KOPENHAGË, 20 janar /ATSH-AA/ – Ministri danez i Mbrojtjes, Troels Lund Poulsen tha se Danimarka, së bashku me Grenlandën, i propozuan Sekretarit të Përgjithshëm të NATO-s, Mark Rutte një mision të Aleancës në Arktik mes kërcënimeve të SHBA-së për të marrë territorin autonom danez.

Poulsen mbajti një konferencë të përbashkët për media me ministren e Jashtme të Grenlandës, Vivian Motzfeldt pasi u takuan me kreun e NATO-s dhe shefen e politikës së jashtme të BE-së, Kaja Kallas në Bruksel.

“Danimarka dhe Grenlanda i kanë propozuar Ruttes një mision të NATO-s në Arktik. Ne e kemi diskutuar atë dhe gjithashtu e kemi propozuar”, tha Poulsen.

Megjithatë, ai nuk tha se si iu përgjigj Rutte propozimit.

Poulsen riafirmoi se ata do të vazhdojnë dialogun me zyrtarët amerikanë, duke shtuar se nuk do të jetë Danimarka ajo që “do të heqë dorë nga këmbëngulja për dialog”.

“Nëse SHBA-ja do të tërhiqej nga NATO nesër, ne do të përballeshim me një sfidë të madhe në menaxhimin tonë vetë”, tha ai duke nënvizuar se disa nga deklaratat që vijnë nga Trumpi “vërtet lëndojnë”.

Motzfeldt përsëriti se “të gjitha dyert mbeten të hapura” përmes bashkëpunimit dhe zhvillimit “me fokus në mbrojtjen e ndërsjellë” midis aleatëve dhe se mbrojtja e tyre është “e ndërthurur me mbrojtjen e SHBA-së”.

“Për ne, banorët e Grenlandës, aspekti më i rëndësishëm i pjesëmarrjes sonë është të jemi në gjendje të flasim në emër të popullit të Grenlandës, duke kontribuar në gjetjen e zgjidhjeve të mira në interes të tyre. Ne e kemi kryer këtë punë në një mënyrë të mirë”, shtoi ajo.

Grenlanda, një territor vetëqeverisës brenda Mbretërisë së Danimarkës ka tërhequr interesin e SHBA-së për shkak të vendndodhjes së saj strategjike dhe burimeve të mëdha minerale si dhe shqetësimeve të supozuara në lidhje me rritjen e aktivitetit rus dhe kinez.

Trumpi ka thënë vazhdimisht se SHBA-ja duhet ta blejë Grenlandën për sigurinë kombëtare dhe për të parandaluar Rusinë ose Kinën të fitojnë kontrollin e territorit. Ai ka kërcënuar me tarifa aleatët që kundërshtojnë ofertën.

Si Danimarka ashtu edhe Grenlanda kanë hedhur poshtë çdo propozim për shitjen e territorit, duke riafirmuar sovranitetin danez mbi ishullin.   /os/

The post FOKUS – Danimarka dhe Grenlanda propozojnë mision të NATO-s në Arktik appeared first on Agjencia Telegrafike Shqiptare.

TEHERAN, 21 janar /ATSH-AA/ – Agjencia e Lajmeve e Aktivistëve të të Drejtave të Njeriut (HRANA) me seli në SHBA, tha të hënën se numri i viktimave nga protestat në Iran është rritur në 4 029 persona.

Sipas të dhënave të mbledhura nga organizata, thuhet se që nga dita e 23-të e protestave mbarëkombëtare në vend janë arrestuar gjithsej 26.015 persona.

Sipas raportit, gjatë protestave të paktën 5.811 persona kanë pësuar lëndime të rënda.

Irani është tronditur nga valët e protestave që nga muaji i kaluar, të cilat filluan më 28 dhjetor në Pazarin e Madh të Teheranit, për shkak të zhvlerësimit të ndjeshëm të rialit iranian dhe përkeqësimit të kushteve ekonomike. Demonstratat më vonë u përhapën në disa qytete të tjera.

Zyrtarët iranianë kanë akuzuar SHBA-në dhe Izraelin për mbështetjen e atyre që i përshkruajnë si “trazira të armatosura”, të cilët kanë kryer disa sulme në vende publike në të gjithë vendin.

Presidenti i SHBA-së, Donald Trump kërcënoi vazhdimisht se do të “godiste fort” nëse protestuesit vriteshin, por më vonë e përgëzoi Teheranin për anulimin e qindra ekzekutimeve të planifikuara, të cilat thuhet se ka bërë.

The post TEHERAN -HRANA: Mbi 4 000 të vdekur dhe mijëra të arrestuar nga protestat appeared first on Agjencia Telegrafike Shqiptare.

UASHINGTON, 20 janar /ATSH-AA/ – Presidenti i SHBA-së, Donald Trump argumentoi të hënën se Danimarka nuk është në gjendje ta mbrojë në mënyrë adekuate Grenlandën, duke sugjeruar se çështja do të diskutohet me udhëheqësit ndërkombëtarë në Forumin Ekonomik Botëror në Davos.

“Nuk mendoj se ata do të kundërshtojnë”, u tha Trump gazetarëve kur u pyet për komentet e udhëheqësve evropianë në Davos, të cilët mund të kundërshtojnë planin e tij për Grenlandën.

“Shikoni, ne duhet ta bëjmë. Ata duhet ta bëjnë këtë. Ata nuk mund ta mbrojnë atë. Ata janë njerëz të mrekullueshëm”, shtoi ai.

Ndërsa vlerësoi Danimarkën dhe udhëheqjen e saj, Trump tha: “E di që udhëheqësit janë njerëz shumë të mirë, por ata as nuk shkojnë atje”.

Ai shtoi se diskutimet mbi Grenlandën do të zhvillohen me udhëheqës të ndryshëm që marrin pjesë në Forumin Ekonomik Botëror, i cili filloi të hënën. “Do të flasim për këtë me njerëz të ndryshëm”, tha Trump, pa specifikuar udhëheqësit.

“Grenlanda është shumë e rëndësishme pçr ne”, theksoi ai.

Presidenti amerikan theksoi shqetësimet e kahershme të sigurisë, duke thënë se NATO e ka paralajmëruar Danimarkën për dekada të tëra për kërcënimet e mundshme në rajon.

“NATO e ka paralajmëruar Danimarkën për rreth 20 vjet tani, më gjatë se kaq, 25 vjet”, tha Trump. Ai përmendi Rusinë si shqetësim duke shtuar se Kina gjithashtu përbën sfidë strategjike në rajonin e Arktikut.

“Pra, do të shohim se çfarë ndodh. Por, le ta themi kështu, do të jetë një Davos shumë interesant”, tha ai.

Në një intervistë të shkurtër telefonike me NBC News, Trump u pyet nëse do të përdorte forcën për të pushtuar Grenlandën. “S’ka koment”, u përgjigj ai.

Trump thotë se SHBA-ja duhet ta blejë Grenlandën për arsye sigurie kombëtare dhe për të penguar rivalët në Arktik. Ai ka kërcënuar me tarifa për aleatët evropianë që kundërshtuan kontrollin e Grenlandës nga SHBA-ja dhe dërguan një numër të vogël trupash në territor.

Si Danimarka ashtu edhe Grenlanda kanë hedhur poshtë çdo propozim për shitjen e territorit.

The post SHBA – Trump: Grenlanda është shumë e rëndësishme për ne appeared first on Agjencia Telegrafike Shqiptare.

KIEV, 20 janar /ATSH/ – Energji elektrike disa orë në ditë, në rastin më të mirë. Banesa pa ngrohje për ditë të tëra. Gjeneratorë që punojnë mbi trotuaret e mbuluara me borë. Reduktime të furnizimit me ujë. Temperaturat më të ulëta ndër vite.

Durimi po shteron, nervozizmi po rritet dhe Kievi po ngrin përderisa ukrainasit përpiqen t’i përballojnë sulmet e pandërprera ruse që kanë shkatërruar pjesë të mëdha të infrastrukturës energjetike të vendit. Një javë pas një breshërie të madhe ruse më 9 janar, shumë shtëpi në kryeqytetin ukrainas, Kiev, kanë mbetur pa ngrohje apo shërbime të tjera.

Përderisa bombardimet e Rusisë ndaj caqeve të energjisë civile dhe ngrohjes nuk janë një strategji e re, breshëria këtë dimër duket më e pandalshme dhe më shkatërruese sesa vitet e kaluara.

“Është 15 gradë Celsius në banesën time”, tha një grua teksa po ecte në një rrugë të Kievit, jo larg ndërtesës ku banon.

“Unë vishem trash dhe i them [kryetarit të Kievit, Vitali] Klitschko që të shpejtojë. Sigurisht, unë vetë nuk mund të nxitojë për shkak të moshës. Unë pi shumë çaja të nxehtë”.

“Është turp që nuk ishim më të përgatitur për këtë”, tha ajo në një intervistë për Current Time.

Një burrë tjetër, që ecte ngadalë nëpër qendrën e Kievit, tha se shtëpia e tij është pa ngrohje që tre ditë, gjatë të cilave gruaja e tij ka ndezur shporetin me gaz për t’u ngrohur. “Shyqyr Zotit që kemi gaz”.

Ukrainasit janë të lodhur nga pothuajse katër vjet të luftës së plotë që Rusia nisi kundër shtetit të tyre. Për shumë, morali është pësuar ulje-ngritje, teksa fati i ushtrisë ukrainase në fushëbetejë ka ndryshuar vazhdimisht.

Presidenti Volodymyr Zelensky, dhe zyrtarë të tjerë janë përpjekur që të mbajnë lart moralin e ukrainasve, teksa po ashtu kanë siguruar mbështetje të vazhdueshme nga aleatët perëndimorë dhe furnizim të qëndrueshëm me armë perëndimore, gjë që ka fuqizuar luftën e ushtrisë. Kjo përfshin edhe mbrojtje ajrore për të rrëzuar raketat dhe dronët që lëshon Rusia.

Këtë dimër, Rusia nuk e ka fshehur strategjinë e saj për të shënjestruar rrjetin elektrik dhe termocentralet në Ukrainë, që veçse janë dëmtuar rëndë, së bashku me ngrohtoret komunale, të cilat furnizojnë me ngrohje dhe ujë të nxehtë, në mos shumicën, e ndërtesave në Kiev dhe qytete të tjera ukrainase.

“Nuk ka asnjë central energjetik në Ukrainë që nuk është goditur nga rusët gjatë luftës”, tha ministri i Energjisë, Denys Shmyhal, gjatë një mbledhje të Parlamentit ukrainas më 16 janar.

Por, Ukraina ka vetëm një numër të kufizuar të sistemeve kundërajrore për rrëzimin e dronëve dhe raketave. Zyrtarët kanë vendosur për ndërprerje të planifikuara të energjisë elektrike nëpër qytet dhe rajonet përreth – për shembull, tri orë me rrymë dhe 12 pa – teksa punëtorët po ngarendin të riparojnë dëmet që të ketë rrymë dhe ngrohje.

“Ka shumë dëme”, tha përmes një videoje një punëtor i DTEK-ut, kompanisë më të madhe private në Ukrainë për shërbime. “Tela të këputur, izolatorë të thyer, shtylla të dëmtuara. Fusha, rrugë të shkatërruara, ku asnjë pajisje nuk mund të arrijë deri te dëmtimet. Për t’i gjetur vendet ku ka dëme, punëtorët ecin me orë të tëra në të ftohtë”.

Ukrainasve po u humb durimi dhe kanë nisur të kritikojnë zyrtarët lokalë dhe qendrorë. Veçmas në Kiev.

“Kievi, fatkeqësisht, ka bërë shumë më pak, shumë pak është bërë në kryeqytet. Dhe edhe këto ditë nuk shoh shumë intensitet”, tha Zelensky, duke pranuar vështirësitë që kanë pasur punëtorët për t’i mbajtur shtëpitë të ngrohta dhe të ndriçuara.

Kjo nxiti një reagim të ashpër nga kryetari i Kievit, i cili edhe më herët ka pasur përplasje me Zelenskyn.

“Çfarë ‘intensiteti’ nuk sheh presidenti në punën që po bëhet në Kiev, në këtë situatë krize, veçmas në ditët e fundit, siç tha ai?”, shkroi në Telegram më 14 janar kryetari i Kievit, Vitali Klitschko.

“Të paktën unë po flas sinqerisht dhe po i paralajmëroj njerëzit për një situatë jashtëzakonisht të vështirë. Dhe nuk më interesojnë asnjë lloj vlerësimesh apo zgjedhjesh fantazmë”, tha Klitschko, i cili kishte këshilluar banorët e Kievit që të largoheshin nga qyteti për shkak të krizës energjetike dhe të gjenin strehim te të afërmit ose miqtë që gjenden diku tjetër.

Zyrtarët e emergjencës kanë ngritur tenda ngrohëse në lagjet më të prekura të Kievit, ku njerëzit mund të ngrohen dhe të mbushin bateritë e telefonave dhe kompjuterëve të tyre.

Inna, nënë e tre fëmijëve, përfshirë një foshnjë trejavëshe, tha se familja e saj ia doli natën e parë pasi u ndërpre ngrohja dhe energjia elektrike. Por, natën e dytë, temperatura brenda shtëpisë ranë në 15 gradë dhe ata nisën ta ndjenin të ftohtët.

“E veshëm më të voglin me dy palë pizhame dhe një triko të trashë. Një fqinj nga solli një triko leshi nga vitet ‘40”, tha ajo. “Mora edhe gëzof nga spitali dhe e mbulova edhe me të”.

“Tashmë kemi 55 orë pa rrymë, ndaj thjesht qesh që të mos qaj”, tha Anna, një grua që po letra në një qendër tjetër për ngrohje.

“Ne duam negociata. Por, më duket se Rusia nuk do negociata. Dhe, çfarë më pas? Nuk e di”, tha një grua tjetër në këtë qendër. “Dua të jetoj në Ukrainë”.

Ligji për konfliktet e armatosura

Vendimi për të shënjestruar popullatën civile të Ukrainës nisi disa muaj pas fillimit të pushtimit në shkallë të plotë të Ukrainës në shkurt të vitit 2022.

Që atëherë, një numër gjithnjë e në rritje i ekspertëve ndërkombëtarë kanë ardhur në përfundim se kjo përpjekje përbën krim të pastër lufte, një shkelje e ligjit ndërkombëtar humanitar që ndalon shënjestrimin e qëllimshëm të civilëve.

“Këto sulme bëhen në kohë të caktuara jo për të përkuar me ofensiva ushtarake, por me ardhjen e dimrit. Efekti i parashikueshëm – dhe ndoshta edhe qëllimi – është t’i zhysë civilët në errësirë dhe privim, duke e përdorur dimrin si armë”, shkroi një grup avokatësh në një dokument të publikuar në nëntor të vitit të kaluar.

Shkalla e vuajtjeve civile të shkaktuara nga këto goditje tejkalon çdo përfitim ushtarak të mundshëm, duke shkelur parimin e proporcionalitetit”, thanë ata.

“Dhe, përdorimi i qëllimshëm i motit të ftohtë dhe errësirës për të thyer moralin tregon një qëllim për të terrorizuar, gjë që ndalohet me ligjet e luftës”, shkruan REL.  /os/

The post KOMENT – Dimri si armë lufte: strategjia e Rusisë kundër Ukrainës appeared first on Agjencia Telegrafike Shqiptare.

LONDËR, 19 janar /ATSH/ – Kalojmë gati 90% të kohës sonë brenda por drita natyrale është “ora kryesore” që sinkronizon ritmet tona biologjike, shkruan salute.eu.

Kur ky sinjal dobësohet, rreziku është një lloj mospozicionimi: truri dhe organet periferike, përfshirë muskujt, përpiqen të qëndrojnë aktive.

Ky është fokusi i një studimi të botuar në Cell Metabolism: 13 persona me diabet të tipit 2, të gjithë mbi 65 vjeç, u vëzhguan në një protokoll shumë të kontrolluar, me dy kushte të krahasuara në rend të rastësishëm dhe të paktën katër javë larg.

Në një seancë, ata punuan nga ora 8:00 e mëngjesit deri në orën 5:00 të pasdites në një dhomë me dritare të mëdha dhe dritë natyrale; në tjetrën, ata ndoqën të njëjtën rutinë por me dritë artificiale të vazhdueshme, ndërsa vaktet, aktiviteti fizik, gjumi dhe madje edhe koha para ekranit u mbajtën sa më identike të ishte e mundur.

Rezultatet, pavarësisht një madhësie të vogël të mostrës dhe vetëm katër ditë e gjysmë, ishin konsistente: me dritë natyrale, pjesëmarrësit kaluan më shumë kohë “brenda diapazonit të dëshirueshëm të sheqerit në gjak”, afërsisht 59% të kohës krahasuar me 51% me dritë artificiale, me më pak ndryshueshmëri.

Në të njëjtën kohë, metabolizmi u zhvendos drejt oksidimit më të madh të yndyrës, një shenjë e fleksibilitetit të përmirësuar metabolik, dhe nivelet e melatoninës ishin pak më të larta në mbrëmje, sikur e gjithë dita të ishte planifikuar më me kujdes.  /os/

The post FOKUS – Ekspozimi në më shumë dritë natyrale përmirëson kontrollin e glicemisë appeared first on Agjencia Telegrafike Shqiptare.

BRUKSEL, 19 janar /ATSH-ANSA/ – Danimarka dhe Groenlanda nuk janë vetëm, deklaroi përfaqësuesja e Lartë Kaja Kallas pas takimit me kolegët e saj nga Danimarka dhe Groenlanda.

‘’Është mirë të shoh kolegët e mi Troels Lund Poulsen dhe Vivian Motzfeldt. Siguria e Arktikut është një interes i përbashkët transatlantik, të cilin mund ta diskutojmë me aleatët tanë amerikanë. Por kërcënimet me tarifa nuk janë rruga e duhur’’, shtoi ajo.

‘’Sovraniteti i Danimarkës është i panegociueshëm. Ne nuk kemi interes të kërkojmë konfrontim, por do ta mbrojmë qëndrimin tonë. Evropa ka një gamë mjetesh për të mbrojtur interesat e saj’’, theksoi Kallas.  /os/

The post BRUKSEL – Kallas: Nuk kërkojmë një përplasje me SHBA-në, por do të mbrohemi! appeared first on Agjencia Telegrafike Shqiptare.

ROMË, 19 janar /ATSH/ – Emri i tij i vërtetë ishte Valentino Clemente Ludovico Garavani. Për botën, ai ishte thjesht Valentino, perandori i fundit i modes, ose ‘’The Chic’’ për amerikanët shkruan Vanityfair.it.

Valentino ndërroi jetë sot, në qetësinë e shtëpisë së tij romake. Ai ishte 93 vjeç, tërësisht i përkushtuar ndaj modës, luksit dhe një vizioni të rrallë.

Mjafton të shikoni rrobat që ai vetë i dizenjoi për koleksionet e tij, mund të admironi atë thjeshtësi: një fjongo, një dekolte, një detaj dhe do të kuptoni madhësinë e tij.

Ai ishte një mjeshtër i ëndrrave, i përkushtuar ndaj bukurisë, magjepsjes.

Bukuria ka qenë gjithmonë një mit për të cilin Valentino aspironte pa pushim, një pasion pa të cilin nuk mund të jetonte.

Dhe nuk po flasim vetëm për tapetin e kuq ose fustanet e princeshave. Po flasim për një bukuri 360 gradë që përshkonte çdo moment të jetës së tij, që shpërthente nga gjithçka që bënte.

Valentino lindi më 11 maj 1932, në Voghera, në provincën e Milanos.

Babai i tij, Mauro Garavani, u martua me Teresën, hapi një berberhane dhe më pas iu përkushtua shitjes me shumicë të materialeve elektrike, duke i siguruar familjes të ardhura të kënaqshme.

Valentino ndoqi shkollën, por ishte i shpërqendruar duke mbushur faqet e librave me vizatime të panumërta.

Ai gjithmonë e donte vizatimin: e bënte vazhdimisht. Nga ato male skicash dolën idetë e tij të mrekullueshme.

Në vitet 1950, pasi fitoi njohje duke marrë pjesë në një konkurs të rëndësishëm dizajni, ai u transferua në Paris dhe filloi të punonte në shtëpinë e Jean Dessès dhe në atelienë e Guy Laroche.

Ai u kthye në Itali dhe në fund të viteve 1950 ishte në Romë, duke studiuar nën drejtimin e Emilio Schuberth, përpara se të punonte në atelienë e Vincenzo Ferdinandit përpara se të hapte shtëpinë e tij të modës.

Në vitin 1957, ai themeloi Valentino-n, së bashku me disa partnerë, përfshirë babanë e tij.

Megjithatë, kostot e larta operative, të kombinuara me shijen e stilistit për luks, i çuan partnerët të tërhiqeshin nga biznesi, duke shkaktuar pothuajse falimentimin e shtëpisë së modës.

Ardhja e partnerit të tij Giancarlo Giammetti, një student i arkitekturës, rezultoi vendimtare. Me Giammetti-n, Garavani filloi një shtëpi të re mode, duke u përqendruar ekskluzivisht në anën krijuese dhe duke ia lënë anën financiare partnerit të tij.

Në vitin 1959 ai hapi atelienë e tij në Romë në Via dei Condotti dhe në vitin 1960 filloi bashkëpunimin me Giancarlo Giammetti, i cili do të mbikëqyrte zhvillimin e markës së tij.

Në vitin 1962, pas triumfit të koleksionit të tij të parë në Pitti Moda në Firence, Valentino u bë shpejt një nga stilistët më të vlerësuar dhe më të njohur në botë.

Dy faqet që botimi francez Vogue i kushtoi atij ishin shenjë e shenjtërimit të tij midis të mëdhenjve të modës.

Në vitin 1967 ai u vlerësua me Çmimin Neiman Marcus në Dallas, ekuivalenti, në botën e modës, i Oscarit për kinemanë.

Në të njëjtin vit ai dizenjoi uniformat për asistentët e fluturimit TWA dhe prezantoi koleksionin e parë Valentino Uomo.

Në vitin 1968 ai filloi të përdorte “V”-në e famshme si nënshkrimin e tij ai krijoi fustanin e nusërisë për dasmën e Jacqueline Bouvier me Onassis.

Ndërkombëtarizimi i markës fillon zyrtarisht, falë një politike inteligjente bashkëpunimesh me kompani të reja prodhimi.

Në dekadën e re, vitet 1970, stilisti italian hap atelie të reja në qytetet më të rëndësishme ndërkombëtare të modës, duke përfshirë Parisin, Tokion, Gjenevën, Nju Jorkun dhe Lozanën.

Në vitin 1969 ai hapi dyqanin e tij të parë të veshjeve të gatshme në Milano.

Ai hapi dyqane në New York City dhe Romë vitin pasardhës. Stilisti vazhdoi të gëzonte një karrierë jashtëzakonisht të suksesshme dhe të shkëlqyer, duke i shërbyer shoqërisë së lartë dhe botës së argëtimit.

Ai dhe Giametti e shitën kompaninë në vitin 1998, megjithëse Valentino mbeti stilisti.

Në vitin 2006 ai mori medaljen e Legjionit të Nderit Francez dhe doli në pension në vitin 2008.

Valentino vdiq sot në shtëpinë e tij në Romë.

Giorgia Meloni, kryeministrja e Italisë, i bëri homazh atij në një postim në rrjetet sociale ku e quajti atë një “mjeshtër të padiskutueshëm të stilit dhe elegancës dhe simbol të përjetshëm të modës së lartë italiane”.   /os/

The post PORTRET – Valentino, perandori i fundit i modës dhe mjeshtri i ëndrrave appeared first on Agjencia Telegrafike Shqiptare.

KOPENHAGË, 19 janar /ATSH-AA/ – Danimarka po vendos më shumë ushtarë në Grenlandë, njoftuan sot mediat lokale.

Forcat e Armatosura Daneze konfirmuan vendosjen për transmetuesin danez TV 2.

Një numër më i madh ushtarësh luftarakë danezë pritet të mbërrijnë në Kangerlussuaq të hënën në mbrëmje, në atë që është përshkruar si “një kontribut i konsiderueshëm”.

Mbërritja do t’i shtohet një grumbullimi të vazhdueshëm të personelit ushtarak danez në Grenlandë.

Sipas raportit, rreth 100 ushtarë danezë kanë mbërritur tashmë në Nuuk, kryeqytetin e Grenlandës, me një numër të ngjashëm të vendosur në Kangerlussuaq.

Trupat do të marrin pjesë në stërvitjen “Arctic Endurance”, të cilën autoritetet daneze thonë se është përshpejtuar dhe intensifikuar pas deklaratave të fundit të presidentit të SHBA-së, Donald Trump.

Trump tha se dëshiron “blerjen e plotë dhe totale” të territorit danez, duke argumentuar se është thelbësore për sigurinë e SHBA-së dhe atë globale.

Shtëpia e Bardhë ka thënë se Grenlanda mund të merret edhe ushtarakisht.

Të shtunën, presidenti Trump tha se do të vendoste tarifa prej 10 për qind për Mbretërinë e Bashkuar, Danimarkën, Norvegjinë, Suedinë, Francën, Gjermaninë, Holandën dhe Finlandën deri më 1 shkurt, me tarifat që do të rriten në 25 për qind deri më 1 qershor, për shkak të kundërshtimit të tyre ndaj kontrollit amerikan të Grenlandës.

Pas njoftimit, tetë vendet evropiane lëshuan deklaratë të përbashkët të dielën, duke denoncuar kërcënimin amerikan dhe duke riafirmuar angazhimin e tyre për sigurinë e Arktikut.   /os/

The post KOPENHAGË – Danimarka rrit praninë ushtarake në Groenlandë appeared first on Agjencia Telegrafike Shqiptare.

ROMË, 19 janar /ATSH-ANSA/ – Gjigandi i modës Valentino Garavani ka vdekur sot në moshën 93 vjeçare.

“Ai ndërroi jetë në paqe në rezidencën e tij romake, i rrethuar nga dashuria e të dashurve të tij”, njoftoi Fondacioni Valentino Garavani dhe Giancarlo Giammetti në një deklaratë.

I lindur Valentino Clemente Ludovico Garavani, i njohur nga të gjithë si Valentino, stilisti lindi më 11 maj 1932, në Voghera, në provincën e Pavias.

Pasioni i tij për modën, i mbështetur nga prindërit e tij Mauro Garavani dhe Teresa de Biaggi, e shtyu atë të studionte modë dhe frëngjisht, përpara se të transferohej në Paris për të eksploruar mundësi të reja.

Ky ishte vetëm fillimi i një karriere të gjatë dhe rekordthyese që e çoi atë të bëhej një nga emrat më legjendarë në modën italiane dhe ndërkombëtare.

The post MODË – Vdes në moshën 93 vjeçare stilisti italian Valentino Garavani appeared first on Agjencia Telegrafike Shqiptare.

DAVOS, 19 janar /ATSH-AA/ – Takimi i 56-të Vjetor i Forumit Ekonomik Botëror (WEF) ka filluar në Davos me temën “Fryma e Dialogut”.

Samiti, i cili mbahet në qytetin zviceran të Davosit dhe që zgjat deri më 23 janar, pritet të tërheqë gati 3.000 pjesëmarrës nga 130 vende.

Pritet të marrin pjesë afërsisht 400 zyrtarë të nivelit të lartë dhe udhëheqës politikë, përfshirë 65 krerë shtetesh dhe qeverish, 55 ministra ekonomie dhe financash, 33 ministra të jashtëm, 34 ministra tregtie dhe industrie dhe 11 guvernatorë të bankave qendrore.

Në samitin e këtij viti, me temë “Fryma e Dialogut”, do të marrin pjesë edhe organizata ndërkombëtare joqeveritare, akademikë të shumtë dhe përfaqësues kryesorë të botës globale të biznesit.

Udhëheqësit politikë dhe përfaqësuesit kryesorë të biznesit do të mblidhen në samit për të marrë pjesë në seanca të hartuara për të filluar diskutime produktive mbi problemet më urgjente të botës dhe në fund të fundit për të krijuar ndikim.

Në këtë periudhë të rritjes së rreziqeve gjeopolitike dhe gjeoekonomike, pjesëmarrësit do të diskutojnë çështje sfiduese si ekonomia globale, transformimi teknologjik, inteligjenca artificiale dhe qëndrueshmëria.

Midis pjesëmarrësve të rëndësishëm në samit, pritet të jenë të pranishëm shumë liderë politikë, përfshirë presidentin e SHBA-së Donald Trump, zëvendëskryeministrin kinez He Faiang, presidentin francez Emmanuel Macron, kancelarin gjerman Friedrich Merz, kryeministrin palestinez Mohammed Mustafa, presidentin sirian Ahmed al-Shara, kryeministrin spanjoll Pedro Sanchez dhe presidentin argjentinas Javier Milei.

Është planifikuar Trump të mbajë fjalimin e tij pasditen e 21 janarit dhe pritet të shoqërohet nga sekretari i Shtetit Marco Rubio, sekretari i Thesarit Scott Bessent dhe Përfaqësuesi i Tregtisë Jamieson Greer.

– Masa të rrepta sigurie në Davos

Samiti i këtij viti, i cili pritet të shohë një numër rekord përfaqësuesish të qeverisë së nivelit të lartë në historinë e Takimeve Vjetore të WEF, po mbahet nën masa të rrepta sigurie.

Policia dhe ushtria zvicerane po përdorin “inteligjencën artificiale” për të monitoruar në mënyrë strikte të gjitha rrugët dhe rrugët hekurudhore të lidhura me Davosin. Civilët që mbërrijnë në Davos i nënshtrohen skanimeve me anë të njohjes së fytyrës dhe kontrolleve nga forcat e sigurisë.

Në samit, kryhen kontrolle sigurie të ngjashme me ato në aeroporte për të hyrë në qendrën mediatike, sallat e konferencave dhe ndërtesat e tjera të ngjarjeve. Laptopët dhe çantat e pjesëmarrësve skanohen gjithashtu nga makinat me rreze X.   /os/

The post DAVOS – Fillon Samiti i Forumit Ekonomik Botëror me temën “Fryma e Dialogut” appeared first on Agjencia Telegrafike Shqiptare.

MOSKE, 18 janar /ATSH-ANSA/ – Federata Ruse planifikon të rrisë ndjeshëm prodhimin duke parashikuar të lësojë deri në 1 000 dronë në ditë mbi Ukrainë deri në vitin 2026, deklaroi komandanti i Përgjithshëm i Forcave të Armatosura të Ukrainës, Oleksandr Syrsky.

Sipas Syrsky, ”nuk ka shenja se rusët po përgatiten për bisedime paqeje”.

“Përkundrazi, po dëshmojmë një rritje të armiqësive, të numrit të grupeve sulmuese armike dhe një rritje të prodhimit të armëve, raketave dhe dronëve” shton ai.

Aktualisht, armiku prodhon 404 Shaheed të llojeve të ndryshme çdo ditë. Dhe planet e tij përfshijnë një rritje” të lëshimeve të dronëve, specifikoi ai. /os/

The post FOKUS – Kievi ngre alarmin: Moska planifikon të lëshojë deri në 1 000 dronë në ditë këtë vit appeared first on Agjencia Telegrafike Shqiptare.

LUBJANE, 18 janar /ATSH-AA/ – Qeveria e Sllovenisë vendosi sot të dërgojë dy oficerë të Forcave të Armatosura të Sllovenisë në Grenlandë, të cilët do të marrin pjesë në planifikimin dhe realizimin e stërvitjes ushtarake nën udhëheqjen e Danimarkës, me synim mbështetjen e forcimit të sigurisë rajonale.

“Në përputhje me paragrafin e tretë të nenit 84 të Ligjit për Mbrojtjen, Qeveria e Republikës së Sllovenisë vendos për pjesëmarrjen e Forcave të Armatosura të Sllovenisë në përmbushjen e detyrimeve të marra në kuadër të organizatave ndërkombëtare, si dhe miraton plane vjetore për stërvitjen e ushtrisë jashtë vendit dhe të njësive të huaja ushtarake në Republikën e Sllovenisë, në përputhje me marrëveshjet ndërkombëtare”, njoftoi qeveria sllovene.

Oficerët do të marrin pjesë në planifikimin dhe realizimin e stërvitjes ushtarake ndërkombëtare “Qëndrueshmëria Arktike”, e cila udhëhiqet nga Danimarka.

Data e stërvitjes, e cila synon forcimin e sigurisë rajonale, ende nuk është caktuar. Ministria e Mbrojtjes ka njoftuar se do të zbatojë procedurat përkatëse për bashkëpunim në planifikimin dhe realizimin e saj.

Me këtë vendim për dërgimin e oficerëve, Sllovenia u bashkohet disa vendeve evropiane, përfshirë Francën, Gjermaninë, Suedinë, Norvegjinë, Finlandën dhe Holandën, të cilat tashmë kanë dërguar oficerë ose pjesëtarë të tjerë të forcave të armatosura në Grenlandë në kuadër të misionit “Qëndrueshmëria Arktike”.

Për shkak të kërcënimeve të presidentit amerikan Donald Trump, vendet evropiane ditët e fundit po dërgojnë me shpejtësi oficerët e tyre në Grenlandë, duke forcuar praninë e personelit ushtarak evropian në këtë ishull me rëndësi të madhe gjeostrategjike.

Zyrtarisht, bëhet fjalë për pjesëmarrje në një stërvitje ushtarake, përkatësisht në operacionin “Qëndrueshmëria Arktike”, por po komentohet se kjo lëvizje përfaqëson një masë evropiane parandaluese përballë kërcënimeve të Trumpit.

Liderët evropianë të martën e kaluar në Paris diskutuan forcimin e pranisë ushtarake në Grenlandë, gjatë një takimi në kuadër të Koalicionit të të Vullnetshmëve për Ukrainën. Madje, edhe para se të mbërrinin në Paris, ku ishin të pranishëm edhe homologët e tyre amerikanë, ata miratuan një deklaratë mbështetjeje për Grenlandën.

Mesazhi kryesor ishte se Grenlanda u përket grenlandezëve dhe se vetëm Grenlanda dhe Danimarka mund të vendosin për të ardhmen e ishullit. Kjo deklaratë u mbështet edhe nga Sllovenia.   /os/

The post LUBJANE – Sllovenia dërgon ushtarakë në Grenlandë appeared first on Agjencia Telegrafike Shqiptare.

TEL AVIV, 18 janar /ATSH/ – Sipas burimeve të raportuara nga llogaria X në gjuhën perse të ministrisë së Jashtme izraelite, Erfan Soltani, i riu iranian që u bë simbol i protestave në Iran, “u vra brutalisht ndërsa ishte në paraburgim të Republikës Islamike”, shkruan rainews.it.

I arrestuar gjatë një demonstrate me akuzën e propagandimit kundër sistemit islamik dhe veprimit kundër sigurisë kombëtare, ai u dërgua në burg në Karaj, jashtë Teheranit.

Prokurorët iranianë kishin mohuar dënimin me vdekje në një deklaratë të raportuar nga televizioni shtetëror. Por që nga mbrëmja e djeshme, në mediat sociale është përhapur lajmi se Soltani është vrarë në të vërtetë.

Një i afërm i ngushtë i të riut zbuloi vrasjen e Erfan Soltanit në burgun e Karaj.

Informacioni u nda më pas në një postim në Instagram nga Sholeh Pakravan, nëna e Reyhaneh Jabbari, një grua e ekzekutuar në vitin 2014 për vrasjen e përdhunuesit të saj.

Aktualisht nuk është e qartë nëse gruaja ndodhet aktualisht në Iran apo jashtë vendit. /os/

The post TEL AVIV – Burime izraelite: Vritet Erfan Soltani, simbol i protestave në Iran appeared first on Agjencia Telegrafike Shqiptare.

ROME, 18 janar /ATSH-ANSA/ – Parashikimi i një rritjeje të tarifave kundër atyre kombeve që kanë zgjedhur të kontribuojnë në sigurinë e Groenlandës është një gabim dhe unë nuk pajtohem me të, deklaroi kryeministrja italiane Giorgia Meloni.

”Fola me presidentin Donald Trump. Kishte një problem mirëkuptimi dhe komunikimi në lidhje me iniciativën nga disa vende të BE-së, e cila nuk duhet interpretuar si anti-amerikane, shtoi Meloni.

”Ne duhet të rifillojmë dialogun dhe të shmangim një përshkallëzim”, shtoi ajo.

“Mendoj se Italia mund të luajë një rol udhëheqës; ne jemi të gatshëm të bëjmë paqen tonë në ndërtimin e planit të paqes”, tha kryeministrja, duke folur me gazetarët në Seul në takimin e Bordit të Gazës.

“Pas kthimit tim, do të thërras një takim për të shqyrtuar masën. Nuk e di nëse do të jetë gati deri të martën, por ne po punojmë për të”, shtoi ajo kur u pyet për dekretin e ri të sigurisë. /os/

The post ROME – Meloni: Rritja e tarifave nga Trump ishte një gabim, po punojmë për të shmangur një përshkallëzim appeared first on Agjencia Telegrafike Shqiptare.

BERLIN, 18 janar /ATSH/ – Filmi “Sentimental Value” i Joachim Trier ka fituar një total prej gjashtë çmimesh, duke përfshirë ”Filmin më të Mirë Evropian”, ”Regjisorin më të Mirë” dhe të dy çmimet për aktrim, shkruan euronews.com.

Po ashtu, edhe filmi “Sirat” i regjizorit Oliver Laxe mori pesë çmime gjatë një mbrëmjeje të ngarkuar politikisht në Berlin.

Çmimet evropiane të filmit të këtij viti, homologu evropian i çmimeve Oscar që nderon arritjet më të mëdha në kinemanë evropiane, kanë folur… dhe ishte një natë triumfi për dramën familjare prekëse dhe të shtresuar “Sentimental Value” të regjisorit norvegjez Joachim Trier.

Filmi arriti një sukses të madh, duke fituar gjashtë çmime, duke përfshirë edhe çmimin e lakmuar për ”Filmin më të Mirë Evropian”.

Ai ”mundi” 14 filma të tjerë, përfshirë filmin tërheqës të ”Palmës së Artë” të Jafar Panahi “It Was Just An Accident”, odisenë post-apokaliptike “Sirāt” të Oliver Laxe, dhe filmin e suksesshëm “Sound of Falling” të Mascha Schilinski.

Trier fitoi çmimin për ”Regjisorin më të Mirë” si dhe ”Skenarin më të Mirë” së bashku me partnerin e tij të hershëm në skenar, Eskil Vogt.

Renate Reinsve fitoi çmimin për ”Aktoren më të Mirë Evropiane për Vlerë Sentimentale”, duke vërtetuar edhe një herë se si çiftëzimi i saj me Trier sjell lavdi, pas filmit “Personi më i Keq në Botë”, dhe se si aktorja është një nga pranitë më tërheqëse në ekran në kinema në mbarë botën.

Fitorja e saj pasoi Stellan Skarsgård që mori çmimin për ”Aktorin më të Mirë Evropian” për rolin e tij si një baba në mungesë në filmin e Trier.

Fjalimi i tij ishte i shkurtër dhe i drejtpërdrejtë: “Ndihem sikur po kthehem në shtëpi. Ju falënderoj me gjithë zemër”.

I shkurtër, i ëmbël dhe ndoshta paksa jetëshkurtër. Megjithatë, një çmim i merituar për Skarsgård, i cili kohët e fundit mori në shtëpi një Glob të Artë dhe çimenton pozicionin e tij si një favorit për çmimet Oscar në mars.

”Sentimental Value” fitoi gjithashtu çmimin për ”Muzikën më të Mirë” (Hania Rani).

Përfshirja nuk ishte disi e habitshme, pasi EFA-të kanë një zakon të përsëritur të dhënies së disa çmimeve për të njëjtin film, shpesh në dëm të një llojllojshmërie, duhet thënë.

Një ceremoni e ngarkuar politikisht dhe solemne

Ndërsa ceremonia shkoi pa probleme dhe u ndërpre nga prerje të shkurtra që festonin kinemanë të drejtuar nga Mark Cousins, pasioni dhe entuziazmi i të cilit ishte ngjitës si gjithmonë, ngjarja ishte e ngarkuar politikisht që nga fillimi.

Regjisori disident iranian Jafar Panahi u mirëprit në skenë që në fillim të ceremonisë, i prezantuar nga Cousins ​​si “një nga regjisorët më të mëdhenj në botë”.

Panahi hapi EFA-të e 38-të duke bërë një deklaratë rreth Iranit dhe mizorive të fundit të kryera nga qeveria shtypëse e Teheranit.

“Nëse bota nuk i përgjigjet kësaj dhune të hapur sot, jo vetëm Irani, por e gjithë bota është në rrezik”, tha Panahi.

“Dhuna, kur lihet pa përgjigje, normalizohet. Ajo përhapet. Bëhet ngjitëse. Kur e vërteta shtypet në një vend, liria vuan kudo. Atëherë askush nuk është i sigurt, askund në botë. Jo në Iran. Jo në Evropë. Jo në Amerikë”, shtoi ai.

Ja lista e fituesve të EFA-s të këtij viti:

Filmi më i mirë Evropian

Fitues: Sentimental value (Norway, France, Denmark, Germany, Sweden) i Joachim Trier
Afternoons of solitude (Spain, France) nga Albert Serra
Arco (France), drejtuar nga Ugo Bienvenu
Dog of god (Latvia, US) – drejtuar nga Raitis Ābele & Lauris Ābele
Fiume o Morte (Croatia, Slovenia, Italy) – drejtuar nga Igor Bezinović
It was just accident (France, Iran, Luxembourg) – drejtuar nga Jafar Panahi
Little Amelie (France) – Drejtuar nga Maïlys Vallade & Liane-Cho Han
Olivia and Livia and the invisible earthquake (Spain, France, Belgium, Switzerland, Chile drejtuar nga Irene Iborra Rizo
Refenstahl(Germany) – drejtuar nga Andres Veiel
Sirat (Spain, France) – drejtuar nga Oliver Laxe
Songs of slow burning earth (Ukraine, France, Denmark, Sweden) – drejtuar Olha Zhurba
‘‘Sounf of falling’‘ (Germany) – drejtuar nga Mascha Schilinski
Tales from the magic garden (Czech Republic, Slovakia, Slovenia, France) – drejtuar nga David Súkup, Patrik Pašš, Leon Vidmar & Jean-Claude Rozec,

The voice of hind rajab (France, Tunisia) – drejtur nga Kaouther Ben Hania
With Haan in Gaza (Germany) – drejtuar nga Kamal Aljafari

Regjisori më i Mirë Evropian

Fitues: Joachim Trier për ”Sentimental value”
Yorgos Lanthimos për ”Bugonia”
Oliver Laxe për ”Sirat”
Jafar Panahi për ”It was an accident”
Mascha Schilinski për Tigulli ”Sounf of falling” /os/

The post KINEMA – “‘Sentimental Value’ triumfon në EFA me gjashtë çmime appeared first on Agjencia Telegrafike Shqiptare.

LONDER, 18 janar /ATSH-ANSA/ – Kryeministri britanik Keir Starmer dënoi tarifat e shpallura nga Donald Trump ndaj Greonlandës, duke i quajtur ato “krejtësisht të gabuara”, duke këmbëngulur se Groenlanda është pjesë e Danimarkës dhe “e ardhmja e saj është një çështje për groenlandezët dhe danezët”.

“Pozicioni ynë ndaj Greonlandës është shumë i qartë: është pjesë e Mbretërisë së Danimarkës dhe e ardhmja e saj është një çështje për groenlandezët dhe danezët.

Ne gjithashtu e kemi bërë të qartë se siguria e Arktikut është e rëndësishme për NATO-n në tërësi dhe se aleatët duhet të bëjnë më shumë së bashku për të adresuar kërcënimin rus në pjesë të ndryshme të Arktikut”, theksoi Starmer.

“Vendosja e tarifave ndaj aleatëve në ndjekje të sigurisë kolektive të aleatëve të NATO-s është plotësisht e gabuar”, shtoi ai.

“Ne, sigurisht, do ta trajtojmë këtë çështje drejtpërdrejt me administratën amerikane”, shtoi ai. /os/

The post BM – Starmer: Tarifat e Trumpit për Groenlandën janë krejtësisht të gabuara appeared first on Agjencia Telegrafike Shqiptare.

BRUKSEL, 18 janar /ATSH/ – Bashkimi Evropian mbështet Danimarkën dhe popullin e Groenlandës. Ne e bëjmë këtë të bashkuar dhe të vendosur, shkroi në X presidentja e Parlamentit Evropian Roberta Metsola.

Masat kundër aleatëve të NATO-s të shpallura sot nuk do të ndihmojnë në sigurimin e sigurisë në Arktik. Ato rrezikojnë të kundërtën, duke i inkurajuar armiqtë tanë të përbashkët dhe ata që dëshirojnë të shkatërrojnë vlerat dhe mënyrën tonë të jetesës së përbashkët”, shkroi ajo.

”Groenlanda dhe Danimarka e kanë bërë të qartë: Groenlanda nuk është në shitje dhe sovraniteti dhe integriteti i saj territorial duhet të respektohen. Asnjë kërcënim për tarifa nuk mund ose nuk do ta ndryshojë këtë fakt”, shtoi ajo. /os/

The post BRUKSEL – Metsola: Greonlanda nuk është në shitje, të respektohet sovraniteti i saj appeared first on Agjencia Telegrafike Shqiptare.

UASHINGTON, 18 janar /ATSH-AA/ – Presidenti i SHBA-së, Donald Trump, në cilësinë e kryetarit themelues të Bordit të Paqes për Gazën, e ka ftuar presidentin turk Recep Tayyip Erdogan t’i bashkohet këtij bordi.

“Më 16 janar, Presidenti i SHBA-së Donald Trump, në cilësinë e kryetarit themelues të Bordit të Paqes, dërgoi një letër duke ftuar Presidentin tonë, z. Recep Tayyip Erdogan, të bëhet anëtar themelues i Bordit të Paqes”, tha Burahanettin Duran, drejtori i Komunikimeve i Turqisë, në një postim në platformën sociale turke NSosyal.

Duran tha se Këshilli i Sigurimit i OKB-së, me Rezolutën 2803, mbështeti Planin Gjithëpërfshirës për Përfundimin e Konfliktit në Gaza, i cili u shpall nga Trump dhe çoi në një armëpushim në enklavën palestineze. Në këtë kuadër, shtoi ai, Bordi i Paqes dhe strukturat e tij po krijohen për të garantuar sigurinë dhe rindërtimin e Gazës. /os/

The post SHBA – Trump fton Erdogan t’i bashkohet ”Bordit të Paqes për Gazën” si anëtar themelues appeared first on Agjencia Telegrafike Shqiptare.

ANKARA, 18 janar /ATSH-AA/ – Eksportet e Turqisë drejt vendeve të Ballkanit u rritën me 8.1 për qind në krahasim me të njëjtën periudhë të vitit të kaluar, duke arritur në 25.258 miliardë dollarë, me Rumaninë si destinacionin kryesor me 7.9054 miliardë dollarë.

Ndërsa politikat proteksioniste po intensifikohen në tregtinë globale dhe vendet po hyjnë në një periudhë sfiduese në marrëdhëniet e tyre tregtare, Turqia po rrit integrimin e saj me vendet në afërsi të saj të menjëhershme dhe po i çon eksportet e saj në nivele më të larta.

Marrëdhëniet afatgjata midis Turqisë dhe vendeve të Ballkanit mbështeten nga programet e delegacioneve dhe takimet e tryezës së rrumbullakët ku marrin pjesë zyrtarë të lartë qeveritarë dhe përfaqësues të biznesit dhe këto kontakte kanë ndikuar pozitivisht në eksportet e Turqisë në rajonin e Ballkanit.

Sipas informacioneve që gazetari i AA-së ka përpiluar nga të dhënat e Këshillit të Eksportuesve të Turqisë (TIM), në vitin 2025 në rajonin e Ballkanit, i cili përfshin Shqipërinë, Bosnjë e Hercegovinën (BeH), Bullgarinë, Kroacinë, Malin e Zi, Kosovën, Maqedoninë e Veriut, Rumaninë, Serbinë, Slloveninë dhe Greqinë, u realizuan gjithsej 25.258 miliardë dollarë eksporte.

Eksportet në rajonin e Ballkanit u rritën me 8.1 për qind gjatë gjithë vitit, ndërkohë me Rumaninë janë realizuar eksportet më të larta midis vendeve në rajon, duke arritur në total 7.9054 miliardë dollarë.

Rumania u pasua nga Bullgaria me 4.6994 miliardë dollarë, Greqia me 3.4734 miliardë dollarë, Sllovenia me 3.1926 miliardë dollarë dhe Serbia me 2.011 miliardë dollarë.

Gjatë së njëjtës periudhë, eksportet në Kosovë arritën në 882.9 milionë dollarë, në Shqipëri 819.8 milionë dollarë, në Bosnjë e Hercegovinë 741.6 milionë dollarë, në Kroaci 732.7 milionë dollarë, në Maqedoninë e Veriut 635.7 milionë dollarë dhe në Mal të Zi 162.9 milionë dollarë.

– Eksportet në rajonin e Ballkanit u rritën në 10 vende

Në vitin 2025, midis vendeve të Ballkanit, Sllovenia krahasuar me vitin 2024 shënoi rritjen më të madhe të eksporteve të bazuara në vlerë, me 692.9 milionë dollarë. Ajo pasohet nga Rumania me 378.1 milionë dollarë, Bullgaria me 300.6 milionë dollarë, Serbia me 228.9 milionë dollarë, Greqia me 149.4 milionë dollarë, Kosova me 91.8 milionë dollarë, Kroacia me 89.6 milionë dollarë, Bosnjë e Hercegovina me 29.5 milionë dollarë, Maqedonia e Veriut me 14.1 milionë dollarë dhe Mali i Zi me 7 milionë dollarë.

Gjatë kësaj periudhe, eksportet në Shqipëri u ulën me 98.7 milionë dollarë.

– Eksportet e Stambollit në Ballkan tejkaluan 10 miliardë dollarë

Duke parë shpërndarjen e eksporteve në vendet e Ballkanit sipas provincave, shihet se eksportet e Stambollit në këtë rajon arritën në 10 miliardë e 185.7 milionë dollarë.

Vitin e kaluar, eksportet totale të kryera nga Stambolli arritën në 95.2 miliardë dollarë dhe eksportet e kreyera drejt vendeve të Ballkanit nga Stambolli u përllogaritën 10.7 për qind të këtij totali.

– Sektori industrial kryeson në eksporte

Sektori industrial spikati në eksportet në rajonin e Ballkanit vitin e kaluar. Nën shtrukturën e grupit industrial, industria automotive ishte sektori që eksportoi më shumë në rajon, me 5.044 miliardë dollarë.

Industria automotive u pasua nga kimikatet dhe produktet kimike me 4.271 miliardë dollarë, hekuri dhe metalet jo-ngjyra me 2.089 miliardë dollarë, elektrike dhe elektronike me 1.5713 miliardë dollarë dhe mobilje, letër dhe produkte pyjore me 1.01 miliardë dollarë.

Sipas të dhënave të TIM (Shoqata e Eksportuesve të Turqisë), sasia dhe ndryshimi i eksporteve drejt vendeve të Ballkanit në vitet 2024 dhe 2025 janë si më poshtë:

/os/

The post FOKUS – Eksportet turke në Ballkan arritën në 25.3 miliardë dollarë në 2025 appeared first on Agjencia Telegrafike Shqiptare.

BRUKSEL, 18 janar /ATSH-ANSA/ – Ambasadorët nga 27 vendet e Bashkimit Evropian do të mblidhen sot për një takim urgjent pasi presidenti i SHBA-së, Donald Trump, premtoi një valë tarifash në rritje ndaj aleatëve evropianë derisa Shtetet e Bashkuara të lejohen të blejnë Groenlandën.

Reuters raportoi në faqen e saj të internetit, duke vënë në dukje se Qiproja, e cila mban presidencën gjashtëmujore të BE-së me rotacion, njoftoi këtë mbrëmje se ka thirrur takimin për ditën e sotme.

Diplomatët e BE-së thanë se ”takimi është planifikuar të fillojë në orën 17:00”. /os/

The post BRUKSEL – Takim urgjent i 27 ambasadorëve të BE-së për tarifat BE-SHBA appeared first on Agjencia Telegrafike Shqiptare.