Partia Demokratike e Kosovës (PDK) ka reaguar ashpër ndaj qëndrimeve të Prokurorisë së Gjykatës Speciale në Hagë, duke e akuzuar atë për devijim nga misioni i saj dhe përpjekje për të ndërtuar një narrativë të rreme mbi luftën çlirimtare të Kosovës.
Sipas PDK-së, deklarimet e Prokurorisë në fazën përmbyllëse të gjykimit kundër ish-udhëheqësve të Ushtrisë Çlirimtare të Kosovës – Hashim Thaçi, Kadri Veseli, Jakup Krasniqi dhe Rexhep Selimi – konfirmojnë se procesi ka humbur karakterin e tij gjyqësor dhe është shndërruar në një përpjekje për “deformim të së vërtetës historike”.
Partia thekson se lufta e UÇK-së ka qenë përgjigje e domosdoshme ndaj represionit dhe krimeve të kryera nga regjimi i Slobodan Millosheviqit, ndërsa përpjekja për ta portretizuar atë si projekt kriminal përbën “barazim të viktimës me agresorin”.
PDK e ka cilësuar “absurde” kërkesën e Prokurorisë për dënime të larta ndaj të akuzuarve, duke e interpretuar atë si ndëshkim politik. Po ashtu, partia e ka quajtur të papranueshme çdo tentativë për të lidhur shpalljen e Pavarësisë së Kosovës me pretendime kriminale, duke theksuar se ky akt është i mbështetur gjerësisht nga komuniteti ndërkombëtar dhe i bazuar në të drejtën për vetëvendosje.
Në reagim, PDK rikonfirmon bindjen e saj në pafajësinë e ish-udhëheqësve të UÇK-së dhe legjitimitetin e luftës çlirimtare, duke e konsideruar çdo kriminalizim të saj si tentativë për rishkrim të historisë dhe cenim të themeleve të shtetit të Kosovës.
“Liria nuk është krim. Dhe historia nuk mund të rishkruhet”, përfundon deklarata e partisë.
Prokuroria Themelore në Prizren, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsion, ka nisur hetime pas informacioneve publike të dala gjatë rinumërimit të votave në Qendrën Komunale të Numërimit në Dragash.
Me autorizim të Kryeprokurorit Petrit Kryeziu, organet hetimore kanë intervistuar 51 persona të dyshuar.
Nga ta, nëntë komisionerë janë ndaluar për 48 orë me urdhër të Prokurorit të Shtetit, për shkak të dyshimeve të bazuara se kanë kryer veprën penale “Falsifikimi i rezultateve të votimit”, sipas nenit 216, paragrafi 2 i Kodit Penal të Republikës së Kosovës.
Prokuroria njofton se brenda afateve ligjore do të vendosë për masat që do të ndërmerren për të siguruar paraqitjen e të pandehurve në procedurë.
Institucionet përgjegjëse theksojnë përkushtimin e tyre për mbrojtjen e integritetit të procesit zgjedhor, garantimin e së drejtës së votës, si dhe luftimin e çdo vepre penale që cenon zgjedhjet e lira dhe demokratike./Telegrafi/
Zyra e Prokurorit të Specializuar pas një pauze ka vazhduar fjalën përmbyllëse, në gjyqin e madh ndaj ish-presidentit Hashim Thaçi dhe të tjerëve, me pretendimet e tyre për funksionimin dhe strukturat e Shtabit të Përgjithshëm.
Sipas prokurorit, të akuzuarit kanë pasur kompetencë mbi strukturat që ekzistonin dhe i kanë përdoruar për të ekzekutuar planin e tyre që e quajnë “kriminal”.
Në pjesën e parë, ai ka përmendur vendet strategjike të UÇK-së, që sipas tij janë caktuar për të pasur kontroll.
“Vendet e caktuara për Shtabin e Përgjithshëm, ishin të rëndësishme për kontekstin dhe janë përzgjedhur në mënyrë strategjike, për të siguruar që të operonin dhe të ushtronin kontroll në mënyrë efektive. Shtabi ka përdorur disa vende, në Drenicë, Pashtrik dhe Nerodime. Në fillim të periudhës së aktakuzës, shtabi e kishte bazën dhe funksiononte në Likofc. Këto vende dhe seli, ishin në qendër të Kosovës, në afërsi të zonave operative, duke lehtësuar kontrollin e Shtabit, ashtu siç është shpjeguar nga Fatmir Limaj”
E për këtë çështje, është shfaqur edhe një deklaratë e Fatmir Limajt.
“Pa marrë parasysh terrenin, e kishte vendin më të sigurt vendosjen në këtë pjesë të Kosovës, nga ku do të ndërlidhte veprimet ushtarake dhe komunikimin me të gjitha njësitë ushtarake anekënd Kosovës. Kjo ishte qendra e Kosovës, në të cilën mund të komunikohej me të gjitha anët e Kosovës. Prandaj, edhe vendosëm që shtabi ta kalojë pjesën më të madhe në këtë pjesë”, thotë Limaj.
Të ftuara në panelin e Greta Topjana në Review në Euronews Albania, psikologia Eksena Qerici dhe aktivistja Lindita Pano folën mbi rastin e skandalit të Jeffrey Epstein, ku ditët e fundit shumë të dhëna, foto dhe video të publikuara nga Departamenti i Shtetit në Shtetet e Bashkuara kanë trazuar rrjetin.
Qerici, duke iu referuar rastit të Epstein, theksoi se një person i abuzuar mund të rritet dhe të bëhet abuzues, si pasojë e asaj që përjeton gjatë abuzimit.
“Nëse ne kemi një individ që kryen abuzimin dhe nuk zbulohet, dhe humbet në një rast të tillë, atëherë nuk kemi më të bëjmë me një individ, por me një fenomen, sepse do të prodhojë tek këto viktima mundësinë që të rilindë një person tjetër i kësaj natyre. Pra, një person i abuzuar në fëmijëri mund të rritet dhe të bëhet një person abuzues i këtyre përmasave, sepse ka pushtet dhe politikë. Nuk kemi më të bëjmë me një çështje nëse ka një apo dy personalitete, por flasim për dëmtime të rënda të aspektit seksual”, u shpreh Qerici.
Ndërkohë, nga ana tjetër, Pano e lidhi këtë rast me një fenomen që ndodh edhe në Shqipëri, por që sipas saj nuk flitet dhe nuk diskutohet në vendin tonë.
“Epstein kishte treg, nuk mund të shesësh diçka kur nuk ka treg. Këto lloj festash ndodhin edhe në Shqipëri, por nuk flitet për to. Ndodhin nga i njëjti rang pushteti dhe parash dhe në të njëjtën mënyrë përdoren vajzat, ashtu si Epstein ka abuzuar”, tregoi Pano.
Një aksident ka ndodhur në mbrëmjen e sotme në aksin rrugor Tri Urat-Lushnje, ku një automjet tip BMW është përplasur me një kalë që i ka dalë papritmas para mjetit.
Si pasojë e përplasjes, kafsha ka ngordhur në vend, ndërsa bashkëshortja e drejtuesit të mjetit është transportuar me ambulancë drejt Spitalit të Lushnjes për ndihmë mjekësore.
Automjeti ka pësuar dëme të konsiderueshme. Policia ndodhet në vendngjarje dhe po punon për zbardhjen e shkaqeve të aksidentit./A2 CNN
Kërkesat për trajtim shëndetësor në qendrat rehabilituese me burime të ujërave termale janë shtuar dukshëm gjatë vitit që lamë pas. Mjekët në Qendrën Rehabilituese në Kllokot dhe ata në Banjë të Pejës thonë se burimet natyrore të ujërave termale kanë veti shëruese për shumë sëmundje, veçanërisht ato ortopedike.
Burimi i ujit termal në fshatin Kllokot të komunës së Vitisë bartet brenda qendrës rehabilituese dhe shfrytëzohet për trajtimin e sëmundjeve të ndryshme. Doktori që e ka nisur profesionin në këtë qendër dhe po e vazhdon punën edhe pas pensionimit, thotë se ky ujë ka fuqi shëruese që në shumë raste mund të zëvendësojë edhe medikamentet.
“Mungon edukata shëndetësore jo vetëm tek popullata por edhe te personeli shëndetësor, një pjesë e tyre nuk kanë njohuri se si mund të ndikojë një banjë e tillë, i ngarkojnë pacientet aq shumë me medikamente, kurse efektet e këtij uji dhe mjekimit këtu nuk kanë kurrëfarë indikacione, me përjashtim që mjeku që e jep terapinë duhet të ketë kujdes se çfarë gjendje shëndetësore gjendet organizimi i atij pacienti”, tha Shasivar Musliu, specialist fiziatër.
Sipas pronarit të Banjës së Kllokotit, vlera të ngjashme të këtij uji janë gjetur edhe në disa shtete të tjera evropiane.
“Sipas vlerësimit të dhënë nga ekspertë të ish-shtetit jugosllav, banja e ngjashme është në Çeki dhe Rusi. Në perëndim banjat ma shumë përdoren gjatë dimrit e sa verës, këtu tek ne është më ndryshe”, tha Nezir Rexhepi.
Një tjetër burim i rëndësishëm i ujërave termale ndodhet edhe në Banjë të Pejës. Sipas mjekëve, ky ujë ka veti të veçanta shëruese sidomos për problemet shëndetësore të lëkurës.
“Karakteristikë e këtij uji më shumë është për sëmundjet vaskulare, d.m.th. edhe për sëmundjet post traumatike, neurologjike, gjinekologjike, urologjike etj, por edhe te sëmundjet e lëkurës është karakteristikë se përmbajtja e sulfurit ka ndikim shumë të mirë në lëkurë”, tha dr. Hyrije Blakaj, specialiste fiziatër.
Përveç Kllokotit dhe Banjës së Pejës, burim i ujit termal ekziston edhe në Banjskë të Mitrovicës, por ky kompleks nuk është rikthyer në shërbim për qytetarët që nga viti 2000.
Mjekët e qendrave rehabilituese vlerësojnë se burimet natyrore të ujërave termale përbëjnë një pasuri të rëndësishme shëndetësore për Kosovën, e cila ende nuk është shfrytëzuar në potencialin e saj të plotë./RTK
Derisa qytetarët në 34 komuna mund të përballen me një rritje të serishme të çmimit të rrymës nga pranvera e këtij viti, ata në katër komunat me shumicë serbe në veri nuk do ta kenë këtë brengë as këtë vit.
Në përgjigjen e parë që nga licencimi, më 2022, kompania Elektrosever njoftoi se tarifat e saja do të mbesin të pandryshuara.
“Kompania Elektrosever nuk planifikon të rrisë çmimet e energjisë elektrike për momentin. Ne monitorojmë me kujdes dhe vazhdimisht situatën në treg dhe marrim në konsideratë të gjithë faktorët përkatës që ndikojnë në formimin e çmimeve”, thuhet nga ana e Elektroserverit.
Furnizuesi i licencuar për Mitrovicë të Veriut, Zveçan, Leposaviq dhe Zubin Potok aktualisht ka tarifa 12 deri në 22 për qind më të ulëta se sa ato në kuadër të Furnizuesit të Shërbimit Universal apo KESCO-s.
Ndërkaq, një aprovim eventual nga Zyra e Rregullatorit për Energji i propozimit të KESCO-s për rritje prej 21.3% do të thellonte dallimit.
Në një situatë hipotetike – nëse tarifat e KESCO-s do të rriteshin aq sa propozimi – për konsumin mujor nën 800 kilovatë orë Elektrosever do të kishte tarifa 48% më të ulëta.
Ndërsa, për bllokun mbi 800 kilovatë orë për tarifën lartë apo të ditës – dallimi do të ishte 36% e për atë të ulët apo të natës 47%.
Ndonëse Elektrosever funksionon jashtë tregut të rregulluar, në ZRRE nuk u përgjigjën në pyetjet e televizionit për këto dallime brenda vendit./Tv Dukagjini/
Hulumtuesi i Institutit “Octopus”, Ridvan Emini, ka vlerësuar se dezinformimi vazhdon të mbetet një nga instrumentet kryesore të Aleksandër Vuçiqit për destabilizim në Kosovë dhe rajon.
Sipas Eminit, propaganda shtetërore serbe, në vazhdimësi, përpiqet ta paraqesë Kosovën si shtet jofunksional dhe burim tensioni, përmes fabrikimit të lajmeve të rreme dhe shpërndarjes së narrativave manipuluese.
Ai ka përmendur si shembull të fundit raportimin e mediumit serb Blic.rs, i cili ka pretenduar se “një grup shqiptarësh” ka qëlluar me mbi 100 plumba ndaj policisë serbe në një fshat të Kurshumlisë, duke shtuar se grupi më pas është larguar drejt Kosovës.
Emini thekson se ky raportim është i pabazuar, pasi nuk ka asnjë konfirmim zyrtar, prova apo burime të pavarura që e mbështesin këtë pretendim.
Sipas tij, pretendimi bëhet edhe më i pabesueshëm duke marrë parasysh faktin se fshati Parada ndodhet më shumë se tre kilometra në thellësi të territorit të Serbisë dhe larg rrugëve që lidhen me Kosovën.
Ai rikujton se raste të ngjashme janë përsëritur edhe më herët. Në nëntor të vitit 2025, autoritetet dhe mediat serbe kishin pretenduar se “një grup i armatosur shqiptarësh” kishte shtënë ndaj Ushtrisë së Serbisë pranë bazës ushtarake “Debella Gllava” në Bujanoc. Ky pretendim ishte demantuar nga Policia e Kosovës, e cila kishte konfirmuar se nuk kishte ndodhur asnjë incident i tillë.
Sipas Eminit, realiteti në terren kishte qenë i kundërt, pasi brenda territorit të Kosovës ishin arrestuar gjuetarë të armatosur serbë të armatosur, të cilët kishin hyrë ilegalisht në fshatin Sfircë.
Ai shton se kësaj ngjarjeje i kishte paraprirë edhe plagosja dhe kidnapimi i shtetasit të Kosovës, Milan Vukashinoviq, nga xhandarmëria serbe.
Emini vlerëson se Serbia po e përdor shpifjen dhe dezinformimin si formë të “luftës hibride”, me synim krijimin e konfuzionit dhe zhvendosjen e vëmendjes nga veprimet e veta, duke tentuar ta portretizojë Kosovën si faktor destabilizues, ndonëse, sipas tij, propaganda shtetërore serbe mbetet një nga burimet kryesore të pasigurisë në rajon.
Është folur shpesh e gjatë se pse Prishtina nuk ka statujë apo diçka që i kushtohet familjes Jashari. Kuvendi Komunal i Prishtinës, tashmë ka hapur konkurs në të cilin pret projekte për ndërtimin e memorialit kushtuar familjes Jashari. I njëjti planifikohet të ndërtohet mbi nënkalimin që do bëhet në rrugën “Agim Ramadani”
Në mes të ndërtesës së Kuvendit të Republikës së Kosovës dhe Xhamisë së Gurit, planifikohet të ndërtohet një nënkalim për vetura e mbi memoriali përkujtimor kushtuar komandantit Adem Jashari dhe familjes së tij.
Kuvendi Komunal i Prishtinës ka hapur edhe njëherë një tender, që pret ofertues për projektimin e ndërtimit të këtij memoriali përkujtimor.
Në aneksin e dosjes së tenderit, janë edhe specifikimet teknike që janë të detyrueshme për operatorët ekonomik që aplikojnë.
Tek tregohet për historinë e familjes Jashari, aty shkruhet edhe për përafrimet e këtij projekti me vizionin e kryetari të komunës, Përparim Rama.
“Përafrimi me vizionin e kryetarit Përparim Rama: Ky projekt përputhet me vizionin e kryetarit Rama për një Prishtinë bashkëkohore, gjithëpërfshirëse dhe një fener të trashëgimisë kulturore. “Memoriali përkujtimor kushtuar familjes Jashari” do të kontribuojnë në këtë vizion duke: Ruajtur Kujtesën Historike: Nderimi i trashëgimisë së një ngjarjeje kyçe në historinë e Kosovës. Promovimi i vlerave universale: Memoriali bashkë ma hapësirën publike përreth shërben për shenjëzimin në kohë dhe hapësirë të sakrificës për vlerën universale për të jetuar të lirë. Përmirësimi i peizazhit urban: Integrimi i memorialit në strukturën urbane të Prishtinës, duke krijuar një hapësirë publike tërheqëse dhe të qasshme”.
Drejtori për transformim në komunën e Prishtinës, Gezim Kastrati tha se ky projekt pritet të marr formë, sapo që niveli qendror të jap dritën e gjelbër për rrugën “Agim Ramadani”.
“Nënkalimi është i paraparë të kryhet prej 8 deri në 12 muaj, mirëpo ne jemi në pritje që 1.5 vit dhe mendoj që me rregullimin e sheshit dhe hapësirën e e nënkalimit do ta kemi sheshin mbi varësisht prej propozimeve që do të vijnë ka me qenë një shesh që do e tregoj trashëgimin, atë gjenocid që ka ndodhë na familjen Jashari”, ka theksuar Gezim Kastrati – Drejtor për Transformim.
Kastrati tregoi gjithashtu pse herën e parë dështoi tenderi.
“Do ta kemi pjesën e sipërme që është paraparë dhe për të dytën herë është shpallë konkursi ndërkombëtar, sepse herën e parë kemi marr një numër të vogël të konkurruesve dhe zgjidhjet nuk kanë qenë të mjaftueshme, me gjithë respektin për konkurruesit tani jemi duke e pritur një projekt i cili do ta përfaqësoj apo do ta tregojë të gjithë atë që ka ndodhë në Prekaz”, ka deklaruar Kastrati.
Shuma totale për këtë projekt, është 150 mijë euro, e vetëm kontrata për hartimin e projektit kryesore, do të jetë 125 mijë euro./Tv Dukagjini/
Nëpërmjet një koncept dokumenti, pushteti që pritet të ripërtërihet pas fitores në zgjedhjet e 28 Dhjetorit, i ka qartësuar synimet për një ligj të ri për ndërmarrjet publike, duke e vlerësuar të mangët atë të miratuar më 2008. Aty përmendet edhe çështja e pronësisë, përkatësisht kalimit të shumicës së aksioneve të ndërmarrjeve te Fondi Sovran – ligji për të cilin është në Gjykatën Kushtetuese që nga Dhjetori 2023.
Një koncept dokument i Ministrisë së Ekonomisë i bën të qarta synimet për hartimin dhe miratimin e një ligji të ri për ndërmarrjet publike, që do të ishte në harmoni edhe me atë për Fondin Sovran.
Teksa theksohet nevoja pwr rishikim të legjislacionit, një nga çështjet e para që përmenden është detyra e pakryer nga qeveritë për miratimin e një politikë të pronësisë.
Në këtë kontekst, koncept dokumenti përmend edhe rolin që parashihet të ketë Fondi Sovran.
“Pas miratimit të ligjit për Fondin Sovran të Republikës së Kosovës (RK), kjo politikë e pronësisë duhet të rishikohet në përputhje me pronësinë shtetërore të ndërmarrjeve, si Shoqëri Tregtare (ShT) me personalitet juridik në të cilën Fondi ka ose do të fitojë shumicën e aksioneve ose pjesëmarrjes në pronësi”.
Por, Ligji për Fondin mbetet ende në trajtim nga Gjykata Kushtetuese që nga 26 Dhjetori 2023 apo 11 ditë pasi ishte miratuar në Kuvend.
“Kjo lëndë aktualisht është në procedurë të shqyrtimit. Vendimi do të merret pasi që të shqyrtohen të gjitha aspektet kushtetuese të pretendimeve të bëra në kërkesë nga pala parashtruese, në përputhje me Kushtetutën, Ligjin për Gjykatën Kushtetuese dhe Rregulloren e punës së Gjykatës”.
Me këtë ligj, pushteti aktual synon që një pjesë të madhe të ndërmarrjeve publike t’i kalojë nën administrimin e Fondit Sovran.
Sidoqoftë, koncept dokumenti në pjesën më të madhe merret me problemet e evidentuara në legjislacionin në fuqi për ndërmarrjet publike, menaxhimin, performancën e dobët financiare, mungesën e llogaridhënies dhe transparencës.
Grupi Punues i dokumentit i përbërë nga përfaqësues të Ministrisë së Ekonomisë, asaj të Financave dhe Zyrës së Kryeministrit, theksoi se vazhdimi pa ndryshime, me ligjin aktual, çon në thellim të problemeve.
“Ky opsion do të vazhdojë me rënien e vlerës së përgjithshme të aseteve në pronësi publike dhe mund të rrezikojë seriozisht cilësinë e shërbimeve, të cilat ofrohen për qytetarët e Republikës se Kosovës (RK). Për më tepër, mungesa e politikës së përgjithshme publike në lidhje me orientimin strategjik për zhvillimin dhe organizimin e Ndërmarrjeve Publike (NP), në treg, mund të ketë pasoja negative në ekonominë e vendit. Në anën tjetër, mos-reformimi i strukturës organizative të Ndërmarrjeve Publike (NP),pamundëson funksionimin efikas të tyre. Mungesa e integrimit të plotë të parimeve të qeverisjes korporative në aktet normative dhe zbatimi i tyre në NP-të, konsiston me mungesë të përgjegjësisë, llogaridhënies dhe kontrollit”.
Dokumenti liston në formë rekomandimi çështjet që duhet të adresojë ligji i ri, përfshirë edhe dispozitat ndëshkuese në rastet e mos-përmbushjes së planeve të biznesit nga ndërmarrjet publike.
Teksa përmenden edhe disa shembuj të shteteve të rajonit dhe BE-së, kryesisht flitet me tone pozitive për ato që kanë modele të centralizuara të menaxhimit të ndërmarrjeve shtetërore./Tv Dukagjini/
Kur kanë mbetur edhe dy ditë afat që Gjykata Supreme të dalë me vendim sa i përket ankesave për zgjedhjet e 28 dhjetorit, njohës të politikës shprehen optimist se deri në mes të shkurtit, Kosova do t’i ketë institucionet e reja.
Sipas tyre, menjëherë me krijimin e institucioneve duhet të shtyhen para në Kuvend marrëveshjet ndërkombëtare dhe buxheti i këtij viti.
Njohësi i politikës, Dorajet Imeri konsideron se në dy javët e para të muajit shkurt do të kemi domosdoshmërisht Kuvendin e konstituuar dhe Qeverinë e formuar.
“Nuk ekziston asnjë pengesë, asnjë arsye dhe asnjë nevojë që kjo të mos ndodhë në këtë periudhë, sidomos kur dihet se tashmë jemi dukshëm të vonuar në këtë proces. Kosova aktualisht ka disa prioritete jetike. I pari është konstituimi i Kuvendit dhe formimi i Qeverisë. I dyti, menjëherë pas tij, është miratimi i buxhetit, i cili është urgjent dhe jetik për funksionimin e Republikës së Kosovës. Po ashtu, është i domosdoshëm edhe nënshkrimi dhe ratifikimi i marrëveshjeve ndërkombëtare, ku gjithashtu jemi të vonuar”, tha Imeri.
Ndërkaq, Vullnet Buqaqku, hulumtues në Institutin Demokratik të Kosovës thotë se në momentin kur Komisioni Qendror i Zgjedhjeve certifikon rezultatet e zgjedhjeve hapet afati kushtetues për presidenten e Republikës që ta caktojë dhe ta thërrasë seancën konstituive të Kuvendit.
“Nga pikëpamja kohore, unë besoj se kjo mund të realizohet rreth mesit të këtij muaji, pra si thirrja e seancës, ashtu edhe mbajtja e saj dhe vetë konstituimi i Kuvendit në përputhje të plotë me afatet dhe parametrat kushtetues. Megjithatë, duhet të pritet dinamika e zhvillimeve dhe mënyra se si Gjykata Supreme e Kosovës do t’i trajtojë ankesat e paraqitura. Gjithçka është e ndërlidhur me këtë proces dhe me epilogun që do të kenë këto ankesa në Supreme”, tha Buqaqku.
Në mënyrë që vendi të dal nga bllokada institucionale, është kërkuar konsensus mes partive politike sa i përket zgjedhjes së presidentit të ri.
“Përtej emrave se kush mund të jetë dhe a do të jetë përsëri Vjosa Osmani apo dikush tjetër, kjo për momentin, nuk është e rëndësishme. Më e rëndësishme sesa emrat është arritja e një dakordimi ndërinstitucional dhe ndërpartiak për ta çuar përpara këtë agjendë”, tha Imeri.
“Thirrja e seancës për zgjedhjen e Presidentit të Republikës mund të ndodhë në fund të muajit shkurt, por po ashtu mund të jetë edhe në fillim të marsit, më 1, 2, 3 apo 4 mars. Pastaj a përfundon apo jo më 4 mars zgjedhja e presidentit mbetet të shihet në seancë se a ka vullnet politik ët partive politike për ta zgjedhur presidentin”, tha Buqaqku.
Procesi i krijimit të institucioneve është konsideruar si vendimtar për stabilitetin politik e ekonomik të vendit./RTK
Instituti Kombëtar i Shëndeti Publik ka bërë të ditur se Komiteti për Inteligjencë Epidemike dhe Komiteti për Sëmundje Ngjitëse, kanë mbajtur takime, ku kanë diskutuar situatën globale rreth përhapjes së virusit ‘Nipah’.
Për RTK-në ata bën të ditur se sipas vlerësimit aktual të Komiteteve, rreziku për Kosovën është i ulët, meqë edhe OBSH dhe organizatat e tjera kanë vlerësuar se shpërthimet mbeten sporadike, të lokalizuara dhe me mundësi të kufizuara të përhapjes përtej Indisë, ku janë zbuluar dy raste.
Sidoqoftë, sipas tyre, Komitetet kanë rekomanduar që të zgjerohet mbikëqyrja epidemiologjike dhe të rritet gatishmëria e sistemit shëndetësor, mirëpo, në këtë fazë nuk ka arsye për alarmim publik apo rrezik për popullatën në Kosovë.
Mjeku Naser Ramadani, njëherësh ish-drejtues IKSHPK-së, thotë se ekspertët e shëndetit publik theksojnë se virusi Nipah është i rrallë, por kur ndodhin shpërthime, pasojat mund të jenë shumë të rënda.
Megjithatë, ai nënvizon rëndësinë e informimit që qytetarët të mos bien pre e dezinformimeve të ndryshme dhe për të mos shkaktuar panik të panevojshëm.
Sipas tij, ky virus mund të kalojë nga kafshët te njerëzit.
Burimet më të shpeshta të infeksionit janë lakuriqët e frutave, të cilët lloje nuk gjenden te ne dhe se aktualisht virusi nuk përhapet përmes ajrit.
Ndërkaq, simptomat janë kryesisht ethe, dhimbje koke, konfuzion, vështirësi në frymëmarrje etj.
Ai shton se deri tani shpërthimet janë të kufizuara në disa zona të Azisë dhe është shumë i ulët rreziku për Evropën, Ballkanin, Kosovën dhe Shqipërinë.
MES KATËR MURESH - episodi i tretë përmban rrëfim për dhunën fizike dhe ekonomike në familje, tradhtinë, pasojat psikologjike te fëmijët, si dhe sfidat e një nëne që po përballet me pasiguri ekonomike dhe mungesë të stabilitetit jetësor.
Përmbajtja përfshin përvoja të dhunës së ushtruar për një periudhë njëvjeçare, ndarjen nga partneri, vështirësitë në rritjen e fëmijëve pa përfshirjen e prindit tjetër, si dhe ndikimin emocional dhe psikologjik te fëmijët që vazhdojnë trajtimin profesional.
Pse ajo nuk kërkon trajtim profesional?
Si po vazhdon tutje?
Pse sakrifikoi dhe çfarë planifikon tutje?
Në studio edhe Afërdita Goçi, psikiatër.
Këtë prodhim të Radio Dukagjinit mund ta ndiqeni në videon e mëposhtme.
Ndonëse rritja e taksave gjyqësore nxiti reagime të shumta, asnjë ankesë zyrtarisht nuk ka shkuar në Këshillin Gjyqësor të Kosovës. Ndërkohë që avokatët e njohësit e sistemit të drejtësisë thonë se në muajt në vazhdim do vërehet rënie e numrit të rasteve që qytetarët e bizneset dërgojnë në gjykatë, çka nuk është e drejtë.
Nga fillimi i këtij viti ka hyrë në fuqi udhëzimi i ri administrativ për unifikimin taksave gjyqësore, udhëzim me të cilin edhe janë shumëfishuar çmimet.
Kjo rritje e çmimeve më së shumti prek rastet civile dhe administrative e që sipas avokatëve së shpejti do të vërehet ndikimi në rënien e numrit të rasteve që iniciohen në Gjykatë.
Avokati Yll Zekaj thotë se drejtësia po kthehet në privilegj vetëm për ata që janë të pasur.
“Këshilli Gjyqësor nuk ka gjetur mënyre tjetër për ta ulur numrin dhe për ta menaxhuar këtë numër të lartë të lëndëve në Këshillin Gjyqësor dhe zgjidhja më e lehtë si duket është gjetur ajo që të rriten taksat dhe të sigurohet që qytetarët, bizneset të mendohen dy herë për ta dërguar një lëndë në procedurë gjyqësore për shkak të shpenzimeve të larta procedurale që do u shkaktohen”, ka deklaruar Zekaj.
“Kjo taksë justifikohet në shërbimet që qytetari merr nga gjykata pra shërbimet administrative e të ngjashme vetëm një rast bazik psh certifikata një letër a4 certifikatë se një biznes nuk i është nënshtruar procedurës së falimentimit e cila merret në Gjykatën Komerciale para këtij udhëzimi ka kushtuar 5 euro ndërsa tani e njëjta është bërë 30 euro, kjo pa dyshim është vetëm zhvatje e bizneseve për një shërbim tejet bazik që do duhej të ofrohej në mënyrë elektronike”, ka deklaruar Qendrim Arifi – Avokat.
Ndërkohë, në Institutin e Kosovës për Drejtësi thonë se Këshilli Gjyqësor duhet të reflektojë e të ndryshojë këtë udhëzim administrativ.
“Ne e kemi një administratë të papërgjegjshme që po i detyron qytetarët që të drejtën e tyre ta kërkojnë përmes gjykatës dhe kjo eventualisht mund të e favorizoj një administratë të papërgjegjshme dhe jo ta fuqizojë qytetarin, taksa është diçka duhet paguar mirëpo definitivisht duhet të jetë proporcionale në të kundërtën rrezikon qasjen e qytetarëve në drejtësi”, ka theksuar Gzim Shala – Hulumtues në IKD.
Pavarësisht reagimeve që ka nxitur sidomos tek komuniteti i avokatëve, asnjë ankesë nuk ka shkuar zyrtarisht në Këshillin Gjyqësor të Kosovës.
Kështu kanë thënë për televizionin nga ky institucion, e për arsyetimin e të cilit thanë se duhet të referohemi në komunikatën e lëshuar javë më parë, në të cilën kishin thënë se ndryshimi i udhëzimi është bërë me qëllim të përshtatjes me realitetin ekonomik dhe standardet aktuale në Republikën e Kosovës.
Udhëzimi i vjetër administrativ ishte në fuqi nga viti 2017./Tv Dukagjini/
Pas arrestimit të Dugagjin Berishës, 27 vjeç, në kuadër të operacionit policor të koduar “Barriera”, detaje të reja janë zbardhur mbi mënyrën se si u dokumentua aktiviteti i tij i trafikimit të armëve.
Sipas Balkanweb, efektivët e Komisariatit nr. 4 kishin marrë informacion se Berisha do të udhëtonte drejt Tiranës dhe më pas në zonën e Freskut për të shitur pistoletat e sekuestruara më parë.
Ai është mbajtur nën vëzhgim që nga kalimi në Pikën Kufitare të Morinit, ku hyri në territorin e Shqipërisë me makinën tip “Volkswagen”.
Policia shqiptare njofton se më parë, me përdorimin e agjentëve të infiltruar, i ka blerë Berishës 2 pistoleta në Fresk, për të dokumentuar aktivitetin e tij kriminal.
Ky veprim u krye për të mbledhur prova konkrete të trafikimit të armëve dhe për të ndaluar shpërndarjen e tyre në tregun e paligjshëm.
Nga hetimet paraprake rezulton se Berisha dyshohet të ketë kryer veprime të ngjashme edhe më herët, duke treguar për një aktivitet të vazhdueshëm të trafikimit të armëve zjarri drejt zonës së Tiranës.
Materialet procedurale dhe provat e mbledhura iu referuan Prokurorisë për veprime të mëtejshme, ndërsa Policia vijon hetimet për identifikimin e të tjerëve të përfshirë në rrjetin e trafikimit të armëve.
Ky rast nënvizon fokusin e Policisë së Tiranës në parandalimin e trafikimit të armëve dhe goditjen e rrjeteve kriminale, duke përdorur metoda proaktive dhe agjentë të infiltruar për mbledhjen e provave.
Qiratë dhe kostoja më e ulët e jetesës, si dhe mundësia për të qëndruar deri në një vit pa leje qëndrimi po e bëjnë Shqipërinë destinacionin e parapëlqyer edhe për pensionistët amerikanë.
Sipas agjentëve të pasurive të patundshme, Vlora dhe Saranda janë ndër qytetet kryesore ku ata qëndrojnë me qira nga 400 deri në 500 USD në muaj.
Prej muajit tetor, Lisa Spence, 62 vjeçe, nga shteti i Alabamës në SHBA, jeton në Vlorë.
Zonja Spence tregon për “Monitor” se ka zgjedhur të jetojë për një vit në Shqipëri për shkak të kostos së ulët të jetesës dhe leverdishmërisë ekonomike, duke pasur parasysh të ardhurat e saj mujore nga pensioni me vlerë 2,200 USD.
Lisa tashmë pensioniste, tregon se ka punuar 18 vjet si administratore në një zyrë kontabiliteti të një kompanie të madhe ndërtimi. Ajo pohon se jeta në SHBA është shumë herë më e shtrenjtë krahasuar me Shqipërinë. Sipas saj, kjo është një ndër arsyet kryesore pse ka vendosur të qëndrojë për një vit në Vlorë.
Ajo jeton në një apartament me qira në zonën e Lungomares në Vlorë. Për një apartament me dy dhoma dhe ballkon me pamje panoramike, paguan 400–500 USD në muaj, ndërsa në SHBA, një pronë e ngjashme sipas saj do të kushtonte minimalisht 1,400 USD.
“Me të ardhurat që kam nga pensioni, nuk do të mbijetoja në SHBA. Cilësia e jetës këtu është shumë i mirë duke pasur parasysh, të ardhurat mujore nga pensioni. Gjithashtu njerëzit janë shumë mikpritës.
Në Shqipëri mund të shijosh momentet e vogla të jetës, si të pish një kafe, të ecësh apo të bësh shëtitje. Edhe cilësia e ushqimeve është shumë e mirë. Klima, ajri i pastër, deti, Vlora është vend ideal për të bërë një jetë të mirë. Atje të gjithë njerëzit nxitojnë. Këtu jeta është më e qetë”, shprehet ajo.
Kjo është përvoja e saj e parë e të jetuarit në një shtet jashtë SHBA-së. Zonja Spence u njoh me Shqipërinë pas disa kërkimeve që bëri mbi listën e vendeve miqësore të publikuara nga Departamenti Amerikan i Shtetit, ku përfshihet edhe Shqipëria.
“Ishte shumë e rëndësishme që, para se të vendosja se ku do të jetoja, të bëja një kërkim mbi shtetet në listën e vendeve miqësore të publikuara nga DASH, pasi për një zonjë pensioniste që jeton e vetme, siguria mbetet kryesorja”, – përfundon Spence.
Më tej, ajo nënvizon se deri tani ka qenë shumë e lehtë për të pasur shërbim ambulator mjekësor, edhe për shkak të një gjendjeje gripale që kaloi, si dhe kujdesin dentar. Ajo shton se deri tani nuk i është dashur të përdorë shërbim spitalor.
Spence e rekomandon qytetin e Vlorës edhe për shtetas të tjerë amerikanë që kërkojnë të jetojnë jashtë vendit të tyre, pas daljes në pension.
Agjentët e tregut të shitblerjes së pasurive të paluajtshme pohojnë se në qytetet bregdetare, si në Vlorë dhe Sarandë, vihet re një tendencë e rritjes të kërkesës së shtetasve të huaj pensionistë, përfshirë edhe shtetasit amerikanë për të jetuar me qira.
Sipas agjentes imobiliare Viola Shehaj-Malaj, kërkesa e pensionistëve amerikanë për të jetuar në qytetin e Vlorës në apartamente me qira ka shënuar rritje të ndjeshme në vitin 2025, tendencë që ka vijuar edhe në muajin e parë të 2026.
Në tërësi, sipas saj, afatet e qëndrimit nga shtetasit e huaj që kanë zgjedhur Vlorën për të qëndruar zgjatin nga 1 deri në 2 vite. Ndërsa pensionistët amerikanë po testojnë këtë lloj përvoje, për të vendosur më tej për afatet e qëndrimit, duke shfrytëzuar avantazhin e qëndrimit deri në një vit në Shqipëri pa vizë dhe leje qëndrimi.
Shehaj-Malaj thekson se një nga faktorët kryesorë që i tërheq është kostoja e ulët e jetesës në Shqipëri krahasuar me Shtetet e Bashkuara të Amerikës dhe veçanërisht çmimet e ulëta të qirave, klima dhe qetësia që gjejnë në qytetet bregdetare.
“Shumica e shtetasve amerikanë që po zgjedhin të qëndrojnë në Vlorë pohojnë se arsyeja kryesore mbetet kostoja e ulët e jetesës, sidomos e qirave që janë shumë herë më të lira. Nëse në Vlorë gjen një apartament të tipologjisë 1+1 me çmim 400 USD/muaj, në SHBA çmimi minimal është rreth tre herë më i lartë.
Por duhet theksuar se shumë prej pensionistëve amerikanë janë në fazën e testimit. Shumë prej tyre parapëlqejnë të qëndrojnë disa javë apo disa muaj, duke shfrytëzuar afatin e qëndrimit njëvjeçar pa vizë dhe leje qëndrimi në Shqipëri, për ta testuar këtë përvojë. Disa të tjerë zgjedhin të qëndrojnë një vit të plotë, për t’u larguar dhe për t’u kthyer sërish. Kjo periudhë i ndihmon të marrin vendimin nëse do të qëndrojnë afatgjatë”, nënvizon ajo.
Përveç shtetasve amerikanë, qyteti i Vlorës vijon të mbetet mjaft i kërkuar për qëndrim afatgjatë edhe prej pensionistëve italianë, sipas agjentes imobiliare. Sipas të dhënave të publikuara nga mediat italiane, deri në muajin mars 2025, numri i pensionistëve italianë që jetonin në Shqipëri arriti në 3,000 nga 300 pensionistë italianë në vitin 2021.
Rritja e numrit të tyre është ndikuar nga politikat fiskale të Shqipërisë për mostatimin e pensioneve të shtetasve italianë.
“Në praktikë, nëse në Itali 1,500 euro bruto kthehen në 1,150 euro neto, këtu mbeten 1,500 euro të pastra. Dhe nuk vijnë vetëm ata me të ardhura të ulëta, por ka edhe shumë pensionistë të pasur me më shumë se 50 mijë euro në vit”, pohoi më herët për “Corriere Della Sera” një pensionist italian që jetonte në Shqipëri./Monitor.al
Drejtori i përgjithshëm i Policisë së Shqipërisë, Ilir Proda, ka shprehur vlerësim të veçantë për Drejtorinë Vendore të Policisë Tiranë, për “operacionet e njëpasnjëshme, profesionale dhe të suksesshme” që tha se po zhvillon në goditjen e trafikimit të armëve të zjarrit nga Kosova drejt Shqipërisë, si dhe të veprimtarisë kriminale të shitjes dhe mbajtjes së tyre pa leje në territorin e Tiranës.
“Vlerësim dhe mirënjohje të veçantë për Drejtorinë Vendore të Policisë Tiranë, për finalizimin e operacionit të radhës, në vazhdën e operacioneve të njëpasnjëshme dhe të suksesshme të zhvilluara për goditjen e trafikimit të armëve të zjarrit nga Kosova drejt Shqipërisë, si dhe të veprimtarisë kriminale të shitjes apo mbajtjes pa leje të armëve në Tiranë”, citohet të ketë thënë ai.
Siç tha ai, operacioni “Barriera”, si dhe operacionet dhe goditjet e realizuara përgjatë vitit 2025 dhe në fillim të këtij viti, janë dëshmi e një pune të mirorganizuar, profesionale, hetimore dhe operacionale, e strukturave të DVP Tiranë.
“Gjithashtu, konfirmojnë marrëdhënie shumë të mira bashkëpunimi ndërinstitucional, veçanërisht me Prokurorinë e Tiranës dhe partnerët ligjzbatues, si dhe bashkëpunimin shumë të mirë mes Policisë së Shtetit dhe Policisë së Kosovës, në funksion të parandalimit dhe goditjes së armëmbajtjes pa leje, trafikimit të lëndëve narkotike dhe çdo paligjshmërie tjetër”, tha ai.
Drejtori i Policisë shqiptare tha se “armët e zjarrit janë mjeti kryesor për kryerjen e veprave penale dhe përbëjnë një rrezik të drejtpërdrejtë për jetën e qytetarëve dhe sigurinë publike”. Tha se “parandalimi dhe goditja e tyre mbetet një prioritet absolut i Policisë së Shtetit, në shërbim të rendit, ligjit dhe qytetarëve”.
“Sjell në vëmendjen tuaj se gjatë vitit 2026, goditja pa kompromis e armëmbajtjes pa leje, trafikimit të armëve dhe çdo forme tjetër të veprimtarisë kriminale të lidhur me to, do të jetë një nga fokuset kryesore të punës së Policisë së Shtetit në të gjitha qarqet e vendit. Ndaj ju inkurajoj që të vazhdoni punën me vendosmëri, profesionalizëm dhe përkushtim maksimal, në shërbim të ligjit dhe sigurisë së qytetarëve”.
Korporata Energjetike e Kosovës ka njoftuar sot se njësia B1 e Termocentralit “Kosova B” është shkyçur nga operimi, pas evidentimit të rrjedhjeve të konsiderueshme të avullit në sistemin e gypave brenda kaldajës. Defekti është vërejtur rreth orës 10:00, ndërsa pas vlerësimeve teknike është marrë vendimi që njësia të ndalet para orës 18:00, për të shmangur dëmtime potencialisht më të mëdha.
Sipas KEK-ut, rrjedhjet kanë shkaktuar harxhime të larta të ujit dhe pamundësi për të vazhduar operimin në mënyrë të sigurt. Ndalja e njësisë është konsideruar si masë parandaluese për ruajtjen e integritetit të pajisjeve.
Furnizimi me energji mbulohet në 87.6% nga prodhimi vendor
Pavarësisht shkyçjes së B1, KEK siguron se furnizimi me energji elektrike në vend mbetet stabil. Katër njësitë e tjera gjeneruese janë në funksion të plotë, duke realizuar prodhim ditor prej rreth 13,560 MWh. Ky nivel mbulon 87.6% të kërkesës së parashikuar nga KESCO për ditën e nesërme, e cila arrin në 15,471 MWh.
Pjesa e mbetur e energjisë sigurohet përmes blerjeve në bursën ALPEX, si dhe përmes shkëmbimit të energjisë me Korporatën Elektroenergjitike Shqiptare (KESH Sh.A.), bazuar në marrëveshjet ekzistuese të bashkëpunimit.
Rikthimi i njësisë B1 pritet pas vlerësimit teknik
KEK njofton se rikthimi në operim i njësisë B1 do të bëhet i ditur pas përfundimit të kontrollimeve të detajuara teknike.
Korporata thekson se mbetet e përkushtuar ndaj operimit të sigurt dhe menaxhimit të përgjegjshëm të kapaciteteve prodhuese, duke garantuar vazhdimësinë e furnizimit me energji elektrike për vendin.
Qyteti i Skenderajt do të përballjet me një ndërprerje të përkohshme të furnizimit me ujë të pijshëm.
Lajmi është bërë i ditur nga Kompania Rajonale Ujësjellësi “Mitrovica”.
“Për shkak të një defekti në Kllinën e Mesme, në gypin kryesor të furnizimit, ka ndërprerje të përkohshme të furnizimit me ujë të pijshëm për qytetin e Skenderajt, deri në sanimin e defektit”, thuhet në njoftimin e kësaj kompanie.
Login
