Mohamed Salah është shfaqur si objektivi kryesor i transferimeve për një klub të Liga Saudite, pas largimit të Karim Benzemas nga Al Ittihadi.

Kjo është hera e parë që një klub i Liga Saudite shfaq interes konkret për yllin egjiptian. Pa asnjë dyshim, Cristiano Ronaldo mbetet fytyra kryesore e kampionatit saudit, por drejtuesit e ligës kanë dashur prej kohësh ta sjellin Mohamed Salah dhe ta bëjnë atë figurën qendrore të projektit të tyre.

Sipas “winwin”, një klub i mbështetur nga PIF po përgatit një ofensivë të re për sulmuesin e Liverpoolit, me synimin për të zëvendësuar një ish-fitues të Topit të Artë.

Sezonin e kaluar, Salah ishte ndoshta në formën e tij më të mirë dhe ndihmoi Liverpoolin të fitonte titullin në Ligë Premier, në sezonin e parë të Arne Slot në krye të skuadrës në "Anfield". Megjithatë, raportimet për një përplasje me Slot dhe drejtuesit e klubit më herët gjatë sezonit kanë ngritur pikëpyetje të reja mbi të ardhmen e tij afatgjatë.

Pikërisht këtë situatë dëshiron ta shfrytëzojë Al Ittihad, duke planifikuar një lëvizje për Mohamed Salah në verën e ardhshme, pas largimit të Karim Benzema gjatë afatit dimëror. Ikja e francezit ka lënë një boshllëk të madh në strukturën sulmuese të klubit arab dhe Salah shihet si nënshkrimi ideal për ta mbushur atë hapësirë.

Deri më tani nuk ka pasur kontakte zyrtare mes klubeve, por besohet se Salah do të ishte i hapur për një transferim nëse Al Ittihad arrin marrëveshje me Liverpoolin.

Sulmuesi i Al Nassr Cristiano Ronaldo nuk do të paraqitet as në përballjen ndaj Al Ittihad të premten si shenjë proteste.

Ronaldo është “rebeluar” me drejtuesit shkaku që kanë vendosur të përforcojnë skuadrat rivale si Al Hilal, megjithatë refuzuan të investonin te Al Nassr në afatin kalimtar dimëror.

Kalimi i Karim Benzema te Al Nassr ishte “kulmi”, kësisoj Ronaldo vendosi të mos paraqitet fare në fitoren e fundit ndaj Al Riyadh, ku dallimin e bëri goli i Sadio Mane.

Al Nassr duhet t’ia dalë pa Ronaldon edhe në ndeshjen e radhës ndaj Al Ittihad, me gazetarin Fabrizio Romano që ka konfirmuar se portugezi nuk do të paraqitet.

“Cristiano Ronaldo do të mungojë për Al Nassr në ndeshjen e radhës ndaj Al Ittihad të premten”.

“Siç u zbulua të hënën, nuk ka probleme me stafin ose menaxhmentin, nuk është i lënduar ose ndonjë problem fizik. Ai mbetet i zemëruar me drejtuesit e Ligës Profesionale se si po i menaxhojnë disa klube”, shkruan ai ndër të tjera.

Mbetet të shihet edhe për sa ndeshje tjera Ronaldo nuk do të paraqitet, derisa sot e feston ditëlindjen e 41-të. Në media gjithashtu u raportua se ekziston mundësia që të pensionohet pas Kupës së Botës 2022, ose të rikthehet në Evropë.

Leicester City është ndëshkuar me zbritje prej gjashtë pikësh pasi është shpallur fajtor për shkelje të rregullave financiare të Ligës Premier.

Klubi, që aktualisht garon në Championship, do të rrëshqasë ndjeshëm në renditje dhe pas këtij vendimi, të dhënë të enjten nga një komision i pavarur, do të mbetet jashtë zonës së rënies vetëm falë golavarazhit.

Ndëshkimi e lë Leicesterin në vendin e 20-të, me pikë të barabarta me West Bromwich Albion dhe Blackburn Rovers – tri klube ish-pjesëmarrëse në Ligën Premier dhe dy herë fituese të titullit kampion.

Zbritja prej gjashtë pikësh vjen pas një beteje të gjatë ligjore, me seancën dëgjimore që u mbajt në muajin nëntor para një paneli të posaçëm. Klubi është shpallur fajtor për shkelje të Rregullave të Fitimit dhe Qëndrueshmërisë (PSR) për sezonin 2023/24, kur Leicester ishte ende pjesë e kategorisë së dytë.

Liga Premier konfirmoi akuzat në muajin maj, ndërsa Leicester u akuzua gjithashtu se nuk kishte dorëzuar llogaritë vjetore brenda afatit të 31 dhjetorit. Një tjetër akuzë shtesë lidhej me dështimin për të përmbushur “detyrimin për të ofruar ndihmë të plotë, të saktë dhe të menjëhershme ndaj Liga Premier”.

Në shtator të vitit 2024, Leicester kishte fituar një apel ndaj një shkeljeje të mëparshme të dyshuar të PSR-së, pasi paneli kishte konstatuar se Liga Premier nuk kishte juridiksion për ta ndëshkuar klubin, për shkak se ai kishte rënë nga elita në momentin kur përfundonte periudha kontabël më 30 qershor 2023.

Sipas të dhënave, Leicester ka regjistruar humbje të kombinuara mbi 200 milionë funte në periudhën trevjeçare që përfundon më 30 qershor 2024. Rregulloret e PSR-së lejojnë një maksimum prej 81 milionë funtesh për atë periudhë, me disa rregullime të mundshme për zbritje.

Si përfundoi Leicester në këtë situatë?

Beteja e Leicesterit për përputhje me rregullat financiare është historia e një klubi që guxoi të ëndërronte, por gjatë rrugës humbi vlerat themelore që e kishin çuar drejt suksesit. Nën drejtimin e Brendan Rodgers, para se gjithçka të shpërbëhej, Leicester ishte një skuadër që trondiste vazhdimisht elitën tradicionale.

Dy sezone radhazi, klubi humbi kualifikimin në Ligën e Kampionëve në ditën e fundit të kampionatit, por në të njëjtën periudhë fitoi FA Cup dhe arriti deri në gjysmëfinale evropiane. Leicester do të argumentojë se është ndëshkuar thjesht për faktin se tregoi ambicie.

Kontrollet strikte financiare i kanë goditur ata, ashtu siç kanë prekur edhe klube të tjera si Aston Villa, Newcastle dhe Crystal Palace. Këto rregulla shpesh konsiderohen të padrejta, pasi favorizojnë “Big Six”-in me të ardhurat e tyre kolosale dhe shtrirjen globale, ndërsa Leicester ka vuajtur pasojat.

Megjithatë, vitet e fundit kanë qenë një betejë e vazhdueshme dhe shumë tifozë e kishin parë këtë rënie të vinte. Gishtat e akuzës janë drejtuar ndaj pronarit Aiyawatt Srivaddhanaprabha dhe drejtorit sportiv Jon Rudkin, për keqmenaxhim të vazhdueshëm.

Sipas konsensusit të përgjithshëm, gjithçka nisi në verën e vitit 2021, kur klubi shpenzoi mbi 50 milionë funte për afrime të reja dhe nuk shiti asnjë yll. Kjo krijoi presionin për të vazhduar përparimin dhe për të mbetur në Evropë, gjë që Leicester nuk e arriti.

Edhe pse arriti në gjysmëfinale të Ligës së Konferencës, rënia kishte nisur tashmë. Rënia nga Liga Premier në vitin 2023 ishte një goditje e rëndë financiare, pasojat e së cilës ndihen ende sot. Në sezonin 2022/23, raporti paga-qarkullim arriti në shifrën alarmante prej 116 për qind.

U morën shumë vendime të gabuara, përtej faktit të mosshitjes së lojtarëve në një sezon të vetëm. Pse lojtarë si Youri Tielemans, Caglar Soyuncu dhe Jonny Evans u lejuan të largoheshin pa pagesë? Pse vlerësimet për lojtarë të caktuar ishin kaq të larta? Pse futbollistë si Vestergaard dhe Danny Ward morën kontrata të reja luksoze? Pse Harry Winks dhe Conor Coady përfituan marrëveshje që arrinin mbi 85 mijë funte në javë në Liga Premier? Leicester duket se nuk nxori asnjë mësim.

Edhe sezonin e kaluar, klubi vazhdonte të paguante kontratat e ish-trajnerëve Steve Cooper dhe Ruud van Nistelrooy, me kosto të përbashkët mbi 7 milionë funte në vit./Telegrafi

FC Ballkani është duke vazhduar me përforcime për pjesën e mbetur të sezonit, ndërsa kanë kompletuar marrëveshjen me bullgarin Stanislav Petkov.

21-vjeçari ka eksperiencë pavarësisht moshës së re, ngase ka luajtur në kampionatin slloven dhe atë bullgar.

Ai luan në pozitën e numrit 6, ndërsa Ballkani beson se do ta përforcojë dukshëm këtë pozitë me agresivitetin e tij.

Postimi i plotë pa ndërhyrje:

“𝐕𝐚𝐳𝐡𝐝𝐨𝐣𝐦𝐞̈ 𝐩𝐞̈𝐫𝐟𝐨𝐫𝐜𝐢𝐦𝐞𝐭 𝐦𝐞 𝐛𝐮𝐥𝐥𝐠𝐚𝐫𝐢𝐧 𝐒𝐭𝐚𝐧𝐢𝐬𝐥𝐚𝐯 𝐏𝐞𝐭𝐤𝐨𝐯!

FC Ballkani vazhdon të përforcohet në afatin kalimtar, tani duke transferuar mesfushorin bullgar Stanislav Petkov. 21 vjeçari, i cili vjen me një përvojë të rëndësishme nga kampionatet si ai bullgar dhe slloven, do të jetë një lojtar i ri i rëndësishëm në ekipin tonë.

Petkov luan si mesfushor defensiv dhe pritet të përforcojë dukshëm këtë repart me agresivitetin dhe aftësitë e tij mbrojtëse. Me një vlerë tregu në rritje dhe eksperiencën e fundit te Tabor Sezana, ai është gati për aventurën e re me ne.

Mirësevjen në Suharekë, Petkov”, thuhet në komunikatë.

Ballkani aktualisht është lider në elitën e futbollit kosovar me 33 pikë pas 18 xhirove, tri mbi Prishtinën./Telegrafi

Lionel Messi po planifikon tashmë një rikthim të mundshëm në Barcelonë në të ardhmen, edhe pse ende nuk është përcaktuar asnjë afat kohor konkret, raporton “Marca”.

Sipas mediumit spanjoll, ylli argjentinas e ka bërë të qartë dëshirën e tij për t’u rikthyer në klubin katalanas në një moment të caktuar, por një kthim i tillë nuk do të lidhet me zgjedhjet e ardhshme presidenciale të Barcelonës, duke hedhur poshtë spekulimet se rikthimi i tij do të përdorej si kartë politike.

Aktualisht, Messi është plotësisht i përqendruar te Inter Miami dhe po përgatitet për atë që pritet të jetë Kupa e fundit e Botës në karrierën e tij, çka ka bërë që çdo hap konkret drejt Barcelonës të shtyhet për më vonë.

Vizita e tij e fundit në “Camp Nou” ka rindezur menjëherë spekulimet mes tifozëve dhe mediave, megjithatë ende nuk ka qartësi se çfarë roli do të kishte Messi në rast të një rikthimi, nëse do të ishte si lojtar, ambasador apo pjesë e strukturave të klubit.

Messi la pas një trashëgimi të pakrahasueshme në Barcelonë, duke realizuar 672 gola dhe dhuruar 303 asistime në 778 paraqitje zyrtare me fanellën blaugrana.

Gjatë asaj periudhe, ai fitoi 35 trofe me klubin, përfshirë 10 tituj në La Liga dhe katër trofe të Ligës së Kampionëve, duke e vulosur përfundimisht statusin e tij si lojtari më i madh në historinë e Barcelonës./Telegrafi

Liverpooli ka konfirmuar transferimin e qendërmbrojtësit Jeremy Jacquet nga Rennes.

Pasi u kompletuan edhe testet mjekësore, Jacquet ka nënshkruar kontratën si lojtar i “Reds”, ndërsa do t’iu bashkohet në fundin e sezonit 2026/27.

Skuadra angleze thuhet se pagoi 60 milionë euro për shërbimet e francezit, i cili u pëlqye nga shumë gjigantë evropianë.

“Liverpooli ka arritur marrëveshje për transferimin e Jeremy Jacquet nga Rennes, me qendërmbrojtësin që do t’i bashokhet para sezonit 2026/27”.

“Reds kanë kompletuar marrëveshjen për 20-vjeçarin, i cili do ta kompletojë sezonin aktual në Ligue ndërsa do të vjen në Anfield gjatë verës në një kontratë afatgjatë”, thuhet ndër të tjera në komunikatë.

Jacquet ndër të tjera ka pesë paraqitje për Francën U21, kurse ka zhvilluar 31 paraqitje për Rennes, skuadër që debutoi në janarin e vitit 2024./Telegrafi

Sipas “Diario AS”, Dean Huijsen po kalon një periudhë të vështirë fizike te Real Madridi, duke luajtur nën dhimbje për shkak të një problemi në pulpë.

Qendërmbrojtësi spanjoll ka vazhduar të aktivizohet me fanellën e Madridit pavarësisht këtij shqetësimi, i cili i shkakton dhimbje të vazhdueshme.

Kjo situatë ka ndikuar edhe në paraqitjet e tij, teksa besohet se Huijsen nuk ka arritur ende të tregojë potencialin e plotë pas transferimit prej 58 milionë eurosh nga Bournemouth gjatë verës.

Durimi në “Santiago Bernabeu” duket se po shteron. Në ndeshjen e fundit kundër Rayo Vallecanos, të fituar 2-1 nga Real Madridi, Huijsen u vërshëllye nga një pjesë e tifozëve, sinjal i qartë i pakënaqësisë me performancat e tij.

Nëse forma e tij nuk përmirësohet, qendërmbrojtësi rrezikon seriozisht vendin në formacion. Antonio Rudiger, i cili po rikuperohet nga lëndimi, pritet të rikthehet së shpejti, ndërsa edhe David Alaba mbetet një alternativë reale për trajnerin, duke e vënë Huijsen nën presion të madh për të reaguar./Telegrafi

Mallorca është duke triumfuar bindshëm ndaj Sevillas me rezultat 3-1, ku protagonist në dy gola ka qenë Vedat Muriqi.

Ylli nga Prizreni fillimisht shënoi nga penalltia për ta zhbllokuar epërsinë, ndërsa ishte kryesori edhe te goli i tretë.

Pasi mori një pasim nga Samu Costa, Muriqi goditi fuqishëm brenda zonës, por kjo goditje përfundoi në trupin e Darder dhe pastaj përfundoi brenda rrjetës.

Darder menjëherë iu kthye lojtarit duke i kërkuar falje për “golin e vjedhur”, ndërsa lojtari i Kosovës filloi ta qeshte dhe e goditi me “shuplakë” në formë shakaje.

Për më shumë shikoni momentin:

Ndërkohë, Muriqi është golashënuesi i dytë më i mirë në La Liga me 15 gola, pas vetëm Kylian Mbappes./Telegrafi

Sheffield United e ka arritur marrëveshjen për ta huazuar mesfushorin e Manchester Cityt, Kalvin Phillips.

Klubi që garon në Championship ka kompletuar afrimin për lojtarin, të cilin Manchester City kishte paguar rreth 50 milionë euro katër vite më parë, por që nuk ka arritur të gjejë hapësira të qëndrueshme nën drejtimin e Pep Guardiolës.

Marrëveshja është huazim i pastër, pa detyrim apo opsion blerjeje në fund të sezonit. Manchester City pritet të mbulojë pjesën më të madhe të pagës së Phillips, e cila raportohet të jetë rreth 150 mijë funte në javë (afërsisht 173 mijë euro).

Drejtuesit e Cityt e shohin këtë lëvizje si një mundësi për t’i dhënë vazhdimësi një lojtari që ka mbetur në hije. Edhe pse marrëveshja finalizuar, Sheffield United nuk ka qenë klubi i vetëm i interesuar, pasi disa skuadra evropiane kanë shfaqur gjithashtu interes.

Një karrierë te City e shoqëruar me vështirësi

Kalvin Phillips iu bashkua Manchester Cityt nga Leeds United në vitin 2022, në një transferim prej 50 milionë eurosh, duke firmosur një kontratë gjashtëvjeçare. Megjithatë, ai nuk arriti asnjëherë të konsolidohej si titullar në “Etihad”, ndërsa situata u vështirësua edhe më shumë për shkak të problemeve me gjendjen fizike.

Pas Kupës së Botës 2022, Pep Guardiola deklaroi publikisht se Phillips ishte rikthyer “mbipeshë”, një koment që mesfushori anglez e pranoi më vonë se kishte qenë një goditje e madhe për vetëbesimin e tij.

“Ka qenë një goditje shumë e madhe për besimin tim”.

Më vonë, Guardiola kërkoi falje për deklaratën. Në shkurt të vitit 2024, ai u shpreh: “Më vjen keq për të. I kërkoj sinqerisht falje. Kam folur me të për këtë çështje. Unë kurrë, absolutisht kurrë, nuk flas me mediat pa folur më parë me lojtarin”.

Huazimet te West Ham dhe Ipswich

Phillips, i cili ka 31 paraqitje me përfaqësuesen e Anglisë, ka zhvilluar vetëm një ndeshje këtë sezon me Manchester Cityn: shtatë minuta lojë në raundin e tretë të Kupës së Ligës ndaj Huddersfield. Në janar të vitit 2024 ai u huazua te West Ham, ku regjistroi tetë paraqitje në Ligën Premier.

Në verën pasuese u huazua sërish, këtë herë te Ipswich, ku luajti 22 ndeshje në të gjitha kompeticionet dhe shënoi një gol. Në total, Phillips ka zhvilluar 32 ndeshje me fanellën e Manchester Cityt, duke realizuar një gol.

Sheffield United, nën drejtimin e Chris Wilder, aktualisht renditet në vendin e 17-të në Championship, shtatë pikë mbi zonën e rënies, dhe e sheh Phillips si një përforcim kyç për luftën e mbijetesës./Telegrafi

Ylli i Kosovës Vedat Muriqi ka kaluar Mallorcan në epërsi ndaj Sevillas.

Futbollisti nga Prizreni shënoi nga pika e bardhë për ta zhbllokuar epërsinë.

Jan Virgili shkaktoi një ndërhyrje brenda zonës, kësisoj gjyqtari akordoi 11-metërsh, nga e cila ishte i pagabueshëm Muriqi (27’).

Për ta parë golin: VIDEO

Për Muriqin ky ishte goli i 15-të në La Liga, ku pas tij ka vetëm Kylian Mbappe./Telegrafi

Trajneri i Arsenalit, Mikel Arteta, po bën hapa të mëdhenj në Liga Premier dhe skuadra e tij shihet si një nga favoritët kryesorë për ta fituar titullin këtë sezon.

Megjithatë, Arteta thekson se formimin dhe vizionin e tij futbollistik nuk ia atribuon as Pep Guardiolës dhe as Manchester Cityt, por Barcelonës, klubit që, sipas tij, i “hapi sytë” për jetën dhe futbollin.

“Barcelona m’i hapi sytë ndaj botës dhe njerëzimit. U transferova atje i vetëm, ende fëmijë”.

“La Masia më dha përvojën personale dhe njerëzore më të pasur që kam pasur ndonjëherë në jetën time. E kuptova futbollin në një nivel krejtësisht tjetër”, deklaroi Arteta.

Pas periudhës së tij te Barcelona, Arteta zhvilloi karrierën si lojtar te klube të njohura si PSG, Everton dhe Arsenal, përpara se të tërhiqej nga futbolli aktiv dhe të niste rrugëtimin si trajner.

Kujtojmë, Arteta shpesh është përmendur si kandidat për ta drejtuar Barcelonën, sidomos kur u shkarkua Xavi Hernandez, por ai vendosi t’i qëndronte besnik projektit me Arsenalin./Telegrafi

Qendërmbrojtësi Mirlind Kryeziu i është bashkuar skuadrës zvicerane Winterthur.

Kryeziu deri vonë ishte në negociata me ish klubin Zurich, sidoqoftë marrëveshja dështoi shkaku se disa persona nuk e pranuan rikthimin e yllit të Kosovës.

Kësisoj, Winterthur përfitoi nga situata dhe e kompletoi marrëveshjen me 29-vjeçarin, i cili nënshkroi kontratë deri në fundin e sezonit 2027.

“Winterthur e ka përforcuar skuadrën me transferimin e qendërmbrojtësit Mirlind Kryeziu. Mbrojtësi ka qenë titullar i gjatë te Zurichu dhe nënshkroi kontratë për 1 vit e gjysmë”.

Kryeziu e njeh mjaftë mirë futbollin zviceran, pasi për Zurichun ka zhvilluar plot 128 paraqitje në proces, kurse ka fituar titullin dhe kupën.

Përndryshe, lojtari ka edhe 10 paraqitje në fanellën e Kosovës./Telegrafi

Eintracht Braunschweig e ka përforcuar repartin defensiv me transferimin e qendërmbrojtësit Andi Hoti nga 1. FC Magdeburg.

Lojtari 22-vjeçar ka nënshkruar kontratë me klubin gjerman deri më 30 qershor 2028 dhe do të mbajë fanellën me numrin 4.

Ai për faqen zyrtare të klubit deklaroi se dëshiron të zhvillohet edhe më shumë, si dhe ta ndihmojë me cilësitë e tij në një kampionat mjaftë të fortë.

“Jam shumë i entuziazmuar për sfidën te Eintracht Braunschweig. Bisedimet me drejtuesit e klubit ishin shumë të qarta dhe të bazuara në besim që në fillim, gjë që më dha një ndjenjë shumë të mirë. Eintracht është një klub me shumë traditë dhe ambicie të mëdha, dhe unë dua të jem pjesë e kësaj rruge”.

“Dua të zhvillohem më tej këtu, të bind me paraqitjet e mia dhe ta ndihmoj skuadrën me cilësitë e mia në një Bundesliga 2 shumë të fortë”.

Andi Hoti (i lindur më 2 mars 2003, 1.91 metra i gjatë) ka lindur pranë Cyrihut. Hapat e parë në futboll i hodhi te FC Zurich, përpara se të transferohej te ekipet U17 dhe U19 të Interit. Në korrik të vitit 2022, Hoti u zhvendos për herë të parë në Gjermani, duke iu bashkuar SC Freiburg II në formë huazimi.

Më pas pasoi kalimi i përhershëm te 1. FC Magdeburg, ndërsa gjatë kësaj periudhe ai pati edhe një huazim gjashtëmujor te SG Dynamo Dresden.

Në karrierën e tij, Hoti ka regjistruar 29 paraqitje në Bundesliga 2 dhe 33 ndeshje në divizionin e tretë, ku ka shënuar dy gola dhe ka dhënë një asist. Ai ka zhvilluar gjithashtu një paraqitje me Kombëtaren e Kosovës./Telegrafi

Përfaqësuesi i Nigerisë, Ademola Lookman, është zyrtarizuar si lojtar i ri i Atletico Madridit, pas largimit nga Atalanta.

Dy klubet konfirmuan marrëveshjen përmes deklaratave zyrtare të publikuara të hënën, duke bërë të ditur se transferimi është përfundimtar. Lookman kishte udhëtuar të dielën drejt kryeqytetit spanjoll për t’iu nënshtruar testeve mjekësore, të cilat i kaloi me sukses, përpara se të firmoste kontratën me klubin madrilen.

Atletico Madrid njoftoi se sulmuesi nigerian ka nënshkruar një kontratë afatgjatë deri në qershor të vitit 2030 dhe do të jetë pjesë e projektit të klubit për vitet e ardhshme në La Liga dhe në garat evropiane.

Lookman largohet nga Atalanta pas një periudhe shumë të suksesshme, ku zhvilloi 137 ndeshje dhe shënoi 55 gola në të gjitha kompeticionet.

Kulmi i karrierës së tij me klubin italian ishte finalja e Ligës së Evropës në vitin 2024, ku realizoi një het-trik historik ndaj Bayer Leverkusen të drejtuar nga Xabi Alonso, duke i dhënë fitoren 3-0 Atalantës dhe trofeun e parë evropian në historinë e klubit.

Sulmuesi 27-vjeçar kaloi tre vjet e gjysmë te Atalanta, periudhë gjatë së cilës u shndërrua në një nga lojtarët më vendimtarë të skuadrës dhe një emër të respektuar në Serie A.

“Atalanta, familja Percassi, familja Pagliuca dhe i gjithë klubi i thonë lamtumirë Ademolës, duke e falënderuar për gjithçka dhe duke i uruar shumë suksese në të ardhmen”.

Lookman ishte rikthyer së fundmi te Atalanta pas angazhimeve me përfaqësuesen e Nigerisë në Kupën e Kombeve të Afrikës. Sipas disa burimeve, Atalanta ka përfituar rreth 35 milionë euro nga ky transferim, me mundësi edhe 5 milionë euro shtesë në formë bonusesh, ndërsa lojtari pritet të përfitojë rreth 7 milionë euro në sezon te Atletico Madrid./Telegrafi

Kombëtarja e Kosovës është përforcuar shumë, por Sllovakia ka besim se mund të kualifikohet në Botëror, kështu ka deklaruar ylli i Samsunspor Lubomir Satka.

Kosova do të jetë mysafir i Sllovakisë më 26 mars, sfidë ku sllovakët shihen si favorit.

Për faqen zyrtare të Federatës Sllovake ka folur edhe Satka, i cili lavdëroi Kosovën për përmirësimin në kohën e fundit.

“Mendoj se shëndeti dhe forma e lojtarëve mund të jenë vendimtare. Besoj se trajnerët do të na përgatisin mirë nga pikëpamja taktike. Detajet mund ta vendosin ndeshjen. Kosovarët janë përmirësuar shumë në aspektin e cilësisë, kanë lojtarë shumë të mirë që luajnë në liga të forta”.

“Ata e konfirmuan këtë duke përfunduar të dytët në një grup kualifikues shumë të vështirë. Nuk do të jetë e lehtë, por të gjithë besojmë se do ta menaxhojmë dhe do t’i afrohemi ëndrrës sonë të përbashkët”, deklaroi ai.

Fituesi i përballjes Sllovaki – Kosovë do ta presë fituesin e gjysmëfinales tjetër Turqi – Rumani më 31 mars 2026./Telegrafi

Mesfushori Sandro Tonali iu është ofruar Arsenalit nga agjenti i tij, por sipas gazetarit të “Athletic” David Ornstein, nuk pritet që një marrëveshje të konkretizohet para afatit të transferimeve që mbyllet të hënën.

Përfaqësuesi i mesfushorit italian ka kontaktuar drejtorin sportiv të Arsenalit, Andrea Berta, për një lojtar që “Topçinjtë” e kanë vlerësuar prej kohësh. Berta e ka shqyrtuar mundësinë në kuadër të rolit të tij për monitorimin e objektivave potencialë në treg.

Megjithatë, Neëcastle United nuk ka interes të kryejë ndonjë veprim në këtë fazë të merkatos. Për më tepër, çmimi i kërkuar për Tonalin raportohet se ka qenë shumë mbi kapacitetet financiare të Arsenalit.

Si pasojë, nuk ka pasur bisedime zyrtare mes klubeve dhe Tonali pritet të qëndrojë në “St James’ Park” për pjesën e mbetur të sezonit.

Situata e bën të qartë se, pavarësisht interesimit dhe kontakteve fillestare, një transferim i mesfushorit italian drejt Arsenalit nuk është realist në këtë afat kalimtar.

Ndërkohë, Tonali është parë te skuadra londineze si pasuesi i Mikel Merinos, i cili pritet ta humbasë tërë sezonin si pasojë e lëndimit./Telegrafi

Superkompjuteri ka bërë një tjetër parashikim të çmendur, ku ka zbuluar të gjitha skuadrat që do t’i fitojnë pesë ligat më të mëdha evropiane.

Ajo që ka fituar vëmendjen më të madhe është përqindja e lartë që i ka dhënë Arsenalit dhe Interit për ta fituar titullin, pavarësisht që aktualisht distanca në ligat e tyre nuk është shumë e madhe.

Sipas superkompjuterit, Arsenali ka plot 91 për qind shanse për ta fituar titullin, ndjekur nga Man City me vetëm 8 për qind si dhe Aston Villës i nevojitet një mrekulli me 1 për qind.

Në Serie A, Interi ka 90 për qind shanse për ta fituar titullin, ndjekur nga AC Milani me 5 për qind, derisa Napoli vetëm 3 për qind. Juventusi në fund me 1 për qind.

Sa i përket Spanjës, Barcelona ka plot 61 për qind, derisa Real Madridi që ka vetëm një pikë më pak aktualisht në renditjen tabelore, ka 38 për qind shanse.

Bayern Munichu ndërkohë mund të thuhet se është kampion pasi ka dallim të madh pikësh nga Dortmundi, ku ka 98 për qind.

Edhe në Francë e njëjta situatë, ku PSG-ja vlerësohet me 97 për qind, ndjekur nga Lens me 2 për qind./Telegrafi

Sipas “The Telegraph”, Xabi Alonso pritet të jetë pjesë e një liste me tre emra si kandidat potencial për ta pasuar Pep Guardiolën në krye të Manchester Cityt.

Brenda qarqeve të Ligës Premier po rritet bindja se Guardiola mund të largohet nga “Etihad” në fund të këtij sezoni, çka do të shënonte plot 10 vite në krye të skuadrës kampione të Anglisë.

Mediumi britanik raporton se Manchester City i kanë hedhur poshtë këto raportime, duke i cilësuar ato si “spekulime të pastra”, megjithatë thuhet se në prapaskenë po zhvillohet planifikim alternativ për çdo skenar të mundshëm.

Xabi Alonso, i shkarkuar së fundmi nga Real Madridi, shihet si një nga kandidatët kryesorë për shkak të profilit të tij taktik dhe përvojës në nivelin më të lartë të futbollit evropian. Spanjolli vlerësohet për qasjen moderne dhe aftësinë për të ndërtuar skuadra konkurruese në një kohë të shkurtër.

Në listë pritet të merret në konsideratë edhe Enzo Maresca. Trajneri italian, i cili u largua nga Chelsea muajin e kaluar, ka pranuar se para shkarkimit kishte zhvilluar bisedime si me Manchester Cityn, ashtu edhe me Juventusin, çka e mban emrin e tij në orbitën e klubeve të mëdha.

Një tjetër emër interesant është Cesc Fabregas. Aktualisht trajner i Comos, ish-mesfushori spanjoll do të ishte i gatshëm të largohej vetëm për një nga postet më të mëdha në futbollin anglez ose në Evropë, duke e bërë atë një opsion afatgjatë, por ambicioz.

E ardhmja e Pep Guardiolës mbetet ende e paqartë, por sinjalet nga Anglia sugjerojnë se Manchester City tashmë po mendon seriozisht për epokën pas tij./Telegrafi

Pavarësisht se e nisi vitin 2026 në formë jo të mirë, Al Nassr duket se e ka rikthyer ritmin konkurrues, duke regjistruar katër fitore radhazi.

Objektivi i tyre mbetet rimarrja e kreut të Saudi Pro League dhe sot përballen me Al Riyadh SC, me synimin për një tjetër fitore që do t’i afronte edhe më shumë me këtë qëllim. Megjithatë, trajneri Jorge Jesus përballet me një problem të papritur, pasi Cristiano Ronaldo nuk do të jetë i disponueshëm për këtë ndeshje.

Cristiano Ronaldo ndodhet në formë shumë të mirë, pa pësuar asnjë lëndim në ndeshjen e fundit apo në seancat stërvitore. Sidoqoftë, portugezi ka vendosur vetë të mungojë në takimin e sotëm, pasi është i pakënaqur me mënyrën se si Al Nassr po menaxhohet nga Fondi Saudit i Investimeve Publike (PIF).

Sipas raportimeve të A Bola, portugezi beson se klubi i tij nuk po trajtohet njësoj si rivalët, në veçanti Al Hilal, ndërsa lajmet për ardhjen e mundshme të Karim Benzema kanë qenë “pika e fundit” që ka shtuar pakënaqësinë e tij.

Edhe pse përflitet se një transferim i Benzema te Al Hilal e ka shqetësuar Ronaldon, kjo nuk nënkupton ndonjë problem personal mes dy yjeve. Përkundrazi, frustrimi i portugezit lidhet me mungesën e investimeve te Al Nassr, në krahasim me lirinë financiare që, sipas tij, po shijojnë rivalët në tregun e transferimeve.

Duke e konsideruar këtë si konkurrencë të padrejtë, ikona 38-vjeçare kërkon të ushtrojë presion mbi PIF-in që situata të korrigjohet.

Në mungesë të Ronaldos, Jorge Jesus është i detyruar të bëjë ndryshime të rëndësishme në formacionin startues, duke e zgjedhur Abdulrahman Ghareeb si sulmues qendror.

Pavarësisht këtyre rregullimeve, Al Nassr vazhdon të konsiderohet favorit i qartë përballë Al Riyadh SC, pasi në fazën ofensive mund të llogarisë në João Felix dhe Sadio Mane. Në mbrojtje, prania e Iñigo Martinez dhe Mohamed Simakan pritet t’i japë stabilitet shtesë skuadrës./Telegrafi

Mesfushori N’Golo Kante ka kompletuar marrëveshjen me Fenerbahcen, skuadër të cilës do t’i bashkohet në ditët e ardhshme.

Ylli francez kishte marrëveshje në parim me Fenerin që disa javë, ndërsa klubi turk tashmë e ka mbyllur marrëveshjen edhe me Al Ittihadin.

Feneri do të paguajë 4 milionë euro për Kante, i cili do të nënshkruajë kontratë deri në vitin 2028.

“N’Golo Kante te Fenerbahce, e kryer. Marrëveshja arrihet me Al Ittihadin”.

“Fenerbahce nuk u dorëzua pasi kishte marrëveshje në parim me Kante. Transferim i përhershëm, rreth 4 milionë euro. Kontratë deri në vitin 2028. Testet mjekësore së shpejti për fituesin e Kupës së Botës”, raporton gazetari Florian Plettenberg.

Ndërkohë, thuhet se është arritur edhe një marrëveshje mes dy klubeve se Youssef En Nesyri do t’i bashkohet Al Ittihad, nëse Karim Benzema vendos t’i bashkohet Al Hilalit./Telegrafi