë.

Kontrata aktuale e Lewandowskit me Barcelonën skadon në fund të sezonit aktual dhe klubi katalanas nuk pritet ta zgjasë qëndrimin e sulmuesit 37-vjeçar në “Spotify Camp Nou”. Për pasojë, gjigantët spanjollë pritet të hyjnë në treg gjatë verës për të siguruar një sulmues të ri.

Edhe pse ka zëra brenda klubit që dëshirojnë ruajtjen e shërbimeve të Lewandowskit, i cili ka shënuar nëntë gola në 812 minuta lojë këtë sezon, gjasat janë që ylli polak të largohet nga Barcelona me përfundimin e kontratës së tij më vonë këtë vit.

Sipas ESPN, drejtuesit e Barcelonës kanë identifikuar dy objektiva kryesorë për të trashëguar fanellën me numrin nëntë pas largimit të ish-sulmuesit të Bayern Munichut dhe Borussia Dortmundit.

Presidenti aktual i klubit, Joan Laporta, i cili është kandidat për rizgjedhje në muajin mars, thuhet se “vazhdon të ëndërrojë” transferimin e Julian Alvarez gjatë verës.

Argjentinasi është lidhur prej kohësh me Barcelonën, por një marrëveshje për sulmuesin e Atletico Madridit pritet të jetë shumë e ndërlikuar, pasi klubi madrilen ka gjasa të kërkojë mbi 100 milionë euro për kartonin e tij.

Megjithatë, 25-vjeçari nuk ka bindur plotësisht këtë sezon me Atleticon, duke shënuar vetëm shtatë gola në La Liga.

Ndërkohë, drejtori sportiv Deco po shqyrton alternativa më ekonomike, me sulmuesin e Juventusit, Dusan Vlahovic, që po shfaqet si një kandidat i fortë për të marrë rolin e Lewandowskit.

Reprezentuesi serb pritej të largohej nga Juventusi gjatë afatit të janarit, por një dëmtim në muajin nëntor e ka mbajtur jashtë fushave deri në mars.

Vlahovic kishte qenë i lidhur me Barcelonën që në vitin 2022, përpara se të largohej nga Fiorentina drejt Juventusit.

Kontrata e tij aktuale skadon në fund të sezonit, çka i jep mundësinë 25-vjeçarit të nënshkruajë një parakontratë me klube jashtë Italisë./Telegrafi/

Presidenti i Barcelonës, Joan Laporta, ka shprehur hapur pakënaqësinë e tij për “situatën e pakëndshme” të krijuar pas vendimit të Dro Fernandez për të shtyrë drejt një transferimi te Paris Saint-Germain, duke dhënë një pasqyrë të ashpër të gjithë çështjes.

Dro Fernandez ka kaluar brenda një kohe shumë të shkurtër nga i përkëdhelur në figurë polemike në “Camp Nou”. Pas paraqitjeve premtuese gjatë turneut parasezonal të verës, ku ra në sy të trajnerit Hansi Flick, adoleshenti më pas u përball edhe me kritika publike nga tekniku gjerman.

Flick madje u detyrua ta përdorte Marcus Rashfordin si shembull të dëshirës dhe përkushtimit që, sipas tij, duhet ta ketë çdo lojtar për të përfaqësuar Barcelonën.

Reprezentuesi i Spanjës U-18 i mbushi 18 vjeç vetëm në janar, çka nënkuptonte se ai ishte ende nën kontratë akademie kur u hap afati kalimtar dimëror. Siç zbuloi Laporta, Barcelona kishte planifikuar të arrinte një marrëveshje të re me Fernandez, e cila do të përfshinte edhe një rritje të ndjeshme të klauzolës së lirimit.

Megjithatë, klauzola prej 6 milionë eurosh mbeti e pandryshuar sapo u bë e qartë se lojtari ishte i vendosur të kërkonte një aventurë të re. Pesë paraqitje me ekipin e parë gjatë pesë muajve të parë të sezonit, përfshirë edhe një start në Ligën e Kampionëve, nuk e kishin kënaqur oreksin e tij për minuta.

“Ai na ka njoftuar se nuk do të vazhdojë. Është një situatë e pakëndshme”.

“Do të përpiqemi ta rregullojmë situatën në mënyrën se si ishte menduar fillimisht. Ishte një surprizë. Ne kishim rënë dakord për një zgjidhje tjetër për Dron kur ai të mbushte 18 vjeç dhe, papritur, agjenti i tij na tha se nuk mund ta respektonim marrëveshjen”.

“Do të mundohemi që gjithçka të përfundojë në mënyrën më të mirë të mundshme për interesat e Barçës”, ka deklaruar Laporta për “Catalunya Radio”.

Tërheqja e PSG-së është e qartë. Përveç faktit se janë kampionë në fuqi të Evropës, parizienët drejtohen nga Luis Enrique, një trajner që ka vlerësim të madh për talentet e reja, veçanërisht ato katalanase, nga koha e tij në krye të Barcelonës.

Megjithatë, mbetet për t’u parë se sa minuta do të gjejë Fernandez në një skuadër ku konkurrenca është e ashpër, me emra si Khvicha Kvaratskhelia, Desire Doue dhe Bradley Barcola./Telegrafi

Presidenti i Barcelonës, Joan Laporta, ka mohuar kategorikisht çdo përfshirje në një skemë të dyshuar mashtrimi me vlerë rreth 100 mijë euro, e cila aktualisht është nën hetim nga Gjykata e Instruksionit nr. 22 në Barcelonë.

Çështja nuk ka asnjë lidhje me FC Barcelonën dhe lidhet me pretendimet se Laporta ka mashtruar një grua përmes investimeve të lidhura me kompanitë Core Store dhe CSSB Limited.

Në një deklaratë publike, duke reaguar ndaj raportimeve për paraqitjen e tij në gjykatë më 16 janar 2026, Laporta ka sqaruar qartë qëndrimin e tij, duke renditur disa pika kryesore për të hedhur poshtë akuzat.

“Unë nuk kam marrë pjesë në nënshkrimin e asnjë kontrate të lidhur me mashtrimin e pretenduar dhe nuk e njoh fare ankuesen”.

“Nuk jam dhe nuk kam qenë kurrë përfaqësues apo agjent i CSSB Ltd., dhe për këtë arsye nuk kam nënshkruar asnjë kontratë dhe nuk kam marrë fonde në emër të kësaj kompanie”.

Sa i përket një dokumenti të përmendur nga avokati i paditëses, Laporta ka sqaruar se firma e tij figuron vetëm në cilësinë e dëshmitarit, në përputhje me praktikën standarde në juridiksionin përkatës.

“Firma ime shfaqet vetëm si dëshmitar, siç është praktikë normale ligjore, dhe jo si palë kontraktuese”.

“Jam plotësisht i bindur se hetimi do të vërtetojë se nuk kam luajtur asnjë rol në këtë çështje, aq më tepër që në fazën fillestare ankesa nuk u pranua për shqyrtim”.

Në fund, Laporta ka bërë të ditur se rezervon të drejtën për të ndërmarrë veprime ligjore ndaj mediave që, sipas tij, kanë publikuar informacione të njëanshme ose të pasakta, të cilat dëmtojnë imazhin dhe reputacionin e tij personal dhe profesional./Telegrafi

Barcelona ka vendosur të refuzojë një ofertë të jashtëzakonshme prej 120 milionë eurosh për sulmuesin brazilian Raphinha, duke konfirmuar se lojtari nuk është në shitje.

Oferta erdhi nga klubi arab Neom SC, që përfshinte 100 milionë euro fiks dhe 20 milionë në variabla, por drejtuesit katalanas vendosën që projekti sportiv të ketë prioritet mbi çdo përfitim financiar.

Presidenti Joan Laporta ka qenë i qartë në komunikimin e vendimit, duke theksuar se Raphinha është një pjesë kyçe e ekipit dhe prishja e stabilitetit do të ishte e dëmshme për projektin e trajnerit Hansi Flick.

Klubi e sheh lojtarin si një element thelbësor jo vetëm për golat, por edhe për lidershipin, përkushtimin dhe ndikimin në dhomën e zhveshjes.

Edhe vetë Raphinha ndjehet i kënaqur dhe i vlerësuar në Barcelonë.

Mbrojtja e vendimit të klubit mbështetet gjithashtu në dëshirën e lojtarit për të qëndruar dhe për të vazhduar të japë kontributin e tij maksimal nën drejtimin e Flick.

Në moshën 29-vjeçare, braziliani po kalon një nga periudhat më të mira të karrierës së tij.

Neom synonte të bënte Raphinha figurën kryesore të projektit të tyre ambicioz sportiv, por përpjekja e tyre nuk pati sukses.

Barcelona ka vendosur të mos hyjë në negociata, duke dhënë një mesazh të qartë për tregun: lojtarët kyç nuk janë në shitje, pavarësisht nga ofertat e jashtëzakonshme.

Ky vendim forcon projektin e Barcelonës dhe sinjalizon një qasje të re: klubi nuk është i gatshëm të shesë referentët për të përmirësuar bilancin financiar, por do të mbajë stabilitetin sportiv.

Raphinha mbetet një pjesë thelbësore e projektit të klubit dhe e trajnerit Hansi Flick. /Telegrafi/

Trajneri gjerman Hansi Flick ka humbur besimin te Ronald Araujo dhe ka kërkuar që klubi të shqyrtojë largimin e tij në afatin kalimtar të ardhshëm.

Sipas stafit teknik, qendërmbrojtësi uruguaian nuk ka arritur nivelin e pritur pas rikthimit në fushë, ndërsa mungesat e shpeshta dhe pasiguria në lojë kanë ndikuar negativisht në vlerësimin e tij.

Edhe pse presidenti Joan Laporta ishte i prirur të tregonte durim, qëndrimi i Flick dhe i drejtorit sportiv Deco është i prerë.

Brenda klubit konsiderohet se cikli i Araujos ka përfunduar dhe se largimi i tij është i nevojshëm për të liruar hapësirë financiare dhe për të rindërtuar repartin defensiv me profile më të besueshme.

Performancat e fundit të uruguaianit, veçanërisht në ndeshjet e rëndësishme si finalja e Superkupës ndaj Real Madridit, kanë forcuar dyshimet e trajnerit.

Flick vlerëson se lojtari nuk arriti të marrë rolin e liderit në mungesë të Inigo Martinez dhe nuk ofroi sigurinë e kërkuar në momente vendimtare.

Nga ana ekonomike, vlera e tregut e Araujos ka pësuar rënie të ndjeshme dhe një transferim i mundshëm vlerësohet rreth 25–30 milionë euro.

Deco beson se mbajtja e tij vetëm sa do të ulte më tej këtë vlerë, ndaj klubi është i hapur për oferta konkrete në verë.

Ndërkohë, Barcelona ka nisur kërkimet për një qendërmbrojtës modern, të shpejtë dhe me dalje të mirë të topit, në përputhje me kërkesat e Flick.

Largimi i Araujos shihet si hapi i parë i një ristrukturimi më të gjerë, me synimin për ta bërë skuadrën më konkurruese në arenën evropiane. /Telegrafi/

Presidenti i Barcelonës Joan Laporta, dhe legjenda e klubit, Deco, kanë pasur prej muajsh në shënjestër mesfushorin portugez Bernardo Silva, dhe tashmë duket se mund ta konkretizojnë transferimin.

Silva pritet të jetë përforcimi i parë i blaugranave për sezonin e ardhshëm, duke ardhur me statusin e lojtarit të lirë, pasi kontrata e tij me Manchester City përfundon në fund të sezonit.

Klubi katalanas po tenton të arrijë një marrëveshje në këtë afat kalimtar dimri, për të siguruar shërbimet e Silvës pa shpenzime të mëdha për transferimin.

Drejtuesit e klubit besojnë se momenti është i favorshëm: mesfushori nuk ka rinovuar kontratën, afati i kampionatit po afron dhe vullneti i lojtarit mund të jetë faktori vendimtar.

Laporta dhe Deco e kanë pasur Silvën në listën e objektivave prioritare për disa afate kalimtare, por më parë kushtet nuk kanë qenë të favorshme.

Tani situata ka ndryshuar: Man City është i vetëdijshëm se mund ta humbasë lojtarin pa përfituar asgjë, dhe Barcelona kërkon të parandalojë konkurrencën nga klubet e tjera evropiane.

Silva përputhet me profilin që kërkon stafi teknik: cilësi, përvojë në nivel të lartë dhe një kuptim të thellë të lojës, të përshtatshëm për La Ligën.

Klubi anglez nuk dëshiron të humbasë lojtarin falas, por nuk mund ta detyrojë atë të rinovojë kundër dëshirës së tij.

Për këtë arsye, Barcelona po eksploron një qasje të kujdesshme, duke tentuar të sigurojë marrëveshjen përpara verës dhe të ofrojë një destinacion tërheqës dhe konkurrues për Silvën.

Për blaugranat, ky transferim përfaqëson një mundësi strategjike.

Transferimi i Silvës falas do të forconte ekipin pa rrezikuar buxhetin, do të rrisë menjëherë konkurrencën në fushë dhe do të sjellë udhëheqje në një skuadër të re dhe ambicioze.

Bernardo Silva mund të vendosë fatin e tij para përfundimit të sezonit, dhe Barcelona synon të përfitojë nga kjo mundësi.

Nëse negociatat ecin sipas parashikimeve, portugezi mund të bëhet emri më i shquar i afatit kalimtar të ardhshëm, edhe përpara përfundimit të dimrit. /Telegrafi/

Tension pas “El Clasico”. Laporta dënon largimin e Mbappé,  ndërsa Fermin dhe Cubarsí bëshen çështje me gjestet dhe fyerjet ndaj tifozëve madrilenë.

Finalja e Superkupës së Spanjës u mbyll me fitoren 3-2 të Barcelonës. Kjo ndeshje do të mbahet mend jo vetëm për spektaklin që prodhuan dy skuadrat në fushë, por edhe për “helmin” e lojtarëve kundër kundërshtarëve pas vërshëllimës së trefishtë. Situata degjeneroi në sjellë antisportive nga të dy frontet.

Kur Barcelona po festonte me trofeun, telekamerat fiksuan anën e errët të euforisë katalanase, duke shkaktuar indinjatë të thellë te tifozët e Realit. Protagonist negativ ishte Fermin Lopez, që u pa të fyente rëndë sektorin e tifozëve madrilenë. I përqafuar me shokët Lamine Yamal e Casadó, ai lëshoi me zë të lartë frazat: “Merreni këtë! Thitheni…, shkoni në shtëpi!”.

Fermin nuk ishte i vetmi që humbi kontrollin te Barcelona. Sapo u mbyll ndeshja, në përqafimin kolektiv të skuadrës në fushë, kamerat kapën mbrojtësin Pau Cubarsí. Ai ishte i ndarë nga grupi dhe u pa të bënte disa herë “gjestin e ombrellës” drejt tribunës kundërshtare.

Në kampin e Realit ngjalli diskutime sjellja e Kylian Mbappé. Frustrimi i tij shpërtheu gjatë ceremonisë së dhënies së trofeut. Sapo mori medaljen e argjentit, francezi u pa qartë që t’u kërkonte shokëve të skuadrës të largoheshin nga stadiumi për të mos marrë pjesë te festimet e rivalëve.

Ky episod nuk i shpëtoi presidentit të Barcelonës, Joan Laporta, i cili e dënoi veprimin e sulmuesit të Real Madrid. “Më ka befasuar ajo që ka bërë Mbappé. Në sport duhet të jesh korrekt në fitore dhe të kesh respekt në humbje. Ne, kur kemi fituar, e kemi respektuar kundërshtarin. Nuk e kuptoj atë sjellje. Reagimi i tyre lind nga frustrimi i pastër i të parit të realitetit”, – tha Laporta.

The post “Helm” pas Barcelona-Real Madrid, gjeste dhe ofendime mes rivalëve të përjetshëm appeared first on Albeu.com.

Presidenti i FC Barcelona po përballet me telashe të reja ligjore. Një gjykatë në Barcelonë e ka thirrur atë të paraqitet si i pandehur në një rast të dyshuar mashtrimi.

Gjykata Hetimore numër 22 në Barcelonë ka thirrur Joan Laportën në gjykatë më 16 janar. Çështja lidhet me një mashtrim të dyshuar të rënduar, me vlerë afër 100 mijë euro.

Së bashku me Laportën, si të pandehur janë thirrur edhe nënkryetari Rafael Yuste, ekonomisti Xavier Sala i Martin dhe ish-drejtori i TV3, Joan Oliver.

Sipas një urdhri gjykate të siguruar nga El Periodico de Catalunya (përmes SPORT), mashtrimi i dyshuar ka të bëjë me dy kompani të lidhura me personat e akuzuar.

Investimet, sipas raportimeve, ishin ofruar me premtimin për një kthim prej gjashtë për qind. Çështja është rihapur pasi Gjykata Provinciale e Barcelonës urdhëroi që padia të hetohej në detaje.

Viktima në këtë rast ka arritur të rikuperojë vetëm 12,500 euro nga shuma fillestare e investuar. Kjo është tashmë çështja e tretë e hapur në të cilën Laporta po hetohet për mashtrim të dyshuar.

Të gjitha rastet janë të lidhura me kompanitë Core Store dhe CSSB Limited. Disa investitorë raportohet se u kanë dhënë para këtyre kompanive në këmbim të kthimeve të larta vjetore, por nuk kanë marrë as fitimet e premtuara dhe as shumën fillestare të investimit.

Procedurat e fundit burojnë nga një padi e ngritur pasi u transmetua një dokumentar mbi rastin e Reusit. Viktima kontaktoi avokatin Pepe Oriola pasi identifikoi ngjashmëri me përvojën e saj personale.

Dokumentet e gjykatës theksojnë se investimet ishin promovuar duke përdorur reputacionin publik të personave të përfshirë, çka luajti një rol kyç në bindjen e viktimës për të investuar.

Gruaja investoi 50 mijë euro në Core Store dhe më pas 54 mijë dollarë në CSSB Limited. Ajo pretendon se kërkesat e saj të vazhdueshme për informacion dhe përditësime janë përballur me përgjigje shmangëse.

Deri më tani, nuk është kryer asnjë pagesë tjetër dhe hetimet për këtë çështje mbeten ende në vazhdim./Telegrafi

Presidenti i Barcelonës, Joan Laporta është pyetur se kur klubi katalunas do të bëjë transferime të mëdha financiare, gjatë pjesëmarrjes së tij në Globe Soccer Awards.

Laporta praktikisht e ka përjashtuar mundësinë e afrimeve të bujshme, duke vënë theksin te filozofia e klubit dhe zhvillimi i talenteve nga akademia La Masia.

“Ne po punojmë për të prodhuar lojtarë nga La Masia dhe kemi shumë talente që janë të aftë të arrijnë ekipin e parë”.

“Jemi krenarë për filozofinë sipas së cilës punojmë. Në fakt, ka lojtarë nga La Masia që arrijnë ekipin e parë dhe, në të njëjtën kohë, ne duam edhe të transferojmë lojtarë të tjerë dhe t’i integrojmë së bashku”.

Laporta ka theksuar se projekti i Barcelonës nuk kufizohet vetëm te ekipi i meshkujve, duke përmendur edhe suksesin dhe rëndësinë e futbollit të femrave në klub.

“Ne kemi edhe ekipe të tjera, jo vetëm ekipin e futbollit të meshkujve; kemi edhe ekipin e futbollit të femrave. Jam shumë i lumtur për këtë, sepse këtu është një lojtare që përfaqëson futbollin e femrave”.

Me këto deklarata, Laporta ka bërë të qartë se Barcelona do të vazhdojë të mbështetet kryesisht te La Masia dhe zhvillimi i brendshëm, duke lënë në plan të dytë transferimet e mëdha me shifra të larta./Telegrafi

Presidenti i Barcelonës, Joan Laporta ka thënë se është gati të përmirësojë marrëdhëniet me yllin e Inter Miamit, Lionel Messi, duke theksuar se legjenda argjentinase meriton një nderim të madh dhe një statujë në Camp Nou.

Laporta ka rikujtuar lidhjen e veçantë mes Messit dhe Barcelonës, duke theksuar se ai nënshkroi kontratën e parë të argjentinasit kur ishte vetëm 16 vjeç.

Presidenti i Blaugranave vlerësoi Messin si një nga kapitujt më të lavdishëm në historinë e klubit, duke thënë se ai meriton nderim të plotë, madje edhe një statujë.

Laporta shtoi se është i gatshëm të rregullojë çdo gjë nga ana e Barcelonës, duke shprehur shpresën që një ditë rrugët e tyre të kryqëzohen sërish.

“Unë nënshkrova kontratën e parë të Messit kur ai ishte 16 vjeç. Ajo që jetuam me të është një nga momentet më të lavdishme në historinë e Barcelonës, nëse jo më i madhi. Ai meriton një nderim, një statujë, njohje të plotë”, ka thënë fillimisht Laporta.

“Varet edhe nga pala tjetër. Jam i gatshëm të rregulloj çdo gjë. Messi i ka dhënë shumë Barcelonës, dhe Barça i ka dhënë shumë atij. Shpresoj të takohemi përsëri një ditë”.

Laporta në fund ka folur edhe [ër largimin kontrovers të Messit në vitin 2021.

"Tema e Messit më trishton. Unë jam tifoz i Barcelonës, por mbi gjithçka është institucioni. Nëse do të isha anëtar, do ta kuptoja atë që bëri presidenti për të mirën e klubit”, përfundoi presidenti i Barçës. /Telegrafi/

Duke folur në darkën e Krishtlindjeve të Barcelonës, presidenti Joan Laporta i ka dhënë një paralajmërim të prerë Real Madridit dhe presidentit të tyre Florentino Perez pas akuzave të tyre të fundit kundër klubit katalanas në lidhje me skandalin Negreira.

Rasti Negreira është duke shkuar drejt fundit tashmë pasi janë duke u mbajtur seancat e fundit gjyqësore para vendimit, por akuzat e Real Madridit drejt Barcelonës nuk janë ndalur, duke bërë drejtuesit katalunas të reagojnë.

“Ne të gjithë e dimë se në çdo veprim sportiv, shoqëror, institucional dhe madje edhe ekonomik, ne lëmë gjurmën tonë, si një klub i respektuar, i njohur, i admiruar dhe i dashur”, ka thënë fillimisht Laporta.

Joan Laporta i kundërpërgjigjet ashpër Perezit pas sulmeve mbi rastin ‘Negreira’

“Gjithashtu duhet të them se kjo staturë që kemi gjeneron një zili që nuk pritet mirë nga ata që, përmes taktikave të fshehta, shpërfillin të gjitha kodet e sjelljes, si etike ashtu edhe morale, dhe jo vetëm në sport, dua të them në përgjithësi”.

“Mendoj se e dini se kujt po i referohem, ata që janë arkitektët e fushatave të vazhdueshme për të diskredituar stemën dhe thelbin tonë, dhe ne nuk do ta lejojmë këtë".

“Këta janë ata që e ngatërrojnë pushtetin me despotizmin, jo me despotizmin e iluminuar, këta janë ata që praktikojnë cinizëm dhe arrogancë të tepruar, këta janë ata që kanë një monstruozitet televiziv që vetëm vjell gënjeshtra dhe helmon vazhdimisht dhe përgjithmonë ajrin”.

Barcelona mund të përjashtohet nga Liga e Kampionëve shkaku i skandalit Negreira

“Këtyre njerëzve, u them se Barça është përsëri e fortë, si në fushë ashtu edhe jashtë saj, dhe ndërsa ata shkatërrojnë dhe përpiqen të fshijnë ose shtrembërojnë historinë, nuk do të kenë sukses”.

“Ne po ndërtojmë, dhe po ndërtojmë një skenë të shkëlqyer në historinë e Barcelonës që do të arrijë përsëri lavdinë dhe do të bëjë histori, dhe kjo është falë jush, në thelb", përfundoi presidenti i Barcelonës. /Telegrafi/

Pasi presidenti i Real Madridit, Florentino Perez, shfrytëzoi mesazhin e tij të Krishtlindjes për ta rikthyer vëmendjen te çështja Negreira dhe Barcelona, homologu i tij Joan Laporta ka pritur më pak se 24 orë për t’u kundërpërgjigjur.

Vetë Laporta ishte të premten në gjykatë për të dhënë dëshminë e tij, teksa gjigantët katalanas po përballen me akuza për korrupsion.

Dëshmia e Laportës u publikua të martën dhe u zbulua se ai kishte deklaruar se nuk ishte takuar kurrë me Jose Maria Enriquez Negreira, ish-nënkryetarin e CTA-së dhe personin për të cilin Barcelona akuzohet se ka tentuar të ushtrojë ndikim.

Perez e kishte cilësuar këtë si “skandalin më të madh në historinë e futbollit” dhe kishte kërkuar ndëshkim.

Duke folur me rastin e mbërritjes në Guadalajara përpara përballjes së Barcelonës në Kupën e Mbretit, Laporta iu përgjigj Perezit.

“Obsesioni ‘barcelonist’ po përkeqësohet dhe shoh se ka zënë rrënjë në zemrat e tifozëve të Madridit. Asgjë më shumë për të thënë”.

“Ne nuk kemi asgjë më shumë për të shtuar; kemi ardhur këtu për të luajtur futboll dhe për të dhënë një shfaqje të bukur”, ka deklaruar Laporta për Sport.

Kreu i Barcelonës ia atribuoi komentet e Perezit vështirësive aktuale të ‘Los Blancos’.

“Gjërat po na shkojnë mirë sepse ata janë më të shqetësuar për ne sesa duhet. Ata vazhdojnë ta zvarrisin çështjen Negreira për të justifikuar diçka që nuk po u funksionon”.

Laporta vuri gjithashtu në dukje një fakt që është përmendur nga shumëkush në Spanjë: qasja e Real Madridit ndaj çështjes Negreira ka ndryshuar që nga momenti kur Barcelona u tërhoq nga projekti i Superligës, i cili i bashkonte dy gjigantët e El Clasicos.

Gjatë fjalimit të tij në Asamblenë e Përgjithshme në vitin 2024, Perez e kaloi lehtë çështjen Negreira, duke theksuar se “klube si Real Madridi dhe Barcelona duhet ta ndihmojnë njëri-tjetrin”./Telegrafi/

Presidenti i Barcelonës, Joan Laporta, u paraqit sot në gjykatë për të dëshmuar në çështjen e shumëpërfolur Negreira, skandal që ka ngritur akuza ndaj klubit katalanas për korrupsion dhe pagesa të dyshimta ndaj Jose Maria Enriquez Negreira, ish-nënkryetar i Komitetit Teknik të Gjyqtarëve.

Gjatë dëshmisë së tij, Laporta mohoi kategorikisht çdo lidhje me Negreiran apo rrethin e tij të ngushtë.

“Në fakt, unë nuk e njoh as Negreiran dhe as këdo nga rrethi i tij. Nuk kam pasur kurrë asnjë lloj marrëdhënieje me ta. Ne kemi paguar për raporte, në asnjë rast për të favorizuar Barcelonën. Nuk kishim nevojë për favore”, ka thënë Laporta.

Ai shtoi se pagesat ishin trashëguar nga administrata e mëparshme dhe se bazoheshin në këshillën e drejtuesve sportivë të klubit.

“I trashëguam ato pagesa. Pyeta drejtuesit sportivë dhe ata na thanë të vazhdonim me raportet. Raportet e fazës së parë nuk i kemi sepse çdo pesë vjet asgjësohen. Kostoja e tyre nuk kishte pse të kalonte në kontrollin e bordit, ishte çështje shume”, deklaroi më tej ai.

Edhe ish-trajnerët e Barcelonës, Luis Enrique dhe Ernesto Valverde, dëshmuan përmes lidhjes me video, duke mohuar se kanë qenë të informuar apo të përfshirë në ndonjë marrëdhënie me Negreiran.

“Nuk kemi qenë të vetëdijshëm për raportet e arbitrimit nga Negreira”, kanë thënë ish-drejtuesit e stolit katalanas.

Dëshmitë pritet të kenë peshë të madhe në vijimin e procesit gjyqësor, i cili ka tronditur futbollin spanjoll dhe po ndiqet nga afër nga opinioni publik. /Telegrafi/

Mbrojtësi i Barcelonës, Ronald Araujo, mund të mos luajë më kurrë për klubin për shkak të problemeve të tij mendore.

Sipas raportimeve të COPE, Araujo është prekur thellë nga çështja emocionale me të cilën po përballet pas kartonit të kuq në ndeshjen kundër Chelseat.

Thuhet se problemi i tij është më serioz se sa ishte parashikuar fillimisht, dhe ai mund të mos luajë më kurrë për të shmangur një kolaps të plotë emocional.

Presidenti i Barcelonës, Joan Laporta, ka kërkuar mbështetje për Araujon, ndërsa futbollisti po përballet me abuzime nga tifozët pas gabimeve që i kushtuan ekipit tre gola dhe humbjen e tre pikëve ndaj Chelseat.

Trajneri Hansi Flick e ka lënë Araujon jashtë listës së ndeshjes për dy takime radhazi që nga ajo ndeshje. /Telegrafi/

Presidenti i Barcelonës, Joan Laporta, ka dhënë një përditësim të ri mbi fazën e tretë të rikthimit në Spotify Camp Nou, duke konfirmuar se klubi është pranë marrjes së licencës së radhës që do të lejojë rritjen e kapacitetit të stadiumit.

Aktualisht, blaugranat janë në gjendje të hapin vetëm disa sektorë, duke mbajtur kapacitet prej pak më shumë se 45 mijë tifozësh.

Plani i klubit është që gjatë këtij sezoni të hapet seksioni final i dy unazave të poshtme, duke e çuar kapacitetin në 62 mijë vende, shifra maksimale që do të arrihet për këtë sezon.

Ndërkohë, ndërtimi i unazës së tretë pritet të nisë për sezonin e ardhshëm, me objektivin që stadiumi i rinovuar të arrijë kapacitetin përfundimtar prej 105 mijë vendesh.

I ftuar në një event të organizuar nga La Vanguardia, Laporta deklaroi për Mundo Deportivo se brenda një muaji pritet të merret licenca 1C nga Bashkia e Barcelonës, e cila do të lejojë shtimin e edhe 17 mijë tifozëve të tjerë.

“Spotify Camp Nou është një ëndërr kolektive që po bëhet realitet. Punimet po ecin mirë dhe marrëdhënia me Bashkinë është e shkëlqyer. Nëse gjithçka shkon sipas planit, në fund të dhjetorit ose fillim të janarit do të kemi gati tribunun Veriore (1C) dhe sektorin e tifozëve ultras”, ka thënë Laporta.

Nëse afatet përmbushen, ndeshja e parë me kapacitet të rritur pritet të jetë ndaj Real Oviedo më 25 janar.

Për shkak të Kupës së Mbretit dhe Superkupës së Spanjës, Barcelona do të zhvillojë gjashtë ose shtatë ndeshje radhazi në transfertë gjatë dhjetorit dhe janarit.

Laporta njoftoi gjithashtu synimin e klubit për të rritur përqindjen e anëtarëve me abonime sezonale.

“Aktualisht raporti është 60% abonentë dhe 40% bileta të lira. Kur të arrijmë në 62 mijë vende, synojmë ta çojmë raportin në 70-30. Ka pasur herë kur afatet nuk janë përmbushur për shkak të kërkesave teknike dhe të sigurisë”.

Masat speciale për ndeshjen me Eintracht Frankfurt

Laporta foli edhe për vendimin e klubit që për sfidën e Ligës së Kampionëve ndaj Eintracht Frankfurt të shiten vetëm bileta ekskluzivisht për anëtarët.

“Kemi një histori shumë negative me këtë klub. Në ndeshjen e fundit stadiumi u pushtua nga tifozët e tyre. Kemi marrë masa të forta që një situatë e tillë të mos përsëritet. Me QR-kodet e reja dhe duke kufizuar shitjen vetëm te anëtarët, jemi të sigurt se stadiumi nuk do të mbushet me gjermanë”, përfundoi Laporta. /Telegrafi/

Presidenti i Barcelonës, Joan Laporta, ka folur për akuzat e vazhdueshme për “rastin Negreira”, ku akuzohen për dhënie të ryshfetit ndaj gjyqtarëve.

Në vitin 2023, Barcelona dhe drejtuesit e saj u akuzuan për korrupsion në lidhje me pagesat ndaj Jose Maria Enriquez Negreira, ish-nënkryetar i Komitetit Teknik të Gjyqtarëve (CTA) në Federatën Mbretërore Spanjolle të Futbollit (RFEF).

Gjykata i ka klasifikuar transfertat multi-milionëshe nga Barcelona te Negreira midis viteve 2001 dhe 2018 si vepra penale. Dëshmi kanë dhënë disa figura kyçe, përfshirë Javier Enriquez, djalin e Negreirës, dhe ish-presidentët Sandro Rosell dhe Josep Bartomeu.

Skandali i ryshfetit te gjyqtarët: Real Madridi kërkon ta çojë Barcelonën deri në fund

“Ky rast do të vazhdojë derisa gjyqtari të vendosë ndryshe. Ne jemi plotësisht të përfshirë dhe të gjitha vendimet deri më sot tregojnë se Barça nuk i ka korruptuar gjyqtarët dhe as nuk ka vepruar në mënyrë të papërshtatshme”, ka thënë fillimisht Laporta.

“Pretendimet e tjera private nuk ofrojnë prova bindëse. Nëse dalin në dritë fakte të reja, procedurat do të vazhdojnë. Kjo e ka vonuar vendimin përfundimtar të gjyqtarit”.

“Ne u gjykuam fajtorë para se të fillonte gjyqi. Jam i bindur se Barcelona përfundimisht do të lirohet nga akuzat. Disa palë janë të motivuara ta mbajnë çështjen gjallë”.

“Pretendimet se Barça fitoi për shkak të gjyqtarëve janë të pavërteta. Për 72 vjet, komiteti i gjyqtarëve ka përfshirë gjithmonë një anëtar të Real Madridit. Real Madridi ka ndikim të konsiderueshëm dhe fitoret tona në kushte të tilla janë edhe më kuptimplote".

“Javier Tebas ka deklaruar se Real Madridi mund të ndikojë te gjyqtarët nëpërmjet kanalit të tij televiziv. Mund të jetë e vlefshme të shqyrtohen nga afër transmetimet televizive të Real Madridit”, përfundoi presidenti i Barcelonës. /Telegrafi/

Në javët e fundit ka pasur tensione të shtuara në nivel institucional mes Barcelonës dhe Real Madridit, të shkaktuara nga deklaratat e presidentëve të të dy klubeve.

Florentino Perez pretendoi se katalanasit historikisht janë favorizuar nga gjyqtarët, gjë që çoi Joan Laportën të deklaronte se ai dhe klubi madrilen vuajnë nga obsesioni ndaj Barcelonës.

Laporta tani ka tentuar ta lërë këtë çështje pas krahëve. Gjatë një aktiviteti të La Vanguardia të enjten, ai foli për Perez, për të cilin shprehu shumë respekt.

“Ai është një njeri i qetë dhe inteligjent. Tani ai shpreh opinionet e tij; në mandatin tim të parë unë isha më luftarak, megjithëse tani ai ka çështje kundër Tebas, kundër UEFA-s”.

“Kam dëgjuar që nuk do të mund të regjistronim lojtarë, por më pas CSD na dha të drejtë në rastin e regjistrimit të Olmos”.

“Sigurisht që ai është më afër atyre që drejtojnë në Spanjë, ashtu si ne këtu në Kataloni për shkak të afërsisë. Ai mbron interesat e tij, siç bëjmë edhe ne”.

Megjithatë, Laporta deklaroi gjithashtu se Perez dhe Real Madridi janë të fiksuar me presidentin e La Liga-s, Javier Tebas, i cili kohët e fundit ka qenë nën kritika.

“Ai është një njeri i fjalës, ka njohuri të gjera. Unë nuk u besoj atyre që duan ta largojnë. Ne e dimë që marrëdhënia që kemi ndërtuar me të është e mire”.

“Janë nga Real Madridi ata që duan ta shkarkojnë. Shoh që ekziston një obsesion nga ‘Shtëpia e Bardhë’”, ka deklaruar Laporta./Telegrafi/

Real Madridi as nuk i është përgjigjur presidentit të Barcelonës, Joan Laporta, dhe kritikave të tij ndaj klubit dhe presidentit të tyre, Florentino Perez, dhe as nuk ka ndërmend ta bëjë këtë.

Florentino Perez foli tashmë aty ku duhej të fliste: në Asamble dhe çështja do të mbetet atje.

Pas fjalimit të Perezit, presidenti i Barcelonës, Laporta pati kritika dhe goditi me disa fjalë rivalin e urryer

“Fjalët e Florentino Perezit tregojnë për barcelonistët që vuajnë nga Real Madridi. Një formë e veçantë obsesioni”.

“Duket se duhet të flasin për Barçën për të justifikuar, nuk e di çfarë”, deklaroi Laporta.

Duket sikur lufta e ftohtë midis Barcelonës dhe Real Madridit është rikthyer.

Megjithatë, sipas mediumit Cope, Real Madridi as nuk i është përgjigjur presidentit të Barcelonës dhe kritikave të tij ndaj klubit dhe presidentit të tyre, dhe as nuk ka ndërmend ta bëjë këtë. /Telegrafi/

Barcelona po përjeton një moment kritik pas performancës së dobët kundër Chelseat, një tjetër simptomë e një skuadre që ka humbur konkurrencën dhe që e detyron Joan Laportën të reagojë me vendosmëri.

Humbja e bëri të qartë se skuadra nuk është gati të garojë në Ligën e Kampionëve me besim, veçanërisht pasi dështoi të mposhtë kundërshtarë të nivelit të lartë si Paris Saint-Germain dhe Real Madrid.

Ndjesia e brendshme është e qartë: pa nënshkrime të rëndësishme, projekti nuk do të ecë përpara.

Barcelona dëshiron ta rindërtojë skuadrën

Prioriteti i Barçës është të përforcojë tre pozicione kyçe. Largimi i Inigo Martinez la një boshllëk të madh në qendër të mbrojtjes, një situatë e përkeqësuar nga performancat e dobëta të kohëve të fundit të lojtarëve që pritet të udhëheqin, si Dani Olmo, Jules Kounde, Pau Cubarsi dhe Lamine Yamal.

Klubi beson se kjo rënie në performancën e përgjithshme kërkon veprime vendimtare në afatin kalimtar të verës së ardhshme.

Në këtë kontekst, Barcelona ka hartuar një plan që përfshin mbërritjen e një qendërmbrojtësi të klasit të lartë që luan me këmbën e majtë, një mbrojtës të djathtë që mund të konkurrojë vërtet me Kounden dhe një qendërsulmues të aftë për të marrë rolin e kërcënimit kryesor sulmues të ekipit në vitet e ardhshme.

Këto tre nënshkrime konsiderohen thelbësore nga drejtori sportiv, Deco, për të rritur nivelin konkurrues të skuadrës.

Barcelona dhe angazhimi i saj për nënshkrimet mbrojtëse

Lëvizja e parë është drejtuar drejtpërdrejt mbrojtjes. Drejtori sportiv beson se performanca e ekipit ka pësuar rënie që kur Inigo Martinez u largua nga klubi, kështu që ata po kërkojnë një profil të ngjashëm: të fortë, me shpërndarje të mirë të topit dhe të mësuar me situata me presion të lartë.

Alessandro Bastoni dhe Nico Schlotterbeck janë dy kandidatët kryesorë. Të dy kanë raporte të shkëlqyera dhe i përshtaten vizionit të Hans-Dieter Flick, i cili e njeh shumë mirë mbrojtësin e Borussia Dortmund, pasi i ka dhënë atij debutimin për ekipin kombëtar gjerman.

Schlotterbeck shihet gjithashtu si opsioni më i qëndrueshëm financiarisht, pasi kontrata e tij përfshin një klauzolë lirimi prej afër 60 milionë eurosh. Nga ana tjetër, Bastoni do të kërkonte negociata komplekse me Interin, të cilat mund ta vononin transferimin.

Kërkimi nuk kufizohet vetëm në pozicionin e qendërmbrojtësit të krahut të majtë. Nevoja e dytë urgjente është mbrojtësi i djathtë. Mospërputhja e Kounde në atë rol e detyron Barcelonën të kërkojë një konkurrent të vërtetë.

Ndër emrat që Deco po shqyrton janë Vanderson dhe Andrei Ratiu, dy profile të ndryshme, por me një emërues të përbashkët: intensitet, qëndrueshmëri dhe soliditet në duelet mbrojtëse.

Një qendërsulmues, nevoja më e madhe e tregut

Transferimi i tretë do të jetë një sulmues. Kontrata e Robert Leëandoëskit skadon në qershor dhe klubi pranon se nuk mund ta mbajë më barrën ofensive si më parë. Ferran Torres, pavarësisht përpjekjeve të tij, nuk frymëzon mjaftueshëm besim për të qenë sulmuesi titullar për një ekip me aspirata evropiane.

Prandaj, Barcelona e konsideron Julian Alvarezin si objektivin e tyre kryesor, një veprim që Laporta do ta ndjekë deri në fund pavarësisht vështirësive financiare dhe rezistencës së Manchester Cityt.

Megjithatë, klubi po eksploron alternativa më të përballueshme, siç janë Serhou Guirassy, një nga golashënuesit më shpërthyes në futbollin gjerman, ose Etta Eyong, një lojtar i re premtues me kushte shumë tërheqëse.

Vera do të jetë vendimtare për Barcelonën, rindërtimi sportiv i së cilës varet kryesisht nga tre nënshkrime kyçe. Laporta, Deco dhe Flick e dinë se pa këto përforcime, projekti nuk do të jetë në gjendje të konkurrojë me gjigantët evropianë. Objektivi është i qartë: të rifitohet konkurrueshmëria dhe të kthehet skuadra në elitë. /Telegrafi/

Presidenti i Barcelonës, Joan Laporta, ka dhënë shpjegimin më të detajuar deri tani për muajt e trazuar që çuan në shkarkimin e Xavi Hernandezit një vit më parë.

Në një intervistë për “Esport3”, ai ka shpalosur kundërthëniet, mesazhet e përziera dhe dilemat që e bindën se ndryshimi në stol ishte i domosdoshëm.

Xavi kishte njoftuar publikisht në janar të vitit 2024 se do të largohej në fund të sezonit, por disa javë më vonë e ndryshoi vendimin. Sipas Laportës, rikthimi i tij erdhi pas një takimi privat në shtëpinë e presidentit.

“Xavi e kishte shpallur vetë se do të largohej në fund të sezonit. Pastaj kërkoi të më takonte në shtëpi për të më thënë se, në të vërtetë, dëshironte të vazhdonte dhe e ndiente të nevojshme këtë”.

Laporta tregon se në atë bisedë i kishte bërë vetëm një pyetje direkte: “E pyeta vetëm një gjë – ‘Xavi, a beson te skuadra?’ Ai u përgjigj: ‘Besoj 100 për qind dhe do t’i bëj këta lojtarë kampionë’”.

Joan Laporta dhe Xavi Hernandez

Megjithatë, sipas presidentit, ajo bindje u zhduk brenda një jave, kur Xavi doli para mediave dhe deklaroi se ekipit do t’i duheshin dy vite për të qenë konkurrues.

“Dy javë më vonë e dëgjova në konferencë duke thënë se ai dhe skuadra do të kishin nevojë për dy vite për të qenë kompetitivë. Mendova: ‘Çfarë po ndodh këtu?’”

Dyshimet u thelluan edhe më shumë kur Xavi bisedoi me drejtorin sportiv Deco për ndryshime të mëdha në skuadër. Laporta pranon se ato biseda e goditën rëndë.

“Ai më pas foli me Decon për mundësinë e ndryshimit të disa lojtarëve të ekipit të parë. Siç e dini, unë kam shumë respekt për Xavin, dhe fjalët e tij më prekën thellë”.

Laporta kujtoi se klubi ka marrë vendime të vështira edhe më herët: “Na është dashur të marrim vendime të rënda me Messin, Alban, Busquetsin, Piquen, madje me Xavin dhe Koeman… por te Barça, institucioni është gjithmonë mbi gjithçka. Është mbi lojtarët, presidentët dhe trajnerët”./Telegrafi