KOPENHAGË, 19 janar /ATSH/- Nuk do të lejojmë që të ushtrohet presion ndaj Groenlandës, tha sot kryeministri Jens-Frederik Nielsen, në një mesazh sfidues në përgjigje të kërcënimeve të presidentit Donald Trump për vendosjen e tarifave ndaj vendeve që po stacionojnë trupa në ishullin Arktik, sipas “Newsweek”.

“Demonstratat në Groenlandë dhe në Danimarkë kanë treguar një marrëdhënie të fortë dhe dinjitoze. Shumë njerëz kanë shprehur në mënyrë paqësore dashurinë për vendin tonë dhe respektin për demokracinë tonë”, tha ai në një postim në “Facebook”.

Nielsen mirëpriti mbështetjen e unionit ndërkombëtar që kundërshton lëvizjen e Trump për të blerë ishullin si një “njohje të qartë se Groenlanda është një shoqëri demokratike me të drejtën për të marrë vendimet e veta”.

“Në të njëjtën kohë, kemi marrë mbështetje nga vende të tjera dhe udhëheqës shtetërorë. Jo si një ndërhyrje, por si një njohje e qartë se Groenlanda është një shoqëri demokratike me të drejtën për të marrë vendimet e veta”, shtoi ai.

“Njoftimet e fundit të SHBA-së, përfshirë kërcënimet për vendosjen e tarifave, nuk i kanë ndryshuar prioritetet tona.  Ne nuk do të lejojmë që të na bëhet presion. Jemi të vendosur të ecim përpara me dialog të ndershëm, respekt të ndërsjellë dhe respekt për të drejtat ndërkombëtare të njeriut”, tha ai.

Ministrja e Jashtme Vivian Motzfeldt, së bashku me Ministrin danez të Mbrojtjes, u takuan sot me sekretarin e përgjithshëm të NATO-s Mark Rutte në Bruksel për të diskutuar tensionet mbi Groenlandën.

Nielsen mori pjesë në një protestë – kundër kërkesës së presidentit të SHBA-së Donald Trump për të marrë kontrollin e ishullit Arktik – përpara konsullatës amerikane në kryeqytetin e Groenlandës, Nuuk, në fundjavë.

Si Groenlanda ashtu edhe Danimarka kanë thënë vazhdimisht se ishulli nuk është në shitje. //a.i/

The post KOPENHAGË – Nielsen: Nuk do të lejojmë të ushtrohet presion ndaj Groenlandës appeared first on Agjencia Telegrafike Shqiptare.

BUDAPEST, 19 janar /ATSH/- E ardhmja e Groenlandës nuk është një çështje e Bashkimit Evropian, tha sot ministri i Jashtëm hungarez, Peter Szijjarto duke sinjalizuar se Hungaria nuk do të mbështeste një deklaratë të përbashkët të BE-së kundër presidentit të SHBA-së, Donald Trump, sipas “Sky News”.

“Ne e konsiderojmë këtë si një çështje dypalëshe që mund të zgjidhet nëpërmjet bisedimeve midis dy palëve. Nuk mendoj se është një çështje e BE-së”, tha Szijjarto.

Presidenti amerikan, Donald Trump ka kërkuar që SHBA-ja të marrë kontrollin e Groenlandës, e cila i përket Danimarkës, duke thënë se ishulli Arktik është i nevojshëm për arsye sigurie.

Hungaria është një nga zërat më euroskeptikë të bllokut dhe qeveria e saj, shpesh ka bllokuar dhe vënë veton ndaj vendimeve të BE-së.

Hungaria, nën drejtimin e kryeministrit, Viktor Orbán është pozicionuar në mënyrë aktive me administratën Trump. //a.i/

The post BUDAPEST – Hungaria: E ardhmja e Groenlandës nuk është çështje e BE-së appeared first on Agjencia Telegrafike Shqiptare.

TEL AVIV, 19 janar /ATSH-DPA/- Izraeli do t’i përgjigjet fuqishëm çdo sulmi të Iranit, paralajmëroi sot kryeministri izraelit, Benjamin Netanyahu gjatë një fjalimi para parlamentit.

“Nëse Irani bën një gabim dhe na sulmon, ne do të veprojmë me forcën që Irani nuk e ka njohur ende”, tha Netanyahu.

“Po i ndjekim me shumë vëmendje, ngjarjet në Iran. Jemi të gjithë thellësisht të impresionuar nga lufta heroike e qytetarëve të Iranit për liri, prosperitet dhe drejtësi”, shtoi ai.

“Brutaliteti i ushtruar nga udhëheqësit në Teheran ndaj qytetarëve të vendit zbulon thelbin e këtij regjimi mizor”, tha Netanyahu duke iu referuar numrit të madh të protestuesve të vrarë në Iran.

“Askush nuk mund të parashikojë se çfarë do të ndodhë në Iran, por çfarëdo që të ndodhë – Irani nuk do të kthehet në atë që ishte”, tha ai.

Frika për një përshkallëzim ushtarak në rajon është rritur pas kërcënimeve të presidentit të SHBA-së, Donald Trump për ndërhyrje ushtarake në Iran.

Trump ka mbështetur ndryshimin e qeverisë dhe presidenti iranian, Masoud Pezeshkian deklaroi se çdo akt agresioni kundër Khamenei do të ishte i barabartë me luftë kundër kombit iranian.

Izraeli dhe Irani zhvilluan një luftë 12-ditore në qershor të vitit të kaluar. //a.i/.

The post TEL AVIV – Netanyahu: Izraeli do t’i përgjigjet fuqishëm çdo sulmi të Iranit appeared first on Agjencia Telegrafike Shqiptare.

SOFJE, 19 janar /ATSH-AFP/- Presidenti i Bullgarisë njoftoi sot se do të jepte dorëheqjen para zgjedhjeve të parakohshme, duke thelluar trazirat politike që kanë përfshirë vendin anëtar të BE-së dhe NATO-s.

Vendi ballkanik, i cili prezantoi euron më 1 janar, u zhyt në trazira të reja politike pasi një seri protestash të gjera kundër korrupsionit rrëzuan nga detyra qeverinë e udhëhequr nga konservatorët, në mesin e dhjetorit.

Rumen Radev, një kritik i zëshëm i qeverisë që mbështeti protestat, njoftoi javën e kaluar se një votim i parakohshëm – zgjedhjet e teta të vendit në pesë vjet – do të mbaheshin pasi partitë nuk arritën të formonin një qeveri të re.

“Sot, po ju drejtohem për herë të fundit si president i Bullgarisë,” tha Radev gjatë një fjalimi televiziv, duke shtuar se do të jepte dorëheqjen nesër nga posti i tij.

Radev, 62 vjeç, tha se ishte i etur të merrte përsipër “betejën për të ardhmen” e Bullgarisë së bashku me – të frymëzuarit dhe të palëkundurit.

Ai tha se modeli i dëmshëm i qeverisjes ishte fajtor për varfërinë, protestat dhe mosbesimin ndaj institucioneve në vend.

Spekulimet kanë qenë të shumta se Radev mund të marrë pjesë në zgjedhje, pasi ai ka thënë se dëshiron të “bashkojë të gjithë” në luftën kundër korrupsionit.

Dorëheqja e tij shënon herën e parë që një kryetar shteti jep dorëheqjen që nga fundi i komunizmit.

Zëvendësja e Radev, Iliana Iotova, 61 vjeç, dhe ish-gazetare dhe ligjvënëse nga Partia Socialiste, pritet të shërbejë si presidente e përkohshme.

Zgjedhjet do të mbahen në fund të marsit ose prill, por ende nuk është caktuar një datë.

Është detyrë e presidentit të emërojë një kryeministër të përkohshëm nga një listë zyrtarësh të lartë shtetërorë dhe të caktojë një datë për votimin.

Mandati i Radev ishte planifikuar të përfundonte në fillim të vitit të ardhshëm, me zgjedhjet presidenciale që pritej të mbaheshin para asaj kohe.

– Ish-pilot luftarak –

Një ish-pilot dhe komandant i forcave ajrore bullgare, Radev, i cili u mbështet nga socialistët e opozitës pro-ruse, u zgjodh president për herë të parë në vitin 2016.

Gjatë protestave masive kundër korrupsionit në vitin 2020, ai shprehu mbështetje të fortë për demonstruesit.

Në vitin 2021, Radev siguroi një mandat të dytë 5-vjeçar, duke fituar pothuajse 67% të votave në raundin e dytë.

Shpesh në kundërshtim me qeverinë, ai ka shprehur kundërshtimin ndaj dërgimit të ndihmës ushtarake në Ukrainën e shkatërruar nga lufta.

Në një intervistë për CNN vitin e kaluar, ai shprehu zhgënjim për mungesën e mbështetjes midis aleatëve të BE-së për “përpjekjet e paqes” të vetëshpallura nga presidenti i SHBA-së Donald Trump.

Partia konservatore GERB kryesoi zgjedhjet më të fundit të vitit të kaluar, duke formuar një qeveri koalicioni, por protestat shpërthyen në fund të nëntorit për projektbuxhetin e saj të vitit 2026.

Protestuesit e quajtën atë si një përpjekje për të maskuar korrupsionin e përhapur.

Radev ka vendosur të japë dorëheqjen dhe potencialisht të kandidojë në zgjedhjet e ardhshme të përgjithshme.

Një sondazh i fundit, i kryer nga instituti “Market Links” raportoi për Radev një vlerësim miratimi prej 44%.

Bullgaria është ndër vendet e BE-së me renditjen më të ulët në Indeksin e Perceptimit të Korrupsionit të organizatës mbikëqyrëse “Transparency International”. //a.i/

The post BULLGARI – Presidenti Radev jep dorëheqjen pas nëntë vitesh në detyrë appeared first on Agjencia Telegrafike Shqiptare.

ROMË, 19 janar /ATSH-ANSA/- Ne përpiqemi gjithmonë të përdorim logjikën e shëndoshë, sepse komunikojmë me të gjithë, dhe gjithmonë themi të vërtetën, tha sot zëvendëskryeministri dhe ministri i Jashtëm italian, Antonio Tajani.

“Ne punuam mirë për marrëveshjen e tarifave dhe besoj se mund të kemi sukses edhe në këtë rast. E rëndësishme është të kuptohemi”, tha ai.

“Kryeministrja e Italisë, Giorgia Meloni është angazhuar në dialogun me Shtetet e Bashkuara të Amerikës, por edhe me evropianët”, tha Tajani.

“Dhe besoj se Italia, pikërisht nga natyra dhe aftësia e saj për të ndërmjetësuar dhe komunikuar me të gjithë, mund të luajë një rol pozitiv në arritjen e marrëveshjeve, pasi nuk ka absolutisht nevojë për luftëra tregtare apo konflikte”, theksoi ai.

“Dialogu është i nevojshëm dhe ne duhet të gjejmë zgjidhje që nuk penalizojnë askënd”, tha ministri i Jashtëm, Tajani.

Një mundësi për bisedime mund të ofrojë edhe Forumi Ekonomik Botëror në Davos.

Presidenti amerikan, Donald Trump pritet të mbërrijë atje të mërkurën.

Edhe kancelari gjerman Friedrich Merz do të marrë pjesë në samitin në Davos.

Sekretari i përgjithshëm i NATO-s, Mark Rutte deklaroi pas një bisede telefonike me Trumpin:

“Ne do të vazhdojmë të punojmë në këtë drejtim. Një takim pritet me Trump në Davos”, tha sekretari i përgjithshëm i NATO-s, Mark Rutte pas një bisede telefonike me presidentin e SHBA-së.

Italia, një nga anëtaret themeluese të NATO-s, nuk dërgoi asnjë trupë në Groenlandë, si pjesë e misionit të zbulimit të udhëhequr nga Danimarka.

Në mision krahas Danimarkës, morën pjesë shtatë vende të tjera evropiane, Norvegjia, Suedia, Franca, Gjermania, Britania e Madhe, Holanda dhe Finlanda. //a.i/

The post ROMË – Tajani: Italia e gatshme të ndërmjetësojë dhe të luajë një rol në çështjen e Groenlandës appeared first on Agjencia Telegrafike Shqiptare.

BRUKSEL, 19 janar /ATSH-ANSA-DPA/- Konsultimet e mia me vendet anëtare te Bashkimit Evropian mbi tensionet e fundit për Groenlandën, tregojnë një vlerësim të përbashkët se vendosja e tarifave doganore do të rrezikonte marrëdhëniet transatlantike, tha sot presidenti i Këshillit Evropian, Antonio Costa.

“Gjithashtu, kjo do të ishte e papajtueshme me marrëveshjen tregtare BE-SHBA”, shtoi ai.

“Nevojitet gatishmëri për të mbrojtur veten nga çdo formë shtrëngimi”, theksoi Costa.

“Megjithatë, ekziston gjithashtu një gatishmëri për të vazhduar bashkëpunimin konstruktiv me Shtetet e Bashkuara të Amerikës për të gjitha çështjet me interes të përbashkët”, tha presidenti i Këshillit Evropian, Costa.

Vendet e Bashkimit Evropian po nxitojnë të gjejnë një përgjigje të përbashkët ndaj kërcënimeve të presidentit të SHBA-së, Donald Trump për të vendosur një tarifë shtesë prej 10% për mallrat nga disa aleatë evropianë nga 1 shkurti.

Udhëheqësit e BE-së do të takohen të enjten, në Bruksel pasi Trump tha se tetë vende evropiane do të përballeshin me tarifa më të larta – derisa Shtetet e Bashkuara të Amerikës të siguronin atë që ai e përshkroi si “blerjen e plotë dhe totale” të Groenlandës.

Danimarka, Finlanda, Franca, Gjermania, Holanda, Norvegjia, Suedia dhe Britania e Madhe dërguan së fundmi një numër të vogël ushtarësh në një mision zbulimi në Groenlandë si një shenjë solidariteti me Danimarkën, e cila po kundërshton ambiciet e Trump për marrjen e ishullit Arktik – që e ka kontrolluar për rreth 300 vjet. //a.i/

The post BRUKSEL – Costa: BE-ja e gatshme të vazhdojë bashkëpunimin konstruktiv me SHBA-në appeared first on Agjencia Telegrafike Shqiptare.

PARIS, 19 janar /ATSH-DPA/- Reshjet e dendura të shiut në jug të Francës kanë çuar në përmbytje në shkallë të gjerë dhe mbylljen e rrugëve dhe shkollave.

Shërbimi meteorologjik “Météo France” lëshoi ​​paralajmërimin e dytë më të lartë për stuhi për tre rajone dhe Korsikën.

“Gjithashtu, nga mbrëmja e sotme dhe deri nesër priten reshje të dendura shiu në ishullin mesdhetar”, paralajmëroi “Météo France” duke lëshuar kodin e alarmit portokalli.

Kjo mund të çojë në një rritje të shpejtë të nivelit të ujit të lumenjve dhe përmbytjeve.

Banorët në dy rajone në Narbonne u detyruan të kalonin natën e së dielës në strehim emergjence si një masë paraprake.

Prefektura më vonë i lejoi banorët të ktheheshin në shtëpitë e tyre.

Më shumë se 40 rrugë mbetën të bllokuara dhe shkolla ​​në 109 vende nuk do të qendrojnë mbyllur deri nesër.

Megjithatë, reshjet e dendura të shiut lehtësuan mungesën e vazhdueshme të ujit në rajon. Departamenti i Pyrenees-Orientales hoqi kufizimet e ujit që kishin qenë në fuqi për njëfarë kohe.

Autoritetet në Perpignan thanë se nivelet e ujit në shumë lumenj ishin kthyer në normalitet dhe se rezervat e ujit nëntokësor ishin rimbushur. //a.i/

The post METEO – Jugu i Francës goditet nga reshje të dendura shiu dhe përmbytje appeared first on Agjencia Telegrafike Shqiptare.

TOKIO, 19 janar /ATSH-DPA/- Japonia do të zhvillojë zgjedhje të parakohshme më 8 shkurt, njoftoi sot kryeministrja Sanae Takaichi, pas vetëm tre muaj në detyrë.

“Parlamenti do të shpërbëhet të premten”, tha politikania konservatore 64-vjeçare në një njoftim, të pritur gjerësisht.

Takaichi ka pasur një pozicion të lartë në sondazhet e opinionit dhe po kërkon të rrisë shumicën e vogël që mbahet nga Partia e saj Liberal Demokratike (LDP) dhe partia neoliberale “Ishin” (Partia e Inovacionit të Japonisë), në Parlamentin Kombëtar.

Bursa e Tokios ka arritur nivele rekord në pritje të zgjedhjeve, pasi një shumicë më e madhe qeverisëse do t’i lejojë koalicionit të Takaichi të zbatonte plane të rritjes ekonomike bazuar në rritjen e shpenzimeve shtetërore.

Takaichi, e cila u zgjodh kryeministrja e parë (grua) e Japonisë në fund të tetorit, tha se stabiliteti politik ishte i nevojshëm për reformën.

Vendimi i saj për të shpallur zgjedhje të parakohshme nuk është pa rrezik dhe mbetet për t’u parë nëse popullariteti i saj do të ndikojë në partinë e saj.

Partia, e cila ka qenë në qeveri pothuajse vazhdimisht që nga viti 1955, kohët e fundit humbi shumicën e saj në të dy dhomat e parlamentit.

Partia më e madhe e opozitës, Partia Kushtetuese Demokratike e Japonisë, e udhëhequr nga ish-kryeministri Yoshihiko Noda, dhe “Komeito” kanë njoftuar se do të bashkojnë forcat në një parti të re reformiste të qendrës – që e sheh veten si një alternativë liberale ndaj koalicionit konservator të Takaichi. //a.i/

The post JAPONI – Kryeministrja Takaichi shpall zgjedhje të parakohshme më 8 shkurt appeared first on Agjencia Telegrafike Shqiptare.

TEHERAN, 19 janar /ATSH/- Protestuesit iranianë po përballen me ditët e tyre më vdekjeprurëse deri më tani, ndërsa forcat e sigurisë kryejnë vrasje masive dhe ekzekutime në një goditje të gjerë, që vëzhguesit e kanë quajtur “gjenocid”, thanë raportet e reja, sipas “Fox News”.

Sipas një raporti të “The Sunday Times”, i përpiluar nga mjekë të vendosur në rajon dhe i shqyrtuar nga media vlerëson se forcat e sigurisë kanë vrarë të paktën 16 500 protestues dhe kanë plagosur më shumë se 330 000 të tjerë.

Raporti gjithashtu e përshkroi dhunën si një “masakër të plotë”, duke paralajmëruar se numri i vërtetë mund të jetë edhe më i lartë për shkak të aksesit të kufizuar në spitale dhe mbylljes pothuajse totale të komunikimeve.

“Shumica e viktimave, besohet të jenë nën moshën 30 vjeç, duke nënvizuar numrin e madh të viktimave mbi brezin e ri të Iranit, ndërsa regjimi intensifikon përpjekjet e tij për të shtypur disidentët”, sipas raportit.

Udhëheqësi suprem i Iranit, Ajatollah Ali Khamenei, pranoi të dielën se “disa mijëra” persona ishin vrarë që nga shpërthimi i protestave më 28 dhjetor.

Në një fjalim televiziv, ai fajësoi demonstruesit, duke i quajtur ata “ushtarë këmbësorë të SHBA-së” dhe duke pretenduar në mënyrë të rreme se protestuesit ishin të armatosur me municion të vërtetë të importuar.

Ndërkohë, Agjencia e Lajmeve të Aktivistëve të të Drejtave të Njeriut (HRANA) raportoi se që nga dita e 22-të e protestave, shifrat e verifikuara tregojnë 3 919 persona të vrarë, me 8 949 vdekje shtesë nën hetim, 2 109 të plagosur rëndë dhe 24 669 të ndaluar.

HRANA vuri në dukje se numri i vërtetë ka të ngjarë të jetë shumë më i lartë për shkak të mbylljes së internetit.

“Krahas vrasjeve në rrugë, ekzekutimet janë rritur ndjeshëm”, sipas Ali Safavi, një zyrtar i lartë në Këshillin Kombëtar të Rezistencës së Iranit (NCRI).

“Fox News Digital” se 2 200 persona u ekzekutuan në vitin 2025, ndërsa 153 janë varur tashmë në 18 ditët e para të janarit 2026, duke arritur mesatarisht në më shumë se tetë ekzekutime në ditë.

“Ali Khamenei po vazhdon ekzekutimet masive paralelisht me vrasjen e protestuesve të rinj”, tha Safavi.

“Tre ekzekutime në formën e varjes po ndodhin tani çdo orë sipas të dhënave tona”, shtoi ai.

Ministri i Jashtëm iranian, Abbas Araghchi kundërshtoi numrin e lartë të vdekjeve të raportuara në një intervistë për “Fox News”, duke pretenduar se viktimat kishin arritur në qindra dhe duke i hedhur poshtë shifrat më të larta si “dezinformim”.

Presidenti amerikan, Donald Trump e dënoi ashpër Khamenei gjatë fundjavës, duke e quajtur atë një “njeri të sëmurë” dhe duke kërkuar udhëheqje të re në Iran.

Në një intervistë për “Politico”, Trump akuzoi Khamenei për mbikëqyrjen e “shkatërrimit të plotë të vendit” dhe përdorimin e “dhunës në nivele të papara më parë”, duke shtuar se udhëheqja e Iranit duhej të ndalonte vrasjen e njerëzve. //a.i/

The post “Fox News”: Irani akuzohet për vrasjen e 16 500 personave në një goditje të gjerë kundër “gjenocidit” appeared first on Agjencia Telegrafike Shqiptare.

LONDËR, 17 janar /ATSH/- Provat aktuale nuk e lidhin përdorimin e paracetamolit gjatë shtatzënisë me autizmin, thanë ekspertët pas një shqyrtimi të ri të studimeve mbi këtë hipotezë, sipas “Lancet”.

Presidenti i SHBA-së, Donald Trump tha në shtator se kishte pasur një “rritje meteorike” të rasteve të autizmit dhe se “Tylenol” – i cili quhet paracetamol në Britaninë e Madhe – ishte një shkak i mundshëm.

Ai tha se qetësuesi i dhimbjeve nuk duhej të merrej gjatë shtatzënisë. Deklarata e Trump u kritikua nga aktivistët e autizmit dhe shkencëtarët në Britaninë e Madhe dhe në mbarë botën.

Ekspertët thanë se shpresonin që studimi i fundit do ta “zgjidhte çështjen”.

Hulumtuesit kryen një shqyrtim të gjerë mbi çështjen, i cili u botua në revistën “The Lancet Obstetrics, Gynaecology and Women’s Health”.

Një ekip ndërkombëtar akademikësh, përfshirë ekspertë nga Britania e Madhe kontrolluan në bazat e të dhënave kërkimore të të gjitha studimeve, që raportonin vlerësime të rrezikut për autizmin, çrregullimin e hiperaktivitetit të mungesës së vëmendjes (ADHD) dhe aftësitë e kufizuara intelektuale.

Studimet e përshtatshme për shqyrtim krahasuan shtatzënitë me dhe pa ekspozim ndaj paracetamolit, si dhe shqyrtuan pyetësorë të validuar ose të dhëna mjekësore mbi rezultatet mjekësore.

Ata gjithashtu shqyrtuan sëmundje të tjera që kishin nënat dhe trajtimet e tjera që ato kishin marrë.

Rreth 43 studime u përfshinë në një shqyrtim sistematik – një shqyrtim gjithëpërfshirës i të dhënave – dhe 17 studime në meta-analizë – një metodë kërkimore për kombinimin sistematik të gjetjeve nga studime të shumta.

U përfshinë gjithashtu një numër i të ashtuquajturave “studime krahasimi të vëllezërve dhe motrave”.

Këto studime krahasojnë fëmijët e lindur nga e njëjta nënë, në një shtatzëni ku ajo ka marrë paracetamol dhe në një shtatzëni tjetër ku nuk ka marrë paracetamol.

Autorët arritën në përfundimin se ekspozimi ndaj paracetamolit gjatë shtatzënisë nuk ishte i lidhur me rrezikun e çrregullimit të spektrit të autizmit, ADHD-së ose aftësive të kufizuara intelektuale. //a.i/

The post Paracetamoli gjatë shtatzënisë nuk lidhet me rrezikun e autizmit ose ADHD-së tek foshnjat appeared first on Agjencia Telegrafike Shqiptare.

VJENË, 17 janar /ATSH-DPA/- Ukraina dhe Rusia kanë rënë dakord të zbatojnë një “armëpushim të lokalizuar” në centralin bërthamor të Zaporizhias, për të mundësuar riparimet në linjën e fundit rezervë të energjisë elektrike të vendit, tha dje në mbrëmje Agjencia Ndërkombëtare e Energjisë Atomike (IAEA).

“Teknikët nga operatori i rrjetit elektrik të Ukrainës pritet të fillojnë, në ditët në vijim, punimet e riparimit në linjën 330 kV – të dëmtuar dhe të shkëputur si rezultat i aktivitetit ushtarak më 2 janar”, tha agjencia në një deklaratë.

IAEA tha se kishte dërguar një ekip për të mbikëqyrur punën.

“Centrali i Zaporizhias, centrali më i madh bërthamor në Evropë, i cili është mbyllur për shkak të pushtimit të Ukrainës nga Rusia, aktualisht mbështetet vetëm në linjën e tij kryesore të energjisë 750 kV”, tha agjencia.

Kjo është hera e katërt që Ukraina dhe Rusia bien dakord për një “armëpushim të lokalizuar” në centralin që ndodhet në jug të Ukrainës, që kur forcat ruse pushtuan vendin pas fillimit të luftës, në shkurt të vitit 2022.

Ndërsa të gjithë reaktorët janë mbyllur që atëherë, energjia elektrike është ende e nevojshme për ftohjen e centralit dhe furnizohet nëpërmjet dy linjave të energjisë që janë dëmtuar vazhdimisht nga bombardimet.

Ekspertët e IAEA-s të pranishëm në vend, kanë raportuar shpërthime të rregullta pranë centralit. //a.i/

The post FOKUS – IAEA: Ukraina dhe Rusia bien dakord për “armëpushim të lokalizuar” në centralin bërthamor të Zaporizhias appeared first on Agjencia Telegrafike Shqiptare.

LONDËR, 17 janar /ATSH-DPA/- Një numër personash janë arrestuar gjatë një proteste dje në mbrëmje, jashtë ambasadës iraniane në Londër.

Policia Metropolitane e Londrës (Met) konfirmoi se, ne terren ishin dislokuar oficerë shtesë dhe ishte vendosur një urdhër i Seksionit 35 për të ndihmuar në shpërndarjen e turmave.

Pamjet e shpërndara në media sociale duket se tregojnë protestues të arrestuar dhe persona të tjerë të plagosur.

Një nga të arrestuarit ishte ngjitur në ndërtesën në Kensington dhe kishte hequr flamurin iranian.

“Gjatë protestës së vazhdueshme në ambasadën iraniane këtë mbrëmje, një protestues hyri ilegalisht në pronën private diplomatike dhe u ngjit nëpër ballkone të shumta në çatinë e ambasadës dhe hoqi një flamur”, tha Policia Metropolitane tha në një postim në X.

“Personi u arrestua nga oficerët me dyshimin për dëmtim kriminal, shkelje të pronës diplomatike dhe sulm ndaj policisë. Një urdhër i seksionit 35 është vendosur si rezultat i çrregullimeve të vazhdueshme, duke përfshirë hedhjen e raketave ndaj oficerëve. Disa oficerë janë plagosur”, tha “Met”.

Në një përditësim të mëvonshëm, “Met” shtoi se një numër personash ishin arrestuar me dyshimin për protesta të dhunshme.

“Një prani e konsiderueshme policore mbetet në vend, përfshirë oficerët shtesë që kanë qënë në terren gjatë mbrëmjes për të parandaluar trazira të mëtejshme”, shtoi policia.

Protesta u nxit nga represioni i regjimit iranian, që ka shkaktuar vdekjen e disa mijëra personave, duke shtypur demonstratat në Iran, të cilat filluan më 28 dhjetor për shkak të ekonomisë së dobët të vendit.

Protestat në mbarë vendin, u shndërruan në kryengritje që sfidojnë drejtpërdrejt teokracinë e Iranit.

Nuk ka pasur shenja protestash ditët e fundit në Teheran, ku blerjet dhe jeta në rrugë janë rikthyer në normalitet, megjithëse ndërprerja e internetit prej një jave vazhdoi.

Autoritetet nuk kanë raportuar ndonjë trazirë diku tjetër në vend. //a.i/

The post BM – Protesta të dhunshme para ambasadës iraniane në Londër appeared first on Agjencia Telegrafike Shqiptare.

LONDËR, 17 janar /ATSH-DPA/- Shtëpia e Bardhë ka njoftuar se ish-kryeministri i Britanisë së Madhe, Tony Blair do të jetë pjesë e “Bordit të Paqes” të presidentit të SHBA-së Donald Trump për Gazën, që synon parandalimin e konflikteve të ardhshme në territor.

Emri i Blair u rendit së bashku me zyrtarë të profilit të lartë të administratës Trump si pjesë e një “bordi ekzekutiv themelues” për të udhëhequr përpjekjet afatgjata të paqes në Lindjen e Mesme, të publikuar nga Shtëpia e Bardhë.

Lista përfshinte gjithashtu sekretarin amerikan të shtetit, Marco Rubio, të dërguarin special për Lindjen e Mesme, Steve Witkoff dhe dhëndrin e Trump, Jared Kushner, ndër të tjerë.

“Bordi themelues do të ndihmojë në operacionalizimin e vizionit të Bordit të Paqes”, tha sot Shtëpia e Bardhë, duke sugjeruar se anëtarët e këtij grupi do të mbanin secili portofole të specializuara për të ndihmuar në përpjekjet e “stabilizimit” në Gaza.

Emri i ish-kryeministrit laburist u shfaq gjithashtu në një listë më të gjatë emrash si pjesë e një “Bordi Ekzekutiv të Gazës” në njoftimin e Shtëpisë së Bardhë, i cili duket se synon qeverisjen e Gazës. //a.i/

The post SHBA – Trump zgjedh Tony Blair si pjesë të “Bordit të Paqes” në Gaza appeared first on Agjencia Telegrafike Shqiptare.

BRUKSEL, 17 janar /ATSH-DPA/- Bashkimi Evropian dhe blloku tregtar i Amerikës Latine Mercosur pritet të nënshkruajnë sot një marrëveshje të tregtisë së lirë, e cila u hartua 25 vjet më parë.

Presidentja e Komisionit Evropian, Ursula von der Leyen, dhe presidenti i Këshillit Evropian, Antonio Costa, do të vizitojnë kryeqytetin e Paraguait, Asuncion, për ceremoninë e nënshkrimit me shpresën për të kthyer më në fund faqen e parë në sagën tregtare transatlantike.

“Marrëveshja do të sjellë përfitime reale për qytetarët dhe bizneset evropiane, do të rrisë sovranitetin dhe autonominë strategjike të BE-së dhe do të formësojë ekonominë globale në përputhje me vlerat tona të përbashkëta”, tha Costa përpara udhëtimit të tij.

“Më shumë se 700 milionë njerëz do të përfitojnë nga marrëveshja BE-Mercosur”, tha Costa.

BE-ja arriti marrëveshjen përtej kufijve pavarësisht kundërshtimit të disa vendeve në bllok, në një përpjekje për të diversifikuar lidhjet e saj tregtare, ndërsa marrëdhëniet me Shtetet e Bashkuara të Amerikës dhe Kinën po tensionohen.

“Evropa është e hapur për biznes dhe po ndërton ura drejt prosperitetit të përbashkët me partnerët tanë globalë”, tha Costa.

Marrëveshja tregtare midis 27 vendeve anëtare të BE-së dhe vendeve të “Mercosur”, Brazilit, Argjentinës, Uruguait dhe Paraguait, synon të rrisë tregtinë midis blloqeve ekonomike.

Negociatat, të cilat filluan në vitin 1999, ngecën vazhdimisht, përfshirë shqetësimet e fermerëve evropianë, të cilët paralajmëruan se do të duhej të përmbushnin standarde të ndryshme.

Ceremonia e nënshkrimit, e cila fillimisht ishte planifikuar në dhjetor, u vonua pasi mbështetja për marrëveshjen midis vendeve të BE-së, nuk arriti shumicën e kërkuar.

Lëshimet e minutës së fundit nga Komisioni Evropian në fillim të këtij muaji nxitën mbështetjen vendimtare nga Italia, për arritjen e marrëveshjes.

Parlamenti Evropian ende duhet ta miratojë marrëveshjen përpara se ajo të hyjë në fuqi.

Zona e re e tregtisë së lirë është menduar gjithashtu si një sinjal që kompenson politikën tregtare proteksioniste të presidentit të SHBA-së Donald Trump.

Qëllimi është të hiqen sa më shumë që të jetë e mundur barrierat tregtare dhe tarifore midis BE-së dhe shteteve të “Mercosur”.

Industria gjermane ka bërë presion për vite me radhë që marrëveshja të përfundonte.

Kancelari gjerman, Friedrich Merz e mirëpriti atë si një “moment historik” në politikën tregtare evropiane dhe një sinjal të rëndësishëm të sovranitetit dhe aftësisë strategjike për të vepruar.

Komisioni vlerëson se marrëveshja mund të rrisë eksportet vjetore të BE-së në Amerikën e Jugut deri në 39%, ose rreth 49 miliardë euro – duke mbështetur më shumë se 440,000 vende pune në të gjithë Evropën.

Në veçanti, industria e automobilave, inxhinieria mekanike dhe sektori farmaceutik do të përfitojnë. //a.i/

The post FOKUS – BE-ja dhe “Mercosur” nënshkruajnë sot marrëveshjen e tregtisë së lirë appeared first on Agjencia Telegrafike Shqiptare.

TIRANË, 17 janar /ATSH/- Një studim i ri australian i botuar në revistën “Intelligence” ka zbuluar se funksionimi i përgjithshëm shëndetit mendor në fakt, arrin kulmin midis moshës 55 dhe 60 vjeç.

Hulumtimet shkencore tregojnë se aftësi të ndryshme njohëse arrijnë kulmin në faza të ndryshme të jetës, dhe nuk ka një moshë të vetme ku të gjitha funksionet mendore janë në maksimumin e tyre.

Truri ndryshon dhe zhvillohet vazhdimisht në përgjigje të përvojave të reja.

Aftësia për të përpunuar informacionin shpejt dhe për të zgjidhur probleme të reja, abstrakte (inteligjenca fluide) përgjithësisht arrin kulmin rreth moshës 19 vjeç ose në fillim të të 20-tave, pastaj fillon një rënie graduale.

Kujtesa afatshkurtër është më e fortë rreth moshës 25 vjeç dhe mbetet e qëndrueshme deri rreth moshës 35 vjeç.

Aftësia për të kujtuar arrin kulmin rreth moshës 30 vjeç.

Njohuritë e akumuluara përmes përvojës jetësore dhe arsimit (inteligjenca e kristalizuar) rriten dhe arrijnë kulmin më vonë në jetë, shpesh në të 60-tat ose 70-tat e një personi.

Aftësi si rregullimi emocional, empatia dhe vendimmarrja e matur shpesh arrijnë kulmin në moshën e mesme, zakonisht në të 40-tat ose 50-tat.

Sugjerimi se truri i burrave nuk e arrin kulmin e mirëqenies mendore deri në fund të të 30-tave është pjesërisht i saktë.

Ndërsa disa aftësi arrijnë kulmin më herët, shumë funksione të rëndësishme njohëse, të tilla si të gjykuarit dhe njohuritë e akumuluara, përmirësohen në moshën e mesme dhe të vjetër.

Një studim gjithëpërfshirës që kombinoi 16 tipare të ndryshme njohëse dhe të personalitetit zbuloi se funksionimi i përgjithshëm mendor arrin kulmin më vonë në jetë, konkretisht midis moshës 55 dhe 60 vjeç.

Ky kulm i mëvonshëm nxitet nga njohuritë në dije, në të gjykuar dhe stabilitet emocional që kompensojnë rënien e shpejtësisë së përpunimit të të dhënave.

Studime të tjera mbi strukturën e trurit sugjerojnë se faza e trurit “adoleshent”, që përfshin rilidhje të konsiderueshme nervore, vazhdon deri rreth moshës 32 vjeç, kur hyn në fazën më të qëndrueshme të “pjekurisë”.

Hulumtimet e përqendruara në pjekurinë emocionale tek burrat gjithashtu sugjerojnë se kjo mund të mos arrihet deri rreth moshës 43 vjeç.

Truri vazhdon të piqet dhe të fitojë aftësi të vlefshm përtej të 30-ave, veçanërisht në lidhje me vendimmarrjen komplekse dhe inteligjencën emocionale. //a.i/

The post Truri i burrave arrin kulmin e mirëqenies mendore midis moshës 55 dhe 60 vjeç appeared first on Agjencia Telegrafike Shqiptare.

TIRANË, 17 janar /ATSH/- Ideja që macet “u zbutën” duke u zhvendosur me njerëzit për gjueti të brejtësve është një teori e pranuar gjerësisht, sipas “Science”.

Kjo, pasi macet e egra të lashta tërhiqeshin nga rezervat e grurit në vendbanimet bujqësore, të cilat tërhiqnin brejtësit, duke krijuar një marrëdhënie të dobishme reciprokisht – ku macet merrnin ushqim dhe njerëzit kishin kontrollin ndaj brejtësve.

Me kalimin e kohës, kjo tolerancë evoluoi në mace shtëpiake (Felis catus), një proces ku macet më miqësore dhe më pak të frikësuara jetonin dhe riprodhoheshin pranë njerëzve pa ndërhyrjen e drejtpërdrejtë të njeriut.

Macet e egra afrikane (Felis lybica) ndiqnin brejtësit në këto vendbanime për një burim të lehtë ushqimi.

Macet siguruan ushqim, njerëzit morën kontrollin e dëmtuesve, duke zvogëluar humbjen e të korrave.

Macet që ishin natyrshëm më tolerante ndaj njerëzve mbijetuan dhe u riprodhuan, duke transmetuar gjenet e tyre “zbutëse”.

Gjatë mijëra viteve, ky avantazh selektiv çoi në macen e veçantë shtëpiake, një specie që është gjenetikisht e ndryshme nga paraardhësit e saj të egër.

Ky partneritet unik dhe i qetë, ku macet në thelb zgjedhin të jetojnë pranë njerëzve për të patur akses më të lehtë në ushqim, është arsyeja pse ato konsiderohen një rast i vetë-zbutjes.

Arkeologët besojnë se macet dhe njerëzit kanë pasur një marrëdhënie të ngushtë për mijëra vjet, duke filluar që nga periudha kur kultivimi i të korrave u bë një normë – midis Detit Mesdhe modern dhe Gjirit Persik.

Brejtësit e vegjël të rrumbullakët që fshiheshin në fusha ishin shënjestra të lehta për macet e egra që jetonin në zonë.

Kështu që, në vend që të luftonin në shkretëtirë, macet u zhvendosën me njerëzit rreth vitit 7500 p.e.s.

Marrëdhënia e saktë midis maceve të hershme, gjysmë të zbutura dhe njerëzve nuk është ende e qartë.

Ekzistojnë prova të shumta se njerëzit kanë patur lidhje me macet.

Një vend varrimi kafshësh shtëpiake në Qipro dëshmon marrëdhënien njeri-mace, që daton 9500 vjet më parë.

Kur njerëzit filluan të shkonin në veri drejt Evropës, duke u marrë me bujqësi, me sa duket u ndoqën nga macet.

Një studim i ri zbuloi kocka njerëzish dhe macesh që datojnë që nga viti 4200 deri në vitin 2300 p.e.s. në një shpellë në Poloni, që përkon me një periudhë vendbanimi të shpejtë në periudhën e vonë neolitike. //a.i/

The post Marrëdhënia njeri-mace filloi rreth 9500 vjet më parë appeared first on Agjencia Telegrafike Shqiptare.

PEKIN, 16 janar /ATSH-DPA/- Kanadaja do të ulë tarifat për automjetet elektrike kineze në këmbim të uljes së taksave nga Kina ndaj produkteve bujqësore kanadeze, tha sot kryeministri Mark Carney, në Pekin.

Njoftimi erdhi ndërsa Carney zhvilloi vizitën e parë si kryeministër i Kanadasë në Kinë në tetë vjet, me të dyja palët që kërkojnë të rivendosin marrëdhëniet e tendosura mes tensioneve destabilizuese tregtare me Shtetet e Bashkuara të Amerikës.

“Kanadaja do të lejojë deri në 49,000 automjete elektrike kineze në tregun e saj sipas një tarife preferenciale prej 6,1%, shumë më poshtë se taksa 100% e vendosur në vitin 2024 në bashkëpunim me Uashingtonin”, tha Carney në një deklaratë.

Në këmbim, Kina do të ulë tarifat për farën kanadeze “kanola” në rreth 15% nga 85% deri më 1 mars.

Për më tepër, karavidhet, gaforret dhe bizelet nuk do t’i nënshtrohen tarifave anti-diskriminim.

“Ne duhet të kuptojmë ndryshimet midis Kanadasë dhe vendeve të tjera dhe të përqendrojmë përpjekjet tona në bashkëpunim aty ku jemi të njësuar”, tha Carney.

Kina është vendi i dytë më i madh i eksportit të Kanadasë pas Shteteve të Bashkuara të Amerikës.

Ndërsa masat e njoftuara sot janë të kufizuara në fushëveprim, ato mund të shënojnë një pikë kthese në marrëdhëniet dypalëshe, ndërsa Carney pranon se lidhjet Kanada-Kinë kanë qenë të largëta dhe të pasigurta.

Marrëdhëniet kanë qenë të ftohta që nga arrestimi i drejtueses ekzekutive të “Huawei”, Meng Wanzhou, në Kanada në vitin 2018 – i kryer me kërkesë të Shteteve të Bashkuara të Amerikës.

Kina reagoi në atë kohë duke arrestuar dy shtetas kanadezë.

Që nga rikthimi në detyrë i presidentit të SHBA-së, Donald Trump, Kanadaja është përballur me presion të ri nga Uashingtoni.

Trump ka tërhequr jo vetëm Kinën, por edhe Kanadanë fqinje në mosmarrëveshje tregtare, një faktor kyç i afrimit te Pekinit me Otavën. //a.i/

The post PEKIN – Kanadaja dhe Kina ulin tarifat mes përpjekjeve për të rivendosur marrëdhëniet e tensionuara appeared first on Agjencia Telegrafike Shqiptare.

KAJRO, 16 janar /ATSH/- Ministri i Jashtëm egjiptian, Badr Abdelatty mori një telefonatë nga Steve Wittkoff, i dërguari special i SHBA-së për Lindjen e Mesme, për të vlerësuar krizat e vazhdueshme në Gaza dhe Iran, sipas “Il Sole 24 Ore”.

Gjatë bisedës, raporton ministria egjiptiane, palët rikonfirmuan angazhimin e tyre të përbashkët për të forcuar bashkëpunimin në sfera të ndryshme politike, të sigurisë dhe ekonomike – për t’i shërbyer interesave të tyre të përbashkëta dhe për të mbështetur përpjekjet për të vendosur sigurinë dhe stabilitetin në rajon.

Lidhur me Iranin, u rikonfirmua nevoja për të punuar për uljen e tensioneve, për të rivendosur qetësinë dhe për të parandaluar që rajoni të bjerë në paqëndrueshmëri dhe kaos.

Në lidhje me Gazën, u theksua nevoja për të vazhduar me zbatimin e kërkesave të fazës së dytë të armëpushimit, me fillimin e punës së komitetit teknik palestinez, vendosjen e një force ndërkombëtare stabilizimi për të monitoruar armëpushimin, tërheqjen e plotë të trupave izraelite nga Rripi i Gazës dhe fillimin e fazës së rimëkëmbjes dhe rindërtimit. //a.i/

The post SHBA – Witkoff telefonon ministrin e Jashtëm egjiptian: Intensifikoni përpjekjet për uljen e tensioneve në LM appeared first on Agjencia Telegrafike Shqiptare.

BRUKSEL, 16 janar /ATSH/- Bashkimi Evropian i bën thirrje Iranit të ndalojë ekzekutimet e protestuesve dhe dënon përdorimin e dënimit me vdekje si mjet për shtypjen e protestave, tha sot zëdhënësi i BE-së për Punët e Jashtme dhe Politikën e Sigurisë, Anouar El Anouni, sipas “Il Sole 24 Ore”.

“Ne kundërshtojmë përdorimin e dënimit me vdekje në çdo kohë dhe në veçanti përdorimin e tij për të shtypur disidentët”, tha El Anouni, gjatë një konference për shtyp në Bruksel.

Zëdhënësi i BE-së theksoi se Brukseli po ndiqte nga afër raportet për ekzekutime të mundshme të afërta të protestuesve.

Brukseli, gjithashtu i bëri thirrje Teheranit të ndiqte një politikë të qëndrueshme drejt heqjes së dënimit me vdekje.

El Anouni përsëriti se ndryshimi i regjimit nuk ishte pjesë e politikës së BE-së.

“Në terren ekziston një lëvizje e protestave legjitime dhe e vërtetë e popullit iranian, me aspirata legjitime për një jetë, liri dhe dinjitet më të mirë”, tha ai.

“Ne qëndrojmë pranë tyre ndërsa ata luftojnë për këto vlera”, shtoi El Anouni. //a.i/

The post BRUKSEL – BE bën thirrje për ndalimin e ekzekutimeve të protestuesve në Iran appeared first on Agjencia Telegrafike Shqiptare.

TEL AVIV/BEJRUT, 16 janar /ATSH-DPA/- Ushtria izraelite tha dje në mbrëmje se kishte sulmuar disa objektiva në Liban, duke përfshirë objektet e Hezbollahut në jug të vendit.

Sipas ushtrisë, objektivat përfshinin objekte të magazinimit të armëve të grupit të mbështetur nga Irani, si dhe infrastrukturë shtesë terroriste të përdorur për sulmet terroriste kundër trupave të IDF-së dhe Shtetit të Izraelit.

Gjatë një sulmi tjetër izraelit, u godit edhe një depo nëntokësore armësh.

“Aktivitetet e Hezbollahut në vendet e përmendura përbënin një shkelje të armëpushimit të rënë dakord midis Izraelit dhe Libanit”, thuhet në deklaratë.

Banorët e zonave fqinje raportuan shpërthime të forta që tronditën shtëpitë e tyre.

Burimet libaneze të sigurisë thanë se Forcat Ajrore Izraelite kishin kryer të paktën dy sulme ajrore. Nuk pati raportime fillestare për viktima të mundshme.

Në kuadër të armëpushimit midis Izraelit dhe Hezbollahut – që ka qenë në fuqi që nga fundi i nëntorit 2024 – milicia shiite e mbështetur nga Irani duhej të çarmatosej.

Afati kyç për çarmatimin e Hezbollahut, të cilin qeveria libaneze ia ngarkoi ushtrisë, përfundoi në fund të dhjetorit.

Izraeli akuzon Hezbollahun për riorganizim dhe riarmatosje në shkelje të marrëveshjes.

Si rezultat, ushtria ka vazhduar të sulmojë fqinjin e saj, pothuajse çdo ditë.

Sipas shifrave të qeverisë, më shumë se 300 njerëz janë vrarë në Liban që kur armëpushimi hyri në fuqi.

Kombet e Bashkuara thonë se më shumë se 100 prej tyre ishin civilë. //a.i/

The post TEL AVIV – Forcat izraelite sulmojnë objektiva në Liban appeared first on Agjencia Telegrafike Shqiptare.