Zjarri që përfshiu tregun e rrobave të përdorura në zonën e 5 Majit në Tiranë është vënë nën kontroll pas rreth katër orësh ndërhyrje intensive nga shërbimi zjarrfikës. Sipas informacioneve paraprake, dyshohet se shkëndija elektrike ka qenë shkaku kryesor i rënies së zjarrit.

Siç raportoi gazetarja Xhensila Kodra, në operacion u angazhuan rreth 40 forca zjarrfikëse, ndërsa vatra kryesore është izoluar. Flakët u përhapën në rreth 50 dyqane të disa kapanoneve, duke shkaktuar dëme të mëdha materiale.

Aktualisht situata paraqitet më e qetë, ndërsa për arsye sigurie është bërë edhe shkëputja e energjisë elektrike në zonë. Autoritetet konfirmojnë se nuk ka persona të lënduar apo të asfiksuar nga tymi.

Forcat zjarrfikëse vijojnë monitorimin në terren për të shmangur riaktivizimin e flakëve, ndërsa shkaqet përfundimtare të zjarrit do të përcaktohen pas ekspertizës zyrtare.

The post Zjarri te “5 maji”, flakët vihen në kontroll pas 4 orësh/ Izolohet vatra, shpërhapja përfshiu 50 dyqane appeared first on Albeu.com.

Këngëtarja Fjolla Morina ka reaguar për herë të parë publikisht pas largimit të saj të papritur dhe shumë të komentuar nga shtëpia e Big Brother VIP Kosova 4.

Fjolla dha dorëheqjen nga spektakli të hënën, duke vendosur të largohet për shkak të presionit të madh psikologjik që, sipas saj, kishte ndjerë në raport me disa prej banorëve brenda shtëpisë.

Pas zhurmës së madhe të krijuar në publik dhe në rrjetet sociale gjatë ditëve të fundit, këngëtarja ka zgjedhur të thyejë heshtjen me një reagim të veçantë në InstaStory.

Ajo publikoi një fotografi të pazakontë dhe ironike, ku shfaqet në tualetin e meshkujve, duke improvizuar sikur po urinonte, një imazh që u interpretua nga ndjekësit si një mesazh i drejtpërdrejtë dhe provokues ndaj situatave që kishte kaluar.

Në mbishkrimin e fotografisë, Fjolla Morina shkroi shkurt, por me domethënie: “Ju dua ata që më mbështetën… Faleminderit”.

The post FOTO/ Pas largimit të bujshëm nga BBVK, Fjolla Morina reagon me një fotografi IRONIKE appeared first on Albeu.com.

Kryetari i partisë “Lëvizja Bashkë”, Arlind Qori, i ftuar në emisionin “Të Paekspozuarit” në MCN TV iu përgjigj ftesës së kryetarit të PD-së Sali Berisha për t’u bërë pjesë e një koalicioni të madh të opozitës, duke theksuar se me krerët e PS dhe PD-së dhe me oligarkët nuk i ka bashkuar dhe as do t’i bashkojë asgjë dhe se koalicioni i vetëm është me qytetarët.

“Shoqëria shqiptare nuk ka pëfituar asgjë nga politika e pandershme dhe as nga politika e kompromiseve të pamoralshne. Mendoj se ato kanë qenë dhe do të jenë të dëmshme, fshehin interesat meskine të drejtuesve të partive për të bërë plaçkë.

Ideja e qeverisë teknike, është ftesë për pazar.

Mendoj se në të gjithë ftesat e Berishës, ftesën për “Lëvizjen Bashkë” e ka paraditur se do ta refuzonim, bëhet fjalë për parti fund e kryer të korruptuar, parti ku drejtuesit janë objekte të hetimeve dhe parti sevile të oligarkisë.

Ajo që më bën çudi, është që të ndikuar nga pozicioni i “Lëvizja Bashkë”, edhe parti që kanë dalë ose nga partia e Berishës ose nga çadra e Bashës, kanë refuzuar Berishën.

Berisha dhe disa parti të vogla janë në koalicion për Bashkinë e Tiranës, mbështetëse të Florian Binaj, de facto kandidat i Berishës.

Ne me Berishën, Ramën, oligarkinë ekonomike nuk ka bashkuar asgjë dhe nuk do të na bashkojë ndonjëherë.

Po organizohemi për protesta të reja përpara Kuvendit të Shqipërisë, që kërkojnë shkarkimin dhe heqjen e imunitetit të Ballukut dhe shkarkimin e Ramës.

Mendoj se na duhet bashkimi i qytetarëve të ndershëm, përmes një alternative që reflekton të kundërtën e asaj me të cilën jemi mësuar, pazaret.

Unë sa herë kam mundësi do t’i bëjë thirrje qytetarëve t’i bashkohen aksionit tonë protestues ndaj një qeverie të korruptuar dhe të diskretituar. Kryeministri de facto është Balluku, sepse Rama ka marrë rrugët e Evropës.

Në kohën e krizës më të madhe, Balluku po drejton vendin”- tha Qori.

The post “Ideja e qeverisë teknike është ftesë për pazar”, Arlind Qori i përgjigjet ftesës së Berishës appeared first on Albeu.com.

Partia Demokratike e Kosovës (PDK) ka kërkuar zyrtarisht shfuqizimin e rreth 20 mijë votave të dërguara në vend përmes postës nga diaspora për zgjedhjet e parakohshme parlamentare të 28 dhjetorit, duke u thirrur në shkelje ligjore.

PDK e cila doli e dyta në zgjedhje parashtroi ankesë në Panelit Zgjedhor për Ankesa dhe Parashtresa (PZAP).

Ajo tha se mbi 20.000 fletëvotime ishin dërguar me postë nga jashtë vendit me vonesë, pas afatit të lejuar ligjor.

Ditë më parë, zëdhënësi i Komisionit Qendror të Zgjedhjeve (KQZ), Valmir Elezi, tregoi për Radion Evropa e Lirë se komisioni i cili mbikëqyr procesin zgjedhor në vend i kishte pranuar rreth 20.000 fletëvotime të dërguara me postë nga diaspora në fillim të janarit.

“Janë rreth 20 mijë pako me fletëvotime të tërhequra më 2 dhe 5 janar që pritet të numërohen së shpejti”, tha Elezi më 5 janar.

Sipas Ligjit të Kosovës për Zgjedhjet, fletëvotimet e dërguara me postë nga jashtë vendit mund të pranohen nga KQZ-ja më së largu një ditë pas zgjedhjeve.

Neni 96 thotë se “vota përmes votimit jashtë Kosovës, e dërguar me postë në kutinë postare të KQZ-së në Kosovë, pranohet nga KQZ-ja deri të nesërmen e ditës së zgjedhjeve në orën 16:00, me kusht që të ketë vulën e dërgimit para ditës së zgjedhjeve”.

Anëtari i PDK-së në KQZ, Ilir Gashi, shkroi të enjten në Facebook se propozimi për pranimin e fletëvotimeve pas afatit u miratua në KQZ “me vetëdije se po bëhej shkelje ligjore, edhe pse kjo u arsyetua me qëllimin që të mos keqkuptohej se jemi kundër mërgatës”.

“Prandaj, organet kompetente duhet të vendosin në mënyrë meritore lidhur me vendimin e KQZ-së për pranimin e fletëvotimeve jashtë afatit ligjor”, shkroi Gashi.

Por, Alban Krasniqi anëtari i Lëvizjes Vetëvendosje në KQZ, e cila i fitoi bindshëm zgjedhjet përfshirë edhe votat me postë e akuzoi PDK-në për ankesë të “turpshme” kundër diasporës.

“Vetë e votuan në KQZ procedurën dhe afatet, e tash kur mërgata u vetorganizua dhe arriti të sjellë fletëvotimet nga gjithandej globit, këtyre u djeg ky fakt duke harruar që humbjen nuk e kanë nga mërgata, e as nga votuesit në Kosovë, por nga sjellja, veprimet dhe vendimet e dëmshme të vet PDK-së”, shkroi Krasniqi në Facebook të enjten.

Rreth 51.000 qytetarë të Kosovës në mërgatë ishin regjistruar për të votuar përmes postës në këto zgjedhje.

Kur janë numëruar rreth 80 për qind të votave me postë, Vetëvendosje e kryeministrit Albin Kurti i ka fituar 30.671 vota, ndërsa PDK-ja vetëm 4.335 vota.

Para fillimit të numërimit të votave me postë, PDK-ja ishte në rrugë për t’i fituar 23 ulëse në Kuvendin e Kosovës, por tani ajo ka humbur një ulëse.

Vetëvendosje, ndërkohë, ka fituar 57 ulëse dhe Kurti pritet ta themelojë qeverinë e re të vendit sapo të verifikohen rezultatet e zgjedhjeve.

KQZ-ja njoftoi të enjten vonë se është buzë përfundimit të numërimit të votave me postë, të fundit, para shpalljes së rezultateve përfundimtare dhe verifikimit të tyre.

“Ka filluar numërimi i pjesës së fundit fletëvotime, mbi 3 mijë, që gjatë ditës janë sjellur në Kosovë”, tha KQZ-ja në Facebook./REL

The post Zgjedhjet e 28 dhjetorit në Kosovë, PDK kërkon shpalljen të pavlefshme të 20 mijë votave nga diaspora appeared first on Albeu.com.

Duke folur në ‘Çim Peka LIVE’ Arben Ahmetaj ka treguar se do të vijë në Shqipëri ditën kur Edi Rama nuk do të jetë më kryeministër dhe nuk do të ketë më drejtësinë në dorë.

Gjatë bisedës, Ahmetaj ka treguar se, ka parë SMS të miqve të tij, që tani janë ish-miq, që i shkruani Edi Ramës, se pse e bëre Ahmetajn zv/kryeministër, kur ti na premtove që do e shkrije.

Çim Peka: Kjo është pyetja në raport me çështjen tuaj.

Arben Ahmetaj: Cila është?

Çim Peka: Çfarë, në çfarë rrethanash Arben Ahmetaj do pranonte të kthehej në Shqipëri dhe të përballej me drejtësinë? Në çfarë kushtesh?

Arben Ahmetaj: Kur drejtësia të çlirohet nga kthetrat e kreut të organizatës. Kur drejtësia të kishte një lloj, në kuptim të respektit të figurës, këtë e them si dhe burri i burrit, po dhe burri i zonjave, një Altin Duman tjetër, jo në kuptimin fizik, në kuptimin e mentalitetit. Ore nuk është kamxhiku, nuk është dhuna. Nuk është dhuna, është humbur në atë vend mundësia që drejtësia të ketë fytyrë humane. Po more kur të jetë e çliruar nga kjo, do vija dhe do përballesha me drejtësinë, dhe me atë, me kreun e organizatës, që ka punuar për të më zeruar gjithë jetën time dhe për të më çuar në burg.

Çim Peka: Ditën që Edi Rama nuk është kryeministër dhe drejtësia nuk punon për statistikë, por bën hetim për të kuptuar korrupsionin, ju jeni të gatshëm të vini në Shqipëri dhe të…

Arben Ahmetaj: Po sigurisht. Po unë i di të vërtetat. Unë jua thashë edhe intervistën, unë kam parë SMS të kreut të organizatës, kur dikush i thotë, po ti na premtove që do ta shkrije, pse e bëre zëvendëskryeministër? E kam të ndarë unë me një nga ish-kolegët e mi këtë gjë.

Çim Peka: Po.

Arben Ahmetaj: Dhe, dhe, dhe, do t’i kthehem një moment këtij ish-kolegut se, se kam një falje për t’i kërkuar. Thotë, Dardha e ka bishtin mbrapa dhe pastaj filloi intriga dhe vjen, se ju referove te dubël standardit, në njërën anë thotë, po të isha unë prokuror dhe gjyqtar…

Çim Peka: Do zgjatem dhe pak këtu sepse kjo është interesante. Një ish-kolegu juaj ka SMS me kryeministrin kur i thotë…

Arben Ahmetaj: Jo, jo ish-kolegu im. Një person i tretë

Çim Peka: Ka SMS me kryeministrin, i shkruan pse e bëre zëvendëskryeministër?

Arben Ahmetaj: Një nga këta që del tek lotet, T V V K K B B L L? Po. Po.

Çim Peka: I shkruan kryeministrit pse e bëre zëvendëskryeministër?

Arben Ahmetaj: Ti na the që do ta shkrije, pse e bëre…

Çim Peka: Dhe përgjigja e kryeministrit?

Arben Ahmetaj: Dardha e ka bishtin mbrapa. Po nuk ka rëndësi më.

Çim Peka: Jo, një ka, ka rëndësi. Ju bëre kryeministër për t’ju bërë shembull, për t’ju bërë këtë që ju bëri, zëvendëskryeministër për t’ju bërë këtë që ju bëri?

Arben Ahmetaj: Edhe një herë më fal. 100%. Tashi do përmend ish-kolegun. Unë haja drekë në zyrë, që ta dish, në tryezë të punës haja drekë. E dinë të gjithë ata që kanë punuar me mua. Edhe më vjen, i kërkoj ndjesë mikut tim me Ditmirin Bushatin, kam një histori të gjatë, në fakt, edhe prezentimin e parë në Partinë Socialiste, praktikisht e kemi gati rrugëtim të përbashkët. Mendoj që i kam bërë mirë Partisë Socialiste, po siç i erdhën punët Ditmirit që dhe ai kaloi në genocid, ndoshta i kam bërë keq, e kam prezantuar jo me Partinë Socialiste, po me Edi Ramën. Dhe më thotë, është gjallë Ditmiri, nuk e di ku është tashmë. Thotë, epo, u bëre zv/kryeministër u forcove. I thashë, ore djalë, unë e di çfarë po ndodh me mua.

Unë jam në lojë shtesë, po unë këtu nuk jam për kreun e organizatës. Unë u bëra, hyra nga e para sërish në qeveri për qytetarët që ishin në rrugë. Unë e di çfarë rruge kam. Unë e di çfarë po ndodh. Dhe ma ka kujtuar në Shqipëri kur ika nga zëvendëskryeministër. Dhe e dyta i kërkoj të falur. Unë dy të falura kam përpara shqiptarëve, kam shumë, në raport me gjithë gjënë. Kemi bërë një diskutim me Ditmir Bushatin në 2019-ën dhe kam rënë dakord pjesërisht me Ditmirin. E para ishte që ky është i padenjë të drejtojë shtetin. Këtu bie dakord. Dhe kur më tha, po pse u ktheve? I thashë, u ktheva për njerëzit në rrugë, nuk u ktheva për atë. Më ka ardhur në zyrë, në zyrën time të vogël aty, ministër Shteti, e ka thënë, të lutem, bëje se po falimentojmë, merru edhe me pandeminë. Po, le t’i mohojë sa të dojë.

Çim Peka: Kush të ka ardhur në zyrë? Rama?

Arben Ahmetaj: Kreu i organizatës.

Çim Peka: Tek zyra jote e vogël?

Arben Ahmetaj: Te zyra e vogël. Dhe i kërkoj të falur Ditmirin se më tha, ky ja ka dorëzuar shtetin krimit të organizuar. Kam qenë naiv unë. A kam pranuar? Kjo është falja tjetër që i kërkoj shqiptarëve. Sigurisht. Por, ndër vite pastaj, 20, 21, 22, 23, 24, 25, nuk është se i ka dorëzuar shtetin krimit të organizuar. Ky e ka kthyer shtetin privat në dorë të karteleve.

Zoti Peka, paraja, paraja e drogës ka larguar klasën, e ka masakruar klasën e mesme në Shqipëri. Kur ju thoni s’ka njerëz, paraja e drogës është nëna e të gjithë të këqijave në atë vend. Që nga deformimi i ekonomisë, që nga deformimi social, që nga deformimi kulturor, që nga deformimi politik, ë, që nga emigracioni. A e di, ka ardhur koha aty që të dëgjosh, është jashtë mode që të mos të kesh ndonjë në krah, ndonjë kartel droge ose mos të merresh me drogë, për ta ndisur vendin, sepse kjo, kjo është Shqipëria e gjithë neve? Jo mo, nuk është kjo Shqipëria ime. Kjo Shqipëri i përket Edi Ramës. Shqipëria e frikës, Shqipëria kartel droge, është Shqipëria e Edi Ramës.

Çim Peka: E qartë. Domethënë, në këtë pjesë të parë, në raport me statusin tuaj juridik, edhe fizik, kuptuam. Ju duhet të ishit sipas Dumanit në burg, ndërkohë që prej tre vitesh akoma, prej tre vitesh, prej tre vitesh, ndërkohë që akoma nuk ka dosja s’ka vajtur në gjykatë. Keni vazhduar të denonconi, njëkohësisht kanë vazhduar t’ju kërcënojnë dhe sot po flisni për katër depozita të Edi Ramës. Bashkia e Tiranës, Ministria e Infrastrukturës, AKSHI dhe Shëndetësia. Shikoj që keni sërish dosje plot në tavolinë. Shqiptarët nuk janë të interesuar për fatin e individit, edhe kur ai ndoshta po sulmohet pa të drejtë. Shqiptarët janë të interesuar të dinë sa më shumë për ata çfarë, për ata që i drejton.

The post Ahmetaj: Ditën kur Rama të mos jetë kryeministër, do kthehem. E ka lënë vendin në dorë të karteleve appeared first on Albeu.com.

Prej dy ditësh, “Flori Official” është bërë pjesë e shtëpisë së Big Brother VIP Albania, i prezantuar nga produksioni si një personazh i njohur i rrjeteve sociale.

Hyrja e tij në format u realizua në mënyrë të veçantë, e ndërtuar si një nga reklamat e tij të shitjeve online, duke tërhequr menjëherë vëmendjen e publikut dhe banorëve.

Megjithatë, ajo që nuk u përmend në asnjë moment ishte emri dhe mbiemri i tij i vërtetë. Publikut iu servir vetëm nofka “Flori Official”, me të cilën ai njihet në internet, pa asnjë sqarim tjetër mbi identitetin personal.

Sipas raportimeve, emri i vërtetë i tij është Florian Prini, një person i cili rezulton i skeduar nga autoritetet italiane në lidhje me një çështje të rëndë penale.

Mediat në Itali kanë raportuar që në shkurt të vitit 2015 për goditjen e një rrjeti prostitucioni, ku Prini përmendej si një nga personat përgjegjës.

Hetimet kishin nisur më 16 qershor 2014, pas një përleshjeje të dhunshme mes prostitutave, e cila përfundoi me plagosjen me thikë të një gruaje të re.

Gjatë muajve në vijim, policia italiane rindërtoi skemën e funksionimit të rrjetit, duke zbuluar përplasjet mes prostitutave “të pavarura” dhe atyre që menaxhoheshin nga një çift shqiptar.

Karabinierët arrestuan Florian Prinin dhe partneren e tij, Fabiana Hoxhën. Prini ishte rezident i ligjshëm në Itali, ndërsa Hoxha rezultonte e regjistruar si emigrante.

Vendbanimi i tyre në Torre Pedrera ishte identifikuar prej kohësh si një qendër logjistike për aktivitetin e prostitucionit.

Aktualisht, mbetet e paqartë nëse produksioni i Big Brother VIP ka zgjedhur që të mos bëjë publik identitetin e vërtetë të “Flori Official” për shkak të kësaj të shkuare, apo nëse vetë banori ka preferuar të mos e deklarojë historinë e tij personale.

The post E shkuara e errët e “Flori Official”/ Detaje të panjohura për banorin e ri të Big Brother VIP appeared first on Albeu.com.

Arben Ahmetaj gjatë intervistës ekskluzive në ‘Çim Peka LIVE’ në SYRI TV, ka treguar se, është kërcënuar me jetë me një mesazh nga një numër venezuelian.

Sipas tij, kërcënimi është bërë në muajin tetor, kur në Shqipëri SPAK akuzoi për herë të parë në mënyrë zyrtare Belinda Ballukun.

Çim Peka: Vetëm se një gjë zoti Ahmetaj, meqë unë jam personi që ju kam intervistuar, i vetmi, për këto intervistat, kemi biseduar bashkë gjatë, po bëhen tre vjet. Më bën përshtypje, duke e njohur mirë Ramën, për një gjë biem dakord, që ai funksionon me struktura mafioze, që fillimisht tenton të të blejë. Kur nuk ja del dhe je rrezik për të, tenton dhe eliminimin. Deri këtu biem dakord. Po si ka mundësi që ju jeni kërcënuar sistematikisht edhe me jetë, tek e fundit edhe me rrëmbim tuaj. Keni folur dhe për disa se mos kërcënuar, besoj do i thoni, do jepni prova sot. Si ka mundësi që ky njeri nuk ka tentuar t’ju blejë kur ju keni treguar se po vazhdoni të flisni dhe në fakt i keni bërë dëm të madh, jo dëm të vogël.

Arben Ahmetaj: Përpara se të vij tek përgjigja e pyetjes tuaj të fundit …

Çim Peka: Sepse ne biem dakord që Rama tenton të blejë. Pse s’e, pse s’e paska tentuar me ju?

Arben Ahmetaj: Urdhëro! Një nga tre mesazhet, në tetor. Të lutem a po e ndjekni?

Çim Peka: Po.

Arben Ahmetaj: Po. Një nga tre mesazhet.

Çim Peka: Çfarë numri është ai?

Arben Ahmetaj: Ky është numër, kam përshtypjen o nga Mainmari, o Venezuela. Pra, o nga Burma e dikurshme ose nga Venezuela.

Çim Peka: Dhe çfarë kishte ndodhur në tetor në Shqipëri në atë kohë kur ju jeni kërcënuar? Mund ta lidhim me ndonjë ngjarje?

Arben Ahmetaj: Unë, unë nuk besoj që është aspak koincidencë. Për informacionin tuaj zoti Peka…

Çim Peka: Dhe çfarë thotë mesazhi?

Arben Ahmetaj: Kërcënim me vdekje. Praktikisht këto mesazhe sot, të treja, janë me autoritetet jo vetëm zviceriane. Jo vetëm zviceriane. Praktikisht, informacioni akoma informal, më vjen që nuk janë numra të thjeshtë. Janë numra me një ndryshim VPN-je shumë të shpejtë, gjë që më çon në logjikën që nuk janë për t’u marrë me shaka. Po është koincidencë që ka të bëjë me ngjarjet e tetorit në Shqipëri? Nuk e di. Po fakti është që ky është një kërcënim i ri dhe në Shqipëri vazhdon genocidi.

Çim Peka: Në tetor në Shqipëri ka pasur një ngjarje. Ka pasur fillimi i hetimeve ose akuza për Belinda Ballukun.

Arben Ahmetaj: Unë lutem që të mos, lutem që të jetë koincidencë. Lutem që të jetë, të jetë koincidencë sepse në qoftë se s’do ishte koincidencë, besoj që një pusetë e re do hapet në raport me të gjithë njerëzit e përfshirë që kërcënojnë mua dhe familjen time. Po të them një gjë zoti Peka, se ë, sigurisht që unë jam futur në një psikozë, bindje që në pikën që unë jam, në padrejtësinë që më është bërë, për mua, e drejta ka shumë vlerë. Madje, jeta ime s’ka vlerë as sa gjysma e të vërtetës më, në raport me daljen e të vërtetës dhe në raport me sigurinë e familjes time. Në këtë psikozë jam. Dhe po ta them ty dhe po ja them dhe shqiptarëve.

Çim Peka: Siguria e familjes tuaj është të mos flisni, jo të flisni.

Arben Ahmetaj: Më falni! Tani, më fal, një sekond, ta mbaroj.

Çim Peka: Ose të flisni.

Arben Ahmetaj: Të lutem, ta mbaroj. Jo, unë, unë nuk pushoj, nuk pushoj së luftuari. Kush më njeh mirë, le të pyesi kreu i organizatës dy-tre bashkëpunëtorë që i jep edhe kulla, edhe i ka shpëtuar dhe nga SPAK-u, që e dinë mirë natyrën time në veprim, për shkak të incidenteve ndaj nesh. E dinë shumë mirë reagimin tim. Unë nuk jam njeri i thjeshtë në atë raport. Unë s’jam trim, s’jam ndonjë i fortë. Por unë nuk ndaloj. Nuk ndaloj. Dhe po jua them shqiptarëve, edhe për ata që më besojnë dhe për ata që s’më besojnë, një burrë ka dy vdekje.

Dy vdekje ka një burrë. Një moment kur i merr frymën e fundit Perëndia, dhe një moment tjetër kur në mënyrë të padrejtë dhe të dhunshme, siç ka bërë kreu i organizatës dhe Altin Dumani, marrin dinjitetin e një burri. Këto janë dy vdekje. Njerëz, s’kam çfarë i bëj, si ka bërë asnjë. Tjetrës, siguria e familjes time të mos flasë. Mjerë kush i afrohet familjes time, ta kërcënojë. Mjerë kush i afrohet. Unë këtë gjë tani nuk e bëj më vetëm për veten time. Bëj dhe për vendin.

Unë një gjë nuk ia fal vetes. Një gjë nuk ia fal vetes. Unë kam në historinë time shumë modeste, shumë modeste, veprime që kanë qenë përtej vetes time. Greva e urisë e 91-shit, ka qenë për mua apo ka qenë për vendin? Mbyllja e skemave piramidale me ndjesë pastë Fatos Nanon edhe Arben Malajn, unë dhe Farudin Arabin. Kam qenë 27 vjeç unë kur kam hyrë te VEFA-ja, sepse Prodi dhe Fondi Monetar tha, nuk i japim Shqipërisë asnjë cent në qoftë se nuk mbyllen skemat piramidale. Pyeteni Arben Rakipin, ka qenë në prezencë me mua, me Fatos Nanon, me Gim Tiranën dhe me drejtorin e atëhershëm të policisë. Po, ja ne të katërt i kemi mbyllur. E kam bërë për vete?

Po grevën e urisë të Partisë Socialiste e kam bërë për vete? Jo. Unë këtë gjë e bëj për familjen time, e bëj për tre vajzat e mia, dhe për vendin. Nuk e fal unë që të gjithë përpjekjet e mia, të gjithë përpjekjet e mia, me gabimet e mia, sigurisht, ta shoh Shqipërinë unë në duart e krimit të organizuar dhe karteleve të drogës. Nuk është kjo as Shqipëria e askujt. Kjo është vetëm Shqipëria e kreut të organizatës dhe 15 oligarkëve. Kaq është. Kjo është Shqipëria e… sot Shqipëria në duart e karteleve të drogës dhe krimit të organizuar dhe të korrupsionit, nuk është në dorë të shqiptarëve. Është në dorë të krimit të organizuar dhe kjo është Shqipëria që do Edi Rama, nuk është kjo Shqipëria që duam.

Çim Peka: Kjo që thoni ju është krejt e vërtetë, por të gjitha këto nuk ndodhen pas 2021 kur Edi Rama ju shpalli në kërkim. Meqenëse nuk e bëni vetëm për vete dhe për familjen, po e bëni edhe për vendin.

Arben Ahmetaj: Pyetja juaj më duket me shumë sens në ë, qerthullin e gjithë hedhjes baltë mbi atë që tentoj të bëj unë. Kjo që, pyetja juaj ë, e ka marrë përgjigjen disa herë. Unë kam këtu dosjet, edhe letra. Unë e kam luftuar aq sa ç’kam mundur marrjen e Shqipërisë në një republikë narko-ë, trafikante, që nga 2014-a, që nga 2015-a. Shikoni çfarë ka ndodhur me AKSH-in. Imagjinoni sikur unë të kisha rënë dakord që të kishim lënë projektin e TVSH-së, të tatimit të vlerës së shtuar, në dorë të privateve që nuk e dimë se kush do ishin, por siç tregojnë faktet, një pjesë e tyre të lidhur drejtpërsëdrejti me krimin. Gjithë të dhënat e tatimpaguesve, siç janë të dhënat personale.

E dini zoti Peka çfarë pasurie kanë njerëzit në Shqipëri, përveç shtëpisë e, nuk po i hyj. Janë të dhënat. Shqipëria çfarë ka? Ka ar, ka uranium? Janë të dhënat personale. Të dhënat personale dorëzohen në dorë të krimit të organizuar. Kupola e policisë është e përfshirë, kupola e policisë, nuk po flas për policinë e thjeshtë. Është e përfshirë. Po mo, a janë futur duart në TIMS? Po mo, a një nga tenderat më të sigurisë kibernetike, është një kompani e akuzuar për organizatë kriminale, person. Po, a janë përdorur këto të dhëna personale gjatë zgjedhjeve? Po. Janë përdorur.

The post Ahmetaj tregon mesazhin: Kur SPAK akuzoi Ballukun, kam marrë kërcënime me vdekje nga Venezuela appeared first on Albeu.com.

Qyteti i Durrësit prej disa ditësh është shndërruar në një Venecia për shkak të motit të keq, përmbytjeve dhe pasojës që kanë sjellë investimet e këqija, me një hidrovor që kushtoi 19 milionë euro, por që nuk kryen funksionin për të parandaluar katastrofën që ka pllakosur në qytetin bregdetar.

Ndërsa Prokuroria ka nisur hetimet për këtë rast, ku mes të dyshuarve është edhe biznesmeni Petrit Kovaçi, babai i Spartak Kovaçit, ish-drejtor i Përgjithshëm i Ujësjellës-Kanalizimeve në Durrës, qindra qytetarë dolën në rrugë dhe para Bashkisë në protestë, duke akuzuar zyrtarët vendorë dhe qendrorë si shkaktarë të përmbytjes.

Mes tyre ishte edhe një qytetare e moshuar, e cila mbajti fjalim me megafon dhe denoncoi abuzimet me fondet e mirëmbajtjes në Durrës, ku edhe pse harxhohen miliona euro, hidrovoret dhe kanalizimet nuk funksionojnë, duke përmbytur banesat e tyre.

Ajo tha se qytetartë janë në ujë, kurse zyrtarët nëpër kolltuqe, teksa shtoi se Zoti do dënonte si kryebashkiaken Sako, ashtu edhe ish-drejtorin Kovaçi, babai i të cilit mori tenderin e kolektorit që sot nuk funksionon.

“I bashkohemi popullit tonë durrsak. Njerëzit po vuajnë, janë në mes të ujit. Këta janë në mes të kolltuqeve. Po i vjedh Emirjana Sako, Emirjana Sakon ka për ta dënuar Zoti, Spartak Kovaçin ka për ta dënuar Zoti! Jemi një popull këtu që mbështetemi të gjithë me mish e me shpirt. I bëj një thirrje rinisë të vijë këtu, që rrinë në lokale, të kenë turp. Kam ardhur këtu nga halli, për moshën që kam. Kam dalë nga shtëpia për ju. Rinia të vijë këtu, mos të rrijë në kafe, të na bashkohet”, tha ajo mes të tjerash para protestuesve që e brohoritën dhe duartrokitën.

Turma e qytetarëve përshkoi sot (8 janar) rrugët e qytetit në shenjë proteste, me thirje e pankarta kundër qeverisë, teksa solli në vëmendje skandalet e korrupsionit të ministres së linjës, Belinda Balluku.

Organi i akuzës ka dyshime se situata të jetë shkaktuar për shkak të mosfunksionimit të hidrovorit që ka kushtuar 19 milionë euro. Tenderi për hidrovorin u fitua nga bashkimi i kompanive 2T, Adriatik dhe Vëllezërit Hysa.

Kompania Adriatik zotërohet në masën 50% nga Petrit Kovaçi, babai i Spartak Kovaçit, ish-drejtor i Përgjithshëm i Ujësjellës-Kanalizimeve në Durrës.

Prokuroria e Durrësit nisi hetimet për përmbytjet, mes tyre edhe biznesmeni Petrit Kovaçi

Prokuroria e Durrësit ka nisur hetimet për përmbytjet që kanë prekur disa zona të qytetit dhe vdekjes së një personi, punonjës i Ndërmarrjes Komunale.

Organi i akuzës bën me dije se ka nisur hetimet për tre vepra penale, shpërdorim detyre, shkatërrimi i pronës me përmbytje dhe shkatërrimi i pronës nga pakujdesia.

“Me qëllim thellimin në shkaqet që kanë çuar në shkaktimin e këtyre pasojave dhe analizimin në mënyrë ezauruese nëse shkaqet kanë qenë tërësisht natyrore apo kanë ardhur si pasojë e pakujdesisë apo mospërmbushjes së detyrës nga ana e organeve kompetente shtetërore apo të vetëqeverisjes vendore, merret iniciativa për regjistrimin e këtij procedimi penal. Ndërkohë, hetimi i mëtejshëm do të japë përfundime të drejta mbi ekzistencën ose jo të përgjegjësisë penale“, njoftoi Prokuroria.

Organi i akuzës ka dyshime se situata të jetë shkaktuar për shkak të mosfunksionimit të hidrovorit që ka kushtuar 19 milionë euro. Tenderi për hidrovorin u fitua nga bashkimi i kompanive 2T, Adriatik dhe Vëllezërit Hysa. Kompania Adriatik zotërohet në masën 50% nga Petrit Kovaçi, babai i Spartak Kovaçit, ish-drejtor i Përgjithshëm i Ujësjellës-Kanalizimeve në Durrës.

“Ortaku themelues i shoqërisë është Ardjan Mustafaraj me 100% të kapitalit. Më datë 24.04.1998, u regjistrua në Qendrën Kombëtare të Biznesit dhurimi i 50% të kuotave të kapitalit të zotëruara nga Ardjan Mustafaraj në favor të Z. Petrit Kovaçi.”, thuhet në të dhënat zyrtare në Open Data.

Petrit Kovaçi ka lidhje familjare me Ceno Klosin, ish-drejtor i Përgjithshëm i Tatimeve dhe aktualisht deputet i PS në qarkun Fier. Ndërkohë, Spartak Kovaçi është pjesë e rrethit të personave të afërt me zëvendëskryeministren Belinda Balluku, e cila është marrë e pandehur nga SPAK për shkelje të barazisë në tendera.

Ndërsa kompania 2T zotërohet në masën 20% nga Artan Sako, vëllai i Gramoz Sakos, aktualisht kryetar socialist i Bashkisë së Tepelenës dhe më herët drejtues i Gardës së Republikës.

Më herët ditën e sotme, edhe anëtarja e Këshillit Kombëtar të PD-së, Ilirjana Kuçana kallëzoi në SPAK Bashkinë e Durrësit, ministrinë e Bujqësisë dhe Drejtorinë e Kullimit për “shpërdorim detyre”, pas përmbytjeve. Ajo u shpreh se kryebashkiakja Emirjana Sako, pas investimit rreth 19 mln euro për hidrovorin, deklaronte se Durrësi nuk do të ketë më probleme me përmbytjet.

The post “Spartak Kovaçin ka për ta dënuar Zoti”, Qytetarja e revoltuar me përmbytjet në Durrës, akuzon kryebashkiaken dhe biznesmenin për vjedhjen e fondeve appeared first on Albeu.com.

Prefekti i Tiranës, Afrim Qendro, ka deklaruar se zjarri në zonën e ish-Uzinës Dinamo, te tregu i 5 Majit, është masiv dhe po përfshin një magazinë të madhe ku operojnë disa biznese.

Në vendngjarje janë angazhuar 11 mjete zjarrfikëse, rreth 60 efektivë, si dhe i gjithë efektivi i zjarrfikësve të Tiranës dhe Kamzës. Po ashtu, po vijnë forca dhe mjete ndihmëse nga Elbasani, Vora dhe ushtria, ndërsa botet e ujit të Bashkisë po sigurojnë furnizimin me ujë.

Sipas tij, në magazina ndodhen rroba dhe materiale të tjera jo të rrezikshme, nuk ka persona të lënduar dhe policia ka vendosur perimetrin e sigurisë.

“Zjarri po vazhdon, është masiv dhe kërkon kohën e vet për t’u neutralizuar,” u shpreh ai, duke shtuar se shkaqet do të përcaktohen nga ekspertët.

Prefekti tha: Kemi një zjarr masiv te ish-uzina dinamo. Në një magazinë goxha të madhe, po punojnë 11 makina zjarrfikës, 60 forca policie. Komplet efektivi i zjarrfikësve të Tiranës dhe Kamzës janë prezent. Botet e ujit të bashkisë janë duke ardhur për të furnizuar me ujë. Po mundohemi ta ndërpresim të mos vazhdojë në pjesën fundore të magazinës. Dhe të ruhet dhe objekti. Është një magazinë e madhe që funksionojnë disa biznese. Deri për momentin janë rroba dhe materiale të tjera jo materiale të rrezikshme. Po punojnë me kapacitet maksimal po vijnë dhe nga Elbasani, Vora dhe zjarrfikëset e ushtrisë. Do an ndihmojnë me furnizim me ujë.
Nuk flas për dyshime janë ekspertët që do japin vlerësimin ligjor. Nuk ka persona të dëmtuar. Forcat e rendit kanë siguruar një perimetër. Zjarr po vazhdon, po punohet për ta ndërprerë. Është zjarr masiv dhe kërkon kohën e vet.

The post Zjarri te tregu i “5 Majit”, flet prefekti i Tiranës: Flakët janë masive! Magazinat nuk kanë materiale të rrezikshme, gjithë kapaciteti i angazhuar appeared first on Albeu.com.

Vijon të jetë aktiv zjarri që ka përfshirë disa magazina në tregun e rrobave të përdorura në rrugën “5 Maji” në Tiranë.

Prefekti i qarkut të Tiranës, Afrim Qendro deklaroi: Kemi një zjarr masiv në një magazinë goxha të madhe. Është një zjarr masiv dhe magazinë shumë e madhe e do kontrollin. Po punojnë gati 11 makina zjarrfikëse dhe 60 forca zjarrfikëse.

The post Flakët përfshijnë magazinën tek tregu i rrobave të përdorura në Tiranë/ Kërkohet e ndihma e ushtrisë dhe zjarrfikësve të Elbasanit dhe Vorës appeared first on Albeu.com.

Vijon të jetë aktiv zjarri që ka përfshirë disa magazina në tregun e rrobave të përdorura në rrugën “5 Maji” në Tiranë, duke shkaktuar panik te banorët dhe bizneset e zonës.

Sipas raportimit të gazetares Xhensila Kodra, flakët janë të përmasave të mëdha dhe po rrezikojnë seriozisht edhe disa biznese që ndodhen pranë tregut. Pavarësisht ndërhyrjes së forcave zjarrfikëse, situata mbetet e vështirë për t’u vënë nën kontroll.

“Në vendngjarje ndodhen gjashtë mjete zjarrfikëse dhe rreth 30 efektivë të shërbimit zjarrfikës, por flakët ende nuk janë neutralizuar,” raportoi gazetarja.

Për shkak të rrezikut nga përhapja e zjarrit dhe tymit të dendur, banorët e pallateve përreth janë evakuuar nga banesat e tyre si masë sigurie. Ndërkohë, policia ka vendosur shiritin e perimetrit të sigurisë dhe po mban larg qytetarët, teksa në zonë janë grumbulluar shumë banorë të shqetësuar.

Autoritetet po punojnë për izolimin e flakëve dhe parandalimin e përhapjes së mëtejshme të zjarrit, ndërsa ende nuk dihen shkaqet e rënies së tij dhe nëse ka persona të lënduar.

The post Bie zjarr në tregun e rrobave të përdorura në rrugën “5 maji” në Tiranë/ Evakuohen banorët e pallateve përreth, pronarët e bizneseve në panik appeared first on Albeu.com.

Moti i keq ka lënë pasoja të rënda edhe në qarkun e Gjirokastrës, jo vetëm me përmbytje masive, por edhe me dëmtime të infrastrukturës rrugore.

Si pasojë e çarjes së karrexhatës, për shkak të reshjeve të dendura të shiut, aksi rrugor Përmet–Çarçovë, në afërsi të vendit të quajtur “Ura e Petranit”, është i bllokuar për qarkullim.

Në terren ndodhen strukturat e Drejtorisë Vendore të Policisë Gjirokastër, në bashkëpunim me strukturat e emergjencave civile dhe Autoritetin Rrugor Shqiptar (ARRSH), të cilat po punojnë intensivisht për rritjen e sigurisë, menaxhimin e situatës dhe ndërhyrjen për normalizimin e këtij segmenti rrugor.

Gjithashtu, është rritur prezenca e shërbimeve të Policisë së Shtetit në të gjitha akset e qarkut, me qëllim parandalimin e aksidenteve rrugore dhe ofrimin e ndihmës për përdoruesit e rrugës, në rast nevoje.

The post Moti i keq/ Çahet rruga te “Ura e Petranit”, bllokohet qarkullimi në aksin Përmet-Çarçovë appeared first on Albeu.com.

Përleshjet e dhunshme në Iran kanë vazhduar për të 12-tën ditë, me forcat e sigurisë që përdorin gaz lotsjellës dhe zjarr për të shpërndarë protestuesit, ndërsa figurat e opozitës në mërgim po bëjnë thirrje për demonstrata dhe greva të reja.

Qeveria e Ajatollahut Ali Khamenei, e cila tashmë përballet me një krizë ekonomike, po përpiqet të shtypë demonstratat që janë përhapur në të gjithë vendin. Duke reaguar ndaj demonstratave të vazhdueshme që filluan më 28 dhjetor me mbylljen e pazarit të Teheranit, autoritetet iraniane kanë intensifikuar represionin e tyre, duke përdorur gaz lotsjellës dhe zjarr për të shpërndarë protestuesit.

Sipas organizatave të të drejtave të njeriut, demonstratat janë rezultat i një ekonomie të rrënuar, pasi vlera e valutës iraniane, rialit, ka rënë në nivelet më të ulëta historike. Qindra protestues dolën në rrugët e Teheranit, ndërsa në qytetin e Mashhadit, i dyti më i populluar në Iran, një protestues përplasi makinën e tij mbi anëtarët e forcave të sigurisë, duke shkaktuar trazira.

Ndërkohë, regjimi në Iran thuhet se ka fikur internetin, sipas të dhënave në platformën Netblocks. Diçka e ngjashme ndodhi në vitin 2022, në kulmin e protestave pas vrasjes së Mahsa Aminit.

Lëvizja, e cila filloi në përgjigje të bllokimit ekonomik dhe rënies së monedhës, është përhapur në të gjithë vendin, me demonstrata të mëdha që zhvillohen çdo ditë. Qeveria iraniane, e cila po përpiqet të përballojë presionin nga vitet e sanksioneve dhe trazirat e luftës me Izraelin dhe SHBA-në në qershor, i ka akuzuar protestuesit si “terroristë”, me kreun e gjyqësorit që tha se “nuk do të ketë tolerancë” për të arrestuarit.

Në një zhvillim veçanërisht të dhunshëm, një polic iranian u godit me thikë për vdekje në perëndim të Teheranit të mërkurën, ndërsa përpiqej të shuante trazirat, sipas agjencisë së lajmeve Fars.

Reza Pahlavi, djali i Shahut të rrëzuar në Revolucionin Iranian të vitit 1979 dhe një figurë kryesore në opozitën në mërgim, tha se pjesëmarrja në demonstratat e së mërkurës ishte “e pashembullt” në këtë fazë të re të protestave. Ai bëri thirrje për demonstrata të reja të enjten në mbrëmje dhe pretendoi në një mesazh në mediat sociale se regjimi ishte “thellësisht i tmerruar” dhe po përpiqej të ndërpriste përsëri internetin për të parandaluar protestat.

Partitë opozitare kurde me bazë në Irak, përfshirë partinë Komala, e cila është e paligjshme në Iran, kanë bërë thirrje për një grevë të përgjithshme më 8 janar në zonat e populluara me kurdë në Iranin perëndimor, ku protestat kanë qenë veçanërisht intensive.

Të paktën 45 protestues, përfshirë tetë të mitur, janë vrarë që nga fillimi i protestave në Iran në fund të dhjetorit, sipas një raporti të ri të publikuar sot nga organizata joqeveritare Iran Human Rights (IHR) me bazë në Norvegji.

“Shtypja po zgjerohet dhe po bëhet më e dhunshme çdo ditë”, tha Mahmoud Amiri-Moghaddam, drejtori i OJQ-së, duke shtuar se “qindra” njerëz janë plagosur dhe më shumë se 2,000 janë arrestuar.

Dje ishte dita më vdekjeprurëse e protestës 12-ditore, me 13 protestues të vrarë. Mediat dhe autoritetet iraniane thonë se të paktën 21 persona janë vrarë që nga fillimi i protestave, përfshirë anëtarë të forcave të sigurisë, sipas një llogaritjeje nga AFP.

The post Vijojnë për të 12-ën ditë protestat në Iran, shkon në 45 numri i viktimave, qeveria iraniane ndërpret internetin appeared first on Albeu.com.

Drejtori i Policisë Rrugore, Perlat Vatoci ka inspektuar shërbimet e planizuara në Rrugën e Arbërit, për të parë nga afër situatën me qarkullimin e mjeteve dhe për të komunikuar me punonjësit që janë të angazhuar në këtë aks rrugor.

Nëpërmjet tyre, gjatë pasdites së sotme ai u ka përcjellë një mesazh të gjithë drejtuesve të automjeteve që qarkullojnë në zona malore ku ka prezencë të reshjeve të dëborës:

“Të gjithë drejtuesit e automjeteve të përdorin mjetet antirrëshqitëse (zinxhirë) dhe goma dimërore, pasi Policia Rrugore ka marrë detyrë dhe urdhër të prerë që të ndëshkojë çdo drejtues automjeti që nuk zbaton me rigorozitet rregullat e qarkullimit në raste të tilla.

Drejtori i Policisë Rrugore, Perlat Vatoci ka apeluar për zbatimin me rigorozitet të rregullave të qarkullimit dhe që, për çdo rast nevoje, të telefonojnë në 112 dhe të kontaktojnë me shërbimet e Policisë në terren.

Ndërkohë, po bashkëpunohet me firmat kontraktore për mirëmbajtjen e akseve rrugore, me qëllim pastrimin në kohë dhe hedhjen e kripës.

Si pasojë e motit të keq, shërbimet e Policisë Rrugore janë 100% në detyrë, krahas shërbimeve të tjera të Patrullave të Përgjithshme, Forcës së Posaçme “Shqiponja” dhe Forcës Kombëtare të Sigurisë.

Ato vijojnë punën për t’iu shkuar në ndihmë qytetarëve në zona që kanë problematika për shkak të motit të keq me reshje shiu dhe dëbore, si dhe për të menaxhuar trafikun rrugor, me qëllim parandalimin e aksidenteve rrugore.

The post Policia Rrugore apel për drejtuesit e automjeteve: Përdorni goma dimërore dhe pajisje antirrëshqitëse appeared first on Albeu.com.

E Ngarkuara me Punë e SHBA, Nancy VanHorn u takua me kreun e SPAK, Klodjan Braho në ambjentet e Prokurorisë së Posaçme.

VanHorn përcolli edhe një herë në SPAK mesazhet e sekretarit të shtetit Marko Rubio, se prioriteti amerikane mbetet lufta ndaj karteleve të drogës dhe krimit të organizuar.

Van Horn shprehu mbështetje në punën e ardhshme të SPAK por edhe për BKH-në dhe kreun e ri të tij Joni Ketën.

E Ngarkuar e SHBA pati gjithashtu takim me ish-kryeprokurorin Altin Dumani dhe me prokurorë të tjerë.

Postimi i ambasadës amerikane në Tiranë:

E Ngarkuara me Punë Nancy VanHorn përgëzoi Kryeprokurorin e Posaçëm të SPAK Klodjan Braho, dhe Kreun e BKH Joni Keta për rolet e tyre të reja drejtuese, duke ritheksuar mbështetjen e Shteteve të Bashkuara për përpjekjet e SPAK në luftën kundër krimit të organizuar dhe trafikut të narkotikëve. Siç ka deklaruar Sekretari Rubio: “Ne do të përballemi me kartelet e drogës kudo që ndodhen dhe kudo që veprojnë kundër interesave të Shteteve të Bashkuara. Detyrimi kryesor i presidentit është të sigurojë interesin kombëtar dhe sigurinë kombëtare të popullit tonë.” Së bashku, ne qëndrojmë të bashkuar në luftën kundër krimit ndërkombëtar.

The post E Ngarkuara me Punë e SHBA takohet me kryeprokurorin e SPAK, VanHorn riktheson mbështetjen amerikane për Klodjan Brahon dhe BKH-në: Do përballemi me kartelet e drogës appeared first on Albeu.com.

Është tensionuar situata në Durrës, teksa një grup protestuesish, mes tyre dhe deputetët e PD Oerd Bylykbashi dhe Arjan Ndoja, kanë tentuar të futen me forcë në Bashkinë e qytetit.

Protesta nisi pasditen e sotme, nën thirrjet “Durrësi, skenë e krimit”, “shpallni gjendjen e emergjencës”, në lidhje me situatën e shkaktuar nga përmbytjet. Siç raporton korrespondentja e Top Channel Vali Qyrfyçi ata e kanë nisur protestën e tyre nga rrethrrotullimi pranë burgut për të vijuar marshimin drejt bashkisë së Durrësit.

Sipas protestuesve, përmbytjet janë pasojë e keqmenaxhimit dhe abuzimeve me fondet dhe jo fatkeqësi natyrore.

The post Agravon situata në Durrës, protestuesit dhe dy deputetët e PD tentojnë të futen me forcë në Bashki appeared first on Albeu.com.

Banorët e qytetit të Durrësit janë ngritur këtë të mërkurë në protestë. Protesta e tyre vjen, pas përmbytjeve të shumta, të cilat kanë përjetuar ditët e fundit. Si pasojë e kësaj situate, shumë banesa dhe rrugë kryesore janë përmbytur dhe bllokuar.

Sipas të dhënave parapake, reth 800 banesa janë me prezencë uji. Banorët kanë bërë thirrje që të dëmshpërblehen, pasi dëmet e shkaktuara nga si pasojë e kësaj situate janë të konsiderueshme.

The post Përmbytjet u shkatëruan banesat, banorët e Durrësit ngrihen në protestë appeared first on Albeu.com.

Ushtria publikoi më shumë se shtatë harta të zonave që tha se do të ishin në shënjestër të sulmeve, duke u bërë thirrje banorëvkrudete të largohen menjëherë për sigurinë e tyre. Komanda e tij operacionale njoftoi një shtetrrethim në rrethet Sheikh Maksoud dhe Ashrafieh nga ora 3 pasdite.

Luftimet, të cilat shpërthyen të martën, detyruan mijëra civilë të largoheshin nga shtëpitë e tyre, ndërsa pati vdekje dhe disa të plagosur, sipas mediave shtetërore. SDF tha se luftëtarët e saj u angazhuan në luftime të ashpra me fraksionet dhe ndihmësit e lidhur me Damaskun pranë lagjes siriane të Aleppos, duke shtuar se ata shkaktuan viktima të mëdha.

Mediat e huaja shkruajnë se dhuna dhe pretendimet konkurruese nënvizojnë një konfrontim të thellë dhe në rritje vdekjeprurës midis Damaskut dhe autoriteteve kurde që rezistuan integrimin e tyre në qeverinë qendrore. Kryeministri i Qeverisë Rajonale të Kurdistanit, Masrour Barzani tha se ishte thellësisht i shqetësuar nga sulmet në lagjet kurde në Aleppo, duke paralajmëruar se shënjestrimi i civilëve dhe përpjekjet për të ndryshuar përbërjen demografike të rajonit përbënin spastrim etnik.

Barzani u bëri thirrje të gjitha palëve të tregojnë përmbajtje, të mbrojnë civilët dhe të kërkojnë dialog. SDF ka akuzuar fraksionet e lidhura me Damaskun për kërcënim me sulme në zonat civile, duke thënë se paralajmërimet publike për bombardime mund të përbëjnë zhvendosje të detyruar dhe krime lufte sipas ligjit ndërkombëtar humanitar

Banorë të tjerë u panë gjithashtu duke u larguar nga Sheikh Maksood dhe Ashrafieh përmes korridoreve të caktuara të sigurta. SDF është një koalicion i mbështetur nga SHBA që kontrollon pjesën më të madhe të Sirisë verilindore dhe ka qenë partneri kryesor lokal i Uashingtonit në luftën kundër Shtetit Islamik.

Autoritetet e udhëhequra nga kurdët krijuan një qeveri gjysmë autonome në këto zona dhe pjesë të Alepos gjatë luftës 14-vjeçare të Sirisë dhe i rezistuan integrimit të tyre të plotë në qeverinë e udhëhequr nga islamistët që erdhi në pushtet pas rënies së ish-presidentit Bashar al-Assad në fund të vitit 2014.

Damasku arriti një marrëveshje me SDG-të vitin e kaluar që parashikonte integrim të plotë deri në fund të vitit 2025, por progresi ka qenë i kufizuar, me të dyja palët që fajësojnë njëra-tjetrën. SHBA po përpiqet të ndërmjetësojë duke organizuar takime edhe të dielën e kaluar, megjithëse këto bisedime përfunduan pa rezultate të prekshme.

Diplomatët paralajmërojnë se mosintegrimi i SDF-së në ushtrinë siriane mund të çojë në më shumë dhunë dhe mund të sjellë Turqinë, e cila ka kërcënuar me veprime ushtarake kundër luftëtarëve kurdë që i konsideron terroristë. Turqia tha të martën se ishte e gatshme të ndihmonte Sirinë nëse pyetej pasi ushtria siriane nisi atë që e quajti një operacion të pavarur “kundër terrorizmit” në Aleppo.

The post Siria nis luftime të ashpra me kurdët në Aleppo, ushtria urdhëron evakuimin e banorëve appeared first on Albeu.com.

Rreshjet e borës kanë bërë të mundur, që qarkullimi i automjeteve në Qafën e Llogarasë të bllokohet. Në kuadër të kësaj, policia ka ndërprerë lëvizjen e aiutomjeteve, për shkak të rrezikshmërisë së lartë. Lëvizja në afërsi të Llogarasë kryhet vetëm përmes tunelit, për automjetet që udhëtojnë në drejtim të Himarës dhe anasjelltas.

Autoritetet u bëjnë thirrje drejtuesve të automjeteve të shmangin lëvizjen drejt kësaj zone dhe të ndjekim me vigjilëncë përditësimëet e fundit të motit. Shërbimet përkatëse po punojnë për pastrimin e rrugës dhe monitorimin e situatës, në mënyrë që të shmangin aksidentet e mundshme.

The post Llogaraja zbardhet nga rreshjet e dëborës / Bllokohet qarkullimi në Qafën e Llogarasë, kalimi kryhet përmes tunelit appeared first on Albeu.com.

Ushtruesi i detyrës së ministrit të Infrastrukturës, Hysen Durmishi, tha se pas reshjeve të borës, të gjitha rrugët në Kosovë janë të kalueshme, por bëri thirrje për kujdes të shtuar gjatë qarkullimit.

“Gjatë gjithë natës kemi intervenuar në shumicën e rrugëve që janë në kompetencë të ministrisë. Edhe sot në mëngjes kemi vazhduar punën në pastrimin e rrugëve dhe hedhjen e kripës”, shkroi ai në Facebook.

Që nga mbrëmja e së mërkurës, në Kosovë ka nisur rënia e temperaturave dhe reshjeve të borës, teksa paraprakisht vendi u përballë me vërshime shkatërruese.

Instituti Hidrometeorologjik i Kosovës mbrëmjen e së mërkurës paralajmëroi për ngrica dhe, së bashku edhe me institucione të tjera, përfshirë Policinë e Kosovës, ai i bëri thirrje qytetarëve për kujdes gjatë qarkullimit në trafik, informon radio Evropa e Lirë.

Ndërkaq, në një njoftim të ndarë Agjencia e Menaxhimit Emergjent (AME) tha se situata me vështrime në Kosovë ka shënuar përmirësim të dukshëm pas ndërprerjes së reshjeve të shiut. Por, sipas agjencisë, reshjet e borës dhe ngricat kanë shkaktuar vështirësi në qarkullimin rrugor në disa zona.

“Disa rrugë mbeten të bllokuara për shkak të shembjeve të dheut. Apelojmë te qytetarët për kujdes të shtuar në situatë”, tha AME-ja përmes një njoftimi më 8 janar.

Sa i përket vërshimeve, AME-ja tha se niveli i ujit në lumenjtë kryesorë në Kosovë ka nisur të bjerë “dhe rrezik i menjëhershëm për vërshime të reja”.

Makina duke lëvizur në rrugë gjatë reshjeve të dendura të borës në Prizren, Kosovë, 25 dhjetor 2024.

AME-ja tha se ka pasur disa intervenime në disa komuna, por situata mbetet e menaxhueshme. Në Mitrovicë të Jugut dhe në Istog janë evakuuar përkohësisht disa familje si masë sigurie.

Për shkak të vërshimeve, në disa zona të Kosovës pati probleme me ujë dhe rrymë, dhe autoritetet u detyruan që të shtynin rinisjen e mësimit pas pushimit dimëror deri më 12 janar.

The post Moti i keq ka goditur edhe Kosovën, Ministria e Infrastrukturës thotë se të gjitha rrugët janë të kalueshme, por apelon për kujdes appeared first on Albeu.com.