Dy persona, njëri prej tyre një fëmijë trevjeçar, janë vrarë dhe rreth 28 të tjerë janë plagosur nga një sulm rus në Kharkiv, kanë konfirmuar zyrtarët ukrainas.
Një ndërtesë shumëkatëshe banimi është shkatërruar pothuajse tërësisht në sulmin e dyfishtë me raketa pasditen e së premtes, të cilin presidenti i Ukrainës, Volodymyr Zelensky, e ka cilësuar si “të neveritshëm”.
Ministria ruse e Mbrojtjes i ka mohuar raportimet për një sulm, duke sugjeruar në Telegram se shpërthimi në vendngjarje është shkaktuar nga detonimi i municioneve ukrainase, njofton BBC, transmeton Sinjali.
Sulmi ndodhi në prag të bisedimeve të rëndësishme që Ukraina pritet t’i presë në Kiev të shtunën. Zelensky ka bërë të ditur se rreth 15 shtete pritet të marrin pjesë në këto bisedime, së bashku me përfaqësues të Bashkimit Evropian dhe NATO-s, ndërsa një delegacion amerikan do të marrë pjesë përmes video-lidhjes. Këto zhvillime vijnë para takimit të liderëve të ashtuquajturit “koalicioni i vullnetit”, që do të mbahet në Francë më 6 janar.
Zyrtarët e Kharkivit kanë njoftuar se trupat e një gruaje dhe një fëmije trevjeçar janë gjetur nën rrënoja, me informacionet paraprake që sugjerojnë se ata mund të kenë qenë nënë e bir.
“Fatkeqësisht, kështu i trajtojnë rusët jetën dhe njerëzit – ata vazhdojnë të vrasin, pavarësisht të gjitha përpjekjeve të botës, dhe veçanërisht të Shteteve të Bashkuara, në procesin diplomatik”, ka shkruar Zelensky në platformën X.
Nga 28 të plagosurit, mes të cilëve edhe një foshnjë gjashtëmuajshe, 16 janë dërguar për trajtim në spital.
Operacioni i kërkim-shpëtimit po vazhdon, me mbi 80 vullnetarë që po punojnë në vendngjarje, sipas një përditësimi nga guvernatori rajonal, Oleh Syniehubov.
“Forcat e Armatosura të Federatës Ruse as nuk kanë planifikuar dhe as nuk kanë kryer sulme me armë raketore apo nga ajri brenda qytetit të Kharkivit”, thuhet në një deklaratë të Ministrisë ruse të Mbrojtjes në Telegram.
Ministria ka shtuar se pamjet video para sulmit tregonin “tym të dendur me origjinë të panjohur”, të cilin e ka përmendur si dëshmi se bëhet fjalë për shpërthim municionesh nga forcat e armatosura ukrainase.
Gjithashtu, ajo ka pretenduar se këto raportime synojnë të largojnë vëmendjen e opinionit botëror nga një sulm i natës së Vitit të Ri ndaj një hoteli në një pjesë të rajonit të Khersonit që kontrollohet nga Rusia, në jug të Ukrainës.
Rusia ka akuzuar Ukrainën se ka vrarë të paktën 27 persona dhe ka plagosur më shumë se 30 të tjerë në një sulm me dron gjatë një feste të Vitit të Ri në fshatin Khorly, në bregdetin e Detit të Zi.
BBC-ja nuk ka qenë në gjendje t’i verifikojë në mënyrë të pavarur këto pretendime apo numrin e viktimave.
Kur është pyetur nga BBC-ja për koment, Ukraina ka thënë se nuk do t’u përgjigjet drejtpërdrejt burimeve të informacionit, siç janë pretendimet e guvernatorëve të rajoneve të pushtuara.
Ajo ka shtuar se respekton normat e së drejtës ndërkombëtare humanitare dhe se kryen sulme ekskluzivisht ndaj objektivave ushtarake.
Ndërkohë, Komiteti Hetimor i Rusisë ka njoftuar se ka hapur një hetim për këtë sulm, ndërsa Ministria e Jashtme ruse ka akuzuar presidentin ukrainas Volodymyr Zelensky se po “përpiqet të frikësojë popullsinë e rajoneve të ribashkuara ruse, të cilat e kanë lidhur përfundimisht fatin e tyre me Rusinë përmes referendumeve”.
Sinjali – aty ku e vërteta flet para lajmit!
/GazetaSinjali/
The post Sulmi rus me raketa në Kharkiv lë dy të vdekur, viktimë edhe një fëmijë appeared first on Sinjali.
Login
Pedri dhe Pepe Mel
