Read More...

Read More...

Në fshatin Mirakë të Librazhdit, ndihet aroma e drurit të freskët dhe trokitja ritmike e daltës.

Aty, prej më shumë se tre dekadash, qëndron zdrukthtaria e mjeshtrit Ali Shalla, një emër i njohur për të gjithë zonën, një zanatçi i përkushtuar që e ka ndërtuar jetën mbi mjeshtërinë e drurit.

I lindur në vitin 1948, në një familje punëtore në Mirakë, Ali Shalla e nisi udhën e jetës ashtu si shumë të tjerë të brezit të tij: me punë të palodhur dhe me dëshirën për të mësuar një zanat që do ta çonte përpara.

Rruga e tij profesionale filloi në ndërmarrjen e sharrave në Librazhd. Aty ai jo vetëm u njoh me teknikat e drurit, por edhe fitoi mjeshtërinë e pare. Pas disa vitesh në ndërmarrje, Ali Shalla u transferua në repartin ushtarak të Divizionit Librazhd, ku punoi përsëri si marangoz.

Ishte koha kur zanati kërkonte jo vetëm aftësi, por edhe disiplinë dhe përkushtim, cilësi që e shoqëruan Aliun gjatë gjithë karrierës së tij.

Viti 1990 solli ndryshime të mëdha në jetën e shumë njerëzve, dhe Aliu vendosi ta shfrytëzojë këtë periudhë për të nisur diçka të vetën. Ai ngriti zdrukthtarinë private në fshatin Mirakë.

Brenda pak vitesh, dyert e vogla të punishtes u bënë të njohura në të gjithë zonën, dhe Aliu u kthye në adresë të parë për këdo që kërkonte punime druri të cilësisë së lartë.

Në këtë udhëtim nuk ishte vetëm. Djali i tij, Bujari, u bë bashkëpunëtori i pandashëm, duke e kthyer zdrukthtarinë në një traditë familjare. Së bashku, ata përpunuan porosi nga fshatrat e Librazhdit e deri në zona të tjera të Shqipërisë.

Nga mobiliet e punuara me dorë, tek dyert, dritaret, çardakët dhe çdo strukturë që kërkonte mjeshtëri druri,  gjithçka mbante vulën e punës së tyre të pastër dhe të besueshme.

Ai mbetet një nga mjeshtrit e vjetër të Librazhdit, simbol i punës së ndershme të profesionit të marangozit.

Ruzhdi Keraj është një nga ata artistë që nuk e vendos dot brenda një kornize të vetme. Piktor, kompozitor, këngëtar dhe shkrimtar, ai ka ndërtuar një rrugëtim të gjatë në art, duke lënë gjurmë në shumë fusha të krijimtarisë.

“Unë nuk shkruaj si shkrimtar, nuk shkruaj si poet, nuk kompozoj si kompozitor, nuk pikturoj si piktor…”

Kjo mënyrë e të shprehurit e përkufizon më së miri Ruzhdi Kerajn: një artist shumëdimensional, për të cilin arti nuk është profesion, por domosdoshmëri.

“Vendos veten, emocionet e mia. Nuk është të fitoj simpati. Unë shprehem, shpalos veten dhe emocionet e mia”

Ruzhdiun e gjen çdo ditë në kafen e tij të preferuar, në krah të bashkëshortes së tij, Mjaftore Keraj, një mësuese e njohur në Kurbin. Të dy flasin me pasion për artin, për jetën dhe për rrugëtimin e përbashkët që nis që nga rinia.

“Ky është libri i 13-të. Jam autor i 13 librave. Nuk jam ndonjë autor i famshëm, por shkruaj për pasionin tim”

Jeta e tij artistike lidhet ngushtë me qytete dhe institucione që kanë shënuar formimin e tij.

“Në Rubik kam ndenjur 30 vjet. Në Laç erdha kur isha student. Kam marrë pjesë në shumë ansamble, kam qëndruar në krah të shumë personaliteteve. Në Laç gjeta një ambient që e njihja dhe filluam të bënim shumë aktivitete”

Teatri, ansamblet, Pallati i Kulturës, vende ku arti merrte jetë përmes bashkëpunimit dhe përkushtimit.

“Takimet për teatrin, për ansamblin… tek Pallati i Kulturës kemi bërë shumë evente. Bashkëpunimet kanë qenë shumë të mira. Drejtori i fundit i Pallatit të Kulturës kam qenë unë, derisa ika në Radio Tirana”

Një tjetër kapitull i rëndësishëm i jetës së tij profesionale ishte Radio Tirana, aty ku u përball me arkivën e pasur të muzikës shqiptare.

“Në Radio Tirana kam punuar si përgjegjës arkive. Kam sistemuar të gjitha punimet e kompozitorëve. Ka qenë një punë e bukur”

Piktura, ashtu si muzika dhe letërsia, mbetet një tjetër gjuhë e tij e shprehjes.

“Jam marrë edhe me pikturë. Ishte një mjedis i bukur, kam qëndruar krah shumë piktorëve. Unë jam piktor, por nuk quhem dot piktor. Çdo profesion kërkon shkollim, për mua është nevojë. Unë s’rri dot pa pikturuar, pa shkruar, pa u ulur te pianoja”

Dashuria për muzikën nis herët, që në fëmijëri, dhe e shoqëron gjatë gjithë jetës.

“Kam filluar të shkruaj muzikë që në fillore. Bëra Institutin e Arteve, mora pjesë në festivale, në një periudhë kur festivali nuk transmetohej në televizion. Kam marrë pjesë në koncerte të mëdha dhe kam fituar çmimin e parë me një këngë që u bë hit asokohe”

Në këtë rrugëtim, një mbështetje e fortë ka qenë gjithmonë bashkëshortja e tij.

“Po ta shikosh titullin e librit ‘Të kam në lot’, është titull intrigues. Loti është hidhërim, është gëzim, optimizëm, entuziazëm, është gjithçka. Lidhet me brendësinë e gjendjes shpirtërore të njeriut.

Për Mjaftoren, Ruzhdi Keraj mbetet i njëjtë në çdo formë arti që prek.

“Ruzhdiu është vetvetja si në këngë, në poezi, ashtu edhe në pikturë. Ai imiton botën e tij dhe shprehet. Libri nis me prezantimin e tij, pastaj me poezi që të kthejnë te vendlindja. Çdo poezi është një nën-temë më vete”, tha Mjaftore Keraj, mësuese.

Një artist që nuk i shmanget ndryshimeve, por i sheh ato me syrin kritik të krijuesit.

“Është e vështirë të ballafaqohesh me disa ndryshime. Jo se Ruzhdiu s’e pranon të renë, por shprehet kritik ndaj asaj që nuk përshtatet”, tha ajo.

I nderuar me titullin “Nderi i Kurbinit” dhe me shumë vlerësime të tjera, Ruzhdi Keraj vazhdon të krijojë, sepse për të arti nuk është zgjedhje, por mënyrë jetese.

VLORË- Një aksident është regjistruar pak momente më parë në zonën e Lungomares në Vlorë, ku një motor elektrik është përplasur me një automjet.

Si pasojë e përplasjes, drejtuesi i motorit elektrik ka mbetur i plagosur dhe është transportuar menjëherë me ambulancë drejt Spitalit Rajonal të Vlorës për ndihmë mjekësore.

Në vendngjarje kanë mbërritur shërbimet e policisë, të cilat po punojnë për zbardhjen e rrethanave të aksidentit./abcnews.al

Për malësorët, kulla ishte më shumë se një shtëpi. Ishte strehë e shpirtit, derë e hapur për mikun, betim i besës dhe simbol i qëndresës ndër breza. Në çdo gur të vendosur lexohet historia e një populli, ndërsa arkitektura e kullës mbetet një pasuri e rrallë e etnokulturës sonë.

Arrëni, fshati më i largët i Kukësit, mbetet edhe më i veçanti, aty ku kullat ngrihen si rojtarë të kujtesës.

Edhe pse koha ka lënë gjurmët e saj dhe disa prej tyre janë braktisur, kullat ende flasin. Qëndrojnë të heshtura, por madhështore, duke ruajtur hijeshinë e dikurshme dhe krenarinë e ndërtimit.

Muret e trasha prej guri, qoshet e skalitura me mjeshtëri, janë shenja dalluese që i japin kullës karakter dhe identitet. Misin Doci është një prej banorëve të Arrënit, që rrëfen historinë e dy kullave të familjes së tij, të ngritura në një kohë kur Shqipëria ishte mbretëri.

Janë ndërtuar vetëm me gurë, rërë dhe gëlqere. Me vështirësitë e mëdha të transportit, Misini tregon se gurët janë marrë nga vetë kjo zonë.

Kulla të tilla ndërtoheshin nga vetë të zotët e shtëpisë. Kullat nuk shërbenin vetëm për familjen.

Misini tregon se miqtë nuk mungonin kurrë. Çdo natë kishte derë të hapur, dhe nga këto kulla familja e tyre u rrit deri në 400 anëtarë. Sot, Misini po i rikthen jetë kullës. Djali i tij ka ardhur nga Franca, për të investuar në rijetëzimin e saj.

Edhe pse Arrëni është braktisur, për këtë banor fshati mbetet i jetueshëm. Për këtë arsye, edhe djemtë kanë zgjedhur të kthehen, për të kaluar një pjesë të vitit këtu.

Kullat u ndërtuan të larta për t’u përballur me ashpërsinë e motit, me dimra të gjatë dhe dëborë që dikur mbulonte gjithçka, deri mbi dy metra.

Sot Misini është në pension dhe prej dhjetë vitesh qëndron në Arrën gjatë verës. Merret me çdo punë, ndërsa në duar mban gurët e oxhakut.

Ai thotë se punimi i gurit kërkon durim dhe kujdes, për ta rikthyer kullën ashtu siç ka qenë dikur. Ky fshat dikur numëronte rreth 700 familje, ndërsa sot vetëm rreth 60 prej tyre vazhdojnë të jetojnë këtu.

Në brendësi të tokës së bregdetit të Jonit, larg syrit të zakonshëm të vizitorëve dhe pak i përmendur në literaturën bashkëkohore, ndodhet një qytet antik me vlera të jashtëzakonshme historike dhe arkeologjike. Bëhet fjalë për qytetin antik të vendosur në zonën e Malçanit, në bashkinë Finiq, i njohur deri më sot thjesht si “qyteti antik i Malçanit”.

Sipas arkeologut Halil Shabani, prej vitesh ekzistojnë mendime dhe hipoteza nga arkeologë dhe historianë që ky vendbanim i lashtë mund të identifikohet me qytetin antik Helikranon, i përmendur në burimet e lashtësisë.

Në literaturën antike, Helikranoni përmendet si një qytet i vendosur në tokat e brendshme, por me lidhje të drejtpërdrejta me ngjarje madhore të kohës. Një nga këto është ardhja në ndihmë e ushtrisë së Etolëve, në periudhën kur qyteti u sulmua nga mbretëresha e Taulantëve, Teuta, me komandant ushtrie Skerdilajdin. Pikërisht këto të dhëna e bëjnë Malçanin një pikë kyçe për studimin e historisë së Epirit.

Nga banorët e zonës, ky vend njihet më tepër si një kala, por sipas specialistëve, e vërteta është se kemi të bëjmë me një qytet antik të mirëfilltë, i ndërtuar pa akropol, i ngjashëm në tipologji me qytetin antik të Çukës së Ajtoit në Konispol.

Nga zbulimet arkeologjike është përcaktuar se qyteti ka lulëzuar kryesisht në shekullin e tretë para Krishtit.

Struktura urbane e qytetit tregon një organizim të avancuar për kohën, me banesa të ndërtuara në dy sisteme taracimi, çka dëshmon për shfrytëzim të zgjuar të terrenit malor.

Për banorët e Malçanit, ky vend mbetet i njohur si “kalaja në malin e Shën Ilisë”, “kalaja e mbretit” apo edhe “kalaja e mbretit Pirro të Epirit”, duke e lidhur në mënyrë simbolike me figurën e njohur historike. Sipas gojëdhënave, banorët e qytetit furnizoheshin me ujë nga një burim që ndodhej 3–4 kilometra larg, nëpërmjet një tubacioni prej qeramike një tjetër dëshmi e nivelit të lartë teknik për kohën.

Qyteti mbrohej nga një mur i fuqishëm rrethues, i ndërtuar për t’u përballur me sulme të mundshme nga armiqtë dhe pushtuesit. Në kujtesën popullore ka mbërritur edhe historia e rënies së qytetit: thuhet se ushtria pushtuese, pasi e kishte rrethuar për një kohë të gjatë, përdori një kalë të etur për ujë për të zbuluar vendin ku kalonte tubacioni i furnizimit. Me ndërprerjen e ujit, qyteti u detyrua të dorëzohej. Koha e saktë e kësaj ngjarjeje mbetet ende e panjohur.

Qyteti antik i Malçanit mbetet sot një pasuri e madhe historike dhe kulturore, ende e pazbuluar plotësisht, që pret vëmendje më të madhe shkencore dhe institucionale, për t’i dhënë vendin që meriton në hartën e trashëgimisë së lashtë të jugut të Shqipërisë./abcnews.al

Read More...

Autoritetet në Greqi arrestuan sot 313 persona në një bastisje në kampusin universitar të qytetit të dytë më të madh të vendit, Selanikut, pasi Policia e Trazirave u sulmua nga turma njerëzish që hodhën më shumë se 100 koktejë molotovë.

Policia greke tha se grupe njerëzish të veshur me kapuçë dolën sot nga kampusi i “Universitetit Aristoteli” të Selanikut në orët para të mëngjesit për të sulmuar një skuadër policie të trazirave.

Njësia zakonisht vendoset në një distancë të caktuar nga kampusi për të garantuar sigurinë – pas festave të natës që zhvillohen në ambientet e universitetit.

Sulme të tilla kundër Policisë së Trazirave pranë kampusit universitar nuk janë të rralla, por kjo është hera e parë që kaq shumë njerëz arrestohen pas një përplasjeje të tillë – gjatë së cilës u përdor një numër jashtëzakonisht i lartë bombash zjarri.

Policia e Trazirave përdori gaz lotsjellës dhe granata zhurmuese për të zmbrapsur sulmuesit.

“Një oficer u dërgua në një spital ushtarak për shkak të djegieve në fytyrë dhe këmbë, ndërsa një civil 21-vjeçar u trajtua për probleme me frymëmarrjen”, tha policia.

Universiteti tha në një deklaratë se sulmet ishin kryer nga “ekstremistë” jashtë kampusit, në bashkëpunim me disa individë brenda territorit të universitetit.

Ata thanë se një hetim ishte duke u zhvilluar – për të përcaktuar nëse ndonjë student ka marrë pjesë.

Gjithashtu, sipas deklaratës nuk ishte dhënë leje për të organizuar ndonjë festë në territorin e universitetit./abcnews.al

Distria Krasniqi vazhdon të shkëlqejë në arenën ndërkombëtare të xhudos, duke i sjellë Kosovës një tjetër sukses të madh. Xhudistja kosovare fitoi medaljen e artë në Grand Slam e Parisit në kategorinë deri në 52 kilogramë, pasi mposhti në finale spanjollen Ariane Toro Soler me Ippon për më pak se 10 sekonda.

Krasniqi e nisi garën nga raundi i dytë, ku dominoi ndaj francezes Alicia Marques, për të vazhduar me fitore të vështirë ndaj brazilianes Larissa Pimenta në çerekfinale.

Në gjysmëfinale triumfoi ndaj Amandine Buchard, ndërsa në finale vulosi suksesin e saj të nëntë në Grand Slam e Parisit, duke konfirmuar edhe një herë statusin e saj si një nga xhudistet më të mira në botë.

Kryeministri spanjoll, Pedro Sanchez, ka njoftuar masa të reja për rregullimin e platformave të rrjeteve sociale dhe forcimin e mbrojtjes së të miturve, duke theksuar se hapësirat digjitale kanë lehtësuar veprimtari kriminale, dezinformim dhe përmbajtje të dëmshme.

Në një video mesazh të shpërndarë mbrëmë vonë në platformën amerikane të rrjeteve sociale X, Sanchez tha se zhvillimet e fundit shënojnë një moment të paprecedentë për demokracinë e Spanjës.

“Këtë javë ka ndodhur diçka e paprecedentë në historinë e demokracive tona. Një oligark teknologjik ka depërtuar në telefonat e miliona qytetarëve spanjoll për t’u thënë se çfarë të mendojnë. Ky është një shembull serioz i abuzimeve të ndërhyrjes që ne po përpiqemi të luftojmë”, tha Sanchez.

Ai i përshkroi rrjetet sociale si “një lloj Perëndimi i Egër në një shtet të dështuar”, duke shtuar se aplikacione si ky ofrojnë strehë për mijëra kanale të përkushtuara ndaj aktiviteteve kriminale që përfshijnë pornografi dhe dhunë.

Sanchez gjithashtu theksoi keqpërdorimin e inteligjencës artificiale.

“Kemi parë se si inteligjenca artificiale po përdoret nga këto aplikacione për të krijuar imazhe të rreme nudo, madje edhe të të miturve, si na përgjojnë, si na vjedhin të dhënat dhe si platformat përfitojnë duke amplifikuar urrejtjen dhe dezinformimin”, tha ai.

Sipas kryeministrit spanjoll, qeveria ka nisur pesë masa “për të mbrojtur të miturit dhe për t’i dhënë fund pandëshkueshmërisë në mjediset digjitale”.

Këto përfshijnë bashkëpunimin me Prokurorinë Publike për hetimin e krimeve në rrjetet sociale, ndjekjen penale të manipulimit të algoritmeve që përdorin të dhëna personale pa pëlqim dhe ngritjen e akuzave penale ndaj kompanive që refuzojnë të heqin përmbajtje të paligjshme.

Hapa të tjerë përfshijnë krijimin e “bazës së parë të të dhënave për urrejtjen dhe polarizimin” dhe kufizimin e qasjes në platformat për personat nën moshën 16-vjeç.

“Ne e dimë se kjo elitë teknologjike ka më shumë para dhe madje më shumë pushtet se shumë shtete, por vendosmëria jonë është më e fortë se xhepat e tyre. Prandaj do të ecim përpara pavarësisht kërcënimeve të tyre”, tha Sanchez.

Qeveria e Shteteve të Bashkuara ka akuzuar Kinën se ka kryer në fshehtësi të paktën një test bërthamor që prodhoi shpërthim gjatë viteve të fundit, edhe pse Kina zyrtarisht ka moratorium për testet e tilla.

Këto akuza u bënë gjatë një fjalimi të Thomas DiNanno, nënsekretar i Shtetit për kontrollin e armëve, në një konferencë për çarmatimin në Gjenevë.

Ai tha se Kina ka përdorur teknika për të fshehur shenjat e shpërthimeve bërthamore, duke maskuar aktivitetet për të shmangur zbulimin e tyre nga monitorimi ndërkombëtar, shkruan washingtonpost.

Sipas tij, një test i tillë u krye më 22 qershor 2020. Kina është nënshkruese e Traktatit të Ndërprerjes së testeve bërthamore, por nuk e ka ratifikuar atë, ashtu si SHBA-ja.

Autoritetet kineze i hodhën poshtë këto akuza, duke thënë se SHBA po paraqet një narrativë të shtrembëruar dhe se akuzat janë të pavërteta.

Raportohet gjithashtu se Kina është duke zgjeruar arsenalin e saj bërthamor, duke ndërtuar fusha të reja me silo për raketa dhe teknologji të avancuara ushtarake.

Read More...

Zyra e Prokurorit Financiar Kombëtar Francez tha të shtunën se kishte hapur një hetim ndaj ish-ministrit të Kulturës Jack Lang dhe vajzës së tij, Caroline Lang nën dyshimin për ‘mashtrim të rënduar tatimor dhe pastrim parash’, një veprim i lidhur me të ndjerin e dënuar për abuzim seksual Jeffrey Epstein.

Po rritet presioni mbi Lang për të dhënë dorëheqjen si president i Institutit të Botës Arabe në Paris, pasi dosjet e publikuara javën e kaluar nga Departamenti i Drejtësisë i SHBA-së tregojnë se Epstein dhe Lang korrespondonin me ndërprerje midis vitit 2012 dhe vdekjes së financierit nga vetëvrasja në burg në vitin 2019.

Mediat franceze, përfshirë Le Monde, Le Figaro dhe Mediapart, thanë se hetimi paraprak ishte hapur pasi dokumentet amerikane zbuluan vite të tëra korrespondence dhe lidhjesh financiare midis Lang dhe Epstein.

Zyra konfirmoi hetimin, por nuk dha detaje të mëtejshme.

Jack Lang është thirrur të paraqitet të dielën në Ministrinë e Jashtme, e cila mbikëqyr Institutin e Botës Arabe, një institucion kulturor dhe kërkimor që promovon të kuptuarit e botës arabe.

Ish-presidenti amerikan Bill Clinton dhe bashkëshortja e tij Hillary po bëjnë thirrje që dëshmitë e tyre në Kongres mbi lidhjet me trafikantin e dënuar të seksit Jeffrey Epstein të mbahen publikisht, për të parandaluar që republikanët të politizojnë çështjen.

Të dy Klintonëve iu ishte urdhëruar të jepnin dëshmi me dyer të mbyllura para komitetit mbikëqyrës të Dhomës së Përfaqësuesve, i cili po heton lidhjet e financierit të ndjerë me figura të fuqishme dhe mënyrën se si është trajtuar informacioni rreth krimeve të tij, shkruan The Guardian, transmeton Klankosova.tv

Demokratët thonë se hetimi po përdoret për të sulmuar kundërshtarët politikë të presidentit Donald Trump- vetë një bashkëpunëtor i hershëm i Epstein i cili nuk është thirrur për të dëshmuar – në vend që të kryejë mbikëqyrje legjitime.

Republikanët e Dhomës së Përfaqësuesve kishin kërcënuar më parë me një votim për përbuzje të Gjykatës nëse çifti i fuqishëm demokrat nuk do të shfaqej për të dëshmuar, gjë të cilën ata kanë rënë dakord ta bëjnë që atëherë.

“Le t’i ndalojmë lojërat + ta bëjmë këtë në mënyrën e duhur: në një seancë dëgjimore publike”, tha ish-presidenti demokrat në emisionin X.

Hillary Clinton, ish-sekretarja e shtetit, tha se çifti i kishte thënë tashmë komitetit mbikëqyrës të udhëhequr nga republikanët “atë që dimë”.

“Nëse e doni këtë luftë… le ta bëjmë publikisht”, tha ajo të enjten.

Ish-presidenti ka pranuar se ka fluturuar me aeroplanin e Epstein në fillim të viteve 2000 për punë humanitare të lidhur me Fondacionin Clinton, por tha se nuk e ka vizituar kurrë ishullin privat të Epstein.

Hillary Clinton, e cila kandidoi kundër Trump për presidente në vitin 2016, tha se nuk kishte pasur ndërveprime kuptimplote me Epstein, nuk fluturoi kurrë me aeroplanin e tij dhe nuk e vizitoi kurrë ishullin e tij.

Koreja e Jugut ka konfirmuar rastin e tetë të murtajës afrikane të derrave (ASF) në vitin 2026, duke nxitur autoritetet të asgjësojnë derrat e prekur, transmeton Anadolu.

Siç raporton Yonhap News, duke cituar Shtabin Qendror për Menaxhimin e Fatkeqësive dhe Sigurinë, rasti më i fundit u zbulua në një fermë derrash në zonën Pocheon, në veri të kryeqytetit Seul, ku rriten rreth 8.800 derra.

Shtabi Qendror për Menaxhimin e Fatkeqësive dhe Sigurinë tha se për të parandaluar përhapjen e virusit, autoritetet planifikojnë asgjësimin e derrave të prekur, megjithatë nuk ka plane për vendosjen e një urdhri ndalimi të përkohshëm për të gjitha fermat e derrave.

Koreja e Jugut konfirmoi rastin e parë të ASF-së në fillim të vitit 2026 në Gangneung, ndërsa raste të tjera u raportuan në Anseong dhe Pocheon, të dyja në provincën Gyeonggi.

Murtaja afrikane e derrave është e padëmshme për njerëzit, por shumë ngjitëse dhe vdekjeprurëse për derrat.

TIRANË- Një 48-vjeçar është arrestuar në flagrancë nga Policia e Tiranës, pasi u kap duke mbajtur pa leje armë zjarri në banesën e tij, në fshatin Pezë Helmes.

Gjatë kontrollit të ushtruar në banesë, policia gjeti dhe sekuestroi një armë zjarri kallashnikov, tre krehra dhe municion luftarak, të cilat u morën në cilësinë e provës materiale.

Policia dhe grupi hetimor po punojnë për zbardhjen e rrethanave./abcnews.al

Read More...

FIER- Policia e Fierit ka arrestuar një 63 vjeçar, banues në Fier, pasi Gjykata e Apelit e Juridiksionit të Përgjithshëm ka vendosur që të kryejë në Shqipëri, pjesë e mbetur nga dënimi 8 vjet e 8 muaj burgim, që i ka caktuar Gjykata e Milanos, për veprat penale “Pjesëmarrja në organizatë kriminale” dhe “Trafikimi i lëndëve narkotike”.

Sipas policisë, i arrestuari është Alban Dauti./abcnews.al