Real Madridi ka arritur fitore me shumë mund ndaj Rayo Vallecano 2-1 në frymën e fundit.

Reali mori një goditje të rëndë në minutat e para të ndeshjes, kur ylli anglez Jude Bellingham pësoi një lëndim dhe në minutën e 10-të u zëvendësua nga Brahim Diaz.

E ylli maroken asistoi te Vinicius Junior pesë minuta më vonë, derisa braziliani realizoi një gol spektakolar për epërsinë e vendasve për 1-0.

Me epërsinë minimale të Los Blancos 1-0 u mbyllen 45 minutat e para të ndeshjes.

Pjesa e dytë nisi për mrekulli për mysafirët të cilët barazuan në minutën e 49-të me anë të de Frutos 1-1.

Reali u hodh në sulm për të gjetur golin e epërsisë, derisa Vallecano në minutën e 80-të mbetën me një futbollist më pak në fushë kur Papis Ciss u ndëshkua me karton të kuq.

Deri në fund madrilenët tentuan golin, por u desh të pritej minuta e 98-të për golin e fitores.

Brahim Diaz fitoi një penallti të vonshme, derisa Kylian Mbappe u tregua i saktë nga pika e bardhë duke shënuar për 2-1.

Me këtë fitore Reali vazhdon të mbetet në pozitën e dytë në tabelë me 54 pikë, një më pak se Barcelona.

Ndeshjen e ardhshme Reali e zhvillon në udhëtim te Valencia, derisa Vallecano pret Real Oviedon. /Telegrafi/

Fortuna Dusseldorf ka marrë një fitore shumë të rëndësishme në Bundesliga 2, teksa ka mposhtur Paderbornin me rezultat 2-1.

Ka qenë një ndeshje ku vendasit kanë fituar me rikthim dhe ylli kosovar Florent Muslija ka qenë vendimtar në këtë takim.

Mysafirët pas dy minutave lojë kaluan në epërsi me golin e Okpalas, por në pjesën e dytë Dusseldorf bënë rikthimin e madh, ndërsa Muslija asistoi në golin e barazimit në minutën e 64-të, ku shënoi Appelkamp.

Reprezentuesi kosovar ishte ndër më të mirët në fushë, duke u vlerësuar me notën 7,0 nga SofaScore. /Telegrafi/i

Carlos Alcaraz mposhti Novak Djokovicin në finalen e Australian Open me rezultat 3:1 në sete, duke arritur një sukses historik që ishte pritur për plot 88 vjet.

Me këtë fitore, Alcaraz hyri në histori duke u bërë lojtari më i ri që kompleton Grand Slam-in në karrierë, pra që fiton të katër turnetë madhorë të tenisit.

Spanjolli, i cili më herët kishte në vitrinën e tij trofetë e Wimbledon, Roland Garros dhe US Open, me triumfin në Australian Open u bë vetëm lojtari i nëntë në histori që fiton të katër turnetë Grand Slam.

Në moshën 22 vjeç e 272 ditë, ai vendosi një rekord të ri historik.

Rekordi i mëparshëm kishte qëndruar i pathyer për 88 vjet dhe mbahej nga legjenda Don Budge, i cili e kompletoi Grand Slam-in në Roland Garros në vitin 1938, vetëm dy ditë para ditëlindjes së tij të 23-të. /Telegrafi/

Trajneri i Manchester United, Michael Carrick, dëshiron ta rikthejë Marcus Rashfordin në Old Trafford, raportojnë mediat angleze.

Megjithatë, rikthimi i sulmuesit anglez nuk duket i lehtë, pasi ai ka plane të tjera për të ardhmen e tij.

Siç dihet, Rashford është pjesë e Barcelonës këtë sezon në formë huazimi nga Manchester United dhe po zhvillon paraqitje mjaft pozitive me kampionët e Spanjës.

Në 31 ndeshje të luajtura në të gjitha garat këtë sezon, Rashford ka shënuar nëntë gola dhe ka dhënë nëntë asistime, duke u shndërruar në një nga lojtarët më të rëndësishëm të skuadrës katalanase. Sulmuesi tashmë e ka bërë të qartë se dëshiron të vazhdojë aventurën e tij në “Camp Nou”.

telegrafi.com

“Ajo që dua të bëj është të qëndroj te Barça. Ky është qëllimi im përfundimtar. Barcelona është një klub i madh dhe fantastik, i ndërtuar për të fituar tituj. Që nga momenti që mbërrita, u ndjeva shumë i mirëpritur. Jam në mjedisin e përsosur për të vazhduar rrugëtimin tim si futbollist”, kishte deklaruar Rashford në dhjetor.

Ai shtoi se fokusi i tij është të japë maksimumin çdo ditë dhe të ndihmojë ekipin të fitojë, ndërsa e ardhmja do të sqarohet në verë.

Vlen të theksohet se nëse Barcelona dëshiron ta mbajë përfundimisht Rashfordin, do të duhet të paguajë klauzolën e blerjes prej 35 milionë eurosh. /Telegrafi/

Tenisti më i mirë në botë, Carlos Alcaraz, fitoi Australian Open pas një përmbysjeje spektakolare ndaj Novak Djokovicit , duke triumfuar me rezultat 2:6, 6:2, 6:3, 7:5 pas pak më shumë se tre orësh lojë në Rod Laver Arena në Melbourne.

Në fillim të ndeshjes, të dy lojtarët ishin shumë të fortë në servimet e tyre, duke lejuar pak mundësi për break në tre gemat e para. Megjithatë, Djokovic arriti të fitonte setin e parë 6:2, duke treguar siguri në çdo pikë vendimtare.

Seti i dytë ishte shfaqja e fuqisë së Alcaraz. Spanjolli bëri dy break, në gemin e tretë dhe të shtatë, duke barazuar setet me 6:2, duke treguar pse është numri një i botës.

Në setin e tretë, pas një starti të barabartë, Alcaraz shfrytëzoi një pikë break në gemin e pestë për të kaluar në avantazh 3:2. Ai ruajti serviset deri në fund dhe realizoi një tjetër break për të fituar setin 6:3.

Seti i katërt u vendos në gemin e dymbëdhjetë, ku Alcaraz realizoi breakin vendimtar dhe mbylli ndeshjen me 7:5, duke vulosur fitoren e tij spektakolare.

Me këtë triumf, 22-vjeçari Alcaraz bëri histori, duke u bërë lojtari më i ri që kompleton Grand Slam-et në karrierë, ndërsa ia prishi ëndrrat Djokovicit për të fituar titullin e 25-të Grand Slam, që do ta kishte bërë më të dekoruarin në tenis.

Rezultati final:

Alcaraz – Djokovic 2:6, 6:2, 6:3, 7:5

Atmosfera te Real Madridi është e tensionuar, dhe Jude Bellingham është në qendër të vëmendjes.

Për shkak të sjelljes së tij brenda dhe jashtë fushës, portieri me përvojë Thibaut Courtois thuhet se ka ndërhyrë për të adresuar situatën.

Shkëndija e fundit erdhi pas humbjes tronditëse 4:2 ndaj Benficas në Ligën e Kampionëve, një rezultat që e detyron skuadrën e Alvaro Arbeloas të luftojë për të kaluar në fazën eliminatore.

Gjatë asaj ndeshjeje, Bellingham tregoi shenja frustrimi në disa momente, ndërsa gjuha e trupit të tij nuk kaloi pa u vënë re.

Courtois ka zhvilluar një bisedë serioze me trajnerin, duke shprehur shqetësimet e tij për sjelljen e mesfushorit anglez.

Sipas belgut, Bellingham “shkëputet” shpesh nga loja, neglizhon detyrat mbrojtëse dhe nuk kontribuon në ekip kur nuk po performon mirë në sulm. Courtois theksoi se nuk bëhet fjalë për një konflikt personal, por për një çështje profesionale, duke i kërkuar Arbeloas të marrë vendime të vështira, por të nevojshme.

“Nëse Bellingham nuk punon dhe nuk ngrihet, ai duhet të shkojë në stol”, raportohet të ketë thënë ai, duke nënvizuar se askush nuk duhet të ndihet i paprekshëm.

Pyetjet rreth temperamentit të Bellingham nuk janë të reja. Qëndrimi i tij ka qenë objekt diskutimi më parë në Angli, ku trajneri Thomas Tuchel zbuloi se nëna e lojtarit e konsideronte “zemërimin, urinë dhe zjarrin” e tij në fushë “të neveritshëm”, megjithëse më vonë kërkoi falje për ato komente, raporton GiveMeSport. /Telegrafi/

Karim Benzema pritet të largohet nga Al-Ittihad pasi ka prishur marrëdhëniet me drejtuesit e klubit shkaku i kontratës së re.

Shumë klube janë vënë pas veteranit francez, derisa gjiganti turk Besiktas është shokuar nga kërkesat e Benzemas.

Sipas raportimeve nga Turqia, sulmuesi i Al-Ittihad, Karim Benzema, i ka bërë një kërkesë surprizuese Besiktasit, duke kërkuar një pagë prej 20 milionë eurosh në vit, si dhe gjysmën e të ardhurave nga shitjet e fanellave të tij, ndërkohë që mediat raportojnë se ai po shqyrton largimin nga klubi saudit.

Megjithatë, gjigantët turq kanë refuzuar menjëherë kërkesën e ish-sulmuesit të Real Madridit, e cila konsiderohet jashtë parametrave financiarë të klubit.

Benzema duket i zhgënjyer nga oferta e rinovimit e Al-Ittihad dhe nuk është i sigurt nëse dëshiron të vazhdojë të luajë për klubin saudit.

38-vjeçari, kontrata e të cilit skadon këtë verë, ka shënuar 16 gola në 21 ndeshje këtë sezon, duke treguar edhe një herë formën e tij të lartë në fushë. /Telegrafi/

Liverpooli po negocion për të sjellë në Anfield mbrojtësin e kombëtares holandeze, Lutsharel Geertruida, në formë huazimi, sipas gazetarit të njohur David Ornstein.

25-vjeçari aktualisht është në huazim njëvjeçar te Sunderland nga RB Leipzig, por klubet po diskutojnë mundësinë e ndërprerjes së këtij huazimi për ta lejuar një transferim drejt Liverpoolit.

Geertruida, që mund të luajë si mbrojtës i djathtë, qendërmbrojtës apo mesfushor mbrojtës, ka tërhequr interesin e Liverpoolit për shkak të mungesave në linjën e tyre mbrojtëse.

Çdo transferim i tij te Reds do të kërkonte miratimin e Sunderlandit.

Holandezi ka bashkëpunuar më parë me trajnerin e Liverpoolit, Arne Slot, gjatë tre sezoneve te Feyenoord, para se të transferohej te RB Leipzig në vitin 2024, duke i dhënë menaxherit njohuri të mirë mbi aftësitë dhe shkathtësinë e tij. /Telegrafi/

Atletico Madrid dhe Fenerbahçe kanë kaluar fundjavën duke u përpjekur të bindin Ademola Lookman që t’u bashkohej, pasi të dy klubet kanë arritur marrëveshje me Atalantën për një transferim prej 40 milionë eurosh.

Tani, topi është në fushën e nigerianit, i cili ka marrë vendimin e tij.

Fillimisht tingëllonte dekurajuese për tifozët e Atletico Madridit që pas një merkatoje ku u larguan katër lojtarë, asnjë përforcim i ri nuk do të mbërrinte në Metropolitano. Por fjalët e Diego Simeones në konferencën për shtyp, ku deklaroi se duhet të punojë me atë që do t’i sjellin, dhe komentet e Mateo Alemany se klubi do të sillte vetëm një përforcim që do ta përmirësonte vërtet skuadrën, mbajtën shpresat gjallë.

Dje pasdite u përhap lajmi se Atletico de Madrid kishte barazuar ofertën e Fenerbahçes prej 40 milionë eurosh për Lookman.

Atalanta nuk ka pasur probleme me këtë shumë, duke e konsideruar të mjaftueshme për ta lënë lojtarin të largohet nga Bergamo. Pjesa më e vështirë ishte bindja e vetë lojtarit nigerian.

Për këtë qëllim, Atletico theksoi avantazhet e La Ligës mbi Super Ligën turke, duke argumentuar se edhe pse rezultatet e fundit nuk kanë qenë të mira, skuadra mbetet konkurruese në të gjitha garat. Përveç kësaj, klubi përmirësoi ofertën financiare fillestare, duke përfshirë pagën e Lookman.

Sipas gazetarit të njohur të transferimeve, Fabrizio Romano, ish-fituesi afrikan i Topit të Artë ka zgjedhur t’i bashkohet Rojiblancos. /Telegrafi/

Boksieri amerikan i peshës së rëndë, Jarrell Miller, zhvilloi një ndeshje mjaft të stuhishme gjatë natës në arenën më të famshme të boksit, Madison Square Garden.

Milleri arriti ta mposhtë ngushtë Kingsley Ibeh, por momenti që do të mbahet mend më shumë nga kjo përballje ndodhi në raundin e dytë dhe nuk kishte të bënte drejtpërdrejt me rezultatin.

Gjatë një shkëmbimi të ashpër goditjesh, Ibeh e goditi fort Millerin me një grusht nga lart, duke bërë që parukja e tij t’i binte nga koka në mes të ringut.

I vetëdijshëm për situatën, Miller reagoi me humor dhe vetëbesim, duke e hequr plotësisht paruken dhe duke e hedhur drejt publikut, veprim që shkaktoi entuziazëm të madh në tribuna.

Në fund, boksieri me përvojë e mbylli ndeshjen me fitore, kryesisht falë grushteve të shkurtra dhe kontrollit të duelit, duke triumfuar ndaj Ibeh me vendim të gjyqtarëve. /Telegrafi/

- YouTube www.youtube.com

Liverpooli ende nuk është bindur ta lë të lirë të largohet mesfushorin Curtis Jones.

Gazetari i njohur Fabrizio Romano ka dhënë një përditësim të ri lidhur me transferimin e mundshëm në formë huazimi të Curtis Jones nga Liverpooli te Interi, duke konfirmuar se negociatat mes palëve janë aktualisht të bllokuara.

Sipas Romanos, klubi anglez nuk ka dhënë dritën jeshile për largimin e mesfushorit, kryesisht për shkak të situatës së kontratës së tij.

“Për momentin, marrëveshja mbetet plotësisht e bllokuar, edhe për shkak të çështjes së rinovimit. Liverpooli nuk do ta lejonte Curtis Jones të largohej në huazim me vetëm një vit të mbetur në kontratën e tij”, shpjegoi Romano.

Ai shtoi se një marrëveshje për zgjatjen e kontratës do të ishte çelësi për çdo lëvizje të mundshme në të ardhmen.

“Aktualisht nuk ka asnjë marrëveshje për rinovimin e kontratës. Do të shohim nëse palët arrijnë dakordësi për një kontratë të re, por për momentin gjithçka është e bllokuar për Curtis Jones.”

Liverpooli pritet të vazhdojë bisedimet me përfaqësuesit e lojtarit për çështjen e kontratës, përpara se të merret ndonjë vendim për huazim apo transferim të përhershëm. /Telegrafi/

Real Madridi po planifikon një ndryshim të madh në afatin kalimtar të verës 2026, me përforcimin e mesfushës që shihet si prioritet absolut, përkrah afrimit të një mbrojtësi qendror.

“Los Blancos” janë në kërkim të profileve më të reja dhe dinamike për repartin e mesfushës, ku në krye të listës ndodhen Vitinha i Paris Saint-Germain dhe talenti holandez i AZ Alkmaar, Kees Smit.

Megjithatë, PSG nuk ka gjasa të heqë dorë nga mesfushori portugez, duke e bërë transferimin e Vitinhas tejet të vështirë. Kjo situatë e shtyn Realin të fokusohet më seriozisht te Smit, i cili shihet si një alternativë shumë premtuese.

Smit është ndjekur prej kohësh nga drejtuesit madrilenë dhe është krahasuar shpesh me yllin e Barcelonës, Pedri, falë stilit të tij të lojës dhe vizionit në fushë. Te Reali ekziston besim i madh në potencialin dhe vlerën e tij afatgjatë.

20-vjeçari është shndërruar në një figurë kyçe të mesfushës së AZ Alkmaar, me paraqitje mbresëlënëse që i kanë siguruar statusin e një prej talenteve më të kërkuara në futbollin evropian.

Në këtë sezon, mesfushori holandez ka shënuar tre gola dhe ka regjistruar pesë asistime në të gjitha garat. /Telegrafi/

Aventura e Christopher Nkunku te Milani pritet të përfundojë shumë shpejt, madje pa u konsoliduar ende mirë, pasi francezi mund të largohet nga “San Siro” që në afatin kalimtar të janarit.

Sulmuesi 28-vjeçar nuk ka arritur të lërë gjurmë me fanellën kuqezi, ndërsa trajneri Massimiliano Allegri raportohet se ka dhënë dritën jeshile për largimin e tij nga skuadra.

Gjithçka lidhet me afrimin e mundshëm të Jean-Philippe Matetas. Nëse Milani arrin marrëveshje për yllin e Crystal Palace, atëherë largimi i Nkunkut do të bëhet i pashmangshëm.

Rossonerët tashmë kanë pranuar disa oferta, kryesisht për huazimin e lojtarit me opsion blerjeje në fund të sezonit.

Roma po këmbëngul më së shumti për shërbimet e francezit, pasi Nkunku është një nga dëshirat kryesore të Gian Piero Gasperinit dhe negociatat me Milanin kanë nisur.

Megjithatë, në garë për transferimin e tij janë futur edhe Atletico Madrid dhe Fenerbahçe, të cilat po e monitorojnë nga afër situatën e sulmuesit.

Këtë sezon, Nkunku ka zhvilluar 19 ndeshje në të gjitha garat me Milanin, duke grumbulluar 944 minuta lojë, me bilanc prej pesë golash dhe dy asistimesh. /Telegrafi/

Gjithsej pesë ndeshje u zhvilluan mbrëmë në parketet e NBA-së, duke sjellë duele interesante dhe rezultate të rëndësishme.

Houston Rockets shënuan fitore në shtëpi ndaj Dallas Mavericks, duke triumfuar me rezultat 111:107 në Toyota Center në Teksas.

Me këtë humbje, Dallas vazhdoi serinë negative, duke pësuar disfatën e katërt radhazi këtë sezon.

Rockets u udhëhoqën drejt fitores së 30-të sezonale nga Thompson me 21 pikë, ndërsa Smith kontribuoi me 19 pikë. Ndërkohë, lojtari yll Kevin Durant pati një paraqitje modeste, duke e mbyllur ndeshjen me 13 pikë.

Te Dallas, më i dalluari ishte Flagg, i cili realizoi një double-double impresionues me 34 pikë dhe 12 ribaunde.

Në një tjetër ndeshje mjaft interesante, Chicago Bulls triumfuan në transfertë ndaj Miami Heat me rezultat 125:118, duke i dhënë fund një serie prej tri humbjesh radhazi.

Dosunmu ishte lideri i Bulls me 29 pikë, ndërsa Buzelis shtoi 21. Te Miami, më efikasit ishin Larsson me 22 pikë dhe Adebayo me 21.

Rezultatet :

Indiana Pacers – Atlanta Hawks 129:124

- YouTube www.youtube.com

Philadelphia 76ers – New Orleans Pelicans 124:114

- YouTube www.youtube.com

Memphis Grizzlies – Minnesota Timberwolves 114:131

- YouTube www.youtube.com

Miami Heat – Chicago Bulls 118:125

- YouTube www.youtube.com

Houston Rockets – Dallas Mavericks 111:107

- YouTube www.youtube.com

Barcelona ka regjistruar një fitore shumë të rëndësishme në transfertë ndaj Elches, duke triumfuar me rezultat 3-1 dhe duke vazhduar kryesimin në La Liga.

Pas ndeshjes, trajneri i Barcelonës, Hansi Flick, ka folur për paraqitjen e skuadrës së tij, duke vlerësuar lojën e zhvilluar, por pa i kursyer kritikat për efikasitetin para portës.

“Është një fitore e rëndësishme dhe mendoj se luajtëm një ndeshje shumë të mirë. Në fund humbëm disa raste dhe kjo është pak bezdisëse, por në përgjithësi jam i kënaqur”, u shpreh Flick.

“Mendoj se zhvilluam një ndeshje pothuajse perfekte, përveç në tre metrat e fundit, ku humbëm shumë mundësi shënimi”, shtoi trajneri gjerman.

telegrafi.com

Ai theksoi se skuadra e tij e shfrytëzoi mirë hapësirat e lëna nga kundërshtari.

“Po i kalonim shumë lehtë hapësirat që na lanë. Krijuam shumë raste dhe dua ta përgëzoj ekipin për performancën.”

Flick nënvizoi se Barcelona duhet të vazhdojë me të njëjtin stil loje edhe në vazhdim.

“Duam të vazhdojmë të luajmë kështu. Jemi të sigurt në lojën tonë dhe i merituam plotësisht tri pikët ndaj Elches.”

Në fund, ai u rikthye te problemi i konkretizimit.

“Kemi krijuar shumë raste dhe duhet të kishim shënuar më shumë gola. Kjo do ta bënte më të lehtë menaxhimin e minutave në fund.”

Barcelona vazhdon të kryesojë La Ligën me 55 pikë, katër më shumë se Real Madridi, i cili ka një ndeshje më pak të zhvilluar. /Telegrafi/

Flakron Hadergjonaj, vëllai i vogël i mbrojtësit të Kombëtares së Kosovës Florent Hadergjonaj, po ndërton një emër gjithnjë e më të respektuar në botën e futbollit, por jashtë fushës së lojës.

Derisa Florenti po shkëlqen në fushë, Flakroni është i lidhur ngushtë me futbollin në rolin e agjentit të lojtarëve, duke realizuar punë të rëndësishme në prapaskenë. Deçanasi, i cili jeton dhe vepron në Zvicër, është përkujdesur ndër vite për karrierën e vëllait të tij të madh, duke ndërmjetësuar transferimet e tij te Ingolstadt, Huddersfield, Kasimpasa dhe aktualisht Alanyaspor, por edhe për futbollistë të tjerë.

Së fundmi, përmes kompanisë së tij FH Sports Management, Flakron Hadergjonaj ka realizuar një transferim të konsideruar sensacional gjatë afatit kalimtar të janarit. Bëhet fjalë për futbollistin çeçen Rakhim Chaadaev.

Sulmuesi i talentuar 20-vjeçar është produkt i Akademisë së Akhmat Grozny, ndërsa sezonin e kaluar kishte bërë një hap prapa në karrierë duke u transferuar në ligën e katërt të Rusisë, te Angusht Nazran.

Yilmaz Seyfi dhe Rakhim Chaadaev

Megjithatë, falë lidhjeve të shkëlqyera të Flakron Hadergjonajt me klubet turke dhe bashkëpunimit me agjentin Yilmaz Seyfi, Chaadaev ka siguruar një transferim në Ligën e Parë të Turqisë, te Hatayspor, ish-skuadra e portierit kosovar Visar Bekaj.

“Ka qenë padyshim transferimi më i veçantë, pasi të transferosh një futbollist nga liga e katërt e Rusisë në ligën e parë turke është një arritje e madhe”, ka deklaruar Flakron Hadergjonaj për Telegrafin.

“Janari është një muaj shumë i vështirë për transferime, sepse klubet janë pothuajse të kompletuara dhe ndryshimet bëhen me vështirësi. Gjithsesi, transferimin e Chaadaev e konsideroj jashtëzakonisht të veçantë”, shtoi ai.

Telegrafi e ka pyetur Hadergjonajn edhe për vëllanë e tij Florent Hadergjonaj, i cili po kalon një sezon shumë të mirë me Alanyasporin, duke realizuar pesë gola dhe katër asistime këtë edicion.

Dy vëllezërit Hadergjonaj, Flakroni dhe Florenti në momentin që ky i dyti nënshkroi për Alanyasporin

“Jam i lumtur me formën e Florentit. Ai është një nga mbrojtësit më produktivë në Superligën e Turqisë dhe po kalon një periudhë të shkëlqyer”, u shpreh Flakroni.

I pyetur për të ardhmen e Florentit, ai shtoi: “Gjithmonë ka oferta për të, edhe tani, por Alanyaspor e vlerëson jashtëzakonisht shumë. Të shohim në verë – nëse vjen oferta e duhur për klubin dhe lojtarin, atëherë gjithçka mund të ndodhë”.

Edhe pse ende i ri në moshë, Flakron Hadergjonaj po bën punë të jashtëzakonshme në menaxhimin e futbollistëve, duke ndërtuar një rrjet të gjerë kontaktesh me klube nga Zvicra, Gjermania, Austria, Turqia, Kroacia dhe Polonia. /Telegrafi/

Anësori i Al-Ittihad, Moussa Diaby, është shndërruar në një nga objektivat kryesorë të Interit në këtë merkato dimri, me zikaltërit që po punojnë intensivisht për të mbyllur transferimin e tij para përfundimit të afatit kalimtar.

Sipas raportimeve, Interi ka arritur një marrëveshje personale me sulmuesin francez, por oferta e parë e klubit italian është refuzuar nga gjigantët sauditë.

Gazetari Fabrice Hawkins bën të ditur se propozimi i Interit ishte një huazim me opsion blerjeje në vlerën e 35 milionë eurove, por Al-Ittihad nuk është bindur nga kjo formulë.

Klubi saudit, i drejtuar nga trajneri Sergio Conceicao, thuhet se kërkon një shitje të përhershme për t’u ndarë me Diabyn që në mes të sezonit.

Megjithatë, Interi mbetet i vendosur për të finalizuar transferimin në ditët në vijim. Madje, trajneri i zikaltërve, Cristian Chivu, raportohet se e ka kontaktuar personalisht Diabyn për t’i prezantuar projektin sportiv dhe rolin që do të kishte në skuadër.

Merkatoja mbetet e hapur dhe pritet të shihet nëse Interi do të rikthehet me një ofertë të re për të bindur Al-Ittihad. /Telegrafi/

Barcelona vazhdon të punojë intensivisht për përforcimet e saj të ardhshme, ndërsa tre prej afrimeve të radhës ishin të pranishëm mbrëmë në Camp Nou gjatë përballjes së Ligës së Kampionëve kundër Copenhagen.

Bëhet fjalë për Hamza Abdelkarim, Juwensley Onstein dhe Patricio Pacifico, të cilët janë shumë pranë finalizimit të transferimeve te Barca Atletic, skuadra rezervë e klubit katalanas.

Sipas raportimeve, Patricio Pacifico ka kryer tashmë testet mjekësore me Blaugranët dhe një njoftim zyrtar pritet së shpejti.

Mbrojtësi i majtë 19-vjeçar uruguaian do të transferohet nga Defensor Sporting në formë huazimi me opsion blerjeje.

Ndërkohë, Barcelona ka fituar garën ndaj klubeve të mëdha si AC Milan dhe Bayern Munich për të siguruar shërbimet e qendërmbrojtësit të talentuar të Genk, Juwensley Onstein, i konsideruar si një nga mbrojtësit më premtues të momentit.

Sa i përket Hamza Abdelkarimit, katalanasit kanë qenë prej kohësh në negociata me klubin e tij, Al-Ahly, por ende nuk është arritur një marrëveshje përfundimtare. Megjithatë, Barcelona mbetet optimiste se do të sigurojë firmën e sulmuesit 18-vjeçar egjiptian, fillimisht në formë huazimi, me opsion për transferim të përhershëm në qershor.

Të tre lojtarët pritet të jenë pjesë e projektit të së ardhmes së Barcelonës, duke forcuar më tej akademinë dhe skuadrën rezervë të klubit. /Telegrafi/

Largimi i Kristjan Asllanit nga Italia është drejt finalizimit. Mesfushori shqiptar pritet të mbyllë periudhën e tij të huazimit te Torino dhe të rikthehet zyrtarisht te Interi, klub i cili tashmë ka nisur bisedimet për transferimin e tij te gjiganti turk, Besiktas.

Sipas raportimeve, marrëveshja mes palëve është shumë pranë përfundimit dhe parashikon një huazim me opsion blerjeje, me një vlerë që shkon nga 12 deri në 13 milionë euro.

Eksperti i njohur i merkatos, Fabrizio Romano, ka dhënë detaje të reja rreth marrëveshjes së arritur mes dy klubeve.

“Kristjan Asllani te Besiktas, ja ku jemi. Marrëveshje e rënë dakord verbalisht me Interin për huazim me klauzolë opsioni blerjeje”, ka shkruar Fabrizio Romano.

Gazetari italian shton se Besiktas do të mbulojë plotësisht pagën e mesfushorit deri në qershor, ndërsa opsioni i blerjes nuk do të jetë i detyrueshëm.

Nëse gjithçka shkon sipas planit, Asllani pritet të fluturojë drejt Stambollit më vonë gjatë ditës së sotme për të kryer procedurat e fundit dhe për të nisur aventurën e re në Superligën turke. /Telegrafi/

Nata e fundit e fazës së ligës në Ligën e Kampionëve solli një nga momentet më dramatike të viteve të fundit, ndërsa Benfica siguroi kualifikimin në sekondat e fundit falë një goli të pabesueshëm nga portieri i saj.

Benfica po fitonte 3:2 ndaj Real Madridit deri në minutën e 98-të, por kjo nuk mjaftonte për të kaluar në fazën eliminatore. Për të siguruar vendin e fundit në play-off për raundin e 16-tave, portugezëve u duhej edhe një gol për të përmirësuar diferencën e golave.

Në momentin kur dukej se gjithçka kishte marrë fund, u shfaq portieri Anatoliy Trubin, i cili në sekondën e fundit shënoi golin vendimtar për rezultatin 4:2, duke e çuar Benfikën në fazën tjetër të garës.

Ky gol nuk u prit mirë nga të gjithë, pasi la jashtë garës Olympique de Marseille, që deri në atë çast po shpresonte të kualifikohej.

Gjigantët francezë ishin mposhtur 3-0 nga Club Brugge, por ende prisnin përfundimin e ndeshjes Benfica–Real Madrid, me shpresën se rezultati do t’i favorizonte.

Madje festa shkoi aq larg sa Club Brugge e përgëzoi Marsejën për kualifikimin në ekranin e madh të stadiumit, duke shkruar:

"Urime për kualifikimin, Olympique de Marseille", shkruhej në ekranin gjigant nga Club Brugge.

Megjithatë, belgët nuk e dinin se Benfica kishte ende kohë për të shënuar, dhe ky gjest xhentëlmenësh përfundoi duke u kthyer në një moment edhe më të dhimbshëm për tifozët dhe lojtarët francezë. /Telegrafi/