Këtë vit, në Mitrovicë fillon projekti më i madh investiv pas luftës, i cili pritet të transformojë tërësisht qytetin në aspektin mjedisor.
Bëhet fjalë për ndërtimin e Impiantit të Trajtimit të Ujërave të Zeza, në vlerë prej rreth 40 milionë euro.
“Këtë vit fillon projekti më i madh investiv në Mitrovicën e pasluftës. Sivjet nis projekti ‘Impianti i Trajtimit të Ujërave të Zeza’, në vlerë prej rreth 40 milionë euro. Lumenjtë e qytetit do të jenë të pastër”, ka shkruar kryetari i Mitrovicës, Faton Peci.
Ai ka bërë të ditur gjithashtu se ka vizituar lokacionin e ndërtimit së bashku me Kryeshefin e Kompanisë Rajonale të Ujësjellësit “Mitrovica”, Bashkim Kurti, dhe ka theksuar ndikimin e madh mjedisor që do të ketë ky projekt.
“Ky impiant do të ketë ndikim të drejtpërdrejtë në ruajtjen e mjedisit, për një Mitrovicë më të gjelbër, përkatësisht në ruajtjen e florës dhe faunës”, tha Peci.
Ai ka përfunduar duke theksuar se investimi do të ndryshojë në mënyrë të qëndrueshme pamjen dhe cilësinë e jetesës në qytet.
“Ky investim do ta transformojë tërësisht Mitrovicën në aspektin mjedisor", ka shkruar Peci. /Telegrafi/
Gjykata e Posaçme rrëzoi një kërkesë të kryebashkiakut të Tiranës, Erion Veliaj, për lirim nga paraburgimi.
Kryebashkiaku kërkoi zbutje të masës me arsyetimin se nuk kishte më kushte ligjore për mbajtje në izolim.
Nga kafazi i sallës, Veliaj theksoi se paraburgimi ishte kthyer në një instrument dënimi pa gjyq.
Në gati 1 orë e30 minuta seancë, ku ishte edhe vetë i pranishëm, Veliaj, ritheksoi edhe njëherë faktin se nuk i ishin vënë në dispozicion të gjitha aktet e dosjes.
Sipas burimeve, ai refuzoi edhe avokaten kryesisht, duke pretenduar se e kishte testuar dhe kuptuar se ajo nuk e njihte çështjen e tij.
Veliaj ka pretenduar, se paraburgimi ishte kthyer në një instrument dënimi pa gjyq, ndërsa arsyet ligjore të zbutjes së masës, i ka parashtruar avokati i tij, Sokrat Gjermeni. /A2 Televizion/
16 vjeçari i cili kishte mbetur i bllokuar nën rrënoja në veturë, të premten fshatin Meliq të Hanit të Elezit, si pasojë e shembjes së murit mbi veturë, sipas informatave ka lëndime të rënda trupore dhe duhet të ketë trajtim kirurgjik.
Këtë ka bërë të ditur për KosovaPress, mjeku kujdestar në Klinikën e Ortopedisë në QKUK, Sami Delijaj që kishte pranuar pacientin nga Emergjenca.
Delijaj ka thënë se i njëjti është në observim të mëtejmë klinik, kardiologjik dhe laboratorik.
Ai ka bërë të ditur se nesër do të mblidhet stafi i Ortopedisë për të diskutuar rreth trajtimit të tij kirurgjik.
“Për momentin është i hospitalizuar në klinikën e ortopedisë, ka lëndime të rënda trupore, është në observim të mëtejmë klinik, kardiologjik dhe laboratorik. Besojmë që tash parametrat janë stabil, nesër do të mblidhemi konsulumi dhe më tutje do të vendosim në lidhje me trajtimin e tij kirurgjik..00:32 Për momentin jemi duke e përcjellë sepse është pjesa e emergjencës, e mjekëve, lëndimeve të tjera trupore, përpos atyre ortopedike, fillojmë me ato çka janë prioritet vital e pastaj shkojmë duke zvogëluar rrezikshmërinë për indikacionin e më tejmë të trajtimit”, ka thënë Delijaj.
Një mur është shembur të premten mbrëma në Han të Elezit, duke rënë mbi një veturë që po lëvizte në atë moment. Si pasojë, shoferi i automjetit ka mbetur i bllokuar nën rrënoja për disa minuta.
Në veturë ndodhej vetëm shoferi, një i mitur 16-vjeçar. Menjëherë pas raportimit të rastit, ekipet e shpëtimit kanë intervenuar për nxjerrjen e tij nga automjeti i dëmtuar. Aty janë parë edhe qytetarë që kanë ndihmuar, duke përfshirë edhe një eskuvatorë./KP/
Qendra e Skive në Brezovicë ka lëshuar një paralajmërim serioz pas një incidenti të ndodhur sot, ku tre skiatorë kanë hyrë jashtë pistave të shënuara, duke shkaktuar një ortek bore.
Sipas njoftimit të Qendrës së Skive në Brezovicë, dy nga skiatorët janë larguar vetë nga vendngjarja, ndërsa një tjetër ka mbetur në majë të një piste të pashënuar me këmbë të lënduar.
Falë ndërhyrjes së shpejtë dhe profesionalizmit të ekipit të shpëtimit, skiatori është transportuar në mënyrë të sigurt në ambulancë.
“Në këtë mënyrë, individët e papërgjegjshëm kanë rrezikuar jetën e tyre, si dhe jetën e shpëtimtarëve gjatë ndërhyrjes”, thuhet në njoftim.
Autoritetet kanë bërë të ditur se për incidentin është njoftuar edhe policia.
Qendra e Skive Brezovicë apelon tek të gjithë skiatorët dhe snowboarder-ët që të përdorin vetëm pistat zyrtare dhe të shënuara, pasi skijimi jashtë tyre përbën rrezik serioz për jetën e vizitorëve dhe të ekipeve të shpëtimit. /Telegrafi/
34 kryesues të Qendrave Komunale të Numërimit (QKN) në rajonin e Mitrovicës janë ndaluar për 48 orë, pas intervistimit në stacionin policor, nën dyshimet për manipulim të votave.
Lajmin e ka konfirmuar për Telegrafin, zëdhënësi i Prokurorisë Themelore në Mitrovicë, Valon Preteni.
Ai bëri të ditur se hetimet po zhvillohen në disa komuna të rajonit.
Më herët gjatë ditës, Prokuroria Themelore në Mitrovicë kishte njoftuar se do të intervistojë gjithsej 43 kryesues të QKN-ve në Mitrovicë Jug, Mitrovicë Veri, Leposaviq, Zubin Potok dhe Zveçan, për shkak të dyshimeve për manipulim të votave gjatë procesit zgjedhor.
Sipas Prokurorisë, hetimet janë iniciuar pas parregullsive të evidentuara gjatë procesit të rinumërimit të votave.
Ditëve të fundit, autoritetet në Kosovë kanë intervistuar qindra njerëz nëpër komuna të ndryshme, dhe kanë ndaluar dhjetëra, nën dyshimet e njëjta.
Përgjatë procesit të rinumërimit, votat për disa kandidatë ndryshuan, me raste deri në 6 mijë për një individ - ndërsa ato për partitë nuk u cenuan.
Sipas Kodit Penal të Republikës së Kosovës, manipulimi i qëllimshëm i votës apo i rezultatit zgjedhor përbën vepër penale dhe dënohet me burgim deri në pesë vjet. /Telegrafi/
Kandidati për deputet nga Aleanca për Ardhmërinë e Kosovës (AAK), Burim Ramadani, ka paralajmëruar për një situatë të ndërlikuar politike në vend, duke ngritur dilema serioze për mundësinë e mbajtjes së zgjedhjeve të reja.
Sipas Ramadanit, Kuvendi i Kosovës pritet të mblidhet rreth datës 20 shkurt, ndërsa nga ajo ditë fillojnë të rrjedhin afatet kushtetuese për konstituimin e institucioneve.
“Që nga ajo ditë, janë dy javë për të konstituuar Kuvendin, zgjedhur Qeverinë, miratuar Buxhetin për vitin 2026 dhe për të filluar procedurën për zgjedhjen e Presidentit të ri”, ka deklaruar Ramadani.
Ai ka theksuar se ngarkesa e këtyre proceseve brenda një kohe kaq të shkurtër e bën të domosdoshme një marrëveshje të gjerë politike.
“Nëse këto procese bëhen bashkë, atëherë është e domosdoshme një marrëveshje më e madhe politike. Nuk pres që kjo mund të ndodh lehtësisht”, është shprehur ai.
Ramadani ka rikujtuar gjithashtu se zgjedhja e Presidentit të ri ka një afat të prerë kushtetues.
“Presidenti i ri duhet të zgjedhet jo më vonë se deri në orët e fundit të 4 marsit”, ka theksuar kandidati i AAK-së.
Në fund, ai ka ngritur pyetjen nëse dështimi për arritjen e marrëveshjes politike mund ta çojë vendin drejt zgjedhjeve të reja. “A po shkon vendi në zgjedhje sërish?”, ka përfunduar Ramadani./Telegrafi/
Presidentja e Kosovës, Vjosa Osmani, ka ndarë në rrjetet sociale një video që shfaq bukuritë dimërore të vendit tonë.
Me pamje spektakolare të maleve të mbuluara me borë, videoja nxjerr në pah peizazhet unike që ofron Kosova gjatë sezonit të dimrit.
Videoja, e realizuar nga Fitim Sopjani, paraqet Kosovën si një destinacion tërheqës për turizëm dimëror, duke theksuar potencialin e saj natyror dhe turistik.
Në postimin e saj, Osmani e ka cilësuar dimrin në Kosovë si një bukuri të veçantë.
Ky promovim dëshmon edhe njëherë se Kosova është vend me pasuri të mëdha natyrore në çdo stinë të vitit. /Telegrafi/
Një aksident ka ndodhur sot në rrugën Pejë-Rugovë në kilometrin e tetë, saktësisht në vendin Kuqishtë, ku një gur i madh ka rrëshqitur dhe ka rënë mbi një veturë që po kalonte në atë zonë.
Lajmin për Telegrafin e ka konfirmuar zëdhënësi i policisë për rajonin e Pejës, Fadil Gashi.
Gashi bëri të ditur se si pasojë janë lënduar katër persona, prindërit dhe dy fëmijë.
“Rreth orës 12:00 në kilometrin e tetë në rrugën Pejë-Rugovë ka ndodhur një aksident, ku një gur që ka rrëshqitur ka goditur një veturë e cila ishte në lëvizje. Si pasojë katër persona kanë pësuar lëndime. Dy të rritur dhe dy fëmijë”, tha Gashi.
Ai shtoi se të lënduarit po trajtohen në Spitalin Rajonal të Pejës, dhe se sipas mjekut kujdestar gjendja e tyre është stabile dhe ndodhen jashtë rrezikut për jetë. /Telegrafi/
Ambasadorja e Izraelit, Tammy Ziv, ka uruar Kosovën dhe Izraelin me rastin e pesëvjetorit të vendosjes së marrëdhënieve diplomatike mes dy vendeve.
Përmes një postimi në rrjetin social X, Ziv ka theksuar rëndësinë e këtij përvjetori dhe ka shprehur dëshirën për thellimin e mëtejmë të bashkëpunimit mes dy shteteve.
“Urime Izraelit dhe Kosovës për festimin e 5 viteve të marrëdhënieve diplomatike. Uroj që ato të vazhdojnë të zhvillohen dhe të lulëzojnë”, ka shkruar ambasadorja Ziv.
Kosova dhe Izraeli vendosën marrëdhënie diplomatike më 1 shkurt 2021, ndërsa gjatë këtyre pesë viteve bashkëpunimi mes dy vendeve është zgjeruar në fusha të ndryshme. /Telegrafi/
Në aksin rrugor Librazhd-Qafë Thanë, në Dragostunjë, si pasojë e rrëshqitjes së një masivi dheu dhe gurësh nga mali, qarkullimi i automjeteve është bllokuar plotësisht në të dyja drejtimet.
Shërbimet e Policisë Rrugore ndodhen në këtë zonë dhe po bashkëpunojnë me firmën kontraktore të mirëmbajtjes së rrugëve për pastrimin në një kohë sa më të shpejtë të aksit rrugor me qëllim fillimin e lëvizjes së automjeteve.
Policia Rrugore e Elbasanit apelon për të gjithë që duan të udhëtojnë në drejtim të Korçës dhe anasjelltas të shmangin lëvizjen deri në një njoftim të dytë për hapjen e rrugës./abcnews/
Në mungesë të lobimit zyrtar në Shtetet e Bashkuara, presidentja e Kosovës, Vjosa Osmani, u shfaq muajt e fundit si një ndër figurat më aktive në arenën ndërkombëtare.
Pjesëmarrja e saj në ceremoninë e nënshkrimit të Kartës së Bordit të Paqes për Gazën dhe takimet me presidentin amerikan, Donald Trump – me shtrëngime duarsh dhe biseda vesh më vesh – kapën vëmendjen e mediave ndërkombëtare. Vendi me rreth 1.5 milion banorë tregoi se diplomacia aktive mund ta mbajë atë të dukshëm.
“Është një nismë historike, me një vizion të qartë: për të sjellë më shumë paqe dhe siguri në botë”, tha Osmani pasi nënshkroi Kartën e Bordit të Paqes më 22 janar.
Kjo nismë nuk u prit pa dilema. Demokraci si Franca dhe Gjermania e refuzuan pjesëmarrjen në të, duke paralajmëruar se ajo mund të dobësojë rolin e OKB-së dhe të hapë derën për figura si presidenti rus, Vladimir Putin.
Edhe në Kosovë, reagimet ishin të ndara: për disa, pjesëmarrja është një hap drejt rritjes së peshës ndërkombëtare të vendit, për të tjerë – një rreshtim i rrezikshëm përkrah regjimeve autoritare, përfshirë Bjellorusinë.
Kështu, debati rreth Bordit të Paqes la në hije një çështje tjetër thelbësore: mungesën e lobimit shtetëror të Kosovës në SHBA.
Donika Emini, njohëse e zhvillimeve politike, thotë se Kosova, për gati dy vjet, ka pasur shumë pak zëra aktivë në Uashington – jo për mungesë temash, por për mungesë strukture. Vendi nuk ka asnjë kontratë aktive lobimi në regjistrin e Agjentëve të Huaj të Departamentit të Drejtësisë amerikane, të njohur si FARA, që nga qershori i vitit 2024. Kjo, pavarësisht se lobimi i tillë i lejon çdo shteti të huaj të tentojë të ndikojë ligjërisht në politikat e SHBA-së.
Sipas Eminit, mungesa e këtij mekanizmi e dobëson aftësinë e Kosovës për të komunikuar interesat e saj, sepse, siç thotë, angazhimi individual i një zyrtari nuk mund ta zëvendësojë një strukturë profesionale lobimi – veçanërisht në SHBA.
“Është realisht shqetësuese, për faktin se SHBA-ja nuk funksionon si Bashkimi Evropian. Me vendet e BE-së, me vetë Brukselin, mund t’i menaxhosh marrëdhëniet bilaterale vetë, përmes kanaleve zyrtare, përfaqësuesve të shtetit. Në SHBA funksionon ajo platformë [FARA] dhe ajo mundësi, sepse gjithçka bëhet përmes lobimit. Asgjë nuk është rastësore”, thotë Emini, nga Grupi Këshillues për Politikat e Ballkanit në Evropë, për programin Expose të Radios Evropa e Lirë.
Që nga fillimi i viteve ’90, Kosova ka paguar kompani të shumta lobimi në SHBA, me qindra mijëra dollarë, për të promovuar agjendën e saj ndërkombëtare. Kontratat janë lidhur nga institucionet shtetërore me emra të njohur amerikanë, si Podesta Group dhe Ballard Partners.
Në pesë vjetët e fundit, gjatë pushtetit të presidentes Osmani dhe Qeverisë së Albin Kurtit, janë nënshkruar vetëm tri kontrata lobimi – të gjitha në vitin 2023: njëra afatshkurtër dhe dy të tjera që skaduan një vit më vonë.
Radio Evropa e Lirë ka kërkuar sqarime nga Presidenca, Qeveria dhe Ministria e Punëve të Jashtme dhe Diasporës lidhur me arsyet përse Kosova, aktualisht, nuk ka asnjë kontratë aktive lobimi të regjistruar në FARA. Deri më tani, asnjëri prej institucioneve nuk ka kthyer përgjigje, duke i lënë të hapura pyetjet për mungesën e një strategjie të qartë, planifikimin dhe koordinimin institucional.
Në një prej deklarimeve të rralla për çështjen e lobimit, ministrja e Jashtme, Donika Gërvalla – tani në detyrë – ka thënë se “po konsiderohet” vazhdimi i kontratave me dy kompanitë e kontraktuara më 2023 – të Avni Mustafajt dhe Afërdita Rakipit. Por, edhe gati një vit e gjysmë më vonë, kjo nuk ka ndodhur. Gërvalla ka deklaruar se është e kënaqur me punën e tyre, edhe pse shumica e shpenzimeve u kanë shkuar për dreka, udhëtime dhe takime në Prishtinë.
“Nuk ka shqetësime lidhur me këto kontrata. Ata dy punojnë së bashku në realizimin e detyrave të tyre”, ka thënë atëkohë Gërvalla.
Sipas Eminit, Kosova e merr për të mirëqenë mbështetjen politike të SHBA-së, pa kuptuar ndryshimet drastike të elitave politike, që kanë ndodhur atje.
“Nuk jemi në vitet ’90. Nuk kemi një elitë politike në SHBA që e njeh Ballkanin në detaje. Nuk kemi lobistë, senatorë apo kongresistë siç i kemi pasur dikur, të cilët e kanë pasur kauzë politike avancimin e Ballkanit”, thotë Emini.
Vesko Garçeviq, profesor i Praktikës së Marrëdhënieve Ndërkombëtare në Universitetin e Bostonit, thotë se pa lobistë që japin informacion nga brenda, Kosova rrezikon t’i keqkuptojë prioritetet e SHBA-së, duke hartuar politika që nuk përshtaten me pritjet e Uashingtonit dhe, për pasojë, marrin pak mbështetje. Në këtë mënyrë, Kosova – kushtimisht thënë – rrezikon edhe “të harrohet”, duke u dhënë hapësirë të tjerëve që ta krijojnë narrativin për të.
“Serbia, sidomos, ka investuar jashtëzakonisht shumë, si financiarisht, ashtu edhe përmes lidhjeve të saj, në ndërtimin e rrjetit të lobimit. Ndaj, po të isha në vendin e Qeverisë së Kosovës, do ta bëja të njëjtën gjë. Do të mendoja për të angazhuar dikë me ndikim që i përfaqëson interesat e Kosovës – jashtë zyrës diplomatike që Kosova ka në Uashington”, thotë Garçeviq për Exposenë.
Serbia, aktualisht, ka gjashtë kontrata aktive në Aktin e Regjistrimit të Agjentëve të Huaj – FARA. Njëra prej tyre përfshin edhe avokim para Kongresit amerikan dhe departamenteve të tij.
Nga vendet e tjera të rajonit, Bosnje e Hercegovina ka 14 kontrata aktive, shumica prej tyre të lidhura nga Republika Sërpska; Shqipëria ka katër, ndërsa Mali i Zi dhe Maqedonia e Veriut nuk kanë asnjë.
Garçeviq, ish-ambasador i Malit të Zi në disa vende evropiane, thotë se lobimi e kompenson peshën e kufizuar diplomatike të një vendi. Ndryshe nga vendet e mëdha, shtetet e vogla – si Kosova dhe Mali i Zi – nuk kanë ndikim të madh ekonomik, ushtarak apo strategjik, prandaj nuk e tërheqin automatikisht vëmendjen e Uashingtonit. Ai shpjegon se lobimi i vazhdueshëm ka bërë që SHBA-ja ta perceptonte pozitivisht kandidaturën e Malit të Zi për NATO, dhe ka luajtur rol vendimtar në arritjen e suksesit.
“Shumë kohë përpara se të merrej vendimi më 2017, ne kemi gjetur një grup lobimi shumë efektiv, që ka punuar në favor të Malit të Zi. Kur ne kemi nisur fushatën për anëtarësim, NATO-ja nuk ka qenë e etur për të pranuar anëtar të ri. Kjo ka ndryshuar me kalimin e kohës, dhe mund të them se lobistët kanë luajtur një rol të rëndësishëm në këtë proces”, thotë Garçeviq.
Në rrethanat ku gjendet Kosova – me çështje të hapura me Serbinë dhe jashtë NATO-s e BE-së – lobimi në SHBA nuk është vetëm çështje imazhi. Ai është mjet kyç edhe për mbrojtjen e sigurisë civile dhe për të siguruar që SHBA-ja mbetet e angazhuar në stabilitetin dhe mbrojtjen e vendit, sipas Garçeviqit.
“Prandaj, mos ua lini të tjerëve që ta formësojnë mënyrën se si SHBA-ja ju qaset. Duhet të jeni proaktivë, sepse kjo ju ndihmon edhe të kuptoni më mirë se si mendohet nga brenda. Njerëzit që i angazhoni për të punuar për ju, mund t’ju japin vlerësime reale se çfarë ndodh në anën tjetër dhe si e shohin ata situatën”, thotë ai.
Emini shton se realiteti politik në Uashington ka ndryshuar ndjeshëm dhe se vendimmarrja sot zhvillohet në një mjedis shumë më të fragmentuar. Sipas saj, Qeveria e re e Kosovës, që pritet të formohet sërish nga Albin Kurti, duhet të investojë në ndërtimin e rrjeteve afatgjate të lobimit në SHBA, e jo të mbështetet në komunikim sporadik apo vetëm në vizita zyrtare.
“Kosova është një shtet i vogël dhe si i tillë mbijeton në aleanca. Edhe sikur të ishte shtetësi e përfunduar, edhe nëse do të kishte ushtri dhe do të ishte pjesë e NATO-s, aleancat janë të domosdoshme”, thotë Emini.
Marrëdhëniet mes Kosovës dhe Shteteve të Bashkuara kanë kaluar periudha tensioni gjatë dy vjetëve të fundit. Shkak janë bërë disa vendime të Qeverisë së Kosovës, të cilat Uashingtoni i ka vlerësuar si të dëmshme për komunitetin serb. Përplasjet kanë kulmuar me paralajmërime publike nga zyrtarët amerikanë për përkeqësim të raporteve dhe me vendosjen e masave ndëshkuese ndaj Kosovës, ndonëse Qeveria e Kurtit ka insistuar se këto mospajtime janë pjesë e një dinamike normale mes aleatëve.
Këtë muaj, Kosova u përfshi edhe në listën e 75 vendeve për qytetarët e të cilave SHBA-ja ka pezulluar përkohësisht lëshimin e vizave të emigrimit. Arsyeja zyrtare: parandalimi i keqpërdorimit të ndihmave sociale. Në këtë listë janë përfshirë të gjitha vendet e Ballkanit Perëndimor, përveç Serbisë, e cila, sipas raportimeve të disa mediave, ka përfituar edhe nga lobimi intensiv.
Megjithatë, Departamenti amerikan i Shtetit ka sqaruar se masa synon ata që “i përdorin ndihmat sociale amerikane në nivele të papranueshme”.
Në një Uashington ku vëmendja blihet, fitohet ose humbet, sfida për Kosovën tani nuk qëndron vetëm te ruajtja e miqësive, por edhe tek aftësia për t’u dëgjuar.
Me fjalët e presidentes Osmani, pas nënshkrimit të Kartës së Bordit të Paqes, “kur Amerika udhëheq, paqja është gjithmonë më e sigurt”. Por, mbetet të shihet nëse Kosova do të arrijë ta shndërrojë këtë moment në ndikim real – përtej dorështrëngimeve dhe titujve në media./REL/
Në stacioni Policorë Mitrovicë-Veri janë duke u bërë intervistime për shkak të dyshimit për manipulim të numërimit të votave në zgjedhjet e 28 dhjetor 2025.
Lajmin e ka konfirmuar për Telegrafin zëvendësdrejtori për rajonin e Veriut, Veton Elshani.
"Po që nga mëngjesi ka filluar intervistimi. Më shumë informacione, drejtohuni tek Prokuroria", tha Elshani.
Sipas njoftimit të Prokurorisë Themelore në Mitrovicë janë 43 persona që do të intervistohen për shkak të dyshimit për manipulim të votave në komunat e Leposaviq, Zveçan, Zubin Potok, Mitrovicë Veri dhe Mitrovicë Jug.
Ditëve të fundit, autoritetet në Kosovë kanë intervistuar qindra njerëz nëpër komuna të ndryshme, dhe kanë ndaluar dhjetëra, nën dyshimet e njëjta.
Përgjatë procesit të rinumërimit, votat për disa kandidatë ndryshuan – me raste deri në 6 mijë për një individ – ndërsa ato për partitë nuk u cenuan.
Sipas Kodit Penal të Republikës së Kosovës, çdo manipulim i qëllimshëm i votës apo rezultatit zgjedhor përbën vepër penale dhe dënohet me deri në pesë vjet burgim. /Telegrafi/
Sot janë bërë 36 vjet nga rënia e dëshmores Elfete Humolli, e cila u vra më 1 shkurt 1990 nga forcat policore serbe gjatë demonstratave gjithëpopullore për liri, demokraci dhe të drejta politike në Kosovë.
Me këtë rast, kryeministri në detyrë Albin Kurti, kryetari i Komunës së Podujevës, Shpejtim Bulliqi, nënkryetarja në detyrë e Kuvendit, Albulena Haxhiu, si dhe ministra, deputetë e aktivistë të Lëvizjes VETËVENDOSJE!, bënë homazhe te monumenti përkujtimor në Lupç të Poshtëm, pranë vendit ku u vra dëshmorja, për të vazhduar më pas vizitën te familja Humolli.
“Sot bëhen 36 vjet nga rënia e dëshmores Elfete Humolli”, thuhet në njoftim, duke rikujtuar se Elfetja ishte vetëm 16 vjeçe në momentin kur u vra, nxënëse e shkollës së mesme dhe “pjesëmarrëse aktive në organizimet popullore të kohës, pjesë e brezit të ri që kërkonte barazi dhe dinjitet për popullin e vet”.
Në njoftim theksohet se demonstratat e asaj kohe u përballën me represion të ashpër.
“Protestat e atyre ditëve u përballën me dhunë të ashpër, gaz lotsjellës dhe të shtëna ndaj demonstruesve të paarmatosur, duke dëshmuar përmasën e represionit ndaj një popullsie që kërkonte liri me mjete paqësore”.
Vrasja e Elfete Humollit tronditi mbarë Kosovën, ndërsa varrimi i saj u shndërrua në një tubim masiv qytetar.
“Varrimi i saj u kthye në një tubim të madh qytetar me mbi 10 mijë pjesëmarrës, ndërsa familja Humolli u bë simbol i dhimbjes dhe qëndresës së një populli që po përballej me shtypje sistematike”, thuhet më tej.
Rasti i Elfetes u pasqyrua edhe nga media ndërkombëtare, duke dëshmuar dhunën ndaj civilëve shqiptarë që kërkonin të drejta themelore. Sakrifica e familjes Humolli u thellua edhe më tej në vitin 1999, kur “më 16 maj 1999, edhe vëllai i saj, Mentori, ra dëshmor në betejën e Koshares”.
“Sot i nderojmë në komplekset memoriale në Lupç të Poshtëm dhe përkujtojmë guximin e tyre, si dhe sakrificën e të gjithë dëshmorëve të rënë për lirinë e Kosovës”, përfundon njoftimi. /Telegrafi/
Pas konstituimit të legjislaturës së re, Kuvendi i Kosovës pritet të përballet me një sërë vendimesh urgjente, të domosdoshme për funksionimin normal të shtetit dhe stabilitetin e institucioneve.
Sipas IKD-së këto vendime nuk janë vetëm obligime politike, por detyrime të drejtpërdrejta kushtetuese dhe ligjore, të cilat kërkojnë veprim të menjëhershëm dhe të përgjegjshëm nga përfaqësuesit e zgjedhur të qytetarëve.
“Prioritetet kryesore përfshijnë: Miratimin e Ligjit për ndarjet buxhetore për vitin 2026, ratifikimin e marrëveshjes me Bashkimin Evropian për Planin e Rritjes (880 milionë euro), ratifikimin e marrëveshjes me Bankën Botërore (90 milionë euro), sigurimin e financimit për Radiotelevizionin e Kosovës (RTK) dhe mbështetje financiare për komunat”, thuhet në njoftimin e IKD-së.
IDK tutje shton se një prioritet po aq i rëndësishëm mbetet edhe zbatimi i aktgjykimeve të Gjykatës Kushtetuese, përfshirë Ligjin për Pagat në Sektorin Publik dhe të drejtat e mbi 94 mijë zyrtarëve publikë.
Instituti i Kosovës për Drejtësi thekson se legjislatura e re duhet të veprojë me urgjencë, përgjegjësi dhe transparencë, duke ç’bllokuar proceset kyçe, zbatuar aktgjykimet kushtetuese dhe forcuar rolin mbikëqyrës të Kuvendit, në funksion të garantimit të rendit demokratik dhe interesit publik.
Këto vendime konsiderohen thelbësore jo vetëm si detyrime ligjore, por edhe për sigurimin e stabilitetit financiar dhe institucional të vendit, si dhe për ruajtjen e besimit të qytetarëve në institucionet e Kosovës. /Telegrafi/
Një aksident ka ndodhur sot në aksin Pejë - Kuqishtë, ku një gur i madh ka rënë në rrugë dhe ka dëmtuar rëndë një veturë që po kalonte në atë zonë.
Ende nuk ka informacione nëse ka pasur persona të lënduar.
Telegrafi ka kontaktuar me policinë dhe është në pritje të përgjigjes.
Në video shihet se vetura ka pësuar dëmtime të konsiderueshme, ndërsa gurët mbeten në rrugë, duke krijuar rrezik për automjetet e tjera që kalojnë në zonë.
Rastet e tilla rrisin nevojën për kujdes të shtuar gjatë kalimit, sidomos në periudha me reshje ose mot të paqëndrueshëm. /Telegrafi/
Prokuroria Themelore në Pejë, ka kërkuar caktimin e masës së paraburgimit ndaj dy personave të dyshuar për veprën penale “Grabitja”, e cila ndodhi më 28 janar në rrugën “Eliot Engel” në Pejë.
Të dyshuarit për këtë vepër janë T.B., i lindur më 24 qershor 2001 në Pejë, dhe A.J., i lindur më 29 maj 1997, po ashtu nga Peja, të cilët aktualisht gjenden në masën e ndalimit.
Nga dosja e siguruar nga Telegrafi, thuhet se të dyshuarit ndodhen në ndalim nga data 30 janar 2026, rreth orës 23:00, për shkak të dyshimit të bazuar se kanë kryer veprën penale “Grabitja”, sipas nenit 317 të Kodit Penal të Republikës së Kosovës.
Ndërsa, për njërin nga të dyshuarit, Prokuroria thekson se përveç grabitjes, dyshohet edhe për veprën penale “Vjedhja e rëndë”.
Prokuroria vlerëson se në këtë rast janë përmbushur kushtet ligjore për caktimin e paraburgimit, për shkak të rrezikut të arratisjes.
Në kërkesë theksohet se pas kryerjes së veprës penale, të dyshuarit janë larguar nga vendi i ngjarjes, kanë shmangur arrestimin nga Policia e Kosovës dhe janë fshehur në lokacione të ndryshme, pa lejen e pronarëve të shtëpive ku janë strehuar.
“Pas kryerjes së veprës penale kanë qenë në arrati dhe të njëjtit janë arrestuar nga Policia e Kosovës, pas ndërmarrjes së veprimeve hetimore, gjegjësisht të njëjtit fillimisht i kryejnë veprat penale, pastaj arratisen nga vendi i ngjarjes, më pas shkojnë në fshatin Shushicë komuna e Istogut ku strehohen në një shtëpi pa lejen e pronarit, pastaj shkojnë në bjeshkën e Repishtës, ku prapë pa lejen e pronarit futen në një stan dhe aty arrestohen nga Policia e Kosovës”, thuhet në dosjen e Prokurorisë.
Në dosje përmendet gjithashtu se njëri nga të dyshuarit, A.J., është person i njohur për organet e rendit, pasi ndaj tij janë lëshuar më herët 11 urdhërarreste për raste të ndryshme penale të kryera nga viti 2015 e tutje, çka sipas Prokurorisë rrit edhe më tej rrezikun e shmangies nga drejtësia.
Sipas dosjes së Prokurorisë dy të pandehurit A.J dhe T.B janë të njohur për organet e hetuesisë.
“Referuar data bazës së Policisë së Kosovës i pandehuri T.B rezulton si i involvuar në 303 raste penale, prej të cilave si i dyshuar në 302 raste. Po ashtu ceket se për të njëjtin kishte të lëshuar edhe 1 urdhëarrest. I pandehuri A.J rezulton si i involvuar në 134 raste penale, prej të cilave si i dyshuar në 129 raste. Po ashtu ceket se për të njëjtin kishte të lëshuar edhe 11 urdhëarreste. Që të dy të pandehurit, shumicën e veprave penale i kanë vepra penale kundër pasurisë. Prandaj, me lënien e të pandehurve në liri ekziston rreziku real, që të pandehurit, të vazhdojnë kryerjen e veprave penale të tilla”, thuhet në dosje.
Bazuar në këto rrethana, Prokuroria i ka propozuar Gjykatës Themelore në Pejë që ndaj të dyshuarve të caktohet masa e paraburgimit, duke vlerësuar se çdo masë më e butë nuk do të ishte e mjaftueshme për të siguruar praninë e tyre në procedurë penale.
Ndërkaq, sipas aktvendimit për fillimin e hetimeve të nxjerrë më 1 shkurt 2026 nga Prokuroria Themelore në Pejë – Departamenti për Krime të Rënda, hetimet penale nuk përfshijnë vetëm dy të dyshuarit që ndodhen në ndalim, por edhe një person të tretë, i cili aktualisht gjendet në arrati.
Në dosje thuhet se më 28 janar 2026, rreth orës 15:45, në rrugën “Eliot Engel” në Pejë, të dyshuarit T.B. dhe A.J., në bashkëkryerje, me qëllim përfitimi të kundërligjshëm pasuror, kanë kryer grabitje ndaj një lokali.
Sipas përshkrimit të Prokurorisë, ata kanë thyer xhamin e lokalit, kanë përdorur mjete të rrezikshme dhe kanë kanosur seriozisht për jetën dhe trupin e punëtores së lokalit. Njëri nga të dyshuarit ka mbajtur rojë jashtë, ndërsa tjetri ka hyrë brenda, ku nën kërcënimin e thikës i ka kërkuar viktimës para, duke i marrë rreth 1 mijë euro, pas së cilës janë larguar nga vendi i ngjarjes.
Në dosje përshkruhet gjithashtu se më 27 janar 2026, nga ora 06:00 deri rreth orës 06:05, i dyshuari T.B., fillimisht në bashkëkryerje dhe më pas i vetëm, ka tentuar dhe ka realizuar hyrje të dhunshme në disa objekte në Pejë.
Sipas aktvendimit, ai ka tentuar të hyjë në një barnatore, por pasi nuk ka arritur, rreth orës 06:05 ka depërtuar me forcë në një lokal tjetër, duke dëmtuar derën hyrëse. Nga brenda ka marrë një telefon mobil Samsung, 200 euro para të gatshme dhe sende të tjera në vlerë rreth 149 euro, pas së cilës është larguar nga vendi i ngjarjes.
Po ashtu, në aktvendim përmendet se më 21 dhjetor 2025, rreth orës 21:35, në një barnatore në Pejë, të dyshuarit T.B. dhe A.K., së bashku me personin e tretë A.J., i cili ndodhet në arrati, kanë vepruar si bashkëkryerës.
Sipas Prokurorisë, fillimisht janë siguruar që punëtorja e barnatores të ishte pa mbikëqyrje, më pas dy prej tyre kanë mbuluar fytyrat, kanë hyrë brenda lokalit dhe nën kërcënimin e thikës i kanë kërkuar asaj para, duke i thënë “qiti paret”. Nga arka janë marrë rreth 800 euro, pas së cilës të dyshuarit janë larguar nga vendi i ngjarjes.
Për këto veprime, Prokuroria thekson se ndaj T.B. përveç veprës penale “Grabitja”, ekziston dyshimi i bazuar edhe për veprën penale “Vjedhja e rëndë”, sipas nenit 315 paragrafi 1 të Kodit Penal të Republikës së Kosovës, ndërsa për të dyshuarit e tjerë veprat penale lidhen me grabitje në bashkëkryerje, sipas nenit 317 të KPRK-së.
Në aktvendim theksohet se personi i tretë i dyshuar, A.K., i lindur më 23 maj 2004 në Pejë, ndodhet në arrati, ndërsa ndaj tij hetimet janë duke vazhduar ndaras. /Telegrafi/
Kryeministri Edi Rama ka reaguar në podkastin “Flasim” lidhur me debatet e krijuara pas zhvendosjes së zyrës së Kadastrës së Vlorës në Tiranë.
Ai sqaroi se është ngatërruar qëllimisht ose nga keqinformimi vendndodhja fizike e zyrës me shërbimin për qytetarët, duke theksuar se modeli i ri i Kadastrës synon ofrimin e shërbimeve plotësisht online përmes platformës e-Albania.
“Dy fjalë për zhvendosjen e zyrës së Kadastrës së Vlorës në Tiranë. U ngatërrua, qëllimisht ose idiotësisht, adresa fizike e zyrës me shërbimin për qytetarët. Agjencia e Kadastrës ka kaluar prej kohësh nga një model shërbimi primitiv, me sportele, radhë dhe zvarritje, në një model online, ende i pa mbyllur plotësisht në ciklin e vet, por gjithsesi përmes platformës e-Albania ky model mundëson që shumica e procedurave të mos kenë nevojë për paraqitje fizike në një sportel. Të gjitha ndiqen online", tha Rama.
Ai shtoi se gjithë kjo zhurmë dhe ky tension që u ndje për atë lëvizje lidhet jo vetëm me një perceptim të gabuar apo me një informim të mangët, por edhe me një mendësi e cila duhet përmbysur.
"Duhet përmbysur duke pasur parasysh se e nesërmja e afërt e Kadastrës është një shërbim pa sportele dhe pa godina fizike të shpërndara në territor, por me akses në çdo shërbim si një e drejtë themelore, një e drejtë që merret përmes celularit ose kompjuterit më të afërt dhe që nuk ka asnjë lidhje me vendndodhjen e zyrës. Ky nuk është i pari veprim për zhvendosjen e një drejtorie vendore në qendër dhe nuk është as i fundit", u shpreh Rama.
Rama shtoi se të tjera drejtori do të zhvendosen dhe ajo që po punojmë çdo ditë është të sigurojmë mbylljen e ciklit,
"Pra, jo më aplikim online dhe më pas marrje e shërbimit me postë, por i gjithë cikli online", tha Rama./euronews/
Kuvendi dhe qeveria do të formohen shpejt posa të certifikohen zgjedhjet e 28 dhjetorit, thotë deputeti i zgjedhur i Lëvizjes Vetëvendosje, Mefail Bajqinovci. Sipas tij, certifikimit të zgjedhjeve do t’i hapet rruga institucioneve të reja për, siç thotë, domosdoshmërinë e miratimit të buxhetit për vitin 2026.
Ai deklaron se vetëm pas konstituimit të Kuvendit, formimit të qeverisë dhe miratimit të buxhetit, do të vijë radha e zgjedhjes së presidentit të vendit.
“Jam i bindur që kemi nevojë për urgjencë për shkak se kemi nevojë ta miratojmë buxhetin e Republikës së Kosovës. Janë ditët e fundit, ju e dini që vetëm edhe muaji shkurt mund të jepen pagat në të gjithë sektorin publik, 85 mijë qytetarë të cilët janë në këtë sektor. Andaj është urgjencë që sa më shpejt të miratohet buxheti i Republikës së Kosovës për vitin 2026…Ne i kemi fituar zgjedhjet dhe me një fitore shumë të thellë, të paparë në historinë e Republikës së Kosovës deri më sot. Kështu që Kuvendi i Republikës së Kosovës, por edhe Qeveria e Kosovës, i ka numrat për themelim. Pra, do të themelohen shumë shpejt institucionet e Republikës së Kosovës, duke filluar nga trupat e Kuvendit e deri te qeveria”, deklaron ai.
Ani pse nuk deklarohet nëse mbështesin Vjosa Osmanin për një mandat të dytë në krye të vendit, Bajqinovci kërkon nga partitë opozitare, siç thotë ai, të kenë mirëkuptim për ta tejkaluar sfidën e zgjedhjes së presidentit dhe të mos ketë kriza të reja politike.
“Faza e parë është konstituimi i Kuvendit. Faza e dytë është krijimi i qeverisë së Republikës së Kosovës dhe faza shumë e rëndësishme pas kësaj është miratimi i buxhetit të Republikës së Kosovës, sepse është duke shkuar në kolaps. Por mendoj që kjo fazë, e cila përmendet për presidentin, është e fundit ajo. Në mars, që përmendet data katër, apo nëse nuk gaboj katër. Është herët të flasim, por po shpresoj që partitë opozitare do të reflektojnë dhe do të ketë mirëkuptim që të mos bëhet sikurse në të kaluarën. Ju e patë, 11 muaj e bllokuan Kuvendin e Republikës së Kosovës, por edhe krijimin e qeverisë Kurti, por edhe krijimin e qeverisë Konjufca, por edhe ashtu për zonjën Albulena Haxhiu. Por do të kalojmë dhe mos të kemi telashe apo bllokadë apo shkuarjen në zgjedhje, por do ta tejkalojmë edhe këtë sfidë”, thekson Bajqinovci.
Duke folur për dëmtimin e procesit zgjedhor me rastin e numërimit të votave për kandidatët për deputetë, ai thotë se rinumërimi dëshmi dallaveret e votave dhe defektet e procesit, por assesi që procesi zgjedhor të përsëritet.
“Unë mendoj që nuk do të duhet të jetë, për shkak se kanë qenë zgjedhje shumë demokratike, shumë fer. Ka pasur defekte brenda partive politike, të cilat tashmë janë publike, por me to janë duke u marrë organet e sigurisë dhe të drejtësisë. Dhe rinumërimi ka treguar që ka defekte, por Lëvizja Vetëvendosje është dhe ka qenë fuqishëm kundër që të ketë ndonjë manipulim ose diçka tjetër. Për çdogjë janë organet e drejtësisë të cilat duhet të merren deri në fund me këtë. Për çështjen se a duhet zgjedhje të reja, ato janë vetëm supozime, sepse zgjedhjet kanë qenë shumë demokratike”, shton Bajqinovci.
Sipas tij, në legjislaturën e ardhshme duhet të amandamentohet Ligji për Zgjedhjet për t’i korrigjuar të gjitha parregullsitë që janë evidentuar në procesin e rinumërimit të votave për kandidatët për deputetë.
“Defektet brenda partive i kemi parë, por mendoj që këto duhet të përmirësohen në vazhdim. Ndoshta ka nevojë edhe ligjin ta amandamentojmë apo të ketë edhe diçka tjetër shtesë. Por unë mendoj që organet e drejtësisë janë duke kryer punën e vet dhe zgjedhjet kanë qenë shumë demokratike. Nuk ka pasur mes partive politike ndonjë defekt. Defektet kanë qenë brenda, por rinumërimi është bërë dhe me këtë rinumërim kanë dalë në pah defekte të cilat po i vëren edhe KQZ-ja dhe po shihet se ndoshta ka nevojë edhe për ndonjë ndryshim të ri”, përfundoi ai. /KP/
“Pasha Zotin s’kom ma” – dalin pamjet ku dy persona me thikë në dorë i marrin paratë në një institucion financiar në Pejë
Janë publikuar pamjet nga momenti i grabitjes së ndodhur më 28 janar 2026 në një institucion financiar në Pejë, ku dy persona të maskuar dhe nën kërcënimin e një thikë kanë arritur t’i marrin paratë punonjëses.
Ngjarja kishte ndodhur rreth orës 15:45 në rrugën “Eliot Engel”, sipas informacioneve të Policisë së Kosovës.
Në pamjet e publikuara nga Kallxo.com dëgjohet një nga grabitësit duke thënë “paret” ndërkaq punëtorja dëgjohet teksa thotë “Pasha Zotin s’kom ma”, derisa ua jep një shumë të parave.
Të dyshuarit marrin paratë dhe largohen drejt një destinacioni të panjohur.
Mirëpo policia sot ka njoftuar se ka arritur të arrestoj dy persona që lidhen me këtë rast dhe një rast tjetër që kishte ndodhur me 21 dhjetor 2025. /Telegrafi/
Policia në Kaçanik ka arrestuar pesë persona për tentim të vjedhjes së rëndë, pas një operacioni të shpejtë në lagjen ku po kryhej vepra.
Sipas raportit të policisë, më 1 shkurt rreth orës 01:40, patrulla ka marrë informacion se dy persona po tentonin të thyenin dritaren e një artarie në rrugën “Ismail Raka”.
Në vendngjarje janë arrestuar dy shtetas të Serbisë: M.M. (36 vjeç) dhe D.T. (35 vjeç), të cilët janë kapur në flagrancë duke kryer veprën penale “Tentim vjedhje e rëndë”.
Në të njëjtën kohë, një patrullë tjetër ka ndaluar një veturë me targa vendore, ku ndodheshin tre shtetas kosovarë: L.M. (48 vjeç), B.H. (42 vjeç) dhe R.F. (28 vjeç). Ata janë shoqëruar në stacion policor për intervistim.
Në vendin e ngjarjes Njësia e Hetimeve ka konfiskuar mjete të dyshuara të përdorura për kryerjen e vjedhjes, përfshirë: shufra metalike (hebell), dana, çelësa të ndryshëm, kaçavida, një mjet i mprehtë (skalpër) dhe doreza.
Po ashtu, tek të dyshuarit janë gjetur çelësat e një veture VW Caddy me targa vendore, e cila ishte e parkuar pranë artaries.
Të dyshuarit janë intervistuar në prani të avokatëve dhe përkthyesit, ndërsa dy prej tyre kanë pranuar përfshirjen në rast. Me urdhër të prokurorit, pesë persona janë dërguar në mbajtje për 48 orë për procedura të mëtejshme hetimore.
Policia Rajonale e Ferizajt falënderon qytetarët për bashkëpunim dhe i inkurajon të raportojnë çdo veprim të dyshimtë në numrin 192 ose përmes platformës digjitale “Lajmëro Policinë”. /Telegrafi/
Login
