Zëvendëskryeministri i Qeverisë dhe ministër i Transportit, Aleksandar Nikolloski, ka zhivlluar sot në Zagreb një takim pune me zëvendëskryeministrin e Qeverisë së Republikës së Kroacisë dhe ministër për Çështje Detare, Transport dhe Infrastrukturë, Oleg Butkoviq, në të cilin siç njoftojnë nga qeveria, është konfirmua bashkëpunimi i shkëlqyer bilateral mes dy vendeve.

Nga qeveria informojnë se në fokus të bisedimeve mes dy zëvendëskryeministrave ishte problemi me të cilin po përballen transportuesit pas vendosjes së sistemit të ri të evidencës elektronike në vendet e zonës Shengen.

Nikolloski ka theksuar se bëhet fjalë për një sfidë thelbësore që nuk prek vetëm transportuesit e Maqedonisë së Veriut, por gjithë sektorin e transportit në rajonin e Ballkanit Perëndimor.

“Problemi me transportuesit ka edhe implikime më të gjera ekonomike, pasi prek edhe kompanitë nga Bashkimi Evropian që kanë investuar në rajon dhe që janë të orientuara fuqishëm drejt eksporteve në tregjet evropiane”, thonë nga Qeveria.

Nikolloski kërkoi mbështetje nga Qeveria e Kroacisë për gjetjen e një zgjidhjeje të përshtatshme dhe të qëndrueshme në nivel të Bashkimit Evropian, me qëllim lehtësimin e punës së transportuesve të RMV-së dhe rajonit.

Ndërkaq, bllokadat e pikave kufitare në vend dhe rajon vazhdojnë edhe sot në ditën e tretë, si pjesë e protestës së transportuesve me kamionë nga Maqedonia e Veriut, Serbia, Mali i Zi dhe Bosnje e Hercegovina. Protesta është kundër zbatimit të sistemit EES për qëndrimin në zonën Shengen dhe rregullit 90/180 ditë, i cili, sipas tyre, po e paralizon punën e tyre.

Inspektorati i Punës do të paraqesë kallëzim penal në Prokurorinë Publike për ngjarjen tragjike, në të cilën dy javë më parë, në një objekt banimi në ndërtim e sipër në Ohër, humbi jetën fotografi Kristijan Lushev. Në momentin e tragjedisë 28-vjeçari, së bashku me një person tjetër, po barte elemente, ndërsa u pengua në një kovë, humbi ekuilibrin dhe ra në hapësirën e parashikuar për ashensor në bodrum.

“U konstatua se dy subjekte juridike nuk kishin ndërmarrë masa në përputhje me rregulloret në fushën e sigurisë dhe shëndetit në punë. Për këtë arsye do të paraqiten kallëzime penale në Prokurorinë Themelore Publike kompetente për veprime të mëtejshme”, njoftojnë nga Inspektorati i Punës.Rasti është në fazë hetimi në Prokurori. Është kryer autopsia dhe janë dhënë urdhra për mbledhjen e provave në vendin e ngjarjes.

“Inspektorati i Punës duhet të dorëzojë raport në prokurori lidhur me gjendjen e konstatuar. Ndërkohë, po ndërmerren edhe veprime të tjera, përfshirë marrjen e deklaratave nga persona që kanë njohuri të caktuara”, thonë nga PTHP.

Babai i Lushevit kërkon përgjegjësi dhe zbardhje të rastit nga institucionet, në mënyrë që tragjedi të tilla të mos përsëriten më.

“Pres drejtësi për fëmijën, edhe pse askush nuk mund ta kthejë. Dy-tri ditë para se të ndodhte aksidenti, i çova fëmijës tim portofol. U ngjita dhe hyra lirshëm në atë ndërtesë deri në katin e dytë. Gjëja e parë që vura re ishte se kishte hapësira në ndërtesë, vrima të ashensorëve, ku nuk kishte mbrojtje. Më kapi frika dhe i thashë djalit tim të bëjë kujdes, sepse gjithçka mund të ndodhte”, deklaroi Valentin Lushev – babai i Kristijanit.

Ai kërkon gjithashtu kontroll më të madh nga shërbimet inspektuese dhe respektim të plotë të ligjeve.

Ka përfunduar konkursi për kryeprokurorin e ri. Në thirrjen e Kuvendit janë paraqitur pesë kandidatë. Kandidaturat nga ana e Kuvendit tashmë janë dërguar në Qeveri.

Kandidatë janë ushtruesja aktualja e detyrës kryeprokurore Anita Topollova-Isajllovska, prokurorja Lençe Ristovska, gjyqtari i Gjykatës Themelore Penale, Nenad Savevski, ish-kryetari i Gjykatës Themelore Penale, Vlladimir Pançevski, dhe prokurorja nga Prokuroria e Shkupit, Lidija Raiçeviç.

Sipas Ligjit për Prokurorinë Publike, kandidaturat dërgohen në qeveri, e pastaj qeveria pret mendimin e Këshillit të Prokurorëve, dhe nëse brenda 15 ditëve Këshilli nuk jep mendim, Qeveria nuk mund të përcaktojë propozimin, por i rekomandon Kuvendit të shpallë një konkurs të ri. Kryeprokurori votohet në Kuvend me shumicë të thjeshtë, pra 61 vota.

Me 76 vota “për”, deputetët miratuan ndryshimet në Kodin Penal, të propozuara nga një grup deputetësh të shumicës. Sipas pushtetit, kjo nënkupton forcimin e politikës penale dhe riparimin e dëmeve nga ndryshimet në vitin 2023.

“Zgjidhjet e reja ligjore rivendosin thelbin e politikës penale, parandalimin dhe luftën kundër korrupsionit dhe krimit të organizuar. Forcojnë kompetencën e prokurorisë për ndjekjen e krimit të organizuar dhe korrupsionit, dhe janë në përputhje me vërejtjet e përfshira në raportin e Komisionit Evropian”, deklaroi Mile Lefkov, deputet nga OBRM-PDUKM.

Para votimit nuk kishte debat. Vetëm deputetja Jovana Mojsoska nga "E Majta" foli, duke thënë se partia e saj ishte kundër.

“Ne nuk e shohim Kodin Penal ende, as pushteti i kaluar nuk e miratoi, ndërsa tendenca është që as kjo qeveri të mos e miratojë. Një kod i tillë penal, është vetëm zgjidhje kozmetike për të përmbushur afatin e përcaktuar nga gjykata kushtetuese”, tha Jovana Mojsoska, deputete nga partia E Majta.

Kundër ishte edhe LSDM-ja opozitare. Sipas Filipçes, ndryshimet nënkuptojnë amnisti për krimin e OBRM-PDUKM-së.

“Kjo është një përpjekje tjetër për të treguar diçka si një ligj reformues, dorëzimi i një ligji reformues dhe amnistim i zyrtarëve aktualë lejohet në një derë të vogël”, u shpreh Venko Filipçe, kryetar i LSDM-së.

Ndryshimet në Kodin Penal do të jenë një zgjidhje kalimtare, derisa të përgatitet Kodi Penal krejtësisht i ri nga një grup pune në Ministrinë e Drejtësisë, i cili, sipas njoftimeve të fundit, duhet të jetë gati deri në qershor të këtij viti. /Alsat/

Ministri i Punëve të Brendshme Pançe Toshkovski, zhvilloi takim dypalësh në ministren e Brendshme me të Shqipërisë, Albana Koçiu, e cila ndodhet në një vizitë zyrtare në vend.

Siç njoftojnë nga MPB, në takim u diskutuan disa çështje të rëndësishme me interes të ndërsjellë, me theks në përmirësimin e bashkëpunimit të përgjithshëm midis dy ministrive, planin për zbatimin e sistemit One Stop Shop me Republikën e Shqipërisë deri në fillim të sezonit turistik, mundësinë e lejimit të kalimit kufitar "Xhepishte - Trebishte" të funksionojë vazhdimisht 24 orë në ditë, si dhe aktivitetet që lidhen me draft-marrëveshjet midis dy qeverive për vendosjen e kontrolleve të përbashkëta në kalimet e përbashkëta kufitare dhe për krijimin dhe funksionimin e një Qendre për Bashkëpunim Policor dhe Doganor.

"Unë besoj se para fillimit të sezonit të verës, ne mundemi, ashtu siç zbatuam sistemin One Stop Shop me Kosovën dhe Serbinë, ta zbatojmë atë me Shqipërinë dhe t'i mbyllim vendet që nuk janë pjesë e BE-së me një transferim më të shpejtë të qytetarëve, gjë që do të zvogëlojë kohën e pritjes në kufijtë tanë. Ne gjithashtu kemi shqyrtuar mundësinë që pika kufitare Xhepishte-Trebishte në të ardhmen, mënyra e funksionimit që ka tani, që është deri në orën 8 të mëngjesit në periudhën e verës dhe deri në orën 6 të mbrëmjes në periudhën e dimrit, të vazhdojë në përputhje me aftësitë dhe kapacitetet e dy ministrive, të funksionojë 24/7 gjatë gjithë vitit, duke u mundësuar qytetarëve në të dyja anët të kenë komunikim më të mirë, të arrijnë një numër më të madh shërbimesh në të dyja anët dhe, në fakt, të lançojmë bashkëpunimin tonë të shkëlqyer në një nivel tjetër më të lartë dhe më të mirë", theksoi ministri Toshkovski.

Vizita përfshiu gjithashtu një takim të nivelit të lartë midis MPB dhe Drejtorëve të Shërbimeve Doganore të të dy vendeve, kushtuar krijimit të një Qendre të Përbashkët Kontakti për Bashkëpunim Policor dhe Doganor. Kjo qendër do të përfaqësojë një mekanizëm shtesë për shkëmbim më të shpejtë dhe më efikas të informacionit, koordinim dhe veprim të përbashkët në përballjen me krimin ndërkufitar, migrimin e paligjshëm, trafikimin e drogës dhe sfida të tjera të sigurisë.

"Lidhja e Marrëveshjes për Themelimin dhe Funksionimin e Qendrës së Bashkëpunimit Policor dhe Doganor do të kontribuojë në forcimin e bashkëpunimit ndërkufitar dhe kontrollit kufitar, si dhe në një luftë më efikase kundër migrimit të paligjshëm, krimit të organizuar dhe kërcënimeve të tjera të sigurisë. Maqedonia ka krijuar katër qendra të përbashkëta kontakti - në Deve Bair me Republikën e Bullgarisë, në Qafë Thanë me Republikën e Shqipërisë, në Bllacë me Republikën e Kosovës dhe në Tabanoc me Republikën e Serbisë. Këto qendra kryejnë funksionin e tyre themelor të shkëmbimit të informacionit, dërgimit të mesazheve të paralajmërimit të hershëm dhe koordinimit në luftën kundër krimit ndërkufitar në baza ditore. Qendra e re e Bashkëpunimit Policor dhe Doganor do të jetë një mekanizëm tjetër i fortë në këtë rrjet", theksoi ministri Toshkovski.

Ai shtoi se iniciativa të tilla janë një konfirmim i drejtpërdrejtë i besimit të ndërsjellë dhe partneritetit strategjik midis dy vendeve.
Në takim u konfirmua angazhimi i përbashkët i Republikës së Maqedonisë së Veriut dhe Republikës së Shqipërisë për të thelluar më tej marrëdhëniet e fqinjësisë së mirë, për të forcuar stabilitetin rajonal dhe për të çuar përpara perspektivën evropiane të rajonit.

MPB Maqedoni njofton se dje (27.01.2026), Departamenti për Shtypjen e Krimit të Organizuar dhe të Rëndë në MPB ngriti kallëzim penal kundër M.Z. (37), I.B. (61) dhe G.B. (59), të gjithë nga Shkupi, për shkak të ekzistencës së dyshimit të arsyeshëm për kryerjen e veprës penale "prodhim dhe shpërndarje e paautorizuar e drogave narkotike, substancave psikotrope dhe prekursorëve"".

"Më 26.01.2026, M.Z. bleu një automjet motorik "Opel Combo" me targa kombëtare zvicerane nga një person nga Struga, në të cilin, së bashku me I.B., vendosën drogën narkotike marihuanë, dhe kontaktuan G.B. me qëllim që automjeti të tërhiqej nga Struga në Shkup për një çmim prej 200 euro, sepse nuk ishte në gjendje të mirë për qarkullim rrugor".

"Pasi mbërritën në Shkup, i raportuari i parë M.Z. së bashku me të raportuarin e dytë I.B. i kërkuan të raportuarit të tretë G.B. shumë prej 40 euro për të vazhduar udhëtimin drejt Shën Nikollës, pas një automjeti motorik "Mercedes" me të cilin po transportoheshin. Në një rrugë rajonale pranë Shën Nikollës, oficerët e policisë, pasi kishin marrë më parë informacion se do të transportohej një sasi e madhe droge, ndaluan kamionin "Iveco" që po tërhiqte automjetin "Opel Combo" dhe gjatë një kontrolli në ulësen e pasme dhe në bagazhin e automjetit "Opel", u gjetën tetë çanta që përmbanin 50 pako marihuanë".

"Pas ekspertizës së kryer në Departamentin për Ekzaminime Forenzike në Ministrinë e Punëve të Brendshme, u përcaktua se bëhej fjalë për 150 kilogramë marihuanë", thonë nga MPB.

MPB Maqedoni njofton se sot (28.01.2026) në orën 06.40, oficerë policie nga Sektori i Punëve të Brendshme të Tetovës – Departamenti për Trafikim të Paligjshëm të Drogës dhe Armëve, kanë privuar nga liria I.J. (43), S.Z. (36), D.P. (69), D.P. (65) dhe S.Z. (42), të gjithë nga fshati Brvenicë.

Siç njoftojnë nga MPB, kontrollet u kryen në fshatin Brvenicë, në shtëpi, dhoma shërbimi dhe automjete pasagjerësh, në bazë të urdhrit gjyqësor të lëshuar më parë.

"Pesë pako me substancë pluhur të bardhë, 52 fishekë nga një pushkë automatike kalibri 7.62, dy fishekë nga një pistoletë kalibri të panjohur dhe një fishek nga një pushkë automatike u gjetën në I.J. Tek S.Z. (36) u gjetën dhe sekuestruan 20 fishekë nga një pushkë automatike kalibri 7.62, një pistoletë dhe një karikator me dy fishekë që i posedonte pa leje, si dhe një peshore dixhitale me mbetje të një lënde pluhur të bardhë".

"Tek D.P. (69) u gjetën dhe sekuestruan një pistoletë që e posedonte pa leje, si dhe një karabinë gjuetie, një pushkë gjuetie dhe një pistoletë që e posedonte me leje. Tek D.P. (65) u gjetën dy lista dhe një fletore shënimesh me emra personash, dy kompjuterë dhe afërsisht 31.640 euro, 3.400 franga zvicerane dhe 56.500 denarë. Tek S.Z. (42) u gjet një substancë pluhur e bardhë. Ata janë ndaluar në stacionin policor për procedura të mëtejshme, dhe pas dokumentimit të plotë të rastit, do të ngrihen raporte përkatëse sipas nenit 396 dhe nenit 215 të Kodit Penal", thonë nga MPB.

Evropa është rajoni me shkallën më të lartë të duhanpirjes në botë, ku mesatarisht 25.9 për qind e popullsisë mbi 15 vjeç përdor produkte duhani, tregojnë të dhënat e platformës “Brilliant Maps” bazuar në raportin global të Organizatës Botërore të Shëndetësisë (OBSh) për trendet e përdorimit të duhanit dhe nikotinës nga viti 2000 deri në 2022, me parashikime deri në vitin 2030.

Vendet e Ballkanit janë ndër shtetet evropiane me shkallën më të lartë të duhanit. Numri më i madh i duhanpirësve aktivë është regjistruar në Bullgari dhe Serbi, ku 39.5 për qind e popullsisë përdor duhan. Më pas vijnë Kroacia me 37 për qind, Greqia me 32.8 për qind, Sllovakia me 32.4 për qind, Hungaria me 32.2 për qind dhe Rumania me 30 për qind, që është dukshëm mbi mesataren evropiane.

Në Evropën Perëndimore shkalla e duhanpirjes është më e ulët, por me diferenca të konsiderueshme ndërmjet vendeve. Përqindja më e lartë është regjistruar në Francë, me 34.6 për qind, që është mbi mesataren evropiane dhe afër niveleve të vendeve ballkanike. Të dhënat për të rinjtë janë shqetësuese, veçanërisht në lidhje me cigaret elektronike dhe produktet e reja të nikotinës. Më shumë se 100 milion njerëz në botë përdorin cigare elektronike, dhe në disa vende evropiane shkallët tek adoleshentët nga 13 deri 15 vjeç janë më të larta sesa tek të rriturit.

Raporti i OBSh tregon se, pavarësisht uljes globale të numrit të përdoruesve të duhanit, nga 1.38 miliardë në vitin 2000 në afërsisht 1.2 miliardë në vitin 2024, përdorimi i duhanit mbetet një kërcënim serioz për shëndetin publik. Rajoni evropian është i vetmi që nuk pritet të arrijë objektivin prej 30 për qind të parashikuar në Planin Global të Veprimit të OBSh-së dhe parashikohet që deri në vitin 2030 Evropa të mbetet me prevalencën më të lartë të duhanit, mbi 23 për qind.

Të dhënat tregojnë se 18 për qind e vdekjeve nga sëmundjet jo-infektive në Evropë në vitin 2019 lidhen me përdorimin e duhanit, që do të thotë se pothuajse çdo pesë vdekje të parakohshme mund të shmangeshin nëse duhani eliminohej.

Në Republikën e Maqedonisë së Veriut, të dhënat e Institutit të Shëndetit Publik (ISHP) për Ditën Botërore Kundër Përdorimit të Duhanit, vitin e kaluar tregojnë se 45.4 për qind e popullsisë janë duhanpirës aktivë, që është dukshëm mbi mesataren e Bashkimit Evropian dhe vendosin vendin ndër shtetet me shkallë më të lartë të duhanit në botë.

Sipas ISHP-së, pjesëmarrja në këshillimet për lënien e duhanit, që funksionojnë në kuadër të qendrave të shëndetit publik, është shumë e vogël; në vitin 2023 vetëm 43 persona kanë kërkuar ndihmë.

Instituti thekson se përdorimi i duhanit kontribuon seriozisht në dëm të shëndetit të përgjithshëm të popullsisë, duke nënvizuar se si pasojë e përdorimit të rregullt të duhanit mund të shfaqen sëmundje kardiovaskulare, respiratore, riprodhuese, malinje, endokrine dhe shumë lloje të tjera sëmundjesh.

Industria e duhanit, sipas Institutit, me të gjitha burimet e saj, lufton me sukses përpjekjet për forcimin e legjislacionit, i cili në fakt është një nga kushtet për integrim në Bashkimin Evropian, prandaj nevojitet përshtatja e ligjeve me ato të BE-së për avancimin e vendit.

"Edhe pse Republika e Maqedonisë së Veriut në vitin 2006 ratifikoi Konventën Kornizë për Kontrollin e Duhanit të OBSh-së dhe gjatë viteve ka pasur përpjekje për të forcuar rregullat lidhur me përdorimin e duhanit, në vitet e fundit ka pasur stagnim në këtë fushë me heqjen e ndalimeve për duhanpirje në tarracat e lokaleve, dhe gjithashtu është lejuar përdorimi i pajisjeve elektronike që ngrohin, por nuk djegin duhanin në ambiente të mbyllura publike", theksoi Instituti për Ditën Botërore të Duhanit të vitit të kaluar.

OBSh dhe institucione të tjera ndërkombëtare shëndetësore bëjnë thirrje për forcimin e politikave kombëtare dhe rajonale për kontrollin e duhanit, përmes rritjes së taksave, zbatimit strikt të ndalimeve për duhanpirje në vende publike, kufizimit të reklamimit dhe zgjerimit të programeve për mbështetje në lënien e duhanit.

MPB Maqedoni njofton se dje (27.01.2026), Departamenti për Shtypjen e Krimit të Organizuar dhe të Krimit të Rëndë ngriti kallëzim penal në Prokurorinë Themelore Publike në Shkup kundër N.A. (36) nga Shkupi, për shkak të dyshimit për kryerjen e veprës penale "prodhim dhe shpërndarje e paautorizuar e drogave narkotike, substancave psikotrope dhe prekursorëve"".

Siç njoftojnë nga MPB, më 26.01.2026, në Bulevardin Ilinden në Shkup, gjatë një kontrolli të një automjeti pasagjerësh Audi me targa të Shkupit, e drejtuar nga N.A., oficerët e policisë gjetën dy çanta pasagjerësh që përmbanin marihuanë.

"N.A. e bleu drogën për shitje të mëtejshme personave në qytetin e Shkupit. Ai është privuar nga liria dhe pas një ekspertize, u përcaktua se çantat përmbanin gjithsej 4999.2 gramë marihuanë. N.A. Ai u nxor para një gjyqtari për procedurë paraprake, ku iu dha dënimi me 30 ditë paraburgim", thonë nga MPB.

Kryetarja e PLD-së dhe deputetja Monika Zajkova pyeti pse liderët në takim nuk diskutuan për standardin e jetës së qytetarëve. Sipas saj, efekti i takimit të liderëve është se xhepat e qytetarëve janë përsëri bosh, dhe partitë u dakorduan për atë që u nevojitet atyre.

Ajo thotë se është e zhgënjyer që çështjet ekonomike nuk u diskutuan në tryezën e Klubit të Deputetëve.

"Në vend që të flasin vetëm për një qeveri teknike dhe kush do të marrë ose jo pozicione, pse nuk menduan të diskutojnë se si duhet të kemi një qeveri më të vogël, më pak drejtorë ose zëvendës. Ne kemi aparat shtetëror të rënduar dhe le të shpjegojnë pse kemi një aparat shtetëror më të madh për frymë se Britania e Madhe, dhe njerëzit po numërojnë xhepat për të blerë një qese me ushqime nga supermarketi".

"Unë shkoj në supermarket çdo ditë dhe jam midis qytetarëve dhe e di që të gjithë komentojnë se nuk mund të dalësh. Një qese me ushqime nga supermarketi të kushton më shumë se 1000 denarë dhe të gjithë jemi të befasuar që kemi bërë pazar. Këto janë temat që mund të ishin diskutuar", tha Zajkova.

Kryetarja e PLD-së tha se do të mbështeste protestën e LSM-së për rritje të pagës minimale në 600 euro.

"Nuk e di se si Ministri i Ekonomisë nuk na tregoi se në Selanik ka produkte më të lira se këtu. Duhet të jemi pak më realistë. Nëse nuk ka para të mjaftueshme për rritjen e pagave, le të pranojnë propozimet tona për uljen e shumave fikse në bordet drejtuese. Një herë në muaj shkojnë atje për të votuar për atë që i përshtatet partisë dhe marrin deri në dy paga mesatare. Si do ta shpjegojmë këtë", pyeti Zajkova.

Njëzet deri në tridhjetë shërbime të reja elektronike, pret ministri për Transformim Digjital, Stefan Andonovski deri në fund të vitit. Duke folur për rritjen e numrit të shërbimeve elektronike, si dhe digjitalizimin në përgjithësi, në një intervistë për TV Alfa, Andonovski theksoi sonte se ekziston mundësia e tejkalimit të këtij numri dhe vuri në dukje se disa nga ato shërbime do të lidhen me çështje që lidhen me FSSHM.

Ministri i Transformimit Digjital, Stefan Andonovski, pret që deri në fund të vitit të ofrohen 20 deri në 30 shërbime të reja elektronike. Duke folur për rritjen e numrit të shërbimeve elektronike dhe për procesin e digjitalizimit në përgjithësi, Andonovski theksoi se ekziston mundësia që kjo shifër të tejkalohet, duke shtuar se një pjesë e këtyre shërbimeve do të lidhen me Fondin e Sigurimit Shëndetësor (FSSH).

“Për mua FSSH-ja është shumë e rëndësishme, sepse është një nga institucionet kyçe që çdo qytetar mund të ketë nevojë ta përdorë – për vazhdimin e pushimit mjekësor, aktivizimin e tij, ndryshimin e vendit të punës dhe çështje të tjera ku ndryshojnë edhe të siguruarit. Ka shumë aktivitete që qytetarët i përdorin”, theksoi Andonovski, duke shtuar se një numër i madh i shërbimeve elektronike do të vijnë pikërisht nga FSSH-ja.

Ai paralajmëroi gjithashtu rreth 15 shërbime të reja nga Ministria e Energjetikës, Minierave dhe Burimeve Minerale, që do të lidhen kryesisht me licenca dhe vërtetime për kompani, e jo drejtpërdrejt për qytetarët. Përveç këtyre 20–30 shërbimeve të planifikuara dhe të financuara nga buxheti, Andonovski pret edhe rreth 30 shërbime të tjera nga një projekt që pritet të nisë këtë pranverë, i mbështetur nga Bashkimi Evropian, konkretisht nga një projekt IPA (komponenta e tretë).

“Pres që viti të përfundojë me shumë më tepër shërbime elektronike. Vitin e kaluar patëm rritje prej 74 për qind të numrit të shërbimeve mujore që u ofrojmë qytetarëve. Në vitin 2024 mesatarja ishte 3.450 shërbime, ndërsa në vitin 2025 mesatarja është 13.450, që tregon një rritje enorme. Numri i përdoruesve është rritur për 62 për qind krahasuar me vitin 2024”, deklaroi Andonovski.

Ai theksoi se qytetarët e kanë pranuar dhe e njohin Portalit Kombëtar për e-shërbime, duke shtuar se aktualisht po punohet në përmirësimin e tij, si në aspektin harduerik ashtu edhe softuerik, me qëllim që të jetë më i shpejtë, më i qasshëm, më i sigurt dhe më i lehtë për përdorim.

Kryeministri i vendit Hristijan Mickoski, në emisionin Click Plus në TV21, duke folur për projektin “Safe City”, theksoi se është i përgatitur të marrë rrezik politik, madje edhe nëse kjo çon në rënien e Qeverisë.

Mes tjerash, kryeministri potencoi se qëllimi nuk janë gjobat, por veprimi edukativ dhe parandalues.

“Qëllimi nuk është të arkëtohen gjoba. Së pari, ekziston tolerancë – nëse vozitet deri në 5 kilometra mbi kufirin e lejuar, nuk do të ketë gjobë. Nëse tejkalohet shpejtësia për më shumë se 10 kilometra, atëherë do të ketë sanksione. Por, sërish po e theksoj: qëllimi nuk janë gjobat, por veprimi edukativ dhe parandalues".

"Nëse kjo Qeveri duhet të bjerë për shkak të ‘Safe City’, e më pas të vijë një Qeveri tjetër që ta shfuqizojë projektin dhe secili të vozisë si të dojë, atëherë në rregull – jam i gatshëm ta marr këtë rrezik”, deklaroi Mickoski./TV21/

Nga Gjykata Kushtetuese në një njoftim për opinionin bëjnë të ditur se janë hapur dy lëndë mbi bazën e iniciativave të dorëzuara, me të cilat kontestohen disa dispozita të Ligjit për Kundërvajtje.
"Për shkak të interesit të shtuar publik dhe pyetjeve nga gazetarët, informojmë se në Gjykatën Kushtetuese janë hapur dy lëndë pas iniciativave të dorëzuara, me të cilat kontestohen ndryshimet në Ligjin për Kundërvajtje, në pjesën që lidhet me vendosjen dhe funksionimin e sistemit elektronik të mbikëqyrjes në trafik, i njohur në opinion si projekti “Qytet i Sigurt – Safe City”", thuhet në njoftim.
"Lënda e parë – У.бр.25/2026: Dispozita të kontestuara - Neni 4 paragrafi 5, neni 5 paragrafi 3, neni 8 kapitulli 7-a, neni 48-a (pjesa “dorëzim”), neni 48-b (pjesa “lëshimi i procesverbalit për kundërvajtje në komunikacion me urdhërpagesë rrugore”), neni 7-b (pjesa “pranimi i përgjegjësisë për kundërvajtje”), neni 48-v, neni 48-g (“mospranimi i përgjegjësisë për kundërvajtje”) dhe neni 15 i Ligjit për Kundërvajtje, të datës 23.01.2026".
"Parashtruesit theksojnë se me këtë projekt vendoset një detyrim ligjor për të gjithë qytetarët që të kenë numër personal telefoni dhe adresë elektronike, në mënyrë që të realizohet komunikimi dhe pranimi i njoftimeve për kundërvajtje të mundshme. Gjithashtu, ata pretendojnë se është problematike fakti që në asnjë pjesë nuk parashihet respektimi i nenit 7 të Kushtetutës, në lidhje me përdorimin e gjuhëve, gjatë komunikimit përmes mesazheve telefonike apo mjeteve elektronike. Sipas tyre, qytetarët nuk janë vënë në pozitë të barabartë, pasi sistemi zbatohet vetëm në Shkup, Tetovë dhe Kumanovë, duke pretenduar se në këto territore “nën lupë” vihet popullsia shqiptare, e cila është më e përfaqësuar në krahasim me qytetet e tjera të vendit", thuhet në njoftim.
Gjykata gjithashtu thekson se lënda e dytë është hapur me iniciativë të Ylli Paçukut.

Sindikata e Pavarur e Gazetarëve dhe Punonjësve të Medias (SPGPM) ka njoftuar se do t'i bashkohet protestës së punëtorëve të planifikuar për nesër. Kërkesa e tyre është rritje e menjëhershme e pagës minimale, si dhe një rritje e pagave në sektorin e medias.

"Vendimi u mor në një mbledhje të Bordit Ekzekutiv të SPGPM, gjatë së cilës sindikata u bëri thirrje anëtarëve të saj të japin mbështetje të plotë kërkesave për përmirësimin e gjendjes ekonomike të punëtorëve. Protesta, e thirrur nga Federata e Sindikatave, është planifikuar për të mërkurën në orën 17:00, dhe SSNM vlerëson se është një shprehje dinjitoze dhe legjitime e pakënaqësisë së punëtorëve".

"Sipas të dhënave nga një anketë e kryer nga SPGPM dhe Instituti RESIS në vitin 2024, më shumë se gjysma e punonjësve të medias fitojnë një pagë nën mesataren kombëtare, ndërsa pothuajse një e treta e gazetarëve, kameramanëve, redaktorëve, dizajnerëve dhe punonjësve të tjerë të medias paguhen me pagë minimale", thonë nga SPGPM.

LSDM mbështet protestën e punëtorëve dhe Lidhjes së Sindikatave për paga të denja dhe rritje të pagës minimale.

Nga LSDM thonë se qytetarët, punëtorët jetojnë vështirë, inflacioni dhe çmimet e rritura gërryejnë standardin e jetesës së punëtorëve, varfëria po rritet dhe pagat janë në ngecje.

"Qeveria e Mickoskit nuk ka para për të rritur pagën minimale, ka para vetëm për tendera. 161 tendera për një kompani, 51 tendera përmes komunave për një kompani tjetër, 9 milionë euro për tendera me dy punonjës, 1.2 milionë euro për tendera përmes Postës. Gjatë qeverisjes së LSDM-së, paratë përfunduan te qytetarët, ne e rritëm pagën minimale nga 8,000 denarë në mbi 20,000 denarë dhe pagën mesatare nga 22,000 denarë në mbi 42,000 denarë".

"Dhe si opozitë, LSDM qëndron në mbështetje të punëtorëve. LSDM propozoi Ligj për rritjen e pagës minimale, por qeveria e hodhi poshtë atë. Ne i dorëzuam Kuvendit zgjidhje ligjore dhe amendamente për rritjen e pagave në sektorë të ndryshëm, por qeveria e hodhi poshtë edhe atë", thonë nga LSDM.

Për shkak të protestës nga shoferët e kamionëve, disa pika kufitare për hyrje dhe dalje nga vendi janë bllokuar.
Trafiku në rrugët shtetërore po zhvillohet pa probleme, në rrugë të lagura.

Nga 15.11.2025, filloi detyrimi ligjor për posedimin e detyrueshëm të pajisjeve dimërore në automjete, pavarësisht nga kushtet aktuale të motit. Ky detyrim do të zgjasë deri më 15.03.2026.

Intensiteti i trafikut në rrugët jashtë zonave urbane është mesatar. Në pikat kufitare në anën RMV, nuk ka vonesa më të gjata për hyrje dhe dalje nga vendi.

LAMM rekomandon një shpejtësi të rregulluar, respektim të sinjalistikës së vendosur të trafikut dhe menaxhim të kujdesshëm të automjeteve, veçanërisht në rrugët nëpër lugina, lugina lumenjsh dhe gryka, ku ekziston mundësia e rrëshqitjeve të dheut. Kjo vlen veçanërisht për seksionet Katllanovë - Veles, Mavrovë - Dibër - Strugë, Vinicë - Berovë dhe Koçan - Delçevë.

Pesë kandidatë janë në garë për Prokuror të ri publik shtetëror. Kuvendi zyrtarisht nuk i publikon emrat e të paraqiturve, por disa prej tyre vetë e kanë bërë publike kandidaturën. Nga Kuvendi thonë se do të presin edhe një ditë për aplikimet që mund të mbërrijnë me postë, e më pas lista do t’i dërgohet Qeverisë. Prokurori i ri publik shtetëror zgjidhet në kuvend me 61 vota.

“Mbrëmë në mesnatë skadoi afati për paraqitjen e kandidatëve për zgjedhjen e Kryeprokurorit të ri të shtetit. Sipas informacioneve zyrtare, në shpallje janë paraqitur pesë kandidatë, pasi të përfundojnë procedurat ligjore, deputetët në Kuvend do ta kenë fjalën përfundimtare për atë se kush do ta udhëheqë këtë institucion për gjashtë vitet e ardhshme”, raporton Mihajlo Donev, gazetar.
Nga Kuvendi megjithatë nuk i zbulojnë emrat e kandidatëve, duke thënë se para se të dërgojnë biografitë e tyre në Qeveri, do të presin edhe një ditë, në rast se mbërrin ndonjë aplikim me postë.

“Kandidaturat e pranuara nga Kuvendi dërgohen në Qeveri. Më tej, Qeveria dhe Këshilli i Prokurorëve Publikë e zbatojnë procedurën ligjore dhe në fund propozimi për Prokuror publik shtetëror dërgohet në Kuvend për votim”, njoftojnë nga Kuvendi. Edhe pse Kuvendi nuk i zbulon emrat, ish-kryetari i Gjykatës Themelore Shkup, Vlladimir Pançevski, ishte i pari që publikisht e shpalli kandidaturën e tij. Në deklaratë për Alsat më herët, Pançevski tha se është paraqitur për shkak të përvojës që posedon, si dhe se prokurori i ri nuk duhet të shkojë në “gjueti shtrigash”, por të tregojë drejtësi.

Përveç Pançevskit, kandidaturën e tij për Alsat e konfirmoi edhe gjyqtari në Gjykatën Penale të Shkupit, Nenad Savevski, i cili megjithatë nuk deshi të komentojë para se publikisht të shpallen emrat e të gjithë kandidatëve. Para se të bëhej gjyqtar, rreth 8 vite ka punuar në Prokurorinë e Shkupit dhe rreth një vit në Prokurorinë Themelore në Gostivar.

Siç mësohet, në shpallje është paraqitur edhe Anita Topollova-Isajllovska, e cila aktualisht ushtron funksionin e ushtrueses së detyrës së Prokurorit të Përgjithshëm shtetëror, deri në zgjedhjen e zëvendësit të përhershëm të Lupço Kocevskit, i cili dha dorëheqje në dhjetor.

Përveç këtyre tre emrave, kandidaturën e saj publikisht e shpalli edhe prokurorja Lençe Ristovska, e cila aktualisht i përfaqëson lëndët “Talir” kundër OBRM-PDUKM-së në pushtet. Ajo u paraqit edhe për gjykatëse në Gjykatën Ndërkombëtare për të Drejtat e Njeriut në Strasburg, por ajo zgjedhje më vonë u anulua.

Kandidatja e pestë është prokurorja Lidija Raiçeviq, e cila punon në Prokurorinë Themelore Publike, Shkup. Jozyrtarisht, interes për paraqitje kanë pasur edhe prokurorët e lartë publikë Vlladimir Milloshoski dhe Zllatko Bikovski, por kandidaturat e tyre zyrtare deri më tani nuk kanë mbërritur.

Sipas ligjit, Qeveria duhet ta dërgojë listën me kandidatë te Këshilli i Prokurorëve Publikë, ku, pasi të përgatitet mendimi për secilin kandidat, lista kthehet në Qeveri. Prej andej, bëhet seleksionimi dhe propozimi dërgohet në Kuvend. Prokurori i ri i Përgjithshëm shtetëror zgjidhet me 61 vota në Kuvend. /Alsat/

Ministrja e Energjisë, Minierave dhe Burimeve Minerale Sanja Bozhinovska mbajti fjalim në ngjarjen “Dita diellore – energjia e pastër në praktikë”, organizuar nga Agjencia për inovacion dhe zhvillim shkencor – teknologjik dhe sipërmarrësi – INOVA, me rastin e 26 janarit – Ditës ndërkombëtare të energjisë së pastër.

Në fjalimin e saj, ministrja Bozhinovska theksoi se festimi i Ditës ndërkombëtare të energjisë së pastër është një kujtesë e fuqishme për përgjegjësinë e përbashkët, por edhe e mundësisë strategjike që vendi ka në procesin e tranzicionit energjetik drejt një sistemi energjetik të qëndrueshëm, të besueshëm dhe modern.

"Energjia diellore tani është një nga shtyllat më të rëndësishme të tranzicionit kombëtar energjetik. Maqedonia ka një potencial serioz diellor dhe orientimi ynë i qartë strategjik është ta shfrytëzojmë atë në maksimum – përmes një kuadri rregullator të qëndrueshëm, mbështetjes së investimeve dhe rolit aktiv të shtetit”, theksoi Bozhinovska.

Ajo theksoi se gjatë vitit të kaluar është shënuar rritje e konsiderueshme e kapaciteteve fotovoltaike, si rezultat i rritjes së interesit si nga investitorët ashtu edhe nga qytetarët, gjë që konfirmon besimin në energjinë diellore si një zgjidhje me kosto efektive dhe të qëndrueshme.

Ministrja theksoi se ministria nuk është vetëm një rregullator, por një nxitës aktiv i proceseve, me fokus në investimet shtetërore në kapacitetet diellore, sistemet e ruajtjes së energjisë dhe planifikimin strategjik të dekarbonizimit.

Në fjalim u theksua gjithashtu rëndësina e partneritetit me sektorin privat, komunitetin akademik dhe qytetarët si një parakusht i domosdoshëm për një tranzicion të suksesshëm dhe të barabartë energjetik.

Të gjithë personat që kanë punuar në shtetet e lindjes, sot sërish protestuan para Drejtorisë së të Ardhurave Publike në Tetovë, kundër tatimeve të cilat u kërkohen të paguhen gjatë kohës të cilët ata kanë punuar jashtë vendit.

Protestuesit thanë se nuk janë kundër tatimeve, por kundërshtojnë ngarkesën e padrejtë dhe retroaktive.

“Kërkojmë që të gjitha vendimet e nxjerrë me bazë retroaktive të anulohen. Nuk mundet të pranohet që qytetarët të detyrohen sot për detyrime që në kohën kur janë krijuar nuk kanë ekzistuar ose janë interpretuar ndryshe. Kërkojmë që të gjitha vendimet tashmë të nxjerra mbi bazë retroaktive të anulohen dhe çdo procedurë e tillë të ndalet deri në sqarimin e plotë ligjor”, tha Bajrami.

Ata kërkojnë përfshirjen e ekspertëve të pavarur për interpretim të drejtë të ligjit për tatim, veçanërisht për çështjen e rezidencës tatimore dhe rregullin e 183 ditëve e më shumë, si dhe hapje të debatit në Kuvend.

Ski Qendra “Kodra e Diellit” njofton se një person ka hyrë pa leje me motor me 4 rrota (ATV) në pistat e skijimit, duke kryer manovra të rrezikshme dhe duke dëmtuar pistat.

Nga Qendra thonë se veprimi konsiderohet i papërgjegjshëm dhe i ndaluar rreptësishtë, ndërsa personi do të paraqitet në polici dhe organet kompetente. Qendra thekson se qarkullimi me mjete motorike në pistat e skijimit është i ndaluar dhe çdo rast i ngjashëm do të publikohet në faqen dhe rrjetet zyrtare.

“Ski Qendra “Kodra e Diellit” informon opinionin publik se nëpër pistat e skijimit është regjistruar dhe shpërndarë një video ku një person me motor me 4 rrota (ATV) ka hyrë pa leje dhe ka kryer manovra të rrezikshme (drift) duke dëmtuar edhe pistat e skijimit. Ky veprim është i papërgjegjshëm dhe i ndaluar rreptësisht, duke paraqitur rrezik serioz për sigurinë e vizitorëve dhe skijuesve".

"Personat e përfshirë do të paraqiten në polici dhe në organet kompetente për procedura të mëtejshme ligjore. Theksojmë se në tërë territorin e ski qendrës janë të vendosura tabela të qarta ndalimi, të cilat duhet të respektohen nga të gjithë. Të gjitha rastet e ngjashme do të dokumentohen dhe do të publikohen në webfaqen dhe rrjetet tona zyrtare me fotografi, me emër dhe mbiemër".

"NDALOHET rreptësisht qarkullimi me motora, ATV apo mjete të tjera motorike nëpër pistat e ski qendrës”, thonë nga Ski Qendra.