Autoritetet amerikane të imigracionit kanë ndaluar këtë muaj të paktën katër fëmijë, përfshirë një 5-vjeçar, në zonën e Minneapolis, në kuadër të operacioneve të administratës së Trump kundër emigracionit të paligjshëm.

Sipas autoriteteve lokale, rreth 3 mijë agjentë federalë janë dislokuar në qytetin më të madh të Minesotës, duke rritur ndjeshëm tensionet mes komuniteteve emigrante.

Një nga rastet më tronditëse është ai i Liam Conejo Ramos, vetëm 5 vjeç, i cili pa babanë e tij të arrestohej nga agjentë të maskuar në oborrin e shtëpisë, ku sapo ishte kthyer nga kopshti.

Departamenti Amerikan i Sigurisë Kombëtare deklaroi se babai i fëmijës ndodhej ilegalisht në Shtetet e Bashkuara, por nuk dha detaje mbi ndonjë precedent penal.

Autoritetet theksuan se fëmijët nuk janë objektiv i drejtpërdrejtë i operacioneve dhe se prindërve u ofrohet mundësia të vendosin për kujdestarinë e tyre.

Megjithatë, drejtues të shkollave konfirmojnë edhe raste të tjera: një 17-vjeçar u ndalua nga agjentë të armatosur teksa shkonte në shkollë, një 10-vjeçare u ndalua dy javë më parë dhe ndodhet ende në një qendër ndalimi në Teksas, ndërsa një tjetër adoleshente u arrestua bashkë me nënën e saj në banesë.

“Është e qartë se ajo që po shohim në rrugët tona tani është diskriminim vetëm në bazë të racës. Pra, po, në Minneapolis, ne duam të zgjidhim krimin. Ne duam të arrestojmë vrasësit. Ajo që po shohim është se kjo ka më shumë të bëjë me hakmarrjen politike, me terrorizimin e njerëzve sesa me sigurinë”, tha Jacob Frey, kryetari i Bashkisë së Minneapolisit.

Ngjarjet kanë shkaktuar reagime të forta nga demokratët dhe autoritetet lokale, të cilët akuzojnë agjentët federalë për përdorim force të panevojshme dhe për krijimin e një klime frike mes komuniteteve emigrante.

Një hetim lidhur me përplasjen e dy trenave të shpejtë në Spanjë, që la të vdekur 45 persona, sugjeron se shina e hekurudhës ishte çarë para aksidentit, sipas një raporti preliminar të publikuar të premten, më 23 janar.

Spanja po kërkon përgjigje për një nga aksidentet më vdekjeprurëse të këtij lloji në Evropë në këtë shekull, që ka ngritur dyshime mbi sigurinë e rrjetit të dytë më të madh në botë të hekurudhave me shpejtësi të lartë.

Aksidenti ndodhi në rajonin jugor të Andaluzisë mbrëmjen e 18 janarit, kur një tren që operohej nga kompania private, Iryo, doli nga shinat dhe kaloi në shinat në anën tjetër, duke u përplasur me një tren që po vinte nga drejtimi i kundërt, tren që operohej nga kompania shtetërore, Renfe.

Një inspektim i trenit Iryo “zbuloi prerje në rrotat anësore në anën e djathtë” të katër vagonëve, u tha në raportin preliminar të komitetit CIAF për hetimin e aksidenteve hekurudhore.

“Këto prerje në rrota dhe deformimi në shina janë të përputhshme me faktin që shina ishte e çarë”, u tha në dokument.

Prerje u gjetën gjithashtu edhe në rrotat anësore në anën e djathtë të tre trenave që kishin kaluar mbi të njëjtat shina disa orë para aksidentit, tha CIAF.

Bazuar në këto informacione, “mund të propozojmë hipotezën se çarja e shinës ka ndodhur para kalimit të trenit Iryo që pësoi aksident, dhe prandaj para devijimit nga shinat”, u tha në raport.

CIAF paralajmëroi se “kjo hipotezë… duhet të verifikohet më pas përmes llogaritjeve dhe analizave të detajuara”.

Ministri i Transportit, Oscar Puente, tha se ishte “qetësuese” që hetuesit kanë këtë hipotezë mbi shkakun e mundshëm të aksidentit.

“Gjetjet nuk janë përfundimtare, por ato hedhin dritë mbi teorinë që ekspertët e komisionit aktualisht e konsiderojnë më të mundshme”, u tha ai gazetarëve në Madrid.

Ai shtoi se çarja e shinës duhej të kishte qenë aq e vogël sa të mos ndërpriste energjinë elektrike që kalonte përmes saj, pasi nëse do të ishte më e thellë automatikisht do të aktivizohej sistemi i alarmit dhe ndalimin i trafikut hekurudhor.

Segmenti i hekurudhës ku ndodhi aksidenti ishte renovuar së voni, ndërkaq treni i Iryos ishte prodhuar në vitin 2022.

Gabimi njerëzor është përjashtuar si shkak i mundshëm i aksidentit, teksa trenat që u përplasën kishin qenë duke udhëtuar brenda kufirit të lejuar të shpejtësisë.

Spanja ka rrjetin më të madh në Evropë për trenat e shpejtë me mbi 3 mijë kilometra hekurudhë që lidhin qytetet e mëdha përfshirë Madridin, Barcelonën, Seviljan, Valencian dhe Malagën.

Read More...

Eksperti i ekonomisë Ergis Sefa, i ftuar në emisionin “Sheshi i Dollarit” në ABC Neës, ka analizuar zhvillimet më të fundit në ekonominë globale dhe ndikimin e tyre në rajon.

Sipas tij, Shtetet e Bashkuara të Amerikës vijojnë të mbeten forca dominuese në tregun global, pavarësisht një rënieje graduale, ndërsa Kina po barazohet gjithnjë e më shumë me SHBA-në për sa i përket prodhimit të brendshëm bruto.

Sefa theksoi se ekonomia botërore mbështetet aktualisht mbi katër pole kryesore, SHBA-në, Europën, Kinën dhe Lindjen e Mesme, duke paralajmëruar se tarifat tregtare të vendosura së fundmi pritet të sjellin pasoja të ndjeshme për Bashkimin Europian dhe vendet partnere, përfshirë edhe Shqipërinë.

“Shtetet e Bashkuara të Amerikës vazhdojnë që të jenë dominuese të tregut global, megjithëse ka qenë në rënie. Kohët e fundit është kina ajo që është njësoj si SHBA për prodhimin e  brendshëm bruto. SHBA është tregu më i madh i brendshëm, Europa vazhdon të jetë një pol i tretë, është një treg goxha i madh dhe Lindja e Mesme vazhdon të jetë ai poli i katërt, sidomos për lëndët minerale. Çdo lëvizje gjeopolitike është në këto katër rajone.

Ka vetëm një vit janë vendosur tarifat, por ende nuk janë ndjerë efektet e tarifave që janë vendosur. Projektohet deri në vitin 2027 prodhimi bruto i BE-së të ulet. Vetëm për pasojë e tarifave pritet që të zbresë deri në 17% eksportet. Kjo bëhet fjalë për tarifat e vendosura dhe jo ato shtesë. 30% e eksporteve të BE drejt SHBA. Pa diskutim që edhe Shqipëria do të marrë goditje , sepse partneri jonë tregtar është BE. Edhe Shqipëria do e pësojë, si një vend që importon dhe eksporton. Kjo është shumë me rëndësi për ne dhe për fat të keq nuk po e kuptojmë dhe nuk po marrim dot masat e duhura për t’u mbrojtur”, tha Sefa.

Eksperti i marrëdhënieve ndërkombëtare, Geron Kamberi, ka komentuar rëndësinë dhe mesazhet kryesore të Forumit Ekonomik Botëror të Davosit, gjatë një interviste në emisionin “Sheshi i Dollarit” në ABC News.

Sipas tij, Davosi mbetet një forum me peshë të konsiderueshme globale, që bashkon ekonominë dhe biznesin, duke ofruar perspektiva për zhvillimet ekonomike të së ardhmes, ndonëse nuk ka rol vendimmarrës.

Kamberi theksoi se forumi, ku marrin pjesë qindra liderë politikë dhe biznesmenë, po funksionon si një “OKB në hije”, ndërsa këtë vit vëmendje të veçantë mori fjalimi i Donald Trump dhe ndikimi i tij në qetësimin e tregjeve, në një kohë kur bota po përballet me sfida dhe konflikte të rëndësishme globale.

“Është një forum që synon të bëjë bashkë ekonominë, biznesin dhe t’i japë botës perspektivën e ekonomisë në ditët që vijnë. Nuk është një forum vendimmarrës, por që ka marrë një peshë të konsiderueshme. Marrin pjesë qindra lider dhe biznesmenë. Është një lloj OKB-je në hije. Forumi i Davos u mbajt këtë vit në përvjetorin e presidencës Trump, e cila gjatë një viti ka arritur shumë gjëra.

Është një lloj ndërhyrje, ku ekonomia pa politikë dhe politika pa ekonomi nuk ekziston. Ajo që tërhoqi vëmendjen ishte fjalimi i Trump, kritika se si e sheh ai botën. Forumi i Davosit sivjet pati mesazhe shumë interesante edhe për5 faktin që bota mori frymë nga dy konflikte, siç ishte ai për paqen e Gazës dhe Groenlanda, ku nga deklarata e djeshme e Trump u duk sikur qetësoi shumë tregje”, tha Kamberi.

Abc News Live

Në një letër shpjeguese drejtuar këshillit të Lartë Gjyqësor, gjyqtarja Irena Gjoka sqaron arsyen se përse në formularin e dekriminalizimit, nuk ka deklaruar se është dënuar me vendim gjykate në Greqi, për falsifikim vize.

Letra e plotë:

Çmoj të theksoj se, në të gjithë përmbajtjen e vendimit të Gjykatës së Janinës të dhënë ndaj meje, nuk përmendet në asnjë moment përcaktimi i shkeljes së pretenduar si të kryer nga unë, e natyrës “penale”, por ajo cilësohet në të gjitha rastet si një “vepër”, “shkelje” e cila parashikohet nga paragrafi 7 i nenit 54 të Ligjit nr. 2910/2001 me titull “Hyrja dhe qëndrimi i të huajve në Territorin Grek” dhe jo nga Kodi Penal.

Si konkluzion, në mungesë të dijenisë, nuk mund t’i përgjigjesha me “po” pyetjeve në formular që kanë të bëjnë me hetimin, gjykimin apo dënimin nga Gjykata e Janinës.

Në rastin konkret vendimi i dënimit nuk është i formës së prerë dhe si rrjedhojë ai nuk ka asnjë vlerë juridike në Territorin e Republikës së Shqipërisë.

Nuk kam asnjë ndalesë që të ushtroj funksione publike në bazë të ligjit për dekriminalizimin dhe kam plotësuar saktë formularin e dekriminalizimit bazuar në njohuritë që kisha në momentin e plotësimit të këtij formulari.

Vendimi i dënimit i dhënë nga Gjykata e Shkallës së Parë Janinë, nuk më është njoftuar asnjëherë dhe nuk ka marrë formë të prerë, jo vetëm për shkak të mosnjoftimit por edhe për shkak të miratimit në vitin 2005 të Ligjit nr.3346, datë 17.6.2005, i cili shfuqizonte vendimet jo të formës së prerë dhe linte pa fuqi të gjitha vendimet e dënimit me më pak se gjashtë muaj burgim. Autoritetet greke të drejtësisë, nëpërmjet letërporosisë, siç u theksua më sipër kanë dërguar shkresën me nr.363 Prot, datë 13.06.2025, të Gjykatës së Shkallës së Parë Janinë, Zyra e Hetuesit, nga përmbajtja e së cilës rezulton se: Vendimi i Gjykatës së Shkallës së Pare me Tre Anëtarë për kundravajtjet, Janinë, nuk u ekzekutua sipas aktit të prokurorit me nr.492/2005 dhe vendimi u depozitua në arkivë në përputhje me nenin 32, parg.1 dhe 2 të Ligjit nr.3346/2005. Për këtë arsye, ky vendim nuk është regjistruar asnjëherë në regjistrin e gjendjes gjyqësore për shkak se ai nuk mori formë të prerë dhe u arkivua nga prokurori.

Si konkluzion, vendimi i dënimit jo i formës së prerë i Gjykatës së Shkallës së Parë Janinë nuk mund të përbëjë shkak për mbarimin e mandatit tim si gjyqtare, sepse ky vendim nuk cenon kushtet e zgjedhshmërisë. Në kushtet e analizuara më sipër, ky vendim konsiderohet si i paqenë.

Nga analiza e sipërcituar, rezulton qartë se ILD nuk mund të fillojë procedim disiplinor ndaj meje, në funksionin e gjyqtares, sepse nuk provohet se kam kryer një vepër penale, vendimi i dënimit nuk sjell asnjë pasojë juridike. Përtej diskutimit të sipërcituar, ILD-se nuk i lejohet të fillojë një procedim disiplinor pas 5 vjetëve nga koha kur ka ndodhur shkelja e pretenduar.

SHBA-të dhe BE-ja shpresojnë të tërheqin 800 miliardë dollarë fonde publike dhe private për të ndihmuar në rindërtimin e Ukrainës, pasi Rusia të përfundojë agresionin e saj, sipas një dokumenti të siguruar nga POLITICO .

Dokumenti 18-faqësh përshkruan një plan 10-vjeçar për të garantuar rimëkëmbjen e Ukrainës me një rrugë të përshpejtuar drejt anëtarësimit në BE.

Komisioni Evropian i qarkulloi planet në kryeqytetet e BE-së përpara samitit të liderëve të enjten në mbrëmje, ku u trajtua dokumenti, i datës 22 janar, sipas tre zyrtarëve dhe diplomatëve të BE-së, të cilëve iu dha anonimiteti për të folur rreth temës së ndjeshme.

Ndërsa Brukseli dhe Uashingtoni po grumbullojnë qindra miliarda dollarë në fonde afatgjata dhe po e paraqesin Ukrainën si një anëtare të ardhshme të BE-së dhe destinacion investimi, strategjia varet nga një armëpushim që mbetet i pakapshëm – duke e lënë planin e prosperitetit të cenueshëm për sa kohë që luftimet vazhdojnë.

Strategjia e financimit shtrihet deri në vitin 2040 së bashku me një plan operativ 100-ditor për të nisur menjëherë projektin.

Por plani i prosperitetit do të ketë vështirësi në tërheqjen e investimeve të jashtme nëse konflikti vazhdon, sipas kompanisë së investimeve, BlackRock.

Ndryshe, SHBA-të pritet të luajnë një rol të spikatur në rimëkëmbjen e Ukrainës.

Në vend që ta paraqiste Uashingtonin kryesisht si donator, dokumenti e pozicionoi SHBA-në si një partner strategjik ekonomik, investitor dhe i besueshëm për rimëkëmbjen e Ukrainës.

Gjatë 10 viteve të ardhshme, BE-ja, SHBA-ja dhe organet financiare ndërkombëtare, përfshirë Fondin Monetar Ndërkombëtar dhe Bankën Botërore, janë zotuar të shpenzojnë 500 miliardë dollarë kapital publik dhe privat, thuhet në dokument.

Delegacionet nga Ukraina, Rusia dhe Shtetet e Bashkuara të Amerikës kanë nisur zyrtarisht bisedimet tripalëshe në Abu Dabi pasditen e kësaj të premteje, me qëllim për të vendosur paqe në konfliktin e nisur 4 vite më parë.

Shtetet e Bashkuara përfaqësohen nga Steve Witkoff dhe Jared Kushner, të cilët i bashkohen takimit pas një bisede me Vladimir Putin në Moskë, si dhe nga Josh Gruenbaum, një ndër këshilltarët e lartë të Bordit të Paqes.

Nga Ukraina në takim marrin pjesë disa nga zyrtarët e saj të lartë, përfshirë Rustem Umerov, kreun e këshillit të sigurisë dhe mbrojtjes kombëtare të Ukrainës, Kyrylo Budanov, kreun e zyrës së Zelensky, negociatorin David Arakhamia dhe shefin e shtabit të përgjithshëm, Andrii Hnatov.

Bisedimet për palën ruse drejtohen nga admirali Igor Kostyukov, zëvendësshef i shtabit të përgjithshëm rus. I dërguari rus i investimeve Kirill Dmitriev është gjithashtu në Emiratet e Bashkuara Arabe dhe do të mbajë një takim të veçantë me Witkoff.

Takimi trilateral me pjesëmarrjen e Rusisë, Ukrainës dhe Shteteve të Bashkuara vijnë pas takimit të Moskës që të dërguarit amerikanë mbajtën me Presidentin rus Vladimir Putin. Këto bisedime u konsideruan nga Kremlini si të sinqerta dhe konstruktive. Megjithatë, padakordësitë mes Kievit dhe Moskës vijojnë dhe problematika kryesore janë territoret.

Putin theksoi gjatë takimit me Steve Witkoff dhe Jared Kushner se nëse nuk zgjidhet kjo çështje sipas formulës territoriale të rënë dakord gjatë takimit me Donald Trump në Alaska, nuk ka shpresë as për një zgjidhje afatgjatë.

Lideri ukrainas Volodymyr Zelensky tha se pikërisht çështja e territoreve do të jetë një pjesë e rëndësishme e diskutimeve në Emiratet e Bashkuara Arabe.

Ka pak detaje publike në lidhje me bisedimet në Abu Dabi, por Volodymyr Zelensky ka thënë se ato do të zgjasin dy ditë.

Bisedimet vijnë në një moment të vështirë për Ukrainën. Vendi ka qenë nën sulmet ruse që nga fillimi i këtij viti dhe infrastruktura e dëmtuar rëndë ka lënë qindra mijëra familje pa energji elektrike këto ditë të ftohta dimri.

Ajo që bie sërish në sy është mungesa e zyrtarëve europianë në këto negociata. Presidenti ukrainas e shprehu qartë zhgënjimin e tij me aleatët në kontinent gjatë forumit të Davosit në Zvicër.

Në përgjigje të Zelensky, presidentja e Komisionit Evropian, Ursula von der Leyen, theksoi se BE ishte mbështetësja më e madhe e Ukrainës.

“Veprimet flasin më shumë se fjalët”, u tha ajo gazetarëve, por pavarësisht kësaj, roli i europianëve vitin e fundit në përpjekjet për arritjen e paqes ka qenë dytësor dhe liderët e kontinentit kanë vepruar vetëm kur situata dukej të ishte emergjente.

Analisti politik Roland Bejko, i ftuar në emisionin “Tirana Live” në ABC News, ka komentuar zhvillimet e fundit në opozitë dhe rolin e Sali Berishës në skenën politike shqiptare.

Sipas Bejkos, retorika e Berishës ndaj demokratëve synon vetëm mobilizimin e tyre artificial, ndërsa në realitet ai ka dështuar të prodhojë rezultate konkrete politike.

Analisti theksoi se veprimet e fundit të Berishës, përfshirë raportin me faktorin ndërkombëtar, kanë çuar në legjitimimin e kryeministrit Edi Rama, duke rrëzuar gjithë narrativën e ndërtuar më herët nga opozita. Bejko e cilësoi situatën si të dëmshme për Partinë Demokratike dhe vlerësoi se kriza aktuale brenda saj kërkon reflektim dhe ndryshim lidershipi.

“Berisha u hedh gënjeshtra demokratëve, që t’i mbajë të karikuar, që të mos i lënë sheshin bosh. Berisha jo vetëm që nuk e largoi Ramën me Trump, por dje Berisha legjitimoi Ramën, duke ia çuar Trump si kryeministrin e Shqipërisë. I ra e gjithë retorika. Gjithë këtë alibi i e krijoi Berisha, sepse jeton në realitete paralele. Ndërton një gjuhë politike dhe në fund ngelet pa gjë. Beriaha është vetëm një komedian që luan në politikën shqiptare. Është tragjike për demokratët.

Çdo gjë që thotë Berisha nuk duhet marrë seriozisht dhe nuk ka asnjë vlerë sot. Në datën 24 demokratët nuk duhet të protestojnë para kryeministrisë, por po të kishin mend duhet shkonin para selisë së PD dhe të kërkojnë dorëheqjen e Berishës. Rënia e Sali Berishës do te hapë procesin për rënien e Ramës. Berisha nuk prodhon politikë, por vetëm disa lëvizje kaotike. Rama vazhdon të jetë 3-4 hapa në këtë lojë politike para Berishës dhe të gjithë politikanëve të tjerë”, tha Bejo.

Read More...

Në një moment vendimtar për fatin europian, Gjermania i jep dritën jeshile Shqipërisë për anëtarësimin në BE. Në vizitën e tij në Tiranë, Ministri i jashtëm dhe për Europën i Gjermanisë, Gynter Krishbaum bëri të qartë se Shqipëria ka mbështetjen e plotë të Berlinit Zyrtar.

“Ne duam ta shohim Shqipërinë në Bashkimin Evropian jemi njëkohësisht mik, mbështetës dhe kritik në rrugën e saj drejt BE-së. Ne shohim potencialin tejet të madh dhe përpjekjet e Shqipërisë për reforma, por edhe sfidat kombëtare, rajonale dhe ndërkombëtare në procesin e anëtarësimit në BE”, tha Krichbaum.

Këtë të premte, Krishbaum zhvilloi takime me kryeministrin Edi Rama, kreun e SPAK Klodjan Braho dhe eksponentë të mazhorancës dhe opozitës. Shqipëria është në pritje të mbylljes së grupkapitujve, ndaj Krishbaum nënvizoi se reformat duhet të vijojnë pa humbur kohë, si ato politike edhe në drejtësi.

“Shqipëria gjendet aktualisht në një moment vendimtar: rruga e nisur në drejtim të BE-së  duhet të çohet përpara me vendosmëri, duke zbatuar në këtë kontekst në mënyrë të vendosur reformat e radhës, veçanërisht në fushën e shtetit të së drejtës, dhe  luftën e palëkundur kundër krimit të organizuar dhe korrupsionit”, shtoi Krichbaum.

Edhe në këtë vizitë, Ministri Gynther Krishbaum e shmangu Sali Berishën. Armiku i vjetër i kreut të PD, dikur e shpalli non grata për së dyti në emër të CDU, por sigurisht për Berishën atëherë edhe Krishbaum ishte mik i Lulzim Bashës.

Luftanijet amerikane po shkojnë drejt Iranit, teksa zyrtarët iranianë po mbrojnë shtypjen brutale të protestave antiqeveritare, shtypje të cilën Kombet e Bashkuara po e cilësojnë si goditjen më vdekjeprurëse të Republikës Islamike ndaj popullit të saj që nga marrja e pushtetit gjatë revolucionit të vitit 1979.

Mes një bllokade disajavore të internetit, informacionet për përmasat e shtypjes së protestave – të cilat nisën me tregtarët në Teheran që protestuan kundër rritjes së inflacionit dhe zhvlerësimit të valutës kombëtare – vazhdojnë të zbulohen ngadalë, teksa grupet për të drejtat e njeriut po mbledhin të dhëna nga spitalet dhe dëshmitarët okularë.

Agjencia e lajmeve e aktivistëve për të drejtat e njeriut (HRANA), me seli në SHBA, thotë se deri më 22 janar, pas 26 ditësh protesta, ka verifikuar 5.002 vdekje, përfshirë 201 pjesëtarë të forcave të sigurisë, ndërsa mbi 9.787 vdekje të tjera janë ende duke u hetuar.

Mai Sato, raportuesja e posaçme e OKB-së për të drejtat e njeriut në Iran, tha më 22 janar se numri i civilëve të vrarë gjatë shtypjes së protestave mund të tejkalojë edhe shifrën 20.000, ndërsa po dalin në dritë raporte nga mjekët.

Gjatë një mbledhjeje më 23 janar mbi ngjarjet në Iran, Këshilli i OKB-së për të Drejtat e Njeriut shprehu shqetësim të thellë për “përmasën e paprecedent të shtypjes së dhunshme të protestave paqësore nga forcat e sigurisë në Iran, raportet për vrasje pa gjyq të protestuesve, përfshirë gra dhe fëmijë, si dhe përdorimin e tepruar dhe vdekjeprurës të forcës, që ka rezultuar me vdekjen e mijëra protestuesve paqësorë dhe plagosjen e shumë të tjerëve”.

Presidenti amerikan, Donald Trump, tha më 22 janar se Shtetet e Bashkuara kishin një “flotë” që po nisej drejt Iranit, por shpresonte të mos i duhej ta përdorte atë, teksa përsëriti paralajmërimet ndaj Teheranit që të mos vriste protestues dhe të mos rifillonte programin e tij bërthamor.

“Kemi shumë anije që po shkojnë në atë drejtim, për çdo rast. Do të preferoja të mos ndodhte asgjë, por po i vëzhgojmë shumë nga afër… kemi një flotë… që po shkon në atë drejtim dhe ndoshta nuk do të na duhet ta përdorim”, u tha Trump gazetarëve në bordin e avionit presidencial teksa po kthehej në Uashington nga Forumi Ekonomik Botëror në Davos të Zvicrës.

Aeroplanmbajtësja USS Abraham Lincoln dhe disa luftanije të tjera të pajisura me raketa pritet të mbërrijnë në Lindjen e Mesme në ditët në vijim.

Departamenti amerikan i Thesarit më 23 janar njoftoi për sanksione ndaj nëntë anijeve që janë pjesë e asaj që e quajti “flotë në hije” e Iranit, e cila transporton naftë dhe produkte nafte iraniane të sanksionuar nëpër botë.

“Sanksionet e sotme synojnë një komponent kritik të mënyrës se si Irani gjeneron fondet që përdoren për të shtypur popullin e vet. Siç është theksuar më parë, Thesari do të vazhdojë të gjurmojë dhjetëra milionë dollarët që regjimi ka vjedhur dhe po përpiqet t’i transferojë në banka jashtë Iranit”, tha sekretari i Thesarit, Scott Bessent.

Mohammad Javad Haj Ali Akbari, një klerik me ndikim që udhëheq lutjes e së premtes në Teheran, tha më 23 janar se Irani do të hakmerrej për çdo sulm amerikan ndaj shtetit, përfshirë edhe duke shënjestruar investimet amerikane në rajon.

Kjo deklaratë erdhi pasi Ali Abdollahi Aliabadi, kreu i Shtabit Qendror Khatam-al Anbiya të Iranit, i cili koordinon ushtrinë dhe Trupat e Gardës Revolucionare Islamike, tha se çdo goditje ushtarake do t’i bënte të gjitha bazat amerikane në rajon “objektiva legjitime”.

Iranianët janë shkëputur nga bota e jashtme që nga 8 janari, kur autoritetet vendosën një bllokadë pothuajse të plotë të internetit në nivel kombëtar, teksa shtypja e protestave u ashpërsua.

Është e paqartë se kur do të rikthehen shërbimet, por edhe kur kjo të ndodhë, ekspertët druajnë se autoritetet do t’i detyrojnë iranianët të përdorin një “intarnet” të dizajnuar brenda vendit, që funksionon i pavarur nga interneti global.

Bisedimet e para trepalëshe mbi luftën midis Rusisë, Ukrainës dhe SHBA-së kanë filluar në Abu Dhabi, njoftojnë Emiratet e Bashkuara Arabe.

“Bisedimet filluan sot në Abu Dhabi dhe janë planifikuar të vazhdojnë gjatë dy ditëve, si pjesë e përpjekjeve të vazhdueshme për të nxitur dialogun dhe për të identifikuar zgjidhje politike për krizën”, tha ministri i jashtëm i Emirateve të Bashkuara Arabe.

Çështja delikate e territorit do të diskutohet

Presidenti ukrainas Volodymyr Zelensky konfirmoi sot se çështjet territoriale do të jenë në tryezën e diskutimit në Abu Dhabi.

Ato mbeten një pikë ngërçi, pasi Rusia kërkon që Ukraina të dorëzojë tokën që ende mban në rajonin lindor të Donetskut, që mendohet të jetë rreth 20%.

Zelensky ka refuzuar të heqë dorë nga toka që Ukraina e ka mbrojtur me sukses me kosto të lartë gjatë viteve të fundit.

Bashkimi Evropian do të pezullojë tarifat hakmarrëse për mallra amerikane me vlerë 93 miliardë euro për gjashtë muaj të tjerë, pasi presidenti i SHBA-së Donald Trump u tërhoq nga kërcënimi i tij për të vendosur taksa ndaj disa vendeve të BE-së që kundërshtuan përpjekjen e tij për të aneksuar Grenlandën.

Komisioni Evropian, krahu ekzekutiv i BE-së që merret me çështjet tregtare për bllokun, po planifikon të paraqesë një propozim për të zgjatur pezullimin e kundërmasave, i cili do të skadojë më 7 shkurt, sipas zëdhënësit Olof Gill.

“Ne e arritëm objektivin tonë nëpërmjet mjeteve diplomatike dhe politike, të cilat do të jenë gjithmonë preferenca jonë, në vend që të ndjekim një spirale masash dhe kundërmasash”, u tha Gill gazetarëve në Bruksel të premten.

Kryeministri hungarez, Viktor Orban ka paralajmëruar se Ukraina do të ketë një rol aktiv në fushatën zgjedhore në Hungari, duke shtuar se ky fakt nuk është i këndshëm për qeverinë e tij.

“Duhet ta kemi parasysh që ukrainasit do të jenë lojtarë aktivë në fushatën zgjedhore në Hungari, sepse ata kanë një interes themelor në ndryshimin e qeverisë në vendin tonë”, tha ai, duke shtuar se, megjithëse kjo është e kuptueshme, nuk e bën situatën më të lehtë për Hungarinë. Kryeministri gjithashtu shprehu bindjen se për të paktën një shekull të ardhshëm, parlamenti hungarez nuk do të miratojë asnjë vendim për pranimin e Ukrainës në Bashkimin Evropian.

Deklaratat e Orbanit vijnë në një kohë kur tensionet politike brenda Hungarisë dhe raportet me vendet fqinje janë në fokus. Analistët shohin këto komente si një sinjal të fortë për politikat e ardhshme të qeverisë në lidhje me zgjerimin e BE-së dhe ndikimin e jashtëm në zgjedhjet kombëtare.

Ndryshe, presidenti ukrainas, Volodymyr Zelensky ka kritikuar qasjen pro-ruse të udhëheqësit të shtetit hungarez.

I Ministri i Shtetit për Evropën në Ministrinë e Jashtme Federale, Gunther Krichbaum zhvilloi biseda politike sot në Tiranë. Ai u takua me Kryeministrin Edi Rama, Ministren e Shtetit për Administratën Publike dhe Antikorrupsionin Adea Pirdeni, zv.Ministren e Jashtme Megi Fino, bashkëkryetarët e Këshillit Kombëtar për Integrimin Evropian, Taulant Balla dhe Jorida Tabaku, Kryetarin e Grupit Parlamentar të Partisë Demokratike Gazment Bardhi si dhe me Drejtuesin e Prokurorisë së Posaçme SPAK Klodian Braho. Në fokus të bisedave të tij ishte procesi i anëtarësimit të Shqipërisë në BE si dhe fuqizimi i shtetit të së drejtës, lufta kundër korrupsionit dhe krimit të organizuar.

Në mbyllje të bisedave Ministri i Shtetit Krichbaum u shpreh:

„Për shkak se ne duam ta shohim Shqipërinë në Bashkimin Evropian jemi njëkohësisht mik, mbështetës dhe kritik në rrugën e saj drejt BE-së. Ne shohim potencialin tejet të madh dhe përpjekjet e Shqipërisë për reforma, por edhe sfidat kombëtare, rajonale dhe ndërkombëtare në procesin e anëtarësimit në BE. Edhe për këtë arsye ishte e rëndësishme për mua të zhvilloja biseda të drejtpërdrejta me qeverinë shqiptare, parlamentin dhe drejtësinë.

Shqipëria gjendet aktualisht në një moment vendimtar: rruga e nisur në drejtim të BE-së  duhet të çohet përpara me vendosmëri, duke zbatuar në këtë kontekst në mënyrë të vendosur reformat e radhës, veçanërisht në fushën e shtetit të së drejtës, dhe  luftën e palëkundur kundër krimit të organizuar dhe korrupsionit.

Për këtë qëllim lipset vijimi i guximshëm i rrugës së reformave,  si dhe përfshirja, por edhe bashkëveprimi konstruktiv i të gjithë aktorëve dhe institucioneve në kuadër të përgjegjësive të tyre kushtetuese.”

Read More...

Komisionerja Ursula von der Leyen i ka mbijetuar sot në 22 janar, e enjte, një votëbesimi në Parlamentin Evropian, pas një mocioni mosbesimi të paraqitur nga grupi ekstremist i djathtë Patriots for Europe (PfE). Rezultati i votimit ishte i qartë: 390 eurodeputetë votuan kundër rrëzimit të Komisioneres, 165 në favor dhe 10 abstenime.

Për të rrëzuar Komisioneren, ishte e nevojshme që mocioni të kalonte një prag të dy të tretave të votave, që përfaqëson shumicën e të gjithë eurodeputetëve të pranishëm. Meqë ky prag nuk u arrit, von der Leyen mbetet në krye të Komisionit të BE-së. Ky vendim erdhi një ditë pas një sfide të rëndësishme për Komisionin. Parlamentit Evropian i kërkohet që të dërgojë marrëveshjen tregtare BE-Mercosur në Gjykatën e Drejtësisë së Bashkimit Evropian për shqyrtim.

Mocioni i mosbesimit i grupit PfE u fokusua kryesisht tek nënshkrimi i marrëveshjes tregtare me vendet e Amerikës Latine, duke argumentuar se Komisioni nuk dëgjoi fermerët dhe qytetarët dhe se ka tejkaluar kompetencat e veta. Protesta të organizuara nga asociacionet e fermerëve u mbajtën jashtë Parlamentit në Strasburg gjatë javës, ku protestuesit mbajtën pankarta dhe kënduan këngë kundër presidencës së von der Leyen, duke kërkuar dorëheqjen e saj. Megjithatë, shumica e grupeve politike e mbështetën presidenten e Komisionit.

Debati për mocionin u zhvillua të hënën në Strasburg, me Komisionerin për Tregtinë, Marrëdhëniet Ndërinstitucionale dhe Transparencën, Maros Sefcovic, që përfaqësoi Komisionin. Pothuajse asnjë nga liderët e grupeve politike nuk ishin prezent, gjë që tregoi se mocioni nuk kishte interes të madh dhe rezultati i votës ishte i paracaktuar. Përveç mbështetësve të mocionit, vetëm disa dhjetëra eurodeputetë të tjerë, kryesisht nga partitë ekstremiste të djathta, votuan për rrëzimin e Komisioneres, edhe pse shumë eurodeputetë kanë kritikuar marrëveshjen Mercosur dhe politikat e von der Leyen.

Eurodeputetët nga grupet kryesore si Partia Popullore Evropiane (EPP), Socialistët dhe Demokratët (S&D), Reneu Europe dhe grupi i Gjelbër/ALDE mbështetën Komisioneren, me përjashtime të pakta. Për shembull, eurodeputetja holandeze e EPP-së, Jessika van Leeuuen nga Lëvizja Fermer–Qytetar (BBB), e cila kundërshton marrëveshjen BE-Mercosur, votoi për rrëzimin e von der Leyen. Grupi Europe of Sovereign Nations mbështeti plotësisht mocionin, ndërsa grupi i Konservatorëve dhe Reformistëve Evropianë (ECR) u nda: eurodeputetët polakë, francezë dhe rumunë votuan kundër Komisioneres, ndërsa ata italianë, belgë dhe çekë e mbrojtën atë.

Shumica e ligjvënësve nga Grupi i Majtë nuk morën pjesë në votim; megjithëse grupi e kundërshton fuqishëm von der Leyen, ata nuk donin të mbështesnin një mocion që vinte nga e djathta ekstreme. Tetë eurodeputetë të këtij grupi votuan për mocionin, përfshirë ligjvënës nga Lëvizja Pesë Yjet e Italisë (M5S). “Ne jemi në opozitë dhe për këtë arsye gjithmonë duhet të votojmë kundër von der Leyen, pavarësisht nga burimi i mocionit të mosbesimit”, tha Pasquale Tridico, kreu i delegacionit M5S, për Euronews.

Kjo ishte hera e katërt e votëbesimit që mbahet në Parlamentin Europian gjatë mandatit të dytë të von der Leyen si kryetare e Komisionit. Të tre herët e mëparshme, të zhvilluara në korrik dhe tetor 2025, gjithashtu konfirmuan mbështetjen e Parlamentit për të, me mocione mosbesimi që nuk u afruan kurrë pranë pragut për miratim.

Vota e së enjtes tregoi edhe një rritje të mbështetjes për Komisioneren, duke marrë më shumë vota në favor sesa në votat e mëparshme. Kjo tregon se, megjithëse marrëveshja BE-Mercosur ka shkaktuar debate të forta dhe protesta, von der Leyen ende ka besimin e shumicës së Parlamentit Evropian.

Presidenti finlandez Alexander Stubb e ka quajtur luftën e Rusisë në Ukrainë një “dështim të plotë strategjik për Vladimir Putinin”, në një sulm të ashpër ndaj udhëheqësit rus.

Duke folur në një panel në Forumin Ekonomik Botëror në Davos, Stubb tha se lufta e Putinit në Ukrainë ka shërbyer vetëm për të forcuar integrimin evropian, unitetin dhe investimet në mbrojtje.

“Kjo luftë është bërë një dështim i plotë strategjik për Vladimir Putinin”, ka thënë Stubb. “Ai e zgjeroi NATO-n, e bëri Ukrainën evropiane dhe i detyroi shtetet evropiane të rrisin buxhetet e tyre të mbrojtjes. Dhe tani po pyesim veten nëse jemi të aftë të mbrohemi. Përgjigja ime është po”.

Moska gjithashtu është përpjekur të parandalojë zgjerimin e NATO-s, por lufta ka nxitur kombe më parë neutrale, përfshirë Suedinë dhe Finlandën, të bashkohen me aleancën, duke dyfishuar në mënyrë efektive madhësinë e kufirit të Rusisë me aleancën ushtarake perëndimore.

“Mendoj se ne jemi në të vërtetë në procesin e krijimit të një NATO-je më të fortë se sa kemi parë që nga përfundimi i Luftës së Ftohtë. Kjo është në të vërtetë NATO 3.0”, shtoi ai.

Presidenti finlandez shtoi se Moska ka “zvogëluar sferën e saj të ndikimit”, duke deklaruar se “vendet në Azinë Qendrore dhe Kaukazin Jugor” tani po “distancëzohen nga e ashtuquajtura perandori ruse”.

Pas pothuajse katër vitesh lufte të ashpër, forcat e Moskës kanë arritur vetëm fitime të vogla në tokën ukrainase me një kosto prej qindra mijëra trupash të vdekura ruse.

Stubb pretendoi se Rusia ka pësuar rreth një milion viktima, duke vënë në dukje se përparimet e saj territoriale në Ukrainën lindore, që nga ofensiva e parë, arrijnë vetëm në rreth 2 përqind të tokës ukrainase.

Ai gjithashtu vuri në dukje vështirësitë në ekonominë ruse, duke vlerësuar se inflacioni mund të arrijë rreth 30 përqind këtë vit. Normat e interesit mbeten në 15 përqind, rritja ekonomike është ndalur dhe rezervat financiare janë varfëruar nga lufta e gjatë në Ukrainë, shtoi ai.

“Nuk ka rritje, nuk ka rezerva dhe nuk ka mundësi për të paguar ushtarët pasi të mbarojë lufta”, tha Stubb, duke theksuar se qytetarët rusë po frustrohen gjithnjë e më shumë nga çështjet ekonomike në vend, shumë prej të cilave janë të nxitura nga ekonomia e kohës së luftës.

Komentet e zotit Stubb erdhën përpara një takimi midis Putinit dhe të dërguarve të paqes të Donald Trump, Steve Witkoff dhe Jared Kushner, të enjten.

Bisedimet për paqen në Ukrainë do të jenë takimi i 7-të i tillë midis zotit Witkoff dhe Putinit që kur Trump u rikthye në detyrë janarin e kaluar – por asnjëra nuk duket se ka bërë përparim të rëndësishëm drejt paqes.

Presidenti finlandez dyshon se Moska do ta miratojë planin 20-pikësh që po përpunohet nga Uashingtoni dhe Ukraina si pjesë e marrëveshjeve për t’i dhënë fund luftës, duke theksuar se është jetike të vazhdohet forcimi i mbështetjes për Ukrainën.